នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន Beijing Scitech Holdings Co., Ltd. បង្ហាញចំណាប់អារម្មណ៍ស្វែងរកឱកាសវិនិយោគនៅកម្ពុជា លើការចម្រាញ់ប្រេងឆៅ នៅកម្ពុជា
រដ្ឋមន្ត្រីបរិស្ថានកូរ៉េ​ ប្ដេជ្ញាជំរុញកិច្ចសហប្រតិបត្តិការលើវិស័យធនធានទឹកជាមួយកម្ពុជា
រដ្ឋមន្រ្តីក្រសួងសុខាភិបាល «សូមយើងរួមគ្នាប្រឆាំងជាមួយនឹងជំងឺមហារីក»
ក្រសួងធម្មការ និងសាសនា បន្តលើកកម្ពស់ និងអភិរក្សប្រពៃណី តាមរយៈការរៀបចំពិធីបើកវគ្គបណ្ដុះបណ្ដាលស្ដីពី តួនាទី ភារកិច្ច និងក្រមសីលធម៌អាចារ្យខ្មែរ (ជំនាន់ទី៤៩)

ព័ត៌មានជាតិ

ក្រសួងការងារ ចុះអនុស្សរណៈជាមួយសាកលវិទ្យាល័យប៊ែលធីអន្តរជាតិដើម្បីបង្កើតកិច្ចសហប្រតិបត្តិការលើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ

2024/06/17 06:33:20 pm        132
Facebook Telegram Linkin
ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃចន្ទ ទី១៧ ខែមិថុនា ឆ្នាំ២០២៤នេះ បានចុះអនុស្សរណៈយោគយល់គ្នាជាមួយសាកលវិទ្យាល័យប៊ែលធីអន្តរជាតិ ក្រោមអធិបតីភាពឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម លី ណាវុឍ្ឍ សាកលវិទ្យាធិការនៃសាកលវិទ្យាល័យប៊ែលធីអន្តរជាតិ ដែលកម្មវិធីនេះធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។ឯកឧត្តម ហេង សួរ បានគូសបញ្ជាក់ពីសារសំខាន់នៃការចុះអនុស្សរណៈរវាងស្ថាប័នទាំងពីរដែលនឹងជំរុញ និងចូលរួមបន្ថែមទៀតជាមួយរាជរដ្ឋាភិបាលក្នុងការបណ្តុះបណ្តាលនិងអភិវឌ្ឍធនធានមនុស្សឱ្យកាន់តែរីកចម្រើនបន្ថែមទៀតខណៈដែលគ្រឹះស្ថានមានវិសាលភាពធំទូលាយ និងសម្បូរបែបលើកម្មវិធីសិក្សា។ ជាមួយគ្នានេះ ឯកឧត្តម លី ណាវុឍ្ឍ បានសម្តែងក្តីសប្បាយរីករាយចំពោះការចុះអនុស្សរណៈជាមួយនឹងក្រសួងការងារនិងបណ្តុះបណ្តាលវិជ្ជាជីវៈដែលជាស្ថាប័នដ៏សំខាន់ក្នុងការបណ្តុះបណ្តាលធនធានមនុស្ស ហើយតាមរយៈការកិច្ចសហប្រតិបត្តិការនេះនឹងធ្វើឱ្យសាកលវិទ្យាល័យមានវិសាលភាពកាន់តែទូលាយលើការអភិវឌ្ឍធនធានមនុស្សនៅកម្ពុជាផងដែរ។សូមបញ្ជាក់ថា អនុស្សរណៈនៃការយោគយល់គ្នានេះ មានគោលបំណងបង្កើតនូវក្របខណ្ឌនៃកិច្ចសហប្រតិបត្តិការក្នុងការផ្លាស់ប្តូរគ្នាទៅវិញទៅមកក្នុងផ្នែកអប់រំបណ្តុះបណ្តាលបច្ចេកទេស និងវិជ្ជាជីវៈ ដើម្បីអភិវឌ្ឍជំនាញនិងជំរុញកិច្ចសហប្រតិបត្តិការក្នុងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ។ បន្ថែមពីនេះ ភាគីទាំងពីរក៏នឹងមានភារៈកិច្ចធ្វើការផ្លាស់ប្តូរទស្សនកិច្ចសិក្សា ការចុះកម្មសិក្សា ការសិក្សាស្រាវជ្រាវ ការបង្រៀន សិក្ខាសាលា និងការចែករំលែកបទពិសោធ រវាងថ្នាក់ដឹកនាំ បុគ្គលិក សាស្ត្រាចារ្យ គ្រូឧទ្ទេស សិស្ស-និស្សិត ការផ្លាស់ប្តូរព័ត៌មានស្តីពីកម្មវិធីសិក្សា ឱកាសការងារ និងកម្មវិធីផ្សេងៗដើម្បីលើកកម្ពស់ការអប់រំបណ្តុះបណ្តាល និងការសិក្សាស្រាវជ្រាវផងដែរ៕

ខ្មាន់កាំភ្លើងបាញ់ប្រហារនៅខណ្ឌច្បារអំពៅ សមត្ថកិច្ចឃាត់បានហើយ រួមជាមួយអ្នកពាក់ព័ន្ធ២នាក់

2024/06/17 06:18:38 pm        963
Facebook Telegram Linkin
​ភ្នំពេញ ៖ ជនសង្ស័យ០៣នាក់ មានម្នាក់ជាខ្មាន់កាំភ្លើង ត្រូវបានសមត្ថកិច្ចធ្វើការឃាត់ខ្លួនបានហើយ ក្នុងអំពើបាញ់ប្រហារបណ្តាលឱ្យមនុស្សប្រុសស្រី០២នាក់បានស្លាប់ និងម្នាក់ទៀតរងរបួសធ្ងន់ នៅក្នុងបុរីប៉េងហួត គម្រោងទី៧ ស្ថិតក្នុងសង្កាត់និរោធ ខណ្ឌច្បារអំពៅ កាលពីវេលារសៀលថ្ងៃទី១៧ ខែមិថុនា ឆ្នាំ២០២៤ ។ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានប្រាប់ឱ្យដឹងថា ៖ ខ្មាន់កាំភ្លើងត្រូវឃាត់ខ្លួនបាននៅស្រុកអង្គឈ្នួល ខេត្តកណ្តាល ខណះកំពុងព្យាយាមរត់គេច ។ ចំណែកជនសង្ស័យ០២នាក់ទៀត ត្រូវបានឃាត់នៅមូលដ្ឋានខណ្ឌច្បារអំពៅ ពោលឃាត់ភ្លាមៗក្រោយកើតហេតុ។ លោកឧត្តមសេនីយ៍ស្នងការ បានបន្តថា ៖ ដើមចមដែលនាំឱ្យកើតមានរឿងហេតុ គឺកើតឡើងដោយសារគំនុំ ជាជម្លោះ និងទំនាស់អ្នកជិតខាងគ្នា ហើយកើតចិត្តគុំគួន រហូតឈានដល់ការបាញ់សម្លាប់តែម្តង ។ លោកបន្ថែមថា ក្នុងអំពើបាញ់ប្រហារនេះ ជនរងគ្រោះមានចំនួន០៣នាក់ ដោយមនុស្សប្រុសស្រី២នាក់បានស្លាប់ និងម្នាក់ទៀតរងរបួសធ្ងន់ ។ បច្ចុប្បន្ន នៅជុំវិញទីតាំងកើតហេតុ គឺត្រូវសមត្ថកិច្ចហ៊ុព័ទ្ធខ្សែ និងមានកម្លាំងចម្រុះឡោមព័ទ្ធការការពារសន្តិសុខ និងដើម្បីធ្វើកោសល្យវិច្ច័យពិនិត្យនៅទីតាំងផ្ទះកើតហេតុផងដែរ ៕ ដោយ ៖ លីហេង

ឯកឧត្តម ខូយ រីដា សង្កត់ធ្ងន់លើបញ្ហាក្តៅៗមួយចំនួន ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត

2024/06/17 05:45:18 pm        144
Facebook Telegram Linkin
ពោធិ៍សាត់ ៖ នារសៀលថ្ងៃទី១៧ ខែមិថុនា ឆ្នាំ២០២៤នេះ នៅសាលប្រជុំក្រុមប្រឹក្សាខេត្ត ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ប្រចាំខែមិថុនា និងលើកទិសដៅអនុវត្តបន្តសម្រាប់ខែកក្កដា ដើម្បីត្រួតពិនិត្យ និងពង្រឹងការអនុវត្តច្បាប់ចរាចរណ៍ផ្លូវគោក, គ្រឿងញៀន, ការអនុវត្ត គោលនយោបាយភូមិ-ឃុំ សង្កាត់ មានសុវត្ថិភាព, សភាពការណ៍សន្តិសុខតាមខ្សែបន្ទាត់ព្រំដែន កម្ពុជា-ថៃ និងបញ្ហាផ្សេងៗ។ ក្នុងនោះដែរ ឯកឧត្តម ខូយ រីដា បានសង្កត់ធ្ងន់លើបញ្ហាមួយចំនួនដូចជា ការបង្រាប់ក្មេងទំនើង ការទន្ទ្រានយកដីរបស់រដ្ឋក្នុងស្រុកក្រគរ ការងារការពារដីព្រៃរបស់រដ្ឋក្នុងស្រុកវាលវែងនិងស្រុកភ្នំក្រវាញ ការអន្តរាគមន៍ជួយប្រជាពលរដ្ឋស្រុកកណ្តៀងដែលខ្វះទឹកសម្រាប់បង្កបង្កើនផលនៅដើមរដូវវស្សាដោយសារពុំមានភ្លៀងធ្លាក់ច្រើន រកដំណោះស្រាយចំពោះគ្រោះថ្នាក់ចរាចរណ៍ដែលតែងតែកើតមានឡើងនៅចំនុចប្រសព្វគ្នារវាងផ្លូវរៀងក្រុងពោធិ៍សាត់ ជាមួយនិងផ្លូវឆ្ពោះទៅស្រុកកណ្តៀង និងបន្តការងារដោះស្រាយប្រជាពលរដ្ឋដែលនៅតាមមាត់ស្ទឺងពោធិ៍សាត់ ៕ ដោយ ៖ អុីត ភារុន

មកដឹងពីប្រភេទសេវានៅច្រកចេញចូលតែមួយ លទ្ធផលនៃការបម្រើ និងចំណូលរកបាន

2024/06/17 04:10:17 pm        156
Facebook Telegram Linkin
ភ្នំពេញ ៖ បច្ចុប្បន្ន ការិយាល័យច្រកចេញចូលតែមួយក្រុង ស្រុក ខណ្ឌ កំពុងដំណើរការផ្តល់សេវា ប្រជាពលរដ្ឋប្រមាណជាង៣០០សេវា លើវិស័យជំនាញចំនួន១៧ រួមមាន៖ ១.វិស័យជូនទេសចរណ៍ ២. វិស័យវប្បធម៌ ៣. វិស័យពាណិជ្ជកម្ម ៤. វិស័យសាធារណការ ៥. វិស័យឧស្សាហកម្ម ៦. វិស័យសំណង់ ៧. វិស័យកសិកម្ម ៨. វិស័យសុខាភិបាល ៩. វិស័យអប់រំ ១០. វិស័យ រ៉ែនិងថាមពល ១១. វិស័យបរិស្ថាន ១២) វិស័យការងារ និងបណ្តុះបណ្តាល វិជ្ជាជីវៈ ១៣. វិស័យធម្មការនិងសាសនា ១៤.ការងារអត្រានុកូលដ្ឋាន ១៥. ការងារនីត្យានុកូលកម្ម ១៦.ការងាររដ្ឋបាល និង១៧.ការផ្ទេរសិទ្ធិកាន់កាប់អចលនទ្រព្យដែលមិនទាន់ចុះបញ្ជី។ នេះបើតាមឯកឧត្តម សួស ប្រាថ្នា អគ្គនាយកនៃអគ្គនាយកដ្ឋាន រដ្ឋបាលក្រសួងមហាផ្ទៃ។ក្នុងឱកាសសន្និសីទសារព័ត៌មាន ស្ដីពីការអនុវត្តយន្តការច្រកចេញចូលតែមួយ រៀបចំដោយក្រុមអ្នកនាំពាក្យក្រសួងមហាផ្ទៃ កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ បានមានប្រសាសន៍ថា គិតចាប់ពីឆ្នាំ២០០៥ រហូតដល់ដំណាច់ឆ្នាំ២០២៣ ការិយាល័យច្រកចេញចូលតែមួយក្រុង ស្រុក ខណ្ឌ បានផ្តល់សេវារដ្ឋបាលជូនប្រជាពលរដ្ឋសរុបចំនួន១៥.០៧៣.២០៨ សេវា និងទទួលបានចំណូលសរុបចំនួន ១៥៩.៣៩៧.៥៥០.៧៦០ រៀល ស្មើនឹង ៣៩.៨៤៩.៣៨៧,៦៩ ដុល្លារអាម៉េរិក។ចំពោះសមិទ្ធផលការងារសម្រេចបានក្នុងរយៈពេល៩ខែ រាជរដ្ឋាភិបាលនីតិកាលទី៧ នៃរដ្ឋសភា (ចាប់ពីខែកញ្ញា ឆ្នាំ២០២៣ ដល់ខែឧសភា ឆ្នាំ២០២៤) ការិយាល័យច្រកចេញ ចូលតែមួយក្រុង ស្រុក ខណ្ឌ បានផ្តល់សេវាជូនប្រជាពលរដ្ឋចំនួន ២.៤២១.៨៩៦សេវា និង ទទួលបានចំណូល ៨.០៨៧.៥៧៦.០៣៤រៀល ស្មើនឹង ២.០២១.៨៩៤ដុល្លារអាម៉េរិកក្នុងនោះ វិស័យដែលបានផ្តល់សេវា និងទទួលបានចំណូលច្រើនជាងគេ គឺវិស័យសុរិយោដី និងវិស័យដែលផ្តល់សេវា និងទទួលបានចំណូលបានតិចជាងគេ គឺវិស័យពាណិជ្ជកម្ម។ នេះបើតាមឯកឧត្តម សួស ប្រាថ្នា អគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ។ដោយឡែក ចំពោះយន្តការច្រកចេញចូលតែមួយនៅថ្នាក់ឃុំ សង្កាត់ ផ្អែកតាមអនុក្រឹត្យលេខ១៨ អនក្រ.បក ចុះថ្ងៃទី៨ ខែកុម្ភៈ ឆ្នាំ២០១៧ ក្រសួងមហាផ្ទៃ បានដាក់ចេញសេចក្តីណែនាំលេខ០១៨ សណន ចុះថ្ងៃទី២៣ ខែឧសភា ឆ្នាំ២០២២ ស្តីពី បែបបទ និងនីតិវិធីនៃការផ្តល់សេវារដ្ឋបាលតាមយន្តការច្រកចេញចូលតែមួយនៃរដ្ឋបាលឃុំ សង្កាត់ ហើយអគ្គនាយកដ្ឋានរដ្ឋបាលក៏បានធ្វើការផ្សព្វផ្សាយសេចក្តីណែនាំនេះជូនរដ្ឋបាល រាជធានី ខេត្ត ដើម្បីគាំទ្រដល់រដ្ឋបាលឃុំ សង្កាត់ក្នុងការរៀបចំដាក់ឱ្យអនុវត្តយន្តការច្រកចេញ ចូលតែមួយនៅគ្រប់ឃុំ សង្កាត់ ក្នុងដែនសមត្ថកិច្ចរបស់ខ្លួន ឱ្យបានមុនដំណាច់ឆ្នាំ២០២២។ បច្ចុប្បន្ន មានសេវាសរុបចំនួន២៣ ដែលកំពុងអនុវត្តតាមយន្តការនេះ។សូមបញ្ជាក់ថា យន្តការច្រកចេញចូលតែមួយ គឺជាកន្លែងប្រមូលផ្តុំការផ្តល់សេវារដ្ឋបាលនានាដែលស្ថិត ក្នុងដែនសមត្ថកិច្ចរបស់ខ្លួន និងផ្តល់លទ្ធផលសម្រេចនៅកន្លែងតែមួយ តាមនីតិវិធីសាមញ្ញ ប្រកបដោយគុណភាព តម្លាភាព ប្រសិទ្ធភាព ស័ក្តិសិទ្ធិភាព គណនេយ្យភាព និងបរិយាបន្ន ឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋាន។ នៅនីតិកាលថ្មីនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយមានឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ជាសេនាធិការ កាន់តែបង្កើនការប្ដេជ្ញាចិត្តខ្ពស់ក្នុងការធ្វើឱ្យ គោលនយោបាយវិមជ្ឈការ និងវិសហការ រួមទាំងយន្តការច្រកចេញចូលតែមួយ ភាពរីកចម្រើនប្រកបដោយគុណភាព និងទំនុកចិត្តខ្ពស់ពីប្រជាពលរដ្ឋ ៕

នគរបាលរាជធានីភ្នំពេញ បង្ហាញមុខជនសង្ស័យ ចំនួន១៣នាក់ពាក់ព័ន្ធ៣ករណីផ្សេងគ្នា

2024/06/17 04:04:25 pm        74
Facebook Telegram Linkin
ភ្នំពេញ ៖ ជនសង្ស័យ ១៣នាក់ពាក់ព័ន្ធ ៣ករណីផ្សេងគ្នា ត្រូវបាន នគរបាលនៃស្នងការដ្ឋាននគរបាលរាជធានីភ្នំពេញ បង្ហាញមុខជាសាធារណៈ នារសៀលថ្ងៃទី១៧ ខែមិថុនា ឆ្នាំ២០២៤ ។​លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានអោយដឹងថា ដោយមានការដឹកនាំ និងដាក់បទបញ្ជាយ៉ាងម៉ឺងម៉ាត់ របស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញសមត្ថកិច្ច ការិយាល័យ ជំនាញ និង នគរបាលនៃអធិកាដ្ឋានខណ្ឌទាំង១៤បានយកចិត្តទុកដាក់បង្ក្រាបបានក្រុមក្មងទំនើង និងជនសង្ស័យប្រព្រឹត្តិបទល្មើសជាបន្តបន្ទាប់ ហើយ ត្រូវបានបង្ហាញមុខជាសាធារណះនោះពេលនេះ។លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ ប្រាប់ឲ្យដឹងថា ជនសង្ស័យទាំង ១៣នាក់ ក្នុងនោះម្នាក់ករណីឃាតកម្មសម្លាប់ក្មេងប្រុស អាយុ ៤ខែ កាលពីថ្ងៃទី១៥ ខែមិថុនា ឆ្នាំ២០២៤ នៅខណ្ឌទួលគោក រាជធានីភ្នំពេញ ។ ចំណែក ១២នាក់ទៀត គឺជាក្រុមក្មេងទំនើងដែលតែងតែជិះម៉ូតូដេញកាប់ចាក់គ្នាបង្កភាពអាណាធិបតេយ្យ នៅក្នុងរាជធានីភ្នំពេញ ក្មុងនោះ ត្រូវបានកម្លាំងការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ បង្ក្រាបឃាត់ខ្លួន ៦នាក់ និង ៦នាក់ទៀត បង្ក្រាបបានដោយនគរបាលខណ្ឌពោធិ៍សែនជ័យ ។ចំពោះជនសង្ស័យទាំង ១៣ នាក់សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕អត្ថបទ តារាវុទ្ធី , រូបភាព ម៉ឺន កុម្ភៈ

ក្រសួងបរិស្ថាន៖ អន្តរក្រសួងបានប្តេជ្ញាចិត្តរួមដៃគ្នាសម្អាតទន្លេសាប ដើម្បីលើកស្ទួយជីវភាព និងសុខមាលភាពប្រជាជនកម្ពុជា

2024/06/17 03:45:23 pm        119
Facebook Telegram Linkin
ភ្នំពេញ៖ការការពារអាយុជីវិត និងសុខមាលភាពរបស់ប្រជាជនកម្ពុជា គឺជាការប្តេជ្ញាចិត្តរួមគ្នារបស់សមាជិក សមាជិការអន្តរក្រសួងនៃក្រុមប្រឹក្សាជាតិអភិវឌ្ឍដោយចីរភាព (NCSD) នៅក្នុងកិច្ចប្រជុំលើកទី២ នាថ្ងៃទី១៧ ខែមិថុនា ឆ្នាំ២០២៤ នៅទីស្តីការក្រសួងបរិស្ថាន ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍដោយចីរភាព(NCSD)។..............................................កិច្ចប្រជុំលើកទី២ របស់ក្រុមប្រឹក្សាជាតិអភិវឌ្ឍដោយចីរភាព (NCSD) បានផ្តោតសំខាន់ទៅលើភាពស្អាតនៅក្នុងទឹក គឺចាំបាច់ត្រូវរួមគ្នាសម្អាតផ្ទៃទន្លេសាបឱ្យមានភាពបៃតងឡើងវិញ ក្រោយពីទន្លេនេះ ទទួលរងនូវការបង្ហូរកាកសំណល់ សំណល់ប្លាស្ទិក និងសំរាមនានាទៅក្នុងផ្ទៃបឹងទន្លេសាប។ ក្តីបារម្ភជារួមនេះ បានកំពុងយកចិត្តទុកដាក់ពីសំណាក់ប្រមុខរាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា តាមរយៈការដាក់ចេញនូវយុទ្ធសាស្រ្តបញ្ចកោណដំណាក់កាលទី១ និងយុទ្ធសាស្រ្តចក្រាវិស័យបរិស្ថាន ដើម្បីធានាឱ្យប្រជាជនកម្ពុជាគ្រប់រូបទទួលបាននូវសុខភាពល្អ ចាកផុតការឆ្លងជំងឺដង្កាត់នានា ដែលបណ្តាលមកពីកង្វះអនាម័យ ទឹកស្អាត និងចំណីអាហារ ជាពិសេសគឺបរិស្ថានស្អាតជុំវិញខ្លួនតែម្តង។ឆ្លើយតបនឹងទស្សនវិស័យច្បាស់លាស់នេះហើយ ទើបក្រុមប្រឹក្សាជាតិអភិវឌ្ឍដោយចីរភាព (NCSD) បានរៀបចំដាក់ចេញនូវទស្សនទាន (Concept Note) ដើម្បីសម្អាតផ្ទៃទឹកទន្លេសាបឱ្យមានភាពស្អាត ភាពបៃតង និងចីរភាព ដោយបានបែងចែកជា ៤ដំណាក់កាលធំៗ ក្នុងនោះរួមមាន៖ ទី១. កាត់បន្ថយការបំពុលពីសំណល់ប្លាស្ទិកហូរចូលទីក្នុងបឹងទន្លេសាប។ ទី២. កាត់បន្ថយពពួករុក្ខជាតិទឹកដែលរាតត្បាតក្នុងបឹង និងតំបន់ដីសើមជុំវិញ។ ទី៣. ធ្វើឱ្យមានរបរចិញ្ចឹមជីវិតបែបចម្រុះ(ពិពិធកម្មរបរចិញ្ចឹមជីវិត)នៅក្នុងមូលដ្ឋានដូចជាការផ្តល់សេវាទេសចរណ៍ក្រៅពីការធ្វើរបរនេសាទត្រីជាដើម។ និងទី៤. ការស្តារឡើងវិញនូវព្រៃលិចទឹក និងតំបន់ដីសើមជុំវិញតំបន់ស្នូលនៃបឹងទន្លេសាប ដើម្បីធ្វើឱ្យបឹងទន្លេសាបកម្ពុជាមានផាសុកភាពឡើងវិញ លើសពីនេះ បឹងទន្លេសាប គឺជាប្រភពប្រូតេអ៊ីន និងផ្តល់នូវសារធាតុចិញ្ចឹមទៅដល់ប្រជាជនកម្ពុជាគ្រប់រូប និងជាផ្នែកមួយដ៏ចម្បងនៃសេដ្ឋកិច្ចជាតិផងដែរ៕

​ សម្ដេចតេជោ ហ៊ុន សែន ប្រាប់ឯកអគ្គរាជទូតម៉ាឡេស៊ីថា ថ្នាក់ដឹកនាំជំនាន់ចាស់នៅតែធ្វើការជាប់នឹងនយោបាយ ដើម្បីជំរុញទំនាក់ទំនងកម្ពុជា ម៉ាឡេស៊ី

2024/06/17 03:34:44 pm        131
Facebook Telegram Linkin
ភ្នំពេញ៖សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា មានប្រសាសន៍បញ្ជាក់ទៅកាន់ ឯកឧត្តម ស្យាហារ៉ូឌីន ប៊ីន អ៊ន (Shaharuddin Bin Onn) ឯកអគ្គរាជទូតម៉ាឡេស៊ីប្រចាំកម្ពុជាថា សម្ដេច និងថ្នាក់ដឹកនាំជំនាន់ចាស់ដទៃទៀតបានចាកចេញពីស្ថាប័ននីតិប្រតិបត្តិ តែពុំបានទៅណាឆ្ងាយនោះទេ ដោយមួយចំនួនស្ថិតនៅក្នុងព្រឹទ្ធសភា និងរដ្ឋសភា ហើយនៅតែធ្វើការជាប់នឹងនយោបាយដែលមានលទ្ធភាពក្នុងការជួយជំរុញឱ្យទំនាក់ទំនងប្រទេសកម្ពុជា និងម៉ាឡេស៊ីឱ្យកាន់តែប្រសើរឡើង។សម្ដេចតេជោ ហ៊ុន សែន បានបញ្ជាក់បែបនេះ ក្នុងឱកាស អនុញ្ញាតឱ្យ ឯកអគ្គរាជទូតម៉ាឡេស៊ីប្រចាំនៅកម្ពុជា ចូលជួបសម្ដែងការគួរសម និងពិភាក្សាការងារ នៅព្រឹកថ្ងៃទី១៧ ខែមិថុនា ឆ្នាំ២០២៤ នៅវិមានព្រឹទ្ធសភា ភ្នំពេញ។ ជាកិច្ចចាប់ផ្តើម សម្ដេចតេជោប្រធានព្រឹទ្ធសភា បានសម្តែងការស្វាគមន៍យ៉ាងកក់ក្តៅជូនដល់ ឯកឧត្តម ស្យាហារ៉ូឌីន ប៊ីន អ៊ន និងសហការី និងបានអបអរសាទរដល់ឯកឧត្តមដែលទទួលបានការតែងតាំងជាឯកអគ្គរាជទូតម៉ាឡេស៊ីប្រចាំនៅកម្ពុជា។ សម្ដេចតេជោសង្ឃឹមថា ឯកឧត្តមអគ្គរាជទូត និងខិតខំបន្តជំរុញទំនាក់ទំនងទ្វេភាគីកម្ពុជា-ម៉ាឡេស៊ី និងកិច្ចសហប្រតិបត្តិការដែលមានស្រាប់ឱ្យបានកាន់តែល្អប្រសើរជាងមុនបន្ថែមទៀត។ ឯកឧត្តមអគ្គរាជទូត ថ្លែងអំណរគុណសម្តេចតេជោ ដែលបានផ្តល់កិត្តិយស និងពេលវេលាដ៏មានតម្លៃដល់ឯកឧត្តម និងសហការី។ ឯកឧត្តម ក៏បានអបអរសាទរចំពោះ សម្ដេចតេជោដែលត្រូវបានជ្រើសតាំងជាប្រធានព្រឹទ្ធសភា។ ឯកឧត្តមបានលើកឡើងថា សម្ដេចតេជោ បានសម្រេចនូវសមិទ្ធផលដ៏ធំធេង ជាពិសេស សុខសន្តិភាព និងជាអ្នកប្រែក្លាយប្រទេសកម្ពុជាពីភាពដុនដាប មកជាប្រទេសដែលមានការអភិវឌ្ឍរីកចម្រើនជាបន្តបន្ទាប់។ ឯកឧត្តម បានបន្តថា ការផ្លាស់ប្តូរអគ្គរាជទូតម៉ាឡេស៊ីប្រចាំព្រះរាជាណាចក្រកម្ពុជា គឺប្រើរយៈពេលខ្លីណាស់ ដោយគ្រាន់តែអគ្គរាជទូតចាស់ចេញផុតភ្លាម អគ្គរាជទូតថ្មីក៏បានមកដល់ និងចាប់ផ្តើម ធ្វើការភ្លាម ដោយសារតែប្រទេសម៉ាឡេស៊ី បានផ្ដល់ការយកចិត្តទុកដាក់យ៉ាងខ្លាំងលើទំនាក់ទំនងរវាងប្រទេសទាំងពីរ។ ឯកឧត្តមអគ្គរាជទូត បានបង្ហាញនូវការវាយតម្លៃខ្ពស់លើទំនាក់ទំនងកម្ពុជា-ម៉ាឡេស៊ី និងប្តេជ្ញាពង្រឹងទំនាក់ទំនង និងកិច្ចសហប្រតិបត្តិការទ្វេភាគីដែលមានស្រាប់ ឱ្យកាន់តែរឹងមាំ និងធ្វើការជាមួយរដ្ឋាភិបាលកម្ពុជា ជាពិសេស បន្តអនុវត្តនូវគម្រោងនៃកិច្ចសហប្រតិបត្តិការដែលថ្នាក់ដឹកនាំនៃប្រទេសទាំងពីរបានកំណត់ ក្នុងដំណើរទស្សនកិច្ចរបស់សម្ដេចធិបតីទៅកាន់ប្រទេសម៉ាឡេស៊ីកាលពីចុងខែកុម្ភៈកន្លងទៅ ដូចជាវិស័យពាណិជ្ជកម្ម និងវិនិយោគ ការងារនិងការអប់រំបណ្តុះបណ្តាលបច្ចេកទេសវិជ្ជាជីវៈ (TVET) ការតភ្ជាប់ បច្ចេកវិទ្យាឌីជីថល និងឧស្សាហកម្មអាហារហាឡាល់ (Halal)។  ឯកឧត្តម ក៏បានបញ្ជាក់ជូនសម្តេចតេជោ បន្ថែមផងដែរថា ទំនាក់ទំនងរវាងរដ្ឋាភិបាល និងរដ្ឋាភិបាល រវាងអ្នកវិនិយោគ និងថ្នាក់ដឹកនាំធុរកិច្ច និងរវាងប្រជាជននៃប្រទេសទាំងពីរ គឺមានការរីកចម្រើនល្អប្រសើរ និងត្រូវតែពង្រឹងបន្ថែមទៀត។ជាការឆ្លើយតប សម្តេចប្រធានព្រឹទ្ធសភា បានសម្តែងនូវការពេញចិត្ត និងមោទនភាព ដែលក្នុងរយៈពេលនៃការដឹកនាំរបស់សម្តេច ក្នុងឋានៈជានាយករដ្ឋមន្ត្រី បានចូលរួមកសាង និងពង្រឹងទំនាក់ទំនងនៃប្រទេសទាំងពីរ រហូតបានក្លាយជាមូលដ្ឋានសម្រាប់ការបន្តជំរុញកិច្ចសហប្រតិបត្តិការដល់ថ្នាក់ដឹកនាំជំនាន់ថ្មី ក៏ដូចជាអ្នកនយោបាយនៅក្នុងប្រទេសម៉ាឡេស៊ីផងដែរ។ សម្តេចតេជោមានប្រសាសន៍បន្ថែមថា៖«សម្ដេច និងថ្នាក់ដឹកនាំជំនាន់ចាស់ដទៃទៀត បានចាកចេញពីស្ថាប័ននីតិប្រតិបត្តិ តែពុំបានទៅណាឆ្ងាយនោះទេ ដោយមួយចំនួនស្ថិតនៅក្នុងព្រឹទ្ធសភា និងរដ្ឋសភា ហើយនៅតែធ្វើការជាប់នឹងនយោបាយដែលមានលទ្ធភាពក្នុងការជួយជំរុញឱ្យទំនាក់ទំនងប្រទេសទាំងពីរ កាន់តែប្រសើរឡើង»។សម្តេចប្រធាន ពេញចិត្តចំពោះកំណើនការវិនិយោគពីម៉ាឡេស៊ី និងកំណើនទំហំពាណិជ្ជកម្មទ្វេភាគី ជាពិសេសគឺការទិញអង្ករពីកម្ពុជា ដែលជួយដល់កសិករកម្ពុជាខិតខំដាំដុះបន្ថែមទៀត និង ដល់សន្តិសុខស្បៀងរបស់ម៉ាឡេស៊ី ។ សម្តេច លើកទឹកចិត្តឱ្យមានការជំរុញការវិនិយោគនិងផ្លាស់ប្ដូរទំនិញផ្សេងៗទៀត។ សម្ដេចតេជោបានចាត់ទុកថាការដឹកទំនិញតាមផ្លូវទឹករវាងកំពង់ផែក្រុងព្រះសីហនុ និងកំពង់ផែម៉ាឡេស៊ីនៅជិតគ្នាណាស់ ដែលផ្ដល់ភាពងាយស្រួលក្នុងការដឹកទំនិញចេញចូលតាមផ្លូវទឹក។ សម្ដេចតេជោបានរំលឹកពីការផ្ទេរតំណែងពីជំនាន់ចាស់ទៅជំនាន់ថ្មី ហើយក្នុងរយៈពេល ៩ខែកន្លងមកនេះ សុខសន្តិភាពត្រូវបានធានា, ស្ថិរភាពនយោបាយ និងសេដ្ឋកិច្ច ស្ថិតស្ថេរ និងកំណើនសេដ្ឋកិច្ច នៅតែបន្តកើនឡើង។ ឆ្នាំនេះកម្ពុជាសង្ឃឹមថាកំណើនសេដ្ឋកិច្ចអាចនឹងឈានដល់៦% ដោយវិស័យឧស្សាហកម្ម និងទេសចរណ៍ជាដើម។ សម្ដេចតេជោបានស្នើឱ្យ ឯកឧត្តមឯកអគ្គរាជទូតបន្តការខិតខំ ពង្រឹងបន្ថែមទៀត ជាពិសេសការសម្រេចឱ្យបាននូវឧស្សាហកម្មម្ហូបហាឡាល់ ដើម្បីផ្គត់ផ្គង់ទៅតំបន់ផ្សេងទៀត។សម្ដេចតេជោបានផ្ដល់អនុសាសន៍ថា កម្ពុជាបានផ្ដល់អាទិភាពលើការបណ្ដុះបណ្ដាលធនធានមនុស្ស និងបានជំរុញឱ្យភាគីម៉ាឡេស៊ី យកចិត្តទុកដាក់លើការបណ្ដុះបណ្ដាលធនធានមនុស្ស ដើម្បីបម្រើសេចក្តីត្រូវការរបស់វិនិយោគិនម៉ាឡេស៊ី និងកម្ពុជាផង និងតម្រូវទីផ្សារការងារ នៅប្រទេសម៉ាឡេស៊ីដែលខ្វះពលកម្មនោះផង។ សម្ដេចតេជោ និង ឯកឧត្តម ឯកអគ្គរាជទូតម៉ាឡេស៊ី ក៏បានឯកភាពគ្នាទៅលើសភាពការណ៍នៅមីយ៉ាន់ម៉ា ដែលនៅតែជាបញ្ហាធំ និងស្មុគស្មាញ សម្រាប់ប្រទេសអាស៊ាន និងជាបន្ទុកដ៏ធំផងដែរសម្រាប់ម៉ាឡេស៊ីដែលធ្វើជាប្រធានអាស៊ាននៅឆ្នាំខាងមុខនេះ។ អំពីបញ្ហានៅមជ្ឈឹមបូព៌ា សម្ដេចតេជោ និងឯកឧត្តមឯកអគ្គរាជទូតម៉ាឡេស៊ី មើលឃើញថា សភាពការណ៍នៅតែតានតឹងនៅឡើយ។ ឯកឧត្តមបានបញ្ជាក់ថា រដ្ឋាភិបាលម៉ាឡេស៊ីនៅតែមានគោលជំហរដដែល គឺបញ្ហានៅមជ្ឈឹមបូព៌ា គឺត្រូវការឱ្យមានបទឈប់បាញ់ ដើម្បីកាត់បន្ថយការបាត់បង់ជីវិតមនុស្ស។នៅក្នុងឱកាសនោះផងដែរ ឯកឧត្តមឯកអគ្គរាជទូតម៉ាឡេស៊ី ក៏បានស្នើសុំសម្ដេចតេជោទៅបំពេញទស្សនកិច្ចនៅម៉ាឡេស៊ី។ សម្ដេចតេជោបានឆ្លើយតបថា សម្តេចទទួលយកការអញ្ជើញដោយក្តីរីករាយ ហើយនឹងរកពេលវេលាសមស្របណាមួយនៅពេលខាងមុខដើម្បីអញ្ជើញបំពេញទស្សនកិច្ចនៅម៉ាឡេស៊ី៕

ការស្ថាបនាផ្លូវជនបទ គឺជាការវិនិយោគដ៏ចាំបាច់ ដើម្បីលើកកម្ពស់ជីវភាពរស់នៅប្រជាពលរដ្ឋ

2024/06/17 03:31:00 pm        232
Facebook Telegram Linkin
ឧដ្ដរមានជ័យ ៖ ក្រសួងអភិវឌ្ឍន៍ជនបទ ចាត់ទុកការអភិវឌ្ឍន៍ផ្លូវនៅតាមជនបទ គឺជាការវិនិយោគដ៏ចាំបាច់ សម្រាប់ជួយសម្រួលដល់ប្រជាពលរដ្ឋ ក្នុងការធ្វើដំណើរ និងការដឹកជញ្ជូនកសិផលផ្សេងៗ ដើម្បីចូលរួមចំណែកលើកកម្ពស់ជីវភាពរស់នៅ និងការកាត់បន្ថយភាពក្រីក្រ នៅជនបទ។ ​ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១៧ ខែ មិថុនា ឆ្នាំ ២០២៤ នេះ បានដឹកនាំប្រតិភូអន្តរក្រសួងចុះត្រួតពិនិត្យ និងវាយតម្លៃ លើលទ្ធផលការងារស្ថាបនាផ្លូវក្រាលដី ល្បាយក្រួសចំនួន ១ ខ្សែ ប្រវែង ១១ ៥០០ ម៉ែត្រ, ទទឹង ៨ ម៉ែត្រ, សាងសង់លូមូលមុខពីរចំនួន ១ កន្លែង, លូមូលមុខមួយចំនួន ៩ កន្លែង, សំណង់ស្ទាក់ទឹកចំនួន ៣ កន្លែង, ការងាររាវសំអាតគ្រាប់មីនយុទ្ធភ័ណ្ឌមិនទាន់ផ្ទុះ មានចំនួនជាង ១៧ ម៉ឺនម៉ែត្រការរ៉េ និង ផ្លាកឈ្មោះផ្លូវចំនួន ២ កន្លែង ស្ថិតនៅចាប់ពីផ្លូវជាតិលេខ ៦៧ ចំណុចភ្នំជាំ ឆ្លងកាត់ភូមិជាំ និងភូមិអូរក្រញ៉ូង ទៅកាន់ចំណុចក្បាល ទន្សោង (តំបន់ស្នាក់នៅចុងក្រោយថ្នាក់ដឹកនាំនយោបាយខ្មែរក្រហម) ឃុំអន្លង់វែង ស្រុកអន្លង់វែង ខេត្តឧត្តរមានជ័យ ដែលគម្រោង នេះ ទទួលការអនុវត្តដោយក្រុមហ៊ុន ហេង សម្បត្តិ អាហរ័ណនីហរ័ណ ដឹកជញ្ជូន និងសំណង់។ជុំវិញគម្រោងខាងលើនេះ, លោក សាន ហេង ថ្លែងឲ្យដឹងថា សម្រាប់ការងារស្ថាបនាផ្លូវខាងលើនេះ ក្រុមហ៊ុនបានអនុវត្ត សម្អាតតួថ្នល់ចាស់, ភ្ជួរ កៀរ និងកិនបង្ហាប់តួផ្លូវចាស់, ការងារធ្វើតួថ្នល់, ក្រាលដីល្បាយក្រួស, ដាក់ស្លាកសញ្ញាចរាចរណ៍ចំនួន ៣៤ ស្លាក, ដាក់ផ្លាកឈ្មោះផ្លូវចំនួន ២ ផ្លាក ដោយការងារទាំងនេះសម្រេចបាន ១០០ ភាគរយ។ ចំណែកការងាររាវសំអាតគ្រាប់មីនយុទ្ធ ភ័ណ្ឌមិនទាន់ផ្ទុះ គឺសម្រេចបាន ១០០ ភាគរយផងដែរ, ខណៈការសាងសង់លូ និងសំណង់ស្ទាក់ទឹករួមមាន៖ ការសាងសង់លូមូល មុខពីរ ចំនួន ១ កន្លែង, សាងសង់លូមូលមុខមួយ ចំនួន ៩ កន្លែង និងសាងសង់សំណង់ស្ទាក់ទឹកចំនួន ៣ កន្លែង សម្រេចបាន ១០០ ភាគរយដូចគ្នា។ សរុបមក, ការងារស្ថាបនាផ្លូវ លូនិងសំណង់ស្ទាក់ទឹក គឺបានអនុវត្តសម្រេចបានលទ្ធផល ១០០ ភាគរយ ត្រឹមត្រូវតាមកិច្ចសន្យា និងតាមបទដ្ឋានបច្ចេកទេស។ទាក់ទិនគម្រោងខាងលើនេះដែរ, ឯកឧត្តម សាន វិសាល សំណូមពរដល់អ្នកទទួលការ ធ្វើការត្រួតពិនិត្យលើការងារស្ថាបនា ផ្លូវ លូ និងសំណង់ស្ទាក់ទឹកខាងលើឲ្យបានល្អ ប្រកបដោយគុណភាព សោភ័ណភាព និងសុវត្ថិភាព ក្នុងរយៈពេល ៦ ខែបន្តទៀត ទៅតាមកិច្ចសន្យា។ បន្ទាប់ពីចុះពិនិត្យគម្រោងផ្លូវ និងលូខាងលើរួច, ឯកឧត្តម សាន វិសាល និងក្រុមការងារអន្តរក្រសួង បានចុះជួបសំណេះ សំណាល ជាមួយអាជ្ញាធរមូលដ្ឋាន និងប្រជាពលរដ្ឋចំនួន ៣០ គ្រួសារ ដោយក្នុងពិធីនោះ ឯកឧត្តមក៏បានផ្តាំផ្ញើដល់អាជ្ញាធរមូលដ្ឋាន និងប្រជាពលរដ្ឋទាំងអស់ សូមចូលរួមថែទាំផ្លូវ លូ និងសំណង់ស្ទាក់ទឹកខាងលើនេះឲ្យបានយូរអង្វែង និងចាត់ទុកផ្លូវ និងលូទាំងនោះជារបស់ពួកគាត់។ ក្នុងពិធីសំណេះសំណាលនេះដែរ ឯកឧត្តម ក៏បានឧបត្តម្ភក្រម៉ា ក្នុងមួយគ្រួសារចំនួន ១ ផងដែរ៕ អត្ថបទ៖ សុន រ៉ាឌី

គ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះអប់រំសុខភាព និងព្យាបាលជំងឺជូនពលរដ្ឋ ខេត្តព្រៃវែង

2024/06/17 03:27:44 pm        89
Facebook Telegram Linkin
ព្រៃវែង ៖ គ្រូពេទ្យស្ម័គ្រចិត្តឯកឧត្ត​ម ហ៊ុន ម៉ានី ចុះពិនិត្យ ព្យាបាលជំងឺ ចែកឱសថ ចែកវ៉ែនតា ទឹកសុទ្ធ នំប៉័ងជូនបងប្អូនប្រជាពលរដ្ឋផ្តល់សេវាដោយឥតគិតថ្លៃ និងឥតគិតថវិកាបេសកកម្ម បានចំនួន១១,៥៥៦នាក់ ស្រីចំនួន៧,៧៤២នាក់ ស្ថិតនៅវិទ្យាល័យ រស្មីសាមគ្គី ឃុំស្វាយភ្លោះ ស្រុកពាមជរ ខេត្តព្រៃវែង កាលពីថ្ងៃទី១៦ ខែមិថុនា ឆ្នាំ២០២៤ ដើម្បីចូលរួមជាមួយរាជរដ្ឋាភិបាលក្នុងការលើកកម្ពស់សុខុមាលភាពប្រជាជន គឺនាំអោយមានកំណើនសេដ្ឋកិច្ច និងកាត់បន្ថយភាពក្រីក្ររបស់ប្រជាពលរដ្ឋកម្ពុជា ស្របទៅតាមគោលដៅអភិវឌ្ឍន៍ប្រកប​ដោយ​ចីរភាពរបស់រាជរដ្ឋាភិបាលនៃព្រះរាជាណាចក្រកម្ពុជា។​ឯកឧត្តមបណ្ឌិត សេង បញ្ញាឫទ្ធិ អនុប្រធានប្រតិបត្តិ ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ខេត្តព្រៃវែង និងជាប្រធានមន្ទីរសុខាភិបាលខេត្តព្រៃវែង បានលើកឡើងថា ថ្ងៃនេះដោយមានការចង្អុលបង្ហាញដ៏ខ្ពង់ខ្ពស់ពីឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ឯកឧត្តម លេង ផាលី រដ្ឋលេខាធិការក្រសួងផែនការ និងជាសមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី នាំយកអំណោយថ្នាំពេទ្យដ៏ថ្លៃថ្លារបស់ឯកឧត្តមឧបនាយករដ្ឋមន្ត្រី ហ៊ុន ម៉ានី និងដឹកនាំសម្រប​សម្រួល ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៨៨០នាក់ ស្រី៣៥៩នាក់ ព្រមទាំងនាំពាក្យផ្តាំផ្ញើសួរសុខទុក្ខពីឯកឧត្តមឧបនាយករដ្ឋមន្ត្រី ហ៊ុន ម៉ានី ជូនចំពោះបងប្អូនប្រជាពលរដ្ឋ និងក្រុមការងារ ប្រចាំនៅខេត្តព្រៃវែងផងដែរ។ ជាមួយគ្នានោះផងដែរឯកឧត្តម សួន សុម៉ាលីន អភិបាលខេត្តព្រៃវែង ព្រមទាំងបងប្អូនប្រជាពលរដ្ឋ ក្មេង ចាស់ ប្រុស ស្រី មានសេចកី្តរីករាយដែលបានទទួលស្វាគមន៍ ក្រុមការងារគ្រូពេទ្យស្ម័គ្រចិត្តរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្រី្តក្រសួងមុខងារសាធារណៈ ដែលបានសហការជាមួយអាជ្ញាធរខេត្តព្រៃវែង ចុះពិនិត្យព្យាបាលជំងឺ ចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋផ្តល់សេវាដោយឥតគិតថ្លៃ ឥតគិតថវិកាបេសកកម្ម ទទួលបានលទ្ធផលជោគជ័យយ៉ាងត្រចះត្រចង់លើសផែនការ។ ហើយមានមោទនភាពខ្លាំងណាស់ ក្នុងនាមប្រជាពលរដ្ឋក្នុងមូលដ្ឋានស្រុកពាមជរ ខេត្តព្រៃវែង តាមរយៈអ្វីដែលទទួលបាននេះ ជាការគិតគូរមួយរបស់រាជរដ្ឋាភិបាល ស្របតាមយុទ្ធសាស្រ្តបញ្ចកោណដំណាក់កាលទី១ ជាកំណែទម្រង់ថ្មី ដែលផ្តល់ឲ្យប្រជាពលរដ្ឋទូទាំងព្រះរាជាណាចក្រកម្ពុជាទទួលបាននូវសន្តិភាព និងការអភិវឌ្ឍន៍បន្តទៅមុខទៀត។ ជាពិសេសតាមរយៈគម្រោងព្រែកជីក «ហ្វូណន តេជោ» ក្នុងនាមជាប្រជាពលរដ្ឋនៅក្នុងខេត្តព្រៃវែង ក៏ដូចជាតំណាងប្រជាពលរដ្ឋជាង១លាន២សែននាក់ ដែលកំពុងរស់នៅក្នុងខេត្តព្រៃវែងទាំងមូល គឺពិតជាមានមោទនភាពខ្លាំងណាស់ ពិព្រោះគម្រោងព្រែកជីក «ហ្វូណន តេជោ» ផ្តល់ប្រយោជន៍សេដ្ឋកិច្ចយ៉ាងខ្លាំងបំផុតដល់ព្រះរាជាណាចក្រកម្ពុជា ជាពិសេសសម្រាប់ប្រជាពលរដ្ឋ និងសម្រាប់យុវជនជំនាន់ក្រោយ ក្នុងការរស់នៅប្រកបដោយសុខសន្តិភាព និងការអភិវឌ្ឍន៍។ឯកឧត្ត​ម លេង ផាលី បានបញ្ជាក់ថា ការចូលរួមសកម្មភាពបម្រើសង្គម រៀនសូត្របន្ថែមនៅមូលដ្ឋានជាក់ស្តែង និងចូលរួមចំណែកលើកកម្ពស់សុខមាលភាពប្រជាជន ដែលស្របតាមគោលដៅអភិវឌ្ឍន៍ប្រកប​ដោយចីរភាព របស់រាជរដ្ឋាភិបាលនៃព្រះរាជាណាចក្រកម្ពុជា អាណត្តិទី៧ ដែលមានសម្តេចមហាបវធិបតី ហ៊ុន ម៉ាណែត ជាប្រមុខដឹកនាំ។   ជាពិសេសក្នុងរយៈពេល១២ឆ្នាំ (០២ ធ្នូ ឆ្នាំ២០១២ ដល់ ១៦ មិថុនា ឆ្នាំ២០២៤) ក្រោមការដឹកនាំចង្អុលបង្ហាញដោយផ្ទាល់របស់ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី មានសមាជិក សមាជិកាចំនួន១២,០៦៩នាក់ (មួយម៉ឺន ពីរពាន់ ហុកសិប ប្រាំបួននាក់) ក្នុងនោះស្ត្រីមានចំនួន ៦,៤៩៥នាក់ (ប្រាំមួយពាន់បួនរយកៅសិបប្រាំនាក់) ដែលមាន២៨សាខា (ក្នុងនោះមានចំនួន២៥រាជធានី-ខេត្ត សាខា និងសាកលវិទ្យាល័យ ចំនួន៣សាខា) បានបំពេញបេសកកម្មដ៏ថ្លៃថ្លាដោយទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស បណ្តុះបណ្តាលវគ្គសង្គ្រោះបឋម យកសំណាករកវីរុសកូវីដ-១៩ និងពិនិត្យព្យាបាលជំងឺជូនប្រជាពលរដ្ឋផ្តល់សេវា ដោយឥតគិតថ្លៃបានចំនួន២០១១លើក មានប្រជាពលរដ្ឋចូលរួមចំនួន១៣,២៣៧,​០៨២នាក់ (ដប់បីលាន ម្ភៃបីម៉ឺន ប្រាំពីរពាន់ ប៉ែតសិបពីរ នាក់) ក្នុងនោះស្ត្រីមានចំនួន ៦,៧៧៩,០៧៣នាក់ (ប្រាំមួយលាន ចិតសិបប្រាំពីរម៉ឺន ប្រាំបួនពាន់ ចិតសិបបី នាក់) គិតត្រឹមថ្ងៃទី១៦ ខែមិថុនា ឆ្នាំ២០២៤ ច្រើនជាង៣ ភាគ៤ នៃប្រជាជនសរុបទូទាំងប្រទេសដែលមានចំនួន១៧,៣៣៦,៣០៧នាក់ (ដប់ប្រាំពីរលាន សាមសិបបីម៉ឺន ប្រាំមួយពាន់ បីរយ ប្រាំពីរ នាក់) ធៀបនឹងឆ្នាំ២០២៤ បើគិតសេវាជាមធ្យម ប្រជាពលរដ្ឋក្នុងម្នាក់ ចំណាយអស់៥០ដុល្លារ សរុបត្រូវចំណាយទាំងអស់ប្រហែល ៦៦១,៨៥៤,១០០ដុល្លារ (ប្រាំមួយរយហុកសិបមួយលាន ប៉ែតសិបប្រាំម៉ឺន បួនពាន់ មួយរយ ដុល្លារសហរដ្ឋអាមេរិក)។ រហូតមកដល់ពេលនេះ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៤,៦០១នាក់ បាននិងកំពុងបន្តចុះបេសកកម្មតាមការឧទ្ទេសនាមរបស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ និងដោយស្ម័គ្រចិត្តឥតគិតថវិកាបេសកកម្ម ដោយចាក់ជូនប្រជាពលរដ្ឋបានប្រមាណ ១១,៩១០,៣៦៨ដូស (ដប់មួយលានកៅសិបមួយម៉ឺនបីរយហុកសិបប្រាំបីដូស) ក្នុង២៥រាជធានី-ខេត្ត។ ទទួលបានការពិនិត្យ ព្យាបាល និងចែកថ្នាំជូនដោយឥតគិតថ្លៃពីក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដោយមានកិច្ចសហការជាមួយសាខាសកម្មជនក្រុមការងារយុវជនរាជធានីភ្នំពេញ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា យុវជនកាយរិទ្ធិកម្ពុជា ក្រុមការងាររាជរដ្ឋាភិបាលចុះជួយរាជធានី-ខេត្ត-មន្ទីរសុខាភិបាលខេត្ត និងអាជ្ញាធរគ្រប់ជាន់ថ្នាក់។ឯកឧត្ត​ម លេង ផាលី បានសង្កត់ធ្ងន់ទៀតថា ការចុះពិនិត្យ និងព្យាបាលជំងឺជូនប្រជាពលរដ្ឋ គឺជាស្មារតីមនុស្សធម៌សុទ្ធសាធដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋក្នុងនាមជាឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួកសាសនា​ ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្ររបស់ប្រជាពលរដ្ឋ  និងបង្កើនភាពសុខដុមរមនាក្នុងសហគមន៍ តាមរយៈការផ្ដល់សេវាសុខភាពសាធារណៈដោយឥតគិតថ្លៃ។ បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យ សុភមង្គល ជូនគ្រួសារ និងសង្គមជាតិ។ យើងទាំងអស់គ្នាសូមគោរពថ្លែងអំណរគុណដល់បងប្អូនប្រជាពលរដ្ឋទាំងអស់ តែងតែបោះឆ្នោតជូនគណបក្សប្រជាជនកម្ពុជាគ្រប់ពេលវេលា។ អបអរសាទរ និងគាំទ្រគម្រោងព្រែកជីក «ហ្វូណន តេជោ» នាំឱ្យមានកំណើនសេដ្ឋកិច្ចកម្ពុជា៕អត្ថបទ ៖ រដ្ឋា​

ក្រុមប្រឹក្សាខេត្តបន្ទាយមានជ័យ បានរៀបចំបេីកកិច្ចប្រជុំលេីកសាមញ្ញ លេីកដំបូង អាណត្តិ ទី៤ របស់ខ្លួន ក្រោយពីបានប្រកាសចូលកាន់តំណែងបានរយៈពេល៧ថ្ងៃ

2024/06/17 03:23:01 pm        123
Facebook Telegram Linkin
បន្ទាយមានជ័យ ៖ ក្រោយពីបានប្រកាសចូលកាន់តំណែងក្រុមប្រឹក្សាខេត្តបន្ទាយមានជ័យ អាណត្តិទី៤ បានរយៈពេល៧ថ្ងៃ ក្រុមប្រឹក្សាខេត្តបន្ទាយមានជ័យ បានរៀបចំបេីកកិច្ចប្រជុំលេីកដំបូង សាមញ្ញ លេីកទី០១ អាណត្តិ ទី៤ របស់ខ្លួនដឹកនាំ ដោយឯកឧត្ដម ប្លែក វ៉ារី ប្រធានក្រុម ប្រឹក្សា ខេត្ត ឯកឧត្ដម លោកជំទាវ សមាជិក ក្រុម ប្រឹក្សា ខេត្ត លោក លោកស្រី អភិបាល រង ខេត្ត មន្ទីរ អង្គភាព ពាក់ព័ន្ធ ជុំវិញ ខេត្ត ប្រារព្ធ ធ្វើឡើង នៅសាលប្រជុំ ក្រុមប្រឹក្សា ខេត្ត នាព្រឹកថ្ងៃទី១៧ ខែមិថុនា ឆ្នាំ២០២៤។ តាមរយៈ នៃកិច្ចប្រជុំដំបូងក្រុមប្រឹក្សាខេត្តបន្ទាយមានជ័យផ្តោតលេីរបៀបវារៈសំខាន់ៗចំនួន៣ រួមមាន ៖ របៀបវារៈទី១ ៖ ការផ្សព្វផ្សាយអំពីសេចក្តីណែនាំលេខ ០២៤ សណន ចុះថ្ងៃទី១៦ ខែឧសភា ឆ្នាំ២០២៤ របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុងរបស់ក្រុមប្រឹក្សាខេត្ត, របៀបវារៈទី២ ៖ អានសេចក្តីព្រាងបទបញ្ជាផ្ទៃក្នុងរបស់ក្រុមប្រឹក្សាខេត្ត និងសេចក្តីព្រាងប្រតិទិន នៃកិច្ចប្រជុំសាមញ្ញរបស់ក្រុមប្រឹក្សាសម្រាប់ រយៈពេលប្រាំមួយ (៦)ខែ, របៀបវារៈទី៣៖ រាយការណ៍អំពីលទ្ធផលការងារ នៃរដ្ឋបាលរបស់ខ្លួន នៅក្នុងអាណត្តិដឹកនាំរបស់ក្រុមប្រឹក្សាអាណត្តិមុន និងការងារសែសសល់ ទិសដៅការងារ រយៈពេល ០៣ខែសម្រេចបានដោយក្រុមប្រឹក្សាផុតអាណត្តិ ហើយដែលត្រូវអនុវត្តបន្ត៕ អត្ថបទ រឿង ចន្ទ្រា

បណ្ដាញសង្គម

ព័ត៌មានថ្មីៗ

ពលរដ្ឋស៊ីរីនាំគ្នាតវ៉ានៅទីក្រុង Hama ដើម្បីថ្កោលទោសការវាយប្រហាររបស់អ៊ីស្រាអែល
05/05/2025 09:05 PM
Facebook Telegram Linkin
ក្រុមហ៊ុន Beijing Scitech Holdings Co., Ltd. បង្ហាញចំណាប់អារម្មណ៍ស្វែងរកឱកាសវិនិយោគនៅកម្ពុជា លើការចម្រាញ់ប្រេងឆៅ នៅកម្ពុជា
05/05/2025 09:05 PM
Facebook Telegram Linkin
រដ្ឋមន្ត្រីបរិស្ថានកូរ៉េ​ ប្ដេជ្ញាជំរុញកិច្ចសហប្រតិបត្តិការលើវិស័យធនធានទឹកជាមួយកម្ពុជា
05/05/2025 08:05 PM
Facebook Telegram Linkin
លោក Trumpបញ្ជាឲ្យសាងសង់ និងបើកដំណើរការឡើងវិញពន្ធនាគារ Alcatraz នៅរដ្ឋ California
05/05/2025 08:05 PM
Facebook Telegram Linkin
ជប៉ុន និងឥណ្ឌាយល់ព្រមលើទំនាក់ទំនងការពារជាតិកាន់តែស៊ីជម្រៅ និងសម្លឹងដល់ស្ថាប័នសន្ទនាថ្មី
05/05/2025 08:05 PM
Facebook Telegram Linkin
អ្នកភូមិឥណ្ឌារស់នៅតាមតំបន់ព្រំដែនប៉ាគីស្ថាន ថ្កោលទោសការវាយប្រហារនៅតំបន់កាស្មៀរ
05/05/2025 08:05 PM
Facebook Telegram Linkin
រ៉្វាន់ដាបញ្ជាក់កិច្ចពិភាក្សាជាមួយសហរដ្ឋអាមរិកចំពោះការទទួលយកជនអន្តោប្រវេសន៍និរទេសខ្លួន
05/05/2025 07:05 PM
Facebook Telegram Linkin
កោះតៃវ៉ាន់ត្រូវបានអង្រួនដោយរញ្ជួយដីនៅឆ្នេរភាគខាងកើត តែមិនទាន់មានរបាយការណ៍ភ្លាមៗ អំពីការខូចខាតឡើយ
05/05/2025 07:05 PM
Facebook Telegram Linkin
អ្នកសរសេរប្លុករុស្ស៊ី៖ អ៊ុយក្រែនវាយប្រហារតំបន់ Kursk របស់រុស្ស៊ី
05/05/2025 07:05 PM
Facebook Telegram Linkin
រដ្ឋមន្រ្តីក្រសួងសុខាភិបាល «សូមយើងរួមគ្នាប្រឆាំងជាមួយនឹងជំងឺមហារីក»
05/05/2025 07:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.