នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ព្រះសង្ឃ និងពលរដ្ឋ អំពាវនាវសប្បុរសជនចូលរួមបរិច្ចាគជាមួយកាកបាទក្រហមកម្ពុជា បន្ត​កិច្ច​ការ​មនុស្សធម៌
ទិវាឆ្មបជាតិ-អន្តរជាតិ៖ ឆ្មបប្តេជ្ញាខិតខំចូលរួមកាត់បន្ថយអាត្រាមរណមាតា និង​ទារក​ប្រកប​ដោយ​វិជ្ជាជីវៈ
កម្លាំងសមត្ថកិច្ចចុះបង្ក្រាបទីតាំងផ្ទះវីឡាពីរកន្លែងដែលជនបរទេសរត់គេចពីការបង្ក្រាបបទល្មើស Online Scams សំងំលាក់ខ្លួននៅក្រុងប៉ោយប៉ែត រកឃើញជនបរទេសជាច្រើននាក់
កម្ពុជាស្វាគមន៍ និងកោតសរសើរចំពោះវត្តមានរបស់ក្រុមអ្នកសង្កេតការណ៍ប្រទេសហ្វីលីពីនមកកាន់កម្ពុជាក្នុងនាមជាប្រធានក្រុម AOT

ព័ត៌មានជាតិ

ពុទ្ធបដិមាធ្វើអំពីស្ពាន់កម្ពស់ ៩ម៉ែត្រ បានដាក់តម្កល់ជាផ្លូវការ​នៅ​អាកាស​យាន​ដ្ឋាន​អន្តរជាតិ​តេជោ

2025/08/08 02:02:05 pm        438
Facebook Telegram Linkin
​សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្ដេចព្រះសង្ឃ នាយក​គណៈ​មហា​និកាយ​នៃ​កម្ពុជា នៅព្រឹកថ្ងៃទី៨ ខែសីហានេះ បានយាងប្រារព្ធពិធីរំកិលព្រះពុទ្ធបដិមា ធ្វើ​អំពី​ស្ពាន់​កម្ពស់ ៩ម៉ែត្រ ដើម្បីតម្កល់ក្នុងទីបរិវេណ អាកាសយានដ្ឋានអន្តរជាតិតេជោ ជា​កេតន​ភណ្ឌ​ដ៏​ពិសិដ្ឋ ថ្វាយជាតិ សាសនា ព្រះមហាក្សត្រ និងដើម្បីបានជាឧត្តមប្រយោជន៍ ក្នុងការគោរព​របស់​បណ្តា​ភ្ញៀវ​ជាតិ និងអន្តរជាតិ។អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក នៅ​ក្រោយ​ចប់​កម្មវិធីនេះ បានមានប្រសាសន៍ប្រាប់ក្រុមអ្នកសារព័ត៍មាន ឱ្យដឹងថា ការតម្កល់​ព្រះពុទ្ធ​បដិមា​នេះ ដើម្បីបង្ហាញពីរចនាបទ វប្បធម៌ និងការលើកតម្កើងព្រះពុទ្ធសាសនា ជាសាសនា​របស់​រដ្ឋ​ទៅកាន់ភ្ញៀវជាតិ និងអន្តរជាតិ ដែលគ្រោងបើកដំណើរនៅថ្ងៃទី៩ ខែកញ្ញាខាងមុខនេះ។ បន្ថែម​ពីនេះ គឺដើម្បីឱ្យភ្ញៀវទេសចរណ៍ជាតិ និងអន្តរជាតិ ក៏ដូចជា​ភ្ញៀវ​ដែល​ឆ្លង​កាត់​ព្រលាន​យន្ត​ហោះ​ទាំង​អស់ជួបតែសេចក្តីសុខសប្បាយនៅក្នុងការធ្វើដំណើរ។អ្នកឧកញ៉ា ឆារស៍ វ៉ាន់ បានបញ្ជាក់បន្ថែមទៀតថា ការដាក់ព្រះពុទ្ធបដិមានេះ ដោយសារ​កម្ពុជា​កាន់​ព្រះពុទ្ធ​សាសនា ដូច្នេះហើយ អ្វីដែលធ្វើនៅព្រលានយន្តហោះនេះគឺរំពឹងថា នៅក្នុងរាល់​រចនា​បថ ការរៀបចំទាំងអស់ក្នុងព្រលាននេះ គឺយកតាមប្រពៃណី និងវប្បធម៌​ខ្មែរ​សុទ្ធ​សាធ​ទាំង​អស់​ដើម្បី​តម្កល់ក្នុងព្រលានថ្មីនេះ គឺដើម្បីឱ្យសុខសាន្ត សុខសប្បាយទាំងអស់ ហើយក៏ជាវប្បធម៌ និង​ដើម្បីឱ្យភ្ញៀវទេសចរទាំងអស់បានមើលឃើញថា ជាព្រះពុទ្ធមួយអង្គដែលមានតម្លៃ សំខាន់​គឺ​បង្ហាញ​វប្បធម៌​របស់កម្ពុជា។នៅអាកាស​យានដ្ឋានអន្តរជាតិតេជោ ក្រៅពីព្រះពុទ្ធបដិមា ក៏មានដាក់តាំងបន្ថែម​អំពី​រូប​ចម្លាក់​រចនា​បទបែបខ្មែរផ្សេងៗជាច្រើនទៀត ដែលភាគច្រើននាំមកពីខេត្តសៀមរាប។ សូមបញ្ជាក់​ទៀត​ថា ​អាកាសយានដ្ឋានអន្តរជាតិតេជោ សាងសង់លើផ្ទៃដីសរុប ២,៦០០ហិកតា ជាអាកាស​យាន​ដ្ឋាន​ 4F ដែលអាចនឹងស្រូបយក និងទទួល​បាន​ការ​ហោះ​ហើរ​ពី​ឆ្ងាយ​ឆ្លង​ទ្វីប​អាច​ឲ្យប្រ​ភេទ​យន្ត​ហោះ​ធុន​យក្ស​ចុះចតបាន។ តាមការគ្រោងទុក ព្រលានយន្តហោះថ្មីនេះ នឹងបើកឱ្យប្រតិបត្តិការ នៅ​ថ្ងៃទី៩ ខែកញ្ញា។ និងថ្ងៃទី២០ ខែតុលា ឆ្នាំ២០២៥ នឹង សម្ពោធជាផ្លូវការ ក្រោម​អធិបតី​ភាព​ដ៏​ខ្ពង់​ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា៕ អត្ថបទ៖ ឈិត បូរ៉ាវី

ប្រជាជនភៀសសឹក២៣៨៤គ្រួសារ​ ស្នាក់នៅបណ្តោះអាសន្ន ក្នុងខេត្តកំពង់ធំ​ ទទួលអំណោយពីសម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​

2025/08/08 01:23:57 pm        290
Facebook Telegram Linkin
នៅព្រឹកថ្ងៃសុក្រ​ ទី៨​ ខែសីហា​ ឆ្នាំ២០២៥​នេះ​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ អមដោយថ្នាក់ដឹកនាំ​ និងភរិយាថ្នាកដឹកនាំ​ បានអញ្ជើញចុះជួបសំណេះសំណាល​ សួរសុខទុក្ខ​ និងផ្តល់អំណោយមនុស្សធម៌​ ជូនប្រជាជនភៀសសឹក​ចំនួន​ ២៣៨៤​ គ្រួសារ​ ក្នុងនោះមកពីខេត្តព្រះវិហារ​មាន៧ក្រុងស្រុកចំនួន៨១៨គ្រួសារ​ ,​ ខេត្តឧត្តរមានជ័យ ​មកពី៤ក្រុងស្រុកចំនួន១៤០២គ្រួសារ​ និងខេត្តប៉ៃលិន​ បន្ទាយមានជ័យ​ បាត់ដំបង​ កោះកុង​ សរុបចំនួន១៦៤គ្រួសារ​ ពិធីនេះប្រព្រឹត្តិទៅនៅពហុកីឡដ្ឋាន​ ស្ថិតក្នុងភូមិរូង​ ឃុំត្រពាំងឫស្សី​ ស្រុកកំពង់ស្វាយ​ ខេត្តកំពង់ធំ​ ។យោងតាមរបាយការណ៍​ ឯកឧត្តម​ នួន​ ផារ័ត្ន​ អភិបាលខេត្តកំពង់ធំ​ និងជាប្រធានគណ:កម្មាធិការសាខាកាកបាទក្រហមកម្ពុជាខេត្ត​ បានឲ្យដឹងថា​ ​អំឡុងមានជម្លោះព្រំដែនកម្ពុជា-ថៃ​ គឺពិតជាបានបង្កផលលំបាក យ៉ាងខ្លាំងមកលើសុខសុវត្ថិភាពរបស់ប្រជាពលរដ្ឋកម្ពុជា ជាពិសេសបងប្អូនដែលរស់នៅជាប់ព្រំដែន កម្ពុជា-ថៃផ្ទាល់ ។ ជាក់ស្តែង ប្រជាជនដែលភៀសសឹកពីខេត្តឧត្តរមានជ័យ ព្រះវិហារ បន្ទាយមានជ័យ កោះកុង បាត់ដំបង និងប៉ៃលិន មកស្នាក់ក្នុងខេត្តកំពង់ធំ មានសរុបចំនួន ២.៣៨៤​ គ្រួសារ ស្មើនឹង ៦.៣៣០នាក់ ក្នុងនោះ ជនភៀសសឹក ជាប្រជាជនទូទៅមានចំនួន ១.៩៥៥គ្រួសារ និងជនភៀស សឹកជាគ្រួសារយោធិនមានចំនួន ៤២៩គ្រួសារ ដោយមានអ្នកខ្លះរស់នៅជាមួយនឹងផ្ទះបងប្អូន អ្នកខ្លះរស់នៅក្នុងទីវត្តអារាមជាដើម។ឯកឧត្តមបន្តថា​ ជនភៀសដែលរស់នៅតាមជំរុំ តាមទីវត្តអារាមនានា ដែលខ្លះខ្វះអាហារហូបចុក ខ្វះទឹកស្អាតប្រើប្រាស់ បាត់បង់មុខរបរ បាត់បង់ចំណូល ក្មេងៗបាត់បង់ការសិក្សា និងប្រឈមនឹងការលំបាកជាច្រើនផ្សេងៗ ទៀត ។ឆ្លើយតបទៅនឹងការលំបាករបស់ប្រជាពលរដ្ឋភៀសសឹកទាំងនេះ កាកបាទក្រហមកម្ពុជា ដែលជាអង្គការមនុស្សធម៌គ្មានព្រំដែន ដឹកនាំដោយ សម្តេចកិត្តិព្រឹទ្ធបណ្ឌិត ដែលប្រជាជនប្រសិទ្ធនាមជា មាតាមនុស្សធម៌ បានធ្វើសកម្មភាពយ៉ាងសស្រាក់សស្រាំជាមួយរាជរដ្ឋាភិបាល និងអាជ្ញាធរពាក់ព័ន្ធ ដើម្បីចែកជូននូវស្បៀងអាហារ និងសម្ភារៈប្រើប្រាស់ផ្សេងៗ ជាបន្តបន្ទាប់ជូនពួកគាត់ ដើម្បីចូលរួមរំលែកទុក្ខ លំបាករបស់ប្រជាពលរដ្ឋ។ ជាក់ស្តែង កម្មវិធីចែកអំណោយនៅថ្ងៃនេះ ពិតណាស់នឹងអាចចូលរួម ចំណែកយ៉ាងសំខាន់ក្នុងការសម្រាលការលំបាករបស់បងប្អូនប្រជាពលរដ្ឋបានមួយផ្នែក ដែដែលកំពុងភៀសខ្លួនចេញពីតំបន់ដែលមានភាពតានតឹង​។ក្នុងឱកាសជួបសំណេះសំណាលសួរសុខទុក្ខជាមួយប្រជាជនភៀសសឹកទាំងអស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មានក្តីក្តុកក្តួលរំជួលចិត្ត អាណិតអាសូរយ៉ាងក្រៃលែង ជាមួយលោកយាយ លោកតា បងប្អូនជនភៀសសឹកទាំងអស់ ដែលបង្ខំចិត្តចាកចោលផ្ទះសម្បែងព្រាត់ប្រាសក្រុមគ្រួសារដោយសារជម្លោះប្រដាប់អាវុធ​។ ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន បានពាំនាំនូវព្រះរាជបន្ទូល និងព្រះសវណីយ៍ ផ្តាំផ្ញើសុខទុក្ខ និងក្តីនឹករលឹក អាណិតអាសូរ ពីព្រះករុណា ព្រះមហាក្សត្រ ជាអម្ចាស់ជីវិតលើត្បូង និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចកាល ព្រះអង្គទាំងទ្វេតែងតែគិតគូរពីសុខទុក្ខរបស់បង-ប្អូនប្រជានុរាស្ត្រនៅគ្រប់ទីកន្លែង ថ្វីបើព្រះអង្គមិនបានយាងមកជួប លោកយាយ លោកតា មាមីង បងប្អូន កូនក្មួយដោយផ្ទាល់ក៏ដោយ។ សម្តេចប្រធាន​បានបញ្ជាក់ថា​ ទោះបីជាស្ថិតក្នុងកាល:ទេស:ណាក៏ដោយ រាជរដ្ឋាភិបាលក៏ដូចជា កាកបាទក្រហមកម្ពុជា​ នៅតែគិតគូរយកចិត្តទុកដាក់ដល់ប្រជាពលរដ្ឋគ្រប់ពេលវេលា​ ជាពិសេសបងប្អូនប្រជាពលរដ្ឋភៀសសឹករស់នៅតាមបន្ទាត់ព្រំដែនដែលរងគ្រោះដោយបញ្ហាជម្លោះព្រំដែនរវាងកម្ពុជា-ថៃ​ ធ្វើបាត់បង់សេចក្តីសុខ​ សុភមង្គល​ ក្នុងក្រុមគ្រួសារ​ និងការសិក្សារបស់កូនៗចៅៗ​ ។ ដោយមើលឃើញពីទុក្ខលំបាកវេទនាទាំងអស់នេះហើយទើបថ្ងៃនេះ កក្រក​ មិនបង្អង់យូឡើយ បាននាំយកគ្រឿងឧបភោគបរិភោគ​ និងសម្ភារ:ប្រើប្រាស់មួយចំនួនជូនបងប្អូននាពេលនេះ​ ដើម្បីជួយសម្រាលជីវភាពប្រជាពលរដ្ឋបានមួយគ្រាផងដែរ។ពាក់ព័ន្ធនិងបញ្ហាសុខភាព សម្ដេចកិត្តិព្រឹទ្ធ ប៊ុនរានី ហ៊ុនសែន បានអំពាវនាវទៅដល់ប្រជាជនភៀសសិកទាំងអស់ដែលកំពុងរស់នៅតាមតំបន់ភៀសសឹកមួយចំនួន ត្រូវថែរក្សាសុខភាពឱ្យបានល្អ ដោយត្រូវរស់នៅមានអានាម័យ​ និងពិសារទឹកដាំឆ្អិន ហើយស្ត្រីមានផ្ទៃពោះទៅពិនិត្យផ្ទៃពោះឲ្យបានទៀងទាត់ដើម្បីសុខភាពល្អទាំងម្តាយ​ និងកូន​ ព្រមទាំងកុំឱ្យកុមារតូចៗលេងទឹកព្រោះរដូវនេះជារដូវទឹកឡើង ដើម្បីចៀសវាងគ្រោះថ្នាក់ជាយថាហេតុណាមួយ​កើតឡើង​ ។ប្រជាពលរដ្ឋភៀសសឹកដែលទទួលអំណោយបានថ្លែងអំណរគុណយ៉ាងជ្រាលជ្រៅចំពោះទឹកចិត្ត​ និងការគិតគូរ​ សម្តេចប្រធាន​ពីជីវភាពរស់នៅរបស់ពួកដោយមិនទុកពួកគាត់ចោល​។ ពួកគាត់បន្តថា​ មានតែមាតាមនុស្សធម៌នៃកម្ពុជា ដែលតែងយកចិត្តទុក្ខដាក់គិតគូរខ្ពស់ចំពោះសុខទុក្ខប្រជាពលរដ្ឋជួបការលំបាកគ្រប់ពេលវេលា ៕ 

សម្តេចរដ្ឋសភាធិបតី ឃួន សុដារី អញ្ជើញដឹកនាំកិច្ចប្រជុំត្រួតពិនិត្យលទ្ធផលការងារត្រៀមចូលរួមមហាសន្និបាតអាយប៉ាលើកទី៤៦ នៅប្រទេសម៉ាឡេស៊ី

2025/08/08 01:14:59 pm        249
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៨ ខែសីហាឆ្នាំ២០២៥ បានអញ្ជើញដឹកនាំកិច្ចប្រជុំត្រួតពិនិត្យលទ្ធផលការងារក្នុងការត្រៀមចូលរួមមហាសន្និបាតអន្តរសភាអាស៊ាន(អាយប៉ា/AIPA) លើកទី៤៦ នៅប្រទេសម៉ាឡេស៊ី ចាប់ពីថ្ងៃទី១៦ដល់ថ្ងៃទី២២ ខែកញ្ញាឆ្នាំ២០២៥ ខាងមុខនេះ។កិច្ចប្រជុំនេះ រៀបចំឡើងនៅវិមានរដ្ឋសភា ដោយមានការអញ្ជើញចូលរួមពីសមាសភាពគណៈប្រតិភូជាន់ខ្ពស់សភានៃព្រះរាជាណាចកម្ពុជា និងថ្នាក់ដឹកនាំអគ្គលលេខាធិការដ្ឋានរដ្ឋសភា ព្រមទាំងមន្រ្តីជំនួយការ ដែលទទួលបានការសម្រេចឱ្យចូលរួមជួយការងារថ្នាក់ដឹកនាំនៅពេលមហាសន្និបាតអន្តរសភា (អាយប៉ា)លើកទី៤៦។ សម្តេចរដ្ឋសភាធិបតី បានថ្លែងអំណរគុណយ៉ាងជ្រាលជ្រៅជូនសមាជិកសមាជិកាសភា ក៏ដូចជាថ្នាក់ដឹកនាំអគ្គលេខាធិការដ្ឋានរដ្ឋសភា ដែលបានបំពេញការងារយ៉ាងសកម្ម និងបានត្រៀមលក្ខណៈបានល្អប្រសើរទំាងខ្លឹមសារ និងសមាសភាពចូលរួម ពិសេសបានធ្វើការយ៉ាងជិតស្និទ្ធជាមួយអគ្គលេខាធិការដ្ឋានអាយប៉ា និងម្ចាស់ផ្ទះរៀបចំមហាសន្និបាត។ ជាមួយគ្នានេះ សម្តេចប្រធានរដ្ឋសភា បានផ្តំាផ្ញើដល់ក្រុមការងារត្រូវបំពេញភារកិច្ចដែលនៅសេសសល់ឱ្យបានរួចរាល់ គ្រប់ជ្រុងជ្រោយ។ សម្តេចបានគូសបញ្ជាក់ថា នៅក្នុងនោះខ្លឹមសារសំខាន់មួយដែលសភាកម្ពុជាត្រូវលើកឡើងនៅក្នុងកិច្ចប្រជុំនានានៅក្នុងពេលមហាសន្និបាតលើកទី៤៦នេះ គឺតម្លៃសន្តិភាព។ សន្តិភាពសម្រាប់កម្ពុជា ដែលបានហែលឆ្លងភ្លើងសង្រ្គាម ជាច្រើនទសវត្សរ៍មានសារៈសំខាន់ណាស់។ សន្តិភាពនៅកម្ពុជា បានពីការលះបង់យកអាយុជីវិតជាដើមទុន របស់សម្តេចអគ្គមហាសេនាបតីតេជោ ហ៊ុន សែន ដែលជាប្រតិបត្តិករដ៏ឆ្នើមនៃនយោបាយឈ្នះ-ឈ្នះ។ សន្តិភាពនៅកម្ពុជា បានកំពុងការពារនិងលើកកម្ពស់ជាបន្ត យ៉ាងម៉ឺងម៉ាត់ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ សម្តេចរដ្ឋសភាធិបតី ក៏បានផ្តាំផ្ញើបន្តថា ក្នុងនាមប្រទេសស្រឡាញ់សន្តិភាព កម្ពុជាត្រូវលើកឡើងពីការថ្លែងអំណរគុណចំពោះគំនិតផ្ដួចផ្ដើមរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ដែលបានបង្កើតឱ្យមាននូវបទឈប់បាញ់កាលពីថ្ងៃទី២៨ ខែកក្កដា ឆ្នាំ២០២៥កន្លងមក។ នៅក្នុងនោះកម្ពុជាក៏ត្រូវអរគុណដល់ ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្រ្តីប្រទេសម៉ាឡេស៊ី និងជាប្រធានអាស៊ាន ក្នុងការជួយសម្របសម្រួលរៀបចំទីកន្លែងកិច្ចចរចាបទឈប់បាញ់និងកិច្ចប្រជុំគណៈកម្មាធិការព្រំដែនទូទៅ (GBC) ដែលទើបបញ្ចប់ ដោយទទួលបានលទ្ធផលជាទីមោទនៈ។ កម្ពុជាក៏សូមអរគុណដល់សាធារណរដ្ឋប្រជាមានិតចិននិងបណ្តាប្រទេសជាមិត្តនានា ដែលបានចូលរួមសង្កេតការណ៍ការចរចាបទឈប់បាញ់ និងការអនុវត្តបទឈប់បាញ់ឱ្យមានប្រសិទ្ធភាពខ្ពស់ដើម្បីសុខសន្តិភាព សុវត្ថិភាពយូរអង្វែងនៃប្រទេសទំាងពីរ៕

គិតមកដល់ពេលនេះ ព្រលានយន្តថ្មីក្រុងតាខ្មៅសម្រេចការសាងសង់ ១០០% និងគ្រោងបើកដំណើរការនៅថ្ងៃទី៩ ខែកញ្ញា

2025/08/08 01:08:58 pm        957
Facebook Telegram Linkin
នាយកគ្រប់គ្រងក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបញ្ជាក់ឱ្យដឹងថា គិតមកទល់ពេលនេះ ព្រលានយន្តហោះអន្តរជាតិតេជោ ក្រុងតាខ្មៅ សម្រេចការសាងសង់បាន ១០០% ខណៈព្រលានថ្មីនេះ គ្រោងបើកដំណើរការនៅថ្ងៃទី៩ ខែកញ្ញាខាងមុខនេះ។អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) នៅក្នុងកម្មវិធីប្រារព្ធពិធីរំកិលព្រះពុទ្ធបដិមា ធ្វើអំពីស្ពាន់ ទម្ងន់៩តោន និងកម្ពស់៩ម៉ែត្រ ដើម្បីតម្កល់ក្នុងទីបរិវេណអាកាសយានដ្ឋានអន្តរជាតិតេជោ នៅព្រឹកថ្ងៃទី៨ ខែសីហានេះ បានមានប្រសាសន៍ប្រាប់បណ្តាញអ្នកសារព័ត៌មានឲ្យដឹងថា នៅពេលនេះក្រុមការងារទាំងអស់ រួមទាំងព្រលានយន្តហោះអន្តរជាតិតេជោ (TIA) ក្រុមហ៊ុនអាកាសចរណ៍ទាំងអស់ និងក្រុមហ៊ុនដឹកជញ្ជូនជាដើម គឺមានប្រជុំ ១សប្តាហ៍ ១ដង ដើម្បីត្រៀមខ្លួនផ្ទេរពីព្រលាយន្តហោះចាស់ មកកាន់ព្រលានយន្តហោះថ្មី។ អ្នកឧកញ៉ា បានបញ្ជាក់ថា មុននឹងបើកឱ្យដំណើរការហោះហើរនៅថ្ងៃទី៩ ខែកញ្ញាខាងមុខ ព្រលានថ្មីនេះបានធ្វើការតេស្តសាកល្បងចំនួន២លើករួចមកហើយជាបច្ចេកទេស ហើយខាងអាកាសចរណ៍ស៊ីវិលក៏បានចុះហត្ថលេខាទទួលស្គាល់ និងចេញអាជ្ញាប័ណ្ណរួចដែរ ហើយយើងក៏ត្រៀមខ្លួនថែមទៀត ដើម្បីធ្វើតេស្តយន្តហោះប្រភេទធំ A320 នៅថ្ងៃទី១៥ ខែសីហា។ បន្ទាប់មក នឹងធ្វើការតេស្តធំមួយទៀត ទៅលើយន្តហោះចំនួន ២គ្រឿង គឺយន្តហោះ Singapore Airline និង Air Cambodia នៅដើមខែកញ្ញាខាងមុខ។ព្រលានយន្តហោះអន្តរជាតិតេជោ មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជាក្នុងឆ្នាំ២០១៨ ក្រោមការណែនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ធសភាកម្ពុជា ដើម្បីធ្វើការងារសាងសង់ព្រលានយន្តភ្នំពេញថ្មីមួយនេះ។ តាមការគ្រោងទុក ព្រលានយន្តហោះអន្តរជាតិតេជោថ្មីនេះ នឹងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា៕ អត្ថបទ ឈិត បូរ៉ាវី

ឯកឧត្តមរដ្ឋមន្ត្រី ជា វ៉ាន់ដេត ទទួលជំនួបជាមួយឯកអគ្គរាជទូតម៉ាឡេស៊ីប្រចាំកម្ពុជា ពិភាក្សាលើការងារពាក់ព័ន្ធនឹងវិស័យឌីជីថល

2025/08/08 12:53:32 pm        267
Facebook Telegram Linkin
ព្រឹកថ្ងៃទី៨ ខែសីហា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ បានទទួលជំនួបពិភាក្សាការងារជាមួយ ឯកឧត្តម Shaharuddin Onn ឯកអគ្គរាជទូតម៉ាឡេស៊ីប្រចាំកម្ពុជា និងសហការី នៅទីស្ដីការក្រសួងប្រៃសណីយ៍និងទូរគមនាគមន៍។ក្នុងជំនួបនេះ ឯកឧត្តមរដ្ឋមន្រ្តី និងឯកឧត្តមឯកអគ្គរាជទូត បានពិភាក្សាលើការងារពាក់ព័ន្ធនឹងវិស័យឌីជីថល បញ្ញាសិប្បនិម្មិត សន្តិសុខសាយប័រ ជាពិសេសដំណើរទស្សនកិច្ចរបស់ឯកឧត្តមរដ្ឋមន្រ្តី និងគណៈប្រតិភូទៅកាន់ប្រទេសម៉ាឡេស៊ី និងចូលរួមកិច្ចប្រជុំកំពូលអាស៊ានស្ដីពីបញ្ញាសិប្បនិម្មិត ម៉ាឡេស៊ី ឆ្នាំ២០២៥ ដែលនឹងប្រព្រឹត្តទៅចាប់ពីថ្ងៃទី១១-១២ ខែសីហា ឆ្នាំ២០២៥ នៅទីក្រុងកូឡាឡាំពួ ប្រទេសម៉ាឡេស៊ី។ ឆ្លៀតក្នុងឱកាសនេះ ឯកឧត្តមរដ្ឋមន្រ្តី បានថ្លែងអំណរគុណដល់ប្រទេសម៉ាឡេស៊ី ចំពោះការចូលរួមចំណែកដ៏ស្វិតស្វាញក្នុងការស្វែងរកដំណោះស្រាយតាមរយៈការចុះកិច្ចព្រមព្រៀងបទឈប់បាញ់រវាងកម្ពុជា-ថៃ ក្រោមគំនិតផ្តួចផ្តើមរបស់សហរដ្ឋអាមេរិក និងមានការចូលរួមដោយសាធារណរដ្ឋប្រជាមានិតចិន៕

កម្ពុជាបង្ហាញការព្រួយបារម្ភទាំងផ្នែកច្បាប់ និងសីលធម៌ ចំពោះយោធិនទាំង១៨នាក់ ដែលថៃចាប់ទៅ

2025/08/08 12:19:45 pm        283
Facebook Telegram Linkin
រាជរដ្ឋាភិបាលកម្ពុជា តាមរយៈអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបង្ហាញការព្រួយបារម្ភទាំងផ្នែកច្បាប់ និងសីលធម៌ ចំពោះយោធិនរបស់កម្ពុជា ដែលថៃចាប់ទៅ ខណៈកំពុងអនុវត្ត កិច្ចព្រមព្រៀងបទឈប់បាញ់ ហើយកម្ពុជាបន្តអំពាវនាវយ៉ាងទទូចឲ្យថៃធ្វើការដោះលែងពួកគេទាំង១៨នាក់នោះ ជាបន្ទាន់ដោយគ្មានលក្ខខណ្ឌ។ក្នុងសន្និសីទសារព័ត៌មានស្តីពីការអនុវត្តបទឈប់បាញ់ នាថ្ងៃទី៨ ខែសីហា ឆ្នាំ២០២៥នេះ ឯកឧត្តម ជុំ សុន្ទរី អ្នកនាំពាក្យក្រសួងការបរទេសកម្ពុជា បានលើកឡើងថា កម្ពុជាបានវាយតម្លៃខ្ពស់ចំពោះគណៈកម្មការកាកកបាទក្រហមអន្តរជាតិ ដែលបានអញ្ជើញចុះសួរសុខទុក្ខដល់យោធិនកម្ពុជា១៨នាក់ ដែលត្រូវបានថៃ ធ្វើការឃុំឃាំង ខណៈដំណើរចុះសួរសុខទុក្ខនេះ គឺដើម្បីធានានូវសិទ្ធិជាមូលដ្ឋាន និងភាពថ្លៃថ្នូរបស់យោធិនខ្មែរទាំង១៨នាក់ នោះ ត្រូវបានគោរពដោយអាជ្ញាធរថៃ ស្របទៅតាមអនុសញ្ញាទីក្រុងហ្សឺណែវឆ្នាំ១៩៤៩ និងច្បាប់មនុស្សធម៌អន្តរជាតិ។ឯកឧត្តម អ្នកនាំពាក្យក្រសួងការបរទេសកម្ពុជា បានសង្កត់ធ្ងន់ថា «ការបន្តឃុំឃាំងយោធិនទាំង១៨រូប ដែលត្រូវបានចាប់ខ្លួន ក្នុងពេលកំពុងអនុវត្តបទឈប់បាញ់ គឺបានបង្កឡើងនូវការព្រួយបារម្ភទាំងផ្នែក ច្បាប់ទាំងផ្នែកសីលធម៌»។យ៉ាងណាក៏ដោយរាជរដ្ឋាភិបាលកម្ពុជា សូមឲ្យមានការធ្វើមាតុភូមិនិវត្តន៍ជាបន្ទាន់ ដោយឥតលក្ខខណ្ឌចំពោះយោធិនកម្ពុជាទាំង១៨រូបនោះ និងទាមទារឲ្យថៃ ផ្តល់អាទិភាពចំពោះកិច្ចសន្ទនាដោយ សុច្ចចិត្ត និងការកាត់បន្ថយភាពតានតឹងក្នុងស្មារតីសន្តិភាព និងកិច្ចសហប្រតិបត្តិការ។សូមបញ្ជាក់ថា ទាក់ទងនឹងវីរកងទ័ពកម្ពុជា ចំនួន១៨នាក់ដែលស្ថិននៅក្រោមការគ្រប់គ្រងរបស់ទាហានថៃនេះដែរ កម្ពុជាបានស្នើឲ្យម៉ាឡេស៊ី ដែលជាប្រធានអាស៊ានប្តូរវេននោះឲ្យជួយអន្តរាគមន៍ ដើម្បីជំរុញឲ្យភាគីថៃឆាប់បញ្ជូនពួកគាត់ឲ្យមកកម្ពុជាវិញ ឲ្យបានឆាប់ៗនេះផងដែរ។ បើតាមអ្នកនាំពាក្យក្រសួងការពារជាតិកម្ពុជាលោកជំទាវ ម៉ាលី សុជាតា ក៏បានលើកឡើងផងដែរថា ក្រសួងការពារជាតិ និងកងយោធពលខេមរភូមិន្ទ នឹងមិនបានព្រងើយកន្តើយ ឬទុកសមាជិករបស់ខ្លួនណាមួយចោលនោះទេ ទោះក្នុងកាលៈទេសៈណាក៏ដោយខណៈទាហាខ្មែរចំនួន១៨នាក់ណ ដែលទាហានថៃចាប់ទៅនេះ បានកំពុងបន្តធ្វើការចរចា យ៉ាងយកចិត្តទុកដាក់បំផុតពីសំណាក់រាជរដ្ឋាភិបាល ដើម្បីសុខសុវត្ថិភាពរបស់ពួកគេនោះ៕ អត្ថបទបាន ចក់

Finalizing the ASEAN Observer Team’s Terms of Reference is an Urgent Priority, Spokesperson (8 August, 2025)

2025/08/08 12:12:47 pm        647
Facebook Telegram Linkin
Phnom Penh, 8 August 2025 — During a press briefing held at the Office of the Council of Ministers at 7:00 AM today, Her Excellency General Maly Socheata, Spokesperson of the Ministry of National Defense, emphasized the critical importance of swiftly finalizing the Terms of Reference (TOR) for the ASEAN Observer Team (AOT), which will monitor the ceasefire between Cambodia and Thailand.Her Excellency highlighted the outcomes of the recent General Border Committee (GBC) Meeting between Cambodia and Thailand, which took place on August 7, 2025 in Putrajaya, Malaysia. She noted that the discussions proceeded smoothly and constructively, reflecting a positive and collaborative atmosphere. Both sides reached mutual agreement on key elements of the ceasefire and the development of a joint implementation mechanism, marking a significant step toward sustaining peace and seeking a long-term, diplomatic resolution.“This progress paves the way for peace, stability, cooperation, and development for the peoples of both nations,” said H.E. Maly Socheata. “The most important next step is establishing a robust mechanism to monitor the implementation of the ceasefire.”She further affirmed that both Cambodian and Thai delegations have agreed to expedite the drafting of the TOR for the ASEAN Observer Team as swiftly as possible. “This monitoring mechanism is essential to ensuring compliance with the ceasefire agreement,” she added.It should be noted that, as previously scheduled, Deputy Prime Minister and Minister of National Defense, General Tea Seiha, led a high-level delegation of the Royal Cambodian Armed Forces to attend the GBC meeting with the Thai side in Putrajaya, Malaysia on August 7, 2025.

នៅព្រឹកនេះ ក្រុមអ្នកសង្កេតការណ៍អន្តរកាលដឹកនាំដោយអនុព័ន្ធយោធាម៉ាឡេស៊ីប្រចាំកម្ពុជា ចុះពិនិត្យទីតាំងស្នាក់ការរបស់​ក្រុម​អ្នកសង្កេតការណ៍អាស៊ាន និងទីតាំងមួយចំនួនទៀត ដែល​បម្រើ​ឱ្យ​ក្រុមការងារនេះ នៅខេត្តឧត្តរមានជ័យ

2025/08/08 11:48:14 am        477
Facebook Telegram Linkin
នៅព្រឹកថ្ងៃទី៨ ខែសីហា ឆ្នាំ២០២៥ លោកវរសេនីយ៍ឯក Nazlee Bin Abdul Rahim អនុ​ព័ន្ធ​យោធា​ម៉ាឡេស៊ីប្រចាំកម្ពុជា បានដឹកនាំក្រុមការងារសម្របសម្រួល សម្រាប់ក្រុម​អ្នក​សង្កេត​ការណ៍​អន្តរកាល (Interim Observer Team) ដែលជាការអនុវត្តន៍យ៉ាងម៉ឺងម៉ាត់ ស្រប​តាម​ខ្លឹម​សារ​ដែល​បានឯកភាពគ្នា ក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា និងថៃ​(GBC)​ កាលពីថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី។សមាសភាពក្រុមអ្នកសង្កេតការណ៍អន្តរកាលដែលបានចូលរួម មានចំនួន០៧ប្រទេស ដែល​កំពុង​ធ្វើដំណើរទៅបំពេញបេសកកម្មនៅខេត្តឧត្តរមានជ័យ រួមមាន ៖1- អនុព័ន្ធយោធាម៉ាឡេស៊ីប្រចាំកម្ពុជា (ប្រធាន)2-អនុព័ន្ធយោធាមីយ៉ាន់ម៉ាប្រចាំកម្ពុជា3- អនុព័ន្ធយោធាឥណ្ឌូនេស៊ីប្រចាំកម្ពុជា 4-អនុព័ន្ធយោធាសិង្ហបុរីប្រចាំកម្ពុជា មាននិវេសនដ្ឋាននៅរដ្ឋធានីហាណូយ5-ជំនួយការអនុព័ន្ធយោធាវៀតណាមប្រចាំកម្ពុជា6- ជំនួយការអនុព័ន្ធយោធាឡាវប្រចាំកម្ពុជា7-ជំនួយការអនុព័ន្ធយោធាហ្វីលីពីនប្រចាំកម្ពុជាការចូលរួមរបស់ប្រទេសដៃគូទាំងនេះ គឺជាការឆ្លុះបញ្ចាំងឱ្យឃើញពីបំណងប្រាថ្នារួម ក្នុង​ការ​ធ្វើ​ឱ្យ​បទ​ឈប់​បាញ់​ទទួល​បានជោគជ័យ និងយូរអង្វែង ជាមួយនឹងគោលដៅនាំមកវិញនូវសន្តិភាព ស្ថិរភាព កិច្ចសហប្រត្តិការ និងការអភិវឌ្ឍសម្រាប់ប្រជាជននៃប្រទេសទាំងពីរ៕

អាមេរិកស្វាគមន៍លទ្ធផលកិច្ចប្រជុំ GBC និងគាំទ្រចំពោះដំណើរ​ការឈាន​ទៅ​មុខ​នៃ​ការ​អនុវត្ត​បទ​ឈប់​បាញ់រវាងកម្ពុជា និងថៃ

2025/08/08 11:15:57 am        328
Facebook Telegram Linkin
ភ្នំពេញ៖ សហរដ្ឋអាមេរិកស្វាគមន៍កិច្ចប្រជុំគណៈកម្មាធិការព្រំដែនទូទៅនៅថ្ងៃនេះ នាទី​ក្រុង​កូ​ឡា​ឡាំពួរ ថាជាជំហានដ៏សំខាន់ឆ្ពោះទៅមុខក្នុងការពង្រឹងការរៀបចំបទឈប់បាញ់ និងការ​បង្កើត​យន្ត​ការ​ក្រុមសង្កេតការណ៍អាស៊ាន។ នេះបើតាមសេចក្តីថ្លែងការណ៍របស់លោក Marco Rubio រដ្ឋមន្ត្រីក្រសួងការបរទេសអាមេរិកស្តីពីដំណោះស្រាយបទឈប់បាញ់រវាងប្រទេសកម្ពុជា និង​ថៃ​នៅ​ថ្ងៃទី៧ ខែសីហានេះ។ខ្លឹមសារក្នុងសេចក្តីថ្លែងការណ៍ បានបញ្ជាក់ថា សហរដ្ឋ​អាមេរិក​ស្វាគម​ន៍​កិច្ច​ប្រជុំ​គណៈកម្មាធិការ​ព្រំដែន​ទូទៅ​នៅថ្ងៃនេះ នាទីក្រុងកូឡាឡាំពួរ ថាជាជំហានដ៏សំខាន់​ឆ្ពោះទៅ​មុខ​ក្នុង​ការ​ពង្រឹង​ការ​រៀប​ចំបទឈប់បាញ់ និងការបង្កើតយន្តការក្រុមសង្កេតការណ៍អាស៊ាន។លោកប្រធានាធិបតី Trump និងលោក Marco Rubio រំពឹងថារដ្ឋាភិបាលនៃប្រទេសកម្ពុជា និង​ប្រទេស​ថៃ នឹងគោរពយ៉ាងពេញលេញនូវការប្តេជ្ញាចិត្តរបស់ពួកគេក្នុងការបញ្ចប់ជម្លោះនេះ។ លោក Marco Rubio ថ្លែងថា យើងនៅតែដឹងគុណចំពោះនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម សម្រាប់ការដឹកនាំរបស់គាត់ និងសម្រាប់ការធ្វើជាម្ចាស់ផ្ទះនៃដំណើរការបទឈប់បាញ់ ដែលជាលទ្ធផលផ្ទាល់នៃឆន្ទៈរបស់គាត់ ក្នុងការសហការរៀបចំកិច្ចប្រជុំពិសេសថ្ងៃទី ២៨ ខែកក្កដា ជាមួយសហរដ្ឋអាមេរិក ដើម្បីដោះស្រាយជម្លោះនេះ។ យើងទន្ទឹងរង់ចាំការគាំទ្រដល់ប្រទេសម៉ាឡេស៊ី អាស៊ាន និងប្រទេសទាំងពីរ នៅពេលដែលដំណើរការនេះឈានទៅមុខ៕

ក្រសួងការងារ លើកទឹកចិត្តដល់និស្សិតជ័យលាភីអាហារូបករណ៍​របស់​រដ្ឋាភិបាល​សាធារណរដ្ឋ​អៀរឡង់ ​សម្រាប់ឆ្នាំ២០២៥-២០២៦ ទៅបន្តសិក្សាថ្នាក់បរិញ្ញាបត្រជាន់ខ្ពស់ ឱ្យក្លាយ​ជា​មូល​ធន​មនុស្ស​ប្រកប​ដោយសក្តានុពលរបស់កម្ពុជាក្នុងយុគសម័យឌីជីថល

2025/08/08 10:53:58 am        129
Facebook Telegram Linkin
លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បាន​អនុញ្ញាត​ឱ្យ​និស្សិត​ជ័យ​លាភី​អាហា​រូប​ករណ៍​របស់រដ្ឋាភិបាលសាធារណរដ្ឋអៀរឡង់ (The Ireland Fellowship Programme) សម្រាប់​ឆ្នាំ២០២៥-២០២៦ ចូលជួបសំណះសំណាល និងសម្តែងការគួរសម នាព្រឹកថ្ងៃទី៧ ខែ​សីហា ឆ្នាំ២០២៥ នៅទីស្តីការក្រសួង។ ក្នុងនាមក្រសួងការងារ និង​បណ្តុះ​បណ្តាល​វិជ្ជាជីវៈ​ដែល​ជា​សេនាធិការ​ឱ្យ​រាជ​រដ្ឋាភិបាល​ក្នុង​ការ​អភិវឌ្ឍ​វិស័យ​ការងារ សន្តិសុខសង្គម និងបណ្តុះបណ្តាលវិជ្ជាជីវៈ លោកជំទាវ​រដ្ឋ​លេខា​ធិការ​ប្រចាំការ បានបញ្ជាក់ជូននិស្សិតជ័យលាភីអាហារូបករណ៍របស់រដ្ឋាភិបាលសាធារណរដ្ឋអៀរឡង់ អំពី​បេ​សកកម្មរបស់ក្រសួង តាម​រយៈ​សកម្មភាព​ចម្បង​របស់​ក្រសួង​ក្នុង​ការ​អនុវត្ត​គោល​នយោបាយ​ពាក់ព័ន្ធនឹងបេឡាជាតិសន្តិសុខសង្គម និងការអប់រំបណ្ដុះ​បណ្ដាល​បច្ចេក​ទេស​ និង​វិជ្ជា​ជីវៈ ដោយស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។ ជាមួយគ្នានេះ លោកជំទាវក៏បានផ្ដាំផ្ញើដល់និស្សិតជ័យលាភីឱ្យយកចិត្តទុកដាក់លើការសិក្សា ឆ្លៀតពេលបង្កើតទំនាក់ទំនងល្អជាមួយមិត្តភក្តិ ស្វែងយល់បន្ថែមពីបណ្ដាប្រទេសផ្សេងៗក្នុងតំបន់អឺរ៉ុបឱ្យបានច្រើន ដើម្បីទទួលបានចំណេះដឹងឱ្យកាន់តែទូលំទូលាយបន្ថែមទៀត។ បន្ថែមលើនេះផងដែរ លោកជំទាវលើកទឹកចិត្តឱ្យនិស្សិតជ័យលាភីអាហារូបករណ៍ទាំងអស់ បន្តលើកស្ទួយមុខមាត់កម្ពុជាយើងឱ្យបានកាន់តែល្អលើឆាកអន្តរជាតិតាមនូវអ្វីដែលអាចធ្វើបាន។លោកជំទាវបានលើកទឹកចិត្តដល់និស្សិតជ័យលាភីអាហារូបករណ៍ទាំងអស់ ត្រូវនាំយកនូវចំណេះជំនាញ និងបទពិសោធ ដែលទទួលបានពីការសិក្សានៅទីនោះត្រឡប់មកបម្រើការងារនៅមាតុប្រទេសវិញ ក្នុងនាមជាមូលធនមនុស្សប្រកបដោយថាមពល និងថាមវន្ត ដើម្បីចូលរួមអភិវឌ្ឍន៍ប្រទេសជាតិជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕

បណ្ដាញសង្គម

ព័ត៌មានថ្មីៗ

ប្រព័ន្ធផ្សព្វផ្សាយអ៊ីរ៉ង់៖ ជនស៊ីវិល ៥នាក់ បានស្លាប់ នៅក្នុងការវាយប្រហាររបស់អាមេរិកលើទូកដឹកទំនិញ
05/05/2026 05:05 PM
Facebook Telegram Linkin
ព្រះសង្ឃ និងពលរដ្ឋ អំពាវនាវសប្បុរសជនចូលរួមបរិច្ចាគជាមួយកាកបាទក្រហមកម្ពុជា បន្ត​កិច្ច​ការ​មនុស្សធម៌
05/05/2026 05:05 PM
Facebook Telegram Linkin
ការវិភាគ៖ រុស្ស៊ីបាត់បង់ទឹកដី នៅអ៊ុយក្រែន ក្នុងខែមេសា ជាលើកដំបូងតាំងពីពាក់កណ្តាលឆ្នាំ២០២៣
05/05/2026 05:05 PM
Facebook Telegram Linkin
អាមេរិកបំផ្លាញទូកតូចៗរបស់អ៊ីរ៉ង់ ៦គ្រឿង បាញ់ទម្លាក់មីស៊ីល និងយានដ្រូន ខណៈបើកច្រកសមុទ្រ Hormuz
05/05/2026 05:05 PM
Facebook Telegram Linkin
អ៊ីរ៉ង់៖ គ្មានដំណោះស្រាយយោធាចំពោះវិបត្តិទេ ខណៈព្រមានអំពីភាពតានតឹងនៅច្រកសមុទ្រ Hormuz
05/05/2026 04:05 PM
Facebook Telegram Linkin
បទឈប់បាញ់អាមេរិក-អ៊ីរ៉ង់ ស្ថិតក្នុងហានិភ័យ ខណៈអារ៉ាប់រួមប្រាប់ពីការវាយប្រហារដោយក្រុងតេអេរ៉ង់
05/05/2026 04:05 PM
Facebook Telegram Linkin
ប្រព័ន្ធផ្សព្វផ្សាយ៖ ប្រេងរុស្ស៊ីដំបូងបានមកដល់ប្រទេសជប៉ុន ចាប់តាំងពីសង្គ្រាមអ៊ីរ៉ង់
05/05/2026 04:05 PM
Facebook Telegram Linkin
ទិវាឆ្មបជាតិ-អន្តរជាតិ៖ ឆ្មបប្តេជ្ញាខិតខំចូលរួមកាត់បន្ថយអាត្រាមរណមាតា និង​ទារក​ប្រកប​ដោយ​វិជ្ជាជីវៈ
05/05/2026 04:05 PM
Facebook Telegram Linkin
អភិបាលក្រុងរុស្ស៊ីនិយាយថា អ៊ុយក្រែនព្យាយាមវាយប្រហាររោងចក្រចម្រាញ់ប្រេង Kirishi របស់រុស្ស៊ី
05/05/2026 04:05 PM
Facebook Telegram Linkin
ជនជាតិនីហ្សេរីយ៉ាយ៉ាងហោចណាស់ ១៣០ នាក់ ស្វែងរកការធ្វើមាតុភូមិនិវត្តន៍ពីអាហ្វ្រិកខាងត្បូងក្រោយមានការតវ៉ា
05/05/2026 04:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.