BTV NEWS

ពិធីប្រកាសចូលកាន់មុខតំណែងចៅអធិការវត្តចំនួន២៥វត្ត និងស្រោចស្រពសុគន្ធវារី

កោះទំហំជិត៤ហិកតាក្នុងស្រុកបាកាន ត្រូវបានបញ្ចុះបឋមសិលាអភិវឌ្ឍន៍ទៅជាឧទ្យានបាកាន កោះនៃការត្រាស់ដឹង

ឯកអគ្គរដ្ឋទូតនៃសាធារណរដ្ឋហ្វីលីពីនប្រចាំកម្ពុជា សន្យាចូលរួមលើកកម្ពស់វិស័យវប្បធម៌ជួយដល់កម្ពុជា

សម្តេច ឃួន សុដារី ណែនាំឱ្យចលនាស្រ្តីគណបក្សចូលរួមលើកិច្ចការគាំពារសង្គម ដើម្បីគាំទ្រយេនឌ័រ

ព័ត៌មានជាតិ

រដ្ឋបាលខេត្តបាត់ដំបង កំពុងតាមដាន និងស្រាវជ្រាវករណីសារធាតុពណ៌បៃតងអណ្ដែតលើផ្ទៃទឹកស្ទឹងសង្កែ

ឯកឧត្ដម សុខ លូ អភិបាលខេត្តបាត់ដំបង ចាត់តាំងក្រុមការងាររដ្ឋបាលខេត្ត ដឹកនាំដោយលោក សឿម ប៊ុនរិទ្ធិ អភិបាលរងខេត្តសហការជាមួយមន្ទីរជំនាញនិងអាជ្ញាធរមូលដ្ឋានបន្តចុះស្រាវជ្រាវករណីសារធាតុពណ៌បៃតងអណ្ដែតលើផ្ទៃទឹកស្ទឹងសង្កែ។ ការចុះស្រាវជ្រាវជាបន្តបន្ទាប់នេះ ធ្វើឡើងក្រោយមានប្រជានេសាទ បានប្រទះឃើញសារធាតុពណ៌បៃតង ស្រដៀងទៅនឹងស្លែ អណ្ដែតលើផ្ទៃទឹកស្ទឹងសង្កែ នៅផ្នែកខាងក្រោមទំនប់ពហុបំណងសេកសក ស្ថិតនៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង ។បន្ទាប់ពីបានទទួលព័ត៌មាននេះភ្លាម នៅថ្ងៃទី១២ខែមិថុនា ឆ្នាំ២០២៤ ឯកឧត្ដម សុខ លូ អភិបាលខេត្ត បានបញ្ជាឱ្យមន្រ្តីជំនាញនៃមន្ទីរបរិស្ថាន សហកាជាមួយអាជ្ញាធរមូលដ្ឋាន បានចុះដល់ទីតាំងផ្ទាល់ និងសាកសួរប្រជាពលរដ្ឋនេសាទនៅទីនោះ ក៏ដូចជាពិនិត្យខ្សែទឹក ផ្នែកខាងលើ និងខាងក្រោម។ ជាលទ្ធផល ពុំទាន់ឃើញមានត្រីឬសត្វមានជីវិត ពុល និងស្លាប់ ដោយសារធាតុពណ៌បៃតង ស្រដៀងស្លែនៅឡើយទេ។ ក្រុមកាងារបានដួសយកសំណាកទឹកនោះផ្ញើទៅពិនិត្យនៅមន្ទីរពិសោធន៍ ក្រសួងបរិស្ថាន ដើម្បីស្វែងរកសារធាតុពិតប្រាកដ ថាវាប៉ះពាល់សុខភាពឬអត់ ។ ចំណែកនៅថ្ងៃទី១៣ខែមិថុនា ឆ្នាំ២០២៤នេះក្រុមការងារបានបន្តចុះត្រួតពិនិត្យនៅរោងចក្រ Phoenix Industrial CO.,LTD. ដែលជារោងចក្រធ្លាប់បានបង្ហូរទឹកកខ្វក់ចូលក្នុងស្ទឹងសង្កែ។ ជាលទ្ធផលក្រុមការងារពុំមានរកឃើញការបង្ហូរទឹកកខ្វក់ចូលក្នុងស្ទឹងសង្កែនោះទេ ប៉ុន្តែជាវិធានការបង្ការទុកជាមុនក្រុមការងារបានណែនាំឱ្យរោងចក្ររៀបចំឃ្លាំង ឬទីតាំងសមស្របសម្រាប់ស្តុកសំណល់ភក់ចេញពីអាងចម្រោះឱ្យបានត្រឹមត្រូវចៀសបង្ហូរផ្ទាល់ចូលក្នុងស្ទឹងសង្កែ។ ទាក់ទិនករណីខាងលើនេះក្រុមការងារបានដាក់កម្លាំង តាមដានជាប់ជាប្រចាំ៕

អ្នកជំនាញទន្លេ៖ ព្រែកជីកហ្វូណនមិនបង្កការខូចខាតដល់ធនធានធម្មជាតិនោះទេ

អ្នកជំនាញទន្លេ និងសមុទ្រ លើកឡើងថា គម្រោងព្រែកជីកហ្វូណនតេជោមិនបានបង្កការខូចខាតដល់ធនធានធម្មជាតិនោះទេ។ថ្លែងប្រាប់ BTV នៅថ្ងៃទី១៣ ខែមិថុនា ឆ្នាំ២០២៤ លោក នូ សុវណ្ណ នាយកប្រតិបត្តិអង្គការសំអាតទន្លេ- សមុទ្រ បានឱ្យដឹងថា ក្នុងនាមអង្គការសំអាតទន្លេ-សមុទ្រ បានបង្ហាញការគាំទ្រយ៉ាងពេញទំហឹងចំពោះគម្រោងព្រែកជីកហ្វូណនតេជោ ដោយសារគម្រោងនេះបានបង្កើតសក្តានុពលជាច្រើន សម្រាប់កសាងសេដ្ឋកិច្ចជាតិ ជាពិសេសពង្រីកការដឹកជញ្ជូន ទាំងវិស័យកសិកម្ម និងទេសចរណ៍ពីកម្ពុជាទៅក្នុងតំបន់ និងពិភពលោក។ ក្នុងនាមអង្គការជំនាញទន្លេ លោក នូ សុវណ្ណ បញ្ជាក់ថា តាមរយៈការសិក្សាលើគម្រោងព្រែកជីកហ្វូណនតេជោមិនមានផលប៉ះពាល់ដល់បរិស្ថាន ហើយរុក្ខជាតិ និងមច្ឆាទាំងក្នុងទន្លេ និងសមុទ្រនៅតែបន្តរស់ទៅតាមលក្ខណៈធម្មជាតិរបស់ខ្លួនដដែល។ជាមួយគ្នា ពាក់ព័ន្ធនឹងមតិលើកឡើងពីផលប៉ះពាល់រវាងទន្លេ និងសមុទ្រ លោក នូ សុវណ្ណ អះអាងថា ចំពោះនីវ៉ូទឹកសមុទ្រ និងទន្លេមិនមានផលប៉ះពាល់អ្វីនោះទេ ដោយសារពីដើមមកទន្លេមេគង្គ និងទន្លេបាសាក់បានតភ្ជាប់ទៅសមុទ្រតាំងយូរអង្វែង។បន្ថែមលើនេះ លោក នូ សុវណ្ណ លើកជាសំណូមពរដល់ប្រទេសជិតខាង សូមកុំមានការព្រួយបារម្មណ៍លើបញ្ហាបរិស្ថានចេញពីទន្លេកម្ពុជា ដោយសារអង្គការសំអាតទន្លេ និងសមុទ្រកម្ពុជា នឹងចូលរួមក្នុងការសំអាតជាមួយនឹងគម្រោងព្រែកជីកហ្វូណនតេជោដោយមិនឱ្យមានផលប៉ះពាល់បរិស្ថានណាមួយនោះទេ។សូមជម្រាបថា ប្រជាពលរដ្ឋទាំងក្នុង និងក្រៅប្រទេសបន្តគាំទ្រយ៉ាងពេញទំហឹងលើគម្រោងព្រែកជីកហ្វូណនតេជោនេះ ដើម្បីឱ្យគម្រោងនេះក្លាយផ្លូវនាវាចររបស់កម្ពុជា ដោយតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ឆ្លងកាត់ខេត្តកណ្តាល តាកែវ កំពត និងខេត្តកែប មានប្រវែង១៨០គីឡូម៉ែត្រ ខណៈគម្រោងគ្រោងចំណាយទុនសាងសង់ប្រមាណ ១,៧០០លានដុល្លារ និងបើកការដ្ឋាននៅថ្ងៃទី៥ ខែសីហាខាងមុខនេះ៕ អត្ថបទ សេក ឧត្តម

សន្និសីទស្តីពី«នវានុវត្តន៍ នៃការវះកាត់ដាំបង្គោលធ្មេញ និងការវះកាត់ស្តារនីតិសម្បទាមុខមាត់ និងឆ្អឹងថ្គាម»

ភ្នំពេញ ៖ សន្និសីទរួមគ្នា ស្តីពី«នវានុវត្តន៍ នៃការវះកាត់ដាំបង្គោលធ្មេញ និងការវះកាត់ស្តារនីតិសម្បទាមុខមាត់ និងឆ្អឹងថ្គាម» រយៈពេល២ថ្ងៃ ចាប់ពីថ្ងៃទី១៣-១៤ ខែមិថុនា ឆ្នាំ២០២៤ ក្នុងគោលបំណងបង្កើនចំណេះដឹងថ្មីៗ បទពិសោធន៍ល្អៗ ដល់ទន្តពេទ្យជាតិ, រៀបចំដោយសមាគមគ្រូពេទ្យវះកាត់មុខ-មាត់ និងឆ្អឹងថ្គាមកម្ពុជា និងសមាគមដាំបង្គោលធ្មេញ ក្នុងឆ្អឹងកម្ពុជា។ទន្តបណ្ឌិតឯកទេស ហេង ពិសិដ្ឋ ប្រធានសមាគមគ្រូពេទ្យវះកាត់មុខមាត់ និងឆ្អឹងថ្គាមកម្ពុជា បានឲ្យដឹងថា សមាគមគ្រូពេទ្យវះកាត់មុខ-មាត់ និងឆ្អឹងថ្គាមកម្ពុជា ត្រូវបានចុះបញ្ជីនៅក្រសួងមហាផ្ទៃ នាថ្ងៃទី៩ ខែមិថុនា ឆ្នាំ២០២០ និងក្លាយជាអង្គភាពផ្តល់ការបណ្តុះបណ្តាលសម្រាប់ការអភិវឌ្ឍវិជ្ជាជីវៈបន្ត ពីគណៈទន្តពេទ្យកម្ពុជា កាលពីថ្ងៃទី១៨ ខែតុលា ឆ្នាំ២០២១ បន្តមកសមាគមបានធ្វើសកម្មភាពជាច្រើន ក្រៅពីនោះសមាគមក៏បានចូលរួមសកម្មភាពសប្បុរសធម៌ជាច្រើនផងដែរ។ ជាពិសេសតាមរយៈសន្និសីទនាថ្ងៃនេះ និងក្លាយជាឱកាសដ៏ល្អមួយ ដើម្បីពិភាក្សាអំពីចំណេះដឹងថ្មីៗ ភាពជឿនលឿននៃការវៈកាត់ និងបច្ចេកទេសទំនើបបំផុត ក្នុងវិស័យដាំបង្គោលធ្មេញក្នុងឆ្អឹង រោគសាស្រ្តក្នុងមាត់ ការវះកាត់មុខ-មាត់ និងឆ្អឹងថ្គាម។ ដែលក្នុងសន្និសីទនេះ យើងបានដាក់បញ្ចូលគ្នានូវប្រធានបទជាច្រើន ដែលប្រមូលផ្តុំដោយវាគ្មិនកិតិ្តយសល្បីៗជាច្រើន មកពីជុំវិញពិភពលោក។ ចំណែកសមាគមដាំបង្គោលធ្មេញ ក្នុងឆ្អឹងកម្ពុជា ត្រូវបានបង្កើតឡើងក្នុងឆ្នាំ២០១២ ដោយក្រុមទន្តបណ្ឌិតកម្ពុជា ដើម្បីជួយទន្តបណ្ឌិតរបស់យើង បង្កើនចំណេះដឹងផ្នែកដាំបង្គោលធ្មេញ ធ្វើបច្ចុប្បន្នភាពបច្ចេកវិទ្យា និងទទួលបានការបណ្តុះបណ្តាលត្រឹមត្រូវ ដើម្បីឱ្យពួកគេអាចផ្តល់នូវការព្យាបាលប្រកបដោយសុវត្ថិភាព ភាពជឿជាក់ និងគុណភាពខ្ពស់ដល់អ្នកជំងឺរបស់យើង។លោកសាស្រ្តាចារ្យជំនួយ ប៉ូច សុភារ័ត្ន ប្រធានគណៈទន្តពេទ្យកម្ពុជា បានលើកឡើងថា គណៈទន្តពេទ្យកម្ពុជា ទទួលខុសត្រូវក្នុងការអនុវត្តន៍ច្បាប់ស្តីពីការគ្រប់គ្រងអ្នកប្រកបវិជ្ជាជីវៈក្នុងវិស័យសុខាភិបាល ហើយបានចងក្រងនិងផ្សព្វផ្សាយនូវឯកសារគតិយុត្តិជាច្រើន មានជាអាទិ៍៖ ក្របសីលធម៌ ក្របខណ្ឌ និងបែបបទនៃការស្នើសុំចុះបញ្ជីការ និងអាជ្ញាបណ្ណវិជ្ជាជីវៈទន្តសាស្រ្ត និយាមអប្បបរមា នៃការអភិវឌ្ឍវិជ្ជាជីវៈបន្ត គោលការណ៍ណែនាំស្តីពីការអភិវឌ្ឍវិជ្ជាជីវៈបន្ត ដែនកំណត់វិជ្ជាជីវៈ បទដ្ឋាន និងនិយាមវិជ្ជាជីវៈនៃការប្រតិបតិ្តសម្រាប់អ្នកប្រកបវិជ្ជាជីវៈទន្តសាស្រ្ត នៅព្រះរាជាណាចក្រកម្ពុជា។នាឱកាសនោះដែរឯកឧត្តម ឡឹម តារា រដ្ឋលេខាធិការ តំណាងឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បានថ្លែងថា បច្ចុប្បន្ននេះ ដោយមានការដឹកនាំប្រកបដោយគតិបណ្ឌិត របស់ប្រមុខរាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោលដំណាក់កាលទី១ និងកម្មវិធីគោលនយោបាយអាទិភាពទី១ ស្តីពី៖ ការផ្តល់ការថែទាំសុខភាពឆ្ពោះទៅការគ្របដណ្តប់សុខភាពជាសកល នៅកម្ពុជា និងវិធានការគន្លឹះក្នុងវិស័យសុខាភិបាល សំដៅពង្រឹងសមត្ថភាពមណ្ឌលសុខភាព និងមន្ទីរពេទ្យបង្អែក ក្នុងការផ្តល់សេវាថែទាំសុខភាពដែលមានគុណភាព សុវត្ថិភាព ប្រសិទ្ធភាព និងប្រកបដោយសមធម៌។ ក្នុងនោះផងដែរ គោលដៅជាយុទ្ធសាស្ត្រ គឺការកសាងធនធានមនុស្ស ប្រកបដោយសមត្ថភាព ជំនាញ ឆន្ទៈម្ចាស់ការ និងក្រម សីលធម៌វិជ្ជាជីវៈ ស្របតាមតួនាទី និងការទទួលខុសត្រូវ ទាំងនេះកំពុងតែមានការយកចិត្តទុកដាក់យ៉ាងខ្លាំងពីថ្នាក់ដឹកនាំក្រសួងសុខាភិបាល។ ជាពិសេសលើវិស័យទន្តសាស្ត្រ ដែលមានសារៈសំខាន់ក្នុងការជួយសម្រាល និងដោះស្រាយបញ្ហាទាំងឡាយទាក់ទងនិងសុខភាពមាត់ធ្មេញ ការទំពារអាហារ និងសម្រស់ផ្ទៃមុខរបស់មនុស្សគ្រប់រូបមិនអាចខ្វះបាន។ បន្ថែមពីលើនេះទៀតនោះ ធ្វើយ៉ាងណាឱ្យវិស័យទន្តសាស្ត្រនិយាយជារួម ជំនាញវះកាត់មុខ-មាត់ និងឆ្អឹងថ្គាម និយាយដោយឡែក អាចផ្តល់សេវាបានដល់គ្រប់មូលដ្ឋានសុខាភិបាល៕អត្ថបទ៖ រដ្ឋា

អ្នកស្វែងរកការងារធ្វើមានចំណេះ ជំនាញ ភាគរយជាប់ក្នុងការជ្រើសរើសមានអាទិភាពខ្ពស់

ដើម្បីឆ្លើយតបក្នុងការទទួលពាក្យ និងសម្ភាសន៍ការងារដល់អ្នកកំពុងស្វែងរកការងារធ្វើ តំណាងក្រុមហ៊ុននានា បានបង្ហាញគន្លឹះសំខាន់ៗមួយចំនួន ក៏ដូចជាបទពិសោធន៍ ក្នុងការត្រៀមខ្លួនជាមុនដើម្បីឲ្យទទួលបានលទ្ធផលជាវិជ្ជមាន ខណៈក្រុមហ៊ុនធំៗចំនួន១២បានផ្តល់ឱកាសការងារចំនួនជិត ៧០០កន្លែង សម្រាប់អ្នកកំពុងស្វែងរកការងារធ្វើក្នុងវេទិកាការងារនៅថ្ងៃទី១៣ ខែមិថុនានេះ។លោក ប្រាក់ សុភៈ មន្រ្តីជ្រើសរើសបុគ្គលិកនៃគ្រឹះស្ថានមីក្រូហិរញ្ញវត្ថុ ជេកស៍ (ខេមបូឌា) ម.ក ក្នុងកិច្ចសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី១៣ ខែមិថុនានេះ បានលើកឡើងថា ឆ្លងកាត់តាមបទពិសោធន៍កន្លងមក គន្លឹះមួយចំនួនដែលអ្នកស្វែងរកការងារធ្វើគួរតែយល់ដឹងនិងត្រៀមជាមុន គឺការស្គាល់ខ្លួនឯងដែលជារឿងសំខាន់បំផុត ជាពិសេសក្រៅពីចំណេះដឹង ត្រូវមានជាចាំបាច់ដើម្បីមានអាទិភាពខ្ពស់ គឺជំនាញក្នុងជីវិត មុននឹងសម្រេចដាក់ពាក្យដើម្បីសម្ភាសន៍ការងារជាមួយក្រុមហ៊ុនដែលខ្លួនពេញចិត្ត។កញ្ញា នី សុខហ័ង ប្រធានអភិវឌ្ឍអាជីវកម្មរបស់ក្រុមហ៊ុនធានារ៉ាប់រង ដាយ អ៊ិ ឈិ និងលោក ស្តុក ថាវ៉ាត់ មន្រ្តីផ្នែកធនធានមនុស្សនៃសហគ្រាស ហ្គូដហៀល កម្ពុជា បានបញ្ជាក់ឲ្យដឹងដែរថា ក្រៅពីការត្រៀមខាងលើនេះ អ្នកស្វែងរកការងារក៏ត្រូវពង្រឹងផ្នែកភាសា និងជំនាញកុំព្យូរទ័រដែរ ព្រោះបច្ចុប្បន្ន និងទៅមុខគឺសម័យឌីជីថល ដែលទាមទារឲ្យមានការយល់ដឹង និងប្រើប្រាស់ច្រើន។ បន្ថែមពីនេះ ក៏គួរមានបញ្ជីរសំណួរជាមុន និងត្រង់ត្រាប់ស្តាប់ចម្លើយក្នុងពេលសម្ភាសន៍ សួរសំណួរដែលត្រូវតាមដាន ព្រោះទាំងអស់នោះ ជាការឆ្លុះបញ្ចាំងពីយើង។សូមជម្រាបជុនថា នៅថ្ងៃទី១៣ ខែមិថុនា ឆ្នាំ២០២៤នេះ មជ្ឈមណ្ឌលការងាររាជធានីភ្នំពេញ នៃទីភ្នាក់ជាតិ និងមុខរបរការងារ (NEA) បានរៀបចំវេទិកាការងារ ដោយមានក្រុមហ៊ុនធំៗចំនួន១២ ចូលរួមបង្ហាញជូននូវឱកាសការងារ ដើម្បីជ្រើសរើសកម្លាំងពលកម្មចំនួនជិត ៧០០កន្លែង។ វេទិកាការងារនេះ គឺជាផ្នែកមួយនៃយន្តការរបស់រដ្ឋាភិបាលក្នុងការផ្ដល់ឱកាសដល់សាធារណៈជនទូទៅ ជាពិសេសយុវជនដែលចង់ស្វែងការងារធ្វើ អ្នកស្វែងរកកន្លែងកម្មសិក្សា ឬអ្នកចង់ផ្លាស់ប្តូរការងារ អាចទទួលបានកាន់តែងាយស្រួល ដោយចំណេញពេលវេលា និងនៅមួយកន្លែង។ ដោយឡែក សិស្ស/និស្សិត និងអ្នកកំពុងស្វែងរកការងារធ្វើ អាចយកប្រវត្តិរូបសង្ខេប និងរៀបចំខ្លួនឲ្យបានសមរម្យទៅតាមមុខតំណែងដែលចង់បាន ដើម្បីចូលរួមដាក់ពាក្យផ្ទាល់ និងសម្ភាសផ្ទាល់ជាមួយក្រុមហ៊ុនទាំងនោះ ចាប់ពីម៉ោង ៨ព្រឹក ដល់ម៉ោង ៥ល្ងាច នៅបរិវេណក្រសួងការងារ និងបណ្តុះបណ្តាលវិជ្ជាជីវៈ៕ អត្ថបទ ឈិត បូរ៉ាវី

ឯកឧត្តម ហេង សួរ ជួបពិភាក្សាការងារជាមួយប្រធានការិយាល័យសកម្មភាពនិយោជករបស់ILO

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបពិភាក្សាការងារជាមួយលោកស្រី Deborah FRANCE-MASSIN ប្រធានការិយាល័យសកម្មភាពនិយោជក (ACT/EMP) នៃអង្គការអន្តរជាតិខាងការងារកាលពីរសៀលម៉ោង៣ និង៣០នាទីថ្ងៃទី១២ ខែមិថុនាម្សិលមិញម៉ោងនៅប្រទេសស្វីស។ នេះជាជំនួបដែលបានធ្វើឡើងក្នុងអំឡុងពេលដែលឯកឧត្តមរដ្ឋមន្តី្រចូលរួមកិច្ចប្រជុំប្រចាំឆ្នាំរបស់អង្គការអន្តរជាតិខាងការងារ(ILO) ក្នុងទីក្រុងហ្សឺណែវ ប្រទេសស្វីស។ក្នុងជំនួបនោះ ឯកឧត្តមរដ្ឋមន្ត្រី បានរំលឹកពីការជួយបណ្តុះបណ្តាល និងការពង្រឹងសមត្ថភាពដល់សហព័ន្ធនិយោជកកម្ពុជាកាលពីពេលកន្លងទៅ ដែលបានរួមចំណែកធ្វើឱ្យនិយោជកកម្ពុជាកាន់តែមានសមត្ថភាពខ្ពស់មួយកម្រិតបន្ថែមទៀត។ជាមួយគ្នានេះ ឯកឧត្តមរដ្ឋមន្ត្រី ក៏បានគូសបញ្ជាក់ពីមហិច្ចតារបស់កម្ពុជាដែលចង់បាននូវការវិនិយោគ លើឧស្សាហកម្មដែលមានតម្លៃបន្ថែមដូចជាគ្រឿងយន្ត គ្រឿងម៉ាស៊ីន និងគ្រឿងបង្គុំជាដើម ខណៈដែលកម្ពុជាបានដាក់ចេញនូវគោលនយោបាយ នៃការបណ្តុះបណ្តាលជំនាញបច្ចេកទេស និងវិជ្ជាជីវៈ។ ឯកឧត្តមរដ្ឋមន្ត្រី ក៏បានអះអាងដែរថា ទន្ទឹមនឹងតម្រូវការកំណើនសេដ្ឋកិច្ច និងការអភិវឌ្ឍ កម្ពុជាក៏បាននិងកំពុងបង្កើតការងារសមរម្យសម្រាប់ប្រជាពលរដ្ឋផងដែរ ដែលសបញ្ជាក់ឱ្យឃើញពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការគោរពលក្ខខណ្ឌស្តង់ដារការងារតាមរយៈការទទួលស្គាល់នៃអនុសញ្ញារបស់អង្គការអន្តរជាតិខាងការងារជាដើម។ ត្រង់ចំណុចនេះ លោកស្រី Deborah FRANCE-MASSIN បានវាយតម្លៃខ្ពស់ចំពោះការគូសបញ្ជាក់របស់ឯកឧត្តមរដ្ឋមន្ត្រី អំពីភាពចាំបាច់នៃគម្លាតរវាងកម្មករនិយោជិត និងនិយោជកដែលជាចំណុចសំខាន់ក្នុងការបង្កើតបរិយាកាសការងារឱ្យល្អប្រសើរ ហើយលោកស្រីប្រធាន បានគូសបញ្ជាក់ថាភាគីលោកស្រី និងកម្មករនិយោជិតនឹងត្រូវតែធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា តាមរយៈក្រសួងការងារ និងបណ្តុះបណ្តាលវិជ្ជាជីវៈដែលជាសេនាធិកា ដើម្បីបង្កើតឱ្យបាននូវទំនាក់ទំនងវិជ្ជាជីវៈប្រកបដោយភាពសុខសាន្ត។ ទន្ទឹមនឹងនេះ ឯកឧត្តមរដ្ឋមន្ត្រីក៏បានថ្លែងអំណរគុណការិយាល័យសកម្មភាពវិនិយោគរបស់ILOចំពោះការចូលរួមគាំទ្រលើការអនុវត្តឱ្យជោគជ័យលើសម្រាប់ភាពសុខសាន្តក្នុងទំនាក់ទំនងវិជ្ជាជីវៈនៅកម្ពុជា៕

ថ្ងៃម្សិលមិញ សាលាដំបូងរាជធានីខេត្តចាត់ការលើសំណុំរឿងក្មេងទំនើង ៤ករណី ឃាត់ខ្លួនជនសង្ស័យ ២០នាក់

អ្នកនាំពាក្យក្រសួងយុត្តិធម៌ បានឱ្យដឹងថា នៅថ្ងៃទី១២ ខែមិថុនា ឆ្នាំ២០២៤ ម្សិលមិញនេះ សាលាដំបូង និងអយ្យការអមសាលាដំបូងរាជធានីខេត្ត បានទទួលចាត់ការលើសំណុំរឿងពាក់ព័ន្ធនឹងករណីក្មេងទំនើងចំនួន ៤ ករណី ដែលមានជនសង្ស័យចំនួន ២៥ នាក់ ហើយតុលាការបានធ្វើការឃាត់ខ្លួនជនសង្ស័យចំនួន ២០នាក់ និងរត់គេចខ្លួនចំនួន ៥ នាក់។អ្នកនាំពាក្យក្រសួងយុត្តិធម៌ បានថ្លែងអំណរគុណយ៉ាងជ្រាលជ្រៅដល់អាជ្ញាធរមានសមត្ថកិច្ច ព្រមទាំងសាលាដំបូង និងអយ្យការអមសាលាដំបូងរាជធានីខេត្ត ដែលបានចាត់វិធានការក្នុងការអនុវត្តច្បាប់យ៉ាងម៉ឺងម៉ាត់ក្នុងសំណុំរឿងពាក់ព័ន្ធករណីក្មេងទំនើងប្រកបដោយស្មារតីយកចិត្តទុកដាក់ និងការទទួលខុសត្រូវខ្ពស់ ដើម្បីការការពារសន្តិសុខ និងសុវត្ថិភាពរបស់សង្គមជាតិ ព្រមទាំងភាពសុខសាន្តរបស់ប្រជាពលរដ្ឋ។បន្ថែមពីនេះអ្នកនាំពាក្យក្រសួងយុត្តិធម៌ បានអំពាវនាវដល់ឪពុកម្តាយ ព្រមទាំងអាណាព្យាបាលទាំងអស់ ត្រូវខិតខំតាមដាន អប់រំ និងទូន្មានប្រៀនប្រដៅដល់កូនៗ ឱ្យដើរតាមគន្លងត្រឹមត្រូវវៀរចាកនូវអំពើអបាយមុខ ដើម្បីក្លាយជាពលរដ្ឋល្អសម្រាប់សង្គមជាតិ និងសូមអំពាវនាវដល់យុវជនទាំងអស់ ដែលជាទំពាំងស្នងឫស្សីរបស់ប្រទេសជាតិ សូមប្រកាន់ខ្ជាប់នូវវិន័យ សីលធម៌ និងសេចក្តីថ្លៃថ្នូរហើយសូមជៀសវាងពីសកម្មភាពទាំងឡាយណា ដែលបង្កអន្តរាយដល់ខ្លួន គ្រួសារ និងសង្គមជាតិ៕

មន្ត្រីនគរបាលចរាចរណ៍ ២រូបត្រូវបានកោះហៅមកសួរនាំពាក់ព័ន្ធឃាត់ម៉ូតូ ១គ្រឿង គ្មានបទល្មើស

ស្នងការនគរបាលរាជធានីភ្នំពេញ កោះហៅមន្ត្រីនគរបាលចរាចរណ៍ ២រូប ដែលឈរជើងនៅចំណុចគោលដៅ ស្តុបផ្លូវជាតិលេខ៤ កែងមហាវិថី ឈ្នះឈ្នះ ទឹកដីខណ្ឌពោធិ៍សែនជ័យ ពាក់ព័ន្ធករណីឃាត់ម៉ូតូ ១គ្រឿង ដោយគ្មានបទល្មើស ។ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមបញ្ជាក់ជូនសាធារណជនមេត្តាជ្រាបថា ក្រោយពី ទទួលបានព័ត៌មានដែលបង្ហោះលើបណ្តាញសង្គមនៅថ្ងៃទី១២ ខែមិថុនា ឆ្នាំ២០២៤ ពាក់ព័ន្ធមន្ត្រីនគរបាលចរាចរណ៍ដែលឈរជើងនៅគោលដៅខាងលើ កាក់ហៅម៉ូតូប្រជាពលរដ្ឋ ១គ្រឿងកំពុងបើកបរគ្មានបទល្មើស ដែលនាំឲ្យរងការរិះគន់ពីប្រជាពលរដ្ឋអ្នកលេងបណ្តាញសង្គម ។ក្រោយពីព័ត៌មាននេះឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងទទួលការងារចរាចរណ៍ និងលោកនាយការិយាល័យនគរបាលចរាចរណ៍ផ្លូវគោកកោះហៅមន្រ្តី ២រូប ដែលកាក់ហៅម៉ូតូប្រជាពលរដ្ឋឲ្យចូលមកបំភ្លឺនៅការិយាល័យនគរបាលចរាចរណ៍ផ្លូវគោក ដើម្បីសុំគោលការណ៍ពី អគ្គស្នងការរង និងជាស្នងការនគរបាលរាជធានីភ្នំពេញ ពិនិត្យសម្រេច ៕ តារាវុទ្ធី

បច្ចុប្បន្នភាពទឹកប្រាក់បរិច្ចាគ ក្នុងយុទ្ធនាការ «១ម៉ឺនរៀល ១ម៉ឺននាក់» !!

គិតមកត្រឹមម៉ោង៥ល្ងាចថ្ងៃទី១២ ខែមិថុនា ឆ្នាំ២០២៤ មូលនិធិគន្ធបុប្ផាកម្ពុជា បានទទួលថវិកាបរិច្ចាគពីបងប្អូនប្រជាពលរដ្ឋចំនួន ១៤៣.១៥៦ នាក់ សរុបជាទឹកប្រាក់មានចំនួន ១.៤៣៩.៩៩៤ ដុល្លារអាម៉េរិក។ នេះបើតាមការបញ្ជាក់តាមរយៈហ្វេសប៊ុកផ្លូវការលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត នាព្រឹកថ្ងៃទី១៣ ខែមិថុនា ឆ្នាំ២០២៤នេះ។ លោកជំទាវបណ្ឌិត បានថ្លែងអំណរគុណចំពោះការគាំទ្រយ៉ាងផុលផុស ក្នុងស្មារតីសាមគ្គីភាព“ខ្មែរជួយខ្មែរ” របស់ប្រជាជាតិទាំងមូល។ ជាមួយគ្នានេះ លោកជំទាវបណ្ឌិត បានអំពាវនាវដល់បងប្អូនសប្បុរសជនដែលមានបំណងចូលរួមបរិច្ចាគក្នុងយុទ្ធនាការ នៃការរក្សានិរន្តរភាពកិច្ចដំណើរការរបស់មន្ទីរពេទ្យគន្ធបុប្ផា សូមមេត្តាបន្តចូលរួមគាំទ្រ រហូតដល់ថ្ងៃបិទយុទ្ធនាការ។

កម្ពុជា-អូស្ត្រាលី ប្ដេជ្ញាសហការប្រយុទ្ធប្រឆាំងបទល្មើសបច្ចេកវិទ្យា អំពើជួញដូរ និងពង្រឹងការងារ សន្តិសុខ

ភ្នំពេញ៖ ក្រសួងមហាផ្ទៃកម្ពុជា និងក្រសួងអន្តោប្រវេសន៍សញ្ជាតិ និងកិច្ចការពហុវប្បធម៌អូស្ត្រាលី បានប្ដេជ្ញាសហការគ្នា ក្នុងការប្រយុទ្ធប្រឆាំងបទល្មើសបច្ចេកវិទ្យា បង្ក្រាបអំពើជួញដូរ សហការពង្រឹងការងារសន្តិសុខ និងការងារកំណែទម្រង់រដ្ឋបាលថ្នាក់ក្រោមជាតិ ។ ក្នុងកិច្ចសហប្រតិបត្តិការទ្វេភាគី កាលថ្ងៃទី១២ ខែមិថុនា ឆ្នាំ២០២៤ ឯកឧត្តមអភិសន្តិបណ្ឌិត ស សុខា បានចែករំលែកជូនភាគីអូស្ត្រាលី នូវព័ត៌មានសំខាន់ៗមួយចំនួន ពាក់ព័ន្ធនឹងកិច្ចការអន្តោប្រវេសន៍នៅកម្ពុជា រួមទាំងការងារកំណែច្បាប់ និងលិខិតបទដ្ឋានគតិយុត្តិពាក់ព័ន្ធ ដើម្បីឆ្លើយតបបរិបទថ្មីនៅកម្ពុជា និងក៏ដើម្បីផ្ដល់ភាពងាយស្រួលកំណត់បែបបទ និងលក្ខខណ្ឌច្បាស់លាស់ លើការងារអន្តោប្រសន៍ខណៈភាគីអូស្ត្រាលី មានបទពិសោធន៍ស៊ីជម្រៅជាងកម្ពុជាលើការងារនេះ ។ ចំពោះការងារប្រយុទ្ធប្រឆាំងបទល្មើសបច្ចេកវិទ្យា រដ្ឋមន្ត្រីក្រសួងមហាផ្ទៃ បានបង្ហាញឆន្ទៈ និងគោលនយោបាយច្បាស់លាស់របស់រាជរដ្ឋាភិបាលកម្ពុជា ក្នុងការបង្ការទប់ស្កាត់បទល្មើសឆបោក និងសកម្មភាពអនឡាញខុសច្បាប់ ដែលមកដល់ពេលនេះក្រសួងមហាផ្ទៃ ក្នុងនាមជាសេនាធិការរាជរដ្ឋាភិបាល បាននិងកំពុងបន្តអនុវត្តយ៉ាងសកម្ម និងយកចិត្តទុកដាក់បំផុត ហើយស្នើភាគីអូស្រ្ដាលី ជួយបណ្ដុះបណ្ដាលមន្ត្រីជំនាញកម្ពុជា បន្ថែមលើការងារមួយចំនួន ។ឯកឧត្តម Andrew Giles រដ្ឋមន្រ្តីក្រសួងអន្តោប្រវេសន៍ សញ្ជាតិ និងកិច្ចការពហុវប្បធម៌ បានបង្ហាញការជឿជាក់ ដំណើរទស្សនកិច្ច របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គឺមានសារសំខាន់ និងប្រាកដជាទទួលបានលទ្ធផលផ្លែផ្កា ជាពិសេសការផ្លាស់ប្តូរយោបល់ និងបទពិសោធជាមួយអង្គភាពជំនាញ លើកិច្ចការអន្តោប្រវេសន៍ កិច្ចការបទល្មើសបច្ចេកវិទ្យា និងការងារនគរបាល ។ ជាមួយនេះ ឯកឧត្តម បានទទួលស្គាល់អំពីកិច្ចប្រឹងប្រែងរបស់កម្ពុជា និងយល់ស្របលើការងារប្រយុទ្ធប្រឆាំងបទល្មើសអន្តោប្រវេសន៍ បទល្មើសនានា រួមទាំងបទល្មើសបច្ចេកវិទ្យា ដើម្បីរក្សាសន្តិសុខសណ្តាប់ធ្នាប់ សុវត្ថិភាព រវាងប្រទេសទាំងពីរ និងក្នុងតំបន់ ហើយទទួលយកសំណូមពរពីភាគីកម្ពុជា ដើម្បីបណ្តុះបណ្តាលជំនាញ ប្រយុទ្ធប្រឆាំងបទល្មើសបច្ចេកវិទ្យា ព្រមទាំងពិនិត្យលទ្ធភាព ជំរុញកិច្ចសហប្រតិបត្តិការ លើការងារស្ថិតក្នុងវិស័យក្រសួងទាំងពីរឱ្យកាន់តែស៊ីជម្រៅថែមទៀត។ជាការកត់សម្គាល់ រដ្ឋមន្រ្តីក្រសួងអន្តោប្រវេសន៍ សញ្ជាតិ និងកិច្ចការពហុវប្បធម៌ អូស្ត្រាលី បានបញ្ជាក់ពីការត្រៀមមកបំពេញទស្សនកិច្ចការងារ នៅព្រះរាជាណាចក្រកម្ពុជា ក្នុងពេលវេលាសមស្រប តបតាមការអញ្ជើញរបស់ឯកឧត្តមអភិសន្តិបណ្ឌិត និងបានជូនពរ ឯកឧត្តមអភិសន្តិបណ្ឌិត និងគណៈប្រតិភូ ទទួលជោគជ័យក្នុងដំណើរទស្សនកិច្ចនេះ ដោយឯកឧត្តមផ្ទាល់មានជំនឿថា គណៈប្រតិភូនឹងជួបពិភាក្សាផ្លាស់ប្តូរ និងដកស្រង់បទពិសោធន៍ល្អៗជាមួយស្ថាប័នជំនាញអូស្រ្តាលី នៅថ្ងៃបន្តបន្ទាប់ ៕ អត្ថបទ បាន សុខរិទ្ធិ

សម្ដេចធិបតី លើកទឹកចិត្តឱ្យវិស័យឯកជនចូលរួមជាមួយក្រសួងអប់រំ ដើម្បីពង្រឹងគុណភាពអប់រំ

ក្នុងឱកាសអញ្ជើញជាអធិបតីពិធីចែកសញ្ញាបត្រដល់និស្សិតនៃសាកលវិទ្យាល័យលីមកុកវីង នៅថ្ងៃទី១៣ ខែមិថុនានេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានលើកទឹកចិត្តដល់វិស័យឯកជន ជាពិសេសគ្រឹះស្ថានសិក្សានានា ចូលរួមជាមួយក្រសួងអប់រំ យុវជន និងកីឡា ដើម្បីពង្រឹងគុណភាពអប់រំ ខណៈរាជរដ្ឋាភិបាលបានបើកឱកាសឱ្យវិស័យឯកជនទាំងក្នុង និងក្រៅប្រទេសចូលរួមវិនិយោគលើវិស័យអប់រំនេះ។ក្នុងឱកាសនោះសម្តេចធិបតី នាយករដ្ឋមន្រ្ដីបានថ្លែងថា គុណភាពអប់រំល្អ គឺអាស្រ័យលើគ្រឹះស្ថានអប់រំផ្ទាល់ ដែលជារោងចក្រផលិតធនធានមនុស្ស។ សម្ដេចធិបតី បានបញ្ជាក់ថា រាជរដ្ឋាភិបាល ក៏ដូចជាក្រសួងអប់រំ ត្រឹមតែជាអ្នកដាក់ចេញនូវគោលនយោបាយ, គោលការណ៍ និងការផ្ដល់ការអនុគ្រោះដល់ការអប់រំ ប៉ុន្ដែអ្នកដែលចូលរួមដោយផ្ទាល់ក្នុងការអភិវឌ្ឍធនធានមនុស្សឱ្យមានការរីកចម្រើនទៅបានគឺជាគ្រឹះស្ថានសិក្សាជាពិសេសគ្រឹះស្ថានឧត្តមសិក្សាផ្ទាល់ដែលកំពុងបណ្ដុះបណ្ដាលធនធានមនុស្សរបស់កម្ពុជា។ក្នុងឱកាសនោះសម្ដេចធិបតី នាយករដ្ឋមន្រ្ដីក៏បានផ្ដល់អនុសាសន៍ដល់ គ្រឹះស្ថានឧត្តមសិក្សារដ្ឋ និងឯកជន បន្តធ្វើបច្ចុប្បន្នកម្ម កម្មវិធីសិក្សាឱ្យស្របនឹងតម្រូវការនៃទីផ្សារការងារ និងបន្តអភិវឌ្ឍន៍កម្មវិធីសិក្សាថ្មីៗ ដើម្បីធានានូវគុណភាព នៃការបណ្តុះបណ្តាល, ដោយផ្តោតការយកចិត្តទុកដាក់បន្ថែមលើ ចំណេះដឹង និងជំនាញផ្នែកបច្ចេកវិទ្យា និងឌីជីថល ស្របតាមបរិការណ៍នៃការរីកចម្រើននៃសេដ្ឋកិច្ច និងសង្គម, ការប្រកួតប្រជែងនៃទីផ្សារការងារ, សាកលភាវូបនីយកម្ម និងការវិវត្តនៃសកលលោកផងដែរ។សម្តេចធិបតីលើកទឹកចិត្តគ្រឹះស្ថានឧត្តមសិក្សាទាំងរដ្ឋ និងឯកជន បង្កើនកិច្ចសហប្រតិបត្តិការជាមួយគ្រឹះស្ថានអប់រំ និងគ្រឹះស្ថានស្រាវជ្រាវជាតិ-អន្តរជាតិ ធ្វើការសិក្សាស្រាវជ្រាវរួមគ្នា, ដកស្រង់បទពិសោធ និងធ្វើទស្សនកិច្ចសិក្សាទៅវិញទៅមក ដើម្បីផ្ទេរចំណេះដឹង, បទពិសោធជាក់ស្ដែង និងឧត្តមានុវត្ត សំដៅបង្កើនគុណភាពន ការអប់រំ, ការបណ្ដុះបណ្ដាល, និងការសិក្សាស្រាវជ្រាវឱ្យកាន់តែប្រសើរដល់យុវជនកម្ពុជា៕អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

[UPDATE] ចំនួនអ្នកស្លាប់ដោយសារការផ្ទុះដ៏ធំនៅកំពង់ផែសំខាន់របស់អ៊ីរ៉ង់បានឡើងដល់ ១៤ នាក់ និងរបួសជាង ៧៥០ នាក់

[BREAKING NEWS] លោកTrump និងលោក Zelensky រៀបចំកិច្ចពិភាក្សាប្រកបដោយផ្លែផ្កានៅខាងក្រៅពិធីបុណ្យព្រះសពរបស់សម្តេចប៉ាប ខណៈសហរដ្ឋអាមេរិកជំរុញឱ្យមានកិច្ចព្រមព្រៀងសន្តិភាព

លោក Trump ស្តីបន្ទោសអ៊ុយក្រែនចំពោះការផ្តួចផ្តើមសង្រ្គាមដោយនិយាយថាតំបន់គ្រីម៉េនឹងនៅជាមួយរុស្ស៊ី

ប្រទេសអ៊ីរ៉ង់ ស្នើផ្តល់ការសម្របសម្រួលក្នុងជម្លោះឥណ្ឌា-ប៉ាគីស្ថាន

លោក Kim Jong Un បង្ហាញនាវាពិឃាតទ័ពជើងទឹកថ្មីរបស់កូរ៉េខាងជើង បំពាក់ដោយអាវុធដ៏មានឥទ្ធិពលបំផុត

មេដឹកនាំពិភពលោកបានចូលរួមព្រះរាជពិធីបុណ្យសពសម្ដេចប៉ាបហ្វ្រង់ស៊ីសនៅថ្ងៃសៅរ៍នេះ

អគាររាប់រយរងការខូចខាត និងមនុស្សរាប់សិបនាក់រងរបួសក្នុងការរញ្ជួយដីកម្រិត៦,៣រ៉ិចទ័រនៅប្រទេសអេក្វាឌ័រ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

រដ្ឋបាលខេត្តបាត់ដំបង កំពុងតាមដាន និងស្រាវជ្រាវករណីសារធាតុពណ៌បៃតងអណ្ដែតលើផ្ទៃទឹកស្ទឹងសង្កែ

អ្នកជំនាញទន្លេ៖ ព្រែកជីកហ្វូណនមិនបង្កការខូចខាតដល់ធនធានធម្មជាតិនោះទេ

សន្និសីទស្តីពី«នវានុវត្តន៍ នៃការវះកាត់ដាំបង្គោលធ្មេញ និងការវះកាត់ស្តារនីតិសម្បទាមុខមាត់ និងឆ្អឹងថ្គាម»

អ្នកស្វែងរកការងារធ្វើមានចំណេះ ជំនាញ ភាគរយជាប់ក្នុងការជ្រើសរើសមានអាទិភាពខ្ពស់

ឯកឧត្តម ហេង សួរ ជួបពិភាក្សាការងារជាមួយប្រធានការិយាល័យសកម្មភាពនិយោជករបស់ILO

ថ្ងៃម្សិលមិញ សាលាដំបូងរាជធានីខេត្តចាត់ការលើសំណុំរឿងក្មេងទំនើង ៤ករណី ឃាត់ខ្លួនជនសង្ស័យ ២០នាក់

មន្ត្រីនគរបាលចរាចរណ៍ ២រូបត្រូវបានកោះហៅមកសួរនាំពាក់ព័ន្ធឃាត់ម៉ូតូ ១គ្រឿង គ្មានបទល្មើស

បច្ចុប្បន្នភាពទឹកប្រាក់បរិច្ចាគ ក្នុងយុទ្ធនាការ «១ម៉ឺនរៀល ១ម៉ឺននាក់» !!

កម្ពុជា-អូស្ត្រាលី ប្ដេជ្ញាសហការប្រយុទ្ធប្រឆាំងបទល្មើសបច្ចេកវិទ្យា អំពើជួញដូរ និងពង្រឹងការងារ សន្តិសុខ

សម្ដេចធិបតី លើកទឹកចិត្តឱ្យវិស័យឯកជនចូលរួមជាមួយក្រសួងអប់រំ ដើម្បីពង្រឹងគុណភាពអប់រំ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

រដ្ឋបាល​ខេត្ត​បាត់ដំបង​ កំពុង​តាមដាន​ និងស្រាវជ្រាវ​ករណី​សារធាតុ​ពណ៌បៃតងអណ្ដែត​លើផ្ទៃទឹកស្ទឹងសង្កែ

អ្នកជំនាញទន្លេ៖ ព្រែកជីកហ្វូណនមិនបង្កការខូចខាតដល់ធនធានធម្មជាតិនោះទេ

សន្និសីទស្តីពី«នវានុវត្តន៍ នៃការវះកាត់ដាំបង្គោលធ្មេញ និងការវះកាត់ស្តារនីតិសម្បទាមុខមាត់ និងឆ្អឹងថ្គាម»

អ្នកស្វែងរកការងារធ្វើមានចំណេះ ជំនាញ ភាគរយជាប់ក្នុងការជ្រើសរើសមានអាទិភាពខ្ពស់

ឯកឧត្តម ហេង សួរ ជួបពិភាក្សាការងារជាមួយប្រធានការិយាល័យសកម្មភាពនិយោជករបស់ILO

ថ្ងៃម្សិលមិញ សាលាដំបូងរាជធានីខេត្តចាត់ការលើសំណុំរឿងក្មេងទំនើង ៤ករណី ឃាត់ខ្លួនជនសង្ស័យ ២០នាក់

មន្ត្រីនគរបាលចរាចរណ៍ ២រូបត្រូវបានកោះហៅមកសួរនាំពាក់ព័ន្ធឃាត់ម៉ូតូ ១គ្រឿង គ្មានបទល្មើស

បច្ចុប្បន្នភាពទឹកប្រាក់បរិច្ចាគ ក្នុងយុទ្ធនាការ​ «១ម៉ឺនរៀល ១ម៉ឺននាក់» !!

កម្ពុជា-អូស្ត្រាលី ប្ដេជ្ញាសហការប្រយុទ្ធប្រឆាំងបទល្មើសបច្ចេកវិទ្យា អំពើជួញដូរ និងពង្រឹងការងារ សន្តិសុខ

សម្ដេចធិបតី លើកទឹកចិត្តឱ្យវិស័យឯកជនចូលរួមជាមួយក្រសួងអប់រំ ដើម្បីពង្រឹងគុណភាពអប់រំ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រដ្ឋបាលខេត្តបាត់ដំបង កំពុងតាមដាន និងស្រាវជ្រាវករណីសារធាតុពណ៌បៃតងអណ្ដែតលើផ្ទៃទឹកស្ទឹងសង្កែ

បច្ចុប្បន្នភាពទឹកប្រាក់បរិច្ចាគ ក្នុងយុទ្ធនាការ «១ម៉ឺនរៀល ១ម៉ឺននាក់» !!