BTV NEWS

គ.ល.ក. ណែនាំដល់ប្រតិបត្តិករមណ្ឌលល្បែងពាណិជ្ជកម្មឱ្យពង្រឹងការអនុវត្តតាមលក្ខខណ្ឌអាជ្ញាបណ្ណបញ្ចៀសសកម្មភាពខុសច្បាប់

ក្រសួងមុខងារសាធារណៈ រំលឹកដល់ក្រសួង-ស្ថាប័ន ផ្តល់សំណុំឯកសារ អំពីការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនដល់មន្ត្រីរាជការស៊ីវិល មកឱ្យបានយ៉ាងយូរត្រឹម ដំណាច់ខែសីហាឆ្នាំ២០២៥

មួយឆ្នាំកន្លងមកមន្រ្តីឧទ្យានុរក្សប្រើប្រាស់ប្រព័ន្ធផ្កាយរណប និងDrone ល្បាត ទប់ស្កាត់ និងបង្រ្កាបបទល្មើសធនធានធម្មជាតិបាន ៧៧ករណី

សមាជិកសភាតួកគី៖ កិច្ចសហប្រតិបត្តិការរវាងស្ថាប័ននីតិប្បញ្ញត្តិកម្ពុជា-តួកគីនឹងជួយជំរុញទំនាក់ទំនងប្រទេសទាំងពីរឱ្យកាន់តែល្អប្រសើរ

ព័ត៌មានជាតិ

ឯកឧត្តម ជា វុទ្ធី ណែនាំដល់បងប្អូនប្រជាពលរដ្ឋជាអាណាព្យាបាលត្រូវចូលរួមទប់ស្កាត់បញ្ហាគ្រឿងញៀនក្នុងសហគមន៍

ភ្នំពេញ ÷ ឯកឧត្តម ជា វុទ្ធី ប្រធានក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ បានណែនាំដល់បងប្អូនប្រជាពលរដ្ឋជាអាណាព្យាបាលត្រូវចូលរួមទប់ស្កាត់បញ្ហាគ្រឿងញៀនក្នុងសហគមន៍។នៅថ្ងៃទី១៤ ខែកញ្ញា ឆ្នាំ២០២៤ ឯកឧត្តម ជា វុទ្ធី ប្រធានក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ រាជធានីភ្នំពេញ និងឯកឧត្តម យុន ហេង អនុប្រធានក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ និងជាប្រធានក្រុមការងារគណបក្សចុះមូលដ្ឋានសង្កាត់ស្ទឹងមានជ័យទី២ បានដឹកនាំក្រុមការងារ សប្បុរសជនមកពីសហរដ្ឋអាមេរិក ដែលមានលោក Gary ព្រមទាំងការចូលរួមពីក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងក្រុមសមាគមសមាធិព្រះពុទ្ទសាសនាអន្តរជាតិ រួមទាំងអង្គការសង្គ្រោះជនរងគ្រោះ (Rescue Task Force) ដើម្បីជួបសំណេះសំណាល និងចែកអំណោយគ្រឿងឧបភោគ បរិភោគ រួមទាំងថវិកាជូនប្រជាពលរដ្ឋក្រីក្រចំនួន៥០គ្រួសារ។ នាឱកាសនោះ ឯកឧត្តម ជា វុទ្ធី មានសេចក្តីសោមនស្សរីករាយជាខ្លាំងដែលបានជួបបងប្អូនប្រជាពលរដ្ឋចំនួន៥០គ្រួសារ ក្នុងចំណោមសរុប៤០០គ្រួសារ និងបានពាំនាំនូវការផ្តាំសាកសួរសុខទុក្ខពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។ ឯកឧត្តម មានប្រសាសន៍ថា ក្នុងនាមជាសេនាធិការជូនរាជរដ្ឋាភិបាល និងក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ គឺរាជរដ្ឋាភិបាលបានគិតគួរខ្ពស់ចំពោះសុខុមាលភាពរបស់បងប្អូនប្រជាពលរដ្ឋ រួមទាំងការយកចិត្តទុកដាក់លើវិស័យអប់រំ ជាពិសេសគ្រួសារខ្វះខាត និងកពិងមានតម្រូវការក្នុងការជួយជ្រោមជ្រែងលើការសិក្សារបស់កូនចៅរបស់បងប្អូនប្រជាពលរដ្ឋក្នុងមូលដ្ឋាន។ ជាមួយគ្នានោះ ឯកឧត្តម ជា វុទ្ធី បានណែនាំដល់ប្រជាពលរដ្ឋត្រូវជំរុញ និងបណ្តុះបណ្តាលកូនៗ ក្នុងការទទួលបានការអប់រំឱ្យបានកាន់តែប្រសើរ ដើម្បីឱ្យពួកគាត់ក្លាយជាធនធានមនុស្សឆ្លើយតបទៅនឹងតម្រូវការ និងផែនការយុទ្ធសាស្រ្តរបស់រាជរដ្ឋាភិបាល សំដៅជំរុញយុវជនទទួលបានការអប់រំខ្ពស់សម្រាប់ជាទុនធ្វើឱ្យជីវភាពល្អប្រសើរ។ឯកឧត្តម បានផ្តាំផ្ញើបងប្អូនប្រជាពលរដ្ឋចូលរួមសហការជាមួយរាជរដ្ឋាភិបាលក្នុងការទប់ស្កាត់បញ្ហាប្រើប្រាស់គ្រឿងញៀនក្នុងសហគមន៍មូលដ្ឋាន ដោយអាណាព្យាបាលទាំងអស់ត្រូវតាមដាន និងមានការប្រុងប្រយ័ត្នចំពោះកូនៗរបស់ខ្លួន។ ឯកឧត្តម បន្តថា ក្នុងពេលបច្ចុប្បន្នស្ថិតក្នុងរដូវវស្សា ដូចនេះការថែទាំសុខភាពពិតជាសំខាន់ណាស់ ដែលបងប្អូនប្រជាពលរដ្ឋត្រូវយកចិត្តទុកដាក់ខ្ពស់ ជាពិសេសត្រូវថែទាំសុខភាពសម្រាប់ធានាដល់ជីវភាពប្រចាំថ្ងៃ។ ជាចុងក្រោយ ឯកឧត្តម ក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានខណ្ឌមានជ័យ បានរម្លឹកថា គណបក្សប្រជាជនកម្ពុជា ក្រោមការដឹករបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងបច្ចុប្បន្នជាប្រធានព្រឹទ្ធសភា គឺមិនមានអ្នកដឹកនាំណាដែលអាចរក្សាសុខសន្តិភាពមកដល់ពេលបច្ចុប្បន្ន ដូចសម្តេចតេជោ ហ៊ុន សែន ឡើយ ជាពិសេសបើប្រៀបធៀបទៅនឹងសម័យកាលមុនៗ ដូច្នេះប្រជាពលរដ្ឋទាំងអស់ត្រូវចូលរួមខិតខំថែរក្សាសុខសន្តិភាពនេះឱ្យបានស្ថិរស្ថេរ។

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល អញ្ជើញជាអធិបតីក្នុងពិធីក្រុងពាលី បញ្ចុះបឋមសិលា អគារមជ្ឈមណ្ឌលកណ្តាល អគារវេជ្ជសាស្រ្តស៊ីក្លូត្រុង និងអគារចំណត នៃមន្ទីរពេទ្យកាល់ម៉ែត

ភ្នំពេញ ÷ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នារសៀលថ្ងៃទី១៤ ខែកញ្ញា ឆ្នាំ២០២៤នេះបានអញ្ជើញជាអធិបតីក្នុងពិធីក្រុងពាលី និងបញ្ចុះបឋមសិលា អគារមជ្ឈមណ្ឌលកណ្តាល អគារវេជ្ជសាស្រ្តស៊ីក្លូត្រុង និងអគារចំណត នៃមន្ទីរពេទ្យកាល់ម៉ែត ដើម្បីសុំម្ចាស់ទឹកម្ចាស់ដី សេចក្តីសុខចំរុងចម្រើន និងត្រៀមបើកការដា្ឋនសាងសង់ នៅថ្ងៃស្អែកនេះ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។គម្រោងសាងសង់នេះនឹងចូលរួមចំណែកក្នុងការលើកកម្ពស់សុខភាព និងសុខមាលភាពដោយធានាបានការថែទាំ និងព្យាបាលជូនប្រជាពលរដ្ឋប្រកបដោយគុណភាព ប្រសិទ្ធភាព ស័ក្តិសិទ្ធភាព និងសុវត្ថិភាព ស្របតាមចក្ខុវិស័យ និងអាទិភាពគន្លឹះនៃយុទ្ធសាស្ត្របញ្ចកោណ-ដំណាក់កាលទី១ នៃរាជរដ្ឋាភិបាលកម្ពុជានីតិកាលទី៧ និងគោលនយោបាយ ព្រមទាំងអាទិភាពជាយុទ្ធសាស្រ្តរបស់ក្រសួងសុខាភិបាល។សូមជម្រាបជូនដែរថា អគារមជ្ឈមណ្ឌលកណ្តាល នឹងរួមចំណែកដល់ការបង្កើនសមត្ថភាពមន្ទីរពេទ្យក្នុងការទទួលពិនិត្យព្យាបាលអ្នកជំងឺ ដែលកើនឡើងពីមួយថ្ងៃទៅមួយថ្ងៃ ព្រមទាំងសមត្ថភាពបច្ចេកទេស តាមជំនាញឯកទេសនីមួយៗ ប្រកបដោយនវានុវត្តដែលផ្តោតលើគុណភាពជាមូលដ្ឋាន។មជ្ឈមណ្ឌលកណ្តាលនេះមានកម្ពស់ ២៥ជាន់ បណ្តោយ ៦៤,៨០ម៉ែត្រ និងទទឹង៤៩,៥០ ស្មើនឹង ៦៥,៥២១ ម៉ែត្រក្រឡា។ មជ្ឈមណ្ឌលវេជ្ជសាស្ត្រស៊ីក្លូត្រុង ក៏មានសក្តានុពលក្នុងការផលិតឱសថវិទ្យុសកម្មបន្ថែមសម្រាប់ត្រៀមចែកចាយទៅមន្ទីរពេទ្យ ឬមជ្ឈមណ្ឌលផ្សេងៗទៀត ដែលត្រូវការ និងមានបំណងធ្វើទំនើបកម្មការធ្វើរោគវិនិច្ឆ័យ និងការព្យាបាលជំងឺប្រកបដោយប្រសិទ្ធភាព ទាំងនៅក្នុងរាជធានីភ្នំពេញ និងតាមបណ្ដាខេត្តនានា។ អគារមជ្ឈមណ្ឌលវេជ្ជសាស្ត្រស៊ីក្លូត្រុងនេះ មានបណ្តោយ ១៤,៩ ម៉ែត្រ ទទឹង ១១,៧ ម៉ែត្រ និងកម្ពស់ ០២ជាន់ មានផ្ទៃក្រឡាសរុប ៦០៥.២៣ ម៉ែត្រការ៉េ។អគារចំណត នឹងផ្តល់ភាពងាយស្រួលជូនប្រជាពលរដ្ឋ ដែលប្រើប្រាស់មធ្យោបាយធ្វើដំណើរផ្ទាល់ខ្លួន មកទទួលសេវាពិគ្រោះ និងសេវាព្យាបាលនៅមន្ទីរពេទ្យ។ អគារចំណត មានបណ្តោយ ៧២ ម៉ែត្រ ទទឹង ២៩ម៉ែត្រ និងកម្ពស់ ១៣ជាន់ ស្មើនឹង ២៨,៥៦៨ ម៉ែត្រក្រឡា ដែលអាចផ្ទុកម៉ូតូ ចំនួន ៤៦៥គ្រឿង រថយន្តចំនួន ៥៤៦គ្រឿង រួមមានអាហារដ្ឋាន ផ្នែកបច្ចេកទេសអេឡិចត្រូនិច និងមជ្ឈមណ្ឌលបណ្តុះបណ្តាលជំនាញ ឬហៅថា Simulation Center ៕ អត្ថបទ រដ្ឋា

ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ បន្តចុះពិនិត្យព្យាបាលភ្នែកជូនពលរដ្ឋក្នុងស្រុកតាលោសែនជ័យ

ខេត្តពោធិ៍សាត់៖ រថយន្តវៈកាត់ភ្នែកចល័ត និងក្រុមគ្រូពេទ្យភ្នែកស្ម័គ្រចិត្តឯកឧត្ដម កែវ រតនៈ ជាច្រើនរូបដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ ក្រោមកិច្ចសហការសម្របសម្រួលដោយ ឯកឧត្តម ស៊ុយ ឌីម៉ង់ ប្រធានក្រុមការងារគណបក្សប្រជាជនកម្ពុជាចុះជួយស្រុកតាលោសែនជ័យ បានធ្វើការចុះពិនិត្យព្យាបាលភ្នែក វាស់ភ្នែក វះកាត់បកភ្នែកនិងកន្ទុយថ្លែន ថ្នាំភ្នែក និងវ៉ែនតា ដោយឥតគិតប្រាក់ ជូនប្រជាពលរដ្ឋក្នុងស្រុកតាលោសែនជ័យ ។ កម្មវិធីពិនិត្យព្យាបាលភ្នែកនេះត្រូវបានរៀបចំឡើង នៅបរិវេណទីស្នាក់ការគណបក្សប្រជាជនកម្ពុជាស្រុកតាលោសែនជ័យ រយៈ១ថ្ងៃពេញ ដោយមានប្រជាពលរដ្ឋមកពីឃុំតាលោ និងឃុំផ្ទះរ៉ុង ចំនួន២២៥៥នាក់ទទួលបានវ៉ែនតា ,៧៦៣នាក់ទទួលបានថ្នាំព្យាលបាលភ្នែក ,២៨នាក់ទទួលបានការវៈកាត់បកបាយភ្នែក ,៩នាក់ទទួលបានការវៈកាត់កន្លុយថ្លែនភ្នែក ,៣នាក់ទទួលបានការព្យាបាលដកកំទេចដែកចេញពីភ្នែក និងម្នាក់ទទួលបានការព្យាបាលខ្លាញ់ក្រោមភ្នែក។ឯកឧត្តម ស៊ុយ ឌីម៉ង់ មានប្រសាស៍លើកឡើងថា ក្រុមគ្រូពេទ្យភ្នែកស្ម័គ្រចិត្ត ចុះមកពិនិត្យនិងព្យាបាលភ្នែកជូនប្រជាពលរដ្ឋក្នុងស្រុកតាលោសែនជ័យដោយឥតគិតប្រាក់ក្នុងពេលនេះគឺជាសកម្មភាពមនុស្សធម៌ ដែលបានផ្តួចផ្តើមឡើងដោយឯកឧត្តម កែវ រតនៈ ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ ដែលជាការយកចិត្តទុកដាក់លើសុខមាភាពរបស់ប្រជាពលរដ្ឋក្នុងមូលដ្ឋានស្រុកតាលោសែនជ័យ និងក្នុងគោលបំណងដើម្បីរួមចំណែកកាត់បន្ថយការចំណាយនិងការលំបាកនានារបស់ប្រជាពលរដ្ឋជាពិសេសប្រជាពលរដ្ឋដែលមានជីវភាពខ្សត់ខ្សោយ ។ ហើយក្នុងនាមជាប្រធានក្រុមការងារចុះជួយមូលដ្ឋានស្រុកតាលោសែនជ័យ ឯកឧត្តម សូមថ្លែងអំណរគុណយ៉ាងជ្រាលជ្រៅចំពោះ ឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ ដែលបានដឹកនាំក្រុមគ្រូពេទ្យភ្នែកស្ម័គ្រចិត្តជាច្រើនរូប លះបង់ទាំងថវិកា កំលាំងកាយចិត្ត និងពេលវេលាផ្ទាល់ខ្លួន ចុះមកពិនិត្យព្យាបាលភ្នែកជូនប្រជាពលរដ្ឋស្រុកតាលោសែនជ័យដោយមិនគិតប្រាក់ ។ ឯកឧត្តម ស៊ុយ ឌីម៉ង់ ក៏សូមអរគុណដល់ក្រុមការងារជួយចុះតាមឃុំទាំង២ ដែលបានជួយសម្រួលដល់ការធ្វើដំណើរ និងផ្តល់អាហារសម្រន់ជូនប្រជាពលរដ្ឋដើម្បីមកទទួលការពិនិត្យព្យាបាលភ្នែក ។ ហើយដោយមើលឃើញពីតម្រូវការជាក់ស្តែង និងតបតាមសំណូមពរពីប្រជាពលរដ្ឋ ក្រុមការងារចុះមូលដ្ឋានស្រុកតាលោសែនជ័យ នឹងបន្តសហការជាមួយក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ ធ្វើការចុះមកពិនិត្យព្យាបាលភ្នែកជូនបងប្អូនប្រជាពលរដ្ឋក្នុងស្រុកតាលោសែនជ័យជាបន្តបន្ទាប់ទៀត ។គួរឱ្យដឹងដែរថាក្នុងឆ្នាំ២០២៤នេះ រថយន្តវៈកាត់ភ្នែកចល័ត និងក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ ដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ បានចុះមកខេត្តពោធិ៍សាត់ចំនួន៤លើក ដោយពិនិត្យព្យាលបាលភ្នែក ជូនប្រជាពលរដ្ឋបានប្រមាណ៩០០០នាក់ ហើយកាលពីឆ្នាំ២០២៣ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ បានចុះមកខេត្តពោធិ៍សាត់ចំនួន០៧លើក ដោយធ្វើការពិនិត្យព្យាបាលជូនប្រជាពលរដ្ឋប្រមាណជិត១ម៉ឺននាក់ ក្នុងនោះលោកយាយលោកតាចាស់ជរាជាប្រមាណជិត២០០នាក់ ដែលមានបញ្ហាភ្នែកធ្ងន់ធ្ងរអាចបណ្តាលអោយទៅជាពិការភ្នែក ត្រូវបានក្រុមគ្រូពេទ្យភ្នែកស្ម័គ្រចិត្តធ្វើការវះកាត់ជួយសង្គ្រោះបានយ៉ាងជោគជ័យផងដែរ ៕ អត្ថបទ ភិរុណ ពៅ

លោកជំទាវបណ្ឌិត ពេជ ចន្ទមុន្នី ដឹកនាំក្រុមគ្រូពេទ្យ TYDA ព្យាបាលជំងឺជូនប្រជាពលរដ្ឋនៅក្រុងរុនតាឯក

សៀមរាប ៖ នៅព្រឹកថ្ងៃទី១៥ខែកញ្ញា ឆ្នាំ២០២៤នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានដឹកនាំក្រុមគ្រូពេទ្យស្ម័គ្រចិត្ត យុវជនសម្តេចតេជោ និងអាជ្ញាធរ ដែនដីគ្រប់លំដាប់ថ្នាក់ ចុះពិនិត្យ និងព្យាបាលជំងឺជូនប្រជាពលរដ្ឋ នៅសង្កាត់រុនតាឯក ក្រុងរុនតាឯកខេត្តសៀមរាប សរុបចំនួន ៩២២៤ ករណី ស្ថិតនៅក្នុងបរិវេណ បឋមសិក្សា-អនុវិទ្យាល័យ ហ៊ុន សែន រុនតាឯក។មានប្រសាសន៍សំណេះសំណាលជាមួយប្រជាពលរដ្ឋនាឱកាសនោះ លោកជំទាវបណ្ឌិត បានគូសបញ្ជាក់ថា សម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា តែងតែយកចិត្តទុកដាក់គិតគូរអំពីសុខទុក្ខ និងសុខភាពរបស់បងប្អូនប្រជាពលរដ្ឋ តាមរយៈការបង្ខិតសេវាព្យាបាល ជូនប្រជាពលរដ្ឋដោយឥតគិតថ្លៃ។ ជាក់ស្ដែងថ្ងៃនេះសមាគមគ្រូពេទ្យស្ម័គ្រចិត្តយុវជនសម្ដេចតេជោ បានចុះពិនិត្យនិងព្យាបាលជំងឺ ជូនប្រជាពលរដ្ឋនៅក្នុងតំបន់រុនតាឯកនេះ ដោយឥតគិតថ្លៃអ្វីទាំងអស់រួមមានជំងឺ៖ ជំងឺទូទៅ, ជំងឺមាត់ធ្មេញ, ពិនិត្យអេកូ និងរោគស្រ្តី, ជំងឺបេះដូង, ពិនិត្យជំងឺភ្នែក, វះកាត់តូច, ជំងឺឫសដូងបាត, ជំងឺសន្លាក់, ជំងឺសើរស្បែក, ជំងឺត្រចៀក ច្រមុះ បំពងក, ថតកាំរស្មី, ពិនិត្យឈាម, និងបញ្ជូនទៅព្យាបាលបន្តក្នុងករណីមានជំងឺធ្ងន់ធ្ងរ ។ប្រជាពលរដ្ឋដែលអញ្ជើញមកទទួលសេវាពិនិត្យ និងព្យាបាលសុខភាពទាំងអស់ បានសម្តែងក្តីសប្បាយរីករាយ និងថ្លែងអំណរគុណជាអនេក ចំពោះលោកជំទាវបណ្ឌិត ដែលបានដឹកនាំក្រុមគ្រូពេទ្យជំនាញ ចុះមកពិនិត្យ និងព្យាបាលសុខភាពរបស់ពួកគាត់ស្ទើរតែដល់ខ្នងផ្ទះ និងមិនមានការបង់ថ្លៃអ្វីទាំងអស់។សូមបញ្ជាក់ថា ក្រុមគ្រូពេទ្យ និងកម្លាំងស្ម័គ្រចិត្តនៃសមាគម (TYDA) ព្យាបាលជំងឺទូទៅជូនប្រជាពលរដ្ឋដោយគិតថ្លៃនាឱកាសនេះ សរុបមានចំនួន ៩២២៤ ករណី។ ក្នុងនោះករណីឈឺធ្ងន់ធ្ងរត្រូវបញ្ជូនមកព្យាបាលបន្តមានចំនួន ៥៨នាក់។ រាល់ការចំណាយទាំងអស់ក្នុងសកម្មភាពនេះ គឺឧបត្ថម្ភដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។ក្នុងឱកាសនោះ ក្រៅពីការពិនិត្យ និងព្យាបាលជំងឺ លោកជំទាវបណ្ឌិត ក៏បានចែកជូនកាបូប ស្ពាយ ដល់សិស្សានុសិស្សមួយចំនួនផងដែរ៕ 15/9/24អត្ថបទ: សំ ងីម

សូមជម្រាបជូនសាធារណជនអំពីបច្ចុប្បន្នភាព “ព្រឹត្តិការណ៍ Gumball 3000 នៅកម្ពុជា” រយៈពេល ៣ថ្ងៃ ចាប់ពីថ្ងៃទី១៥-១៧ ខែកញ្ញា ឆ្នាំ២០២៤

ភ្នំពេញ ៖ ថ្ងៃទី១ ត្រូវនឹងថ្ងៃអាទិត្យ ទី១៥ ខែកញ្ញា ឆ្នាំ២០២៤ នៅចន្លោះពីម៉ោង ៩ព្រឹក ដល់ម៉ោង ១១យប់- ប្រតិភូ Gumball 3000 មកដល់កម្ពុជាតាមច្រកទ្វារព្រំដែនអន្តរជាតិបាវិត ឆ្ពោះមករាជធានីភ្នំពេញ តាមផ្លូវជាតិលេខ១- ប្រតិភូ Gumball 3000 នឹងមកដល់រាជធានីភ្នំពេញ រៀបចំតាំងបង្ហាញរថយន្ត និងបង្ហាញបច្ចេកទេសជ្រែរថយន្តដ៏អស្ចារ្យ (Supercars Drifting) ជូនសាធារណជនទស្សនានៅបរិវេណសួនច្បារវិមានឯករាជ្យ សួនច្បារសម្តេចជួនណាត និងសួនច្បារវត្តបទុមវតី- ការប្រគុំតន្ត្រីខ្នាតយក្សលំដាប់អន្តរជាតិ ដោយមានការចូលរួមសម្តែងពីប្រតិភូ Gumball 3000 ដែលជាមហាសេដ្ឋី អ្នកមានឥទ្ធិពលលើបណ្តាញសង្គម កីឡាករ និងតារារ៉េបល្បីៗ នៅមុខវត្តបទុមវតី ថ្ងៃទី២ ត្រូវនឹងថ្ងៃចន្ទ ទី១៦ ខែកញ្ញា ឆ្នាំ២០២៤ ចន្លោះពីម៉ោង ៧ព្រឹក ដល់ម៉ោង ១១យប់- ប្រតិភូ Gumball 3000 នឹងបន្តដំណើរពីរាជធានីភ្នំពេញឆ្ពោះទៅខេត្តសៀមរាប- ការតាំងបង្ហាញរថយន្ត និងពិព័រណ៍ខ្នាតតូចនៅសួនច្បារព្រះរាជដំណាក់ ខេត្តសៀមរាបថ្ងៃទី៣ ត្រូវនឹងថ្ងៃអង្គារ ទី១៧ ខែកញ្ញា ឆ្នាំ២០២៤ ចន្លោះពីម៉ោង ៦ព្រឹក ដល់ម៉ោង ២រសៀល- ការតាំងបង្ហាញរថយន្ត Supercars របស់ប្រតិភូ Gumball 3000 ទាំងអស់ ដើម្បីបំបែកឯកទគ្គពិភពលោក (Guinness World Record) នៅបរិវេណខាងមុខប្រាសាទអង្គរវត្ត- ប្រតិភូ Gumball 3000 ចេញដំណើរពីខេត្តសៀមរាបឆ្ពោះទៅច្រកទ្វារអន្តរជាតិប៉ោយប៉ែត ចូលរួមទស្សនាកម្សាន្តដោយសេរី!

ឯកឧត្តម យឿន យឿត ទីប្រឹក្សារាជរដ្ឋាភិបាលកម្ពុជា និងជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា សូមសម្ដែងអំណរសាទរ ប្រកបដោយមនោសព្ចោតនារីករាយក្រៃលែង ក្នុងឱកាស «ខួប២០ឆ្នាំ» ដែល សម្ដេចអគ្គមហាសេនាបតីតេជោ ហ៊ុន សែន ក្លាយជាសមាជិកមេធាវី

ភ្នំពេញ ៖ ថ្ងៃនេះ កាលពី២០ឆ្នាំមុន សម្តេចអគ្គមហាសេនាបតីតេជោ ហ៊ុន សែន ត្រូវបានក្រុមប្រឹក្សាគណ:មេធាវី ក្នុងអាណត្តិដឹកនាំរបស់លោកមេធាវី គី តិច ពិនិត្យសម្រេចលើកម្រិតសញ្ញាបត្រ លក្ខណៈសម្បត្តិ តាមផ្លូវច្បាប់ បញ្ចូលជាសមាជិកគណ:មេធាវី និងបានធ្វើពិធីសម្បថនៅចំពោះ ក្រុមប្រឹក្សាសាលាឧទ្ធរណ៏ភ្នំពេញ កាលពីថ្ងៃទី១៥ ខែកញ្ញា ឆ្នាំ២០០៤ (បើគិតមកដល់ថ្ងៃទី១៥ ខែកញ្ញា ឆ្នាំ២០២៤) នេះ សម្តេចអគ្គមហាសេនាបតីតេជោ ហ៊ុន សែន បានក្លាយជាសមាជិកមេធាវី នៃព្រះរាជាណាចក្រកម្ពុជា «២០ឆ្នាំ» ហើយ។ស្ថិតក្នុងឱកាសដ៏ឧត្តុង្គឧត្តមនេះ ខ្ញុំបាទយឿត យឿត ក្នុងនាមជាទីប្រឹក្សាសម្តេចតេជោ ហ៊ុន សែន សូមលើកហត្ថប្រណមបួងសួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិក្នុងលោក ទេវតាថែរក្សាការពារព្រះរាជាណាចក្រកម្ពុជា សូមប្រោះព្រំសព្ទសាធុការពរជ័យ បវរសួស្ដី សិរីមង្គល វិបុលសុខ មហាប្រសើរជូន សម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ព្រមទាំងក្រុមគ្រួសារ និងសូមបានសមប្រកបនូវពុទ្ធពរទាំង៤ ប្រការ អាយុ វណ្ណ: សុខ: ពល: កុំបីឃ្លៀងឃ្លាតឡើយ៕

ថ្ងៃនេះគឺជាខួប២០ឆ្នាំ ដែល សម្តេចអគ្គមហាសេនាបតីតេជោ ហ៊ុន សែន ត្រូវបានបញ្ចូលជាសមាជិកគណ:មេធាវី

ភ្នំពេញ៖ នៅថ្ងៃទី១៥ ខែកញ្ញា ឆ្នាំ២០២៤នេះ គឺជាខួប២០ឆ្នាំ (១៥ កញ្ញា ២០០៤-១៥ កញ្ញា ២០២៤) ដែល សម្តេចអគ្គមហាសេនាបតីតេជោ ហ៊ុន សែន ត្រូវបានបញ្ចូលជាសមាជិកគណ:មេធាវី។ ផ្តើមចេញពីបទពិសោធន៍ការដឹកនាំអនុវត្ត និងសញ្ញាបត្រជំនាញជាន់ខ្ពស់ សម្តេចអគ្គមហាសេនាបតីតេជោ ហ៊ុន សែន ត្រូវបានក្រុមប្រឹក្សាគណ:មេធាវី ក្នុងអាណត្តិដឹកនាំរបស់លោកមេធាវី គី តិច ពិនិត្យសម្រេចលើកម្រិតសញ្ញាបត្រ លក្ខណៈសម្បត្តិ តាមផ្លូវច្បាប់ បញ្ចូលជាសមាជិកគណ:មេធាវី និងបានធ្វើពិធីសម្បថនៅចំពោះក្រុមប្រឹក្សាសាលាឧទ្ធរណ៏ភ្នំពេញ កាលពីថ្ងៃទី១៥ ខែកញ្ញា ឆ្នាំ២០០៤ ដែលថ្ងៃនេះ គឺសម្តេចអគ្គមហាសេនាបតីតេជោ ហ៊ុន សែន បានក្លាយជាសមាជិកគណ:មេធាវី នៃព្រះរាជាណាចក្រកម្ពុជា «២០ឆ្នាំ» ហើយ។តាមការបញ្ជាក់របស់លោកទេសរដ្ឋមន្ត្រី គី តិច ប្រធានក្រុមមេធាវីរាជរដ្ឋាភិបាល និងជាអតីតប្រធានគណ:មេធាវី អាណត្តិទី៥-៦ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ពិតជាបានគិតគូរប្រកបដោយគតិបណ្ឌិតដ៏ខ្ពង់ខ្ពស់ ជួយទ្រទ្រង់ដល់រាល់សកម្មភាព និងកិច្ចការរដ្ឋបាលទូទៅរបស់គណ:មេធាវី មានជាអាទិ៍ ដូចខាងក្រោម៖- ជាស្ថាបនិកផ្តួចផ្តើមបង្កើត និងអនុម័តផ្តល់ថវិកាបដិភាគរបស់រាជរដ្ឋាភិបាល សម្រាប់គណ:មេធាវីធ្វើប្រតិបត្តិការការពារក្តីជូនជនក្រីក្រ ក្នុងក្របខណ្ឌទូទាំងប្រទេស- ផ្តល់អគាររបស់រដ្ឋ ជាកម្មសិទ្ធិរបស់គណ:មេធាវី នៃព្រះរាជាណាចក្រកម្ពុជា ធ្វើជាទីស្នាក់ការរដ្ឋបាល រហូតបច្ចុប្បន្ន - អនុម័ត ផ្តល់ថវិកាឧបត្ថម្ភ ដល់និសិ្សតដែលកំពុងសិក្សានៅមជ្ឈមណ្ឌលបណ្តុះបណ្តាលវិជ្ជាជីវ:មេធាវី- ជាស្ថាបនិកផ្តួចផ្តើមបង្កើតក្រុមមេធាវីស្ម័គ្រចិត្តសម្តេចតេជោសែន ដោយផ្តល់ថវិកាផ្ទាល់ខ្លួនរបស់សម្តេច សម្រាប់ប្រតិបត្តិការពារក្តី និងពិគ្រោះ ប្រឹក្សាយោបល់ ជូនស្ត្រីងាយរងគ្រោះ មានជីវភាពខ្សត់ខ្សោយ និងខ្វះការការពារតាមផ្លូវច្បាប់ នៅក្នុងក្របខណ្ឌទូទាំងរាជធានី-ខេត្ត ។ល៕

អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម៖ខាងក្រោមនេះជាផ្លូវជាតិលេខ៧៨-៥(ផ្លូវទៅកាន់តំបន់កន្ទុយនាគ) ដែលមានប្រវែងសរុប១៦៦គីឡូម៉ែត្រ ដោយបែកចេញពីផ្លូវជាតិលេខ៧៨ ក្នុងភូមិសាស្ត្រក្រុងបាលុង ខេត្តរតនគិរី

រតនគិរី ៖ អំពីស្ថានភាពផ្លូវលេខ៧៨-៥ ត្រូវបានចែកចេញជា៤កំណាត់ស្ថិតក្រោមការថែទាំរបស់មន្ទីរសាធារណការ និងដឹកជញ្ជូន ខេត្តរតនគិរី។ កំណាត់ទី១ ៖ កម្រាលកៅស៊ូ DBST មានប្រវែង ២១,៩៥ គម ទទឹង១៤ម- ៧ម ចាប់ពី គ.ម ០០+០០០ ផ្លូវបំបែកផ្លូវជាតិលេខ ៧៨ (គ.ម ១២៣+២៥០)សង្កាត់ឡាបានសៀក ក្រុងបានលុង ខេត្តរតនគិរី (13.740084 - 106.991512) ដល់ គ.ម ២១+៩៥០ ភូមិស្វាយ ឃុំប៉ូយ ស្រុកអូរជុំ (13.891591– 107.011827) កំណាត់ទី ២ ៖ កម្រាលដីល្បាយថ្ម មានប្រវែង ២៤,០៩ គម ទទឹង ៧ម ចាប់ពី គ.ម ២១+៩៥០ ភូមិស្វាយ ឃុំប៉ូយ ស្រុកអូរជុំ (13.891591– 107.011827)ដល់ គ.ម ៤៦+០៤០ ឃុំតាវែងលើ ស្រុកតាវែង ខេត្តរតនគិរី (14.041500 –107.107476) កំណាត់ទី ៣ ៖ កម្រាលកៅស៊ូ DBST មានប្រវែង ១.០០ គម ទទឹង ១០ម ចាប់ពី គ.ម ៤៦+០៤០ ឃុំតាវែងលើ ស្រុកតាវែង ខេត្តរតនគិរី (14.041500 – 107.107476) ដល់ គ.ម ៤៧+០៤០ ឃុំតាវែងលើ ស្រុកតាវែង ខេត្តរតនគិរី (14.050944 – 107.110450) កំណាត់ទី ៤ ៖ កម្រាលដីធម្មជាតិ មានប្រវែង ១១៨,៩៦ គម (រាជរដ្ឋាភិបាលកំពុងគិតគូរខ្លាំង និងអទិភាព)។ មន្ត្រីជំនាញ នៃក្រសួងសាធារណការ និងជញ្ជូន បានចុះពិនិត្យជាបន្តបន្ទាប់ និងធានាវឌ្ឍនភាពនាពេលឆាប់ៗខាងមុខនេះ។

ការប្រឡងគ្រូមតេយ្យជាការជ្រើសរើសមន្ត្រីចុងក្រោយសម្រាប់ក្របខណ្ឌក្រសួងអប់រំ

ភ្នំពេញ ៖ ក្រសួងមុខងារសាធារណៈ នៅថ្ងៃទី១៧ ខែកញ្ញា ឆ្នាំ ២០២៤នេះ បានរៀបចំការប្រឡងជ្រើសរើសគ្រូមតេយ្យសិក្សាលើវិញ្ញាសាសរសរលើកទី២។ ការប្រឡងនេះជាការប្រឡងលើកចុងក្រោយ ដែលនឹងកំណត់យកអ្នកជាប់ត្រឹមតែ២០០នាក់ប៉ុណ្ណោះសម្រាប់ការប្រឡងជ្រើសរើសមន្ត្រីក្របខណ្ឌ ឆ្នាំ២០២៣ របស់ក្រសួងអប់រំ យុវជន និងកីឡា។ការប្រឡងជ្រើសរើសគ្រូមតេយ្យសិក្សា ដែលប្រព្រឹត្តិទៅនៅថ្ងៃនេះ ជាការប្រឡងលើកចុងក្រោយ ដែលមានបេក្ខជនចូលរួមសរុប ៦៣២នាក់។ បេក្ខជនជាង ៦០០នាក់នេះ ជាបេក្ខជនដែលបានប្រឡងជាប់ ក្នុងការប្រឡងលើវិញ្ញាសាសរសេរលើកទី ១កន្លងទៅ។ ការប្រឡងលើកចុងក្រោយនេះ គឺនឹងជ្រើសរើសយកអ្នកជាប់ ត្រឹមតែ ២០០នាក់ប៉ុណ្ណោះ ដើម្បីក្លាយជាគ្រូបង្រៀនមតេយ្យសិក្សា បម្រើការនៅក្រសួងអប់រំ។ ការប្រឡងនេះ ក៏ជាការប្រឡងលើកចុងក្នុងការជ្រើសរើសមន្ត្រីចូលបម្រើការងារនៅក្របខណ្ឌក្រសួងអប់រំ យុវជន និងកីឡា ក្នុងក្របខណ្ឌឆ្នាំ ២០២៣ផងដែរ។ចំពោះវិញ្ញាសាសម្រាប់ការប្រឡងលើកចុងក្រោយនេះ គឺមានពីរវិញ្ញាសា។ វិញ្ញាទី ១ គឺគណិតវិទ្យា មានរយៈពេល ២ម៉ោង រីឯវិញ្ញាសាទី ២ គឺអក្សរសាស្ត្រខ្មែរ មានរយៈពេល ២ម៉ោងដូចគ្នា។ វិញ្ញាសាទាំងពីរ គឺកម្រិតថ្នាក់ទី ១២។ មិនខុសពីការប្រឡងជ្រើសរើសមន្ត្រីនាពេលកន្លង ការប្រឡងជ្រើសរើសគ្រូមតេយ្យសិក្សាលើកចុងក្រោយនេះ ចាប់ផ្ដើមការតាក់តែងវិញ្ញាសា នៅពេលព្រឹក។ ក្រសួងអប់រំជាអ្នកផ្តល់សមាសភាពអ្នកតាក់តែងវិញ្ញាសា រួមមានវិញ្ញាសាគណិតវិទ្យាចំនួន ១០រូប និងវិញ្ញាសាអក្សរសាស្ត្រខ្មែរ ចំនួន ១០រូប មកក្រសួងមុខងារសាធារណៈ ដើម្បីជ្រើសរើសគ្រូតាក់តែងវិញ្ញាសាគណិតវិទ្យាចំនួន៥រូប និងវិញ្ញាសាអក្សរសាស្ត្រខ្មែរ ចំនួន៥រូប មុនមួយថ្ងៃនៃការប្រឡង ដោយឯកឧត្តមឧបនាយករដ្ឋមន្ត្រី ដោយផ្ទាល់ និងសម្ងាត់។ ពួកគេជាបង្រៀននៅកម្រិត វិទ្យាល័យ ដែលអញ្ជើញមកពីសាលាផ្សេងៗគ្នា។ក្រោយតាក់តែងវិញ្ញាសារួចរាល់ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានប្រធានគណៈកម្មការរៀបចំការប្រឡងប្រជែង បានជ្រើសរើសវិញ្ញា និងចូលរួមកាត់វិញ្ញាសាប្រឡងដោយផ្ទាល់។ ចំពោះបេក្ខជនប្រឡងវិញ គឺត្រូវតែឆ្លងកាត់ការត្រួតពិនិត្យ ស្វែងរកសំណៅឯកសារ និងហាមឃាត់ការនាំចូលនូវទូរស័ព្ទដៃ នាឡិកាវៃឆ្លាត និងគ្រឿងអេឡិចត្រូនិកនានា។ គ្រប់នីតិវិធីនៅតែរក្សាដដែល ដើម្បីធានាបាននូវភាពសុក្រឹត្យ តម្លាភាព សម្រាប់គ្រប់បេក្ខជន ក្រោមការចូលរួមត្រួតពិនិត្យគ្រប់ដំណាក់កាលដោយ មន្ត្រីអង្គភាពប្រឆាំងអំពើពុករលួយ ក៏ដូចជាអ្នកសង្កេតការណ៍ស្ម័គ្រចិត្តផងដែរ។ ទាំងនេះគឺដើម្បីធានាថា អ្នកចេះត្រូវតែជាបេក្ខជន ដែលមានសមត្ថភាពពិត។សូមជម្រាបថា ក្រសួងមុខងារសាធារណៈបានរៀបចំការប្រឡងជ្រើសរើសគ្រូបង្រៀនដើម្បីបម្រើការនៅក្រសួងអប់រំ យុវជន និងកីឡា ចំនួន ៣លើករួចមកហើយ។ ការប្រឡង ៣លើកកន្លងទៅរួមមាន ការប្រឡងជ្រើសរើសគ្រូឯកទេសកីឡា ការប្រឡងជ្រើសរើសគ្រូអនុវិទ្យាល័យ ការប្រឡងជ្រើសរើសគ្រូបឋមសិក្សា និងការប្រឡងលើកចុងក្រោយនេះ ជាការប្រឡងជ្រើសរើសគ្រូមតេយ្យសិក្សា៕អត្ថបទ៖ គឹមហុក

អាជ្ញាធរគ្រោងដាក់តំបន់ភ្នំនាងកង្រី និងភ្នំទូកមាសជាតំបន់ប្រើប្រាស់ច្រើនយ៉ាងដើម្បីទាក់ទាញទេសចរ

កំពង់ឆ្នាំង ៖ អាជ្ញាធរស្រុកកំពង់លែង ខេត្តកំពង់ឆ្នាំង គ្រោងនឹងប្រែក្លាយតំបន់ភ្នំកង្រី និងតំបន់ភ្នំទូកមាសដែលជាតំបន់ប្រើប្រាស់ច្រើនយ៉ាង អោយក្លាយជាតំបន់ទេសចរណ៍មួយដែលមានភាពទាក់ទាញការចាប់អារម្មណ៍ពីសំណាក់ភ្ញៀវទេសចរណ៍ជាតិអន្តរជាតិ។ ម្យ៉ាងទៀតដើម្បីអនុវត្តផែនការគ្រប់គ្រង អភិរក្ស និងអភិវឌ្ឍន៍តំបន់ទេសចរណ៍នេះឱ្យមានប្រសិទ្ធភាពនោះកន្លងមក លោកអភិបាលស្រុកកំពង់លែង បានដឹកនាំក្រុមការងារចុះពិនិត្យ ដើម្បីពិភាក្សាលម្អិតទៅលើគម្រោងសំខាន់ៗ ដែលត្រូវអនុវត្តចំពោះមុខ។លោក យ៉ែម លក្ខិណា អភិបាលស្រុកកំពង់លែងបានឱ្យដឹងថា រាជរដ្ឋាភិបាលកម្ពុជាបានចេញអនុក្រឹត្យសម្រេចដាក់ «ភ្នំនាងកង្រី និងភ្នំទូកមាស» ស្ថិតក្នុងឃុំត្រងិល ឃុំពោធិ៍ ឃុំច្រណូក ឃុំដារ និងឃុំស្វាយរំពារ ស្រុកកំពង់លែង ខេត្តកំពង់ឆ្នាំង ទៅជាតំបន់ប្រើប្រាស់ច្រើនយ៉ាង ដែលស្ថិតនៅក្រោមការគ្រប់គ្រងរបស់ក្រសួងបរិស្ថាន។ លោកបន្តថា គោលបំណងនៃការសម្រេចដាក់ភ្នំនេះជាតំបន់ប្រើប្រាស់ច្រើនយ៉ាង គឺដើម្បីធានាឱ្យមានការថែទាំទីជម្រក និងស្ថិរភាពនៃប្រពន្ធអេកូឡូស៊ីសារព័ន្ធមជ្ឈដ្ឋានធម្មជាតិ សត្វព្រៃ រុក្ខជាតិ សម្រាប់យូរអង្វែង។ រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យ គ្រោះមហន្តរាយធម្មជាតិ។ លើកទឹកចិត្តឱ្យមានការចូលរួមរបស់សហគមន៍មូលដ្ឋាន ក៏ដូចជាអ្នកពាក់ព័ន្ធក្នុងការថែរក្សាការពារ អភិរក្ស និងការប្រើប្រាស់ធនធានធម្មជាតិដោយនិរន្តរភាព។ លោកបានបន្តថា ភ្នំនាងកង្រី និងភ្នំទូកមាសមានសម្រស់ព្រៃភ្នំ និងទឹកទន្លេជាប់ជើងភ្នំជាការទាក់ទាញបំផុត ជាពិសេសភ្ញៀវទេសចរណ៍អាចទៅកម្សាន្តគ្រប់រដូវកាល។ រមណីយដ្ឋានភ្នំនាងកង្រី និងភ្នំទូកមាស ជាតំបន់ទេសចរណ៍មួយ ដែលមានទស្សនីយភាពធម្មជាតិជាច្រើន តែចំពោះភ្នំនាងកង្រីវិញ បានបង្ហាញពីរូបរាងភ្នំយ៉ាងចម្លែក គឺដូចជារាងមនុស្សស្រីកំពុងដេក ។ នៅលើភ្នំនាងកង្រី និងភ្នំទូកមាស ក៏មានដើមឈើតូចធំជាច្រើនប្រភេទ និងមានទន្លេយ៉ាងធំល្វឹងល្វើយ អាចឱ្យអ្នកទេសចរជាតិអន្តរជាតិ ជិះទូកកម្សាន្ត គយគន់មើលពីសម្រស់ភ្នំនាងកង្រី ពីត្រើយម្ខាងនៃទន្លេផ្សារក្រោមផងដែរ៕ កាំង ហុងវាស្នា

បណ្ដាញសង្គម

ព័ត៌មានថ្មីៗ

សម្ព័ន្ធអារ៉ាប់ថ្កោលទោសចំពោះផែនការរបស់អ៊ីស្រាអែល ក្នុងការបង្កើត «ទីក្រុងមនុស្សធម៌» នៅហ្កាហ្សា

មន្ត្រី UN ព្រមានពីហានិភ័យដល់ជនភៀសខ្លួនរាប់លាននាក់ ដែលត្រឡប់ទៅអាហ្វហ្គានីស្ថានវិញ

ប្រធានាធិបតីចិន៖ SCO គួរតែកែលម្អយន្តការដើម្បីឆ្លើយតបនឹងការគំរាមកំហែងផ្នែកសន្តិសុខ

ចិន ថ្កោលទោស 'ការបង្រៀន ១០ចំណុច' របស់មេដឹកនាំកោះតៃវ៉ាន់ ថាជាការបោកបញ្ឆោត និងបង្ករឿង

រុស្ស៊ី ច្រានចោលពេលកំណត់ ៥០ថ្ងៃរបស់លោក Trump លើបទឈប់បាញ់អ៊ុយក្រែន ថាមិនអាចទទួលយកបានទេ

កិច្ចព្រមព្រៀងអាវុធណាតូរបស់លោក Trump សម្រាប់អ៊ុយក្រែន ធ្វើឱ្យសមាជិកបក្សរបស់លោកខឹងសម្បារ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877