BTV NEWS

២០ថ្ងៃហើយដែលទាហានកម្ពុជា ត្រូវបានភាគីថៃចាប់ទៅដោយខុសច្បាប់ ប៉ុន្តែកម្ពុជានិងសហគមន៍អន្តរជាតិ បន្តអំពាវនាវឲ្យថៃដោះលែងពួកគេមកវិញជាបន្ទាន់

ព្រះសង្ឃ និងពុទ្ធបរិសទ្ធនៅសៀមរាប រួមគ្នាយកអំណោយចែកជូនវីរកងទ័ពនៅព្រំដែនកម្ពុជា-ថៃ

សម្ដេច ម៉ែន សំអន អញ្ជើញចូលថ្វាយបង្គំ ថ្វាយភួងផ្កា ថ្វាយរបាំ ដល់ព្រះប្រតិមាទើបប្រទះឃើញ នៅសារមន្ទីរខេត្តកំពង់ធំ

សម្តេច ម៉ែន សំអន អញ្ជើញបួងសួងសុំសេចក្តីសុខ សេចក្តីចម្រើនជូនជាតិ និងប្រជាពលរដ្ឋ នៅប្រាសាទសំបូរព្រៃគុក

ព័ត៌មានជាតិ

ក្រសួងការបរទេសកម្ពុជា កោះអញ្ជើញអង្គទូតបរទេសប្រចាំកម្ពុជា ពន្យល់ពីស្ថានភាពជម្លោះព្រំដែនកម្ពុជា-ថៃ

ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៥ ខែកក្កដា ឆ្នាំ២០២៥ បានកោះអញ្ជើញបណ្ដាអង្គទូតបរទេស ប្រចាំនៅកម្ពុជា ដើម្បីធ្វើការពន្យល់អំពីស្ថានភាព នៃជម្លោះព្រំដែនរវាងកម្ពុជា-ថៃ ខណៈបណ្ដាអង្គទូតទាំងអស់នោះ បានបង្ហាញនូវក្តីព្រួយបារម្ភ ពីការរីករាលដាលនៃជម្លោះ និងផលប៉ះពាល់ ។ក្នុងសន្និសីទសារព័ត៌មាន បន្ទាប់ពីកិច្ចប្រជុំនេះ ឯកឧត្តម គង់ ភោគ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានលើកឡើងថា នៅចំពោះមុខអង្គទូតទាំង ៥១រូប ឯកឧត្តម ប្រាក់ សុខុន បានពន្យល់ប្រាប់ចំនួន៤ចំណុច ទី១. ការថ្កោលទោសរបស់កម្ពុជា អំពីការឈ្លានពានរបស់ថៃ និងហេតុការណ៍កំពុងកើតឡើង, ទី២. ការឆ្លើយតបរបស់កម្ពុជាលើការឈ្លានពានរបស់ថៃ, ទី៣. ដំណោះស្រាយនានារបស់ម្ពុជា លើការងារការទូតជាដើម និងទី៤. ការប្ដេជារបស់កម្ពុជា ប្រើប្រាស់យន្តការអន្តរជាតិ ដើម្បីដោះស្រាយ ។ឯកឧត្តម បានបន្តថា បន្ទាប់ពីបានស្ដាប់ការពន្យល់ អង្គទូតមួយចំនួនបានសួរនាំបន្ថែម ពីស្ថានភាពបច្ចុប្បន្ននៅជួរមុខ និងសម្ដែងនូវការព្រួយបារម្ភ ជាមួយនោះ ជំហររបស់ពួកគេក៏ដូចជាកម្ពុជាផងដែរ គឺចង់ឲ្យមានការចរចាដោយសន្តិវិធី ។ឯកឧត្តម គង់ ភោគ បានគូសបញ្ជាក់ថា ការឆ្លើយតបជាប្រដាប់វុធចំពោះការឈ្លានពាន គឺធ្វើស្របទៅតាមច្បាប់ ក្នុងន័យការពារខ្លួន ការពារបូរណភាពទឹកដី ហើយគោរពទៅតាមផែន ទីដែលបានកំណត់ ខណៈដែលភាគីថៃ កំពុងរំលោភច្បាប់អន្តរជាតិ ប្រើប្រាស់អាវុធធុនធ្ងន់ និងបាញ់ប្រហារក្នុងតំបន់ជនស៊ីវិល ធ្វើឲ្យមានស្លាប់ និងរបួស រួមទាំងមានការជម្លៀសពលរដ្ឋទៅកាន់ទីសុវត្ថិភាពរាប់ពាន់នាក់ ។គួរបញ្ជាក់ថា បន្ទាប់ពីមានការផ្ទុះអាវុធរវាងកម្ពុជា និងថៃ នៅតាមបន្ទាប់ព្រំដែន ក្នុងភូមិសាស្ត្រខេត្តឧត្តរមានជ័យ និងខេត្តព្រះវិហារ កាលពីថ្ងៃទី២៤ ខែកក្កដា ឆ្នាំ ២០២៥ម្សិលមិញ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់លិខិត ទៅអង្គការសហប្រជាជាតិ (UN) ដើម្បីជួយអន្តរាគមន៍ អំពីបញ្ហាជម្លោះប្រដាប់អាវុធនេះ ព្រោះកម្ពុជាត្រូវការសន្តិភាព និងចង់ដោះស្រាយតាមយន្តការអន្តរជាតិ ។ បើមិនមានអ្វីប្រែប្រួលទេនោះ នារសៀលថ្ងៃទី២៥ ខែកក្កដា ម៉ោងនៅសហរដ្ឋអាមេរិក នឹងមានកិច្ចប្រជុំបន្ទាន់នៃសមាជិកអង្គការសហប្រជាតិ ដើម្បីពិភាក្សាជម្លោះព្រំដែនកម្ពុជា-ថៃនេះ ៕ អត្ថបទ សុខរិទ្ធិ

ថ្ងៃទី២នៃដំណើរការឈ្លានពានរបស់ថៃ មកលើកម្ពុជា ទាហានថៃប្រើប្រាស់គ្រាប់បែកចង្កោម វាយប្រហារមកលើកម្ពុជា

អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានអះអាងថា ថ្ងៃទី២នៃដំណើរការទាហានឈ្លានពានថៃ មកលើកម្ពុជា ថៃបានបាញ់ប្រហារមកលើកម្ពុជាចំនួន ៧ទីតាំង ដោយប្រើប្រាស់កាំភ្លើងធំ យន្តហោះចម្បាំង និងប្រើប្រាស់គ្រាប់បែកចង្កោមផងដែរ ខណៈការប្រើប្រាស់អាវុធបែបនេះ គឺប្រឆាំងនឹងច្បាប់អន្តរជាតិ និងបង្ហាញអំពីភាពឃោឃៅ និងអមនុស្សធម៌របស់ថៃ។ក្នុងសន្និសីទសារព័ត៌មាន ព្រឹកថ្ងៃទី២៥ ខែកក្កដា ឆ្នាំ២០២៥នេះ ស្តីពីថ្ងៃទី២ នៃដំណើរការទាហានឈ្លានពានសៀមមកលើកម្ពុជា លោកជំទាវ ម៉ាលី សុជាតា បានលើកឡើងថា ថ្ងៃនេះថៃ បានបើកការវាយប្រហារមកលើកម្ពុជាទាំងកម្រោលចាប់តាំងពីម៉ោងបីទៀបភ្លឺ ដោយប្រើសុទ្ធតែអាវុធធន់ធ្ងន់ មានទាំង ការទម្លាក់គ្រាប់បែក តាមរយៈយន្តហោះ F-16 និងគ្រាប់បែកចង្កោមជាដើម។លោកជំទាវអ្នកនាំពាក្យ បានឲ្យដឹងទៀតថា ថ្ងៃទី២៥នេះថៃ បានចាប់ផ្តើមវាយប្រហារមកលើកម្ពុជា ដំបូងគេនៅតំបន់ភ្នំខ្មោចខេត្តព្រះវិហារ តាថាវ និង៣៣៣ និងតំបន់មួយចំនួនទៀត នៅប្រាសាទតាមាន់ តំបន់មុំបី និងចង់វាយដណ្តើមកាន់កាប់ប្រាសាទតាក្របីវិញ ប៉ុន្តែត្រូវបានទាហានខ្មែរបានតស៊ូយ៉ាងស្វិតស្វាញ ដោយវាយបកទៅវិញយ៉ាងស្វាហាបធ្វើឲ្យទាហានថៃបរាជ័យ។ជាមួយគ្នានោះដែរលោកជំទាវ ម៉ាលី សុជាតា ក៏បានលើកឡើងផងដែរថា ថៃបានប្រើប្រាស់គ្រាប់បែកចង្កោមវាយមកលើទាហានកម្ពុជានោះ គឺជាការខុសច្បាប់ គឺជាទង្វើឈ្លានពានយ៉ាងឃោឃៅ ដោយបានបំពានយ៉ាងធ្ងន់ធ្ងរទៅលើច្បាប់អន្តរជាតិ រួមទាំងអនុសញ្ញា ស្តីពីគ្រាប់បែកចង្កោម។ មួយវិញទៀត ការប្រើប្រាស់នូវអាវុធបែបនេះ មិនត្រឹមតែឃោឃៅ និងអមនុស្សធម៌ប៉ុណ្ណោះទេ ថែមទាំងបានឆ្លុះបញ្ចាំងឲ្យអន្តរជាតិមើលឃើញថា ថៃគ្មានខ្លាចក្រែងចំពោះច្បាប់មនុស្សធម៌ អន្តរជាតិនោះឡើយ។សូមបញ្ជាក់ថា នៅថ្ងៃទី២៥ ខែកក្កដានេះ ជាថ្ងៃទី២ហើយ ដែលទាហានថៃ បានធ្វើការឈ្លានពានមកលើទឹកដីកម្ពុជា ដោយបានបាញ់ប្រហារមកលើទាហានកម្ពុជា និងពលរដ្ឋខ្មែរស្លូតត្រង់ ហើយបានធ្វើឲ្យប្រជាជនកម្ពុជាស្លាប់ម្នាក់ និងរងរបួស៥នាក់ និងបានធ្វើពលរដ្ឋខ្មែរស្លូតត្រង់ធ្វើការភៀស សឹករាប់ពាន់គ្រួសារទៅរកទីកន្លែងសុវត្ថិភាព៕ អត្ថបទ បានចក់

អាជ្ញាធរមីនកម្ពុជា ថ្កោលទោសចំពោះទាហានថៃដែលប្រើប្រាស់គ្រាប់បែកចង្កោមបាញ់ប្រហារមកលើកម្ពុជា

អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(អាជ្ញាធរមីន) បានប្រកាសថ្កោលទោសយ៉ាងដាច់អហង្ការចំពោះទាហានឈ្លានពានថៃ ដែលបានប្រើប្រាស់គ្រាប់បែកចង្កោមបាញ់មកលើកម្ពុជា ខណៈគ្រាប់បែកចង្កោមនេះជាអាវុធមួយត្រូវបានហាមប្រាមដោយអន្តរជាតិនោះ។យោងតាមសេចក្តីថ្លែងការណ៍របស់អាជ្ញាធរមីន ដែលបានចេញនៅព្រឹកថ្ងៃទី២៥ ខែកក្កដា ឆ្នាំ ២០២៥នេះ បានបង្ហាញការព្រួយបារម្ភ និងថ្កោលទោសយ៉ាងខ្លាំងបំផុត បន្ទាប់ពីទទួលបានរបាយការណ៍ថា កងកម្លាំង ប្រដាប់អាវុធថៃបានប្រើប្រាស់គ្រាប់បែកចង្កោមនៅថ្ងៃនេះ គឺថ្ងៃទី២៥ ខែកក្កដា ឆ្នាំ២០២៥ នៅតំបន់ព្រំដែនក្នុងទឹកដីកម្ពុជា។សេចក្តីថ្លែងការណ៍របស់អាជ្ញាធរមីន បានលើកឡើងទៀតថា តាមព័ត៌មានបឋមដែលទទួលបានពីអាជ្ញាធរមូលដ្ឋាន និងក្រុមបច្ចេកទេសបោសសម្អាតមីន បានបញ្ជាក់ច្បាស់ថា មានគ្រាប់ជាច្រើន ដែលមានលក្ខណៈដូចទៅនឹងគ្រាប់បែកចង្កោមដែលហាមប្រាម ដោយអន្តរជាតិ ត្រូវបានប្រើប្រាស់ទៅលើទីតាំងភ្នំខ្មោច និងទីតាំងភូមិធម្មជាតិ ស្រុកជាំក្សាន្ត ដែលបង្កការគំរាមកំហែងចំពោះប្រជាជន ប្រតិបត្តិករបោសសម្អាតមីន និងសហគមន៍ក្នុងតំបន់ព្រំដែន។អាជ្ញាធរមីនកម្ពុជា បានហៅការប្រើប្រាស់គ្រាប់បែកចង្កោមពីសំណាក់ទាហានឈ្លានពានថៃមក លើកម្ពុជានេះ គឺជាទង្វើបំពានយ៉ាងធ្ងន់ធ្ងរចំពោះច្បាប់អន្តរជាតិ។ គ្រាប់បែកចង្កោមត្រូវ បានហាមប្រាម នៅក្រោមអនុសញ្ញាស្តីពីគ្រាប់បែកចង្កោមឆ្នាំ២០០៨ ដោសារតែគ្រាប់នេះ បង្កផលប៉ះពាល់ទៅលើផ្ទៃដីធំ និងបង្កគ្រោះថ្នាក់ចំពោះប្រជាជន ជាពិសេសក្មេងតូច។ កម្ពុជាបានយល់ច្បាស់អំពីផលប៉ះពាល់ ដ៏អាក្រក់របស់គ្រាប់ចង្កោម ដោយកម្ពុជាធ្លាប់ទទួលរងគ្រោះធ្ងន់ធ្ងរ ដោយសារគ្រាប់ប្រភេទនេះ ដែលបានទម្លាក់ជាច្រើនលានគ្រាប់នៅក្នុងសម័យសង្គ្រាម។ គ្រាប់បែកចង្កោមទាំងនេះ បានបង្កគ្រោះថ្នាក់ដល់អាយុជីវិតប្រជាជនរារាំងការអភិវឌ្ឍ និងបង្កភាពភ័យខ្លាចដល់សហគមន៍ជាច្រើនជំនាន់ទៅមុខទៀតផងដែរ។អាជ្ញាធរមីនបានគូសបញ្ជាក់បន្ថែមទៀតថា ការប្រើប្រាស់គ្រាប់បែកចង្កោមជាពិសេសនៅក្នុងតំបន់ព្រំដែនដែលមានប្រជាជនរស់នៅកកកុញនេះ«គឺជាទង្វើបំពានដែលមិនអាចទទួលយកបានឡើយ ព្រោះវាជាការមិនគោរពដល់អាយុជីវិតមនុស្ស គោលការណ៍មនុស្សធម៌ និងសន្តិភាពក្នុងតំបន់ជាដើម»។កម្ពុជាបានខិតខំប្រឹងប្រែងយ៉ាងខ្លាំង ក្នុងការបោសសម្អាតរាល់សំណល់ជាតិផ្ទុះពីសង្គ្រាម ក៏ប៉ុន្តែការប្រើប្រាស់គ្រាប់បែកចង្កោមនៅថ្ងៃនេះ ពិតជាបានគំរាមកំហែងដល់អាយុជីវិត និងកិច្ចសហប្រតិបត្តិការ និងទំនុកចិត្ត ដែលបានសាងមកអស់ រយៈពេលជាច្រើនទសវត្សរ៍មកហើយ។ យ៉ាងណាក៏ដោយតាមរយៈសេចក្តីថ្លែងការណ៍នេះអាជ្ញាធរមីន ក៏បានរំលឹកដល់គ្រប់ភាគីផងដែរថា វឌ្ឍនភាពសកម្មភាពមីន និងសន្តិភាពក្នុងតំបន់ អាចសម្រេចបានតាមរយៈកិច្ចសន្ទនា ការគោរពគ្នាទៅវិញទៅមក និងការបដិសេធដាច់ខាតចំពោះ អំពើហឹង្សា និងការប្រើប្រាស់កម្លាំងយោធា។ អាជ្ញាធរមីន សូមបញ្ជាក់ជាថ្មីនូវការប្ដេជ្ញាចិត្តរបស់ខ្លួនចំពោះតម្លាភាព និងគណនេយ្យភាព និងស្នើអញ្ជើញដល់សហគមន៍អន្តរជាតិ រួមទាំអង្គការសហប្រជាជាតិ អាស៊ាន និងគ្រប់ស្ថាប័នពាក់ព័ន្ធទៅនឹងការរំសាយអាវុធមនុស្សធម៌ ចូលរួមតាមដានស្ថានការណ៍។ អាជ្ញាធរមីន «ថៃត្រូវតែបញ្ឈប់រាល់សកម្មភាពនេះជាបន្ទាន់ និងត្រូវរក្សានូវគោលការណ៍ច្បាប់មនុស្សធម៌អន្តរជាតិតាមរយៈកិច្ចសន្ទនាដោយសន្តិវិធី»៕ អត្ថបទ៖ បាន ចក់

ដំណឹងបន្ទាន់ !! រដ្ឋបាលខេត្តប៉ៃលិនអំពាវនាវពលរដ្ឋខ្មែរដែលកំពុងស្នាក់នៅ និងធ្វើការនៅប្រទេសថៃ វិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ

រដ្ឋបាលខេត្តប៉ៃលិន សូមជម្រាបដល់បងប្អូនពលករខ្មែរ និងប្រជាពលរដ្ឋខ្មែរ ដែលកំពុងស្នាក់នៅ និងធ្វើការនៅក្នុងប្រទេសថៃ ដោយស្ថានភាពមិនល្អបច្ចុប្បន្នបើមិនមានការចាំបាច់ សូមប្រញាប់វិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ ខេត្តប៉ៃលិន។ រដ្ឋបាលខេត្តបានរៀបចំក្រុមការងាររង់ចាំជួយសម្របសម្រួលជួយបងប្អូនពលករ «ទោះបីមានឯកសារ ឬគ្មានឯកសារ» និងត្រៀមរថយន្តក្រុង សម្រាប់ជូនបងប្អូនវិលត្រឡប់ទៅស្រុកកំណើត ដល់លំនៅដ្ឋានគ្រប់ខេត្ត/ក្រុង ទូទាំងព្រះរាជាណាចក្រកម្ពុជា ដោយឥតគិតថ្លៃ។ចំពោះករណីបងប្អូនពលករខ្មែរ កំពុងស្ថិតនៅក្នុងប្រទេសថៃ ជួបបញ្ហាផ្សេងៗ ឬ មិនទាន់បើកប្រាក់ខែ និងគ្មានមធ្យាបាយធ្វើដំណើរមកដល់ព្រំដែនកម្ពុជាយើង តែមានបំណងចង់វិលត្រឡប់ទៅស្រុកកំណើត សូមទំនាក់ទំនងតាមរយៈលេខទូរស័ព្ទ 0975 79 78 78 / 088 369 6666 នោះក្រុមការងារនឹងរង់ចាំជួយសម្របសម្រួលជួយដោយឆន្ទះខ្មែរតែមួយ៕

ក្រសួងការពារជាតិកម្ពុជា ទាត់ចោលព័ត៌មានថៃ ផ្សាយថាទាហានឈ្លានពានថៃ កាន់កាប់តំបន់ប្រាសាទព្រះវិហារ

អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានធ្វើការទាត់ចោលទាំងស្រុង ចំពោះសារព័ត៌មានថៃ ដែលបានផ្សាយថា ទាហានឈ្លានពានថៃ បានកាន់កាប់វត្តកែវសិក្ខាគិរីស្វរៈ និងតំបន់ប្រាសាទព្រះវិហារ របស់កម្ពុជា ខណៈតំបន់ទាំងនោះ ទាហានកម្ពុជាបានកំពុងឈរជើងយ៉ាងរឹងមាំ និងស្វាហាប់បំផុតនោះ។ថ្លែងនៅក្នុងសន្និសីទសារព័ត៌មាន ស្តីពីដំណើរការថ្ងៃទី២ នៃការឈ្លានពានរបស់ទាហានថៃមកលើ កម្ពុជា នាព្រឹកថ្ងៃទី២៥ ខែកក្កដា ឆ្នាំ២០២៥នេះ លោកជំទាវ ម៉ាលី សុជាតា បានបញ្ជាក់ថា សារព័ត៌មានថៃ បានធ្វើការផ្សព្វផ្សាយព័ត៌មានមិនពិត ប្រឌិត បំភ្លើស បំភ្លៃ ដែលបានផ្សាយថា ទាហានឈ្លានពានរបស់ ខ្លួនកាន់កាប់តំបន់ប្រាសាទព្រះវិហាររបស់ខ្មែរ ខណៈដែលទាហានខ្មែរ កំពុងឈរជើងនៅទីនោះ។បើតាមលោកជំទាវឧត្តមសេនីយ៍ឯក ម៉ាលី សុជាតា ក៏បានប្រកាសផងដែរថា រហូតមកដល់ពេលទាហានកម្ពុជា បានគ្រប់គ្រងស្ថានការណ៍បានយ៉ាងល្អ និងរឹងមាំបំផុត ដោយគ្មានការរាថយ គ្រប់ទីតាំងទាំងអស់ ដែលទាហានឈ្លានពានថៃ ធ្វើការបាញ់ប្រហារទាហានខ្មែរ និងជនស៊ីវិលខ្មែរ៕អត្ថបទ៖ បាន ចក់

រដ្ឋបាលខេត្តសៀមរាប ត្រៀមសម្របសម្រួលកន្លែងស្នាក់នៅ និងផ្គត់ផ្គង់អាហារជូនបងប្អូនភៀសខ្លួនពីខេត្តឧត្តរមានជ័យ និងខេត្តព្រះវិហារ

នៅថ្ងៃទី២៤ ខែកក្កដា ឆ្នាំ២០២៥ រដ្ឋបាលខេត្តសៀមរាប ចេញសេចក្ដីជូនដំណឹងដល់បងប្អូនប្រជាពលរដ្ឋទាំងអស់ដែលត្រូវជម្លៀសខ្លួនពីខេត្តឧត្តរមានជ័យ និងខេត្តព្រះវិហារ ដោយខេត្តបានត្រៀមសម្របសម្រួលកន្លែងស្នាក់នៅ និងផ្គត់ផ្គង់អាហារជូនពុកម៉ែបងប្អូន។ប្រជាពលរដ្ឋមកពីខេត្តឧត្តរមានជ័យ និងខេត្តព្រះវិហារ ដែលត្រូវជម្លៀសខ្លួនមកកាន់ ខេត្តសៀមរាបអាចធ្វើការទំនាក់ទំនងដូចខាងក្រោម៖១-រដ្ឋបាលស្រុកស្វាយលើ (ជាប់ព្រំប្រទល់ខេត្តព្រះវិហារ) លេខទូរស័ព្ទ ០៧៨ ២៥៤ ២៨៩២-រដ្ឋបាលស្រុកស្រីស្នំ (ជាប់ព្រំទល់ខេត្ត ឧត្តរមានជ័យ) លេខទូរស័ព្ទ ០៩៧ ៩ ៧២៤ ៥៣៤៣-រដ្ឋបាលស្រុកក្រឡាញ់( ស្របទិសខេត្តឧត្តរមានជ័យ)លេខទូរស័ព្ទ ០១២ ៦៣៤ ៧០៤ ឬលេខទូរស័ព្ទ ០៩២ ៦៩២ ៨៩៦

TOP STORY | សម្ដេចតេជោ៖ថាក់ សុីន ប្រើប្រាស់សង្រ្គាមដើម្បីសងសឹក ហ៊ុន សែន ដែលលទ្ធផលចុងក្រោយគឺប្រជាជនជាអ្នករងគ្រោះ

ភ្នំពេញ៖ សម្ដេចតេជោ ហ៊ុន សែន នៅយប់ថ្ងៃទី២៤ ខែកក្កដានេះ បានបង្ហោះសារញ្ជាក់ថា ថាក់ សុីន បានប្រើប្រាស់សង្រ្គាមដើម្បីសងសឹក ហ៊ុន សែន ដែលលទ្ធផលចុងក្រោយ គឺប្រជាជនជាអ្នករងគ្រោះសម្ដេចតេជោសរសេរថា មុននេះ ថាក់ សុីន បង្ហោះសារដែលមានចរិតប្រើប្រាស់សង្រ្គាម ដើម្បីប្រដៅ ហ៊ុន សែន។ សំដីរបស់ ថាក់ សុីន កាន់តែបង្ហាញច្បាស់នូវការឈ្លានពានកម្ពុជា ពីសំណាក់កងទ័ពថៃមកលើកម្ពុជា។ សម្ដេចថ្លែងថា ខ្ញុំមិនចម្លែកទេសម្រាប់ចរិតរបស់ ថាក់ សុីន មកលើខ្ញុំព្រោះ សូម្បីតែព្រះមហាក្សត្រថៃ ក៏គាត់ក្បត់មនុស្សក្នុងបក្សគាត់ក៏គាត់ក្បត់ និងរឿងកាន់តែអាក្រក់ គឺគាត់ធ្លាប់សម្លាប់ប្រជាជនថៃកាន់សាសនាឥស្លាម នៅខេត្តភាគត្បូងរាប់រយនាក់កាលពីឆ្នាំ២០០៤។ សម្ដេចតេជោបន្តថា ពេលនេះក្រោមហេតុផលសងសឹក ហ៊ុន សែន គាត់ប្រើសង្រ្គាមដែលលទ្ធផលចុងក្រោយ គឺប្រជាជនជាអ្នករងគ្រោះ។

ប្រធានអាស៊ានប្តូរវេន អំពាវនាវដល់មេដឹកនាំកម្ពុជា និងថៃ អនុវត្តបទឈប់បាញ់ជាបន្ទាន់ និងសន្ទនាដោយសន្តិវិធី

ប្រធានអាស៊ានប្តូរវេន អំពាវនាវដល់មេដឹកនាំកម្ពុជា និងថៃ អនុវត្តបទឈប់បាញ់ជាបន្ទាន់ និងសន្ទនាដោយសន្តិវិធីនាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ក្នុងឋានៈជាប្រធានអាស៊ានប្តូរវេនបាន អំពាវនាវដល់មេដឹកនាំកម្ពុជា និងថៃ អនុវត្តបទឈប់បាញ់ជាបន្ទាន់ និងសន្ទនាដោយសន្តិវិធី និងដំណោះស្រាយការទូត។លោក អានវ៉ា អ៊ីប្រាហ៊ីម បានសរសេរលើបណ្ដាញសង្គមរបស់លោកថា ល្ងាចនេះ លោកបានទាក់ទងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឧបនាយករដ្ឋមន្ត្រី រដ្ឋាភិបាលថៃ Phumtham Wechayachai ដើម្បីបញ្ចេញក្តីបារម្ភរបស់ម៉ាឡេស៊ី ជុំវិញភាពតានតឹងកើនឡើង នៅតាមព្រំដែននៃប្រទេសទាំងពីរ។លោក អានវ៉ា អ៊ីប្រាហ៊ីម បន្តថា នៅក្នុងកិច្ចសន្ទនានោះ ស្តីពីសមត្ថភាពម៉ាឡេស៊ីក្នុងនាមជាប្រធានអាស៊ានសម្រាប់ឆ្នាំ ២០២៥ លោកបានអំពាវនាវដល់មេដឹកនាំទាំងពីរឱ្យអនុវត្តបទឈប់បាញ់ជាបន្ទាន់ ដើម្បីចៀសវាងជម្លោះកាន់តែធ្ងន់ធ្ងរ និងបើកកន្លែងសម្រាប់កិច្ចសន្ទនាដោយសន្តិវិធី និងដំណោះស្រាយការទូត។លោក អានវ៉ា អ៊ីប្រាហ៊ីម ប្រកាសស្វាគមន៍ កាយវិការ និងឆន្ទៈវិជ្ជមាន បង្ហាញដោយទីក្រុងបាងកក និងទីក្រុងភ្នំពេញ ក្នុងការពិចារណាអំពីរឿងនេះ។ ម៉ាឡេស៊ីត្រៀមខ្លួនរួចជាស្រេចក្នុងការជួយ និងសម្របសម្រួលដល់ដំណើរការនេះ ក្នុងស្មារតីសាមគ្គីភាពអាស៊ាន និងការទទួលខុសត្រូវរួមគ្នា។លោក អានវ៉ា អ៊ីប្រាហ៊ីម ជឿជាក់យ៉ាងមុតមាំថា កម្លាំងរបស់អាស៊ានស្ថិតនៅលើសាមគ្គីភាព ហើយសន្តិភាពត្រូវតែជាជម្រើសរួមដែលមិនទាន់បែកបាក់របស់យើងជានិច្ច៕

ទេសរដ្ឋមន្រ្តី គន់ គីម ចុះសួរសុខទុក្ខ និងរៀបចំបញ្ជូនអំណោយជូនជនភៀសសឹកក្នុងខេត្តឧត្តរមានជ័យ

ឧត្តរមនជ័យ៖ នារសៀលថ្ងៃទី២៤ ខែកក្កដា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងារចុះសួរសុខទុក្ខ និងពិនិត្យស្ថានភាពស្នាក់នៅបណ្តោះអាសន្នជនភៀសសឹក នៅវត្តភ្នំកំបោរ ឃុំបេង ស្រុកបន្ទាយអពិល ខេត្តឧត្តរមានជ័យ ព្រមទាំងបានផ្តល់តង់សម្រាប់ប្រើប្រាស់ និងរៀបចំបញ្ជូនគ្រឿងឧបភោគ បរិភោគជូនប្រជាពលរដ្ឋ។ការចុះពិនិត្យនេះ មានការចូលរួមពី ឯកឧត្តម មាន ចាន់យ៉ាដា អភិបាលខេត្ត, លោកឧត្តមសេនីយ៍ ខូវ លី ស្នងការនគរបាលខេត្ត, អាជ្ញាធរមូលដ្ឋាន និងកងកម្លាំងទាំងបី។នាឱកាសនោះ ឯកឧត្តម ទេសរដ្ឋមន្រ្តី គន់ គីម បាននាំយកការផ្តាំផ្ញើសាកសួរសុខទុក្ខរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្រ្តី ជូនបងប្អូនប្រជាពលរដ្ឋជាជនភៀសសឹកទាំងអស់ ដែលត្រូវបានជម្លៀសដោយការវាយប្រហារ ឈ្លានពានរបស់កងទ័ពថៃ។អំឡុងពេលចុះពិនិត្យនេះ ឯកឧត្តម ទេសរដ្ឋមន្រ្តី គន់ គីម មានប្រសាសន៍ថា តបតាមអនុសាសន៍របស់សម្តេចតេជោ ហ៊ុន សែន ប្រធានព្រឹទ្ធសភា និងតបតាមបទបញ្ជារបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តី ស្អែកនេះ រាជរដ្ឋាភិបាភិបាលនឹងដឹកជញ្ជូនអំណោយជាស្បៀង មានដូចជា គ្រឿងឧបភោគ បរិភោគ និងសម្ភាៈប្រើប្រាស់ជាឃីត រួមមាន មុង ភួយជាដើម សម្រាបចែកជូនប្រជាពលរដ្ឋ។ ក្នុងនាមសម្តេចបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម ទេសរដ្ឋមន្រ្តី គន់ គីម បញ្ជាក់ថា យោងតាមសភាពការណ៍នេះ រាជរដ្ឋាភិបាលបន្តរក្សាគោលជំហរ និងភាពម៉ឺងម៉ាត់ការពារបូរណភាពទឹកដីពីការឈ្លានពានរបស់កងទ័ពថៃ ពិសេសក៏បានគិតគូរយ៉ាងយកចិត្តទុកដាក់ចំពោះសុវត្ថិភាព និងអាយុជីវិតរបស់បងប្អូនប្រជាពលរដ្ឋតាមបន្ទាត់ព្រំដែនកម្ពុជា ថៃ។បន្ថែមលើនេះ ឯកឧត្តម ទេសរដ្ឋមន្រ្តី គន់ គីម ណែនាំដល់ជនភៀសសឹកទាំងអស់ត្រូវថែទាំសុខភាពឱ្យបានល្អ ក្នុងករណីមានបញ្ហាឈឺស្កាត់ ឬត្រូវការសេវាពិនិត្យសុខភាពអាចទាក់ទងក្រុមគ្រូពេទ្យ និងអាជ្ញាធរមូលដ្ឋានដែលប្រចាំការនៅវត្តកំបោរ។ឯកឧត្តម ទេសរដ្ឋមន្រ្តី គន់ គីម បានស្នើដល់រដ្ឋបាលខេត្ត អាជ្ញាធរមូលដ្ឋាន កងកម្លាំងទាំងអស់ និងមន្រ្តីពាក់ព័ន្ធត្រូវរៀបចំ និងដោះស្រាយនូវរាល់សេចក្តីត្រូវការបន្ទាន់ណាមួយជូនជនភៀសសឹក ពិសេសស្រ្តីមានផ្ទៃពោះ និងកុមារជាដើម៕

ថៃបាននឹងកំពុងប្រព្រឹត្តឧក្រិដ្ឋកម្មធ្ងន់ធ្ងរប្រឆាំងនឹងបេតិកភណ្ឌពិភពលោក និងរំលោភបំពានច្បាប់អន្តរជាតិ

ថៃបាននិងកំពុងប្រព្រឹត្តឧក្រិដ្ឋកម្មធ្ងន់ធ្ងរប្រឆាំងនឹងបេតិកភណ្ឌពិភពលោក និងការរំលោភបំពានច្បាប់អន្តរជាតិដោយការបាញ់គ្រាប់ផ្លោង និងការទំលាក់គ្រាប់បែកពីលើយន្តហោះប៉ះពាល់ដល់ប្រាង្គប្រាសាទព្រះវិហារដែលជាបេតិកភណ្ឌពិភពលោក, កងទ័ពឈ្លានពានថៃបានប្រើប្រាស់យន្តហោះទម្លាក់គ្រាប់បែកបំផ្លាញវត្តអារាម និងមណ្ឌលសុខភាពដែលជាកន្លែងប្រារព្ធជំនឿសាសនានិងព្យាបាលពលរដ្ឋ។ យោងតាមមន្ត្រីអាជ្ញាធរមូលដ្ឋាន នៅវេលាម៉ោង៥.៣០នាទីរសៀលមានយន្ដហោះថៃ F16 មួយគ្រឿង បានមកទម្លាក់គ្រាប់មកលើវត្តតាមាន់សែនជ័យ និងមណ្ឌលសុខភាពតាសែនជ័យ ស្ថិតនៅភូមិតាសែនជ័យ ឃុំគោកមន ស្រុកបន្ទាយអំពិលខេត្តឧត្ដរមានជ័យ បង្កឱ្យមានការខូចខាត។ នេះជាការរំលោភពបំពានច្បាប់អន្តរជាតិយ៉ាងធ្ងន់ធ្ងររបស់ថៃ។ កងទ័ពថៃ ដែលនៅព្រឹកថ្ងៃទី២៤ ខែកក្កដា ឆ្នាំ២០២៥ នេះ បានបើកការវាយប្រហារមកលើកងទ័ពកម្ពុជានៅប្រាសាទតាមាន់ធំ និងនៅទីតាំង ៥ កន្លែងផ្សេងទៀតដែលបង្ហាញពីការឈ្លានពានបូរណភាពទឹកដី នៃព្រះរាជាណាចក្រកម្ពុជា៕

បណ្ដាញសង្គម

ព័ត៌មានថ្មីៗ

មេដឹកនាំអឺរ៉ុប នឹងចូលរួមជាមួយប្រធានាធិបតីអ៊ុយក្រែន Zelenskyy ក្នុងកិច្ចប្រជុំជាមួយលោក Trump

លោក Trump នឹងជួបលោកZelensky នៅអាមេរិក បន្ទាប់ពីកិច្ចពិភាក្សាដោយជោគជ័យ ជាមួយលោក Putin

ចំនួនអ្នកស្លាប់កើនឡើង ខណៈចំហេះព្រៃនៅតែបន្តឆាបឆេះពាសពេញអឺរ៉ុបភាគខាងត្បូង

ទឹកជំនន់នៅភាគខាងជើងប្រទេសចិន សម្លាប់មនុស្ស៨នាក់ និងបាត់ខ្លួន៤នាក់

បណ្ដាប្រទេសអារ៉ាប់ និងឥស្លាម ថ្កោលទោសការលើកឡើងរបស់លោក Netanyahu ដែលចង់ពង្រីកអ៊ីស្រាអែលកាន់តែអស្ចារ្យ

BREAKING NEWS! រញ្ជួយដីដ៏ខ្លាំងក្លាវាយប្រហារឥណ្ឌូនេស៊ី បានបណ្តាលឲ្យមនុស្សរាប់សិបនាក់រងរបួស និងពីរនាក់របួសធ្ងន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877