BTV NEWS

សម្ដេចតេជោ ហ៊ុន សែន៖ «ខ្ញុំសួរចៅតីថាចង់ធ្វើអីនៅពេលខាងមុខ? ចៅតីឆ្លើយថា(ចង់រៀន) ជាចម្លើយដែលធ្វើឲ្យខ្ញុំពេញចិត្តបំផុត»

ចៅស្រី ស៊ុន ស្រីតី បានជួប លោកតា សម្ដេចតេជោ ហើយ

ស្ថានឯកអគ្គរាជទូតកម្ពុជាប្រចាំប្រទេសជប៉ុន រៀបចំកម្មវិធីប្រឡងនិយាយភាសាខ្មែរជាលើកទី៨ ឆ្នាំ២០២៥

ស្អែកនេះ ក្រសួងមុខងារសាធារណៈ និងក្រសួងធម្មការ និងសាសនា សហការរៀបចំសិក្ខាសាលាស្តីពី«ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួងធម្មការ និងសាសនា»

ព័ត៌មានជាតិ

អៀរឡង់នឹងពង្រឹងចំណងមិត្តភាពក្នុងតំបន់ ដោយផ្តោតជាពិសេសលើកម្ពុជា

នៅថ្ងៃទី១៣ ខែមិថុនា ឆ្នាំ២០២៤ ឯកឧត្តម សុខ ចិន្តាសោភា ឧបនាយករដ្ឋមន្រ្តី និងជារដ្ឋមន្រ្តីការបរទេស និង សហប្រតិបត្តិការអន្តរជាតិ បានអនុញ្ញាតឱ្យ លោកជំទាវ Deirdre Ní Fhallúin ឯកអគ្គរដ្ឋទូតវិសាមញ្ញ និង ពេញសមត្ថភាពនៃសាធារណរដ្ឋអៀរឡង់ ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងហាណូយ បានចូលជួបសម្តែងការគួរសម នៅទីស្តីការក្រសួង។ឯកឧត្តមឧបនាយករដ្ឋមន្ត្រី និងលោកជំទាវឯកអគ្គរដ្ឋទូត បានកត់សម្គាល់ដោយក្តីពេញចិត្តយ៉ាងខ្លាំងចំពោះទំនាក់ទំនង និងកិច្ចសហប្រតិបត្តិការល្អរវាងកម្ពុជា និងអៀរឡង់ ហើយបានគូសបញ្ជាក់ពីសារសំខាន់នៃការលើកកម្ពស់បន្ថែមទៀតនូវទំនាក់ទំនងរវាងប្រទេសទាំងពីរក្នុងវិស័យដែលនាំមកនូវផលប្រយោជន៍រួម។នាឱកាសនោះ ឯកឧត្តមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលអៀរឡង់ ចំពោះជំនួយដ៏មានតម្លៃ ជាពិសេសលើវិស័យអប់រំ ការដោះមីន និងសុខាភិបាល។ លោកជំទាវឯកអគ្គរដ្ឋទូតបានបញ្ជាក់ពីការប្តេជ្ញាចិត្តរបស់ រដ្ឋាភិបាលអៀរឡង់ក្នុងការធ្វើឱ្យកាន់តែស៊ីជម្រៅនូវទំនាក់ទំនងរបស់ខ្លួនជាមួយបណ្តាប្រទេសក្នុងតំបន់ ជាពិសេសប្រទេស កម្ពុជា ដោយបានគូសបញ្ជាក់បន្ថែមទៀតថា វិស័យអប់រំជាសសរស្តម្ភសំខាន់នៃកម្មវិធីកិច្ចសហប្រតិបត្តិការរបស់អៀរឡង់ ដែលស្របទៅនឹងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា។នាឱកាសនោះដែរ ភាគីទាំងពីរបានសង្កត់ធ្ងន់លើសារសំខាន់នៃការបង្កើតយន្តការពិគ្រោះយោបល់ទ្វេភាគី ឬគណៈកម្មការសេដ្ឋកិច្ចចម្រុះ ដែលនឹងត្រួសត្រាយផ្លូវដើម្បីពង្រឹង និងស្វែងរកវិស័យថ្មីសម្រាប់ភាពជាដៃគូ ជាពិសេសក្នុងការផ្លាស់ប្តូរពាណិជ្ជកម្ម និង សេដ្ឋកិច្ចរវាងប្រទេសទាំងពីរ។ បន្ថែមលើនេះ ភាគីទាំងពីរក៏បានផ្លាស់ប្តូរទស្សនៈលើបញ្ហាតំបន់ និងអន្តរជាតិដែលមានផលប្រយោជន៍ទៅវិញទៅមក៕

នៅថ្ងៃម្សិលមិញ សាលាដំបូងរាជធានីខេត្តចាត់ការករណីក្មេងទំនើងចំនួន ៦ករណី ឃាត់ខ្លួនជនសង្ស័យចំនួន ១៤នាក់

ភ្នំពេញ៖ អ្នកនាំពាក្យក្រសួងយុត្តិធម៌សូមជម្រាបជូនសាធារណជនទាំងអស់ជ្រាបថា នៅថ្ងៃទី១៣ ខែមិថុនា ឆ្នាំ២០២៤ ម្សិលមិញនេះ សាលាដំបូង និងអយ្យការអមសាលាដំបូងរាជធានីខេត្ត បានទទួលចាត់ការលើសំណុំរឿងពាក់ព័ន្ធនឹងករណីក្មេងទំនើងចំនួន ៦ ករណី ដែលមានជនសង្ស័យចំនួន ១៧ នាក់ ហើយតុលាការបានធ្វើការឃាត់ខ្លួនជនសង្ស័យចំនួន ១៤នាក់ និងរត់គេចខ្លួនចំនួន៣នាក់។អ្នកនាំពាក្យក្រសួងយុត្តិធម៌ បានថ្លែងអំណរគុណយ៉ាងជ្រាលជ្រៅដល់អាជ្ញាធរមានសមត្ថកិច្ច ព្រមទាំងសាលាដំបូង និងអយ្យការអមសាលាដំបូងរាជធានីខេត្ត ដែលបានចាត់វិធានការក្នុងការអនុវត្តច្បាប់យ៉ាងម៉ឺងម៉ាត់ក្នុងសំណុំរឿងពាក់ព័ន្ធករណីក្មេងទំនើងប្រកបដោយស្មារតីយកចិត្តទុកដាក់ និងការទទួលខុសត្រូវខ្ពស់ដើម្បីការការពារសន្តិសុខ និងសុវត្ថិភាពរបស់សង្គមជាតិ ព្រមទាំងភាពសុខសាន្តរបស់ប្រជាពលរដ្ឋ។អ្នកនាំពាក្យក្រសួងយុត្តិធម៌ ក៏បានអំពាវនាវដល់ឪពុកម្តាយ ព្រមទាំងអាណាព្យាបាលទាំងអស់ ត្រូវខិតខំតាមដាន អប់រំ និងទូន្មានប្រៀនប្រដៅដល់កូនៗ ឱ្យដើរតាមគន្លងត្រឹមត្រូវវៀរចាកនូវអំពើអបាយមុខ ដើម្បីក្លាយជាពលរដ្ឋល្អសម្រាប់សង្គមជាតិ។ អ្នកនាំពាក្យអំពាវនាវដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ សូមប្រកាន់ខ្ជាប់នូវវិន័យ សីលធម៌ និងសេចក្តីថ្លៃថ្នូរ ហើយសូមជៀសវាងពីសកម្មភាពទាំងឡាយណា ដែលបង្កអន្តរាយដល់ខ្លួន គ្រួសារ និងសង្គមជាតិ៕

ស្លាប់៧នាក់ និងរបួសធ្ងន់ម្នាក់ ក្នុងហេតុការណ៍គ្រោះថ្នាក់ចរាចរណ៍នៅស្រុកត្បូងឃ្មុំ

ត្បូងឃ្មុំ៖ រថយន្ត២គ្រឿងបុកគ្នាពេញទំហឹងលើកំណាត់ផ្លូវជាតិលេខ៧១C បណ្តាលឱ្យមនុស្ស ៧នាក់បានស្លាប់ និងម្នាក់នាក់រងរបួសធ្ងន់ ក្នុងហេតុការណ៍ កើតឡើងនៅថ្ងៃទី១៤ ខែមិថុនា ឆ្នាំ២០២៤ វេលាម៉ោង០៤ និង៣០នាទីទាបភ្លឺ ស្ថិតនៅភូមិព្រះអង្គ ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ ។ប្រភពពីសមត្ថកិច្ច បានឲ្យដឹងថា ហេតុការណ៍នេះ បង្កដោយរថយន្តម៉ាក ហ៊ីយ៉ិនដាយ ពណ៌ស ពាក់ផ្លាកលេខ កំពង់ធំ 3A-3053 បើកបរដោយឈ្មោះ ឈាង ហ៊ាង ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិសំរោង ឃុំទំរីង ស្រុកសណ្តាន់ ខេត្តកំពង់ធំ បុកជាមួយ រថយន្តម៉ាកហ៊ីយ៉ិនដាយ ពណ៌ទឹកប្រាក់ ពាក់ផ្លាក់លេខ ត្បូងឃ្មុំ 3A-4487 មិនស្គាល់ឈ្មោះ ។ ប្រភពដដែលឲ្យដឹងទៀតថា រថយន្តទាំង២ បើកបរមានទិសដៅ បញ្រ្ចាសទិសគ្នា រថយន្តពាក់ផ្លាកលេខ កំពង់ធំ 3A-3053 បើកបរមកពីជើងទៅត្បូងប្រើប្រាស់ល្បឿន ទៅបុករថយន្ត ពាក់ស្លាកលេខ ត្បូងឃ្មុំ 3A-4487 បើកបរមកពីត្បូងទៅជើង បណ្តាលអោយរថយន្តទាំង០២គ្រឿង ខូចខាតធ្ងន់ធ្ងរ និងមានមនុស្សស្លាប់ចំនួន០៥នាក់ភ្លាមៗនៅកន្លែងកើតហេតុ និងរងរបួសធ្ងន់ចំនួន០៣នាក់ លុះបញ្ជូនទៅមន្ទីពេទ្យមិត្តភាពកម្ពុជា.ចិន បានស្លាប់នៅមន្ទីពេទ្យចំនួន២នាក់បន្ថែមទៀត សរុបស្លាប់៧នាក់ របួសធ្ងន់១នាក់។ បន្ទាប់ពីកើតហេតុសមត្ថកិច្ចមូលដ្ឋានជំនាញចរាចរណ៍ ចុះមកដល់វាស់វែង និងធ្វើកំណត់ហេតុយករថយន្តទាំងពីរគ្រឿង ទៅរក្សាទុករង់ចាំឲ្យភាគីសងខាងដោះស្រាយគ្នាតាមច្បាប់ ៕

រដ្ឋមន្រ្ដីក្រសួងធនធានទឹក៖ ប្រព័ន្ធធារាសាស្ត្រដោះទឹកស្ទឹងព្រែកត្នោជាគម្រោងប្រវត្តិសាស្ត្រដ៏ធំមួយទៀតរបស់កម្ពុជា

ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងថា ប្រព័ន្ធធារាសាស្ត្រដោះទឹកស្ទឹងព្រែកត្នោជាគម្រោងប្រវត្តិសាស្ត្រដ៏ធំមួយទៀតរបស់កម្ពុជា។ឯកឧត្តម ថោ ជេដ្ឋា បានឱ្យដឹងថា ការអនុវត្តគម្រោងដោះទឹកនេះ មានស្ថាប័នអនុវត្តចំនួនបីចូលរួម គឺក្រសួងធនធានទឹក និងឧតុនិយម អនុវត្តការងារផ្នែកខាងក្រៅធ្វើយ៉ាងណា បង្វែរទឹកភ្លៀងធ្លាក់ពីលើក្នុងបរិមាណទឹកដ៏ច្រើន និងផ្ទៃរងតំបន់ជុំវិញ កុំឱ្យធ្លាក់ទៅលិចរាជធានីភ្នំពេញ។ ចំណែកក្រសួងសាធារណការ និងដឹកជញ្ជូន និងសាលារាជធានី ទទួលបន្ទុកដោះទឹកចេញពីផ្ទៃក្នុងរាជធានី ភ្នំពេញ ដើម្បីដោះទឹកចេញទៅតាមប្រព័ន្ធដែលក្រសួងធនធានទឹក និងឧតុនិយមកំពុងអនុវត្ត។ឯកឧត្តមបន្តថា ក្រោយពីការជួសជុលស្តារនៃគម្រោងប្រព័ន្ធរំដោះទឹក បញ្ចៀសទឹក និងពង្វាងទឹកចេញពីតំបន់រាជធានី និងក្រុងតាខ្មៅ និងតំបន់រណបទាំងនេះបានបញ្ចប់ រាជរដ្ឋាភិបាលរំពឹងថា នឹងលែងមានហានិភ័យទឹកជំនន់លិច ជុំវិញភ្នំពេញ ខេត្តកណ្តាល និងតំបន់ដើមឬស កំពង់ទួល ផ្លូវជាតិលេខ៣ តទៅទៀតនៅក្នុងរដូវវស្សា។ សូមជម្រាបថា តាមរយៈប្រព័ន្ធធារាសាស្ត្រដោះទឹកស្ទឹងព្រែកត្នោនេះ ប្រជាជនលែងលំបាកពីការលិចលង់ អាជីវកម្មមានស្ថិរភាព លើកកម្ពស់កម្រិតជីវភាពរស់ នៅប្រចាំថ្ងៃ ជួយដល់ការអភិវឌ្ឍសេដ្ឋកិច្ចជាតិ និងជួយដោះស្រាយបញ្ហាខ្វះទឹកដែលតែងតែកើតមាននៅ រដូវប្រាំងដល់តំបន់ជុំវិញ រួមមានខេត្តកំពង់ស្ពឺ ខេត្តកណ្តាល និងខេត្តតាកែវ ប្រកបដោយស័ក្តិសិទ្ធិភាព និងនិរន្តរភាពព្រមទាំងជួយសម្រេចបានចក្ខុវិស័យកម្ពុជាឆ្នាំ២០៣០។ ប្រព័ន្ធទាំងនេះក៏នឹងក្លាយជាតំបន់ ទេសចរណ៍របស់ប្រជាពលរដ្ឋនៅខេត្តកំពង់ស្ពឺ ខេត្តកណ្តាល ក្រុងតាខ្មៅ តំបន់រាជធានីភ្នំពេញ ហើយក៏ជា មរតករបស់សម្តេចមហាបវរធិបតី ហ៊ុន ម៉ាណែត ទុកជូនកូនចៅជំនាន់ក្រោយផងដែរ៕ អត្ថបទ៖វ៉ន ដារ៉ា

ពលរដ្ឋសាទរចំពោះប្រព័ន្ធដោះទឹកជំនន់ចេញពីភ្នំពេញ និងតំបន់រណប ស្ទឹងព្រែកត្នោត

រាជរដ្ឋាភិបាល បាននឹងកំពុងកសាងកែលម្អប្រព័ន្ធធារាសាស្ត្រយ៉ាងរឹងមាំ ក្នុងគោលដៅសំខាន់រំដោះ ពង្វាងទឹកជំនន់មិនឱ្យជន់លិច រាជធានីភ្នំពេញ និងតំបន់រណប។ ការស្ថាបនាលើប្រព័ន្ធធារាសាស្ត្រនេះ ទទួលបានការសាទរជាខ្លាំងពីប្រជាពលរដ្ឋ ពិសេស ពលរដ្ឋដែលតែងមានការព្រួយបារម្ភពីការជន់លិចជារៀងរាល់ឆ្នាំ។ការស្ថាបនាប្រព័ន្ធធារាសាស្ត្រ ដើម្បីរំដោះពង្វាងទឹកជំនន់ មិនឱ្យជន់លិច រាជធានីភ្នំពេញ និងតំបន់រណប បាននឹងកំពុងចាប់ផ្ដើម។ គម្រោងនេះ ចាប់ផ្ដើមតាំងពីភូមិសាស្ត្រ ខេត្តកំពង់ស្ពឺ ឆ្លងកាត់ស្រុកកណ្ដាលស្ទឹង ខេត្ត កណ្ដាល ក៏ដូចជាការស្ថាបនាក្នុងភូមិសាស្ត្រក្នុងខណ្ឌដង្កោ រាជធានីភ្នំពេញ និងការស្ថាបនានៅប្រព័ន្ធធារាសាស្ត្រ នៅព្រែកហូរ ក្រុងតាខ្មៅ ខេត្តកណ្ដាល។គម្រោងស្ថាបនាប្រព័ន្ធធារាសាស្ត្រនេះ ជាការប្រែមុខមាត់ថ្មី ជាគម្រោងផ្ដល់ស្នាមញញឹមដល់ប្រជាពលរដ្ឋគ្រប់រូប។ ជាក់ស្ដែងសម្រាប់ពលរដ្ឋ រស់នៅតាមបណ្ដោយប្រព័ន្ធទឹកនៅ ភូមិសាស្ត្រសង្កាត់ ព្រែកហូរ លើកឡើងថា ការស្ថាបនានេះ គឺមានភាពរឹងមាំ ផ្លាស់ប្ដូរពីស្ទឹងដែលពោពេញដោយ ដើមឈើ សំរាម តូចចង្អៀត ទៅជាប្រព័ន្ធធារាសាស្ត្រ ដែលមានសោភ័ណ្ឌភាព ធំទូលាយ រឹងមាំ ដោយរាបថ្ម ចាក់បេតុងយ៉ាងស្រស់ស្អាត។សមិទ្ធផលនេះផ្ដល់ជាទំនុកចិត្ត សម្រាប់ពួកគាត់។ ទំនុកចិត្តព្រោះលែងព្រួយបារម្ភ ពីបញ្ហាទឹកជំនន់ ដូចកាលពីមុន។ប្រព័ន្ធធារាសាស្ត្រដែលកំពុងស្ថាបនានេះ មាននៅបីទីតាំងសំខាន់ៗ។ ទីតាំងទី ១ គឺប្រព័ន្ធស្ទឹងតូច ដែលជួយដកទឹកចេញពីស្ទឹងព្រែកត្នោត ត្រង់ចំណុច ឃុំ រលាំងចក និងឃុំរលាំងគ្រើល ស្រុកសំរោង កាត់ ស្រុកគងពីសី ខេត្ត កំពង់ស្ពឺ និងកាត់ស្រុកកណ្តាលស្ទឹង ខេត្តកណ្តាល។ ទី២ ជាប្រព័ន្ធប្រឡាយជើងឯក ស្ថិតក្នុងភូមិសាស្ត្រ ខណ្ឌនដង្កោ រាជធានីភ្នំពេញ និងទី ៣ ជាប្រព័ន្ធធារាសាស្ត្រនៅព្រែកហូរ ដែលអាចដកទឹកចេញពីស្ទឹងព្រែកត្នោត ត្រង់ចំណុច ក្រុងតាខ្មៅ៕ អត្ថបទ៖ គឹម ហុក

១៤ថ្ងៃនៃយុទ្ធនាការ «១ម៉ឺនរៀល ១ម៉ឺននាក់» ទទួលបានការបរិច្ចាគពីពលរដ្ឋជាង១លាន ៥៧ម៉ឺនដុល្លារ

គិតចាប់ពីបើកយុទ្ធនាការ «១ម៉ឺនរៀល ១ម៉ឺននាក់» ចាប់ពីថ្ងៃទី១ រហូតត្រឹមព្រឹកថ្ងៃទី១៤ ខែមិថុនា ឆ្នាំ២០២៤នេះ មូលនិធិគន្ធបុប្ផាកម្ពុជា ទទួលបានការរិច្ចាគពីសប្បុរសជនមកពីគ្រប់ទិសទីចំនួនប្រមាណជាង ១៤ ម៉ឺននាក់ គិតជាទឹកប្រាក់ចំនួនប្រមាណ ១លាន ៥៧ម៉ឺនដុល្លារ។ក្នុងបទសម្ភាសន៍ជាមួយព័ត៌មាន ប៊ីធីវី លោក ឃាន តួក ប្រធានផ្នែកទំនាក់ទំនងសាធារណៈនៃមូលនិធិគន្ធបុប្ផាកម្ពុជា បានមានប្រសាសន៍ឲ្យដឹងថា យុទ្ធនាការ «១ម៉ឺនរៀល ១ម៉ឺននាក់»នេះ មានរយៈពេលពេញ ១ខែមិថុនានេះ ក្នុងគោលបំណងចម្បងចំនួន២ គឺដើម្បីលរួមអបអរសាទរទិវាកុមារអន្តរជាតិ ១មិថុនា និងការបំផុសស្មារតី «ខ្មែរជួយខ្មែរ» តាមរយៈការអំពាវនាវឱ្យមានការចូលរួមបរិច្ចាគជូនមូលនិធិគន្ធបុប្ផាកម្ពុជា ដើម្បីរួមគ្នាផ្តល់ក្តីស្រលាញ់ដល់កុមារនៅកម្ពុជា។លោកបានបន្តថា គណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំក្រសួង-ស្ថាប័ន, រដ្ឋបាលរាជធានី-ខេត្ត និងក្រុមហ៊ុន-សហគ្រាសសំខាន់ៗ ក៏បាននិងកំពុងរៀបចំចលនាកៀរគរការបរិច្ចាគ ដើម្បីចូលរួមគាំទ្រយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ របស់មូលនិធិគន្ធបុប្ផាកម្ពុជានេះផងដែរ។ក្រុមប្រជាពលរដ្ឋមកពីតំបន់ខុសៗគ្នារាជធានី ខេត្ត ដែលកំពុងរងចាំគ្រូពេទ្យពិនិត្យ និងព្យាបាលកុមារ បានសម្តែងការអរគុណជូនចំពោះសប្បុរសជននានា និងថ្នាក់ដឹកនាំគ្រប់ជាន់ថ្នាក់ដែលបានចូលរួមបរិច្ចាគជាថវិកាដើម្បីទ្រទ្រង់មន្ទីរពេទ្យឲ្យដំណើរការទៅមុខបន្តទៀត។ ក្រុមប្រជាពលរដ្ឋ បានលើកឡើងស្រដៀងគ្នាទៀតថាបើគ្មានមន្ទីរពេទ្យគន្ធបុប្ជានេះទេ កូនៗ ក៏ដូចជាក្មេងដទៃទៀតក៏មិនអាចជាសះស្បើយពីជម្ងឺ ឬឈានដល់បាត់បង់ជីវិតថែមទៀតមូលហេតុដោយសារជីវភាពមានការខ្វះខាត។សូមបញ្ជាក់ថា ពិធីបើកយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ ត្រូវបានធ្វើឡើងកាលពីថ្ងៃទី១ ខែមិថុនា ឆ្នាំ២០២៤ កន្លងទៅ ក្រោមអធិបតីដ៏ខ្ពង់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា។ នាឱកាសនោះលោកជំទាវបណ្ឌិត បានថ្លែងថា «ការរក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផា ជាភារកិច្ចរួមរបស់ពលរដ្ឋកម្ពុជាគ្រប់រូប»៕អត្ថបទ ឈិត បូរ៉ាវី

ក្រុមប្រឹក្សាថ្មីសន្យាជំរុញការផ្តល់សេវាសាធារណៈ និងតាមដានបញ្ហាសន្តិសុខ ក្នុងសហគមន៍ឱ្យបានល្អ

ក្រុមប្រឹក្សាអាណត្តិថ្មី ដែលទើបជាប់ឆ្នោតនៃការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ កាលពីថ្ងៃទី២៦ ខែឧសភា ឆ្នាំ២០២៤នេះ បានសន្យាជំរុញដល់ការផ្តល់សេវាសាធារណៈរបស់អាជ្ញាធរ និងតាមដានពាក់ព័ន្ធការគ្រប់គ្រងបញ្ហាសន្តិសុខក្នុងសហគមន៍ឱ្យបានល្អ។ថ្លែងប្រាប់ BTV នៅថ្ងៃទី១៤ ខែមិថុនា ឆ្នាំ២០២៤នេះ ក្រុមប្រឹក្សាដែលទើបចូលកាន់តំណែងកាលពីថ្មីៗនេះបានឱ្យដឹងថា បន្ទាប់ពីទទួលបានការប្រកាសទទួលស្គាល់ជាក្រុមប្រឹក្សា អាណត្តិទី៤ សមាជិកក្រុមប្រឹក្សាក្នុងខណ្ឌ៧មករា រាជធានីភ្នំពេញ បានបង្ហាញការរីករាយ និងពេញចិត្តដើម្បីត្រៀមខ្លួនក្នុងការបំពេញតួនាទី និងភារកិច្ចរបស់ខ្លួនជាមួយរដ្ឋបាល ក៏ដូចជាអាជ្ញាធរមានសមត្ថកិច្ចសំដៅបម្រើប្រជាពលរដ្ឋក្នុងមូលដ្ឋាន។ ក្នុងនោះ សមាជិកក្រុមប្រឹក្សា លោក សៅ ដារិទ្ធ និងលោក ថោង ម៉ារឌី បានប្តេជ្ញាចិត្តក្នុងការជំរុញ និងតាមដានដល់ការងារផ្តល់សេវាសាធារណៈជូនប្រជាពលរដ្ឋឱ្យបន្តមានប្រសិទ្ធភាព គុណភាព និងបញ្ហាសង្គមមូលដ្ឋានធានាបានសន្តិសុខសណ្តាប់ធ្នាប់បងប្អូនប្រជាពលរដ្ឋមូលដ្ឋាន។ជាមួយគ្នានេះលោកស្រី ហ៊ុន សុភី លើកឡើងថាក្នុងនាមស្រ្តីជាសមាជិកក្រុមប្រឹក្សាមួយរូបនឹងចូលរួមចំណែកក្នុងការលើកកម្ពស់សិទ្ធិ និងកុមារ ជាពិសេសទប់ស្កាត់ និងប្រយុទ្ធប្រឆាំងមិនឱ្យមានការជួយដូរ និងការប្រើប្រាស់អំពើហិង្សាលើស្រ្តី។សូមជម្រាបថា យោងតាមច្បាប់របស់ក្រុមប្រឹក្សា គឺក្រុមប្រឹក្សានីមួយៗ ត្រូវធ្វើជាតំណាង និងធ្វើសកម្មភាពក្នុងនាមជាប្រជាពលរដ្ឋទាំងអស់ ដែលរស់នៅក្នុងដែនសមត្ថកិច្ចរបស់ខ្លួន។ ក្នុងនោះក្រុមប្រឹក្សា ត្រូវបង្កើតជំរុញ និងធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យ នៅក្នុងដែនសមត្ថកិច្ចរបស់ខ្លួន។ លើសពីនេះ ក្រុមប្រឹក្សាមានតួនាទីចាត់ចែងកិច្ចការចាំបាច់នានាដើម្បីសម្រេចនូវគោលបំណងក្នុងការបង្កើតការជំរុញ និងការធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យ។ សូមជម្រាបថា គិតមកដល់ពេលនេះ តាមបណ្តារាជធានី-ខេត្តជាច្រើនបានប្រកាសចូលកាន់តំណែងក្រុមប្រឹក្សារាជធានី ខេត្ត ក្រុង ស្រុក និងខណ្ឌរួចរាល់ ដើម្បីឈានទៅរកការរៀបចំកិច្ចប្រជុំដំបូង និងកិច្ចប្រជុំវិសាមញ្ញរបស់ខ្លួនទៅការសម្រេចរបស់រាជធានី ខេត្តនីមួយៗ៕ អត្ថបទ សេក ឧត្តម

លោកជំទាវ ចម និម្មល ដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យ ស្តីពីការកំណត់លក្ខខណ្ឌអប្បបរមា សម្រាប់ការទិញលក់ភេសជ្ជៈគ្រឿងស្រវឹងក្នុងព្រះរាជាណាចក្រកម្ពុជា

ភ្នំពេញ៖ នាព្រឹកថ្ងៃសុក្រ ទី១៤ ខែមិថុនា ឆ្នាំ២០២៤ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអញ្ជើញដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការកំណត់លក្ខខណ្ឌអប្បបរមាសម្រាប់ការទិញលក់ភេសជ្ជៈគ្រឿងស្រវឹងក្នុងព្រះរាជាណាចក្រកម្ពុជា ដោយមានការអញ្ជើញចូលរួមពីឯកឧត្តម លោកជំទាវថ្នាក់ដឹកនាំក្រសួងពាណិជ្ជកម្ម ព្រមទាំងក្រុមប្រឹក្សានីតិកម្ម ដើម្បីពិនិត្យ ពិភាក្សា និងផ្ដល់ធាតុចូលលើសេចក្ដីព្រាងអនុក្រឹត្យខាងលើ ដើម្បីធានាឱ្យមានលក្ខណៈគ្រប់ជ្រុងជ្រោយ។

ឯកឧត្តម ហ៊ុន ម៉ានី តំណាងសម្តេចធិបតី អញ្ជើញប្រកាសតែងតាំង និងស្រោចស្រពព្រះសុគន្ធវារី ប្រគេនព្រះចៅ អធិការវត្តហរិរក្សរាជិនី (ហៅវត្តវាំងចាស់) ខេត្តកំពង់ស្ពឺ

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីប្រកាសតែងតាំង និងស្រោចស្រពព្រះសុគន្ធវារី ប្រគេនព្រះចៅ អធិការវត្តហរិរក្សរាជិនី (ហៅវត្តវាំងចាស់) និងព្រះមន្ត្រីសង្ឃ ស្ថិតក្នុងសង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ, នាព្រឹកថ្ងៃសុក្រ ទី១៤ ខែមិថុនា ឆ្នាំ២០២៤នេះ។និមន្ត/អញ្ជើញរួមាន សម្ដេចឧត្តមវង្សា កិត្តិបណ្ឌិត មួង រ៉ា ព្រះសង្ឃនាយករងទី៣ ព្រះថេរានុថេរៈ ឯកឧត្តម លោកជំទាវ សមាជិកព្រឹទ្ធសភា រដ្ឋសភា ឯកឧត្តមរដ្ឋមន្ត្រីក្រសួងធម្មការ និងសាសនា មន្រ្តីរាជការបងប្អូនប្រជាពលរដ្ឋ និងពុទ្ធបរិស័ទទាំងអស់ ចំនួន ៧៧៥ អង្គ/នាក់។ ថ្លែងទៅកាន់អង្គពិធីឯកឧត្តម ហ៊ុន ម៉ានី បានចូលរួមអបអរសាទរ ជាមួយព្រះសង្ឃគ្រប់ព្រះអង្គដែលគង់នៅទីអារាមវត្តដ៏ចំណាស់នេះ ជាពិសេស ព្រះឥន្ទសិរីវង្ស តាម វិបុល ដែលត្រូវបានតែងតាំងជាព្រះចៅអធិការថ្មីនៃវត្តហរិរក្សរាជនី ហៅវត្តរាំងចាស់។ជាមួយគ្នានេះ ឯកឧត្តមបានកោតសរសើរ និងថ្លែងអំណរគុណដោយស្មោះចំពោះព្រះថេរានុថេរៈគ្រប់ព្រះអង្គ លោកតា លោកយាយ ពុទ្ធបរិស័ទ និងសប្បុរសជនជិតឆ្ងាយ ដែលបានរួមចំណែកចាប់មគ្គផលកសាងសមិទ្ធផលនានាក្នុងវត្ត ហើយឯកឧត្តមសង្ឃឹមយ៉ាងមុតមាំថា ក្រោមការដឹកនាំរបស់ព្រះគ្រូចៅអធិការវត្តថ្មី នឹងធ្វើឱ្យវត្តអារាមនេះកាន់តែមានភាពសុខដុម និងអភិវឌ្ឍរីកចម្រើនទៅមុខជាបន្តបន្ទាប់បន្ថែមទៀត។ឯកឧត្តម ឧបនាយករដ្ឋមន្រ្តី បានបន្ថែមថា ជាក់ស្តែងវត្តវាំងចាស់ដែលមានអាយុកាល ១៧០ឆ្នាំ និងមានផ្ទុកទៅដោយគម្ពីរ ដីកា ទាំងភាសាបាលី និងសម្រាយ ជាកន្លែងសាបព្រោះចំណេះដឹងក្នុងព្រះពុទ្ធសាសនា ចងវេញជាធ្លុងសាមគ្គីភាពរបស់ប្រជាជាតិខ្មែរ ដើម្បីចូលរួមចំណែកការពារ អភិរក្ស វប្បធម៌ ប្រពៃណី អក្សរសាស្ត្រ អត្តសញ្ញាណជាតិ និងបុព្វហេតុសង្គមជាតិ គ្រប់ៗជំនាន់។ ជាអកុសល សមិទ្ធផលជាច្រើនត្រូវបានរងការបំផ្លិចបំផ្លាញស្ទើរគ្មានសល់នាសម័យសង្គ្រាម។ ទន្ទឹមនឹងនេះ ឯកឧត្តមឧបនាយករដ្ឋមន្រ្តីបានរំលេចអំពីភាពសំខាន់ នៃកត្តាសុខសន្តិភាពដែលកើតចេញពី ថ្ងៃជ័យជម្នះ៧ មករា ដែលបានសង្រ្គោះអាយុជីវិតរបស់ប្រជាជនខ្មែរចេញពីគ្រោះមរណៈ និងបានផ្តល់ជាឱកាសឱ្យគ្រប់សាសនាទាំងអស់នៅកម្ពុជា ជាពិសេសព្រះពុទ្ធសាសនា បានរស់រានឡើងវិញ កសាងបានជាសមិទ្ធផលថ្មីៗ និងបានរីកចម្រើនជាបន្តបន្ទាប់រហូតមកដល់សព្វថ្ងៃនេះ៕អត្ថបទ រដ្ឋា/

សម្ដេចធិបតី៖ ប្រព័ន្ធធារាសាស្ត្ររំដោះទឹកស្ទឹងព្រែកត្នោត នឹងផ្ដល់ទឹកខួបប្រាំងខួបវស្សាដល់កសិករ

ក្នុងឱកាសអញ្ជើញពិនិត្យប្រព័ន្ធធារាសាស្ត្ររំដោះ និងពង្វាងទឹកស្ទឹងព្រែកត្នោត នៅព្រឹកថ្ងៃទី១៤ ខែមិថុនា ឆ្នាំ២០២៤នេះសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា ប្រព័ន្ធធារាសាស្ត្ររំដោះទឹកស្ទឹងព្រែកត្នោតនេះ ពិតជាមានសារសំខាន់ណាស់ក្រៅពីរំដោះទឹកចេញពីរាជធានីភ្នំពេញ និងតំបន់ជាយក្រុងមួយចំនួន ប្រព័ន្ធធារាសាស្ត្រនេះ ក៏នឹងក្លាយជាប្រភពផ្ដល់ទឹកខួបប្រាំងខួបវស្សា ដល់ប្រជាកសិករក្នុងការបង្កបង្កើនផលដំណាំផងដែរ។ សម្ដេចធិបតី នាយករដ្ឋមន្រ្ដី មានប្រសាសន៍ថា ប្រព័ន្ធធារាសាស្ត្ររំដោះទឹកស្ទឹងព្រែកត្នោតនេះ មិនមែនផ្ដល់ផលតែរាជធានីភ្នំពេញប៉ុណ្ណោះទេ តែក៏បានជួយស្រោចស្រង់តំបន់ដែលធ្លាប់ជន់លិចជាង ៣០ ម៉ឺនហិកតា ដែលធ្លាប់រងផលប៉ះពាល់ដល់ស្រែចម្ការ លំនៅដ្ឋាន និងតំបន់រោងចក្រមួយចំនួនទៀតផងដែរ ស្ថិតក្នុងភូមិសាស្រ្ដរាជធានីភ្នំពេញ ខេត្តកណ្ដាល និងខេត្តកំពង់ស្ពឺ។ ក្នុងឱកាសនោះសម្ដេចធិបតី ហ៊ុន ម៉ាណែត បានបញ្ជាក់ដែរថា គម្រោងប្រព័ន្ធរំដោះទឹក និងពង្វាងទឹកជំនន់ចេញពីភ្នំពេញ និងតំបន់រណបនេះ បានចំណាយថវិកាសាងសង់ និងស្ដារឡើងវិញជាង ៤០០ លានដុល្លារ។ ប្រព័ន្ធធារាស្រ្ដនេះ ក្រៅពីរំដោះជំនន់នៅភ្នំពេញ ក៏នឹងជួយរំដោះជំនន់ក្នុងតំបន់នៅតាមបណ្ដោយប្រឡាយផងដែរ ហើយព្រមទាំងផ្ដល់ប្រយោជន៍ ជាច្រើនទៀត រួមទាំងជួយផ្ដល់ទឹកសម្រាប់ធ្វើចម្ការស្រែ ផ្ដល់ជាផ្លូវថ្នល់សម្រា ប់ពលរដ្ឋធ្វើដំណើរ និងវិស័យទេសចរណ៍ផងដែ៕អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

ចៅស្រី ស៊ុន ស្រីតី បានជួប លោកតា សម្ដេចតេជោ ហើយ

[UPDATE] មានអ្នកស្លាប់ ៩នាក់ ខណៈអ្នកបើកបរត្រូវបានចាប់ខ្លួន ក្រោយរថយន្តបើកបុកចូលហ្វូងមនុស្ស

លោក Lee Jae-myung បេក្ខជននាំមុខសម្រាប់តំណែងប្រធានាធិបតីកូរ៉េខាងត្បូង ឈ្នះការបោះឆ្នោតក្នុងបក្ស

ប្រមុខបក្ស NR ត្រៀមចូលប្រជែងតំណែងប្រធានាធិបតីឆ្នាំ២០២៧ បើលោកស្រី Le Pen ខកខាន

លោក Trump៖ នាវារបស់អាមេរិក គួរតែបានឆ្លងកាត់ព្រែកជីក Panama និង Suez ដោយមិនបាច់បង់ថ្លៃ

«កេសរកូលព្រះទ្រហឹង» ប្រភេទកេសរកូលធំជាងគេលើសកលលោក

អ៊ីរ៉ង់ និងអាមេរិក ពិភាក្សាកម្រិតអ្នកជំនាញជាច្រើនម៉ោង នៅអូម៉ង់ ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877