នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋបាលខេត្តបន្ទាយមានជ័យ៖ ក្រុមការងារកំពុង​ដំណើរ​ការសាង​សង់​ផ្ទះ​បណ្តោះ​អាសន្ន​លើ​ផ្ទៃ​ដី​ទំហំ ៤០០​ហិកតា​ជូន​ពលរដ្ឋ​ភៀស​សឹក​ដែល​ត្រូវ​ទាហាន​ចូល​ឈ្លាន​ពាន​មិន​ទាន់​អាច​ទៅ​ផ្ទះ​វិ​ញ​បាន
ប្រធានាធិបតីបារាំង៖ រវាងកម្ពុជា និងបារាំងមានប្រវត្តិសាស្ត្ររួមគ្នាដ៏ជ្រាលជ្រៅដែលកំពុងតែរីកចម្រើនកាន់តែរឹងមាំថែមទៀត ក្នុងវិស័យថាមពល សុខាភិបាល ក៏ដូចជាវិស័យបេតិកភណ្ឌ
មន្រ្តីជំនាញក្រសួងអភិវឌ្ឍន៍ជនបទ ចុះពិនិត្យវឌ្ឍនភាពការងារសាងសង់ផ្លូវជនបទ ចំនួន ៤ស្រុកក្នុងខេត្តបន្ទាយមានជ័យ
សម្តេចមហារដ្ឋសភាធិការធិបតី អញ្ជើញចូលគោរពជូនពរសម្តេចអគ្គមហាពញាចក្រី និងសម្តេចធម្មវិសុទ្ធវង្សា ក្នុងឱកាសបុណ្យចូលឆ្នាំថ្មី ប្រពៃណីជាតិ

ព័ត៌មានជាតិ

ក្រសួងសង្គមកិច្ច៖កម្ពុជាត្រូវការកម្លាំងសេវាសង្គមដើម្បីកសាងសង្គមប្រកបដោយភាពសុខដុម

2026/03/19 04:31:02 pm        96
Facebook Telegram Linkin
ឯកឧត្តម ជា សុមេធី លើកឡើងថាកម្ពុជាត្រូវការកម្លាំងសេវាសង្គម ដើម្បីរួមចំណែកដល់ការផ្លាស់ប្ដូរ និងការកសាងសង្គមមួយប្រកបដោយភាពសុខដុម និងផាសុកភាព។ ការលើកឡើងដូចនេះធ្វើឡើងនៅថ្ងៃទី ១៩ ខែមីនា ឆ្នាំ ២០២៦ រៀបចំទិវាជាតិសង្គមកិច្ចលើកទី ២ និងទាវាសង្គមកិច្ចពិភពលោកទី១៩ ក្រោមប្រធានបទ “ រួមគ្នាសាងក្ដីសង្ឃឹម និងភាពសុខដុមរមនា” ។ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច បានលើកឡើងថា កម្ពុជាពិតជាត្រូវការកម្លាំងសេវាសង្គម ដែលជាអ្នកអាជីពសង្គមកិច្ច អ្នកអាជីពសង្គមកិច្ចរង អ្នក សង្គមកិច្ចបឋម និងអ្នកសង្គមកិច្ចសម្ព័ន្ធ បម្រើការងារក្នុងស្ថាប័នរាជរដ្ឋាភិបាល ឬអង្គការមិនមែនរដ្ឋាភិបាល ឬវិស័យឯកជន ដើម្បីរួមចំណែកដល់ការផ្លាស់ប្តូរ និងការកសាងសង្គមមួយប្រកបដោយភាពសុខដុម និង ផាសុខភាព ដែលកម្លាំងសេវាសង្គមត្រូវធ្វើការជាមួយប្រជាជន និងសហគមន៍ ជាពិសេសជាមួយប្រជាជន ក្រីក្រ រងគ្រោះ និងងាយរងគ្រោះ រួមមាន៖ កុមារ យុវជន មនុស្សពេញវ័យ ជនពិការ ស្ត្រី មនុស្សវ័យចាស់ គ្រួសារ និងសហគមន៍ ដើម្បីលើកកម្ពស់សុខុមាលភាព ដោះស្រាយបញ្ហាប្រឈម ជំរុញឱ្យមានការផ្លាស់ប្ដូរវិជ្ជមាន និងសមធម៌សង្គម តាមរយៈការផ្ដល់សេវាសង្គមកិច្ច និងការគាំទ្រផ្លូវចិត្ត ផ្លូវកាយ សម្ភារ ការសិក្សាអប់រំ សេដ្ឋកិច្ចសង្គម និងនយោបាយ។ លើសពីការងារនេះ ក្រសួងសង្គមកិច្ច ក្នុងសន្និបាតបូកសរុបលទ្ធផលការងារ ឆ្នាំ២០២៥ និងទិសដៅអនុវត្តបន្ត ឆ្នាំ២០២៦កន្លងទៅ ក៏បានដាក់ចេញនូវការងារអាទិភាពមួយចំនួន រួមមាន៖ ការអនុវត្តកម្មវិធីជំនួយសង្គមក្នុងកញ្ចប់គ្រួសារ កម្មវិធីជាតិជំនួយសង្គមផ្នែកបណ្តុះបណ្តាល ជំនាញវិជ្ជាជីវៈនិងបច្ចេកទេសសម្រាប់យុវជនក្រីក្រនឹងគ្រួសារអងហានិភ័យ កម្មវិធីដោះស្រាយបញ្ហាជន អនាថានិងជនវិបល្លាសស្មារតី ការលើកកម្ពស់ការងារយុវនីតិសម្បទា និងកម្មវិធីយុត្តិធម៌អនីតិជន ការ ជំរុញការជ្រើសរើសជនមានពិការភាពចូលបម្រើការងារក្នុងវិស័យរដ្ឋនិងឯកជនតាមអត្រាកំណត់ និងការ កំណត់គោលនយោបាយសម្រាប់ជនរងគ្រោះនិងជនងាយរងគ្រោះ។ បន្ថែមពីនេះក្រសួងនឹងបន្តកិច្ចសហការ ជាមួយក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាជាតិគាំពារសង្គម កំពារសង្គម និងក្រសួង ស្ថាប័នពាក់ព័ន្ធ បន្តពង្រឹង ប្រព័ន្ធសន្តិសុខ សង្គមឱ្យកាន់តែរឹងមាំ តាមរយៈ ការធ្វើស្វ័យប្រវត្តិកម្មនៃការបញ្ជូនទិន្នន័យ ជាមួយ នឹងការផ្ទៀងផ្ទាត់ភាពត្រឹមត្រូវ និងសុក្រឹតភាពទិន្នន័យដោយប្រើប្រាស់ថ្នាលគាំពារសង្គមឌីជីថលកម្ពុជា ជាគោល ព្រមទាំងផ្តោតលើកម្មវិធីអាទិភាពទាំង៤របស់ក្រសួង ស្របតាមកម្មវិធីគោលនយោបាយនិងយុទ្ធ សាស្ត្របញ្ចកោណ ដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលក្នុងនោះ បានផ្តោតជាសំខាន់លើការរៀបចំយន្តការ និងការអភិវឌ្ឍកម្លាំងសេវាសង្គម នៅកម្ពុជា។ អត្ថបទ៖ គឹមហុក

ក្រសួងសុខាភិបាល ជំរុញឱ្យទន្តពេទ្យលើកស្ទួយសុខុមាលភាព និងធានាស្តង់ដារគុណភាពជូនអ្នកជំងឺ

2026/03/19 04:27:50 pm        85
Facebook Telegram Linkin
មន្រ្តីជាន់ខ្ពស់នៃក្រសួងសុខាភិបាល បានជំរុញឱ្យទន្តបណ្ឌិត ទន្តពេទ្យ បង្កើនគុណភាព និងសមត្ថភាព ហើយត្រូវខិតខំប្រឹងប្រែងសិក្សារៀនសូត្រជាបន្តបន្ទាប់ទាំងបច្ចេកវិទ្យាថ្មីៗ ពីបណ្តារៀមច្បងដែលមានបទពិសោធន៍ច្រើន ព្រមទាំងសហការជាមួយទន្តបណ្ឌិតអន្តរជាតិ ដើម្បីបង្កើននូវសមត្ថភាពឱ្យកាន់តែខ្ពស់ និងឱ្យកាន់តែសុក្រិត្យ។ ឯកឧត្តមវេជ្ជបណ្ឌិត ស៊ិក ប៊ុណ្ណា រដ្ឋលេខាធិការ ក្រសួងសុខាភិបាល នៅក្នុងពិធីបើកសន្និសីទ និងការតាំងពិព័រណ៍ធ្មេញលើកទី២៤ នៃសមាគមទន្តសាស្ត្រកម្ពុជា ឆ្នាំ២០២៦ ក្រោមប្រធានបទ«កំណើនវិទ្យាសាស្ត្រ ក្នុងវិស័យទន្តសាស្ត្រ នាសម័យ ទំនើប» កាលពីព្រឹកថ្ងៃទី១៩ ខែមីនានេះ បានមានប្រសាសន៍ថា ចំពោះក្រមសីលធម៌វិជ្ជាជីវៈសុខាភិបាល ទន្តបណ្ឌិត និង ទន្តពេទ្យ ត្រូវតែគោរពស្រឡាញ់ និងយកចិត្តទុកដាក់ចំពោះអ្នកជំងឺ គ្រប់ប្រភេទ គឺកុំរើសអើងថា អ្នកមាន ឬអ្នកក្រ ហើយត្រូវគិតថា ការឈឺចាប់របស់អ្នកជំងឺ គឺជាការឈឺចាប់របស់ពេទ្យ ហើយការពាអតិថិជន តាមរយៈការលើកស្ទួយសុខុមាលភាព និងធានានូវស្តង់ដាគុណភាព គឺជាការចាំបាច់។ឯកឧត្តមវេជ្ជបណ្ឌិត បានលើកឡើងបន្តថា សន្និសីទនាថ្ងៃនេះ ក៏ជាសក្ខីភាពបង្ហាញថា សមាគមទន្តសាស្ត្រកម្ពុជា បានអនុវត្តបានល្អនូវការសាមគ្គី ការសហការគ្នាល្អ ការអប់រំ ជួយបណ្តុះបណ្តាលបន្ត និងការចែករំលែកនូវចំណេះដឹងថ្មីៗ ដែលមានកំណើនវិទ្យសាស្ត្រជាសាកលដោយបន្តនិរន្តរភាពជារៀងរាល់ឆ្នាំ ចំពោះទន្តបណ្ឌិតទូទាំងប្រទេសកម្ពុជា។ ចំពោះវត្តមានសាស្ត្រាចារ្យបរទេស ដែលអញ្ជើញមកពីទីជិតឆ្ងាយចូលរួម ជាការឆ្លុះបញ្ចាំងពីឆន្ទៈ ក្នុងការចូលរួមអភិវឌ្ឍន៍វិស័យសុខាភិបាលកម្ពុជា ជាពិសេសក្នុងវិស័យទន្តសាស្ត្រកម្ពុជា។ ទន្ទឹមនេះ ទន្តបណ្ឌិត តាក រ៉ាណុច និពន្ធនាយកសមាគមទន្តពេទ្យកម្ពុជា បានឱ្យដឹងថា សន្និសីទជាតិ ស្តីពី កំណើនវិទ្យាសាស្រ្ត ក្នុងវិស័យទន្តសាស្រ្ត នាសម័យទំនើប ត្រូវបានរៀបចំឡើងក្នុងគោលបំណងផ្សព្វផ្សាយពីសារៈសំខាន់អត្ថប្រយោជន៍សម្រាប់សមាជិក សមាជិការ របស់សមាគម ក្នុងការសិក្សាស្វែងយល់បន្ថែម ទាក់ទងនឹងកំណើនវិទ្យាសាស្រ្ត លើវិស័យទន្តសាស្រ្តនេះ ដើម្បីជំនួយក្នុងការព្យាបាលប្រកបដោយប្រសិទ្ធភាពជូនដល់ប្រជាជនកម្ពុជាគ្រប់ៗគ្នា។លោកប្រធានសមាគម បានបញ្ជាក់ថា វិស័យទន្តសាស្រ្តកម្ពុជាទទួលបានអ្នកជំងឺជាតិ និងអន្តរជាតិមកទទួលសេវាព្យាបាលយ៉ាងច្រើន ដោយសារតែវិស័យនេះ បាននិងកំពុងមានការរីកចំរើនយ៉ាងខ្លាំង ព្រមទាំងមានឧបករណ៍ និងសម្ភារៈព្យាបាលទំនើបមកពីបរទេស ពោលគឺ អ្វីដែលគេមាន នៅកម្ពុជាក៏មាន អ្វីដែលគេអាចធ្វើបាន នៅកម្ពុជាក៏អាចធ្វើបាន និងមានគុណភាពសុវត្ថិភាពថែមទៀត៕អត្ថបទ៖ ឈិត បូរ៉ាវី 

អាជ្ញាធរភ្នំពេញ៖ម្ចាស់ទីតាំងជួលនានាបើព្រងើយកន្តើយមិនព្រមពង្រឹងលើការគ្រប់គ្រងជនបរទេសដែលមកជួលស្នាក់នៅទេនឹងប្រឈមទោសទណ្ឌធ្ងន់ធ្ងរ

2026/03/19 04:24:48 pm        82
Facebook Telegram Linkin
ភ្នំពេញ ៖ លោក ហ៊ុន សុរិទ្ធី អភិបាលរងរាជធានីភ្នំពេញបានលើកឡើងថា ម្ចាស់ទីតាំងជួលនានាបើព្រងើយកន្តើយ មិនព្រមពង្រឹងលើការគ្រប់គ្រងជនបរទេសដែលមកជួលស្នាក់នៅទេ នឹងទទួលទោសទណ្ឌនិងផាកពិន័យក្នុងកម្រិតមួយយ៉ាងធ្ងន់ធ្ងរ។ការលើកឡើងរបស់លោក ហ៊ុន សុរិទ្ធី អភិបាលរងរាជធានីបានធ្វើឡើងនាព្រឹកថ្ងៃទី១៩ ខែមីនា ឆ្នាំ២០២៦ ខណៈលោក និងលោក ឆាយ វីរៈ អភិបាលរងតំណាងឯកឧត្ដម ឃួង ស្រេង អភិបាលរាជធានីភ្នំពេញអញ្ជើញជាធិបតីក្នុងពិធីផ្សព្វផ្សាយអនុក្រឹត្យរបស់រាជរដ្ឋាភិបាលស្តីពីការគ្រប់គ្រងសន្តិសុខ សុវត្ថិភាពតាមទីតាំងរស់នៅប្រមូលផ្តុំទៅដល់ម្ចាស់ទីតាំង បុរី ខុនដូ អាផាតមិន សណ្ឋាគារ និងអគារសហកម្មសិទ្ធិ ក្នុងភូមិសាស្រ្តរាជធានីភ្នំពេញ។លោក ហ៊ុន សុរិទ្ធី បានថ្លែងថា គ្រប់ម្ចាស់ទីតាំងដែលត្រូវជួលឱ្យជនបរទេសស្នាក់នៅត្រូវតែពង្រឹងលើការគ្រប់គ្រង ដើម្បីសន្តិសុខ និងសុវត្ថិភាពសង្គម។ ការស្នាក់នៅរបស់ជនបរទេសទាំងអស់ត្រូវមានលិខិតស្នាមបញ្ជាក់ឱ្យបានត្រឹមត្រូវ ចំពោះអ្នកណាម្នាក់ត្រូវជាសាច់ញាតិដែលចង់មកលេងក៏ត្រូវទាមទារលិខិតឱ្យបានច្បាស់លាស់ផងដែរ ធ្វើយ៉ាងណាត្រូវតែអនុវត្តតាមអនុក្រឹត្យរបស់រាជរដ្ឋាភិបាលឱ្យបានល្អប្រសើរ និងមានប្រសិទ្ធភាពខ្ពស់បំផុត។ លោក ហ៊ុន សុរិទ្ធី បន្ថែមថា ប្រសិនបើមានការធ្វេសប្រហែសលើការគ្រប់គ្រងជនបរទេសបង្កឱ្យមានបញ្ហានឹងត្រូវទទួលទោសទណ្ឌ និងផាកពិន័យក្នុងកម្រិតធ្ងន់ធ្ងរ ព្រោះឈានដល់ដំណាក់កាលនេះ មិនមែនត្រូវអប់រំណែនាំទៀតទេ ត្រូវតែប្រឈមមុខច្បាប់។ អ្វីដែលអនុវត្តនេះ មិនមែនសំដៅដាក់គំនាប គាបសង្កត់ទៅលើម្ចាស់ទីតាំងទេ អាជ្ញាធរធ្វើនេះក្នុងន័យថា ធ្វើយ៉ាងណាធានាបានថា ទីតាំងទាំងអស់មិនមានបទល្មើសលួចលាក់នៅខាងក្នុង។ អភិបាលរងរាជធានីគូសបញ្ជាក់ថា ការឱ្យម្ចាស់ទីតាំងរាយការណ៍អំពីជនបរទេសស្នាក់នេះ ក្នុងគោលបំណងបញ្ចៀសធ្វើយ៉ាងណាកុំឱ្យម្ចាស់ទីតាំងទទួលរងទុក្ខទោស និងការផាកពិន័យ។យោងតាមមាត្រា ១៩ នៃអនុក្រឹត្យស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ គឺម្ចាស់ទីតាំងរស់នៅប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំដែលធ្វេសប្រហែសខកខានមិនបំពេញកាតព្វកិច្ចរាយការណ៍អំពីការស្នាក់របស់ជនបរទេសទេ នឹងត្រូវផាកពិន័យចំនួន៤លានរៀល ដោយមិនទាន់គិតដល់ព្យសនកម្មដែលកើតឡើងពីការធ្វេសប្រហែស។ សម្រាប់មាត្រា ២០ ម្ចាស់ទីតាំងរស់នៅប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំដែលមានចេតនាលាក់បាំង និងអនុញ្ញាតឱ្យជនបរទេសដែលចូលមកកម្ពុជាដោយខុសច្បាប់ស្នាក់នៅក្នុងទីតាំងស្ថិតនៅក្រោមការទទួលខុសត្រូវរបស់ខ្លួន ត្រូវផាកពិន័យជាប្រាក់៤លានរៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌ៕អត្ថបទ ៖ ប្រាក់ វ៉ាន់ដា

ក្រសួងពាណិជ្ជកម្ម អំពាវនាវដល់ម្ចាស់សហគ្រាស និងអ្នកនាំចូលទំនិញ សូមកុំដំឡើង​តម្លៃ​លើស​កម្រិត

2026/03/19 04:16:47 pm        243
Facebook Telegram Linkin
អ្នកនាំពាក្យក្រសួងពាណិជ្ជកម្ម អំពាវនាវដល់ម្ចាស់សហគ្រាសដែលជាអ្នកផលិត និង​កែ​ច្នៃ​ក្នុង​ស្រុក ​អ្នកនាំចូលទំនិញ និងអាជីវករ លក់ដូរលើទីផ្សារ សូមកុំឆ្លៀត​ឱកាស​នៃ​ការ​ដំឡើង​ថ្លៃ​លក់​មុខ​ទំនិញ​ជា​គំហុក ពោលគឺកុំដំឡើងថ្លៃលើសកម្រិតនៅលើទីផ្សារ។ ឯកឧត្តម ប៉ែន សុវិជាតិ អ្នកនាំពាក្យនិងជារដ្ឋលេខាធិការក្រសួងពាណិជ្ជកម្ម ថ្លែង​លើក​ឡើង​ក្នុង​កិច្ច​សម្ភាសន៍​ជា​មួយ BTV ស្តីអំពីថ្លៃមុខទំនិញលើទីផ្សារក្នុងបរិបថបច្ចុប្បន្ននេះថា ជុំវិញបញ្ហា​នៃ​ការ​ហក់​ឡើង​នៃ​តម្លៃប្រេងឥន្ធនៈនេះ និងអ្វីៗនឹងហក់ឡើងទៅ តាមនោះផងដែរ ព្រោះប្រេង​ឥន្ធនៈ​គឺ​ជា​មធ្យោបាយដ៏សំខាន់ សម្រាប់សេវាដឹកញ្ជូន មិនថាការដឹកជញ្ជូនតាមផ្លូវគោក ផ្លូវទឹក ឬ​ផ្លូវអាកាស ជាពិសេសការបម្រើក្នុងប្រតិបត្តិការអាជីវកម្មជាដើម។ឯកឧត្តម បន្តថា ជុំវិញបញ្ហានេះ ក្រសួងពាណិជ្ជកម្មមានវិធាន២សំខាន់គឺ៖ ការអប់រំ និង​ការ​ផ្សព្វ​ផ្សាយ ​អំពីហានីភ័យដែល ជួបប្រទះក្នុងករណីប្រធានស័ក្តិដូចជាបញ្ហាប្រេងឥន្ធនៈនេះជាដើម ក្នុង​នោះ​ចំពោះអ្នកទទួលផលប៉ះពាល់ដោយផ្ទាល់ ជាពិសេសអ្នក ធ្វើអាជីវកម្ម, ខណៈ​តម្លៃ​ប្រេង​ហក់​ឡើង ដំណើរផលិតកម្មគឺពិតណាស់ចៀសមិនផុតអំពីផលប៉ះពាល់នេះឡើយ ដូច្នេះ​ទាំង​អ្នក​ផលិត ​និងកែច្នៃ អ្នកនាំចូលទំនិញពីក្រៅប្រទេស និងអាជីវករដែលកំពុងលក់ដូរលើទីផ្សារជាដើម សូម​មានការឡើងថ្លៃសមរម្យ និងសូមកុំ យកបរិបថដែលកំពុងជួបបញ្ហាប្រឈមនេះ ឆ្លៀត​ឱកាស​ដំឡើង​ថ្លៃ​ហួស​ហេតុនោះឡើយ។ទាក់ទិនការឡើងថ្លៃប្រេងនេះ, លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា បាន​បង្ហាញនូវការព្រួយ បារម្មណ៍អំពីការប្រកួតប្រែងមិនស្មើរភាព រវាងទំនិញនាំចូល និង​ទំនិញ​ផលិត​ផល​ ឬកែច្នៃដែលផលិតក្នុងស្រុក ខណៈស្ថិតក្នុងបរិបថនេះ ប្រទេស​មួយ​ចំនួន​បាន​បើក​យុទ្ធ​នាការជួយសង្រ្គោះ អំពីការកើនឡើងនៃតម្លៃប្រេងឥន្ធនៈ។ បញ្ហានេះ​ដែរ​លោក​បាន​អំពាវ​នាវ​ដល់​រាជរដ្ឋាភិបាលពិចារណា និងពិនិត្យមើលទ្ធភាពជាក់ស្តែង ជួយដល់កិច្ច​ដំណើរ​ផលិតកម្ម​នៅ​ក្នុង​ស្រុក​ផងដែរ ខណៈទំនិញដែលផលិត និង កែច្នៃក្នុងស្រុក កំពុងមានសម្ទុះ​គាំ​ទ្រ​ពី​ប្រជា​ពលរដ្ឋ​៕ អត្ថបទ៖ សុន រ៉ាឌី

មនី្ទរពេទ្យមិត្តភាពខ្មែរ-សូវៀត សម្ពោធដាក់ឲ្យដំណើរការម៉ាស៊ីនអេកូឆ្លុះក្នុងសរសៃឈាមបេះដូង-IVUS

2026/03/19 04:03:02 pm        298
Facebook Telegram Linkin
នាព្រឹកថ្ងៃទី១៩ ខែមីនា ឆ្នាំ២០២៦នេះ ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត នៃក្រសួងសុខាភិបាល បានអញ្ជើញសម្ពោធដាក់ឲ្យដំណើរការម៉ាស៊ីនអេកូឆ្លុះ ក្នុងសរសៃឈាមបេះដូង Intravascular Ultrasound (IVUS) នៅមជ្ឈមណ្ឌលព្យាបាលជំងឺបេះដូង និងមនុស្សចាស់។លោកវេជ្ជបណ្ឌិតឯកទេស លឹម ស៊ីវុតថា នាយផ្នែកមជ្ឈមណ្ឌលព្យាបាលជំងឺបេះដូង និងមនុស្សចាស់ បានលើកឡើងថា ក្នុងរយៈពេល ០២ឆ្នាំចុងក្រោយ ចំនួនអ្នកជំងឺនៅផ្នែក Cath-Lab បានកើនឡើង ពី ៦៤៣ ករណី ក្នុងឆ្នាំ២០២៤ ដល់ ៩២០ករណី ក្នុងឆ្នាំ២០២៥ កើនឡើងប្រហែល ៣៧% ដែលបង្ហាញពីការកើនឡើងនៃការជឿជាក់ និងតម្រូវការសេវាកម្ម។ បច្ចុប្បន្ននេះ ផ្នែក Cath-Lab មានសមត្ថភាពកាន់តែប្រសើរ ទាំងធនធានមនុស្ស និងឧបករណ៍ទំនើប ដោយអាចផ្តល់សេវាជាច្រើន ដូចជា៖ ការថតឆ្លុះសរសៃឈាមបេះដូង, ការពង្រីកសរសៃឈាមដោយបាឡូន និងដាក់ STENT, ការដាក់ថ្មបេះដូង ទាំងអចិន្ត្រៃយ៍ និងអត់ខ្សែ ការសិក្សា និងព្យាបាលវិបត្តិចង្វាក់បេះដូង, ការព្យាបាលជំងឺស្ទះសរសៃឈាមអវយវៈ និងនីតិវិធីសំខាន់ៗផ្សេងទៀត។ ជាមួយគ្នានេះ មជ្ឈមណ្ឌល ក៏បានបំពាក់ឧបករណ៍ទំនើបជាច្រើន រួមមាន៖ ម៉ាស៊ីន Monoplane (2020), និង Biplane (2024), ឧបករណ៍ព្យាបាលវិបត្តិចង្វាក់បេះដូង 2D និង 3D (2023), FFR។ ក្នុងពិធីសម្ពោធនេះ ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានថ្លែងថា ដើម្បីអោយកាន់តែមានប្រសិទ្ធភាពលើការព្យាបាលអ្នកជំងឺស្ទះសរសៃឈាមបេះដូង ផ្នែកបានដាក់ឱ្យដំណើរការម៉ាស៊ីនដ៏ទំនើប និងចុងក្រោយបង្អស់មួយទៀតឈ្មោះថា AVIGO™ ដែលជាបច្ចេកវិទ្យាថតរូបភាពខាងក្នុងសរសៃឈាម ដ៏ទំនើប អាចជួយវេជ្ជបណ្ឌិតមើលឃើញសរសៃឈាមបេះដូង ពីខាងក្នុងបានយ៉ាងច្បាស់ និងមានភាពត្រឹមត្រូវខ្ពស់។ បច្ចេកវិទ្យានេះជួយវាយតម្លៃទំហំសរសៃឈាមលក្ខណៈរបស់ Plaque (SOFT, FIBROUS, CALCIFIED) និង EXTENT OF BLACKAGE បានត្រឹមត្រូវ ជួយជ្រើសរើស STENT សមស្រប និងធានាការដាក់ STENT បានល្អប្រសើរ។ តាមរយៈម៉ាស៊ីននេះ អាចអោយយើងវាស់ Fraction Flow Reserve (FFR) ដែលអាចឲ្យយើងសិក្សាអំពី blood flow នៅផ្នែកខាងក្រោមកន្លែងស្ទះ។ជាចុងក្រោយឯកឧត្តមសាស្រ្តាចារ្យ បញ្ជាក់ទៀតថា ក្រៅពីផ្នែកជំងឺបេះដូង យើងមានបន្ទប់ពិនិត្យសុខភាពទូទៅ (មេឌីខល ឆែកអាប់) ដែលអ្នកធម្មតា ក៏អាចពិនិត្យបានផងដែរ។ ហើយក្នុងករណីពិនិត្យសុខភាពទូទៅ បើរកឃើញថាវាមានការប្រែប្រួលទៅលើជំងឺអ្វីមួយ គ្រប់ផ្នែកទាំងអស់ នៃមនី្ទរពេទ្យមិត្តភាពខ្មែរ-សូវៀត បានធ្វើទំនើបកម្មគ្រប់ផ្នែកទាំងអស់ មានសមត្ថភាពគ្រប់គ្រាន់ក្នុងការបម្រើសេវាសុខាភិបាល ជូនប្រជាពលរដ្ឋ ដោយមិនចាំបាច់ទៅទទួលសេវានៅក្រៅប្រទេសឡើយ៕ អត្ថបទ រដ្ឋា

ក្រុមអាជីវករ៖ ទំនិញប្រើប្រាស់ប្រចាំថ្ងៃ ត្រីសាច់បន្លែ រក្សាតម្លៃថេរ នៅទីផ្សារទីក្រុងភ្នំពេញ

2026/03/19 01:58:31 pm        76
Facebook Telegram Linkin
ក្រុមអាជីវករ លក់នៅផ្សារច្បាអំពៅ នៅរាជធានីភ្នំពេញ បានលើកឡើងថា ទំនិញប្រើប្រាស់ចាំបាច់ប្រចាំថ្ងៃ ដូចជា ត្រី សាច់ និងបន្លែ ពួកគាត់លក់ក្នុងតម្លៃថេរដដែល បើទោះបីជា ពិភពលោកទាំងមូលរួមទាំងកម្ពុជា កំពុងរងផលប៉ះពាល់ពីវិបត្តិប្រេងឥន្ធនៈដោយសារសង្រ្គាមនៅអ៊ីរ៉ង់ក៏ដោយ។ក្រុមអាជីវករ ផ្សារច្បាអំពៅ បានឱ្យដឹងថា ស្របពេលតម្លៃប្រេងឥន្ធនៈបន្តហក់ឡើង តម្លៃ ត្រី សាច់ជ្រូក សាច់មាន់ និងបន្លែ គឺលក់មិនឡើងថ្លៃនេះទេ គិតត្រឹមថ្ងៃទី១៩ មីនានេះ។ ប៉ុន្តែ ពួកគាត់ថា ប្រសិនឡើងតម្លៃមានការប្រែប្រួល ក៏មិនឡើងថ្លៃហួសហេតុដែរគឺរក្សាតម្លៃសមរម្យអាចទទួលយកបាន។ ក្រុមអាជីវករ មានប្រសាសន៍ថា៖ «ខ្ញុំអត់មានលក់ឡើងថ្លៃនោះទេ មានតែលក់ធូរថ្លៃ តម្លៃសមរម្យ លក់ដូចកាលពីមុនដែរ បើហ៊ានតែឡើងថ្លៃ លក់អត់ដាច់វិញទេ។ ខ្ញុំសូមអំពាវឱ្យមានភ្ញៀវមកផ្សារច្បាអំពៅឱ្យបានច្រើន មកជួយទិញ តម្លៃអត់មានលក់ឡើងថ្លៃទេ តម្លៃធម្មតា។ ខ្ញុំរាល់ថ្លៃចង់ឱ្យប្រជាពលរដ្ឋគាំទ្រផលិតផលខ្មែរ យើងប្រើរបស់យើងវាជួយសេដ្ឋកិច្ចយើង»។ដោយឡែក ប្រជាពលរដ្ឋដែលអ្នកទិញ បានបញ្ជាក់ថា នៅព្រឹកនេះ សាច់ជ្រូកនៅរក្សាតម្លៃដដែល ប៉ុន្តែបន្លែ និងសាច់មាន់ បានឡើងតិចតូច ដែលអាចទទួលយកបាន។ពួកគាត់ អំពាវនាវឱ្យអាជីវករកុំឡើងថ្លៃទំនិញហួសហេតុពេក ក្នុងអំឡុងពេលដ៏លំបាកនេះ។ ប្រជាពលរដ្ឋ លើកឡើងថា ៖ «សាច់ជ្រូកអត់ឡើងថ្លៃទេ សាច់ជ្រូកតម្លៃ ២០,០០០រៀល តែបន្លែ ស្លឹកខ្ទឹមឡើងថ្លៃមួយគីឡូ ឡើង១,០០០រៀល។ ខ្ញុំចង់សុំឱ្យលក់តម្លៃសមរម្យ កុំឡើងថ្លៃពេក»។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានអះអាថា ក្នុងអំឡុងពេលនេះ កម្ពុជាអាចធានាការផ្គត់ផ្គង់សាច់នៅលើទីផ្សារមិនឱ្យខ្វះខាតឡើយ ហើយធានាស្ថិរភាពតម្លៃនៅលើទីផ្សារឱ្យនៅដដែល ដើម្បីកុំឱ្យប៉ះពាល់ដល់ជីវភាពប្រជាពលរដ្ឋ។ លោក ស្រ៊ុន ពៅ បញ្ជាក់ថា៖ «ការផ្គត់ផ្គង់សាច់សត្វនៅលើទីផ្សារមិនទាន់ប៉ះពាល់អ្វីទេ វិបតត្តិប្រេងជាសាកលទើបនឹងកើតឡើងថ្មីៗ។ តម្លៃសាច់សត្វនៅថេរធម្មតា ហើយការចិញ្ចឹមសត្វក៏កំពុងដំណើរការជាធម្មតា»។បើតាមការកត់សម្គាល់ តម្លៃទំនិញប្រើប្រាស់ប្រចាំថ្ងៃនៅលើទីផ្សារ ហាក់រក្សាតម្លៃនៅទ្រឹងពោលគឺមិនហក់ឡើងហួសហេតុ តាមតម្លៃប្រេងឥន្ធនៈនោះទេ។ ទោះបីយ៉ាងណា ក្រសួងពាណិជ្ជកម្ម កំពុងតាមដានយ៉ាងយកចិត្តទុកដាក់លើការប្រែប្រួលតម្លៃទំនិញនៅលើទីផ្សារ៕

អភិបាលខេត្តបាត់ដំបង នាំយកអំណោយជាគ្រឿងឧបភោគបរិភោគផ្ដល់ជូនដល់អតីតយុទ្ធជន និង​និវត្តជនចំនួន ៤៨៤គ្រួសារ

2026/03/19 01:52:59 pm        157
Facebook Telegram Linkin
បាត់ដំបង៖ នៅថ្ងៃទី១៩ ខែមីនា ឆ្នាំ២០២៦ ឯកឧត្តម សុខ លូ អភិបាលនៃ​គណៈ​អភិបាល​ខេត្ត​បាត់ដំបង ​បាននាំយកអំណោយជាគ្រឿងឧបភោគបរិភោគផ្ដល់ជូនដល់អតីតយុទ្ធជន និង​និវត្ត​ជន​ចំនួន ៤៨៤គ្រួសារ ដែលកំពុងរស់នៅលើដីសម្បទានសង្គមកិច្ចស្ថិតក្នុងឃុំឆ្នាល់មាន់ និង ឃុំដូ​នបា ស្រុកគាស់ក្រឡ។មាន​ប្រសាសន៍ក្នុងឱកាសនោះ ឯកឧត្តម សុខ លូ គូសបញ្ជាក់ថា សម្ដេចតេជោ ហ៊ុន សែន ប្រធាន​ព្រឹទ្ធសភា និងជាប្រធានសមាគមអតីតយុទ្ធជន និងនិវត្តជន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​កម្ពុជា​តែង​តែ​គិតគូរ និង​យក​ចិត្ត​ទុក​ដាក់​ខ្ពស់​ចំពោះ​សុខ​ទុក្ខ​គ្រប់​បែប​យ៉ាងរបស់អតីតយុទ្ធជន និងនិវត្តជន។ឯកឧត្តម ជំរុញឱ្យអតីតយុទ្ធជន និងនិវត្តជនត្រូវ​ខិតខំ​បង្កើន​ការ​ដាំដុះ និង​ចិញ្ចឹម​សត្វ​សម្រាប់​ផ្គត់​ផ្គង់​ជីវភាព​រស់នៅប្រចាំថ្ងៃ។ឯកឧត្តម ណែនាំដល់មន្រ្តីជំនាញ និងអាជ្ញាធរត្រូវ​បន្ត​យក​ចិត្ត​ទុក​ដាក់​ពន្លឿន​រៀបចំ​បណ្ដាញ​អគ្គិសនី ​ទឹក ផ្លូវ មន្ទីរពេទ្យ និងសាលារៀន​ដើម្បី​បំពេញ​តម្រូវ​ការ​ចាំបាច់​របស់​គ្រួសារ​អតីត​យុទ្ធជន​ និងនិវត្តជន។ក្នុងនាមរដ្ឋបាលខេត្ត ឯកឧត្តម សុខ លូ ប្ដេជ្ញាខិតខំកៀរគរ​ធនធាន​ដើម្បី​បន្ត​ជួយ​ឧបត្ថម្ភ​គាំទ្រ​ដល់​បង​ប្អូន​អតីត​យុទ្ធជន និងនិវត្តជន ដោយមិនទុកបងប្អូនចោលឡើយ។ឯកឧត្តម ជំរុញ​ឱ្យអតីតយុទ្ធជន និងនិវត្តជនចូលរួមអប់រំកូនចៅឱ្យឆ្ងាយពីគ្រឿងញៀន និង​ចូល​រួម​រាយការណ៍ករណីគ្រឿងញៀនកម្មវិធីទូរសព្ទដៃApp NoDrug ដែលជាមធ្យោបាយលឿនរហ័ស សុវត្ថិភាព និងរក្សាការសម្ងាត់១០០%៕

សម្តេច ម៉ែន សំអន៖ ការវិវត្តន៍នៃសម្លៀកបំពាក់របាំព្រះរាជទ្រព្យខ្មែរ បានឆ្លុះបញ្ចាំងពីដំណើរប្រវត្តិសាស្ត្រ ភាពរុងរឿង ការរស់រានមានជីវិត និងការលើកកម្ពស់វប្បធម៌ និងអរិយធម៌ខ្មែរ «អតីតកាល បច្ចុប្បន្នកាល និងអនាគតកាល»

2026/03/19 01:22:32 pm        165
Facebook Telegram Linkin
សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញជាអធិបតី ការសម្តែងទស្សនីយភាពរបាំស្តីពី ការវិវត្តន៍នៃសម្លៀកបំពាក់របាំព្រះរាជទ្រព្យខ្មែរ ដែលបានរៀបចំឡើងនៅសាលមហោស្រពចតុមុខ រាជធានីភ្នំពេញ នារាត្រីថ្ងៃពុធ ទី១៨ ខែមីនា ឆ្នាំ២០២៦។តាមរយៈ នៃការវិវត្តន៍នៃសម្លៀកបំពាក់របាំព្រះរាជទ្រព្យខ្មែរ មិនមែនគ្រាន់តែជាការផ្លាស់ប្តូររូបរាងឬពណ៌សម្បុរនោះទេ ប៉ុន្តែវាបានឆ្លុះបញ្ចាំងពីដំណើរប្រវត្តិសាស្ត្រ ភាពរុងរឿង ការរស់រានមានជីវិត និងការលើកកម្ពស់វប្បធម៌ និងអរិយធម៌ខ្មែរ «អតីតកាល បច្ចុប្បន្នកាល និងអនាគតកាល» ហើយការវិវត្តន៍នោះបានចូលរួមចំណែក រួមមាន៖១. រក្សានូវអត្តសញ្ញាណ និងស្មារតីជាតិ ព្រោះថា សម្លៀកបំពាក់របាំព្រះរាជទ្រព្យ គឺជានិមិត្តរូបដ៏ខ្ពង់ខ្ពស់បំផុតមួយនៃអត្តសញ្ញាណជាតិខ្មែរ។ ការវិវត្តន៍នេះ គឺជាភស្តុតាងប្រវត្តិសាស្ត្រដែលបញ្ជាក់ថា អរិយធម៌ខ្មែរមិនដែលរលាយបាត់ឡើយ ។ ម៉្យាងទៀតគឺជាបន្តបាននូវការថែរក្សាមរតកដូនតា តាមរយៈការវិវត្តន៍ សិល្បករ និងអ្នកប្រាជ្ញបានខិតខំស្រាវជ្រាវ ស្ដារ និងថែរក្សានូវលក្ខណៈដើមពីសម័យអង្គរ ដូចជារូបចម្លាក់ទេពអប្សរ និងព្រះរាជពិធីនានា។២.លើកកម្ពស់គុណភាពសិល្បៈ និងសោភ័ណភាពការវិវត្តន៍បានជំរុញឱ្យសិល្បករខ្មែរបង្កើនជំនាញរបស់ខ្លួន ធ្វើយ៉ាងណាឱ្យសម្លៀកបំពាក់កាន់តែមានភាពរុងរឿង វិចិត្រ និងប្រណិត ដោយរក្សាបាននូវអត្តសញ្ញាណជាតិ ដោយរាប់តាំងពីការប៉ាក់ឌិន ការស្រោបមាស រហូតដល់ការធ្វើម្កុដ សុទ្ធសឹងជាស្នាដៃសិល្បៈដ៏មានតម្លៃ។ ទន្ទឹមនឹងនោះផងដែរ ភាពស្រស់ស្អាតពេញលក្ខណៈបានធ្វើឱ្យរបាំព្រះរាជទ្រព្យកាន់តែមានភាពទាក់ទាញ។ ក្បាច់រាំដ៏រលូន រួមផ្សំនឹងសម្លៀកបំពាក់ដ៏ត្រចះត្រចង់ និងតន្ត្រីដ៏ពិរោះ បង្កើតបានជាសិល្បៈដ៏ពេញលក្ខណៈ ដែលអាចទាក់ទាញទស្សនិកជនជាតិខ្មែរ និងអន្តរជាតិ។៣. បង្ហាញការទូតវប្បធម៌ការទូត និងសេដ្ឋកិច្ច ៖ នៅពេលដែលរបាំព្រះរាជទ្រព្យ និងសម្លៀកបំពាក់ គឺជា «ឯកអគ្គរដ្ឋទូតវប្បធម៌» ដ៏មានឥទ្ធិពលរបស់កម្ពុជាក្នុងការបង្ហាញខ្លួននៅលើឆាកអន្តរជាតិ។ នៅពេលដែលក្រុមរបាំទៅសម្តែងក្រៅប្រទេស សម្លៀកបំពាក់ដ៏ស្រស់ស្អាតទាំងនេះ បានបង្ហាញពីភាពថ្លៃថ្នូរ និងសមត្ថភាពច្នៃប្រឌិតរបស់ជាតិខ្មែរ ជួយពង្រឹងចំណងមិត្តភាព និងការយោគយល់គ្នារវាងប្រជាជាតិនានា។ ភាពល្បីល្បាញនៃរបាំព្រះរាជទ្រព្យ ទាក់ទាញភ្ញៀវទេសចរឱ្យមកកម្ពុជា ដើម្បីទស្សនាសម្លៀកបំពាក់ដើម និងទស្សនាការសម្តែងផ្ទាល់។ នេះជាការរួមចំណែកយ៉ាងសំខាន់ដល់វិស័យទេសចរណ៍ និងសេដ្ឋកិច្ចជាតិ៕

ក្រសួងការងារ ជំរុញយុទ្ធនាការបង្ការ និងទប់ស្កាត់ការប្រើប្រាស់ពលកម្មកុមារ និងលើកកម្ពស់លក្ខខណ្ឌការងារកម្មករនិយោជិតវ័យក្មេង

2026/03/19 01:03:22 pm        115
Facebook Telegram Linkin
ក្រចេះ៖ នាព្រឹកថ្ងៃទី១៨ ខែមីនា ឆ្នាំ២០២៦ ក្រសួងការងារ និងបណ្តុះបណ្តាលវិជ្ជាជីវៈ បានបើកយុទ្ធនាការផ្សព្វផ្សាយស្តីពី «ការបង្ការនិងទប់ស្កាត់ការប្រើប្រាស់ពលកម្មកុមារ និងលើកកម្ពស់លក្ខខណ្ឌការងារសម្រាប់កម្មករនិយោជិតវ័យក្មេង» នៅក្នុងទីតាំងចម្ការកៅស៊ូ នៃក្រុមហ៊ុន ស្វីហ្វ រីសសស៍ (ខេមបូឌា) ស្ថិតក្នុងស្រុកស្នួល ខេត្តក្រចេះ។យុទ្ធនាការផ្សព្វផ្សាយនេះ បានប្រព្រឹត្តទៅក្រោមអធិបតីភាពលោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មាធិការជាតិប្រឆាំងពលកម្មកុមារ ដោយមានការចូលរួមពីអនុប្រធាន សមាជិក សមាជិកានៃគណៈកម្មាធិការជាតិប្រឆាំងពលកម្មកុមារ (គ.ជ.ព.) និងគណៈកម្មការប្រឆាំងពលកម្មកុមាររាជធានី ខេត្តទាំង២៥, តំណាងក្រសួង ស្ថាប័នពាក់ព័ន្ធ, តំណាងរដ្ឋបាលរាជធានី-ខេត្ត ស្រុក ឃុំ, ប្រធានមន្ទីរការងារ និងបណ្តុះបណ្តាលវិជ្ជាជីវៈរាជធានី-ខេត្ត,អង្គការអន្តរជាតិខាងការងារ (ILO), អង្គការដៃគូ, សមាគមនិយោជក, សហជីព, ម្ចាស់សហគ្រាសក្នុងវិស័យកសិ-ឧស្សាហកម្ម និងសិប្បកម្មផលិតឥដ្ឋក្នុងខេត្តក្រចេះ, ឪពុកម្តាយ អាណាព្យាបាល, លោកគ្រូ អ្នកគ្រូ និងកុមារ សរុបប្រមាណ៥០០នាក់។ លោកជំទាវរដ្ឋលេខាធិការប្រចាំការ បានគូសបញ្ជាក់ថា យុទ្ធនាការផ្សព្វផ្សាយនេះមានគោលបំណង (១) លើកកម្ពស់ការយល់ដឹងរបស់សាធារណជន និងភាគីពាក់ព័ន្ធ ជាពិសេស ឪពុកម្តាយ អាណាព្យាបាល និយោជក និងសហគមន៍អំពីហានិភ័យនិងផលប៉ះពាល់នៃពលកម្មកុមារនៅក្នុងវិស័យអាទិភាព សិប្បកម្មផលិតឥដ្ឋ-ក្បឿង និងកសិ-ឧស្សាហកម្ម (២) ពង្រឹងប្រសិទ្ធភាពនៃការអនុវត្តច្បាប់តាមរយៈយន្តការអធិការកិច្ចការងារក្នុងការលើកកម្ពស់លក្ខខណ្ឌការងារកម្មករនិយោជិតវ័យក្មេង (៣) បង្កើនកិច្ចសហការរបស់គ្រប់ភាគីពាក់ព័ន្ធក្នុងការគាំទ្រគ្រួសារនិងកុមារឱ្យទទួលបានការអប់រំ បំណិនជីវិត ការបណ្តុះបណ្តាលជំនាញ និងឱកាសទទួលបានមុខរបរនិងការងារដើម្បីលើកកម្ពស់ជីវភាពរស់នៅ និង (៤) ជំរុញការប្តេជ្ញាចិត្តជាសកលរបស់កម្ពុជាក្នុងនាមជាសមាជិកអង្គការ ILO ក្នុងការបញ្ចប់ពលកម្មកុមារ។លោកជំទាវក៏បានអំពាវនាវឱ្យបន្តពង្រឹងកិច្ចសហការយ៉ាងជិតស្និទ្ធពីគ្រប់ភាគីពាក់ព័ន្ធ ដើម្បីរួមគ្នាបញ្ចប់រាល់ទម្រង់ធ្ងន់ធ្ងរនៃពលកម្មកុមារ និងបន្តលើកកម្ពស់លក្ខខណ្ឌការងារសម្រាប់កម្មករនិយោជិតវ័យក្មេង ជាពិសេស នៅក្នុងវិស័យដែលបម្រើឲ្យការនាំចេញ រួមទាំងវិស័យកសិ-ឧស្សាហកម្ម និងសិប្បកម្មផលិតឥដ្ឋ-ក្បឿង សំដៅរក្សាកេរ្តិ៍ឈ្មោះប្រទេសកម្ពុជា ជាប្រទេសដែលគោរពសិទ្ធិការងារនិងលក្ខខណ្ឌការងារ។ ទន្ទឹមនេះ លោកជំទាវរដ្ឋលេខាធិការប្រចាំការ ក៏បានលើកទឹកចិត្តឱ្យសាធារណជនដែលមានបំណងស្វែងរកការងារ ឬចូលរៀនជំនាញបច្ចេកទេសនិងវិជ្ជាជីវៈ ឬរាយការណ៍រាល់ករណីសង្ស័យអំពីការប្រើប្រាស់ពលកម្មកុមារ សូមទាក់ទងលេខទូរស័ព្ទទាន់ហេតុការណ៍ (Hotline) ១២៩៧ ឬ ១២៨៦ ដើម្បីក្រសួងអាចចាត់វិធានការបានទាន់ពេលវេលា។ជាទីបញ្ចប់ លោកជំទាវរដ្ឋលេខាធិការប្រចាំការ បានបង្ហាញនូវក្តីសង្ឃឹមយ៉ាងមុតមាំថា គណៈកម្មការប្រឆាំងពលកម្មកុមាររាជធានី ខេត្តនឹងចូលរួមយ៉ាងសកម្មជំរុញយុទ្ធនាការផ្សព្វផ្សាយស្តីពីការបង្ការនិងទប់ស្កាត់ការប្រើប្រាស់ពលកម្មកុមារ និងលើកកម្ពស់លក្ខខណ្ឌការងារសម្រាប់កម្មករនិយោជិតវ័យក្មេងឆ្នាំ២០២៦ ប្រកបដោយលទ្ធផលជាផ្លែផ្កាដូចការរំពឹងទុក៕

ឯកអគ្គរដ្ឋទូតថ្មីសាធារណរដ្ឋស្លូវ៉ាគី ប្ដេជ្ញាលើកកម្ពស់ទំនាក់ទំនងរវាងកម្ពុជា និងស្លូវ៉ាគី ពិសេស​លើ​វិស័យពាណិជ្ជកម្ម និងវិនិយោគ

2026/03/19 12:56:33 pm        166
Facebook Telegram Linkin
ភ្នំពេញ៖ ឯកអគ្គរដ្ឋទូតថ្មីនៃសាធារណរដ្ឋស្លូវ៉ាគី ប្រចាំនៅកម្ពុជា បានប្ដេជ្ញា​លើក​កម្ពស់​ទំនាក់​ទំនង​ដ៏​ល្អរវាងកម្ពុជា និងស្លូវ៉ាគីដែលមានស្រាប់ឱ្យកាន់តែប្រសើរឡើងបន្ថែមទៀត ជាពិសេស​លើ​ទំនាក់​ទំនង​ពាណិជ្ជកម្ម សេដ្ឋកិច្ច និងធុរកិច្ច និងការវិនិយោគ​ដែល​ជា​ចំណុច​ស្នូល​ត្រូវ​ពង្រីក​បន្ថែម​។ ឯកឧត្តម អេឡិចសិនដឺ មីខូវស៊ិន (Alexander Micovčin) ឯកអគ្គរដ្ឋទូតថ្មីនៃសាធារណរដ្ឋ​ស្លូវ៉ា​គី ​ប្រចាំ​នៅកម្ពុជា បានបង្ហាញនូវការប្ដេជ្ញាចិត្តបែបនេះ ក្នុងឱកាសដែល​សម្តេច​អគ្គ​មហា​សេនា​បតី​តេជោ ​ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតឱ្យចូលជួប និងប្រគល់​សារ​តាំង ​នៅវិមានសាមគ្គីភាព នៃព្រឹទ្ធសភា នាព្រឹកថ្ងៃទី១៩ ខែមីនា ឆ្នាំ២០២៦នេះ។ ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា នៅក្នុងជំនួបនេះ សម្ដេច​តេជោ ហ៊ុន សែន ក្នុងព្រះបរមនាមព្រះករុណាព្រះមហាក្សត្រនៃព្រះរាជាណាចក្រកម្ពុជា សម្ដេច​សូម​អបអរសាទរ និងស្វាគមន៍​ចំពោះ​ឯកឧត្តម​ឯកអគ្គរដ្ឋទូតដែលបានទទួលការតែងតាំង​ជា​ឯកអគ្គរដ្ឋទូតរបស់ស្លូវ៉ាគីប្រចាំព្រះរាជាណាចក្រកម្ពុជា។ សម្ដេចតេជោបានបង្ហាញក្តីសង្ឃឹមថា ក្នុង​អាណត្តិរបស់ឯកឧត្តមជាឯកអគ្គរដ្ឋទូតថ្មីនេះនឹងពូនជ្រុំនូវទំនាក់ទំនងរវាងកម្ពុជា និង​ស្លូវ៉ាគី​ឱ្យ​កាន់​តែរីកចម្រើនបន្ថែមទៀតជាពិសេសនៅក្នុងឱកាសខួប ៧០ឆ្នាំនៃទំនាក់​ទំនង​ការ​ទូត​រវាង​ប្រទេស​ទាំង​២នៅឆ្នាំក្រោយនេះ សម្ដេចតេជោសង្ឃឹមថា នឹងមានការរៀបចំ​អបអរ​សាទរ​ដើម្បី​ពង្រឹង​ទំនាក់​ទំនងរវាងកម្ពុជានិងស្លូវ៉ាគីឱ្យកាន់តែរីកចម្រើនបន្ថែមទៀត។ នៅក្នុងឱកាសនោះ ឯកឧត្តមឯកអគ្គរដ្ឋទូតថ្មី​ស្លូវ៉ាគី​បាន​សម្ដែង​នូវ​ការ​អរគុណ​ចំពោះ​សម្ដេច​តេជោ​ដែល​បានអនុញ្ញាតឱ្យឯកឧត្តមបានជួបនឹងប្រគល់សារតាំងនាឱកាសនេះ។ ឯកឧត្តម​បាន​ជម្រាប​ជូនសម្ដេចតេជោថាបេសកកម្មរបស់ឯកឧត្តមនៅពេលនេះ គឺមានភារកិច្ចក្នុ​ង​ការ​លើក​កម្ពស់​ទំនាក់​ទំនងដ៏ល្អរវាងកម្ពុជា និងស្លូវ៉ាគីដែលមានស្រាប់ឱ្យកាន់តែប្រសើរឡើងបន្ថែមទៀត។ ឯកឧត្តមបានសង្កត់ធ្ងន់លើទំនាក់ទំនងពាណិជ្ជកម្ម សេដ្ឋកិច្ច និងធុរកិច្ច និងការវិនិយោគដែលជាចំណុចស្នូលដែលឯកឧត្តមចង់ពង្រីកក្នុងអាណត្តិរបស់ឯកឧត្តម។ សម្ដេចតេជោបានសម្ដែងនូវការគាំទ្រចំពោះការការពង្រីកទំនាក់ទំនងរវាងកម្ពុជា និងស្លូវ៉ាគីទៅលើមុខព្រួញនៃសេដ្ឋកិច្ច ពាណិជ្ជកម្ម និងការវិនិយោគ ដោយសម្ដេចតេជោបានចាត់ទុកចំណុចទាំងនេះជាចំណុចស្នូលនៃទំនាក់ទំនងក្រៅពីការទូត និងនយោបាយ។ សម្ដេចតេជោបានកោតសរសើរចំពោះក្រសួងការបរទេសនៃប្រទេសទាំងពីរដែលរដ្ឋាភិបាលតែងតែជជែកគ្នាអំពីការគាំទ្រគ្នាក្នុងឆាកអន្តរជាតិ និងលើវេទិកាអន្តរជាតិរវាងកម្ពុជា និងស្លូវ៉ាគី។ជាចុងក្រោយ សម្ដេចតេជោ ហ៊ុន សែន បានជូនពរឯកឧត្តមAlexander Micovčin ឯកអគ្គរដ្ឋទូតស្លូវ៉ាគីថ្មីប្រចាំនៅកម្ពុជា ឱ្យបំពេញបេសកកម្មនៅក្នុងប្រទេសកម្ពុជាប្រកបដោយភាពជោគជ័យ៕

បណ្ដាញសង្គម

ព័ត៌មានថ្មីៗ

ក្រុមហ៊ុនជប៉ុនសហការជាមួយអ៊ុយក្រែន ដើម្បីផលិតយានដ្រូនស្ទាក់ចាប់ ខណៈតម្រូវការនៅឈូងសមុទ្រកើនឡើង
04/09/2026 11:04 AM
Facebook Telegram Linkin
អ៊ីរ៉ង់ វាយប្រហាររដ្ឋឈូងសមុទ្រ បន្ទាប់ពីព្រមព្រៀងលើបទឈប់បាញ់ដ៏ផុយស្រួយ ជាមួយអាមេរិក
04/09/2026 11:04 AM
Facebook Telegram Linkin
អនុប្រធានាធិបតីអាមេរិកនិយាយថា អ៊ីរ៉ង់នឹងឆោតល្ងង់ ប្រសិនបើបណ្ដោយឱ្យការចរចាដួលរលំដោយសារប្រទេសលីបង់
04/09/2026 11:04 AM
Facebook Telegram Linkin
វ័យត្រឹម ១៥ ឆ្នាំ Szubarczyk ក្លាយជាកីឡាករស្នូកឃ័រវ័យក្មេងបំផុត ឈ្នះការប្រកួត​នៅពានរង្វាន់ពិភពលោក
04/09/2026 11:04 AM
Facebook Telegram Linkin
ប្រធានសិទ្ធិមនុស្សអង្គការសហប្រជាជាតិ និយាយថា ទំហំនៃការសម្លាប់មនុស្សនៅលីបង់ «គួរឱ្យរន្ធត់»
04/09/2026 11:04 AM
Facebook Telegram Linkin
គ្រូ Manila ថាជួបគ្នាយប់នេះ គ្មានអ្វីខុសប្លែក តែគ្រូព្រះខ័នរាជ ថាមិនដូចគ្នាឡើយ
04/09/2026 10:04 AM
Facebook Telegram Linkin
រដ្ឋបាលខេត្តបន្ទាយមានជ័យ៖ ក្រុមការងារកំពុង​ដំណើរ​ការសាង​សង់​ផ្ទះ​បណ្តោះ​អាសន្ន​លើ​ផ្ទៃ​ដី​ទំហំ ៤០០​ហិកតា​ជូន​ពលរដ្ឋ​ភៀស​សឹក​ដែល​ត្រូវ​ទាហាន​ចូល​ឈ្លាន​ពាន​មិន​ទាន់​អាច​ទៅ​ផ្ទះ​វិ​ញ​បាន
04/09/2026 10:04 AM
Facebook Telegram Linkin
អនុប្រធានាធិបតីអាមេរិក នឹងដឹកនាំគណៈប្រតិភូទៅប៉ាគីស្ថាន ដើម្បីចរចាជាមួយអ៊ីរ៉ង់ នៅថ្ងៃសៅរ៍
04/09/2026 10:04 AM
Facebook Telegram Linkin
មេដឹកនាំបក្សប្រឆាំងកោះតៃវ៉ាន់៖ដំណើរទស្សនកិច្ចនៅចិនដីគោកដើម្បីសាបព្រោះ«គ្រាប់ពូជនៃសន្តិភាព»
04/09/2026 10:04 AM
Facebook Telegram Linkin
ព្រះខ័នរាជ រៀបចំរចនាសម្ព័ន្ធ និងនាំចូលកីឡាការិនីខ្មែរ-បរទេសជាច្រើន ត្រៀមលីគរដូវកាល
04/09/2026 10:04 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.