BTV NEWS

សមត្ថកិច្ចកំណត់បានហើយក្រុមមនុស្សដែលវាយបំផ្លាញរថយន្តនៅខណ្ឌដូនពេញ បើមិនចូលខ្លួននឹងមានវិធានការច្បាប់

បីថ្ងៃចូលឆ្នាំនៅស្វាយរៀងមានប្រជាពលរដ្ឋ ភ្ញៀវជាតិ-អន្តរជាតិ មកដើរលេងកម្សាន្តជាង ៤សែននាក់

៣ថ្ងៃនៃសង្រ្កាន្តឆ្នាំថ្មីកោះកុង ទទួលបានភ្ញៀវទេសចរជាង២ម៉ឺននាក់

ខេត្តតាកែវទទួលបានភ្ញៀវទេសចរណ៍ជិត១លានាក់ក្នុងរយ:ពេល៣ថ្ងៃនៃពិធីបុណ្យចូលឆ្នាំខ្មែរ

ព័ត៌មានជាតិ

ឯកឧត្តម ប៉េង ពោធិ៍នា ចុះជួបសំណេះសំណាលជាមួយមន្រ្តីរាជការ បុគ្គលិកសុខាភិបាល និងសួរសុខទុក្ខពលរដ្ឋកំពុងសម្រាកព្យាបាលនៅមន្ទីរពេទ្យតេជោសែនកោះធំ

នាព្រឹកថ្ងៃអាទិត្យ ទី៧ ខែកញ្ញា ឆ្នាំ២០២៥ ឯកឧត្តម ប៉េង ពោធិ៍នា ប្រធានក្រុមការងាររាជរដ្ឋាភិបាល ចុះមូលដ្ឋានស្រុកស្អាង និងស្រុកកោះធំ បានអញ្ជើញចុះជួបសំណេះសំណាលជាមួយថ្នាក់ដឹកនាំ មន្រ្តីរាជការ បុគ្គលិកសុខាភិបាល និងសួរសុខទុក្ខបងប្អូនកំពុងសម្រាកព្យាបាល នៅមន្ទីរពេទ្យតេជោសែនកោះធំ ដែលមានទីតាំងស្ថិតនៅតាមបណ្តោយផ្លូវជាតិលេខ២១ ឃុំព្រែកថ្មី ស្រុកកោះធំ ខេត្តកណ្តាល។ ជំនួបនេះមានការចូលរួមពី ឯកឧត្តមសាស្ដ្រាចារ្យមហាបរិញ្ញា គង់ សន្យា អគ្គនាយកមន្ទីរពេទ្យកាល់ម៉ែត ឯកឧត្តម លោកជំទាវ លោក លោកស្រីក្រុមការងាររាជរដ្ឋាភិបាលចុះមូលដ្ឋានស្រុកកោះធំ ថ្នាក់ដឹកនាំ និងបុគ្គលិកមន្ទីរពេទ្យតេជោសែនកោះធំ ព្រមទាំងអាជ្ញាធរមូលដ្ឋានស្រុកកោះធំគ្រប់លំដាប់ថ្នាក់ ដែលត្រូវបានធ្វើឡើងក្នុងគោលបំណងពិនិត្យមើលពីស្ថានភាពជាក់ស្តែង ក៏ដូចជាស្វែងយល់ពីតម្រូវការចាំបាច់នានារបស់មន្ទីរពេទ្យ។ ឯកឧត្តម ប៉េង ពោធិ៍នា បានថ្លែងនូវការកោតសរសើរជូនដល់ថ្នាក់ដឹកនាំ និងមន្រ្តីគ្រប់រូបម្រើការងារនៅក្នុងមន្ទីរពេទ្យតេជោសែនកោះធំ ដែលបានយកចិត្តទុកដាក់ខិតខំបំពេញការងារ និងផ្តល់សេវាជូនបងប្អូនប្រជាពលរដ្ឋបានយ៉ាងល្អប្រសើរនាពេលកន្លងមក។ ឯកឧត្តមប្រធានក៏បានលើកទឹកចិត្ត និងជំរុញធ្វើយ៉ាងណាឱ្យការផ្តល់សេវាសុខាភិបាលកាន់តែមានភាពលឿនរហ័ស ប្រកបដោយគុណភាព និងប្រសិទ្ធភាពខ្ពស់ ដើម្បីទទួលបាននូវការជឿទុកចិត្តពីបងប្អូនដែលទៅទទួលយកសេវាពីមន្ទីរពេទ្យ។ ឆ្លៀតក្នុងឱកាសនោះ ឯកឧត្តមប្រធាន ក៏បាននាំយកនូវថវិកាមួយចំនួនជូនដល់ស្រ្តីឆ្លងទន្លេ និងអ្នកជំងឺដែលកំពុងសម្រាកព្យាបាលនៅផ្នែកសង្រ្គោះបន្ទាន់ផងដែរ។ គួរបញ្ជាក់ថា មន្ទីរពេទ្យតេជោសែនកោះធំ ត្រូវបានសម្ពោធបើកឱ្យប្រើប្រាស់ជាផ្លូវការ កាលពីថ្ងៃទី១៣ ខែមីនា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ មន្ទីរពេទ្យនេះបានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០២២ ដោយប្រើរយៈពេលសាងសង់ចំនួន ១៨ខែ និង១៣ថ្ងៃ នៅលើផ្ទៃដីប្រមាណ ១,៣ហិកតា ក្នុងនោះមានអគារថ្មីចំនួន ០៣ខ្នង ទំហំសរុបស្មើនឹង ១៤ ៧០០ម៉ែត្រក្រឡា។ គម្រោងសាងសង់មន្ទីរពេទ្យនេះ ដែលពីមុនជាមន្ទីរពេទ្យបង្អែកកោះធំ គឺជាគំនិតផ្តួចផ្តើមរបស់ឯកឧត្តម ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងឯកឧត្តម ឈាង រ៉ា រដ្ឋមន្រ្តីក្រសួងសុខាភិបាល ដើម្បីឆ្លើយតបទៅនឹងតម្រូវការជាក់ស្តែង ស្របតាមកម្មវិធីនយោបាយរបស់រាជរដ្ឋាភិបាល និងចក្ខុវិស័យសម្រាប់អភិវឌ្ឍជាតិរបស់សម្តេចតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ធសភា ដែលតែងតែគិតគូរ យកចិត្តទុកដាក់ពីសុខទុក្ខ សុខភាព និងសុខមាលភាពរបស់ប្រជាពលរដ្ឋ។ មន្ទីរពេទ្យនេះបានក្លាយជាមណ្ឌលផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង ៦០ម៉ឺននាក់ ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ និងតំបន់ជុំវិញ៕

វិទ្យាស្ថានជាតិការងារ បើកវគ្គបណ្តុះបណ្តាលពិសេស សម្រាប់បុគ្គលទទួលបន្ទុកផ្នែករដ្ឋបាល និងធនធានមនុស្ស នៃសហគ្រាស ក្រុមហ៊ុន រោងចក្រ សម្រាប់ឆ្នាំ២០២៥

ភ្នំពេញ៖ កាលពីព្រឹកថ្ងៃទី៦ ខែកញ្ញា ឆ្នាំ២០២៥ វិទ្យាស្ថានជាតិការងារ នៃក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គបណ្តុះបណ្តាលពិសេស សម្រាប់បុគ្គលទទួលបន្ទុកផ្នែករដ្ឋបាល និងធនធានមនុស្ស នៃសហគ្រាស ក្រុមហ៊ុន រោងចក្រ សម្រាប់ឆ្នាំ២០២៥ នៅទីស្តីការក្រសួង ក្រោមអធិបតីភាព ឯកឧត្តម អ៊ិន ខេមរា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពីសិក្ខាកាមជាបុគ្គលទទួលបន្ទុកផ្នែករដ្ឋបាល និងធនធានមនុស្ស សរុបចំនួន ២៥៨នាក់។វគ្គបណ្តុះបណ្តាលនេះមានរយៈពេល ៥ថ្ងៃ ចាប់ពីថ្ងៃទី៦ ខែកញ្ញា ឆ្នាំ២០២៥ ក្នុងគោលបំណងលើកកម្ពស់សមត្ថភាព និងចំណេះដឹងពាក់ព័ន្ធនឹងការអនុវត្តបទប្បញ្ញត្តិច្បាប់ និងលិខិតបទដ្ឋានគតិយុត្តក្នុងវិស័យការងារ និងសន្តិសុខសង្គម ដល់បុគ្គលទទួលបន្ទុកផ្នែករដ្ឋបាល និងធនធានមនុស្ស ក្នុងការបំពេញតួនាទីភារកិច្ចរបស់ខ្លួនឱ្យកាន់តែមានប្រសិទ្ធភាព និងវិជ្ជាជីវៈ សំដៅលើកកម្ពស់អនុលោមភាពនៃការអនុវត្តច្បាប់ការងារ សុខដុមនីយកម្មនៃទំនាក់ទំនងវិជ្ជាជីវៈ និងផលិតភាពការងារនៅតាមសហគ្រាស ក្រុមហ៊ុន រោងចក្រ។ថ្លែងក្នុងឱកាសនោះ ឯកឧត្តម អ៊ិន ខេមរា មានប្រសាសន៍ថា វគ្គបណ្តុះបណ្តាលនេះ គឺជាផ្នែកមួយក្នុងការចូលរួមចំណែកអភិវឌ្ឍមូលធនមនុស្ស ដែលជាកត្តាអាទិភាព និងចាំបាច់មិនអាចខ្វះបានក្នុងការអភិវឌ្ឍសង្គម-សេដ្ឋកិច្ចជាតិ ព្រមទាំងចូលរួមអនុវត្តនូវយុទ្ធនាការរបស់រាជរដ្ឋាភិបាល ស្តីពី “សហគ្រាសមួយជាសហគមន៍សុខសាន្តមួយ” ដែលជាកម្មវិធីថ្នាក់ជាតិ សំដៅបន្តពង្រឹង និងលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈ បង្កើតនូវវប្បធម៌អនុលោមភាពតាមច្បាប់ ពង្រឹងប្រសិទ្ធភាពនៃយន្តការដោះស្រាយវិវាទការងារក្រៅប្រព័ន្ធតុលាការ ពង្រឹងការអនុវត្តរបបសន្តិសុខសង្គម និងបង្កើនផលិតភាពការងារឱ្យកាន់តែប្រសើរឡើង ចៀសវាងបាននូវវិវាទការងារ ដែលអាចបង្កទៅជាកូដកម្ម បាតុកម្មតវ៉ាពីបងប្អូនកម្មករនិយោជិត ដោយសារតែការយល់ដឹង និងការបកស្រាយបទប្បញ្ញត្តិច្បាប់ការងារមិនទាន់មានសង្គតិភាព។ទន្ទឹមនោះឯកឧត្តម ក៏បានផ្តល់អនុសាសន៍ដល់សិក្ខាកាមឱ្យយកចិត្តទុកដាក់ស្វែងយល់លើមេរៀន លើកជាសំណួរបញ្ជាក់ជាមួយគ្រូឧទ្ទេស ដែលសុទ្ធតែជាមន្រ្តីមានចំណេះដឹងនិងបទពិសោធក្នុងវិស័យការងារ ហើយពេលត្រឡប់ទៅបម្រើការងារវិញ ត្រូវបន្តសហការជិតស្និទ្ធជាមួយមន្រ្តីជំនាញក្រសួង ដើម្បីដោះស្រាយរាល់បញ្ហាដែលកើតមានឡើងនៅកន្លែងធ្វើការ។សូមបញ្ជាក់ថា វគ្គបណ្ដុះបណ្ដាលនេះ ពិតជាមានសារៈសំខាន់ និងចាំបាច់សម្រាប់បុគ្គលទទួលបន្ទុកផ្នែករដ្ឋបាល និងធនធានមនុស្ស ក្នុងការបំពេញតួនាទីភារកិច្ចរបស់ខ្លួន ដើម្បីលើកកម្ពស់អនុលោមភាពតាមច្បាប់ និងធានាបាននូវសុខដុមនីយកម្មក្នុងទំនាក់ទំនងវិជ្ជាជីវៈ នៅកន្លែងធ្វើការងារ ដោយផ្តោតលើប្រធានបទចំនួន ៨ រួមមាន៖ (១) លក្ខខណ្ឌទូទៅនៃការងារ, (២) ការអនុវត្តកិច្ចសន្យាការងារ, (៣) ការទូទាត់ប្រាក់បំណាច់ និងអត្ថប្រយោជន៍ផ្សេងៗ ,(៤) លក្ខខណ្ឌសុវត្ថិភាព និងសុខភាពការងារ (៥), សេរីភាពអង្គការវិជ្ជាជីវៈ, (៦) ការដោះស្រាយវិវាទការងារ ការធ្វើកូដកម្ម និងឡុកអៅ (៧), ប្រព័ន្ធស្វ័យប្រវត្តិកម្មក្នុងវិស័យការងារ និង (៨) របបសន្តិសុខសង្គម៕

ប្រធានាធិបតីហ្វីលីពីន និងលោកជំទាវទី១ អញ្ជើញមកដល់កម្ពុជា ដោយសុវត្ថិភាព ដើម្បីបំពេញទស្សនកិច្ចផ្លូវរដ្ឋរយៈពេលបីថ្ងៃ

តបតាមការអញ្ជើញរបស់ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ឯកឧត្តម Ferdinand Romualdez Marcos Jr. ប្រធានាធិបតី នៃសាធារណរដ្ឋហ្វីលីពីន និងលោកជំទាវ Louise Araneta-Marcos បានអញ្ជើញមកដល់រាជធានី ភ្នំពេញ ព្រះរាជាណាចក្រកម្ពុជាប្រកបដោយសុវត្ថភាព ដើម្បីបំពេញទស្សនកិច្ចផ្លូវរដ្ឋ ចាប់ពីថ្ងៃទី៧ដល់ថ្ងៃទី ៩ ខែកញ្ញា ឆ្នាំ២០២៥។ក្នុងដំណើរទស្សនកិច្ចនេះ ឯកឧត្តម Ferdinand Romualdez Marcos Jr. នឹងអញ្ជើញ ជួបជាមួយ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី ព្រមទាំងមានជំនួបពិភាក្សា ទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅ វិមានសន្តិភាព។ ឯកឧត្តម Marcos Jr. និងថ្នាក់ដឹកនាំកម្ពុជាទាំងពីររូប នឹងធ្វើការពិភាក្សាស៊ីជម្រៅ លើការពង្រឹងទំនាក់ទំនងដ៏កក់ក្តៅ និងពង្រីកកិច្ចសហប្រតិបត្តិការដែលផ្តល់ផលប្រយោជន៍ទៅវិញ ទៅមក។ ភាគីទាំងពីរ នឹងផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិនានាដែលជាចំណាប់ អារម្មណ៍រួម។ ឯកសារកិច្ចសហប្រតិបត្តិការទ្វេភាគីមួយចំនួន ក៏នឹងត្រូវបានចុះហត្ថលេខា ក្នុងដំណើរ ទស្សនកិច្ចនេះផងដែរ។ឯកឧត្តមប្រធានាធិបតីហ្វីលីពីន នឹងអញ្ជើញដាក់កម្រងផ្កាគោរពវិញ្ញាណក្ខន្ធនៅវិមាន ឯករាជ្យ និងនៅមណ្ឌបព្រះបរមរូប ព្រះករុណា ព្រះបាទសម្តេច ព្រះនរោត្តម សីហនុ «ព្រះបរមរតន កោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជា។ដំណើរទស្សនកិច្ចផ្លូវរដ្ឋរបស់ឯកឧត្តមប្រធានាធិបតី Ferdinand Romualdez Marcos Jr. នឹងពង្រឹងបន្ថែមទៀតនូវចំណងមិត្តភាព និងសាមគ្គីភាព ព្រមទាំងកិច្ចសហប្រតិបត្តិការលើគ្រប់វិស័យរវាងប្រទេស និងប្រជាជនទាំងពីរ៕

សម្តេច ម៉ែន សំអន ប្រារព្ធពិធីបុណ្យទក្ខិណានុប្បទាន ដើម្បីឧទ្ទិសកុសល ជូនចំពោះវិញ្ញាណក្ខន្ធវីរកងទ័ព ដែលបានពលីជីវិត ក្នុងបុព្វហេតុជាតិ ការពារបូរណភាព

នៅព្រឹកថ្ងៃទី៧ ខែ កញ្ញា ឆ្នាំ ២០២៥នេះ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជាបានរៀបចំពិធីបុណ្យទក្ខិណានុប្បទានដើម្បីជូនបុណ្យចំពោះវីរជនកងទ័ពខ្មែរគ្រប់លំដាប់ថ្នាក់ដែលកំពុងបំពេញបេសកកម្មនៅសមរភូមិ និងឧទ្ទិសកុសលជូនចំពោះវិញ្ញាណក្ខន្ធវីរកងទ័ពដែលបានពលីជីវិតក្នុងបុព្វហេតុជាតិ ការពារបូរណភាពទឹកដី ក្នុងអំឡុងពេលនៃជម្លោះព្រំដែន កម្ពុជា-ថៃ និងឧទ្ទិសមហាកុសលថ្វាយចំពោះព្រះមហាវីរក្សត្រ ខ្មែរគ្រប់ជំនាន់ ។ ពិធីនេះដែរប្រារព្ធធ្វើនៅឧបដ្ឋានសាលាវត្តរាជបូណ៌ ក្រុងសៀមរាប ដោយមានការអញ្ជើញចូលរួមពីសំណាក់ ឯកឧត្តម ប្រាក់ សោភ័ណ អភិបាលខេត្តសៀមរាប ឯកឧត្តម លោកជំទាវសមាជិកក្រុមប្រឹក្សាខេត្ត គណៈអភិបាលអភិបាលខេត្ត អស់ លោក លោកស្រី មន្ទីរអង្គភាព រួមទាំងព្រះសង្ឃ និងប្រជាពុទ្ធបរិស័ទនិមន្តនិងអញ្ជើញចូលរួមជាច្រើនអង្គ/នាក់។នៅក្នុងពិធីបុណ្យនោះដែរសម្តេចព្រះព្រហ្មរតនមុនី ពិន សែម ក៏បានមានថេរដីកាសម្ដែងនូវការសោកស្តាយរកអ្វីប្រៀបផ្ទឹមពុំបាន ចំពោះការបាត់បង់នូវវីរកងទ័ពកម្ពុជាដែលបានពលីជីវិតបូជាដើម្បីការពារព្រំដែនទឹកដី និងអធិបតេយ្យភាពជាតិខ្មែរ ប្រកបដោយភាពអង់អាចក្លាហានក្រៃលែង។ ការពលីជីវិតរបស់វីរកងទ័ពកម្ពុជាយើងគឺជាការលះបង់ដ៏ធំធេង និងមានគុណបំណាច់មិនអាចកាត់ថ្លៃបានចំពោះជាតិកម្ពុជាទាំងមូល ដែលយើងត្រូវតែគោរព និងផ្តល់តម្លៃជាវីរបុរសពិតរបស់ជាតិប្រកបដោយកិត្តិយសជាអមតៈសម្រាប់ប្រវត្តិសាស្ត្រកម្ពុជា។សម្តេចព្រះព្រហ្មរតនមុនី បានមានថេរដីកាបន្ថែមថា យើងពិតជាមានការសោកស្តាយយ៉ាងខ្លាំងចំពោះការបាត់បង់វីរកងទ័ព ពោរពេញដោយឆន្ទៈ មនសិការ ស្មារតីក្លាហាន និងសេចក្តីស្មោះត្រង់ចំពោះជាតិ ដែលពួកគាត់បានសុខចិត្តយកទ្រូងពាំងគ្រាប់រំសេវនិងអាវុធគ្រប់ប្រភេទ ប្តូរយកសុខសន្តិភាពជូនប្រជាជនកម្ពុជាទាំងមូល ដែលយើងអាចសម្រានលក់ ហូបឆ្ងាញ់ ប្រកបដោយស្នាមញញឹម និងភាពកក់ក្តៅជាមួយក្រុមគ្រួសារ។ ក្នុងឱកាសនោះផងដែរសម្តេចកិត្តិសង្គហបណ្ឌិត រួមជាមួយ ព្រះមន្ត្រីសង្ឃខេត្ត ព្រះសង្ឃនិង ឯកឧត្តម លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត លោក លោកស្រីថ្នាក់នាំមន្ទីរអង្គភាពរួមនិង ពុទ្ធបរិស័ទ ទាំងអស់ ក៍បានសម្តែងការគោរពដឹងគុណជានិច្ចចំពោះពលីកម្មដ៏ធំធេងនេះ ហើយតាំងចិត្តចងចាំជានិច្ចនូវគំរូវីរភាពមិនអាចកាត់ថ្លៃបាននេះជារៀងរហូត និងសូមឧទ្ទិសផលបុណ្យទាំងឡាយជូនដល់វិញ្ញណក្ខន្ធវីរកងទ័ពបានបដិសន្ធិជាខ្មែរឡើងវិញកុំបីខាន។សម្តេចក៏បានបួងសួងដល់គុណបុណ្យព្រះរតនត្រ័យនិងវត្ថុសក្តិសិទ្ធិ សូមអភិបាលរក្សា និងឃុំគ្រងវីរកងទ័ពកម្ពុជាយើងដែលកំពុងសម្រាកព្យាបាល ឱ្យឆាប់បានធូរស្បើយ និងសូមបួងសួងដល់វត្ថុសក្តិសិទ្ធិដូនតាខ្មែរ ជួយពាំងរាំងមុខកងទ័ពយើងឱ្យមានជោគជ័យ និងសុខសុវត្ថិភាពគ្រប់ពេលវេលា ។ នៅក្នុងពិធីបុណ្យទក្ខិណានុប្បទាន ដើម្បីជូនបុណ្យចំពោះវីរជនកងទ័ពខ្មែរគ្រប់លំដាប់ថ្នាក់ដែលកំពុងបំពេញបេសកកម្មនៅសមរភូមិ និងឧទ្ទិសកុសលជូនចំពោះវិញ្ញាណក្ខន្ធវីរកងទ័ពដែលបានពលីជីវិតក្នុងបុព្វហេតុជាតិ ការពារបូរណភាពទឹកដី ក្នុងអំឡុងពេលនៃជម្លោះព្រំដែន កម្ពុជា-ថៃ និងឧទ្ទិសមហាកុសលថ្វាយចំពោះព្រះមហាវីរក្សត្រ ខ្មែរគ្រប់ជំនាន់នាពេលនោះដែរក៏មានការរៀបចំរាប់បាត្រព្រះចំនួន៥០០អង្គ ផងដែរ៕

កិច្ចប្រជុំ GBC កម្ពុជា-ថៃ បានចាប់ផ្តើមហើយនៅរសៀលនេះ នៅខេត្តកោះកុង ដើម្បីពិភាក្សាបន្ថែមទៀតជំរុញប្រសិទ្ធភាព និងភាពជឿជាក់អំពីការអនុវត្តកិច្ចព្រមព្រៀងបទឈប់បាញ់ និងកសាងទំនុកចិត្តជាមួយគ្នា

អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា សូមជម្រាបជូនសាធារណជនជ្រាបថា កិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) បានចាប់ផ្តើមកិច្ចប្រជុំហើយ នាវេលាម៉ោង ១:២៥នាទីរសៀលថ្ងៃទី០៧ ខែកញ្ញា ឆ្នាំ២០២៥នេះ នៅខេត្តកោះកុង ដើម្បីពិភាក្សាបន្ថែមទៀតក្នុងការជំរុញ ប្រសិទ្ធភាព និងភាពជឿជាក់អំពីការអនុវត្តកិច្ចព្រមព្រៀងបទឈប់បាញ់ និងការកសាងទំនុកចិត្តជាមួយគ្នា។គណៈប្រតិភូក្រុមលេខាធិការរបស់កម្ពុជា ដឹកនាំដោយ ឧត្តមសេនីយ៍ទោ ញ៉ែម បូរ៉ាដែន ប្រធានក្រុមលេខាធិការ (GBC) និងគណៈប្រតិភូក្រុមលេខាធិការរបស់ថៃ ដឹកនាំដោយ ឧត្តមសេនីយ៏ ឯក ណាត់ថាផុង ប្រាវកែវ ប្រធានក្រុមលេខាធិការ GBC។សូមគូសបញ្ជាក់ផងដែរថា ក្រុមលេខាធិការដ្ឋាននៃភាគីទាំងពីរបានផ្លាស់ប្តូរឯកសារជាមុន ដើម្បីត្រៀម ពិភាក្សាក្នុងកិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងដំណើរ ការកិច្ចប្រជុំរបស់ខ្លួន ចាប់ពីថ្ងៃទី៧ ដល់ថ្ងៃទី៩ ខែកញ្ញា ឆ្នាំ២០២៥ នេះតទៅ ដើម្បីត្រៀមរៀបចំ កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) លើកទី១៨ ដែលនឹងប្រព្រឹត្តនៅថ្ងៃទី១០ ខែកញ្ញា ឆ្នាំ២០២៥ ខាងមុខនេះ ហើយកម្ពុជាគឺជាម្ចាស់ផ្ទះនៃកិច្ចប្រជុំ។

មនុស្សចំនួន០៦នាក់ត្រូវបានឃាត់ខ្លួន ក្នុងយុទ្ធនាការចុះត្រួតពិនិត្យឆែកអាវុធជាតិផ្ទុះ និងទប់ស្កាត់រាល់បទល្មើស

ភ្នំពេញ៖កម្លាំងគណៈបញ្ជាការឯកភាពខណ្ឌ៧មករា សហការជាមួយកម្លាំងនាយកដ្ឋានសណ្តាប់ធ្នាប់សាធារណៈ នៃអគ្គស្នងការនគរបាលជាតិ ចុះពង្រឹងសន្តិសុខក្នុងមូលដ្ឋានខណ្ឌ៧មករា ដោយឃាត់ខ្លួនមនុស្សប្រុសស្រីចំនួន០៦នាក់ និងសម្ភារៈមួយចំនួន។យុទ្ធនាការនេះបានធ្វើឡើងកាលពី វេលាម៉ោង ០៩យប់ថ្ងៃទី ០៦ខែកញ្ញា ដល់ម៉ោង ១យប់រំលងអាធាត្រចូលថ្ងៃទី ៧ ខែកញ្ញាឆ្នាំ២០២៥កម្លាំងចម្រុះ បានសហការ ដឹកនាំដោយឯកឧត្តម ឧត្តមសេនីយ៍ឯក ប៊ុន ដា ប្រធាននាយកដ្ឋានសណ្តាប់ធ្នាប់សាធារណៈនិងលោក ឌី រត្ន័ខេមរុណ អភិបាលរងខណ្ឌ៧មករា តំណាងឲ្យ លោក ថេង សុថុល អភិបាលខណ្ឌ៧មករា ចុះដឹកនាំកម្លាំងចម្រុះ ត្រួតពិនិត្យឆែកអាវុធជាតិផ្ទុះ និងទប់ស្កាត់បទល្មើសគ្រឿងញៀនតាមមូលដ្ឋាន ក្នុងគោលដៅចំណុចមុខវិទ្យាល័យបាក់ទូក ផ្លូវលេខ ១៦៩ ស្ថិតក្នុងសង្កាត់ វាលវង់ ខណ្ឌ៧មករា ។ក្នុងរង្វង់ប្រតិបត្តិការកម្លាំងចម្រុះបានធ្វើការត្រួតពិនិត្យរថយន្តចំនួន១៨០គ្រឿង ជាលទ្ធផល បានឃាត់មនុស្សចំនួន៦នាក់ ក្នុងនោះមានស្រី១នាក់ បានរកឃើញអ្នករក្សាទុកម្សៅពណ៌សថ្លា ចំនួន២កញ្ចប់តូច និងថ្នាំ២ បន្ទះពណ៌ខៀវ ចំនួន៨គ្រាប់ព្រមទាំងសម្ភារៈជក់សំរាប់បឺតចំនួន ១៥ដើម និងឃាត់បានរថយន្តចំនួន ២គ្រឿង ។ក្រោយធ្វើការឃាត់ខ្លួន និងសួរនាំរួចបានធ្វើកំណត់ហេតុដកហូតវត្ថុតាងរួចមក កម្លាំងចម្រុះនៃអគ្គស្នងការនគរបាលជាតិ បានបញ្ជូនមនុស្សប្រុសស្រី ទាំង០៦នាក់ទៅមន្ទីប្រឆាំងគ្រឿងញៀន ដើម្បីបន្តតាមនីតិវិធី៕អត្ថបទ៖ កុម្ភៈ

គ្រិស្ដបរិស័ទជួបជុំគ្នាអធិដ្ឋាន និងអំពាវនាវអន្តរជាតិ ជួយអន្តរាគមន៍ ឲ្យមានសន្តិភាពរវាងកម្ពុជា-ថៃជានិរន្ត

គ្រិស្តបរិស័ទនៅក្នុងប្រទេសកម្ពុជា បានជួបជុំគ្នា ដើម្បីធ្វើការអធិដ្ឋានសូមឲ្យប្រទេសកម្ពុជាមានតែសុខសន្តិភាព ជាមួយនឹងការអំពាវនាវដល់សហគន៍អន្តរជាតិ ជួយអន្តរាគមន៍បន្ថែម ដើម្បីឲ្យប្រទេសថៃ បញ្ឈប់សកម្មភាពរំលោភបទឈប់បាញ់ ហើយធ្វើឲ្យព្រំដែនកម្ពុជា-ថៃ មានសន្តិភាពជានិរន្ត។នៅក្នុងពិធីនេះ គ្រិស្តបរិស័ទនៅកម្ពុជា រួមគ្នាអធិដ្ឋានដើម្បីសន្តិភាព កាលពីថ្ងៃទី៦ ខែកញ្ញា ឆ្នាំ២០២៥ ព្រឹទ្ធបូជាចារ្យ ម៉ម បាណាបាស បានអាននូវសេចក្តីថ្លែងការណ៍របស់គ្រិស្តបរិស័ទកម្ពុជា ដោយគាំទ្រចំពោះរាជរដ្ឋាភិបាល ដែលបានស្វះស្វែងរកសន្តិភាព និងទទួលយកការសម្រុះ សម្រួលរបស់ប្រធានាធិបតីអាមេរិក លោក ដូណាល់ត្រាំ ដើម្បីឲ្យមានបទឈប់បាញ់ជាបន្ទាន់ រវាងកងទ័ពកម្ពុជា និងកងទ័ពថៃ ។សេចក្តីថ្លែងការណ៍នេះ គ្រិស្ដបរិស័ទក៏បានទទូច ដល់សហគមន៍អន្តរជាតិឲ្យជួយអន្តរាគមន៍ ដើម្បីបញ្ឈប់នូវរាល់សកម្មភាពបង្ករឿង និងការឈ្លានពានលើអធិបតេយ្យភាពកម្ពុជា ពីសំណាក់ភាគីថៃ ព្រមទាំងអនុវត្តបទឈប់បាញ់ ឲ្យបានខ្ជាប់ខ្ជួន ។ព្រឹទ្ធបូជាចារ្យ ហេង ចេង និងឯកឧត្តមបណ្ឌិត សៀ សុភ័ក្រ្ត រដ្ឋលេខាធិការក្រសួងធម្មការ និងសាសនា មានប្រសាសន៍ថា ក្នុងនាមជាប្រទេសជាប់ភូមិផងរបងជាមួយ កម្ពុជា-ថៃ ត្រូវតែមានសន្តិភាពជាមួយគ្នាជានិរន្ត ហើយរួមគ្នាអភិវឌ្ឍប្រជាជាតិអាស៊ាន ឲ្យកាន់តែរីកចម្រើន ដោយមិនគួរមានជម្លោះជាមួយគ្នានោះទេ ។ក្នុងពិធីនេះ គ្រិស្តបរិស័ទនៅកម្ពុជារួមគ្នាអធិដ្ឋានដើម្បីសន្តិភាពនេះ គ្រិស្តបរិស័ទ ក៏បានប្រមូលថវិកា និងសម្ភារផ្សេងៗ ដើម្បីទុកចែកជូនដល់វីរកងទ័ពកម្ពុជា កំពុងឈរជើងការពារទឹកដី នៅសមរភូមិមុខ ជាមួយនឹងការអធិដ្ឋានដល់កងទ័ពទាំងអស់ សូមមានសេចក្តីសុខ សេចក្តីចម្រើន ។គួរបញ្ជាក់ថា កិច្ចព្រមព្រៀងបទឈប់បាញ់នៃកងទ័ពកម្ពុជា-ថៃ មានរយៈពេលជាង១ខែមកហើយ ដោយភាគីកម្ពុជា បានអនុវត្តយ៉ាងខ្ជាប់ខ្ជួន មិនបានចល័តទ័ព ឬធ្វើឲ្យមានការតានតឹងនៅព្រំដែនកម្ពុជា-ថៃ ប៉ុន្តែបានជ្រើសយកការទូតបរទេស និងច្បាប់អន្តរជាតិ ទោះបីជាភាគីថៃ បានរំលោភបទឈប់បាញ់ម្ដងជាពីរដងក្ដី ប៉ុន្ដែកម្ពុជានៅបន្តរក្សាបាននូវការអត់ធ្មត់ខ្ពស់បំផុត៕ អត្ថបទ បាន សុខរិទ្ធិ

ស្អែកបិណ្ឌ១ ពលរដ្ឋត្រៀមធ្វើចង្ហាន់ទៅវត្តប្រគេនព្រះសង្ឃឧទ្ទិសកុសលដល់បុព្វការីជន

ប្រជាពលរដ្ឋ នៅថ្ងៃទី ៧ ខែកញ្ញា ឆ្នាំ ២០២៥នេះ បានអញ្ជើញទៅតាមផ្សារ ក្នុងគោលដៅទិញបន្លែ ត្រី សាច់ និងរបស់របរចាំបាច់នានា សម្រាប់ការធ្វើចង្ហាន់ទៅកាន់ទីវត្តអារាម សម្រាប់ថ្ងៃកាន់បិណ្ឌទី ១ ដើម្បីប្រគេនព្រះសង្ឃ និងឧទ្ទិសកុសលដល់បុព្វការីជន។តាមផ្សារនានានៅរាជធានីភ្នំពេញចាប់ផ្ដើមមានភាពមមាញឹកកាន់តែខ្លាំង ដោយសាររដូវកាល កាន់បិណ្ឌ និងបុណ្យភ្ជុំបិណ្ឌបានចូលមកដល់ ក្នុងនោះជាទិដ្ឋភាពនៅផ្សារច្បារអំពៅនាព្រឹកនេះ ពលរដ្ឋខ្លះទិញសាច់ជ្រូក អ្នកខ្លះទិញសាច់មាន់ បូករួមនឹងបន្លែ និងនំផ្សេងៗ ដើម្បីធ្វើជាចង្ហាន់ទៅតាមវត្តអារាម វេរប្រគេន ព្រះសង្ឃ ឧទ្ទិសកុសលជូននសាច់ញាតិដែលបានចែកឋានទៅ។ ពិធីបុណ្យកាន់បិណ្ឌនិងភ្ជុំបិណ្ឌ តែងរៀបចំឡើងនៅថ្ងៃ១រោច ដល់ថ្ងៃ១៥រោចខែភទ្របទ។ ពិធីបុណ្យកាន់បិណ្ឌ និងភ្ជុំបិណ្ឌ ជាពិធីបុណ្យមួយដែលធំជាងគេ នៅក្នុងចំណោមពិធីបុណ្យផ្សេងទៀត សម្រាប់អ្នកកាន់ព្រះពុទ្ធសាសនានៅកម្ពុជា។កំឡុងពេលពីថ្ងៃកាន់បិណ្ឌទី ១ រហូតដល់ថ្ងៃភ្ជុំបិណ្ឌ ប្រជាពលរដ្ឋ តែងនាំយកម្ហូបអាហារ វេរប្រគេនជូនព្រះសង្ឃតាមទីវត្តអារាមនានា។ ឈានចូលថ្ងៃឈប់សម្រាក សម្រាប់រយៈពេល ៣ថ្ងៃសម្រាប់ពិធីបុណ្យភ្ជុំបិណ្ឌ ប្រជាពលរដ្ឋនឹងចាប់ផ្ដើមធ្វើដំណើរកាន់តែច្រើន ពិសេសធ្វើដំណើរចេញពីរាជធានីភ្នំពេញ ទៅកាន់ទីបណ្ដាខេត្ត ដែលជាស្រុកកំណើតរបស់ខ្លួន៕អត្ថបទ៖គឹមហុក

មន្ត្រីគណបក្សប្រជាជនកម្ពុជាខេត្តពោធិ៍សាត់ ទទួលបានការបំពាក់បំប៉នការងារព័ត៌មានវិទ្យា

ឯកឧត្តម សោម សឿន សមាជិកគណៈអចិន្ត្រៃយ៍ និងជាប្រធានគណៈចាត់តាំងនៃគណៈកម្មាធិការកណ្តាលគណបក្សប្រជាជនកម្ពុជា និងឯកឧត្តម ខូយ រីដា សមាជិកគណៈកម្មាធិការកណ្តាល ប្រធានគណៈកម្មាធិការគណបក្សខេត្តពោធិ៍សាត់ នាថ្ងៃទី៦ ខែកញ្ញា ឆ្នាំ២០២៥ បានអញ្ជើញជាអធិបតីក្នុងពិធីបើកវគ្គបំពាក់បំប៉នជំនាញការងារចាត់តាំងកសាងបក្ស និងព័ត៌មានវិទ្យា ( IT ) ជូនដល់មន្ត្រីគណបក្សថ្នាក់ខេត្ត មន្ទីរ អង្គភាព ស្រុក ក្រុងនិងមន្ត្រីទទួលបន្ទុកព័ត៌មានវិទ្យា (IT)ចំនួន២០០នាក់ នៅទីស្នាក់ការរគណបក្សប្រជាជនកម្ពុជាខេត្តពោធិ៍សាត់ ។ឯកឧត្តម ខូយ រីដា បានបញ្ជាក់ថា ឯកឧត្តម កែវ រតនៈ សមាជិកគណកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះជួយមូលដ្ឋានខេត្តពោធិ៍សាត់ តែងតែយកចិត្តទុកដាក់និងជម្រុញគណបក្សខេត្ត ក្នុងការរៀបចំចាត់តាំងក្រុមការងារចុះជួយមូលដ្ឋានស្រុក ក្រុងទាំង៧ និង៤៩ឃុំ សង្កាត់ ប្រជាពលរដ្ឋមានឈ្មោះក្នុងបញ្ជីបោះឆ្នោតឆ្នាំ២០២៥ ចំនួន៣០៩.៣០៧នាក់ ក្នុងនោះមានសមាជិកបក្សចំនួន២៦១.៤២២នាក់ ស្មើនឹង៨៤.៥២ %។ ក្នុងនាមប្រធានគណកម្មាធិការគណបក្សខេត្ត បានថ្លែងអំណរគុណយ៉ាងជ្រាលជ្រៅចំពោះឯកឧត្តម សោម សឿន និងសហការី បានអញ្ជើញជាអធិបតីនិងវាគ្មិនឧទ្ទេសនាមឯកសារវគ្គបំពាក់បំប៉នជំនាញការងារចាត់តាំង កសាងបក្ស និងព័ត៌មាន វិទ្យា IT លើការងារគ្រប់គ្រងទិន្នន័យសមាជិកបក្សនិងមន្ត្រីបក្សក្នុងប្រព័ន្ធ(SERVER) ដល់មន្ត្រីគណបក្សថ្នាក់ខេត្ត មន្ទីរ អង្គភាព ស្រុក ក្រុងនិងមន្ត្រីទទួលបន្ទុកព័ត៌មានវិទ្យា(IT) ដើម្បីបង្កើនចំណេះដឹងបន្ថែម។ក្នុងឱកាសនោះ ឯកឧត្តម សោម សឿន បានលើកឡើងថាគោលបំណងសំខាន់គឺលើកកម្ពស់ការយល់ដឹងអំពីតួនាទី ភារកិច្ចនិងរបៀបរបបធ្វើការងាររបស់គណៈចាត់តាំងនៃគណបក្សរាជធានី ខេត្ត ក្រុង ស្រុក ខណ្ឌ អំពីគោលការណ៍ការងាររៀបចំរចនាសម្ព័ន្ធនិង អង្គការ ចាត់តាំង ។ លើមូលដ្ឋាននេះពង្រឹងលើកកម្ពស់សមត្ថភាព និងស្មារតីទទួលខុសត្រូវក្នុងការអនុវត្តតួនាទីភារកិច្ចរបស់ខ្លួនឱ្យបានត្រឹមត្រូវតាមកោលការណ៍កំណត់របស់បក្ស ធ្វើជាសេនាធិការជូនគណៈកម្មាធិការគណបក្ស ដើម្បីពង្រឹងប្រសិទ្ធិភាពនៃការដឹក នាំរបស់អង្គការចាត់តាំងគណបក្សគ្រប់ថ្នាក់ ព្រមទាំងពង្រឹងសាមគ្គីភាព ឯកភាពផ្ទៃក្នុងនិងជំនឿគាំទ្រចំពោះគណបក្ស។ ឯកឧត្តម បានលើកឡើងទៀតថា ឯកសារនៃវគ្គបំពាក់បំប៉ននេះមាន៤ផ្នែកគឺ ផ្នែកទី១-គោលការណ៍ការងារចាត់តាំងកសាងបក្ស និងតួនាទី ភារកិច្ចរបស់គណៈចាត់តាំង។ ផ្នែកទី២- គោលការណ៍ការងាររៀបចំរចនាសម្ព័ន្ធ អង្គការចាត់តាំងនិងមន្ត្រីគណៈកម្មាធិការគណបក្សរាជធានី ខេត្ត ក្រុង ស្រុក ខណ្ឌ ឃុំ សង្កាត់និងអង្កការចាត់តាំងមូលដ្ឋានចំណុះ។ ផ្នែកទី៣-គោលការណ៍ការងារគ្រប់គ្រង កសាង និងពង្រឹង ពង្រីកសមាជិកគណបក្ស។ផ្នែកទី៤-គោលការណ៍ការងារគ្រប់គ្រងទិន្នន័យបញ្ជីឈ្មោះសមាជិកគណបក្សនិង មន្ត្រីបក្សតាមប្រព័ន្ធព័ត៌មានវិទ្យា (IT)។ ដូច្នេះសូមឱ្យសិក្ខាកាមទាំងអស់ខិតខំត្រង់ត្រាប់ស្តាប់ការពន្យល់ណែនាំ បង្ហាត់បង្ហាញពីសំណាក់គ្រូឧទ្ទេសដោយសង្ឃឹមថា ទទួលបានចំណេះដឹងថ្មីៗដើម្បីពង្រឹងពង្រីកសមត្ថភាពពិតប្រាកដឈានទៅដល់ការឯកភាពគ្នាជាធ្លុងមួយក្នុងការរៀបចំធ្វើបច្ចុប្បន្នភាពរចនាសម្ព័ន្ធអង្គការចាត់តាំងគណបក្សឱ្យកាន់តែរឹងមាំនិងបន្តទៅរៀបចំគ្រប់គ្រងតាមប្រ ព័ន្ធបច្ចេកទេសព័ត៌មានវិទ្យា នៃប្រព័ន្ធSER VERRរបស់គណៈចាត់តាំងគណៈកម្មាធិការកណ្តាល៕

វត្ដអារាមក្នុងខេត្ដសៀមរាបរៀបចំរួចរាល់ សម្រាប់ពិធីកាន់បិណ្ឌ និងអំនាវនាវឱ្យរក្សាបរិស្ថានស្អាតអនាម័យល្អ

ព្រះសង្ឃក្នុងខេត្ដសៀមរាប បានឱ្យដឹងថា នៅតាមវត្ដអារាម បានរៀបចំរួចរាល់ហើយ សម្រាប់ពិធីកាន់បិណ្ឌនិងភ្នំបិណ្ឌក្នុរយៈពេល១៥ថ្ងៃ និងអំនាវនាវឱ្យពុទ្ធសាសនិកជន រក្សាបរិស្ថានស្អាត អនាម័យល្អ ក្នុងវត្ដអារាមឱ្យបានស្អាតជានិច្ច ស្របតាមទីក្រុងស្អាត ទេសចរប្រសើរ។ព្រះតេជគុណ ស រ៉ា ព្រះគ្រូចៅអធិការវត្តត្រាំនាគ ក្រុងសៀមរាប ព្រះអង្គបានផ្តំាផ្ញើដល់ពុទ្ធបរិស័ទ និងយុវជនក្មេងៗឱ្យស្រឡាញ់បរិស្ថាន និងរក្សាបាននូវគុណតម្លៃប្រពៃណីទំនៀមទម្លាប់របស់ខ្មែរ ដើម្បីឱ្យពិធីបុណ្យកាន់បិណ្ឌ និងភ្ជុំបិណ្ឌនៅតាមទីអារាមប្រកបដោយភាពសុខដុមរមនានិងសាមគ្គីធម៌ ទៅតាមជំនឿប្រពៃណីព្រះពុទ្ធសាសនាជាសាសនារបស់រដ្ឋ។ព្រះអង្គមានសង្ឃដីកាបន្ដថា ពិធីបុណ្យកាន់បិណ្ឌនិងភ្ជុំបិណ្ឌនេះ ជាពិធីបុណ្យជាតិដ៏សំខាន់ និងមិនអាចខ្វះបាន ដែលប្រជាពុទ្ធបរិស័ទ្ធ តែប្រារព្ធតាំងពីដូនតាមក ជាពិសេសពីបោះបាយបិណ្ឌមិនត្រឹមតែជាជំនឿដែលបានចាក់ឫសយ៉ាងជ្រៅ ទៅក្នុងផ្នត់គំនិតជនជាតិខ្មែរប៉ុណ្ណោះទេ តែពិធីនេះ បានក្លាយទៅជាប្រពៃណី និងបង្កប់ន័យអប់រំ ផងដែរ។ព្រះវិភត្តិមុនីញ្ញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ ព្រះអង្គមានសង្ឃដីកាថា ក្នុងឱកាសកាន់បិណ្ឌ១៥ថ្ងៃ ក៏មានពិធីបោះបាយបិណ្ឌនិងពិធីសាសនាផ្សេងៗទៀត ព្រមទាំងបានរៀបចំពិធីបាំងស្កូលដល់ព្រលឹងវីរៈកងទ័ពដែលបានពលីជីវិតក្នុងការពារបូរណៈទឹកផងដែរ។ព្រះអង្គបន្ដថា ពិធីបុណ្យកាន់បិណ្ឌ ភ្ជំបិណ្ឌ ព្រះអង្គបានរៀបចំរួចរាល់ហើយ សម្រាប់ប្រជាពលរដ្ឋខែ្មរ ដែលតែងតែនាំគ្នាទៅប្រារព្ធពិធី និងបោះបាយបិណ្ឌនៅតាមវត្តអារាម នាពេលទៀបភ្លឺជារៀងរាល់ថ្ងៃ ។ ជាមួយគ្នានេះ ក្នុងពិធីនេះ ក៏មានការផ្សព្វផ្សាយពីសារៈសំខាន់ផ្សេងទៀតតាមរយៈព្រះធម៌ទេសនា ដូច ពីផលប៉ះពាល់នៃការប្រើប្រាស់គ្រឿងញាន គ្រោះថ្នាក់ចរាចរណ៍ ជាពិសេសការបញ្ជ្រាបនូវព្រះធម៌។សូមរំលឹកថា ពិធីកាន់បិណ្ឌ និងភ្នំបិណ្ឌ បានប្រារព្ធឡើង នៅថ្ងៃ១៣រោជខែភទ្របទ ឆ្នាំម្សាញ់សប្ដស័ក ពុទ្ធសករាជ២៥២៩ ត្រូវនឹងពីថ្ងៃទី៨ខែកញ្ញាឆ្នាំ២០២៥នេះ។បើតាមតម្រាចារតាមប្រវត្តិសាស្ត្រនៃប្រទេសកម្ពុជា បានបង្ហាញថា ពិធីបុណ្យភ្ជុំបិណ្ឌ គឺកើតមានតាំងពីបុរាណកាលមកម្ល៉េះ។ កាលពីសម័យបុរាណកាល គេធ្វើពិធីបុណ្យនេះ គឺដើម្បីរៀបចំធ្វើសង្ឃភត្ត ទំនុកបម្រុងព្រះសង្ឃ ដែលគង់ចាំវស្សាក្នុងវត្តរយៈពេល ៣ ខែ ចាប់តាំងពីថ្ងៃចូលវស្សារហូតដល់ថ្ងៃចេញវស្សា៕

បណ្ដាញសង្គម

ព័ត៌មានថ្មីៗ

អ្នកវិទ្យាសាស្ត្របកស្រាយប្រវត្តិភូគព្ភសាស្ត្រនៃជ្រលងភ្នំ Grand Canyon

វិមានក្រឹមឡាំង៖ សហប្រតិបត្តិការយានដ្រូនរបស់អឺរ៉ុបជាមួយអ៊ុយក្រែន គឺជាការចូលរួមខ្លាំងឡើងៗ នៅក្នុងសង្គ្រាម

អតីតប្រធានាធិបតីមីយ៉ាន់ម៉ា មានសេរីភាព ក្រោយការលើកលែងទោស ពាក់ព័ន្ធការផ្ដន្ទាទោសក្រោយរដ្ឋប្រហារ

UN៖ ស្រ្តី និងក្មេងស្រី ៤៧នាក់ ត្រូវបានសម្លាប់ក្នុង ១ថ្ងៃ អំឡុងសង្រ្គាមហ្កាហ្សា

លោក Macron និងលោក Starmer រៀបចំកិច្ចប្រជុំកំពូលស្តីពីសន្តិសុខច្រកសមុទ្រ Hormuz

ប្រធានាធិបតីលីបង់ បញ្ជាក់ថា កិច្ចចរចាដោយផ្ទាល់ជាមួយអ៊ីស្រាអែល គឺ «សំខាន់ណាស់»

មនុស្ស ៦នាក់ ស្លាប់ និងមនុស្ស ៤៣នាក់ រងរបួសនៅអ៊ុយក្រែន ក្នុងការវាយប្រហាររបស់រុស្ស៊ី រយៈពេល ១ថ្ងៃកន្លងមកនេះ

រដ្ឋមន្រ្តីការពារជាតិ៖ អ៊ីស្រាអែលនឹងបន្តគ្រប់គ្រងទឹកដីដែលពួកគេដណ្តើមបាននៅភាគខាងត្បូងលីបង់

អាល្លឺម៉ង់មិនចូលរួមបេសកកម្មច្រកសមុទ្រ Hormuz នោះទេ រហូតដល់សន្តិភាពសម្រេចបាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877