BTV NEWS

ត្រឹមខែឧសភានេះ អតីតពលករមកពីថៃជាង ៧០០នាក់បានធ្វើតេស្តទទួលស្គាល់ជំនាញពីរាជរដ្ឋាភិបាល

កម្ពុជាកំពុងរៀបចំក្របខណ្ឌនៃការអភិវឌ្ឍ និងការគ្រប់គ្រងមណ្ឌលអាជីវកម្មកំពង់ផែទន្លេភ្ជាប់ទៅសមុទ្រ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីក្នុងសន្និបាតបូកសរុបលទ្ធផលការងារ និងលើកទិសដៅបន្តរបស់គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ

អ្នកជំនាញ៖ កម្ពុជានៅតែបន្តស្រូបយកការវិនិយោគ ក្រោមបរិយាកាសអំណោយផលផ្សេងៗ

ព័ត៌មានជាតិ

ព្រះសង្ឃខេត្តស្វាយរៀងនាំគ្រឿងឧបភោគផ្ដល់ជូនដល់វីរៈកងទ័ពនិងជនភៀសសឹកឈរជើងទិសខេត្តព្រះវិហារនិងខេត្តឧត្តមានជ័យ

ស្វាយរៀង ៖ គ្រឿងឧបភោគ បរិភោគ រួមមានអង្ករ មី ត្រីខ នំអន្សម នំចាំងប្រមាណជាង ៣ពាន់នំ ភេសជ្ជ: និងថវិកា ដែលជាអំណោយ បានពីការចូលរួមប្រមូលផ្តុំ របស់ព្រះសង្ឃ ពុទ្ធបរិសទ័ចំណុះជើងវត្តព្រះពន្លា ស្រុកស្វាយទាប និងវត្តត្រពាំងត្រាវ ស្រុកកំពង់រោទិ៍ ខេត្តស្វាយរៀងត្រូវបានព្រះគ្រូ ញឹម ចន្ទ័ថៃ និងព្រះគ្រូ គង់ សុម៉ាលី នៅថ្ងៃទី៨ ខែសីហា ឆ្នាំ២០២៥នេះ បាននាំទៅផ្ដល់ជូន ដល់វីរៈកងទ័ព ដែលកំពុងឈរជើង ការពារបូរណភាពទឹកដី និងជនភៀសសឹក នៅទិសខេត្តព្រះវិហារ និងខេត្តឧត្តរមានជ័យ។ ក្នុងឪកាសដឹកនាំប្រជាពុទ្ធបរិសទ័វេចនំអន្សម សម្រាប់នាំយកទៅចែកផ្តល់ដល់វរះកងទព័ និងជនភៀសសឹក ព្រះតេជគុណ ញឹម ចន្ទ័ថៃ និង ព្រះតេជគុណ គង់ សុម៉ាលី បានមានសង្ឃដិការ ថ្លែងអំណរគុណយ៉ាងជ្រាលជ្រៅចំពោះ ព្រះសង្ឃ ពុទ្ធបរិសទ័ ដែលបានចូលរួមវិភាគទាន ជាបច្ចយ័ គ្រឿងឧបភោគ បរិភោគប្រមូលផ្តុំ សម្រាប់នាំយកផ្តល់ជូនដល់វរះកងទព័ និងជនភៀសសឹកដោយចោរសៀមឈ្លានពានទន្ទ្រានមកលើព្រះរាជាណាចក្រកម្ពុជា ។ សូមបញ្ជាក់ថានៅក្នុងព្រឹត្តិការណ៍ ដែលកម្ពុជា និងប្រទេសថៃ បានប៉ះទង្គិច ដោយប្រើប្រាស់អាវុធ ការពារទឹកដីពីថ្ងៃទី២៤ ខែកក្កដា ឆ្នាំ២០២៥មក ព្រះសង្ឃខេត្តស្វាយរៀង បានធ្វើការនាំគ្រឿងឧបភោគបរិភោគទៅធ្វើការ ឧបត្ថម្ភ បន្ថែមដល់វីរៈកងទ័ព ជាបន្តបន្ទាប់ដើម្បីឆ្លើយតបទៅនឹងការ ធ្វើពលិកម្មដ៏ធំធេងរបស់វីរៈកងទ័ពផងដែរ៕ ដោយ ៖ ភា សារិទ្ធ

ពលករធ្វើការនៅប្រទេសថៃ អរគុណរាជរដ្ឋាភិបាល ដែលបានយកចិត្តទុកដាក់លើពួកគាត់ និងជួយអោយមានការងារធ្វើនៅជិតផ្ទះ មិនមានការភិតភ័យ

កំពង់ឆ្នាំង៖ ពលករមានស្រុកកំណើតនៅក្នុងស្រុកជលគីរី ខេត្តកំពង់ឆ្នាំងចំនួន៨គ្រួសារ ដែលបានវិលមកពីប្រទេសថៃវិញ នៅថ្ងៃទី០៨ ខែសីហា ឆ្នាំ២០២៥នេះ បានបញ្ជាក់ថា ពួកគាត់សប្បាយចិត្តខ្លាំង ក្រោយពីមកដល់ព្រំដែនកម្ពុជា និងមានក្រុមការងាររបស់រាជរដ្ឋាភិបាល អាជ្ញាធរខេត្តស្រុក បានយកចិត្តទុកដាក់ដល់សុវត្ថិភាពដោយមានឡានមកទទួលទៅកាន់ស្រុកកំណើត និងមានបាយទឹកហូបរហូតមក។ ពេលមកដល់ផ្ទះមានឯកឧត្តម អ៊ុក ពញ្ញា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះស្រុកជលគីរី បានចុះមកសួរសុខទុក្ខ ក៏ដូចជាផ្តាំផ្ញើអោយខិតខំកសាងជីវភាពគ្រួសារ និងថែសុខភាព។ ក្រោយឃើញការយកចិត្តទុកដាក់របស់ ក្រុមការងារ និងអាជ្ញាធរបែបនេះ ពួកគាត់នឹងឈប់ចំណាកស្រុក ដោយត្រូវខិតខំធ្វើការងារនៅក្នុងស្រុកជិតផ្ទះសម្បែងវិញ ព្រោះប្រាក់ខែនៅស្រុកខ្មែរល្អជាងស្រុកថៃផង។ពលករបានអោយដឹងថា៖ កាលពួកគាត់រស់នៅ និងធ្វើការក្នុងប្រទេសថៃ គឺពួកគាត់ភ័យខ្លាចបំផុតលើសុវត្ថិភាពផ្ទាល់ខ្លួន ព្រោះមានជនជាតិថៃ បានបង្ករការរំខាន និងរករឿងដល់ប្រជាពលករខ្មែរ ជាពិសេសពេលប្រទេសខ្មែរយើងមានជម្លោះព្រំដែនជាមួយប្រទេសថៃឈ្លានពាន រួមនិងការអំពាវនាវរបស់រាជរដ្ឋាភិបាលអោយពលករខ្មែរទាំងអស់វិលមកស្រុកកំណើតវិញផងនោះ ពួកគាត់បាននាំគ្នាវិលមកវិញដោយថៅកែមិនបើកប្រាក់ខែអោយឡើយ។ នៅថ្ងៃនេះ ពួកគាត់បានឃើញក្រុមការងាររាជរដ្ឋាភិបាលដែលមានឯកឧត្តម អ៊ុក ពញ្ញា អញ្ជើញចុះពិនិត្យដោយផ្ទាល់ និងបានយកចិត្តទុកដាក់ដល់ពួកគាត់បែបនេះ ។ ពួកគាត់ពិតជាអរគុណដល់ឯកឧត្តម អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះខេត្តកំពង់ឆ្នាំង ជាពិសេសសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដែលបានខិតខំស្វែងរកសុខសន្តិភាពជូនដល់ប្រជាជនក្នុងប្រទេស ក៏ដូចក្នុងតំបន់ទាំងមូល។ ឯកឧត្តម អ៊ុក ពញ្ញា បានសំណូមពរដល់ពលករទាំងអស់ អោយប្រញាប់ទៅដាក់ពាក្យធ្វើការងារ ព្រោះក្នុងខេត្តកំពង់ឆ្នាំងមានការងារនៅតាមរោងចក្រ សហគ្រាសជាច្រើនកន្លែងរង់ចាំទទួលបងប្អូន។ ត្រូវចេះថែរក្សាសុខភាពក្រុមគ្រួសារអោយបានល្អ អោយកូនទៅរៀនសូត្រ និងខិតខំដាំដុះបន្លែបង្ការ និងបង្ករបង្កើនផលស្រូវ។ ម្យ៉ាងទៀតបើបងប្អូនចង់រកការងារធ្វើ ហើយពាក់ព័ន្ធនឹងសេវាសាធារណៈ បងប្អូនត្រូវមករកអាជ្ញាធរឃុំជួយអោយបានលឿន និងដាក់ការងារធ្វើបានទាន់ពេលផងដែរ៕ កាំង ហុងវាស្នា

ឯកឧត្តម ហ៊ុន ម៉ានី អញ្ជើញគោរពវិញ្ញាណក្ខន្ធវីរកងទ័ពជួរមុខដែលបានពលីជីវិតនៅសមរភូមិ

ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ អញ្ជើញចូលរួមពិធីគោរពវិញ្ញាណក្ខន្ធវីរកងទ័ពដែលបានពលីជីវិតនៅសមរភូមិមុខ ដើម្បីបុព្វហេតុជាតិ និងមាតុភូមិកម្ពុជា លោកអនុសេនីយ៍ឯក ប្រាក់ ពិសិដ្ឋ កងឯកភាពនៃកងពលតូចអន្តរាគមន៍លេខ៨។ ពិធីនេះ បានរៀបចំធ្វើឡើងនារសៀលថ្ងៃទី៨ ខែសីហា ឆ្នាំ២០២៥ ដោយមានការអញ្ជើញចូលរួមពីឯកឧត្តម វ៉ា ថន អភិបាលនៃគណអភិបាលខេត្តក្រចេះ និងឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត ថ្នាក់ដឹកនាំខេត្ត ព្រមទាំងអភិបាលរងខេត្ត ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងទាំងបីប្រភេទ យុវជន នៃសហភាពសហព័ន្ធយុវជនកម្ពុជា និងបងប្អូនប្រជាពលរដ្ឋជាច្រើនរយនាក់ នៅគេហដ្ឋានសព ភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះ។ ក្នុងឱកាសនោះ ឯកឧត្តម ឧបនាយករដ្ឋមន្ត្រីបានចូលរួមរំលែកទុក្ខជាមួយគ្រួសារ លោកអនុសេនីយ៍ឯក ប្រាក់ ពិសិដ្ឋ ជាវីរកងទ័ពដែលបានពលីជីវិតនៅសមរភូមិមុខ ដើម្បីបុព្វហេតុជាតិ និងមាតុភូមិកម្ពុជា និងបានឧបត្ថម្ភទឹកប្រាក់មួយចំនួន។ក្រោយពីឯកឧត្តម ហ៊ុន ម៉ានី បានគោរពវិញ្ញាណក្ខន្ធវីរកងទ័ពរួច ថ្នាក់ដឹកនាំខេត្តក្រចេះក៏ចូលរួមពិធីគោរពវិញ្ញាណក្ខន្ធវីរកងទ័ពដែលបានពលីជីវិតនៅសមរភូមិមុខ លោកអនុសេនីយ៍ឯក ប្រាក់ ពិសិដ្ឋ កងឯកភាពនៃកងពលតូចអន្តរាគមន៍លេខ ៨ និងបានចូលរួមរំលែកទុក្ខជាមួយគ្រួសារ រួមទាំងបានឧបត្ថម្ភទឹកប្រាក់មួយចំនួនផងដែរ។ក្នុងនាមថ្នាក់ដឹកនាំខេត្តក្រចេះ សូមគោរពដឹងគុណ និងចងចាំជានិច្ចនូវវីរភាពដ៏អង់អាចក្លាហានរបស់វីរកងទ័ព ដែលបានពលីក្នុងសមរភូមិមុខ និងសូមឧទ្ទិសបួងសួងដល់ដួងវិញ្ញាណក្ខន្ធវីរកងទ័ពដែលបានពលី សូមបានទៅកាន់សុគតិភពកុំបីឃ្លៀងឃ្លាតឡើយ៕ អត្ថបទ៖ សេង ម័រ

ឯកឧត្តម ចាន់ ដារ៉ុង ដឹកនាំគណៈកម្មការអន្តរក្រសួងចុះពិនិត្យវាយតម្លៃបញ្ចប់សុពលភាពការងារថែទាំផ្លូវខួបចំនួន ៣កំណាត់ ក្នុងខេត្តពោធិ៍សាត់

នៅថ្ងៃទី៨ ខែសីហា ឆ្នាំ២០២៥ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ រួមដំណើរដោយឯកឧត្តម ជា ស្រ៊ុន រដ្ឋលេខាធិការក្រសួងអភិវឌ្ឍន៍ជនបទ និងជា គណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) បានដឹកនាំគណៈកម្មាធិការអន្តរក្រសួង រួមមាន៖ ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំ ក្រុមការងារបច្ចេកទេស របស់មន្ទីរអភិវឌ្ឍន៍ជនបទខេត្តពោធិ៍សាត់ ដើម្បីចុះពិនិត្យ និងវាយតម្លៃបញ្ចប់សុពលភាព លើការងារថែទាំខួបផ្លូវចំនួន៣កំណាត់ ដោយក្រាលកៅស៊ូឡើងវិញ (Reseal DBST ) ដែលមានទទឹង៦ម៉ែត្រ និងប្រវែងសរុប៧០០០ម៉ែត្រ ស្ថិតនៅក្នុងឃុំបឹងខ្នារ ស្រុកបាកាន និងឃុំតាលោ ស្រុកតាលោសែនជ័យ អនុវត្តន៍ដោយមន្ទីរអភិវឌ្ឍន៍ជនបទខេត្តពោធិ៍សាត់ ដោយប្រើប្រាស់ថវិការរបស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ ។បន្ទាប់ពីបានធ្វើការពិនិត្យ និងវាយតម្លៃរួចមក គណៈកម្មាធិការអន្តរក្រសួង បានសម្រេចឯកភាពទទួលយកបញ្ចប់នូវកាធានាគុណភាព ការងារថែទាំផ្លូវទាំង ៣កំណាត់នេះ ដោយផ្អែកទៅតាមលក្ខខណ្ឌបច្ចេកទេស ដូចមានចែងក្នុងកិច្ចសន្យា ។ ជាមួយគ្នានោះ ឯកឧត្តម ចាន់ ដារ៉ុង មានប្រសាសន៍លើកឡើងថា ក្រសួងអភិវឌ្ឍន៍ជនបទ ក្នុងនាមជាសេនាធិការផ្ទាល់របស់រាជរដ្ឋាភិបាលកម្ពុជា បាននឹងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ កាត់បន្ថយពេលវេលា និងកាត់បន្ថយចំណាយ លើការដឹកជញ្ជូនកសិផល និងទំនិញផ្សេងៗនៅជនបទ ។ឯកឧត្តម ចាន់ ដារ៉ុង ក៏បានសំណូមពរឲ្យអាជ្ញាធរមូលដ្ឋាន ក៏ដូចជាប្រជាពលរដ្ឋដែលប្រើប្រាស់ផ្លូវទាំងនេះត្រូវចូលរួមថែរក្សា ដើម្បីការប្រើប្រាស់បានយូរអង្វែង ទប់ស្កាត់ការដឹកលើសទំងន់ កុំចាក់ដីខ្ពស់ជាងផ្លូវ កុំលុបផ្លូវទឹកសងខាងផ្លូវ កុំហាលកសិផលនានានៅលើផ្លូវ មានផ្លូវស្រួលកុំបើកបរលឿនពេកត្រូវគោរច្បាប់ចរាចរណ៍ និងត្រូវចូលរួមថែរក្សាបរិស្ថានអនាម័យតាមដងផ្លូវ ។ឯកឧត្តម ចាន់ ដារ៉ុង បានបន្តថា ផ្លូវមានសារៈសំខាន់ណាស់ ផ្លូវ គឺជាសរសៃឈាម ជំរុញ អន្តរកម្មទាំងផ្នែកសេដ្ឋកិច្ច និងសង្គម តាមរយៈការលើកកម្ពស់ជីវភាពរស់នៅ របស់ប្រជាជន និងប្រែក្លាយជនបទឱ្យទៅជាតំបន់ ដែលមានភាពរីកចម្រើន។ ទន្ទឹមគ្នានេះ ឯកឧត្តមរដ្ឋលេខាធិការ ក៏បានវាយតម្លៃខ្ពស់ និងបានកោតសរសើរ ដល់មន្ទីរអភិវឌ្ឍន៍ជនបទខេត្តពោធិ៍សាត់ ទាំងថ្នាក់ដឹកនាំមន្ទីរ ក៏ដូចជាមន្រ្តីបច្ចេកទេស ដែលបានយកចិត្តទុកដាក់ ក្នុងកិច្ចការងារ ថែទាំផ្លូវ ដោយរក្សាបាននូវគុណភាពល្អប្រសើរ ដែលជាផ្នែកមួយដ៏សំខាន់ ចូលរួមជាមួយរាជរដ្ឋាភិបាល ក្នុងការចូលរួមរក្សាគុណភាពផ្លូវ ៕

វិស័យឧស្សាហកម្មសំខាន់ៗចំនួន៤ បានកំពុងជួយគាំទ្រដល់កំណើននាំចេញខ្ពស់របស់កម្ពុជា

កម្ពុជាបាននិងកំពុងស្រូបការវិនិយោគវិស័យឧស្សាហកម្ម លើរោងចក្របង្កើតសម្ភារៈបរិក្ខាអគ្គិសនី និងអេឡិចត្រូនិច, គ្រឿងបង្គុំ យានយន្ត, រោងចក្រផលិតសំបកកង់រថយន្ត, និងរោងចក្រកែច្នៃគ្រឿងសង្ហារឹមជាដើម ហើយក្នុងរយៈពេល៥ឆ្នាំទៅមុខទៀត វិស័យនេះនៅតែដើរតួសំខាន់នៅក្នុងសេដ្ឋកិច្ច។ឯកឧត្តម លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា លើកឡើងក្នុងកិច្ច ពិភាក្សាស្តីពី ឱកាសធុរកិច្ច និងវិនិយោគនៅកម្ពុជា ក្នុងពិព័រណ៍ម៉ាស៊ីន និងសម្លៀកបំពាក់ដ៏ធំបំផុតនៅកម្ពុជា នៅថ្ងៃទី៧ ខែសីហា ឆ្នាំ២០២៥ នេះថា ទាក់ទិនឧស្សាហកម្មនេះ កម្ពុជាបានស្រូបយកឧស្សាហកម្មកាត់ដេរ និងសម្លៀកបំពាក់មុនគេ បន្ទាប់ពីមានកិច្ចព្រម ព្រៀងនៅលើពិភពលោក ដែលបានកំណត់កូតាក្នុងការនាំចេញ ក្នុងនោះកម្ពុជាក៏ជាប្រទេសមួយដែលទទួលបានកូតាក្នុងការនាំចេញ ផងដែរ ដោយធ្វើឱ្យកម្ពុជាស្រូបយកឱកាសវិនិយោគលើវិស័យឧស្សាហកម្មជាបន្តបន្ទាប់ និងបានរីកដុះដាល់យ៉ាងខ្លាំងរហូតមកដល់ បច្ចប្បន្ន គឺដោយសារកម្ពុជាបានចូលរួមជាមួយអង្គការ ILO។ បន្ទាប់មកកម្ពុជាក៏ទទួលបានរោងចក្រស្បែកជើង និងជាង១០ឆ្នាំមុន កម្ពុជាក៏បានស្រូបយកឧស្សាហកម្មសំភារៈធ្វើដំណើរ ដោយវិស័យនេះបានរីកចម្រើនចាប់តាំងពីឆ្នាំ២០១៦ រហូតមកដល់បច្ចុប្បន្ន។ឯកឧត្តម បន្តថា ជុំវិញវិស័យឧស្សាហកម្មខាងលើនេះ គិតមកដល់បច្ចុប្បន្ន កម្ពុជាបាននិងកំពុងស្រូបយកវិស័យឧស្សាហកម្ម ផ្សេងៗទៀតបម្រើក្នុងសេដ្ឋកិច្ច និងបានកំពុងរីកចម្រើននៅក្នុងស្រុកដូចជា រោងចក្រគ្រឿងបង្គុំសម្ភារៈបរិក្ខាអគ្គិសនី និងអេឡិចត្រូនិច មានដូចជា ការផលិតអំពូលភ្លើង និងកង្ហាជាដើម រោងចក្រឧស្សាហកម្មទាំងនោះភាគច្រើននៅក្រុងបាវិតខេត្តស្វាយរៀង។ បន្ទាប់មក ទៀតកម្ពុជាក៏ទទួលបានរោងចក្រគ្រឿងបង្គុំយានយន្ត, រោងចក្រផលិតសំបកកង់រថយន្ត និងការកែច្នៃគ្រឿងសង្ហារឹមផ្សេងៗ ដែល វិស័យទាំងនេះបានកំពុងចូលរួមបន្ថែមដល់កំណើននៃការនាំចេញរបស់កម្ពុជា។សូបញ្ជាក់ថា នៅក្នុងឆមាសទី១ ឆ្នាំ២០២៥, ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបមានចំនួន ៣៧៣ គម្រោង មានទុនវិនិយោគប្រមាណ ៥,៨ ប៊ីលានដុល្លារអាម៉េរិក បើប្រៀបធៀបរយៈពេលដូចគ្នាក្នុងឆ្នាំ២០២៤ ឃើញថា កើនឡើងចំនួន ១៨៣ គម្រោង បច្ចុប្បន្នកម្ពុជាបាននិងកំពុងបន្តទទួលគម្រោងវិនិយោគថ្មីៗបន្ថែមទៀត ក្នុងការចូលរួមដល់ការអភិវឌ្ឍវិស័យឧស្សាហកម្ម នៅកម្ពុជា៕ អត្ថបទ៖ សុន រ៉ាឌី

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

ធនាគារជាតិនៃកម្ពុជា បានប៉ានស្មានថា វិស័យកសិកម្មនៅកម្ពុជា នៅក្នុងឆមាសទី១ ឆ្នាំ២០២៥នេះ បានបន្តមានកំណើន កើនឡើងក្នុងរង្វង់ ១,២% ដោយបានគាំទ្រកំណើននៃអនុវិស័យផលដំណាំ និងធនធានជលផល។តាមរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ២០២៥ របស់ធនាគារជាតិនៃកម្ពុជា បានបង្ហាញឱ្យដឹងថា សេដ្ឋកិច្ចកម្ពុជានៅក្នុងឆមាសទី១នេះ បានកើន ៥.៩% បើទោះបីជាប្រឈមនឹងភាពមិនច្បាស់លាស់ពីកត្តាខាងក្រៅខ្លាំងក៏ដោយ ក៏ កំណើននេះត្រូវបានគាំទ្រដោយវិស័យមួយចំនួន ក្នុងនោះវិស័យកសិកម្ម, បានបន្តមានកំណើន ១,២% ដែលគាំទ្រដោយកំណើន ផលដំណាំ និងធនធានជលផល។ចំពោះផលដំណាំ, ក្នុងនោះផលស្រូវរដូវប្រាំងបានកើនជិត ១១% ធៀបនឹងគ្រាដូចគ្នាឆ្នាំមុន ដល់ ៤,៣ លានតោន ដោយ សារភាពអំណោយផលនៃអាកាសធាតុ និងការអភិវឌ្ឍប្រព័ន្ធធារាសាស្ត្រ។ ទន្ទឹមនេះ ការកើនឡើងនៃថ្លៃស្រូវនៅឆ្នាំ២០២៣-២០២៤ ក៏បានរួមចំណែកជំរុញការដាំដុះផងដែរ។ លើសពីនេះផ្ទៃដីដាំដុះស្រូវរដូវវស្សាក៏បានកើន ៤,៤% ធៀបនឹងគ្រាដូចគ្នាឆ្នាំមុន។ ចំណែក ផលជ័រកៅស៊ូវិញ នៅក្នុងរយៈពេលនេះដែរ បានកើនឡើង ១,៣% ដល់ជាង ១៤២ ពាន់តោន ដោយសារការកំណើនតម្រូវការ ស្រប ពេលតម្លៃជ័រកៅស៊ូជាមធ្យមបន្តកើនឡើងខ្ពស់ជាង ៣០% ដល់ជិត ២ ពាន់ដុល្លារអាមេរិក ក្នុង១តោន ។ ចំណែកធនធានជលផល បានកើនជិត ១៦% ក្នុងនោះផលនេសាទទឹកសាប និងសមុទ្របានកើនជាង ២៣% ដែលជាចម្បងដោយសារការពង្រឹងវិធានការ ទប់ស្កាត់សកម្មភាពនេសាទខុសច្បាប់ ស្របពេលដែលផលវារីវប្បកម្ម កើន ៦% ផងដែរ។ឧកញ៉ាបណ្ឌិត ឈិន កេន អ្នកសម្របសម្រួលទីផ្សារនាំចេញកសិផលកម្ពុជា លើកឡើងថា ជុំវិញវិស័យកសិកម្មនេះឃើញថា រាជរដ្ឋាភិបាលបានយកចិត្តទុកដាក់ទាំងការដាំដុះ និងទីផ្សារនាំចេញ គិតមកដល់ពេលនេះ, ផលិតផលកម្ពុជាជាច្រើនកំពុងហៀរចេញ ទៅកាន់ទីផ្សារក្រៅប្រទេស ជាក់ស្តែងថ្មីៗនេះ គយចិនបានអនុញ្ញត្តិនាំចេញចូលផ្លែធុរេនរបស់កម្ពុជាបន្ថែមទៀត និងរំពឹងថា កសិផល របស់កម្ពុជាជាច្រើនទៀត នឹងត្រូវនាំចេញជាបន្តបន្ទាប់ គាំទ្រដល់កំណើនាំចេញ និងការរីកលូតលាស់វិស័យកសិកម្មក្នុងស្រុក។ជុំវិញវិស័យកសិកម្មនេះ, បើយោងតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ ត្រូវបានរាជរដ្ឋាភិបាលព្យាករថា នៅក្នុងឆ្នាំ ២០២៥ វិស័យនេះនឹងមានកំណើនឡើង ១,១% ដោយសារការរំពឹងទុកនូវកំណើនល្អនៃអនុវិស័យដំណាំ និងចិញ្ចឹមសត្វ និងការងើប សន្សឹមៗនៃអនុវិស័យនេសាទ។ អនុវិស័យដំណាំ ត្រូវបានរំពឹងថា នៅរក្សាកំណើនល្អ ដោយសារការបន្តកើននៃការវិនិយោគទាំងក្នុង ស្រុកនិងពីបរទេស លើការកែច្នៃផលិតផលកសិកម្ម ការបង្កើនការវិនិយោគសាធារណៈ និងអន្តរាគមន៍របស់រាជរដ្ឋាភិបាល។ ទន្ទឹមនេះ អនុវិស័យចិញ្ចឹមសត្វត្រូវបានព្យាករថានឹងបន្តងើបសន្សឹមៗ ដោយសារវិធានអន្តរាគមន៍របស់រាជរដ្ឋាភិបាលលើការនាំចូលសាច់បង្កក កន្លងមក ដែលនឹងលើកទឹកចិត្តការចិញ្ចឹមក្នុងស្រុក ខណៈអនុវិស័យនេសាទ ត្រូវបានព្យាករថា នឹងមានកំណើនល្អ ក្រោមការរំពឹងទុក នូវកំណើនផលចាប់ទឹកសាប ដែលនឹងត្រូវបានបន្តស្តារឡើងវិញ ដោយសារការដាក់ចេញនូវគោលនយោបាយ បង្ក្រាបបទល្មើស នេសាទ និងការវិនិយោគក្នុងវារីវប្បកម្ម ក្រោមការអនុវត្តវិធានការរបស់រាជរដ្ឋាភិបាលនិងការគាំទ្រពីដៃគូអភិវឌ្ឍន៍ សំដៅដោះស្រាយ បញ្ហាប្រឈមជារចនាសម្ព័ន្ធ ផ្តល់ការគាំទ្រផ្នែកហិរញ្ញប្បទាន និងជំរុញការផ្សព្វផ្សាយបច្ចេកទេសនិងការប្រើប្រាស់ពូជត្រី ប្រកបដោយ ប្រសិទ្ធភាពខ្ពស់និងគុណភាព៕ អត្ថបទ៖ សុន រ៉ាឌី

ពុទ្ធបដិមាធ្វើអំពីស្ពាន់កម្ពស់ ៩ម៉ែត្រ បានដាក់តម្កល់ជាផ្លូវការនៅអាកាសយានដ្ឋានអន្តរជាតិតេជោ

សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្ដេចព្រះសង្ឃ នាយកគណៈមហានិកាយនៃកម្ពុជា នៅព្រឹកថ្ងៃទី៨ ខែសីហានេះ បានយាងប្រារព្ធពិធីរំកិលព្រះពុទ្ធបដិមា ធ្វើអំពីស្ពាន់កម្ពស់ ៩ម៉ែត្រ ដើម្បីតម្កល់ក្នុងទីបរិវេណ អាកាសយានដ្ឋានអន្តរជាតិតេជោ ជាកេតនភណ្ឌដ៏ពិសិដ្ឋ ថ្វាយជាតិ សាសនា ព្រះមហាក្សត្រ និងដើម្បីបានជាឧត្តមប្រយោជន៍ ក្នុងការគោរពរបស់បណ្តាភ្ញៀវជាតិ និងអន្តរជាតិ។អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក នៅក្រោយចប់កម្មវិធីនេះ បានមានប្រសាសន៍ប្រាប់ក្រុមអ្នកសារព័ត៍មាន ឱ្យដឹងថា ការតម្កល់ព្រះពុទ្ធបដិមានេះ ដើម្បីបង្ហាញពីរចនាបទ វប្បធម៌ និងការលើកតម្កើងព្រះពុទ្ធសាសនា ជាសាសនារបស់រដ្ឋទៅកាន់ភ្ញៀវជាតិ និងអន្តរជាតិ ដែលគ្រោងបើកដំណើរនៅថ្ងៃទី៩ ខែកញ្ញាខាងមុខនេះ។ បន្ថែមពីនេះ គឺដើម្បីឱ្យភ្ញៀវទេសចរណ៍ជាតិ និងអន្តរជាតិ ក៏ដូចជាភ្ញៀវដែលឆ្លងកាត់ព្រលានយន្តហោះទាំងអស់ជួបតែសេចក្តីសុខសប្បាយនៅក្នុងការធ្វើដំណើរ។អ្នកឧកញ៉ា ឆារស៍ វ៉ាន់ បានបញ្ជាក់បន្ថែមទៀតថា ការដាក់ព្រះពុទ្ធបដិមានេះ ដោយសារកម្ពុជាកាន់ព្រះពុទ្ធសាសនា ដូច្នេះហើយ អ្វីដែលធ្វើនៅព្រលានយន្តហោះនេះគឺរំពឹងថា នៅក្នុងរាល់រចនាបថ ការរៀបចំទាំងអស់ក្នុងព្រលាននេះ គឺយកតាមប្រពៃណី និងវប្បធម៌ខ្មែរសុទ្ធសាធទាំងអស់ដើម្បីតម្កល់ក្នុងព្រលានថ្មីនេះ គឺដើម្បីឱ្យសុខសាន្ត សុខសប្បាយទាំងអស់ ហើយក៏ជាវប្បធម៌ និងដើម្បីឱ្យភ្ញៀវទេសចរទាំងអស់បានមើលឃើញថា ជាព្រះពុទ្ធមួយអង្គដែលមានតម្លៃ សំខាន់គឺបង្ហាញវប្បធម៌របស់កម្ពុជា។នៅអាកាសយានដ្ឋានអន្តរជាតិតេជោ ក្រៅពីព្រះពុទ្ធបដិមា ក៏មានដាក់តាំងបន្ថែមអំពីរូបចម្លាក់រចនាបទបែបខ្មែរផ្សេងៗជាច្រើនទៀត ដែលភាគច្រើននាំមកពីខេត្តសៀមរាប។ សូមបញ្ជាក់ទៀតថា អាកាសយានដ្ឋានអន្តរជាតិតេជោ សាងសង់លើផ្ទៃដីសរុប ២,៦០០ហិកតា ជាអាកាសយានដ្ឋាន 4F ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីបអាចឲ្យប្រភេទយន្តហោះធុនយក្សចុះចតបាន។ តាមការគ្រោងទុក ព្រលានយន្តហោះថ្មីនេះ នឹងបើកឱ្យប្រតិបត្តិការ នៅថ្ងៃទី៩ ខែកញ្ញា។ និងថ្ងៃទី២០ ខែតុលា ឆ្នាំ២០២៥ នឹង សម្ពោធជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា៕ អត្ថបទ៖ ឈិត បូរ៉ាវី

ប្រជាជនភៀសសឹក២៣៨៤គ្រួសារ ស្នាក់នៅបណ្តោះអាសន្ន ក្នុងខេត្តកំពង់ធំ ទទួលអំណោយពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន

នៅព្រឹកថ្ងៃសុក្រ ទី៨ ខែសីហា ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អមដោយថ្នាក់ដឹកនាំ និងភរិយាថ្នាកដឹកនាំ បានអញ្ជើញចុះជួបសំណេះសំណាល សួរសុខទុក្ខ និងផ្តល់អំណោយមនុស្សធម៌ ជូនប្រជាជនភៀសសឹកចំនួន ២៣៨៤ គ្រួសារ ក្នុងនោះមកពីខេត្តព្រះវិហារមាន៧ក្រុងស្រុកចំនួន៨១៨គ្រួសារ , ខេត្តឧត្តរមានជ័យ មកពី៤ក្រុងស្រុកចំនួន១៤០២គ្រួសារ និងខេត្តប៉ៃលិន បន្ទាយមានជ័យ បាត់ដំបង កោះកុង សរុបចំនួន១៦៤គ្រួសារ ពិធីនេះប្រព្រឹត្តិទៅនៅពហុកីឡដ្ឋាន ស្ថិតក្នុងភូមិរូង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។យោងតាមរបាយការណ៍ ឯកឧត្តម នួន ផារ័ត្ន អភិបាលខេត្តកំពង់ធំ និងជាប្រធានគណ:កម្មាធិការសាខាកាកបាទក្រហមកម្ពុជាខេត្ត បានឲ្យដឹងថា អំឡុងមានជម្លោះព្រំដែនកម្ពុជា-ថៃ គឺពិតជាបានបង្កផលលំបាក យ៉ាងខ្លាំងមកលើសុខសុវត្ថិភាពរបស់ប្រជាពលរដ្ឋកម្ពុជា ជាពិសេសបងប្អូនដែលរស់នៅជាប់ព្រំដែន កម្ពុជា-ថៃផ្ទាល់ ។ ជាក់ស្តែង ប្រជាជនដែលភៀសសឹកពីខេត្តឧត្តរមានជ័យ ព្រះវិហារ បន្ទាយមានជ័យ កោះកុង បាត់ដំបង និងប៉ៃលិន មកស្នាក់ក្នុងខេត្តកំពង់ធំ មានសរុបចំនួន ២.៣៨៤ គ្រួសារ ស្មើនឹង ៦.៣៣០នាក់ ក្នុងនោះ ជនភៀសសឹក ជាប្រជាជនទូទៅមានចំនួន ១.៩៥៥គ្រួសារ និងជនភៀស សឹកជាគ្រួសារយោធិនមានចំនួន ៤២៩គ្រួសារ ដោយមានអ្នកខ្លះរស់នៅជាមួយនឹងផ្ទះបងប្អូន អ្នកខ្លះរស់នៅក្នុងទីវត្តអារាមជាដើម។ឯកឧត្តមបន្តថា ជនភៀសដែលរស់នៅតាមជំរុំ តាមទីវត្តអារាមនានា ដែលខ្លះខ្វះអាហារហូបចុក ខ្វះទឹកស្អាតប្រើប្រាស់ បាត់បង់មុខរបរ បាត់បង់ចំណូល ក្មេងៗបាត់បង់ការសិក្សា និងប្រឈមនឹងការលំបាកជាច្រើនផ្សេងៗ ទៀត ។ឆ្លើយតបទៅនឹងការលំបាករបស់ប្រជាពលរដ្ឋភៀសសឹកទាំងនេះ កាកបាទក្រហមកម្ពុជា ដែលជាអង្គការមនុស្សធម៌គ្មានព្រំដែន ដឹកនាំដោយ សម្តេចកិត្តិព្រឹទ្ធបណ្ឌិត ដែលប្រជាជនប្រសិទ្ធនាមជា មាតាមនុស្សធម៌ បានធ្វើសកម្មភាពយ៉ាងសស្រាក់សស្រាំជាមួយរាជរដ្ឋាភិបាល និងអាជ្ញាធរពាក់ព័ន្ធ ដើម្បីចែកជូននូវស្បៀងអាហារ និងសម្ភារៈប្រើប្រាស់ផ្សេងៗ ជាបន្តបន្ទាប់ជូនពួកគាត់ ដើម្បីចូលរួមរំលែកទុក្ខ លំបាករបស់ប្រជាពលរដ្ឋ។ ជាក់ស្តែង កម្មវិធីចែកអំណោយនៅថ្ងៃនេះ ពិតណាស់នឹងអាចចូលរួម ចំណែកយ៉ាងសំខាន់ក្នុងការសម្រាលការលំបាករបស់បងប្អូនប្រជាពលរដ្ឋបានមួយផ្នែក ដែដែលកំពុងភៀសខ្លួនចេញពីតំបន់ដែលមានភាពតានតឹង។ក្នុងឱកាសជួបសំណេះសំណាលសួរសុខទុក្ខជាមួយប្រជាជនភៀសសឹកទាំងអស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មានក្តីក្តុកក្តួលរំជួលចិត្ត អាណិតអាសូរយ៉ាងក្រៃលែង ជាមួយលោកយាយ លោកតា បងប្អូនជនភៀសសឹកទាំងអស់ ដែលបង្ខំចិត្តចាកចោលផ្ទះសម្បែងព្រាត់ប្រាសក្រុមគ្រួសារដោយសារជម្លោះប្រដាប់អាវុធ។ ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន បានពាំនាំនូវព្រះរាជបន្ទូល និងព្រះសវណីយ៍ ផ្តាំផ្ញើសុខទុក្ខ និងក្តីនឹករលឹក អាណិតអាសូរ ពីព្រះករុណា ព្រះមហាក្សត្រ ជាអម្ចាស់ជីវិតលើត្បូង និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាល ព្រះអង្គទាំងទ្វេតែងតែគិតគូរពីសុខទុក្ខរបស់បង-ប្អូនប្រជានុរាស្ត្រនៅគ្រប់ទីកន្លែង ថ្វីបើព្រះអង្គមិនបានយាងមកជួប លោកយាយ លោកតា មាមីង បងប្អូន កូនក្មួយដោយផ្ទាល់ក៏ដោយ។ សម្តេចប្រធានបានបញ្ជាក់ថា ទោះបីជាស្ថិតក្នុងកាល:ទេស:ណាក៏ដោយ រាជរដ្ឋាភិបាលក៏ដូចជា កាកបាទក្រហមកម្ពុជា នៅតែគិតគូរយកចិត្តទុកដាក់ដល់ប្រជាពលរដ្ឋគ្រប់ពេលវេលា ជាពិសេសបងប្អូនប្រជាពលរដ្ឋភៀសសឹករស់នៅតាមបន្ទាត់ព្រំដែនដែលរងគ្រោះដោយបញ្ហាជម្លោះព្រំដែនរវាងកម្ពុជា-ថៃ ធ្វើបាត់បង់សេចក្តីសុខ សុភមង្គល ក្នុងក្រុមគ្រួសារ និងការសិក្សារបស់កូនៗចៅៗ ។ ដោយមើលឃើញពីទុក្ខលំបាកវេទនាទាំងអស់នេះហើយទើបថ្ងៃនេះ កក្រក មិនបង្អង់យូឡើយ បាននាំយកគ្រឿងឧបភោគបរិភោគ និងសម្ភារ:ប្រើប្រាស់មួយចំនួនជូនបងប្អូននាពេលនេះ ដើម្បីជួយសម្រាលជីវភាពប្រជាពលរដ្ឋបានមួយគ្រាផងដែរ។ពាក់ព័ន្ធនិងបញ្ហាសុខភាព សម្ដេចកិត្តិព្រឹទ្ធ ប៊ុនរានី ហ៊ុនសែន បានអំពាវនាវទៅដល់ប្រជាជនភៀសសិកទាំងអស់ដែលកំពុងរស់នៅតាមតំបន់ភៀសសឹកមួយចំនួន ត្រូវថែរក្សាសុខភាពឱ្យបានល្អ ដោយត្រូវរស់នៅមានអានាម័យ និងពិសារទឹកដាំឆ្អិន ហើយស្ត្រីមានផ្ទៃពោះទៅពិនិត្យផ្ទៃពោះឲ្យបានទៀងទាត់ដើម្បីសុខភាពល្អទាំងម្តាយ និងកូន ព្រមទាំងកុំឱ្យកុមារតូចៗលេងទឹកព្រោះរដូវនេះជារដូវទឹកឡើង ដើម្បីចៀសវាងគ្រោះថ្នាក់ជាយថាហេតុណាមួយកើតឡើង ។ប្រជាពលរដ្ឋភៀសសឹកដែលទទួលអំណោយបានថ្លែងអំណរគុណយ៉ាងជ្រាលជ្រៅចំពោះទឹកចិត្ត និងការគិតគូរ សម្តេចប្រធានពីជីវភាពរស់នៅរបស់ពួកដោយមិនទុកពួកគាត់ចោល។ ពួកគាត់បន្តថា មានតែមាតាមនុស្សធម៌នៃកម្ពុជា ដែលតែងយកចិត្តទុក្ខដាក់គិតគូរខ្ពស់ចំពោះសុខទុក្ខប្រជាពលរដ្ឋជួបការលំបាកគ្រប់ពេលវេលា ៕

សម្តេចរដ្ឋសភាធិបតី ឃួន សុដារី អញ្ជើញដឹកនាំកិច្ចប្រជុំត្រួតពិនិត្យលទ្ធផលការងារត្រៀមចូលរួមមហាសន្និបាតអាយប៉ាលើកទី៤៦ នៅប្រទេសម៉ាឡេស៊ី

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៨ ខែសីហាឆ្នាំ២០២៥ បានអញ្ជើញដឹកនាំកិច្ចប្រជុំត្រួតពិនិត្យលទ្ធផលការងារក្នុងការត្រៀមចូលរួមមហាសន្និបាតអន្តរសភាអាស៊ាន(អាយប៉ា/AIPA) លើកទី៤៦ នៅប្រទេសម៉ាឡេស៊ី ចាប់ពីថ្ងៃទី១៦ដល់ថ្ងៃទី២២ ខែកញ្ញាឆ្នាំ២០២៥ ខាងមុខនេះ។កិច្ចប្រជុំនេះ រៀបចំឡើងនៅវិមានរដ្ឋសភា ដោយមានការអញ្ជើញចូលរួមពីសមាសភាពគណៈប្រតិភូជាន់ខ្ពស់សភានៃព្រះរាជាណាចកម្ពុជា និងថ្នាក់ដឹកនាំអគ្គលលេខាធិការដ្ឋានរដ្ឋសភា ព្រមទាំងមន្រ្តីជំនួយការ ដែលទទួលបានការសម្រេចឱ្យចូលរួមជួយការងារថ្នាក់ដឹកនាំនៅពេលមហាសន្និបាតអន្តរសភា (អាយប៉ា)លើកទី៤៦។ សម្តេចរដ្ឋសភាធិបតី បានថ្លែងអំណរគុណយ៉ាងជ្រាលជ្រៅជូនសមាជិកសមាជិកាសភា ក៏ដូចជាថ្នាក់ដឹកនាំអគ្គលេខាធិការដ្ឋានរដ្ឋសភា ដែលបានបំពេញការងារយ៉ាងសកម្ម និងបានត្រៀមលក្ខណៈបានល្អប្រសើរទំាងខ្លឹមសារ និងសមាសភាពចូលរួម ពិសេសបានធ្វើការយ៉ាងជិតស្និទ្ធជាមួយអគ្គលេខាធិការដ្ឋានអាយប៉ា និងម្ចាស់ផ្ទះរៀបចំមហាសន្និបាត។ ជាមួយគ្នានេះ សម្តេចប្រធានរដ្ឋសភា បានផ្តំាផ្ញើដល់ក្រុមការងារត្រូវបំពេញភារកិច្ចដែលនៅសេសសល់ឱ្យបានរួចរាល់ គ្រប់ជ្រុងជ្រោយ។ សម្តេចបានគូសបញ្ជាក់ថា នៅក្នុងនោះខ្លឹមសារសំខាន់មួយដែលសភាកម្ពុជាត្រូវលើកឡើងនៅក្នុងកិច្ចប្រជុំនានានៅក្នុងពេលមហាសន្និបាតលើកទី៤៦នេះ គឺតម្លៃសន្តិភាព។ សន្តិភាពសម្រាប់កម្ពុជា ដែលបានហែលឆ្លងភ្លើងសង្រ្គាម ជាច្រើនទសវត្សរ៍មានសារៈសំខាន់ណាស់។ សន្តិភាពនៅកម្ពុជា បានពីការលះបង់យកអាយុជីវិតជាដើមទុន របស់សម្តេចអគ្គមហាសេនាបតីតេជោ ហ៊ុន សែន ដែលជាប្រតិបត្តិករដ៏ឆ្នើមនៃនយោបាយឈ្នះ-ឈ្នះ។ សន្តិភាពនៅកម្ពុជា បានកំពុងការពារនិងលើកកម្ពស់ជាបន្ត យ៉ាងម៉ឺងម៉ាត់ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ សម្តេចរដ្ឋសភាធិបតី ក៏បានផ្តាំផ្ញើបន្តថា ក្នុងនាមប្រទេសស្រឡាញ់សន្តិភាព កម្ពុជាត្រូវលើកឡើងពីការថ្លែងអំណរគុណចំពោះគំនិតផ្ដួចផ្ដើមរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ដែលបានបង្កើតឱ្យមាននូវបទឈប់បាញ់កាលពីថ្ងៃទី២៨ ខែកក្កដា ឆ្នាំ២០២៥កន្លងមក។ នៅក្នុងនោះកម្ពុជាក៏ត្រូវអរគុណដល់ ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្រ្តីប្រទេសម៉ាឡេស៊ី និងជាប្រធានអាស៊ាន ក្នុងការជួយសម្របសម្រួលរៀបចំទីកន្លែងកិច្ចចរចាបទឈប់បាញ់និងកិច្ចប្រជុំគណៈកម្មាធិការព្រំដែនទូទៅ (GBC) ដែលទើបបញ្ចប់ ដោយទទួលបានលទ្ធផលជាទីមោទនៈ។ កម្ពុជាក៏សូមអរគុណដល់សាធារណរដ្ឋប្រជាមានិតចិននិងបណ្តាប្រទេសជាមិត្តនានា ដែលបានចូលរួមសង្កេតការណ៍ការចរចាបទឈប់បាញ់ និងការអនុវត្តបទឈប់បាញ់ឱ្យមានប្រសិទ្ធភាពខ្ពស់ដើម្បីសុខសន្តិភាព សុវត្ថិភាពយូរអង្វែងនៃប្រទេសទំាងពីរ៕

គិតមកដល់ពេលនេះ ព្រលានយន្តថ្មីក្រុងតាខ្មៅសម្រេចការសាងសង់ ១០០% និងគ្រោងបើកដំណើរការនៅថ្ងៃទី៩ ខែកញ្ញា

នាយកគ្រប់គ្រងក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបញ្ជាក់ឱ្យដឹងថា គិតមកទល់ពេលនេះ ព្រលានយន្តហោះអន្តរជាតិតេជោ ក្រុងតាខ្មៅ សម្រេចការសាងសង់បាន ១០០% ខណៈព្រលានថ្មីនេះ គ្រោងបើកដំណើរការនៅថ្ងៃទី៩ ខែកញ្ញាខាងមុខនេះ។អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) នៅក្នុងកម្មវិធីប្រារព្ធពិធីរំកិលព្រះពុទ្ធបដិមា ធ្វើអំពីស្ពាន់ ទម្ងន់៩តោន និងកម្ពស់៩ម៉ែត្រ ដើម្បីតម្កល់ក្នុងទីបរិវេណអាកាសយានដ្ឋានអន្តរជាតិតេជោ នៅព្រឹកថ្ងៃទី៨ ខែសីហានេះ បានមានប្រសាសន៍ប្រាប់បណ្តាញអ្នកសារព័ត៌មានឲ្យដឹងថា នៅពេលនេះក្រុមការងារទាំងអស់ រួមទាំងព្រលានយន្តហោះអន្តរជាតិតេជោ (TIA) ក្រុមហ៊ុនអាកាសចរណ៍ទាំងអស់ និងក្រុមហ៊ុនដឹកជញ្ជូនជាដើម គឺមានប្រជុំ ១សប្តាហ៍ ១ដង ដើម្បីត្រៀមខ្លួនផ្ទេរពីព្រលាយន្តហោះចាស់ មកកាន់ព្រលានយន្តហោះថ្មី។ អ្នកឧកញ៉ា បានបញ្ជាក់ថា មុននឹងបើកឱ្យដំណើរការហោះហើរនៅថ្ងៃទី៩ ខែកញ្ញាខាងមុខ ព្រលានថ្មីនេះបានធ្វើការតេស្តសាកល្បងចំនួន២លើករួចមកហើយជាបច្ចេកទេស ហើយខាងអាកាសចរណ៍ស៊ីវិលក៏បានចុះហត្ថលេខាទទួលស្គាល់ និងចេញអាជ្ញាប័ណ្ណរួចដែរ ហើយយើងក៏ត្រៀមខ្លួនថែមទៀត ដើម្បីធ្វើតេស្តយន្តហោះប្រភេទធំ A320 នៅថ្ងៃទី១៥ ខែសីហា។ បន្ទាប់មក នឹងធ្វើការតេស្តធំមួយទៀត ទៅលើយន្តហោះចំនួន ២គ្រឿង គឺយន្តហោះ Singapore Airline និង Air Cambodia នៅដើមខែកញ្ញាខាងមុខ។ព្រលានយន្តហោះអន្តរជាតិតេជោ មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជាក្នុងឆ្នាំ២០១៨ ក្រោមការណែនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ធសភាកម្ពុជា ដើម្បីធ្វើការងារសាងសង់ព្រលានយន្តភ្នំពេញថ្មីមួយនេះ។ តាមការគ្រោងទុក ព្រលានយន្តហោះអន្តរជាតិតេជោថ្មីនេះ នឹងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា៕ អត្ថបទ ឈិត បូរ៉ាវី

បណ្ដាញសង្គម

ព័ត៌មានថ្មីៗ

រដ្ឋមន្ដ្រីទេសចរណ៍ ចាត់ទុកការជិះកង់ចម្ងាយ ១,២១២គីឡូម៉ែត្រ បង្ហាញពិភពលោកថា កម្ពុជាមានសន្ដិភាព សុវត្ថិភាព គ្រប់ពេល និងទីកន្លែង

មនុស្ស១០នាក់ស្លាប់នៅប៉ាគីស្ថាន ខណៈទីក្រុងការ៉ាជីរបស់ប្រទេសនេះកំពុងទប់ទល់នឹងថ្ងៃក្ដៅបំផុតក្នុងពេល៨ឆ្នាំ

គំនូរនៅលើផ្លូវ និងជញ្ជាំងនៅទីក្រុង Rio បង្ហាញពីការគាំទ្រលើទឹកដីក្រុមជម្រើសជាតិប្រេស៊ីល

អង្គភាពសេវាសម្ងាត់និយាយថា មន្ត្រីរបស់ខ្លួនបានបាញ់ជនសង្ស័យប្រដាប់អាវុធនៅជិតសេតវិមាន

អ្នកចាំទីវ័យចំណាស់ដល់ ៧០ ឆ្នាំនៅតែអាចបង្ហាញខ្លួនការប្រកួតផ្លូវការបាននៅអេស្ប៉ាញ

ការជម្លៀសត្រូវបានគ្រោងទុក ខណៈការផ្ទុះឡើងវីរុស Hanta ធ្វើឲ្យជាប់មនុស្ស១៥០នាក់នៅលើនាវាទេសចរណ៍នៅអាហ្វ្រិកខាងលិច

ស្ថានទូតអាមេរិកប្រចាំនៅអារ៉ាប់រួម ចេញការព្រមានអំពី «ការគំរាមកំហែងតាមអាកាសដ៏ខ្លាំងក្លា»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ឯកឧត្តម ហ៊ុន ម៉ានី អញ្ជើញគោរពវិញ្ញាណក្ខន្ធវីរកងទ័ពជួរមុខដែលបានពលីជីវិតនៅសមរភូមិ

វិស័យឧស្សាហកម្មសំខាន់ៗចំនួន៤ បានកំពុងជួយគាំទ្រដល់កំណើននាំចេញខ្ពស់របស់កម្ពុជា

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

ពុទ្ធបដិមាធ្វើអំពីស្ពាន់កម្ពស់ ៩ម៉ែត្រ បានដាក់តម្កល់ជាផ្លូវការនៅអាកាសយានដ្ឋានអន្តរជាតិតេជោ

គិតមកដល់ពេលនេះ ព្រលានយន្តថ្មីក្រុងតាខ្មៅសម្រេចការសាងសង់ ១០០% និងគ្រោងបើកដំណើរការនៅថ្ងៃទី៩ ខែកញ្ញា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ឯកឧត្តម ហ៊ុន ម៉ានី អញ្ជើញគោរពវិញ្ញាណក្ខន្ធ​វីរកងទ័ពជួរមុខ​ដែល​បាន​ពលី​ជីវិត​នៅ​សមរភូមិ

វិស័យឧស្សាហកម្មសំខាន់ៗចំនួន៤ បានកំពុងជួយគាំទ្រដល់កំណើននាំចេញខ្ពស់របស់កម្ពុជា

វិស័យកសិកម្មមានកំណើន ១,២% គាំទ្រដោយកំណើនផលដំណាំ និងធនធានជលផល

ពុទ្ធបដិមាធ្វើអំពីស្ពាន់កម្ពស់ ៩ម៉ែត្រ បានដាក់តម្កល់ជាផ្លូវការ​នៅ​អាកាស​យាន​ដ្ឋាន​អន្តរជាតិ​តេជោ

គិតមកដល់ពេលនេះ ព្រលានយន្តថ្មីក្រុងតាខ្មៅសម្រេចការសាងសង់ ១០០% និងគ្រោងបើកដំណើរការនៅថ្ងៃទី៩ ខែកញ្ញា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ឯកឧត្តម ហ៊ុន ម៉ានី អញ្ជើញគោរពវិញ្ញាណក្ខន្ធវីរកងទ័ពជួរមុខដែលបានពលីជីវិតនៅសមរភូមិ

ពុទ្ធបដិមាធ្វើអំពីស្ពាន់កម្ពស់ ៩ម៉ែត្រ បានដាក់តម្កល់ជាផ្លូវការនៅអាកាសយានដ្ឋានអន្តរជាតិតេជោ