BTV NEWS

អគ្គលេខាធិការ អ.ស.ប ប្រគល់មេដាយឆ្នើមដល់កងកម្លាំងរក្សាសន្តិភាពកម្ពុជាចំនួន ៣រូបដែលបានពលីជីវិត

អាជ្ញាធរភ្នំពេញបង្ក្រាបទីតាំងបើកល្បែងស៊ីសងខុសច្បាប់ចំនួន ៦ទីតាំងនៅតំបន់ផ្សារចិន

ឯកឧត្តម ហ៊ុន ម៉ានី អបអរសាទរ និងបង្ហាញមោទនភាពចំពោះអត្តពលិកជនពិការកម្ពុជា

កម្ពុជាចូលរួមពិព័រណ៍ការប្រើប្រាស់ទេសចរណ៍ និងវប្បធម៌អន្តរជាតិទីក្រុងប៉េកាំង លើកទី៤ ដើម្បីផ្សព្វផ្សាយសក្ដានុពលទេសចរណ៍ និងគោលនយោបាយលើកលែងទិដ្ឋាការជូនភ្ញៀវចិន

ព័ត៌មានជាតិ

ប្រជាពលរដ្ឋស្រុកអូររាំងឪនឹងទទួលបានផ្លូវលេខ៣៧០ស្អាត និងអំពូលសូឡាបន្ថែម

រដ្ឋបាលស្រុកអូររាំងឪ ខេត្តត្បូងឃ្មុំ នៅព្រឹកថ្ងៃទី៤ ខែវិច្ឆិកា ឆ្នាំ២០២៥ បានសហការជាមួយមន្ទីរអភិវឌ្ឍន៍ជនបទខេត្តត្បូងឃ្មុំ និងតំណាងក្រុមហ៊ុនទទួលសាងសង់ផ្លូវ បានចុះពិនិត្យស្ថានភាពផ្លូវជាក់ស្ដែង និងរៀបចំពិធីបើកការដ្ឋានជួសជុលស្ដារផ្លូវលេខ៣៧០ ឱ្យបានស្អាតឡើងវិញនិងដាក់អំពូលសូឡានៅតាមដងផ្លូវនេះបន្ថែមទៀត ចាប់ពីភូមិសាស្រ្តឃុំគោងជ័យ ឆ្ពោះទៅទីប្រជុំជនផ្សារអូររាំងឪ កែងនឹងផ្លូវជាតិលេខ១១។ សូមបញ្ជាក់ថា ផ្លូវលេខ៣៧០ មានប្រវែង៣០ ០០០ ម៉ែត្រឆ្លងកាត់ស្រុកអូររាំងឪ ស្រុកត្បូងឃ្មុំ និងក្រុងសួង ខេត្តត្បូងឃ្មុំ បានដំណើរការជួសជុលនិងស្តារឡើងវិញបានល្អ មានប្រវែង ២៤ ០០០ ម៉ែត្រនិងតម្លើងភ្លើងសូឡាបំភ្លឺ ជូនប្រជាពលរដ្ឋប្រើប្រាស់ រួចហើយកាលពីពេលថ្មីៗកន្លងមកនេះ។ ដោយឡែកដំណើរការជួសជុល ដំណាក់កាលទីពីរ លើកំណត់ផ្លូវនៅសល់ ប្រវែងប្រមាណ ៦ ០០០ ម៉ែត្រទៀត ចេញពីឃុំគងជ័យ ឆ្ពោះមកភ្ជាប់ផ្លូវជាតិលេខ៧ ទីប្រជុំជនស្រុកអូររាំងឪ ក៏នឹងចាប់ផ្តើមនាថ្ងៃទី២៤ ខែវិច្ឆិកា ឆ្នាំ២០២៥ ខាងមុខនេះ និងគ្រោងបញ្ចប់នៅដើមឆ្នាំ២០២៦។កន្លងមក ថ្នាក់ដឹកនាំ មន្រ្តីរាជការ មន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងប្រជាពលរដ្ឋ ដែលបានសហការ និងគាំទ្រដល់ដំណើរជួសជុលផ្លូវ៣៧០ នេះ ដើម្បីផ្តល់ប្រយោជន៍ជូនប្រជាពលតរដ្ឋ ដឹកជញ្ជូនកសិផល ធ្វើដំណើរងាយស្រួល និងជួយចូលរួមការបង្កើនសេដ្ឋកិច្ចមូលដ្ឋាន មួយកម្រិតទៀត។ ជាមួយគ្នានេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ បាននាំយក និងតម្លើងអំពូលសូឡា ចំនួន៦១៤ ដើម ដែលជាអំណោយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនប្រជាពលរដ្ឋ សម្រាប់បំភ្លឺតាមបណ្តោយផ្លូវលេខ៣៧០នេះ ផងដែរ។អំពូលភ្លើងសូឡា ឬ«អំពូលភ្លើងទេវតា» ដើរដោយថាមពលពន្លឺព្រះអាទិត្យ និងបានផ្តល់ជូនប្រជាពលរដ្ឋ នៅតាមមូលដ្ឋានក្នុងខេត្តត្បូងឃ្មុំ នាពេលនេះ ពិតជាការចូលរួមចំណែក ជួយអភិវឌ្ឍនៅមូលដ្ឋាននានា សំដៅឆ្លើយតបទៅនឹងតម្រូវការចាំបាច់ ក្នុងការលើកកម្ពស់ជីវភាព របស់ប្រជាពលរដ្ឋក្នុងមូលដ្ឋាន ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា។ កន្លងមកនេះ ប្រជាពលរដ្ឋបានសាទរយ៉ាងខ្លាំង ចំពោះសមិទ្ធផលថ្មីលើទឹកដីស្រុកអូររាំងឪ ក៏ដូចជាតាមមូលដ្ឋាននាក្នុងខេត្តត្បូងឃ្មុំ ជាពិសេសសមិទ្ធផល ដែលជាអំណោយរបស់អគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជណាចក្រកម្ពុជា បានយកចិត្តទុកដាក់លើសុខទុក្ខ ជួយកាត់បន្ថយការលំបាក និងជួយបង្កើនជីវភាព របស់ប្រជាពលរដ្ឋ នៅគ្រប់មូលដ្ឋានទាំងអស់៕

ពិធីបុណ្យអុំទូកពីរថ្ងៃ ខេត្តកំពតទទួលបានភ្ញៀវទេសចរប្រមាណជាង១៣ម៉ឺននាក់

កំពត ៖ ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រយៈពេលពីរថ្ងៃ ខេត្តកំពតទទួលបានភ្ញៀវទេសចរ ប្រមាណជាង១៣ម៉ឺននាក់ ខណៈនៅថ្ងៃទី៥ ខែវិច្ឆិកា ឆ្នាំ២០២៥ ឯកឧត្តមបណ្ឌិត ម៉ៅ ធនិន អភិបាលខេត្តកំពត បានដឹកនាំមន្ត្រីរាជការ អាជ្ញាធរក្រុងស្រុក កងកម្លាំង ប្រជាពលរដ្ឋ រៀបចំពិធីពះព្រះខែ និងអកអំបុក នៅប្រាសាទមាសលោកជំទាវម៉ៅ ស្ថិតនៅលើកំពូលភ្នំទ្វារ ឃុំល្អាង ស្រុកដងទង់។ ក្នុងឱកាសនោះ លោកអាចារ្យរៀបចំកម្មវិធីបានបញ្ជាក់ថា ក្រោមគំនិតនិតផ្តួចផ្តើមប្រកបដោយការច្នៃប្រឌិតខ្ពស់ របស់ឯកឧត្តមបណ្ឌិត ម៉ៅ ធនិន អភិបាលខេត្តកំពត ដោយមានការឯកភាពពីឯកឧត្តម តាក ហាប់ ប្រធានក្រុមប្រឹក្សាខេត្ត រដ្ឋបាលខេត្តកំពតឆ្នាំនេះ បានសម្រេចជ្រើសរើសយកទីតាំងប្រាសាទមាសលោកជំទាវ រៀបចំពិធីសំពះព្រះខែ និងអកអំបុក ដើម្បីរំលឹកនឹកគុណព្រះពោធិសត្វនៅក្នុងកាលដែលព្រះអង្គមានជាតិកំណើរជាសត្វទន្សាយ ដើម្បីសន្សំបារមីផង និងដើម្បីបួងសួងសុំសេចក្តីសុខសេចក្តីចម្រើន ជូនដល់ប្រមុខថ្នាក់ដឹកនាំ ប្រជាពលរដ្ឋ និងភ្ញៀវទេសចរផង ក៏ដូចជាដើម្បីរួមសាមគ្គីគ្នាលើកស្ទួយវិស័យទេសចរណ៍ខេត្តកំពត ជាពិសេសចង់បង្ហាញទេសភាព បរិយាកាសនៅប្រាសាទមាសលោកជំទាវម៉ៅនេះតែម្តង។ ចំណែកក្រុមយុវជនចូលរួមជួយរៀបចំកម្មវិធី បានបង្ហាញចំណាប់អារម្មណ៍សប្បាយរីករាយរបស់ខ្លួនដែលថា នេះជាលើកទីមួយ ដែលពួកគេចូលរួមពិធីសំពះព្រះខែ និងអកអំបុកជាមួយនឹងថ្នាក់ដឹកនាំខេត្ត។ ពិធីនាពេលនេះពិតជាអធឹកអធម មានអំបុក ចេក ដូងរាប់ពាន់ផ្លែ សម្រាប់ចែកជូនដល់អ្នកចូលរួម ហើយអ្វីដែលកាន់តែពិសេស គឺពួកគេបានមកឃើញ ទេសភាពដ៏ស្រស់ត្រកាលនៅប្រាសាទមាសលោកជំទាវម៉ៅ ដែលជាមិទ្ធផលទេសចរណ៍មួយថ្មី ក្រោមគំនិតផ្តួចផ្តើមរបស់ឯកឧត្តមអភិបាលខេត្ត និងលោកជំទាវ ហ៊ុន ចាន់ធី ម៉ៅធនិន ។

ពិធីបុណ្យអុំទូកពីរថ្ងៃនៅខេត្តបាត់ដំបងទាក់ទាញភ្ញៀវទេសចរជាង៨ម៉ឺននាក់

បាត់ដំបង៖លោក ហម អរុណ អនុប្រធានមន្ទីរ និងជាអ្នកនាំពាក្យមន្ទីរទេសចរណ៍ខេត្តបាត់ដំបង ថ្លែងឱ្យដឹងថា រយៈពេល២ថ្ងៃក្នុងឱកាសព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ចាប់ពីថ្ងៃទី៤ដល់ថ្ងៃទី៥ ខែវិច្ឆិកា ឆ្នាំ២០២៥ ខេត្តបាត់ដំបងទទួលបានភ្ញៀវទេសចរជាង៨ម៉ឺននាក់ក្នុងនោះថ្ងៃទី១ទទួលបាន៣៣,៦៣៥នាក់ និងថ្ងៃទី២ទទួលបាន៩,៧៦៩ នាក់។លោក ហម អរុណ បានឱ្យដឹងបន្ថែមថា ខេត្តបាត់ដំបង គឺជាទឹកដីដែលមានភាពអំណោយផល និងមានសក្ដានុពលខ្ពស់លើវិស័យទេសចរណ៍ដែលតែងតែផ្ដល់ភាពរីករាយ និងការកម្សាន្តនានាជូនទៅដល់ភ្ញៀវទេសចរជាតិ និងអន្តរជាតិ ខណៈថ្ងៃឈប់សម្រាកក្នុងឱកាសនៃពិធីបុណ្យអុំទូក បណ្ដែតប្រទីប អកអំបុកនិងសំពះព្រះខែ ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា ឆ្នាំ២០២៥ នៅតាមមូលដ្ឋានអាជីវកម្ម សេវាកម្មទេសចរណ៍ តំបន់រមណីយដ្ឋាន និងគោលដៅទេសចរណ៍នានា គឺបានត្រៀមលក្ខណៈរួចរាល់ក្នុងការទទួលស្វាគមន៍ភ្ញៀវមកពីគ្រប់ទិសទី។លោក ហម អរុណ បញ្ជាក់បន្ថែមថា នៅក្នុងរដូវកាលនេះ គឺជាពេលវេលាដ៏ល្អសម្រាប់ការមកទស្សនាកម្សាន្តនៅទឹកដីខេត្តបាត់ដំបងដោយសារអាកាសធាតុចាប់ផ្ដើមធ្លាក់ខ្យល់ត្រជាក់អមជាមួយទេសភាពបៃតងខ្ចីពិតជាផ្ដល់អារម្មណ៍ស្រស់ស្រាយមែនទែនដល់ភ្ញៀវទេសចរ។ជាមួយគ្នានេះ លោក ហម អរុណ បានអំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិសូមអញ្ជើញមកទស្សនាកម្សាន្តនៅខេត្តបាត់ដំបងឱ្យបានច្រើនកុះករនៅក្នុងឱកាសឈប់សម្រាកចុងក្រោយនៃព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ។សូមជម្រាបថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានទាំងរមណីយដ្ឋានបែបប្រវត្តិសាស្រ្ត វប្បធម៌ ប្រពៃណី សិល្បៈ ម្ហូបអាហារ និងមានគោលដៅទេសចរណ៍សរុបចំនួន១១៥កន្លែងក្នុងនោះរួមមាន ៖ រមណីយដ្ឋានទេសចរណ៍ចំនួន២២កន្លែង សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិទេសចរណ៍ចំនួន៤កន្លែង ៕

ឯកឧត្តម ស៊ុន ចាន់ថុល ស្នើក្រុមហ៊ុន Pfizer ពិនិត្យលទ្ធភាពបណ្តាក់ទុនវិនិយោគលើវិស័យសុខាភិបាល ការផលិតឱសថ និងបច្ចេកវិទ្យាជីវសាស្ត្រនៅកម្ពុជា

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានស្នើឱ្យក្រុមហ៊ុនពិនិត្យលទ្ធភាពក្នុងការបណ្តាក់ទុនវិនិយោគនៅក្នុងប្រទេសកម្ពុជា ដោយការវិនិយោគនៅក្នុងវិស័យសុខាភិបាល ការផលិតឱសថ និងបច្ចេកវិទ្យាជីវសាស្ត្រ (Biotechnology) ទទួលបានការលើកទឹកចិត្តយ៉ាងពិសេស តាមរយៈច្បាប់វិនិយោគថ្មីរបស់កម្ពុជា។ឯកឧត្តម ស៊ុន ចាន់ថុល បានស្នើបែបនេះ ក្នុងឱកាសទទួលជួបសម្តែងការគួរសម និងពិភាក្សាកាងារជាមួយថ្នាក់ដឹកនាំក្រុមហ៊ុន Pfizer ដែលជាក្រុមហ៊ុនមានជំនាញឯកទេសក្នុងការសិក្សាស្រាវជ្រាវ និងផលិតឱសថឈានមុខគេបំផុតមួយរបស់ពិភពលោក នៅទីក្រុង វ៉ាស៊ីងតុន ឌីស៊ី សហរដ្ឋអាមេរិក កាលពីរសៀលថ្ងៃទី៤ ខែវិច្ឆិកា ឆ្នាំ២០២៥ (ម៉ោងក្នុងតំបន់)។ ក្នុងនជំនួបនាឱកាសនេះបានផ្តោតលើការផ្សារភ្ជាប់វិស័យឱសថ និងសុខាភិបាលកម្ពុជា ជាមួយបច្ចេកវិទ្យានិងស្តង់ដាសកលរបស់ Pfizer។ជាកិច្ចចាប់ផ្តើម ថ្នាក់ដឹកនាំក្រុមហ៊ុន Pfizer បានបង្ហាញចំណាប់អារម្មណ៍យ៉ាងខ្លាំងចំពោះការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការជំរុញវិស័យសុខាភិបាល។ ជាមួយគ្នានេះ ថ្នាក់ដឹកនាំ Pfizer ក៏បានបង្ហាញឆន្ទៈក្នុងការបន្តធ្វើការយ៉ាងជិតស្និទ្ធជាមួយក្រុមប្រឹក្សាអភិវឌ្ឍន៍កម្ពុជា និងក្រសួងពាក់ព័ន្ធ ដើម្បីសិក្សាលទ្ធភាពនៃការពង្រីកសកម្មភាពអាជីវកម្មនៅកម្ពុជា ជាពិសេសលើការផ្គត់ផ្គង់ជាមួយលក្ខខណ្ឌពិសេសសម្រាប់ឱសថសំខាន់ៗ និងការគាំទ្រដល់កម្មវិធីសុខភាពសាធារណៈនានា។ក្នុងឱកាសនេះ ឯកឧត្តមឧបនាយករដ្ឋមន្ត្រី បានសង្កត់ធ្ងន់ពីឆន្ទៈក្នុងការធ្វើការរួមគ្នាដើម្បីធានាថា ផលិតផលរបស់ Pfizer អាចចូលទៅដល់ទីផ្សារកម្ពុជាបានកាន់តែលឿន និងទូលំទូលាយ ជាពិសេសជាមួយនឹងការចុះកិច្ចព្រមព្រៀងពាណិជ្ជ្កកម្មបដិការរវាងកម្ពុជា និងសហរដ្ឋអាម៉េរិកនាពេលថ្មីៗនេះ ដែលនឹងផ្តល់នូវបរិយាកាសអំណោយផលបន្ថែមទៀតរវាងប្រទេសទាំងពីរ។ឆ្លៀតក្នុងឱកាសនេះ ឯកឧត្តមក៏បានស្នើឱ្យក្រុមហ៊ុនពិនិត្យលទ្ធភាពក្នុងការបណ្តាក់ទុនវិនិយោគនៅក្នុងប្រទេសកម្ពុជា ដោយការវិនិយោគនៅក្នុងវិស័យសុខាភិបាល ការផលិតឱសថ និងបច្ចេកវិទ្យាជីវសាស្ត្រ (Biotechnology) ទទួលបានការលើកទឹកចិត្តយ៉ាងពិសេស តាមរយៈច្បាប់វិនិយោគថ្មីរបស់កម្ពុជា។ បន្ថែមពីនេះ ឯកឧត្តមឧបនាយករដ្ឋមន្ត្រី ក៏បានជំរុញឱ្យក្រុមហ៊ុនបន្តកិច្ចខិតខំប្រឹងប្រែងក្នុងការបណ្តុះបណ្តាលធនធានមនុស្ស និងការផ្ទេរចំណេះដឹងក្នុងវិស័យឱសថសាស្ត្រទៅដល់ប្រជាជនកម្ពុជាផងដែរ៕

អ្នកនាំពាក្យរាជរដ្ឋាភិបាលកម្ពុជា អំពាវនាវឱ្យភាគីថៃ គោរពនិងអនុវត្តឱ្យបានម៉ឺងម៉ាត់ចំពោះសេចក្តីថ្លែងការណ៍រួមទីក្រុងគូឡាឡាំពួ

ភ្នំពេញ៖ អ្នកនាំពាក្យរាជរដ្ឋាភិបាលកម្ពុជា នៅថ្ងៃទី៥ ខែវិច្ឆិកា ឆ្នាំ២០២៥ បានចេញសេចក្ដីថ្លែងការណ៍មួយ ដោយបានអំពាវនាវដោយទទូចឱ្យភាគីថៃគោរពនិងអនុវត្តឱ្យបានម៉ឺងម៉ាត់បំផុតនូវរាល់ខ្លឹមសារដែលមានចែងក្នុងសេចក្តីថ្លែងការណ៍រួមទីក្រុងគូឡាឡាំពួ ខណៈមន្ត្រី ថ្នាក់ដឹកនាំថៃទាំងរដ្ឋាភិបាលស៊ីវិល និងយោធាបានចេញធ្វើអត្ថាធិប្បាយជាបន្តបន្ទាប់ដែលមិនស្របតាមស្មារតី និងខ្លឹមសារនៃសេចក្តីថ្លែងការណ៍រួមទីក្រុងគូឡាឡាំពួឡើយ។តាមរយៈសេចក្តីថ្លែងការណ៍ អ្នកនាំពាក្យរាជរដ្ឋាភិបាលកម្ពុជា បានបញ្ជាក់ថា ចាប់តាំងពីមាន ការចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងគូឡាឡាំពួ នៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ក្រោមវត្តមានជាសាក្សីរបស់ ឯកឧត្តម ដូណាល់ ត្រាំ ប្រធានាធិបតីសហរដ្ឋ អាម៉េរិក និងឯកឧត្តម អានវ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ានរួចមក រាជរដ្ឋាភិបាល កម្ពុជាបាននិងកំពុងគោរពនិងអនុវត្តយ៉ាងម៉ឺងម៉ាត់នូវរាល់ចំណុចដែលបានព្រមព្រៀងគ្នា។ជាក់ស្តែង ភ្លាមៗបន្ទាប់ពីការចុះហត្ថលេខាលើសេចក្តីថ្លែងការណ៍រួមនេះ នៅយប់ថ្ងៃទី២៦ ខែតុលា ឆ្នាំ២០២៥ ភាគីកម្ពុជានិងថៃបាននិងកំពុងអនុវត្តតាមកិច្ចព្រមព្រៀងក្នុងការកែសម្រួលអាវុធ និងយុទ្ធោបករណ៍បំផ្លិចបំផ្លាញ ធុនធ្ងន់មួយផ្នែកចេញពីតំបន់ព្រំដែនជានិមិត្តរូប ក្រោមការសង្កេតរបស់ក្រុមអ្នកសង្កេតការណ៍អាស៊ាន (AOT)។ បន្ទាប់មក ភាគីទាំងពីរក៏បានឯកភាពគ្នាដកអាវុធ និងយុទ្ធោបករណ៍បំផ្លិចបំផ្លាញធុនធ្ងន់នេះ ក្នុងដំណាក់កាល ជាក់លាក់ដោយរាប់ចាប់តាំងពីថ្ងៃទី១ ខែវិច្ឆិកា ឆ្នាំ២០២៥។ជាមួយគ្នានេះ ភាគីទាំងពីរបាននិងកំពុងធ្វើការលើបញ្ហាផ្សេងៗទៀតដូចជា កិច្ចសហការក្នុងការប្រយុទ្ធប្រឆាំង និងទប់ស្កាត់ឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ការជួញដូរមនុស្ស និងការដោះមីន ដើម្បីមនុស្សធម៌ជាដើម។ ភាគីកម្ពុជាបាននិងកំពុងអនុវត្តយ៉ាងសកម្ម និងដោយស្មោះត្រង់ក្នុងគោលបំណងរក្សា សន្តិភាពរវាងប្រទេសកម្ពុជានិងថៃ ក៏ដូចជាសន្តិភាពនិងសន្តិសុខក្នុងតំបន់អាស៊ានទាំងមូល។ ថ្នាក់ដឹកនាំ និងមន្ត្រី រាជរដ្ឋាភិបាលកម្ពុជា បានប្រកាន់គោលជំហរ និងរក្សាភាពស្ងៀមស្ងាត់យ៉ាងខ្ជាប់ខ្ជួនដើម្បីបង្កើតបរិយាកាសល្អ ឈានទៅអនុវត្តសេចក្តីថ្លែងការណ៍រួមនេះឱ្យមានប្រសិទ្ធភាពខ្ពស់។ប៉ុន្តែក្នុងរយៈពេលប៉ុន្មានថ្ងៃចុងក្រោយនេះ អ្នកនាំពាក្យរាជរដ្ឋាភិបាលកម្ពុជា បានសង្កេតឃើញថា មន្ត្រី ថ្នាក់ដឹកនាំថៃ ទាំងរដ្ឋាភិបាលស៊ីវិលនិងយោធា បានចេញធ្វើអត្ថាធិប្បាយជាបន្តបន្ទាប់ដែលមិនស្របតាមស្មារតី និងខ្លឹមសារនៃសេចក្តីថ្លែងការណ៍រួមទីក្រុងគូឡាឡាំពួ។ ជាក់ស្តែងមន្ត្រីថៃទាំងនោះបានអត្ថាធិប្បាយដោយយកចំណុចដែលបានព្រមព្រៀងគ្នាក្នុងសេចក្តីថ្លែងការណ៍រួម មកធ្វើជាលក្ខខណ្ឌក្នុងការដោះលែងយោធិនកម្ពុជា១៨រូប ដែលកំពុងស្ថិតនៅក្រោមការឃុំគ្រងរបស់ថៃ និងបង្កើតឱ្យមានលក្ខខណ្ឌថ្មីៗបន្ថែមទៀត ដូចជាករណីប្រាសាទតាក្របីជាដើម ដោយបានព្រមានពីការប្រើប្រាស់កម្លាំងយោធាដើម្បីដណ្តើមយកដែលធ្វើឱ្យស្ថានការណ៍កាន់តែតានតឹងឡើង និងធ្វើឱ្យមានការព្រួយបារម្ភអំពីការបាត់បង់ទំនុកចិត្តគ្នាទៅលើការដោះស្រាយបញ្ហាដោយសន្តិវិធី ដូចមានចែងក្នុងសេចក្តីថ្លែងការណ៍រួម។ការអត្ថាធិប្បាយទាំងនេះ ផ្ទុយទៅនឹងខ្លឹមសារចំណុចទី៤ ដែលចែងថា «ភាគីទាំងពីរបានឯកភាពគ្នាជៀសវាង ការចែកចាយ ឬផ្សព្វផ្សាយព័ត៌មានមិនពិត ការចោទប្រកាន់ ការអះអាងដោយគ្មានភស្តុតាង និងវោហាសាស្ត្រ ដែលបង្កគ្រោះថ្នាក់ទាំងតាមបណ្តាញផ្លូវការរបស់រដ្ឋាភិបាល ឬវេទិកាក្រៅផ្លូវការដើម្បីបន្ថយភាពតានតឹង កាត់បន្ថយ សតិអារម្មណ៍អវិជ្ជមានរបស់សាធារណជន និងលើកកម្ពស់បរិយាកាសអំណោយផលដល់ការសន្ទនាដោយសន្តិវិធី»។អ្វីដែលជាការកត់សម្គាល់យ៉ាងសំខាន់មួយទៀតដែលបញ្ជាក់ថា ភាគីថៃមិនបានគោរពខ្លឹមសារនៃសេចក្តី ថ្លែងការណ៍រួមនោះ គឺនៅត្រង់ថា រហូតមកទល់ថ្ងៃទី៥ ខែវិច្ឆិកា ឆ្នាំ២០២៥ នេះ មានរយៈពេល ១០ថ្ងៃហើយ ដែលភាគីថៃមិនទាន់បានដោះលែងយោធិនកម្ពុជា ១៨រូប ទៅតាមស្មារតីនៃសេចក្តីថ្លែងការណ៍រួម ដែលរំពឹងថានឹង ត្រូវបានដោះលែងភ្លាមៗ ស្របតាមស្មារតីនៃការអនុវត្តតាមកាតព្វកិច្ចនៃច្បាប់មនុស្សធម៌អន្តរជាតិ។ សូមបញ្ជាក់ថា ក្នុងសេចក្តីថ្លែងការណ៍រួមទីក្រុងគូឡាឡាំពួ ចំណុចទី៥ បានចែងថា «ដើម្បីបង្ហាញពីបំណងប្រាថ្នារបស់ប្រទេសថៃ ក្នុងការលើកកម្ពស់ទំនុកចិត្ត និងការជឿទុកចិត្តគ្នាទៅវិញទៅមក ប្រទេសថៃនឹងដោះលែងយោធិនកម្ពុជាទាំងនោះ ដោយគ្មានបង្អែបង្អង់ឡើយ»។អ្នកនាំពាក្យរាជរដ្ឋាភិបាលកម្ពុជា សូមអំពាវនាវដោយទទូចឱ្យភាគីថៃ គោរពនិងអនុវត្តឱ្យបានម៉ឺងម៉ាត់បំផុត នូវរាល់ខ្លឹមសារដែលមានចែងក្នុងសេចក្តីថ្លែងការណ៍រួមទីក្រុងគូឡាឡាំពួ ដោយមិនត្រូវធ្វើអត្ថាធិប្បាយណាមួយ ដែលនាំឱ្យមានភាពតានតឹង និងបាត់បង់ទំនុកចិត្តរវាងគ្នាដែលមិនអំណោយផលដល់ការសន្ទនាដោយសន្តិវិធី។ កម្ពុជាសូមអំពាវនាវដល់ភាគីថៃបញ្ឈប់នូវការដាក់លក្ខខណ្ឌផ្សេងៗ ដែលមិនស្របតាមស្មារតីនៃសេចក្តីថ្លែងការណ៍រួម ទីក្រុងគូឡាឡាំពួ និងការឯកភាពគ្នាក្នុងកិច្ចប្រជុំនានា ក្នុងពេលកន្លងមក។ ដូច្នេះ វាមានសារសំខាន់ណាស់ដែល ភាគីទាំងពីរត្រូវអនុវត្តឱ្យបានយ៉ាងម៉ឺងម៉ាត់នូវសេចក្តីថ្លែងការណ៍រួមនេះ ដោយសុចរិតភាព និងភាពស្មោះត្រង់ ដើម្បីផលប្រយោជន៍នៃប្រទេសទាំងពីរទៅវិញទៅមក៕

ក្រសួងបរិស្ថានបានទប់ស្កាត់ការបំពុលបរិស្ថានតាមរយៈការបញ្ចេញសំណល់រាវពីសហគ្រាស និងរោងចក្រនានាបានចំនួនជិត១៦លានម៉ែត្រគូប

ក្នុងរយៈពេល១០ខែក្នុងឆ្នាំ២០២៥ គិតចាប់ពីខែមករា ដល់ខែតុលា ឆ្នាំ២០២៥ ក្រសួងបរិស្ថាន បានធ្វើការទប់ស្កាត់ការបញ្ចេញសំណល់រាវបំពុលបរិស្ថានពីរោងចក្រ សហគ្រាសនិងក្រុមហ៊ុននានា ស្របតាមវិធានការច្បាប់ បានចំនួន១៥ ៨៩៤ ៤៥០ ម៉ែត្រគូប។ ដោយឡែកគ្រាន់តែក្នុងខែតុលា ឆ្នាំ២០២៥ ក្រសួងបរិស្ថានបានទប់ស្កាត់ការបញ្ចេញសំណល់រាវមិនឱ្យមានការបំពុលបរិស្ថាន បានចំនួនប្រមាណ២លានម៉ែត្រគូប។អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានបញ្ជាក់ថា លទ្ធផលសម្រេចបាននេះ គឺស្របតាមគោលនយោបាយនិងយុទ្ធសាស្រ្តរបស់រាជរដ្ឋាភិបាលកម្ពុជា និងការដឹកនាំចង្អុលបង្ហាញដ៏ខ្ពង់សខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការទប់ស្កាត់និងកាត់បន្ថយការបំពុលទឹកសាធារណៈ។ ជាមួយគ្នានេះ យុទ្ធសាស្រ្តចក្រាវិស័យបរិស្ថាន ដែលបានដាក់ចេញ ដោយអនុលោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក៏បានដាក់ចេញសសរស្តម្ភចំនួន៣ គឺភាពស្អាត ភាពបៃតង និងចីរភាព។ អ្នកនាំពាក្យក្រសួងបរិស្ថាន បានឱ្យដឹងដែរថា ចំពោះភាពស្អាត គឺក្រសួងបរិស្ថាន បានធ្វើការផ្សព្វផ្សាយ ដាក់ចេញជាយុទ្ធនាការ និងអនុវត្តសកម្មភាព ដើម្បឱ្យកម្ពុជាមានភាពស្អាតទាំងនៅលើផ្ទៃដី ភាពស្អាតក្នុងទឹក និងភាពស្អាតលើមេឃ។ ចំពោះភាពស្អាតក្នុងទឹកនេះ ក្រសួងបរិស្ថានបានរួមបញ្ចូលយុទ្ធនាការទប់ស្កាត់ការបញ្ចេញសំណល់រាវបំពុលតំបន់ទឹកសាធារណៈ និងបរិស្ថាន។ កន្លងមកនេះ ម្ចាស់រោងចក្រ សហគ្រាសនិងក្រុមហ៊ុននានា បានចូលរួមជាបន្តបន្ទាប់បំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ ដើម្បីរួមគ្នាទប់ស្កាត់ការបញ្ចេញសំណល់រាវមិនត្រឹមត្រូវ នាំឱ្យមានការបំពុលតំបន់ទឹកសាធារណៈ ប៉ះពាល់ដល់បរិស្ថាននិងការរស់នៅរបស់ប្រជាពលរដ្ឋ។ ជាមួយគ្នានេះ ឯកឧត្តម ខ្វៃ អាទិត្យា បានថ្លែងថា ការទប់ស្កាត់ការបញ្ចេញសំណល់រាវដែលនាំឱ្យមានការបំពុលបរិស្ថាន បានចែងតាមច្បាប់ជាធរមានរបស់កម្ពុជា ក្នុងក្រមបរិស្ថាន និងធនធានធម្មជាតិ ត្រង់មាត្រា១៧៨ មាត្រា២៨៧ មាត្រា២៨៨ មាត្រា៨២៩ ទាក់ទងនឹង ការបញ្ចេញសំណល់ ឬសារធាតុបំពុលទៅក្នុងបរិស្ថាន មិនស្របតាមស្តង់ដារបញ្ចេញសំណល់រាវ ត្រង់មាត្រា៨៤៥ ការមិនអនុវត្តកាតព្វកិច្ចក្នុងការគ្រប់គ្រងសំណល់រាវ និងទឹកកខ្វក់។ លើសពីនេះ ការត្រួតពិនិត្យការបំពុលទឹក ការកាត់បន្ថយនិងទប់ស្កាត់ការបំពុលតំបន់ទឹកសារធារណៈ ក៏មានចែងក្នុងបទដ្ឋានគត្តិយុត្តមួយចំនួនផ្សេងទៀត ដែលបានចូលជាធរមាន របស់ព្រះរាជាណាចក្រកម្ពុជា។ សូមបញ្ជាក់ថា គិតត្រឹមខែតុលា ឆ្នាំ២០២៥នេះដែរ រោងចក្រ សហគ្រាស និងក្រុមហ៊ុនចំនួ៦១ ទីតាំង បានចុះកិច្ចសន្យា ក្នុងនោះមាន៤៨ទីតាំង បានបំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ នៅតាមទីតាំងរៀងៗខ្លួន៕

ក្រុមហ៊ុនផ្តល់សេវាកម្មបច្ចេកវិទ្យាទេសចរណ៍ដ៏ល្បី Simplenight ចាប់អារម្មណ៍លើសក្តានុពលទេសចរណ៍កម្ពុជា និងកាលានវុត្តភាពវិនិយោគទេសចរណ៍របស់កម្ពុជា

នាឱកាសដឹកនាំប្រតិភូជាន់ខ្ពស់ក្រសួងទេសចរណ៍ និងក្រុមប្រឹក្សាភិបាលសិក្សាទីផ្សារ និងផ្សព្វផ្សាយកម្ពុជា (CTB) អញ្ជើញចូលរួមពិព័រណ៍ទេសចរណ៍អន្តរជាតិ (World Travel Market) នាទីក្រុងឡុងដ៏ ចក្រភពអង់គ្លេស ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានទទួលជួបពិភាក្សាការងារជាមួយតំណាងក្រុមហ៊ុន Simplenight ដែលជាក្រុមហ៊ុនផ្តល់សេវាកម្មបច្ចេកវិទ្យាទេសចរណ៍ដ៏ធំ និងឈានមុខគេមួយលើពិភពលោក ដែលចង់ស្វែងយល់ពីកតា្តសុខសន្តិភាព សុវត្ថិភាព ស្ថិរភាពនយោបាយ សេដ្ឋកិច្ច សង្គមក្រោមការដឺកនំារបស់រាជរដ្ឋាភិបាល ព្រមទាំងបានជ្រាបពីសក្តានុពលទេសចរណ៍កម្ពុជាដ៏សំបូរបែប និងកាលានុវត្តភាពវិនិយោគលើវិស័យទេសចរណ៍។ ទន្ទឹមនឹងនោះដែរ ឯកឧត្តមរដ្ឋមន្រ្តី ក៏បានអញ្ជើញក្រុមហ៊ុនមកទស្សនកិច្ចនៅព្រះរាជាណាចក្រកម្ពុជាក្នុងពេលឆាប់ៗ ដើម្បីពិនិត្យផ្ទាល់ និងចូលរួមជួយផ្សព្វផ្សាយពីសក្តានុពលទេសចរណ៍កម្ពុជាដល់ប្រជាជនអង់គ្លេស និងពិភពលោកទាំងមូល។

ថ្ងៃលិចភ្នំបាខែង នៅតែជាជម្រើសពិសេសសម្រាប់ភ្ញៀវទេសចរមកលេងកម្សាន្តនៅលើទឹកដីអង្គរ

ភ្ញៀវទេសចរជាតិ និងអន្តរជាតិ ធ្វើដំណើរដោយថ្មើរជើង ដើម្បីឡើងទៅដល់កំពូលភ្នំបាខែង ព្រោះនៅកំពូលភ្នំនេះមានទិដ្ឋភាពដ៏ស្រស់ស្អាតជាច្រើនកន្លែងសម្រាប់មើលថ្ងៃរៀបលិចនៅកំពូលប្រាសាទ។ ទេសចរបានមកអង្គុយរងចាំទស្សនាទិដ្ឋភាពថ្ងៃរៀបលិច នៅបរិវេណប្រាសាទ ជាមួយសកម្មភាពផ្តិតយករូបភាពដ៏ស្រស់ស្អាតនេះ នាថ្ងៃទី០៥វិច្ឆិកា ឆ្នាំ២០២៥។ ទោះបី មានរលឹមស្រិចៗ មិនឃើញច្បាស់ពន្លឺព្រះអាទិត្យ ប៉ុន្ដែ អ្នកទេសចរ មិនខកបំណងឡើយ ព្រោះវាព្រឹត្ដិការណ៍មួយអស្ចារ្យដែលកម្រឃើញ។ពួកគាត់នៅតែមានអារម្មណ៍រំភើប និងសប្បាយរីករាយ ដែលបានទៅទស្សនាប្រាសាទភ្នំបាខែងនាថ្ងៃរៀបលិច៕

ថ្ងៃទី២ នៃពិធីបុណ្យអុំទូក ខេត្តសៀមរាបមានភ្ញៀវទេសចរជាតិ និងអន្តរជាតិជិត ២០ម៉ឺននាក់មកលេងកម្សាន្ត

បើតាមរបាយការណ៍មន្ទីរទេសចរណ៍ខេត្ត បានបង្ហាញថា នៅថ្ងៃទី៥ ខែវិច្ឆិកា ឆ្នាំ២០២៥ ដែលជាថ្ងៃទី២ នៃពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខេត្តសៀមរាប ទទួលបានភ្ញៀវទេសចរជាតិ និងអន្តរជាតិចំនួនជាង ១៩៩ ០០០នាក់ កើនឡើង ៣.៧៦ភាគរយ បើប្រៀបធៀបរយៈពេលដូចគ្នាឆ្នាំ២០២៥ ដែលមានចំនួន ១៩១ ៨៦៣ នាក់។របាយការណ៍ដដែលបង្ហាញថា ក្នុងចំណោមភ្ញៀវទេសចរជាតិ និងអន្តរជាតិចំនួនជាង ១៩៩ ០០០នាក់នេះ មានភ្ញៀវទេសចរជាតិ និងបងប្អូនប្រជាពលរដ្ឋក្នុងខេត្តសៀមរាប ចំនួនប្រមាណ ១៩៥ ៥៦០ នាក់ កើនឡើង ៤.៥៨% ធៀបនឹងរយៈពេលដូចគ្នាឆ្នាំ២០២៤ ចំនួន ១៨៧ ០០០ នាក់។ ដោយឡែក ទេសចរបរទេសមានចំនួន ៣ ៥២០ នាក់ ថយចុះ ២៧.៦២% ធៀបនឹងរយៈពេលដូចគ្នាឆ្នាំ២០២៤ ចំនួន ៤ ៨៦៣ នាក់។សរុបជារួមរយៈពេល ២ថ្ងៃ គឺថ្ងៃទី៤-៥ ខែវិច្ឆិកា ឆ្នាំ២០២៥ ខេត្តសៀមរាប ទទួលបានទេសចរសរុប ២៨៩ ៧៨១ នាក់ កើនឡើង ៣.៨៧% បើប្រៀបធៀបនឹងរយៈពេលដូចគ្នាឆ្នាំ២០២៤ ដែលមានចំនួន ២៧៨ ៩៨២ នាក់។សូមជម្រាបថា ដើម្បីអបអរព្រះរាជពិធីបុណ្យអុំទូក ឆ្នាំ២០២៥នេះ ខេត្តសៀមរាប បានរៀបចំកម្មវិធីកម្សាន្ត និងសាសនាជាច្រើនរួមមាន៖ កម្មវិធីជិះទូកកម្សាន្ត និង ការប្រណាំងទូកមិត្តភាពសៀមរាបផ្ទះខ្ញុំ, ការប្រណាំងក្រឡោ, កម្មវិធីប្រគុំតន្ត្រីស្គរដៃ, កម្មវិធីស្ដង់ពិព័រណ៍ និងម្ហូបអាហារ, ផ្សារបណ្ដែតទឹក និង Street Food, កម្មវិធីប្រដាល់គុនខ្មែរ និងល្ខោនបាសាក់ និងពិធីបណ្ដែតប្រទីប សំពះព្រះខែ និងអកអំបុក ផងដែរ៕

ប្រជាជនឃុំកោះថ្កូវ បានរៀបចំពិធីប្រណាំងទូកនៅភូមិតាមុលលើ តាមវ្បធម៌ប្រពៃណីយ៉ាងសប្បាយអ៉ឺងកង

កំពង់ឆ្នាំង : ឯកឧត្តម គឹម វាសនា ប្រធានក្រុមការងាររាជរដ្ឋាភិបាលថ្នាក់កណ្តាលចុះឃុំកោះថ្កូវ ស្រុកជលគីរី ខេត្តកំពង់ឆ្នាំង លោក ដូវ គឹមស៊ីន អភិបាលស្រុកជលគីរី និងបងប្អូនប្រជាពលរដ្ឋក្នុងឃុំកោះថ្កូវ នាថ្ងៃទី០៥ ខែវិច្ឆិកា ឆ្នាំ២០២៥នេះ បានរៀបចំពិធីប្រណាំងទូកង ដែលបានធ្វើឡើងនៅក្នុងភូមិតាមុលលើ ឃុំកោះថ្កូវ ស្រុកជលគីរី ដើម្បីអបអរសាទរ ព្រះរាជពិធីបុណ្យអុំទូក បណ្តែតប្រទីប អកអំបុក សំពះព្រះខែ ឆ្នាំ២០២៥ ។ក្នុងឆ្នាំ២០២៥នេះ បើទោះជាមិនបានធ្វើពិធីប្រណាំងទូកធំនៅមុខព្រះបរមរាជវាំងក៏ដោយ ក៏ប្រជាជននៅតាមមូលដ្ឋាន បានរៀបចំពិធីប្រណាំងទូកនៅតាមមូលដ្ឋានផងដែរ ដើម្បីអោយយុវជនជំនាន់ក្រោយបានស្គាល់ និងបានដឹងនូវប្រពៃណីទំនៀមទំលាប់របស់ខ្មែរតាំងពីបូរាណ។ ប្រជាជនឃុំកោះថ្កូវ ស្រុកជលគីរី ខេត្តកំពង់ឆ្នាំង និងថ្នាក់ដឹកនាំ បានធ្វើពិធីប្រណាំងទូកនៅឆ្នាំនេះ មានទូកងចូលរួមមកពីបណ្តាឃុំជាច្រើននៅក្នុងស្រុកជលគីរី និងបានបង្ហាញនូវភាពសប្បាយរីករាយក្នុងម្លប់សុខសន្តិភាពផងដែរ៕ កាំង ហុងវាស្នា

បណ្ដាញសង្គម

ព័ត៌មានថ្មីៗ

ក្រុមអ្នកសង្កេតការណ៍អាស៊ាន បន្តចុះសង្កេតការណ៍ស្ថានភាពព្រំដែននៅតំបន់អូរភ្លុកដំរី ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ ទីតាំងរងការវាយប្រហារ និងកំពុងកាន់កាប់ដោយខុសច្បាប់ដោយយោធាថៃ

ឯកអគ្គរដ្ឋទូត៖ ប៉ាគីស្ថាននៅតែរក្សាទំនាក់ទំនងជាមួយរុស្ស៊ីជុំវិញបញ្ហាអ៊ីរ៉ង់

CENTCOM៖ សហរដ្ឋអាមេរិកបានបាញ់ទម្លាក់មីស៊ីលអ៊ីរ៉ង់ដែលបាញ់ឆ្ពោះទៅប្រទេសកូវ៉ែត និងបារ៉ែន

ឃាតកម្មចាក់សម្លាប់មនុស្សរួចយកសពប្លុងចោលក្នុងរថយន្តនៅខណ្ឌដង្កោ កម្លាំងសមត្ថកិច្ចឃាត់ខ្លួនក្រុមឃាតកបាន០៤នាក់

ឱកាសការងារជាង ៩ពាន់កន្លែង អត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តបាត់ដំបង ក្នុងស្មារតី «ខ្មែរជួយរកការងារ និងផ្ដល់ការងារឱ្យខ្មែរ»

លោក PUTIN៖ រុស្ស៊ីនឹងបន្តសាងសង់រោងចក្រនុយក្លេអ៊ែរនៅក្នុងប្រទេសអ៊ីរ៉ង់ នៅពេលស្ថានការណ៍ស្ងប់ស្ងាត់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877