BTV NEWS

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

ក្រុមប្រឹក្សាធម្មនុញ្ញប្រារព្ធពិធីសូត្រមន្តចម្រើនសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ

ខែមីនា ឆ្នាំ២០២៦នេះ កម្ពុជាទទួលបានការចុះបញ្ជីតាមប្រព័ន្ធ CamDX មានទុនវិនិយោគ ២៩៤ លានដុល្លារ

ក្រុមការងារអន្តរក្រសួងចុះពិនិត្យផ្ទៀងផ្ទាត់ទីតាំងត្រៀមរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅថ្ងៃទី១១ ខែមេសានេះ ក្រោមអធិបតីភាពសម្ដេចធិបតី

ព័ត៌មានជាតិ

កម្ពុជាបន្តតវ៉ានឹងសកម្មភាពឈ្លានពាន និងកាន់កាប់ទឹកដីដោយខុសច្បាប់ដោយកងកម្លាំងប្រដាប់អាវុធថៃ

កម្ពុជាបានធ្វើការតវ៉ាជំទាស់ជាផ្លូវការមួយទៀតប្រឆាំងនឹងសកម្មភាពឈ្លានពាន និងការកាន់កាប់ទឹកដី ដោយខុសច្បាប់ជាបន្តបន្ទាប់ ដែលជាការរំលោភលើអធិបតេយ្យ និងបូរណភាពទឹកដីរបស់កម្ពុជា ដែលធ្វើឡើង ដោយកងកម្លាំងប្រដាប់អាវុធថៃ បន្ទាប់ពីបទឈប់បាញ់នៅថ្ងៃទី២៧ ខែធ្នូ ឆ្នាំ២០២៥ នៅតាមទីតាំងមួយចំនួន។ នេះបើតាមសេចក្ដីប្រកាសព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ កម្ពុជា។ក្រសួងការបរទេសកម្ពុជា បានឱ្យដឹងថា ទីតាំងដែលយោធាថៃឈ្លានពានចូលដែនធិបតេយ្យភាពកម្ពុជានោះរួមមាន នៅតំបន់ភាគអាគ្នេយ៍នៃប្រាសាទតាមាន់ធំ ខេត្តឧត្តរមានជ័យ កងកម្លាំងប្រដាប់អាវុធថៃបានប្រើ ប្រាស់គ្រឿងចក្រធុនធ្ងន់ជីកកកាយដី និងសាងសង់លេណដ្ឋានបេតុងថ្មីមួយបន្ថែមទៀត។នៅតំបន់មុំបី ខេត្តព្រះវិហារ ម្តុំភ្នំ៤៦៩ កងកម្លាំងប្រដាប់អាវុធថៃបានធ្វើសកម្មភាពឈូសឆាយដី សាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន រួមទាំងរូបសំណាកព្រះពុទ្ធផងដែរ។នៅភូមិថ្មដូន ស្រុកបន្ទាយអំពិល ខេត្តឧត្តរមានជ័យ កងកម្លាំងប្រដាប់អាវុធថៃបានធ្វើសកម្មភាព ឈូសឆាយដី និងសាងសង់ផ្លូវ ព្រមទាំងរចនាសម្ព័ន្ធអចិន្ត្រៃយ៍មួយចំនួន នៅភាគខាងលិចនៃតំបន់ ដំណាក់ស្ដេច។នៅតំបន់អានសេះ ខេត្តព្រះវិហារ កងកម្លាំងប្រដាប់អាវុធថៃបានធ្វើសកម្មភាពឈូសឆាយដី សាងសង់ ផ្លូវ និងរចនាសម្ព័ន្ធអចិន្ត្រៃយ៍មួយចំនួន ព្រមទាំងលើកទង់ជាតិថៃ។ សកម្មភាពស្រដៀងគ្នានេះត្រូវ បានគេសង្កេតឃើញកើតមាននៅទីតាំងជាច្រើន រួមទាំងនៅម្តុំច្រកទ្វារព្រំដែនអន្តរជាតិអានសេះ អូរផ្កាស្នេហ៍ ភ្នំ៦៧៧ និងភ្នំ៥០០ ដែលកងកម្លាំងប្រដាប់អាវុធថៃ រួមជាមួយព្រះសង្ឃថៃ បានសាងសង់រូបសំណាកព្រះពុទ្ធមួយអង្គ។នៅតំបន់តាថាវ ខេត្តព្រះវិហារ កងកម្លាំងប្រដាប់អាវុធថៃបានធ្វើសកម្មភាពឈូសឆាយថ្មី និង សាងសង់ផ្លូវនិងសំណង់បេតុងអចិន្ត្រៃយ៍មួយចំនួននៅក្នុងដែនអធិបតេយ្យរបស់ប្រទេសកម្ពុជា រួមទាំងម្ដុំប្រាសាទដូនទុន ភ្នំ៥០៥ ភ្នំ៣៣៣ និងតំបន់ច្រកតាថាវ។ នៅតំបន់តាសឹម និងចាក់ច្រែង ខេត្តព្រះវិហារ កងកម្លាំងប្រដាប់អាវុធថៃបានមើល ឆាយដី និងសាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន។ កងកម្លាំងថៃ ដោយមានជំនួយពីព្រះសង្ឃថៃ បានសាងសង់រូបសំណាកព្រះពុទ្ធមួយចំនួននៅទីតាំង ផ្សេងៗក្នុងទឹកដីកម្ពុជា រួមទាំងតំបន់តាថាវ និងភ្នំទ្រព្យ ខេត្តព្រះវិហារ តំបន់អូរស្មាច់ និងប្រាសាទខ្នារ ខេត្តឧត្តរមានជ័យ។ក្រសួងការបរទេសកម្ពុជា បញ្ជាក់ថា តំបន់ទាំងនេះស្ថិតនៅក្នុងដែនអធិបតេយ្យនៃព្រះរាជាណាចក្រកម្ពុជាទាំងស្រុង ដូចដែលបានកំណត់ ដោយផែនទីមាត្រដ្ឋាន ១:២០០.០០០ របស់គណៈកម្មការកំណត់ព្រំដែនឥណ្ឌូចិន-សៀម ស្របតាមអនុសញ្ញា បារាំង-សៀមឆ្នាំ១៩០៤ និងសន្ធិសញ្ញាបារាំង-សៀមឆ្នាំ១៩០៧។ សកម្មភាពខាងលើគឺជាការរំលោភបន្ថែម ទៀតលើមាត្រា៥ នៃអនុស្សរណៈនៃការយោគយល់គ្នារវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាល នៃព្រះរាជាណាចក្រថៃ ស្តីពីការវាស់វែង និងបោះបង្គោលព្រំដែន ដែលបានចុះហត្ថលេខានៅថ្ងៃទី១៤ ខែមិថុនា ឆ្នាំ២០០០ក៏ដូចជាចំណុចទី១ (វិធានកាត់បន្ថយភាពតានតឹង) នៃសេចក្តីប្រកាសរួម នៃកិច្ចប្រជុំពិសេសលើក ទី៣ របស់គណៈកម្មាធិការព្រំដែនទូទៅ (GBC) ដែលបានធ្វើឡើងនៅថ្ងៃទី២៧ ខែធ្នូ ឆ្នាំ២០២៥។កម្ពុជា អំពាវនាវឱ្យប្រទេសថៃបញ្ឈប់ជាបន្ទាន់នូវសកម្មភាពដែលបានធ្វើឡើងនៅក្នុងតំបន់ដូចបានរៀបរាប់ខាងលើ ឬនៅក្នុងតំបន់ផ្សេងទៀត ក្រោមកាលៈទេសៈស្រដៀងគ្នា ជៀសវាងសកម្មភាពឯកតោភាគី បន្ថែមទៀតនៅក្នុងតំបន់ខាងលើ និងធានានូវការអនុវត្តកិច្ចព្រមព្រៀង និងការរៀបចំពាក់ព័ន្ធទាំងអស់រវាង ប្រទេសទាំងពីរឱ្យបានពេញលេញ និងស្មោះត្រង់ ក្នុងគោលបំណងបន្ធូរបន្ថយស្ថានការណ៍ លើកកម្ពស់ការជឿជាក់ និងទំនុកចិត្តគ្នាទៅវិញទៅមក ព្រមទាំងរក្សាសន្តិភាព ស្ថិរភាព និងភាពជាអ្នកជិតខាងល្អតាមបណ្តោយព្រំដែន កម្ពុជា-ថៃ។រាជរដ្ឋាភិបាលកម្ពុជា បញ្ជាក់សាជាថ្មីនូវការប្តេជ្ញាចិត្តដ៏ខ្ជាប់ខ្ជួន និងឥតងាករេរបស់ខ្លួន ក្នុងការស្វែងរកដំណោះស្រាយដោយសន្តិវិធីចំពោះជម្លោះព្រំដែនជាមួយប្រទេសថៃ ក៏ដូចជាជាមួយប្រទេសជិតខាងទាំងអស់ របស់ខ្លួន តាមរយៈមធ្យោបាយសន្តិភាព ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីនានា ព្រមទាំងប្តេជ្ញា ចិត្តជាដាច់ខាតចំពោះការប្រកាន់ជំហរជាគោលការណ៍ថា ព្រំដែនមិនត្រូវផ្លាស់ប្តូរដោយកម្លាំងឡើយ៕

រដ្ឋបាលខេត្តបន្ទាយមានជ័យ ធ្វើពិធីចាប់ឆ្នោតរើសក្បាលដីឡូត៍ជូនជនភៀសសឹកចូលរស់នៅជម្រកបណ្ដោះអាសន្ន

បន្ទាយមានជ័យ៖ រដ្ឋបាលខេត្តបន្ទាយមានជ័យ នៅថ្ងៃទី១៨ ខែមីនា ឆ្នាំ២០២៦នេះ បានរៀបចំពិធីចាប់ឆ្នោតរើសក្បាលដីឡូត៍ ជូនដល់បងប្អូនជនភៀសសឹក ដើម្បីចូលរស់នៅជម្រកបណ្ដោះអាសន្ន ផ្ទះអតីតយុទ្ធជន ស្ថិតនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។ ពិធីនេះក៏មានការអញ្ជើញចូលរួមជាអធិបតីភាព ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត មានការចូលរួមឯកឧត្តម ប្រាក់ ដាវីឌ អនុប្រធានក្រុមការងាររាជរដ្ឋបាលភិបាលចុះមូលដ្ឋានខេត្តបន្ទាយមានជ័យ និងជាប្រធានក្រុមការងារចុះមូលដ្ឋានស្រុកថ្មពួក ព្រមទាំងមានការចូលរួមពី អាជ្ញាធរស្រុក ឃុំ ធ្វើឡើងនៅថ្ងៃទី១៨ ខែមីនា ឆ្នាំ២០២៦៕

នៅថ្ងៃស្អែកនេះ គណៈកម្មាធិការអចិន្ត្រៃយ៍នៃរដ្ឋសភា នឹងប្រជុំពិនិត្យសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា

គណៈកម្មាធិការអចិន្ត្រៃយ៍នៃរដ្ឋសភា នឹងធ្វើការកោះប្រជុំនៅព្រឹកថ្ងៃទី១៩ ខែមីនា ឆ្នាំ២០២៦ ដើម្បីពិនិត្យមើលវិសោធនកម្មច្បាប់ស្តីពីការជ្រើសតាំងសមាជិកព្រឹទ្ធសភា និងសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដើម្បីបញ្ជូនទៅគណៈកម្មការជំនាញធ្វើការសិក្សា។ឯកឧត្តម កែវ ពិសិដ្ឋ អគ្គលេខាធិការរងប្រចាំការរដ្ឋសភា និងជានាយកខុទ្ទកាល័យសម្តេចប្រធានរដ្ឋសភា បានមានប្រសាសន៍ប្រាប់ BTV នៅព្រឹកថ្ងៃទី១៨ ខែមីនាននេះ ថា នៅថ្ងៃទី១៩ ខែមីនា ឆ្នាំ២០២៦ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នឹងដឹកនាំកិច្ចប្រជុំគណៈកម្មាធិការអចិន្ត្រៃយ៍ដើម្បីពិនិត្យមើលវិសោធនកម្មច្បាប់ស្តីពីការជ្រើសតាំងសមាជិកព្រឹទ្ធសភា និងសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។ ដោយឯកឧត្តមបញ្ជាក់ថា រដ្ឋសភាបានទទួលសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលគណៈរដ្ឋមន្ត្រីបានបញ្ជូនមកហើយ។ នៅពេលសេចក្តីព្រាងច្បាប់មកដល់រដ្ឋសភា គឺស្នើសុំសម្តេចប្រធានរដ្ឋសភា ដើម្បីកោះប្រជុំគណៈកម្មាធិការអចិន្ត្រៃយ៍ធ្វើការទទួលសេចក្តីព្រាងច្បាប់មកត្រួតពិនិត្យ ដើម្បីបញ្ជូនទៅគណៈកម្មការជំនាញដើម្បីធ្វើការសិក្សា។សូមជម្រាបថា គណៈរដ្ឋមន្ត្រីបានបញ្ជូនសេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ទៅរដ្ឋសភាកាលពីថ្ងៃទី១៦ ខែមីនា ឆ្នាំ២០២៦ បន្ទាប់ពីគណៈរដ្ឋមន្ត្រីបានអនុម័តកាលពីថ្ងៃទី១៣ ខែមីនា ឆ្នាំ២០២៦។ ហើយកាលពីថ្ងៃទី២០ ខែវិច្ឆិកា ឆ្នាំ២០២៥ គណៈកម្មាធិការអចិន្រ្តៃយ៍រដ្ឋសភា បានអនុម័តទទួលយកសេចក្តីព្រាងច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ជូនគណៈកម្មការនីតិកម្ម និងយុត្តិធម៌ នៃរដ្ឋសភា ដោយសហការជាមួយគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា ពិនិត្យសិក្សា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ៕ អត្ថបទ៖ វង្ស សុភាព

កម្ពុជា កំពុងខិតខំឱ្យក្លាយជាសមាជិកកិច្ចព្រមព្រៀង CPTPP ដើម្បីពង្រីកទីផ្សារឱ្យកាន់ទូលំទូលាយ

មន្រ្តីជាន់ខ្ពស់ក្រសួងពាណិជ្ជកម្ម បានលើកឡើងថា រាជរដ្ឋាភិបាលបាននិងកំពុងខិតខំប្រឹងប្រែងឱ្យក្លាយជាសមាជិកនៃកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក (CPTPP) ដែលនេះគឺជាទិសដៅរបស់រាជរដ្ឋាភិបាលក្នុងការធ្វើសមាហរណកម្មសេដ្ឋកិច្ចទៅក្នុងតំបន់ និងពិភពលោក។សព្វថ្ងៃ រាជរដ្ឋាភិបាលបានដាក់ពាក្យស្នើសុំចូលជាសមាជិកកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក (CPTPP) រួចហើយ កាលពីខែធ្នូ ឆ្នាំ២០២៥ ហើយដើម្បីអាចបន្ថែមសមាជិកថ្មីបាន លុះត្រាណាតែមានការយល់ព្រមជាឯកច្ឆន្ទពីសមាជិកទាំង ១២ប្រទេស។ឯកឧត្តម ប៉ែន សុវិជាតិ រដ្ឋលេខាធិការ និងអ្នកពាក្យក្រសួងពាណិជ្ជកម្ម បានប្រាប់ BTV ថារាជរដ្ឋាភិបាលនឹងខិតខំឱ្យក្លាយជាសមាជិក នៃកិច្ចព្រមព្រៀងពាណិជ្ជកម្ម CPTPPនេះ ដើម្បីពង្រីកទីផ្សារនាំចេញផលិតផលរបស់កម្ពុជា និងដើម្បីអាចស្រូបទាញវិនិយោគិនពីបរទេសឱ្យមកវិនិយោគនៅកម្ពុជាបន្ថែមទៀត។ ឯកឧត្តម បញ្ជាក់ថា បើតាមបទពិសោធន៍របស់កម្ពុជា នឹងមិនពិបាកនោះទេ ក្នុងការចរចាឱ្យក្លាយជាសមាជិកពាណិជ្ជកម្ម CPTPP នេះ។ កិច្ចព្រមព្រៀងពាណិជ្ជកម្ម CPTPP គឺជាប្លុកពាណិជ្ជកម្មដែលមានសមាជិកចំនួន១២ រួមមានប្រទេសអូស្ត្រាលី, ប្រ៊ុយណេ, កាណាដា, ឈីលី, ជប៉ុន, ម៉ាឡេស៊ី, ម៉ិកសិក, នូវែលសេឡង់, ប៉េរូ, សិង្ហបុរី, វៀតណាម និងអង់គ្លេស ដែលគ្រប់ដណ្តប់ប្រមាណ ១៣ភាគរយនៃផលិតផលក្នុងស្រុកសរុប (GDP)ពិភពលោក។សូមបញ្ជាក់ថា បច្ចុប្បន្ន ប្រទេសកម្ពុជាគឺជាសមាជិកអង្គការពាណិជ្ជកម្មពិភពលោក (WTO) និងជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។ RCEP គឺជាកិច្ចព្រមព្រៀងពាណិជ្ជកម្មសេរីដ៏ធំបំផុតនៅលើពិភពលោកដែលគ្របដណ្តប់ ១៥ ប្រទេស (អាស៊ាន១០ + ចិន ជប៉ុន កូរ៉េខាងត្បូង អូស្រ្តាលី នូវែលសេឡង់) ដោយតំណាងឱ្យប្រមាណ ៣០% នៃផលិតផលក្នុងស្រុកសរុប (GDP) ពិភពលោក។ លើសពីនេះ កម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-ចិន និងកម្ពុជា-កូរ៉េ ជាដើម៕ អត្ថបទ៖ ធូ វិរៈ

ទូត និងធុរជនពីប្រទេសអូទ្រីស ចាប់អារម្មណ៍លើសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍នៅកម្ពុជា

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានអនុញ្ញាតជូនលោក Andreas Sumper អនុប្រធានបេសកកម្មស្ថានទូតអូទ្រីសប្រចាំកម្ពុជា លោក Max Gridling អគ្គកុងស៊ុលកិត្តិយសអូទ្រីស និងលោក Christian-Petru Ciochirca នាយកប្រតិបត្តិនៃក្រុមហ៊ុន M8 M8imize GmbH ចូលជួបសម្តែងការគួរសម និងពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍ក្នុងឱកាសនៃបេសកកម្មពាណិជ្ជកម្មមកប្រទេសកម្ពុជា នៅទីស្តីការក្រសួងទេសចរណ៍។លោកប្រធានប្រតិភូ បានជម្រាបជូនឯកឧត្តមរដ្ឋមន្រ្តីពីបេសកកម្មពាណិជ្ជកម្មរបស់ស្ថានទូតដែលបានដឹកនាំក្រុមហ៊ុនធំៗ ពីប្រទេសអូទ្រីសជាច្រើនក្រុមហ៊ុនពីអាជីវកម្មផ្សេងៗ មកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គម កាលានុវត្តភាពវិនិយោគ ជាពិសេសលើវិស័យទេសចរណ៍។ក្នុងជំនួបនេះដែរ លោកតំណាងក្រុមហ៊ុន បានណែនាំអំពីសកម្មភាព និងបទពិសោធរបស់ក្រុមហ៊ុន លើការរៀបចំព្រឹត្តិការណ៍កីឡាកន្លងមក ដែលអាចរួមចំណែកជំរុញការផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ។ ជាកិច្ចឆ្លើយតប ឯកឧត្តមរដ្ឋមន្រ្តី បានកោតសរសើរ វាយតម្លៃខ្ពស់ និងថ្លែងអំណរគុណដល់ស្ថានទូតអូទ្រីសប្រចាំកម្ពុជា និងធុរជនអូទ្រីសជាប្រតិភូដែលបានមកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គមពិតជាក់ស្តែង ដែលកំពុងមានសុខសន្តិភាព និងការរីកចម្រើនលើគ្រប់វិស័យក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។ តាមរយៈកត្តាសុខសុវត្តិភាព និងស្ថិរភាពនយោបាយ បានផ្តល់នូវកាលានុវភាពវិនិយោគ និងសក្តានុពលទេសចរណ៍ដ៏ល្អប្រៀបដូចជាតារាទើបនឹងរះបង្ហាញដល់អ្នកវិនិយោគ និងភ្ញៀវទេសចរអន្តរជាតិ។ក្នុងជំនួបប្រកបដោយផ្លែផ្កា គូភាគី បានបញ្ជាក់ពីការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍ឱ្យកាន់តែល្អ ដើម្បីអភិវឌ្ឍវិស័យទេសចរណ៍ និងឧស្សាហកម្មបដិសណ្ឋារកិច្ចឱ្យកាន់តែរីកចម្រើនព្រមទាំងការពិនិត្យលទ្ធភាពជម្រុញឱ្យមានជើងហោះហើរត្រង់ពីទីក្រុង Vienna មកកាន់រាជធានីភ្នំពេញ ឬខេត្តសៀមរាប។សូមបញ្ជាក់ថា កម្ពុជា និងអូទ្រីស មានទំនាក់ទំនងការទូតដ៏ល្អតាំងពីឆ្នាំ១៩៥៦ ហើយគិតត្រឹមឆ្នាំ២០២៦ នេះ គឺមានរយៈពេលប្រមាណ៧០ឆ្នាំមកហើយ ដែលមានកិច្ចសហប្រតិបត្តិការលើវិស័យនានា រួមទាំងវិស័យវិនិយោគ ទេសចរណ៍ផងដែរ។ ក្នុងដើមឆ្នាំ២០២៦ នេះ មានភ្ញៀវទេសចរអូទ្រីសច្រើនជាង២.០០០នាក់ បានធ្វើដំណើរទេសចរណ៍មកលេងគ្រប់គោលដៅទេសចរណ៍កម្ពុជាទាំងអស់ប្រកបដោយសុខសុវត្តិភាព និងសោមន្សរីករាយ។

ក្រសួងទេសចរណ៍ដាក់ចេញវិធានសន្សំសំចៃថាមពលអគ្គិសនីក្នុងអំឡុងពេលបំពេញការងារ

ក្រសួងទេសចរណ៍ បានដាក់ចេញវិធានការ ដើម្បីកាត់បន្ថយការប្រើបាស់ថាមពលអគ្គិសនីទាំងនៅក្រសួង និងបណ្តាមន្ទីរទេសចរណ៍រាជធានី -ខេត្ត ក្នុងអំឡុងពេលបំពេញការងារ។ ការដាក់ចេញវិធានការនេះគឺ ដើម្បីទប់ទល់នឹងតម្លៃប្រេងឥន្ធនៈហក់ឡើង និងចូលរួមសន្សំសំចៃការប្រើប្រាស់ប្រេងឥន្ធនៈក្នុងខ្សែច្រវ៉ាក់ផ្គង់ផ្គង់ថាមពលអគ្គិសនីដើរដោយប្រេងឥន្ធនៈ។សេចក្តីណែនាំរបស់ក្រសួង ស្តីពីការពង្រឹងវិធានការ ដើម្បីកាត់បន្ថយ និងសន្សំសំចៃថាមពលអគ្គិសនីក្នុងអំឡុងពេលបំពេញការងារ បានផ្សាយនៅព្រឹកថ្ងៃទី១៨ មីនានេះ បញ្ជាក់ថា មន្ត្រីរាជការនៃក្រសួងទេសចរណ៍ទាំងអស់ត្រូវចូលរួមកាត់បន្ថយ និងសន្សំសំចៃថាមពលអគ្គិសនី ក្នុងអំឡុងពេលបំពេញ។ក្រសួងបានដាក់ចេញនូវវិធានការមួយចំនួន ដូចជា កំណត់ការប្រើប្រាស់ម៉ាស៊ីនត្រជាក់ ដោយ កំណត់សីតុណ្ហភាពត្រឹម ២៥ °C (កម្រិតស្តង់ដាសន្សំសំចៃ), ត្រូវបិទម៉ាស៊ីនត្រជាក់ក្នុងបន្ទប់ប្រជុំ ក្រោយពីបញ្ចប់ការប្រើប្រាស់, និង បិទម៉ាស៊ីនត្រជាក់ ១៥ ទៅ ៣០ នាទី មុនពេលសម្រាក ឬមុនពេលបញ្ចប់ម៉ោងការងារ។ទន្ទឹមនឹនេះ មន្ត្រីរាជការក្រោមឱវាទទាំងអស់ ត្រូវកំណត់ការប្រើប្រាស់ប្រព័ន្ធពន្លឺ ដូចជា បិទអំពូលភ្លើងនៅតាមកន្លែងដែលមិនចាំបាច់ ឬកន្លែងដែលមានពន្លឺគ្រប់គ្រាន់, បិទអំពូលភ្លើងក្នុងបន្ទប់ធ្វើការ រាល់ពេលចេញទៅខាងក្រៅលើសពី ១៥ នាទី, បិទអំពូលភ្លើងក្នុងបន្ទប់ទឹក ក្រោយពីប្រើប្រាស់រួច,និងជំរុញការប្រើប្រាស់ពន្លឺធម្មជាតិដោយបើកវាំងនន ដើម្បីឱ្យពន្លឺថ្ងៃចូលក្នុងបន្ទប់គ្រប់គ្រាន់ ជំនួស ឱ្យការបើកអំពូលភ្លើង។បន្ថែមពីនេះ ត្រូវកំណត់ការប្រើប្រាស់សម្ភារៈការិយាល័យ ដោយ បិទកុំព្យូទ័រ (Shut down) និងដកខ្សែភ្លើងឧបករណ៍ផ្សេងៗនៅពេលបញ្ចប់ការងារប្រចាំថ្ងៃ និង កំណត់ឱ្យកុំព្យូទ័រស្ថិតក្នុងទម្រង់ "Sleep Mode" នៅពេលសម្រាក។ ក្រសួងបានណែនាំឱ្យថ្នាក់ដឹកនាំ និងមន្ត្រីរាជការ នៃក្រសួងទេសចរណ៍ទាំងអស់ អនុវត្តឱ្យមានប្រសិទ្ធភាព ប្រកបដោយស្មារតីទទួលខុសត្រូវខ្ពស់ ចាប់ពី ថ្ងៃចុះហត្ថលេខានេះតទៅ៕ អត្ថបទ៖ ធូ វិរៈ

សម្ដេចតេជោ រម្លឹកសភាពការណ៍កាលពី៥៦ឆ្នាំមុន ទោះពេលនោះលំបាកខ្លាំងតែសម្ដេចមិនរត់ចោលប្រជាជននោះទេ

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃកម្ពុជា និងជាអតីតរដ្ឋមន្រ្ដីការបរទេសកម្ពុជា កាលពីអំឡុងឆ្នាំ១៩៧៩ បានបង្ហាញរូបថតមួយសន្លឹកកាលពីសម្ដេចនៅជារដ្ឋមន្រ្ដីការបរទេសជួបជាមួយប្រតិភូម៉ុងហ្គោលីនៅទីក្រុងភ្នំពេញ និងបញ្ជាក់ថាទោះបីជាសភាពការពេលនោះលំបាកខ្លាំងតែសម្ដេចមិនរត់ចោលប្រជាជននោះទេ សម្ដេចប្រឹងងើបឈរឡើងដើម្បីរស់ ស្តារ និងកសាងប្រទេសឡើងវិញទម្រាំបានដូចសព្វថ្ងៃ។សម្ដេចតេជោ ហ៊ុន សែន បានសរសេរនៅលើបណ្ដាញសង្គម ដោយបានរម្លឹកថា នៅថ្ងៃទី១៨ ខែមីនានេះជាខួបលើកទី៥៦ឆ្នាំ នៃរដ្ឋប្រហារទម្លាក់សម្តេចព្រះនរោតម្តសីហនុពីសំណាក់ពួក លន់ នល់ (១៨ មីនា ១៩៧០-១៨ មីនា ២០២៦) ដែលជាមូលហេតុនាំប្រទេសពីសន្តិភាពទៅកាន់សង្គ្រាមទាំងស្រុង។សម្ដេចតេជោ បានសរសេរថា គាប់ជួនម្សិលមិញ សម្ដេចបានទទួលរូបថតមួយសន្លឹកដែលស្រាវជ្រាវដោយលោក អេង សុធីវណ្ណ ដែលអ្នកថតរូបបរទេស បានថតកាលពីថ្ងៃ១៥ មីនា ១៩៧៩ ដែលពេលនោះពិតមែនតែសម្ដេចនៅក្មេង តែស្គមទម្ងន់ប្រមាណ ៥០គីឡូក្រាមប៉ុណ្ណោះ។សម្ដេចតេជោបានថ្លែងថា៖«សូមសង្កេតមើលសម្លៀកបំពាក់ខ្ញុំនាពេលនោះ ខោដោយខោ អាវដោយអាវដែលអាវរើសបានពីផ្ទះមួយនៅផ្សារធំថ្មីយកមកពាក់ជាមួយខោដែលមានស្រាប់។ គាប់ជួនថ្ងៃនោះវ៉ែនតាខ្ញុំជ្រុះកញ្ចក់មិនអាចពាក់បានទៀត។ សភាពការណ៍ពេលនោះលំបាកខ្លាំងណាស់តែយើងមិនរត់ចោលប្រជាជននោះទេ យើងប្រឹងងើបឈរឡើងដើម្បីរស់ និងការស្តា និងកសាងប្រទេសឡើងវិញទម្រាំបានដូចសព្វថ្ងៃ»។សម្ដេចតេជោបានបញ្ជាក់ថា៖ «ខ្ញុំនៅចាំបានថា ក្នុងរយៈពេលនោះ ម៉ាណែត មិនហៅខ្ញុំថា ជាពុកនៅឡើយបន្ទាប់ពីជួបគ្នាឡើងវិញ នៅថ្ងៃ២៤ កុម្ភៈ ១៩៧៩។ គេហៅខ្ញុំថា ជាពូ និងតែងបណ្តេញខ្ញុំចេញនៅពេលខ្ញុំទៅជិតម្តាយរបស់គេ»។ក្នុងឱកាសនោះ សម្ដេចបានត្រឡប់រូបថតនេះវិញ អ្នកនិពន្ធបានសរសេរជាភាសាអង់គ្លេសនៅក្រោយរូបថតថា៖ រដ្ឋមន្ត្រីការបរទេសវ័យក្មេងបំផុតរបស់ពិភពលោក៖ លោក ហ៊ុន សែន ដែលពេលនោះមានអាយុ ២៦ ឆ្នាំ បានជួបជាមួយគណៈប្រតិភូម៉ុងហ្គោលីនៅទីក្រុងភ្នំពេញ នៅថ្ងៃទី១៥ ខែមីនា ឆ្នាំ១៩៧៩ (The world’s youngest foreign minister: Hun Sen, then 26 years old, meets with a Mongolian delegation in Phnom Penh on March 15, 1979.)៕

កម្ពុជាកំពុងលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម សម្រាប់ឧស្សាហកម្មផលិតសំបកកង់រថយន្ត

កម្ពុជាដោះស្រាយបញ្ហាប្រឈម និងគោលនយោបាយ ដើម្បីលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម (កៅស៊ូ) រវាងរោងចក្រផលិត សំបកកង់រថយន្ត និងសមាគមអភិវឌ្ឍន៍កៅស៊ូកម្ពុជា សម្រាប់ជំរុញបង្កើនការប្រើប្រាស់កៅស៊ូក្នុងឧស្សាហកម្មផលិតសំបកកង់រថយន្ត។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៧ ខែមីនា ឆ្នាំ២០២៦ បានអញ្ជើញជាអធិបតី ក្នុងកិច្ចប្រជុំពិភាក្សា ស្តីពីការលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម (កៅស៊ូ) រវាងរោងចក្រផលិតសំបកកង់ រថយន្តនៅកម្ពុជា ជាមួយនឹងសមាគមអភិវឌ្ឍន៍កៅស៊ូកម្ពុជា និងតំណាងក្រុមហ៊ុនវិនិយោគផលិតសំបកកង់រថយន្តចំនួន ៨ ដែលបោះ ទុនវិនិយោគនៅតំបន់សេដ្ឋកិច្ចចំនួន៥ រួមមានខេត្តស្វាយរៀង ព្រះសីហនុ និងខេត្តក្រចេះ បានអញ្ជើញចូលរួមក្នុងកិច្ចប្រជុំនេះផងដែរ។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីលើកកម្ពស់ខ្សែច្រវាក់ផ្គត់ផ្គង់វត្ថុធាតុដើម (កៅស៊ូ) រវាងរោងចក្រផលិត សំបកកង់រថយន្តនៅកម្ពុជា ជាមួយសមាគមអភិវឌ្ឍន៍កៅស៊ូកម្ពុជា ដោយកិច្ចពិភាក្សាបានផ្តោតលើសក្តានុពល បញ្ហាប្រឈម និង ដំណោះស្រាយគោលនយោបាយ ដើម្បីបង្កើនការប្រើប្រាស់កៅស៊ូក្នុងស្រុករបស់ឧស្សាហកម្មផលិតសំបកកង់រថយន្ត ដែលអាចចាត់ ទុកថាជាការនាំចេញនៅនឹងកន្លែង។សូមបញ្ជាក់ថា ជុំវិញការនាំចេញជ័រកៅស់ស៊ូ និងផលិតផលធ្វើពីកៅស៊ូ ដូចជាសំបកកង់រថយន្តជាដើម, បើយោងតាមរបាយការណ៍អគ្គ នាយកដ្ឋានគយ និងរដ្ឋាករកម្ពុជា នៅក្នុងរយៈពេល២ខែ ដើមឆ្នាំ២០២៦នេះ កម្ពុជាបាននាំចេញមានទឹកប្រាក់សរុបជិត ៤២០ លាន ដុល្លារអាម៉េរិក កើនឡើងជិត ៣៦ ភាគរយ បើធៀបរយៈពេលដូចគ្នានិងឆ្នាំ២០២៥៕អត្ថបទ៖ សុន រ៉ាឌី

បង្ក្រាប Scams Online នៅបុរីប៉េងហួតបឹងស្នោរ ខណ្ឌច្បារអំពៅ ឃាត់ជនជាតិចិន១៩នាក់

ភ្នំពេញ ៖ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី១៧ ខែមីនា ឆ្នាំ២០២៦ បានបន្តប្រតិបត្តិការចុះបង្ក្រាប Scams Online នៅបុរីប៉េងហួតបឹងស្នោរ ខណ្ឌច្បារអំពៅ ឃាត់ជនជាតិចិន១៩នាក់ ។ ប្រតិបត្តិការនេះ ធ្វើឡើង ក្រោមការបញ្ជាដឹកនាំដោយឯកឧត្តម ឃួង ស្រេង អភិបាលរាជធានីភ្នំពេញ ក្រោមការសម្របសម្រួលនីតីវិធីច្បាប់ដោយលោកស្រី ភី ស៊ីថង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។ ជាលទ្ធផល នៃប្រតិបត្តិការបង្ក្រាប កម្លាំងអាជ្ញាធរមានសមត្ថកិច្ច ឃាត់ខ្លួនមនុស្សសរុប ចំនួន១៩នាក់ ជាជនជាតិចិន ដោយបានដកហូតសម្ភារៈរួមមាន ៖ ទូរស័ព្ទដៃ ចំនួន១៣ គ្រឿង , កុំព្យូទ័រយួរដៃ ចំនួន០១គ្រឿង , ធុង CPU ចំនួន ០១គ្រឿង , កុំព្យូទ័រ All in One ចំនួន០៨គ្រឿង , ម៉ូនីទ័រចំនួន០២គ្រឿង និងវត្ថុតាងពាក់ព័ន្ធមួយចំនួនទៀតផងដែរ ។ មន្ត្រីសមត្ថកិច្ចជំនាញ បញ្ជាក់ថា ៖ ក្រុមឧក្រិដ្ឋជនខាងលើ បានក្លែងឯកសារជាសមត្ថកិច្ចប្រទេសចិន ដើម្បីប្រព្រឹត្តិឧក្រិដ្ឋឆបោកតាមប្រព័ន្ធបច្ចេកវិទ្យាខាងលើ ។ បច្ចុប្បន្ន ជនសង្ស័យទាំង១៩នាក់ខាងលើ ត្រូវបានឃាត់ខ្លួនបញ្ចូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់វិធានការទៅតាមផ្លូវច្បាប់ ៕ លីហេង

មន្រី្តសុខាភិបាលរាជធានី ចុះបាញ់ថ្នាំកំចាត់មូស ដើម្បីបង្ការ និងទប់ស្កាត់ការចម្លងជំងឺគ្រុនឈាម

ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ ឯកឧត្តមបណ្ឌិត ងី មានហេង តាមរយៈBTV ព័ត៌មាន នាព្រឹកថ្ងៃទី១៧ ខែមីនា ឆ្នាំ២០២៦នេះ មន្រី្តជំនាញនៃមនី្ទរសុខាភិបាលរាជធានីភ្នំពេញ បន្តចុះបាញ់ថ្នាំកំចាត់មូស ដើម្បីបង្ការ និងទប់ស្កាត់ការចម្លងជំងឺគ្រុនឈាម តាមលំនៅឋានប្រជាពលរដ្ឋ ក្នុងភូមិសាស្រ្តរាជធានីភ្នំពេញ។ ឯកឧត្តមបណ្ឌិត បានមានប្រសាសន៍ថា ថ្នាក់ដឹកនាំ ក៏ដូចជាមន្រី្ត នៃការិយាល័យសុខាភិបាលស្រុកប្រតិបតិ្ត ដែលមានក្រុមការងារបាញ់ថ្នាំមូស បានសហការជាមួយអាជ្ញាធរសង្កាត់-ភូមិ តាមបណ្តាខណ្ឌនានាទាំង១៤ខណ្ឌ ក្នុងមូលដ្ឋានរាជធានីភ្នំពេញ បន្តយុទ្ធនាការចុះបាញ់ថ្នាំកំចាត់មូស ដើម្បីបង្ការ និងទប់ស្កាត់ការចម្លងជំងឺគ្រុនឈាម តាមលំនៅឋានរស់នៅ របស់បងប្អូនប្រជាពលរដ្ឋ ព្រមទាំងអប់រំផ្សព្វផ្សាយពីវិធានការលុបបំបាត់ជម្រក«មូសខ្លា» និងការពារទប់ស្កាត់កុំឲ្យមូសខ្លាខាំ ធ្វើឲ្យកើតជំងឺគ្រុនឈាមផងដែរ។ សកម្មភាពជាក់ស្តែងដែលក្រុមការងារចុះបាញ់ថ្នាំសម្លាប់សត្វមូសនេះ គឺចុះបាញ់ថ្នាំ នៅតាមដងផ្លូវសាធារណៈ មាត់ប្រឡាយទឹកស្អុយ ក្នុងប្រអប់លូ (តូច-ធំ) សាលារៀន និងលំនៅដ្ឋានប្រជាពលរដ្ឋ ហើយប្រភេទសត្វមូស ដែលកំពុងកើតមានច្រើននៅក្នុងបណ្តាសង្កាត់នានាក្នុងរាជធានីភ្នំពេញ គឺសុទ្ធតែជាប្រភេទមូសអង្កាម ដែលមិនបង្កជាហានិភ័យកើតជំងឺអ្វីជាសំខាន់នោះទេ រួមទាំងជំងឺគ្រុនឈាម ដោយគ្រាន់តែនៅពេលសត្វមូសអង្កាម ខាំ វាបង្កឱ្យយើងរមាស់ និងផ្តល់ផលរំខានតែប៉ុណ្ណោះ។រដូវវស្សាខិតជិតមកដល់ (ខែមេសា-ខែឧសភា ឆ្នាំ២០២៦) និងមានភ្លៀងធ្លាក់ បង្កឲ្យដកទឹកច្រើននាពេលខាងមុខនេះ ឯកឧត្តមបណ្ឌិត ងី មានហេង បានអំពាវនាវឲ្យសាធារណជន និងអាជ្ញាធរទាំងមូលសហការគ្នា ក្នុងការការពារ និងទប់ស្កាត់ជំងឺគ្រុនឈាម ដែលកំពុងមាននិន្នាការកើនឡើងចាប់ពីចុងខែមេសា ដោយសារទឹកភ្លៀងធ្លាក់ច្រើន បណ្តាលឲ្យមានការដក់ទឹកនៅក្នុងវត្ថុផ្សេងៗ ដែលជាកន្លែងកំណើតមូសខ្លា ដែលជាភ្នាក់ងារចម្លងជំងឺ គ្រុនឈាម។ បងប្អូនប្រជាពលរដ្ឋត្រូវចូលរួមរក្សាអនាម័យផ្ទះសម្បែង ការសម្អាតកន្លែងដក់ទឹក និងកម្ចាត់សម្ភារៈដែលអាចដក់ទឹកបាន គឺជាចំណុចសំខាន់ ក្នុងការកាត់បន្ថយកំណើតមូសខ្លា។ ការផ្លាស់ប្តូរទឹកក្នុងអាង ថូផ្កា និងឧបករណ៍ផ្ទះសម្បែងផ្សេងៗ ត្រូវអនុវត្តជាប្រចាំ ឬដាក់ថ្នាំសម្លាប់ដង្កូវទឹក និងអាចចិញ្ចឹមត្រីក្នុងអាងទឹកបានផងដែរ។ បន្ថែមពីនេះ ម្ចាស់ការដ្ឋានសំណង់ត្រូវ ផ្តោតសម្អាតវត្ថុដែលអាចដក់ទឹកបាន និងរៀបចំឧបករណ៍សំណង់ឲ្យមានរបៀបល្អ ដើម្បីចៀសវាងការកកើតមូសខ្លា នៅជុំវិញ តំបន់សំណង់។ អាជីវករដែលទាក់ទងនឹងសំបកកង់ឡាន ម៉ូតូ ត្រូវដាក់សំបកនៅកន្លែងមានដំបូល ឬគ្របឲ្យជិតដើម្បីមិនឱ្យមានទឹកដក់។ ការរក្សាអនាម័យផ្ទះស្អាត ការកាប់ស្មៅ ការស្លៀកពាក់សមរម្យការពារកាយ និងការប្រើថ្នាំបាញ់ ឬលាបកំចាត់មូស ត្រូវអនុវត្តប្រកបដោយការយកចិត្តទុកដាក់ ជាពិសេសសម្រាប់ស្ត្រីមានផ្ទៃពោះ ដែលអាចប្រើថ្នាំបាញ់បានដោយសុវត្ថិភាព។ ការគេងក្នុងមុង នៅពេលថ្ងៃ និងយប់ក៏ជាវិធានការមួយដ៏មានប្រសិទ្ធភាព៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ

របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz

ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់

ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ

អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ

ចក្រភពអង់គ្លេសបានដាក់ពង្រាយយោធា ដើម្បីរារាំងនាវាមុជទឹករុស្ស៊ីកុំឲ្យចូលដែនទឹករបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

កម្ពុជាបន្តតវ៉ានឹងសកម្មភាពឈ្លានពាន និងកាន់កាប់ទឹកដីដោយខុសច្បាប់​ដោយកងកម្លាំង​ប្រដាប់អាវុធថៃ

រដ្ឋបាលខេត្តបន្ទាយមានជ័យ ធ្វើពិធីចាប់ឆ្នោតរើសក្បាលដីឡូត៍​ជូនជនភៀសសឹកចូលរស់​នៅជម្រក​បណ្ដោះអាសន្ន

កម្ពុជា កំពុងខិតខំឱ្យក្លាយជាសមាជិកកិច្ចព្រមព្រៀង CPTPP ដើម្បីពង្រីក​ទីផ្សារ​ឱ្យ​កាន់​ទូលំ​ទូលាយ