BTV NEWS

សម្តេច ឃួន សុដារី ណែនាំឱ្យចលនាស្រ្តីគណបក្សចូលរួមលើកិច្ចការគាំពារសង្គម ដើម្បីគាំទ្រយេនឌ័រ

កម្ពុជា-ឥណ្ឌូនេស៊ី បើកសន្និសីទវេជ្ជសាស្ត្របេះដូងអន្តរជាតិប្រចាំឆ្នាំលើកទី២

៤ខែដើមឆ្នាំ២០២៥ កម្លាំងជលផលខេត្តកែបបង្រ្កាបបទល្មើសនេសាទ១១ករណី ឃាត់ខ្លួនជនល្មើស១០នាក់ បញ្ជូនទៅតុលាការ

អតីតសកម្មជនបក្សភ្លើងទៀននៅស្រុកត្រាំកក់២៣នាក់ សម្រេចចូលរួមជីភាពនយោបាយជាមួយគណបក្សប្រជាជនកម្ពុជា

ព័ត៌មានជាតិ

សមាគមមិត្តតន្រ្តីករ រៀបចំសិក្ខាសាលាស្តីពីការស្រាវជ្រាវ និងរំឭករំលេចតន្ត្រីប្រពៃណីខ្មែរ ដែលពុំសូវមានប្រជាប្រិយភាពក្នុងស្រទាប់សាធារណជន

សមាគមមិត្តតន្រ្តីករ បានរៀបចំសិក្ខាសាលាស្តីពី «ការស្រាវជ្រាវ និងរំឭករំលេចតន្ត្រីប្រពៃណីខ្មែរដែលពុំសូវមានប្រជាប្រិយភាពក្នុងស្រទាប់សាធារណជន» នៅថ្ងៃទី២១ ខែមិថុនា ឆ្នាំ២០២៤ នេះ។សិក្ខាសាលាដ៏មានសារ:សំខាន់នេះ មានបទបង្ហាញចំនួន៤ ដូចខាងក្រោម: -បទបង្ហាញទី១៖ «បទភ្លេង និង ទំនុកច្រៀងគ្រឹម» ដោយលោក ឈឿន វាស្នា (នាយកដ្ឋានសិល្បៈទស្សនីយភាព) -បទបង្ហាញទី២៖ «វង់ភ្លេងពិណពាទ្យបុរាណ (មុនសម័យអង្គរ និងបច្ចុប្បន្ន)» ដោយលោក កែវ សុនន្ទកវី (សាកលវិទ្យាល័យភូមិន្ទវិចិត្រសិល្បៈ) -បទបង្ហាញទី៣៖ «សិក្សាស្រាវជ្រាវពីឧបករណ៍តន្ត្រីនៅលើជញ្ជាំងប្រាសាទបាយ័ន»ដោយលោក សួន សុភ័ក្ត្រ (រាជបណ្ឌិត្យសភាកម្ពុជា) និងបទបង្ហាញទី៤៖ «ការវិវត្ត ការអភិវឌ្ឍ ច្នៃប្រឌិតបង្កើតថ្មី៖ ឧបករណ៍ភ្លេងក្រពើ» ដោយលោក សក់ បុប្ផាវណ្ណ (រាជបណ្ឌិត្យសភាកម្ពុជា)។នាឱកាសនោះឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា ខ្មែរយើងមានភ័ព្វសំណាងនិងមោទនភាពខ្លាំងណាស់ ដែលជាប្រជាជនខ្មែរ និងរស់នៅក្នុងប្រទេសដែលមានវប្បធម៌អរិយធម៌ខ្ពង់ខ្ពស់ ជាពិសេសវប្បធម៌អរិយធម៌អង្គរដ៏រុងរឿង (ស.វ. ទី៩-១៥)។ វប្បធម៌អរិយធម៌ខ្មែរ ជាវប្បធម៌អរិយធម៌ស្នូលនៅក្នុងពិភពលោក ជាពិសេសនៅតំបន់អាស៊ីយើងនេះ។ «កម្ពុជាអច្ឆរិយ» «កម្ពុជា៖ ព្រះរាជាណាចក្រនៃវប្បធម៌» «វប្បធម៌ជាព្រលឹងរបស់ជាតិ» «វប្បធម៌រលំជាតិរលាយ វប្បធម៌ពណ្ណរាយជាតិថ្កើងថ្កាន» ជាទិសនិងពាក្យស្លោកឆ្លុះបញ្ចាំងពីអច្ឆរិយភាពវប្បធម៌ និងប្រទេសជាតិខ្មែរ។ សូមគិត និងស្រមៃមើល មនុស្សដែលមានតែខ្លួនប្រាណ តែគ្មានព្រលឹង។ តើមនុស្សនោះរស់របៀបណា? តាមការស្រាវជ្រាវ យើងឃើញថាវប្បធម៌ខ្មែរដ៏រុងរឿងនិងសម្បូណ៌បែប រួមមានទាំងទម្រង់សិល្បៈទស្សនីយភាពជាង២០ទម្រង់៖ តន្ត្រី ចម្រៀង កំណាព្យ របាំ និងល្ខោនជាច្រើនប្រភេទ។ យើងឃើញនៅពេលបច្ចុប្បន្ននេះ ទម្រង់សិល្បៈមួយចំនួន បានមានការបាត់បង់ទាំងស្រុង។ ខ្លះទៀត ដោយការខិតខំប្រឹងប្រែងរបស់សិល្បករសិល្បការិនីយើង បានរស់រៀនមានជីវិតឡើងវិញ តែក៏នៅមានកម្រិត ដូចជាល្ខោនអាប៉េ ល្ខោនប្រាមោជ្ជទ័យ ល្ខោនពោលស្រី ល្ខោនស្បែកពណ៌ ជាដើម។ចំណែកឯកឧត្តមបណ្ឌិត យន់ ខៀន អនុរដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានសមាគមមិត្តតន្រី្តករ បានលើកឡើងថា ភ្លេងបុរាណខ្មែរយើង អភ័ព្វបន្តិចត្រង់ថា អត់មានប្រជាប្រិយភាព។ ដូច្នេះការពេញនិយម ត្រូវបានកាត់បន្ថយ ដោយឡែកភ្លេងសម័យមានការពេញនិយមច្រើន។ជាចុងក្រោយឯកឧត្តម ហាប់ ទូច បានបញ្ជាក់ថា ព្រឹត្តិការណ៍សិក្ខាសាលា គឺដើម្បីលើកកម្ពស់ការយល់ដឹង ភាពសុខដុមរមនា សន្តិភាព និងមនុស្សជាតិ។ ឯកឧត្តម មានទំនុកចិត្តនិងជឿជាក់ថា កម្មវិធីនេះនឹងអនុញ្ញាតឱ្យយើងកសាង និងអភិវឌ្ឍ យុវជនជំនាន់ក្រោយ ព្រមទាំងការស្រឡាញ់នៃវប្បធម៌របស់ពួកគេ ស្របតាមគោលនយោបាយវប្បធម៌៖ អភិរក្ស ថែរក្សា ច្នៃប្រឌិត នវានុវត្តន៍ ទំនើបកម្ម អភិវឌ្ឃន៍ និងបង្កើតថ្មី៕ អត្ថបទ រដ្ឋា

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

កិច្ចពិគ្រោះយោបល់វាងកម្ពុជា-អាល្លឺម៉ង់ ជាវេទិកាដ៏មានសារៈសំខាន់ក្នុងការតាមដានវឌ្ឍនភាព នៃកិច្ចសហប្រតិបត្តិការ និងក៏ជាការរួមចំណែកគាំទ្រដល់កម្ពុជាស្របពេលដែលកម្ពុជាកំពុងត្រៀមខ្លួនធ្វើការចាកចេញពីឋានៈជាប្រទេសអភិវឌ្ឍន៍តិចតួច (LDC) ក្លាយជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០។ ឯកឧត្តម ឈៀង យ៉ាណារ៉ា ទេសរដ្ឋមន្ត្រី ទទួលបន្ទុកបេសកម្មពិសេស និងជាអនុប្រធានទី២ ក្រុមប្រឹក្សាអភិវឌ្ឍកម្ពុជា បានដឹកនាំកិច្ចពិគ្រោះយោបល់ស្ដីពីកិច្ចសហប្រតិបត្តិការអភិវឌ្ឍន៍ឆ្នាំ ២០២៤ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋ សហព័ន្ធអាល្លឺម៉ង់ នៅថ្ងៃទី ២០ ខែ មិថុនា ឆ្នាំ២០២៤, នេះជាកិច្ចប្រជុំទ្វេភាគីលើកទី ១៦ ដែលត្រូវបានចាត់ទុកជាវេទិកាដ៏សំខាន់ ក្នុងការបន្តពង្រឹង និងពង្រីកកិច្ចសហប្រតិបត្តិការអភិវឌ្ឍន៍ និងភាពជាដៃគូរវាងរដ្ឋាភិបាលទាំងពី។ គោលដៅចម្បងនៃកិច្ចពិគ្រោះ យោបល់នេះ គឺដើម្បីពិនិត្យ និងពិភាក្សាលើវឌ្ឍនភាព និងបញ្ហាប្រឈមនានា ក្នុងការអនុវត្តគម្រោង ដែលផ្ដល់ហិរញ្ញប្បទានដោយ រដ្ឋាភិបាលអាល្លឺម៉ង់ និងលើកសំណើគម្រោងថ្មី និងគម្រោងដែលត្រូវអនុវត្តបន្ត សម្រាប់រដ្ឋាភិបាលអាល្លឺម៉ង់ពិចារណា និងអនុម័ត ក្នុងកិច្ចចរចាទ្វេភាគី ស្តីពីកិច្ចសហប្រតិបត្តិការអភិវឌ្ឍន៍ឆ្នាំ២០២៥ ។ជាមួយគ្នានេះ កិច្ចពិគ្រោះយោបល់នេះ គឺជាវេទិកាដ៏មានសារៈសំខាន់ ក្នុងការតាមដានវឌ្ឍនភាពនៃកិច្ចសហប្រតិបត្តិការ រវាងកម្ពុជានិងអាល្លឺម៉ង់ ស្របពេលដែលកម្ពុជាកំពុងត្រៀមខ្លួនធ្វើការចាកចេញពីឋានៈជាប្រទេសអភិវឌ្ឍន៍តិចតួច (LDC) តាមរយៈកិច្ចខិតខំប្រឹងប្រែងសហការរវាងក្រសួង/ស្ថាប័នរបស់រាជរដ្ឋាភិបាល និងដៃគូអភិវឌ្ឍន៍ ពិសេសដៃគូអាល្លឺម៉ង់ ដែលបានដើរតួនាទីយ៉ាងសំខាន់ ក្នុងការរួមចំណែកគាំទ្រកម្ពុជាក្នុងការចាកចេញដោយរលូន និង ស្របពេលដែលក្រុមប្រឹក្សាអភិវឌ្ឍន៍កម្ពុជាបានរៀបចំយុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូឆ្នាំ២០២៤-២០២៨ ដើម្បីធានាថាហិរញ្ញប្បទានសហប្រតិបត្តិការ ត្រូវបាន ប្រើប្រាស់ឱ្យមានប្រសិទ្ធភាពជាអតិបរមា ខណៈពេលដែលភាពជាដៃគូ, ភាពជាម្ចាស់ និងភាពជាអ្នកដឹកនាំរបស់រាជរដ្ឋាភិបាលត្រូវបានពង្រឹងក្នុងកិច្ចលើកកម្ពស់កិច្ចអភិវឌ្ឍន៍។បន្ថែមលើនេះភាគីទាំងពីរបានវាយតម្លៃខ្ពស់ ចំពោះសមិទ្ធផលដែលសម្រេចបានក្នុងកិច្ចសហប្រតិបត្តិការទ្វេភាគី ហើយ សមិទ្ធផលទាំងនោះ គឺពិតជាបានរួមចំណែកក្នុងការកាត់បន្ថយផលប៉ះពាល់ដល់សង្គម សេដ្ឋកិច្ច ពីជំងឺកូវីដ-១៩ និងលើកកម្ពស់ កំណើនសេដ្ឋកិច្ចនៅកម្ពុជា ដើម្បីសម្រេចក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានចំណូល ខ្ពស់នៅឆ្នាំ២០៥០៕ អត្ថបទ៖ សុន រ៉ាឌី

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

បណ្តាក្រុមហ៊ុនការីទេសចរណ៍កម្ពុជា បានបង្ហាញប្តេជ្ញាចិត្ត ខិតខំផ្សព្វផ្សាយគោលដៅទេសចរក្នុងស្រុក និងក្រៅស្រុក រៀបចំកញ្ចប់ទេសចរលក់ក្នុងតម្លៃសមរម្យ ដើម្បីជំរុញកំណើនចលនាលំហូរទេសចរជាតិ អន្តរជាតិបន្ថែមទៀត។នៅក្នុងដំណើរទស្សនៈកិច្ចសិក្សាស្វែងយល់ពីវិស័យទេសចរណ៍នៅខេត្តហៃណានប្រទេសចិន បណ្តាក្រុមហ៊ុនការីទេសចរណ៍នៅកម្ពុជា បានថ្លែងប្រាប់ BTV នៅថ្ងៃទី២១ ខែមិថុនានេះថា ដោយមានកិច្ចសហការគ្នាល្អរវាងបណ្តាអាជីវកម្មទេសចរណ៍ រមណីយដ្ឋានទេសចរណ៍ សណ្ឋាគារ ភោជនីយដ្ឋាន និងបណ្តាក្រុមហ៊ុនអាកាសចរណ៍ នៅក្នុងស្រុក និងក្រៅស្រុក បញ្ចុះតម្លៃសេវាកម្មខ្លួនជូនដល់បណ្តាការីទេសចរណ៍កម្ពុជា គឺបានជំរុញបណ្តាក្រុមហ៊ុនការីទេសចរណ៍ ច្នៃប្រឌិត និងរៀបចំកញ្ចប់ទេសចរណ៍លក់ក្នុងតម្លៃសមរម្យ ដើម្បីជំរុញទាក់ទាញភ្ញៀវទេសចរជាតិ អន្តរជាតិកក់ទិញកញ្ចប់ទេសចរណ៍ដើរកម្សាន្តនៅក្នុងប្រទេស និងចេញទៅក្រៅប្រទេស។ទន្ទឹមនឹងការផ្សព្វផ្សាយលក់កញ្ចប់ខែ្សទស្សនៈកិច្ចនេះដែរ បណ្តាការីទេសចរណ៍ ក៏បានរួមគ្នាផ្សព្វផ្សាយគោលដៅទេសចរណ៍ប្រណិតៗ ជំរុញការផ្តល់សេវាល្អប្រកបផាសុកភាព សុវត្ថិភាព ផ្តល់ចំណេះដឹងល្អៗផ្នែកខាងទំនៀមទំលាប់ ជំនឿ សាសនា ការរស់នៅ ការអភិវឌ្ឍ និងការរីកចំរើន នៅក្នុងសង្គមជាតិ អន្តរជាតិបច្ចុប្បន្ន។សូមបញ្ជាក់ថា តាមរបាយការណ៍ក្រសួងទេសចរណ៍រយៈពេល៤ខែ ចាប់ពីខែមករា ដល់ខែមេសា ឆ្នាំ២០២៤ ពលរដ្ឋខ្មែរបានចេញទេសចរនៅក្រៅប្រទេសប្រមាណជាង៥៨ម៉ឺននាក់។ ដោយឡែកទេសចរអន្តរជាតិមកចូលទស្សនាប្រទេសកម្ពុជាប្រមាណជាង ២លាននាក់។ នៅក្នុងតួលេខកំណើនកំណើនលំហូរទេសចរណ៍នេះ គឺមានភ្ញៀវទេសចរជាតិ និងភ្ញៀវអន្តរជាតិមួយចំនួនធំបានទិញកញ្ចប់ទេសចរណ៍ពីកម្ពុជា ចេញទៅទស្សនានៅក្រៅប្រទេស ហើយក៏មានភ្ញៀវទេសចរអន្តរជាតិជាច្រើន បានកក់ទិញកញ្ចប់ទេសចរណ៍ត្រៀមមកទស្សនាកម្ពុជានៅក្នុងអំឡុងខែតុលានេះរហូតដល់ខែមេសាឆ្នាំ២០២៥ ដែលរដូវ High Season៕ អត្ថបទ ស៊ុម សុខជា

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

ក្រសួងពាណិជ្ជកម្មកកម្ពុជា បានប្រគល់លិខិតជូនដល់សហគ្រិនកម្ពុជាមានពិការភាពចំនួន ២០នាក់ ចំពោះការដាក់ពាក្យស្នើសុំចុះបញ្ជីម៉ាក ដែលមានសុពុលភាពរយៈពេល១០ឆ្នាំ ដោយមិនគិតថ្លៃ តាមរយៈគម្រោងពាណិជ្ជកម្មតំបន់សម្រាប់ការអភិវឌ្ឍ ដើម្បីលើកកម្ពស់ការយល់ដឹងពាក់ព័ន្ធនឹងម៉ាកពាណិជ្ជកម្ម និងដើម្បីពង្រឹងអាជីវកម្មឱ្យរីកចម្រើនបន្តទៀត។លោក អាឌ្រៀន ហ្គីលប៊ឺត (Adrian Gilbert) នាយកគម្រោងពាណិជ្ជកម្មតំបន់សម្រាប់ការអភិវឌ្ឍ (RT4D) ក្នុងពិធីបិទ“ការអនុវត្តគម្រោង RT4D ដោយផ្តោតលើកំណើនប្រកបដោយបរិយាបន្ន៖ ការលើកកម្ពស់សហគ្រិនកម្ពុជាដែលមានពិការភាពតាមរយៈការអប់រំកម្មសិទ្ធិបញ្ញា និងការកសាងកេរ្តិ៍ឈ្មោះម៉ាកសម្រាប់ពាណិជ្ជកម្ម” នារសៀលថ្ងៃទី២០ មិថុនា ឆ្នាំ២០២៤កន្លងទៅ បានឲ្យដឹងថា នេះជាគម្រោងទី១ ដែល RT4D បានចូលរួមអនុវត្តជាមួយក្រសួងពាណិជ្ជកម្ម ដើម្បីជួយដល់សហគ្រិនមានពិការភាពនៅកម្ពុជា។ លោកបន្តថា គម្រោងនេះ គឺជាការប្តេជ្ញាចិត្តរបស់ RT4D ក្នុងការគាំទ្រកម្ពុជា ដើម្បីអនុវត្តឱ្យបានពេញលេញនូវកិច្ចព្រមព្រៀងសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP) ដោយបានផ្តោតការយកចិត្តទុកដាក់លើវិស័យកម្មសិទ្ធិបញ្ញា។ គម្រោងនេះដែរ នឹងជួយពង្រីកឱកាសផ្នែកសេដ្ឋកិច្ច ជំរុញឱ្យមានការឱ្យតម្លៃនិងបរិយាបន្ន និងផ្តល់សិទ្ធិអំណាចដល់បុគ្គលដែលជាសហគ្រិនមានពិការភាពឱ្យទទួលបានភាពរីកចម្រើន និងអាចចូលរួមចំណែកដល់សង្គមជាតិបាន។ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ការចូលរួមអនុវត្តគម្រោងនេះ គឺឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល ក្នុងការចូលរួមលើកកម្ពស់ចំណេះដឹង និងបង្កើនភាពប្រកួតប្រជែងរបស់សហគ្រិនកម្ពុជា។ ឯកឧត្តម បានបន្តថា ដូចដឹងហើយថា ក្រសួងពាណិជ្ជកម្ម ក្នុងនាមជាសេនាធិការឱ្យរាជរដ្ឋាភិបាលកម្ពុជា បានខិតខំប្រឹងប្រែងយ៉ាងខ្លាំងក្នុងការចរចាបើកច្រកទីផ្សារថ្មីៗ ដើម្បីអាចនាំចេញទំនិញរបស់កម្ពុជាឱ្យបានកាន់តែទូលាយ ព្រមជាមួយការចរចាកិច្ចព្រមព្រៀងពាណិជ្ជកម្មសេរីថ្មីៗបន្ថែមទៀត ដែលនឹងជំរុញឱ្យកម្ពុជាមានកាលានុវត្តភាពខ្ពស់ក្នុងការនាំចេញទំនិញកាន់តែច្រើនទៅតាមគោលដៅនៃឯកទេសនីយកម្ម នៃទំនិញដែលកម្ពុជាផលិតបានទៅកាន់ទីផ្សារទាំងអស់នោះ។អ្នកស្រី ឆា ស្រីនាង ម្ចាស់អាជីវកម្មផ្នែកម្ហូបអាហារ នាងច្នៃ និងអ្នកស្រី ឃួន សុជាតា ម្ចាស់អាជីវកម្មលក់កូនឈើ យីហោ ម៉ាក់តាតា ជាសហគ្រិនមានពិការភាពជើងដូចគ្នា បានឲ្យដឹងស្រដៀងគ្នាថា ពិតជាមានអារម្មណ៍ថា រំភើបចិត្ត និងសប្បាយរីករាយ ដែលទទួលបានការយកចិត្តពីសំណាក់រដ្ឋាភិបាលផង និងជាពិសេសគម្រោង RT4D ដែលធ្វើឲ្យពួកគាត់បានយល់ដឹងកាន់តែស៊ីជម្រៅពាក់ព័ន្ធនឹងកម្មសិទ្ធិបញ្ញា ទៅប្រកបអាជីវកម្មរបស់ខ្លួនដើម្បីអភិវឌ្ឍផលិតផល និងពង្រឹងការកសាងកេរ្តិ៍ឈ្មោះម៉ាកនៅក្នុងទីផ្សារឱ្យកាន់តែរឹងមាំបន្ថែមទៀត។គម្រោងពាណិជ្ជកម្មតំបន់សម្រាប់ការអភិវឌ្ឍ (RT4D) គឺជាបច្ច័យកើតចេញពីកិច្ចព្រមព្រៀងអាស៊ាន-អូស្ត្រាលី-នូវែលហ្សេឡង់ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលផ្តល់ការគាំទ្រផ្នែកពាណិជ្ជកម្ម និងវិនិយោគ សម្រាប់រដ្ឋជាសមាជិកអាស៊ាន តាមរយៈគម្រោង RT4D ។ ដោយឡែក សហគ្រិនមានពិការភាពដែលបានចូលរួមគម្រោងនេះ ទទួលបានការបណ្តុះបណ្តាលពីមន្ត្រីជំនាញរបស់នាយកដ្ឋានកម្មសិទ្ធិបញ្ញា និងវាគ្មិនជំនាញផ្សេងៗ លើប្រធានបទមួយចំនួនរួមមាន៖ មូលដ្ឋានគ្រឹះទស្សនទាននៃកម្មសិទ្ធិបញ្ញា, ការចែករំលែកអាជីវកម្មជោគជ័យ តាមរយៈការប្រើប្រាស់កម្មសិទ្ធិបញ្ញា, ការរស់នៅប្រសើរជាមួយនឹងពិការភាព, ការអភិវឌ្ឍផលិតផល, ទស្សនទាននៃការច្នៃនិម្មិតសញ្ញា, និងប្រសិទ្ធភាព នៃការវេចខ្ចប់ផលិតផលជាដើម៕ អត្ថបទ ឈិត បូរ៉ាវី

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ

ទូរថភ្លើង Kiha-183 ប្រភេទ DMU(Diesel Multiple Unit) ដែលទើបយកមកពីជប៉ុនចំនួន ៥គ្រឿងបន្ថែមទៀត និងទើបកែសម្រួលប្រព័ន្ធជើងក្រោម និងបច្ចេកទេសរួចរាល់ បានដាក់ឱ្យដំណើរការបើកធ្វើតេស្តសាកល្បងរត់ពីព្រះសីហនុ មកភ្នំពេញកាលពីថ្ងៃទី២០ ខែមិថុនា ឆ្នាំ២០២៤ ប្រកបដោយជោគជ័យ ។ នេះបើតាមឯកឧត្ដម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឱ្យដឹង។ ទូរថភ្លើងចំនួន ៥គ្រឿងថ្មីនេះ ត្រូវបានដាក់ឱ្យដំណើរការសាកល្បង នៅបន្ទាប់ពីទូរថភ្លើងដូចគ្នានេះចំនួន ៤គ្រឿង ត្រូវបានដាក់ឱ្យដំណើរការបើកធ្វើតេស្តសាកល្បងដោយជោគជ័យទាំងលើផ្លូវភាគខាងត្បូងភ្នំពេញ និងភាគខាងជើងភ្នំពេញកាលពីពេលថ្មីៗកន្លងមកនេះរួចមក។ឯកឧត្ដម ផន រឹម បានឱ្យដឹងបន្ថែមថា ក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន បានចុះពិនិត្យ តាមដានដំណើរការបើកសាកល្បងនេះ បន្ទាប់ពីកែសម្រួលប្រ ព័ន្ធហ្វ្រ័ង និងទទឹងកង់ពីស្តង់ដាផ្លូវដែកជប៉ុន មកស្តង់ដាផ្លូវដែកនៅកម្ពុជារួចមក។ក្រុមការងារបច្ចេកទេសនាយកដ្ឋានផ្លូវដែកនៃក្រសួងសាធារណការ និងដឹកជញ្ជូន ព្រមទាំងក្រុមហ៊ុន Royal Railway Cambodia(RRC) ក៏បានពិនិត្យ និងសិក្សារួមគ្នាលើដំណើរការកង់, ប្រព័ន្ធហ្វ្រ័ង, ម៉ាស៊ី នត្រជាក់, ច្រកទ្វារសម្រាប់អ្នកដំណើរ, ច្រកទ្វារសុវត្ថិភាព, សម្ភារៈបរិក្ខារ និងការងារផ្សេងៗទៀត ដើ ម្បីប្រាកដថា មានសុវត្ថិភាពខ្ពស់សម្រាប់ដឹកជញ្ជូនអ្នកដំណើរ មុននឹងសម្រេចដាក់ឱ្យដំណើរការជាផ្លូវការនាពេលឆាប់ៗខាងមុខនេះ។នៅពេលដាក់ឱ្យដំណើរការជាផ្លូវការ Kiha-183 នឹងត្រូវដាក់ឱ្យរត់ដោយបែងចែកជាពីរក្នុងនោះ ខ្សែរត់លើផ្លូវភាគខាងត្បូង គឺភ្នំពេញ-ព្រះសីហនុ តម្រូវឱ្យបើកបរក្នុងល្បឿន ៨០ គីឡូម៉ែត្រក្នុងមួយម៉ោង និងខ្សែរត់លើផ្លូវភាគខាងជើង គឺភ្នំពេញ-ប៉ោយប៉ែត តម្រូវឱ្យបើកបរក្នុងល្បឿនចន្លោះពី ៣០ ទៅ ៥០ គីឡូ ម៉ែត្រក្នុងមួយម៉ោង៕ ដោយ៖ គង់ ឌិន

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញសំណេះសំណាលជាមួយថ្នាក់ដឹកនាំ និងសមាជិកសមាជិកាសមាគមឧកញ៉ាកម្ពុជា

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅព្រឹកថ្ងៃទី២១ ខែមិថុនា ឆ្នាំ២០២៤នេះ បានអញ្ជើញជាអធិបតីភាពក្នុងពិធីសំណេះសំណាលជាមួយថ្នាក់ដឹកនាំ និងសមាជិកសមាជិកាសមាគមឧកញ៉ាកម្ពុជា។ ពិធីនេះបានប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា។សមាគមឧកញ៉ាកម្ពុជា ដែលមានលោកអ្នកឧកញ៉ា លី យ៉ុងផាត់ ជាប្រធានបានបរិច្ចាគថវិកាចំនួន ១,៥៥៥,៥៥៥ ដុល្លារអាមេរិក ចូលរួមជាមួយកាកបាទក្រហមកម្ពុជា ក្នុងឱកាសខួបទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»។សមាគមឧកញ៉ាកកម្ពុជា ក្រោមការដឹកនាំដ៏ឆ្នើមរបស់លោកអ្នកឧកញ៉ា លី យ៉ុងផាត់ បានធ្វើឱ្យសមាគមឧកញ៉ានេះ មានការរីកចម្រើនរុងរឿងជាបន្ដបន្ទាប់។ ពិសេសសមាគមមួយនេះបានចូលរួមធ្វើសកម្មភាពជាច្រើន ដើម្បីរួមចំណែកអភិវឌ្ឍន៍សង្គមជាតិ បម្រើនូវឧត្តមប្រយោជន៍សម្រាប់ជាតិ និងប្រជាជន ពិសេសការងារមនុស្សធម៌៕

ឯកឧត្តមបណ្ឌិត លី ធុជ អំពាវនាវឲ្យរដ្ឋភាគី រដ្ឋមិនមែនភាគី និងអង្គការនានា ប្តេជ្ញាចិត្តប្រឹងប្រែងរួមគ្នា ដើម្បីពន្លឿនការអនុវត្តបន្ថែមឈានដល់គោលដៅរួមនៃអនុសញ្ញាអូតាវ៉ា

ក្នុងនាមជារដ្ឋភាគី ឯកឧត្តម លី ធុជ បានអំពាវនាវឱ្យភាគីពាក់ព័ន្ធបន្តពង្រឹងភាពជាដៃគូកិច្ចស ហប្រតិបត្តិការ និងកិច្ចខិតខំប្រឹងប្រែងដើម្បីឆ្ពោះទៅកាន់កិច្ចប្រជុំកំពូលសៀមរាប -អង្គរ និងបង្កើតមូលដ្ឋានគ្រឹះដ៏រឹងមាំសម្រាប់ការអនុវត្តផែនការសកម្មភាពរយៈពេល ៥ ឆ្នាំ ខាងមុខ។ ជាមួយគ្នានោះ រដ្ឋភាគី រដ្ឋមិនមែនភាគី និងអង្គការនានា ត្រូវបន្តពង្រឹងការប្តេជ្ញាចិត្តផ្នែកនយោបាយ និងការខិតខំប្រឹងប្រែងរួមគ្នា ដើម្បីពន្លឿនការអនុវត្តបន្ថែមទៀត និងឈានដល់គោលដៅរួមនៃអនុសញ្ញាអូតាវ៉ា។ការអំពាវនាវនេះក្នុងពេលឯកឧត្តមបណ្ឌិត លី ធុជ ប្រធានអនុសញ្ញាអូតាវ៉ាឆ្នាំ២០២៤ អញ្ជើញបិទកិច្ចប្រជុំពាក់ កណ្តាលអាណត្តិ (Intersessional Meetings) នៃកិច្ចប្រជុំត្រួតពិនិត្យឡើងវិញលើកទី៥ ឬ កិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីននៃអនុ សញ្ញាអូតាវ៉ា នាថ្ងៃទី២០ ខែមិថុនា ឆ្នាំ២០២៤នៅទីក្រុងហ្សឺណែវ ប្រទេសស្វីស ។ឯកឧត្តមបណ្ឌិត លី ធុជ បានថ្លែងថា កិច្ចប្រជុំពាក់ កណ្តាលអាណត្តិ គឺជាជំហានមួយដ៏សំខាន់នៅលើផ្លូវទៅកាន់កិច្ចប្រជុំកំពូលសៀមរាប-អង្គរ ហើយព័ត៌មានថ្មីៗបានមកពីរដ្ឋភាគី រដ្ឋមិនមែនភាគី និងអង្គការនានា នឹងត្រូវបន្តពង្រឹង និងយកប្រើប្រាស់ជាធាតុចូលសម្រាប់ការរៀបចំកិច្ចប្រជុំកំពូលសៀមរាប-អង្គរ។ ក្នុងឱកាសនោះ ក្រៅពីបានស្នើសុំឱ្យភាគីពាក់ព័ន្ធបន្តពង្រឹងភាពជាដៃគូកិច្ចសហប្រតិបត្តិការ និងកិច្ចខិតខំប្រឹង ប្រែងដើម្បីឆ្ពោះទៅកាន់កិច្ចប្រជុំកំពូលសៀមរាប -អង្គរ និងបង្កើតមូលដ្ឋានគ្រឹះដ៏រឹងមាំ សម្រាប់ការអនុវត្តផែនការសកម្មភាពរយៈពេល ៥ ឆ្នាំខាងមុខ។ រីឯរដ្ឋភាគី រដ្ឋមិនមែនភាគី និងអង្គការនានា ក៍ត្រូវបន្តពង្រឹងការប្តេជ្ញាចិត្តផ្នែកនយោបាយ និង ការខិតខំប្រឹងប្រែងរួមគ្នាដើម្បីពន្លឿនការអនុវត្តបន្ថែមទៀត និងឈានដល់គោលដៅរួមនៃអនុសញ្ញាអូតាវ៉ាផងដែរនោះ។ ឯកឧត្តមបណ្ឌិត លី ធុជ ក៍បានថ្លែង អំណរគុណដល់ប្រទេសស្វីស ដែលជាម្ចាស់ផ្ទះ និងគាំទ្រដល់ការរៀបចំកិច្ចប្រជុំពាក់កណ្តាលអាណត្តិនេះ ព្រមទាំងបានអរគុណដល់អង្គភាព GICHD ដែលជួយឧបត្ថម្ភគាំទ្រនិងសម្របសម្រួលដល់កិច្ចការរដ្ឋបាលនេះផងដែរ៕ អត្ថបទ៖ ភារម្យ

នាយករដ្ឋមន្រ្តីណែនាំស្ថាប័នពាក់ព័ន្ធអនុវត្តឲ្យមានប្រសិទ្ធភាពបំផុតក្នុងការជំរុញសាងសង់ផ្ទះជូនអតីតយុទ្ធជន

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំដល់គ្រប់ក្រសួង ស្ថាប័នទាំងអស់ត្រូវអនុវត្តឲ្យបានល្អ និងមានប្រសិទ្ធភាពបំផុត ក្នុងការជំរុញនៃការសាងសង់នូវផ្ទះជូន ដល់បងប្អូនអតីតយុទ្ធជន ដើម្បីជាការតបស្នងសងគុណដល់ពួកគាត់ដែលបានលះបង់សាច់ស្រស់ឈាម ស្រស់ក្នុងបុព្វហេតុជាតិ មាតុភូមិ និងប្រជាជននោះ។តាមរយៈសារលិខិត ក្នុងឱកាសខួបលើកទី១៧ ទិវាអតីតយុទ្ធជនកម្ពុជា ថ្ងៃទី២១ មិថុនា ឆ្នាំ២០២៤នេះ សម្តេចធិបតី ហ៊ុន ម៉ាណែត បានលើកឡើងថា «ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបន្តអនុវត្តឱ្យបានល្អ និងមានប្រសិទ្ធភាពនូវការផ្តល់សេវាគាំពារសុខុមាលភាពអតីតយុទ្ធជន និងការបើកផ្តល់របបសន្តិសុខសង្គមសម្រាប់អតីតយុទ្ធជន និងគ្រួសារអតីតយុទ្ធជន តាមរយៈមូលនិធិជាតិជំនួយសង្គមនៅទូទាំងប្រទេស និងត្រូវខិតខំជំរុញការអនុវត្តគម្រោងសាងសង់ផ្ទះជូនអតីតយុទ្ធជន និងគ្រួសារដូចដែលបានបញ្ចូលក្នុងផែនការវិនិយោគសាធារណៈរបស់រាជរដ្ឋាភិបាល។ មួយវិញទៀតក្រសួងរៀបចំដែនដី នគរូបនីយកម្មនិងសំណង់ និងក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវសហការជាមួយក្រសួង ស្ថាប័នពាក់ព័ន្ធ បន្តជំរុញការអនុវត្តគោលនយោបាយស្តីពីការផ្តល់សម្បទានដីសង្គមកិច្ច ជូនអតីតកងកម្លាំងប្រដាប់អាវុធ និងគ្រួសារឱ្យកាន់តែមានប្រសិទ្ធភាពខ្ពស់»។សូមបញ្ជាក់ថា ដើម្បីឆ្លើយតបទៅនឹងគុណបំណាច់ដ៏ធំធេងចំពោះបុព្វហេតុជាតិមាតុភូមិរបស់អតីតយុទ្ធជនចាប់ពីឆ្នាំ២០០៨ដល់ឆ្នាំ២០២៣ និងដោយបានការយកចិត្តទុកដាក់គិតគូរពី សម្តេចតេជោប្រធានសមាគមអតីតយុទ្ធជនកម្ពុជា និងសម្ដេចកិត្តិព្រឹទ្ធបណ្ឌិត បានសាងសង់ផ្ទះជូនអតីតយុទ្ធជនក្រីក្រ សរុបមានចំនួន ៥ ៥៦៩ខ្នងហើយរហូតដល់ថ្ងៃនេះ។ក្នុងសារលិខិតខាងលើនេះដែរ សម្តេចធិបតី នាយករដ្ឋមន្រ្តី ក៏បានអំពាវនាវដល់បងប្អូនអតីតយុទ្ធជនកម្ពុជា សូមបន្តរក្សាស្មារតីវីរភាពដ៏ឧត្តុង្គឧត្តម និងសេចក្ដីថ្លៃថ្នូរ ជាពលរដ្ឋឆ្នើមរបស់ ជាតិមាតុភូមិ ដើម្បីបន្តធ្វើជាគំរូល្អក្នុងសង្គមជាតិ ខណៈ រាជរដ្ឋាភិបាល និងប្រជាជនកម្ពុជាទូទាំងប្រទេសពិតជាចងចាំជានិច្ច នូវការលះបង់ និងគុណបំណាច់ដ៏ធំធេងរបស់បងប្អូនអតីតយុទ្ធជនគ្រប់រូប ចំពោះជាតិមាតុភូមិជាទីស្នេហានៃយើង។សម្តេចធិបតី ក៏បានអំពាវនាវដល់គ្រប់ក្រសួងស្ថាប័ន អង្គភាព និងអាជ្ញាធរដែនដីគ្រប់លំដាប់ថ្នាក់ ត្រូវរៀបចំគណៈប្រតិភូចុះសួរសុខទុក្ខ បងប្អូនអតីតយុទ្ធជនតាមមូលដ្ឋាន និងយុទ្ធជន យុទ្ធនារី ជាពិសេសយុទ្ធជន យុទ្ធនារីក្នុងអង្គភាពកងកម្លាំង ប្រដាប់អាវុធ សម្ព័ន្ធមេត្រីភាព យុទ្ធជន យុទ្ធនារី ដែលកំពុងសម្រាកព្យាបាលនៅតាមមន្ទីរពេទ្យ និងជនពិការ នៅតាមមណ្ឌលយោធិនពិការ ដើម្បីលើកទឹកចិត្ត និងផ្សារភ្ជាប់មនោសញ្ចេតនាជាមួយអតីតយុទ្ធជន និងយុទ្ធជនយុទ្ធនារី។ សម្តេចធិបតី ក៏រំលឹកដល់ក្រសួងស្ថាប័នពាក់ព័ន្ធ អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ ត្រូវចូលរួមក្នុងការជួយ ឧបត្ថម្ភគាំទ្រដល់អតីតយុទ្ធជន ជាពិសេសត្រូវយកចិត្តទុកដាក់ជួយឧបត្ថម្ភគាំទ្រដល់គ្រួសារអតីតយុទ្ធជនដែលកំពុង ជួបប្រទះការលំបាក។សម្តេចធិបតី ក៏បានណែនាំដល់សមាគមអតីតយុទ្ធជនកម្ពុជាគ្រប់ថ្នាក់ ត្រូវបន្តពង្រឹងពង្រីកសកម្មភាពរបស់សមាគមតាមស្មារតីសេចក្តីសម្រេចចិត្ត របស់មហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើកទី២។ សមាគមអតីត យុទ្ធជនកម្ពុជា ត្រូវបន្តធ្វើជាស្នូលក្នុងការលើកកម្ពស់តួនាទីអតីតយុទ្ធជននៅក្នុងសង្គម និងលើកទឹកចិត្តឱ្យបងប្អូនអតីត យុទ្ធជនប្រកាន់ខ្ជាប់នូវស្មារតីសាមគ្គីភាព និងការជួយជ្រោមជ្រែងគ្នាទៅវិញទៅមក ព្រមទាំងចូលរួមឱ្យបានសកម្មក្នុង ចលនាប្រឡងប្រណាំង៣ពូកែ ដើម្បីជាប្រយោជន៍ដល់បងប្អូន និងប្រទេសជាតិផងដែរ។ឆ្លៀតក្នុងឱកាសដ៏ប្រពៃថ្លៃថ្លានេះ សម្តេចធិបតីនាយករដ្ឋមន្រ្តី ក៏សូមសម្តែងនូវកតញ្ញូកតវេទិតាធម៌ថ្វាយចំពោះព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជានិងសម្ដេច ព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរនិងសុភមង្គល ជាទីគោរពសក្ការៈដ៏ខ្ពង់ខ្ពស់ ដែលព្រះអង្គតែងតែយកព្រះទ័យទុកដាក់ចំពោះប្រជារាស្ត្ររបស់ព្រះអង្គ ជាពិសេសតែងតែផ្តល់ការគាំទ្រដល់អតីតយុទ្ធជន និងគ្រួសារជនពលី មរណៈ ប្រកបដោយព្រះទ័យព្រហ្មវិហារធម៌ដ៏ជ្រាលជ្រៅបំផុត។សម្តេចធិបតី នាយក រដ្ឋមន្រ្តីក៏បានថ្លែងអំណរគុណផងដែរ ចំពោះកាកបាទក្រហមកម្ពុជា ដៃគូអភិវឌ្ឍ អង្គការមិនមែនរដ្ឋាភិបាលនិង សប្បុរសជនទាំងអស់ដែលបានយកចិត្តទុកដាក់ផ្តល់ជំនួយឧបត្ថម្ភគាំទ្រដល់បងប្អូនអតីតយុទ្ធជន និងក្រុមគ្រួសារ ក៏ដូចជាជនចាស់ជរា ជនពិការ ស្ត្រីមេម៉ាយ និងគ្រួសារយុទ្ធជនពលី មរណៈ ដែលមានជីវភាពលំបាក សំដៅចូលរួម ចំណែកលើកកម្ពស់កម្រិតជីវភាព និងសុខុមាលភាពរបស់បងប្អូន។ ទឹកចិត្តនិងកាយវិការដ៏សប្បុរសនេះ បានឆ្លុះបញ្ចាំង ឱ្យឃើញពីស្មារតីនៃការជួយគ្នាទៅវិញទៅមកនៅគ្រប់កាលៈទេសៈ គ្រប់ទីកន្លែងក្នុងព្រះរាជាណាចក្រកម្ពុជា៕ អត្ថបទ៖ បាន ចក់

តំណាងកម្មករ៩ម៉ឺននាក់ ដាក់ញត្តិស្នើសុំក្រសួងមហាផ្ទៃពិនិត្យសកម្មភាព និងការប្រើប្រាស់ថវិកាអង្គការសង់ត្រាល់

សហភាពសិទ្ធិកម្មករកម្ពុជា និងសហជីពមូលដ្ឋាន តំណាងឲ្យកម្មករ៩ម៉ឺននាក់ នៅព្រឹកថ្ងៃទី២១ ខែមិថុនានេះបានដាក់ញត្តិទៅក្រសួងមហាផ្ទៃ ដើម្បីស្នើសុំឲ្យមានការត្រួតពិនិត្យការអនុវត្តសកម្មភាព និងការប្រើប្រាស់កញ្ចប់ថវិការបស់មជ្ឈមណ្ឌល សម្ព័ន្ធភាពការងារ និងសិទ្ធិមនុស្សហៅកាត់«សង់ត្រាល់» ដែលធ្វើសកម្មភាពផ្ទុយពីច្បាប់ស្ដីពីសមាគម និងអង្គការមិនមែនរដ្ឋាភិបាល និងលក្ខន្តិកៈរបស់ខ្លួន ។លោក គឹម ចាន់សំណាង ប្រធានសហភាពសិទ្ធិកម្មករកម្ពុជា បានឲ្យដឹងថា អង្គការសង់ត្រាល់ជាអង្គការមួយទទួលជំនួយពីបរទេស និងបានចុះបញ្ជិការនៅក្រសួងមហាផ្ទៃ ប៉ុន្តែទៅធ្វើការងារជ្រៀតជ្រែកក្នុងការងារសហជីព ធ្វើរបាយការណ៍ក្នុងចេតនាញុះញង់ បំបែកបាក់សហជីពនៅកម្ពុជា ធ្វើឲ្យមានការយល់ច្រឡំ ថាសិទ្ធិសេរីភាពសហជីពនៅកម្ពុជា ត្រូវបានរឹតត្បិត។ លោកបន្ថែមថា អង្គការសង់ត្រាល់បានចេញផ្សាយរបាយការណ៍ដែលធ្វើឲ្យមានការជះឥទ្ធិពលដល់អ្នកបញ្ជាទិញ អាចមានការយល់ច្រឡំពីស្ថានភាពជាក់ស្តែងនៃសហជីព និងកម្មករនិយោជិតនៅកម្ពុជាទាំងមូល ជាហេតុធ្វើឲ្យអ្នកបញ្ជាទិញអាចបង្វែរការបញ្ជាទិញចេញពីកម្ពុជា ដែលធ្វើឲ្យប៉ះពាល់ធ្ងន់ធ្ងរដល់ភាពមានការងារធ្វើរបស់កម្មករនិយោជិតទាំងអស់។ លោក គឹម ចាន់សំណាង បញ្ជាក់ថា របាយការណ៍របស់អង្គការសង់ត្រាល់ គ្រាន់តែសម្ភាសន៍សហជីពចំនួន១០ នៃរោងចក្រ១៤ បែរជាយកមកវាយតម្លៃជារួម ថានៅកម្ពុជាមានការរំលោភសិទ្ធិសេរីភាពសហជីព កម្មករនិយោជិតធ្ងន់ធ្ងរទៅវិញ។ នេះមិនឆ្លុះបញ្ចាំងពីស្ថានភាពជាក់ស្តែង ពីសិទ្ធិសេរីភាពសហជីព កម្មករនិយោជិត នៅកម្ពុជាទាំងមូលឡើយ។ សកម្មភាព និងរបាយការណ៍របស់អង្គការមួយមួយនេះ មានចេតនាធ្វើឲ្យសង្គមកម្ពុជាល្អកកករ បំផ្លាញសន្តិភាព បំផ្លាញប្រជាធិបតេយ្យ ដែលមិនអាចទទួលយកបានជាដាច់ខាត។ លោកបញ្ជាក់ថា«របាយការណ៍សង់ត្រាល់មិនបានឆ្លុះបញ្ចាំងពីការពិតនិងមិនមានមូលដ្ឋានច្បាស់លាស់ដែលធ្វើឲ្យប៉ះពាល់កិត្តិយសជាតិ ប៉ះពាល់ដល់ស្ថេរភាពការងារ និងផលប្រយោជន៍រួមរបស់កម្មករនិយោជិតនៅកម្ពុជាទាំងមូល។ របាយការណ៍នោះ មានចរិតនយោបាយ និងញុះញុង លាបពណ៌ ឲ្យមានការរើសអើងសហជីព និងបំបែកបំបាក់សាមគ្គីភាពរវាងសហជីពនៅកម្ពុជា»។ លោកប្រធាន សហភាពសិទ្ធិកម្មករកម្ពុជា លើកឡើងថា តាមរយៈរបាយការណ៍របស់អង្គការសង់ត្រាល់ កម្មករនិយោជិត មានការព្រួយបារម្មណ៍យ៉ាងខ្លាំងពីផលប៉ះពាល់ដល់ស្ថេរភាពការងារ និងផលប្រយោជន៍រួមរបស់កម្មករនិយោជិត។ លោកសង្ឃឹមថា ក្រសួងមហាផ្ទៃ នឹងពិនិត្យមើលការអនុវត្តសកម្មភាពផ្ទុយនឹងច្បាប់ និងការប្រើប្រាស់កញ្ចប់ថវិកាជំនួយបរទេសមិនសមស្របរបស់អង្គការសង់ត្រាល់ ដែលបង្កបញ្ហាជាអវិជ្ជមានដល់សង្គមជាតិ ជាពិសេសក្នុងវិស័យឧស្សាហកម្មកាត់ដេរសម្លៀកបំពាក់ និងស្បែកជើងនៅកម្ពុជា៕

ព្រះរាជពិធីបុណ្យទីឃាយុវឌ្ឍនមង្គលប្រោះព្រំព្រះសុគន្ធវារីថ្វាយ សម្តេចព្រះមហាសង្ឃរាជស្តីទី នន្ទ ង៉ែត

នៅវត្តបទុមវតីរាជវរារាមព្រឹកថ្ងៃទី២១មិថុនានេះ គណៈកម្មាធិការជាតិ រៀបចំបុណ្យជាតិ និងអន្តរជាតិ បានប្រារព្ធព្រះរាជពិធីបុណ្យទីឃាយុវឌ្ឍនមង្គល ប្រោះព្រំព្រះសុគន្ធវារីថ្វាយ សម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជស្តីទី នៃព្រះរាជាណាចក្រកម្ពុជា ក្នុងគម្រប់ព្រះជន្ម ១០០ យាងចូល ១០១ ព្រះវស្សា ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។យាង និងអញ្ជើញចូលរួមក្នុងព្រះរាជពិធីដ៏មង្គលនេះ មានសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា សម្ដេចព្រះពោធិវ័ង្ស កិត្តិបណ្ឌិត អំ លឹមហេង សម្ដេចព្រះសង្ឃនាយកស្ដីទី គណៈមហានិកាយនៃព្រះរាជាណាចក្រកម្ពុជា សម្ដេចព្រះសង្ឃនាយក សម្ដេចព្រះរាជាគណៈ ព្រះថេរានុថេរៈ ឯកឧត្តម លោកជំទាវ ជាសមាជិកសមាជិកាព្រឹទ្ធសភា រដ្ឋសភា រាជរដ្ឋាភិបាល អ្នកឧកញ៉ា លោកឧកញ៉ា សិលវ័ន សីលវត្តី និងពុទ្ធបរិស័ទជាច្រើនផងដែរ។ឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា បានគោរពស្វាគមន៍ និងថ្លែងគុណកថាសម្តេចព្រះមហាសង្ឃរាជស្តីទី ថា៖ សម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត ទ្រង់ប្រសូតនៅថ្ងៃសុក្រ ៦រោច ខែចេត្រ ឆ្នាំជូត ឆស័ក ព.ស.២៤៦៧ ត្រូវនឹងថ្ងៃទី២៥ ខែមេសា ឆ្នាំ១៩២៤ នៅភូមិត្រពាំងវែង ឃុំលំចង់ ស្រុកសំរោង ខេត្តតាកែវ ក្នុងត្រកូលកសិករ។ ទ្រង់ជាបុត្រទី២ របស់ឧបាសក នុត តុន និងឧបាសិកា ម៉ឹង យ៉ឺន ។ក្នុងព្រះជន្ម១៣ឆ្នាំ ទ្រង់បានក្លាយទៅជាកូនកំព្រាម្តាយ រស់នៅជាមួយឳពុក និងប្អូនៗយ៉ាងកំសត់ក្រៃលែង។ព្រះជន្ម១៨ព្រះវស្សា ទ្រង់បានចូលបួសជាសាមណេរ រហូតដល់ព្រះជន្ម២១ព្រះវស្សា បានក្លាយទៅជាឧបសម្បទាភិក្ខុភាវៈ ទ្រង់បានទទួលនាមបញ្ញត្តិថា ចន្ទថេរោ។ក្រោយពីបំពេញជាឧបសម្បទាភិក្ខុភាវៈរួច ទ្រង់គឺជាព្រះសង្ឃមួយព្រះអង្គដែល ប្រតិបត្តិយ៉ាងតឹងរឹងក្នុងធម៌វិន័យឧស្សាហ៍ខិតខំរៀនសូត្ររហូតទទួលបានសញ្ញាបត្រ ផ្សេងៗដូចជាសញ្ញាបត្រធម៌វិន័យថ្នាក់ត្រី ទោ ឯក និងសញ្ញាបត្រគ្រូជាដើម។ ទ្រង់ជា ព្រះឧទ្ទេសាចារ្យ បង្ហាត់បង្រៀនអក្សរសាស្ត្រខ្មែរ ភាសាបាលីដល់ភិក្ខុសាមណេរ និងក្មេងៗកូនចៅអ្នកស្រុកចំណុះជើងវត្ត។ រហូតដល់ឆ្នាំ១៩៧៥ ត្រូវពួកខ្មែរក្រហមបង្ខំឲ្យលាចាកសិក្ខាបទ ហើយ ក្រោយរបបកម្ពុជាប្រជាធិបតេយ្យត្រូវដួលរលំនៅថ្ងៃទី៧ ខែមករា ឆ្នាំ១៩៧៩ ប្រទេសជាតិក៏ដូចជាសាសនា បានរស់រានមានជីវិតសារជាថ្មីឡើងវិញនៅថ្ងៃពុធ ១៣រោច ខែភទ្របទ ឆ្នាំមមែ ឯកស័ក ព.ស ២៥២៣ ត្រូវនឹងថ្ងៃទី១៩ ខែកញ្ញា ឆ្នាំ១៩៧៩។ ទ្រង់ត្រូវបានក្រុមប្រឹក្សារណសិរ្សសាមគ្គីសង្គ្រោះជាតិកម្ពុជាជ្រើសរើសជាឧបសម្បទាបេក្ខា១រូប ក្នុងចំណោម៧រូប និងចូលបំពេញជាឧបសម្បទ ជាភិក្ខុភាវៈលើកទី២ ជាផ្លូវការដំបូងនៅវត្តឧណាលោម ក្រុងភ្នំពេញ ហើយបានក្លាយទៅជាព្រះឧបជ្ឈា បំបួសកុលបុត្រ នៅក្នុងព្រះពុទ្ធសាសនា បាន ធ្វើឱ្យព្រះពុទ្ធសាសនារីកចម្រើនរហូតមកដល់បច្ចុប្បន្ន។ ព្រះរាជតួនាទី និងសមណសក្កិ ដែលសម្តេចទទួលមានដូចជា៖ ព្រះចៅអធិការវត្តល័ង្លការព្រះកុសម៉ារាមពីឆ្នាំ១៩៨០ដល់១៩៨៩ ជាព្រះចៅអធិការវត្តបទុមវតី ពីឆ្នាំ១៩៨៩ ដល់បច្ចុប្បន្ន ជាព្រះមេគុណក្រុងភ្នំពេញពីឆ្នាំ១៩៩៣ដល់ឆ្នាំ២០០៦ ជាព្រះសមាគមពុទ្ធសាសនាខ្មែរនៅឆ្នាំ១៩៩៥ ជាព្រះអធិការ នៃអធិការដ្ឋានពុទ្ធិកសិក្សាជាតិ នៅឆ្នាំ២០០១ដល់ឆ្នាំ២០០៦ ជាព្រះសកលធិការ នៃពុទ្ធិកសាកលវិទ្យាល័យព្រះសីហនុរាជនៅ ឆ្នាំ២០០៦ ដល់ឆ្នាំ២០២៤ ជាព្រះអគាធិការ នៃអគារធិការដ្ឋានពុទ្ធិកសិក្សាជាតិពីឆ្នាំ២០០៦ដល់ឆ្នាំ២០២៤ ជាព្រះអធិបតី នៃព្រះអគារធិការដ្ឋានពុទ្ធិកសិក្សាជាតិនៅឆ្នាំ ២០២៤ ជាសម្ដេចព្រះសង្ឃនាយករងទី ១នៅឆ្នាំ១៩៩១ដល់ឆ្នាំ២០០៦ ជាព្រះ សុមេធាធិបតីព្រះសង្ឃនាយក នៃព្រះរាជាណាចក្រកម្ពុជានៅឆ្នាំ២០០៦ ជាសម្ដេចព្រះសង្ឃនាយក នៃព្រះរាជាណាចក្រកម្ពុជា និងមានព្រះរាជបុព្វសិទ្ធិ ក្នុងការប្រើប្រាស់រាជសព្ទនិងផ្លិតយសពិសេសនៅឆ្នាំ២០០៧ ។ ជាកិត្តិឧទ្ទេសបណ្ឌិត នៃរាជបណ្ឌិត្យសភា នៅឆ្នាំ២០១២ ជាសម្ដេចព្រះសង្ឃរាជស្ដីទី នៃព្រះរាជាណាចក្រកម្ពុជានៅឆ្នាំ២០២៤។ ក្រៅពីនេះទ្រង់ ធ្លាប់ទទួលបានសញ្ញាបត្រស្ថាបនាជាតិ និងគោរមងារផ្សេងៗពីប្រទេសមីយ៉ាន់ម៉ា និងគ្រឿងឥស្សរិយសខ្ពស់បំផុត ជាតូបការពីព្រះមហាក្សត្រនៃព្រះរាជាណាចក្រកម្ពុជា និងពានធម្មចក្រ ពីព្រះរាជាណាចក្រថៃផងដែរ។ក្នុងព្រះរាជពិធីដ៏ថ្លៃថ្លានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រួមនឹងថ្នាក់ដឹកនាំសំខាន់ៗ បានអញ្ជើញថ្វាយព្រះសុគន្ធវារីលើព្រះបាទា ថ្វាយសម្តេចព្រះមហាសង្ឃរាជស្តីទី លើបុស្បុក ដើម្បីជាការគោរពថ្វាយព្រះពរដល់ សម្តេចក្នុងគម្រប់ព្រះជន្ម ១០០ យាងចូល ១០១ ព្រះវស្សា៕

បណ្ដាញសង្គម

ព័ត៌មានថ្មីៗ

UN៖ ជនស៊ីវិលជាង៤៨០នាក់ស្លាប់ក្នុងតំបន់ដាហ្វួរខាងជើងរបស់ស៊ូដង់ក្នុងពេលជាង២សប្ដាហ៍

គណៈកម្មាធិការគោលនយោបាយរបស់IMF បញ្ជាក់ពីហានិភ័យពាណិជ្ជកម្មចំពោះសេដ្ឋកិច្ចពិភពលោក

កម្មវិធីស្បៀងអាហារពិភពលោក និយាយថា ស្តុកស្បៀងនៅតំបន់ហ្កាហ្សា បានអស់ហើយ

ជនអន្តោប្រវេសន៍រារាំងដោយការបង្ក្រាបរបស់លោក Trump រង់ចាំជំនួយរបស់UN ដើម្បីត្រឡប់ទៅប្រទេសវិញ

សេចក្តីថ្លែងការណ៍នៃកិច្ចពិភាក្សារវាងអាមេរិកនិងចិនដែលមានជម្លោះ បានបន្ថែមភាពច្របូកច្របល់ពាណិជ្ជកម្មពិភពលោក

លោក Trump៖ កិច្ចព្រមព្រៀងរុស្ស៊ី-អ៊ុយក្រែន «ខិតជិតដល់» បន្ទាប់ពីកិច្ចពិភាក្សាថ្មីនៅវិមានក្រឹមឡាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ

ព្រះរាជពិធីបុណ្យទីឃាយុវឌ្ឍនមង្គលប្រោះព្រំព្រះសុគន្ធវារីថ្វាយ សម្តេចព្រះមហាសង្ឃរាជស្តីទី នន្ទ ង៉ែត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

អាល្លឺម៉ង់កំពុងជួយជ្រោមជ្រែងកម្ពុជា ដល់ការចាកចេញពីឋានៈជាប្រទេសអភិវឌ្ឍន៍តិចតួច

បណ្តាការីទេសចរណ៍ បង្ហាញការប្តេជ្ញាចិត្តផ្សព្វផ្សាយគោលដៅទេសចរជំរុញចលនាជាតិ-អន្តរជាតិ

សហគ្រិនកម្ពុជាមានពិការភាព ២០នាក់ បានលិខិតទទួលស្គាល់ការដាក់ពាក្យស្នើសុំចុះបញ្ជីម៉ាក

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរ​ការ​សាកល្បង​លើផ្លូវភ្នំពេញ-ព្រះសីហនុ

ព្រះរាជពិធីបុណ្យទីឃាយុវឌ្ឍនមង្គលប្រោះព្រំព្រះសុគន្ធវារីថ្វាយ សម្តេចព្រះមហាសង្ឃរាជស្តីទី នន្ទ ង៉ែត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រថភ្លើងដែលទើបយកមកពីជប៉ុនចំនួន ៥ គ្រឿងបន្ថែម ត្រូវបានដាក់ឱ្យដំណើរការសាកល្បងលើផ្លូវភ្នំពេញ-ព្រះសីហនុ