BTV NEWS

គ្រួសារយោធិនពលី ថ្លែងអំណរគុណសម្តេចធិបតី ដែលបានជួយដោះស្រាយបំណុល

TOP STORY | សម្ដេចតេជោ ហ៊ុន សែន ចោទជាសំនួរថា ហេតុផលអ្វីទៅដែលថៃមិនព្រមប្រគល់កងទ័ពកម្ពុជា ១៨រូបមកឲ្យកម្ពុជាវិញ?

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញគោរពវិញ្ញាណក្ខន្ធសពវីរកងទ័ពដែលបានពលី ក្នុងការប៉ះទង្គិចគ្នារវាងកងទ័ពកម្ពុជា-ថៃ

អ្នកនាំពាក្យ៖ រហូតដល់ម៉ោង១១ថ្ងៃត្រង់នេះ ស្ថានភាពនៅខេត្តឧត្តរមានជ័យ និងព្រះវិហារ មានសភាពស្ងប់ស្ងាត់ធម្មតា

ព័ត៌មានជាតិ

សមាជិកមូលនិធិត្រីចក្រយានកម្ពុជា ប្រមាណ៣០០នាក់ទទួលអំណោយសម្តេចធិបតី និងលោកជំទាវបណ្ឌិត

លោកជំទាវ ជា ស៊ីណា ឃួងស្រេង ប្រធានក្រុមប្រឹក្សាសមាគមកាយឫទ្ធិនារីកម្ពុជា សាខារាជធានីភ្នំពេញ តំណាងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា នាព្រឹកថ្ងៃទី១៨ ខែកញ្ញា ឆ្នាំ២០២៤ បានអញ្ជើញជាអធិបតីភាពក្នុងកម្មវិធីសប្បុរសធម៌ចែករំលែកសម្ភារៈ នៃយុទ្ធនាការ “ចាស់អ្នក ថ្មីខ្ញុំ” របស់សមាគមកាយឫទ្ធិនារីកម្ពុជា និងអំណោយរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនសមាជិកមូលនិធិត្រីចក្រយានកម្ពុជា ប្រមាណ ៣០០នាក់ នៅសាលារាជធានីភ្នំពេញ។ក្នុងឱកាសនោះលោកជំទាវ ជា ស៊ីណា ឃួងស្រេង បានមានប្រសាសន៍ផ្ដាំផ្ញើរសាកសួរសុខទុក្ខពីសំណាក់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលជាប្រចាំសម្ដេច និងលោកជំទាវតែងខ្វាយខ្វល់ពីសុខទុក្ខប្រជាពលរដ្ឋគ្រប់ទីកន្លែងនៅទូទាំងព្រះរាជាណាចក្រកម្ពុជា។ ជាក់ស្តែងសម្រាប់ពេលនេះ សម្តេចធិបតី និងលោកជំទាវបណ្ឌិត បានខ្វាយខ្វល់ចំពោះសុខទុក្ខ លោកអ៊ុ លោកពូ ដែលជាសមាជិកមូលនិធិត្រីចក្រយានកម្ពុជា ដោយបានផ្តល់ជាអំណោយជូនក្នុងឱកាសបុណ្យភ្ជុំបិណ្ឌ ដោយក្នុងម្នាក់ៗទទួលបានថវិកា និងគ្រឿងឧបភោគបរិភោគ។លោកជំទាវ ជា ស៊ីណា ឃួង ស្រេង មានប្រសាសន៍ថា សមាគមកាយឫទ្ធិនារីកម្ពុជា ក្រោមការដឹកនាំរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សម្រេចបានលទ្ធផលជាច្រើន និងទទួលបានការចាប់អារម្មណ៍ពីគ្រប់មជ្ឈដ្ឋាន រហូតមានការចូលរួមយ៉ាងគគ្រឹកគគ្រេង។ បើមិនមានការចូលរួមពីបងប្អូនប្រជាពលរដ្ឋ អាជីវករ និងមន្រីរាជការទេ សមាគមកាយឫទ្ធិនារីកម្ពុជា ក៏មិនអាចមានសកម្មភាពផុលផុសដូចពេលនេះដែរ។ក្នុងឱកាសនោះដែរ លោកជំទាវ ជា ស៊ីណា ឃួង ស្រេង ក៏បានលើកទឹកចិត្តដល់ប្រជាពលរដ្ឋទាំងអស់សូមរួមគ្នាជួយអភិរក្ស ស៊ីក្លូ តាមរយៈការជួយជិះដើរលេងកំសាន្ត ថតរូបជាអនុស្សាវីយ៍ ដើម្បីឱ្យកូនចៅជំនាន់ក្រោយៗ នៅតែស្គាល់ស៊ីក្លូ រហូតតទៅ។ ជាមួយគ្នានេះលោកជំទាវក៏បានសូមឱ្យលោកអ៊ុ លោកពូ សមាជិកមូលនិធិត្រីចក្រយាន ខិតខំថែរក្សាសុខភាពឱ្យបានល្អ ដោយប្រកាន់យកនូវអនាម័យល្អ រស់នៅស្អាត និងហូបស្អាត៕ អត្ថបទ ៖ ប្រាក់ វ៉ាន់ដា

ដីភ្នំតាញាស់ក្នុងស្រុកទឹកផុស ត្រូវអាជ្ញាធរខេត្តដកហូតរក្សាទុក តែមិនទាន់ចំណាត់ការតាមផ្លូវច្បាប់នៅឡើយ

កំពង់ឆ្នាំង៖ មកដល់ថ្ងៃទី១៨ ខែកញ្ញា ឆ្នាំ២០២៤នេះ មានរយៈពេល១០ថ្ងៃហើយ តែដីព្រៃជាច្រើនហិកតានៅក្នុងភូមិកោះខ្ទម្ព ឃុំជៀប ស្រុកទឹកផុស ខេត្តកំពង់ឆ្នាំង ដែលជាដីព្រៃគម្របព្រៃឈើឆ្នាំ២០០២ ចេញដោយព្រះរាជក្រឹត្យនោះ មិនទាន់បានកសាងសំណុំរឿងបញ្ជូនទៅតុលាការនៅឡើយ បើទោះបីជាខាងខ័ណ្ឌរដ្ឋបាលព្រៃឈើកំពង់ឆ្នាំង បានរកឃើញពីឈ្មោះជនសង្ស័យទាំង៤នាក់នោះក៏ដោយ។ លោក ពារ គឹមហេង នាយខ័ណ្ឌរដ្ឋបាលព្រៃឈើកំពង់ឆ្នាំង បានអោយដឹងនៅថ្ងៃទី១៨ ខែកញ្ញានេះថា៖ ក្រោយពីចុះពិនិត្យ នៅទីតាំងប្រព្រឹត្តិបទល្មើសចំនួន៣លើកមក (លើកទី១ទៅជាមួយក្រុមការងារថ្នាក់ស្រុកទឹកផុស, លើកទី២ទៅជាមួយក្រុមការងារចំរុះថ្នាក់ខេត្ត, លើកទី៣ទៅជាមួយក្រុមការងារចំរុះដឹកនាំដោយតំណាងអយ្យការអមសាលាដំបូងខេត្តកំពង់ឆ្នាំង) ក្រុមការងារបានរកឃើញមានជនសងស្ស័យចំនួន៤នាក់ បានចូលទៅឈូសឆាយបំផ្លាញគម្របព្រៃឈើដែលចេញដោយព្រះរាជក្រឹត្យឆ្នាំ២០០២ អស់ប្រមាណជិត១០ហិកតាពិតប្រាកដមែន ។ ក្នុងរឿងនេះ លោកបានធ្វើរបាយការណ៍ជូនលោកប្រធានមន្ទីរកសិកម្ម រុក្ខាប្រម៉ាញ់ និងនេសាទនៅថ្ងៃទី១៧ ខែកញ្ញា ឆ្នាំ២០២៤ តែលោកប្រធានមន្ទីរអោយលោកយករបាយការណ៍នោះមកវិញ ដោយអោយរៀបចំជាសំណុំរឿងចោទប្រកាន់ជនសង្ស័យទាំង៤នាក់នោះ បញ្ជូនទៅអយ្យការអមសាលាដំបូងខេត្តវិញ ដើម្បីចំណាត់ការតាមផ្លូវច្បាប់។លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបានអោយដឹងថា៖ ក្នុងរឿងនេះ លោកតែងពន្លឿនមន្ត្រីព្រៃឈើរបស់លោកអោយកសាងសំណុំរឿងបញ្ជូនទៅអយ្យការអមសាលាដំបូងខេត្តអោយបានលឿន ដើម្បីចំណាត់ការតាមនីតិវិធីទោះជាជនសង្ស័យនោះជាអ្នកណាក៏ដោយ ព្រោះយើងជាមន្ត្រីនគរបាលយុត្តិធម៌ កាលណាមានបទល្មើសកើតឡើង និងបានស្គាល់អត្តសញ្ញាណជនសង្ស័យទាំង៤នាក់នោះហើយ ត្រូវតែកសាងសំណុំរឿងបញ្ជូនទៅអយ្យការអមសាលាដំបូងភ្លាមដែរ។ កាលពីថ្ងៃទី០៨ ខែកញ្ញា ឆ្នាំ២០២៤ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអោយលោក ឈឹម វុទ្ធា អភិបាលរងខេត្ត ដឹកនាំកម្លាំងជំនាញរដ្ឋបាលព្រៃឈើ អាជ្ញាធរស្រុកឃុំភូមិ ចុះទៅពិនិត្យឃើញថា ដីព្រៃជាគម្របព្រៃឈើជាច្រើនហិកតានៅជុំវិញភ្នំតាញាស់ ។ ក្រុមការងារបានរកឃើញថា ដីនៅតំបន់នោះត្រូវបានគេឈូសបំផ្លាញ និងកាន់កាប់យកមែន ក្នុងនោះមានមន្ត្រីសាលាខេត្តម្នាក់ជានាយកទីចាត់ការផែនការ និងវិនិយោគខេត្តកំពង់ឆ្នាំងទៀតផង តែមកដល់ពេលនេះ មិនទាន់ចំណាត់ការអ្វីនៅឡើយ៕ កាំង ហុងវាស្នា

ករណីទឹកហូរកាត់ផ្លូវល្បឿនលឿនភ្នំពេញ-ព្រះសីហនុ អ្នកដំណើរអាចបើកបរលើគន្លងវ៉ាជែង ដោយមិនមានការកាត់ផ្តាច់ចរាចរណ៍ឡើយ

ព្រះសីហនុ៖ នៅលើកំណាត់ផ្លូវល្បឿនលឿនភ្នំពេញ-ព្រះសីហនុ ចន្លោះគីឡូម៉ែត្រ K១៦៨-K១៦៩ ស្ថិត នៅក្នុងភូមិសាស្ត្រឃុំទំនប់រលក ស្រុកស្ទឹងហាវ ខេត្តព្រះសីហនុ ត្រូវទឹកហូរកាត់ ខណៈដែលភ្លៀងកំពុង ធ្លាក់យ៉ាងខ្លាំង នៅព្រឹកថ្ងៃទី១៨ ខែកញ្ញា នេះ ។ នេះជាការឱ្យដឹងរបស់លោក បូរី វង្សសានិត្យ ប្រធានមន្ទីរសាធារណការនិងដឹកជញ្ជូន ខេត្តព្រះសីហនុ ។លោកបានឱ្យដឹងទៀតថា កម្លាំងនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈប្រចាំការលើផ្លូវល្បឿនលឿន បាននឹងកំពុងអន្តរាគមន៍នៅកន្លែងកើតហេតុ ដើម្បីសម្រួលការធ្វើដំណើរ ដោយ មិនមានការកាត់ផ្តាច់ចរាចរណ៍ឡើយ ។លោកបានអំពាវនាវដល់អ្នកបើកបរ ត្រូវប្រុងប្រយ័ត្ន និងត្រូវគោរពតាមការបញ្ជាចរាចរណ៍របស់ នគរបាល និងមើលការដំណឹង និងព័ត៌មានផ្សេងៗ នៅលើផ្ទាំងLED របស់ក្រុមហ៊ុនផ្លូវល្បឿនលឿន ៕

កងទ័ពជើងទឹកត្រៀមកម្លាំងជាងមួយពាន់នាក់ សម្រាប់អន្តរាគមន៍ជួយពលរដ្ឋជួបគ្រោះទឹកជំនន់

ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាអគ្គលេខាធិការរងនៃគណៈកម្មាធិការជាតិសន្តិសុខលម្ហសមុទ្រ បានឲ្យដឹងថា កងទ័ពជើងទឹកបានត្រៀមកម្លាំងជាងមួយពាន់នាក់ និងមធ្យោបាយរួចជាស្រេច សម្រាប់ចុះអន្តរាគមន៍ជួយបងប្អូនប្រជាពលរដ្ឋជួបករណីទឹកជំនន់នៅតាមបណ្តារាជធានី-ខេត្តនានា។ ថ្លែងប្រាប់ទូរទស្សន៍BTVតាមរយៈតេលេក្រាម នាព្រឹកថ្ងៃទី១៨ ខែកញ្ញា ឆ្នាំ២០២៤នេះ ឧត្តមនាវីឯក ទៀ សុខា បានលើកឡើងថា ខណៈគ្រោះទឹកជំនន់បានកំពុងគំរាមកំហែងនៅប្រទេសជិតខាងរបស់កម្ពុជា ហើយក៏ទទួលបានបទបញ្ជាររបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ឲ្យកងកម្លាំងប្រដាប់អាវុធគ្រប់ប្រភេទត្រៀមខ្លួនចុះអន្តរាគមន៍ជួយបងប្អូនប្រជាពលរដ្ឋរងគ្រោះដោយសារទឹកជំនន់នោះ បញ្ជការដ្ឋានកងទ័ពជើងទឹកបានត្រៀមកម្លាំង និងសម្ភាររួចជាស្រេចសម្រាប់ចុះជួយអន្តរាគមន៍គ្រប់ពេលវេលាទាំងអស់ ពោលគឺ២៤ ម៉ោងលើ២៤ម៉ោង។ឧត្តមនាវីឯក ទៀ សុខា ថ្លែងថា ខណៈពេលដែល អាកាសធាតុមិនសូវល្អនាពេលនេះកងទ័ពជើងទឹកបានត្រៀមកម្លាំង១២០០នាក់ ដើម្បីជួយសង្រ្គោះប្រជាពលរដ្ឋនៅ តាមតំបន់ ដែលអាចប្រឈមនឹងទឹកភ្លៀង ជាពិសេសតំបន់ខ្លះនៃខេត្តកំពង់ស្ពឺ, ស្ទឹងត្រែង កំពង់ឆ្នាំង, រាជធានីភ្នំពេញ, តំបន់តាមមាត់សមុទ្រ, និងតាមបណ្តាកោះនានាជាដើម។ឯកឧត្តមឧត្តមនាវីឯក ទៀ សុខា បានបញ្ជាក់ថា«កងទ័ពជើងទឹកបានត្រៀមធម្យោបាយសង្រ្គោះ ដែលមានសម្ភារដូចជា នាវា អូប័រ ទូក និងអាវប៉ូង ជាពិសេសទៅទៀតនោះគឺថ្នាំដង្កូវ គ្រូពេទ្យកងទ័ពជើងទឹកដើម្បីចល័តចុះជួយសង្រ្គោះ បងប្អូនប្រជាពលរដ្ឋណាដែលជួបនូវគ្រោះទឹកជំនន់»។ក្រៅពីត្រៀមនូវកម្លាំង និងធម្យោបាយនានា កងទ័ពជើងទឹកក៏បានត្រៀមនូវស្បៀងអាហារមួយ ចំនួនសម្រាប់ចែកជូនដល់បងប្អូនប្រជាពលរដ្ឋ ដែលរងគ្រោះនូវទឹកជំនន់ទាំងនោះផងដែរ ដើម្បីជួយសម្រាល់ទុក្ខលំបាករបស់ពួកគាត់៕ អត្ថបទបាន ចក់

រដ្ឋបាលរាជធានីរៀបចំរថយន្តក្រុង ៦៥៣គ្រឿង ជិះដោយមិនបង់ប្រាក់ទៅមកតាមខេត្តក្នុងឱកាសបុណ្យភ្ជុំបិណ្ឌ

រដ្ឋបាលរាជធានីភ្នំពេញបានរៀបចំរថយន្តក្រុងចំនួន ៦៥៣គ្រឿង សម្រាប់បម្រើសេវាដឹកជញ្ជូនសាធារណៈរយៈពេល ៥ថ្ងៃ ចាប់ពីថ្ងៃទី៣០ ខែកញ្ញា ដល់ថ្ងៃទី០៤ ខែតុលា ឆ្នាំ២០២៤ ដោយជិះមិនបង់ប្រាក់ ក្នុងឱកាសពិធីបុណ្យភ្ជុំបិណ្ឌ។ នេះបើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញដែលបានផ្សព្វផ្សាយនៅព្រឹកថ្ងៃទី១៨ ខែកញ្ញា ឆ្នាំ២០២៤។សេចក្ដីជូនដំណឹងដដែលបានឱ្យដឹងថា កាេរៀបចំរថយន្តក្រុងចំនួន ៦៥៣គ្រឿង សម្រាប់បម្រើសេវាដឹកជញ្ជូនសាធារណៈរយៈពេល ៥ថ្ងៃ ដោយជិះមិនបង់ប្រាក់នេះ ដើម្បីជួុយសម្រួលដល់ការចំណាយជូនកម្មករ នយោជិត និងប្រជាពលរដ្ឋក្នុងការធ្វើដំណើរទៅលេងស្រុកកំណើតជួបជុំបងប្អូនក្រុមគ្រួសារ ជាពិសេសទៅលេងកម្សាន្តនៅតាមបណ្ដាខេត្តភាពឦសាន។រដ្ឋបាលរាជធានីភ្នំពេញបានបែងចែកគោលដៅបណ្ដារាជធានី ខេត្ត ចំនួន៣ធំៗដូចជា សម្រាប់តម្រាយរត់ក្នុងរាជធានីភ្នំពេញនឹងប្រើប្រាស់រថយន្តក្រុង ១០០គ្រឿង។ សម្រាប់សេវាដឹកជញ្ជូនប្រជាពលរដ្ឋ ដែលនឹងធ្វើដំណើរពីរាជធានីភ្នំពេញទៅតាមបណ្ដាខេត្ត និងពីបណ្ដាខេត្តត្រឡប់មករាជធានីភ្នំពេញវិញ ដែលជាបណ្ដាខេត្តក្រៅពីភូមិភាគឦសាន គឺនឹងប្រើប្រាស់រថយន្តក្រុងចំនួន ៤៩៧គ្រឿង។ ចំពោះខេត្តភូមិភាគឦសាន ដូចជា ខេត្តក្រចេះ ស្ទឹងត្រែង មណ្ឌលគិរី និងខេត្តរតនគិរី គឺប្រើប្រាស់រថយន្តចំនួន ៥៦គ្រឿង ដែលគោលដៅទៅខេត្តទាំងនេះនឹងចេញដំណើរពីស្ថានីយរថយន្តក្រុងរង្វង់មូលកួចកាណុង។ទន្ទឹមនឹងនេះ ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងឱកាសបុណ្យភ្ជុំបិណ្ឌនេះដែរ រដ្ឋបាលរាធានីភ្នំពេញក៏រៀបចំទឹកពិសារបរិសុទ្ធដោយឥតគិតថ្លៃតាមគោលដៅចេញដំណើរផងដែរ។ ជាមួយគ្នានេះរដ្ឋបាលរាជធានីក៏បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដេកជញ្ជូនអ្នកដំណើរទាំងអស់ឱ្យរក្សាតម្លៃដឹកជញ្ជូននៅដដែល ដោយពុំឡើងថ្លៃក្នុងឱកាសបុណ្យភ្ជុំបិណ្ឌ ដើម្បីរួចចំណែកជាមួយរាជរដ្ឋាភិបាល និងរដ្ឋបាលរាជធានីភ្នំពេញក្នុងការជួយសម្រួលដល់ជីវភាពរស់នៅរបស់ប្រជាពលរដ្ឋ៕ អត្ថបទ ៖ ប្រាក់ វ៉ាន់ដា

I CC Preah Vihear បើកកិច្ចប្រជុំបច្ចេកទេសលើកទី៩ នៅខេត្ដសៀមរាប

គណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃ រមណីយដ្ឋានប្រាសាទព្រះវិហារ ហៅកាត់ថា ICC Peah Vihear នៅព្រឹកថ្ងៃទី១៨ ខែកញ្ញា ឆ្នាំ២០២៤នេះ បានបើកកិច្ចប្រ ជុំបច្ចេកទេសលើកទី៩ របស់ខ្លួន ដើម្បីពិភាក្សា ការងារពីការអភិរក្ស និងអភិវឌ្ឍន៍នៅតំបន់រមណីយដ្ឋានប្រាសាទព្រះវិហារ និងតំបន់រមណីយដ្ឋានប្រាសាទកោះកេរ។កិច្ចប្រជុំនេះ ក្រោមអធិបតីភាពលោកជំទាវបណ្ឌិតសភាចារ្យ ភឿង ករុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដែលកិច្ចប្រជុំ មានសហប្រធានប្រទេសឥណ្ឌា និងប្រទេសចិន។ កិច្ចប្រជុំនឹងលើកឡើង នូវរបាយណ៍ពីកិច្ចការងារអភិរក្ស និងអភិវឌ្ឍន៍នៅរមណីយដ្ឋានប្រាសាទព្រះវិហារ ។វឌ្ឍនភាពនៃការសិក្សាសមិទ្ធិលទ្ធភាពស្តីពីគម្រោងអភិរក្ស និងជួសជុលប្រាសាទព្រះវិហារ។របាយការណ៍វឌ្ឍនភាពការងារអភិរក្ស និងជួសជុលគោបុរៈទី៥នៃប្រាសាទព្រះវិហារ។ការកំណត់ប្រព័ន្ធរំដោះទឹក និងលក្ខណៈភូគព្ភសាស្ត្រខាងក្រោមប្រសាទ។ការប្រមូលទិន្ន័យសម្រាប់សិក្សាចលនា និងការវិវត្តន៍នៃកម្លាំងតិចតូនិច ការសិក្សាស្ថិរភាពជម្រាលថ្ម ទិន្នន័យពី បច្ចេកវិទ្យាLidar និងស្ថានីយត្រួតពិនិត្យអាកាសធាតុ ។របាយការណ៍វឌ្ឍនភាពការងារអភិរក្សតម្រោងជួសជុលជណ្តើរបុរាណខាងជើងដំណាក់កាលទី ៤ ។ការសិក្សាស្រាវជ្រាវអំពីគោបុរៈទី៤ និងរចនាសម្ព័ន្ធពាក់ព័ន្ធ ព្រមទាំងកិច្ចការងារអភិរក្សនិងអភិវឌ្ឍន៍ជាច្រើនទៀត នៅតំបន់រមណីយដ្ឋានប្រាសាទកោះកេរ។

នាយករដ្ឋមន្រ្តី បញ្ជាឲ្យភាគីពាក់ព័ន្ធទាំងអស់ត្រៀមលក្ខណៈជួយពលរដ្ឋឲ្យបានទាន់ពេលវេលាក្នុងហេតុការគ្រោះទឹកជំនន់

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចេញបទបញ្ជាឲ្យអាជ្ញាធរាជធានី -ខេត្ត ក្រសួង និងស្ថាប័នពាក់ព័ន្ធទាំអស់ត្រូវត្រៀមលក្ខណៈឲ្យបានគ្រប់គ្រាន់ ក្នុងកិច្ចការអន្តរាគមន៍ ជួយបងប្អូនប្រជាពលរដ្ឋឲ្យបានទាន់ពេលវេលាក្នុងករណីជួបគ្រោះទឹកជំនន់ដោយយថាហេតុណាមួយនោះ។ តាមរយៈសារសំឡេងពិសេស នាព្រឹកថ្ងៃទី១៨ ខែកញ្ញា ឆ្នាំ ២០២៤នេះ សម្តេចធិបតីនាយករដ្ឋមន្រ្តីបានលើកឡើងថា ដោយសារឥទ្ធិពលព្យុះ បានធ្វើឲ្យភ្លៀងបន្តធ្លាក់ជា ច្រើនបន្តបន្ទាប់ ហើយបានបង្ករឲ្យមានការលិចលង់ប្រទេសជិតខាងកម្ពុជា ដូច្នេះអាជ្ញាធរ រាជធានី-ខេត្ត កងកម្លាំងប្រដាប់អាវុធគ្រប់ប្រភេទ រួមទាំងស្ថាប័នពាក់ព័ន្ធទាំងអស់ត្រូវបង្កើន ការយកចិត្តទុកដាក់ ប្រុងប្រយ័ត្នខ្ពស់តាមដានឲ្យជាប់ ដោះស្រាយឲ្យបានទាន់ពេលវេលានៅ ក្នុងករណីដែលមានទឹកជំនន់ប៉ះពាល់ នៅក្នុងភូមិសាស្រ្តទទួលខុសត្រូវរបស់ពួកផងខ្លួន។ ជាមួយគ្នានោះដែរ សម្តេចធិបតី នាយករដ្ឋមន្រ្តី ក៏បានបញ្ជាឲ្យអគ្គមេបញ្ជាការកងយោ ធពលខេមរភូមិន្ទ អគ្គស្នងការនគរបាលជាតិ ត្រៀមកម្លាំងមធ្យោបាយ សម្ភារដើម្បីធ្វើអន្តរាគមន៍សង្រ្គោះតាមការចាំបាច់ ខណៈគណៈកម្មាធិការជាតិគ្រប់គ្រងគ្រោះមហន្តរាយគប្បីបន្ត តាមដានឲ្យជាប់ជាមួយគណៈអភិបាលរាជធានី-ខេត្តត្រូវកំណត់ទីតាំង ឬទីទួលសុវត្ថិភាព ឲ្យបានគ្រប់លក្ខណៈដើម្បីត្រៀមអន្តរាគមន៍ចុះជួយបងប្អូនប្រជាពលរដ្ឋឲ្យបានទាន់ពេលវេ លា។តាមរយៈសារសំឡេងនេះដែរ សម្តេចធិបតី ហ៊ុន ម៉ាណែត ក៏បានចេញបទបញ្ជាឲ្យ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ,ក្រសួងកសិកម្ម រុក្ខាប្រមាញ់ និងគ្រប់ភាគីពាក់ព័ន្ធទាំង អស់ត្រូវត្រៀមនូវស្បៀង សម្ភារបរិក្ខាចាំបាច់ ជាពិសេសស្រូវពូជឲ្យបានគ្រប់គ្រាន់ដើម្បីជួយ ស្តារឡើងវិញខណៈបងប្អូនប្រជាពលរដ្ឋរងផលប៉ះពាល់ខ្លាំងដោយសារគ្រោះទឹកជំនន់នេះ៕

កាកបាទក្រហមបើកវគ្គបណ្តុះបណ្តាលដល់និស្សិតពុទ្ធិកសាកលវិទ្យាល័យព្រះសីហនុរាជចំនួន១០០នាក់

ភ្នំពេញ ÷កាលពីព្រឹកថ្ងៃទី១៧ ខែកញ្ញា ឆ្នាំ២០២៤ កាកបាទក្រហមកម្ពុជា បានបើកវគ្គបណ្តុះបណ្តាលមូលដ្ឋានគ្រឹះស្តីពី ប្រវត្តិចលនាអន្តរជាតិ ច្បាប់មនុស្សធម៌អន្តរជាតិ ការគ្រប់គ្រងបណ្តាញយុវជន កាកបាទក្រហមកម្ពុជា និងវិជ្ជាសង្គ្រោះបឋម ដល់និស្សិតពុទ្ធិកសាកលវិទ្យាល័យព្រះសីហនុរាជ ចំនួន១០០នាក់ ក្រោមអធិបតភាពឯកឧត្តម ពិត ចំណាន សមាជិកគណៈកម្មាធិការកណ្ដាល និងជាអនុប្រធានអចិន្ត្រៃយ៍ និងព្រះសាក្យវង្ស បណ្ឌិត ស៊ីម សារ៉ាន ព្រះសាកលវិទ្យាធិការរង នៃពុទ្ធិកសាកលវិទ្យាល័យព្រះសីហនុរាជ នាទីស្នាក់ការកណ្តាល កាកបាទក្រហមកម្ពុជា។ ព្រះសាក្យវង្ស បណ្ឌិត ស៊ឹម សារ៉ាន ព្រះសាកលវិទ្យាធិការរង តំណាងសម្តេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ បានមានថេរៈដីកាថា៖ ការដឹកនាំនិស្សិត នៃពុទ្ធិកសាកលវិទ្យាល័យព្រះសីហនុរាជ ចំនួន១០០រូប ចូលរួមវគ្គបណ្តុះបណ្តាលមូលដ្ឋាននៅពេលនេះ គឺជាសក្ខីភាពបង្ហាញឲ្យឃើញយ៉ាងជាក់ច្បាស់ ពីការយកចិត្តទុក្ខដាក់ខ្ពស់ចំពោះ ការងារកាកបាទក្រហមកម្ពុជា ក៏ដូចជាការងារទ្រទ្រង់សកម្មភាពយុវជន និងអ្នកស្ម័គ្រចិត្ត កាកបាទក្រហមកម្ពុជាផងដែរ និងជាការលើកទឹកចិត្តដ៏ប្រពៃមួយ ដើម្បីឆ្លើយតបទៅនឹងកិច្ចខិតខំប្រឹងប្រែងយកអស់កម្លាំងកាយ និងបញ្ញាញាណ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្នាក់ដឹកនាំ ព្រមទាំងសមាជិកសមាជិកា កាកបាទក្រហមកម្ពុជាទាំងអស់ ក្នុងការលើកកម្ពស់ការងារមនុស្សធម៌។ បន្ថែមពីនេះឯកឧត្តម ពិត ចំណាន ក៏បាននាំនូវអនុសាសន៍សំខាន់ៗរបស់ សម្ដេចកិត្ដិ្ដព្រឹទ្ធបណ្ឌិតប្រធាន ផ្ដាំផ្ញើជូនគណៈអធិបតី និងអង្គពិធីទាំងមូលដែរថា សូមក្មួយៗយកចិត្តទុកដាក់ក្នុងការសិក្សារៀនសូត្រមុខជំនាញឱ្យបានច្បាស់លាស់ និងចូលរួមលើកកម្ពស់វប្បធម៌ អរិយធម៌ ប្រពៃណីជាតិ ពង្រីកចំណេះដឹងដោយសិក្សាបន្ថែមនូវ បច្ចេកវិទ្យាព័ត៌មានឌីជីថល និងភាសាបរទេស ឱ្យស្របតាមតម្រូវការងារទីផ្សារក្នុងប្រទេស និងសកលលោក។ ជាពិសេសសូមក្មួយៗបន្ដពង្រឹង និងពង្រីកនូវវប្បធម៌ចែករំលែក ពង្រឹងសកម្មភាព មិត្ត-អប់រំ-មិត្ត និង មិត្ត-ជួយ-មិត្ត ចេះជួយសិស្ស និស្សិត យុវជនកាកបាទក្រហមកម្ពុជា ដែលមានជីវភាពខ្វះខាត។សូមរំលឹកថាអ្នកស័្មគ្រចិត្ត និង យុវជនកាកបាទក្រហមកម្ពុជា ត្រូវបានចាត់ទុកជាឆ្អឹងខ្នង របស់ចលនាអន្តរជាតិកាកបាទក្រហម និងអឌ្ឍចន្ទក្រហម ដែលបច្ចុប្បន្នមានជាង១៦លាននាក់ មកពីសមាគមជាតិចំនួន ១៩១ នៅទូទាំងពិភពលោក, ក្នុងនោះមានអ្នកស្ម័គ្រចិត្ត និងយុវជនកាក បាទក្រហមកម្ពុជាមាន ជិត៥ម៉ឺននាក់។អត្ថបទៈ សំ ងីម

រដ្ឋមន្ត្រីក្រសួងសុខាភិបាល ធ្វើបាឋកថាស្តីពីសមិទ្ធផលសុខាភិបាល សម្រាប់មន្រ្តីរាជការក្រោមឱវាទ

ភ្ណំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើបទបាឋកថាលើសមិទ្ធិផល និងវឌ្ឍនភាពសុខាភិបាល ជូនមន្រ្តីរាជការក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ (Zoom) ដែលមានសមាសភាពចូលរួមសរុបចំនួន ៣ ៨១៥នាក់, នារសៀលថ្ងៃទី១៧ ខែកញ្ញា ឆ្នាំ២០២៤នេះ។ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានសំណេះសំណាលជាមួយថ្នាក់ដឹកនាំគ្រប់ឋានានុក្រមពីការអភិវឌ្ឍន៍របស់វិស័យសុខាភិបាលនាពេលកន្លងមក ជាពិសេសនៅក្នុងរយៈពេល ១ឆ្នាំ នៃអាណិត្តទី៧ របស់រាជរដ្ឋាភិបាល និងបានលើកតម្កល់សមិទ្ធិផលនៃការអភិវឌ្ឍន៍ទាំងនេះជាស្នាដៃរួមរបស់មន្រ្តីសុខាភិបាលគ្រប់លំដាប់ថ្នាក់។ឯកឧត្តមសាស្រ្តាចារ្យរដ្ឋមន្រ្តី បានជម្រាបជូនអង្គជួបជុំពីវេទិកាពិភាក្សាជាមួយក្លឹបអ្នកកាសែត ដែលក្នុងវេទិការនេះ ឯកឧត្តមសាស្រ្តាចារ្យបានបង្ហាញពី (១)សមិទ្ធិផលរបស់វិស័យសុខាភិបាល រួមនឹង(២)ស្ថានភាពសុខភាព និងកត្តាកំណត់សុខភាព (៣)ការប្រឈមមុខ និង (៤)ឱកាសសម្រាប់ដែលនឹងត្រូវកែលំអបន្តទៀត។ ឯកឧត្តមសាស្រ្តាចារ្យរដ្ឋមន្រ្តី បានលើកឡើងថា ការងារថែទាំសុខភាពប្រជាជន មន្ត្រីសុខាភិបាលគ្រប់លំដាប់ថា្នក់មានការតាំងចិត្តខ្ពស់ ក្នុងការប្រែក្លាយឧបសគ្គទាំងឡាយឱ្យក្លាយទៅជាឱកាស ដើម្បីធ្វើឱ្យវិស័យសុខាភិបាលកាន់តែមានភាពប្រសើរឡើង។ ជាឧទាហរណ៍ ជាក់ស្តែង ឯកឧត្តមសាស្រ្តចារ្យរដ្ឋមន្រ្តី បានចុះពិនិត្យមណ្ឌលសុខភាព ហ៊ុនសែន កែវផុស នៃខេត្តព្រះសីហនុ ដោយមិនប្រាប់មុន ហើយពិនិត្យឃើញថា មណ្ឌលសុខភាពមានការវិវត្តន៍ច្រើនពីកាលកន្លងមក ដោយពេលនេះមណ្ឌលសុខភាពមានអនាម័យល្អ មានបុគ្គលិកផ្តល់សេវាបានយ៉ាងល្អ។ បន្ថែមពីលើនេះ ឯកឧត្តមសាស្រ្តាចារ្យរដ្ឋមន្រ្តី ក៏បានផ្តល់ព័ត៌មានត្រឡប់ ដល់មណ្ឌលសុខភាពសម្រាប់ធ្វើការកែលំអបន្ថែមលើការបដិសណ្ឋារកិច្ច និងលក្ខណៈបច្ចេកទេស។ ក្នុងនោះដែរ ឯកឧត្តមសាស្រ្តាចារ្យ ក៏បានលើកទឹកចិត្តឱ្យមន្រ្តីសុខាភិបាលទូទាំងប្រទេសបន្តកែលំអឱ្យកាន់តែប្រសើរឡើង។បន្ទាប់មកឯកឧត្តមសាស្ត្រាចារ្យបានអនុញ្ញាតដល់ក្រុមការងារមន្ទីរពេទ្យបង្អែកខេត្តកំពង់ចាម បានធ្វើបទបង្ហាញដោយប្រើប្រាស់ PDIA សម្រាប់បង្កើនការមកប្រើប្រាស់សេវាពិនិត្យជំងឺក្រៅនៅមន្ទីរពេទ្យ៕អត្ថបទ រដ្ឋា

កម្ពុជា និងសហភាពអ៊ឺរ៉ុបបានរួមគ្នារៀបចំកិច្ចសន្ទនារវាងរដ្ឋនិងឯកជន លើកទី១ ដើម្បីឱ្យក្លាយជារបៀបវារៈទៀតទាត់ ថែទាំវិនិយោគិនពីសហភាពអ៊ឺរ៉ុបដែលកំពុងបណ្ដាក់ទុនវិនិយោគនៅកម្ពុជា

ភ្ណំពេញ ៖ ក្រុមប្រឹក្សាអភិវឌ្ឍន៍កម្ពុជា៖ នារសៀលថ្ងៃអង្គារ ទី១៧ ខែកញ្ញា ឆ្នាំ២០២៤ ឯកឧត្ដម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងឯកឧត្តម អ៊ីហ្គ័រ ឌ្រីសមែន្ស (Igor Driesmans) ឯកអគ្គរដ្ឋទូតវិសាមញ្ញនិងពេញសមត្ថភាពនៃសហភាពអឺរ៉ុបប្រចាំព្រះរាជាណាចក្រកម្ពុជា បានដឹកនាំកិច្ចសន្ទនារវាងរដ្ឋនិងឯកជន កម្ពុជា-សហភាពអ៊ឺរ៉ុប លើកទី១ ដោយមានការចូលរួមពីតំណាងក្រសួង-ស្ថាប័នពាក់ព័ន្ធ, ឯកឧត្តម ហ្សាក់ ប៉ឺឡេ (Jacques Pellet ) ឯកអគ្គរដ្ឋទូតសាធារណរដ្ឋបារាំងប្រចាំព្រះរាជាណាចក្រកម្ពុជា, ប្រធានសភាពាណិជ្ជកម្មអឺរ៉ុបនៅកម្ពុជា (EuroCham), តំណាងក្រុមប្រឹក្សាធុរកិច្ចសហភាពអ៊ឺរ៉ុប-អាស៊ាន (EU-ABC), វិស័យឯកជន និងមន្ត្រីជំនាញជាច្រើនរូប។ កិច្ចសន្ទនារវាងរដ្ឋនិងឯកជន កម្ពុជា-សហភាពអ៊ឺរ៉ុប លើកទី១នេះគឺជាផ្នែកមួយនៃយន្តការថែទាំវិនិយោគ ដែលត្រូវបានរៀបចំឡើងក្រោមការចង្អុលបង្ហាញដ៏ខ្ពង់ខ្ពស់ពីប្រមុខថ្នាក់ដឹកនាំកម្ពុជា សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងទទួលបានការឯកភាពពីថ្នាក់ដឹកនាំនៃសហភាពអ៊ឺរ៉ុប ដើម្បីប្រើប្រាស់កិច្ចសន្ទនានេះជារបៀបវារៈផ្លូវការរួមគ្នាពីគ្រប់ស្ថាប័នពាក់ព័ន្ធនៃរាជរដ្ឋាភិបាលកម្ពុជា និងសហភាពអ៊ឺរ៉ុប សម្រាប់ស្ដាប់និងដោះស្រាយរាល់បញ្ហាប្រឈមរបស់វិនិយោគិនអ៊ឺរ៉ុបដែលកំពុងបណ្ដាក់ទុនវិនិយោគនៅកម្ពុជា និងលើកកម្ពស់ទំនុកចិត្តជូនដល់បណ្ដាវិនិយោគិនអ៊ឺរ៉ុបផ្សេងទៀតដែលមានបំណងជ្រើសរើសកម្ពុជាទីតាំងវិនិយោគ។ជាកិច្ចចាប់ផ្ដើម ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅជូនចំពោះវត្តមានរបស់ឯកឧត្តមឯកអគ្គរដ្ឋទូតសហភាពអឺរ៉ុប ក៏ដូចជាឯកឧត្តមឯកអគ្គរដ្ឋទូតសាធារណរដ្ឋបារាំង តំណាងក្រសួង-ស្ថាប័ន និងវិស័យឯកជន ដែលបានអញ្ជើញចូលរួមកិច្ចសន្ទនានាឱកាសនេះ។ ការរៀបចំកិច្ចសន្ទនារវាងរដ្ឋនិងឯកជន កម្ពុជា-សហភាពអ៊ឺរ៉ុប លើកទី១នេះ បានឆ្លុះបញ្ចាំងអំពីការយកចិត្តទុកដាក់របស់រាជរដ្ឋាភិបាលកម្ពុជាដើម្បីស្ដាប់អំពីកង្វល់របស់វិនិយោគិនអ៊ឺរ៉ឺប តាមរយៈការប្រើប្រាស់របៀបវារៈផ្លូវការជាទៀតទាត់ ធានាដល់ការតាមដាន និងការដោះស្រាយបញ្ហាប្រឈមរបស់វិនិយោគិនជាអាទិភាព។ កម្ពុជាបានបើកចំហរទទួលការវិនិយោគពីគ្រប់បណ្ដាប្រទេសទាំងអស់នៅលើសកលលោក ហើយបច្ចុប្បន្នក្រៅអំពីការសម្របសម្រួលនិងថែទាំវិនិយោគ ក្រុមប្រឹក្សាអភិវឌ្ឍន៍កម្ពុជាបានបន្តខិតខំគោះទ្វារវិនិយោគិនមានសក្ដានុពលពីប្រទេសនានា មានជាអាទិ៍ សហភាពអ៊ឺរ៉ុបជាដើម។ ឯកឧត្តមឧបនាយករដ្ឋមន្ត្រី បានជម្រាបបន្ថែមថា ក្រុមប្រឹក្សាអភិវឌ្ឍន៍កម្ពុជាគ្រោងនឹងរៀបចំទស្សនកិច្ចគោះទ្វារវិនិយោគិននៅសហភាពអ៊ឺរ៉ុបជាលើកទី២ នាពេលឆាប់ៗខាងមុខនេះ ក្រោយពេលគណៈប្រតិភូកម្ពុជា ទទួលបានលទ្ធផលជោគជ័យក្នុងដំណើរទស្សនកិច្ចលើកទី១ កាលពីខែមិថុនា ឆ្នាំ២០២៤កន្លងទៅ។ មានប្រសាសន៍ក្នុងឱកាសនេះ ឯកឧត្តម អ៊ីហ្គ័រ ឌ្រីសមែន្ស បានរំលេចផងដែរអំពីក្របខណ្ឌនៃការរៀបចំកិច្ចសន្ទនារវាងរដ្ឋនិងឯកជន កម្ពុជា-សហភាពអ៊ឺរ៉ុប លើកទី១ បានក្លាយជាឱកាសថ្មីដែលនាំមកនូវជំនួបពិភាក្សាគ្នារវាងគ្រប់ភាគីពាក់ព័ន្ធនៃរាជរដ្ឋាភិបាលកម្ពុជា សម្របសម្រួលដោយក្រុមប្រឹក្សាអភិវឌ្ឍន៍កម្ពុជា និងសហភាពអ៊ឺរ៉ុប ក្រោមកិច្ចសម្របសម្រួលពីសភាពាណិជ្ជកម្មអឺរ៉ុបនៅកម្ពុជា ដើម្បីពិនិត្យលើបញ្ហាប្រឈមនានារបស់វិនិយោគិន។ បន្ថែមពីនេះ ជាការឆ្លើយតបលើការលើកឡើងរបស់ឯកឧត្តមឧបនាយករដ្ឋមន្រ្តី ឯកឧត្តមឯកអគ្គរដ្ឋទូតបានគាំទ្រលើគំនិតផ្ដួចផ្ដើមរបស់ក្រុមប្រឹក្សាអភិវឌ្ឍន៍កម្ពុជា ក្នុងការត្រៀមរៀបចំដំណើរទស្សនកិច្ចលើកទី២ ទៅសហភាពអ៊ឺរ៉ុប។ សហភាពអ៊ឺរ៉ុប នឹងបន្តផ្ដល់កិច្ចសហការនានាមកកម្ពុជា ដើម្បីជាចំណែកបង្កើនតម្លៃនៃការអភិវឌ្ឍសង្គមកម្ពុជាបន្ថែមទៀត៕

បណ្ដាញសង្គម

ព័ត៌មានថ្មីៗ

ភ្លៀងធ្លាក់ខ្លាំងវាយប្រហាររដ្ឋនានាទូទាំងប្រទេសឥណ្ឌា បង្កឲ្យមានការប្រកាសអាសន្នទឹកជំនន់ និងការរំខាន

គ្រួសារយោធិនពលី ថ្លែងអំណរគុណសម្តេចធិបតី ដែលបានជួយដោះស្រាយបំណុល

អង់គ្លេស គំរាមដាក់ពន្ធនាគារអ្នករត់ពន្ធមនុស្ស ដែលផ្សាយពាណិជ្ជកម្មនៅលើបណ្តាញសង្គម

ហ្ស៊កដានី អារ៉ាប់រួម និងបណ្តាប្រទេសនៅអឺរ៉ុប ទម្លាក់ជំនួយមនុស្សធម៌លើតំបន់ហ្កាហ្សា

ទីប្រឹក្សាពិសេសប្រធានាធិបតី៖ ប្រេស៊ីលប្រឆាំងការដាក់ទណ្ឌកម្មលើការនាំចូលប្រេងរបស់ខ្លួន

លោក Trump៖ បេសកជនពិសេសអាមេរិកលោក Witkoff នឹងធ្វើដំណើរទៅរុស្ស៊ីនៅសប្ដាហ៍នេះ

អ្នកធ្វើធម្មយាត្រាពោរពេញដោយអារម្មណ៍រំជួលចិត្ត ខណៈសម្តេចប៉ាបលីអូ ជំរុញចិត្តយុវជនកាតូលិក

ទីប្រជុំជនជាច្រើននៅអូស្ត្រាលី គ្របដណ្តប់ដោយព្រិលដ៏កម្រ ដោយសារអាកាសធាតុអាក្រក់

ជប៉ុនថានឹងត្រៀមបន្ថែមថវិកាជាតិ ដើម្បីទប់ទល់នឹងផលប៉ះពាល់ពន្ធរបស់សហរដ្ឋអាមេរិក

មនុស្សជាច្រើននាក់ស្លាប់ និងរាប់ពាន់នាក់ត្រូវជម្លៀសខ្លួននៅកោះតៃវ៉ាន់ ដោយសារព្យុះភ្លៀងដ៏ខ្លាំងក្លា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877