នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កិច្ចសន្ទនារវាងកម្ពុជា-កូរ៉េ ឆ្លុះបញ្ចាំងពីការយកចិត្តទុកលើការថែទាំគាំទ្រវិនិយោគបរទេសនៅកម្ពុជា
អភិបាលខេត្តប៉ៃលិន ផ្តាំផ្ញើដល់បងប្អូនពលករដែលវិលត្រឡប់មកពីថៃ កុំព្រួយបារម្ភរឿងអត់ការងារធ្វើ ព្រោះរាជរដ្ឋាភិបាលកម្ពុជាបានត្រៀមរួចរាល់ហើយ
ឯកឧត្តមសាស្រ្តាចារ្យ ឈាង រ៉ា ចុះជួបមន្រី្តសុខាភិបាល នៅមណ្ឌលសុខភាពព្រែកលួង ដើម្បីស្វែងយល់ពីមូលដ្ឋាន និងការបម្រើសេវាសុខភាព
ពលករខ្មែរមកពីថៃថ្លែងអំណរគុណអភិបាលខេត្តប៉ៃលិនចំពោះការយកចិត្តទុកដាក់លើសុខភាពពួកគេ

ព័ត៌មានជាតិ

អាជ្ញាធរទន្លេសាបចុះឈ្វេងយល់ ប្រមូលធាតុចូលពីគ្រប់ភាគីពាក់ព័ន្ធនៅតំបន់អភិរក្សជលផលផាត់សណ្តាយ

2024/08/24 10:14:27 am        107
Facebook Telegram Linkin
កំពង់ធំ ៖ អាជ្ញាធរទន្លេសាបដឹកនាំដោយ ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប ដំណាងដ៏ខ្ពង់ខ្ពស់របស់ ឯកឧត្ដម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានចុះទៅពិនិត្យឈ្វេងយល់ អំពីការងារអភិរក្សធនធានជីវចម្រុះ នៅតំបន់អភិរក្សជលផលផាត់សណ្តាយ (លេខ២ស្ទូន) ក្នុងឃុំផាត់សណ្តាយ ស្រុកកំពង់ស្វាយ ខេត្តកំពងធំ នាព្រឹកថ្ងៃទី២៣ ខែសីហា ឆ្នាំ២០២៤ ។ ឯកឧត្តម ហ៊ែល តូនី បានបញ្ជាក់ថា ការចុះទៅពិនិត្យឈ្វេងយល់ពីការងារអភិរក្ស និងវឌ្ឍនភាព នៃការគ្រប់គ្រងធនធានជលផល ក៏ដូជីវចម្រុះនៅតំបន់អភិរក្ស ជលផលផាត់សណ្តាយនេះ គឺដេីម្បីប្រមូលធាតុចូលពីគ្រប់ភាគីពាក់ព័ន្ធ រួមទាំងសហគមន៍ ដែលកំពុងរស់នៅ និងអាស្រ័យផលនៅតំបន់នោះ យកទៅពិភាក្សាបន្ត ដេីម្បីរាយការជូនទៅរាជរដ្ឋាភិបាល ខណៈ រាជរដ្ឋាភិបាលគ្រប់ៗ អាណត្តិ បានយកចិត្តទុកដាក់យ៉ាងខ្លាំង លេីធនធានជីវចម្រុះ​ ពិសេស អាណត្តិទី៧​ដែលដឹកនាំដោយ​សម្តេច​មហាបវរ​ ហ៊ុន​ ម៉ាណែន​ ក្នុងបំណងធ្វេីយ៉ាងណាធានាឱ្យបាននូវនិរន្តរភាព។  សូមជម្រាបថា ក្នុងឱកាស នោះប្រិភូអាជ្ញាធរទន្លេសាប ដែលមាន អន្តរក្រសួង អាជ្ញាធរ ដែនដី និង សហគមន៍ បានប្រកាសគាំទ្រពេញទំហឹង ចំពោះវិធានការទប់ស្កាត់ការទន្ទ្រានដីរដ្ឋ ដីព្រៃ និងដីតំបន់ការពារធនធានធម្មជាតិតំបន់ទន្លេសាប តាមបទបញ្ជារបស់សម្តេចធិបតីនាយករដ្ឋមន្រ្តី គ្រប់គ្នាផងដែរ៕

ទេសរដ្ឋមន្ត្រី អូស្មាន ហាស្សាន់ ស្នើវិទ្យាស្ថានទស្សនៈអ៊ិស្លាមអន្តរជាតិប្រចាំតំបន់អាស៊ីបូព៌ានិងអាស៊ីអាគ្នេយ៍ជួយសហគមន៍ខ្មែរអ៊ិអ៊ិស្លាមលើផ្នែកសិក្សាធិការ

2024/08/24 07:55:44 am        96
Facebook Telegram Linkin
ភ្នំពេញ ÷ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសក កម្មពិសេស ទទួលជួបសម្តែងការគួរសម និងពិភាក្សាការងារជាមួយ ឯកឧត្តមបណ្ឌិតសាស្ត្រាចារ្យ Mohd Fauzan Norodin នាយកវិទ្យាស្ថានទស្សនៈអ៊ិស្លាមអន្តរជាតិប្រចាំតំបន់អាស៊ីបូព៌ា និងអាស៊ីអាគ្នេយ៍(IIIT) នារសៀលថ្ងៃ ទី ២៣ ខែសីហា ឆ្នាំ២០២៤ នៅវិមានសន្តិភាព។ក្នុងជំនួបនោះ ឯកឧត្តមបណ្ឌិត អូស្មាន ហាស្សាន់ បានលើកឡើងពីវឌ្ឍនៈភាពសហគមន៍អ៊ិស្លាមកម្ពុជា ក៏ដូចជាវិស័យអប់រំ ដោយបច្ចុប្បន្នមានសិស្សនិស្សិតជាច្រើន កំពុងបន្តការសិក្សាទាំងក្នុង និងក្រៅប្រទេស ហើយពួកគេបានជ្រើសរើសមុខជំនាញទាំងផ្នែកវិទ្យាសាស្ត្រ និង សាសនា។ ទន្ទឹមគ្នានេះដែរ      ឯកឧត្តមបណ្ឌិត បានស្នើឱ្យវិទ្យាស្ថានទស្សនៈអ៊ិស្លាមអន្តរជាតិប្រចាំតំបន់អាស៊ីបូព៌ា និងអាស៊ីអាគ្នេយ៍ ជួយសហគមន៍អ៊ិស្លាមលើផ្នែកសិក្សាធិការ (Academic) ការស្រាវជ្រាវ អប់រំ និងផ្នែកផ្សេងៗទៀតតាម ដែលអាចធ្វើបាន ដើម្បីចូលរួមអភិវឌ្ឍសហគមន៍អ៊ិស្លាមកម្ពុជា ក៏ដូចជាសង្គមជាតិទាំងមូល។ ចំណែកឯកឧត្តមបណ្ឌិតសាស្ត្រាចារ្យ Mohd Fauzan Norodin បានមាន ប្រសាសន៍ថា ថ្នាក់ដឹកនាំម៉ាឡេស៊ី ជាពិសេសឯកឧត្តម Dato' Seri Anwar Ibrahim នាយករដ្ឋមន្ត្រីម៉ាឡេស៊ី តែងតែកោតសសើរមិនដាច់ពីមាត់ពីភាពដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជាបច្ចុប្បន្ន ហើយបន្តមកសម្តេចធិបតី ហ៊ុន ម៉ាណែត ជានាយករដ្ឋមន្ត្រី ដែលបាននឹងកំពុងធ្វើឱ្យកម្ពុជាមានសុខដុមរមនា និងការរីកចម្រើនលើគ្រប់វិស័យយ៉ាងឆាប់រហ័ស។ ជាងនេះទៅទៀតឯកឧត្តមបណ្ឌិតសាស្ត្រាចារ្យលើកឡើងដែរថា កម្ពុជាជាប្រទេសគំរូផ្នែកសុខដុមនីយកម្មជាតិសាសន៍ និង សាសនា នៅតំបន់អាស៊ីអាគ្នេយ៍។ទន្ទឹមគ្នានេះដែរ ក្នុងនាមលោកជាអ្នករៀបចំគោលនយោបាយ Madani សម្រាប់ឯកឧត្តម Dato' Seri Anwar Ibrahim នាយករដ្ឋមន្ត្រីម៉ាឡេស៊ីក៏បានចែករំលែកអំពីផែនការយុទ្ធ សាស្ត្រ Madani ក្នុងការអភិវឌ្ឍប្រទេសម៉ាឡេស៊ី។ ដោយគោលនយោបាយ Madani មកពីពាក្យ និរន្តភាព សុភមង្គល នវានុវត្តន៍ ការគោរពជំនឿទុកចិត្ត និងការអាណិតអាសូរ។ ឯកឧត្តមបណ្ឌិតសាស្ត្រាចារ្យ ក៏បានលើកឡើងពីសារៈសំខាន់នៃប្រព័ន្ធបច្ចេក វិទ្យាឌីជីថលនិងជម្រុញឱ្យចងក្រងប្រព័ន្ធទន្និន័យសម្រាប់សហគមន៍អ៊ិស្លាមកម្ពុជា។ ទាក់ទងនឹងការស្នើសុំរបស់ឯកឧត្តមបណ្ឌិត អូស្មាន ហាស្សាន់ ខាង លើ ឯកឧត្តមបណ្ឌិតសាស្ត្រាចារ្យ បានរីករាយក្នុងការសហការជាមួយគ្នាដើម្បីអភិវឌ្ឍសហគមន៍អ៊ិស្លាមកម្ពុជា ក៏ដូចជារាជរដ្ឋាភិបាលកម្ពុជា។សូមបញ្ជាក់ដែរថា វិទ្យាស្ថានអន្តរជាតិខាងលើ គឺជាអង្គការអន្តរជាតិឈាន មុខគេដែលផ្តោតលើការផ្តល់ ផ្លេតហ្វម សម្រាប់បញ្ញវន្ត អ្នកប្រាជ្ញ និង អ្នកស្រាវ ជ្រាវ ផ្នែកមនុស្សសាស្ត្រ និងវិទ្យាសាស្ត្រសង្គម។ ជាមួយគ្នាដែរវិទ្យាស្ថានបានបង្កើតកិច្ចសហប្រតិបត្តិការជាមួយស្ថាប័ន និងអង្គការមួយចំនួននៅទូទាំងពិភពលោកឲដើម្បីអនុវត្តសកម្មភាព និងកម្មវិធីរបស់ខ្លួន។ អស់រយៈពេល៤០ ឆ្នាំមកហើយ វិទ្យាស្ថានទស្សនៈអ៊ិស្លាមអន្តរជាតិប្រចាំតំបន់អាស៊ីបូព៌ានិងអាស៊ីអាគ្នេយ៍ គឺជាសំឡេងសម្រាប់ការនិយមកណ្ដាល ភាពចម្រុះ និងភាពទំនើបនៅក្នុងទស្សនៈអ៊ិស្លាម ដោយសង្កត់ធ្ងន់លើគោលគំនិត ដូចជាការអត់ឱន ការរួម រស់ជាមួយគ្នា និងការកសាងសមត្ថភាពរបស់សហគមន៍ ដើម្បីដោះស្រាយបញ្ហាប្រឈមសកល។វិទ្យាស្ថានទស្សនៈអ៊ិស្លាមអន្តរជាតិប្រចាំតំបន់អាស៊ីបូព៌ា និងអាស៊ីអាគ្នេយ៍ នេះត្រូវបានបង្កើតឡើងមិនរកប្រាក់ចំណេញ នៅសហរដ្ឋ អាមេរិកក្នុងឆ្នាំ១៩៨១ មានទីស្នាក់ការកណ្ដាលនៅ Virginia ជាយរដ្ឋធានី Washington DC ហើយបច្ចុប្បន្ន ឯកឧត្តម Dato' Seri Anwar Ibrahim នាយករដ្ឋមន្ត្រីម៉ាឡេស៊ី គឺជាប្រធានក្រុមប្រឹក្សាភិបាល ៕ អត្ថបទ,ភារម្យ

មន្ត្រី​ជំនាញ​ជលផលកំពង់ចាម​ នៅតែបន្តចុះបង្ក្រាបឧបករណ៍នេសាទខុសច្បាប់ដូចភ្លៀងរលឹម

2024/08/23 07:06:20 pm        45
Facebook Telegram Linkin
កំពង់ចាម​៖​ ដេីម្បីចូលរួមទប់ស្កាត់​ និងបង្ក្រាបបទល្មេីសនេសាទខុសច្បាប់​នៅតាមព្រែក​ បឹង​ និងទន្លេ​ ក្នុងភូមិសាស្ត្រខេត្តកំពង់ចាម​ មន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ នៅតែបន្តចុះ​បង្ក្រាបឧបករណ៍នេសាទខុសច្បាប់ដូចភ្លៀងរលឹម។ ជាក់ស្ដែង​នៅថ្ងៃទី២៣​ ខែសីហា ឆ្នាំ២០២៤នេះ​ ខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ អធិការដ្ឋានរដ្ឋបាលជលចតុមុខ និងអាជ្ញាធរស្រុកកងមាស ដោយមានការសម្របសម្រួលពីឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល បានចំនួនបួនទីតាំង​ ក្នុងភូមិសាស្ត្រស្រុកកងមាស​ដោយកសាងសំណុំរឿងតាមនិតិវិធីច្បាប់ស្តីពីជលផល និងរុះរើកាប់បំផ្លាញចោលវត្ថុតាងនៃបទល្មើសជលផលនៅនឹងកន្លែង។ លោក​ លី​ ស្រ៉ី​ នាយខណ្ឌស្តីទី​ជលផលកំពង់ចាម​ បានឲ្យដឹងថា​ ជាលទ្ធផល​ ប្រតិបត្តិការចុះបង្រ្កាបបទល្មើសជលផលនេះដែរ​ ក្រុមការងារ​បានរុះរើកាប់បំផ្លាញចោលវត្ថុតាងនៅចំណុចផ្ទៃបឹង​ ក្នុងឃុំរាយប៉ាយ​ ស្រុកកងមាស​ ជារួមមាន៖​ឧបករណ៍លូស្បៃមុងចំនួន៧៩មាត់, របាំងស្បៃមុងប្រវែង ៤០៤០ម៉ែត្រ, បង្គោលចម្រឹងចំនួន ១៣១៥ដើម​និងបានចាក់លែងកូនត្រីចម្រុះទម្ងន់ ៩៦៧គីឡូក្រាម។ ទន្ទឹមនឹងនេះដែរ​​ លោក​ លី​ ស្រ៉ី​ នាយខណ្ឌស្តីទី​ជលផលកំពង់ចាម​ ដែលដឹកនាំផ្ទាល់​​ បានបន្តចុះអប់រំផ្សព្វផ្សាយដល់ប្រជានេសាទឈប់នេសាទនៅតំបន់​ កុំប្រើប្រាស់ឧបករណ៍ល្មើសច្បាប់​ និងស្នេីសុំឲ្យអាជ្ញាធរមូលដ្ឋានចូលរួមសហការ​រាយការណ៍និងបង្ក្រាប​ អ្វីដែលមន្ត្រីជំនាញស្នេីសុំទៀតនោះ​ គឺសូមឲ្យបងប្អូនប្រជាពលរដ្ឋចូលរួមសហការទប់ស្កាត់​ការនេសាទខុសច្បាប់​ ដេីម្បីរក្សាពូជត្រីបានច្រេីន​៕

តាមរយៈគោលនយោបាយឧបត្ថម្ភសាច់ប្រាក់ កម្មការិនីម្នាក់សល់លុយខ្ទង់ពាន់ដុល្លារក្រោយការសម្រាលកូន

2024/08/23 07:03:32 pm        112
Facebook Telegram Linkin
ភ្នំពេញ ៖ កម្មករជាស្ត្រីមានផ្ទៃពោះលើកឡើងថា ក្នុងរយៈពេល១ឆ្នាំនៃរាជរដ្ឋាភិបាលអាណត្តិថ្មី បានផ្តល់ជូនអត្ថប្រយោជន៍បន្ថែមកាន់តែច្រើន ជាពិសេសការបង្កើនប្រាក់ឧបត្ថម្ភចំពោះស្ត្រីមានផ្ទៃពោះ និង កូនមានអាយុក្រោម២ឆ្នាំ ដែលធ្វើឱ្យពួកគាត់មិនបាច់ចំណាយប្រាក់ ព្រមទាំងសល់លុយខ្ទង់ពាន់ដុល្លារពេលសម្រាលកូនទៀតផង។  អ្នកស្រី ឆម សុភា អាយុ៣៣ ឆ្នាំ ជាកម្មការិនីរោងចក្រសេងយ៉ុង លើកឡើងថា បណ្ណសមាជិក បសស និងការឧបត្ថម្ភសាច់ប្រាក់បន្ថែមផ្សេងៗទៀតពីរាជរដ្ឋាភិបាល ធ្វើឱ្យអ្នកស្រី មិនបាច់ចំណាយលុយជាងពាន់ដុល្លារ ដែលបានត្រៀមទុកសម្រាប់ការសម្រាលកូន នោះឡើយ។ អ្នកស្រីថ្លែងថា៖«ការសម្រាលកូនរបស់ខ្ញុំបើសិនជាអត់មាន ប.ស.ស. អស់ប្រហែលជាជាង១ពាន់ តែដល់ពេលយើងមាន បសសគឺយើងអាចចំណេញបានជាង១ពាន់ហ្នឹងមកវិញ ដោយសារយើងមាន ប.ស.ស. គឺរដ្ឋាភិបាលគាត់ជួយក្នុងការចំណាយផ្សេងៗ តាំងពីយើងពិនិត្យផ្ទៃពោះ រហូតដល់យើងសម្រាល យកកូនទៅចាក់វ៉ាក់សាំងផ្សេងៗ និងក្រោយពេលសម្រាល»។កម្មការិនីមកពីខេត្តពោធិ៍សាត់រូបនេះបានប្រាប់ថា មិនត្រឹមតែមិនបាច់ចំណាយលុយក្នុងការសម្រាលកូន និងសម្រាកក្នុងមន្ទីរពេទ្យនោះទេ ថែមទាំងទទួលបានលុយឧបត្ថម្ភពីរាជរដ្ឋាភិបាល ៨០ម៉ឺនរៀលទៀត សម្រាប់ការសម្រាលកូន១នាក់ ខណៈមុនពេលសម្រាលកូន អ្នកស្រីក៏ទទួលបានលុយ ៨ម៉ឺនរៀល សម្រាប់ការពិនិត្យផ្ទៃពោះម្តងៗ ទៀតផង។ អ្នកស្រីថា បើគ្មាន ប.ស.ស.ទេ អ្នកស្រីត្រូវចំណាយលើការសម្រាលកូនរហូតដល់ជាង១ពាន់ដុល្លារសហរដ្ឋអាមេរិក ប៉ុន្តែ ប.ស.ស. បានជួយឱ្យអ្នកស្រីមិនអស់ប្រាក់ ហើយថែមទាំងសល់ប្រាក់នោះវិញ។ អ្នកស្រីប្រាប់ថា៖«ការវះកាត់ ការចាក់វ៉ាក់សាំង ការពិនិត្យផ្ទៃពោះអីគឺរាជរដ្ឋាភិបាល គាត់ជួយចេញ។ និយាយពីការជាក់ស្តែងបើយើងអត់មាន ប.ស.ស. យើងត្រូវការចំណាយច្រើន បើការចំណាយប្រហែលជាជាង១ពាន់ ដោយសារការសម្រាលបើសិនជាដូចប្អូនសម្រាលដោយការវះកាត់ គឺអស់ថ្លៃមុខកាំបិតផង អស់ថ្លៃបន្ទប់ ទៅពេទ្យផង អនាម័យផង ការហូបចុកចឹងគឺចំណាយអស់ច្រើន»។ស្ត្រីសំបុរស្រអែមមានកូន២នាក់រស់នៅជាមួយគ្រួសារក្នុងបន្ទប់ជួលនៅភូមិផ្សារតូច សង្កាត់ទួលសង្កែទី១ ខណ្ឌឫស្សីកែវនិយាយថា មិនត្រឹមតែអត្ថប្រយោជន៍ក្នុងការសម្រាលកូននោះទេ ការយកចិត្តទុកដាក់របស់រាជរដ្ឋាភិបាលក្នុងការតបណ្តាញទឹក ភ្លើង នៅតាមបន្ទប់ជួល ក៏ជាការជួយសម្រាលបន្ទុកចំណាយឱ្យអ្នកស្រីអាចសន្សំលុយបានខ្លះបន្ថែមទៀត ខណៈប្រាក់ឈ្នួលអប្បបរមាមានការកើនឡើងជាបន្តបន្ទាប់ពី១ឆ្នាំទៅ១ឆ្នាំ។ អ្នកស្រីនិយាយថា៖«ធូរច្រើនបងដោយសាររដ្ឋគាត់ជួយចឹងធូរព្រោះអី បើយើងគិតទៅពីដើមឡើយ យើងអត់ប្រើភ្លើងរដ្ឋអ៊ីចឹង គឺចំណាយអស់ច្រើន ដូចថា គុណនឹង២អ៊ីចឹងណា»។ ប្តីរបស់កម្មការិនី ឆម សុភា លោក ណឹម ប៊ី អាយុជាង៥០ឆ្នាំ បានឱ្យដឹងថា គោលនយោបាយរបស់រាជរដ្ឋាភិបាលតាមរយៈការផ្តល់បណ្ណសមាជិក ប.ស.ស. និងការឧបត្ថម្ភផ្សេងៗទៀត ពិតជាបានលើកកម្ពស់ជីវភាពពលរដ្ឋ កាត់បន្ថយភាពក្រីក្របានយ៉ាងច្រើន។ លោកថា៖«បានធូរស្រាលច្រើន ហើយបានគ្រាន់ព្រោះអីបានខាងបសសជួយគាត់ជួយឧបត្ថម្ភចឹងទៅ ជីវភាពយើងក៏អត់ខ្វះខាតដែរ ចឹងវាអាចថាធូរមួយកម្រិតធំ ។ អត់មាន ប.ស.ស. ជួយ ពិបាកទាំងអស់ យើងប្រឹងដោយកម្លាំងញើសឈាមខ្លួនឯង និងថវិកាផ្ទាល់ខ្លួន ចឹងស្អីក៏ត្រូវការចំណាយ ហើយយើងត្រូវការបញ្ចេញនូវលុយផ្ទាល់ខ្លួនឯងទាំងអស់ ចឹងខ្វះខាតច្រើនមែនទែន»។សូមបញ្ជាក់ថា ស្ត្រីមានផ្ទៃពោះ ដែលបានបំពេញតាមលក្ខខណ្ឌកំណត់ ប.ស.ស. នឹងទទួលបានប្រាក់ឧបត្ថម្ភជា៣ដំណាក់កាល ស្មើនឹងចំនួន ១៥លើក គឺចាប់តាំងពីពិនិត្យផ្ទៃពោះ ពេលសម្រាលកូន រហូតដល់កូនមានអាយុក្រោម២ឆ្នាំ។ ក្នុងនោះ ដំណាក់កាលទី១ ជាដំណាក់កាលដែលស្ត្រីទៅពិនិត្យផ្ទៃពោះចំនួន ៤ដង ដោយការពិនិត្យផ្ទៃពោះក្នុងមួយដងៗនឹងទទួលបានប្រាក់ចំនួន ៨ម៉ឺនរៀល។ដំណាក់កាលទី២ នៅពេលសម្រាល នឹងទទួលបានប្រាក់ឧបត្ថម្ភចំនួន ៨០ម៉ឺនរៀលសម្រាប់កូនមួយ បើក្នុងករណីកូនភ្លោះពីរ ទទួលបានប្រាក់ឧបត្ថម្ភចំនួន ១លាន ២សែនរៀល ហើយបើកូនភ្លោះបី នឹងទទួលបានរហូតដល់ ១លាន៦សែនរៀល ព្រមទាំងប្រាក់ឧបត្ថម្ភផ្ទាល់របស់សម្ដេចតេជោ និងសម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន ៥លានរៀលបន្ថែមទៀត។ចំណែក ដំណាក់កាលទី៣ ជាដំណាក់ក្រោយសម្រាល រហូតកូនមានអាយុក្រោម២ឆ្នាំនឹងទទួលបានការឧបត្ថម្ភបន្ថែមចំនួន ១០លើក ដោយក្នុងមួយលើកៗទទួលបានថវិកាចំនួន ៨ម៉ឺនរៀល ក្នុងនោះមានការពិនិត្យសុខភាពសម្រាប់ម្តាយចំនួន៣លើក និងការចាក់វ៉ាក់សាំងសម្រាប់កូន ចំនួន៧លើក។ លើសពីនេះស្រ្តីមានផ្ទៃពោះទាំងអស់ ដែលបានបំពេញគ្រប់លក្ខខណ្ឌរបស់ ប.ស.ស នឹងទទួលបានប្រាក់បំណាច់មាតុភាពចំនួន ១២០ភាគរយ នៃប្រាក់ឈ្នួល ដោយ៣០ភាគរយទទួលបានពីម្ចាស់រោងចក្រ និង៧០ភាគរយ បានពី ប.ស.ស ព្រមទាំងអត្ថប្រយោជន៍ផេ្សងៗ ជាច្រើនទៀត។ គោលនយោបាយជាយុទ្ធសាស្ត្រថ្មីរបស់រាជរដ្ឋាភិបាល ស្តីពីការបង្កើនប្រាក់ឧបត្ថម្ភរាជរដ្ឋាភិបាលសម្រាប់សមាជិក ប.ស.ស.​ជាស្ត្រីមានផ្ទៃពោះ និងកូនអាយុក្រោម២ឆ្នាំនេះ គឺជាការយកចិត្តទុកដាក់ក្នុងការលើកកម្ពស់សុខុមាលភាព មាតា និងទារក ព្រមទាំងរួមចំណែកដោះស្រាយ បញ្ហាកង្វះអាហារូបត្ថម្ភ ចាប់តាំងពីកូនក្នុងផ្ទៃ រហូតដល់អាយុក្រោម ២ឆ្នាំ ដែលជួយជំរុញដល់ ការលូតលាស់ទាំងកាយសម្បទា និងបញ្ញាស្មារតីឱ្យស្របតាមគោល នយោបាយ ជាតិគាំពារសង្គមរបស់រាជរដ្ឋាភិបាល៕

ឯកឧត្តម ឌិត ទីណា ណែនាំកសិករបង្កើនការផលិតពូជស្រូវសំខាន់ពីរប្រភេទ ដើម្បីផ្គត់ផ្គង់ទីផ្សារ

2024/08/23 05:12:32 pm        71
Facebook Telegram Linkin
ភ្នំពេញ៖ ក្នុងដំណើរទស្សនកិច្ចចុះពិនិត្យស្ថានភាពជាក់ស្តែងរបស់រោងម៉ាស៊ីនកិនស្រូវនៅខេត្តកំពង់ស្ពឺ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តប្រជាកសិករឲ្យបង្កើនការផលិតពូជស្រូវសែនក្រអូប និងពូជស្រូវផ្កាម្លិះ ដើម្បីឆ្លើយតបតម្រូវការទីផ្សារទាំងក្នុង និងក្រៅប្រទេស ខណៈពូជស្រូវទាំងនេះកំពុងមានការចាប់អារម្មណ៍ និងមានតម្លៃខ្ពស់។នៅក្នុងកិច្ចប្រជុំមុនចុះឈ្វេងយល់សង្វាក់ផលិតកម្មនានារបស់រោងម៉ាស៊ីនកិនស្រូវ ស្ថិតនៅក្រុងឧត្តុង្គម៉ែជ័យ ខេត្តកំពង់ស្ពឺ កាលពីរសៀលថ្ងៃទី២២ ខែសីហានេះ ឯកឧត្តមរដ្ឋមន្រ្តី បានគូសបញ្ជាក់ថា អង្ករផ្កាម្លិះរបស់កម្ពុជា បានជាប់ជ័យលាភីលំដាប់ថ្នាក់ពិភពលោក ក្នុងការប្រគួតប្រជែងវេទិកាស្រូវ-អង្ករពិភពលោក៥លើកកន្លងមកហើយ។ ជ័យលាភីនេះ គឺដោយសារតែអង្ករកម្ពុជា មានរូបសម្បត្តិប្រវែងគ្រាប់អង្ករល្អ ស្មើគ្នាពណ៌សភ្លឺរលោងស្អាត ការតុបតែងវេចខ្ចប់អង្ករមានលក្ខណៈទាក់ទាញ ក្រោយចម្អិន បាយមានភាពទន់ល្អក្លិនក្រអូបប្រហើរ និងមានឱជារសឆ្ងាញ់។ឯកឧត្តម ឌិត ទីណា បានលើកឡើងបន្តថា ពូជស្រូវសែនក្រអូប ក៏ជាពូជស្រូវមួយប្រភេទរបស់កម្ពុជាដែលកំពុងទទួលបានការចាប់អារម្មណ៍ខ្លាំងផងដែរ ប៉ុន្តែកសិករហាក់មិនសូវបានធ្វើការដាំដុះនោះទេ ដោយសារតែចំណាយពេលវេលាវែង និងហុចផលមិនសាកសម។ ឯកឧត្តមបន្ថែមថា បច្ចុប្បន្នកសិករនិយមដាំដុះស្រូវចំរុះដែលចំណាយពេលវេលាខ្លី ហើយទទួលបានទិន្នផលល្អ រីឯតម្លៃក៏មិនលើសគ្នាប៉ុន្មានពីស្រូវសែនក្រអូបនេះដែរ។នាឱកាសដដែលនោះ ឯកឧត្តម ឌិត ទីណា បានលើកឡើងនូវគោលនយោបាយរបស់ក្រសួង គឺចង់ជំរុញការប្រើប្រាស់ពូជស្រូវសុទ្ធ ពូជស្រូវល្អ សែនក្រអូប និងផ្ការំដួលដែលជាពូជស្រូវយុទ្ធសាស្ត្ររបស់ខ្មែរ ហើយការកសាងបណ្តាញពូជស្រូវសុទ្ធ ពិសេសពូជស្រូវ សែនក្រអូបនិងផ្ការំដួលដែលមានតម្លៃថ្លៃ មានការចុះបញ្ជី មានវិញ្ញាបនបត្រត្រឹមត្រូវនិងមានខ្សែច្រវាក់ទីផ្សារល្អ លើសពីនេះ ត្រូវកសាងទំនុកចិត្តគ្នាទៅវិញទៅមក និងត្រូវអនុវត្តផលិតកម្មតាមផែនការនិងកិច្ចសន្យា ដើម្បីធានានូវស្ថិរភាពនៃការផ្គត់ផ្គង់និងមានតម្លៃល្អ។ ឯកឧត្តម ក៏បានជំរុញឱ្យកសិករផលិតស្រូវពូជ ត្រូវយកចិត្តទុកដាក់ផលិតពូជស្រូវល្អ សែនក្រអូប និងផ្ការំដួល ដើម្បីឆ្លើយតបនឹងតម្រូវការទីផ្សារនិងការប្រើប្រាស់ សហគមន៍កសិកម្ម ត្រូវធ្វើការផ្សព្វផ្សាយចលនាពូជសុទ្ធ និងជំរុញការប្រើប្រាស់ពូជសុទ្ធឱ្យកាន់តែធំទូលាយ ទាំងអ្នកប្រើស្រូវចំណី ដើម្បីពង្រីកឱ្យធំ ព្រោះមានទីផ្សារពូជស្រូវល្អនិងតម្លៃល្អ។សូមជម្រាបជូនថា ដើម្បីជំរុញដល់ការនាំចេញ ក៏ដូចជាផ្សព្វផ្សាយអំពីសក្តានុពលរបស់វិស័យស្រូវអង្ករកម្ពុជា រដ្ឋមន្រ្តីចំនួន ៣រូប រួមមាន៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម , ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវតន៍ , ឯកឧត្តម ឌិត ទីណា ក្រសួងកសិកម្ម រុក្ខាប្រមាញ់ និងនេសាទ និងឯកឧត្តមបណ្ឌិត កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម បានអញ្ញើញធ្វើដំណើរទស្សនកិច្ចទៅកាន់រោងម៉ាស៊ីនស្រូវចំនួនពីរ ដែលជាសមាជិកសហព័ន្ធស្រូវអង្ករកម្ពុជា ក្នុងគោលបំណងដើម្បីពិនិត្យមើលទិដ្ឋភាពនៃសមត្ថភាព គុណភាព បច្ចេកវិទ្យា និងទំនើបកម្មរបស់រោងម៉ាស៊ីនកិនស្រូវនៅកម្ពុជា និងផ្សព្វផ្សាយអំពីសក្តានុពលរបស់វិស័យស្រូវអង្ករកម្ពុជាដោយឈរលើមូលដ្ឋាន (ដាំដុះមានគុណភាពល្អ កិនកែច្នៃប្រកបដោយសុវត្ថិភាព និងទីផ្សារដែលមាននិរន្តរភាព ព្រមទាំង ប្រាក់ចំណេញ ដោយមានការជួយជ្រោមជ្រែងពីរាជរដ្ឋាភិបាលតាមរយៈគោលនយោបាយនានា)៕

រាជរដ្ឋាភិបាលសម្រេចបន្តសេវាផ្តល់លិខិតឆ្លងដែនធម្មតានៅសាធារណរដ្ឋកូរ៉េចំនួន៦០ថ្ងៃបន្ថែមទៀត ដោយគិតចាប់ពីថ្ងៃទី៤ ខែកញ្ញា ដល់ថ្ងៃទី២ ខែវិច្ឆិកា ឆ្នាំ២០២៤

2024/08/23 05:01:17 pm        95
Facebook Telegram Linkin
ភ្នំពេញ៖រាជរដ្ឋាភិបាលសម្រេចបន្តសេវាផ្តល់លិខិតឆ្លងដែនធម្មតានៅសាធារណរដ្ឋកូរ៉េចំនួន៦០ថ្ងៃបន្ថែមទៀត ដោយគិតចាប់ពីថ្ងៃទី៤ ខែកញ្ញា ដល់ថ្ងៃទី២ ខែវិច្ឆិកា ឆ្នាំ២០២៤។ នេះបើយោងតាមសេចក្ដីជូនដំណឹងរបស់ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ នារសៀលថ្ងៃទី២៣ ខែសីហា ឆ្នាំ ២០២៤នេះ។ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានជម្រាបជូនដំណឹងដល់ សាធារណៈជនទាំងអស់ថា ផ្អែកតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងយោងសេចក្តីជូនដំណឹងរបស់ក្រសួងមហាផ្ទៃ លេខ ០៥២ សជណចុះថ្ងៃទី៥ ខែមករា ឆ្នាំ២០២៤ ស្ថានទូតបានដាក់ឱ្យដំណើរការសេវាផ្តល់ លិខិតឆ្លងដែនធម្មតា ជូនប្រជាពលរដ្ឋ និងពលករកម្ពុជា ដែលកំពុងស្នាក់នៅ និងធ្វើការនៅសាធារណរដ្ឋកូរ៉េ ដើម្បីសម្រួលដល់ការលំបាក និងកាត់បន្ថយថ្លៃចំណាយផ្សេងៗ ដែលក្នុងជំហានដំបូង គិតចាប់ពីថ្ងៃទី១០ ខែមករា ឆ្នាំ២០២៤ ដល់ថ្ងៃទី៣០ ខែមេសា ឆ្នាំ២០២៤ ដូចមានសេចក្តីជូនដំណឹងរបស់ស្ថានទូត ចុះថ្ងៃទី ០៩ ខែមករា ឆ្នាំ២០២៤។ក្នុងឱកាសអញ្ជើញមកបំពេញទស្សនៈកិច្ចផ្លូវការរបស់សម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រីនៃព្រះរាជាណាចក្រកម្ពុជា នៅសា.កូរ៉េ ចាប់ពីថ្ងៃទី ១៥ ដល់ថ្ងៃទី១៨ ខែឧសភា ឆ្នាំ២០២៤ សម្តេច មហាបវរធិបតីនាយករដ្ឋមន្ត្រី បានអញ្ជើញជួបសំណេះសំណាលជាមួយបងប្អូនសហគមន៍ខ្មែរនៅសា.កូរ៉េ ដែលក្នុងឱកាសនោះ សម្តេចមហាបវរធិបតីនាយករដ្ឋមន្ត្រី បានប្រកាសឱ្យបន្តការផ្តល់សេវាធ្វើលិខិតឆ្លងដែនជូនពលរដ្ឋខ្មែរ រយៈពេល ៣ ខែ បន្តទៀត គិតចាប់ពីថ្ងៃទី ២០ ខែឧសភា ឆ្នាំ២០២៤ ដល់ថ្ងៃទី ២៥ ខែសីហា ឆ្នាំ២០២៤ ដូចមានសេចក្តីជូនដំណឹងរបស់ស្ថានទូតចុះថ្ងៃទី ២០ ខែឧសភា ឆ្នាំ២០២៤។យោងតាមការវាយតម្លៃទៅលើចំនួននៃការដាក់ពាក្យស្នើសុំធ្វើលិខិតឆ្លងដែន របស់ពលរដ្ឋខ្មែរ នៅ មិនទាន់សម្រេចបានទៅតាមចំនួនដែលបានរំពឹងទុកនៅឡើយ ស្របពេលដែលបងប្អូនពលរដ្ឋខ្មែរយើង នៅតែបន្តអញ្ជើញមកដាក់ពាក្យស្នើសុំជាបន្តបន្ទាប់ ដូច្នេះ ស្ថានទូតក៏បានស្នើសុំគោលការណ៍ពីប្រមុខ រាជរដ្ឋាភិបាល ដើម្បីបន្តសេវាផ្តល់លិខិតឆ្លងដែននេះ មួយរយៈទៀត។ក្នុងន័យនេះដោយបានទទួលគោលការណ៍សម្រេចដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ស្ថានឯកអគ្គរាជទូតកម្ពុជាប្រចាំសា.កូរ៉េ មានសេចក្តីសោមនស្ស រីករាយ សូមជម្រាបជូនដំណឹងដល់បងប្អូនប្រជាពលរដ្ឋខ្មែរ ដែលកំពុងរស់នៅ និងធ្វើការនៅសា.កូរ៉េ ជ្រាបថា ស្ថានទូតនឹងបន្តសេវាផ្តល់លិខិតឆ្លងដែនធម្មតានៅសា.កូរ៉េ ចំនួន ៦០ ថ្ងៃទៀត ដោយគិតចាប់ពីថ្ងៃទី ០៤ ខែកញ្ញា ឆ្នាំ២០២៤ ដល់ថ្ងៃទី០២ ខែវិច្ឆិកា ឆ្នាំ២០២៤ (ចាប់ពីថ្ងៃពុធ ដល់ថ្ងៃអាទិត្យ ជារៀងរាល់សប្តាហ៍៕

ក្រុមការងារមន្ទីរធនធានទឹក បូមទឹកជួយសង្រ្គោះស្រូវវស្សា ដែលរងផលប៉ះពាល់ក្រៀមស្វិតចំនួន ៨០០ហិកតា

2024/08/23 04:48:41 pm        1143
Facebook Telegram Linkin
មន្រ្តីជំនាញនៃមន្ទីរធនធានទឹក និងឧតុនិយមខេត្តឧត្តរមានជ័យ នៅរសៀលថ្ងៃទី២២ សីហា ឆ្នាំ២០២៤នេះ បាន​ដឹកនាំក្រុមការងារ​ចុះធ្វើការ​ជួយអន្តរាគមន៍​បូមទឹក​សង្រ្គោះដល់ស្រូវវស្សា​របស់ប្រជាពលរដ្ឋដែលរងផលប៉ះពាល់ក្រៀមស្វិតដោយ​កត្តា​អាកាសធាតុ​រាំងស្ងួត​ចំនួន៨០០ហិកតា មានប្រជាពលរដ្ឋប្រមាណ១០៥០គ្រួសារ ស្ថិតនៅចំណុចភូមិកោគវត្ត ភូមិព្រៃធំ ឃុំចុងកាល់ និងភូមិជើងទៀន ភូមិកោគពង្រ ភូមិស្រែប្រាំង ឃុំជើងទៀន ស្រុកចុងកាល់ ខេត្តឧត្តរមានជ័យ។លោក ញឺន កួន ប្រធានមន្ទីរធនធានទឹក និងឧតុនិយម ​ខេត្តឧត្តរមានជ័យ ​បានឲ្យដឹងថា នៅ​រសៀល​ថ្ងៃទី២២ ខែសីហា ឆ្នាំ២០២៤នេះ ដោយមើលឃើញពីបញ្ហាអាកាសធាតុនៅតែប្រឈម ពុំមាន​ភ្លៀងធ្លាក់គ្រប់គ្រាន់ នៅក្នុងភូមិសាស្រ្តខេត្តឧត្តរមានជ័យ តាមបណ្តាលក្រុងស្រុក​មួយចំនួន​នោះ​ជួប​បញ្ហារាំងស្ងួត​ លោក​បាន​បញ្ជូន​គ្រឿងចក្រ ​និងម៉ាស៊ីនបូមទឹកខ្នាតមធ្យមកម្លាំង ៦៥សេះ ចំនួន ០៤គ្រឿង ចុះ​អន្តរាគមន៍​បូមទឹក​ ដើម្បី​ជួយ​សង្រោះ​ដល់​ស្រូវ​រដូវវស្សារបស់​ប្រជាពលរដ្ឋ ដែលកំពុង​ជួប​ប្រទះ​គ្រោះរាំងស្ងួត ​លើដំណាំ​ស្រូវវស្សាចំនួន ៨​០០ហិកតា ដែល​អូសប្រភពទឹកពីតំបន់​អាងទឹកស្ទឹងស្រែង១ ។លោកបន្តថា​ បញ្ហាជួបប្រទះគ្រោះរាំងស្ងួត​លើ​ដំណាំស្រូវរបស់​ប្រជាពលរដ្ឋនោះ​មិន​ប្រឈម​ណាស់​ណា​ប៉ុន្មាន​នោះទេ​ ដោយតំបន់ខ្លះ​មាន​ប្រភព​ទឹក ​និង​តំបន់ខ្លះ​នៅឆ្ងាយពីប្រភព​ទឹក​មិនអាច​ទៅ​ដល់​ ប៉ុន្តែប្រសិនបើមានភ្លៀងធ្លាក់ខ្លះៗ​វិញនោះ ​វានឹងមានការ​លូតលាស់​ដូច​ធម្មតា​វិញ​ផង​ដែរ​៕

សមត្ថកិច្ចក្រុងប៉ៃលិនឃាត់ខ្លួនជនសង្ស័យលួចកាត់ខ្សែភ្លើងនិងអាគុយសូឡារបស់សាខាអគ្គិសនីកម្ពុជា

2024/08/23 03:59:05 pm        1189
Facebook Telegram Linkin
ប៉ៃលិន៖ ក្រោយពីទទួលពាក្យបណ្តឹងពីជនរងគ្រោះ ករណីបាត់ខ្សែភ្លើង អាគុយសូឡា និងសម្ភារមួយ ចំនួនរបស់អគ្គិសនីកម្ពុជាសាខាប៉ៃលិន កម្លាំងនគរបាលក្រុងប៉ៃលិន សហការជាមួយកម្លាំងប៉ុស្តិ៍រដ្ឋបាល សង្កាត់ប៉ៃលិន - អូរតាវ៉ៅ បានប្រតិបត្តិការបង្ក្រាបជនសង្ស័យម្នាក់ នៅចំណុចមុខមន្ទីរពេទ្យបង្អែកខេត្តប៉ៃ លិន ។វរសេនីយ៍ឯក យ៉ែម សារិទ្ធ អធិការនគរបាលក្រុងប៉ៃលិន បានឱ្យដឹងថា នាថ្ងៃទី២២ ខែសីហា នេះ បន្ទាប់ពីទទួលពាក្យបាន បណ្តឹង កម្លាំងសមត្ថកិច្ចជំនាញ បានសហការគ្នាយ៉ាងយកចិត្តទុក ធ្វើការស្រាវ ជ្រាវរហូតបានឃើញជនសង្ស័យកំពុងជិះម៉ូតូដឹកសម្ភារដែលបានលួច និងធ្វើការបង្រ្កាបតែម្តង។ ជន សង្ស័យឈ្មោះ ទឹម រាំបូ ភេទ ប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន មានផ្ទុកសារធាតុញៀន ចំណែកបក្សពួកបានរត់គេចខ្លួន ។វរសេនីយ៍ឯក បានឱ្យដឹងថា វត្ថុតាងដែលរឹបអូសបាន រួមមាន៖ អាគុយសូឡា ចំនួនបួនគ្រាប់ ខ្សែ ភ្លើង ចំនួនបីដុំ ប្រវែងប្រហែល៥០ម៉ែត្រ ឧបករណ៍ទប់ភ្លើងប្រភេទAVR មួយគ្រាប់ អាំងម៉ូទ័រ ពីរគ្រាប់ ដុំDRC មួយគ្រឿង និងសម្ភារសម្រាប់កាត់ខ្សែភ្លើងមួយចំនួនទៀត។វរសេនីយ៍ឯក យ៉ែម សារិទ្ធ អធិការនគរបាលក្រុងប៉ៃលិន បានបញ្ជាក់ថា ជនសង្ស័យ បានឆ្លើយ សារភាពថា ខ្លួន និងបក្សពួក ពិតជាបានធ្វើសកម្មភាពលួចកាត់ខ្សែភ្លើង លួចអាគុយសូឡា និងសម្ភារមួយ ចំនួនទៀតមែន ។ បច្ចុប្បន្ន ជនសង្ស័យនេះ ត្រូវបានឃាត់ខ្លួននៅអធិការដ្ឋាននគរបាលក្រុងប៉ៃលិនដើម្បី អនុវត្តនីតិ វិធីបន្ត ៕

គណៈកម្មាធិការជាតិគ្រប់គ្រងគ្រោះមហន្តរាយ និង WFP ចុះMOU កាត់បន្ថយហានិភ័យគ្រោះមហន្តរាយនៅកម្ពុជារយះពេល5ឆ្នាំ

2024/08/23 03:05:21 pm        45
Facebook Telegram Linkin
ភ្នំពេញ ៖ ពិធីចុះហត្ថលេខារួមគ្នាលើកិច្ចព្រមព្រៀង ដើម្បីអនុវត្តផែនការយុទ្ធ សាស្ត្រក្នុងការកាត់បន្ថយហានិភ័យគ្រោះមហន្តរាយនៅកម្ពុជា ឆ្នាំ ២០២៤ - ២០២៨ រវាងគណៈកម្មាធិការជាតិគ្រប់គ្រងគ្រោះមហន្តរាយ និងកម្មវិធីស្បៀង អាហារពិភពលោកប្រចាំកម្ពុជា នេះធ្វើឡើងនៅនៅទីស្តីការ គ.ជ.គ.ម.នាថ្ងៃទី២៣ ខែសីហា ឆ្នាំ ២០២៤ ក្រោមអធិបតីភាពឯកឧត្តម ហង្ស សាមឿន អនុប្រធានទី២ នៃ គ.ជ.គ.ម. តំណាងឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងលោក ស្រី ឃ្លែរ ខូណាន់ (Claire Conan) តំណាងអង្គការកម្មវិធីស្បៀង អាហារពិភព លោកប្រចាំកម្ពុជា (World Food Program- WFP) និងមាន ការចូលរួមពីមន្ត្រីបច្ចេកទេសគ.ជ.គ.ម. ដើម្បីបន្តនិងតាមដានលើការងារគ្រោះ មហន្តរាយនៅកម្ពុជា។    គោលបំណងនៃពិគ្រោះយោបល់បន្ថែមរវាងគណៈកម្មាធិការជាតិគ្រប់គ្រងគ្រោះមហន្តរាយ និង អង្គការកម្មវិធីស្បៀងអាហារពិភពលោកប្រចាំកម្ពុជា រកភាពខ្លាំងនិងភាពខ្សោយតាមតំបន់ងាយរកគ្រោះដោយគ្រោះមហន្តរាយនៅកម្ពុជា។ ម្យ៉ាងវិញទៀតគោលដៅសំខាន់គឺដើម្បីពិភាក្សាអំពីស្ថានភាពនៃគំនិតផ្តួចផ្តើមមានចំនួនបី៖ ការវាយតម្លៃភាពងាយរងគ្រោះ និងហានិភ័យ (VRA) ការតាមដាន និងវាយតម្លៃ (M&E) និងកម្មវិធីការព្រមានជាមុនសម្រាប់ទាំង អស់គ្នា (EW4All) ដើម្បីឈានទៅរកទិសដៅបន្តនិងកិច្ចសហប្រតិបត្តិការក៏ ដូចជាធ្វើពិធីចុះអនុស្សារណៈ សម្រាប់កិច្ចព្រមព្រៀងជំនួយបច្ចេកទេសសម្រាប់ភាពយោគយល់គ្នាគ.ជ.គ.ម. និងWFP។ទន្ទឹមនឹងនេះ ក្នុងការបន្តនូវគោលដៅ និងយុទ្ធសាស្ត្ររបស់ WFP ក៏ដូចជាគោលនយោបាយរបស់រដ្ឋាភិបាល ដែលផ្តល់អាទិភាពដល់សន្តិសុខស្បៀង និងអាហារូបត្ថម្ភជាបញ្ហាអភិវឌ្ឍន៍សំខាន់ WFP កំពុងរួមចំណែកដល់ការអភិវឌ្ឍនិងការពង្រឹងសមត្ថភាពជាតិនៃព្រះរាជាណាចក្រកម្ពុជា ដើម្បីសម្រេចបាននូវភាពអត់ឃ្លាន គ្មានការលើកកំពស់សមត្ថភាពគ្រោះមហន្តរាយថ្នាក់ជាតិ និងថ្នាក់ក្រោមជាតិ ដើម្បីដោះស្រាយវិបត្តិ និងគ្រោះមហន្តរាយនៅកម្ពុជា។ល។រាជរដ្ឋាភិបាលទទួលស្គាល់ WFP ជាអង្គការមនុស្សធម៌ដ៏ធំបំផុតរបស់ពិភព លោក ជួយសង្គ្រោះជីវិតក្នុងគ្រាអាសន្ន និងប្រើ ប្រាស់ជំនួយស្បៀងអាហារដើម្បីកសាងផ្លូវទៅកាន់សន្តិភាព ស្ថិរភាព និងវិបុលភាពសម្រាប់ប្រជាជនដែលងើបឡើងវិញពីគ្រោះមហន្តរាយ និងផលប៉ះពាល់នៃការប្រែប្រួលអាកាស ធាតុ។ការពង្រឹងប្រព័ន្ធគ្រប់គ្រងទិន្នន័យ ទិន្នន័យអាកាសធាតុ និងការវិភាគដែលគាំទ្រដល់ការសម្រេចចិត្ត ជម្រុញការអនុវត្តអភិក្រមសកម្មភាពសម្រាប់ការកាត់បន្ថយផល់ប៉ះពាល់អវិជ្ជមានពីគ្រោះមហន្តរាយ ការផ្សព្វផ្សាយសកម្ម ភាព សកម្មភាពព្យាករណ៍ ការពង្រឹងក្របខណ្ឌច្បាប់ដែលគាំទ្រការគ្រប់គ្រងហានិភ័យគ្រោះមហន្តរាយ និងការពង្រឹងបន្ថែម លើយន្តការសម្របសម្រួល និងការទំនាក់ទំនង ដើម្បីធានាបាននូវកិច្ចខិតខំប្រឹងប្រែងឆ្លើយតបប្រកបដោយប្រសិទ្ធភាព។ គ.ជ.គ.ម. នឹងសម្របសម្រួល និងអនុវត្តសកម្មភាពដែលបានស្នើឡើង ដោយសហការជាមួយការិយាល័យពាក់ព័ន្ធនៅ ថ្នាក់ជាតិ (ឆ្លើយតប និងស្តាឡើងវិញ អប់រំផ្សព្វផ្សាយ និងបណ្តុះបណ្តាល គ្រប់គ្រងព័ត៌មានគ្រោះ មហន្តរាយ និងផែនការនឹងស្រាវជ្រាវ) និងថ្នាក់ក្រោមជាតិ (លេខាធិការគ្រោះ មហន្តរាយខេត្ត ស្រុក និងឃុំ សម្រាប់ការគ្រប់គ្រងគ្រោះមហន្តរាយ អាជ្ញាធរមូលដ្ឋាន) និងជាមួយក្រសួងស្ថាប័នពាក់ព័ន្ធនានា កាកបាទក្រហមកម្ពុជា និងដៃគូអភិវឌ្ឍន៍ និង មនុស្សធម៍ផងដែរ។សូមបញ្ជាក់ថា ដំណើរការនៅក្នុងព្រះរាជាណាចក្រកម្ពុជាក្រោមក្របខណ្ឌនៃកិច្ចព្រមព្រៀងជាមូលដ្ឋានមួយដែលបានចុះរវាងរដ្ឋាភិបាលកម្ពុជា និង WFP នៅក្នុងឆ្នាំ២០០៦បានធ្វើ ("កិច្ចព្រមព្រៀងមូលដ្ឋាន")។ កិច្ចព្រមព្រៀងនេះជាការបំពេញបន្ថែមទៅនឹងកិច្ចព្រមព្រៀងជាមូលដ្ឋាន ហើយបទប្បញ្ញត្តិនៃកិច្ចព្រមព្រៀងមូលដ្ឋានត្រូវអនុវត្តទាំងស្រុង និងដោយគ្មានករណីលើកលែងចំពោះកិច្ចព្រមព្រៀងនេះ៕ អត្ថបទ៖ភារម្យ

គ្រូពេទ្យឯកទេសសួត និងផ្លូវដង្ហើម នៃមនី្ទរពេទ្យមិត្តភាពខ្មែរ-សូវៀត ចែករំលែកពីជំងឺផ្តាសាយបក្សី និងផ្តាសាយធម្មតា

2024/08/23 03:00:37 pm        106
Facebook Telegram Linkin
ភ្នំពេញ ៖ លោកវេជ្ជបណ្ឌិត វ៉ា ម៉េង ប្រធានមជ្ឈមណ្ឌលឯកទេសជំងឺសួត និងផ្លូវដង្ហើម នៃមនី្ទរពេទ្យមិត្តភាពខ្មែរ-សូវៀត នាព្រឹកថ្ងៃទី២៣ ខែសីហា ឆ្នាំ២០២៤នេះ បានចែករំលែកអំពីបញ្ហាជំងឺផ្តាសាយបក្សី និងផ្តាសាយធម្មការ ដែលកើតមានក្នុងមនី្ទរពេទ្យ ក៏ដូចជាស្ថានភាពទូទៅក្នុងប្រទេសកម្ពុជានាពេលបច្ចុប្បន្ននេះ។ដោយយោងទៅតាមបទពិសោធន៍ការងាររបស់លោកវេជ្ជបណ្ឌិត វ៉ា ម៉េង ដែលមានករណីផ្ទុះឡើងនៃការរីករាលជំងឺកូវីដ-១៩កន្លងទៅនេះ ក៏ដូចជាបានចូលរួមជាច្រើនក្នុងការទប់ស្កាត់ជំងឺដែលងាយរាតត្បាត។ បច្ចុប្បន្នទាក់ទងនឹងជំងឺផ្តាសាយ មានការកើនឡើងគួរឲ្យកត់សម្គាល់ លើសពីនេះទៅទៀត ក៏មានករណីធ្ងន់ ជាពិសេសមានរហូតដល់ការបាត់បង់អាយុជីវិត ដែលថ្មីៗនេះ មានអ្នកជំងឺផ្តាសាយបក្សីH5N1។ ករណីនេះបានកើតឡើងលើកុមារី ដែលមានអាយុ១៥ឆ្នាំ រស់នៅខេត្តព្រៃវែង ដែលអ្នកជំងឺនេះពិតជាធ្ងន់ នៅពេលមកសម្រាកព្យាបាលនៅក្នុងមនី្ទរពេទ្យមិត្តភាពខ្មែរ សូវៀត។ ចំណែកបងប្អូនប្រជាពលរដ្ឋរស់នៅក្នុងរាជធានីភ្នំពេញ និងខេត្តកណ្តាល អញ្ជើញមកទទួលសេវាពិនិត្យសុខភាព នៅមជ្ឈមណ្ឌលឯកទេសជំងឺសួត និងផ្លូវដង្ហើម នៃមនី្ទរពេទ្យមិត្តភាពខ្មែរ-សូវៀត បាននិយាយរួមគ្នាថា គ្រូពេទ្យបានយកចិត្តទុកដាក់ខ្លាំង និងបានផ្តល់យោបល់ល្អៗ ឲ្យពួកគាត់យកចិត្តថែរក្សាសុខភាព ធ្វើឲ្យគាត់មានភាពកក់ក្តៅ និងពិតជាសប្បាយចិត្តមែនទែន។ ....សម្លេងប្រជាពលរដ្ឋ២រូប យកជាង០១នាទី....(sound 02) ជាចុងក្រោយលោកវេជ្ជបណ្ឌិត វ៉ា ម៉េង សូមលើកទឹកចិត្តឲ្យពុក ម៉ែ បងប្អូន ប្រជាពលរដ្ឋទាំងអស់ មកទទួលសេវាពិគ្រោះជំងឺនៅមនី្ទរពេទ្យណាដែលនៅជិតផ្ទះរបស់ពុក ម៉ែ បងប្អូន ប្រជាពលរដ្ឋ ដើម្បីទទួលការស្វែងរក ក៏ដូចជាទទួលការព្យាបាលឲ្យបានទាន់ពេលវេលា ដើម្បីកាត់បន្ថយអត្រាឈឺ អត្រាមរណៈភាព ដើម្បីកាត់បន្ថយនូវអត្រាដែលប្រឈមមុខទៅលើការខូចខាតសាច់សួត ក្នុងទម្រង់ធ្ងន់ធ្ងរដែលមិនអាចត្រឡប់មកវិញ៕អត្ថបទ រដ្ឋ

បណ្ដាញសង្គម

ព័ត៌មានថ្មីៗ

កិច្ចសន្ទនារវាងកម្ពុជា-កូរ៉េ ឆ្លុះបញ្ចាំងពីការយកចិត្តទុកលើការថែទាំគាំទ្រវិនិយោគបរទេសនៅកម្ពុជា
06/25/2025 09:06 PM
Facebook Telegram Linkin
ក្រុមហ៊ុននេប៉ាល់ ប្រើប្រាស់យានដ្រូន ដើម្បីដឹកជញ្ជូនសម្ភារៈ និងកាកសំណល់នៅលើភ្នំ Everest
06/25/2025 08:06 PM
Facebook Telegram Linkin
លោក Macron ៖ អឺរ៉ុបនឹងចំណាយបន្ថែមទៀតលើថ្លៃការពារ ដើម្បីប្រឈមការគំរាមកំហែងពីរុស្ស៊ី
06/25/2025 08:06 PM
Facebook Telegram Linkin
ពលរដ្ឋហ្កាហ្សាចូលរួមពិធីបុណ្យសពអ្នកកាសែតដែលត្រូវបានសម្លាប់ក្នុងការវាយប្រហាររបស់អ៊ីស្រាអែល
06/25/2025 07:06 PM
Facebook Telegram Linkin
អាកាសយានដ្ឋានក្រុងតែល អាវីវ ចាប់ផ្តើមជើងហោះហើរអន្តរជាតិឡើងវិញ ក្រោយមានបទឈប់បាញ់ជាមួយអ៊ីរ៉ង់
06/25/2025 07:06 PM
Facebook Telegram Linkin
លោក Medvedev របស់រុស្ស៊ី ហៅ EU ថា ជា «ការគំរាមដោយផ្ទាល់» និងថា ភាពជាសមាជិករបស់អ៊ុយក្រែន នឹងបង្កគ្រោះថ្នាក់
06/25/2025 07:06 PM
Facebook Telegram Linkin
សមាជិកសភារុស្ស៊ី ព្រមានថា ទីក្រុងមូស្គូ នឹងស្វែងរកការឆ្លើយតបចំពោះការគំរាមកំហែងណាមួយពី ណាតូ
06/25/2025 07:06 PM
Facebook Telegram Linkin
លោក Grossi៖ឱកាសសម្រាប់ដំណោះស្រាយការទូតចំពោះបញ្ហានុយក្លេអ៊ែរអ៊ីរ៉ង់បច្ចុប្បន្ន បានបើកចំហ
06/25/2025 07:06 PM
Facebook Telegram Linkin
សង្រ្គាមច្រកអាកាសអ៊ីស្រាអែល-អ៊ីរ៉ង់ធ្វើឲ្យក្រុមវិនយោគព្រួយបារម្ភពីច្រកសមុទ្រ Hormuz
06/25/2025 07:06 PM
Facebook Telegram Linkin
សារព័ត៌មាន Yonhap៖ តុលាការកូរ៉េខាងត្បូងបដិសេធមិនចេញដីកាចាប់ខ្លួនអតីតប្រធានាធិបតី
06/25/2025 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.