BTV NEWS

គណៈប្រតិភូ អ.ម.ត ជួបជុំដៃគូគ្រឹះស្ថានសិក្សាកំពូលៗ១០ និងនិស្សិតកម្ពុជាជាង១០០នាក់ ក្នុងបេសកកម្មនៅប្រទេសចិន

អគ្គលេខាធិការ អ.ស.ប ប្រគល់មេដាយឆ្នើមដល់កងកម្លាំងរក្សាសន្តិភាពកម្ពុជាចំនួន ៣រូបដែលបានពលីជីវិត

អាជ្ញាធរភ្នំពេញបង្ក្រាបទីតាំងបើកល្បែងស៊ីសងខុសច្បាប់ចំនួន ៦ទីតាំងនៅតំបន់ផ្សារចិន

ឯកឧត្តម ហ៊ុន ម៉ានី អបអរសាទរ និងបង្ហាញមោទនភាពចំពោះអត្តពលិកជនពិការកម្ពុជា

ព័ត៌មានជាតិ

អតីតយុទ្ធជនសោធននិវត្តន៍ នៅស្រុកកំពង់ស្វាយ ខេត្តកំពង់ធំ បានទទួលផ្ទះថ្មី អំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត

កំពង់ធំ៖ នៅរសៀលថ្ងៃទី៦ ខែវិច្ឆិកា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ តំណាងគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ អមដំណើរដោយលោក អ៊ុត វណ្ណរ៉ា អភិបាលស្រុក ប្រធានសមាគមអតីតយុទ្ធជន និងនិវត្តជនកម្ពុជា ស្រុកកំពង់ស្វាយ បានដឹកនាំសហការី រួមជាមួយអាជ្ញាធរដែនដី ភូមិ ឃុំ ទៅប្រគល់ផ្ទះថ្មី ដែលទើបសាងសង់រួចនៅលើដីកម្មសិទ្ធិ របស់គ្រួសារអតីតយុទ្ធជនដែលបានចូលសោធននិវត្តន៍ មានដីតែមានជម្រករស់នៅមិនសមរម្យ នៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។ លោក និល សំណាង មានអាយុ ៥៩ឆ្នាំ មានឋានន្តរសក្ដិ អនុសេនីយ៍ឯក បានរៀបរាប់ថា៖ គាត់ធ្លាប់បានចូលបម្រើក្នុងជួរកងទ័ពនៅឆ្នាំ១៩៨៣ នៅអង្គភាពយោធភាគទី៤ ខេត្តសៀមរាប ហើយត្រូវបានចូលសោធននិវត្តនៅឆ្នាំ២០០៨ ។ គាត់មានភរិយាឈ្មោះ ទឹម ណារី មានកូន និងចៅចំនួន ៥នាក់ នៅក្នុងបន្ទុក ។ លោក អ៊ុត វណ្ណរ៉ា អភិបាលស្រុក ប្រធានសមាគមអតីតយុទ្ធជន និងនិវត្តជនកម្ពុជា ស្រុកកំពង់ស្វាយ ខេត្តកំពង់ធំ បានសូមគោរពថ្លៃអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលបានផ្ដល់ផ្ទះមួយខ្នងថ្មីទៀត សរុបចំនួន ៦៦ផ្ទះរួចមកហើយ ជូនក្រុមគ្រួសារអតីតយុទ្ធជន ដែលកំពុងមានជីវភាពលំបាកខ្វះខាត និងមានជម្រករស់នៅមិនសមរម្យនៅស្រុកកំពង់ស្វាយ នាពេលនេះ និងសូមគោរពជូនពរសម្ដេច ឯកឧត្តម លោកជំទាវ និងថ្នាក់ដឹកនាំគណៈកម្មាធិការសមាគមអតីតយុទ្ធជននិងនិវត្តជនកម្ពុជា នៅគ្រប់ថ្នាក់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ ។ ឧត្តមសេនីយ៍ទោ សោម ស៊ុន បានបញ្ជាក់ថា៖ ផ្ទះថ្មី ដែលទើបសាងសង់រួចនេះ មានទំហំ ៥ម៉ែត្រ គុណនិងង ៧ម៉ែត្រ សាងសង់ពីសសរបេតុង ឆ្អឹងដែក ដំបូលប្រក់ស័ង្កសីកិនភ្លី ជញ្ជាំងស្មាតប៊ត រនាបក្រាលក្តារ ដោយមានតសំយ៉ាបផ្ទះបាយទៅក្រោយប្រវែង ៣ម៉ែត្រ ព្រមទាំងមានបង្គន់អនាម័យសម្រាប់ប្រើប្រាស់ផងដែរ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា ទុកជាចំណងដៃ តកូនតចៅ រស់នៅបានសមរម្យជារៀងរហូត ។ នៅក្នុងឱកាសនេះ ឧត្តមសេនីយ៍ទោ សោម ស៊ុន ក៏បាននាំយកនូវស្បៀងអាហារ គ្រឿងឧបភោគបរិភោគ សម្ភារប្រើប្រាស់ មានមុង ភួយ កន្ទេល ខ្នើយ ចាន ឆ្នាំង ព្រមទាំងសម្ភារប្រើប្រាស់ផ្សេងៗ និងថវិកាមួយចំនួនទៀត ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ ជូនដល់ក្រុមគ្រួសារលោក និល សំណាងសម្រាប់ដោះស្រាយជីវភាពប្រចាំថ្ងៃ និងសម្រាប់ប្រើប្រាស់ក្នុងឱកាសទទួលបានផ្ទះថ្មីនៅពេលនេះផងដែរ ។

ពិធីបុណ្យអុំទូក បណ្តែតប្រទីប អកអំបុក សំពះព្រះខែ នៅខេត្តពោធិ៍សាត់មានពលរដ្ឋទស្សនាយ៉ាងច្រើនកុះករ

ពោធិ៍សាត់៖ ពិធីបុណ្យប្រណាំងទូក អកអំបុក សំពះព្រះខែ និងបណ្តែតប្រទីប តែងត្រូវបានរៀបចំឡើងជារៀងរាល់ឆ្នាំនៅព្រះរាជាណាចក្រកម្ពុជាដោយព្រឹត្តិការណ៍ មានរយះពេល ៣ថ្ងៃ ។ ខេត្តពោធិ៍សាត់ទោះជាឆ្នាំនេះមិនបានរៀបចំព្រឹត្តិការណ៍មានលក្ខណៈទ្រង់ទ្រាយធំដូចបណ្តាឆ្នាំកន្លងក៏ដោយក៏រដ្ឋបាលខេត្ត ស្រុក ក្រុង មន្ទីរ អង្គភាពនិងទីវត្តអារាមបានរៀបចំឱ្យមានពិធីបុណ្យអុំទូក បណ្តែតប្រទីបនិងអកអំបុកសំពះព្រះខែនេះឡើងនៅតាមដងស្ទឹងពោធិ៍សាត់ស្ថិតក្នុងឃុំវាល ស្រុកកណ្តៀងនិងនៅលើបុរីវប្បធម៌កោះសំពៅមាសជាទីប្រជុំជនខេត្តស្ថិតក្នុងសង្កាត់ផ្ទះព្រៃ ក្រុងពោធិ៍សាត់នាថ្ងៃទី៥ខែវិច្ឆិកាឆ្នាំ២០២៥ ក្រោមអធិបតីភាព ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត ឯកឧត្តម ខូយ រីដា អភិបាលនៃគណៈអភិបាលខេត្ត លោកជំទាវ អាំង សុជាតា ខូយ រីដា ប្រធានកិត្តិយស សាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្ត ព្រមទាំងឯកឧត្តម លោកជំទាវ លោក លោកស្រី មន្ត្រីអ្នក អ្នកការ អាជីវករ ទាំងក្នុងខេត្តនិងក្រៅខេត្តមកចូលរួមទស្សនាប្រមាណ៥៦០០០នាក់ ។អត្ថន័យពិធីបុណ្យអំទូក បណ្តែតប្រទីបនិងសំពះព្រះខែ អកអំបុកមានដើមកំណើតតាំងពីរជ្ជកាលព្រះបាទជ័យវរ្ម័នទី៧ បានបង្រួបបង្រួមជាតិ និងចំណាយពេលវេលារៀបចំយុទ្ធសាស្ត្រកងទ័ព ដើម្បីប្រយុទ្ធប្រឆាំងចំពោះសត្រូវ រហូតទទួលបានជ័យជម្នះ ហើយព្រះអង្គបានឡើងគ្រងរាជសម្បត្តិដឹកនាំនិងបានធ្វើឱ្យប្រទេសជាតិមានការរីកចម្រើន រុងរឿងដល់កម្រិតកំពូលថែមទៀត។ ប្រវត្តិសាស្ត្រនេះ ទើបនាំឲ្យប្រជាពលរដ្ឋកម្ពុជា ប្រារព្ធពិធីបុណ្យនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹករបស់ខ្មែរ ដែលបានរំដោះទឹកដី ឲ្យរួចផុតពីការជិះជាន់របស់ខ្មាំងសត្រូវនាសម័យនោះ។ ពិធីនេះបានទទួលការគាំទ្រពីសំណាក់ប្រជាពលរដ្ឋគ្រប់ទិសទី ហើយតែងនាំគ្នាប្រារព្ធជារៀងរាល់ឆ្នាំ ដោយមានការប្រណាំងទូកអុំ និងទូកចែវបុរស-នារី ការបណ្ដែតប្រទីប អកអំបុក និងសំពះព្រះខែ ដែលជាការឆ្លុះបញ្ចាំងពីជំនឿសាសនាយ៉ាងមុតមាំនិងបានប្រារព្ធធ្វើនៅ តាមបណ្ដារាជធានី ខេត្ត ទូទាំងព្រះរាជាណាចក្រកម្ពុជា។ ចំពោះ អត្ថន័យនៃការបណ្តែតប្រទីបនេះ គឺដើម្បី សម្តែងការរឭកដល់គុណនៃព្រះគង្គា និងព្រះធរណីដែលបានផ្ដល់នូវសេចក្ដីសុខសប្បាយ ភោគផលក្នុងការងារកសិកម្ម របរចិញ្ចឹមជីវិតប្រចាំថ្ងៃ របស់ប្រជាកសិករ។ ក្រៅពីបណ្តែតប្រទីប អកអំបុក សំពះព្រះខែ បាញ់កាំជ្រួច បង្ហោះគោមព្រោងព្រាតនិងក៏មានកម្មវិធីសប្បាយជាច្រើនទៀត ដែលមានមនុស្សម្នាចូលរួមទស្សនាយ៉ាងច្រើនកុះករ និងញ៉ាំងឲ្យពិធីនេះកាន់តែអ៊ូអរ និងអធិកអធម ដើម្បីរម្លឹកដល់ព្រះពោធិសត្វ ដែលយោងយកកំណើតជាទន្សាយ ដោយគ្រានោះ ព្រះអង្គបានលះបង់អាយុសង្ខារដល់ព្រះឥន្ទ្រាធិរាជ ដើម្បីបំពេញទានបារមី។បើតាមជំនឿរបស់ដូនតាខ្មែរ ប្រជាពលរដ្ឋយល់ថាព្រះសម្មាសម្ពុទ្ធបរមគ្រូនៃយើង ធ្លាប់កើតជាសត្វទន្សាយ កាលពីព្រះអង្គមិនទាន់ត្រាស់ដឹង គឺជាគ្រាមួយ ព្រះឥន្ទ្រ បានយាងចុះមក ហើយនិមិតខ្លួន ជាតាព្រាហ្មណ៍ម្នាក់នៅចំពោះមុខទន្សាយនោះ ហើយក៏ពោលពាក្យឡើងថា៖ «ជីវិតខ្ញុំនឹងក្ស័យជាមិនខាន បើគ្មានអាហារបរិភោគនាពេលនេះ»។កត្តានេះហើយបានជារាជរដ្ឋាភិបាលកម្ពុជា និយាយរួមដោយឡែករដ្ឋបាលខេត្ត តែងតែរៀបចំប្រារព្ធពិធីនេះជារៀងរាល់ឆ្នាំ នៅតាមវត្តអារាម ភូមិស្រុក និងទីប្រជុំជននានា ដោយមានចេក អំបុក ទឹកដូង ផ្លែឈើ ជាដើម ដើម្បីរម្លឹកដល់ព្រះពោធិសត្វ ៕

ពិធីបណ្តែតប្រទីប រម្លឹកគុណព្រះគង្គា និងព្រះធរណី នៅខេត្តសៀមរាប

សៀមរាប៖ ពិធីបុណ្យអុំទូក បណ្តែតប្រទីប អកអំបុក និងសំពះព្រះខែ គឺជាពិធីបុណ្យប្រពៃណីដ៏សំខាន់របស់ប្រជារាស្ត្រខ្មែរ ដែលបានប្រារព្ធធ្វើឡើងតាំងពីបុរាណកាលមក ហើយឆ្នាំនេះ នៅរាត្រីថ្ងៃពេញបូណ៌មី ខែកត្តិក ត្រូវនឹងថ្ងៃទី៥ ខែវិច្ឆិកា ឆ្នាំ២០២៥ នៅដងស្ទឹងប្រវត្តិសាស្ត្រសៀមរាប ក៏មានការរៀបចំពិធីបណ្តែតប្រទីបយ៉ាងអធិកអធម ដោយមានការចូលរួមពីភ្ញៀវជាតិ និងអន្តរជាតិផងដែរ។‎ពិធីបណ្តែតប្រទីប តាមគម្ពីរទាថាវង្ស ភាសាបាលី បានចែងថា ពិធីបណ្តែតប្រទីបនេះ ធ្វើឡើងដើម្បីបូជាចំពោះព្រះចង្កូមកែវទាំង ៤ របស់ព្រះសម្មាសម្ពុទ្ធ ដែលប្រតិស្ឋាននៅទីកន្លែងផ្សេងៗ និងបូជាចំពោះស្នាមព្រះបាទរបស់ព្រះអង្គនៅទីទាំង ៥ ក្នុងនោះមាននៅស្ទឹងនម្មទាផងដែរ។អត្ថន័យនៃការបណ្តែតប្រទីប ចំពោះប្រជាពលរដ្ឋទូទៅ ការបណ្តែតប្រទីបនេះ គឺដើម្បីរម្លឹកដល់គុណនៃព្រះគង្គា (ទឹក) និងព្រះធរណី (ដី) ដែលបានផ្ដល់នូវសេចក្ដីសុខសប្បាយ និងភោគផលល្អប្រសើរ សម្រាប់ការងារកសិកម្ម និងរបរចិញ្ចឹមជីវិតប្រចាំថ្ងៃរបស់ប្រជាកសិករ។ ពិធីនេះឆ្លុះបញ្ចាំងពីជំនឿសាសនា និងការដឹងគុណយ៉ាងមុតមាំ។ពិធីបុណ្យអុំទូកនៅខេត្តសៀមរាប តែងតែទទួលបានការគាំទ្រពីសំណាក់ប្រជាពលរដ្ឋគ្រប់ទិសទី ហើយក្នុងនោះក៏មានការប្រណាំងអុំទូកផងដែរ។ ជាពិសេសនៅរាត្រីពេញបូណ៌មីខែកត្តិក គេឃើញមានការរៀបចំ ពិធីបណ្តែតប្រទីប ដើម្បីបួងសួងសុំសេចក្តីសុខ និងសេចក្តីចម្រើនដល់ប្រទេសជាតិ និងប្រជាពលរដ្ឋគ្រប់ៗគ្នា៕

សៀវភៅមគ្គុទេសក៍ទេសចរណ៍ដ៏ល្បីរបស់ពិភពលោក Lonely Planet បានចាត់ថ្នាក់ទីក្រុងសៀមរាបជាគោលដៅទេសចរណ៍ដ៏ល្អមួយក្នុងឆ្នាំ២០២៥ នេះ

នាឱកាសដឹកនាំប្រតិភូជាន់ខ្ពស់ក្រសួងទេសចរណ៍ និងក្រុមប្រឹក្សាភិបាលសិក្សាទីផ្សារ និងផ្សព្វផ្សាយកម្ពុជា (CTB) ចូលរួមពិព័រណ៍ទេសចរណ៍អន្តរជាតិ (World Travel Market) នៅទីក្រុងឡុងដ៏ ឯកឧត្តម រដ្ឋមន្រ្តី ហួត ហាក់ រដ្ឋមន្ត្រីក្រសួងទេសចរណ៍ បានទទួលជួបពិភាក្សាការងារជាមួយលោក Tom Hall ជាអនុប្រធានក្រុមហ៊ុន Lonely Planet សៀវភៅមគ្គុទេសក៍ទេសចរណ៍ដ៏ល្បីរបស់ពិភពលោក Lonely Planet និងសហការី ចូលជួបពិភាក្សាការងារ ពីកិច្ចសហប្រតិបត្តិការបន្ថែមទៀមក្នុងការជួយផ្សព្វផ្សាយសក្តានុពលទេសចរណ៍កម្ពុជាដល់ពិភពលោក។ ឆ្លៀតក្នុងឱកាសនោះ ឯកឧត្តមរដ្ឋមន្រ្តីក៏បានថ្លែងអំណរគុណដល់ក្រុមហ៊ុនដែលបានផ្តល់ចំណាត់ថ្នាក់ទីក្រុងសៀមរាបជាគោលដៅទេសចរណ៍ដ៏ល្អមួយដែលត្រូវតែមកទស្សនាក្នុងឆ្នាំ២០២៥ នេះ។ ទន្ទឹមនឹងនោះដែរ ឯកឧត្តមរដ្ឋមន្រ្តី ក៏បានអញ្ជើញលោក Tom Hall និងសហការី មកទស្សនានៅព្រះរាជាណាចក្រកម្ពុជាក្នុងពេលឆាប់ៗ ដើម្បីបានឃើញផ្ទាល់ និងជួយផ្សព្វផ្សាយពីសក្តានុពលទេសចរណ៍កម្ពុជាដល់ប្រជាជនអង់គ្លេស និងពិភពលោកទាំងមូល៕

កម្ពុជាដាក់តាំងស្តង់ជាតិ បង្ហាញសិល្បៈ វប្បធម៌ និងផលិតផលខ្មែរក្នុងពិព័រណ៍នាំចូលអន្តរជាតិចិន-CIIE នៅទីក្រុងសៀងហៃ

«ព្រះរាជាណាចក្រអច្ឆរិយៈ ឬ Kingdom of Wonder» ត្រូវបានរំលេចឡើងក្នុងស្តង់ជាតិកម្ពុជា ដោយមានសម្តែងជារបាំខ្មែរ បង្ហាញវប្បធម៌ខ្មែរ តាំងផលិតផលខ្មែរមានគុណភាពខ្ពស់ដោយផ្តោតជាពិសេសលើសិល្បៈ សិប្បកម្ម និងផលិតផលកសិកម្មលំដាប់ខ្ពស់ដែរនៅក្នុងពិព័រណ៍នាំចូលអន្តរជាតិចិន (CIIE) ឆ្នាំ២០២៥ ដែលបានបើកសម្ពោធនៅថ្ងៃទី៥ ខែវិច្ឆិកា ឆ្នាំ២០២៥ នៅទីក្រុងសៀងហៃ ប្រទេសចិន។ ការចូលរួមនេះបានគូសបញ្ជាក់ពីការប្តេជ្ញាចិត្តរបស់កម្ពុជា ដើម្បីពង្រឹងទំនាក់ទំនងពាណិជ្ជកម្មជាមួយប្រទេសចិនក្រោមគំនិតផ្តួចផ្តើមខ្សែក្រវ៉ាត់និងផ្លូវ នៅក្នុងពិព័រណ៍ CIIE ដើម្បីបញ្រ្ជៀបទំនិញកម្ពុជាផង ទាក់ទាញវិនិយោគិនផង និងពង្រឹងតួនាទីរបស់ខ្លួនបន្ថែមទៀតទៅក្នុងខ្សែសង្វាក់ផ្គត់ផ្គង់ទាំងថ្នាក់តំបន់និងអន្តរជាតិផង៕

សម្ដេចធិបតី អបអរសាទរទិវាជាតិអាហារូបត្ថម្ភលើកទី១២ក្រោមប្រធានបទ «អាហារូបត្ថម្ភដើម្បីសន្តិភាពសន្តិភាពដើម្បីអាហារូបត្ថម្ភ»

ភ្នំពេញ ៖ ក្នុងឱកាសអបអរសាទរទិវាជាតិអាហារូបត្ថម្ភ លើកទី១២ (៦ វិច្ឆិកា ២០១៤-៦ វិច្ឆិកា ២០២៥) ក្រោមប្រធានបទ «អាហារូបត្ថម្ភដើម្បីសន្តិភាព សន្តិភាពដើម្បីអាហារូបត្ថម្ភ» សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានផ្ញើសារលិខិតជូនជនរួមជាតិ និងបានបញ្ជាក់ថា ឆ្នាំនេះរាជរដ្ឋាភិបាលបានជ្រើសរើសយក ប្រធានបទ «អាហារូបត្ថម្ភដើម្បីសន្តិភាព សន្តិភាពដើម្បីអាហារូបត្ថម្ភ» ពីព្រោះប្រធានបទនេះបានឆ្លុះបញ្ចាំងពីស្ថានភាពជាក់ស្តែងនៅកម្ពុជាដែលប្រជាជនគ្រប់រូបប្រាថ្នាចង់មានអាហារូបត្ថម្ភល្អ មានសុខភាពល្អ និងរស់នៅប្រកបដោយសុខសន្តិភាព។តាមរយៈសារលិខិត សម្ដេចធិបតី នាយករដ្ឋមន្រ្ដី បានបញ្ជាក់ថា ទិវាជាតិអាហារូបត្ថម្ភត្រូវបានប្រារព្ធធ្វើឡើងជារៀងរាល់ឆ្នាំនៅថ្ងៃទី៦ ខែវិច្ឆិកា ក្នុងគោលបំណងផ្សព្វផ្សាយ អប់រំ និងលើកកម្ពស់ការយល់ដឹងជាសាធារណៈឱ្យបានទូលំទូលាយ អំពីសារៈសំខាន់នៃវិស័យសន្តិសុខស្បៀង និងអាហារូបត្ថម្ភ ក្នុងការចូលរួមចំណែកអភិវឌ្ឍមូលធនមនុស្ស បង្កើនប្រសិទ្ធភាពការងារ ជំរុញកំណើន សេដ្ឋកិច្ច និងវឌ្ឍនភាពសង្គម។សម្ដេចធិបតីបានថ្លែងថា ចំពោះទិវាជាតិអាហារូបត្ថម្ភលើកទី១២ ឆ្នាំនេះរាជរដ្ឋាភិបាលបានជ្រើសរើសយក ប្រធានបទ «អាហារូបត្ថម្ភដើម្បីសន្តិភាព សន្តិភាពដើម្បីអាហារូបត្ថម្ភ» ស្របពេលដែលអង្គការសហប្រជាជាតិ បានរៀបចំកិច្ចប្រជុំកំពូលបូកសរុបលទ្ធផលស្តីពីប្រព័ន្ធស្បៀងរបស់អង្គការសហប្រជាជាតិ លើកទី២ នៅទីក្រុង Addis Ababa ប្រទេសអេត្យូពី កាលពីថ្ងៃទី២៧-២៩ ខែកក្កដា ឆ្នាំ២០២៥ ដែលពេលនោះ ឯកឧត្តម Antonio Guterres អគ្គលេខាធិការអង្គការសហប្រជាជាតិ បានអំពាវនាវឱ្យប្រទេសនានាលើសកលលោក ចូលរួមពន្លឿនបរិវត្តកម្មប្រព័ន្ធស្បៀង ឱ្យកាន់តែមានភាពធន់ ឆ្លាតវៃ និងបរិយាបន្ន ដើម្បីធានាថា មនុស្សគ្រប់ រូបមានលទ្ធភាពទទួលបានអាហារមានសុវត្ថិភាពនិងអាហារូបត្ថម្ភត្រឹមឆ្នាំ២០៣០ ថែរក្សាបានសន្តិភាព ការពារភពផែនដី និងវិបុលភាពសង្គម។ ប្រធានបទនេះក៏បានឆ្លុះបញ្ចាំងពីស្ថានភាពជាក់ស្តែងនៅកម្ពុជា ដែលប្រជាជនគ្រប់រូបប្រាថ្នាចង់មានអាហារូបត្ថម្ភល្អ មានសុខភាពល្អ និងរស់នៅប្រកបដោយសុខសន្តិភាព។សម្ដេចធិបតីបានថ្លែងបញ្ជាក់ថា អាហារូបត្ថម្ភដើម្បីសន្តិភាព សន្តិភាពដើម្បីអាហារូបត្ថម្ភ មានទំនាក់ទំនងគ្នាយ៉ាងស៊ីជម្រៅ។ សង្គមដែលប្រជាពលរដ្ឋទទួលបានសន្តិសុខស្បៀង និងអាហារូបត្ថម្ភគ្រប់គ្រាន់ គឺជាសង្គមមួយដ៏រឹងមាំ មានភាពធន់ មានសាមគ្គីភាព មានការអភិវឌ្ឍ និងមានស្ថិរភាពសង្គម។ ផ្ទុយទៅវិញ បើប្រជាពលរដ្ឋជួបប្រទះអសន្តិសុខស្បៀង និងបញ្ហាអាហារូបត្ថម្ភ សង្គមនោះមិនអាចថែរក្សាបាននូវសន្តិភាព និងសុខុមាលភាព រួមទាំងសុខភាពផ្លូវចិត្ត និងសុខភាពផ្លូវកាយបានឡើយ។ សម្ដេចធិបតីបានបញ្ជាក់ថា៖«សន្តិភាពបានជះឥទ្ធិពលវិជ្ជមានទៅលើជីវភាពរស់នៅប្រចាំថ្ងៃរបស់ប្រជាពលរដ្ឋ ដោយបង្កលក្ខណៈងាយស្រួលឱ្យប្រជាពលរដ្ឋយើងមានលទ្ធភាពគ្រប់គ្រាន់បរិភោគអាហារជាមួយក្រុមគ្រួសារ ប្រកបដោយផាសុកភាពនិងសុវត្ថិភាព។ បើគ្មានសន្តិភាពទេ យើងក៏មិនអាចមានលទ្ធភាពទៅបង្កបង្កើនផល និងប្រកបការងារចិញ្ចឹមជីវិត ដើម្បីទទួលបានសន្តិសុខស្បៀងនិងអាហារូបត្ថម្ភដែរ»។សម្ដេចនាយករដ្ឋមន្រ្ដីអះអាងថា រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេច ចក្ខុវិស័យកម្ពុជាឆ្នាំ២០៥០ សំដៅបន្តពង្រឹងតួនាទី និងការអភិវឌ្ឍវិស័យកសិកម្មឱ្យទំនើប សម្បូរបែប និងមានភាពធន់ដែលគាំទ្រដល់ការអភិវឌ្ឍ ធានាសន្តិសុខស្បៀង និងអាហារូបត្ថម្ភ និងសុវត្ថិភាពស្បៀង ដើម្បីលើកកម្ពស់គុណភាពជីវភាពរស់នៅរបស់ប្រជាជន។ រាជរដ្ឋាភិបាលបានដាក់ចេញនូវគោលនយោបាយ និងយុទ្ធសាស្ត្រនានាក្នុងការលើកស្ទួយសុខុមាលភាពរបស់ប្រជាជន ដែលជាកាតាលីករក្នុងការជំរុញឱ្យមានកំណើន សេដ្ឋកិច្ច វឌ្ឍនភាព និងវិបុលភាពសង្គម៕

រដ្ឋបាលខេត្តបន្ទាយមានជ័យរៀបចំពិធីអកអំបុក សំពះព្រះខែ ដេីម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ

បន្ទាយមានជ័យ ៖ នៅថ្ងៃទី៥ ខែវិច្ឆិកា ឆ្នាំ២០២៥ រដ្ឋបាលខេត្តបន្ទាយមានជ័យ បានរៀបចំពី អកអំបុក សំពះព្រះខែ ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ នៅបរិវេនសួនច្បារថ្មី ដងស្ទឹងសិរីសោភ័ណ ស្ថិតនៅភូមិបី សង្កាត់ព្រះពន្លា ក្រុងសិរីសោភ័ណ។ ក្នុងពិធីក៏មានការអញ្ជើញចូលរួមពីសំណាក់ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត លោក លី សុវណ្ណារិទ្ធិ អភិបាល រងខេត្ត តំណាង ដ៏ខ្ពង់ខ្ពស់ ឯកឧត្ដម អ៊ុ រាត្រី អភិបាល នៃគណៈអភិបាលខេត្តខេត្តបន្ទាយមានជ័យ លោកជំទាវ ជ័យ ណារី អ៊ុ រាត្រី ព្រមទាំង មានការអញ្ជើញចូលរួមឯកឧត្តម លោកជំទាវ សមាជិក រដ្ឋសភា-ព្រឹទ្ធសភា សមាជិកក្រុមប្រឹក្សាខេត្ត បណ្តាមន្ទីរ អង្គភាព ក្រុង-ស្រុកទាំង៩ បងប្អូនប្រជាពលរដ្ឋ អញ្ជើញ ចូលរួម យ៉ាងច្រើនកុះករ។ លោក លី សុវណ្ណារិទ្ធិ អភិបាល រង នៃគណៈអភិបាលខេត្តក៏បានបញ្ជាក់ថា ដោយសារស្ថានភាពព្រំដែន ឆ្នាំ២០២៥នេះរដ្ឋបាលខេត្ដ មិនបានរៀបចំការប្រណាំងទូក ង ដូចបណ្តាឆ្នាំមុនៗនោះទេ តែបានរៀបចំបណ្តែតប្រទីប។ លោក បញ្ជាក់ ថា កាលពីថ្ងៃទី២៦ ខែតុលា ឆ្នាំ២០២៥ កន្លងទៅថ្មីៗនេះ ប្រមុខរាជ រដ្ឋាភិបាល នៃប្រទេសទាំងពី កម្ពុជា-ថៃ បានចុះហត្ថលេខាលើសេចក្តីថ្លែងការរួមទីក្រុងកូឡាឡាំពួ ស្តីពីកិច្ចព្រមព្រៀងសន្តិភាព ដែលមានលោកប្រធានាធិបតីសហរដ្ឋអាមេរិក លោក ដូណាល់ត្រាំ បានអញ្ជើញជាអធិបតី និងជាសាក្សី ដោយមានការសម្របសម្រួលរបស់ប្រទេសម៉ាឡេស៊ីដែលមានលោក នាយករដ្ឋមន្រ្តី អាន់វ៉ា អ៊ីប្រាហ៊ីម ជាប្រធានអាស៊ានប្តូរវេន និងជាសាក្សី នៃពីធីនោះផងដែរ។លោក ក៏បានបញ្ជាក់ផងដែរថា សន្តិភាព ដែលយើងបានមកដល់ថ្ងៃនេះ ដោយសារតែបងប្អូនប្រជាពលរដ្ឋទូទាំងប្រទេសជឿជាក់ទៅលើប្រមុខរាជរដ្ឋាភិបាលកម្ពុជាក្រោមការដឹកនាំរបស់សម្ដេចមហាបវរ ធិបតី ហ៊ុន សែន នាយករដ្ឋមន្ត្រី ដែលបានដាក់ចេញនូវយុទ្ធសាស្ត្រ រហូតទទួលបាននូវការចុះកិច្ចព្រមព្រៀងសន្តិភាពមួយនេះ។ ក្នុងនោះដែរ លោក អភិបាលរងខេត្ត ក៏បានក្រើនរំលឹកដល់មន្រ្តីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ អាជ្ញាធរដែនដីគ្រប់មូលដ្ឋាន បន្តយកចិត្តទុកដាក់ ខិតខំបំពេញភារកិច្ចតាមតួនាទី ខ្លួន ដើម្បីបម្រើសន្តិសុខ-សុវត្ថិភាពសាធារណៈជូនប្រជាពលរដ្ឋ និងការផ្តល់សេវាតាមរយៈយន្តការច្រកចេញចូលតែមួយ ដែលមានរហ័សនាមថា "ស្នាមញញឹមខេត្តបន្ទាយមានជ័យ" ក្នុងការផ្តល់សេវាល្អ មាន គុណភាព តម្លាភាព គណនេយ្យភាព និងភាពជឿទុកចិត្តបានរបស់ ប្រជាពលរដ្ឋ និយាយរួម គឺចូលរួមអនុវត្ត នូវ "គោលនយោបាយភូមិ-ឃុំ-សង្កាត់មានសុវត្ថិភាព " ទាំង៧ចំណុច ក្នុងស្មារតីបុរេសកម្ម សកម្ម និងអន្តរសកម្ម ដើម្បីភាពរីកចម្រើនរុងរឿង សុខក្សេមក្សាន្ត និងសុខដុមរមនារបស់ប្រជាពលរដ្ឋគ្រប់រូប៕ ដោយ ៖ ឃិនសារិទ្ធ

អភិបាលខេត្តបន្ទាយមានជ័យបញ្ចុះបឋមសិលាសាងសង់អគារសង្រ្គោះបន្ទាន់ និងវះកាត់នៅមន្ទីរបង្អែកអូរជ្រៅ

បន្ទាយមានជ័យ ៖ ឯកឧត្ដម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត លោកជំទាវ នួម សុភ័ណ អ្នកតំណាង មណ្ឌល បន្ទាយមានជ័យ បានអញ្ជើញ ជាអធិបតី ភាពក្នុងពិធីបញ្ចុះបឋមសិលាសាងសង់អគារសង្រ្គោះបន្ទាន់ និងវះកាត់នៅមន្ទីរបង្អែក អូរជ្រៅ ក្រោយជំនួយរបស់មន្ទីរពេទ្យមិត្តភាពកម្ពុជា-ចិន ព្រះកុសុមៈ និងសប្បុរសជននៅថ្ងៃទី៥វិច្ឆិកាឆ្នាំ២០២៥។ពិធីនេះក៏មានការអញ្ជេីញចូលរួម ឯកឧត្តមវេជ្ជបណ្ឌិតឯកទេស តាន់ សុគុន នាយកមន្ទីរពេទ្យមិត្តភាពកម្ពុជា-ចិន ព្រះកុសុមៈ និងលោកជំទាវ ស៊ន ឌីធីតា ក្រុមប្រឹក្សាស្រុក គណៈអភិបាលស្រុក មន្ត្រីសុខាភិបាលខេត្ត ស្រុក ពលរដ្ឋបានចូលរួមជាច្រើនរូបប្រារព្ធ ធ្វើឡើង នៅមន្ទីរពេទ្យ បង្អែក អូរជ្រៅ ខេត្តបន្ទាយមានជ័យ ។ឯកឧត្ដម អ៊ុ រាត្រី អភិបាល នៃគណ :អភិបាលខេត្ត បានសម្តែងការអរគុណដល់ក្រុមគ្រូពេទ្យ មន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលបានសហការណ៍ជាមួយមន្ទីរពេទ្យបង្អែកអូរជ្រៅ បានរៀបចំ ព្យាបាលតាមបែបបូរាណចិន និងចាក់ម្ជុលវិទ្យាសាស្ត្រដោយឥតគិតថ្លៃជូនអ្នកជំងឺនៅក្នុងស្រុកអូរជ្រៅ ដែលមានលក្ខណះដូចជា ៖ ឈឺក្បាលជាប្រចាំ, ស្លឹកដៃជើង, ស្លឹកមួយចំហៀងខ្លួន, ឈឺចង្កេះ, ឈឺសន្លាក់, ដេកមិនលក់ផងដែរ៕ឃិនសារិទ្ធ

ថ្ងៃទី៣ពិធីបុណ្យអុំទូកប្រជាពលរដ្ឋមកលេងកម្សាន្តតាមរមណីយដ្ឋាននានាក្នុងរាជធានីភ្នំពេញច្រើន

ភ្នំពេញ ៖ ក្នុងថ្ងៃទី៣ នៃពិធីបុណ្យអុំទូក ទោះមានភ្លៀងធ្លាក់បន្តិចក៏ប្រជាពលរដ្ឋក្នុងរាជធានីភ្នំពេញ និងប្រជាពលរដ្ឋ មកពីបណ្តាខេត្តនានាចូលមកលេងកម្សាន្តនៅតាមរមណីយដ្ឋាននានាក្នុងរាជធានីភ្នំពេញ។ថ្ងៃទី៣ នៃពិធីបុណ្យអុំទូក បណ្តែតប្រទីប សំពះព្រះខែ អកអំបុក ត្រូវនឹងថ្ងៃទី៦ ខែវិចិ្ឆកា ឆ្នាំ២០២៥ បងប្អូនប្រជាពលរដ្ឋ ក្មេង ចាស់ ប្រុស ស្រី គ្រប់ក្រុមគ្រួសារ បានអញ្ជើញមកដើរលេងកម្សាន្ត នៅមុខព្រះបរមរាជវាំង និងតាមផ្លូវថ្មើជើងចតុម្មុខ (Walk Street) ស្របមាត់ទន្លេ បានបង្ហាញចំណាប់អារម្មណ៍របស់ខ្លួនស្រដៀងគ្នាថា ក្នុងឱកាសនៃពិធីបុណ្យអុំទូកនេះ បើទោះបីជាមានការផ្អាកប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៥ នៅរាជធានីភ្នំពេញ ឲ្យដូចបណ្តាឆ្នាំនាពេលកន្លងមកកី្ត ប៉ុន្តែក៏នៅតែសប្បាយចិត្ត ព្រោះយើងបានឈប់សម្រាកពីការងារ និងបានជូនក្រុមគ្រួសារមកដើរលំហែកម្សាន្តតាមមាត់ទន្លេ។សូមបញ្ជាក់ថា ឆ្នាំ២០២៥នេះ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមដង ទន្លេសាប មុខព្រះបរមរាជវាំង រាជធានីភ្នំពេញ មិនបានរៀបចំទេដោយសារបញ្ហាជម្លោះព្រំដែនកម្ពុជា និងថៃ។ ប៉ុន្ដែប្រជាពលរដ្ឋ និងភ្ញៀវទេសចរមកពីបណ្តាខេត្តនានា បានចូលមកលេងកម្សាន្តនៅតាមរមណីយដ្ឋាននានាក្នុងរាជធានីភ្នំពេញជាច្រើនផងដែរ៕អត្ថបទ រដ្ឋា

កម្ពុជានិងអូស្ត្រាលី ពង្រីកកិច្ចសហប្រតិបត្តិការផ្នែកបណ្តុះបណ្តាលវិជ្ជាជីវៈ និងកម្មវិធីហាត់ការ

ភ្នំពេញ៖ កំពុងស្ថិតនៅប្រទេសអូស្ត្រាលី ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក Cameron Baker ប្រធានស្នងការជំនាញ នៃរដ្ឋអូស្ត្រាលីខាងត្បូង (South Australian Skills Commission) បានរួមគ្នាចុះហត្ថលេខាលើកិច្ចព្រមព្រៀងសហប្រតិបត្តិការ ផ្នែកបណ្តុះបណ្តាលបច្ចេកទេស និងវិជ្ជាជីវៈ និងកម្មវិធីហាត់ការ ដែលអាចនឹងអនុញ្ញាតឱ្យសិស្សនិស្សិតកម្ពុជា ដែលកំពុងរៀនថ្នាក់សញ្ញាបត្របច្ចេកទេស និងវិជ្ជាជីវៈ ១-៣ ដែលចុះបញ្ជិកានៅក្រសួងការងារ និងទទួលស្គាល់ដោយស្នងការជំនាញអូស្ត្រាលី អាចទៅបន្តការសិក្សានៅគ្រឹះស្ថានបណ្តុះបណ្តាលជំនាញវិជ្ជាជីវៈ និងចុះហាត់ការផ្ទាល់រយៈពេល ២ឆ្នាំ នៅតាមរោងជាង ការដ្ឋាន និងកសិដ្ឋាននានា ក្នុងរដ្ឋអូស្ត្រាលីខាងត្បូង នៃប្រទេសអូស្ត្រាលី។ យោងតាមក្រសួងការងារ និងបណ្តុះបណ្តាលវិជ្ជាជីវៈ នៅល្ងាចថ្ងៃទី៥ ខែវិច្ឆិកា ឆ្នាំ២០២៥នេះ បានសសេរឱ្យដឹងថាភាគីទាំងពីរ បានវាយតម្លៃខ្ពស់ និងជឿជាក់ថា កិច្ចសហប្រតិបត្តិការនេះ នឹងរួមចំណែកជំរុញឱ្យមានការអភិវឌ្ឍមូលធនមនុស្សនៅកម្ពុជា និងជួយដល់វិស័យឯកជន នៅរដ្ឋអូស្ត្រាលីខាងត្បូង។ កិច្ចសហការនេះក៏រួមបញ្ចូលការបណ្តុះបណ្តាលសមត្ថភាពគ្រូ ការអភិវឌ្ឍកម្មវិធីសិក្សា និងវិធីសាស្ត្របង្រៀន ដែលស្របតាមស្តង់ដារអូស្ត្រាលីផងដែរ។លោក Cameron Baker បានបញ្ជាក់ថា លោកនឹងរៀបចំឱ្យមានក្រុមការងារចំពោះកិច្ចសម្រាប់អនុវត្តកិច្ចការនេះឱ្យមានប្រសិទ្ធភាពខ្ពស់ ដែលនឹងអាចចាប់ផ្តើមទទួលសិស្សនិស្សិតកម្ពុជា ក្នុងការហាត់ការ និងកម្មសិក្សានៅក្នុងឆ្នាំ២០២៦ លើមុខជំនាញវិស្វកម្មរថយន្ត រថយន្តអគ្គិសនី និងអេឡិចត្រូនិក និងអាចបន្ថែមជំនាញផ្សេងៗទៀត ចាប់ពីឆ្នាំ២០២៧។លទ្ធផលនៃកិច្ចសហប្រតិបត្តិការនេះ គឺកើតចេញពីការចង្អុលបង្ហាញ និងផ្តល់អនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសដែលលោកជំទាវ Frances Adamson អភិបាលរដ្ឋ នៃរដ្ឋអូស្ត្រាលីខាងត្បូង (South Australia-SA) ប្រទេសអូស្ត្រាលី អញ្ជើញទៅទស្សនកិច្ចនៅកម្ពុជាកាលពីថ្ងៃទី១៩ ខែឧសភាឆ្នាំ២០២៥ កន្លងទៅនេះ។នាឱកាសនោះ គណៈប្រតិភូកម្ពុជាក៏បានធ្វើទស្សនកិច្ចសិក្សា និងផ្លាស់ប្តូរបទពិសោធ នៅតាមគ្រឹះស្ថានបណ្ដុះបណ្ដាលមួយចំនួនក្នុងទីក្រុងអាដេឡេដ ប្រទេសអូស្ត្រាលី រួមមាន សាលាបណ្តុះបណ្តាលបច្ចេកទេស របស់ Technical and Further Education South Australia, សាលាមធ្យមសិក្សាបច្ចេកទេស Tonsley Technical College, សាលាបណ្តុះបណ្តាលជាងរថយន្ត នៃសមាគមជាង និងអ្នកផ្តល់សេវាថែទាំយានយន្តអូស្ត្រាលី (Motor Trade Association) និងសាលាបណ្តុះបណ្តាលបច្ចេកទេសកសិកម្ម នៃសាលាបណ្តុះបណ្តាលជំនាញតំបន់៕

បណ្ដាញសង្គម

ព័ត៌មានថ្មីៗ

អ៊ីស្រាអែល បន្តបាញ់ស្រោចលើលីបង់សម្លាប់មនុស្ស ១២ នាក់ រួមទាំងមន្ត្រីជាន់ខ្ពស់ដោយមិនខ្វល់ពីបទឈប់បាញ់

អាមេរិក និងអ៊ីរ៉ង់ វាយប្រហារដាក់គ្នាជាថ្មី ក្នុងការដុតបញ្ឆេះភាពតានតឹងចុងក្រោយនៅតំបន់ឈូងសមុទ្រ

កូរ៉េខាងជើងបញ្ជាក់ពីឋានៈជារដ្ឋនុយក្លេអ៊ែរឡើងវិញ មួយថ្ងៃមុន ដំណើរទស្សនកិច្ចរបស់ប្រធានាធិបតីចិន

កម្ពុជាចូលរួមពិព័រណ៍ការប្រើប្រាស់ទេសចរណ៍ និងវប្បធម៌អន្តរជាតិទីក្រុងប៉េកាំង លើកទី៤ ដើម្បីផ្សព្វផ្សាយសក្ដានុពលទេសចរណ៍ និងគោលនយោបាយលើកលែងទិដ្ឋាការជូនភ្ញៀវចិន

ក្រុមអ្នកសង្កេតការណ៍អាស៊ាន បន្តចុះសង្កេតការណ៍ស្ថានភាពព្រំដែននៅតំបន់អូរភ្លុកដំរី ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ ទីតាំងរងការវាយប្រហារ និងកំពុងកាន់កាប់ដោយខុសច្បាប់ដោយយោធាថៃ

ឯកអគ្គរដ្ឋទូត៖ ប៉ាគីស្ថាននៅតែរក្សាទំនាក់ទំនងជាមួយរុស្ស៊ីជុំវិញបញ្ហាអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877