BTV NEWS

សម្ដេចធិបតីជំរុញឱ្យរដ្ឋបាលរាជធានី-ខេត្តបន្តផ្សព្វផ្សាយអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស

សម្ដេចធិបតីឱ្យតាមដានជាប្រចាំលើការអនុវត្តគោលនយោបាយដែលបានដាក់ចេញចៀសវាងការអនុវត្តផ្ទុយ

សម្ដេចធិបតីចែករំលែកបទពិសោធន៍កាលធ្វើកម្មសិក្សានៅធនាគារពិភពលោក ក្នុងរដ្ឋធានី Washington សហរដ្ឋអារិកនៅឆ្នាំ២០០២

សម្ដេចធិបតី៖ រាជរដ្ឋាភិបាលនឹងខិតខំចរចាបន្តទៀតពាក់ព័ន្ធនឹងការអនុវត្តពន្ធថ្មីរបស់អាមេរិក

ព័ត៌មានជាតិ

ឯកឧត្តមរដ្ឋមន្រ្តី ហួត ហាក់ បានដឹកនាំគណៈប្រតិភូជាន់ខ្ពស់ក្រសួងអធិការកិច្ច អញ្ជើញចូលជួបសម្តែងការគួរសម និងពិភាក្សាការងារជាមួយ លោក Vu Van Chien នាយកសាលាបណ្តុះបណ្តាលអធិការកិច្ច

ភ្នំពេញ ៖ រដ្ឋធានីហាណូយ៖ ព្រឹកថ្ងៃអង្គារ ទី១១ ខែមិថុនា ឆ្នាំ២០២៤ ឯកឧត្តមរដ្ឋមន្រ្តី ហួត ហាក់ បានដឹកនាំគណៈប្រតិភូជាន់ខ្ពស់ក្រសួងអធិការកិច្ច នៃព្រះរាជាណាចក្រកម្ពុជា អញ្ជើញចូលជួបសម្តែងការគួរសម និងពិភាក្សាការងារជាមួយ លោក Vu Van Chien នាយកសាលាបណ្តុះបណ្តាលអធិការកិច្ច ដើម្បីសិក្សាស្វែងយល់ និងដកស្រង់បទពិសោធអំពីសាលាបណ្តុះបណ្តាលអធិការកិច្ចវៀតណាម នៅសាលាបណ្តុះបណ្តាលអធិការកិច្ច រដ្ឋធានីហាណូយ។សូមជម្រាបជូនថា សាលាបណ្តុះបណ្តាលអធិការកិច្ច ជាអង្គភាពមួយចំណុះឱ្យអធិការកិច្ចរដ្ឋាភិបាលវៀតណាម ដែលមានតួនាទីបណ្តុះបណ្តាល និងអភិវឌ្ឍជំនាញចាំបាច់នានាក្នុងទិដ្ឋភាពអធិការកិច្ចជូនអង្គភា ព និងបុគ្គលិកនៃសាខាអធិការកិច្ច (Inspection Branch)។ សាលាបណ្តុះបណ្តាលអធិការកិច្ច គឺបណ្តុះបណ្តាលផ្តោតលើជំនាញជាច្រើនដូចជា៖ ១.ការអភិវឌ្ឍប្រព័ន្ធបណ្តុះបណ្តលអធិការកិច្ច, ២.ការបណ្តុះបណ្តាល និងអភិវឌ្ឍប្រព័ន្ធប្រតិបត្តិការអធិការកិច្ច, ៣.ការបណ្តុះបណ្តាល និងអភិវឌ្ឍប្រតិបត្តិការអធិការកិច្ចសំខាន់ៗ, ៤.ការបណ្តុះបណ្តាល និងអភិវឌ្ឍអធិការកិច្ចជាន់ខ្ពស់, ៥.ការបណ្តុះបណ្តាល និងអភិវឌ្ឍលើជំនាញអធិការកិច្ចពិសេសដោយធ្វើបច្ចុប្បន្នភាព ដើម្បីបម្រើដល់បេសកម្មរបស់អធិការកិច្ចរដ្ឋាភិបាលវៀតណាមក្នុងការដោះស្រាយបណ្តឹងតវ៉ា និងបណ្តឹងបរិហារ និងប្រឆាំងនឹងអំពើពុករលួយ។

មន្ត្រីជាន់ខ្ពស់ស៊ីម៉ាក់: ប្រជាជនកម្ពុជាត្រូវប្រឈមនឹងគ្រោះថ្នាក់ដោយគ្រាប់មីនយូររាប់ឆ្នាំទៅមុខបន្តទៀត

ភ្នំពេញ ៖ មន្ត្រីជាន់ខ្ពស់ស៊ីម៉ាក់បានថ្លែងថា ប្រជាជនកម្ពុជានូវត្រូវរស់នៅប្រឈមនឹងគ្រោះថ្នាក់ដោយសារគ្រាប់មីននិងគ្រាប់សំណល់ពីសង្គ្រាមជាយូររាប់ឆ្នាំទៅមុខបន្តទៀត ។នេះបើយោងតាមរបាយការណ៍ព័ត៌មាននិងទិន្ន័យនៃការ ស្រាវជ្រាវបោសសំអាតមីននិងគ្រាប់មិនទាន់ផ្ទុះកប់ក្នុងដីពីសំណាក់កម្លាំងស៊ីម៉ាក់ដែលកំពុងតែប្រតិបត្តិការនោះ។ជាក់ស្តែងត្រឹមរយះពេលជាង 5ខែដើមឆ្នាំ2024នេះកម្ពុជាមានអត្រាគ្រោះគ្រោះថ្នាក់ជិត40នាក់ បន្ថែមទៀត។ការថ្លែងបែបនេះខណះឯកឧត្តម ហេង រតនា ប្រតិភូរាជ រដ្ឋាភិបាលកម្ពុជាទទួលបន្ទុកជាអគ្គនាយកមជ្ឍមណ្ឌលសកម្មភាពកំចាត់មីនកម្ពុជា ជួបពិភាក្សាការងារជាមួយគណះប្រតិភូមកពីក្រុងអូគីណាវ៉ា នៃប្រទេសជប៉ុនមាន ២ ក្រុមគឺ ១. ក្រុមជំនាញសារមន្ទីរសន្តិភាពនៃក្រុងអូគីណាវ៉ា និង ២.ក្រុមហ៊ុនជំនាញផលិតឧបករណ៍រាវយុទ្ធភណ្ឌមិន ទាន់ផ្ទុះ។ដែលការពិភាក្សាគ្នាផ្តោតសំខាន់លេីកការពង្រឹងកិច្ចសហប្រតិបត្តិការ ជាពិសេសការបញ្ជូនមន្ត្រីអង្គភាពសុីម៉ាក់ទៅសិក្សាដកពិសោធការងារគ្រប់គ្រងសារមន្ទីរសន្តិ ភាពនៅក្រុងអូគីណាវ៉ានៃប្រទេសជប៉ុន នៅថ្ងៃទី ១០ ខែ មិថុនា ឆ្នាំ២០២៤នេះ នៅទីបញ្ជាការដ្ឋានសុីម៉ាក់ភ្នំពេញ ។ឯកឧត្តម ហេង រតនា បានបញ្ជាក់ជូនភ្ញៀវថា ដោយ សារកត្តានេះឯកឧត្តមក៍បានជម្រាបជូនដល់ថ្នាក់ដឹកនាំជា ពិសេស សម្តេចធិបតីនាយករដ្ឋមន្ត្រីដើម្បីរៀបចំផែនការរយះពេលវែងក្នុងការដោះស្រាយបញ្ហាគ្រាប់សំណល់គ្រាប់យុទ្ធភណ្ឌមិនទាន់ផ្ទុះ ដើម្បីធានាសុខសុវត្ថិភាពអាយុ ជីវិតប្រជាពលរដ្ឋនិងការអភិវឌ្ឍសេដ្ឋកិច្ចនៅកម្ពុជា។ ដែលកិច្ចផែនការនេះ រាប់ថាជាដំណាក់កាលទី2ដ៍សំខាន់តទៅ ទៀតក្នុងការពន្លឿនល្បឿននៃសកម្មភាពការបោសសំអាតនិងកម្ទេចគ្រាប់មីននិងសំណល់យុទ្ធភណ្ឌសល់ពីសង្គ្រាមឲ្យអស់ដើម្បីបន្តធានាសុវត្ថិភាពជូនប្រជាពលរដ្ឋនិងគាំទ្រអភិវឌ្ឍសេដ្ឋកិច្ចនៃប្រទេសជាតិ បន្ទាប់ពីដំណាក់កាលទី1 ក្នុងកិច្ចប្រតិបត្តិការមានរយះពេលជាង30ឆ្នាំមកហើយ។ឯកឩត្តមបន្តថា កម្លាំងស៊ីម៉ាក់ក្រៅពីប្រឹងប្រែងបោស សំអាតនៅលើផ្ទៃដីនោះ បច្ចប្បន្នប្រតិបត្តិការស្រាវជ្រាវនិងស្តារយកគ្រាប់នៅក្រោមបាតទឹកទន្លេ របស់កម្លាំងជំនាញរបស់ស៊ីម៉ាក់កំពុងតែខិតខំមុជរាវជារៀងរាល់ថ្ងៃដើម្បីបើក ផ្លូវមុខទឹកផ្តល់សុខសុវត្ថិ ភាពដល់ប្រជាពលរដ្ឋរស់នៅតាមដងទន្លេ ការនេសាទនិងការបង្កើនទំនុកចិត្តសម្រាប់ធ្វើនាវាទេសចរ និងការដឹកជញ្ជូនទំនិញផ្សេងៗតាមផ្លូវទឹកក្នុងដំណើរការពង្រឹងសេដ្ឋកិច្ចរបស់កម្ពុជា ។ ឯកឩត្តមបានប្រាប់ប្រតិភូបន្តថា គ្រឿងចក្រនិងឩបករណ៍ប្រើប្រាស់ទំនើបៗរាប់ទាំងត្រូននិងម៉ាស៊ីនស្គែនស្វែង រកមីននិងគ្រាប់មិនទាន់ផ្ទុះកប់ក្នុងដីគឺជាកត្តាចាំបាច់ណាស់ ពីព្រោះប្រជាជនកម្ពុជានៅប្រឈមនឹងគ្រោះថ្នាក់បន្តទៀតដោយសារនៅមានផ្ទៃដីទំហំប្រមាណ 1,300គីឡូមែត្រក្រឡា ជាតំបន់ដែលដឹងថានៅមានគ្រាប់មីនហើយប្រជាពលរដ្ឋកំពុងតែប្រើប្រាស់ដីទាំងនោះទាំងយ៉ាងមមា ញឹកនោះ។ ដូចន្នេះឯកឧត្តមសង្ឃឹមថា តាមរយះប្រតិភូនៃក្រុមហ៊ុនជប៉ុននេះនឹងមានកិច្ចសហការជួយដល់ស៊ីម៉ាក់ដើម្បីឲ្យកម្ពុជាឆាប់ទទួលបានជោគជ័យជាប្រទេសលែងមានមនុស្សនិងសត្វរងគ្រោះថ្នាក់ដោយសារមីននិងគ្រាប់យុទ្ធភ័ណ្ឌមិនទាន់ផ្ទុះសល់ពីសង្គ្រាមតទៅទៀត៕អត្ថបទ ៖ ភារម្យ

ផ្តន្ទាទោសស្ត្រីជាប់ចោទម្នាក់ដាក់ពន្ធនាគារអស់មួយជីវិត ករណីដឹកជញ្ជូនឆ្លងដែនដោយខុសច្បាប់ នូវសារធាតុញៀនជាង ៤គីឡូក្រាម

ភ្នំពេញ៖ ក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ សម្រេចផ្តន្ទាទោសលើជនជាប់ចោទម្នាក់ឈ្មោះ LOPEZ VACA KAREN CECIA ភេទស្រី អាយុ ៣៧ឆ្នាំ ជនជាតិ បូលីវី ដាក់ពន្ធនាគារ អស់មួយជីវិត ពីបទដឹកជញ្ជូនឆ្លងដែនដោយខុសច្បាប់នូវសារធាតុញៀនជាង ៤គីឡូក្រាម បទល្មើសព្រហ្មទណ្ឌដែលមានចែង និងផ្តន្ទាទោសតាម មាត្រា ៤០ កថាខណ្ឌទី២ និងកថាខណ្ឌទី៧ នៃច្បាប់ ស្តីពី ការត្រួតពិនិត្យគ្រឿងញៀន។ ជុំវិញករណីនេះកន្លងទៅសមត្ថកិច្ចមន្ទីរប្រឆាំងគ្រឿងញៀន ប្រាប់ឲ្យដឹងថា បន្ទាប់ពីទទួលព័ត៌មានសម្ងាត់ពីទីភ្នាក់ងារអនុវត្តច្បាប់ប្រឆាំងគ្រឿងញៀន អាមេរិក (DEA) និងមន្ត្រីសហព័ន្ធប្រេស៊ីល កាលពីថ្ងៃទី១០ ខែកញ្ញា ឆ្នាំ២០២៣ កម្លាំងជំនាញមន្ទីរប្រឆាំងគ្រឿងញៀន សហការជាមួយកម្លាំងអគ្គនាយកដ្ឋានអន្តោប្រវេសន៍ និងអគ្គនាយកដ្ឋានគយ និងរដ្ឋាករ ប្រចាំនៅអាកាសយានដ្ឋានអន្តរជាតិភ្នំពេញ បានធ្វើការត្រួតពិនិត្យវ៉ាល្លីសរបស់ជនសង្ស័យ ដែលធ្វើដំណើរមកពីទីក្រុង រីយ៉ូ ប្រទេសប្រេស៊ីល ឆ្លងកាត់ឌុយបៃ បន្តមកប្តូរជើងហោះហើរនៅម៉ាឡេស៊ី រួចធ្វើដំណើរមកអាកាសយានដ្ឋានអន្តរជាតិភ្នំពេញ តាមជើងហោះហើរ MH762 ពីម៉ាឡេស៊ី ឃាត់ខ្លួន ជនសង្ស័យឈ្មោះ LOPEZ VACA KAREN CECIA ភេទស្រី ជនជាតិ បូលីវី ឆ្នាំកំណើត១៩៨៧។ក្រោយធ្វើតេស្តបឋមបង្ហាញលទ្ធផល បានបង្ហាញថា ជាល្បាយគ្រឿងញៀន ប្រភេទកូកាអ៊ីន (Cocaine) ចំនួន ២១បន្ទះធំ និង២២បន្ទះតូច (សរុប៤៣ បន្ទះ) ជាប់ជាមួយសាច់សម្លៀកបំពាក់ ដោយធ្វើការដេរភ្ជាប់ខោអាវ ដែលមានទម្ងន់សរុប ៤៣៥៦ក្រាម (គិតទាំងសំបកប្លាស្ទីក និងសាច់កំណាត់)។ក្រោយពីឃាត់បានជនសង្ស័យត្រូវបានជំនាញមន្ទីរប្រឆាំងបទល្មើសគ្រឿងញៀន កសាងសំណុំរឿងបញ្ជូនទៅសាលាដំបូងរាជធានីភំ្នពេញ ដើម្បីចាត់ការតាមនីតិវិធី ៕

អភិបាលខេត្តពោធិ៍សាត់ ដោះស្រាយករណីប្រជានេសាទស្នើសុំអូសលៀស ដោយកម្លាំងម៉ាស៊ីន ក្នុងរដូវបិទនេសាទ

ពោធិ៍សាត់៖ នៅព្រឹកថ្ងៃទី១១ ខែមិថុនា ឆ្នាំ២០២៤ នៅវេទិកាដោះស្រាយទំនាស់ ក្នុងសាលាខេត្តពោធិ៍សាត់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអនុញ្ញាតឱ្យបងប្អូនប្រជានេសាទប្រមាណ៤០គ្រួសារ ចូលជួបពិភាក្សារកដំណោះស្រាយជុំវិញការស្នើសុំ អូសលៀសដោយប្រើកម្លាំងម៉ាស៊ីន នៅបឹងទន្លេសាប ក្នុងភូមិសាស្ត្រស្រុកក្រគរ កំឡុងពេលរដូវបិទនេសាទ។មានប្រសាសន៍ក្នុងឱកាសនោះ ឯកឧត្តម ខូយ រីដា បានលើកឡើងថា ក្នុងនាមរដ្ឋបាលខេត្ត គឺមានការយកចិត្តទុកដាក់លើជីភាពរស់នៅរបស់បងប្អូនប្រជាពលរដ្ឋ ហើយក្នុងករណីបងប្អូនប្រជានេសាទ ធ្វើការនេសាទគោរពតាមច្បាប់អនុញ្ញាត ហើយមាន កម្លាំងសមត្ថកិច្ច មន្ត្រីជំនាញ ឬជនណាមួយ មកគៀបសង្កត់យកលុយពីបងប្អូន គឺឯកឧត្តម នឹងចាត់ការជនទាំងនោះតាមច្បាប់ដើម្បីការពារផលប្រយោជន៍ជូនបងប្អូន តែបើបងប្អូនធ្វើការនេសាទមិនត្រូវតាមច្បាប់កំណត់នោះ គឺពុំមានអ្នកណាអាចជួយការពារបងប្អូនបានទេ ។ ដូចនេះជុំវិញករណីដែលបងប្អូនស្នើរសុំ អូសលៀសដោយប្រើម៉ាស៊ីន ក្នុងរដូវបិទនេសាទ ត្រូវស្តាប់ការពន្យល់ពីខាងជំនាញជនផល ពាក់ព័ន្ធផ្លូវច្បាប់ និងផលប៉ះពាលនានា ហើយបងប្អូនត្រូវពិចារណាថ្លឹងថ្លែង ដើម្បីប្រយោជន៍ដល់កូនចៅយើងជំនាន់ក្រោយ។ក្នុងនោះដែរ លោក ភុំ វិមល នាយខណ្ឌរដ្ឋបាលជលផលខេត្តពោធិ៍សាត់ បានពន្យល់ប្រជានេសាទដោយលើកឡើងថា ការស្នើរសុំរបស់បងប្អូន អូសលៀសដោយប្រើកម្លាំងម៉ាស៊ីន នៅបឹងទន្លេសាប កំឡុងពេលរដូវបិទនេសាទ គឺច្បាប់មិនអនុញ្ញាតនោះទេ ហើយវាធ្វើឱ្យប៉ះពាលធ្ងន់ធ្ងរ លើជីវៈចម្រុះក្នុងបឹងទន្លេសាប ។ តែដោយសារកត្តាជីវភាព គឺអាចឱ្យបងប្អូនធ្វើការនេសាទលក្ខណៈគ្រួសារអូសដោយដៃ ដោយមិនមានការអូសដោយប្រើកម្លាំងម៉ាស៊ីន ហើយប្រើ មងដែលមានក្រឡាចាប់ពី ២ហ៊ុនកន្លះ ឡើងទៅ ។ក្នុងនោះដែរ ដោយបងប្អូនប្រជានេសាទភាគច្រើនមានជីវភាពខ្វះខាត ឯកឧត្តម ខូយ រីដា បានឧបត្ថម្ភអង្ករក្នុង ១គ្រួសារ ២០គីឡូក្រាម នឹងសំណូមពរឱ្យប្រជានេសាទទាំងអស់គោរពតាមច្បាប់ ដើម្បផលប្រយោជន៍រួម៕ អត្ថបទ៖ ភិរុណ ពៅ

សមត្ថកិច្ចមិនដកថយការទប់ស្កាត់ក្មេងទំនើង ខណៈត្រឹមមួយសប្ដាហ៍ចុងក្រោយនេះ ឃាត់ខ្លួនជាង៣០០នាក់

ភ្នំពេញ៖ កម្លាំងនគរបាលជាតិ បានសហការជាមួយសមត្ថកិច្ចពាក់ព័ន្ធ កំពុងបន្តទប់ស្កាត់នូវករណីក្មេងទំនើងនៅទូទាំងប្រទេស មិនមានការដកថយនោះទេ ខណៈត្រឹមរយៈពេលមួយសប្ដាហ៍ប៉ុណ្ណោះ នៅក្នុងខែមិថុនា ឆ្នាំ២០២៤នេះ បង្ក្រាបក្មេងទំនើង និងឃាត់ខ្លួនបានចំនួនជាង៣០០នាក់ ។បើតាមលោក ទូច សុខៈ អ្នកនាំពាក្យរងក្រសួងមហាផ្ទៃ បានឲ្យដឹងថា ចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៤ កម្លាំងនគរបាលបានបង្ក្រាបក្មេងទំនើង បានចំនួន៦៨ករណី ស្ថិតនៅក្នុងរាជធានីខេត្តចំនួន១៨ ដែលក្នុងនោះរាជធានីខេត្តចំនួន៤ មានការកើតឡើង និងបង្ក្រាបបានគួរឲ្យកត់សម្គាល់ជាងគេ ក្នុងនោះ រាជធានីភ្នំពេញ កើតឡើងចំនួន ១៨ករណី ឃាត់ខ្លួនក្មេងទំនើងបាន ៣៦នាក់ ខេត្តកណ្ដាល កើតឡើងចំនួន ៨ករណី ឃាត់ខ្លួន៤១នាក់ ខេត្តកំពង់ស្ពឺ កើតឡើងចំនួន ៦ករណី ឃាត់ខ្លួន៤០នាក់ និងខេត្តតាកែវ កើតឡើងចំនួន ៦ករណី ឃាត់ខ្លួនបាន ៣៥នាក់។លោកបន្តថា ចំពោះការបង្ក្រាប និងទប់ស្កាត់នូវករណីក្មេងទំនើងនេះ កម្លាំងនគរបាល បាននិងកំពុងខិតខំ ទាំងយប់ទាំងថ្ងៃ ដោយបន្ទាប់ពីឃាត់ខ្លួនបានហើយ ក្មេងទំនើងមួយចំនួនដែលសង្ស័យក្នុងករណីបទល្មើសអ្វីមួយ ត្រូវកសាងនូវសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់ ហើយមួយចំនួនទៀត ត្រូវធ្វើការអប់រំណែនាំ នឹងឲ្យត្រឡប់ទៅផ្ទះវិញ។លោក ទូច សុខៈ បានបញ្ជាក់ថា សម្រាប់យុវជនទាំងអស់ មិនត្រូវដាក់ជាប់ខ្លួននូវសម្ភារ ឬឧបករណ៍ដែលបង្កគ្រោះថ្នាក់ ឬអាវុធខុសច្បាប់ដែលជាមុខសញ្ញា គឺសមត្ថកិច្ចអាចឃាត់ខ្លួនកសាងសំណុំរឿងបញ្ជូនទៅតុលាការជាដើម ។គួរបញ្ជាក់ថា សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីពេលថ្មីៗនេះ បានបញ្ជាក់ជាថ្មី មិនមានការដកថយនោះទេ ចំពោះការបង្ក្រាប និងទប់ស្កាត់ករណីក្មេងទំនើង ព្រោះករណីក្មេងទំនើងនេះ បានបង្កភាពមិនសប្បាយរីករាយដល់ប្រជាពលរដ្ឋ អសន្តិសុខ និងករណីខ្លះ មានសភាពកាច់សាហាវ ប្រើប្រាស់ហិង្ស បង្កឲ្យមានអ្នកស្លាប់ និងរបួសផងដែរ ខណៈវិធានការបង្ក្រាបនូវក្មេងទាំងអស់នោះ មានការសាទរ និងគាំទ្រយ៉ាងខ្លាំងពីសំណាក់ប្រជាពលរដ្ឋនៅទូទាំងប្រទេស៕ អត្ថបទ បាន សុខរិទ្ធិ

អ្នកជំនាញអាជ្ញាធរជាតិអប្សរា ធ្វើកំណាយស្រាវជ្រាវស្ពានហាលខាងកើតប្រាសាទបេងមាលា

ក្រុមការងារបច្ចេកទេសនាយកដ្ឋានអភិរក្សប្រាសាទនិងបុរាណវិទ្យា នៃអាជ្ញាធរជាតិអប្សរា កំពុងធ្វើកំណាយស្រាវជ្រាវទិន្នន័យបុរាណវិទ្យាទៅលើរចនាសម្ពន្ធរបស់ស្ពានហាលផ្នែកខាងកើតនៃប្រាសាទបេងមាលា ដើម្បីឈានទៅដល់គម្រោងជួសជុលនៅពេលខាងមុខ។លោក ពុទ្ធ សុទ្ធ មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា ដែលបានដឹកនាំធ្វើកំណាយឱ្យដឹងថា ក្រុមការងារបានចាប់ផ្ដើមធ្វើកំណាយស្រាវជ្រាវនៅលើស្ពានហាលនេះ គឺដើម្បីពិនិត្យលទ្ធភាពក្នុងការជួសជុលរចនាសម្ពន្ធស្ពានហាលខាងកើតប្រាសាទបេងមាលាឡើងវិញ។លោក ពុទ្ធសុទ្ធ ឱ្យដឹងទៀតថា ពេលកំណាយបកស្រទាប់ដីខាងលើឃើញថា កម្រាលស្ពានហាលផ្នែកខាងកើតនៃប្រាសាទបេងមាលាមានការស្រុតខ្លាំងដោយកន្លែង គ្រឹះក៏ចុះខ្សោយ និងហែកចេញពីគ្នា ធ្វើឱ្យគ្រឿងបង្គុំរបស់រចនាសម្ពន្ធស្ពានហាលមួយចំនួនមានដូចជា សសរ បង្កាន់ដៃនាគ ខ្លួននាគ ក្បាលនាគ បាក់ជាច្រើនបំណែកធ្លាក់ចូលក្នុងកសិន្ធុ និងខ្លះទៀតកប់ក្នុងដី ដែលបណ្តាលមកពីកត្តាអាយុកាល និងធម្មជាតិ។ សូមបញ្ជាក់ថា គម្រោងជួសជុលស្ពានហាលខាងកើតប្រាសាទបេងមាលា ស្ថិតក្រោមមូលនិធិនៃកិច្ចសហប្រតិបត្តិការមេគង្គ-ឡានឆាង៕

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញជាអធិបតីបើកសិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ

ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ នៅព្រឹកថ្ងៃទី១១ ខែមិថុនា ឆ្នាំ២០២៤ នៅសណ្ឋាគារសុខាភ្នំពេញ។សិក្ខាសាលានេះ រៀបចំឡើងដើម្បីផ្ដល់ជាព័ត៌មានបច្ចុប្បន្នភាព នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ជូនដល់សមាជិកសមាជិការរដ្ឋសភា និងព្រឹទ្ធសភា ឱ្យទទួលបាននូវព័ត៌មានគ្រប់ជ្រុងជ្រោយអំពីវឌ្ឍនភាព ទិសដៅ និងគោលដៅយុទ្ធសាស្ត្រចុងក្រោយសម្រាប់អភិវឌ្ឍន៍ប្រព័ន្ធគ្រប់គ្រងហិរញ្ញវត្ថុឱ្យបានឈានដល់កម្រិតស្ដង់ដារ និងឧត្ដមានុវត្តអន្តរជាតិដែលរាជរដ្ឋាភិបាលរំពឹងទុក។លើសពីនោះទៀត សិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈនាពេលនេះ ក៏នឹងផ្ដល់ជាធាតុចូលជូនអង្គនីតិប្បញ្ញត្តិ ដើម្បីអនុវត្តតួនាទីនីតិកម្ម តាមដាន និងត្រួតពិនិត្យការអនុវត្តច្បាប់ ព្រមទាំងលើកកម្ពស់តួនាទីរបស់អង្គនីតិប្បញ្ញត្តិក្នុងការចូលរួមក្នុងកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ក៏ដូចជាការលើកកម្ពស់តួនាទីភារកិច្ចរបស់អាជ្ញាធរសវនកម្មជាតិចំពោះកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។សូមជម្រាបជូនថា សិក្ខាសាលានេះ មានការអញ្ជើញចូលរួមពីឯកឧត្ដម លោកជំទាវ ជាសមាជិក សមាជិការដ្ឋសភា ព្រឹទ្ធសភា អាជ្ញាធរសវនកម្មជាតិ និងមន្ត្រីពាក់ព័ន្ធនៃអគ្គលេខាធិការដ្ឋានសភាទាំងពីរផងដែរ៕

ជិត៨ខែកម្មវិធីបណ្តុះបណ្តាលជំនាញវិជ្ជាជីវៈទាក់ទាញយុវជនចូលរៀនជាង ៤ម៉ឺននាក់

គិតចាប់ពីប្រកាសដាក់ឱ្យដំណើរការ កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ កាលពីថ្ងៃទី១៤ ខែវិច្ឆិកា ឆ្នាំ២០២៣ រហូតត្រឹមថ្ងៃទី១០ ខែមិថុនា ឆ្នាំ២០២៤នេះ ក្រសួងការងារ និងបណ្តុះបណ្តាលវិជ្ជាជីវៈ បានទទួលការចុះឈ្មោះយុវជន និងសិស្សចូលរៀនបានចំនួនសរុបជាង ៤ម៉ឺននាក់ ក្នុងនោះសិស្សកំពុងរៀនមានចំនួនជាង ១ម៉ឺន ៧ពាន់នាក់។ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ឱ្យដឹងថា កាលពីខែឧសភាកន្លងទៅនៅក្នុងចំណោមគ្រឹះស្ថានបណ្តុះបណ្តាលវិជ្ជាជីវៈបច្ចេកទេសចំនួន ៣៧ ដែលស្ថិតនៅក្រោមក្រសួងការងារ បានធ្វើតេស្តបញ្ចប់សមត្ថភាពសិស្សដែលបានរៀនវគ្គព្រឹក និងរសៀលចំនួនជាង ៣,២០០ នាក់ ក្នុងនោះសិស្សដែលប្រឡងជាប់មានចំនួនជិត ៣ពាន់នាក់។ ហើយគិតមកដល់ពេលនេះ ក្នុងចំណោមសិស្សជិត៣ពាន់នាក់ មានក្រុមហ៊ុន រោងចក្រ សហគ្រាសកំពុងទាក់ទងចូលបម្រើការងារជាបណ្តើរៗក្នុងនោះមានមួយចំនួនក៏បានបើកមុខរបរអាជីវកម្មខ្លួនឯងដែរ។ឯកឧត្តមបានបញ្ជាក់បន្ថែមថា ការទទួលបានជំនាញបច្ចេកទេស និងវិជ្ជាជីវៈ ពិតជាមានសារសំខាន់ណាស់ សម្រាប់ជីវិតនៅក្នុងវិកស័យការងារ ដែលសិស្សទាំងអស់អាចបើកអាជីវកម្មដោយខ្លួនឯងក៏បាន ឬក៏អាចធ្វើការតាមរោងចក្រ សហគ្រាស គ្រឹះស្ថាននានាក៏បាន ដែលមានការងារល្អ ប្រាក់ខែខ្ពស់ ហើយក៏ជាឱកាសច្រើនដែរសម្រាប់ប្រទេសកម្ពុជា ចាប់ពីពេលនេះតទៅដែលត្រូវការអ្នកជំនាញច្បាស់លាស់មួយសម្រាប់ចូលធ្វើការងារ។ទាក់ទិនកម្មវិធីបណ្តុះបណ្តាលជំនាញនេះ សិស្សចំនួន២នាក់ ដែលទើបបញ្ចប់វគ្គបណ្តុះបណ្តាលខាងផ្នែកកែច្នៃបន្លែផ្លែឈើ នៅវិទ្យាស្ថានពហុបច្ចេកទេសកម្ពុជា (NPIC) គឺលោក អឿន បញ្ញា និងអ្នកស្រី ហួន ធារី បានឱ្យព័ត៌មាន ប៊ីធីវី ដឹងនៅព្រឹកថ្ងៃទី១១ ខែមិថុនានេះថា ពួកគាត់មានអារម្មណ៍ថារំភើប និងសប្បាយរីករាយ ដែលបានរៀនជំនាញដែលខ្លួនពេញចិត្ត បន្ថែមពីនេះ គឺការសិក្សាដោយមិនគិតថ្លៃអ្វីទាំងអស់ ថែមទាំងមានការយកចិត្តទុកដាក់យ៉ាងខ្ពស់ពីគ្រូបង្រៀន។យុវជនទាំងពីររូបនេះ បានទទួលស្គាល់ទៀតថា កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈរបស់រាជរដ្ឋាភិបាលអាណិត្តទី៧នេះ ពិតជាផ្តល់ផលប្រយោជន៍ជាច្រើនដល់ប្រជាពលរដ្ឋទាំងអស់ ជាពិសេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យក្រៅពីការសិក្សាដោយឥតគិតថ្លៃ ថែមទាំងទទួលបានប្រាក់ឧបត្ថម្ភប្រចាំខែផងដែរ។សូមជម្រាបថា កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈនេះ ក្រសួងការងារ និងបណ្តុះបណ្តាលវិជ្ជាជីវៈបានកំណត់យកមុខជំនាញចំនួន ៣៨ នៅក្នុងវិស័យអាទិភាពចំនួន១០ រួមមាន៖ សំណង់, អគ្គិសនីនិងថាមពល, បរិក្ខាត្រជាក់និងកម្តៅ, ទេសចរណ៍, មេកានិកទូទៅ/មេកានិករថយន្ត, សេវាកម្ម, កសិកម្ម និងកសិ-ឧស្សាហកម្ម , កម្មន្តសាល , អេឡិចត្រូនិច និងធុរកិច្ច និងព័ត៌មានវិទ្យា៕ អត្ថបទ ឈិត បូរ៉ាវី

សម្តេចធិបតី ហ៊ុន ម៉ាណែត បានអនុម័តជាឯកឆន្ទដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ សំដៅកសាងកម្ពុជាមួយគ្មានអេដស៍

ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានបញ្ជាក់ថា ក្នុងដំណើរឆ្ពោះទៅបញ្ចប់អេដស៍ដែលជាគ្រោះគម្រាមកំហែងដល់សុខភាពសាធារណៈ រាជរដ្ឋាភិបាលកម្ពុជា បានដាក់ចេញនូវវិធានការជាបន្តបន្ទាប់ ជាពិសេសនៅថ្ងៃទី១៥ ខែមីនា ឆ្នាំ២០២៤ កន្លងទៅកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់បំផុត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុម័តជាឯកច្ឆន្ទដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ សំដៅកសាងកម្ពុជាមួយគ្មានអេដស៍។ការថ្លែងរបស់ឯកឧត្តមទេសរដ្ឋមន្ត្រី អៀង មូលី យ៉ាងដូច្នេះក្នុងឱកាសបើកកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍ លើកទី១ ឆ្នាំ២០២៤ នៅទីស្តីការគណៈរដ្ឋមន្ត្រី នាព្រឹកថ្ងៃទី១១ ខែមិថុនា ឆ្នាំ២០២៤នេះ។ ជាមួយគ្នានេះ ឯកឧត្តមទេសរដ្ឋមន្រី្ត អៀង មូលី ក៏សូមថ្លែងនូវការកោតសរសើរដ៏ស្មោះ ជូនចំពោះក្រសួង ស្ថាប័នពាក់ព័ន្ធទាំងអស់ក្នុងការខិតខំប្រឹងប្រែង និងកិច្ចសហការជាមួយអាជ្ញាធរជាតិប្រយុទ្ធនឹងជំងឺអេដស៍ ដើម្បីជំរុញ និងចូលរួមអនុវត្ត “សេចក្តីជូនដំណឹងលេខ ២១៣ សជណ.សស ចុះថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែកុម្ភៈ ឆ្នាំ២០១៩ របស់រាជរដ្ឋាភិបាលកម្ពុជា រហូតបានទទួលលទ្ធផលជាផ្លែផ្កាគួរជាទីពេញចិត្ត។ឯកឧត្តមទេសរដ្ឋមន្រី្ត បានសង្កត់ធ្ងន់ថា គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ បានបញ្ជាក់នូវការប្តេជ្ញាចិត្ត ផ្នែកនយោបាយយ៉ាងមុតមាំបន្ថែមទៀតរបស់រាជរដ្ឋាភិបាលនីតិកាលទី៧ នៃរដ្ឋសភា ដែលបន្តបេសកកម្មដ៏ថ្លៃថ្លាពីរាជរដ្ឋាភិបាលនីតិកាលមុនៗ ក្រោមការដឹកនាំដ៏ឆ្នើមរបស់សម្តេចអគ្គមហាសេនាបតីតេជោ ហ៊ុន សែន ក្នុងការបន្តអភិវឌ្ឍន៍មូលធនមនុស្ស និងការលើកម្ពស់សុខភាព និងសុខមាលភាពប្រជាជន សមស្របតាមយុទ្ធសាស្ត្របញ្ចកោណដំណាក់កាល ទី១។ គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ បានត្រូវរៀបចំឡើងជាឧបករណ៍ដ៏មុតស្រួចក្នុងការជំរុញការចូលរួមការងារឆ្លើយតបមេរោគអេដស៍ និងជំងឺអេដស៍ជាលក្ខណៈពហុវិស័យទាំងនៅថ្នាក់ជាតិ និងទាំងនៅថ្នាក់ក្រោមជាតិ ដោយឈរលើសសរស្តម្ភទាំងបីគឺ៖ ១) ភាពជាអ្នកដឹកនាំ ឬភាពជាម្ចាស់ ២)ភាពជាដៃគូ និង៣) ការវិនិយោគ រួមជាមួយគោលការណ៍បី មួយគឺ៖ យុទ្ធសាស្ត្រ ឬក្របខ័ណ្ឌផែនការសកម្មភាពតែមួយ, ស្ថាប័នសម្របសម្រួលតែមួយ និងប្រព័ន្ធតាមដាន និងវាយតម្លៃតែមួយ។ លើសពីនេះ គោលនយោបាយជាតិក៏បានចង្អុលទិស ក្នុងការរៀបចំផែនការយុទ្ធសាស្ត្រជាតិ ទូលំទូលាយ និងពហុវិស័យលុបបំបាត់ជំងឺអេដស៍ ដើម្បីធានានូវការឆ្លើយតបមួយឱ្យបានសមស្របទៅ នឹងសេចក្តីត្រូវការជាអាទិភាពក្នុងចំណោមក្រុមគោលដៅ រួមជាមួយនឹងការប្រើប្រាស់ធនធានប្រកប ដោយប្រសិទ្ធផល និងប្រសិទ្ធភាពឈានទៅសម្រេចបាននូវគោលដៅតាមកាលកំណត់។ឯកឧត្តមទេសរដ្ឋមន្ត្រី អៀង មូលី សូមជម្រាបជូនអង្គពិធីទាំងមូលជ្រាបថា យោងតាមគម្រោងផែនការសកម្មភាពឆ្នាំ២០២៤ កិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី១ ធ្វើឡើងដើម្បីពិនិត្យមើលរួមគ្នានូវវឌ្ឍនភាព សមិទ្ធផល ប្រសិទ្ធភាព ឬបញ្ហាប្រឈម ក្នុងការប្រយុទ្ធនឹងជំងឺអេដស៍ សម្រាប់រយៈពេល៦ខែដើមឆ្នាំ២០២៤។ តាមរបៀបវារៈ កិច្ចប្រជុំយើងនឹងមានបទបង្ហាញចំនួនពីរ រួមមាន ៖ទី១.បទបង្ហាញសេចក្តីព្រាងស្តីពីវឌ្ឍនភាពនៃការអនុវត្តសេចក្តីសម្រេចចិត្តនៃកិច្ចប្រជុំពេញអង្គលើកទី២ ឆ្នាំ២០២៣ បង្ហាញជូនដោយឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍។ទី២.បទបង្ហាញស្តីពីគោលនយោបាយជាតិលុបបំបាត់ជំងឺអេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ បង្ហាញជូនដោយឯកឧត្តមវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍។ បន្ទាប់មកយើងនឹងមានការពិភាក្សារួមគ្នា និងដាក់ចេញនូវសេចក្តីសម្រេចចិត្តកិច្ចប្រជុំពេញអង្គ អាជ្ញាធរជាតិប្រយុទ្ធនឹងជំងឺអេដស៍លើកទី១ ឆ្នាំ២០២៤ ផងដែរ៕អត្ថបទ រដ្ឋា

គណៈប្រតិភូជាន់ខ្ពស់ក្រសួងអធិការកិច្ចកម្ពុជា ជួបពិភាក្សាការងារជាមួយ លោកឧត្តមសេនីយ៍ទោ Do Minh Phuong អនុប្រធានក្រុមហ៊ុន Viettel

នាថ្ងៃទី១០ ខែមិថុនា ឆ្នាំ២០២៤ ឯកឧត្តមរដ្ឋមន្រ្តី ហួត ហាក់ បាន ដឹកនាំគណៈប្រតិភូជាន់ខ្ពស់ក្រសួងអធិការកិច្ច នៃព្រះរាជាណាចក្រកម្ពុជា អញ្ជើញជួបពិភាក្សាការងារ លោកឧត្តមសេនីយ៍ទោ Do Minh Phuong អនុប្រធានក្រុមហ៊ុន Viettel នៅទីស្នាក់កណ្តាលក្រុមហ៊ុន ដែលស្ថិតនៅរដ្ឋធានីហាណូយ សាធារណរដ្ឋសង្គមនិយមវៀតណាម។ក្នុងឱកាសនោះដែរ លោកឧត្តមសេនីយ៍ទោ អនុប្រធានក្រុមហ៊ុន Viettel បានជម្រាបជូនគណៈប្រតិភូជាន់ខ្ពស់ក្រសួងអធិការកិច្ចកម្ពុជា អំពីសាវតា បេសកម្ម និងសមិទ្ធផលនានារបស់ក្រុមហ៊ុនដែលសម្រេចបាននាពេលកន្លងមក ហើយបានប្រែក្លាយជាក្រុមហ៊ុនដ៏ធំ ឈានមុខគេនៅប្រទេសវៀតណាម និងបានចូលរួមចំណែកយ៉ាងច្រើនដល់ការអភិវឌ្ឍសេដ្ឋកិច្ច និងសង្គមរបស់ប្រទេសវៀតណាម ព្រមទាំងបានពង្រីកសក្ដានុពល តាមរយៈការធ្វើសមាហរណកម្មទៅក្នុងទីផ្សាអន្តរជាតិយ៉ាងខ្លាំងក្លា ជាពិសេសការបង្កើតក្រុមហ៊ុនបុត្រសម្ព័ន្ធនៅក្នុងបណ្ដាប្រទេសជាមិត្តនៅក្នុងអាស៊ី ក៏ដូចជានៅប្រទេសកម្ពុជា គឺក្រុមហ៊ុនមិត្តហ្វូន (Metfone) ជាបុត្រសម្ព័ន្ធរបស់ ក្រុមហ៊ុនViettel ដែលបានវិនិយោគចាប់តាំងពីខែកុម្ភៈ ឆ្នាំ២០០៩មកម្លេះ។ជាការឆ្លើយតប ឯកឧត្តមរដ្ឋមន្រ្តី បានសម្តែងនូវក្តីសោមនស្សរីករាយ ដែលបានមកជួបពិភាក្សាការងារជាមួយថ្នាក់ដឹកនាំ និងបុគ្គលិកក្រុមហ៊ុន Viettel នៅទីស្នាក់ការកណ្ដាលរបស់ក្រុមហ៊ុន និងបានថ្លែងអំណរគុណយ៉ាងជ្រាលជ្រៅ ចំពោះការស្វាគមន៍យ៉ាងកក់ក្តៅរបស់ លោកឧត្តមសេនីយ៍ទោ និងថ្នាក់ដឹកនាំរបស់ក្រុមហ៊ុន ចំពោះគណៈប្រតិភូជាន់ខ្ពស់ក្រសួងអធិការកិច្ច ព្រមទាំងបានកោតសរសើរ និងវាយតម្លៃខ្ពស់ចំពោះសមិទ្ធផលនានារបស់ក្រុមហ៊ុន ជាពិសេសនៅកម្ពុជា ក្រុមហ៊ុន Metfone បានចូលរួមលើកកម្ពស់កិច្ចសហប្រតិបត្តិការ រវាងប្រទេសវៀតណាម និងប្រទេសកម្ពុជា ក៏ដូចជាការចូលរួមចំណែកក្នុងការអភិវឌ្ឍសេដ្ឋកិច្ចសង្គមនៅកម្ពុជា តួយ៉ាងក្រុមហ៊ុន Metfone បានផ្ដល់ឱកាសការងារពេញម៉ោងដល់ប្រជាជនកម្ពុជាប្រមាណជា ៣,០០០នាក់ ការងារក្រៅម៉ោងប្រមាណ ១០,០០០នាក់ និងមានការិយាល័យលក់ ចំនួន ៣០,០០០កន្លែង មិនតែប៉ុណ្ណោះ ក្រុមហ៊ុននេះបាននិងកំពុងចូលរួមយ៉ាងសកម្មក្នុងការអភិវឌ្ឍឌីជីថលូបនីយកម្មនៅកម្ពុជា មានជាអាទិ៍ កសាងហេដ្ឋារចនាសម្ព័ន្ធឌីជីថល វេទិកា និងសេវាកម្ម ក្នុងការបង្កើតសង្គមឌីជីថល។ជាមួយគ្នានេះដែរ ឯកឧត្តមរដ្ឋមន្រ្តី កត់សម្គាល់ឃើញថា ក្រុមហ៊ុន Metfone តែងតែបង្ហាញនូវភាពសកម្មក្នុងការទទួលខុសត្រូវសង្គម (Corporate Social Responsibility) និងជាក្រុមហ៊ុនឈានមុខគេរបស់វៀតណាមនៅកម្ពុជា ដែលបានចូលរួមចំណែកយ៉ាងសំខាន់ក្នុងការជំរុញទុនវិនិយោគផ្ទាល់ពីប្រទេសវៀតណាមមកកម្ពុជា។ ក្រុមហ៊ុន Viettel និង Metfone តែងតែបង្ហាញនូវស្មារតីទទួលខុសត្រូវខ្ពស់ យកចិត្តទុកដាក់ដល់ជីវភាពរស់នៅរបស់ប្រជាជនកម្ពុជា រួមចំណែកជាជំនួយថវិកាយ៉ាងច្រើនដល់សកម្មភាពសង្គមកិច្ច និងមនុស្សធម៌។មុននឹងបញ្ចប់ ឯកឧត្តមរដ្ឋមន្រ្តី បានជូនពរដល់ក្រុមហ៊ុន Viettel នៅប្រទេសវៀតណាម ក៏ដូចជាក្រុមហ៊ុន Metfone នៅកម្ពុជាសូមទទួលបានការអភិវឌ្ឍរយៈពេលវែង និងទទួលបានជោគជ័យក្នុងមុខជំនួញដែលរួមចំណែកដល់ការអភិវឌ្ឍសេដ្ឋកិច្ចសង្គម របស់ប្រទេសវៀតណាម និងប្រទេសកម្ពុជាឈានឆ្ពោះទៅរការរីកចម្រើនជឿនលឿនទៅមុខជានិច្ចនិរន្តន៍។

បណ្ដាញសង្គម

ព័ត៌មានថ្មីៗ

រុស្ស៊ីទទួលស្គាល់ជាលើកដំបូងពីវត្តមានទាហានកូរ៉េខាងជើងប្រយុទ្ធ ក្នុងសង្គ្រាម នៅអ៊ុយក្រែន

ប្រភពអេហ្ស៊ីប៖ ក្រុមហាម៉ាសមានបំណងដោះលែងចំណាប់ថ្នូរទាំងអស់ ជាថ្នូរនឹងបទឈប់បាញ់ ៥ឆ្នាំ

លោក Putin ប្រាប់ថា រុស្ស៊ីត្រៀមជាស្រេច ដើម្បីពិភាក្សាជាមួយអ៊ុយក្រែន «ដោយគ្មានលក្ខខណ្ឌជាមុន»

[UPDATE] នគរបាល៖ មនុស្សមួយចំនួន បានស្លាប់ ក្រោយរថយន្តបើកបុកចូលហ្វូងមនុស្ស នៅកាណាដា

លោក Trump សង្ស័យពីចេតនាចង់បានសន្តិភាពរបស់លោក Putin ក្រោយជួបលោក Zelensky នៅបុរីវ៉ាទីកង់

រដ្ឋបាលខេត្តបន្ទាយមានជ័យធ្វើពិធី ស្រោចស្រពសុគន្ធវារីចូលកាន់តំណែងចៅអធិការវត្ត ២៥ វត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877