BTV NEWS

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

រថយន្តក្រុងរដ្ឋ ៦០០គ្រឿងត្រៀមជាស្រេច សម្រាប់ដឹកពលរដ្ឋទៅស្រុកកំណើតក្នុងឱកាសបុណ្យចូលឆ្នាំថ្មី

តាមភូមិឋាននានា រៀបចំតុបតែងលម្អ ត្រៀមទទួលស្វាគមន៍ពិធីបុណ្យចូលឆ្នាំប្រពៃណីជាតិខ្មែរ

រយៈពេល៣ខែឆ្នាំ២០២៦នេះ ទីផ្សារអាមេរិកស្រូបយកទំនិញកម្ពុជា មានទឹកប្រាក់ជាង ៣,៣ ពាន់លានដុល្លារ

ព័ត៌មានជាតិ

ការចរចាប្រាក់ឈ្នួលកម្មករ ភាគីនិយោជករក្សាគោលជំហរដដែល ខណៈភាគីសហជីពស្នើសុំតម្លើង១០ដុល្លារបន្ថែម

ភ្នំពេញ៖ ខណៈកិច្ចប្រជុំចរចាប្រាក់ឈ្នួលអប្បបរមារបស់កម្មករនិយោជិតវិស័យកាត់ដេរ សម្រាប់ឆ្នាំ២០២៦ លើកទី៣ នឹងប្រព្រឹត្តទៅនាពេលខាងមុខនេះ តំណាងភាគីនិយោជក បានឱ្យដឹងថា នៅតែប្រកាន់គោលជំហរតួលេខប្រាក់ឈ្នួលនៅដដែល ខណៈដែលភាគីសហជីពតំណាងកម្មករនិយោជិត បានសម្រេចនិងមូលមតិគ្នា ស្នើសុំដំឡើងចំនួន ១០ដុល្លារបន្ថែម លើប្រាក់ឈ្នួលបច្ចុប្បន្នចំនួន ២០៨ដុល្លារអាម៉េរិក។អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា និងជាប្រធានសមាគមស្បែកជើងកម្ពុជា បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា ការស្នើសុំរក្សាតួលេខប្រាក់អប្បបរមានៅដដែលនេះ ដោយសារត្រូវតែមានការប្រៀបធៀបជាមួយនិងប្រទេសជិតខាង ឧទាហរណ៍ថា ប្រសិនបើប្រាក់ឈ្នួលនៅកម្ពុជាឡើងខ្ពស់ពេកគឺអាចធ្វើឱ្យមានការប៉ះពាល់អ្នកវិនិយោគថ្មីៗដែលនឹងមកវិនិយោគបន្ថែមទៀតនៅកម្ពុជា នឹងធ្វើឱ្យពួកគាត់អាចរារែក ទៅមើលវិនិយោគនៅប្រទេសផ្សេងៗជំនួសវិញ។ អ្នកឧកញ៉ា បន្ថែមថា ប្រាក់ឈ្នួលអប្បបរមានេះដែរ បើក្រឡេកទៅមើលប្រទេសផ្សេងៗទៀត នៅមានប្រាក់ខែដែលធូរជាងនៅប្រទេសកម្ពុជាជាច្រើនដែរ។ អ្នកឧកញ៉ា សង្ឃឹមថា ឆ្នាំនេះ ប្រសិនបើមានការតម្លើងប្រាក់ឈ្នួលបន្តទៀត សុំកុំឱ្យឡើងខ្ពស់ពេក ដើម្បីឱ្យកម្ពុជាមានឱកាសស្រូបយកអ្នកវិនិយោគថ្មីៗថែមទៀតដើម្បីបង្កើតរោងចក្រនៅកម្ពុជា។ ដោយឡែក សម្រាប់រោងចក្រដែលមានស្រាប់ ក៏អាចពង្រីកសង្វាក់ផលិតកម្មបន្ថែមទៀត និងផ្តល់ឱកាសការងារកាន់តែច្រើនដល់ប្រជាពលរដ្ឋក្នុងស្រុក ជាពិសេសដើម្បីឱ្យកម្ពុជាអាចប្រកួតប្រជែងជាមួយប្រទេសជិតខាង និងជាមួយប្រទេសផ្សេងៗទៀតដែលធ្វើពាណិជ្ជកម្មក្នុងវិស័យកាត់ដេរនេះ។ លោក គឹម ចាន់សំណាង ភាគីសហជីពតំណាងកម្មករនិយោជិត បានឱ្យប៊ីធីវី ដឹងថា ការស្នើសុំដំឡើងចំនួន ១០ដុល្លារបន្ថែមលើប្រាក់ឈ្នួលបច្ចុប្បន្ន គឺយោងតាមលក្ខណៈបច្ចេកទេសទំាងអស់។ លោកបានបន្តថា ការស្នើសុំខាងលើនេះ បើក្នុងករណីចាំបាច់ នឹងពិនិត្យទៅមើលទឡ្ហីករណ៍ណាមួយទៀត ហើយក៏ត្រូវពិនិត្យទៅលើការដំឡើងប្រាក់ឈ្នួលពាក់ព័ន្ធនយោបាយផ្សេងៗទៀតជាមួយទៅនឹងប្រទេសជិតខាង ជាពិសេសគឺការប្រកួតប្រជែង ដែលក្រុមសហជីពត្រូវតែធ្វើអ្វីឈរលើឆន្ទៈដើម្បីចង់បានឲ្យមានការងារជូនដល់កម្មករនិយោជិតទាំងអស់គ្នា។ ពាក់ព័ន្ធកិច្ចចរចាប្រាក់ឈ្នួលអប្បបរមានេះដែរ កម្មការិនីរោងចក្រកាត់ដេរស្បែកជើង ស្ថិតនៅស្រុកគងពិសី ខេត្តកំពង់ស្ពឺ ឈ្មោះ ស៊ី នួន បាននិយាយថា គិតមកដល់ពេលនេះអ្នកស្រីធ្វើការងាររោងចក្រ បានរយៈពេលជាង១០ឆ្នាំ និងកត់សម្គាល់ឃើញថា ប្រាក់ឈ្នួលមានការតម្លើងជារៀងរាល់ឆ្នាំ បើទោះបីជាចំនួនមិនទាន់សមបំណង ប៉ុន្តែពិតសប្បាយចិត្ត ព្រោះមើលឃើញថា ថ្នាក់ដឹកនាំគ្រប់ជាន់ថ្នាក់ ទាំងភាគីរដ្ឋាភិបាល ភាគីនិយោជក និងភាគីសហជីព ពិតជាមានការយកចិត្តទុកដាក់ជាខ្លាំង ក្នុងការចរចាប្រាក់ឈ្នួលកម្មករ។ សូមបញ្ជាក់ថា ការកំណត់ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរនិងកាបូប ដែលត្រីភាគី (ភាគីរដ្ឋាភិបាល, សហជីព, និយោជក) លើកយកមកពិភាក្សាគ្នា គឺផ្អែកទៅលើមូលដ្ឋានបម្រែបម្រួលលក្ខណៈវិនិច្ឆ័យបែបសង្គម និងសេដ្ឋកិច្ចចំនួន ៧ចំណុច ក្នុងនោះមានស្ថានភាពគ្រួសារ អត្រាអតិផរណា ការចំណាយក្នុងការរស់នៅ ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ។ គិតត្រឹមឆ្នាំ២០២៥នេះ កម្មករនិយោជិតដែលបំពេញការក្នុងវិស័យកាត់ដេរមានចំនួន ២០៨ដុល្លារអាម៉េរិក ក្នុងមួយខែ ដោយមិនគិតពីប្រាក់អត្ថប្រយោជន៍ផ្សេងៗ៕អត្ថបទ៖ ឈិត បូរ៉ាវី

[ការងារជំរឿនមន្ត្រី] "ការធ្វើបច្ចុប្បន្នភាពរចនាសម្ព័ន្ធ និងការធ្វើជំរឿនមន្ត្រីជាក់ស្តែង នឹងផ្តល់ទិន្នន័យរួមមួយដែលច្បាស់លាស់ ឯកភាពគ្នា ហើយប្រើប្រាស់បានរួមគ្នា"

ភ្នំពេញ ៖ មានប្រសាសន៍ក្នុងកិច្ចប្រជុំគណៈកម្មការធ្វើបច្ចុប្បន្នភាពរចនាសម្ព័ន្ធ និងការធ្វើជំរឿនមន្ត្រីជាក់ស្តែង ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានលើកឡើងថា “ការធ្វើបច្ចុប្បន្នភាពរចនាសម្ព័ន្ធ និងការធ្វើជំរឿនមន្ត្រីជាក់ស្តែង នឹងផ្តល់ទិន្នន័យរួមមួយដែលមានភាពគ្រប់ជ្រុងជ្រោយ សង្គតិភាព អាចជឿទុកចិត្តបានពីគ្រប់ភាគីពាក់ព័ន្ធទាំងអស់ សម្រាប់ការប្រើប្រាស់ជារួមនៅក្នុងប្រព័ន្ធរួមតែមួយនៃរដ្ឋបាលសាធារណៈរបស់រាជរដ្ឋាភិបាល។” ឯកឧត្តមលើកឡើងបែបនេះ ដោយបានបញ្ជាក់ពីសារៈសំខាន់នៃការធ្វើជំរឿនមន្ត្រីនេះថា ជាជំហានបន្ថែមមួយទៀតក្នុងការពង្រឹងប្រព័ន្ធរដ្ឋបាលសាធារណៈ។ “ការពង្រឹងប្រព័ន្ធរដ្ឋបាលសាធារណៈ ក៏គឺជាការពង្រឹងសមត្ថភាពខ្មែរ” ឯកឧត្តមបានបន្ថែម។កិច្ចប្រជុំនារសៀលថ្ងៃទី៨ ខែកញ្ញា ឆ្នាំ២០២៥នេះ មានការអញ្ជើញចូលរួមពីថ្នាក់ដឹកនាំ មន្ត្រីរាជការដែលជាសមាជិក សមាជិកានៃគណៈកម្មការធ្វើបច្ចុប្បន្នភាពរចនាសម្ព័ន្ធ និងការធ្វើជំរឿនមន្ត្រីជាក់ស្តែងទាំង៣គោលដៅ នៃក្រសួងមុខងារសាធារណៈ ក្រសួងសេដ្ឋកិច្ច និងហិរញ្ញវត្ថុ ក្រសួងមហាផ្ទៃ ក្រសួងអប់រំយុវជន និងកីឡា ក្រសួងសុខាភិបាល រដ្ឋបាលរាជធានីភ្នំពេញ មន្ទីរមុខងារសាធារណៈ មន្ទីរអប់រំ យុវជន និងកីឡា និងមន្ទីរសុខាភិបាល រាជធានីភ្នំពេញ និងអង្គភាពពាក់ព័ន្ធផ្សេងទៀត។កិច្ចប្រជុំបានកំណត់ថា ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង សម្រាប់រចនាសម្ព័ន្ធក្រសួងស្ថាប័ន នឹងចាប់ផ្តើមនៅក្រសួងមុខងារសាធារណៈ។ ទន្ទឹមនោះ សម្រាប់រចនាសម្ព័ន្ធនៃគ្រឹះស្ថានសិក្សាសាធារណៈ នឹងចាប់ផ្តើមនៅខណ្ឌដូនពេញ ហើយសម្រាប់រចនាសម្ព័ន្ធ នៃអង្គភាពសុខាភិបាលមូលដ្ឋាន នឹងចាប់ផ្តើមនៅការិយាល័យស្រុកប្រតិបត្តិចតុមុខ រាជធានីភ្នំពេញ៕

សម្តេច ម៉ែន សំអន អញ្ជើញសូត្រមន្តវេនកាន់បិណ្ឌទី២ នៅវត្តបុទុមវតី

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានអញ្ជើញចូលរួមសូត្រមន្តវេនកាន់បិណ្ឌទី ២ នៅវត្តបុទុមវតី រាជធានីភ្នំពេញ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រីនៃខុទ្ទកាល័យនៃគណៈកម្មការកណ្តាលគណបក្សប្រជាជនកម្ពុជា នារសៀលថ្ងៃចន្ទ ១រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៨ ខែកញ្ញា ឆ្នាំ២០២៥។គួរំលឹកផងដែរថា វេនកាន់បិណ្ឌទី២ នេះ ជាវេនរបស់ខុទ្ទកាល័យនៃគណៈកម្មការកណ្តាលគណបក្សប្រជាជនកម្ពុជា ដែលបានរៀបចំឡើងជារៀងរាល់ឆ្នាំ។ តាមកម្មវិធី នៅរសៀលនេះ នឹងមានការជួបជុំពុទ្ធបរិស័ទ នមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និងសម្តែងធម៌ទេសនា។ លុះស្អែកឡើង នឹងមានពិធីរាប់បាត្រ បង្សុកូលឧទ្ទិសកុសលជូនដល់ដួងវិញ្ញាណក្ខន្ធអ្នកស្នេហាជាតិ បុព្វការីជន ញាតិមិត្តជិតឆ្ងាយ កម្មាភិបាល យុទ្ធជន យុទ្ធនារី ញាតិកាទាំង៧សន្ដាន ដែលបានពលី ជីវិតដើម្បីបុព្វហេតុជាតិ មាតុភុមិ និងវេរភត្តហារប្រគេនព្រះសង្ឃជាកិច្ចបង្ហើយបុណ្យ៕

រដ្ឋលេខាធិការដ្ឋានអាកាសចរណ៍ស៊ីវិល បដិសេធ ការបង្ហោះហ្វេសប៊ុកថា ត្រូវបង់ថ្លៃសេវារហូតដល់ ៥ម៉ឺនដុល្លារ ដើម្បីចូលធ្វើការ

ភ្នំពេញ ៖ តាមរយៈ សេចក្តីស្រាយបំភ្លឺព័ត៌មាន នៅថ្ងៃទី៨ ខែកញ្ញា ឆ្នាំ២០២៥ នេះ រដ្ឋលេខាធិការដ្ឋានអាកាសចរណ៍ស៊ីវិល (រ.ល.អ.ស) បានបកស្រាយបំភ្លឺ ពីការលើកឡើង របស់គណនីហ្វេសប៊ុកផេកមួយឈ្មោះ Lim Kimsor ដែលបានសរសេរបង្ហោះកាលពីថ្ងៃទី៥ ខែកញ្ញា ឆ្នាំ២០២៥ ថា “លឺថា បើចង់ធ្វើការនៅព្រលានយន្តហោះថ្មី ត្រូវបង់ថ្លៃសេវាមុខងារ ៣ ០០០$ ទៅ ៥០ ០០០$ ទើបអាចធ្វើការនៅនោះបាន” ដែលការសរសេរបង្ហោះនេះ ជាការលើកឡើងមិនពិត ដោយពុំមានភស្តុតាង និងប្រភពច្បាស់លាស់។“រ.ល.អ.ស” បញ្ជាក់ថា យោងខ្លឹមសារ នៃការសរសេរបង្ហោះនេះ បានធ្វើឱ្យប៉ះពាល់ដល់កេរ្តិ៍ឈ្មោះ នៃអាកាសយានដ្ឋានអន្តរជាតិភ្នំពេញតេជោ ដែលត្រៀមនឹងបើកដំណើរការនៅថ្ងៃទី៩ ខែកញ្ញា ខាងមុខនេះ ក៏ដូចជាប៉ះពាល់ដល់ស្ថានប័នពាក់ព័ន្ធ ជាពិសេសមុខមាត់ប្រទេសជាតិ ព្រមទាំងធ្វើឱ្យសាធារណជនមានការយល់ច្រលំខុស អំពីនីតិវិធីក្នុងការជ្រើសរើស បុគ្គលិករបស់អាកាសយានដ្ឋាន។ហេតុនេះ រដ្ឋលេខាធិការដ្ឋានអាកាសចរណ៍ស៊ីវិល សូមបញ្ជាក់បំភ្លឺជូនសាធារណជន មេត្តាជ្រាបថា៖១. រដ្ឋលេខាធិការដ្ឋានអាកាសចរណ៍ស៊ីវិល មានតួនាទីក្នុងការតាមដាន និងត្រួតពិនិត្យលើស្តង់ដា សុវត្ថិភាព សន្តិសុខ គុណភាព នៃកិច្ចប្រតិបត្តិការ ព្រមទាំងផ្តល់អាជ្ញាបណ្ណ និងវិញ្ញាបនបត្រដល់ ប្រតិបត្តិកររបស់ ក្រុមហ៊ុនខេមបូឌា អ៊ែរផត អ៊ុន វេសម៉ិន ឯ.ក (Cambodia Airport Investment Co., Ltd - CAIC) និងក្រុមហ៊ុនប្រតិបត្តិករអាកាសយានដ្ឋាន ខេមបូឌា អ៊ែរផត (Cambodia Airports) ដោយឡែក រាល់ការជ្រើសរើសបុគ្គលិកឱ្យចូលបំពេញការងារនៅក្នុងក្រុមហ៊ុន គឺមិនស្ថិតនៅក្នុងដែនសមត្ថកិច្ចរបស់រាជរដ្ឋាភិបាល, រដ្ឋលេខាធិការដ្ឋានអាកាសចរណ៍ស៊ីវិល ឬក្រសួង-ស្ថាប័នរដ្ឋ ណាមួយឡើយ តែជាសមត្ថកិច្ចរបស់ក្រុមហ៊ុនដោយផ្ទាល់។២. យោងការបញ្ជាក់ និងការបកស្រាយពីភាគីពាក់ព័ន្ធ ជាពិសេសក្រុមហ៊ុនខេមបូឌា អ៊ែរផត អ៊ុន វេសម៉ិន ឯ.ក (CAIC) និងក្រុមហ៊ុនប្រតិបត្តិករអាកាសយានដ្ឋាន ខេមបូឌា អ៊ែរផត (Cambodia Airports) បានឱ្យដឹងថា៖- ក្រុមហ៊ុនមានគោលការណ៍នីតិប្រតិបត្តិរួម (Standard Operating Procedure/ SOP) ច្បាស់លាស់ ក្នុងការជ្រើសរើសបុគ្គលិកដែលមានគុណវុឌ្ឍ ផ្អែកលើលក្ខខណ្ឌយោងការងារ (Term of Reference) ការពិពណ៌នាមុខតំណែង (Job Descriptions) និងលក្ខណៈវិនិច្ឆ័យ (Criteria) ដើម្បីឱ្យចូលបម្រើការទៅតាមផ្នែកនីមួយៗ។- បុគ្គលិកដែលត្រូវបានជ្រើសរើសដោយក្រុមហ៊ុនឱ្យចូលបំពេញការងារទាំងអស់ សុទ្ធតែត្រូវបាន ឆ្លងកាត់ប្រព័ន្ធបច្ចេកវិទ្យាឌីជីថល ក្នុងការជ្រើសរើសយ៉ាងតឹងតែង តាំងពីដំណាក់កាលនៃការដាក់ពាក្យស្នើសុំ ការធ្វើតេស្ត សមត្ថភាព (ភាសា ជំនាញបច្ចេកទេស និងបទពិសោធន៍) និង រហូតដល់ការធ្វើបទសម្ភាសន៍ដោយផ្ទាល់ (គណៈកម្មការចម្រុះ-ពហុផ្នែក)។៣. បងប្អូនដែលមានបំណងចង់ដាក់ពាក្យចូលបំពេញការងារនៅក្នុងក្រុមហ៊ុនទាំងនោះ សូមមេត្តាប្រុងប្រយ័ត្នឱ្យបានខ្ពស់ ជៀសវាងការចាញ់បោកជនខិលខូចឆ្លៀតឱកាស ឬការឆបោកពីប្រភពព័ត៌មាន មិនច្បាស់លាស់ណាមួយ។រដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់បន្ថែមថា រាជរដ្ឋាភិបាល នៃព្រះរាជាណាចក្រកម្ពុជា បាន និងកំពុងបំពេញកាតព្វកិច្ចយ៉ាងខ្ជាប់ខ្ជួន ដើម្បីឱ្យកម្ពុជាកាន់តែរីកចម្រើន និងបន្តរក្សាបាននូវសន្តិភាព ក្នុងគោលបំណងទាក់ទាញភ្ញៀវទេសចរ បង្កើតការងារជូនប្រជាពលរដ្ឋទាំងបរិមាណ និងគុណភាព សំដៅជំរុញកំណើនសេដ្ឋកិច្ចជាតិ និងការអភិវឌ្ឍលើកស្ទួយវិស័យទេសចរណ៍-អាកាសចរណ៍ ដើម្បីបម្រើផលប្រយោជន៍ជាតិ និងបងប្អូនជនរួមជាតិមាតុភូមិទាំងអស់។ជាមួយគ្នានេ “រ.ល.អ.ស” សំណូមពរសាធារណជនមេត្តាប្រុងប្រយ័ត្ន និងពិចារណាចំពោះរាល់ការបង្ហោះ និង ការចែកចាយព័ត៌មានបន្ត ណាមួយ តាមរយៈហ្វេសប៊ុកផេក ឬផេកសារព័ត៌មានមួយចំនួន ដែលពុំមានប្រភព ច្បាស់លាស់ និងពុំមានអំណះអំណាងគ្រប់គ្រាន់៕

JICA ផ្តល់ជំនួយសង្រ្គោះបន្ទាន់នូវឧបករណ៍ចម្រោះទឹកស្អាតជាង ២០០ឈុត ដល់សហគមន៍ភៀសសឹកតាមព្រំដែន

ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (ចៃកា-JICA) ផ្តល់ជូននូវការគាំទ្របន្ទាន់តាមការផ្តល់ឧបករណ៍ចម្រោះទឹកស្អាតជាង ២០០ឈុត ដើម្បីឆ្លើយតបនឹងតម្រូវការមូលដ្ឋាននៅជំរុំជនភៀសសឹក ដោយសារជម្លោះនៅព្រំដែន។ ការផ្តល់ជំនួយនេះប្រព្រឹត្តទៅ នាវេលាព្រឹកថ្ងៃទី៨ ខែកញ្ញា ឆ្នាំ២០២៥ មានគោលដៅចូលរួមចែករំលែកនូវការលំបាក រក្សានូវស្ថិរភាព នៃជីវភាពរស់នៅ និងធានានូវការទទូលបានទឹកស្អាតដែលមានសុវត្ថិភាពជាសកល។ ចៃកា បាន និងកំពុងតែគាំទ្រវិស័យទឹកស្អាត តាមរយៈការអភិវឌ្ឍហេដ្ឋារចនាសម្ព័ន្ធ ជំនួយហិរញ្ញវត្ថុ និងការកសាងសមត្ថភាពក្នុងប្រតិបត្តិការផ្តល់ទឹកស្អាត។ បន្ថែមលើកិច្ចសហប្រតិបត្តិការដ៏យូររហូតមកដល់បច្ចុប្បន្ន ចៃកា ផ្តល់ជូនប្រជាជនភៀសសឹកនូវឧបករណ៍ចម្រោះទឹកស្អាតចំនួន ២២០ឈុត តាមរយៈ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលពិធីប្រគល់ជានិមិត្តរូបប្រព្រឹត្តទៅ នៅទីស្តីការក្រសួងផ្ទាល់។ក្នុងនាមជាដៃគូអភិវឌ្ឍន៍ដ៏ធំមួយនៅកម្ពុជា ចៃកា បញ្ចាក់ថា នឹងបន្តធ្វើការជិតស្និទ្ធជាមួយ រាជរដ្ឋាភិបាលកម្ពុជា និងដៃគូអភិវឌ្ឍន៍ផ្សេងៗក្នុងការលើកកម្ពស់កិច្ចសហប្រតិបត្តិការ ដើម្បីធ្វើឱ្យការរស់នៅរបស់ប្រជាជនប្រសើរឡើង៕

កម្ពុជា-ហ្វីលីពីន ប្តេជ្ញាពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ

ភ្នំពេញ ៖ នាព្រឹកថ្ងៃទី៨ ខែកញ្ញា ឆ្នាំ២០២៥, នៅវិមានសន្តិភាព, សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានជួបពិភាក្សាការងារទ្វេភាគី ជាមួយឯកឧត្តម ហ្វឺឌីណាន់ រ៉ូម៉ូលដេស ម៉ាកូស ជូញៀ (Ferdinand Romualdez Marcos Jr.) ប្រធានាធិបតី នៃសាធារណរដ្ឋហ្វីលីពីន និងគណៈប្រតិភូជាន់ខ្ពស់ ក្នុងដំណើរទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា ពីថ្ងៃទី៧ ដល់ថ្ងៃទី៩ ខែកញ្ញា ឆ្នាំ២០២៥ ។ជាកិច្ចចាប់ផ្ដើម, សម្តេចបវរធិបតីបានសម្តែងនូវការស្វាគមន៍យ៉ាងកក់ក្តៅជូនចំពោះឯកឧត្តមប្រធានាធិបតី និងគណៈប្រតិភូ ដែលបានអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា។ សម្តេចបវរធិបតីមានប្រសាសន៍ថា ការផ្លាស់ប្ដូរដំណើរទស្សនកិច្ចកម្រិតខ្ពស់រវាងប្រទេសទាំងពីរ គឺជាសក្ខីភាពឆ្លុះបញ្ចាំងពីមិត្តភាពដ៏រឹងមាំ, ការប្តេជ្ញាចិត្តរួមគ្នាក្នុងការជំរុញ និងការលើកកម្ពស់ទំនាក់ទំនងទ្វេភាគីឱ្យកាន់តែប្រសើរឡើងថែមទៀត។ សម្តេចបវរធិបតីបានវាយតម្លៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការដ៏ល្អប្រសើរ រវាងកម្ពុជា និង ហ្វីលីពីន ព្រមទាំងបានគូសបញ្ជាក់ថា កម្ពុជាផ្តល់សារៈសំខាន់ចំពោះទំនាក់ទំនងយូរអង្វែងជាមួយហ្វីលីពីន ដែលឈរលើមូលដ្ឋាននៃគោលការណ៍គោរពគ្នាទៅវិញទៅមក និងឧត្តមប្រយោជន៍រួម។ ជាការឆ្លើយតប, ឯកឧត្តមប្រធានាធិបតី បានថ្លែងអំណរគុណយ៉ាងជ្រាលជ្រៅចំពោះ រាជរដ្ឋាភិបាល និងប្រជាជនកម្ពុជា និង សម្តេចបវរធិបតី ដែលបានទទួលបដិសណ្ឋារកិច្ចយ៉ាងកក់ក្តៅ និងស្និទ្ធស្នាល។ ឯកឧត្តមប្រធានាធិបតីបានឯកភាពចំពោះការលើកឡើងរបស់សម្តេចបវរធិបតី អំពីភាពរីកចម្រើននៃទំនាក់ទំនងទ្វេភាគី ដោយឯកឧត្តមបានសង្កត់ធ្ងន់លើកិច្ចសហប្រតិបត្តិការលើវិស័យសំខាន់ៗដូចជា៖ ការពង្រឹងទំនាក់ទំនងរវាងកងទ័ព និងកងទ័ព, ពាណិជ្ជកម្ម និងការវិនិយោគ និងកិច្ចសហប្រតិបត្តិការសេដ្ឋកិច្ច។ ឯកឧត្តមប្រធានាធិបតីបានបន្ថែមថា ប្រទេសទាំងពីរនៅមានសក្តានុពលជាច្រើនទៀត ដែលជាកាលានុវត្តភាពសម្រាប់កិច្ចសហប្រតិបត្តិការកាន់តែស៊ីជម្រៅ និងយូរអង្វែង។ក្នុងជំនួបនោះ, ថ្នាក់ដឹកនាំទាំងពីរបានពិភាក្សាផ្លាស់ប្តូរយោបល់អំពីការជំរុញនិងពង្រឹងកិច្ចសហប្រតិបត្តិការក្នុងក្របខណ្ឌទ្វេភាគីលើវិស័យអាទិភាពមួយចំនួន រួមមាន៖ សន្តិសុខ និងការពារជាតិ, ពាណិជ្ជកម្ម និងវិនិយោគ, កសិកម្ម, ទេសចរណ៍, ថាមពល និងការតភ្ជាប់រវាងប្រជាជននិងប្រជាជន ជាដើម។ ទន្ទឹមនឹងនេះ, ថ្នាក់ដឹកនាំទាំងពីរក៏បានផ្លាស់ប្ដូរយោបល់អំពីការពង្រឹងកិច្ចសហប្រតិបត្តិការបន្ថែមទៀត តាមរយៈយន្តការពហុភាគី ទាំងក្នុងក្របខ័ណ្ឌអាស៊ាន និងអន្តរជាតិ ដើម្បីរួមចំណែកដល់សន្ដិភាព ស្ថិរភាព និងវិបុលភាព។ពាក់ព័ន្ធនឹងស្ថានភាពព្រំដែនកម្ពុជា-ថៃ ឯកឧត្តមប្រធានាធិបតីបានបង្ហាញនូវការគាំទ្រចំពោះបទឈប់បាញ់ និងបានបញ្ជាក់ពីការត្រៀមលក្ខណៈរបស់ហ្វីលីពីន ដើម្បីចូលរួមជួយជំរុញឱ្យមានបទឈប់បាញ់មួយជាអចិន្ត្រៃយ៍ សំដៅធានាដល់សន្ដិភាព និងស្ថិរភាព នៃប្រទេសទាំងពីរ។ជាមួយគ្នានោះ សម្ដេចបវរធិបតីបានថ្លែងអំណរគុណដល់ឯកឧត្តមប្រធានាធិបតីដែលបានគាំទ្របទឈប់បាញ់រវាងកម្ពុជា-ថៃ ព្រមទាំងអរគុណហ្វីលីពីន ដែលចូលរួមក្នុងក្រុមអ្នកសង្កេតការណ៍អន្តរកាល (IOT) នៅកម្ពុជា ក៏ដូចជាការបង្កើនក្រុមអ្នកសង្កេតការណ៍អន្តរកាលនៅកម្ពុជា ផងដែរ។បន្ទាប់ពីកិច្ចពិភាក្សាគ្នាប្រកបដោយលទ្ធផលជាផ្លែផ្កា, ថ្នាក់ដឹកនាំទាំងពីរបានអញ្ជើញចូលរួមជាអធិបតី ក្នុងពិធីចុះហត្ថលេខាលើឯកសារចំនួនបី គឺ ១. អនុស្សរណៈនៃការយោគយល់គ្នាស្តីពីសេវាអាកាសចរណ៍, ២. អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យអប់រំ, និង ៣. លិខិតប្តូរសារ ស្តីពីកិច្ចសហប្រតិបត្តិការប្រយុទ្ធប្រឆាំងនឹងឧក្រិដ្ឋកម្មឆ្លងដែន៕

៨ខែ ឆ្នាំ២០២៥ កម្ពុជានាំចេញអង្ករជិត ៤៧៣ ពាន់តោន គិតជាប្រាក់ បានជាង ៣៤៨ លានដុល្លារសហរដ្ឋអាមេរិក

ក្នុងរយៈពេល ៨ខែ នៃឆ្នាំ២០២៥ កម្ពុជាបាននាំចេញអង្ករបានចំនួន ៤៧២ ៨០៣តោន តាមរយៈក្រុមហ៊ុននាំចេញអង្ករចំនួន ៥១ ក្រុមហ៊ុន ទៅកាន់គោលដៅចំនួន ៦៦ ក្រុមហ៊ុន។ ក្នុងនោះកម្ពុជានាទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៦ បានបរិមាណអង្ករចំនួន ២២ ៦៩១ តោន គិតជាទឹកប្រាក់ចំនួន ១៧៦,៣៣ លានដុល្លារសហរដ្ឋអាមេរិក ទៅកាន់ប្រទេសចិន និងហុងកុង ចំនួន ១១៦ ៣២០ តោន គិតជាទឹកប្រាក់ចំនួន ៦៨,៨៦ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន ចំនួន ៧ ប្រទេសបានបរិមាណចំនួន ៦២ ១៥៨ តោន គិតជាទឹកប្រាក់ចំនួន ៤៣,៥០ លានដុល្លារសហរដ្ឋអាមេរិក និងទៅកាន់គោលដៅ ៣២ ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៦៧ ៤១១ តោន គិតជាទឹកប្រាក់ចំនួន ៥៩,៤៨ លានដុល្លារសហរដ្ឋអាមេរិក។ ចំពោះប្រភេទអង្ករដែលបាននាំចេញមាន អង្ករក្រអូបចំនួន ៨៧% ប្រភេទអង្ករសគ្រាប់វែង ៩,៧២% អង្ករចំហ៊ុយ ១% អង្ករសរីរាង្គចំនួន ១,៨៣% និងអង្ករផ្សេងៗចំនួន ០,៤៥%។ ជាមួយគ្នានេប្រទេសកម្ពុជាក៏បាននាំចេញស្រូវចំនួន ៤ ៨៤៨ ៨៣៥ តោនស្រូវសើម ដែលគិតជាទឹកប្រាក់បានប្រមាណ ១១១៤,២៥ លានដុល្លារសហរដ្ឋអាមេរិក៕

អាកាសយានដ្ឋានអន្តរជាតិភ្នំពេញតេជោ ធ្វើពិធីប្រុងពលី ដើម្បីត្រៀមបើកប្រតិបត្តិការហោះហើរផ្លូវការថ្ងៃស្អែកនេះ

ភ្នំពេញ ៖ កាលពីរសៀលថ្ងៃទី៨កញ្ញាម្សិលមិញ អាកាសយានដ្ឋានអន្តរជាតិភ្នំពេញតេជោ បានធ្វើពិធីប្រុងពលី ដើម្បីត្រៀមប្រតិបត្តិការហោះហើរជាផ្លូវការនៅព្រឹកថ្ងៃទី៩កញ្ញានេះប្រកបដោយជោគជ័យ និងសុខសុវត្ថិភាព។បញ្ជាក់ប្រាប់ទូរទស្សន៍បាយ័ន នៅអាកាសយានដ្ឋានអន្តរជាតិភ្នំពេញតេជោច្រក VIP ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរស៊ីវិល នៅពេលនេះអាកាសយានដ្ឋានអន្តរជាតិភ្នំពេញតេជោ បានធ្វពិធីប្រុងពលីជាផ្លូវការហើយ ក្រោមអធិបតីភាពឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអកាសចរណ៍ស៊ីវិល, ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល, លោកអ្នកឧកញ៉ា ពុង ខៀវសែ និងមន្ត្រីក្រសួងស្ថាប័នផ្សេងៗទៀត។ ឯកឧត្តមបានបន្តទៀតថា ជាមួយនឹងពិធីប្រុងពលីនេះ ឯកឧត្តមសូមអំពាវនាវឱ្យភ្ញៀវទេសចរជុំវិញពិភពលោក មកលេងកម្ពុជា ពិសេសដើម្បីបានមកមើលអាកាសយានដ្ឋានអន្តរជាតិភ្នំពេញតេជោ ដែលទំនើបអស្ចារ្យនៅកម្ពុជា។ សូមបញ្ជាក់ថាអាកាសយានដ្ឋានអន្តរជាតិភ្នំពេញតេជោ នៅព្រឹកថ្ងៃទី៩ខែកញ្ញាឆ្នាំ២០២៥នេះ នឹងដាក់ឱ្យដំណើរការជាផ្លូវការ ហើយក្នុងព្រឹកនេះ នឹងមានក្រុមហ៊ុនហោះហើរចំនួន២ ហោះមក ក្នុងនោះមានក្រុមហ៊ុន Air Cambodia និងក្រុមហ៊ុន Singapore Airlines ហើយនឹងមានធ្វើពិធីទទួលអ្នកដំណើរដោយឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុកអាកាសចរណ៍ស៊ីវិល និងឯកឧត្តម ហួត ហាក់ រដ្ឋ មន្ត្រីក្រសួងទេសចរណ៍។ សូមបញ្ជាក់បន្ថែមដែរថា អាកាសយានដ្ឋានអន្តរជាតិភ្នំពេញតេជោមួយនេះ សាងសង់ឡើងលើផ្ទៃដីសរុប ប្រមាណ ២,៦០០ហិកតា ជាប់រាជធានីភ្នំពេញ ខេត្តកណ្តាល និងខេត្តតាកែវ សាងសង់ដោយក្រុមហ៊ុន CAIC ដែលបណ្តាក់ទុនរួមគ្នា រវាងរាជរដ្ឋាភិបាលកម្ពុជា និងក្រុមហ៊ុន OCIC មានតម្លៃសរុបប្រមាណ ១,៥០០លានដុល្លារ និងជាអាកាសយានដ្ឋានអន្តរជាតិលំដាប់ 4F ដែលអាចទទួលយន្តហោះធំៗគ្រប់ប្រភេទលើពិភពលោក៕ ផលិត គង់ រ៉េន

រដ្ឋមន្ត្រីក្រសួងសុខាភិបាល និងថ្នាក់ដឹកនាំក្រសួង មន្ត្រីរាជការ ក្រោមឱវាទ ចូលរួមកាន់បិណ្ឌ វេនទី១ នៅវត្តសុវណ្ណមុនីសាគរ សំរោងអណ្តែត

ភ្នំពេញ ៖ នាព្រឹកថ្ងៃចន្ទ ១រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៨ ខែកញ្ញា ឆ្នាំ២០២៥ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងឯកឧត្តម លោកជំទាវ ថ្នាក់ដឹកនាំក្រសួង មន្ត្រីរាជការក្រោមឱវាទក្រសួងសុខាភិបាល រួមជាមួយឯកឧត្តមសាស្រ្តាចារ្យ ម៉ម ប៊ុនហេង អ្នកតំណាងរាស្រ្តមណ្ឌលរាជធានីភ្នំពេញ បានអញ្ជើញចូលរួមកាន់បិណ្ឌវេនទី១ នៅវត្តសុវណ្ណមុនីសាគរ សំរោងអណ្តែត ដែលស្ថិតនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងបានវេរចង្ហាន់បិណ្ឌបាត ទេយ្យវត្ថុ ចំពោះព្រះសង្ឃ ដើម្បីឧទ្ទិសកុសលផលបុណ្យដល់មាតា បិតា ជីដូន ជីតា ញាតិកា និងបុព្វបុរសដែលបានទទួលមរណកាលទៅ។តាមរយៈពិធីកាន់បិណ្ឌនេះ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងឯកឧត្តមសាស្រ្តាចារ្យ ម៉ម ប៊ុនហេង អ្នកតំណាងរាស្រ្តមណ្ឌលរាជធានីភ្នំពេញ សូមជូនមហាកុសលផលបុណ្យ ជូនដល់ថ្នាក់ដឹកនាំ មន្រ្តីរាជការ និងបុគ្គលិកសុខាភិបាលទាំងអស់ ដែលកំពុងបំពេញភារកិច្ចរៀងៗខ្លួនយ៉ាងសស្រាក់សស្រាំនៅទូទាំងព្រះរាជាណាចក្រកម្ពុជា ក៏ដូចជាកំពុងបំពេញបេសកកម្មនៅក្រៅប្រទេស និងបងប្អូនប្រជាពលរដ្ឋ ព្រមទាំងក្រុមគ្រួសារ ញាតិមិត្ត សូមទទួលបាននូវសុខភាពល្អបរិបូណ៍ កម្លាំងមាំមួន ប្រាជ្ញាឈ្លាសវៃ ជោគជ័យគ្រប់ភារកិច្ចការងារ និងរកទទួលទានបានដ៏ល្អប្រពៃ ក្នុងសន្តិភាពដ៏ល្អផូរផង់នៃយើងទាំងអស់គ្នា។សូមជម្រាបជូនផងដែរថា ពិធីបុណ្យភ្ជុំបិណ្ឌ គឺជាពិធីបុណ្យមួយដែលធំជាងគេ នៅក្នុងចំណោមពិធីបុណ្យទាំងអស់របស់អ្នកកាន់ព្រះពុទ្ធសាសនា។ ពិធីបុណ្យកាន់បិណ្ឌ និងភ្ជុំបិណ្ឌ ត្រូវបានគេកំណត់យកតាមប្រតិទិនពុទ្ធសាសនា ដែលប្រព្រឹត្តទៅចាប់ពីថ្ងៃ១រោច ដល់ថ្ងៃ១៥រោច ខែភទ្របទ ជារៀងរាល់ឆ្នាំ។ ដោយឡែក ពិធីបុណ្យកាន់បិណ្ឌ និងភ្ជុំបិណ្ឌឆ្នាំ២០២៥នេះ ប្រព្រឹត្តទៅចាប់ពីថ្ងៃ១រោច ដល់ថ្ងៃ១៥រោច ខែភទ្របទ ឆ្នាំម្សាញ់ ត្រូវនឹងថ្ងៃទី៨ ដល់ថ្ងៃទី២២ ខែកញ្ញា ឆ្នាំ២០២៥៕អត្ថបទ រដ្ឋា

ក្រសួងការងារ និងរដ្ឋបាលខេត្តបន្ទាយមានជ័យ ផ្សព្វផ្សាយ អត្ថប្រយោជន៍របបសន្តិសុខសង្គម ជូនប្រជាពលរដ្ឋទើបត្រឡប់ពីថៃ

បន្ទាយមានជ័យ៖ ឯកឧត្តម សាន គីមហុង អនុរដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ និង លោក យឹម សំណាង អភិបាលរងខេត្ត តំណាង ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានអញ្ជើញចុះផ្សព្វផ្សាយវេទិកាការងារ ស្តីពី អត្ថប្រយោជន៍របបសន្តិសុខសង្គម ជូនប្រជាពលរដ្ឋទើបត្រឡប់មកពីប្រទេសថៃ ក្នុងឃុំទ្រាស ស្រុកស្វាយចេក។ វេទិកានេះរៀបចំដោយក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយ រដ្ឋបាលខេត្តបន្ទាយមានជ័យ នៅថ្ងៃទី៨ ខែកញ្ញា ឆ្នាំ២០២៥។ថ្លែងក្នុងឱកាសនោះ ឯកឧត្តម សាន គីមហុង បានមានប្រសាសន៍ថា៖ ការបង្កើតវេទិកាការងារ ស្ដីពី ឱកាសការងារ និងឱកាសកម្មសិក្សាការងារនាពេលនេះមានគោលបំណងចំនួន ៣សំខាន់គឺ៖១. ផ្តល់ភាពងាយស្រួលដល់ប្រជាពលរដ្ឋដែលទើបត្រលប់មកពីប្រទេសជិតខាង ហើយចង់ស្វែងរកការងារ បានជួបជាមួយនិយោជកផ្ទាល់ និងអាចសួរនាំពីអត្ថប្រយោជន៍ និង លក្ខខណ្ឌ នៃការដាក់ពាក្យបានភ្លាមៗ២. ផ្តល់ភាពងាយស្រួលដល់និយោជក ក្នុងការផ្សព្វផ្សាយពីឱកាសការងារ និងបានជួបផ្ទាល់ ជាមួយប្រជាពលរដ្ឋដែលបានប្រមូលផ្តុំគ្នានៅទីនេះ។៣. ផ្តល់ឱកាសឱ្យ អាជ្ញាធរមូលដ្ឋានបានពង្រឹងសហការជាមួយ មន្ទីរការងារ និងបណ្ដុះបណ្ដាលវិជ្ជាជីវៈ ក្នុងការបម្រើសេវាសាធារណៈពាក់ព័ន្ធ នឹងវិស័យការងារ ជូនដល់ប្រជាពលរដ្ឋក្នុងមូលដ្ឋានរបស់ខ្លួន។ លោក យឹម សំណាង បានមានប្រសាសន៍លើកឡើងថា នៅក្នុងខេត្តបន្ទាយមានជ័យបានធ្វើការជាមួយនិយោជកសឹងតែគ្រប់វិស័យនៅក្នុងខេត្តរួមមាន វិស័យរោងចក្រ សណ្ឋាគារ ធនាគារ មីគ្រូហិរញ្ញវត្ថុ កាស៊ីណូ សំណង់ យាន ជុសជុលរថយន្ត និងក្រុមហ៊ុនផ្សេងៗទៀតកំពុងតែមានការរីកចម្រើនជាលំដាប់ ដើម្បីផ្តល់ភាពងាយស្រួលដល់ប្រជាពលរដ្ឋដែលទើបត្រលប់មកពីប្រទេសជិតខាង ហើយចង់ស្វែងរកការងារ។គូសបញ្ជាក់ថា សហគ្រាសក្រុមហ៊ុន ដែលត្រូវការជ្រើសរើសបុគ្គលិកធ្វើការ បានបន្តចុះចំនួន ៤ឃុំ រួមមាន ឃុំស្លក្រាម ឃុំទ្រាស ឃុំតាផូ និងឃុំស្វាយចេក ស្ថិតនៅក្នុងស្រុកស្វាយចេក ខេត្តបន្ទាយមានជ័យ ខណៈសរុបប្រជាពលរដ្ឋចូលរួមប្រមាណជាង ៨០០នាក់។អត្ថបទ៖ ឃិន សារិទ្ធ

បណ្ដាញសង្គម

ព័ត៌មានថ្មីៗ

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

មនុស្សយ៉ាងតិច ៦នាក់ បានស្លាប់ ក្នុងការវាយប្រហារដោយអាវុធ នៅកូឡុំប៊ី

នាយករដ្ឋមន្ត្រីអង់គ្លេស៖ ជម្លោះ នៅអ៊ីរ៉ង់ បង្ហាញថា អង់គ្លេសត្រូវតែជ្រើសរើសផ្លូវថ្មីមួយ

ប្រធានាធិបតីមីយ៉ាន់ម៉ា៖ ប្រទេសត្រូវប្រឈមបញ្ហាជាច្រើន ខណៈចង់ធ្វើឲ្យទំនាក់ទំនងអាស៊ានប្រក្រតីឡើងវិញ

លោក ស៊ី ប្រាប់មេដឹកនាំប្រឆាំងតៃវ៉ាន់ថា ប្រជាជននៅអមច្រកសមុទ្រតៃវ៉ាន់ គឺជាជនជាតិចិនតែមួយ

អ៊ីស្រាអែល៖ ការចំណាយលើសង្គ្រាម ៤០ថ្ងៃ នៅអ៊ីរ៉ង់ និងលីបង់ មានប្រមាណ ១៧,៥ពាន់លានដុល្លារ

រដ្ឋមន្ត្រីអឺរ៉ុបនៅមេឌីទែរ៉ាណេ អំពាវនាវឱ្យមានកិច្ចព្រមព្រៀងបទឈប់បាញ់រវាងអ៊ីស្រាអែល និងលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877