BTV NEWS

មហាសន្និបាតនៃវេទិកា AFPPD សមាជិកសភា ប្តេជ្ញាខិតខំជំរុញយន្តការសភាបន្ថែមទៀតឆ្លើយតបទៅនឹងបញ្ហាប្រជាជនឱ្យមានប្រសិទ្ធភាព

នាវាកងទ័ពជើងទឹកប្រជាជនវៀតណាម១គ្រឿងបានចូលចតធ្នៅវើទស្សនៈកិច្ចមូលដ្ឋានសមុទ្ររាម ខេត្តព្រះសីហនុ

កម្លាំងគណៈបញ្ជាការឯកភាពខណ្ឌ៧មករា បន្តចុះរដ្ឋបាលតំបន់ស្មុគស្មាញ បុរីកីឡា

ឯកឧត្តម គីម សុវណ្ណឌី៖ កម្ពុជាកំពុងសហការជាមួយស្ថាប័នពាក់ព័ន្ធដើម្បីសុវត្ថិភាពកុមារតាមប្រព័ន្ធអនឡាញ

ព័ត៌មានជាតិ

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញជាអធិបតីបើកសិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ

ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ នៅព្រឹកថ្ងៃទី១១ ខែមិថុនា ឆ្នាំ២០២៤ នៅសណ្ឋាគារសុខាភ្នំពេញ។សិក្ខាសាលានេះ រៀបចំឡើងដើម្បីផ្ដល់ជាព័ត៌មានបច្ចុប្បន្នភាព នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល ជូនដល់សមាជិកសមាជិការរដ្ឋសភា និងព្រឹទ្ធសភា ឱ្យទទួលបាននូវព័ត៌មានគ្រប់ជ្រុងជ្រោយអំពីវឌ្ឍនភាព ទិសដៅ និងគោលដៅយុទ្ធសាស្ត្រចុងក្រោយសម្រាប់អភិវឌ្ឍន៍ប្រព័ន្ធគ្រប់គ្រងហិរញ្ញវត្ថុឱ្យបានឈានដល់កម្រិតស្ដង់ដារ និងឧត្ដមានុវត្តអន្តរជាតិដែលរាជរដ្ឋាភិបាលរំពឹងទុក។លើសពីនោះទៀត សិក្ខាសាលាស្តីពី កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈនាពេលនេះ ក៏នឹងផ្ដល់ជាធាតុចូលជូនអង្គនីតិប្បញ្ញត្តិ ដើម្បីអនុវត្តតួនាទីនីតិកម្ម តាមដាន និងត្រួតពិនិត្យការអនុវត្តច្បាប់ ព្រមទាំងលើកកម្ពស់តួនាទីរបស់អង្គនីតិប្បញ្ញត្តិក្នុងការចូលរួមក្នុងកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ក៏ដូចជាការលើកកម្ពស់តួនាទីភារកិច្ចរបស់អាជ្ញាធរសវនកម្មជាតិចំពោះកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។សូមជម្រាបជូនថា សិក្ខាសាលានេះ មានការអញ្ជើញចូលរួមពីឯកឧត្ដម លោកជំទាវ ជាសមាជិក សមាជិការដ្ឋសភា ព្រឹទ្ធសភា អាជ្ញាធរសវនកម្មជាតិ និងមន្ត្រីពាក់ព័ន្ធនៃអគ្គលេខាធិការដ្ឋានសភាទាំងពីរផងដែរ៕

ជិត៨ខែកម្មវិធីបណ្តុះបណ្តាលជំនាញវិជ្ជាជីវៈទាក់ទាញយុវជនចូលរៀនជាង ៤ម៉ឺននាក់

គិតចាប់ពីប្រកាសដាក់ឱ្យដំណើរការ កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ កាលពីថ្ងៃទី១៤ ខែវិច្ឆិកា ឆ្នាំ២០២៣ រហូតត្រឹមថ្ងៃទី១០ ខែមិថុនា ឆ្នាំ២០២៤នេះ ក្រសួងការងារ និងបណ្តុះបណ្តាលវិជ្ជាជីវៈ បានទទួលការចុះឈ្មោះយុវជន និងសិស្សចូលរៀនបានចំនួនសរុបជាង ៤ម៉ឺននាក់ ក្នុងនោះសិស្សកំពុងរៀនមានចំនួនជាង ១ម៉ឺន ៧ពាន់នាក់។ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ឱ្យដឹងថា កាលពីខែឧសភាកន្លងទៅនៅក្នុងចំណោមគ្រឹះស្ថានបណ្តុះបណ្តាលវិជ្ជាជីវៈបច្ចេកទេសចំនួន ៣៧ ដែលស្ថិតនៅក្រោមក្រសួងការងារ បានធ្វើតេស្តបញ្ចប់សមត្ថភាពសិស្សដែលបានរៀនវគ្គព្រឹក និងរសៀលចំនួនជាង ៣,២០០ នាក់ ក្នុងនោះសិស្សដែលប្រឡងជាប់មានចំនួនជិត ៣ពាន់នាក់។ ហើយគិតមកដល់ពេលនេះ ក្នុងចំណោមសិស្សជិត៣ពាន់នាក់ មានក្រុមហ៊ុន រោងចក្រ សហគ្រាសកំពុងទាក់ទងចូលបម្រើការងារជាបណ្តើរៗក្នុងនោះមានមួយចំនួនក៏បានបើកមុខរបរអាជីវកម្មខ្លួនឯងដែរ។ឯកឧត្តមបានបញ្ជាក់បន្ថែមថា ការទទួលបានជំនាញបច្ចេកទេស និងវិជ្ជាជីវៈ ពិតជាមានសារសំខាន់ណាស់ សម្រាប់ជីវិតនៅក្នុងវិកស័យការងារ ដែលសិស្សទាំងអស់អាចបើកអាជីវកម្មដោយខ្លួនឯងក៏បាន ឬក៏អាចធ្វើការតាមរោងចក្រ សហគ្រាស គ្រឹះស្ថាននានាក៏បាន ដែលមានការងារល្អ ប្រាក់ខែខ្ពស់ ហើយក៏ជាឱកាសច្រើនដែរសម្រាប់ប្រទេសកម្ពុជា ចាប់ពីពេលនេះតទៅដែលត្រូវការអ្នកជំនាញច្បាស់លាស់មួយសម្រាប់ចូលធ្វើការងារ។ទាក់ទិនកម្មវិធីបណ្តុះបណ្តាលជំនាញនេះ សិស្សចំនួន២នាក់ ដែលទើបបញ្ចប់វគ្គបណ្តុះបណ្តាលខាងផ្នែកកែច្នៃបន្លែផ្លែឈើ នៅវិទ្យាស្ថានពហុបច្ចេកទេសកម្ពុជា (NPIC) គឺលោក អឿន បញ្ញា និងអ្នកស្រី ហួន ធារី បានឱ្យព័ត៌មាន ប៊ីធីវី ដឹងនៅព្រឹកថ្ងៃទី១១ ខែមិថុនានេះថា ពួកគាត់មានអារម្មណ៍ថារំភើប និងសប្បាយរីករាយ ដែលបានរៀនជំនាញដែលខ្លួនពេញចិត្ត បន្ថែមពីនេះ គឺការសិក្សាដោយមិនគិតថ្លៃអ្វីទាំងអស់ ថែមទាំងមានការយកចិត្តទុកដាក់យ៉ាងខ្ពស់ពីគ្រូបង្រៀន។យុវជនទាំងពីររូបនេះ បានទទួលស្គាល់ទៀតថា កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈរបស់រាជរដ្ឋាភិបាលអាណិត្តទី៧នេះ ពិតជាផ្តល់ផលប្រយោជន៍ជាច្រើនដល់ប្រជាពលរដ្ឋទាំងអស់ ជាពិសេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យក្រៅពីការសិក្សាដោយឥតគិតថ្លៃ ថែមទាំងទទួលបានប្រាក់ឧបត្ថម្ភប្រចាំខែផងដែរ។សូមជម្រាបថា កម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈនេះ ក្រសួងការងារ និងបណ្តុះបណ្តាលវិជ្ជាជីវៈបានកំណត់យកមុខជំនាញចំនួន ៣៨ នៅក្នុងវិស័យអាទិភាពចំនួន១០ រួមមាន៖ សំណង់, អគ្គិសនីនិងថាមពល, បរិក្ខាត្រជាក់និងកម្តៅ, ទេសចរណ៍, មេកានិកទូទៅ/មេកានិករថយន្ត, សេវាកម្ម, កសិកម្ម និងកសិ-ឧស្សាហកម្ម , កម្មន្តសាល , អេឡិចត្រូនិច និងធុរកិច្ច និងព័ត៌មានវិទ្យា៕ អត្ថបទ ឈិត បូរ៉ាវី

សម្តេចធិបតី ហ៊ុន ម៉ាណែត បានអនុម័តជាឯកឆន្ទដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ សំដៅកសាងកម្ពុជាមួយគ្មានអេដស៍

ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានបញ្ជាក់ថា ក្នុងដំណើរឆ្ពោះទៅបញ្ចប់អេដស៍ដែលជាគ្រោះគម្រាមកំហែងដល់សុខភាពសាធារណៈ រាជរដ្ឋាភិបាលកម្ពុជា បានដាក់ចេញនូវវិធានការជាបន្តបន្ទាប់ ជាពិសេសនៅថ្ងៃទី១៥ ខែមីនា ឆ្នាំ២០២៤ កន្លងទៅកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់បំផុត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុម័តជាឯកច្ឆន្ទដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ សំដៅកសាងកម្ពុជាមួយគ្មានអេដស៍។ការថ្លែងរបស់ឯកឧត្តមទេសរដ្ឋមន្ត្រី អៀង មូលី យ៉ាងដូច្នេះក្នុងឱកាសបើកកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍ លើកទី១ ឆ្នាំ២០២៤ នៅទីស្តីការគណៈរដ្ឋមន្ត្រី នាព្រឹកថ្ងៃទី១១ ខែមិថុនា ឆ្នាំ២០២៤នេះ។ ជាមួយគ្នានេះ ឯកឧត្តមទេសរដ្ឋមន្រី្ត អៀង មូលី ក៏សូមថ្លែងនូវការកោតសរសើរដ៏ស្មោះ ជូនចំពោះក្រសួង ស្ថាប័នពាក់ព័ន្ធទាំងអស់ក្នុងការខិតខំប្រឹងប្រែង និងកិច្ចសហការជាមួយអាជ្ញាធរជាតិប្រយុទ្ធនឹងជំងឺអេដស៍ ដើម្បីជំរុញ និងចូលរួមអនុវត្ត “សេចក្តីជូនដំណឹងលេខ ២១៣ សជណ.សស ចុះថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែកុម្ភៈ ឆ្នាំ២០១៩ របស់រាជរដ្ឋាភិបាលកម្ពុជា រហូតបានទទួលលទ្ធផលជាផ្លែផ្កាគួរជាទីពេញចិត្ត។ឯកឧត្តមទេសរដ្ឋមន្រី្ត បានសង្កត់ធ្ងន់ថា គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ បានបញ្ជាក់នូវការប្តេជ្ញាចិត្ត ផ្នែកនយោបាយយ៉ាងមុតមាំបន្ថែមទៀតរបស់រាជរដ្ឋាភិបាលនីតិកាលទី៧ នៃរដ្ឋសភា ដែលបន្តបេសកកម្មដ៏ថ្លៃថ្លាពីរាជរដ្ឋាភិបាលនីតិកាលមុនៗ ក្រោមការដឹកនាំដ៏ឆ្នើមរបស់សម្តេចអគ្គមហាសេនាបតីតេជោ ហ៊ុន សែន ក្នុងការបន្តអភិវឌ្ឍន៍មូលធនមនុស្ស និងការលើកម្ពស់សុខភាព និងសុខមាលភាពប្រជាជន សមស្របតាមយុទ្ធសាស្ត្របញ្ចកោណដំណាក់កាល ទី១។ គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ បានត្រូវរៀបចំឡើងជាឧបករណ៍ដ៏មុតស្រួចក្នុងការជំរុញការចូលរួមការងារឆ្លើយតបមេរោគអេដស៍ និងជំងឺអេដស៍ជាលក្ខណៈពហុវិស័យទាំងនៅថ្នាក់ជាតិ និងទាំងនៅថ្នាក់ក្រោមជាតិ ដោយឈរលើសសរស្តម្ភទាំងបីគឺ៖ ១) ភាពជាអ្នកដឹកនាំ ឬភាពជាម្ចាស់ ២)ភាពជាដៃគូ និង៣) ការវិនិយោគ រួមជាមួយគោលការណ៍បី មួយគឺ៖ យុទ្ធសាស្ត្រ ឬក្របខ័ណ្ឌផែនការសកម្មភាពតែមួយ, ស្ថាប័នសម្របសម្រួលតែមួយ និងប្រព័ន្ធតាមដាន និងវាយតម្លៃតែមួយ។ លើសពីនេះ គោលនយោបាយជាតិក៏បានចង្អុលទិស ក្នុងការរៀបចំផែនការយុទ្ធសាស្ត្រជាតិ ទូលំទូលាយ និងពហុវិស័យលុបបំបាត់ជំងឺអេដស៍ ដើម្បីធានានូវការឆ្លើយតបមួយឱ្យបានសមស្របទៅ នឹងសេចក្តីត្រូវការជាអាទិភាពក្នុងចំណោមក្រុមគោលដៅ រួមជាមួយនឹងការប្រើប្រាស់ធនធានប្រកប ដោយប្រសិទ្ធផល និងប្រសិទ្ធភាពឈានទៅសម្រេចបាននូវគោលដៅតាមកាលកំណត់។ឯកឧត្តមទេសរដ្ឋមន្ត្រី អៀង មូលី សូមជម្រាបជូនអង្គពិធីទាំងមូលជ្រាបថា យោងតាមគម្រោងផែនការសកម្មភាពឆ្នាំ២០២៤ កិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី១ ធ្វើឡើងដើម្បីពិនិត្យមើលរួមគ្នានូវវឌ្ឍនភាព សមិទ្ធផល ប្រសិទ្ធភាព ឬបញ្ហាប្រឈម ក្នុងការប្រយុទ្ធនឹងជំងឺអេដស៍ សម្រាប់រយៈពេល៦ខែដើមឆ្នាំ២០២៤។ តាមរបៀបវារៈ កិច្ចប្រជុំយើងនឹងមានបទបង្ហាញចំនួនពីរ រួមមាន ៖ទី១.បទបង្ហាញសេចក្តីព្រាងស្តីពីវឌ្ឍនភាពនៃការអនុវត្តសេចក្តីសម្រេចចិត្តនៃកិច្ចប្រជុំពេញអង្គលើកទី២ ឆ្នាំ២០២៣ បង្ហាញជូនដោយឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍។ទី២.បទបង្ហាញស្តីពីគោលនយោបាយជាតិលុបបំបាត់ជំងឺអេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ បង្ហាញជូនដោយឯកឧត្តមវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍។ បន្ទាប់មកយើងនឹងមានការពិភាក្សារួមគ្នា និងដាក់ចេញនូវសេចក្តីសម្រេចចិត្តកិច្ចប្រជុំពេញអង្គ អាជ្ញាធរជាតិប្រយុទ្ធនឹងជំងឺអេដស៍លើកទី១ ឆ្នាំ២០២៤ ផងដែរ៕អត្ថបទ រដ្ឋា

គណៈប្រតិភូជាន់ខ្ពស់ក្រសួងអធិការកិច្ចកម្ពុជា ជួបពិភាក្សាការងារជាមួយ លោកឧត្តមសេនីយ៍ទោ Do Minh Phuong អនុប្រធានក្រុមហ៊ុន Viettel

នាថ្ងៃទី១០ ខែមិថុនា ឆ្នាំ២០២៤ ឯកឧត្តមរដ្ឋមន្រ្តី ហួត ហាក់ បាន ដឹកនាំគណៈប្រតិភូជាន់ខ្ពស់ក្រសួងអធិការកិច្ច នៃព្រះរាជាណាចក្រកម្ពុជា អញ្ជើញជួបពិភាក្សាការងារ លោកឧត្តមសេនីយ៍ទោ Do Minh Phuong អនុប្រធានក្រុមហ៊ុន Viettel នៅទីស្នាក់កណ្តាលក្រុមហ៊ុន ដែលស្ថិតនៅរដ្ឋធានីហាណូយ សាធារណរដ្ឋសង្គមនិយមវៀតណាម។ក្នុងឱកាសនោះដែរ លោកឧត្តមសេនីយ៍ទោ អនុប្រធានក្រុមហ៊ុន Viettel បានជម្រាបជូនគណៈប្រតិភូជាន់ខ្ពស់ក្រសួងអធិការកិច្ចកម្ពុជា អំពីសាវតា បេសកម្ម និងសមិទ្ធផលនានារបស់ក្រុមហ៊ុនដែលសម្រេចបាននាពេលកន្លងមក ហើយបានប្រែក្លាយជាក្រុមហ៊ុនដ៏ធំ ឈានមុខគេនៅប្រទេសវៀតណាម និងបានចូលរួមចំណែកយ៉ាងច្រើនដល់ការអភិវឌ្ឍសេដ្ឋកិច្ច និងសង្គមរបស់ប្រទេសវៀតណាម ព្រមទាំងបានពង្រីកសក្ដានុពល តាមរយៈការធ្វើសមាហរណកម្មទៅក្នុងទីផ្សាអន្តរជាតិយ៉ាងខ្លាំងក្លា ជាពិសេសការបង្កើតក្រុមហ៊ុនបុត្រសម្ព័ន្ធនៅក្នុងបណ្ដាប្រទេសជាមិត្តនៅក្នុងអាស៊ី ក៏ដូចជានៅប្រទេសកម្ពុជា គឺក្រុមហ៊ុនមិត្តហ្វូន (Metfone) ជាបុត្រសម្ព័ន្ធរបស់ ក្រុមហ៊ុនViettel ដែលបានវិនិយោគចាប់តាំងពីខែកុម្ភៈ ឆ្នាំ២០០៩មកម្លេះ។ជាការឆ្លើយតប ឯកឧត្តមរដ្ឋមន្រ្តី បានសម្តែងនូវក្តីសោមនស្សរីករាយ ដែលបានមកជួបពិភាក្សាការងារជាមួយថ្នាក់ដឹកនាំ និងបុគ្គលិកក្រុមហ៊ុន Viettel នៅទីស្នាក់ការកណ្ដាលរបស់ក្រុមហ៊ុន និងបានថ្លែងអំណរគុណយ៉ាងជ្រាលជ្រៅ ចំពោះការស្វាគមន៍យ៉ាងកក់ក្តៅរបស់ លោកឧត្តមសេនីយ៍ទោ និងថ្នាក់ដឹកនាំរបស់ក្រុមហ៊ុន ចំពោះគណៈប្រតិភូជាន់ខ្ពស់ក្រសួងអធិការកិច្ច ព្រមទាំងបានកោតសរសើរ និងវាយតម្លៃខ្ពស់ចំពោះសមិទ្ធផលនានារបស់ក្រុមហ៊ុន ជាពិសេសនៅកម្ពុជា ក្រុមហ៊ុន Metfone បានចូលរួមលើកកម្ពស់កិច្ចសហប្រតិបត្តិការ រវាងប្រទេសវៀតណាម និងប្រទេសកម្ពុជា ក៏ដូចជាការចូលរួមចំណែកក្នុងការអភិវឌ្ឍសេដ្ឋកិច្ចសង្គមនៅកម្ពុជា តួយ៉ាងក្រុមហ៊ុន Metfone បានផ្ដល់ឱកាសការងារពេញម៉ោងដល់ប្រជាជនកម្ពុជាប្រមាណជា ៣,០០០នាក់ ការងារក្រៅម៉ោងប្រមាណ ១០,០០០នាក់ និងមានការិយាល័យលក់ ចំនួន ៣០,០០០កន្លែង មិនតែប៉ុណ្ណោះ ក្រុមហ៊ុននេះបាននិងកំពុងចូលរួមយ៉ាងសកម្មក្នុងការអភិវឌ្ឍឌីជីថលូបនីយកម្មនៅកម្ពុជា មានជាអាទិ៍ កសាងហេដ្ឋារចនាសម្ព័ន្ធឌីជីថល វេទិកា និងសេវាកម្ម ក្នុងការបង្កើតសង្គមឌីជីថល។ជាមួយគ្នានេះដែរ ឯកឧត្តមរដ្ឋមន្រ្តី កត់សម្គាល់ឃើញថា ក្រុមហ៊ុន Metfone តែងតែបង្ហាញនូវភាពសកម្មក្នុងការទទួលខុសត្រូវសង្គម (Corporate Social Responsibility) និងជាក្រុមហ៊ុនឈានមុខគេរបស់វៀតណាមនៅកម្ពុជា ដែលបានចូលរួមចំណែកយ៉ាងសំខាន់ក្នុងការជំរុញទុនវិនិយោគផ្ទាល់ពីប្រទេសវៀតណាមមកកម្ពុជា។ ក្រុមហ៊ុន Viettel និង Metfone តែងតែបង្ហាញនូវស្មារតីទទួលខុសត្រូវខ្ពស់ យកចិត្តទុកដាក់ដល់ជីវភាពរស់នៅរបស់ប្រជាជនកម្ពុជា រួមចំណែកជាជំនួយថវិកាយ៉ាងច្រើនដល់សកម្មភាពសង្គមកិច្ច និងមនុស្សធម៌។មុននឹងបញ្ចប់ ឯកឧត្តមរដ្ឋមន្រ្តី បានជូនពរដល់ក្រុមហ៊ុន Viettel នៅប្រទេសវៀតណាម ក៏ដូចជាក្រុមហ៊ុន Metfone នៅកម្ពុជាសូមទទួលបានការអភិវឌ្ឍរយៈពេលវែង និងទទួលបានជោគជ័យក្នុងមុខជំនួញដែលរួមចំណែកដល់ការអភិវឌ្ឍសេដ្ឋកិច្ចសង្គម របស់ប្រទេសវៀតណាម និងប្រទេសកម្ពុជាឈានឆ្ពោះទៅរការរីកចម្រើនជឿនលឿនទៅមុខជានិច្ចនិរន្តន៍។

ឯកឧត្តមរដ្ឋមន្ត្រី កែវ រតនៈ អញ្ជើញប្រកាសចូលកាន់តំណែងក្រុមប្រឹក្សាខេត្តពោធិ៍សាត់ អាណត្តិទី៤ ចំនួន២១រូប

ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ នៅព្រឹកថ្ងៃទី១១ ខែមិថុនា ឆ្នាំ២០២៤ បានអញ្ជើញជាងធិបតីភាពក្នុងពិធីប្រកាសចូលកាន់តំណែងក្រុមប្រឹក្សាខេត្តពោធិ៍សាត់ចំនួន២១រូប សម្រាប់អាណត្តិទី៤ ពិធីនេះប្រារព្ធធ្វើឡើងនៅសាលប្រជុំក្រុមប្រឹក្សាខេត្តពោធិ៍សាត់ ដោយមានការចូលរួមពីឯកឧត្តម ខូយ រីដា អភិបាលខេតពោធិ៍សាត់ តំណាងក្រសួងមហាផ្ទៃ ក្រុមការងាររាជរដ្ឋាភិបាលចុះជួយខេត្តពោធិ៍សាត់ អង្គភាព-មន្ទីរពាក់ព័ន្ធ រួមនិងមន្ត្រីរាជការជាច្រើននាក់ ។ យោងតាមព្រះរាជក្រឹត្យ នស/រកត/០៦២៤/៥៨៨ អានដោយ ឯកឧត្តម អ៊ុំ ចំរើន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ ស្តីអំពីការទទួលស្គាល់សមាសភាព ក្រុមប្រឹក្សាខេត្តពោធិ៍សាត់ សម្រាប់អាណត្តិទី៤នេះ សរុបមានចំនួន២១រូប ក្នុងនោះ៤រូបជាស្ត្រី ដោយមានប្រធាន១រូប និងសមាជិក ២០រូប រួមមានដូចខាងក្រោម ៖១ ឯកឧត្តម ម៉ក់ រ៉ា ជាប្រធាន២ ម៉ៅ សាន ជាសមាជិក៣ ឯកឧត្តម វង្ស សំអុល ជាសមាជិក៤ ឯកឧត្តម កែម សុធឿន ជាសមាជិក៥ លោកជំទាវ ឈឹម ស៊ីណា ជាសមាជិក៦ ឯកឧត្តម ចេង ឡៃ ជាសមាជិក៧ ឯកឧត្តម លឹម ចន្ទថៃ ជាសមាជិក៨ ឯកឧត្តម ខ្លឹម សុគន្ធ ជាសមាជិក៩ ឯកឧត្តម ស៊ុម លើម ជាសមាជិក១០ ឯកឧត្តម សៅ ដារឿន ជាសមាជិក១១ ឯកឧត្តម ឃៀង សុជីវន្ត័ ជាសមាជិក១២ ឯកឧត្តម អ៊ិត ប៊ុនណា ជាសមាជិក១៣ លោកជំទាវ ម៉ែន ផល្លី ជាសមាជិក១៤ លោកជំទាវ ថោ សុធា ជាសមាជិក១៥ លោកជំទាវ ធួន រដ្ឋធានី ជាសមាជិក១៦ ឯកឧត្តម នី ហួង ជាសមាជិក១៧ ឯកឧត្តម លី ការីម ជាសមាជិក១៨ ឯកឧត្តម លៀង ពេជ្រ ជាសមាជិក១៩ ឯកឧត្តម រ៉ែម សាមឿន ជាសមាជិក២០ ឯកឧត្តម ហេង ទ្រី ជាសមាជិក២១ ឯកឧត្តម ឈុំ សេងហ៊ន ជាសមាជិក

ពិធីសម្ពោធដាក់ឱ្យប្រើជាផ្លូវការគេហទំព័របណ្ណាល័យច្បាប់ឌីជីថល និងកម្មវិធី AIPALync (AIPALync - Digital Law Library) ដែលជាគំនិតផ្តួចផ្តើមរបស់សភាកម្ពុជា

ភ្នំពេញ៖ អបអរសាទរពិធីសម្ពោធដាក់ឱ្យប្រើជាផ្លូវការគេហទំព័របណ្ណាល័យច្បាប់ឌីជីថល និងកម្មវិធី AIPALync (AIPALync - Digital Law Library) ដែលជាគំនិតផ្តួចផ្តើមរបស់សភាកម្ពុជា នាមហាសន្និបាតលើកទី៤៣ ឆ្នាំ២០២២ ដែលកម្ពុជាធ្វើជាម្ចាស់ផ្ទះ។ ជាមោទកភាពដ៏ឧត្តុង្គឧត្តមរបស់សភាកម្ពុជា ដែលបានខិតខំនាពេលកន្លងមក រហូតសម្រេចបានលទ្ធផលជាផ្លូវការនៅថ្ងៃនេះ។តបតាមការអញ្ជើញរបស់ លោកជំទាវ Ar. Siti Rozaimeriyanty Dato Haji Abdul Rahman អគ្គលេខាធិការអាយប៉ា និងដោយទទួលបានការចាត់តាំងដ៏ខ្ពង់ខ្ពស់ពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ក្នុងនាមរដ្ឋសភាកម្ពុជាមានកិត្តិយសចូលរួមថ្លែងចំណាប់អារម្មណ៍ក្នុង “ពិធីសម្ពោធដាក់ឱ្យប្រើជាផ្លូវការគេហទំព័របណ្ណាល័យច្បាប់ឌីជីថល ដែលជាគំនិតផ្តួចផ្តើមរបស់សភាកម្ពុជា និងកម្មវិធី AIPALync (AIPALync - Digital Law Library)” របស់លេខាធិការដ្ឋានអាយប៉ា ក្រោមអធិបតីភាព ឯកឧត្តម Pengiran Dato Seri Setia Shamhary bin Pengiran Dato Paduka Haji Mustapha រដ្ឋមន្ត្រីក្រសួងទូរគមនាគមន៍ និងទំនាក់ទំនងព័ត៌មាន នៃប្រទេសព្រុយណេដារូស្សាឡាម និងលោកជំទាវ អគ្គលេខាធិការអាយប៉ា ព្រមទាំងមានការផ្តល់កិត្តិយសអញ្ជើញចូលរួមពី ថ្នាក់ដឹកនាំជាន់ខ្ពស់ ជាតំណាងសភានៃប្រទេសជាសមាជិកអាស៊ាន អ្នករៀបចំគោលនយោបាយ តំណាងរដ្ឋាភិបាល អ្នកដឹកនាំធុរកិច្ច និងដៃគូអភិវឌ្ឍន៍អន្តរជាតិសំខាន់ៗ សរុបប្រមាណជាង ៤០០នាក់ នារសៀលថ្ងៃចន្ទ ៤កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែមិថុនា ឆ្នាំ២០២៤ នៅទីក្រុងបានដាស៊េរីបេហ្កាវ៉ាន់ នៃប្រទេសព្រុយណេដារូស្សាឡាម។ពិធីសម្ពោធជាផ្លូវការនេះ ត្រូវបានរៀបចំឡើងស្របគ្នាក្នុងឱកាសនៃការរៀបចំវេទិកាត្រីភាគីស្តីពី “ការកសាងសេដ្ឋកិច្ចឌីជីថលក្នុងអាស៊ានប្រកបដោយភាពរស់រវើក៖ យុទ្ធសាស្ត្រសម្រាប់ភាពធន់នឹងអ៊ីនធឺណិត និងវិបុលភាពរួមគ្នា” ដែលរៀបចំឡើងដោយ លេខាធិការដ្ឋានអាយប៉ា សហការជាមួយក្រុមប្រឹក្សាភិបាលធុរកិច្ចអាស៊ាននៃប្រទេសព្រុយណេដារូស្សាឡាម និងក្រុមប្រឹក្សាភិបាលធុរកិច្ច APEC នៃប្រទេសព្រុយណេដារូស្សាឡាម ព្រមទាំងមានការគាំទ្រពីក្រុមប្រឹក្សានីតិប្បញ្ញត្តិ នៃប្រទេសព្រុយណេដារូស្សាឡាម និងវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA)។សូមជម្រាបជូនថា គេហទំព័របណ្ណាល័យច្បាប់ឌីជីថល និងកម្មវិធី AIPALync (AIPALync- Digital Law Library) គឺជាលទ្ធផលនៃសេចក្តីសម្រេចស្តីពីការបង្កើតបណ្ណាល័យច្បាប់ឌីជីថលអាយប៉ា (AIPA Digital Law Library) ដែលជាគំនិតផ្តួចផ្តើមរបស់សភាកម្ពុជា នាមហាសន្និបាតអាយប៉ា លើកទី៤៣ ឆ្នាំ២០២២ ដែលសភាកម្ពុជាធ្វើជាម្ចាស់ផ្ទះ។ បន្ទាប់មក នៅក្នុងមហាសន្និបាតអាយប៉ា លើកទី៤៤ គណៈកម្មាធិការរៀបចំបានសម្រេចឱ្យលេខាធិការដ្ឋានអាយប៉ា បង្កើតក្រុមការងារចំពោះកិច្ច (Task Force) ដើម្បីរៀបចំកិច្ចប្រជុំ។ ក្រុមការងារនេះ បានរៀបចំកិច្ចប្រជុំលើកទី១ របស់ខ្លួន នៅទីក្រុងហ្សាកាតា ប្រទេសឥណ្ឌូនេស៊ី កាលពីខែមករា ឆ្នាំ២០២៤ ដោយទទួលបានការគាំទ្រពីសភាសមាជិកអាយប៉ាទាំងអស់។ ជាលទ្ធផល ក្រុមការងារលេខាធិការដ្ឋានអាយប៉ា បានបន្តអភិវឌ្ឍន៍ និងបានចេញជារូបរាងនូវគេហទំព័រ AIPALync - Digital Law Library និងបានសម្ពោធដាក់ឱ្យប្រើជាផ្លូវការនាថ្ងៃនេះ៕

ឧត្តមសេនីយ៍ត្រី អេង ហ៊ី ធ្វើបទឧទ្ទេសនាមស្តីពីដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ដល់មន្ត្រីកងរាជអាវុធហត្ថ ៣៥០នាក់ នៅតំបន់ប្រវត្តិសាស្ត្រតេជោកោះថ្ម X16

ត្បូងឃ្មុំ៖ នៅតំបន់ប្រវត្តិសាស្ត្រតេជោកោះថ្មX16 ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ កាលពីព្រឹកថ្ងៃទី១០ ខែមិថុនា ឆ្នាំ២០២៤ លោកឧត្តមសេនីយ៍ត្រី អេង ហ៊ី ស្នងការស្នងការដ្ឋានទំនាក់ទំនងកិច្ចការសាធារណៈ កងរាជអាវុធហត្ថលើផ្ទៃប្រទេស បានអញ្ជើញធ្វើបទឧទ្ទេសនាមស្តីពីដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ដល់ប្រតិភូនាយទាហាន នាយទាហានរង និងពលទាហាននៃកងរាជអាវុធហត្ថរាជធានីភ្នំពេញ ៥០នាក់, កណ្តាលចំនួន ៥០នាក់, កំពង់ឆ្នាំង ៥០នាក់, ព្រៃវែង ៥០នាក់, ស្វាយរៀង ៥០នាក់, កំពង់ចាម ៥០នាក់ និងត្បូងឃ្មុំចំនួន ៥០នាក់ សរុប ៣៥០នាក់។ប្រតិភូបានអញ្ជើញគោរពវិញ្ញាក្ខន្ធ និងចងចាំនូវឧបការគុណយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា និងបុព្វបុរសដែលពលី មរណៈ ដើម្បីរំដោះប្រទេសជាតិ សង្គ្រោះអាយុជីវិតប្រជាជនកម្ពុជា ឱ្យរួចផុតពីការធ្វើទារុណកម្ម ការកាប់សម្លាប់យ៉ាងសាហាវ យង់ឃ្នងពីរបបប្រល័យពូជសាសន៍ ប៉ុល ពត។សម្តេចតេជោ ហ៊ុន សែន បានយកចិត្តទុកដាក់យុទ្ធមិត្តរបស់លោក ទាំងពេលនៅមានជីវិត បានជួយដោះស្រាយទុក្ខលំបាក ហើយពេលពលី មរណៈ ក៏ត្រូវបានយកចិត្តទុកដាក់ខ្ពស់ ដោយធ្វើមាតុភូមិនិវត្តន៍នូវសពយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន ៤៩រូប ដែលបានពលីនៅពេលធ្វើការតស៊ូផ្ដួលរំលំរបបប្រល័យពូជសាសន៍ ប៉ុល ពត មកប្រទេសកំណើតវិញតាមប្រពៃណី សាសនា ពិធីការកងទ័ព និងពិធីការរដ្ឋ យ៉ាងអធិកក្រៃលែង៕

កម្ពុជា-ជប៉ុន ឯកភាពបន្តពង្រឹងកិច្ចសហប្រតិបត្តិការទ្វេភាគី លើវិស័យការងារ និងសន្តិសុខសង្គមឱ្យកាន់តែរីកចម្រើនបន្ថែមទៀតស្របតាមកម្រិតទំនាក់ទំនងការទូតថ្មី

ក្នុងដំណើរចូលរួមកិច្ចប្រជុំប្រចាំឆ្នាំរបស់អង្គការអន្តរជាតិខាងការងារ(ILO) ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបពិភាក្សាការងារជាមួយឯកឧត្តម MIYAZAKI Masahisa រដ្ឋមន្ត្រីក្រសួងការងារ និងសុខមាលភាពនៃព្រះរាជាណាចក្រជប៉ុន ដើម្បីបន្តពង្រឹងកិច្ចសហប្រតិបត្តិការទ្វេភាគីលើវិស័យការងារ សន្តិសុខសង្គមឱ្យស្របតាមកម្រិតទំនាក់ទំនងការទូតថ្មីជាប្រទេសដៃគូគ្រប់ជ្រុងជ្រោយ។ ជំនួបនេះ បានធ្វើឡើងកាលពីរសៀលម៉ោង៣នាទី ម៉ោងនៅក្រុងហ្សឺណែវ ប្រទេសស្វីសត្រូវនឹងម៉ោង១០យប់នៅកម្ពុជា។ ក្នុងឱកាសនោះ ភាគីទាំងពីរ បានអបអរសាទរចំពោះខួបទំនាក់ទំនងការទូត៧០ឆ្នាំរវាងកម្ពុជា និងជប៉ុនដែលបានប្រារព្ធយ៉ាងអឹកធឹកកាលពីឆ្នាំមុន និងការដំឡើងកម្រិតទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយដែលបានបង្ហាញពីភាពរឹងមាំ និងភាពជិតស្និទ្ធរវាងកម្ពុជា-ជប៉ុនដែលបាននិងកំពុងបន្តផ្តល់ផ្លែផ្កាដល់ប្រជាជននៃប្រទេសទាំងពីរ។ បន្ថែមពីនេះ ថ្នាក់ដឹកនាំទាំងពីរ ក៏បានជជែកពិភាក្សាផ្លាស់ប្តូរព័ត៌មានបន្ថែមស្តីពីកិច្ចសហប្រតិបត្តិការក្នុងវិស័យការងារដែលបាននិងកំពុងជួយជ្រោមជ្រែងនិងគាំទ្រលើការអភិវឌ្ឍសេដ្ឋកិច្ច និងសង្គមតាមរយៈឱកាសការងារ ការផ្ទេរបច្ចេកវិទ្យា និងជំនាញបច្ចេកទេស។ ក្រៅពីនេះ ក្នុងនាមជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ ក៏បានថ្លែងអំរគុណដល់ប្រទេសជប៉ុនដែលតែងតែបន្តផ្តល់អ្នកជំនាញមកគ្រឹះស្ថានបណ្តុះបណ្តាលរបស់កម្ពុជាដើម្បីបណ្តុះបណ្តាលនិងពង្រឹងសមត្ថភាពនិងលើកកម្ពស់ជំនាញលើវិស័យអេឡិចត្រូនិច គ្រឿងម៉ាស៊ីន និងរថយន្តនៅកម្ពុជា។ ឆ្លើយតបចំពោះចំណុចនេះ ឯកឧត្តម MIYAZAKI Masahisa បានអះអាងថា ជប៉ុនបានត្រៀមខ្លួនរួចជាស្រេចដើម្បីបន្តជួយកម្ពុជាបន្ថែមទៀត។ មុននឹងបញ្ចប់ ថ្នាក់ដឹកនាំទាំងពីរ បានឯកភាពគ្នាបន្តពង្រឹងកិច្ចសហប្រតិបត្តិការលើវិស័យការងារ និងសន្តិសុខសង្គមដែលមានស្រាប់ឱ្យកាន់តែរីកចម្រើនបន្ថែមទៀតដើម្បីស្របទៅតាមកម្រិតទំនាក់ទំនងដ៏ស្អិតរមួតក្នុងនាមជាដៃគូយុទ្ធសាស្ត្រគ្រប់ជ្រុងជ្រោយដែលរាជរដ្ឋាភិបាលទាំងពីរសម្រេចបាន៕

យុវជនជាច្រើនរយនាក់ មកដាក់ពាក្យប្រឡងជ្រើសរើសពលទាហានបំពេញក្របខណ្ឌថ្មី នៅកងរាជអាវុធហត្ថខេត្តក្រចេះ

បញ្ជាការដ្ឋានកងរាជអាវុធហត្ថខេត្តក្រចេះ នៅថ្ងៃទី១០ ខែមិថុនា ឆ្នាំ២០២៤នេះ បានចាប់ផ្តើមដំណើរការចែកពាក្យប្រឡងជ្រើសរើសពលទាហានបំពេញក្របខណ្ឌថ្មី ដល់សិស្ស និស្សិត និងយុវជន ដែលមានបំណងចង់ចូលបម្រើការងារក្នុងកងរាជអាវុធហត្ថ ប្រកបដោយមនសិការ និងឧត្តមគតិ ក្នុងការបម្រើជាតិមាតុភូមិ។ជាក់ស្ដែង យុវជនមានការចូលរួមយ៉ាងច្រើនកុះករក្នុងការមកទទួលពាក្យប្រឡង ក៏ដូចជា ការវាស់កម្ពស់ ការពិនិត្យឯកសារភ្ជាប់មកជាមួយ មានលក្ខណៈសម្បត្តិគ្រប់គ្រាន់ តាមលក្ខខណ្ឌកំណត់ គឺទទួលបានពាក្យដោយឥតគិតថ្លៃ នៅបញ្ជាការដ្ឋានកងរាជអាវុធហត្ថ ខេត្តក្រចេះ នៅរៀងរាល់ម៉ោងធ្វើការ ចាប់ពីថ្ងៃទី ១០ ខែ មិថុនា ឆ្នាំ២០២៤ ដល់ថ្ងៃទី២១ ខែមិថុនា ឆ្នាំ២០២៤។ ហើយការទទួលពាក្យប្រឡង គឺចាប់ពីថ្ងៃទី១៧ ខែមិថុនា ដល់ថ្ងៃទី៥ ខែកក្កដា ឆ្នាំ២០២៤។ រីឯកាលបរិច្ឆេទប្រឡង គឺធ្វើឡើងនៅថ្ងៃទី៣ ខែសីហា ឆ្នាំ២០២៤។គូសបញ្ជាក់ថា លក្ខណៈសម្បត្តិ និងលក្ខខណ្ណដែលត្រូវជ្រើសរើសជាពលទាហាន កងរាជអាវុធហត្ថ គឺត្រូវមានសញ្ជាតិខ្មែរ ភេទប្រុស នៅលីវ មានអាយុពី ១៨ ដល់ ២៥ គិតត្រឹមថ្ងៃដាក់ពាក្យ មានកាយសម្បទាគ្រប់គ្រាន់ និងមានសុខភាពល្អ តាមតម្រូវការ ដើម្បីបំពេញមុខងារ មានភក្តីភាពចំពោះជាតិ មាតុភូមិ និងគ្មានជាប់ពិរុទ្ធ អំពើបទល្មើសផ្សេងៗ មានសញ្ញាបត្រមធ្យមសិក្សាទុតិយភូមិឡើងទៅ ឬលិខិតបញ្ជាក់ ការសិក្សា ឬសមមូលសញ្ញាបត្រ មានកម្ពស់ចាប់ពី 1,70ម៉ែត្រឡើងទៅ បេក្ខជនត្រូវឆ្លងកាត់ ការត្រួតពិនិត្យ លក្ខណៈសម្បត្តិ និងធ្វើតេស្តប្រឡងសមត្ថភាព បេក្ខជនត្រូវមាន សុខភាព និងកាយសម្បទានល្អផងដែរ៕ ដោយ សេង ម័រ

ឯកឧត្តមសាស្ត្រាចារ្យ ឈាង រ៉ា ផ្តល់អនុសាសន៍ដល់ថ្នាក់ដឹកនាំនៃអគ្គាធិការដ្ឋានក្រសួងសុខាភិបាល ដើម្បីពង្រឹងការអនុវត្តការងារឱ្យមានប្រសិទ្ធភាព

ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានប្រជុំពិភាក្សាការងារជាមួយថ្នាក់ដឹកនាំអគ្គាធិការដ្ឋានចាប់ពីអនុប្រធានការិយាល័យ ព្រមទាំងថ្នាក់ដឹកនាំទទួលបន្ទុកអធិការកិច្ច ដើម្បីពិនិត្យវឌ្ឍនភាពការងារ និងផ្តល់អនុសាសន៍ណែនាំ សំដៅរបង្កើននិងពង្រឹងប្រសិទ្ធភាពការងារបន្ថែមទៀត, នៅថ្ងៃទី១០ ខែមិថុនា ឆ្នាំ២០២៤ នៅទីស្តីការក្រសួងសុខាភិបាល។ឯកឧត្តមសាស្រ្តាចារ្យរដ្ឋមន្រ្តី បានស្តាប់នូវរបាយការណ៍វឌ្ឍនភាពការងារ ការត្រួតពិនិត្យ និងការធ្វើអធិការកិច្ច លើបាតុភាពមិនប្រក្រតីក្នុងករណីមានបណ្តឹង និងកត្តាប្រឈមនានាដែលមានកន្លងមក។ ក្នុងនោះដែរ ឯកឧត្តមសាស្ត្រាចារ្យរដ្ឋមន្រ្តី បានផ្តល់នូវអនុសាសន៍ ជាគន្លឹះសំខាន់ៗ ដើម្បីពង្រឹងនូវស្មារតីការងារ និងក្រមសីលធម៌ដល់មន្ត្រីអធិការកិច្ចទាំងអស់ សម្រាប់អនុវត្តការងារឱ្យមានប្រសិទ្ធភាព តម្លាភាព និងយុត្តិធម៌ សំដៅបង្កើនការចូលរួមចំណែកដល់ការកែទំរង់វិស័យសុខាភិបាល ក៏ដូចជាការពង្រឹងនូវគុណភាព ប្រសិទ្ធភាព នៃការបម្រើសេវាពិនិត្យព្យាបាលនិងថែទាំសុខភាព និងផ្តល់នូវសុវត្ថិភាពខ្ពស់ដល់ប្រជាពលរដ្ឋទូទៅក្នុងប្រទេសកម្ពុជាយើង៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

Alex Marquez ឈ្នះការប្រណាំងម៉ូតូ GP លើកដំបូងក្នុងអាជីពក្នុងទឹកដីអេស្ប៉ាញរបស់ខ្លួន

យោធាអាមេរិក៖ ខ្លួននឹងកំណត់ការបញ្ចេញព័ត៌មានលម្អិតអំពីការវាយប្រហារនៅយេម៉ែន

Manchester City ឈ្នះ Nottingham ឡើងវគ្គផ្តាច់ព្រ័ត្រ FA Cup ជួប Crystal Palace

មន្ត្រីអង្គការសហប្រជាជាតិព្រមានថាពលរដ្ឋហ្កាហ្សាស្លាប់បន្តិចម្តងៗព្រោះការបិទផ្លូវទាំងស្រុងពីអ៊ីស្រាអែល

នាយករដ្ឋមន្ត្រីកាតានិយាយថាកិច្ចចរចាបទឈប់បាញ់ហ្កាហ្សាបង្ហាញវឌ្ឍនភាពគួរឱ្យកត់សម្គាល់

អាមេរិក កំពុងទាក់ទងឥណ្ឌា និងប៉ាគីស្ថាន ខណៈទំនាក់ទំនងអ្នកជិតខាងទាំងពីរកាន់តែដុនដាប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877