BTV NEWS

ប្រធានាធិបតីបារាំង៖ រវាងកម្ពុជា និងបារាំងមានប្រវត្តិសាស្ត្ររួមគ្នាដ៏ជ្រាលជ្រៅដែលកំពុងតែរីកចម្រើនកាន់តែរឹងមាំថែមទៀត ក្នុងវិស័យថាមពល សុខាភិបាល ក៏ដូចជាវិស័យបេតិកភណ្ឌ

មន្រ្តីជំនាញក្រសួងអភិវឌ្ឍន៍ជនបទ ចុះពិនិត្យវឌ្ឍនភាពការងារសាងសង់ផ្លូវជនបទ ចំនួន ៤ស្រុកក្នុងខេត្តបន្ទាយមានជ័យ

សម្តេចមហារដ្ឋសភាធិការធិបតី អញ្ជើញចូលគោរពជូនពរសម្តេចអគ្គមហាពញាចក្រី និងសម្តេចធម្មវិសុទ្ធវង្សា ក្នុងឱកាសបុណ្យចូលឆ្នាំថ្មី ប្រពៃណីជាតិ

រដ្ឋមន្រ្តីក្រសួងបរិស្ថានគាំទ្រវិស័យឯកជន អនុវត្តការវិនិយោគស្អាត ដើម្បីទទួលបានការរីកចម្រើន និងធានាការការពារសុខភាពសាធារណៈ និងបរិស្ថានជាតិដោយចីរភាព

ព័ត៌មានជាតិ

សម្ដេចធិបតី នាយករដ្ឋមន្រ្ដី បញ្ជាឱ្យរដ្ឋមន្រ្ដីក្រសួងការងារ ប្រជុំជាមួយតំណាងនិយោជក និងសហជីព ដើម្បីដោះស្រាយផលលំបាករបស់កម្មករដែលកើតចេញពីការកើនឡើងតម្លៃប្រេងឱ្យបានឆាប់បំផុត

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅយប់ថ្ងៃទី១៩ ខែមីនា ឆ្នាំ២០២៦នេះ មានសរសេរសារបញ្ជាក់ថា ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះសម្ដេចបានបញ្ជាឱ្យរដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ ប្រជុំជាមួយតំណាងនិយោជក និងសហជីព ដើម្បីដោះស្រាយលើបញ្ហានេះ។ សម្ដេចធិបតី នាយករដ្ឋមន្រ្ដីបានសរសេរថា៖«ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះ ខ្ញុំបានណែនាំឱ្យ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតយើង នៅក្នុងរយៈពេលអន្តរកាលនេះ ឱ្យបានឆាប់បំផុត»។ សម្ដេចធិបតីបានថ្លែងថា៖«ខ្ញុំសង្ឃឹមថាភាគីនិយោជក និងភាគីសហជីព នឹងអាចរកបាននូវចំណុចប្រសព្វសមរម្យមួយ ដែលអាចជួយសម្រាលបន្ទុកថ្លៃធ្វើដំណើររបស់បងប្អូនកម្មករផង និងអាចរក្សាបាននូវភាពប្រកួតប្រជែងនៃឧស្សាហកម្មរបស់យើងផង»។

ព្រឹត្តិការណ៍បុណ្យទន្លេ លើកទី១០នឹងប្រារព្ធឡើងនៅខេត្តក្រចេះ ចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៦ នាពេលខាងមុខនេះ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង បានអញ្ជើញជាដឹកនាំកិច្ចប្រជុំគណៈកម្មការអន្តរក្រសួង ដើម្បីត្រួតពិនិត្យវឌ្ឍនភាពការងារត្រៀមរៀបចំព្រឹត្តិការណ៍បុណ្យទន្លេលើកទី១០ ឆ្នាំ២០២៦ ដែលសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតជាគោលការណ៍ដ៏ខ្ពង់ខ្ពស់ឱ្យរៀបចំព្រឹត្តិការណ៍បុណ្យទន្លេលើកទី១០ នៅខេត្តក្រចេះ ចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៦ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល»។កិច្ចប្រជុំនេះមានការអញ្ជើញចូលរួមពី ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ និងជាអនុប្រធានគណៈកម្មការអន្តរក្រសួង ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និង អន្តរក្រសួង ស្ថាប័ន ជាអនុប្រធាននិងសមាជិក ព្រមទាំង លោកឧកញ៉ា ឧកញ៉ា លោក លោកស្រី តំណាងវិស័យឯកជន តាមរយៈការចូលរួមដោយផ្ទាល់ និងប្រព័ន្ធបញ្ជូនរូបភាព និងសម្លេង(Zoom Meeting) សរុបចំនួន ១៣០នាក់។ឆ្ថ្លែងក្នុងឱកាសនេះ ឯកឧត្តមរដ្ឋមន្ត្រី បានលើកឡើងពីសារៈសំខាន់នៃព្រឹត្តិការណ៍បុណ្យទន្លេ ដែលជាព្រឹត្តិការណ៍ជាតិរៀបចំឡើងក្នុងគោលបំណងលើកកម្ពស់វិស័យទេសចរណ៍ បង្ហាញសក្តានុពលធនធានធម្មជាតិ និងវប្បធម៌របស់តំបន់ជាប់ដងទន្លេ ជាពិសេសខេត្តក្រចេះ ព្រមទាំងជួយជំរុញសេដ្ឋកិច្ចរបស់ខេត្ត និងប្រជាពលរដ្ឋនៅមូលដ្ឋាន។ទន្ទឹមនឹងនោះ រដ្ឋបាលខេត្ត និងអនុគណៈកម្មការនីមួយៗ បានត្រៀមខ្លួនរួចរាល់ក្នុងការរៀបចំព្រឹត្តិការណ៍បុណ្យទន្លេលើកទី១០ ឱ្យប្រព្រឹត្តទៅដោយរលូន ទទួលការចូលរួមពីមហាជនឱ្យបានច្រើនកុះករ និងទទួលបានជោគជ័យ។សូមបញ្ជាក់ជូនថាក្នុងអំឡុងពេល៣ថ្ងៃនេះ នឹងមានព្រឹត្តិការណ៍អមជាច្រើន ដូចជា៖ ១. ពិធីរាប់បាត្រព្រះសង្ឃដើម្បីឧទ្ទិសកុសលជូនដល់វិញ្ញាណក្ខន្ធបុព្វបុរសខ្មែរ វីរៈកងទ័ព និងកងកម្លាំងប្រដាប់អាវុធគ្រប់ប្រភេទ ដែលបានពលីក្នុងបុព្វហេតុការពារជាតិ មាតុភូមិ និងប្រជាជន, ២. កម្មវិធីដុតក្រឡានក្រចេះដឹងគុណវីរៈកងទ័ព និងកងកម្លាំងប្រដាប់អាវុធគ្រប់ប្រភេទ និងផ្ញើក្ដីនឹករលឹកដល់ប្រជាជនភៀសសឹក, ៣. កម្មវិធីព្រលែងត្រីចូលក្នុងទន្លេ ដើម្បីផ្ដល់ជីវិតថ្មី និងបន្តនិរន្តរភាពជីវៈចម្រុះសម្រាប់ទន្លេ និងបួងសួងសុំសេចក្ដីសុខដល់ប្រជាជនកម្ពុជារស់នៅក្នុងសុខសន្តិភាព, ៤. ការសម្តែងទស្សនីយភាពសិល្បៈ ដែលបង្ហាញពីប្រពៃណីទំនៀមទម្លាប់ និងសក្ដានុពលទេសចរណ៍ខេត្តក្រចេះ ព្រមទាំងមានការប្រគំតន្ត្រីផងដែរ, ៥. ការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារនិងភេសជ្ជៈ ការតាំងពិព័រណ៍ពាណិជ្ជកម្ម ផលិតផលកសិ-ទេសចរណ៍ និងផលិតផលក្នុងស្រុក ព្រមទាំងការបង្ហាញ សមិទ្ធផលនិងគម្រោងអភិវឌ្ឍន៍នានារបស់ខេត្តក្រចេះ, ៦. សកម្មភាពកីឡាទេសចរណ៍ជាលក្ខណៈមហាជនជាច្រើនប្រភេទ និង៧. កម្មវិធីបណ្តែតប្រទីប ព្រមទាំងកម្មវិធីកម្សាន្តផ្សេងៗទៀតជាច្រើន។

អនុរដ្ឋមន្ត្រីការបរទេសប្រេស៊ីលប្តេជ្ញាចិត្តធ្វើឱ្យកិច្ចសហប្រតិបត្តិការជាមួយកម្ពុជាឲ្យកាន់តែស៊ីជម្រៅបថែមទៀត

ភ្នំពេញ ៖ អនុរដ្ឋមន្ត្រីការបរទេសទទួលបន្ទុកអាស៊ី និងប៉ាស៊ីហ្វិក នៃក្រសួងការបរទេសប្រេស៊ីលលោកជំទាវ Susan Kleebank ប្តេជ្ញាចិត្តរបស់ប្រេស៊ីល ក្នុងការធ្វើឱ្យកិច្ចសហប្រតិបត្តិការនេះកាន់តែស៊ីជម្រៅបថែមទៀត ជាពិសេសក្នុងវិស័យដែលជាផលប្រយោជន៍រួមនៃប្រទេសទាំងពីរ។ ការប្តេជ្ញានេះ នៅក្នុងជំនួបពិភាក្សាការងារជាមួយឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅទីស្តីការក្រសួង នៅព្រឹកថ្ងៃទី១៩ ខែមីនា ឆ្នាំ២០២៦។ ក្នុងជំនួបនេះ ឯកឧត្តមឧបនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះលោកជំទាវ Susan Kleebank សម្រាប់ដំណើរទស្សនកិច្ចការងារមកព្រះរាជាណាចក្រកម្ពុជា និងបានបង្ហាញការ ពេញចិត្តចំពោះសន្ទុះរីកចម្រើនយ៉ាងស្វាហាប់នៃទំនាក់ទំនងទ្វេភាគីរវាងប្រទេសទាំងពីរ។ ឯកឧត្តម ឧបនាយករដ្ឋមន្ត្រី បានកោតសរសើរចំពោះភាពជោគជ័យនៃកិច្ចប្រជុំពិគ្រោះយោបល់ទ្វេភាគីលើកទី២ រវាងក្រសួងការបរទេសកម្ពុជា និងប្រេស៊ីល នៅថ្ងៃទី១៨ ខែមីនា ឆ្នាំ២០២៦ ដែលបង្កើតបានលទ្ធផលជាផ្លែផ្កាគួរជាទីមោទនៈ ក្នុងគោលបំណងពង្រឹង និងពង្រីកកិច្ចសហប្រតិបត្តិការបន្ថែមទៀត ដើម្បីផលប្រយោជន៍ទៅវិញទៅមកនៃប្រជាជាតិទាំងពីរ រួមមាន វិស័យពាណិជ្ជកម្ម និងវិនិយោគ ទេសចរណ៍ កសិកម្ម ថាមពលកកើតឡើងវិញ ការកែច្នៃកសិផល ការដោះមីន អប់រំ បរិស្ថាន និងកិច្ច សហប្រតិបត្តិការរវាងរដ្ឋសភា និងរដ្ឋសភានៃប្រទេសទាំងពីរ។លោកជំទាវ Susan Kleebank បានស្វាគមន៍ និងរីករាយយ៉ាងខ្លាំងចំពោះវឌ្ឍនភាពជាវិជ្ជមានជាបន្តបន្ទាប់ និងឆាប់រហ័សនៃទំនាក់ទំនងទ្វេភាគីរវាងប្រទេសទាំងពីរ និងបានបញ្ជាក់ជាថ្មីនូវការប្តេជ្ញាចិត្តរបស់ប្រេស៊ីល ក្នុងការធ្វើឱ្យកិច្ចសហប្រតិបត្តិការនេះកាន់តែស៊ីជម្រៅបថែមទៀត ជាពិសេសក្នុងវិស័យដែលជាផលប្រយោជន៍រួមនៃប្រទេសទាំងពីរ។ភាគីទាំងពីរក៏បានផ្លាស់ប្តូរទស្សនៈលើការធ្វើឱ្យកាន់តែប្រសើរឡើងនូវចំណងមិត្តភាព និងកិច្ចសហប្រតិបត្តិការនៃប្រទេសទាំងពីរបន្ថែមទៀត ហើយក៏បានសង្កត់ធ្ងន់នូវការប្តេជ្ញាចិត្តក្នុងការបន្តវ ទ្រគ្នាទៅវិញទៅមកទាំងក្នុងក្របខ័ណ្ឌទ្វេភាគី និងពហុភាគី ក្នុងគោលបំណងរួមគ្នា ដើម្បីលើកកម្ពស់ វិបុលភាព និងការអភិវឌ្ឍសម្រាប់ប្រជាជននៃប្រទេសទាំងពីរ។ឯកឧត្តមឧបនាយករដ្ឋមន្ត្រី ប្រាក់ សុខុន ក៏បានឆ្លៀតឱកាសជម្រាបជូនលោកជំទាវ Susan Kleebank អំពីការវិវត្តថ្មីៗពាក់ព័ន្ធនឹងបញ្ហាព្រំដែនកម្ពុជា-ថៃ និងបានវាយតម្លៃខ្ពស់ចំពោះការគាំទ្រ និងលើកទឹកចិត្តរបស់ប្រទេសប្រេស៊ីល លើដំណើរការនៃបទឈប់បាញ់ និងសន្តិភាព ព្រមទាំង ពិភាក្សាលើបញ្ហាតំបន់ និងអន្តរជាតិ ដែលជាកង្វល់រួមនៃប្រទេសទាំងពីរផងដែរ៕ អត្ថបទ៖ វង្ស សុភាព

ឃុំខ្លួនឧក្រិដ្ឋជនខ្មែរចិន៦៥នាក់ ដាក់ពន្ធនាគារបណ្តោះអាសន្ន ពាក់ព័ន្ធនឹងឧក្រិដ្ឋកម្មឆបោកអនឡាញ ( Online Scams )

រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក ប៊ុន រតនៈ នៅរសៀលថ្ងៃទី១៩ ខែមីនា ឆ្នាំ២០២៦នេះ បានចេញដីការសម្រេចឃុំខ្លួនឃុំខ្លួនឧក្រិដ្ឋជន៦៥នាក់ មានជនជាតិខ្មែរ និងចិន ដាក់ពន្ធនាគារព្រៃសបណ្តោះអាសន្ន ពាក់ព័ន្ធនឹងឧក្រិដ្ឋកម្មឆបោកតាមប្រព័ន្ធបច្ចេកវិទ្យា ( Online Scams ) ។ ជនត្រូវចោទទាំង៦៥នាក់ មានខ្មែរ៥៧នាក់ (ស្រី២៧នាក់) និងជនជាតិចិនជាមនុស្ស០៨នាក់ ត្រូវបានលោកសេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ សម្រេចធ្វើការចោទប្រកាន់ពីបទ ៖ ឆបោកមានស្ថានទម្ងន់ទោស ( ជាក្រុមមានការចាត់តាំង ) តាមបញ្ញត្តិ៣៧៧ និងមាត្រា៣៨០ នៃក្រមព្រហ្មទណ្ឌ ប្រព្រឹត្តិទៅនៅប្រទេសកម្ពុជា និងទីកន្លែងផ្សេងទៀត កាលពីកំឡុងឆ្នាំ២០២៥ ដល់ក្នុងឆ្នាំ២០២៦ ។ គួររំលឹកថា ៖ ជនល្មើសទាំង៦៥នាក់ខាងលើ ត្រូវបានកម្លាំងគណៈបញ្ជាការឯកភាពរដ្ឋបាលរាជធានីភ្នំពេញ បើកប្រតិបត្តិការស្រាវជ្រាវចុះបង្ក្រាប នៅចំណុចខុនដូរមួយកន្លែង យីហោ ហ្គោលឌិន វ័ន (Golden One) អគារលេខ៤១ ជាន់ទី៣០ ផ្លូវលេខ៣៦០ ភូមិ៧ សង្កាត់ទួលស្វាយព្រៃទី១ ខណ្ឌបឹងកេងកង ។ ប្រតិបត្តិការនេះ ធ្វើឡើងក្រោមការដឹកនាំបញ្ជាផ្ទាល់ដោយ ឯកឧត្តមឃួង ស្រេង អភិបាលរាជធានី និងជាប្រធានគណៈបញ្ជាការឯកភាព , ឯកឧត្តម ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជាធានីភ្នំពេញ ក្រោមការប្រតិបត្តិផ្ទាល់ដោយកម្លាំងនគរបាលផែនជំនាញការិយាល័យប្រឆាំងបទល្មើសបច្ចេកវិទ្យា , ការិល័យអន្តរាគមន៍ និងតម្រួតបទបញ្ជា , ការិល័យគ្រប់គ្រងជនបរទេស និងការិល័យស៊ើបអង្កេត និងអនុវត្តនីតិវិធី ផងដែរ ។ មន្ត្រីនគរបាលជំនាញ បញ្ជាក់ថា ៖ ជនល្មើសទាំង៦៥នាក់ បានប្រើប្រាស់ប្រទេសកម្ពុជាប្រព្រឹត្តបទល្មើស ឆបោកតាមប្រព័ន្ធបច្ចេកវិទ្យា (Online Scams) ក្រោមរូបភាពអូសទាញលោមលួងដាក់ប្រាក់ឱ្យវិនិយោគក្លែងកា្លយ (Investment Scams) ជាមួយជនរងគ្រោះជាជនបរទេស ដែលកំពុងស្នាក់នៅរដ្ឋបរទេសដទៃ ៕ លីហេង

កម្ពុជាជំរុញបង្កើតថាមពលកកើតឡើងវិញឈានមុខគេក្នុងតំបន់អាស៊ាន ស្របតាមការប្តេជ្ញាចិត្តនៃកិច្ចព្រមព្រៀងទីក្រុងប៉ារីស និងផែនការជាតិកាត់បន្ថយការបញ្ចេញឧស្ម័នផ្ទះកញ្ចក់

កម្ពុជាជំរុញបង្កើតថាមពលកកើតឡើងវិញ ឈានមុខគេនៅក្នុងតំបន់អាស៊ាន ស្របតាមការប្តេជ្ញាចិត្តយ៉ាងមុតមាំ ចំពោះកិច្ចព្រមព្រៀងទីក្រុងប៉ារីស និងផែនការ រួមចំណែកជាតិ NDC 3.0 ក្នុងការកាត់បន្ថយការបញ្ចេញឧស្ម័នផ្ទះកញ្ចក់ចំនួន៥៥% នៅឆ្នាំ២០៣៥។ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងបែបនេះ ក្នុងឱកាសទទួលជួបសម្តែងការគួរសមជាមួយកញ្ញា Tzeporah Berman ស្ថាបនិក និងជាប្រធានសន្ធិសញ្ញាមិនរីកសាយភាយឧស្ម័នឥន្ធនៈហ្វូស៊ីល (FFNPT) នាព្រឹកថ្ងៃទី១៨ ខែមីនា ឆ្នាំ២០២៦ នៅទីស្តីការក្រសួងបរិស្ថាន។កញ្ញា Tzeporah Berman បានលើកឡើងថា សន្ធិសញ្ញាមិនរីកសាយភាយឧស្ម័នឥន្ធនៈហ្វូស៊ីល (FFNPT) ជាគំនិតផ្តួចផ្តើមសកលនិងជាកិច្ចព្រមព្រៀងអន្តរជាតិ។ កញ្ញាប្រធាន FFNPT បានកោតសរសើរកម្ពុជាចំពោះការអនុវត្តជំរុញសកម្មភាព ដើម្បីភាពស្អាត ភាពបៃតង និងចីរភាព នៃយុទ្ធសាស្រ្តចក្រា វិស័យបរិស្ថាន ដែលស្របតាមគោលនយោបាយនិងយុទ្ធសាស្រ្តរបស់រាជរដ្ឋាភិបាលកម្ពុជា។ កញ្ញា Tzeporah Berman ស្ថាបនិក បានបញ្ជាក់ថា លទ្ធផលដែលកម្ពុជាសម្រេចបានដោយមានការចូលរួមពីមនុស្សច្រើនលាននាក់ដែលបានអនុវត្តជាក់ស្តែងមិនមែនត្រឹមតែជាទ្រឹស្ដីទេ ជាពិសេសលើការកាត់បន្ថយការប្រើប្រាស់ប្លាស្ទិក និងការជំរុញការដាំកូនឈើបង្កើនគម្របបៃតង និងការឆ្លើយតបនឹងការប្រែប្រួលអាកាសធាតុ។ ដូចនេះ ពិភពលោកនឹងគួររៀនសូត្រតាម។ ជាមួយគ្នានេះកញ្ញា Tzeporah Berman បានស្នើឱ្យកម្ពុជាគាំទ្រ និងយល់ព្រមជាគោលការណ៍ ក្នុងការធ្វើជាម្ចាស់ផ្ទះសន្និសីទអន្តរជាតិលើកទី៣ ស្ដីពីការបញ្ឈប់ឥន្ធនៈហ្វូស៊ីល (The 3rd conference on fossil fuel phase-out) ដែលគ្រោងនឹងប្រារព្ធឡើងនៅដើមឆ្នាំ២០២៧ ឬ ២០២៨ ដើម្បីបង្ហាញពីភាពដឹកនាំរបស់កម្ពុជាក្នុងតំបន់អាស៊ី នៃសន្ធិសញ្ញាមិនរីកសាយភាយឥន្ធនៈហ្វូស៊ីល ដែលជាយន្តការបំពេញបន្ថែមដល់កិច្ចព្រមព្រៀងទីក្រុងប៉ារីស ដើម្បីផ្ដល់ការគាំទ្រផ្នែកហិរញ្ញវត្ថុ និងបច្ចេកវិទ្យាដល់ប្រទេស ដែលកំពុងអភិវឌ្ឍដូចជាកម្ពុជាដែរ។ស្របជាមួយគ្នានេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានមានប្រសាសន៍ថានឹងលើកសំណើខាងលើ ដាក់ជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីគោរពពិនិត្យនិងសម្រេចជាមុន។ ឯកឧត្តមរដ្ឋមន្រ្តី បានថ្លឺងថា បច្ចុប្បន្នកម្ពុជាជាប់ចំណាត់ថ្នាក់លេខ២ ក្នុងអាស៊ានលើផ្នែកថាមពលកកើតឡើងវិញ និងគ្រោងបង្កើនសមាមាត្រថាមពលចម្រុះឱ្យដល់ ៧២% នៅឆ្នាំ២០៣៥ ឆ្ពោះទៅសម្រេចបានកម្ពុជាជា ប្រទេសអព្យាក្រឹតកាបូន នៅឆ្នាំ២០៥០។ ជាមួយគ្នានេះ ក្រសួងបរិស្ថានបានដាក់ចេញកោះអព្យាក្រឹតកាបូនគំរូដំបូងគេបង្អស់ នៅក្នុងអាស៊ី(Carbon Neutral Island) ដែលត្រៀមនឹងដាក់សម្ពោធ នៅចុងខែមីនានេះ។សូមបញ្ជាក់ថា កម្ពុជាបានបង្ហាញឆន្ទះក្នុងការជំរុញការកាត់បន្ថយឥន្ធនៈផូស៊ីល (ធ្យូងថ្ម ប្រេង ឧស្ម័ន) គឺចាំបាច់ដើម្បីទប់ស្កាត់ការប្រែប្រួលអាកាសធាតុ និងការប្រើប្រាស់ថាមពលកកើតឡើងវិញ (ព្រះអាទិត្យ ខ្យល់) ជំនួសវិញ។ កម្ពុជាបានធ្វើការឆ្លើយតបនឹងការប្រែប្រួលអាកាសធាតុតាមរយៈផែនការយុទ្ធសាស្ត្រជាតិ (CCCSP 2024-2033) និងការប្តេជ្ញាចិត្ត ជំរុញការកាត់បន្ថយការបញ្ចេញឧស្ម័នផ្ទះកញ្ចក់ និងពង្រឹងភាពធន់នឹងអាកាសធាតុ តាមរយៈ ផែនការជាតិរួមចំណែកឆ្លើយតបនឹងការប្រែប្រួលអាកាសធាតុ ដំណាក់កាលទី៣ (NDC 3.0)។ វិស័យអាទិភាព ដែលបានកំណត់ក្នុងផែនការរួមចំណែកជាត ផ្តោតលើវិស័យសំខាន់ៗរួមមាន៖ ព្រៃឈើ និងដីធ្លី ដោយជំរុញការបង្កើនគម្របព្រៃឈើ និងកាត់បន្ថយការបំភាយឧស្ម័ន។ កសិកម្ម ដោយធ្វើការកែសម្រួលបច្ចេកទេសកសិកម្មដើម្បីធន់នឹងអាកាសធាតុ។ ថាមពល ដោយលើកកម្ពស់ថាមពលកកើតឡើងវិញ និងបច្ចេកវិទ្យាបៃតង។ និងវិស័យសំណល់ ដោយធ្វើការគ្រប់គ្រងសំណល់ឲ្យបានប្រសើរ៕

ពលរដ្ឋម្នាក់ស្លាប់ និងម្នាក់រងរបួសករណីផ្ទុះគ្រាប់បែកចង្កោម នៅស្រុកស្វាយចេក ខេត្តបន្ទាយមានជ័យ

បន្ទាយមានជ័យ ៖ នៅថ្ងៃទី១៩ ខែមីនា ឆ្នាំ២០២៦ វេលាម៉ោង ១១ : ៣០នាទី មានករណីផ្ទុះគ្រាប់បែកចង្កោម ១ករណី នៅភូមិបឹងស្នោ ឃុំស្លក្រាម ស្រុកស្វាយចេក ខេត្តបន្ទាយមានជ័យ បណ្តាលឲ្យឈ្មោះ ចាន់ សារ៉េត ភេទប្រុស អាយុ ៤៤ឆ្នាំបានស្លាប់នៅកន្លែងកើតហេតុ និងឈ្មោះ តា ចាស់ ភេទប្រុស អាយុ ៤៧ ឆ្នាំ បានរងរបួស និងត្រូវបានបញ្ជូនទៅព្យាបាលនៅមន្ទីរពេទ្យមិត្តភាព កម្ពុជា-ជប៉ុន មង្គលបូរី ខេត្តបន្ទាយមានជ័យ។ សមត្ថកិច្ចបានបញ្ជាក់ថា ហេតុការណ៍គ្រោះថ្នាក់នេះបណ្តាលមកពីជនរងគ្រោះឈ្មោះ ចាន់ សារ៉េត បានកាន់គ្រាប់បែកចង្កោមមកបោកលេងនៅផ្ទះឈ្មោះ តា ចាស់ ។អាជ្ញាធរមីនសូមអំពាវនាវដល់បងប្អូនប្រជាពលរដ្ឋ នៅពេលប្រទ:ឃើញមីន គ្រាប់មិនទាន់ផ្ទុះ គ្រាប់បែកចង្កោម និងវត្ថុចំលែកសង្ស័យជាគ្រាប់ សូមកុំប៉ះពាល់ កែច្នៃ គប់ ដុំ ឫចល័តទៅទីណាមួយ គ្រាប់ទាំងនោះនឹងធ្វើឨ្យរបួស ពិការ ស្លាប់ គ្រប់ពេល និងសូមរាយការណ៍ជាបន្ទាន់ទៅអាជ្ញាធរមានសមត្ថកិច្ច ប៉ុស្តិ៍នគរបាល មេភូមិ មេឃុំ និងប្រតិបត្តិករបោសសម្អាតមីន តាមរយ:លេខទូរស័ព្ទ ដូចខាងក្រោម៖012 800 473011 38 39 37097 489 5600066 612 613063 96 34 99

ក្រសួងអភិវឌ្ឍន៍ជនបទកំពុងខិតខំលើកកម្ពស់គុណភាពផ្លូវ ដើម្បីជួយជំរុញកំណើនសេដ្ឋកិច្ចពលរដ្ឋនៅទីជនបទ

តាកែវ៖ រាជរដ្ឋាភិបាល ដែលមានក្រសួងអភិវឌ្ឍន៍ជនបទ ជាសេនាធិការ កំពុងខិតខំស្ថាបនាកែលម្អ ក៏ដូចលើកកម្ពស់ផ្លូវនៅទីជនបទ ដើម្បីជួយជំរុញកំណើនសេដ្ឋកិច្ចរបស់ពលរដ្ឋ ដែលមានផ្លូវធ្វើដំណើស្រួល និងងាយដឹកកសិផលទៅកាន់ទីផ្សារ ។ក្នុងឱកាសតំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ចុះត្រួតពិនិត្យ វាយតម្លៃបញ្ចប់សុពលភាព លើការងារស្តារឡើងវិញផ្លូវក្រាល ល្បាយថ្មភ្នំ ប្រវែង៤ ៥០០ម៉ែត្រ ស្ថិតក្នុងឃុំក្រពុំឈូក ស្រុកកោះអណ្តែត រួមទាំងមានការស្ថាបនាប្រព័ន្ធលូ និងការជួសជុលផ្លូវក្រាលកៅស៊ូពីរជាន់ នៅឃុំកុមារាជា ស្រុកបាទី អនុវត្តដោយនាយកដ្ឋានវិស្វកម្ម ក្រសួងការពារជាតិ ឯកឧត្តម ប៉ែន ពេជ្រសាលី រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី បានដាក់ចេញនូវគោលការណ៍ “ពង្រឹង ៧០ភាគរយ និងពង្រីក ៣០ភាគរយ” ក្នុងគោលដៅពិនិត្យឡើងវិញ និងកែលម្អនូវសមត្ថភាព ដើម្បីលើកកម្ពស់ប្រសិទ្ធភាព និងស័ក្តិសិទ្ធិភាព នៃការអភិវឌ្ឍប្រទេសជាតិ ។ឯកឧត្តម បានបន្តថា ដើម្បីរួមចំណែកអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្រសួងអភិវឌ្ឍន៍ជនបទ បានដាក់ចេញនូវគោលនយោបាយជាតិ ស្តីពីការអភិវឌ្ឍជនបទ ឆ្នាំ២០២៥-២០៣៥ ដោយបានកំណត់ចក្ខុវិស័យ "កសាងសង្គមជនបទកម្ពុជា ឱ្យមានវិបុលភាពប្រកបដោយបរិយាបន្ន និងចីរភាព ទាំងផ្នែកសេដ្ឋកិច្ច សង្គមកិច្ច និងវប្បធម៌” ។ឯកឧត្តមរដ្ឋលេខាធិការ បានបន្ថែមថា ក្នុងនោះមានគោលដៅចម្បងចំនួន៥ រួមមាន៖ ទី១. ប្រជាជនមានជីវភាពរស់នៅសមរម្យ, ទី២. ប្រជាជនមានសុខភាពមាំមួន,ទី៣. ប្រជាជនរស់នៅក្នុងភាពថ្លៃថ្នូរ, ទី៤. គ្រប់ភូមិឋានទាំងអស់នៅតំបន់ជនបទ មានហេដ្ឋារចនាសម្ព័ន្ធខ្វាត់ខ្វែងប្រកបដោយភាពធន់ និងទី៥. គ្រប់ភូមិឋានទាំងអស់នៅជនបទមានអភិបាលកិច្ចល្អ ។ឯកឧត្តម ប៉ែន ពេជ្រសាលី បានគូសបញ្ជាក់ថា ក្រសួងអភិវឌ្ឍន៍ជនបទ ក៏បានបានកំណត់យុទ្ធសាស្រ្តគន្លឺះចំនួន ៥គឺ ទី១. ការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ជនបទប្រកបដោយភាពធន់, ទី២. ការកែលម្អលក្ខខណ្ឌ នៃការរស់នៅរបស់ប្រជាជននៅតំបន់ជនបទ, ទី៣. ការអភិវឌ្ឍសហគមន៍ជនបទ និងចលនាភូមិគំរូ, ទី៤. ពិពិធកម្មសេដ្ឋកិច្ចជនបទនិងនវានុវត្តន៍ការងារ និងទី៥. ការពង្រឹងស្ថាប័ន ។ក្នុងឱកាសនោះ គណៈកម្មការអន្តរក្រសួង ក៏បានអំពាវនាវដល់អាជ្ញាធរ និងប្រជាពលរដ្ឋដែលរស់នៅអមផ្លូវទាំង ២ខ្សែនេះ ជួយថែទាំ និងទប់ស្កាត់ការដឹកលើសទម្ងន់ ដែលធ្វើឲ្យផ្លូវឆាប់រងការខូចខាត ខណៈដែលរាជរដ្ឋាភិបាល ក្នុងផ្លូវមួយខ្សែៗ ត្រូវចំណាយថវិកាច្រើន ដើម្បីស្ថាបនា ឬជួសជុលកែលម្អឡើងវិញ ៕អត្ថបទ បាន សុខរិទ្ធិ

កម្ពុជា និងជប៉ុន ចុះហត្ថលេខាលើលិខិតប្តូរសារស្តីពីហិរញ្ញប្បទាន ឥតសំណងបន្ថែមរបស់ជប៉ុនសម្រាប់គម្រោងផ្គត់ផ្គង់ទឹកស្អាត

រាជរដ្ឋាភិបាលជប៉ុនបានផ្តល់ហិរញ្ញប្បទានឥតសំណងដល់រាជរដ្ឋាភិបាលកម្ពុជាប្រមាណ ២៣លានដុល្លារអាម៉េរិក សម្រាប់គម្រោង «ការពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ»។ ជំនួយឥតសំណងនេះ បានឆ្លុះបញ្ចាំងពីការប្តេជ្ញាចិត្តឥតងាករេរបស់ជប៉ុនក្នុងការជំរុញការអភិវឌ្ឍសង្គម-សេដ្ឋកិច្ចរបស់កម្ពុជា ស្របពេលពង្រឹងបន្ថែមទៀតនូវកិច្ចសហប្រតិបត្តិការទ្វេភាគីក្រោម ភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន។ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជា នៅថ្ងៃទី១៩ ខែមីនា ឆ្នាំ២០២៦ បានចុះហត្ថលេខាលើលិខិតប្តូរសារស្តីពីការកែសម្រួលនៃហិរញ្ញប្បទានឥតសំណងរបស់ជប៉ុនសម្រាប់គម្រោង «ការពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ»។ នៅក្នុងលិខិតប្តូរសារថ្មីនេះ ទំហំទឹកប្រាក់នៃជំនួយសម្រាប់គម្រោង«ការពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ» ដែលបានចុះហត្ថលេខាលើកដំបូងកាលពីថ្ងៃទី២៤ ខែមីនា ឆ្នាំ២០២០ នឹងកើនពី ៣.៤២១ លានយ៉េន (ប្រមាណ ២២លានដុល្លារអាម៉េរិក) ទៅ ៣.៥៦៨ លានយ៉េន (ប្រមាណ ២៣លានដុល្លារអាម៉េរិក)។ហិរញ្ញប្បទានឥតសំណងបន្ថែមនេះ ឆ្លុះបញ្ចាំងពីការប្តេជ្ញាចិត្តឥតងាករេរបស់ជប៉ុន ក្នុងការជំរុញ ការអភិវឌ្ឍសង្គម-សេដ្ឋកិច្ចរបស់កម្ពុជា ស្របពេលពង្រឹងបន្ថែមទៀតនូវកិច្ចសហប្រតិបត្តិការទ្វេភាគីក្រោម ភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន។ឯកអគ្គរាជទូតជប៉ុនសង្ឃឹមយ៉ាងមុតមាំថា តាមរយៈកិច្ចសហប្រតិបត្តិការលើគម្រោងនេះ និងជំនួយបន្ថែមនេះ អត្ថប្រយោជន៍នៃការកែលម្អការផ្គត់ផ្គង់ទឹកស្អាត ដែលត្រូវបានគេស្គាល់ថាជា "អព្ភូតហេតុនៃទីក្រុងភ្នំពេញ" នឹងត្រូវបានពង្រីកទៅកាន់តំបន់នានានៅក្រៅរាជធានីភ្នំពេញ។ ឯកឧត្តមក៏សង្ឃឹមដែរថា គម្រោងនេះនឹងបន្តពង្រឹងចំណងមិត្តភាពដ៏រឹងមាំ ដែលផ្អែកលើទំនុកចិត្ត និងមិត្តភាពរវាងប្រទេសទាំងពីរ៕ អត្ថបទ៖ វង្ស សុភាព

មន្ទីរពេទ្យព្រះអង្គឌួងបំពាក់ម៉ាស៊ីន ឡាហ្សែ ទំនើបចុងក្រោយពីអាមេរិកសម្រាប់ព្យាបាលជំងឺភ្នែកស្ងួតជូនពលរដ្ឋ

មន្ទីរពេទ្យព្រះអង្គឌួង នៃក្រសួងសុខាភិបាល បាននាំយកម៉ាស៊ីន ឡាហ្សែ អាយ ភី អិល ( Laser IPL)ទំនើបបច្ចេកវិទ្យាចុងក្រោយបង្អស់ពីសហរដ្ឋអាមេរិក ជាលើកដំបូងមកប្រទេសកម្ពុជា សម្រាប់ព្យាបាលជំងឺស្ងួតភ្នែក ប្រកបដោយប្រសិទ្ធភាព និងគុណភាពខ្ពស់។លោកស្រីសាស្ត្រាចារ្យ ជុកម៉ុល កុសុម៉ា នាយិការង នៃមន្ទីរពេទ្យព្រះអង្គឌួង ថ្លែងប្រាប់BTV ព័ត៌មាន នាព្រឹកថ្ងៃទី១៩ ខែមីនា ឆ្នាំ២០២៦នេះថា ម៉ាស៊ីន ឡា ហ្សែ អាយ ភី អិលនេះ ជាបច្ចេកវិទ្យាទំនើបចុងក្រោយរបស់សហរដ្ឋអាមេរិក ហើយមានតែមួយគត់នៅក្នុងប្រទេសកម្ពុជា ពោលគឺមានតែនៅក្នុងមន្ទីរពេទ្យព្រះអង្គឌួងប៉ុណ្ណោះ។ ហើយម៉ាស៊ីននេះមានសមត្ថភាពខ្ពស់ក្នុងការព្យាបាលជំងឺភ្នែកស្ងួត ដែលមិនមានការវះកាត់ និងជួយកាត់បន្ថយការប្រើប្រាស់ថ្នាំបន្តក់ភ្នែកច្រើនដង។ ការប្រើប្រាស់ បច្ចេកវិទ្យា អាយ ភី អិលនេះ គឺការប្រើប្រាស់ពន្លឺកម្រិតខ្ពស់ទៅលើស្បែកជុំវិញត្របកភ្នែក ដែលជួយកាត់បន្ថយសរសៃឈាម ដែលរលាក និងកម្ចាត់បាក់តេរី ដែលបង្កឱ្យមានការរលាកត្របកភ្នែក។ អត្ថប្រយោជន៍ដ៏សំខាន់បំផុត គឺជួយផ្ដល់កម្ដៅដល់ក្រពេញខ្លាញ់ ត្របកភ្នែក ដើម្បីរំលាយខ្លាញ់ដែលកកស្ទះ ធ្វើឱ្យស្រទាប់ទឹកភ្នែកមានគុណភាពល្អ ភ្នែកមានសំណើម និងផាសុកភាពហើយការព្យាបាលចំណាយពេលប្រហែល ១៥ ទៅ២០នាទី និងមិនមានការឈឺចាប់ខ្លាំងនោះទេ។លោកស្រីសាស្រ្តាចារ្យ ជុកម៉ុល កុសុម៉ា បានលើកឡើងទៀតថា ការព្យាបាលបញ្ហាភ្នែកស្ងួត អាស្រ័យតាមកម្រិត ដូចជា៖ ការប្រើប្រាស់ទឹកភ្នែកសិប្បនិម្មិត ក្នុងកម្រិតដំបូង និងការព្យាបាលដោយបច្ចេកវិទ្យាទំនើបដូចជា៖ ការស្អំភ្នែក និងការព្យាបាលដោយ ឡា ហ្សែ អាយ ភី អិល ក្នុងកម្រិតមធ្យមទៅធ្ងន់។ ការប្រើប្រាស់ឧបករណ៍ស្អំភ្នែក ផ្ដល់អត្ថប្រយោជន៍យ៉ាងខ្លាំង ក្នុងការបង្កើនសំណើមដល់ផ្ទៃភ្នាសភ្នែក និងជួយរំលាយខ្លាញ់ដែលស្ទះក្នុងក្រពេញខ្លាញ់ត្របកភ្នែក ។ វិធីសាស្ត្រនេះជួយកាត់បន្ថយអាការៈ រមាស់ ផ្សា ក្រហមភ្នែក និងជួយឱ្យភ្នែកមានភាពស្រស់ថ្លាឡើងវិញ។ ភ្នែកស្ងួត មានរោគសញ្ញាដែលអ្នកជំងឺជួបជាញឹកញាប់មានដូចជា៖ ក្តៅ ផ្សា ក្រហាយ ភ្នែកក្រហម មើលមិនច្បាស់ ឬភ្នែកឆាប់នឿយហត់ មានអារម្មណ៍ខ្លាចពន្លឺ រកាំ និងមានអារម្មណ៍ដូចជា៖ មានអ្វីមួយនៅក្នុងភ្នែក មានចេញទឹកភ្នែកច្រើន។ ជាមួយគ្នានេះ ការនាំយកម៉ាស៊ីន និងឧបករណ៍ទំនើបៗមកមន្ទីរពេទ្យនេះ ដោយសារបច្ចុប្បន្នជំងឺភ្នែកស្ងួត មានកើនឡើងច្រើនទៅលើគ្រប់វ័យដោយសារមានកត្តាមួយចំនួនរួមមាន៖ វ័យចាស់ មើលអេក្រង់កុំព្យូទ័រ ឬទូរស័ព្ទច្រើន អ្នកនៅកន្លែងស្ងួត ខ្យល់ច្រើន ឬមានម៉ាស៊ីនត្រជាក់គ្រប់ពេល អ្នកពាក់ Contact lens ជាប្រចាំ ការផ្លាស់ប្តូរអរម៉ូន ពិសេសស្ត្រីក្រោយមានផ្ទៃពោះ ការប្រើថ្នាំមួយចំនួនដូចជា៖ ថ្នាំប្រឆាំងអាលែហ្សី, ថ្នាំបន្ធូរការតឹងច្រមុះ និងជំងឺរលាកសន្លាក់ជាដើម។ លោកស្រីសាស្ត្រាចារ្យ ជុក ម៉ុល កុសុម៉ា បានអំពាវនាវដល់ប្រជាពលរដ្ឋកុំធ្វេសប្រហែស ចំពោះភ្នែកស្ងួតឱ្យសោះ ព្រោះវាអាចនាំឱ្យមានបញ្ហាគំហើញ និងប៉ះពាល់ការរស់នៅប្រចាំថ្ងៃ ហើយប្រសិនបើមានបញ្ហាភ្នែកស្ងួត សូមប្រញាប់ទៅពិគ្រោះនិងព្យាបាលជាមួយគ្រូពេទ្យជំនាញ៕អត្ថបទ រដ្ឋា

ក្រសួងសង្គមកិច្ច៖កម្ពុជាត្រូវការកម្លាំងសេវាសង្គមដើម្បីកសាងសង្គមប្រកបដោយភាពសុខដុម

ឯកឧត្តម ជា សុមេធី លើកឡើងថាកម្ពុជាត្រូវការកម្លាំងសេវាសង្គម ដើម្បីរួមចំណែកដល់ការផ្លាស់ប្ដូរ និងការកសាងសង្គមមួយប្រកបដោយភាពសុខដុម និងផាសុកភាព។ ការលើកឡើងដូចនេះធ្វើឡើងនៅថ្ងៃទី ១៩ ខែមីនា ឆ្នាំ ២០២៦ រៀបចំទិវាជាតិសង្គមកិច្ចលើកទី ២ និងទាវាសង្គមកិច្ចពិភពលោកទី១៩ ក្រោមប្រធានបទ “ រួមគ្នាសាងក្ដីសង្ឃឹម និងភាពសុខដុមរមនា” ។ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច បានលើកឡើងថា កម្ពុជាពិតជាត្រូវការកម្លាំងសេវាសង្គម ដែលជាអ្នកអាជីពសង្គមកិច្ច អ្នកអាជីពសង្គមកិច្ចរង អ្នក សង្គមកិច្ចបឋម និងអ្នកសង្គមកិច្ចសម្ព័ន្ធ បម្រើការងារក្នុងស្ថាប័នរាជរដ្ឋាភិបាល ឬអង្គការមិនមែនរដ្ឋាភិបាល ឬវិស័យឯកជន ដើម្បីរួមចំណែកដល់ការផ្លាស់ប្តូរ និងការកសាងសង្គមមួយប្រកបដោយភាពសុខដុម និង ផាសុខភាព ដែលកម្លាំងសេវាសង្គមត្រូវធ្វើការជាមួយប្រជាជន និងសហគមន៍ ជាពិសេសជាមួយប្រជាជន ក្រីក្រ រងគ្រោះ និងងាយរងគ្រោះ រួមមាន៖ កុមារ យុវជន មនុស្សពេញវ័យ ជនពិការ ស្ត្រី មនុស្សវ័យចាស់ គ្រួសារ និងសហគមន៍ ដើម្បីលើកកម្ពស់សុខុមាលភាព ដោះស្រាយបញ្ហាប្រឈម ជំរុញឱ្យមានការផ្លាស់ប្ដូរវិជ្ជមាន និងសមធម៌សង្គម តាមរយៈការផ្ដល់សេវាសង្គមកិច្ច និងការគាំទ្រផ្លូវចិត្ត ផ្លូវកាយ សម្ភារ ការសិក្សាអប់រំ សេដ្ឋកិច្ចសង្គម និងនយោបាយ។ លើសពីការងារនេះ ក្រសួងសង្គមកិច្ច ក្នុងសន្និបាតបូកសរុបលទ្ធផលការងារ ឆ្នាំ២០២៥ និងទិសដៅអនុវត្តបន្ត ឆ្នាំ២០២៦កន្លងទៅ ក៏បានដាក់ចេញនូវការងារអាទិភាពមួយចំនួន រួមមាន៖ ការអនុវត្តកម្មវិធីជំនួយសង្គមក្នុងកញ្ចប់គ្រួសារ កម្មវិធីជាតិជំនួយសង្គមផ្នែកបណ្តុះបណ្តាល ជំនាញវិជ្ជាជីវៈនិងបច្ចេកទេសសម្រាប់យុវជនក្រីក្រនឹងគ្រួសារអងហានិភ័យ កម្មវិធីដោះស្រាយបញ្ហាជន អនាថានិងជនវិបល្លាសស្មារតី ការលើកកម្ពស់ការងារយុវនីតិសម្បទា និងកម្មវិធីយុត្តិធម៌អនីតិជន ការ ជំរុញការជ្រើសរើសជនមានពិការភាពចូលបម្រើការងារក្នុងវិស័យរដ្ឋនិងឯកជនតាមអត្រាកំណត់ និងការ កំណត់គោលនយោបាយសម្រាប់ជនរងគ្រោះនិងជនងាយរងគ្រោះ។ បន្ថែមពីនេះក្រសួងនឹងបន្តកិច្ចសហការ ជាមួយក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាជាតិគាំពារសង្គម កំពារសង្គម និងក្រសួង ស្ថាប័នពាក់ព័ន្ធ បន្តពង្រឹង ប្រព័ន្ធសន្តិសុខ សង្គមឱ្យកាន់តែរឹងមាំ តាមរយៈ ការធ្វើស្វ័យប្រវត្តិកម្មនៃការបញ្ជូនទិន្នន័យ ជាមួយ នឹងការផ្ទៀងផ្ទាត់ភាពត្រឹមត្រូវ និងសុក្រឹតភាពទិន្នន័យដោយប្រើប្រាស់ថ្នាលគាំពារសង្គមឌីជីថលកម្ពុជា ជាគោល ព្រមទាំងផ្តោតលើកម្មវិធីអាទិភាពទាំង៤របស់ក្រសួង ស្របតាមកម្មវិធីគោលនយោបាយនិងយុទ្ធ សាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលក្នុងនោះ បានផ្តោតជាសំខាន់លើការរៀបចំយន្តការ និងការអភិវឌ្ឍកម្លាំងសេវាសង្គម នៅកម្ពុជា។ អត្ថបទ៖ គឹមហុក

បណ្ដាញសង្គម

ព័ត៌មានថ្មីៗ

ប្រទេសបារាំង ប្រកាសពីការជំរុញថវិកាចំនួន ៣៦ ពាន់លានអឺរ៉ូ ដើម្បីធ្វើឲ្យប្រសើរឡើងវិញផ្នែកសព្វាវុធ

ប្រេងឡើងថ្លៃ ខណៈក្រុមវិនិយោគិននៅតែមានការប្រុងប្រយ័ត្នចំពោះបទឈប់បាញ់រអាមេរិក-អ៊ីរ៉ង់

អ៊ីស្រាអែលវាយប្រហារទូទាំងលីបង់សម្លាប់មនុស្សជាង២៥០នាក់ក្រោយបទឈប់បាញ់រវាងអ៊ីរ៉ង់-អាមេរិក

មនុស្សជិត២០០នាក់ត្រូវបានចាប់ខ្លួន បន្ទាប់ពីការវាយប្រហារ លើស្ថានកុងស៊ុលអ៊ីស្រាអែល

លោក Trump ជួបពិភាក្សាអំពីការចាកចេញពីសម្ព័ន្ធយោធា NATO ជាមួយលោក Rutte ក្រោយរិះគន់ខ្លាំងៗលើសម្ព័ន្ធនេះ

មេដឹកនាំអ៊ីស្រាអែលត្រៀមខ្លួនរួចរាល់វិលត្រឡប់ទៅសមរភូមិវិញនៅពេលណាក៏បាន ប្រឆាំងនឹងអ៊ីរ៉ង់

អ៊ីរ៉ង់បានឱ្យដឹងថា ការចរចាសន្តិភាព នឹងមិនសមហេតុផលទេ ក្រោយការវាយប្រហាររបស់អ៊ីស្រាអែលលើលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877