BTV NEWS

សួនរុក្ខជាតិអង្គរ ពិព័រណ៍ “មិត្តសត្វព្រៃ និងពិភពសត្វល្អិត” សម្រាប់អ្នកទេសចរទស្សនា ក្រៅពីអង្គរវត្ដ

សម្ដេចព្រះមហាសង្ឃរាជ បួរ គ្រី ផ្ដល់ព្រះរាជអំណោយដល់កងទ័ព និងធ្វើបុណ្យឧទ្ទិសកុសលដល់យុទ្ធជនពលី

តាមបណ្តាសាកលវិទ្យាល័យ រៀបចំលេងល្បែងប្រជាប្រិយមុនថ្ងៃចូលឆ្នាំថ្មី និងលើកតម្កើងអត្តសញ្ញាណវប្បធម៌ខ្មែរ

ការតុបតែងលម្អអបអរបុណ្យចូលឆ្នាំថ្មីធ្វើឱ្យទេសចរអន្តរជាតិយល់ដឹងកាន់តែច្រើនពីវប្បធម៌ខ្មែរដ៏សម្បូរបែប

ព័ត៌មានជាតិ

អ្នកនាំពាក្យក្រសួងពាណិជ្ជកម្ម៖ សង្គ្រាមនៅមជ្ឈិមបូព៌ាមិនប៉ះពាល់ការធ្វើពាណិជ្ជកម្មកម្ពុជា-អេមីរ៉ាតអារ៉ាប់រួមទេ

អ្នកនាំពាក្យក្រសួងពាណិជ្ជកម្ម ថ្លែងថា ការផ្ទុះឡើងសង្គ្រាមនៅតំបន់មជ្ឈិមបូព៌ា មិនមានការប៉ះពាល់ដល់ការធ្វើពាណិជ្ជកម្មរវាង កម្ពុជា ជាមួយអេមីរ៉ាតអារ៉ាប់រួមនោះទេ ខណៈបច្ចុប្បន្នបាននិងកំពុងដំណើរល្អ នឹងនៅពេលខាងមុខការធ្វើអាពាណិជ្ជកម្មរវាងភាគីទាំង ពីរ នឹងលេចឡើងនូវប្រភេទពាណិជ្ជកម្មសេវា និងពាណិជ្ជកម្មតាមប្រព័ន្ធអេឡិចត្រូនិច។ឯកឧត្តម ប៉ែន សុវិជាតិ អ្នកនាំពាក្យនិងជារដ្ឋលេខាធិការក្រសួងពាណិជ្ជកម្ម បានថ្លែងប្រាប់ BTV ស្តីពីការផ្ទុះឡើងសង្គ្រាម នៅតំបន់មជ្ឈិមបូព៌ា និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម (CEPA) នេះថា បន្ទាប់ ពីការចូលជាធរមានរវាងកម្ពុជា និងអេមីរ៉ាតអារ៉ាប់ ក្នុងរយៈពេលកន្លងមកនេះ ភាគីទាំងពីរបានបង្កើនទំហំពាណិជ្ជកម្មប្រកបដោយ ប្រសិទ្ធភាព ព្រមទាំងមានកិច្ចសហប្រតិបត្តិការមួយចំនួនថែមទៀត នៃការបើកទីផ្សារសម្រាប់ផលិតសម្រាប់នាំចេញដូចជា ផលិតផល ហាឡាល់ និងផលិតផលកសិកម្ម ដែលយើងកែច្នៃសមស្របតាមនៃទីផ្សារនាំចេញ។ឯកឧត្តម បន្តថា បច្ចុប្បន្នយើងនៅតែបន្តដើម្បីបើកច្រកទីផ្សារថ្មីៗបន្ថែមទៀតទៅកាន់តំបន់មជ្ឈិមបូព៌ា ទោះមានការផ្ទុះឡើងសង្គ្រាមនៅតំបន់មជ្ឈិមបូព៌ា តែមិនប៉ះពាល់ដល់បណ្តាប្រទេសដៃគូពាណិជ្ជកម្មផ្ទាល់នោះទេ (ដោយអឺរ៉ង់វាយលុកទៅលើមូល ដ្ឋានទ័ពអាមេរិកតែប៉ុណ្ណោះ) ដែលបញ្ហានេះ កម្ពុជានិងអេមីរ៉ាតអារ៉ាប់រួម នៅតែបន្តធ្វើយ៉ាងណាឱ្យមានចរន្តពាណិជ្ជកម្មមានការកើនឡើង និងផ្តល់ភាពវិជ្ជមានរវាងទីផ្សារទាំងពីរ។ ឯកឧត្តមបញ្ជាក់ថា អ្វីដែលជាចំណែកនៃការអនុវត្តកិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយ រវាងកម្ពុជានិងអេមីរ៉ាតអារ៉ាប់រួម (CEPA) គឺនៅតែបន្តនូវកិច្ចសហប្រតិបត្តិការ និងការជំរុញឱ្យមានទំហំពាណិជ្ជកម្ម កាន់តែកើនឡើង និងការស្វែងរកផលិតភាពផ្សេងៗទៀត ដើម្បីនាំចេញមុខទំនិញថ្មីទៅកាន់ទីផ្សារនោះបន្ថែម។ឯកឧត្តម ប៉ែន សុវិជាតិបានថ្លែងថា «ថ្វីត្បិតច្រកទីផ្សាររបស់យើងកំពុងរងគ្រោះពីសង្គ្រាមក៏ដោយយើងនៅតែបន្តអនុវត្តនូវកិច្ចសហការ ដើម្បីធ្វើយ៉ាងណាឱ្យមានចរន្ត ពាណិជ្ជកម្មឱ្យកាន់តែកើនឡើងរវាងកម្ពុជាជាមួយ UAE។សូមបញ្ជាក់ថា ការធ្វើពាណិជ្ជកម្មរវាងកម្ពុជានិងអេមីរ៉ាតអារ៉ាប់រួម បើយោងតាមរបាយការណ៍ក្រសួងពាណិជ្ជកម្ម នៅក្នុងរយៈពេល២ ខែ ដើមឆ្នាំ២០២៦ នេះ, ការធ្វើពាណិជ្ជកម្មរវាងភាគីទាំងពីរ មានទំហំទឹកប្រាក់សរុបជាង ១៥ លានដុល្លារអាម៉េរិក ក្នុងកម្ពុជាមាននាំ ចេញមានទឹកប្រាក់ជាង ១០លានដុល្លារអាម៉េរិក និងការនាំចូលមកទីផ្សារកម្ពុជា មានទឹកប្រាក់ជិត ៥ លានដុល្លារអាម៉េរិក៕ អត្ថបទ៖ សុន រ៉ាឌី

តំណាង UN ប្រចាំកម្ពុជាកោតសរសើរកម្ពុជា លើការឆ្លើយតបនឹងមេរោគអេដស៍ប្រកបដោយភាពច្នៃប្រឌិត

ព្រឹកថ្ងៃទី១៨ ខែមីនា ឆ្នាំ២០២៦ នៅអាជ្ញាធរជាតិប្រយុទ្ធនឹងជំងឺអេដស៍ មានជំនួបពិភាក្សាការងាររវាង ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងលោកជំទាវ Vladanka Andreeva អ្នកសម្របសម្រួលអង្គការសហប្រជាជាតិប្រចាំកម្ពុជា អមដោយលោកស្រី Patricia Ongpin នាយិកាអង្គការយូអិនអេដស៍ប្រចាំកម្ពុជា ឡាវ និងម៉ាឡេស៊ី។ ចូលរួមនៅក្នុងជំនួបនេះរួមមាន ឯកឧត្តម និងលោក ជាអនុប្រធាន នាយកខុទ្ទកាល័យ និងប្រធានការិយាល័យសម្របសម្រួលនៃការិយាល័យអ្នកសម្របសម្រួលអង្គការសហប្រជាជាតិប្រចាំកម្ពុជាផងដែរ។ជាកិច្ចចាប់ផ្តើម ឯកឧត្តមទេសរដ្ឋមន្រ្តីបានស្វាគមន៍លោកជំទាវ Vladanka Andreeva ដែលបានត្រលប់មកកម្ពុជាម្តងទៀតក្នុងតួនាទីថ្មីនៅអង្គការសហប្រជាជាតិ។ ឯកឧត្តមទេសរដ្ឋមន្រ្តីបានបញ្ជាក់ថា កម្ពុជាប្តេជ្ញាធ្វើការជាមួយអង្គការសហប្រជាជាតិ ព្រោះកម្ពុជាមានការជឿជាក់លើប្រព័ន្ធរបស់អង្គការសហប្រជាជាតិ ពឹងផ្អែកលើធម្មនុញ្ញអង្គការសហប្រជាជាតិ និងជឿទុកចិត្តលើច្បាប់អន្តរជាតិ។ ទន្ទឹមនឹងនេះ ឯកឧត្តមទេសរដ្ឋមន្រ្តីក៏បានសង្កត់ធ្ងន់លើភាពជាដៃគូជាមួយអង្គការយូអិនអេដស៍ ដែលក្នុងនោះកម្ពុជាត្រូវការនូវភាពជាដៃគូ ដើម្បីសម្រេចគោលដៅអភិវឌ្ឍន៍។ បន្ថែមលើនេះ ឯកឧត្តមទេសរដ្ឋមន្រ្តីបានសង្កត់ធ្ងន់ថា ដោយមានការគាំទ្រយ៉ាងរឹងមាំពីសម្តេចមហាបវរធិបតី នាយករដ្ឋមន្រ្តី កម្ពុជាបានដាក់ចេញនូវគោលនយោបាយជាតិបញ្ចប់អេដស៍ និងចីរភាព កម្មវិធីអេដស៍សម្រាប់ឆ្នាំ២០២៣-២០២៨កាលពីឆ្នាំ២០២៤ ព្រមទាំងបានរៀបចំរបាយការណ៍ស្តីពីគោលនយោបាយនេះ ក្នុងឆ្នាំ២០២៥កន្លងទៅ។បន្ទាប់មកលោកជំទាវ Vladankar Endreeva បានបង្ហាញនូវក្តីសោមនស្សចំពោះការស្វាគមន៍យ៉ាងកក់ក្តៅ និងការត្រលប់មកកម្ពុជាជាថ្មី។ លោកជំទាវបានថ្លែងការកោតសរសើរចំពោះកម្ពុជាក្នុងការឆ្លើយតបនឹងមេរោគអេដស៍ថាជាប្រទេសឈានមុខមួយ ប្រកបដោយការច្នៃប្រឌិត និងធ្វើឱ្យមានវឌ្ឍនភាព។ លោកជំទាវបានអបអរសាទរចំពោះការដាក់ចេញនូវគោលនយោបាយជាតិបញ្ចប់អេដស៍ សមាជិកភាពរបស់កម្ពុជាក្នុងក្រុមប្រឹក្សាសម្របសម្រួលអង្គការយូអិនអេដស៍(PCB) និងទស្សនកិច្ចដោយជោគជ័យរបស់លោកជំទាវ Winnie Byanyima នាយិកាប្រតិបត្តិអង្គការយូអិនអេដស៍ នៅកម្ពុជាក្នុងខែឧសភា ឆ្នាំ២០២៥។ លោកជំទាវក៏បានសម្តែងនូវការអបអរសាទរដែលកម្ពុជានឹងទទួលបានជោគជ័យជាបន្តបន្ទាប់ក្នុងការឆ្លើយតបនឹងមេរោគអេដស៍និងជំងឺអេដស៍។ ជាការឆ្លើយតប ឯកឧត្តមទេសរដ្ឋមន្រ្តីបានបញ្ជាក់ថា ដើម្បីអបអរសាទរសមិទ្ធផលថ្មីៗដែលកម្ពុជា សម្រេចបាន អាជ្ញាធរជាតិប្រយុទ្ធនឹងជំងឺអេដស៍រៀបចំទស្សនកិច្ចរបស់លោក Eamonn Murphy នាយកប្រចាំតំបន់អាស៊ី-ប៉ាស៊ីហ្វ៊ិច នៃអង្គការយូអិនអេដស៍ មកកម្ពុជា ក្នុងខែមិថុនា ឆ្នាំ២០២៦នេះ។ ឯកឧត្តមទេសរដ្ឋមន្រ្តីបានរំឭកថា ដោយជឿជាក់លើប្រព័ន្ធ កម្ពុជាបានចូលរួមថវិកាចំនួន ១០០,០០០ ដុល្លារអាមេរិកជាមួយអង្គការយូអិនអេដស៍ កាលពីឆ្នាំ២០២៥កន្លងទៅ។ជាទីបញ្ចប់ ឯកឧត្តមទេសរដ្ឋមន្រ្តីបានថ្លែងអំណរគុណចំពោះកិច្ចសហការដ៏ល្អនាពេលកន្លងមក និងសន្យាបន្តសហការជាមួយអង្គការសហប្រជាជាតិ ជាពិសេសអង្គការយូអិនអេដស៍បន្តទៅមុខទៀត ដើម្បីបញ្ចប់អេដស៍នៅកម្ពុជា៕អត្ថបទ រដ្ឋា

អាជ្ញាធរខេត្តកំពង់ឆ្នាំង បន្តពង្រឹងការពិនិត្យតម្លៃប្រេងនៅតាមស្ថាននីយ ដេប៉ូ និងអ្នកលក់សាំងដប កុំឱ្យលក់លើសតម្លៃក្រសួង បានជូនដំណឹង

កំពង់ឆ្នាំង៖ ក្រោយពីពិភពលោក បានទទួលរងនូវបញ្ហាប្រេងឡើងថ្លៃ ទាំងរាជរដ្ឋាភិបាលកម្ពុជា ក្រសួងពាក់ព័ន្ធ អាជ្ញាធរខេត្ត ស្រុកក្រុង និងឃុំសង្កាត់ តែងមមាញឹកក្នុងការចុះពិនិត្យតម្លៃប្រេងនៅតាមទីតាំងលក់ចែកចាយ គឺធ្វើយ៉ាងណា មិនអោយតម្លៃប្រេងដែលបានលក់អោយប្រជាពលរដ្ឋ មានតម្លៃលើសពីតម្លៃរបស់ក្រសួងនោះឡើយ។ ដោយមានគោលការណ៍យ៉ាងម៉ឺងម៉ាត់ពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងក្នុងការរក្សាតម្លៃប្រេងតាមក្រសួងពាណិជ្ជកម្ម លោក កុយ តេង មេឃុំកំពង់អុស ស្រុកជលគីរី ខេត្តកំពង់ឆ្នាំង នៅថ្ងៃទី១៨ ខែមីនា ឆ្នាំ២០២៦នេះ បានអោយដឹងថា៖ ជារៀងរាល់ថ្ងៃ ក្រុមប្រឹក្សាឃុំកំពង់អុស កម្លាំងប្រជាការពារភូមិ និងកម្លាំងនគរបាលប៉ុស្តិរដ្ឋបាលទាំងអស់ តែងចុះពិនិត្យតម្លៃនៅតាមដេប៉ូប្រេង និងកន្លែងលក់សាំងដប គឺធ្វើយ៉ាងណាមិនអោយអ្នកលក់ប្រេង តម្លើងថ្លៃហួសពីតម្លៃរបស់ក្រសួងឡើយ។តាមបណ្តាឃុំសង្កាត់ទាំង៧២របស់ខេត្តកំពង់ឆ្នាំង ប្រជាពលរដ្ឋ ត្រូវការជាចាំបាច់បំផុតនូវប្រេងសាំង ប្រេងម៉ាស៊ូត និងហ្គាស ប្រើប្រាស់ក្នុងជីវភាពប្រចាំថ្ងៃរបស់ខ្លួន។ ជាក់ស្តែងនៅក្នុងឃុំកំពង់អុស ស្រុកជលគីរី ប្រជាកសិករ បានប្រើប្រាស់ត្រាក់ទ័រ គោយន្ត កាណូត ម៉ូតូ ម៉ាស៊ីនច្រូតកាត់ ក៏ដូចជាម៉ាស៊ីនផ្សេងទៀតជាច្រើន ហើយម៉ាស៊ីនទាំងនេះ ត្រូវការប្រេងចាក់ ទើបប្រើប្រាស់បាន។ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង តែងតែក្រើនរំលឹកដល់អ្នកលក់ប្រេងតាមស្ថាននីយ៍នានា ដេប៉ូប្រេង និងអ្នកលក់សាំងដប សូមកុំតម្លើងថ្លៃហួសពីតម្លៃរបស់ក្រសួងពាណិជ្ជកម្ម ព្រោះការតម្លើងថ្លៃប្រេងហួសហេតុ នាំអោយបង្កជាផលវិបាកដល់ប្រជាពលរដ្ឋក្នុងការប្រើប្រាស់ និងជះឥទ្ធិពលមិនល្អដល់សន្តិសុខផងដែរ។ ប្រសិនបើអាជ្ញាធរមានសមត្ថកិច្ច រកឃើញថាម្ចាស់ស្ថាននីយ៍ប្រេង ម្ចាស់ដេប៉ូប្រេង ឬអ្នកលក់សាំងដបណាមិនគោរពលក់ចេញរបស់ក្រសួងពាណិជ្ជកម្ម និងមិនគោរពគោលការណ៍របស់អាជ្ញាធរខេត្ត អ្នកទាំងនោះនឹងត្រូវទទួលការពិន័យ ឬដកអាជ្ញាប័ណ្ណ និងបិទមិនអោយបន្តអាជីវកម្មទៀតឡើយ៕

គ្រួសាររងគ្រោះដោយសង្គ្រាមថៃឈ្លានពានចំនួន ១៩៧គ្រួសារ នៅមូលដ្ឋានស្រុកថ្មពួក ខេត្តបន្ទាយមានជ័យ ទទួលអំណោយមនុស្សធម៌ពីសាខាកាកបាទក្រហមខេត្ត

បន្ទាយមានជ័យ៖ នៅព្រឹកថ្ងៃពុធ ទី១៨ ខែមីនា ឆ្នាំ២០២៦ នេះ ឯកឧត្តម អ៊ុ រាត្រី ប្រធានគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យ បានដឹកនាំឯកឧត្តម លោកជំទាវ លោក លោកស្រី ដែលជាសមាជិក សមាជិកា គណៈកិត្តិយស គណៈកម្មាធិការ ក្រុមប្រតិបត្តិសាខា អនុសាខាស្រុក មន្ត្រីប្រចាំការ ក្រុមកាកបាទក្រហមឃុំ និងអ្នកស្ម័គ្រចិត្តភូមិ ចុះទៅសួរសុខទុក្ខ និងនាំយកអំណោយមនុស្សធម៌ផ្តល់ជូនដល់គ្រួសាររងផលប៉ះពាល់ដោយសារសង្រ្គាមឈ្លានពានរបស់ប្រទេសថៃ ចំនួន១៩៧គ្រួសារ នៅក្នុងស្រុកថ្មពួក ខេត្តបន្ទាយមានជ័យ។នាឱកាសនោះ ឯកឧត្តមប្រធានគណៈកម្មាធិការសាខា បាននាំមកនូវប្រសាសន៍ផ្តាំផ្ញើសាកសួរសុខទុក្ខ ពីឯកឧត្តម ឌិត ទីណា ប្រធានកិត្តិយសសាខាខេត្ត និងជាពិសេសពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយបងប្អូនជនរងគ្រោះដោយការឈ្លានពានពីប្រទេសថៃទាំង១៩៧គ្រួសារ។ ជាការពិតណាស់ សម្ដេចប្រធានតែងតែគិតគូរ អំពីសុខទុក្ខប្រជាពលរដ្ឋរៀងរាល់ពេល ទោះជាស្ថិតក្នុងស្ថានភាពបែបណាក៏ដោយគឺស្របតាមពាក្យស្លោក "ទីណាមានទុក្ខលំបាក ទីនោះមានកាកបាទក្រហមកម្ពុជា និង “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នាមិនទុកនរណាម្នាក់ចោល" ។ មិនតែប៉ុណ្ណោះ ឯកឧត្តមប្រធានក៏បានសំណូមពរអោយបងប្អូនប្រជាពលរដ្ឋខិតខំថែរក្សាសុខភាពឱ្យបានល្អ ដោយប្រកាន់យកនូវអនាម័យល្អ បរិស្ថានស្អាត រស់នៅស្អាត បរិភោគស្អាត ផឹកស្អាត និងសូមបង្កើនការប្រុងប្រយ័ត្នអោយបានខ្ពស់ ដោយសារអាកាសធាតុមានការប្រែប្រួលអាចមានជាភ្លៀងលាយឡំជាមួយផ្គររន្ទះ និងខ្យល់កន្ទ្រាក់ដែលអាចបង្ករគ្រោះថ្នាក់ជាយថាហេតុ។ បន្ថែមពីនេះ សូមបន្តចូលរួមក្នុងការទប់ស្កាត់ការឆ្លងរីករាលដាលនៃជំងឺឆ្លងកាចសាហាវផ្សេងៗដូចជំងឺកូវីដ-១៩ ផ្ដាសាយបក្សី(H5N1) គ្រុនចាញ់ គ្រុនឈីក-គ្រុនឈាម។ ព្រមទាំងចូលរួមកំចាត់ជំងឺមិនឆ្លងដោយមិនត្រូវបរិភោគអាហារមានរសជាតិផ្អែមពេក ប្រៃពេកកាត់បន្ថយការពិសារភេសជ្ជៈកំប៉ុង និងចូលរួមទាំងអស់គ្នាក្នុងការកាត់បន្ថយការប្រើប្រាស់ថង់ប្លាស្ទិក ព្រមទាំងបានអំពាវនាវដល់បងប្អូនប្រជាពលរដ្ឋទាំងអស់មេត្តា បង្កើនការប្រុងប្រយ័ត្នចំពោះការប្រើប្រាស់ភ្លើងអគ្គិសនី ឱ្យបានខ្ពស់នៅរដូវក្ដៅនេះផង។សម្ភារៈផ្តល់ជូនគ្រួសារនីមួយៗរួមមាន ៖ អង្ករ២៥គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ និងថវិកាមួយចំនួនផងដែរ៕

អ្នកនាំពាក្យ៖ រាជរដ្ឋាភិបាលកំពុងធ្វើសកម្មភាពការទូតសកម្មទាំងក្នុង និងក្រៅប្រទេស ដើម្បីការពារទឹកដី និងប្រជាជន

រាជរដ្ឋាភិបាលបាន និងកំពុងបង្ហាញពីភាពសកកម្មលើសមរភូមិការទូត ទាំងក្នុង និងក្រៅប្រទេស ដើម្បីពង្រឹង និងពង្រីកកិច្ចសហប្រតិបត្តិការជាមួយបណ្តាប្រទេសជាមិត្ត និងដៃគូអភិវឌ្ឍន៍ទាំងក្នុងតំបន់ និងនៅលើឆាកអន្តរជាតិ ដោយផ្សារភ្ជាប់ជាមួយ «កាតព្វកិច្ចការពារបូរណភាពទឹកដី និងប្រជាជន» ដែលត្រូវបានចាត់ទុកជាអាទិភាពខ្ពស់បំផុតរបស់រាជរដ្ឋាភិបាល។ អ្នកនាំពាក្យរាជរដ្ឋាភិបាល ឯកឧត្តម ប៉ែន បូណា បានថ្លែអតាមរយៈសន្និសីទសារព័ត៌មាននៅថ្ងៃទី១៨ ខែមីនា ឆ្នាំ២០២៦នេះថា រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាតែងតែតម្កល់សន្តិភាពជាស្នូលនៃការអភិវឌ្ឍន៍ប្រទេស។ ក្នុងន័យនេះ រាជរដ្ឋាភិបាលបាននិងកំពុងបង្ហាញពីភាពសកកម្មលើសមរភូមិការទូត ទាំងក្នុងនិងក្រៅប្រទេស ដើម្បីពង្រឹងនិងពង្រីកកិច្ចសហប្រតិបត្តិការជាមួយបណ្តាប្រទេសជាមិត្ត និងដៃគូអភិវឌ្ឍន៍ ទាំងក្នុងតំបន់ និងនៅលើឆាកអន្តរជាតិ ដោយផ្សារភ្ជាប់ជាមួយ «កាតព្វកិច្ចការពារបូរណភាពទឹកដី និងប្រជាជន» ដែលត្រូវបានចាត់ទុកជាអាទិភាពខ្ពស់បំផុតរបស់រាជរដ្ឋាភិបាល។ ជាក់ស្តែង រយៈពេលប៉ុន្មានថ្ងៃចុងក្រោយនេះ សម្តេចមហាបវរធិបតី នាយករដ្ឋមន្ត្រីបានទទួលជំនួបសម្តែងការគួរសមនិងពិភាក្សាការងារពីអង្គទូត និងដៃគូអភិវឌ្ឍន៍ មានដូចជាឯកអគ្គរដ្ឋទូតនៃសាធារណរដ្ឋកូរ៉េ និងអនុប្រធានធានាគារពិភពលោក ទទួលបន្ទុកអាស៊ីខាងកើត និងប៉ាស៊ីហ្វិក ជាដើម ដើម្បីពង្រឹងនិងពង្រីកកិច្ចសហប្រតិបត្តិការទ្វេភាគីនិងការអភិវឌ្ឍន៍សង្គម-សេដ្ឋកិច្ចកម្ពុជា។ នៅឯក្រសួងការបរទេស ក៏មានជំនួបពិភាក្សាជាបន្តបន្ទាប់ជាមួយអង្គទូត និងអ្នកសម្របសម្រួលប្រព័ន្ធអង្គការសហប្រជាជាតិប្រចាំកម្ពុជាជាដើមដើម្បីពង្រឹងនិងពង្រីកកិច្ចសហប្រតិបត្តិការ ដោយមិនភ្លេចពីជម្លោះព្រំដែនកម្ពុជាថៃ ជាពិសេសផលប៉ះពាល់មកលើប្រជាពលរដ្ឋភៀសសឹក។ នៅឯក្រៅប្រទេស ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ទើបតែបានបញ្ចប់ដំណើរទស្សនកិច្ចផ្លូវការនៅប្រទេសអូស្ត្រាលីពីថ្ងៃទី១៥ដល់១៦ ខែមីនា ឆ្នាំ ២០២៦។ ក្នុងចំណោមកិច្ចសហប្រតិបត្តិការក្នុងវិស័យជាច្រើនដែលបានលើកឡើង កិច្ចសហប្រតិបត្តិការសន្តិសុខនិងការពារជាតិក៏ជាប្រធានបទដ៏សំខាន់មួយ ដែលភាគីទាំងពីរបានលើកមកពិភាក្សា។ ប្រមុខការទូតកម្ពុជាក៏បានសម្តែងអំណរគុណអូស្ត្រាលីចំពោះការបន្តគាំទ្រការបណ្តុះបណ្តាល និងការអភិវឌ្ឍជំនាញដល់មន្ត្រីយោធាកម្ពុជា។ ចំណែកឯសភាពការណ៍ព្រំដែនកម្ពុជា-ថៃ ក៏ត្រូវបានពិភាក្សាយ៉ាងស៊ីជម្រៅ ហើយកម្ពុជាបានថ្លែងអំណរគុណអូស្ត្រាលីចំពោះការគាំទ្រជំហរដោះស្រាយជម្លោះដោយសន្តិវិធី។ អ្នកណាំពាក្យបានជម្រាបជូនថា ក្នុងដំណើរទស្សនកិច្ចមួយជុំរបស់ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅប្រទេសសិង្ហបុរី នូវែលសេឡង់ និងអូស្ត្រាលី ស្ថានការណ៍វិវត្តន៍នៅតាមបណ្តោយព្រំដែនកម្ពុជាថៃត្រូវបានពិភាក្សាយ៉ាងស៊ីជម្រៅ ដែលអនុញ្ញាតឱ្យបណ្តាដៃគូសន្ទនាបានយល់ច្បាស់ពីសភាពការណ៍ពិត ក៏ដូចជាជំហរសន្តិភាពនិយមដោយផ្អែកលើច្បាប់អន្តរជាតិរបស់កម្ពុជាដែលស្របនឹងការចង់បានរបស់សហគមន៍អន្តរជាតិ។ ដំណើរទស្សនកិច្ចផ្លូវការទៅកាន់ប្រទេសទាំងបីខាងលើរបស់ឯកឧត្តមឧបនាយករដ្ឋមន្ត្រី ប្រាក់ សុខុន បានកើតឡើងបន្ទាប់ពីដំណើរបេសកកម្មការទូតរបស់សម្តេចបវរធិបតី ហ៊ុន ម៉ាណែត នៅសហរដ្ឋអាម៉េរិកនិងអឺរ៉ុប កាលពីចុងខែកុម្ភៈ ឆ្នាំ ២០២៦ថ្មីៗនេះ។ ការណ៍នេះបានឆ្លុះបញ្ចាំងពីភាពសកម្មរបស់រាជរដ្ឋាភិបាលកម្ពុជានៅលើសមរភូមិការទូតដើម្បីឧត្តមប្រយោជន៍ជាតិ ដោយផ្សារភ្ជាប់ជាមួយអាទិភាពខ្ពស់បំផុតរបស់រាជរដ្ឋាភិបាលគឺ«ការការពារបូរណភាពទឹកដីនិងប្រជាជន»។កាលពីចុងខែកុម្ភៈកន្លងទៅថ្មីៗនេះដែរ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិ ក៏បានអញ្ជើញថ្លែងបទអន្តរាគមន៍ ក្នុងសម័យប្រជុំលើកទី ៦១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ សហព័ន្ធស្វីស ដោយបានសង្កត់ធ្ងន់អំពីសិទ្ធិមនុស្សដែលមិនអាចកាត់ផ្តាច់ចេញបានពីសន្តិភាព ខណៈដែលការអភិវឌ្ឍក៏មិនអាចកាត់ផ្តាច់បានពីសន្តិសុខ។ ចំណែកឯ ក្នុងទំនាក់ទំនងរវាងរដ្ឋនិងរដ្ឋ ការការពារសិទ្ធិមនុស្សនិងសេចក្តីថ្លៃថ្នូរ ត្រូវផ្អែកលើការគោរពយ៉ាងម៉ឺងម៉ាត់នូវអធិបតេយ្យភាព បូរណភាពទឹកដី និងច្បាប់អន្តរជាតិ។ ក្នុងន័យនេះ ការបង្កឧបសគ្គរារាំងដល់ការវិលត្រឡប់របស់ប្រជាជនស៊ីវិលកម្ពុជារាប់ម៉ឺននាក់ទៅកាន់ផ្ទះសម្បែងរបស់គេវិញ ប្រកបដោយសុវត្ថិភាពនិងសេចក្តីថ្លៃថ្នូរ គឺជាការប៉ះពាល់ធ្ងន់ធ្ងរទៅលើសិទ្ធិមនុស្ស។អ្នកនាំពាក្យរាជរដ្ឋាភិបាលបញ្ជាក់ជាថ្មីថា ក្នុងស្មារតីស្រឡាញ់សន្តិភាពនិងគោរពច្បាប់អន្តរជាតិ កម្ពុជាគោរពយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងៗទៀតដែលបានឯកភាពគ្នាក្នុងការដោះស្រាយបញ្ហាព្រំដែនដោយសន្តិវិធីតាមយន្តការJBCដើម្បីធានាដំណោះស្រាយត្រឹមត្រូវ យុត្តិធម៌ និងធានាសន្តិភាពយូរអង្វែងតាមព្រំដែនរវាងប្រទេសទាំងពីរ។ ដើម្បីសម្រេចគោលដៅនេះ រាជរដ្ឋាភិបាលបន្តបេសកកម្មកការទូតសកម្មរបស់ខ្លួនដោយឥតឈប់ឈរ។កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

ក្រសួងធនធានទឹក បើកសន្និបាតបូកសរុបលទ្ធផលការងារ របស់ក្រសួង, គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប និងលើកទិសដៅអនុវត្ត

នាព្រឹកថ្ងៃទី១៨ ខែមីនា ឆ្នាំ២០២៦នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសន្និបាតបូកសរុបលទ្ធផលការងាររបស់ក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ប្រចាំឆ្នាំ២០២៥ និងទិសដៅអនុវត្តឆ្នាំ២០២៦ នៅសាលប្រជុំនៃទីស្ដីការក្រសួងធនធានទឹក និងឧតុនិយម។ថ្លែងក្នុងអង្គពិធី ឯកឧត្តមរដ្ឋមន្ត្រី បានសម្ដែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការនៃក្រសួង-ស្ថាប័នទាំងបី ព្រមទាំងភាគីពាក់ព័ន្ធដែលបានខិតខំរួមគ្នាបំពេញភារកិច្ចរបស់ខ្លួនយ៉ាងសកម្ម រហូតសម្រេចបានលទ្ធផលជាច្រើនគួរឱ្យកត់សម្គាល់ក្នុងឆ្នាំ២០២៥ ស្របតាមផែនការសកម្មភាពដែលបានដាក់ចេញ ដើម្បីពង្រឹងសន្តិសុខទឹក ទ្រទ្រង់ប្រព័ន្ធអេកូឡូស៊ី និងកាត់បន្ថយនូវការខូចខាតដែលបណ្តាលមកពីគ្រោះធម្មជាតិ ក្នុងបរិបទនៃការប្រែប្រួលអាកាសធាតុ ជាពិសេស ដៃគូអភិវឌ្ឍន៍ទាំងអស់ ដែលបានបន្តការគាំទ្រយ៉ាងសកម្មទាំងផ្នែកបច្ចេកទេស និងហិរញ្ញវត្ថុ សម្រាប់ការគ្រប់គ្រង ការអភិរក្ស និងការអភិវឌ្ឍវិស័យធនធានទឹក និងឧតុនិយម នៅព្រះរាជាណាចក្រកម្ពុជា។ឯកឧត្តមរដ្ឋមន្ត្រី បានបញ្ជាក់ថា ក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា ក៏ដូចជាអាជ្ញាធរទន្លេសាប បាននិងកំពុងបន្តអនុវត្តយ៉ាងសកម្មនូវអាទិភាពគន្លឹះទាំង៥ នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា គឺ«មនុស្ស ផ្លូវ ទឹក ភ្លើង និង បច្ចេកវិទ្យា» ក្រោមការដឹកនាំប្រកបដោយភាពឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីឈានទៅសម្រេចបានចក្ខុវិស័យកម្ពុជាឆ្នាំ២០៣០ និងឆ្នាំ២០៥០ ដោយបានកំណត់នូវសកម្មភាពជាអាទិភាព សូចនាករ ពេលវេលាច្បាស់លាស់សម្រាប់អនុវត្ត និងយន្តការសម្រាប់ត្រួតពិនិត្យនិងវាយតម្លៃដោយផ្អែកលើក្របខ័ណ្ឌលទ្ធផល ដើម្បីទទួលបានជោគជ័យក្នុងការគ្រប់គ្រងអាងទន្លេ និងធនធានទឹកចម្រុះ ការអភិវឌ្ឍ និងការគ្រប់គ្រងធនធានទឹក និងឧតុនិយម ប្រកបដោយប្រសិទ្ធភាព ស័ក្តិសិទ្ធភាព និងនិរន្តរភាព។សូមបញ្ជាក់ថា អង្គសន្និបាតប្រព្រឹត្តទៅរយៈពេលមួយថ្ងៃដោយមានការធ្វើបទបង្ហាញចំនួន៤ របស់តំណាងអគ្គនាយកដ្ឋានកិច្ចការដ្ឋបាល និងអគ្គនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម អគ្គលេខាធិការដ្ឋានគណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប និងបទអន្តរាគមន៍ចំនួន ៤ របស់តំណាងក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងគណៈកម្មាធិការជាតិគ្រប់គ្រងគ្រោះមហន្តរាយ៕

អភិបាលខេត្តកំពង់ស្ពឺ អំពាវនាវពលរដ្ឋទុកដាក់សំរាមឱ្យត្រឹមត្រូវ និងរៀបចំភូមិឋានដើម្បីទាក់ទាញទេសចរណ៍

កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអំពាវនាវដល់សហគមន៍ និងប្រជាពលរដ្ឋទាំងអស់ ចូលរួមទុកដាក់សំរាមឱ្យបានត្រឹមត្រូវ កាត់បន្ថយប្រើប្រាស់ថង់ប្លាស្ទិក ដើម្បីជួយឱ្យសោភ័ណភាពមានភាពល្អប្រសើរ បរិស្ថានស្អាត មានកំណើនភ្ញៀវទេចរណ៍ជាតិ អន្តរជាតិមកលេងកម្សាន្តច្រើន ។ក្នុងឱកាសអញ្ជើញក្នុងកម្មវិធីបុណ្យបញ្ចុះខណ្ឌសីមាព្រះវិហារថ្មី នៅវត្តសំពៅផុស ហៅវត្តតាំងបំពង់ ស្ថិតក្នុងភូមិតាំងបំពង់ ឃុំតាសាល ស្រុកឱរ៉ាល់ នៅថ្ងៃទី១៨ ខែមីនា ឆ្នាំ២០២៦ ឯកឧត្តមអភិបាលខេត្ត មានប្រសាសន៍ថា ស្រុកឱរ៉ាល់គឺជាស្រុកមួយ ដែលធ្លាប់រងការគ្រោះដោយសង្គ្រាមរ៉ាំរ៉ៃអូសបន្លាយជាច្រើនឆ្នាំ ប៉ុន្តែក្រោមគោលនយោបាយឈ្នះឈ្នះ របស់រាជរដ្ឋាភិបាល ស្រុកនេះត្រូវបានប្រកាសនៅឆ្នាំ១៩៨៥ ដោយកាត់ចេញពីស្រុកថ្ពង និងស្រុកភ្នំស្រួច ហើយក្រោយប្រកាស សមិទ្ធផលជាច្រើនត្រូវបានផុសឡើងជាហូហែរ ក្នុងនោះរមណីយដ្ឋានធម្មជាតិ ដែលមានក្នុងស្រុកនេះ ក៏ត្រូវបានគាស់រំលើង និងធ្វើការអភិវឌ្ឍ ដើម្បីទទួលស្វាគមន៍ភ្ញៀវទេសចរណ៍ជាតិ អន្តរជាតិមកលេងកម្សាន្ត ។ឯកឧត្តមបានបន្តថា ដើម្បីឱ្យកំណើនភ្ញៀវទេសចរណ៍ មកលេងកម្សាន្តច្រើន ក្នុងស្រុកនេះ អាជ្ញាធរ សហគមន៍ និងពលរដ្ឋក្នុងមូលដ្ឋាន គប្បីរួមគ្នារៀបចំអនាម័យ និងសោភ័ណភាពនៅតាមកន្លែងសាធារណៈ តំបន់ទេសចរណ៍ វត្តអារាម និងមូលដ្ឋាននៅទូទាំងស្រុក ឱ្យបានល្អប្រសើរ ធ្វើយ៉ាងណាឱ្យសោភ័ណភាព នៃស្រុកនេះ និងទីរមណីយដ្ឋានមើលឃើញមានភាពស្រស់ស្អាត និងមានបរិស្ថានល្អ ជាទីគយគន់របស់ភ្ញៀវទេសចរជាតិ និងអន្តរជាតិ ដែលធ្វើដំណើរមកចូលរួមកម្សាន្ត សប្បាយរីករាយ ។ជាមួយនេះ ឯកឧត្តមបណ្ឌិត ជាម ច័ន្ទសោភ័ណ បានជំរុញទៅមន្ទីរបរិស្ថានខេត្ត ត្រូវសហការជាមួយអាជ្ញាធរមូលដ្ឋាន សហគមន៍ រៀបចំមានទីកន្លែងទុកដាក់សំរាម ឲ្យបានត្រឹមត្រូវ ដាំកូនឈើ ដើមផ្កានៅអមសងខាងផ្លូវ ពិសេសផ្លូវចូលទៅកាន់រមណីយដ្ឋាននានា ដើម្បីបង្កើនសោភ័ណភាពនិងភាពស្រស់បំព្រង ។គួរបញ្ជាក់ថា បច្ចុប្បន្នខេត្តកំពង់ស្ពឺ កំពុងមានរមណីយដ្ឋានទេសចរណ៍ល្បីៗ និងទាក់ទាញជាច្រើន ដូចជារមណីយដ្ឋានគិរីរម្យ ភ្នំឱរ៉ាល់ និងភ្នំខ្នងផ្សារជាដើម ជាមួយនឹងមានទឹកជ្រោះ ព្រៃប្រឹក្សា សត្វព្រៃ និងធនធានធម្មជាតិជាច្រើនទៀត ។ ដោយខេត្តមួយនេះ ក៏ជាមួយគោលដៅទេសចរណ៍មួយដែរ ក្នុងឱកាសបុណ្យចូលឆ្នាំប្រពៃណីជាតិខ្មែរ នាពេលដ៏ខ្លីខាងមុខនេះ ៕ អត្ថបទ បាន សុខរិទ្ធិ

កម្ពុជា និងរវ៉ាន់ដា ប្តេជ្ញាបន្តពង្រឹងពង្រីកទំនាក់ទំនង និងកិច្ចសហប្រតិបត្តិការល្អដែលកំពុងមានការរីកចម្រើន

ភ្នំពេញ៖ លោកជំទាវ អ៊ាត សោភា រដ្ឋមន្ត្រីស្តីទី ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម Bakuramutsa NKUBITO MANZI ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋរវ៉ាន់ដា ប្រចាំព្រះរាជាណាចក្រកម្ពុជា បានបញ្ជាក់នូវការប្តេជ្ញាបន្តពង្រឹងពង្រីកទំនាក់ទំនង និងកិច្ចសហប្រតិបត្តិការល្អរវាងកម្ពុជា និងរវ៉ាន់ដា ដែលកំពុងមានការរីកចម្រើន ចាប់តាំងពីការបង្កើតទំនាក់ទំនងការទូតក្នុងឆ្នាំ២០០៥។ ការប្តេជ្ញារបស់ភាគីទាំងពីរនៅក្នុងជំនួបពិភាក្សាកាលពីថ្ងៃទី១៧ ខែមីនា ឆ្នាំ២០២៦ នៅទីស្តីការក្រសួង។នៅក្នុងជំនួប លោកជំទាវរដ្ឋមន្ត្រីស្តីទី អរគុណរវ៉ាន់ដាដែលគាំទ្រកម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ និងសូមស្វាគមន៍គណៈប្រតិភូជាន់ខ្ពស់របស់ប្រទេសរវ៉ាន់ដា មកចូលរួមកិច្ចប្រជុំកំពូលនេះ។ ភាគីទាំងពីរក៏បានសម្តែងការប្តេជ្ញាចិត្តក្នុងការពង្រឹងបន្ថែមទៀតនូវកិច្ចសហប្រតិបត្តិការ និងការគាំទ្រគ្នាទៅវិញទៅមកក្នុងវេទិកាអន្តរជាតិ។ភាគីទាំងពីរក៏បានរំលឹកឡើងពីលទ្ធផលល្អប្រសើរនៃទស្សនកិច្ចផ្លូវការរបស់ ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅរវ៉ាន់ដា កាលពីខែវិចិ្ឆកា ឆ្នាំ២០២៥ ដែលក្នុងឱកាសនោះ មានការចុះហត្ថលេខាលើអនុស្សរណៈនៃការយោគយល់គ្នា ស្តីពីការបង្កើតការពិគ្រោះយោបល់ទ្វេភាគី និងកិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ៕ អត្ថបទ៖ វង្ស សុភាព

កម្ពុជាបន្តតវ៉ានឹងសកម្មភាពឈ្លានពាន និងកាន់កាប់ទឹកដីដោយខុសច្បាប់ដោយកងកម្លាំងប្រដាប់អាវុធថៃ

កម្ពុជាបានធ្វើការតវ៉ាជំទាស់ជាផ្លូវការមួយទៀតប្រឆាំងនឹងសកម្មភាពឈ្លានពាន និងការកាន់កាប់ទឹកដី ដោយខុសច្បាប់ជាបន្តបន្ទាប់ ដែលជាការរំលោភលើអធិបតេយ្យ និងបូរណភាពទឹកដីរបស់កម្ពុជា ដែលធ្វើឡើង ដោយកងកម្លាំងប្រដាប់អាវុធថៃ បន្ទាប់ពីបទឈប់បាញ់នៅថ្ងៃទី២៧ ខែធ្នូ ឆ្នាំ២០២៥ នៅតាមទីតាំងមួយចំនួន។ នេះបើតាមសេចក្ដីប្រកាសព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ កម្ពុជា។ក្រសួងការបរទេសកម្ពុជា បានឱ្យដឹងថា ទីតាំងដែលយោធាថៃឈ្លានពានចូលដែនធិបតេយ្យភាពកម្ពុជានោះរួមមាន នៅតំបន់ភាគអាគ្នេយ៍នៃប្រាសាទតាមាន់ធំ ខេត្តឧត្តរមានជ័យ កងកម្លាំងប្រដាប់អាវុធថៃបានប្រើ ប្រាស់គ្រឿងចក្រធុនធ្ងន់ជីកកកាយដី និងសាងសង់លេណដ្ឋានបេតុងថ្មីមួយបន្ថែមទៀត។នៅតំបន់មុំបី ខេត្តព្រះវិហារ ម្តុំភ្នំ៤៦៩ កងកម្លាំងប្រដាប់អាវុធថៃបានធ្វើសកម្មភាពឈូសឆាយដី សាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន រួមទាំងរូបសំណាកព្រះពុទ្ធផងដែរ។នៅភូមិថ្មដូន ស្រុកបន្ទាយអំពិល ខេត្តឧត្តរមានជ័យ កងកម្លាំងប្រដាប់អាវុធថៃបានធ្វើសកម្មភាព ឈូសឆាយដី និងសាងសង់ផ្លូវ ព្រមទាំងរចនាសម្ព័ន្ធអចិន្ត្រៃយ៍មួយចំនួន នៅភាគខាងលិចនៃតំបន់ ដំណាក់ស្ដេច។នៅតំបន់អានសេះ ខេត្តព្រះវិហារ កងកម្លាំងប្រដាប់អាវុធថៃបានធ្វើសកម្មភាពឈូសឆាយដី សាងសង់ ផ្លូវ និងរចនាសម្ព័ន្ធអចិន្ត្រៃយ៍មួយចំនួន ព្រមទាំងលើកទង់ជាតិថៃ។ សកម្មភាពស្រដៀងគ្នានេះត្រូវ បានគេសង្កេតឃើញកើតមាននៅទីតាំងជាច្រើន រួមទាំងនៅម្តុំច្រកទ្វារព្រំដែនអន្តរជាតិអានសេះ អូរផ្កាស្នេហ៍ ភ្នំ៦៧៧ និងភ្នំ៥០០ ដែលកងកម្លាំងប្រដាប់អាវុធថៃ រួមជាមួយព្រះសង្ឃថៃ បានសាងសង់រូបសំណាកព្រះពុទ្ធមួយអង្គ។នៅតំបន់តាថាវ ខេត្តព្រះវិហារ កងកម្លាំងប្រដាប់អាវុធថៃបានធ្វើសកម្មភាពឈូសឆាយថ្មី និង សាងសង់ផ្លូវនិងសំណង់បេតុងអចិន្ត្រៃយ៍មួយចំនួននៅក្នុងដែនអធិបតេយ្យរបស់ប្រទេសកម្ពុជា រួមទាំងម្ដុំប្រាសាទដូនទុន ភ្នំ៥០៥ ភ្នំ៣៣៣ និងតំបន់ច្រកតាថាវ។ នៅតំបន់តាសឹម និងចាក់ច្រែង ខេត្តព្រះវិហារ កងកម្លាំងប្រដាប់អាវុធថៃបានមើល ឆាយដី និងសាងសង់ផ្លូវ និងរចនាសម្ព័ន្ធអចិន្ត្រៃយ៍មួយចំនួន។ កងកម្លាំងថៃ ដោយមានជំនួយពីព្រះសង្ឃថៃ បានសាងសង់រូបសំណាកព្រះពុទ្ធមួយចំនួននៅទីតាំង ផ្សេងៗក្នុងទឹកដីកម្ពុជា រួមទាំងតំបន់តាថាវ និងភ្នំទ្រព្យ ខេត្តព្រះវិហារ តំបន់អូរស្មាច់ និងប្រាសាទខ្នារ ខេត្តឧត្តរមានជ័យ។ក្រសួងការបរទេសកម្ពុជា បញ្ជាក់ថា តំបន់ទាំងនេះស្ថិតនៅក្នុងដែនអធិបតេយ្យនៃព្រះរាជាណាចក្រកម្ពុជាទាំងស្រុង ដូចដែលបានកំណត់ ដោយផែនទីមាត្រដ្ឋាន ១:២០០.០០០ របស់គណៈកម្មការកំណត់ព្រំដែនឥណ្ឌូចិន-សៀម ស្របតាមអនុសញ្ញា បារាំង-សៀមឆ្នាំ១៩០៤ និងសន្ធិសញ្ញាបារាំង-សៀមឆ្នាំ១៩០៧។ សកម្មភាពខាងលើគឺជាការរំលោភបន្ថែម ទៀតលើមាត្រា៥ នៃអនុស្សរណៈនៃការយោគយល់គ្នារវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាល នៃព្រះរាជាណាចក្រថៃ ស្តីពីការវាស់វែង និងបោះបង្គោលព្រំដែន ដែលបានចុះហត្ថលេខានៅថ្ងៃទី១៤ ខែមិថុនា ឆ្នាំ២០០០ក៏ដូចជាចំណុចទី១ (វិធានកាត់បន្ថយភាពតានតឹង) នៃសេចក្តីប្រកាសរួម នៃកិច្ចប្រជុំពិសេសលើក ទី៣ របស់គណៈកម្មាធិការព្រំដែនទូទៅ (GBC) ដែលបានធ្វើឡើងនៅថ្ងៃទី២៧ ខែធ្នូ ឆ្នាំ២០២៥។កម្ពុជា អំពាវនាវឱ្យប្រទេសថៃបញ្ឈប់ជាបន្ទាន់នូវសកម្មភាពដែលបានធ្វើឡើងនៅក្នុងតំបន់ដូចបានរៀបរាប់ខាងលើ ឬនៅក្នុងតំបន់ផ្សេងទៀត ក្រោមកាលៈទេសៈស្រដៀងគ្នា ជៀសវាងសកម្មភាពឯកតោភាគី បន្ថែមទៀតនៅក្នុងតំបន់ខាងលើ និងធានានូវការអនុវត្តកិច្ចព្រមព្រៀង និងការរៀបចំពាក់ព័ន្ធទាំងអស់រវាង ប្រទេសទាំងពីរឱ្យបានពេញលេញ និងស្មោះត្រង់ ក្នុងគោលបំណងបន្ធូរបន្ថយស្ថានការណ៍ លើកកម្ពស់ការជឿជាក់ និងទំនុកចិត្តគ្នាទៅវិញទៅមក ព្រមទាំងរក្សាសន្តិភាព ស្ថិរភាព និងភាពជាអ្នកជិតខាងល្អតាមបណ្តោយព្រំដែន កម្ពុជា-ថៃ។រាជរដ្ឋាភិបាលកម្ពុជា បញ្ជាក់សាជាថ្មីនូវការប្តេជ្ញាចិត្តដ៏ខ្ជាប់ខ្ជួន និងឥតងាករេរបស់ខ្លួន ក្នុងការស្វែងរកដំណោះស្រាយដោយសន្តិវិធីចំពោះជម្លោះព្រំដែនជាមួយប្រទេសថៃ ក៏ដូចជាជាមួយប្រទេសជិតខាងទាំងអស់ របស់ខ្លួន តាមរយៈមធ្យោបាយសន្តិភាព ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីនានា ព្រមទាំងប្តេជ្ញា ចិត្តជាដាច់ខាតចំពោះការប្រកាន់ជំហរជាគោលការណ៍ថា ព្រំដែនមិនត្រូវផ្លាស់ប្តូរដោយកម្លាំងឡើយ៕

រដ្ឋបាលខេត្តបន្ទាយមានជ័យ ធ្វើពិធីចាប់ឆ្នោតរើសក្បាលដីឡូត៍ជូនជនភៀសសឹកចូលរស់នៅជម្រកបណ្ដោះអាសន្ន

បន្ទាយមានជ័យ៖ រដ្ឋបាលខេត្តបន្ទាយមានជ័យ នៅថ្ងៃទី១៨ ខែមីនា ឆ្នាំ២០២៦នេះ បានរៀបចំពិធីចាប់ឆ្នោតរើសក្បាលដីឡូត៍ ជូនដល់បងប្អូនជនភៀសសឹក ដើម្បីចូលរស់នៅជម្រកបណ្ដោះអាសន្ន ផ្ទះអតីតយុទ្ធជន ស្ថិតនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។ ពិធីនេះក៏មានការអញ្ជើញចូលរួមជាអធិបតីភាព ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត មានការចូលរួមឯកឧត្តម ប្រាក់ ដាវីឌ អនុប្រធានក្រុមការងាររាជរដ្ឋបាលភិបាលចុះមូលដ្ឋានខេត្តបន្ទាយមានជ័យ និងជាប្រធានក្រុមការងារចុះមូលដ្ឋានស្រុកថ្មពួក ព្រមទាំងមានការចូលរួមពី អាជ្ញាធរស្រុក ឃុំ ធ្វើឡើងនៅថ្ងៃទី១៨ ខែមីនា ឆ្នាំ២០២៦៕

បណ្ដាញសង្គម

ព័ត៌មានថ្មីៗ

អេស្តូនីនឹងមិនឃាត់នាវារុស្ស៊ីនៅក្នុងសមុទ្របាល់ទិក ដោយសារតែហានិភ័យនៃការកើនឡើងភាពតានតឹង

ប្រជាជនលីបង់នៅទីក្រុងបេរូត បង្ហាញពីភាពមិនប្រាកដប្រជា មុនពេលមានការចរចាជាមួយអ៊ីស្រាអែល

កូរ៉េខាងជើងដាក់តាំងបង្ហាញស្ករគ្រាប់រាងដូចមីស៊ីល និងរថក្រោះ នៅក្នុងពិធីតាំងពិព័រណ៍

ក្រុមអ្នកជួយសង្គ្រោះ កំពុងស្វែងរកមនុស្សបាត់ខ្លួន បន្ទាប់ពីទូកទេសចរណ៍លិចនៅភាគខាងជើងឥណ្ឌា

លីប៊ីចុះហត្ថលេខាលើថវិការដ្ឋបង្រួបបង្រួមលើកដំបូង ក្នុងរយៈពេលជាង ១ ទសវត្សរ៍

រដ្ឋមន្ត្រីនិយាយថា ប្រធានាធិបតីឥណ្ឌូនេស៊ី នឹងទៅទស្សនកិច្ចនៅរុស្ស៊ី និងជួបជាមួយលោក PUTIN

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

តំណាង UN ប្រចាំកម្ពុជាកោតសរសើរកម្ពុជា លើការឆ្លើយតបនឹងមេរោគអេដស៍ប្រកបដោយភាពច្នៃប្រឌិត

អភិបាលខេត្តកំពង់ស្ពឺ អំពាវនាវពលរដ្ឋទុកដាក់សំរាមឱ្យត្រឹមត្រូវ និងរៀបចំភូមិឋានដើម្បីទាក់ទាញទេសចរណ៍

កម្ពុជាបន្តតវ៉ានឹងសកម្មភាពឈ្លានពាន និងកាន់កាប់ទឹកដីដោយខុសច្បាប់​ដោយកងកម្លាំង​ប្រដាប់អាវុធថៃ

រដ្ឋបាលខេត្តបន្ទាយមានជ័យ ធ្វើពិធីចាប់ឆ្នោតរើសក្បាលដីឡូត៍​ជូនជនភៀសសឹកចូលរស់​នៅជម្រក​បណ្ដោះអាសន្ន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កម្ពុជាបន្តតវ៉ានឹងសកម្មភាពឈ្លានពាន និងកាន់កាប់ទឹកដីដោយខុសច្បាប់ដោយកងកម្លាំងប្រដាប់អាវុធថៃ

រដ្ឋបាលខេត្តបន្ទាយមានជ័យ ធ្វើពិធីចាប់ឆ្នោតរើសក្បាលដីឡូត៍ជូនជនភៀសសឹកចូលរស់នៅជម្រកបណ្ដោះអាសន្ន