BTV NEWS

មន្ត្រីជាន់ខ្ពស់ការបរទេស៖កម្ពុជាបានជ្រើសរើសអ្នកផ្សះផ្សាពីររូបរួចហើយ ខណៈភាគីថៃមានពេល២១ថ្ងៃ ដើម្បីជ្រើសរើសអ្នកផ្សះផ្សាពីររូបដែរ

កម្ពុជាធ្វើជាម្ចាស់ផ្ទះសិក្ខាសាលាស្តីពី ការបង្កើតកិច្ចសហប្រតិបត្តិការស្ថាប័នប្រវត្តិសាស្ត្រយោធាអាស៊ាន(AMHIC)”

សម្តេចតេជោ ចែករំលែកបទវិភាគអ្នកជំនាញភូមិសាស្ត្រនយោបាយថៃ «អន្ទាក់របស់កម្ពុជា! តើ Anutin នាំប្រទេសឱ្យចាញ់ក្តីនៅតុលាការអន្តរជាតិម្តងទៀតឬ?»

ក្រុមហ៊ុនអាកាសចរណ៍ អ៊ែរ អេស៊ា ខេមបូឌា និងក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជាចុះកិច្ចព្រមព្រៀងដើម្បីជំរុញកំណើនទេសចរណ៍កម្ពុជា

ព័ត៌មានជាតិ

ការបង្រៀនពីរវេនផ្ដល់ឱកាសឱ្យកុមារសិក្សាបានច្រើន និងមានចំណេះដឹងប្រសើរជាងមុន

បច្ចុប្បន្នសាលាបឋមសិក្សាមួយចំនួន បានផ្លាស់ពីការសិក្សាមួយពេល ទៅជាការសិក្សាពេញមួយថ្ងៃ។ ការសិក្សាពេញមួយថ្ងៃនេះ បានផ្ដល់ផ្លែផ្កាមកវិញជាភាពប្រសើរឡើងរបស់កុមារ។ កុមារទទួលបានការសិក្សា ការអប់រំច្រើនម៉ោង ហើយលទ្ធផលសិក្សារបស់ពួកគេក៏មានភាពប្រសើរ។សាលាបឋមសិក្សា អ្នកឧកញ៉ា មហាភក្ដី ហ៊ុន នាង ព្រែកកំពឹស ជាសាលាមួយដែលបានវិវត្តខ្លួន ពីការបង្រៀនមួយពេលធម្មតា ទៅជាសាលាអនុវត្តការសិក្សាពីរវេនពេញមួយថ្ងៃទាំងស្រុង។ ការផ្លាស់ប្ដូរនេះ ទាំងគ្រូបង្រៀន ទាំងសិស្ស ត្រូវមកបង្រៀន និងរៀនទាំងព្រឹកទាំងរសៀល។លោក ផុន ណាត ជានាយកសាលាបានបង្ហាញការមើលឃើញថា សិស្សទទួលបានភាពវិជ្ជមានច្រើន ក្រោយអនុវត្តការសិក្សាពេញមួយថ្ងៃនេះ។ លោកនាយកបន្តថា សិស្សទទួលបានការសិក្សាច្រើនម៉ោងជាងមុន សិស្សទទួលបានការអភិវឌ្ឍចំណេះដឹងកាន់តែប្រសើរ និងភ្ជាប់ជាមួយការមានសីលធម៌ប្រពៃ និងវិន័យល្អរបស់កុមារ។ភ្ជាប់ជាមួយផ្លែផ្កាដែលទទួលបាននេះ លោកក្នុងនាមជាគណៈគ្រប់គ្រងសាលា ពិតជាអរគុណដល់គ្រូបង្រៀនគ្រប់រូប ដែលបានឯភាព ចូលរួមបំពេញការងារបង្រៀនពេញមួយថ្ងៃដើម្បីចំណេះដឹងរបស់សិស្ស។សម្រាប់គ្រូបង្រៀនវិញ ទោះមានភាពនឿយហត់យ៉ាងណាក្ដី ក៏ពួកគាត់នៅតែមានស្នាមញញឹម។ ញញឹម ដោយពួកគាត់សប្បាយ ពេលឃើញថាការបំពេញការងារបង្រៀនទាំងពីរវេនរបស់ពួកគាត់ ពិតជាបានផ្ដល់ឱ្យសិស្សមានការចេះដឹងច្រើនជាងមុនពិតប្រាកដមែន។ ក្នុងនាមជាគ្រូ គ្មានអ្វីចង់បានជាងការដែលឃើញ សិស្សមានការចេះដឹងជាមុននោះទេ។ការសិក្សាពេញមួយថ្ងៃនេះ ក៏មានការបង់ជាវិភាគទានមួយចំនួន សម្រាប់ទ្រទ្រង់ដំណើរការរៀន និងបង្រៀនឱ្យមាននិរន្តរភាពផងដែរ៕ អត្ថបទ៖ គឹម ហុក

កម្ពុជា-ឡាវនឹងបើកកិច្ចប្រជុំ ស្ដីពីកិច្ចសហប្រតិបត្តិការរក្សាសន្តិសុខតាមបណ្តោយព្រំដែន នៅចុងសប្ដាហ៍នេះ

កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំគណៈកម្មការកិច្ចសហប្រតិបត្តិការរក្សាសន្តិសុខរៀបរយតាមបណ្តោយព្រំដែនកម្ពុជា-ឡាវ ឡាវ-កម្ពុជា លើកទី៤ ដែលនឹងប្រព្រឹត្តទៅរយៈពេល៤ថ្ងៃ ចាប់ពីថ្ងៃទី១៧ ដល់ថ្ងៃទី២០ ខែឧសភា ឆ្នាំ២០២៦។ ដោយកិច្ចប្រជុំនេះផ្តោតទៅលើកិច្ចសហប្រតិបត្តិការលើការងារធានាសន្តិសុខតាមបណ្តោយព្រំដែននៃប្រទេសទាំងពីរ។ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជការនៃកងយោធពលខេមរភូមិន្ទ បានមានប្រសាសន៍ប្រាប់ BTV នៅថ្ងៃទី១២ ខែឧសភា នេះថា កិច្ចប្រជុំគណៈកម្មការកិច្ចសហប្រតិបត្តិការរក្សាសន្តិសុខរៀបរយតាមបណ្តោយព្រំដែនកម្ពុជា-ឡាវ គឺផ្តោតសំខាន់លើការងារធានាសន្តិសុខនៅតាមបន្ទាត់ព្រំដែនកម្ពុជា-ឡាវ។ ដោយកិច្ចប្រជុំនេះធ្វើជារៀងរាល់ឆ្នាំដោយផ្លាស់ប្តូរគ្នាធ្វើជាម្ចាស់ផ្ទះ។ ហើយភាគីទាំងពីរនឹងពិភាក្សាគ្នា ដោយមានបញ្ហាអ្វីត្រូវផ្តល់ព័ត៌មានឲ្យគ្នាទៅវិញទៅមកសហប្រតិបត្តិការលើការងារធានាសន្តិសុខនៅតាមបន្ទាត់ព្រំដែន។ កិច្ចប្រជុំនេះ ភាគីកម្ពុជា ដឹកនាំដោយនាយឧត្តមសេនីយ៍ ឥត សារ៉ាត់ អគ្គមេបញ្ចាការរង នៃកងយោធពលខេមរភូមិន្ទ និងជានាយសេនាធិការចម្រុះអគ្គបញ្ជាការ ចំណែកភាគីឡាវ ដឹកនាំដោយឧត្តមសេនីយ៍ទោ វ៉ាន់ថង ប៊ុតតាក់វង្ស អនុប្រធានអគ្គសេនាធិការកងទ័ព និងជាសហប្រធានគណៈកម្មការកិច្ចសហប្រតិបត្តិការរក្សាសន្តិសុខរៀបរយតាមបណ្តោយព្រំដែនឡាវ-កម្ពុជា។ សូមជម្រាបថា កិច្ចប្រជុំគណៈកម្មការកិច្ចសហប្រតិបត្តិការរក្សាសន្តិសុខរៀបរយតាមបណ្តោយព្រំដែនកម្ពុជា-ឡាវ ឡាវ-កម្ពុជា លើកទី៣ ភាគីទាំងពីរបានឯកភាពគ្នាបន្តនិងពង្រឹងកិច្ចសហការជាមួយអាជ្ញាធរមូលដ្ឋាន និងមន្ត្រីពាក់ព័ន្ធក្នុងការអប់រំប្រជាពលរដ្ឋ ដែលរស់នៅតាមបណ្តោយព្រំដែន ឱ្យបានយល់ដឹងអំពីច្បាប់ និងសេចក្តីកំណត់ផ្សេងៗរបស់ប្រទេសទាំងពីរ ជៀសវាងការប្រព្រឹត្តិអំពើល្មើសច្បាប់ និងសកម្មភាពដែលធ្វើឱ្យប៉ះពាល់ដល់សន្តិសុខ សុវត្ថិភាព តាមបណ្តោយព្រំដែន។ បន្តគាំទ្រឱ្យគណៈកម្មាធិការព្រំដែនឡាវ-កម្ពុជា កម្ពុជា-ឡាវ (JBC) អនុវត្តតាមតួនាទីរបស់ខ្លួន៕ អត្ថបទ៖ វង្ស សុភាព

TOP STORY! សម្ដេចតេជោប្រមុខរដ្ឋស្ដីទី រំឭកដល់រាជរដ្ឋាភិបាលកុំបើកការចរចាទ្វេភាគីណាមួយជាមួយថៃលើបញ្ហាសមុទ្រ និងដើរត្រង់ទៅរកយន្តការច្បាប់សមុទ្រឆ្នាំ១៩៨២ តែម្តង

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃកម្ពុជា បានរំឭកដល់រាជរដ្ឋាភិបាលកុំបើកការចរចាទ្វេភាគីណាមួយជាមួយថៃលើបញ្ហាសមុទ្រ និងដើរត្រង់ទៅរកយន្តការច្បាប់សមុទ្រឆ្នាំ១៩៨២ តែម្តង។សម្ដេចតេជោ ហ៊ុន សែន បានសរសេរថា កាលពីថ្ងៃម្សិលមិញ ១១ ឧសភា ២០២៦ មានការចុះផ្សាយដោយសារព័ត៌មានថៃថា លោករដ្ឋមន្ត្រីការទេសថៃបាននិយាយថា (ក្រោមអនុសញ្ញាច្បាប់សមុទ្រ បន្ទាប់ពីលុបចោលអនុសារណះយោគយល់គ្នាឆ្នាំ២០០១ ត្រូវតែដំណើការក្នុងក្របខ័ណ្ឌនៃអនុសញ្ញាដែលមានច្រើនដំណាក់កាល ហើយវិធីសាស្ត្រចម្បងសម្ដេចតេជោ បានថ្លែងបញ្ជាក់ថា គួរតែជាការចរចារវាងភាគីទាំងពីរជាមុនសិន)។ ប្រសិនបើការចុះផ្សាយនេះជាសំដីពិតរបស់លោករដ្ឋមន្ត្រីការបរទេសថៃមែននោះពាក្យថា (វិធីសាស្ត្រចម្បង គួរតែការចរចារវាងភាគីទាំងពីរជាមុនសិន) ពាក្យនេះវាផ្ទុយស្រឡះជាមួយសកម្មភាពរបស់ភាគីថៃ ដែលបានលុបចោល MOU2001 ដោយឯកតោភាគី ដែលបានលុបចោលក្របខណ្ឌនៃការចរចាទ្វេភាគីរួចស្រេចទៅហើយសម្រាប់ដែនសមុទ្រត្រួតស៊ីគ្នា។ សម្ដេចតេជោបានបញ្ជាក់ថា៖«ក្នុងឋានៈជាប្រមុខរដ្ឋស្តីទី ខ្ញុំសូមរំលឹកដល់រាជរដ្ឋាភិបាល សូមកុំបើកការចរចាទ្វេភាគីណាមួយជាមួយថៃលើបញ្ហាសមុទ្រ និងសូមដើរត្រង់ទៅរកយន្តការច្បាប់សមុទ្រ ឆ្នាំ១៩៨២តែម្តង ដោយមិនរង់ចាំការយល់ព្រមណាមួយពីភាគីថៃនោះឡើយ»។ សម្ដេចតេជោបានរំឭកថា កាលពីថ្ងៃ ៦ ខែឧសភា ២០២៦ ខ្ញុំបានរំលឹកម្តងរួចហើយថា កុំបង្កើតយន្តការទ្វេភាគីថ្មីជំនួសឲ្យយន្តការទ្វេភាគីចាស់ដែលថៃលុបចោល។ យើងសោកស្តាយដែលថៃលុប MOU 2001 ចោល តែយើងក៏អរគុណថៃដែលបានជួយយើងឲ្យប្រើប្រាស់យន្តការអន្តរជាតិជំនួសវិញ៕

អ្នកនាំពាក្យ៖ បច្ចុប្បន្នមានជនភៀសសឹកជាង៣ម៉ឺននាក់ទៀត មិនទាន់អាចវិលត្រឡប់ទៅផ្ទះបាន

អ្នកនាំពាក្យរបស់រាជរដ្ឋាភិបាលកម្ពុជា បានឱ្យដឹងថា រហូតដល់ពេលនេះ នៅមានពលរដ្ឋខ្មែរជាជនភៀសសឹកជាង៣ម៉ឺននាក់ទៀត ដែលភាគច្រើនជាស្រ្តី និងកុមារ មិនទាន់អាចវិលត្រឡប់ទៅភូមិឋានរបស់ពួកគេវិញបានទេ ដោយសារតែមានការរារាំងពីសំណាក់ពួកយោធាថៃ។តាមរយៈសន្និសីទប្រចាំថ្ងៃ នាព្រឹកថ្ងៃទី១២ ខែឧសភា ឆ្នាំ២០២៦នេះ ឯកឧត្តម ប៉ែន បូណា បានលើកឡើងថា មកដល់ពេលនេះ នៅមានជនភៀសសឹកប្រមាណបីម៉ឺនពីរពាន់នាក់ទៀត នៅមិនទាន់ អាចវិលត្រឡប់ទៅកាន់ផ្ទះសម្បែងបានវិញនៅឡើយ ដោយជួបហានិភ័យផ្សេងៗ ប៉ុន្តែពួកគេទាំងនោះ ត្រូវបានរាជរដ្ឋាភិបាលបានកំពុងយកចិត្តទុកដាក់យ៉ាងខ្លាំងចំពោះជីវភាពរស់នៅរបស់ពួកគាត់។ឯកឧត្តម ប៉ែន បូណា ក៏បានគូសបញ្ជាក់ផងដែរថា កម្មវិធីអន្តរាគមន៍ពិសេសសម្រាប់គ្រួសារដែលត្រូវបានជម្លៀសចេញពីភូមិសាស្រ្តជម្លោះព្រំដែន ពលករ និងកម្មករនិយោជិត ដែលរងផលវិបាកពីវិបត្តិ ទាំងនេះ ស្តែងឲ្យឃើញច្បាស់ពីការយកចិត្តទុកដាក់ពីរាជរដ្ឋាភិបាលក្នុងការជំរុញនូវគុណតម្លៃ និងការលើកកម្ពស់នូវឧត្តមប្រយោជន៍របស់គ្រួសារ និងការលើកស្ទួយកម្រិតជីវភាពប្រជាពលរដ្ឋគ្រប់រូប ដោយមិនប្រកាន់ពូជសាសន៍ ពណ៌សម្បុរ សាសនា ឋានៈតួនាទី និងនិន្នាការនយោបាយ នោះឡើយ៕អត្ថបទ៖ បាន ចក់

អនុប្រធានទី១ CDC ស្នើដល់ទូតសិង្ហបុរី ជួយទាក់ទាញវិនិយោគិនសិង្ហបុរី មកបណ្តាក់ទុននៅកម្ពុជាបន្ថែម

អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ស្នើដល់ឯកអគ្គរដ្ឋទូតសិង្ហបុរី ពិនិត្យលទ្ធភាពជួយជំរុញ និងទាក់ទាញវិនិយោគិនសិង្ហបុរី មកកម្ពុជាបណ្តាក់ទុននៅកម្ពុជាបន្ថែម ជាពិសេសលើវិស័យឧស្សាហកម្មកែច្នៃចំណីអាហារ បែបហាឡាល់ ដែលជាវិស័យមានសក្តានុពល ខ្ពស់ សម្រាប់ទីផ្សារក្នុងតំបន់និងសកលលោក។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១១ ខែឧសភា ឆ្នាំ២០២៦ បានអនុញ្ញាតឱ្យឯកឧត្តម Steven Pang Chee Wee ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរី ប្រចាំ កម្ពុជា ចូលជួបសម្តែងការគួរសម និងពិភាក្សាការងារ, ក្នុងជំនួបនោះ បានធ្វើបច្ចុប្បន្នភាពអំពីវឌ្ឍនភាពនៃផែនការអភិវឌ្ឍន៍សេដ្ឋកិច្ច-សង្គមរបស់កម្ពុជាដោយផ្តោតសំខាន់លើ៖ ការលើកកម្ពស់ភាពប្រទាក់ក្រឡានៃបណ្តាញដឹកជញ្ជូនពហុមធ្យោបាយ (ផ្លូវគោក ផ្លូវទឹក ផ្លូវសមុទ្រ និងផ្លូវអាកាស) រួមទាំងគម្រោងបង្កើតមជ្ឈមណ្ឌលភស្តុភារកម្ម ដើម្បីប្រែក្លាយកម្ពុជាជាចំណុចតភ្ជាប់ក្នុងតំបន់, និង គម្រោងផែនការរបស់ ក.អ.ក. ក្នុងការរៀបចំផែនទីបង្ហាញផ្លូវសម្រាប់ឧត្តមានុវត្តន៏ប្រតិបត្តិការកការងារនៅក្នុងស្ថាប័នផ្ទាល់។ឯកឧត្តមឧបនាយករដ្ឋមន្ត្រី ក៏បានគូសបញ្ជាក់អំពីភាពជោគជ័យនៃការវិនិយោគនានា របស់វិនិយោគិនសិង្ហបុរី ដែលកំពុង មានប្រតិបត្តិការយ៉ាងរស់រវើកនៅក្នុងព្រះរាជាណាចក្រកម្ពុជា និងបានស្នើឱ្យឯកឧត្តមឯកអគ្គរដ្ឋទូត ពិនិត្យលទ្ធភាពជួយជំរុញ និង ទាក់ទាញវិនិយោគិនសិង្ហបុរីមកកម្ពុជាបន្ថែមទៀត ជាពិសេសលើវិស័យឧស្សាហកម្មកែច្នៃចំណីអាហារបែបហាឡាល់ ដែលជាវិស័យ មានសក្តានុពលខ្ពស់សម្រាប់ទីផ្សារក្នុងតំបន់ និងសកលលោក។ក្នុងជំនួបនេះ, ឯកឧត្តមឯកអគ្គរដ្ឋទូត បានគូសបញ្ជាក់អំពីទំនាក់ទំនងមិត្តភាពជាប្រវត្តិសាស្ត្រ និងកិច្ចសហប្រតិបត្តិការ ដ៏រឹងមាំរវាងប្រទេសទាំងពីរ ដែលបានកសាងឡើងតាំងពីសម័យព្រះបរមរតនកោដ្ឋ ព្រះបាទសម្តេចព្រះនរោត្តម សីហនុ និងត្រូវបាន ថែរក្សាពូនជ្រំយ៉ាងល្អប្រសើររហូតមកដល់បច្ចុប្បន្ន។ ឯកឧត្តមឯកអគ្គរដ្ឋទូត បានលើកឡើងបន្ថែមថា ក្នុងរយៈពេលពីរខែ នៃការចាប់ ផ្តើមបេសកកម្មការទូតនេះ, ឯកឧត្តមបានចុះស្វែងយល់ផ្ទាល់ នៅតាមបណ្តាខេត្តសំខាន់ៗរួមមាន៖ ខេត្តព្រះសីហនុ ដើម្បីសិក្សាស្វែង យល់អំពីសក្តានុពលនៃហេដ្ឋារចនាសម្ព័ន្ធកំពង់ផែ ផែនការពង្រីកវិសាលភាពកំពង់ផែស្វយ័តក្រុងព្រះសីហនុ និងការរៀបចំប្រព័ន្ធ ភស្តុភារកម្មទំនើប ដើម្បីជំរុញពាណិជ្ជកម្មតាមសមុទ្រ និងខេត្តកោះកុង (តំបន់ស្រែអំបិល) ដើម្បីពិនិត្យលើកិច្ចការអភិរក្សសត្វព្រៃ និងការអភិវឌ្ឍវិស័យទេសចរណ៍បែបជីវៈចម្រុះ ដែលជាគំរូនៃតុល្យភាពរវាងការអភិវឌ្ឍ និងការអភិរក្ស។តាមរយៈជំនួបនេះ ភាគីទាំងពីរបានបង្ហាញនូវជំនឿចិត្តយ៉ាងមុតមាំថា តាមរយៈបេសកកម្មការទូតរបស់ឯកឧត្តម Steven Pang Chee Wee វឌ្ឍនភាពនៃកិច្ចសហប្រតិបត្តិការរវាងកម្ពុជា និងសិង្ហបុរី នឹងកាន់តែមានភាពរីកចម្រើនថែមមួយកម្រិតទៀត ជាពិសេស លើវិស័យពាណិជ្ជកម្ម វិនិយោគ និងការតភ្ជាប់ហេដ្ឋារចនាសម្ព័ន្ធ ដែលនឹងនាំមកនូវផលប្រយោជន៍សេដ្ឋកិច្ច សម្រាប់ប្រជាជាតិទាំងពីរ ក៏ដូចជាការរួមចំណែកដល់ស្ថិរភាព និងវិបុលភាពនៅក្នុងតំបន់ទាំងមូលផងដែរ៕អត្ថបទ៖ សុន រ៉ាឌី

កម្ពុជា-កូរ៉េ ចុះហត្ថលេខាបង្កើតរោងចក្រកែច្នៃគ្រាប់ស្វាយចន្ទី នៅខេត្តកំពង់ធំ ដើម្បីនាំចេញ

ជាសមិទ្ធផលថ្មី នៅដើមឆ្នាំ២០២៦នេះ ដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៃព្រះរាជាណាចក្រកម្ពុជា និងសាជីវកម្មសហគមន៍ជនបទកូរ៉េ នៃសាធារណរដ្ឋកូរ៉េ បានចុះហត្ថលេខាលើកំណត់ហេតុនៃកិច្ចពិភាក្សា (Record of Discussion) ស្តីពីគម្រោង “លើកកម្ពស់ខ្សែច្រវ៉ាក់តម្លៃកសិកម្មតាមរយៈការកែច្នៃ និងការនាំចេញគ្រាប់ស្វាយចន្ទីនៅកម្ពុជា” ។ នេះគឺជាព្រឹត្តិការណ៍ដ៏សំខាន់មួយ ក្នុងកិច្ចសហប្រតិបត្តិការ លើវិស័យកសិកម្មរវាងកម្ពុជា និងកូរ៉េ ហើយគម្រោងនេះ គាំទ្រដោយក្រសួងកសិកម្ម ម្ហូបអាហារ និងកិច្ចការអភិវឌ្ឍន៍ជនបទ នៃសាធារណរដ្ឋកូរ៉េ ដែលបានផ្តល់ជំនួយបច្ចេកទេស និងហិរញ្ញវត្ថុ ព្រមទាំងបានពង្រឹងកិច្ចសហប្រតិបត្តិការដ៏រឹងមាំ រវាងប្រទេសទាំងពីរ។ ពិធីចុះហត្ថលេខានេះ បានរៀបចំឡើងនៅព្រឹកថ្ងៃទី១២ ខែឧសភា ឆ្នាំ២០២៦ នាទីស្តីការគណៈរដ្ឋមន្ត្រី រវាងឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិ ជំរុញចលនាភូមិមួយផលិតផលមួយ និងលោកបណ្ឌិត ឆយ ចាន់វ៉ុន (Choi Chan Won) នាយកការិយាល័យគម្រោងសកល នៃមជ្ឈមណ្ឌលសហប្រតិបត្តិការអភិវឌ្ឍន៍កសិកម្ម និងម្ហូបអាហារអន្តរជាតិនៃសាជីវកម្មសហគមន៍ជនបទកូរ៉េ (KRC) ។ ឯកឧត្តមបណ្ឌិតសភាចារ្យ អ៊ុក រ៉ាប៊ុន មានប្រសាសន៍ថា ដំណាំស្វាយចន្ទី គឺជាដំណាំអាទិភាពមួយក្នុងចំណោមដំណាំសំខាន់ៗ ដែលរាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានផ្តោតការយកចិត្តទុកដាក់ខ្ពស់ និងផ្តោតសំខាន់លើការបង្កើនផលិតភាព និងការនាំចេញ ដើម្បីពង្រឹងនូវសមត្ថភាពប្រកួតប្រជែង និងធ្វើពិពិធកម្មសេដ្ឋកិច្ចជាតិ ។ ឯកឧត្តមទេសរដ្ឋមន្ត្រី បានបន្តថា គម្រោងនេះ នឹងរួមចំណែកដល់នូវការអនុវត្តផែនការយុទ្ធសាស្ត្រអភិវឌ្ឍន៍ជាតិ និងផែនការយុទ្ធសាស្ត្រអភិវឌ្ឍន៏វិស័យកសិកម្មកម្ពុជា ហើយមានគោលបំណងគាំទ្រដល់ការពង្រីកការកែច្នៃ និងការនាំចេញគ្រាប់ស្វាយចន្ទី របស់កម្ពុជាទៅកាន់ទីផ្សារអន្តរជាតិ ដែលនឹងជួយបង្កើនប្រាក់ចំណូល សម្រាប់កសិករខ្នាតតូច និងបង្កើតឱកាសការងារដល់ប្រជាពលរដ្ឋ រួមចំណែកដល់ការអភិវឌ្ឍសេដ្ឋកិច្ចនៅជនបទ តាមរយៈការលើកកម្ពស់បច្ចេកវិទ្យាកែច្នៃទំនើប ការពង្រឹងនូវសមត្ថភាពគ្រប់គ្រង ក្រោយពេលប្រមូលផល ការពង្រឹងសមត្ថភាពសហគមន៍កសិកម្មទំនើប នៅខេត្តកំពង់ធំ និងការពង្រឹងស្តង់ដារគុណភាពស្វាយចន្ទី និងការពង្រីកទីផ្សារនាំចេញគ្រប់ស្វាយចន្ទី ហើយវាក៏ស្របតាមគោលបំណងរបស់រាជរដ្ឋាភិបាលក្នុងការធ្វើឲ្យកម្ពុជាក្លាយជាអធិរាជស្វាយចន្ទីនៅលើពិភពលោក ។ លោកបណ្ឌិត ឆយ ចាន់វ៉ុន បានបញ្ជាក់ជាថ្មី នូវការប្តេជ្ញាចិត្តរបស់កូរ៉េ ក្នុងការធ្វើការយ៉ាងជិតស្និទ្ធ ជាមួយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងភាគីពាក់ព័ន្ធទាំងអស់នៅកម្ពុជា ដើម្បីធានាការអនុវត្តគម្រោងនេះ ឱ្យទទួលបានជោគជ័យ ហើយពិធីចុះហត្ថលេខានេះ បានបង្ហាញយ៉ាងច្បាស់អំពីមិត្តភាព និងភាពជាដៃគូយុទ្ធសាស្ត្រយូរអង្វែង រវាងព្រះរាជាណាចក្រកម្ពុជា និងសាធារណរដ្ឋកូរ៉េ ពិសេសក្នុងវិស័យកសិកម្ម និងអភិវឌ្ឍន៍ជនបទ ។ ភាគីទាំងពីរ បានបង្ហាញជំនឿយ៉ាងមុតមាំថា គម្រោងនេះ នឹងជួយលើកកម្ពស់ខ្សែច្រវ់ាក់តម្លៃគ្រាប់ស្វាយចន្ទី ដែលមានភាពធន់ សមត្ថភាពប្រកួតប្រជែងខ្ពស់ និងបរិយាប័ន្ន ដើម្បីជាប្រយោជន៍ដល់ប្រជាពលរដ្ឋ និងការអភិវឌ្ឍសេដ្ឋកិច្ចជាតិប្រកបដោយចីរភាព ។ គួរបញ្ជាក់ថា គិតត្រឹមឆ្នាំ ២០២៥ កម្ពុជា ជាប្រទេសផលិតគ្រាប់ស្វាយចន្ទីឆៅជាប់លេខ ២ ច្រើនបំផុតនៅលើពិភពលោក ខណៈមួយឆ្នាំកម្ពុជា បានផលិតគ្រាប់ស្វាយចន្ទីបានរាប់ម៉ឺនតោន ប៉ុន្តែការកែច្នៃក្នុងស្រុកមានតិចតួចនៅឡើយ៕ អត្ថបទ៖ បាន សុខរិទ្ធិ

កម្ពុជា-គុយបា ជំរុញឱ្យមានកិច្ចព្រមព្រៀងសេវាកម្មដឹកជញ្ជូនផ្លូវអាកាសរវាងប្រទេសទាំងពីរ

សាធារណរដ្ឋគុយបា និងព្រះរាជាណាចក្រកម្ពុជា កំពុងជំរុញឱ្យមានកិច្ចព្រមព្រៀង សេវាកម្មដឹកជញ្ជូនតាមផ្លូវអាកាសខណៈភាគីទាំងពីរបានប្តេជ្ញា និងបញ្ជូនមន្ត្រីជំនាញដើម្បីសិក្សាពីលទ្ធភាពនេះ។បញ្ជាក់ប្រាប់ BTV ក្រោយជំនួបរវាងឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងឯកអគ្គរដ្ឋទូត នៃសាធារណរដ្ឋគុយបាប្រចាំនៅកម្ពុជា, ឯកឧត្តម វ៉ាន់ ចន្ទី អគ្គនាយក នៃអគ្គនាយកដ្ឋានគោលនយោបាយ និងបទបញ្ញត្តិដឹកជញ្ជូនតាមផ្លូវអាកាស នៃរដ្ឋលេខាធិការ ដ្ឋានអាកាសចរណ៍ស៊ីវិល បានបឲ្យដឹងថា កម្ពុជា និងគុយបា ធ្លាប់មានទនាក់ទំនងគ្នាជាយូរហើយ ប៉ុន្តែនៅពេលនេះ ប្រទេសទំាងពីរ កំពុងជំរុញឱ្យមានកិច្ចព្រមព្រៀងលើសេវាកម្មដឹកជញ្ជូនតាមផ្លូវអាកាស ដើម្បីបង្កើនទំនាក់ទំនង ការផ្លាស់ប្តូរវប្បធម៌ និងទំនាក់ទំនងរវាងប្រជាជន និងប្រជាជន។ ឯកឧត្តម បានបន្តទៀតថា ក្រៅពីនេះ ប្រទេសទំាងពីរ ក៏នឹងជំរុញឱ្យមានអ្នកជំនាញការបន្ថែម ដើម្បីស្វែងរកនូវកិច្ចសហប្រតិបត្តិការកាន់តែល្អប្រសើរ ហើយក្នុងជំនួបនេះ ឯកឧត្តមបណ្ឌិត ម៉ៅ ហាវណ្ណាល់ ក៏បានស្នើ ឱ្យលោកជំទាវឯកអគ្គរដ្ឋទូតគុយបា ធ្វើរបាយការណ៍ផ្ញើជូនរដ្ឋាភិបាលគុយបា និងអាជ្ញាធរ អាកាសចរណ៍ស៊ីវិលគុយបា ដើម្បីត្រៀមរៀបចំនូវកិច្ចព្រមព្រៀមសេវាកម្មដឹកជញ្ជូនតាមផ្លូវអាកាសរវាងប្រទេសទំាងពីរឲ្យកាន់តែឆាប់រហ័ស។សូមបញ្ជាក់ថា ព្រះរាជាណាចក្រកម្ពុជា និងសាធារណរដ្ឋគុយបា ធ្លាប់មានទំនាក់ទំនងជាប្រវត្តិសាស្ត្រដ៏យូរលង់ ដែលមានមូលដ្ឋានគ្រឹះយ៉ាងរឹងមាំលើសាមគ្គីភាព និងមិត្តភាព ហើយបានបង្កើតទំនាក់ទំនងការទូតជាផ្លូវការតាំងពីឆ្នាំ១៩៦០ ហើយប្រទេសទាំងពីរ ធ្លាប់បានផ្តល់អាហារូបករណ៍ឱ្យនិស្សិតទៅវិញទៅមក ធ្លាប់មានកិច្ចសហប្រតិបត្តិការលើផ្នែកវេជ្ជសាស្ត្រ ធ្លាប់មានការផ្លាស់ប្តូរវប្បធម៌ និងបច្ចេកទេសផ្សេងៗ ហើយកម្ពុជា និងគុយបាតែងតែគាំទ្រគ្នាទៅវិញទៅមកនៅក្នុងវេទិកាពហុភាគីនានា ដោយបានបង្ហាញសាមគ្គីភាពយ៉ាងស្អិតរមួតផងដែរ៕ផលិត គង់ រ៉េន

សាខាកាកបាទក្រហមខេត្តកំពង់ស្ពឺ ប្ដេជ្ញាបង្កើនសកម្មភាពមនុស្សធម៌ ស្របតាមទិសស្លោក “បន្តរួមកម្លាំងគ្នា ដើម្បីមនុស្សធម៌”

កំពង់ស្ពឺ៖ ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងពង្រឹងកិត្តិនាមរបស់កាកបាទក្រហមកម្ពុជា ឯកឧត្តមបណ្ឌិត ជាម ច័ន្ទសោភ័ណ ប្រធានគណកម្មាធិការសាខាកាកបាទក្រហមកម្ពុជាខេត្តកំពង់ស្ពឺ បានប្ដេជ្ញា ក៏ដូចជាបានណែនាំដល់សាខា និងអនុសាខាទាំង ៩ស្រុក-ក្រុងឱ្យបង្កើនសកម្មភាពមនុស្សធម៌យ៉ាងសកម្ម ស្របតាមទិសស្លោក “បន្តរួមកម្លាំងគ្នា ដើម្បីមនុស្សធម៌” ។ក្នុងពិធីអបអរសាទរខួបទី១៦៣ នៃទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៦ កាលពីថ្ងៃទី១១ ខែឧសភា ឆ្នាំ២០២៦ ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា កាកបាទក្រហមគឺជាស្ថាប័នមនុស្សធម៌ដ៏ធំបំផុតនៅកម្ពុជា ក្នុងការជួយសង្គ្រោះដល់ប្រជាពលរដ្ឋ ដែលជួបទុក្ខលំបាកមិនប្រកាន់ពូជសាសន៍ និងនិន្នាការនយោបាយឡើយ ។ សកម្មភាពមនុស្សធម៌ ដែលកាកបាទក្រហមបានធ្វើ គឺជាកម្លាំងចូលរួមយ៉ាងធំធេង ពីសប្បុរសជន ក្នុងវិស័យរដ្ឋ និងឯកជនមកពីគ្រប់ទិសទី ហើយរាល់សកម្មភាពមនុស្សធម៌ កាកបាទក្រហមកម្ពុជា គឺធ្វើដោយគ្មានការរើសអើង និងមិនទុកឱ្យនរណាម្នាក់ស្លាប់ ដោយអត់បាយនោះឡើយ ។ជាងនេះ ឯកឧត្តមបណ្ឌិត បានបន្ថែមថា កាកបាទក្រហមកម្ពុជាតែងតែនៅជាមួយបងប្អូនប្រជាពលរដ្ឋគ្រប់ទីកន្លែង និងគ្រប់កាលៈទេសៈ តាមរយៈមន្ត្រីស្ម័គ្រចិត្ត របស់កាកបាទក្រហមកម្ពុជា ។ តែទោះជាយ៉ាងនេះក្តី ភាពខ្វះចន្លោះរបស់មន្ត្រីកាកបាទក្រហមកម្ពុជា ទាំងថ្នាក់សាខានិងអនុសាខាក្រុងស្រុកនៅតែមាន ដូច្នេះទាំងអស់គ្នា ក៏ត្រូវខិតខំបំពេញកែលម្អរបន្ថែមទៀត នូវចំណុចខ្វះខាតទាំងឡាយ ដែលមានកន្លងមក ត្រូវបង្កើនការយកចិត្តទុកដាក់និងចុះជាប់ជាប្រចាំ ជាមួយបងប្អូនប្រជាពលរដ្ឋ នៅតាមមូលដ្ឋាន ដើម្បីក្តាប់ឱ្យបានពីសុខទុក្ខនិងបញ្ហាប្រឈមដែលពួកគាត់ជួបប្រទះ ។ មួយវិញទៀត ការចាយវាយ ការប្រើប្រាស់ថវិការបស់កាកបាទក្រហម ត្រូវធ្វើឱ្យបានចំគោលដៅ និងគោលការណ៍គ្រឹះ នៃកាកបាទក្រហមកម្ពុជា ពោលគឺស្មោះត្រង់ និងតម្លាភាពក្នុងការជួយដល់ប្រជាពលរដ្ឋ ដែលរងគ្រោះនិងងាយរងគ្រោះ ដើម្បីបង្កើនជំនឿពីប្រជាពលរដ្ឋ សប្បុរសជន ក្នុងការបន្តគាំទ្រលើចលនា សកម្មភាព ក្នុងបុព្វហេតុមនុស្សធម៌ នៃកាកបាទក្រហមកម្ពុជាឱ្យបានកាន់តែរីកចម្រើន រឹងមាំ និងខ្លាំងក្លាបន្ថែមទៀត។ ដើម្បីមានមូលនិធិគ្រប់គ្រាន់ សម្រាប់បន្តបេសកកម្មមនុស្សធម៌ ឯកឧត្តមបណ្ឌិត ជាម ច័ន្ទសោភ័ណ បា អំពាវនាវដល់សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា សប្បុរសជន មកពីគ្រប់មជ្ឈដ្ឋានទាំងក្នុងវិស័យរដ្ឋ និងវិស័យឯកជន សូមបន្តចូលរួមបរិច្ចាគថវិកា សម្ភារៈ ជូនកាកបាទក្រហមកម្ពុជា ដោយសទ្ធាជ្រះថ្លា និងតាមការស្ម័គ្រចិត្ត ។ ការចូលរួមឧបត្ថម្ភគាំទ្រការងារមនុស្សធម៌ តាមរយៈកាកបាទក្រហមកម្ពុជា គឺពិតជាមានគុណតម្លៃណាស់ ក្នុងការលើកកម្ពស់ស្មារតីវប្បធម៌ នៃការចែករំលែក ដែលជាការផ្សារភ្ជាប់រវាងសប្បុរសជនជាមួយអ្នកទទួលផល៕ អត្ថបទ បាន សុខរិទ្ធិ

អតីតយុទ្ធជននៅភូមិអូកាខុប កំពុងផ្លាស់ប្ដូរជីវភាពក្រោមអំណោយដី និងផ្ទះពីសម្តេចតេជោ ហ៊ុន សែន

អតីតយុទ្ធជនរស់នៅក្នុងភូមិកាខុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង នៅថ្ងៃទី១២ ខែឧសភា ឆ្នាំ២០២៦នេះ បានសំដែងនូវការសប្បាយរីករាយ ក្រោយពីឃើញផលដំណាំរួមផ្សំរបស់គេដែលខិតខំដាំជាងបីឆ្នាំកន្លងមកនេះ បានចេញផ្លែផ្កាលក់បានកម្រៃជាបណ្តើរៗ ធ្វើឱ្យជីវភាពគ្រួសារពួកគេបានធូរធារជាងពេលមុនមួយកម្រិត។ អតីតយុទ្ធជនបានឱ្យដឹងថា អតីតយុទ្ធជនទាំងអស់ បានទទួលដី និងផ្ទះរបស់សមាគមអតីតយុទ្ធជនពីសម្តេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជន ប្រមុខរដ្ឋស្តីទី និងជាប្រធានព្រឹទ្ធសភានៃព្រះរាជាណាចក្រកម្ពុជា តាមរយៈឯកឧត្តមកិត្តិសង្គហបណ្ឌិត គន់ គីម អគ្គលេខាធិការសមាគមអតីតយុទ្ធជននិវត្តជនកម្ពុជា, ឯកឧត្តម ស៊ុន សុវណ្ណារិទ្ធិ ប្រធានសមាគមអតីតយុទ្ធជន និងនិវត្តជនខេត្តកំពង់ឆ្នាំង និងលោកឧត្តមសេនីយ៍ត្រី អ៊ុំ សុភា អនុប្រធានសមាគមអតីតយុទ្ធជនខេត្តកំពង់ឆ្នាំង ចំនួន១ម៉ឺន៥រយម៉ែត្រការ៉េក្នុង១គ្រួសារ។ ក្រោយទទួលបានភ្លាម អតីតយុទ្ធជន បានខិតខំដាំដំណាំយុទ្ធសាស្ត្រ និងដំណាំរួមផ្សំជាច្រើនប្រភេទ ដែលពេលនេះ ពួកគេបានផល និងលក់បានថវិកាមួយចំនួនគ្រាន់ដោះស្រាយជីវភាពបណ្តើរៗហើយ។ ដំណាំយុទ្ធសាស្ត្រ និងដំណាំរួមផ្សំផ្សេងទៀត នឹងហុចផលឱ្យជាបន្តបន្ទាប់ ហើយនៅថ្ងៃក្រោយ គ្រួសារពួកគេមិនលំបាករឿងលុយកាក់ទៀតឡើយ។ អតីតយុទ្ធជនបានបញ្ជាក់ថា ដីនៅទីតាំងនោះ មានជីជាតិល្អ និងសំណូមពរដល់អតីតយុទ្ធជនទាំងអស់ដែលមិនទាន់បានដាំដុះ សូមខិតខំដាំដុះដំណាំជុំវិញផ្ទះ ដើម្បីទ្រទ្រង់ជីវភាពឱ្យប្រសើរឡើង។ ពួកគេបានថ្លែងអំណរគុណយ៉ាងជ្រៀលជ្រៅ ចំពោះសម្តេចតេជោ ហ៊ុន សែន ប្រធានសមាគមអតីតយុទ្ធជន ដែលបានជួយគ្រួសារគាត៉ងៅយមានជីវភាពល្អដូចថ្ងៃនេះ។ ឯកឧត្តម ស៊ុន សុវណ្ណារិទ្ធិ បានថ្លែងថា៖ គោលបំណងរបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន គឺបង្ហាញពីការយកចិត្តទុកដាក់ខ្ពស់ ចំពោះអតីតយុទ្ធជនទាំងអស់ ដោយមិនទុកឱ្យកងកម្លាំងប្រដាប់អាវុធចូលនិវត្តន៍ណាម្នាក់ នៅឯកោ និងរស់នៅដោយលំបាកឡើយ។ គ្រួសារអតីតយុទ្ធជនខេត្តកំពង់ឆ្នាំង បានសាទរ និងគាំទ្រ ចំពោះការយកចិត្តទុកដាក់របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា ដែលសម្តេចតែងតែគិតគូរជួយដល់អ្នកចូលនិវត្ដន៍ទាំងអស់ រួមទាំងមន្ត្រីរាជការស៊ីវិល និងកងកម្លាំងប្រដាប់អាវុធដែលចូលនិវត្តន៍ ដើម្បីឱ្យពួកគាត់រស់នៅមានជីវភាពធូរធារ៕ អត្ថបទ៖ កាំង ហុងវាស្នា

សាលានៅទីជនបទ ក្នុងស្រុកមុខកំពូល រៀបចំសួនកម្សាន្ត សម្រាប់កុមារហាត់ប្រាណ និងលេងកម្សាន្តជួយដល់សុខភាព

កណ្តាល៖ សួនកុមារ និងសម្ភារលម្ហែរកម្សាន្ត (Playgound) យ៉ាងស្រស់ស្អាត នៅសាលាបឋមសិក្សាការកោង១ ស្ថិតក្នុងភូមិរការកោង ឃុំរការកោងទី១ ស្រុកមុខកំពូល ខេត្តកណ្តាល ត្រូវបានសាងសង់ឡើងរួចរាល់ ១០០ភាគរយ ដោយសប្បុរសជនមកពីប្រទេសកូរ៉េ និងជាគំនិតផ្តួតផ្តើម និងសម្របសម្របសម្រួល របស់លោកឧត្ដមសេនីយ៍ឯក ទូច សុភា អនុប្រធាននាយកដ្ឋានកណ្ដាលសណ្តាប់ធ្នាប់សាធារណៈ នៃអគ្គស្នងការនគរបាលជាតិ។ការរៀបចំសួនកម្សាន្ត និង Playgound ក្រោមជំនួយរបស់អង្គការរ៉ូតារីកូរ៉េ (ROTARY Korea) និងអង្គការក្រោនហ្វ័រ ឈឺលដ្រេន ដើម្បីជាការរួមចំណែកមួយ ក្នុងការអភិវឌ្ឍ និងកសាងសមិទ្ធផលនានាជូនជាតិ តាមរយៈកិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងគោលបំណងពង្រីក និងពង្រឹងគោលនយោបាយទំនាក់ទំនងអន្តរជាតិ ដើម្បីជ្រៀតចូលក្នុងសហគមន៍ ប្រកបដោយចីរភាព និងទំនាក់ទំនងល្អរវាងប្រទេស និងប្រទេស។នៅក្នុងឱកាសសម្ពោធដាក់ឲ្យដំណើរការសួនកម្សាន្តនេះ លោកឧត្ដមសេនីយ៍ឯក ទូច សុភា អនុប្រធាននាយកដ្ឋានកណ្ដាលសណ្តាប់ធ្នាប់សាធារណៈ នៃអគ្គស្នងការនគរបាលជាតិ លើកឡើងថា ដោយមើលឃើញពីគុណសម្បត្តិ នៃរៀបចំសួនកម្សាន្ត និងទីតាំងលេងកម្សាន្តរត់លម្ហែរបស់សិស្សានុសិស្សតូចៗ ទើបលោក និងក្រុមការងារបានគៀងគរមិត្តកូរ៉េ តាមរយៈអង្គការរ៉ូតារី កូរ៉េ ដឹកនាំដោយលោក គង់ មីយ៉ុងស៊ីក និងលោក គឹម សាំងស៊ូ រួមទាំងសហការី របស់អង្គការក្រោនហ្វ័រ ឈឺលដ្រេន បានចូលរួមកសាងសួនកុមារ ប្រកបដោយសោភ័ណ្ឌភាព ទុកសម្រាប់សិស្សានុសិស្សលេង ក្រោយម៉ោងចេញលេង និងបានរត់លេងលម្ហែរអារម្មណ៍ បង្កើនភាពស្និទ្ធិស្នាលរវាងមិត្តរួមថា្នក់ និងមិត្តរួមសាលាផងដែរ ។លោកឧត្តមសេនីយ៍ឯក បានបន្ថែមថា អង្គការទាំងពីរនេះ គឺមិត្តស្និតស្នាលបំផុតរបស់កម្ពុជា ព្រោះបានចូលរួមកសាងសួនកុមារ តាមបណ្តាសាលារៀនជាច្រើនផងដែរ ក្នុងប្រទេសកម្ពុជា ជាមួយនឹងការប្ដេជ្ញាបន្តកសាង តាមសាលាបឋមសិក្សានានាបន្ថែមទៀតផង។ប្រតិភូនៃអង្គការ ROTARY Korea លើកឡើងថា ការចូលរួមជួយកសាងនូវសួនកម្សាន្តសម្រាប់កុមារនេះ គឺចង់ចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់សុខភាពកុមារ បង្ហាញពីការស្រឡាញ់សុខភាព ហើយចង់ឲ្យពួកគេមានសុខភាពល្អ បានចូលរៀនទៀងទាត់ ហើយការចូលរួមនេះ គឺបានឆ្លើយតបផងដែរ ទៅនឹងកិច្ចសហប្រតិបត្តិការនានា រវាងរដ្ឋាភិបាលកម្ពុជា និងរដ្ឋាភិបាលប្រទេសកូរ៉េ ដែលមានជាមួយគ្នាជាយូរណាស់មកហើយ ។ សង្ឃឹមថា សម្ភារនេះក៏នឹងក្លាយជាចំណែក កាន់តែធ្វើឲ្យប្រទេសទាំងពីរ មានមិត្តភាពជាមួយគ្នា កាន់តែស្និទ្ធស្នាល ។ក្នុងឱកាសនោះ លោក ហុង គិរី អភិបាលរងស្រុកមុខកំពូល តំណាងលោក យី យ៉េន អភិបាលស្រុកមុខកំពូល ក៏បានផ្ដាំផ្ញើ ចំពោះគណៈគ្រប់គ្រងសាលា លោកគ្រូ អ្នកគ្រូ ជាពិសេសសិស្សានុសិស្ស ដែលជាអ្នកទទួលផលផ្ទាល់ ប្រើប្រាស់ឲ្យបានយូរអង្វែង ហើយចូលរួមថែរក្សា ។ជាមួយគ្នានោះដែរ លោកឧត្តមសេនីយ៍ ទូច សុភា និងលោកជំទាវ អាជ្ញាធរស្រុក លោកគ្រូ អ្នកគ្រូ និងសិស្សានុសិស្សមានការត្រេកអរយ៉ាងខ្លាំង និងថ្លែងអំណរគុណដល់ អង្គការទាំងពីរ ដែលបានកសាងសួនកុមារ នឹងធ្វើឲ្យកុមារកម្ពុជាកាន់តែមានសុខភាពល្អ កម្លាំងមំាមួន រហ័សរហួន ហើយមកសាលារៀនទៀងទាត់ និងជួយលើកកម្ពស់វិស័យអប់រំនៅកម្ពុជា៕ អត្ថបទ បាន សុខរិទ្ធិ

បណ្ដាញសង្គម

ព័ត៌មានថ្មីៗ

បម្រែបម្រួលអាកាសធាតុធ្វើឲ្យប៉ះពាល់ដល់កសិករចិញ្ចឹមឃ្មុំនៅកូរ៉េខាងត្បូង

EU និង UNICEF បញ្ជូនគ្រឿងផ្គត់ផ្គង់សង្រ្គោះជំងឺអេបូឡាទៅកាន់កុងហ្គោ ខណៈផ្ទុះការរីករាលដាលឆ្លង

មានអ្នកស្លាប់ច្រើននាក់ ក្នុងហេតុការណ៍ធ្លាក់យន្តហោះនៅតំបន់ Istria របស់ក្រូអាត

ឆ្មាំបដិវត្តន៍អ៊ីរ៉ង់អំពាវនាវឲ្យអ៊ីស្រាអែលដកទ័ពទៅកាន់ទីតាំងមុនសង្គ្រាម នៅលីបង់

ប្រទេស ១១ នៅអឺរ៉ុប អំពាវនាវឲ្យ EU មានច្បាប់ទិដ្ឋាការកាន់តែតឹងរ៉ឹង សម្រាប់ជនជាតិរុស្ស៊ី

អ៊ីស្រាអែលឃុំខ្លួនក្រុមបាតុករជ្វីហ្វជ្រុលនិយម បន្ទាប់ពីបានវាយប្រហារលំនៅឋានរបស់ចៅក្រម

បទឈប់បាញ់នៅលីបង់ បង្កើនក្តីសង្ឃឹមពីការមានវឌ្ឍនភាព សម្រាប់កិច្ចព្រមព្រៀងអ៊ីរ៉ង់

អាកាសធាតុអាក្រក់បែងចែកអ៊ីតាលីដោយព្យុះកួចកើតមាននៅទីក្រុងរ៉ូមហើយអាកាសធាតុក្តៅវាយប្រហារកោះ Sicily

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877