BTV NEWS

អភិបាលខេត្តពោធិ៍សាត់ ចុះជួបគ្រួសារវីរកងទ័ពជួរមុខ និងពិនិត្យវឌ្ឍនភាព វាយតម្លៃគម្រោងមូលនិធិឃុំ ក្នុងស្រុកក្រគរ

មន្ត្រីក្រសួងកសិកម្ម ដឹកនាំក្រុមការងារ ពិនិត្យការបំពាក់ឧបករណ៍ប្រព័ន្ធតាមដាននាវា នៅខេត្តព្រះសីហនុ

រដ្ឋបាលរាជធានី នឹងបញ្ចៀសចរាចរណ៍យានយន្តគ្រប់ប្រភេទ នៅតីរវិថីព្រះស៊ីសុវត្ថិ ជាបណ្ដោះអាសន្ន

ក្រសួងវប្បធម៌ រៀបចំ មហោស្រពសិប្បកម្មច្នៃប្រតិដ្ឋទូទាំងប្រទេសលើកទី១ ចុងសប្ដាហ៍នេះ

ព័ត៌មានជាតិ

ខេត្តក្រចេះ ទទួលសត្វផ្សោតមួយថែមទៀតដែលទើបកើតថ្មីនៅថ្ងៃទី១១ ខែមីនានេះ

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា កូនផ្សោតទើបកើតថ្មី១ក្បាល មានអាយុប្រមាណ២ថ្ងៃ ត្រូវបានស្រាវជ្រាវ និងថតបានដោយក្រុមការងារស្រាវជ្រាវនៃរដ្ឋបាលជលផល និងអង្គការ WWF នាថ្ងៃទី១១ ខែមីនា ឆ្នាំ២០២៥ នៅអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។ ប្រភពដដែល បានសសេរឲ្យដឹងទៀតថា តាមរយៈការពិនិត្យរបស់ក្រុមអ្នកស្រាវជ្រាវ កូនផ្សោតនេះ កើតពីមេផ្សោតដែលមានលេខកូដ១២៣ និងស្ថិតនៅក្នុងក្រុមសត្វផ្សោតពេញវ័យ ចំនួន ៣ក្បាលផ្សេងទៀត។ នេះគឺជាកូនផ្សោតទី៥ ដែលបានកើតនៅដើមឆ្នាំ២០២៥នេះ។ក្រសួងកសិកម្ម បានបញ្ជាក់ថា សត្វផ្សោតទន្លេមេគង្គ ត្រូវចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វជិតផុតពូជ និងកំពុងត្រូវបានការពារ និងអភិរក្សយ៉ាងតឹងរឹង ដោយច្បាប់ស្តីពីជលផល និងអនុក្រឹត្យស្តីពីការ បង្កើតតំបន់គ្រប់គ្រងនិងការពារសត្វផ្សោតទន្លេមេគង្គនៃព្រះរាជាណាចក្រកម្ពុជា។ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ អំពាវនាវដល់ប្រជានេសាទថា ប្រសិនបើបានប្រទះឃើញសត្វផ្សោត ពិសេសកូនផ្សោត សូមផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ៖ ០១២ ៨៩៧ ៩៤៣ ០១១ ៣៥៥ ៨៨៣ ០៩៩ ៧៩១ ៩១៩ ០៩២ ៩១៨ ១៤៤ និង ០១៧ ៨១៨ ៣៨២៕

រថយន្តបាញ់ផ្សែងចេញពីអគារកំពុងឆេះ ជាជំនួយរបស់ជប៉ុនបានដឹកមកភ្នំពេញហើយ

លោកស្រី ដោ សម្ជស្ស អ្នកនាំពាក្យរដ្ឋបាលរាជធានីភ្នំពេញបានឲ្យដឹងព្រឹកថ្ងៃទី១២ ខែមីនា ឆ្នាំ២០២៥ថា រថយន្តបាញ់ផ្សែងចំនួន ១គ្រឿង តម្លៃ ៨៣.៦៧២ដុល្លារអាមេរិក ដែលជាអំណោយរបស់រដ្ឋាភិបាលជប៉ុនតាមរយៈស្ថានទូតជប៉ុន ត្រូវបានដឹកជញ្ជូនមកដល់រាជធានីភ្នំពេញហើយ។ អ្នកជំនាញជប៉ុននឹងផ្តល់វគ្គបណ្តុះបណ្តាលអំពីរបៀបប្រើប្រាស់រថយន្តនេះដល់មន្រ្ដីជំនាញរបស់អង្គភាពបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញក្នុងសបា្តហ៍នេះ។លោកស្រីបន្ថែមថា ចំពោះកម្មវិធីប្រគល់-ទទួលផ្លូវការ នឹងរៀបចំធ្វើក្នុងសបា្តហ៍ខាងមុខនេះ។ លោកស្រីបញ្ជាក់ថា រថយន្តនេះមានមុខងារជួយបាញ់ផ្សែងចេញពីអគារកំពុងឆេះ ដើម្បីបង្កលក្ខណៈងាយស្រួលដល់ក្រុមសង្គ្រោះអាចប្រតិបត្តិការសង្រ្គោះបានទាន់ពេលវេលា៕ អត្ថបទ៖ ប្រាក់ វ៉ាន់ដា

ក្រសួងមុខងារសាធារណៈ និងក្រសួងទេសចរណ៍ សហការរៀបចំសិក្ខាសាលា ស្តីពីការ «ពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងទេសចរណ៍»

នៅព្រឹកថ្ងៃទី១២ ខែមីនា ឆ្នាំ២០២៤នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ កំពុងអញ្ជើញជាអធិបតីដ៏ខ្ពង់ខ្ពស់ ក្នុងសិក្ខាសាលាស្តីពី «ការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងទេសចរណ៍» ដោយមានវត្តមានអញ្ជើញចូលរួមដោយ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ព្រមទាំងថ្នាក់ដឹកនាំ និងមន្ត្រីជំនាញនៃក្រសួងទាំង២ និងមន្ទីរទេសចរណ៍រាជធានី ខេត្តទាំង២៥។ក្នុងមតិស្វាគមន៍អង្គសិក្ខាសាលា ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជម្រាបជូនអង្គសិក្ខាសាលាថា “ដោយអនុវត្តតាមសេចក្តីណែនាំ និងសារាចរ របស់រាជរដ្ឋាភិបាល ក្រសួងទេសចរណ៍បានសហការជាមួយអគ្គលេខាធិការដ្ឋាននៃ គ.វ.រ. ដើម្បីគាំទ្រដំណើរការ នៃការពិនិត្យឡើងវិញ ការវិភាគមុខងារនិងរចនាសម្ព័ន្ធវិស័យសេដ្ឋកិច្ច ដោយធ្វើការពិនិត្យឡើងវិញ វិភាគមុខងារនិងរចនាសម្ព័ន្ធ និងការធ្វើបច្ចុប្បន្នភាពរចនាសម្ព័ន្ធ និងទិន្នន័យមន្ត្រីរាជការ របស់ក្រសួងទេសចរណ៍។ ជាលទ្ធផលក្រសួងបានកំណត់មុខងារគោលចំនួន៣ រួមមាន៖ ទី១.គ្រប់គ្រងវិស័យទេសចរណ៍, ទី២.ដឹកនាំ និងសម្របសម្រួលការអភិវឌ្ឍន៍វិស័យទេសចរណ៍ និងទី៣.សេវាគាំទ្រដំណើរការទូទៅវិស័យទេសចរណ៍។ ព្រមទាំងកំណត់មុខងារគាំទ្រ ចំនួន១៨ និងមុខងារជំនាញ ចំនួន៣២។”ទន្ទឹមនេះ ឯកឧត្តមរដ្ឋមន្ត្រីបានបញ្ជាក់ថា “បន្ទាប់ពីបានពិនិត្យឡើងវិញ ការវិភាគមុខងារនិងរចនាសម្ព័ន្ធ ក្រសួងនឹងធ្វើការកែសម្រួលរចនាសម្ព័ន្ធឡើងវិញ ដោយឈរលើអភិក្រម នៃការងារកែទម្រង់រដ្ឋបាលសាធារណៈ គឺពង្រឹងជាជាងពង្រីក។ ផ្អែកតាមលទ្ធផលនៃការពិនិត្យឡើងវិញ ការវិភាគមុខងារនិងរចនាសម្ព័ន្ធ និងការធ្វើបច្ចុប្បន្នភាពរចនាសម្ព័ន្ធ និងទិន្នន័យមន្ត្រីរាជការក្រសួងទេសចរណ៍ បានបង្ហាញថា តួនាទី និងភារកិច្ចរបស់គណៈកម្មការមួយចំនួន ដែលគាំទ្រដល់ការជំរុញការអភិវឌ្ឍន៍វិស័យទេសចរណ៍ មានភាពស្ទួនគ្នាជាមួយនឹងតួនាទីភារកិច្ចរបស់ក្រសួងទេសចរណ៍ ព្រមទាំងតួនាទី ភារកិច្ចមួយចំនួននៅក្រសួងដទៃ មានភាពស្ទួនគ្នា ក៏ដូចជាតួនាទី ភារកិច្ចរបស់ការិយាល័យផងដែរ។” “ផ្អែកតាមរបបគំហើញដែលបានរកឃើញ ក្រសួងគ្រោងនឹងកែសម្រួលរចនាសម្ព័ន្ធនាពេលបច្ចុប្បន្ន ឱ្យសមស្របទៅនឹងមុខងារថ្មីរបស់ក្រសួងទេសចរណ៍ និងកែសម្រួលតួនាទី ភារកិច្ចរបស់គណៈកម្មការនានា ដែលគាំទ្រដល់ការជំរុញការអភិវឌ្ឍន៍វិស័យទេសចរណ៍ និងមន្ត្រីរាជការ តាមអង្គភាពនីមួយៗ លើមុខងារមួយចំនួន ដើម្បីប្រសិទ្ធភាពការងារ។” ឯកឧត្តមរដ្ឋមន្ត្រី បានបន្ថែម។សូមជម្រាបថា សិក្ខាសាលានេះ មានបទបង្ហាញរបស់ថ្នាក់ដឹកនាំក្រសួងមុខងារសាធារណៈ ចំនួនពីររូបរួមមាន៖ (១) ការបង្ហាញពីដំណើរការ នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធ របស់ក្រសួង ស្ថាប័ន ដោយលោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និង (២) ការបង្ហាញពីការងារបំពេញគ្នា គាំទ្រគ្នា និងជំរុញការអនុវត្តការងាររួមគ្នា ក្នុងក្របខណ្ឌការកែទម្រង់ និងពង្រឹងអភិបាលកិច្ច ដោយឯកឧត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ៕

មេបញ្ជាការតំបន់ប្រតិបត្តការសឹករងកំពង់ឆ្នាំង ណែនាំប្រជានេសាទអោយប្រើឧបករណ៍ត្រូវច្បាប់ស្តីពីជលផល

កំពង់ឆ្នាំង៖ អនុវត្តតាមបទបញ្ជាដ៏ខ្ពង់ខ្ពស់របស់ថ្នាក់ដឹកនាំ លោកឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តការសឹករងកំពង់ឆ្នាំង នៅថ្ងៃទី១២ ខែមីនា ឆ្នាំ២០២៥នេះ ក្នុងពេលចុះបង្ក្រាបបទល្មើសនេសាទនៅតាមដងទន្លេសាបនៃខេត្តកំពង់ឆ្នាំង បានជួបសំណេះសំណាល និងបានណែនាំប្រជានេសាទ អោយប្រើប្រាស់ឧបករណ៍ស្របច្បាប់ស្តីពីជលផល ប្រសិនបើមានការគំរាមមិនអោយរកក្បែរសម្រាស់ ឬរបាំងរបស់ជនល្មើស ត្រូវរាយការណ៍ភ្លាមមកលោក ដើម្បីចំណាត់ការទាន់ពេល។ លោកឧត្តមសេនីយ៍ត្រី អ៊ុំ សុភា បានបន្តថា៖ ក្រោយពីបើកកិច្ចប្រតិបត្តការបង្ក្រាបបទល្មើសនេសាទធំៗដូចជា សម្រាស់, របាំងសាច់អួនវែងៗ, របាំងស្បៃមុង, ជន, ឆក់ក្តៅ ឆក់ត្រជាក់, នាម, មងបង្ក្រាប អស់រយៈពេលជាង៤០ថ្ងៃកន្លងមកនេះ កម្លាំងតំបន់ប្រតិបត្តការសឹករងកំពង់ឆ្នាំង កម្លាំងយោធភូមិភាគ៥ កម្លាំងកងទ័ពពិសេស៩១១ កម្លាំងកងពលតូចលេខ៧០ និងកម្លាំងកងទ័ពនៅអង្គភាពផ្សេងៗទៀត បានឆ្លៀតពេលខ្លះជួបជាមួយបងប្អូនប្រជានេសាទលក្ខណៈគ្រួសារដែលកំពុងនេសាទត្រីដោយប្រើប្រាស់ឧបករណ៍ត្រូវច្បាប់មាន មង, សំណាញ់ និងសន្ទូច រួមនិងបងប្អូននៅតាមភូមិដ្ឋានជាប់ដងទន្លេមួយចំនួន ដើម្បីពន្យល់ណែនាំអោយពួកគាត់កាន់តែយល់អំពីផលប៉ះពាល់ពេលពួកគាត់នេសាទត្រីដោយប្រើឧបករណ៍ខុសច្បាប់ស្តីពីជលផល និងប្រាប់ពីទោសទណ្ឌដែលពួកគាត់ត្រូវទទួលក្រោយពេលប្រើប្រាស់ឧបករណ៍ខុសច្បាប់ទាំងនោះ។ ក្នុងពេលនោះ លោកឧត្តមសេនីយ៍ត្រី បានអោយលេខទូរស័ព្ទរបស់គាត់ទៅប្រជានេសាទ និងបានប្រាប់អោយទូរស័ព្ទមកគាត់ភ្លាម បើមានម្ចាស់សម្រាស់ ឬម្ចាស់របាំងកន្លែងណាមួយ គំរាមមិនអោយនេសាទនៅក្បែរសម្រាស់ ឬរបាំងរបស់ពួកគេ។ ប្រជានេសាទលក្ខណៈគ្រួសារ បានទទួលយកនូវការណែនាំ និងបានអរគុណដល់លោកឧត្តមសេនីយ៍ត្រី រួមនិងកងកម្លាំងកងទ័ពទាំងអស់ដែលបានចុះមកបង្ក្រាបបទល្មើសនេសាទធំៗទាំងនោះបានមួយចំនួន និងបានឃើញវត្តមានត្រីមួយចំនួនដែលបាត់នាពេលកន្លងមក។ ពួកគាត់សង្ឃឹមថា ភោគផលត្រីទឹកសាបនៅបឹងទន្លេសាប និងទន្លេសាបក្នុងខេត្តកំពង់ឆ្នាំង នឹងសំបូរឡើងវិញ ងាយស្រួលនេសាទដោយប្រើឧបករណ៍ត្រូវច្បាប់ស្តីពីជលផល ហើយពួកគាត់សុំអោយកម្លាំងកងទ័ពបន្តបង្ក្រាបថែមទៀត។ ប្រជានេសាទ ក៏បានថ្លែងអំណរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី , ឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងកងយោធពលខេមរភូមិន្ទ មេបញ្ជាការកងទព័ជើងគោក, ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង ដែលបានខិតខំថែរក្សាការពារទន្លេសាប បឹងទន្លេសាប និងរក្សាធនធានធម្មជាតិ និងមច្ឆាជាតិទឹកសាប អោយគង់វង្ស សំរាប់ផ្គត់ផ្គង់ជីវភាពបងប្អូនប្រជានេសាទ និងប្រជាពលរដ្ឋខ្មែរជាង១៧លាននាក់បន្តទៅមុខ៕ កាំង ហុងវាស្នា

ឯកឧត្តមរដ្ឋមន្ត្រី ជា វ៉ាន់ដេត បានអញ្ជើញជាអធិបតីដឹកនាំកិច្ចប្រជុំលើកទី៦ របស់គណៈកម្មាធិការរដ្ឋាភិបាលឌីជីថល

នៅរសៀលថ្ងៃទី១១ ខែមីនា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍និងជាប្រធានគណៈកម្មាធិការរដ្ឋាភិបាលឌីជីថល (គ.រ.ឌ.) បានអញ្ជើញជាអធិបតីដឹកនាំកិច្ចប្រជុំលើកទី៦ របស់ គ.រ.ឌ. ដើម្បីពិនិត្យទៅលើវឌ្ឍនភាពការងារ ក្នុងការជំរុញបរិវត្តកម្មឌីជីថលនៅតាមក្រសួង ស្ថាប័ន។ កិច្ចប្រជុំនេះមានការអញ្ជើញចូលរួមពី ឯកឧត្ដម លោកជំទាវ ជាថ្នាក់ដឹកនាំក្រសួង ស្ថាប័ន ដែលជាអនុប្រធាន សមាជិក គ.រ.ឌ. ថ្នាក់ដឹកនាំ និងមន្ត្រីរាជការ សរុបប្រមាណ ៨០នាក់។ជាមួយគ្នានេះ ឯកឧត្ដមរដ្ឋមន្ត្រី និងប្រធាន គ.រ.ឌ. បានជម្រាបជូនអង្គប្រជុំអំពីបច្ចុប្បន្នភាពបច្ចេកវិទ្យាឌីជីថលនៅក្នុងកម្រិតអន្តរជាតិ និងក្នុងតំបន់ ពិសេសគឺបច្ចេកវិទ្យាបញ្ញាសិប្បនិម្មិត និងសន្តិសុខសាយប័រ ដែលកម្ពុជាត្រូវយកចិត្តទុកដាក់ ដេីម្បីចាប់យកកាលានុវត្តភាពនិងជំរុញកំណេីនសេដ្ឋកិច្ច។

អ្វីដែលបងប្អូនកំពុងទន្ទឹងរង់ចាំកាន់តែខិតជិតមកដល់ហើយ !

គណៈកម្មការរៀបចំព្រឹត្តិការណ៍អង្គរសង្ក្រាន្តដែលដឹកនាំដោយ ឯកឧត្តម ហ៊ុន ម៉ានី បានអញ្ជើញរៀបចំកិច្ចប្រជុំតាមដានវឌ្ឍនភាពការងាររបស់ក្រុមការងារក្នុងចង្កោមទាំង ៩ នៃគណៈកម្មការរៀបចំព្រឹត្តិការណ៍អង្គរសង្រ្កាន្តឆ្នាំ២០២៥ កាលពីរសៀលថ្ងៃទី១១ ខែមីនា ឆ្នាំ២០២៥ នៅមជ្ឈមណ្ឌលម៉ានី អគារThe Kampus។ កិច្ចប្រជុំនេះធ្វើឡើងក្នុងគោលបំណងរាយការណ៍អំពីវឌ្ឍនភាពការងាររបស់ក្រុមការងារតាមចង្កោមនីមួយៗ ក៏ដូចជាពិនិត្យ ពិភាក្សា ឆ្លងយោបល់ផ្សេងៗដើម្បីឈានទៅសម្រេចបាននូវការរៀបចំព្រឹត្តិការណ៍អង្គរសង្រ្កាន្ត ដែលនឹងមកដល់ក្នុងពេលឆាប់ៗនេះ។ សូមជម្រាបជូនថា អង្គរសង្ក្រាន្តឆ្នាំ២០២៥នេះ នឹងក្លាយជាឆ្នាំដំបូងដែលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកអង្គរសង្ក្រាន្ត ក្រោមប្រធានបទ «ញញឹមសាទរសង្ក្រាន្តឆ្នាំថ្មី»។ តស់! សាកទស្សន៍ទាយទាំងអស់គ្នា តើអង្គរសង្ក្រាន្តឆ្នាំ២០២៥ នឹងមានអ្វីថ្មីប្លែកខ្លះ?

ក្រសួងបរិស្ថានទប់ស្កាត់ការបំពុលបរិស្ថាន និងការថែរក្សាគុណភាពទឹក ដី ខ្យល់ ឱ្យមានភាពល្អប្រសើរសម្រាប់ការរស់នៅដោយចីរភាព

ភ្នំពេញ ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងថា នៅក្នុងក្របខណ្ឌកិច្ចគាំពារបរិស្ថាន ក្រសួងបរិស្ថានបានយកចិត្តទុកដាក់លើការទប់ស្កាត់ ការកាត់បន្ថយការបំពុលបរិស្ថាន និងការថែរក្សាគុណភាពបរិស្ថានទឹក ដី ខ្យល់ ឱ្យមានភាពល្អប្រសើរសម្រាប់ការប្រើប្រាស់ និងការទ្រទ្រង់ជីវិត ជីវៈចម្រុះ ទាំងក្នុងពេលបច្ចុប្បន្ននិងទៅអនាគត តាមរយៈការដាក់ចេញនូវគោលនយោបាយ ផែនការសកម្មភាព លិខិតបទដ្ឋានច្បាប់ និងវិធានការគ្រប់គ្រងសំណល់ និងសារធាតុបំពុលបរិស្ថាននានា ប្រកបដោយនិរន្តរភាពបរិស្ថាន ដោយមានតម្រូវការជាចាំបាច់នូវការចូលរួមគាំទ្រនិងអនុវត្តពីគ្រប់ភាគីពាក់ព័ន្ធ ឬ ដៃគូអភិវឌ្ឍន៍ទាំងអស់ ដើម្បីធានាថា សំណល់និងសារធាតុគីមីពុលដែលបង្កើត និងបញ្ចេញដោយសកម្មភាពអភិវឌ្ឍន៍ និងភាពរីកចម្រើននៃសង្គមជាតិ គឺត្រូវបានគ្រប់គ្រង និងបានធ្វើប្រព្រឹត្តិកម្មសម្អាតមុនបញ្ចេញទៅក្នុងបរិយាកាស ទឹក ឬ ដី។ប្រសាសន៍ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នារសៀលថ្ងៃទី១១ ខែមីនា ឆ្នាំ២០២៥នេះ ក្នុងឱកាសអញ្ជើញជាអធិបតីក្នុង «កិច្ចប្រជុំលើកទី២ គណៈកម្មការអន្តរក្រសួងក្នុងការសម្របសម្រួលរួមសម្រាប់អនុវត្តគម្រោងស្ដីពី ការពង្រឹងសមត្ថភាពលើការគ្រប់គ្រងការបំពុលទឹក» ដោយមានការអញ្ជើញចូលរួមពី តំណាងក្រសួង ស្ថាប័នពាក់ព័ន្ធថ្នាក់ជាតិ ថ្នាក់ក្រោមជាតិ និងដៃគូរអភិវឌ្ឍន៍ជាច្រើនរូប។ ឯកឧត្តម រដ្មមន្រ្តីបន្ថែមថា ក្រសួងបរិស្ថានក៏បានដាក់ឱ្យអនុវត្តប្រកាស ស្ដីពីការអនុវត្តវិធានស្វ័យត្រួតពិនិត្យនៅតាមប្រភពបំពុលសក្តានុពល ក្នុងគោលបំណងធ្វើទំនើបកម្មការតាមដានការបំពុលបរិស្ថានពីចម្ងាយ លើការបញ្ចេញសំណល់ដែលបង្កហានិភ័យខ្ពស់ដល់បរិស្ថាន ដោយធ្វើការវាស់ស្ទង់បរិមាណនិងកម្រិតសារធាតុបំពុលដែលត្រូវបញ្ចេញចូលបរិស្ថាន និងបញ្ជូនទិន្នន័យមកក្រសួងបរិស្ថានតាមប្រព័ន្ធអនឡាញ (Online) ដោយស្វ័យប្រវត្តិ សំដៅលើកកម្ពស់ប្រសិទ្ធភាពការអនុវត្តច្បាប់ កាត់បន្ថយការបំពុលបរិស្ថាន (ទឹក ដី ខ្យល់) ពីរោងចក្រ សហគ្រាស និងកាត់បន្ថយការចុះត្រួតពិនិត្យផ្ទាល់ពីមន្រ្តីជំនាញដែលអាចបង្កការរំខានដល់អ្នកវិនិយោគ។សូមបញ្ជាក់ថា គម្រោងស្ដីពីការពង្រឹងសមត្ថភាពលើការគ្រប់គ្រងការបំពុលទឹក ជំហានទី២ ត្រូវបានអនុម័តសម្រាប់រយៈពេល ៤ឆ្នាំ ពីឆ្នាំ២០២៣ ដល់ឆ្នាំ២០២៦ ដែលជ្រើសរើសស្ទឹងព្រែកត្នោត ជាតំបន់អនុវត្តគម្រោងបឋម ក្នុងគោលបំណង៖ ១. លើកកម្ពស់ភាពត្រឹមត្រូវ និងជឿជាក់នៃការវិភាគគុណភាពទឹក ដែលអនុវត្តដោយមន្ទីរពិសោធន៍ ដោយការពង្រឹងលើការកែលម្អបច្ចេកទេសដែលបានផ្តួចផ្តើមក្នុងគម្រោងជំហានទី១។២. បង្កើតប្រព័ន្ធត្រួតពិនិត្យគុណភាពទឹក និងប្រព័ន្ធអធិការកិច្ចសំណល់រាវនៅក្នុងតំបន់គោលដៅ ដោយការពង្រីក និងជម្រុញកិច្ចខិតខំប្រឹងប្រែងដែលបានសាកល្បងក្នុងគម្រោងជំហានទី១។៣. ពង្រឹងសមត្ថភាពក្នុងការរៀបចំផែនការគ្រប់គ្រងគុណភាពទឹក ដោយការប្រើប្រាស់សមត្ថភាព និងចំណេះដឹងដែលបានអភិវឌ្ឍន៍អំឡុងពេលគម្រោងជំហានទី១។៤. ចែករំលែកការអនុវត្តល្អៗទាក់ទងនឹងការអនុវត្តអនុក្រឹត្យស្តីពីការគ្រប់គ្រងការបំពុលទឹកជាមួយភាគីពាក់ព័ន្ធ រួមមានអាជ្ញាធរមូលដ្ឋាន និងផ្នែកឯកជន ដើម្បីធានាបាននូវការអនុវត្តមានប្រសិទ្ធភាព។ កញ្ញា MIURA Yoshiko តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) បានឱ្យដឹងថា គម្រោងនេះ គឺជាគំនិតផ្តួចផ្តើមរយៈពេល 3 ឆ្នាំ ដែលបានចាប់ផ្តើមឡើងនៅក្នុងខែកក្កដា ឆ្នាំ2023 ហើយគ្រោងនឹងបញ្ចប់នៅខែកក្កដា ឆ្នាំ2026។ គម្រោងនេះមានគោលបំណងផ្តោតទៅលើការ បង្កើតប្រព័ន្ធតាមដាន និងគ្រប់គ្រងទឹកលើផ្ទៃដី និងទឹកកខ្វក់ ដោយផ្អែកលើអនុក្រឹត្យស្តីពីការ គ្រប់គ្រងការបំពុលទឹក។ ក្នុងរយៈពេលមួយឆ្នាំកន្លងមកនេះ គម្រោងសម្រេចបាននូវ វឌ្ឍនភាពគួរឱ្យកត់សម្គាល់ក្នុងការអភិវឌ្ឍសមត្ថភាពមន្ទីរពិសោធន៍ ការត្រួតពិនិត្យគុណភាព ទឹកលើផ្ទៃដី និងការគ្រប់គ្រងទឹកកខ្វក់។

អគ្គស្នងការដ្ឋាននគរបាលជាតិ បិទបញ្ចប់សវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្ដាឆ្នាំពាក់ព័ន្ធ

(ភ្នំពេញ)៖ អគ្គស្នងការដ្ឋាននគរបាលជាតិ នៅរសៀលថ្ងៃទី១១ ខែមីនា ឆ្នាំ២០២៥នេះ បានបិទបញ្ចប់សវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្ដាឆ្នាំពាក់ព័ន្ធ។ ពិធីបិទសវនកម្មនេះ ត្រូវបានធ្វើឡើងក្រោមអធិបតីភាព លោកឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ និងលោកឧត្តមសេនីយ៍ឯក ឡោ សុឡេង អគ្គស្នងការរង ស្នងការហិរញ្ញកិច្ច និងភស្ដុភារ តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ។ថ្លែងក្នុងឱកាសនោះ លោកឧត្តមសេនីយ៍ឯក ឡោ សុឡេង បានឯកភាពរបាយការណ៍សង្ខេបដែលអានដោយ លោកឧត្តមសេនីយ៍ត្រី ផូ ប៊ុនឡេង អំពីលទ្ធផលសវនកម្ម ដែលបានអនុវត្តរបស់នាយកដ្ឋាន មន្ទីរ អង្គភាព ជំនាញ ចំណុះអគ្គស្នងការដ្ឋាននគរបាលជាតិនាពេលកន្លងមក។ លោកឧត្តមសេនីយ៍ឯក ឡោ សុឡេង បានថ្លែងអំណរគុណយ៉ាងជ្រាលជ្រៅ ចំពោះក្រុមការងារសវនកម្ម និងប្រធាននាយកដ្ឋាន មន្ទីរ អង្គភាពជំនាញ ចំណុះអគ្គស្នងការដ្ឋាននគរបាលជាតិ ដែលបានចូលរួមបង្កលក្ខណៈជិតស្និទ បង្កលក្ខណៈងាយស្រួល ដល់ក្រុមការងារសវនកម្មផ្ទៃ ក្នុងគោលបំណងស្វែងរក ស្វែងយល់អំពីចំណុចខ្លាំងចំណុចខ្សាយ ដើម្បីកែសម្រួលនិងផ្លាស់ប្តូរបទពិសោធន៍ជាមួយគ្នាទៅវិញទៅមក ក្នុងការបំពេញបេសកកម្មរបស់ខ្លួន។លោកឧត្តមសេនីយ៍ឯក ឡោ សុឡេង បានអះអាងថា អគ្គស្នងការដ្ឋាននគរបាលជាតិ បានយកចិត្តទុកដាក់ប្រកបដោយការទទួលខុសត្រូវ និងណែនាំចង្អុលបង្ហាញដល់ នាយកដ្ឋាន មន្ទីរ អង្គភាពជំនាញឲ្យបានខ្ជាប់ខ្ជួននូវរាល់សេចក្តីណែនាំ គោលការណ៍របស់ក្រសួងមហាផ្ទៃ ក៏ដូចជារបស់អគ្គស្នងការដ្ឋាននគរបាលជាតិ។ ពាក់ព័ន្ធការគ្រប់គ្រង និងដឹកនាំកងកម្លាំង ព្រមទាំងការផ្គត់ផ្គង់ភស្តុភារ និងហិរញ្ញវត្ថុ ការគ្រប់គ្រងមធ្យោបាយ ឧបករណ៍បច្ចេកទេស ជូនដល់កងកម្លាំង ដែលរាជរដ្ឋាភិបាល និងក្រសួងមហាផ្ទៃបានបំពាក់ជូននាពេលកន្លងមក សំដៅបម្រើឲ្យកិច្ចប្រតិបត្តិការ និងការពារសន្តិសុខជាតិ និងសណ្តាប់ធ្នាប់សាធារណៈ។លោកបានគូសបញ្ជាក់ថា ចំពោះការគ្រប់គ្រងបញ្ជាកងកម្លាំង បញ្ជាបន្ទាន់ៗរបស់អគ្គស្នងការដ្ឋាននគរបាលជាតិមួយចំនួននាពេលកន្លងមក ដែលតម្រូវឲ្យមានការដឹកនាំប្រកបដោយការបត់បែន ក្នុងភាពជាម្ចាស់ការ និងហេតុការណ៍ដែលកើតមានឡើងជាយថាហេតុ ហើយកិច្ចការទាំងនោះបង្កឲ្យមានចំណុចខ្លាំង ចំណុចខ្សោយក៏ដូចជាបញ្ហាប្រឈម ជាសត្យានុម័ត និងអត្តនោម័តក្នុងពេលដឹកនាំបញ្ជាកងកម្លាំង។ក្នុងនាមកងកម្លាំងនគរបាលជាតិ លោកបានថ្លែងអំណរគុណដល់ក្រុមការងារសវនកម្ម ដែលបានផ្តល់អនុសាសន៍ល្អៗ សម្របសម្រួល និងសហការល្អប្រសើរផ្តល់ជូនដល់ នាយកដ្ឋាន មន្ទីរ អង្គភាពជំនាញ ក្នុងកំឡុងពេលការចុះធ្វើសវនកម្មសំដៅពិនិត្យលើការងារគ្រប់គ្រងកម្លាំង គ្រប់គ្រងទ្រព្យសម្បត្តិរដ្ឋ ការងារផ្គត់ផ្គង់ ភស្តុភារនិងហិរញ្ញវត្ថុ ឲ្យកាន់តែល្អប្រសើរបន្ថែមទៀត។ លោកជឿជាក់ថា ការធ្វើសវកម្មនាពេលនេះ គឺជាការឆ្លុះបញ្ចាំងធ្វើឲ្យមានការកែប្រែថ្មី ក្នុងប្រសិទ្ធភាពការដឹកនាំបញ្ជាកងកម្លាំង ក៏ដូចជាការគ្រប់គ្រងថែរក្សាទ្រព្យសម្បត្តិរដ្ឋ ការងារគ្រប់គ្រងបុគ្គលិក ការងារគ្រប់គ្រងរបបផ្សេងៗ ឲ្យកាន់តែមានតម្លាភាព គណនេយ្យភាព និងប្រសិទ្ធភាពក្នុងការប្រើប្រាស់ធនធានរបស់រដ្ឋ។ជាមួយគ្នានោះ លោកឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង បានបង្ហាញក្តីសោមនស្សរីករាយយ៉ាងក្រៃលែង ដែលបានអញ្ជើញចូលរួមបិទកិច្ចប្រជុំបិទសវនកម្មផ្ទៃ សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ។ លោកបានថ្លែងអំណរគុណ និងសូមកោតសរសើរដោយស្មោះដល់ថ្នាក់ដឹកនាំ នៃអគ្គស្នងការដ្ឋាននគរបាលជាតិ ដែលបានរួមចំណែកសហការ និងជួយសម្របសម្រួល ជាមួយអគ្គនាយកដ្ឋានសវនកម្មផ្ទៃក្នុង ធ្វើឲ្យការងារសវកម្មអាចសម្រេចបានលទ្ធផល ជារបាយការណ៍ប្រកបដោយភាពទទួលខុសត្រូវខ្ពស់ និងមានការព្រមព្រាងទទួលយក ដើម្បីបន្តរួមចំណែកកែលំអជាបន្តបន្ទាប់ទៀត៕

ឃាត់ខ្លួនជនសង្ស័យម្នាក់ ពាក់ព័ន្ធករណីហិង្សាលើក្មួយប្រុសនិងប្រើប្រាស់ដោយខុសច្បាប់ នូវសារធាតុញៀន នៅខណ្ឌច្បារអំពៅ

ភ្នំពេញ ៖ នគរបាលខណ្ឌច្បារអំពៅស្រាវជ្រាវឃាត់ខ្លួនជនសង្ស័យម្នាក់ ពាក់ព័ន្ធករណីហិង្សាលើក្មួយប្រុសនិងប្រើប្រាស់ដោយខុសច្បាប់ នូវសារធាតុញៀន ។នគរបាលប្រាប់ឲ្យដឹងថា បន្ទាប់ពីមានការផ្សព្វផ្សាយព័ត៌មានតាមបណ្តាញសង្គម ជុំវិញករណីហិង្សានៅចំណុចមុខផ្ទះគ្មានលេខ ផ្លូវលំ ភូមិវាលស្បូវ សង្កាត់វាលស្បូវ ខណ្ឌច្បារអំពៅ នៅថ្ងៃទី១១ ខែមីនា ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលវាលស្បូវ បានស្រាវជ្រាវឃាត់ខ្លួនជនសង្ស័យ ម្នាកពាក់ព័ន្ធករណីហិង្សា និងប្រើប្រាស់ដោយខុសច្បាប់ នូវសារធាតុញៀន។ជនសង្ស័យឈ្មោះ សូត្រ សុខថានី ភេទ ប្រុស ជនជាតិខ្មែរ មុខរបរមិនពិតប្រាកដ មានទីលំនៅភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ចំពោះជនសង្ស័យ សមត្ថកិច្ចកំពុងឃាត់ខ្លួនជាបណ្តោះអាសន្ននៅប៉ុស្តិ៍នគរបាលរដ្ឋបាលវាលស្បូវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕ តារាវុទ្ធី

កម្ពុជាស្នើដល់គណៈប្រតិភូចិន ពិនិត្យលទ្ធភាពលើការវិនិយោគកែច្នៃផលិតផលក្នុងវិស័យកសិកម្ម

ភ្នំពេញ ៖ អគ្គលេខាធិការគណៈកម្មាធិការវិនិយោគកម្ពុជា ស្នើដល់គណៈប្រតិភូចិន ពិនិត្យលទ្ធភាពវិនិយោគក្នុងខ្សែច្រវាក់តម្លៃ ក្នុង ឧស្សាហកម្មស្វាយចន្ទីនៅកម្ពុជា និងការបណ្តាក់ទុនវិនិយោគក្នុងវិស័យកសិកម្មផ្សេងទៀត ដូចជាការកែច្នៃកសិផល ពិសេសស្រូវ និងការកែច្នៃជ័រកៅស៊ូសម្រាប់ផ្គត់ផ្គង់ដល់ឧស្សាហកម្មក្នុងស្រុក។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅថ្ងៃទី១១ ខែមីនា ឆ្នាំ២០២៥ នេះ ទទួលជួបគណៈ ប្រតិភូវិនិយោគចិនចំនួន ១៩ ក្រុមហ៊ុន ដឹកនាំដោយលោក Liu Yong (លាវ យ៉ុង) ប្រធានសមាគមអ្នក វិនិយោគវ័យក្មេង នៅខេត្តអ៊ីនណាន ទីក្រុងឃុនមីង សាធារណរដ្ឋប្រជាមានិតចិន ក្រោមការសម្របសម្រួលពីអ្នកឧកញ៉ា លី ឃុនថៃ ប្រធានសមាគម ស្បែកជើងកម្ពុជា។ ក្រុមហ៊ុនទាំង១៩ នេះ មានសកម្មភាពវិនិយោគក្នុងវិស័យកសិកម្ម, សុខាភិបាល, សំណង់ និងអចលនទ្រព្យ, បច្ចេកវិទ្យា, ថាមពល, បោះពុម្ពនិងវេចខ្ចប់, ម្ហូបអាហារ, សណ្ឋាគារ និងបដិសណ្ឋារកិច្ច, ការគ្រប់គ្រងធុរកិច្ច, ការផ្តល់សេវាប្រឹក្សា ផ្នែកច្បាប់, លក់និងសេវាថែទាំរថយន្ត, និងការបណ្តុះបណ្តាលវិជ្ជាជីវៈ មានសមាជិកសរុបចំនួនប្រមាណ ១.៥០០ សហគ្រាស ដោយមានអាជីវកម្មក្នុងវិស័យផ្សេងៗពីគ្នា។ឯកឧត្តមអគ្គលេខាធិការ បានលើកទ្បើងពីចំណងមិត្តភាពដ៏ជិតស្និទ្ធ និងយូរអង្វែងរវាងកម្ពុជានិងចិន ដោយរដ្ឋាភិបាលចិន តែងតែជួយឧបត្ថម្ភគាំទ្រ ដល់ការអភិវឌ្ឍន៍សង្គមសេដ្ឋកិច្ចកម្ពុជា។ ចំណែកក្នុងក្របខណ្ឌកិច្ចសហប្រតិបត្តិការក្នុងការជំរុញការ វិនិយោគ ថ្មីៗនេះកម្ពុជានិងចិន បានចុះអនុស្សារណៈនៃការយោគយល់គ្នាមួយចំនួនដូចជា “ច្រករបៀងឧស្សាហកម្មនិងបច្ចេកវិទ្យា” “ច្រករបៀងមច្ឆានិងអង្ករ”និង "ហេដ្ឋារចនាសម្ព័ន្ធ សេដ្ឋកិច្ចឌីជីថល"ជាដើម។ឯកឧត្តមអគ្គលេខាធិការ ក៏បានគូសបញ្ជាក់ពីស្ថានភាពវិនិយោគនៅកម្ពុជា ដែលមានកំណើនពីមួយឆ្នាំទៅមួយឆ្នាំ ជាពិសេស ប្រភពទុនវិនិយោគមកពីប្រទេសចិន បានឈរនៅលំដាប់លេខរៀងទីមួយ ឬទី២ជាបន្តបន្ទាប់ ក្នុងរយៈពេលជាង១ទសវត្សរ៍ចុងក្រោយ នេះ, ជាក់ស្តែងនៅក្នុងឆ្នាំ២០២៤ ការវិនិយោគមកពីប្រទេសចិនបានរួមចំណែកដល់ទៅប្រមាណ ៥០% នៃទុនវិនិយោគសរុប។ ឯកឧត្តមអគ្គលេខាធិការ ក៏បានលើកឡើងពីការលើកទឹកចិត្តរបស់រាជរដ្ឋាភិបាល ជាពិសេសគម្រោងវិនិយោគក្នុងវិស័យស្វាយចន្ទី នៅកម្ពុជា ក្រោមគំនិតផ្ដួចផ្ដើមដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការបង្កើតសួនឧស្សាហកម្ម ស្វាយចន្ទី ដែលនឹងជួយបង្កើនភាពអំណោយផល នៃបរិយាកាសធុរកិច្ចក្នុងវិស័យអាទិភាពនេះនៅកម្ពុជា។ ជាការឆ្លើយតប លោក Liu Yong បានបង្ហាញនូវចំណាប់អារម្មណ៍ក្នុងការសិក្សា និងស្វែងរកអ្នកផ្គត់ផ្គង់ស្វាយចន្ទី ដែលមាន ស្រាប់ ដើម្បីធ្វើការនាំចេញ ជាក់ស្តែងនាពេលកន្លងមកនេះ លោកក៏បានធ្វើការស្វែងរកអ្នកផ្គត់ផ្គង់ស្វាយចន្ទី ប៉ុន្តែ មិនស្គាល់ពីប្រភព និងបណ្តាញច្បាស់លាស់នៅឡើយ ចំណែកតាមរយៈនៃជំនួបនេះ លោកសង្ឃឹមថា នឹងទទួលបានប្រភពកាន់តែច្បាស់លាស់ ក្នុងនោះ គណៈប្រតិភូដទៃទៀត ក៏បានធ្វើការណែនាំពីសាវតាររបស់ក្រុមហ៊ុននីមួយៗ និងបានបង្ហាញចំណាប់អារម្មណ៍ខ្ពស់ ចំពោះការមក បណ្តាក់ទុនវិនិយោគនៅកម្ពុជា៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្តីស្រមៃពឹងផ្អែកស្រូវសាលីរបស់ប្រជាកសិករអ៊ីរ៉ាក់ត្រូវបានបំផ្លាញដោយសារវិបត្តិទឹក

ពលរដ្ឋលីបង់ស្វាគមន៍រដូវកាលបុណ្យណូអែលជាមួយក្តីសង្ឃឹមថា ព្រះជាម្ចាស់នឹងជួយទប់ស្កាត់សង្រ្គាម

តើយានដ្រូនបានផ្លាស់ប្តូរសង្រ្គាមបែបណាខ្លះនៅក្នុងឆ្នាំ ២០២៥?

ផ្សែងអ័ព្ទយ៉ាងក្រាស់នៅប៉ាគីស្ថាន បង្ខំឲ្យបិទផ្លូវហាយវ៉េសំខាន់ៗជាច្រើនខ្សែនៅខេត្ត Punjab

ចិនបញ្ជាក់ឡើងវិញពីតម្រូវការឲ្យនាយករដ្ឋមន្រ្តីជប៉ុនកែសម្រួលសេចក្តីអត្ថាធិប្បាយលើបញ្ហាកោះតៃវ៉ាន់

ក្រុមហ៊ុនធានារ៉ាប់រង Swiss Re ៖ គ្រោះមហន្តរាយធម្មជាតិធ្វើឲ្យប៉ះពាល់សេដ្ឋកិច្ចសកល ២២០ពាន់លានដុល្លារ ក្នុងឆ្នាំ ២០២៥

សមាជិកកម្លាំងសន្តិសុខ ៣នាក់ នៅអ៊ីរ៉ង់ ត្រូវបានសម្លាប់ អំឡុងការប្រយុទ្ធគ្នា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877