នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្ត្រីសុខាភិបាល «អ្នកដឹកនាំសុខាភិបាល ស្ថិតនៅជាប់ជានិច្ចជាមួយមន្រ្តីរបស់ខ្លួន ឈរលើគោលដៅសម្រេចឱ្យបានជោគជ័យក្នុងការបម្រើសេវាជូនប្រជាពលរដ្ឋ និងលើកកិត្តិយសវិជ្ជាជីវៈសុខាភិបាលទាំងមូល»
ផ្សារសមាគមខ្មែរកំពុងស្រូបយកផលិតផលកែច្នៃក្នុងស្រុក គាំទ្រដល់ការរីកចម្រើនរបស់សហគ្រិន
រដ្ឋមន្រ្តីសុខាភិបាល «យុទ្ធសាស្ត្រមួយល្អ លុះត្រាតែយុទ្ធសាស្រ្តនោះត្រូវបានយកទៅអនុវត្តជាក់ស្តែងបាន ដេីម្បីសម្រេចគោលដៅតាមការគ្រោងទុក»
ទូតឥណ្ឌូនេស៊ីកោតសរសើរកម្ពុជា ចំពោះការគ្រប់គ្រងវិស័យព័ត៌មាន និង សោតទស្សន៍

ព័ត៌មានជាតិ

រដ្ឋមន្រ្តីក្រសួងសុខាភិបាល ចុះសួរសុខទុក្ខលើកទឹកចិត្តបុគ្គលិកសុខាភិបាលប្រចាំការ និងពិនិត្យទំនើបកម្មផ្តល់សេវាព្យាបាលវះកាត់នៅមន្ទីរពេទ្យកាល់ម៉ែត

2024/10/04 04:37:05 pm        24
Facebook Telegram Linkin
ភ្នំពេញ ÷ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញឆ្លៀតចុះពិនិត្យការផ្តល់សេវាសុខាភិបាលជូនប្រជាពលរដ្ឋ និងសួរសុខទុក្ខក្រុមគ្រួសារអ្នកជំងឺ ដែលកំពុងព្យាបាលនៅមន្ទីរពេទ្យកាល់ម៉ែត នាថ្ងៃបិណ្ឌធំ នៃពិធីបុណ្យភ្ជុំបិណ្ឌ, កាលពីរសៀលថ្ងៃទី២ ខែតុលា ឆ្នាំ២០២៤។ឯកឧត្តមសាស្រ្តាចារ្យរដ្ឋមន្រ្តី បានអញ្ជើញពិនិត្យការផ្តល់សេវានៅតាមផ្នែកមួយចំនួន នៃមន្ទីរពេទ្យកាល់ម៉ែត ពិសេសផ្នែកវះកាត់ រួមមាន បន្ទប់ដាក់ថ្នាំសណ្តំ បន្ទប់មុនវះកាត់ បន្ទប់ក្រោយវះកាត់ បន្ទប់វះកាត់ផ្នែកពោះ ផ្នែកតំរង់នោម ផ្នែកបាក់បែកឆ្អឹង វះកាត់ភ្នែក និងបន្ទប់វះកាត់ដោយចោះតាមបំពង់ បន្ទប់អន្តរាគមន៍ឆ្លុះសរសៃ ពីរប្លង់ (angiography biplane)។ ដែលក្នុងនោះក៏បានផ្តល់អនុសាសន៍មួយចំនួនដល់មន្រ្តីនៅតាមផ្នែកនីមួយៗ ដើម្បីបង្កើនប្រសិទ្ធភាពក្នុងទំនើបកម្មការងារបន្ថែមទៀត។ក្នុងឱកាសចុះពិនិត្យនេះដែរ ឯកឧត្តមសាស្រ្តាចារ្យរដ្ឋមន្រ្តី បានសួរសុខទុក្ខ និងថ្លែងអំណរគុណដល់ថ្នាក់ដឹកនាំ មន្រ្តីរាជការ បុគ្គលិក នៃមន្ទីរពេទ្យកាល់ម៉ែត ក៏ដូចជាការលើកទឹកចិត្តដល់មន្រ្តីរាជការ បុគ្គលិកសុខាភិបាលទាំងអស់ ដែលកំពុងបំពេញភារកិច្ចរបស់ខ្លួនដោយស្មារតីទទួលខុសត្រូវខ្ពស់ ក្នុងការបម្រើសេវាជូនប្រជាពលរដ្ឋប្រកបដោយគុណភាព ប្រសិទ្ធភាព ស័ក្តិសិទ្ធភាព និងសមធម៌៕ អត្ថបទ រដ្ឋា

សម្តេចតេជោ ហ៊ុន សែន៖ កម្ពុជាចង់ឃើញបងប្អូនកូរ៉េមានទំនាក់ទំនងជាមួយគ្នាល្អឡើងវិញ

2024/10/04 04:07:33 pm        869
Facebook Telegram Linkin
សម្តេចតេជោ ហ៊ុន សែន ប្រមុខរដ្ឋស្តីទី បានថ្លែងថា កម្ពុជាចង់ឃើញបងប្អូនកូរ៉េ មាន​ទំនាក់​ទំនង​ល្អ​នឹងគ្នាឡើងវិញ ហើយកម្ពុជាពេញ​ចិត្ត​ក្នុង​ការ​ចូលរួម​ស្វែង​រក​ដំណោះ​ស្រាយ​សន្តិភាព​ដល់​ប្រទេស​កូរ៉េទាំងពីរផងដែរ។ក្នុងកិច្ចជំនួបពិភាក្សាការងារជាមួយលោក Jang Yun Gon ឯកអគ្គរដ្ឋទូត នៃ​សាធារណ​រដ្ឋ​ប្រជាមា​និត​ប្រជាធិបតេយ្យកូរ៉េប្រចាំកម្ពុជា(កូរ៉េខាងជើង) នាថ្ងៃទី៤ ខែតុលា ឆ្នាំ២០២៤​ នៅ​វិមា​ន​ព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណា​ចក្រ​កម្ពុជាបានលើកឡើងថា កម្ពុជាពិតជាចង់ឃើញ និងចង់បានឱ្យប្រទេសកូរ៉េទាំងពីរ ដែលជាបង​ប្អូន​នឹងគ្នា មានទំនាក់ទំនងល្អជាមួយគ្នាវិញ និងចៀសឱ្យផុតពីការផ្ទុះសង្រ្គាមនៅឧបទ្វីបកូរ៉េ។ នៅ​ចំពោះមុខឯកអគ្គរដ្ឋទូត សម្តេចតេជោក៏បានលើកឡើងផងដែរថា កម្ពុជា​ពេញ​ចិត្ត​ក្នុង​ការ​ចូលរួម​ស្វែងរកដំណោះស្រាយសន្តិភាពដល់ប្រទេសកូរ៉េទាំងពីរ។ ជាមួយគ្នានោះដែរ សម្តេចប្រមុខរដ្ឋស្តីទី ក៏បានស្នើសុំការយោគយល់ពីឯកអគ្គរដ្ឋទូតកូរ៉េខាងជើង ផង​ដែរ ចំពោះការដែលកម្ពុជាត្រូវបង្ខំចិត្តអនុវត្តសេចក្តីសម្រេចចិត្តរបស់ ក្រុម​ប្រឹក្សា​សន្តិសុខ​អង្គការ​សហប្រជាជាតិ ចំពោះទណ្ឌកម្មលើសាធារណរដ្ឋប្រជាមានិតប្រជាធិបតេយ្យកូរ៉េ ដោយ​ព្រះរា​ជា​ណាចក្រកម្ពុជា ជារដ្ឋសមាជិករបស់អង្គការសហប្រជាជាតិ ដូច្នេះកម្ពុជា​ត្រូវ​តែ​បង្ខំ​ចិត្ត​អនុវត្ត​សេចក្តីសម្រេចចិត្តនានារបស់ក្រុមប្រឹក្សាសន្តិសុខអង្គការសហប្រជាជាតិ។ សម្ដេចតេជោ​បាន​មាន​ប្រសាសន៍ថា ទណ្ឌកម្មនោះមិន​ត្រឹមតែ​ប៉ះពា​ល់​ដល់​សាធារណ​រដ្ឋ​ប្រជាមានិត​ប្រជាធិប​តេយ្យ​ប៉ុណ្ណោះនោះទេ ប៉ុន្តែប៉ះពាល់ដល់ប្រទេសនានា រួមទាំងកម្ពុជាផងដែរ។ ចំពោះទំនាក់​ទំនងកូរ៉េខាងជើងជាមួយអាស៊ាន សម្តេចតេជោ បានមានប្រសាសន៍ថា កូរ៉េខាង​ជើង គប្បីប្រើវេទិកាអាស៊ាន ដើម្បីរក្សាទំនាក់ទំនងជាមួយបណ្តាប្រទេសក្នុងអាស៊ាន និង​ការ​ផ្សា​ភ្ជាប់​កូរ៉េ​ខាងជើងជាមួយតំបន់អាស៊ាន។ សម្តេចតេជោ បានបន្តថាកម្ពុជា យល់អំពី​ភាព​ចាំ​បាច់​នៃ​ការ​ការពារខ្លួនរបស់សាធារណរដ្ឋប្រជាមានិតប្រជាធិបតេយ្យកូរ៉េ ក៏ប៉ុន្តែ សូមកុំដាក់​វិធានការ​ដែល​ដើរ​ហួស​ពីភាពចាំបាច់ ដែលនាំឱ្យមានការព្រួយបារម្ភ ដល់ប្រទេសក្នុងតំបន់ និងអាស៊ាន។ថ្លែង​នៅ​ក្នុងកិច្ចជំនួបនោះដែរ លោក Jang Yun Gon ក៏បានថ្លែងអំណរគុណដល់សម្តេចប្រមុខ រដ្ឋស្តីទី ចំពោះការអបអរសាទរខួបលើកទី៧១ នៃថ្ងៃបង្កើត​សាធារណ​រដ្ឋ​ប្រជាមានិត​ប្រជាធិ​បតេយ្យ​កូរ៉េ កាលពីថ្ងៃទី១ខែតុលាកន្លងមក និងខួបលើកទី៦០ នៃទំនាក់ទំនងកា​រទូ​តរ​វា​ង​ប្រទេស​យើង​ទាំង២ផងដែរ។ លោកឯកអគ្គរដ្ឋទូត បានបន្តទៀតថាទំនាក់​ទំនង​ការ​ទូត​រវាង​ប្រទេស​កម្ពុជា និងកូរ៉េខាងជើងអស់រយៈពេល ៦០ឆ្នាំមកនេះ គឺជាទំនាក់ទំនង​ប្រវត្តិសាស្រ្ត​ដែល​បាន​កសាង​ឡើងដោយអតីតប្រមុខរដ្ឋនៃប្រទេសយើងទាំងពីរគឺ ឯកឧត្តម គីម អ៊ីលស៊ុង និង​ព្រះករុណាសម្តេចព្រះបរមរតនកោដ្ឋ។ជាមួយ​គ្នានោះដែរលោកឯកអគ្គរដ្ឋទូតក៏បានគោរពអបអរសាទរសម្តេចអគ្គមហាសេនាបតីតេជោ ដែល បានជាប់ឆ្នោតជ្រើសតាំងជាប្រធានព្រឹទ្ធសភានៃព្រះរាជាណាចក្រកម្ពុជា បន្ទាប់ពីបាន​បំពេញ​ភារកិច្ចជានាយករដ្ឋមន្រ្តីអស់រយៈពេល៣៨ឆ្នាំ និងបានសម្រេច​នូវ​សមិទ្ធផល​ដ៏​មាន​តម្លៃ​ជា​ច្រើន​ដែលមិនអាចកាត់ថ្លៃបាន ជូនប្រជាជន និងប្រទេសកម្ពុជា។ លោកទូត បានបន្តទៀតថា ការផ្លាស់ប្តូរថ្នាក់ដឹកនាំរាជរដ្ឋាភិបាលថ្មី ដែលមានសម្តេចមហាបវរធិបតី ហ៊ុន ម៉ាណែត ជានាយក​រដ្ឋ​មន្រ្តី និងមានគណៈរដ្ឋមន្រ្តីជាយុវជន បានប្រព្រឹត្តទៅយ៉ាងរលូន និងល្អប្រសើរ ដើម្បី​ឆ្លើយ​តប​ទៅ​នឹង​ការវិវត្តនៃស្ថានការណ៍ពិភពលោកនាពេលបច្ចុប្បន្ន។ នៅចំពោះមុខសម្តេចប្រមុខរដ្ឋស្តីទី លោកទូតក៏បានជម្រាបជូនសម្តេចផងដែរថា អស់រយៈពេល ១ឆ្នាំកន្លងមកនេះ តាមការតាមដានយ៉ាងយកចិត្តទុកដាក់របស់លោកផ្ទាល់ លោក​សូម​វាយ​តម្លៃ​ខ្ពស់​ចំពោះ រាជរដ្ឋាភិបាលនីតិកាលទី ៧នៃរដ្ឋសភា ដែលដឹកនាំដោយ សម្តេចមហាបវរធិបតី ហ៊ុន ម៉ាណែត បានយកអស់កម្លាំងកាយចិត្ត ដាក់ចេញនូវវិធានការ យុទ្ធសាស្រ្ត គម្រោងអភិវឌ្ឍន៍ និង​គោលនយោបាយជាច្រើនដែលទទួលបានលទ្ធផលជាផ្លែផ្កា និងជាពិសេស​គឺ​ធានា​បាន​នូវ​សន្តិភាព សុវត្ថិភាព ស្ថិរភាពសេដ្ឋកិច្ច និងការអភិវឌ្ឍសម្រាប់ប្រទេសកម្ពុជា៕ អត្ថបទ៖ បាន ចក់

កម្ពុជាស្នើដល់ក្រុមហ៊ុនធំៗនៅអាមេរិក ពិនិត្យលទ្ធភាព ក្នុងការបណ្តាក់ទុនវិនិយោគនៅកម្ពុជា

2024/10/04 02:53:49 pm        740
Facebook Telegram Linkin
កម្ពុជាស្នើដល់ក្រុមហ៊ុនធំៗនៅអាមេរិក ពិនិត្យលទ្ធភាព ក្នុងការបណ្តាក់ទុនវិនិយោគនៅកម្ពុជា លើវិស័យថាមពល វិស័យ សុខាភិបាល និងការដាក់លក់ផលិតផលកម្ពុជា នៅលើថ្នាលពាណិជ្ជកម្មតាមប្រព័ន្ធអេឡិចត្រូនិច។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១ ខែ តុលា ឆ្នាំ ២០២៤ បានជួបពិភាក្សារការងារជាមួយវិស័យឯកជនចំនួន៣ស្ថាប័ន លើវិស័យថាមពល, វិស័យពាណិជ្ជកម្មអេឡិចត្រូនិច (E-Commerce), និងសុខាភិបាល នៅវ៉ាស៊ីនតោនឌីស៊ី ដើម្បីផ្សព្វផ្សាយនិងពន្យល់ លម្អិតអំពីបរិយាកាសវិនិយោគនៅកម្ពុជា កញ្ចប់លើកទឹកចិត្តនានា និងកិច្ចសម្របសម្រួលវិនិយោគពីក្រុមប្រឹក្សាអភិវឌ្ឍន៍កម្ពុជា។ ក្នុងជំនួបនោះដែរ ឯកឧត្តមឧបនាយករដ្ឋមន្ត្រី និងគណៈប្រតិភូបានជម្រាបជូនអំពីព័ត៌មានជាសក្តានុពលសម្រាប់កិច្ចការងារ វិនិយោគនៅកម្ពុជា ដោយក្នុងនោះគណៈប្រតិភូកម្ពុជាបានស្នើក្រុមហ៊ុនឱ្យពិនិត្យលទ្ធភាព ក្នុងការបណ្តាក់ទុនវិនិយោគរបស់ខ្លួន នៅកម្ពុជា លើវិស័យថាមពល វិស័យសុខាភិបាល និងការដាក់លក់ផលិតផលកម្ពុជានៅលើថ្នាលពាណិជ្ជកម្មតាមប្រព័ន្ធអេឡិចត្រូនិច ដែលជាមុខសញ្ញាវិនិយោគរបស់ក្រុមហ៊ុនផងដែរ។សូមបញ្ជាក់ថា នៅក្នុងថ្ងៃដ៏ដែលនេះដែរ, ឯកឧត្តម ស៊ុន ចាន់ថុល បានជួបពិភាក្សាការងារ ជាមួយឯកឧត្តម Daleep Singh ទីប្រឹក្សារងសន្តិសុខជាតិផ្នែកសេដ្ឋកិច្ចអន្តរជាតិរបស់សហរដ្ឋអាម៉េរិក ក្នុងនោះបានជូនអំពីកិច្ចសហប្រតិបត្តិការជាផ្លែផ្កា រវាងប្រទេស ទាំងពីរកន្លងមក និងបន្តបង្ហាញពីកាលានុវត្តភាព និងសក្តានុពលវិនិយោគនៅកម្ពុជា ដែលផ្ដល់លទ្ធភាពដល់ក្រុមហ៊ុនឯកជនរបស់ សហរដ្ឋអាម៉េរិក អាចមកបណ្តាក់ទុនវិនិយោគនៅកម្ពុជាបន្ថែមទៀត។ ជាការឆ្លើយតប, ឯកឧត្តម Daleep Singh បានវាយតម្លៃខ្ពស់និងកោតសរសើរ ចំពោះកិច្ចខិតខំរបស់រាជរដ្ឋាភិបាលកម្ពុជា លើការ អភិវឌ្ឍសេដ្ឋកិច្ចជាតិ ក្រោមការដឹកនាំរបស់សម្តេចធិបតីនាយករដ្ឋមន្ត្រី ដោយក្នុងនោះ ភាគីទាំងពីរបានបង្ហាញឆន្ទៈនឹងពង្រឹងទំនាក់ ទំនង និងបង្កើនកិច្ចសហប្រតិបត្តិការរវាងប្រទេសទាំងពីរ តាមរយៈសកម្មភាពពាណិជ្ជកម្ម និងការវិនិយោគផងដែរ។ដោយឡែកក្នុងជំនួបជាមួយលោក Scott Nathan នាយកប្រតិបត្តិនៃសាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិសហរដ្ឋអាម៉េរិក (DFC) វិញ, ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានជម្រាបជូនអំពីវឌ្ឍនភាពថ្មីៗនៃការរីកចម្រើនរបស់កម្ពុជា ក្រោម សុខសន្តិភាព ដែលអាចអនុញ្ញាតឱ្យគណៈប្រតិភូកម្ពុជាបំពេញទស្សនកិច្ចទាក់ទាញ និងជំរុញវិនិយោគនៅសហរដ្ឋអាម៉េរិកផងដែរ។ បន្ថែមពីនេះ ឯកឧត្តមឧបនាយករដ្ឋមន្ត្រី បានលើកឡើងផងដែរអំពីវឌ្ឍនភាពរបស់កម្ពុជា ក្នុងវិស័យមួយចំនួនមានជាអាទិ៍៖ ហេដ្ឋារចនាសម្ព័ន្ធ កសិកម្ម សុខាភិបាល និងសុខុមាលភាពប្រជាជន ដែលមានការប្រសើរឡើងគួរឱ្យកត់សម្គាល់ ដោយក្នុងនោះ រាជរដ្ឋាភិបាលនៅតែបន្តពង្រឹង និងពង្រីកផលិតភាពឱ្យបានកាន់តែល្អប្រសើរ។ តាមរយៈជំនួបនានេះ លោក Scott Nathan បាន បង្ហាញនូវសុទិដ្ឋិនិយមខ្ពស់ នឹងចូលរួមបង្កើនសកម្មភាពប្រតិបត្តិការរបស់ខ្លួន នៅក្នុងប្រទេសកម្ពុជាឱ្យបានកាន់តែច្រើនជាងមុន ជាពិសេសលើវិស័យជាអាទិភាពរបស់រាជរដ្ឋាភិបាលកម្ពុជា៕ អត្ថបទ៖ សុន រ៉ាឌី,

អ្នកនាំពាក្យ៖ ភ្ជុំ៣ថ្ងៃ ស្ថានភាពសន្តិសុខមានភាពល្អប្រសើរ ពលរដ្ឋធ្វើបុណ្យ និងដើរកម្សាន្ត​ដោយភាពរីករាយ

2024/10/04 01:02:30 pm        280
Facebook Telegram Linkin
ឧត្តមសេនីយ៍ឯក ឆាយ គឹមឃឿន អ្នកនាំពាក្យអគ្គស្នងការនគរបាលជាតិ បានថ្លែងថា ពិធី​បុណ្យ​ភ្ជុំ​បិណ្ឌរយៈពេល៣ថ្ងៃ គឺចាប់ពីថ្ងៃទី១ ដល់ទី៣ ខែតុលា ឆ្នាំ២០២៤ ស្ថានភាព​សន្តិសុខ​សណ្ដាប់​ធ្នាប់​សាធារណៈ មានភាពល្អប្រសើរ ដោយប្រជាពលរដ្ឋបានទៅធ្វើបុណ្យនៅតាមវត្តអារាម ឬទី​សក្ការ​បូជានានា និងដើរកម្សាន្តតាមរមណីយដ្ឋានផ្សេងៗ ប្រកបដោយភាពសប្បាយរីករាយ និង​សន្តិសុខល្អ ។ថ្លែងប្រាប់ BTV នៅថ្ងៃទី៤ ខែតុលា ឆ្នាំ២០២៤ លោកឧត្តមសេនីយ៍ឯក មានប្រសាសន៍ថា ថ្ងៃ​ពិធី​បុណ្យ​ភ្ជុំបិណ្ឌ ប្រជាពលរដ្ឋបានធ្វើដំណើរទៅស្រុកកំណើតជួបជុំគ្រួសារ ការនាំយក​ចង្ហាន់​ទេយ្យ​ទាន​ទៅប្រគេនព្រះសង្ឃ នៅតាមវត្តអារាម ឬតាមទីបូជនីយដ្ឋានផ្សេងៗ ក្រោមបរិយាកាស​កក់ក្ដៅ។អ្នកនាំពាក្យអគ្គស្នងការនគរបាលជាតិ បានបន្តថា ជាពិសេសភ្ញៀវទេសចរណ៍ជាតិ និងអន្តរជាតិ ដើរ​លេងកម្សាន្តនៅតំបន់រមណីយដ្ឋាននៅទូទាំងប្រទេស នៅប្រមាណជាង ១ពាន់គោលដៅ ប្រក​ប​ដោយការសប្បាយរីករាយ គ្មានអ្វីជាការព្រួយបារម្ភ ចំពោះបញ្ហាអសន្តិសុខនោះទេ។ឧត្តម​សេនីយ៍ឯក ឆាយ គឹមឃឿន បានបន្ថែមថា ចំពោះបញ្ហាគ្រោះថ្នាក់ចរាចរណ៍ មាន​ការ​ថយ​ចុះ​ចំនួន ២៤លើក ស្មើនឹង ៤១ភាគរយ ខណៈឆ្នាំនេះកើតឡើង ៣៤លើក ហើយឆ្នាំមុន​កើត​ឡើង ៥៨លើក តែគួរឲ្យសោកស្ដាយអ្នកស្លាប់ឆ្នាំនេះមានរហូតដល់ ៣០នាក់ កើនឡើងចំនួន ៨នាក់ បើធៀបនឹងឆ្នាំមុន៕ អត្ថបទ៖ បាន សុខរិទ្ធិ 

សម្តេច ម៉ែន សំអន អញ្ជើញដឹកនាំកិច្ចប្រជុំគណៈកម្មការរៀបចំ​អង្គកឋិនទានដង្ហែ​ទៅកាន់វត្តខ្មែរក្រោម

2024/10/04 12:53:53 pm        206
Facebook Telegram Linkin
សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញ ជា​អធិបតី​ដឹកនាំ​កិច្ចប្រជុំគណ:កម្មការរៀបចំអង្គកឋិនទានដង្ហែទៅកាន់វត្តខ្មែរក្រោម នាព្រឹកថ្ងៃទី៤ ខែតុលា ឆ្នាំ២០២៤។ថ្លែងក្នុងឱកាសនោះ សម្តេចកិត្តិសង្គហបណ្ឌិតបានមានប្រសាសន៍ថា ដោយទទួលបានការ ចាត់តាំងពី សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងសម្តេចមហា បវរធិបតី ហ៊ុន ម៉ាណែត នាយករដ្ឋមន្ត្រី ទើបរាជរដ្ឋាភិបាលបានចេញសេចក្តីសម្រេចលេខ ១៩៤ សសរ ស្តីពីការបង្កើតគណៈកម្មការរៀបចំអង្គកឋិនទានដង្ហែទៅកាន់វត្តខ្មែក្រោម ចុះថ្ងៃទី ០២ ខែតុលា ឆ្នាំ ២០២៤។បន្ទាប់ពីទទួលបានសេចក្តីសម្រេច សម្តេចកិត្តិសង្គហបណ្ឌិត ក៏បានសម្រេចបង្កើត អនុគណៈ​កម្មការ មួយចំនួន ចំណុះឲ្យគណ:កម្មការរៀបចំអង្គកឋិនទានដង្ហែទៅកាន់វត្តខ្មែរក្រោម និងបាន​ផ្តាំ​ផ្ញើដល់ ឯកឧត្តម លោកជំទាវ លោក លោកស្រីដែល ជាសមាជិក សមាជិកាទាំង​ក្នុង​គណៈ​កម្មការ និងអនុគណៈកម្មការត្រូវបន្តយកចិត្តទុកដាក់ខ្ពស់អនុវត្ត តាមតួនាទីភារកិច្ចរបស់ខ្លួន ដើម្បី​ឲ្យ​​អង្គកឋិនទាននេះដំណើរការទៅបានដោយរលូន និងទទួលបានជោគជ័យស្របតាម ទំនៀម​ទម្លាប់ប្រពៃណីព្រះពុទ្ធសាសនា៕

ភ្ជុំបិណ្ឌ៣ថ្ងៃ គ្រោះថ្នាក់ចរាចរណ៍បណ្ដាលឱ្យមនុស្សស្លាប់៣០នាក់ របួសធ្ងន់ស្រាល៥០នាក់

2024/10/04 12:45:32 pm        319
Facebook Telegram Linkin
ភ្នំពេញ៖ ពិធីបុណ្យភ្ជុំបិណ្ឌរយៈពេល៣ថ្ងៃ គឺចាប់ពីថ្ងៃទី១ ដល់ទី៣ ខែតុលា ឆ្នាំ២០២៤ មានគ្រោះថ្នាក់ចរាចរណ៍នៅទូទាំងប្រទេស បានកើតឡើងចំនួនជាង ៣០លើក ហើយបណ្ដាលឲ្យមានមនុស្សស្លាប់ចំនួន ៣០នាក់ កើនឡើងចំនួន ៨នាក់ និងរបួសធ្ងន់ស្រាល់ចំនួន ៥០នាក់ ។យោងតាមរបាយការណ៍ របស់អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី១ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌថ្ងៃទី១ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១៣លើក បណ្ដាលឲ្យមនុស្សស្លាប់៩នាក់ និងរបួសធ្ងន់ស្រាល២២នាក់ មូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍ រួមមានបើកបរក្នុងល្បឿនលឿន, មិនគោរពសិទិ្ធ ប្រជែងក្នុងស្ថានភាពគ្រោះថ្នាក់ និងស្រវឹង ។នៅថ្ងៃទី២ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌថ្ងៃទី២ (ភ្ជុំធំ) គឺមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ១៥លើក បណ្ដាលឲ្យមនុស្សស្លាប់១៧នាក់ និងរបួស១៩នាក់ ហើយមូលហេតុដែលបណ្ដាលឲ្យកើតមានគ្រោះថ្នាក់ចរាចរណ៍ រួមមានបើកបរក្នុងល្បឿនលឿន មិនគោរពសិទិ្ធ និងប្រជែងក្នុងស្ថានភាពគ្រោះថ្នាក់ ។ចំណែកនៅថ្ងៃទី៣ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌចុងក្រោយ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៦លើក បណ្ដាលឲ្យមនុស្សស្លាប់ ៤នាក់ និងរបួស៩នាក់ ហើយមូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍ រួមមានបើកបរក្នុងល្បឿនលឿន មិនគោរពសិទិ្ធ និងប្រជែងក្នុងស្ថានភាពគ្រោះថ្នាក់ ។គួរបញ្ជាក់ថា គ្រោះថ្នាក់ចរាចរណ៍ នៅទូទាំងប្រទេស ក្នុងរយៈពេល ៣ថ្ងៃ នៃពិធីបុណ្យភ្ជុំបិណ្ឌ គិតចាប់ពីថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣ បានកើតឡើងចំនួន ៥៨លើក បណ្តាលឱ្យស្លាប់ ២២នាក់ និងរបួស៧៩នាក់ ៕ អត្ថបទ បាន សុខរិទ្ធិ 

ពលរដ្ឋអរគុណរដ្ឋាភិបាល ចំពោះការផ្តល់រថយន្តក្រុងដោយមិនគិតថ្លៃក្នុងឱកាសភ្ជុំបិណ្ឌ

2024/10/04 12:38:28 pm        199
Facebook Telegram Linkin
ក្រុមប្រជាពលរដ្ឋដែលបានប្រើប្រាស់រថយន្តក្រុងឥតគិតថ្លៃ ក្នុងឱកាសបុណ្យភ្ជុំបិណ្ឌ បាន​បង្ហាញ​នូវ​អារម្មណ៍សប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដែលបានផ្ដល់ រថយន្តក្រុងជិះទៅ-មក ដោយឥតគិតថ្លៃ ដែលជួយ​កាត់​បន្ថយការចំណាយយ៉ាងច្រើនក្នុងសេដ្ឋកិច្ចគ្រួសារ។ជួបសម្ភាសន៍ជា​មួយប្រជាពលរដ្ឋដែលចាកចេញពីខេត្តព្រះសីហនុ និងទើបមកដល់រាជ​ធានី​ភ្នំពេញ នៅព្រឹកថ្ងៃទី៤ ខែតុលានេះ ពលរដ្ឋបានលើកឡើងថា ពួកគាត់ពិត​ជា​មាន​អារម្មណ៍​រំភើប​សប្បាយ​ចិត្តណាស់ ដោយសារបានជិះរថយន្តក្រុងដ៏ល្អប្រកបដោយផាសុកភាព និងសុវត្ថិភាព​របស់​រាជរដ្ឋាភិបាល ជាពិសេសផ្តល់ជូនដោយមិនគិតថ្លៃអ្វីទាំងអស់ ដោយគ្មាន​លក្ខ​ខណ្ឌ​សម្រាប់​ប្រជា​ពលរដ្ឋទូទាំងប្រទេស ហើយពិសេស​ឆ្នាំ​នេះ​ថែម​ទាំង​មាន​ការ​ផ្ដល់​ជូន​ទឹក​បរិសុទ្ធ​ពិសារ​ដោយ​មិន​គិតថ្លៃទៀតផង។ក្រុមប្រជាពលរដ្ឋ បាននិយាយឲ្យដឹងទៀតថា ពួកគាត់មិននឹកស្មានទេថា ការជិះរថយន្ត​ក្រុង​ដោយ​មិន​បង់ថ្លៃនេះ ពិតជាមានភាពងាយស្រួល ត្រជាក់ និងមានសុវត្ថិភាពថែមទៀតទាំងទៅ និងមក ដែលជួយកាត់បន្ថយដល់ការចំណាយយ៉ាងច្រើន ខណៈ​កាល​មិន​ទាន់​បាន​ប្រើប្រាស់​រថយន្ត​សាធារណៈនេះ យ៉ាងហោចណាស់ក្នុងគ្រួសារដែលមានមនុស្សចំនួន ៤នាក់ ត្រូវ​ចំណាយ​ប្រាក់​ប្រមាណ ២០ម៉ឺនរៀល ដើម្បីធ្វើដំណើរចេញពីខេត្តព្រះសីហនុ ត្រឡប់ចូលរាជ​ធានី​ភ្នំពេញ​វិញ​។លោក ឡៅ អូគីម អ្នកបើកបរ នៃរដ្ឋាករស្វយ័តដឹកជញ្ជូនសាធារណៈរថយន្តក្រុង ប្រចាំស្ថានីយ​រថយន្ត​ក្រុង ២០០៤ បានឲ្យដឹងដែរថា សម្រាប់ព្រឹកនេះរថយន្ត​ក្រុង​ដែល​រង់​ចាំ​ដឹក​ជញ្ជូន​ប្រជា​ពលរដ្ឋ​ពី​ខេត្តព្រះសីហនុ មករាជធានីភ្នំពេញ មានចំនួនជិត ២០គ្រឿង។ លោកបានបន្តថា នេះជាការ​គិតគូរដ៏ខ្ពង់ខ្ពស់ ដែលមានចាប់ពីសម្ដេចតេជោ ហ៊ុន សែន និងបន្តដោយសម្ដេចធិបតី ហ៊ុន ម៉ាណែត ដែលតែងតែគិតគូរសុខទុក្ខដល់ប្រជាពលរដ្ឋគ្រប់ស្រទាប់វណ្ណៈ ដោយបា​ន​ផ្ដល់​នូវ​រថយន្ត​ក្រុងជិះដោយមិនបង់ប្រាក់ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ កម្មករ​និយោជិត និងកាត់បន្ថយចំណាយក្នុងការធ្វើដំណើរទៅស្រុកកំណើត។សូមបញ្ជាក់ថា ក្នុងឱកាសបុណ្យភ្ជុំបិណ្ឌឆ្នាំនេះ រាជរដ្ឋាភិបាលកម្ពុជា តាមរយៈរដ្ឋបាល​រាជ​ធានី​ភ្នំពេញ បានរៀបចំរថយន្តក្រុងចំនួន ៦៥៣ គ្រឿង សម្រាប់ដឹកជញ្ជូនប្រជាពលរដ្ឋ ក្នុងគោល​បំណង​ដើ​ម្បីសម្រួល និងសម្រាលបន្ទុក​ក្នុង​ការ​ធ្វើដំណើរ​ទៅ​កាន់​ស្រុក​កំណើត​នៅ​ទូទាំង​ប្រទេស​។ សកម្មភាពដឹកជញ្ជូនទាំងនេះ គឺមានរយៈពេល ៦ថ្ងៃ ចាប់ពីថ្ងៃទី២៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៤៕ អត្ថបទ៖ ឈិត បូរ៉ាវី 

ក្រសួងវប្បធម៌នឹងរៀបចំមហោស្រពជាតិសិល្បៈសូនរូបនិងសិល្បៈសិប្បកម្មស្តីពីគំនូរឌីជីថល

2024/10/04 12:22:04 pm        302
Facebook Telegram Linkin
ក្រសួងវប្បធម៌ និងវិចិត្រសិល្បៈ នឹងរៀបចំមហោស្រពជាតិសិល្បៈសូនរូបនិងសិល្បៈសិប្បកម្ម ស្តីពីគំនូរឌីជីថល ក្រោមប្រធានបទ សម្រស់មាតុភូមិកម្ពុជាក្នុងសម័យសន្តិភាព រយៈពេល៣ថ្ងៃ នាខែធ្នូ ឆ្នាំ២០២៤ខាងមុខនេះ។បើតាមលោក ហ៊ួន សាវង ប្រធានស្តីទីនាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ ថ្លែងប្រាប់BTV ព័ត៌មាននាព្រឹកថ្ងៃទី៤ ខែតុលា ឆ្នាំ២០២៤នេះថា មហោស្រពជាតិសិល្បៈសូនរូបនិងសិល្បៈសិប្បកម្ម ស្តីពីគំនូរឌីជីថល ក្រោមប្រធានបទ សម្រស់មាតុភូមិកម្ពុជាក្នុងសម័យសន្តិភាព ប្រារព្ធឡើងក្នុងគោលបំណងបំផុសស្មារតីយុវជន ចូលរួមប្រឡងប្រជែងរចនាគំនូរបែបឌីជីថល ដើម្បីផ្សព្វផ្សាយអំពីសម្រស់នៃភាពរីកចម្រើនមាតុភូមិកម្ពុជា ក្នុងសម័យសន្តិភាព ដោយប្រើប្រាស់បច្ចេកវិទ្យា ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ដំណាក់កាលទី១។ ក្នុងឱកាសនោះក្រសួង នឹងតាំងបង្ហាញស្នាដៃសិល្បៈសូនរូប និងផលិតផលសិប្បកម្ម ពីតាមបណ្តាអង្គការ សមាគម និងសហគមន៍នានា ព្រមទាំងរៀបចំកម្មវិធីស្វែងយល់អំពី មូលដ្ឋានគ្រឹះសិល្បៈសូនរូប និងសិល្បៈសិប្បកម្ម និងកម្មវិធីផ្សព្វផ្សាយសិល្បៈវប្បធម៌។លោក ហ៊ួន សាវង ប្រធានស្តីទីនាយកដ្ឋានសិល្បៈសូនរូប និងសិល្បៈសិប្បកម្ម...ហើយជាគោលបំណងនៃការរៀបចំមហោស្រពហាក់បីដូចជាប្លែកជាងឆ្នាំមុនៗកន្លងមក ដោយសារតែយើងទាំងអស់គ្នាបានដឹងហើយ ផ្អែកតាមយុទ្ធសាស្រ្តបញ្ចកោណរបស់រាជរដ្ឋាភិបាលដំណាក់កាលទី១នេះ ផ្តោតទៅលើបច្ចេកវិទ្យា ម្លោះហើយបានជាក្រុមការងារក្រសួង ជាពិសេសនាយកដ្ឋានសិល្បៈសូនរូប និងសិល្បៈសិប្បកម្ម បានសម្រេចរៀបចំមហោស្រពនេះ ជា២ទម្រង់ ដោយរបៀបទី១.គំនូរឌីជីថល(មួយបែប)។ ដោយឡែករបៀបទី២. ដោយសារតែសង្កេតឃើញទេពកោសល្យរបស់យុវជនសម័យនេះ មានទេពកោសល្យផ្នែកឌីជីថលនេះច្រើន ជាពិសេសគឺមានការលេចធ្លោ នៅក្នុងស្រទាប់ទីផ្សាររបស់ស្នាដៃឌីជីថលសំបូរបែបផងដែរ ដូចជា៖ ស្នាដៃខ្លះបានចូលប្រឡូកក្នុងឆាកអន្តរជាតិជាដើម ឬក៏ជាការប្រកួតប្រជែង និងជាការផ្សព្វផ្សាយជាសាធារណៈទាំងក្នុងប្រទេស និងក្រៅប្រទេស។លោក ហ៊ួន សាវង បន្តថា ខ្លឹមសារគំនូរស្នាដៃប្រឡងប្រជែងត្រូវរចនាជាគំនូរឌីជីថល ក្រោមប្រធានបទ សម្រស់មាតុភូមិកម្ពុជាក្នុងសម័យសន្តិភាព បង្ហាញឱ្យឃើញពីការអភិវឌ្ឍរីកចម្រើនរបស់ប្រទេសកម្ពុជាដូចជា ទេសភាពតំបន់បេតិកភណ្ឌវប្បធម៌ តំបន់ប្រវត្តិសាស្ត្រ តំបន់ទេសចរណ៍ធម្មជាតិ និងតំបន់ឆ្នេរសមុទ្រជាដើម ដែលមានអត្ថន័យឆ្លុះបញ្ចាំងពីសម្រស់ដ៏ត្រកាលនៃមាតុភូមិ និងជីវភាពរស់នៅយ៉ាងសុខដុមរមនារបស់ប្រជាពលរដ្ឋក្នុងសម័យសន្តិភាព។ ស្នាដៃទាំងនោះត្រូវតែជា ប្រភេទស្នាដៃសិល្បៈច្នៃប្រតិដ្ឋបែបគំនូរឌីជីថល មិនធ្លាប់ចូលរួមប្រកួតប្រជែង ឬដាក់តាំងបង្ហាញជាសាធារណៈ។ ចំណែកលក្ខខណ្ឌចូលរួម បេក្ខជន បេក្ខនារី ដែលមានបំណងដាក់ស្នាដៃប្រឡងប្រជែងត្រូវបំពេញលក្ខខណ្ឌដូចខាងក្រោម៖ -ពាក្យសុំចូលរួមប្រឡងប្រជែងស្នាដៃ ចំនួន ១ច្បាប់ -ប្រវត្តិរូបសង្ខេប ចំនួន ១ច្បាប់ -រូបថត ៤ x ៦ (ថតថ្មី ផ្ទៃពណ៌ស) ចំនួន ២សន្លឹក -អត្តសញ្ញាណប័ណ្ណសញ្ជាតិខ្មែរថតចម្លង ចំនួន ១ច្បាប់ ដាក់ពាក្យ និងទទួលស្នាដៃប្រឡងប្រជែង ចាប់ផ្តើមទទួលពាក្យ និងស្នាដៃប្រឡងប្រជែងពីថ្ងៃជូនដំណឹងនេះ ព័ត៌មានលម្អិត សូមទំនាក់ទំនងមក នាយកដ្ឋានសិល្បៈសូនរូប និងសិល្បៈសិប្បកម្ម នៅទីស្តីការក្រសួងវប្បធម៌និងវិចិត្រសិល្បៈ តាមរយៈលោកស្រី អ៊ុក សូលីដានី ទូរស័ព្ទលេខ០១២ ៦១៦ ៥៤៥ (Telegram) និង លោកស្រី ចាន់ ធារី ទូរស័ព្ទលេខ០៧០ ៣៩៥ ០៧៧ (Telegram) ឬសួរព័ត៌មាននៅតាមមន្ទីរវប្បធម៌និងវិចិត្រសិល្បៈរាជធានី-ខេត្ត។ ក្រសួងវប្បធម៌ និងវិចិត្រសិល្បៈសង្ឃឹមថា សាធារណជន លោក-លោកស្រី សិល្បករ សិប្បករ សិស្ស និស្សិត តំណាងអង្គការ-សមាគមធ្វើការក្នុងវិស័យសិល្បៈសូនរូប និងសិល្បៈសិប្បកម្ម នឹងចូលរួមក្នុងសកម្មភាពមហោស្រពជាតិសិល្បៈសូនរូប និងសិល្បៈសិប្បកម្មនាពេលខាងមុខបានច្រើនកុះករ ដើម្បីរួមគ្នាបន្តលើកស្ទួយ និងអភិវឌ្ឍន៍ សិល្បៈវប្បធម៌ជាតិឱ្យកាន់តែរុងរឿងថ្កុំថ្កើង៕ អត្ថបទ រដ្ឋា 

បញ្ជាការដ្ឋានកងទ័ពជើងទឹកត្រៀមកីឡាករជិត១០០នាក់ និងទូកខ្នាតធំ២គ្រឿងចូលរួមប្រកួតថ្ងៃបុណ្យអុំទូក

2024/10/04 11:50:01 am        212
Facebook Telegram Linkin
ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាអគ្គលេខាធិការរង​នៃ​គណៈកម្មាធិការ​ជាតិ​សន្តិសុខលម្ហសមុទ្រ នៅព្រឹកថ្ងៃទី៤ ខែតុលា ឆ្នាំ២០២៤នេះ បានចុះ​សំណេះសំណាល និងសួរសុខទុក្ខ ដល់ក្រុមកីឡាករទូក«ង»កងទ័ពជើងទឹក ដែលកំពុង​ហ្វឹកហ្វឺន​ត្រៀម​ចូល​រួមប្រកួត នៅក្នុងឱកាសព្រះរាជ ពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនាពេលខាងមុខន។បើតាមឧត្តមនាវីឯក ទៀ សុខា បានឲ្យដឹងថា បញ្ជាការដ្ឋានកងទ័ពជើងទឹកបានត្រៀមកីឡាករ ដែល​ជានាវឹកចំនួន៩០នាក់ និងទូកខ្នាតធំចំនួន២គ្រឿង សម្រាប់ចូលរួមប្រកួតប្រជែង ខណៈ​បុណ្យ​អុំទូក ឆ្នាំ២០២៤នេះត្រូវបានរាជរដ្ឋាភិបាលប្រកាសថា នឹងធ្វើ​ជា​លក្ខណៈ​ទ្រង់​ទ្រាយ​ធំ​នោះ​។នៅក្នុងពិធីសំណេះសំណាលនោះដែរ ឧត្តមនាវីឯក ទៀ សុខា ក៏បានលើកទឹកចិត្ត និងណែនាំ ដល់​បងប្អូនកីឡាករទាំងអស់ត្រូវខិតខំធ្វើការហ្វឹកហាត់ និងថែរក្សា​សុខភាព​ដើម្បី​ចូល​រួម​ការ​ប្រកួត ដើម្បីយកជ័យជម្នះ និងរង្វាន់ក្នុងឱកាសបុណ្យអុំទូកនាពេលខាងមុខនេះផងដែរ។ក្នុងឱកាសដឹកនាំកិច្ចប្រជុំគណៈរដ្ឋមន្រ្តីកាលពីកន្លងទៅថ្មីៗនេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រកាសថា ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅ​ឆ្នាំ២០២៤នេះ នឹងប្រារព្ធធ្វើជាលក្ខណៈទ្រង់ទ្រាយធំ។ នៅក្នុង​កិច្ច​ប្រជុំ​សម្តេច​ធិបតី​នាយករដ្ឋ​មន្រ្តី​ក៏បានណែនាំឱ្យគណៈកម្មាធិការជាតិរៀបចំបុណ្យជាតិ-អន្តរជាតិ និងក្រសួង ស្ថាប័ន​ពាក់ព័ន្ធ ជាពិសេសក្រសួងទេសចរណ៍ និងវិស័យឯកជន សហការ​រៀបចំ​ឱ្យ​បាន​ល្អដើ​ម្បី​ទាក់​ទាញ​ទេសចរជាតិ និងអន្តរជាតិ៕ អត្ថបទបាន ចក់

ភ្ញៀវទេសចរជាតិបានមកកម្សាន្តនៅតាមរមណីយដ្ឋានធម្មជាតិខេត្តកំពង់ឆ្នាំង ជាង២៥ម៉ឺននាក់ ក្នុងឱកាសភ្ជុំបិណ្ឌ

2024/10/04 11:41:43 am        180
Facebook Telegram Linkin
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបញ្ជាក់នៅរសៀលថ្ងៃទី០៣ ខែតុលា ឆ្នាំ​២០២៤ថា ភ្ញៀវទេសចរជាតិ-អន្តរជាតិមកលេងកម្សាន្តនៅក្នុងខេត្តកំពង់ឆ្នាំង នារដូវបុណ្យ​ភ្ជុំ​បិណ្ឌ​​​​ឆ្នាំ​២០២៤នេះ មានប្រមាណជាង២៥ម៉ឺននាក់។ ការមកលេងច្រើនបែបនេះបញ្ជាក់ថា ប្រជា​ពលរដ្ឋ​បានជឿជាក់លើគោលនយោបាយរបស់រាជរដ្ឋាភិបាល ដែលបានថែរក្សាសុខសន្តិភាព និង​សណ្តាប់​ធ្នាប់បានល្អ ។ឯកឧត្តម ស៊ុន សុវណ្ណារិទ្ធិ បានបន្តអោយដឹងថា ដោយសាររាជរដ្ឋាភិបាលកម្ពុជា​ដឹកនាំ​ដោយ​សម្តេច​ធិបតី ហ៊ុន ម៉ាណែត នាយករដ្ឋមន្ត្រី បានធ្វើអោយប្រទេសមានសុខសន្តិភាពពេញបរិបូណ៌ រីក​ចម្រើនលើគ្រប់វិស័យ ជាពិសេសលើវិស័យទេសចរណ៍តែម្តង។ ខេត្តកំពង់ឆ្នាំងនៅ​ក្នុ​ង​ឆ្នាំ​២០២៤​នេះ មានបងប្អូនប្រជាពលរដ្ឋមកលេងកម្សាន្ត​នៅស្រុកកំណើត ក៏ដូចជា​បង​ប្អូន​ភ្ញៀវ​ទេសចរ​មកកម្សាន្តនៅតាមរមណីយដ្ឋានធម្មជាតិនានា មានចំនួន​កើន​ឡើង​គួរ​អោយ​កត់​សម្គាល់​។ នៅរមណីយដ្ឋានធម្មជាតិគង្គា ស្ថិតក្នុងស្រុករលាប្អៀរ ខេត្តកំពង់ឆ្នាំងវិញ ភ្ញៀវទេសចរ​ជាតិ​បាន​ទៅ​លេងកម្សាន្ត​ច្រើនកុះករនៅក្នុងរដូវបុណ្យភ្ជុំបិណ្ឌឆ្នាំនេះដែរ ដោយឡែក​នៅ​តាម​បណ្តា​រមណីយ​ដ្ឋាន​នានាផ្សេងទៀតនៅក្នុងខេត្តកំពង់ឆ្នាំង មានភ្ញៀវ​កើន​ឡើង​គួរ​អោយ​កត់​សម្គាល់​រហូត​ខេត្ត​កំពង់ឆ្នាំង ទទួលភ្ញៀវបានជាង២៥ម៉ឺននាក់។ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង​បានអំពាវនាវ​ដល់​បង​ប្អូន​ប្រជា​ពលរដ្ឋ​ដែលកំ​ពុង​ប្រើប្រាស់ផ្លូវទាំងអស់ សូមចូលរួមគោរពច្បាប់ចរាចរណ៍អោយបានខ្ជាប់ខ្ជួន បើទោះ​បី​ប្រើ​ប្រាស់​នូ​​វមធ្យោបាយធ្វើដំណើរបែបណាក៏ដោយ។ ម្យ៉ាងវិញទៀត សូមធ្វើដំណើរ​ប្រកប​ដោយ​ក្តី​រីករាយ​នៅគ្រ​ប់ក្រុមគ្រួសារ បងប្អូន ញាតិមិត្ត ៕ កាំង ហុង វាស្នា 

បណ្ដាញសង្គម

ព័ត៌មានថ្មីៗ

លោកTrump ដកសហរដ្ឋអាមេរិកចេញពីអង្គការយូណេស្កូម្តងទៀតនិងរិះគន់របៀបវារៈ«ដ៏គួរឲ្យភ្ញាក់ផ្អើល»
07/23/2025 09:07 AM
Facebook Telegram Linkin
ចិន៖ កិច្ចប្រជុំកំពូលចិន-សហភាពអឺរ៉ុបនាពេលខាងមុខ ល្អសម្រាប់ភាគីទាំងពីរ និងពិភពលោក
07/23/2025 09:07 AM
Facebook Telegram Linkin
គ្រូពេទ្យហាត់ការនៅអង់គ្លេស គ្រោងធ្វើកូដកម្មនៅថ្ងៃសុក្រសប្ដាហ៍នេះ បន្ទាប់ពីកិច្ចចរចាប្រាក់ខែបរាជ័យ
07/23/2025 09:07 AM
Facebook Telegram Linkin
ប្រេសិតពិសេសអាមេរិក សង្ឃឹមថា នឹងធ្វើដំណើរទៅកាន់ទីក្រុង Doha ក្នុងសប្តាហ៍នេះ ដើម្បីជំរុញកិច្ចព្រមព្រៀងចំណាប់ខ្មាំង
07/23/2025 09:07 AM
Facebook Telegram Linkin
លោក Trump ប្រកាសកិច្ចព្រមព្រៀងពាណិជ្ជកម្មជាមួយទីក្រុងតូក្យូ រួមមានពន្ធនាំចូល ១៥% លើទំនិញជប៉ុន
07/23/2025 08:07 AM
Facebook Telegram Linkin
ក្រុមផ្ដល់ជំនួយនិងសិទ្ធិមនុស្សជាង១០០ អំពាវនាវឱ្យចាត់វិធានការ ខណៈភាពអត់ឃ្លានរីករាលដាលនៅហ្កាហ្សាសម្លាប់មនុស្សជាង​ ១០០នាក់
07/23/2025 08:07 AM
Facebook Telegram Linkin
ចិនចាប់ផ្តើមសាងសង់ទំនប់វារីអគ្គិសនីធំជាងគេបំផុតរបស់ពិភពលោកនៅតំបន់ទីបេតិ៍
07/23/2025 12:07 AM
Facebook Telegram Linkin
គណៈកម្មាធិការស្វែងរកការពិតស៊ីរី រាយការណ៍ថា មនុស្ស ១.៤២៦នាក់ ត្រូវបានសម្លាប់អំឡុងអំពើហិង្សាក្នុងខែមីនា
07/23/2025 12:07 AM
Facebook Telegram Linkin
ជនប៉ាឡេស្ទីននៅទីក្រុងហ្កាហ្សានិយាយថា ពួកគេពុំបានបរិភោគអស់រយៈពេល ៥ថ្ងៃមកហើយ
07/23/2025 12:07 AM
Facebook Telegram Linkin
រដ្ឋមន្ត្រីសុខាភិបាល «អ្នកដឹកនាំសុខាភិបាល ស្ថិតនៅជាប់ជានិច្ចជាមួយមន្រ្តីរបស់ខ្លួន ឈរលើគោលដៅសម្រេចឱ្យបានជោគជ័យក្នុងការបម្រើសេវាជូនប្រជាពលរដ្ឋ និងលើកកិត្តិយសវិជ្ជាជីវៈសុខាភិបាលទាំងមូល»
07/23/2025 12:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.