BTV NEWS

ក្រសួងការងារកម្ពុជា និងអង្គការសហប្រជាជាតិ ឯកភាពបន្តលើកកម្ពស់ការងារសមរម្យ និងការគាំពារសង្គមនៅកម្ពុជា

សម្តេច ឃួន សុដារី៖ កម្ពុជាមានឆន្ទៈមោះមុតចូលរួមការពារសុខសន្តិភាពតំបន់ ពិភពលោក តាមការសន្ទនា និងកិច្ចសហប្រតិបត្តិការដោយយកពលរដ្ឋជាស្នូល

ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

សម្ដេចតេជោ ជំរុញឱ្យកម្ពុជា-កូរ៉េខាងត្បូងលើកកម្ពស់ទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយក្នុងឱកាសខួប៣០ឆ្នាំនៃទំនាក់ទំនងប្រទេសទាំងពីរ

ព័ត៌មានជាតិ

មន្ត្រីជំនាញរុករកឃើញស្ថានីយផូស៊ីលស្លឹកឈើ១កន្លែង នៅលើភ្នំកកេះ ស្រុកទឹកឈូ ខេត្តកំពត

កំពត៖ ស្ថានីយផូស៊ីលស្លឹកឈើថ្មីមួយកន្លែងមានអាយុកាលចន្លោះពី ៦៥-១៥០ឆ្នាំ ត្រូវបានរកឃើញនៅលើភ្នំកកេះ ស្ថិតក្នុងស្រុកទឹកឈូ ខេត្តកំពត។ ស្ថានីយផូស៊ីលថ្មីនេះ ជាស្ថានីយផូស៊ីលទី ៦៧ ក្នុងសកម្មភាពសិក្សាស្រាវជ្រាវ និងរុករក រយៈពេល ៦ឆ្នាំកន្លងមកនេះ ។ លោក លីម វណ្ណច័ន្ទ ប្រធានការិយាល័យបេតិកភណ្ឌវប្បធម៌ នៃក្រសួងបរិស្ថាន បានឱ្យដឹងនៅថ្ងៃទី ១៩ ខែកញ្ញា ឆ្នាំ២០២៤នេះថា អ្នកជំនាញទើបនឹងរកឃើញស្ថានីយផូស៊ីលថ្មីទី៦៧ ជាប្រភេទផូស៊ីលស្លឹកឈើបុរាណ ដែលមានអាយុកាលចន្លោះពី ៦៥-១៥០ឆ្នាំ នៅភ្នំកកេះក្នុងស្រុកទឹកឈូ ខេត្តកំពត។ ស្ថាននីយផូស៊ីលនេះ ស្ថិតក្នុងបរិវេណប្រហែលជាង ១០០ម៉ែត្រ វាត្រូវបានកប់ក្នុងស្រទាប់ថ្ម ហើយក្រុមការងារបានរកឃើញតែផ្នែកខ្លះប៉ុណ្ណោះ។ លោកបញ្ជាក់ថា ផូស៊ីលដែលរកឃើញ មានសណ្ឋានជាដើមប៉ប្រក និងរុក្ខជាតិមួយចំនួនផ្សេងទៀត ហើយបច្ចុប្បន្នមិនទាន់មានអ្នកជំនាញណាម្នាក់សន្និដ្ឋាន និងអាចផ្ដល់ព័ត៌មានលម្អិតពី ស្ថានីយផូស៊ីលនេះឡើយ។ក្នុងរយៈពេល ៦ឆ្នាំ នៃសកម្មភាពសិក្សាស្រាវជ្រាវ អ្នកជំនាញបានរកឃើញស្ថានីយ ផូស៊ីលសរុបចំនួន ៦៧ ក្នុងនោះមានផូស៊ីលឈើ១៤ស្ថានីយ, ផូស៊ីលសត្វសមុទ្រ៤៥ស្ថានីយ, ផូស៊ីលសត្វទឹកសាប ២ស្ថានីយ, ផូស៊ីលដានជើងសត្វ៣ស្ថានីយ, ផូស៊ីលដាយណូស័រ១ស្ថានីយ និងផូស៊ីលស្លឹកឈើ១ស្ថានីយ ដែលមានទីតាំងស្ថិតនៅ ខេត្តបន្ទាយមានជ័យ បាត់ដំបង កោះកុង ពោធិ៍សាត់ និងកំពត៕

អ្នកជំនាញកំពុងជួសជុលខ្លោងទ្វារខាងត្បូង នៃប្រាសាទតាព្រហ្មឡើងវិញ

ខ្លោងទ្វារទិសខាងត្បូងប្រាសាទតាព្រហ្ម ដែលរលំដួលទាំងស្រុងអស់ជាច្រើនឆ្នាំមកហើយ ចាប់ផ្ដើមបង្ហាញរូបរាងដើមជាបណ្ដើរៗហើយ បន្ទាប់ពីអាជ្ញាធរជាតិអប្សរា រួមសហការជាមួយស្ថាប័នស្រាវជ្រាវបុរាណវិទ្យាឥណ្ឌា (ASI) ជួសជុលអស់ពេលជាច្រើនខែមក។ ការងារនេះ ចាប់ផ្តើមតាំងពីពាក់កណ្តាលឆ្នាំ២០២៤ ដោយពង្រឹងគ្រឹះ និងតួខ្លោងទ្វារឡើងវិញ បន្ទាប់ពីអ្នកជំនាញបានចំណាយពេល១ឆ្នាំក្នុងការសិក្សា រុះរើថ្មតាមបច្ចេកទេសអាណាស្ទីលឡូ។លោក Chitranjan Kumar ប្រធានគ្រប់គ្រងការដ្ឋានជួសជុលនៅប្រាសាទតាព្រហ្ម ឱ្យដឹងថា តាំងពីដើមឆ្នាំ២០២៣ ក្រុមការងារបានសិក្សា រុះរើគំនរថ្មដែលជ្រុះធ្លាក់សន្ធប់មកលើតួខ្លោងទ្វារទាំងមូល និងស្វែងរកថ្មដែលចល័តខុសពីទីតាំងដើមមកផ្គុំសាកល្បងឱ្យត្រូវតាមទីតាំងដើម ព្រមទាំងជួសជុលថ្មបាក់បែក ឬខូចខាតមួយចំនួន កំណាយបុរាណវិទ្យា ពិសោធន៍ដីគ្រឹះជាដើម។ អ្នកគ្រប់គ្រងការដ្ឋាន បន្ថែមថា មកដល់ពាក់កណ្ដាលឆ្នាំ២០២៤ ក្រុមការងារបានរៀបចំជួសជុលពង្រឹងគ្រឹះខ្លោងទ្វារនិងខឿន ជញ្ជាំងមួយចំនួនតាមលំនាំឡើងវិញជាបន្តបន្ទាប់។ កិច្ចការនេះអាចរលូនទៅបានឆាប់រហ័សដោយសារតែថ្មដើមរបស់ខ្លោងទ្វារ អាចរកឃើញប្រមាណជា៩៥ភាគរយយកមកដាក់នៅទីតាំងដើមឡើងវិញ។ លោក Chitranjan Kumar បញ្ជាក់ទៀតថា ការងារជួសជុលខ្លោងទ្វារខាងត្បូងនៃប្រាសាទតាព្រហ្មនេះ ត្រូវបានអភិរក្សទាំងដើមឈើផង ស្របតាមអនុសាសន៍របស់ក្រុមអ្នកជំនាញការអាដហុកនៃគណៈកម្មាធិការអន្ដរជាតិសម្របសម្រួល កិច្ចគាំពារ និងអភិវឌ្ឍន៍តំបន់ប្រវត្តិសាស្រ្តអង្គរ និងសំបូរព្រៃគុក (ICC-Angkor/ Sambor Prei Kuk)៕

អបអរសាទរ! ប្រាក់ឈ្នួលកម្មករកាត់ដេរឆ្នាំ២០២៥ ឡើងដល់ ២០៨ដុល្លារ ខណៈសម្ដេចធិបតី ហ៊ុន ម៉ាណែត បន្ថែម២ដុល្លារលើតួលេខ ២០៦ ដុល្លារ នៃលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា

អបអរសាទរ! ប្រាក់ឈ្នួលកម្មករនិយោជិតសម្រាប់ឆ្នាំ២០២៥ បានឡើងដល់ ២០៨ ដុល្លារ ខណៈសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជាបានសម្រេចបន្ថែម ២ ដុល្លារលើតួលេខ ២០៦ ដុល្លារនៃលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា នៅល្ងាចថ្ងៃទី១៩ ខែកញ្ញា ឆ្នាំ២០២៤នេះ។ តាមរយៈសារនៅលើបណ្ដាញសង្គមនៅល្ងាចថ្ងៃទី១៩ ខែកញ្ញានេះ សម្ដេចធិបតី នាយករដ្ឋមន្រ្ដីបានបញ្ជាក់ថា មុននេះបន្តិច ឯកឧត្តម ហេង សួរ រដ្ឋមន្ត្រីក្រសួងការងារ និង បណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា បានរាយការណ៍អំពីលទ្ធផលនៃការចរចាប្រាក់ឈ្នួលអប្បបរមាសម្រាប់ឆ្នាំ២០២៥។ តាមរយៈការបោះឆ្នោតសំឡេងភាគច្រើនលើសលប់ ៤៦ លើ ៥១សំឡេង បានគាំទ្រតួលេខ ២០៦ដុល្លារ។ សម្ដេចធិបតីបញ្ជាក់ថា៖«ទោះជាយ៉ាងនេះក៏ដោយ ខ្ញុំបានផ្ដល់គោលការណ៍ទៅឯកឧត្តម ហេង សួរ ឱ្យបន្ថែម ២ដុល្លារ លើតួលេខ ២០៦ដុល្លារ ដែលជាលទ្ធផលបោះឆ្នោតរបស់ក្រុមប្រឹក្សាជាតិប្រាក់ឈ្នួលអប្បបរមា។ ដូច្នេះ ប្រាក់ឈ្នួលអប្បបរមាថ្មីសម្រាប់ឆ្នាំ២០២៥ គឺ ២០៨ដុល្លារ ក្នុង ១ខែ កើនឡើង ៤ដុល្លារ បើប្រៀបធៀបនឹងឆ្នាំ២០២៤ ដែលមានត្រឹមតែ ២០៤ដុល្លារ»។ សម្ដេចធិបតីនាយករដ្ឋមន្រ្ដីថ្លែងថា៖«ខ្ញុំសូមឱ្យក្រសួងការងារ និងបណ្តុះបណ្តាលវិជ្ជាជីវៈ ធ្វើការផ្សព្វផ្សាយ និងជូនដំណឹងដល់បងប្អូនកម្មករនិយោជិត ក៏ដូចជាសាធារណជនឱ្យបានជ្រាបជាព័ត៌មាន»។ សម្ដេចធិបតីអះអាងថា ទោះក្នុងកាលៈទេសៈលំបាកនៃសេដ្ឋកិច្ចសកលក៏ដោយ ក៏រាជរដ្ឋាភិបាលមិនភ្លេចយកចិត្តទុកដាក់ដល់ការលើកកម្ពស់ជីវភាពរស់នៅ មុខរបរ និងសុខុមាលភាពរបស់បងប្អូនប្រជាពលរដ្ឋគ្រប់ស្រទាប់វណ្ណៈ។ ជាក់ស្តែង ការដំឡើងប្រាក់ឈ្នួលអប្បបរមាឆ្នាំនេះ ទោះតិចក្តីច្រើនក្តី គឺដើម្បីជួយសម្រួលដល់ការលំបាកខ្លះរបស់បងប្អូនកម្មករនិយោជិតនៃយើង។ សូមជម្រាបថា ក្នុងឆ្នាំ២០២៤នេះ ប្រទេសជាច្រើននៅក្នុងតំបន់មិនមានការដំឡើងប្រាក់ឈ្នួលអប្បបរមាទេ ដោយសារស្ថានភាពសេដ្ឋកិច្ចមិនទាន់ល្អប្រសើរ ហើយប្រាក់ឈ្នួលអប្បបរមា ដែលគិតជាប្រាក់ដុល្លារអាមេរិកនៃប្រទេសមួយចំនួនមិនត្រឹមតែមិនកើនទេ គឺថែមទាំងថយទាបជាងចុងឆ្នាំ២០២៣ ទៅវិញ ដោយសារតែការប្រែប្រួលនៃអត្រាប្តូរប្រាក់នៃប្រទេសទាំងនោះ។ ទន្ទឹមនឹងការដំឡើងប្រាក់ឈ្នួលនេះ ខ្ញុំសូមជម្រាបជូនបងប្អូនកម្មករនិយោជិត និងសាធារណជនថា ខ្ញុំនឹងបន្តជំរុញដល់ក្រសួង ស្ថាប័ន អាជ្ញាធរពាក់ព័ន្ធពិនិត្យ តាមដាន និងដាក់វិធានការបន្ថែម ដើម្បីពិនិត្យលទ្ធភាពកាត់បន្ថយបន្ទុកចំណាយរបស់បងប្អូនកម្មករនិយោជិត។ ក្នុងឱកាសនោះ សម្ដេចធិបតី បានអរគុណ និងសូមកោតសរសើរដល់គ្រប់ភាគីពាក់ព័ន្ធ ជាពិសេស ភាគីតំណាងបងប្អូនកម្មករនិយោជិត និងតំណាងនិយោជក ដែលបានខិតខំពិភាក្សាប្រាក់ឈ្នួលអប្បបរមាឆ្នាំនេះប្រកបដោយវិជ្ជាជីវ: និងស្មារតីរួម។ សម្ដេចក៏បាបន អរគុណដល់ក្រសួងការងារ និងបណ្ដុះបណ្ដាលវិជ្ជាជីវៈ ដែលបានខិតខំដឹកនាំសម្របសម្រួលការចរចានេះ៕

ការវាស់វែងដីធ្លីរួចសម្រេចបានជាង ៧លាន ៥សែនក្បាលដី និងនៅសល់ជាង ១លានក្បាលដី

ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា មកទល់ពេលនេះ ក្បាលដីដែលបានវាស់វែងរួចមានប្រមាណជាង ៧លាន ៥សែនក្បាលដី និងនៅសល់ប្រមាណជាង ១លានក្បាលដីទៀតប៉ុណ្ណោះ មុននឹងបញ្ចប់ការវាស់វែងដីធ្លីនៅទូទាំងប្រទេស ។ ក្នុងឱកាសអញ្ជើញធ្វើបាឋកថាស្ដីពីគោលនយោបាយដីធ្លី និងការចុះបញ្ជីដីធ្លីនៅកម្ពុជា ជូនដល់កម្មសិក្សាការី សិក្ខាកាមឆ្នាំ២០២៤ នៃសាលាភូមិន្ទរដ្ឋបាលនាព្រឹកថ្ងៃទី១៩ ខែកញ្ញាឆ្នាំ២០២៤ ឯកឧត្តមឧបនាយករដ្ឋមន្ត្រី បានបង្ហាញពីការគាំទ្រ និងលើកទឹកចិត្តឱ្យមានការរៀបចំបាឋកថាបែបនេះបន្តទៀត ដើម្បីពង្រីកការស្វែងយល់ទាក់ទិននឹងគោលនយោបាយដីធ្លី និងការចុះបញ្ជីដីធ្លីនៅកម្ពុជា ជាប្រយោជន៍ក្នុងការកសាងប្រទេសជាតិឱ្យបានល្អប្រសើរ។ឯកឧត្តមក៏បានអបអរសាទរ និងកោតសរសើរចំពោះកម្មសិក្សាការី សិក្ខាកាមឆ្នាំ២០២៤នៃសាលាភូមិន្ទរដ្ឋបាលទាំងអស់ ដែលបានជ្រើសរើសអាជីពជាមន្ត្រីរាជការស៊ីវិលក្នុងជីវិតរបស់ខ្លួន ដែលទាមទារនូវការលះបង់ទាំងពេលវេលា កម្លាំងកាយចិត្ត និងកម្លាំងប្រាជ្ញា ដើម្បីធ្វើយ៉ាងណាបម្រើឧត្តមប្រយោជន៍ដល់ប្រទេសជាតិ និងផ្ដល់នូវសេចក្តីសុខសុភមង្គលជូនដល់ប្រជាជនកម្ពុជាគ្រប់រូប ។នាឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថាការចុះបញ្ជីដីធ្លី និងចេញបណ្ណកម្មសិទ្ធិជូនប្រជាពលរដ្ឋ គឺដើម្បីបញ្ចប់វិវាទដីធ្លី និងភាពចម្រូងចម្រាស់នៅទូទាំងប្រទេស ផ្ដល់សុវត្ថិភាពក្នុងការកាន់កាប់ដីធ្លីស្របច្បាប់ បង្កើនតម្លៃដីធ្លី ជាទ្រព្យសម្រាប់កសាងជីវភាពរស់នៅរបស់ប្រជាពលរដ្ឋក្នុងជំនាន់នេះនិងជំនាន់ក្រោយៗទៀត។ ប្រមុខរាជរដ្ឋាភិបាលកម្ពុជាបានដាក់ចេញនូវគោលការណ៍ និងទស្សនៈវិស័យក្នុងវិស័យរៀបចំដែនដី នគរូបនីយកម្ម និងសំណង់ សំរាប់ប្រជាជាតិកម្ពុជា ដោយធ្វើយ៉ាងណាជំរុញការងារចុះបញ្ជីដីធ្លីបង្ហើយឱ្យបានចប់សព្វគ្រប់ រៀបចំទីក្រុងទីប្រជុំជនឱ្យបានល្អ ក្លាយជាភូមិឋានក្សេមក្សាន្ត ផ្ដល់ទ្រនំសុភមង្គលសម្រាប់ប្រជាពលរដ្ឋគ្រប់រូប ដោយប្រកាន់ខ្ជាប់នូវគោលការណ៍ថា សុភមង្គលរបស់សង្គមជាតិទាំងមូលគឺជាសុភមង្គលរបស់ខ្លួនយើងផ្ទាល់ ៕ អត្ថបទ បាន សុខរិទ្ធិ

អភិបាលខេត្តឧត្ដរមានជ័យ ណែនាំឱ្យមន្ត្រីត្រៀមទុកជាមុន សម្រាប់អន្តរាគមន៍ពលរដ្ឋ ពេលមានគ្រោះមហន្តរាយកើតឡើង

ឧត្ដរមានជ័យ៖ ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ បានណែនាំដល់អាជ្ញាធរមូលដ្ឋាន និងថ្នាក់ដឹកនាំមន្ទីរ អង្គភាពជំនាញជុំវិញខេត្តទាំងអស់ ត្រូវត្រៀមលក្ខណៈរៀបចំទុកជាមុន សម្រាប់អន្តរាគមន៍ និងជួយសង្គ្រោះប្រជាពលរដ្ឋ ឱ្យបានទាន់ពេលវេលា ពេលមានគ្រោះមហន្តរាយកើតឡើង ដោយយថាហេតុ។ការណែនាំបែបនេះ ធ្វើឡើងនៅក្នុងប្រជុំ ត្រៀមបង្ការទប់ស្កាត់ និងការឆ្លើយតបសង្គ្រោះបន្ទាន់ ចំពោះបញ្ហាគ្រោះមហន្តរាយក្នុងភូមិសាស្រ្តខេត្តឧត្ដរមានជ័យ នាថ្ងៃទី១៩ខែកញ្ញាឆ្នាំ២០២៤នេះ។ឯកឧត្ដមអភិបាលខេត្ត ក៏បានចាត់ឱ្យមន្ត្រីទទួលខុសត្រូវតាមវិស័យជាសេនាធិការ ឱ្យគណៈកម្មាធិការគ្រប់គ្រងគ្រោះមហន្តរាយ តាមបណ្តាលក្រុង-ស្រុក និងត្រូវត្រៀមលក្ខណៈ សហការជាមួយលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត ក្នុងការប្រមូលទិន្នន័យព័ត៌មានឲ្យឆាប់រហ័ស អំពីផលប៉ះពាល់នានា នៃគ្រោះមហន្តរាយឱ្យបានទាន់ពេលវេលា ក្នុងមូលដ្ឋានរបស់ខ្លួន។ ម្យ៉ាងទៀតត្រូវផ្តោតការយកចិត្តទុកដាក់លើការងារ ត្រៀមបម្រុងសម្រាប់ឆ្លើយតបគ្រោះមហន្តរាយ នៅក្នុងរង្វង់ដែនសមត្ថកិច្ចរបស់ខ្លួន ឲ្យមានប្រសិទ្ធភាព។គួរបញ្ជាក់ថា តាមរបាយការណ៍របស់លោក គង់ កន្ធារិទ្ធ អភិបាលរងខេត្ត បានឲ្យដឹងថា គ្រោះមហន្តរាយរយៈពេល ៩ខែឆ្នាំ២០២៤ ក្នុងភូមិសាស្ត្រខេត្តឧត្តរមានជ័យ ករណីខ្យល់កន្ត្រាក់៖ មានចំនួន០១លើកបណ្តាលឲ្យប៉ះពាល់ផ្ទះសម្បែង ប្រជាពលរដ្ឋចំនួន ៣ ១២៩ខ្នង ខូចខាតចំនួន ១២៧ខ្នង, សាលារៀនចំនួន ០១ខ្នង, របួសមនុស្សចំនួន ០១នាក់ និងខូចខាតអគារសាធារណៈ ២ខ្នង។ ករណីគ្រោះទឹកជំនន់៖ មានចំនួន ០១លើក បណ្តាលឲ្យលិចផ្ទះប្រជាពលរដ្ឋចំនួន៥ខ្នង, សាលារៀនចំនួន ០១ខ្នង និងសត្វជ្រូក មាន់ ទា ៣៣ក្បាល ។ ករណីគ្រោះរាំងស្ងួត៖ មាន ០១លើក បណ្តាលឲ្យប៉ះពាល់ដំណាំស្រូវសរុបចំនួន ៥៣០៥ហិកតា ខូចខាតទាំងស្រុងចំនួន ៥៩០ហិកតា បានមូបទឹកសង្គ្រោះចំនួន ៣៤០ហិកតា។ ករណីគ្រោះអគ្គិភ័យ៖ មានចំនួន ១៣លើក បណ្តាលឲ្យខូចខាតផ្ទះប្រជាពលរដ្ឋចំនួន ១៣ខ្នង និងសម្ភារៈប្រើប្រាស់មួយចំនួនទៀត៕

សមាជិកព្រឹទ្ធសភាធ្វើវេទិកាពិគ្រោះយោបល់ស្តីពី “ បញ្ហាប្រឈម និងសំណូមពរ នៅភូមិភាគទី១ រាជធានីភ្នំពេញ ”

ភ្នំពេញ៖ វេទិកាពិគ្រោះយោបល់របស់សមាជិកព្រឹទ្ធសភា ប្រចាំភូមិភាគទី១ ស្តីពី “ បញ្ហាប្រឈម និងសំណូមពរ នៅភូមិភាគទី១ រាជធានីភ្នំពេញ ” ត្រូវបានធ្វើឡើង នាព្រឹកថ្ងៃទី១៩ ខែកញ្ញា ឆ្នាំ២០២៤ ក្រោមអធិបតីភាព ឯកឧត្តម ប្រាក់ សុខុន ប្រធាន ព្រឹទ្ធសភាស្ដីទី និងជាប្រធានក្រុមសមាជិកព្រឹទ្ធសភា ប្រចាំភូមិភាគទី១ និងមានការចូលរួមពីឯកឧត្ដម ម៉ប់ សារិន ប្រធានក្រុមប្រឹក្សារាជធានី និងឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ នៅសាលារាជធានីភ្នំពេញ។ ឯកឧត្ដម ឃួង ស្រេង មានប្រសាសន៍ថា ព្រឹទ្ធសភា ដឹកនាំដោយសម្តេចតេជោ ហ៊ុន សែន ជាប្រធាន និងបន្តដឹកនាំប្រទេសកម្ពុជាដោយភាពស្វាហាប់ ថាមពលនិងគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើការកែទម្រង់ជាច្រើន ដើម្បីឱ្យប្រទេសកម្ពុជាកាន់តែអភិវឌ្ឍន៍រីកចំរើន។ឯកឧត្ដម ឃួង ស្រេង បានបន្តថា រដ្ឋបាលរាជធានីភ្នំពេញមានការងារជាច្រើន ដែលបាននឹងកំពុងអនុវត្ត ហើយក៏មានបញ្ហាប្រឈមជាច្រើនផងដែរ ដែលបាននិងកំពុងដោះស្រាយ។ សំរាប់វេទិកាពិគ្រោះយោបល់របស់ក្រុមសមាជិកព្រឹទ្ធសភា ប្រចាំភូមិភាគទី១ ស្តីពី “បញ្ហាប្រឈម និងសំណូមពរ នៅភូមិភាគទី១ រាជធានីភ្នំពេញ” នាពេលនេះ គឺក្នុងគោលបំណង ដើម្បីពិនិត្យវឌ្ឍនៈភាពការងារ ពីការកំណែទម្រង់ប្រសិទ្ធភាពការងារ តម្លាភាព និងសមធម៌ ដើម្បីឆ្លើយតបទៅតាមការចង់បានរបស់ប្រជាពលរដ្ឋ។ឯកឧត្ដម ឃួង ស្រេង បន្តថា ថ្នាក់ដឹកនាំរាជធានី ខណ្ឌ សង្កាត់ និងមន្ទីរជំនាញនានាបានខិតខំប្រឹងប្រែងរហូតសម្រេចបានវឌ្ឍនភាពការងារសំខាន់ៗជាច្រើន តែក៏នៅមានបញ្ហាប្រឈមមួយចំនួនដែលយើងយកមកដោះស្រាយ រួមគ្នាក្នុងវេទិកាពិគ្រោះយោបល់របស់ក្រុមសមាជិកព្រឹទ្ធសភា ប្រចាំភូមិភាគទី១ នាពេលនេះដែរ ក្នុងនោះរួមមាន ១. ការងារភូមិ សង្កាត់ មានសុវត្ថិភាព ២. ការងារអត្តសញ្ញាណកម្ម និងអត្រានុកូលដ្ឋាន ៣. ការងារលទ្ធកម្មតាមមូលដ្ឋាន ៤. ការងារអភិវឌ្ឍហេដ្ឋារចនាសម្ព័ន្ធមូលដ្ឋាន ៥. ការងារបណ្តុះបណ្តាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យ និងការងារ ប.ស.ស ។ ឯកឧត្តម ប្រាក់ សុខុន ប្រធានព្រឹទ្ធសភាស្ដីទីក្នុងឱកាសនោះ បានសម្តែងនូវការកោតសរសើរ រដ្ឋបាលរាជធានីភ្នំពេញ ចំពោះការកែទម្រង់នានា សំដៅធ្វើយ៉ាងណាឱ្យរាជធានីភ្នំពេញមានការអភិវឌ្ឍរីកចំរើន ជាមួយនិងការលើកកម្ពស់ជីវភាពប្រជាពលរដ្ឋ និងការបំរើសេវាសាធារណៈជូនប្រជាពលរដ្ឋឱ្យកាន់តែល្អប្រសើរ។ឯកឧត្តម ប្រាក់ សុខុន មានប្រសាសន៍ថា នៅរាជធានីភ្នំពេញពិតជាមានបញ្ហាប្រឈមច្រើននៅតាមមូលដ្ឋានសង្កាត់ទាំង១០៥ តែក្នុងវេទិកាពិគ្រោះយោបល់របស់ក្រុមសមាជិកព្រឹទ្ធសភា ប្រចាំភូមិភាគទី១ នៅពេលនេះ យើងជ្រើសរើសយកតែបញ្ហាប្រឈមណាដែលមានលក្ខណៈសមស្របមកដោះស្រាយមុន។ ការរួមគ្នាជាមួយព្រឹទ្ធសភា ក្នុងការចុះមូលដ្ឋានទាំង១០៥ ប្រមូលបានបញ្ហាជាច្រើន មានទាំងវិជ្ជមាន និងអវិជ្ជមាន ដែលអាចយកបញ្ហាទាំងអស់នោះ មកគិតពិចារណា ដោះស្រាយជូនប្រជាពលរដ្ឋឱ្យបានទាន់ពេលវេលា។ ឯកឧត្តមប្រាក់ សុខុន ក៏បានស្នើឱ្យអាជ្ញាធរ និងកងកម្លាំងទាំងអស់បន្តថែរក្សាសន្តិសុខ សុវត្ថិភាព បើទោះបីជារក្សាសុខសន្តិភាពនេះបានល្អប្រសើរហើយក្តី។ ឯកឧត្តមសូមឱ្យបន្តពង្រឹងរដ្ឋបាលសាធារណៈ បន្តយន្តការកែទម្រង់អភិបាលកិច្ច និងបន្តដោះស្រាយបញ្ហាប្រឈមនានារបស់ប្រជាពលរដ្ឋឱ្យបានល្អប្រសើរ៕អត្ថបទ ៖ ប្រាក់ វ៉ាន់ដា

មន្ដ្រីជាន់ខ្ពស់ក្រសួងបរិស្ថាន ចុះពិនិត្យទីតាំងអភិរក្សជម្រកសត្វទន្សោង ដែនជម្រកសត្វព្រៃសង្ឃរុក្ខាវន្ត

ឯកឧត្តម សាម អ៊ីន រដ្ឋលេខាធិការក្រសួងបរិស្ថាន អមដំណើរដោយលោក ផួង លីណា ប្រធានមន្ទីរបរិស្ថានខេត្តឧត្តរមានជ័យ រួមទាំងមន្រ្តីអភិរក្ស និងកងកម្លាំងការពារមួយចំនួនទៀតបានអញ្ជើញចុះពិនិត្យមើលស្ថានភាពទីតាំងតំបន់ចុងក្រោយ ដែលជាជម្រករបស់សត្វទន្សោង រស់នៅក្នុងសហគមន៍ដែនជម្រកសត្វព្រៃសង្ឃរុក្ខាវន្ត នាថ្ងៃទី១៩ កញ្ញា ឆ្នាំ២០២៤។ក្នុងនោះឯកឧត្តម សាម អ៊ីន រដ្ឋលេខាធិការក្រសួងបរិស្ថាន បានណែនាំបន្ថែមដល់មន្រ្តីអភិរក្សធ្វើយ៉ាងណាត្រូវបង្កើនការយកចិត្តទុកដាក់បង្ការទប់ស្កាត់ឲ្យបាន ក្នុងការ ការពារតំបន់ទីតាំងជម្រកសត្វទន្សោងរស់នៅឲ្យបានល្អប្រសើរ ដើម្បីអភិរក្សសត្វទន្សោង ទាំងអស់នេះ ឲ្យបានគង់វង្ស ព្រោះវាជាសត្វមួយកម្រជិតផុតពូជ ។សម្រាប់លោក ផួង លីណា ប្រធានមន្ទីរបរិស្ថានខេត្ត បានឲ្យដឹងថា បន្ទាប់ពីមន្រ្តីអភិរក្ស និងកងកម្លាំងយោធារួមគ្នាធ្វើការដើរល្បាតគ្រប់ពេលទាំងយប់ទាំងថ្ងៃ រៀងរាល់ថ្ងៃនោះ យើងសង្កេតឃើញថា ការដាក់អន្ទាក់យកសត្វព្រៃនៅតំបន់សហគមន៍ដែនជម្រកសត្វព្រៃសង្ឃរុក្ខាវន្ត ហាក់បីមានភាពស្ងប់ស្ងាត់ជាងមុន និងមិនសូវមានបទល្មើសផ្សេងៗបានកើតឡើងក្នុងតំបន់នេះនោះទេ។លោក ប្រធានមន្ទីរបរិស្ថានខេត្ត បានបន្តថា ក្នុងដែនជម្រកសត្វព្រៃសង្ឃរុក្ខាវន្តនេះមន្រ្តីបានដាំកូនឈើបន្ថែមជាច្រើនម៉ឺនដើមជាបន្តបន្ទាប់ ដើម្បីទុកជាជម្រករស់នៅរបស់សត្វព្រៃ គ្រប់ប្រភេទ និងបានយាមកាមដើរល្បាតគ្រប់ពេល ដើម្បីបង្ការទប់ស្កាត់បទល្មើសនានាមិនឲ្យកើតមានក្នុងតំបន់នេះ នោះទេ។លោកបន្តថា ក្នុងតំបន់ព្រៃសង្ឃរក្ខាវន្តប្រសិនបើយើងការពារអភិរក្សសត្វព្រៃគ្រប់ប្រភេទបានល្អប្រសើរនិងមិនមានការលួចកាប់បំផ្លាញព្រៃឈើបន្តទៀតនោះ តំបន់នេះ វាអាចក្លាយជាតំបន់អេកូទេសចរធម្មជាតិមួយគួរឲ្យមានការទាក់ទាញ ខ្លាំងពីសំណាក់ទេសចរជាតិ និងអន្តរជាតិ ជាពិសេសនោះក្រុមយុវជនមកលេងកម្សាន្ត និងបោះតង់ដើរព្រៃបានយ៉ាងល្អប្រសើរ៕

កម្ពុជា-ម៉ាឡេស៊ី ដាក់ឱ្យដំណើរការគម្រោងទូទាត់ឆ្លងដែន ដែលផ្តល់ភាពងាយស្រួល និងសុវត្ថិភាពខ្ពស់

ភ្នំពេញ ៖ ធនាគារជាតិនៃកម្ពុជា (NBC) និងធនាគារកណ្តាលម៉ាឡេស៊ី (BNM) ប្រកាសដាក់ឱ្យដំណើរការជាផ្លូវការ គម្រោងទូទាត់ឆ្លង ដែន តាមឃ្យូអរកូត (QR Code) រវាងប្រទេសទាំងពីរ ដើម្បីផ្តល់ការទូទាត់ជូនប្រជាពលរដ្ឋ មានភាពងាយស្រួល និងសុវត្ថិភាពខ្ពស់ តាមរយ ប្រព័ន្ធទូទាត់បែបឌីជីថល។លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងនៅក្នុងការដាក់ឱ្យដំណើរការជាផ្លូវការ គម្រោង ទូទាត់ឆ្លងដែនរវាងព្រះរាជាណាចក្រកម្ពុជា និងប្រទេសម៉ាឡេស៊ី នៅថ្ងៃទី ១៩ ខែ កញ្ញា ឆ្នាំ ២០២៤ នេះថា នេះគឺជាសមិទ្ធផលដ៏ សំខាន់មួយ ដែលឆ្លុះបញ្ចាំងពីកិច្ចសហប្រតិបត្តិការដ៏រឹងមាំ រវាងធនាគារកណ្តាលទាំងពីរ និងដៃគូសហការនៃប្រទេសទាំងពីរផងដែរ។ គម្រោងទូទាត់ឆ្លងដែននេះ ដើរតួនាទីយ៉ាងសំខាន់ ក្នុងការជំរុញសកម្មភាពពាណិជ្ជកម្ម និងបរិយាបន្នហិរញ្ញវត្ថុ នៃប្រទេសទាំងពីរ ដែលបង្ហាញពីជំហានដ៏សំខាន់មួយ ឆ្ពោះទៅសម្រេចបាននូវចក្ខុវិស័យនៃសហគមន៍សេដ្ឋកិច្ចអាស៊ាន លើការតភ្ជាប់ប្រព័ន្ធទូទាត់រាយ ដែលមានភាពរហ័ស ប្រសិទ្ធភាព និងសុវត្ថិភាព និងដែលត្រូវបានតភ្ជាប់ទូទាំងតំបន់។លោកជំទាវបណ្ឌិត លើកឡើងបន្តថា ការតភ្ជាប់គម្រោងទូទាត់ឆ្លងដែនតាមឃ្យូអរកូតនេះ សម្រេចទៅបានដោយមានកិច្ច សហប្រតិបត្តិការយ៉ាងរឹងមាំ ពីសំណាក់ដៃគូសំខាន់ៗនៃប្រទេសទាំងពីររួមមាន៖ ប្រព័ន្ធទូទាត់បាគង របស់ធនាគារជាតិនៃកម្ពុជា និង Payment Network Malaysia (PayNet) និងធនាគារមេយប៊ែង ដែលជាធនាគារប្រតិបត្តិការ។ ក្នុងនាមជាស្ថាប័នហិរញ្ញវត្ថុឈាន មុខគេមួយក្នុងតំបន់ ធនាគារមេយប៊ែង ត្រូវបានផ្តល់ទំនុកចិត្តជាធនាគារប្រតិបត្តិការ សម្រាប់កិច្ចសហការតភ្ជាប់ប្រព័ន្ធទូទាត់ រវាង កម្ពុជានិងម៉ាឡេស៊ី។ ការផ្តល់សេវាទូទាត់ឆ្លងប្រទេសនេះ គឺជាផ្នែកមួយនៃការបន្តប្តេជ្ញាចិត្ត របស់ធនាគារមេយប៊ែង ក្នុងការពង្រីក សេវាកម្មហិរញ្ញវត្ថុឆ្លងដែន ដើម្បីផ្តល់ជូនអតិថិជននូវភាពងាយស្រួល និងសុវត្ថិភាពខ្ពស់ តាមរយៈប្រព័ន្ធទូទាត់បែបឌីជីថលរបស់ ធនាគារ។នៅក្នុងពិធីនេះដែរ, លោក Dato’ Khairussaleh Ramli ប្រធាន និងនាយកប្រតិបត្តិនៃសម្ព័ន្ធធនាគារមេយប៊ែង មាន ប្រសាសន៍ថា៖ តាមរយៈនៃការតភ្ជាប់គម្រោងទូទាត់ឆ្លងដែននេះ នឹងពង្រីកវិសាលភាពនៃសេវាកម្មទូទាត់ឆ្លងប្រទេស របស់ធនាគារ មេយប៊ែង ហើយក៏នឹងរួមចំណែកដល់ការសម្រេចបាននូវទំនើបកម្មក៏ដូចជា ការអភិវឌ្ឍកាន់តែរីកចម្រើន នៅក្នុងតំបន់អាស៊ាន។ គំនិត ផ្តួចផ្តើមនេះក៏ស្របតាមយុទ្ធសាស្ត្រ M25+ ក្នុងការពង្រឹងវត្តមានរបស់ធនាគារមេយប៊ែងនៅក្នុងតំបន់ ដោយផ្តល់នូវដំណោះស្រាយ អាជីវកម្ម និងសេវាកម្មដែលមានភាពខុសប្លែកពីគេ ជូនដល់អតិថិជនរបស់យើង។ ទាំងនេះបានឆ្លុះបញ្ចាំងពីទំនើបកម្ម នៃប្រព័ន្ធបច្ចេក វិទ្យា របស់ធនាគារមេយប៊ែង នៅគ្រប់បណ្តាប្រទេសជាគោលដៅសំខាន់។ប្រព័ន្ធទូទាត់ឆ្លងដែនតាមឃ្យូអរកូត រវាងព្រះរាជាណាចក្រកម្ពុជា និងប្រទេសម៉ាឡេស៊ី ជាសមិទ្ធផលក្រោមកិច្ចសហប្រតិបត្តិការដ៏រឹង មាំ ក្នុងដំណើរឆ្ពោះទៅរកការទូទាត់ឆ្លងដែនដ៏រលូន រវាងប្រទេសទាំងពីរនេះ ដែលចាប់ផ្តើមនៅឆ្នាំ២០២១។ នៅពេលធនាគារជាតិ នៃកម្ពុជា និងធនាគារមេយប៊ែង បានដាក់សម្ពោធឱ្យដំណើរការសេវាផ្ទេរប្រាក់ឆ្លងដែនដំបូងគេបង្អស់ រវាងព្រះរាជាណាចក្រកម្ពុជា និង ប្រទេសម៉ាឡេស៊ី ដោយតភ្ជាប់ប្រព័ន្ធធនាគារមេយប៊ែង ទៅនឹងប្រព័ន្ធបាគង។ បន្ទាប់មកនៅដើមឆ្នាំ ២០២៤ នេះ ធនាគារជាតិនៃ កម្ពុជា និងធនាគារកណ្តាលម៉ាឡេស៊ី បានចុះហត្ថលេខាលើអនុស្សរណៈយោគយល់ ស្តីពីកិច្ចសហប្រតិបត្តិការផ្នែកនវានុវត្តន៍ហិរញ្ញវត្ថុ និងប្រព័ន្ធទូទាត់ ក្រោមអធិបតីភាពដ៏ខ្ពង់ខ្ពស់របស់នាយករដ្ឋមន្រ្តីនៃប្រទេសទាំងពីរ ដោយផ្តោតទៅលើការតភ្ជាប់ការទូទាត់ឆ្លងដែន រវាងប្រទេសទាំងពីរ ឱ្យកាន់តែងាយស្រួល សុវត្ថិភាព ឆាប់រហ័ស និងតម្លៃសមរម្យ៕អត្ថបទ៖ សុន រ៉ាឌី

កម្ពុជាទទួលបានការគាំទ្រពេញទំហឹងពីប្រទេសជាសមាជិកក្នុងការរៀបចំកិច្ចប្រជុំកំពូលសៀមរាប-អង្គរស្តីពីពិភព លោកមួយដែលគ្មានមីន

ប្រទេសស្វីស) ៖ ប្រទេសជាសមាជិកបានប្រកាសគាំទ្រកម្ពុជា ក្នុងខណះដែលឯកឧត្តមបណ្ឌិត លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ា បានដឹកនាំកិច្ចប្រជុំត្រៀមលើកទី២ នៅថ្ងៃទី១៨ ខែកញ្ញា ឆ្នាំ២០២៤នេះ នៅក្នុងទីស្នាក់ការអង្គការ សហប្រជាជាតិ ទីក្រុងហ្សឺណែវ ប្រទេសស្វីស ដោយលើក យកប្រធានបទចំនួន៩មកជជែកពិភាក្សាគ្នាសម្រាប់កិច្ច ប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន។កិច្ចប្រជុំពេញអង្គ ពិភាក្សាទៅលើប្រធានបទចំនួន៩ នេះរួមមាន ១.សេចក្តីថ្លែងការណ៍បើកកិច្ចប្រជុំ ២. អនុម័តរបៀបវារៈកិច្ចប្រជុំត្រៀមលើកទី២ ៣.ការរៀបចំការងារសម្រាប់កិច្ចប្រជុំកំពូលសៀមរាប-អង្គរ ៤.ការផ្លាស់ប្តូរទស្សនវិស័យលើឯកសារចំនួន៤ដែលត្រូវអនុម័តក្នុងកិច្ច ប្រជុំកំពូលសៀមរាប-អង្គរ (សេចក្តីព្រាងការពិនិត្យឡើង វិញនៃប្រតិបត្តិការ និងលក្ខន្តិកៈនានានៃអនុសញ្ញា ២០២៤-២០២៩, សេចក្តីព្រាងផែនការសកម្មភាពសៀមរាប-អង្គរ, សេចក្តីស្នើកិច្ចប្រជុំនានានិងយន្តការសម្រាប់ក្រោយកិច្ចប្រជុំកំពូលសៀមរាប-អង្គរ, សេចក្តីព្រាងធាតុផ្សំនានាសម្រាប់សេចក្តីថ្លែងការណ៍នយោបាយសៀមរាប-អង្គរស្តីពីពិភពលោកមួយគ្មានមីន) ៥.ការធ្វើបច្ចុប្បន្នភាពស្តីពីការរៀបចំផែនការសកម្មភាពរបស់អង្គភាពគាំទ្រការអនុវត្តអនុសញ្ញា (ISU) និងផែនការថវិកា ២០២៥-២០២៩ ៦.ការធ្វើបច្ចុប្បន្នភាពស្តីពីការងារភស្តុភា និងរដ្ឋបាល ៧.ស្ថានភាពនៃការរួមចំណែកក្នុងការវាយតម្លៃសម្រាប់កិច្ចប្រជុំកំពូលសៀមរាប-អង្គរ ៨.ការងារផ្សេងៗ ៩.ការពិចារណា និងការអនុម័តរបាយការណ៍នីតិវិធីសម្រាប់កិច្ចប្រជុំកំពូលសៀមរាប-អង្គរ។ឯកឧត្តមបណ្ឌិត ទេសរដ្ឋមន្ត្រី បានជម្រាបជូនអង្គប្រជុំនូវកម្មវិធីទាំងស្រុងនៃកិច្ចប្រជុំកំពូលសៀមរាប-អង្គរ នៅខែវិច្ឆិកា ឆ្នាំ២០២៤ គឺចាប់ពីថ្ងៃអាទិត្យ ទី២៤-ការដើរជាក្បួនពីមុខប្រាសាទអង្គរវត្ត ការទស្សនកិច្ចនៅសារមន្ទីរសន្តិភាពសកម្មភាពមីន និងពិធីលៀងសាយភោជន៍ជូនប្រតិភូនៅមុខប្រាសាទបាយ័ន ថ្ងៃទី២៧-ទស្សនកិច្ចប្រាសាទអង្គរវត្ត និងពីថ្ងៃទី២៥-២៩-កិច្ចប្រជុំពេញអង្គនិងការប្រជុំតាមព្រឹត្តិការណ៍អម រួមដោយការតាំងពិព័រណ៍នៅទីធ្លាខាងមុខសាលប្រជុំ។ ជាលទ្ធផល ប្រទេសនានាដែលចូលរួមយោបល់ក្នុងអង្គ ប្រជុំ បានលើកឡើងពីការគាំទ្រទាំងស្រុងចំពោះប្រទេសកម្ពុជា ដែលរៀបចំកិច្ចប្រជុំកំពូលសៀមរាប-អង្គរ៕អត្ថបទ ៖ ភារម្យ

ក្រុមហ៊ុន សុវណ្ណភូមិ អ៊ិនវេសមែន ឧបត្ថម្ភថវិកា 10ម៉ឺនដុល្លារជូនកាកបាទក្រហមកម្ពុជា អបអរទិវា ៨ ឧសភា ២០២៤

ភ្នំពេញ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមថ្លែងអំណរគុណយ៉ាងជ្រាលជ្រៅបំផុតចំពោះ ក្រុមហ៊ុន សុវណ្ណភូមិ អ៊ិនវេសមែន ដែលបានឧបត្ថម្ភថវិកាចំនួន ១០ម៉ឺនដុល្លារអាម៉េរិក (ដប់ម៉ឺនដុល្លារអាម៉េរិក) ជូនកាកបាទក្រហមកម្ពុជា ក្នុងឱកាសខួបទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»។ពិធីប្រគល់ និងទទួលថវិកាសប្បុរសធម៌ខាងលើនេះ បានធ្វើឡើងនៅស្នាក់ការកណ្ដាលកាកបាទក្រហមកម្ពុជា នាព្រឹកថ្ងៃទី១៨ ខែកញ្ញា ឆ្នាំ២០២៤។លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុន សុវណ្ណភូមិ អ៊ិនវេសមែន ដែលបានជួយឧបត្ថម្ភគាំទ្រដល់សកម្មភាពមនុស្សធម៌របស់កាកបាទក្រហមកម្ពុជា។ លោកជំទាវ បានបន្តថា “ក្រុមហ៊ុន សុវណ្ណភូមិ អ៊ិនវេសមែន បានឧបត្ថម្ភគាំទ្រដល់កាកបាទក្រហមកម្ពុជាជាង២០ឆ្នាំមកហើយ នៅពេលតំបន់នៅអាស៊ីអាគ្នេយ៍របស់យើងកំពុងរងគ្រោះទឹកជំទំនន់ ពីខ្យល់ព្យុះ ទីហ្វុង យ៉ាហ្គី ដូច្នេះសមាគមនីមួយៗកំពុងខិតខំជួយសង្គ្រោះដល់ប្រជាពលរដ្ឋទាំងអស់គ្នា យើងជឿជាក់ស្មារតីនិងឯកភាពជាមួយប្រទេសជិតខាង យើងតែងជួយគ្នាទៅវិញទៅមក ពេលមានទុក្ខលំបាក និងសូមកោតសរសើរដល់ក្រុមជួយសង្គ្រោះនៅក្នុងប្រទេសថៃ ដែលបានជួយដល់ប្រជាពលរដ្ឋមានប្រសិទ្ធភាពភ្លាមៗ និងបានឆាប់រហ័ស។លោកជំទាវអោយដឹងដថាប្រទេសកម្ពុជា ក៏ទើបតែចាប់ផ្តើមមានទឹកជំនន់ យើងក៏ណែនាំដល់ប្រជាពលរដ្ឋ និងមានយន្តការត្រៀមបង្កានិងប្រុងប្រយ័ត្នជានិច្ច អ្វីដែលធ្វើឱ្យកាកបាទក្រហមកម្ពុជា មានលទ្ធភាពគ្រប់គ្រាន់ ដើម្បីជួយដល់ប្រជាពលរដ្ឋពេលមានគ្រោះមហន្តរាយគឺថវិកាដែលទទួលបានពីសប្បុរសជន ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ក្នុងនោះក៏មានការរួមចំណែករបស់ក្រុមហ៊ុនសុវណ្ណភូមិ អ៊ិនវេសមែនផងដែរ និងសូមអរគុណចំពោះប្រតិភូក្រុមហ៊ុន សុវណ្ណភូមិ អ៊ិនវេសមែន ដែលធ្វើដំណើរពីប្រទេសថៃមកប្រទេសកម្ពុជា។ ទោះមានរយៈពេលខ្លីក៏មិនភ្លេចកាកបាទក្រហមកម្ពុជា និងសូមថ្លែងអំណរគុណ ឯកឧត្តម ខាំពូន កែវមុណី ដែលតែងសម្របសម្រួល និងទំនាក់ទំនងជាមួយក្រុមហ៊ុន សុវណ្ណភូមិ អ៊ិនវេសមែន និងជាអ្នកមានទឹកចិត្តមនុស្សធម៌ដើម្បីជួយប្រជាពលរដ្ឋ”៕ 19/9/24អត្ថបទ៖ សំ ងីម

បណ្ដាញសង្គម

ព័ត៌មានថ្មីៗ

ប្រមុខការពារជាតិកម្ពុជា ទាមទារឲ្យអតីតទាហានព្រៃថៃ សូមទោសកងទ័ពខ្មែរជាសាធារណៈ ខណៈអាចឡើងដល់តុលាការ

ទូតកូរ៉េខាងត្បូងជម្រាបសម្ដេចតេជោថា ស្ពានមិត្តភាពកម្ពុជា-កូរ៉េខាងត្បូងនឹងបើកការដ្ឋានសាងសង់នៅឆ្នាំ២០២៦

សម្ដេចធិបតី ហ៊ុន ម៉ាណែត អញ្ជើញដឹកនាំកិច្ចប្រជុំជាមួយគណៈបញ្ជាឯកភាពរាជធានី-ខេត្ត ត្រួតពិនិត្យការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា

ក្រសួងការងារបន្តផ្សព្វផ្សាយឱកាសការងារជូនពលរដ្ឋ និងពលករក្នុងខេត្តចំនួន១១បន្ថែមទៀត ខណៈមួយសប្តាហ៍កន្លងមក ពលករជាង១,៣ ម៉ឺននាក់ទទួលបានការងារធ្វើ

មនុស្ស៤៦នាក់ស្លាប់ និង៣៧នាក់រងរបួសក្នុងការវាយប្រហារដោយទាហានប៉ារ៉ានៅស៊ូដង់ខាងលិច

ប្រទេសម៉ិកស៊ិក ប្តេជ្ញាស្វែងរកការផ្អាកពន្ធរបស់សហរដ្ឋអាមេរិកលើផលិតផលប៉េងប៉ោះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877