BTV NEWS

កម្ពុជា និងចិន ចុះហត្ថលេខា ដើម្បីជួយសម្រួលវិស័យធុរៈកិច្ចពាណិជ្ជកម្មអន្តរជាតិនៃប្រទេសទាំងពីរ

សម្តេចបវរធិបតី ហ៊ុន ម៉ាណែត សាទរ និងកោតសរសើរលើកិច្ចខិតខំប្រឹងប្រែងការពារ អភិរក្សធនធានធម្មជាតិ និងបរិស្ថាន រហូតកម្ពុជាទទួលចំណាត់ថ្នាក់ ជាប្រទេសមានបរិស្ថានធម្មជាតិលេខ១ លើពិភពលោក

កម្ពុជានាំចេញអង្ករជាង ៥៦ម៉ឺនតោន គិតជាទឹកប្រាក់ជាង ៣២៧លានដុល្លាររយៈពេល៥ខែ ឆ្នាំ ២០២៦នេះ

កម្ពុជាយកយន្តការ UN ដោះស្រាយបញ្ហាព្រំដែនសមុទ្រជាមួយថៃបន្ទាប់ពីជម្រើសទ្វេភាគីអស់លទ្ធភាព

ព័ត៌មានជាតិ

អាជ្ញាធររាជធានីភ្នំពេញបន្តត្រួតពិនិត្យទីតាំងស្នាក់នៅប្រមូលផ្ដុំចំនួន ៨២ទីតាំង រកឃើញជនបរទេសខ្លះពុំមានលិខិតឆ្លងដែន និងផាកពិន័យម្ចាស់ ឬអ្នកគ្រប់គ្រង ៣ទីតាំង

ភ្នំពេញ ៖ គណៈបញ្ជាការឯកភាពរដ្ឋបាលខណ្ឌទាំង១៤ កាលពីថ្ងៃទី០២ ខែមិថុនា ឆ្នាំ២០២៦ ក្រោមការដឹកនាំ និងបញ្ជាផ្ទាល់របស់ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានបន្តចុះត្រួតពិនិត្យតាមទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ចំនួន ៨២ទីតាំង រកឃើញជនបរទេសស្នាក់នៅចំនួន ៤៧៨នាក់ ក្នុងនោះជនបរទេសពុំមានលិខិតឆ្លងដែនចំនួន១០នាក់។ ទោះបីជាយ៉ាងណាក្តីក្រុមការងារមិនបានឃើញបទល្មើសការឆបោកតាមប្រព័ន្ធបច្ចេកវិទ្យា (ONLINE SCAMS)នោះឡើយ។ នេះបើតាមលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញបានឱ្យដឹងនាព្រឹកថ្ងៃទី០៣ ខែមិថុនា ឆ្នាំ២០២៦។លោកស្រីអ្នកនាំពាក្យរដ្ឋបាលរាជធានីភ្នំពេញបន្តថា រដ្ឋបាលខណ្ឌទាំង១៤ បានចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និងផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជាស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំ ក្នុងភូមិសាស្ដ្ររាជធានីភ្នំពេញ។លោកស្រីអ្នកនាំពាក្យបានអះអាទៀតថា កន្លងមក និងបន្តទៅមុខទៀតគណៈបញ្ជាការឯកភាពរដ្ឋបាលរាជធានីភ្នំពេញនៅតែជំរុញយ៉ាងម៉ឺងមាត់ឱ្យគណៈបញ្ជាការឯកភាពរដ្ឋបាលខណ្ឌទាំង១៤បំពេញការងារព្រមៗគ្នា ដោយប្ដេជ្ញាលុបបំបាត់ឱ្យអស់បទល្មើសក្នុងមូលដ្ឋានរបស់ខ្លួនទាំងស្រុង។លោកស្រី ដោ សម្ផស្ស បញ្ជាក់ទៀតថា ប្រតិបត្តិការត្រួតពិនិត្យនៅថ្ងៃទី២ ខែមិថុនា ឆ្នាំ២០២៦ ស្នងការដ្ឋាននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬអ្នកគ្រប់គ្រងទីតាំងរស់នៅប្រមូលផ្ដុំតាមអនុក្រឹត្យលេេខ០៣ អនក្រ .បក ចុះថ្ងៃទី៥ខែមករា ឆ្នាំ២០២៦ របស់រាជរដ្ឋាភិបាល តាមមាត្រា២០ ជំពូកទី៦ ស្ដីពីទណ្ឌកម្ម បានផាកពិន័យសរុបចំនួន ៣ទីតាំង មនុស្សចំនួន៥នាក់ គិតជាថវិកាសរុបបានចំនួន ២០.០០០.០០០រៀល (ម្ភៃលានរៀល ) ៕អត្ថបទ ៖ ប្រាក់ វ៉ាន់ដា

គណៈបញ្ជាការឯកភាពរដ្ឋបាលក្រុងកំពង់សោម ចុះត្រួតពិនិត្យរដ្ឋបាលចំហរ រកឃើញជនបរទេស ២៦នាក់ ពាក់ព័ន្ធករណី Online Scams

ខេត្តព្រះសីហនុ ៖ នៅថ្ងៃទី០២ ខែមិថុនា ឆ្នាំ២០២៦ វេលាម៉ោង ១៦និង៣០នាទី ក្រោមការដឹកនាំរបស់គណៈបញ្ជាការឯកភាពរដ្ឋបាលក្រុងកំពង់សោម ដឹកនាំដោយលោក នួន ប៊ុនថុល អភិបាលក្រុង និងមានការសម្រលសម្រួលនីតិវិធីពីលោក កង ធីរ៉េម ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ និងដោយមានការចង្អុលបង្ហាញពី ឯកឧត្តម ឧត្ដមសេនីយ៍ឯក អគ្គស្នងការរង និងជាស្នងការនគរបាលខេត្តព្រះសីហនុ កម្លាំងផែនការងារអន្តោប្រវេសន៍ នៃស្នងការដ្ឋាននគរបាលខេត្តព្រះសីហនុ សហការជាមួយក្រុមការងារចម្រុះរួមមាន កម្លាំងផែនការងារសន្តិសុខ កម្លាំងអធិការដ្ឋាននគរបាលក្រុងកំពង់សោម កម្លាំងកងរាជអាវុធហត្ថក្រុងកំពង់សោម នៅផ្ទះវីឡាជួលមួយកន្លែង ម្តុំស្ពានត្រជាក់ចិត្ត ស្ថិតក្នុងភូមិគគីរ សង្កាត់បិតត្រាំង ក្រុងកំពង់សោម ខេត្តព្រះសីហនុ ។ជាលទ្ធផល សមត្ថកិច្ចរកឃើញជនបរទេសសរុប ២៦នាក់ ស្រី ៣នាក់ រួមមាន ជនជាតិចិន ៣នាក់ និងជនជាតិវៀតណាម ២៣នាក់ មិនមានលិខិតឆ្លងដែនជាប់ខ្លួន ។ ក្រោយការត្រួតពិនិត្យឧបករណ៍អេឡិចត្រូនិច បានរកឃើញថា មានពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (Online Scams) ។ សមត្ថកិច្ចបានដកហូតសម្ភារៈរួមមាន កុំព្យូទ័រយួរដៃ ១១គ្រឿង, ទូរស័ព្ទ ២០គ្រឿង, រថយន្ត ២គ្រឿង និងម៉ូតូ ១គ្រឿង ។ បច្ចុប្បន្ន ជនបរទេសទាំង ២៦នាក់ ត្រូវបាននាំមកស្នងការដ្ឋាននគរបាលខេត្តព្រះសីហនុ ដើម្បីសាកសួរ និងបន្តនីតិវិធី ។ ចំណែកទីតាំងខាងលើ ដោយមានតំណាងម្ចាស់ទីតាំងឈ្មោះ ឌឹម គាំ ភេទស្រី ជនជាតិខ្មែរ អាយុ ៣៦ឆ្នាំ ត្រូវបានបិទសៀលជាបណ្តោះអាសន្ន ។ ករណីនេះដែរ ឯឧត្តម ឧត្តមសេនីយ៍ឯក អគ្គស្នងការរង និងជាស្នងការនគរបាលខេត្តព្រះសីហនុ បានបញ្ជាឱ្យសមត្ថកិច្ចជំនាញធ្វើការស្រាវជ្រាវបន្ថែមលើទីតាំងខាងលើ៕

សម្តេចតេជោ ហ៊ុន សែន៖ «គ្មានការយោគយល់ណាមួយ ចំពោះទីកន្លែងណាក៏ដោយ ដែលបើកឱកាសឲ្យពួកឆបោកតាមប្រព័ន្ធអនឡាញ ធ្វើសកម្មភាព»

សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ក្នុងឱកាសសំណេះសំណាលជាមួយក្រុមប្រឹក្សា និងមន្ត្រី នៃមន្ទីរអង្គភាពនានាជុំវិញខេត្តកំពង់ធំ នៅថ្ងៃទី០៣ ខែមិថុនា ឆ្នាំ២០២៦នេះ មានប្រសាសន៍ណែនាំលើការបង្ក្រាបការឆបោក Online Scams ដោយសម្តេចបានជំរុញឲ្យអាជ្ញាធរមូលដ្ឋាន ខិតខំបន្តរក្សាស្ថេរភាពនយោបាយសន្តិសុខសង្គមឲ្យបានល្អ អ្វីដែលត្រូវខិតខំប្រុងប្រយ័ត្នគឺការឆបោកតាមអនឡាញ។ សម្តេចបន្តថា «ប្រយ័ត្នពង្រាយខ្លួនទៅណាមិនរួចចូលមកកំពង់ធំ ភូមិ-ឃុំ តាមទីកន្លែងនានា មើលក្រែងមានការជួលផ្ទះបង្កើតឆបោកអនឡាញ ព្រោះបែកសំបុកធំៗ អាចពង្រាយទៅតូចៗ តាមមើលឲ្យដិតដល់ ត្រូវបោសសម្អាតឲ្យអស់ ព្រោះវាអាចបង្កគ្រោះមហន្តរាយដល់មុខមាត់ប្រទេសជាតិ ហើយអាចប៉ះពាល់ដល់ប្រជាជនដែរ»។ ទាក់ទងការបង្ក្រាបការឆបោកតាមអនឡាញ សម្តេចតេជោបន្តថា កុំធ្វើតែមួយកន្លែងហើយកន្លែងដទៃមិនធ្វើ ត្រូវធ្វើទាំងព្រម ហើយកន្លងទៅបានដកអភិបាលខេត្តមួយ និងមេប៉េអ៊ឹមមួយ ប៉ុន្តែមិនដល់កម្រិតដាក់ពិន័យទេ ព្រោះការដកនេះត្រង់ថា «បើធ្វើមិនបានដាក់អ្នកថ្មីចូលធ្វើ»។ ការបង្ក្រាបបទល្មើសឆបោកតាមប្រព័ន្ធអនឡាញនេះ សម្តេចតេជោ ហ៊ុន សែនបញ្ជាក់ថា «គ្មានការយោគយល់ណាមួយដែលត្រូវបានធ្វើ ចំពោះទីកន្លែងណាក៏ដោយ ដែលបើកឱកាសឲ្យពួកឆបោកតាមប្រព័ន្ធអនឡាញនេះធ្វើសកម្មភាពទេ» ។ក្រៅពីនេះទាក់ទងសន្តិសុខសង្គមនៅមូលដ្ឋាន សម្តេចតេជោ ក៏បានណែនាំអោយខេត្តកំពង់ធំ យកចិត្តទុកដាក់បន្តមើលទៅលើក្រុមក្មេងទំនើងផងដែរ៕

មេបញ្ជាការរងកងរាជអាវុធហត្ថលើផ្ទៃប្រទេសណែនាំឱ្យគ្រប់ជំនាញទាំងអស់បង្កើនការយកចិត្តទុកដាក់បង្ក្រាប Online Scams និងបទល្មើសផ្សេងៗ

ភ្នំពេញ ៖ លោកឧត្តមសេនីយ៍ទោ ស សំបូរធន មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស ទទួលផែនការងារប្រតិបត្តិការ ហ្វឹកហ្វឺន និងអន្តរាគមន៍ បានណែនាំឱ្យគ្រប់ជំនាញទាំងអស់ឱ្យបង្កើនការយកចិត្តទុកដាក់នៅក្នុងកិច្ចការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា(Online Scams) កិច្ចសហការត្រួតពិនិត្យរដ្ឋបាលទីតាំងប្រព្រឹត្តិបទល្មើសឆបោកតាមប្រពន្ធ័បច្ចេកវិទ្យា(Online Scams) សហការត្រួតពិនិត្យជនបរទេសនៅតាមប៉ុស្តិត្រួតពិនិត្យតាមដងផ្លូវ និងបន្តការពារសន្តិសុខជូនជនបរទេសស្នាក់នៅអតីតអាកាសយានដ្ឋានអន្តរជាតិភ្នំពេញ និងនៅគោលដៅភូមិត្រយឹងខ្ពស់ ឃុំលំពង់ ស្រុកបាទី ខេត្តតាកែវ។ ការណែនាំនេះ នៅក្នុងកិច្ចប្រជុំដើម្បីផ្សព្វផ្សាយរបាយការណ៍លទ្ធផលត្រួតពិនិត្យការអនុវត្តតួនាទី ភារកិច្ចកងរាជអាវុធហត្ថខែឧសភា និងលើកទិសដៅការងារខែមិថុនា ឆ្នាំ២០២៦ នៅព្រឹកថ្ងៃទី៣ ខែមិថុនា ឆ្នាំ២០២៦។ កិច្ចប្រជុំនេះ ដោយអនុវត្តន៍បទបញ្ជារបស់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។លោកឧត្តមសេនីយ៍ទោ ស សំបូរធន ក៏បានណែនាំឱ្យគ្រប់ជំនាញទាំងអស់ត្រូវបន្តកិច្ចការងារបង្ក្រាបបទល្មើសផ្សេងៗជាអាទិ៍ បទល្មើសជួញដូរ ផលិត ចែកចាយ និងប្រើប្រាស់គ្រឿងញៀន បទល្មើសជួញដូរមនុស្សគ្រប់ទម្រង់ បទល្មើសក្មេងទំនើង បទល្មើសព្រៃឈើ បទល្មើសកាប់ទន្ទ្រានដីព្រៃរបស់រដ្ឋ និងបទល្មើសនេសាទ។ និងត្រូវត្រៀមកម្លាំង មធ្យោបាយ-សម្ភារៈ ដើម្បីជួយសង្គ្រោះគ្រោះមហន្តរាយទឹកជំនន់ក្នុងរដូវវស្សានេះ និងសង្គ្រោះគ្រោះមហន្តរាយផ្សេងៗដូចជាខ្យល់ កន្ត្រាក់ ខ្យល់ព្យុះ រន្ទះបាញ់ អគ្គិភ័យ បាក់ច្រាំងទន្លេ បាក់រលំអាគារ…។ល។ សូមជម្រាបថា កិច្ចប្រជុំផ្សព្វផ្សាយនេះមានការអញ្ជើញចូលរួមពីសំណាក់នាយសេនាធិការរង ស្នងការ ស្នងការរង មេបញ្ជាការគ្រប់អង្គភាពចំណុះអ.ហ.ផ.ទ និងបានភ្ជាប់វីដេអូ Conference ទៅសាលាកងរាជអាវុធហត្ថទាំង២ និងបញ្ជាការដ្ឋានកងរាជអាវុធហត្ថរាជធានី-ខេត្តទាំង២៥៕ អត្ថបទ៖ វង្ស សុភាព

ស្ថានទូតខ្មែប្រចាំនៅសាធារណរដ្ឋកូរ៉េ ចុះ MOU ជាមួយមន្ទីរពេទ្យដៃគូ ដើម្បីផ្ដល់អត្ថប្រយោជន៍ដល់ពលរដ្ឋខ្មែរនៅកូរ៉េ

ភ្នំពេញ៖ ឯកឧត្តម ឃួន ផុនរតនៈ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានចុះហត្ថលេខាលើអនុស្សរណៈយោគយល់គ្នា (MOU) រវាងស្ថានទូតកម្ពុជាប្រចាំសាធារណរដ្ឋកូរ៉េ និងមន្ទីរពេទ្យ Soonchunhyang University Hospital (SUH) នៅមន្ទីរពេទ្យ Soonchunhyang ក្នុងទីក្រុងសេអ៊ូល ។ ការអនុស្សរណៈយោគយល់គ្នានេះ ធ្វើឡើងក្នុងគោលបំណងធានាថា ប្រជាពលរដ្ឋកម្ពុជា ដែលកំពុងរស់នៅប្រទេសកូរ៉េ អាចទទួលបានសេវាថែទាំសុខភាពដ៏ល្អ ក្នុងតម្លៃសមរម្យក្នុងប្រទេសកូរ៉េ និងជាយន្តការមួយសម្រាប់ស្ថាប័នទាំងពីរ បន្តសហការធ្វើការរួមគ្នា ក្នុងនាមជាអ្នកជិតខាង និងជាដៃគូដ៏ជិតស្និត ក្នុងបេសកកម្មមនុស្សធម៌ ដើម្បីបម្រើដល់ផលប្រយោជន៍របស់ប្រជាជនកម្ពុជាទាំងនៅក្នុងប្រទេសកម្ពុជា និងនៅប្រទេសកូរ៉េនេះ ។ ក្នុងពិធីចុះ MOU កាលពីថ្ងៃទី២ ខែមិថុនា ឆ្នាំ២០២៦ លោកវេជ្ជបណ្ឌិត Suh You-Sung នាយកមន្ទីរពេទ្យ Soonchunhyang បានថ្លែងថា មន្ទីរពេទ្យ Soonchunhyang បានចាប់ផ្តើមបេសកកម្មរបស់ខ្លួន ក្នុងប្រទេសកម្ពុជា តាំងពីឆ្នាំ ២០០២ ដោយ ក្នុងរយៈពេល ២៤ឆ្នាំកន្លងទៅនេះ ដោយមន្ទីរពេទ្យបានចូលរួមចំណែកយ៉ាងច្រើ នក្នុងការកសាងនូវហេដ្ឋារចនាសម្ព័ន្ធសុខាភិបាលក្នុងប្រទេសកម្ពុជា រួមមានការកសាងមន្ទីរពេទ្យ ការបញ្ជូនក្រុមគ្រូពេទ្យស្ម័គ្រចិត្ត បណ្តុះបណ្តាលក្រុមគ្រូពេទ្យកម្ពុជា និងផ្តល់អាហារូបករណ៍ដល់និស្សិតកម្ពុជា ជាដើម ។ លោកបន្តថា មន្ទីរពេទ្យនេះ នឹងខិតខំប្រឹងប្រែងបន្ថែមទៀត ក្នុងការជួយដល់ប្រទេសកម្ពុជា លើវិស័យសុខាភិបាល ពិសេសការបណ្តុះធនធានមនុស្ស ដើម្បីជាទុនដ៏រឹងមាំក្នុងការកសាងហេដ្ឋារចនាសម្ព័ន្ធសុខាភិបាល នៅក្នុងប្រទេសកម្ពុជា ។ ក្នុងឱកាសនោះ ឯកឧត្តមឯកអគ្គរាជទូត បានថ្លែងអំណរគុណ ចំពោះក្រុមគ្រួសារមន្ទីរ Soonchunhyang ដែលជានិច្ចជាកាល តែងតែចូលរួមជាមួយស្ថានទូត ក្នុងសកម្មភាពមនុស្សធម៌ជាច្រើន ទាំងនៅប្រទេសកម្ពុជា និងកូរ៉េ ដូចជាឧបត្ថម្ភថ្នាំពេទ្យ និងសម្ភារប្រើប្រាស់ជូនដល់ជនភៀសសឹក មណ្ឌលកុមារកំព្រា និងមន្ទីរពេទ្យក្នុងប្រទេសកម្ពុជា និងផ្តល់ការពិនិត្យសុខភាពដោយឥតគិតថ្លៃ ជូនប្រជាជនខ្មែរនៅកម្ពុជា ក៏ដូចជាតាមតំបន់នានា ក្នុងប្រទេសកូរ៉េ ជាដើម ។ ជាមួយនេះ ឯកឧត្តមបង្ហាញការជឿជាក់ថា តាមរយៈការចុះ MOU នេះ ស្ថាប័នទាំងពីរនឹងអាចបង្កើនកិច្ចសហការ កាន់តែជិតស្និតបន្ថែមទៀត លើគម្រោងមនុស្សធម៌ផ្សេងទៀត នាពេលខាងមុខ សម្រាប់ជាប្រយោជន៍ដល់ប្រជាជនទាំងពីរប្រទេស ៕ អត្ថបទ បាន សុខរិទ្ធិ

ក្រុមការងារអភិវឌ្ឍវិស័យឯកជនប្រមូលធាតុចូល និងលក្ខខណ្ឌនានា គាំទ្រការផលិតស៊ីម៉ងត៍ក្នុងស្រុក

ក្រុមការងារអភិវឌ្ឍវិស័យឯកជន បើកកិច្ចប្រជុំពិភាក្សាលើវិធានការគាំទ្រឧស្សាហកម្មផលិតស៊ីម៉ងត៍ក្នុងស្រុក ដោយបានប្រមូល ធាតុចូលសំខាន់ៗ សម្រាប់ការពិចារណា និងវាយតម្លៃលើការអនុវត្តវិធានការ និងលទ្ធភាពនៃការដាក់ចេញវិធានការ ឬលក្ខខណ្ឌនានា នៅលើវិស័យនេះ។ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារអភិវឌ្ឍ វិស័យឯកជន នៅថ្ងៃទី២ ខែមិថុនា ឆ្នាំ២០២៦នេះ បានដឹកនាំកិច្ចប្រជុំពិភាក្សាលើវិធានការគាំទ្រឧស្សាហកម្មផលិតស៊ីម៉ងត៍ក្នុងស្រុក ដោយកិច្ចប្រជុំនេះមានការអញ្ជើញចូលរួមពីតំណាងក្រសួងបរិស្ថាន, ក្រសួងរ៉ែ និងថាមពល, អគ្គនាយកដ្ឋានពន្ធដារ, អគ្គនាយកដ្ឋាន គយ និងរដ្ឋាករកម្ពុជា, អគ្គនាយកដ្ឋានគោលនយោបាយ, និងអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើរពន្ធ នៃ ក្រសួងសេដ្ឋកិច្ច និងហិរញ្ញវត្ថុ ។អង្គប្រជុំបានពិនិត្យលើសាវតារនៃការដាក់ឱ្យអនុវត្តវិធានការរបស់រាជរដ្ឋាភិបាល, ស្ថានភាពឧស្សាហកម្មផលិតស៊ីម៉ងត៍ក្នុង ស្រុក និងការវិវត្តថ្មីៗនៃស្ថានភាពសេដ្ឋកិច្ចសកល ព្រមទាំងលក្ខខណ្ឌតម្រូវនានារបស់រាជរដ្ឋាភិបាល ទៅលើក្រុមហ៊ុនផលិតស៊ីម៉ងត៍ ដូចជា៖ ការបង់មូលនិធិបរិស្ថាន, ការបង់សួយសាររ៉ែ, ការផ្ទេរជំនាញ និងការបណ្តុះបណ្តាលនិយោជិត, និងការប្រើប្រាស់ធាតុផ្សំ ក្នុងស្រុកជាដើម។ ជាលទ្ធផល, អង្គប្រជុំបានផ្តល់ធាតុចូលសំខាន់ៗសម្រាប់ការពិចារណា និងវាយតម្លៃលើការអនុវត្តវិធានការ និង លទ្ធភាពនៃការដាក់ចេញវិធានការ និង/ឬលក្ខខណ្ឌនានា ទៅលើក្រុមហ៊ុនស៊ីម៉ងត៍ក្នុងស្រុក ។ជុំវិញវិធានខាងលើនេះ ឯកឧត្តមបណ្ឌិតសភាចារ្យ បានផ្តល់អនុសាសន៍ណែនាំឱ្យលេខាធិការដ្ឋានក្រុមការងារធ្វើការសម្រប សម្រួល និងសហការជាមួយក្រសួង-ស្ថាប័នពាក់ព័ន្ធ ដើម្បីសិក្សាស៊ីជម្រៅ ប្រមូលធាតុចូល និងរៀបចំជារបាយការណ៍ជូនរាជរដ្ឋាភិ- បាលឱ្យបានច្បាស់លាស់ និងគ្រប់ជ្រុងជ្រោយ ។ជុំវិញឧស្សាហកម្មស៊ីម៉ង់ត៍, ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ ក្រសួងរ៉ែ និងថាមពល លើកឡើងនៅក្នុង ពិព័រណ៍ផលិតផលរ៉ែឆ្នាំ២០២៦ កន្លងមកថា ជុំវិញផលិតផលស៊ីម៉ង់ត៍ ចាប់ពីឆ្នាំ២០២៣មក កម្ពុជាបានប្រែក្លាយពីប្រទេសនាំចូល ស៊ីម៉ង់ត៍ ១០០ភាគរយ ទៅជាប្រទេសអាចផ្គត់ផ្គង់តម្រូវការទាំងស្រុង និងក្លាយជាប្រទេសដែលនាំចេញស៊ីម៉ង់ត៍ជាលើកដំបូងក្នុងរង្វង់ ៣ ម៉ឺនតោនក្នុងមួយឆ្នាំ នៅមុនការផ្ទុះជម្លោះព្រំដែនកម្ពុជា-ថៃ ជាក់ស្តែងមកដល់ពេលនេះ កម្ពុជាមានក្រុមហ៊ុនដែលកំពុងប្រតិបត្តិការ អាជីវកម្មចំនួន ៦ មានសមត្ថភាពផលិតស៊ីម៉ង់ត៍ សរុបបានចំនួន ១២ លានតោន ក្នុង១ឆ្នាំ ដែលបានឆ្លើយតបដល់ការអភិឌ្ឍក្នុងស្រុក និងនាំចេញ៕អត្ថបទ៖ សុន រ៉ាឌី

សម្ដេចធិបតី៖ រាជរដ្ឋាភិបាលមានលទ្ធភាពគ្រប់គ្រាន់បង្កើនថវិកាការពារជាតិមិនចាំបាច់កាត់ពីវិស័យផ្សេងទេ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បញ្ជាក់ថា ក្នុងផែនការចំណាយថវិកាជាតិឆ្នាំ២០២៧-២០២៩ ខាងមុខនេះ រាជរដ្ឋាភិបាលនឹងបង្កើនការចំណាយថវិកាលើការការពារជាតិជាអាទិភាពចម្បងបន្ថែមទៀត ប៉ុន្ដែការចំណាយនេះ រាជរដ្ឋាភិបាលមិនចាំបាច់ត្រូវការកាត់ចំណាយពីវិស័យផ្សេងៗទៀត ដូចជាវិស័យសង្គមកិច្ច អប់រំ ឬសុខាភិបាលនោះទេ។ សម្ដេចធិបតីនាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាសអញ្ជើញសម្ពោធសមិទ្ធផល និងប្រគល់សញ្ញាបត្រគ្រូបង្រៀនជូនគរុសិស្ស និស្សិត នៅវិទ្យាស្ថានជាតិអប់រំកាយ និងកីឡា នៅព្រឹកថ្ងៃទី៣ ខែមិថុនា ឆ្នាំ២០២៦នេះ។ សម្ដេចធិបតី បានថ្លែងបញ្ជាក់ថា ការចំណាយថវិកាជាតិឆ្នាំ២០២៧-២០២៩ សម្រាប់វិស័យការពារជាតិក៏មានការកើនឡើងដែលជាអាទិភាពសម្រាប់ពង្រឹងវិស័យការពារជាតិរបស់ជាតិមាតុភូមិកម្ពុជា ក្នុងនោះរាជរដ្ឋាភិបាលត្រូវអនុវត្តច្បាប់កាតព្វកិច្ច និងធ្វើកំណែទម្រង់កងទ័ពជាដើម គឺត្រូវកើនការចំណាយ ប៉ុន្ដែរាជរដ្ឋាភិបាលមានថវិកាចំណាយគ្រប់គ្រាន់មិនត្រូវការដកថវិកាពីវិស័យអប់រំ ឬវិស័យការពារជាតិនោះទេ។ ដោយឡែកសម្រាប់ការចំណាយលើវិស័យសង្គមកិច្ច អប់រំ និងសុខាភិបាលក៏បន្តកើនឡើងផងដែរ។ សម្ដេចធិបតី ហ៊ុន ម៉ាណែត បានបញ្ជាក់ថា ការពារជាតិមិនមែនការពារមួយថ្ងៃទេ ប៉ុន្ដែការពារជាតិគឺត្រូវការប្រើប្រាស់រយៈពេលយូរអង្វែង ដ៏រាបណាប្រទេសខ្មែរនៅតែជាប្រទេស ការពារជាតិត្រូវតែធ្វើ ហើយការពារទាំងបូរណភាពទឹកដី ការពារទាំងសន្ដិសុខសណ្ដាប់ធ្នាប់សង្គមត្រូវតែធ្វើជាប្រចាំ។ សម្ដេចធិបតីបានថ្លែងថា៖« ការចំណាយថវិកាជាតិឆ្នាំ២០២៧-២០២៩ សម្រាប់វិស័យការពារជាតិក៏មានការកើនឡើងដែរ ដែលជាអាទិភាពសម្រាប់ពង្រឹងវិស័យការពារជាតិរបស់ជាតិមាតុភូមិកម្ពុជា ក្នុងនោះរាជរដ្ឋាភិបាលអនុវត្តច្បាប់កាតព្វកិច្ច និងធ្វើកំណែទម្រង់កងទ័ពជាដើម គឺត្រូវកើនការចំណាយ ប៉ុន្ដែរាជរដ្ឋាភិបាលមានថវិកាចំណាយគ្រប់គ្រាន់មិនត្រូវការដកថវិកាពីវិស័យអប់រំ ឬវិស័យការពារជាតិនោះទេ»៕ ក្នុងឱកាសនោះ សម្ដេចធិបតី ហ៊ុន ម៉ាណែត បានបញ្ជាក់ទៀតថា ការកសាង និងការការពារជាតិរឹងមាំ គឺអាស្រ័យទៅលើមនុស្សរឹងមាំ, មនុស្សរឹងមាំ គឺអាស្រ័យទៅលើការវិនិយោគទៅលើធនធានមនុស្ស នៅក្នុងសង្គមកិច្ច ទាំងវិស័យអប់រំ និងវិស័យសុខាភិបាលនេះឯង។ សម្ដេចធិបតីបញ្ជាក់ថា ការការពារជាតិ យើងមិនត្រូវមើលតែការចំណាយលើវិស័យការពារជាតិតែមួយទេ, ប៉ុន្ដែជាតិមួយខ្លាំងបានទាល់តែប្រជាជនខ្លាំង សេដ្ឋកិច្ចខ្លាំងទើបយើងរឹងមាំ។ ដូច្នេះសេដ្ឋកិច្ចខ្លាំង ស្មារតីស្នេហាជាតិ និងធនធានមនុស្សម្នាក់ៗមានសមត្ថភាព និងសុខភាពរឹងមាំ គឺត្រូវមើលទៅលើវិស័យពាក់ព័ន្ធដែលជាអាទិភាពសំខាន់ជាច្រើនទៀត ដូចជាវិស័យសង្គមកិច្ច អប់រំ និងវិស័យសុខាភិបាលនេះឯង ទើបអាចការពារជាតិរឹងមាំបាន៕

សម្ដេចធិបតី៖ បរិការណ៍ពិភពលោកបច្ចុប្បន្ន កម្ពុជាត្រូវពន្លឿនការកែទម្រង់លើវិស័យសេដ្ឋកិច្ច និងការពារជាតិ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បញ្ជាក់ថា ក្នុងបរិការណ៍សកលពោរពេញដោយហានិភ័យ និងភាពមិនប្រាកដប្រជាខ្ពស់ កម្ពុជាត្រូវតែពន្លឿនការកែទម្រង់ឱ្យកាន់តែស៊ីជម្រៅក្នុងវិស័យសេដ្ឋកិច្ច និងវិស័យការពារជាតិ ស្របតាមពាក្យស្លោក «មុជឱ្យជ្រៅ ទៅឱ្យឆ្ងាយ» តាមរយៈការបន្តពូនជ្រុំមូលធនមនុស្សស្របតាមទិសដៅនៃយុទ្ធសាស្ត្រអភិវឌ្ឍជាតិ និងការបន្តលើកកម្ពស់ចំណេះដឹង, ចំណេះធ្វើ, សីលធម៌ និងវិន័យរបស់ប្រជាពលរដ្ឋខ្មែរ ដើម្បីឆ្លើយតបបានកាន់តែប្រសើរ និងទាន់ពេល ទៅនឹងសេចក្តីត្រូវការនៃការអភិវឌ្ឍសង្គមសេដ្ឋកិច្ច និងកិច្ចការពារជាតិមាតុភូមិរបស់កម្ពុជា។សម្ដេចធិបតីនាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាសអញ្ជើញសម្ពោធសមិទ្ធផល និងប្រគល់សញ្ញាបត្រគ្រូបង្រៀនជូនគរុសិស្ស និស្សិត នៅវិទ្យាស្ថានជាតិអប់រំកាយ និងកីឡា នៅព្រឹកថ្ងៃទី៣ ខែមិថុនា ឆ្នាំ២០២៦នេះ។ ក្នុងឱកាសនោះ សម្ដេចធិបតី បានថ្លែងថា រាជរដ្ឋាភិបាល នីតិកាលទី៧ នៃរដ្ឋសភា បន្តជំរុញការអភិវឌ្ឍវិស័យអប់រំនៅកម្ពុជា ឱ្យមានប្រសិទ្ធភាព, ភាពស័ក្ដិសិទ្ធិ និងសមធម៌ តាមរយៈការសិក្សាដាក់ចេញនូវ គោលនយោបាយផែនការយុទ្ធសាស្ត្រ និងកម្មវីធីកែទម្រង់ស៊ីជម្រៅតាមគ្រប់រូបភាពសំដៅអប់រំបណ្ដុះបណ្តាល ប្រជាជនកម្ពុជា ជាពិសេស យុវជន និង កុមារ ឱ្យមានចំណេះដឹងទូលាយ, ជំនាញពិតប្រាកដ, សីលធម៌ និង វិន័យ, ក៏ដូចជា សុខភាពផ្លូវកាយ និង ផ្លូវចិត្ត រឹងមាំ ដើម្បីក្លាយជាសសរទ្រូងពិតប្រាកដរបស់ប្រទេសជាតិនៅគ្រប់កាលៈទេសៈ និងគ្រប់ទីកន្លែង។ សម្ដេចធិបតី បានបន្តថារាជរដ្ឋាភិបាលនឹងបន្តចាត់ទុកការអភិឌ្ឍមូលធនមនុស្ស និងការលើកកម្ពស់សុខុមាលភាពប្រជាពលរដ្ឋ ជាការងារអាទិភាពខ្ពស់ ក្នុងក្របខ័ណ្ឌហិរញ្ញវត្ថុសាធារណៈរយៈពេលមធ្យម និងវែង តាមរយៈការបន្តបង្កើនការវិភាជថវិកាជាតិដល់វិស័យសង្គមកិច្ច, និយាយជារួម និងវិស័យអប់រំ និង សុខាភិបាល និយាយដោយឡែក គឺបន្តបង្កើនថវិកាជាបន្តបន្ទាប់ មិនមានការកាត់ថវិកាដូចការផ្សព្វផ្សាយរបស់សារព័ត៌មានមួយចំនួននាពេលកន្លងទៅឡើយ។ សម្ដេចធិបតីបានថ្លែងថា៖«ក្នុងបរិការណ៍សកលពោរពេញដោយហានិភ័យ និង ភាពមិនប្រាកដប្រជាខ្ពស់ កម្ពុជាត្រូវតែពន្លឿនការកែទម្រង់ឱ្យកាន់តែស៊ីជម្រៅក្នុងវិស័យសេដ្ឋកិច្ច និងវិស័យការពារជាតិ ស្របតាមពាក្យស្លោក «មុជឱ្យជ្រៅ ទៅឱ្យឆ្ងាយ» តាមរយៈ ការបន្តពូនជ្រុំមូលធនមនុស្សស្របតាមទិសដៅនៃយុទ្ធសាស្ត្រអភិវឌ្ឍជាតិ, និង ការបន្តលើកកម្ពស់ចំណេះដឹង, ចំណេះធ្វើ, សីលធម៌ និងវិន័យ របស់ប្រជាពលរដ្ឋខ្មែរ ដើម្បីឆ្លើយតបបានកាន់តែប្រសើរ និង ទាន់ពេល ទៅនឹងសេចក្តីត្រូវការ នៃការអភិវឌ្ឍសង្គមសេដ្ឋកិច្ច និង កិច្ចការពារជាតិមាតុភូមិ»។ សូមបញ្ជាក់ថា ជាទិសដៅយុទ្ធសាស្ត្រ និងគោលនយោបាយ, ការជំរុញអនុវត្តឱ្យសម្រេចបានជោគជ័យនូវ «យុទ្ធសាស្ត្របញ្ចកោណ-ដំណាក់កាលទី ១» គឺជាអាទិភាពរបស់រាជរដ្ឋាភិបាល ព្រមជាមួយការជំរុញអនុវត្ត «កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុង បរិការណ៍សកល ដែលមានភាពមិនប្រាកដប្រជាខ្ពស់ របស់រាជរដ្ឋាភិបាលនីតិកាលទី ៧ នៃរដ្ឋសភា» និង «កម្មវិធី ជំរុញការកែលម្អបរិយាកាសសម្រាប់ធុរកិច្ច និងការវិនិយោគនៅកម្ពុជាឆ្នាំ ២០២៥-២០២៨» សំដៅរួមចំណែក ដោះស្រាយបញ្ហាជារចនាសម្ព័ន្ធសំខាន់ៗ ឱ្យកាន់តែចំទិសដៅ និងប្រសិទ្ធភាពស្របតាមបរិការណ៍សង្គម-សេដ្ឋកិច្ចកម្ពុជា, តំបន់ និងសកល ដែលកំពុងវិវដ្តយ៉ាងឆាប់រហ័ស និងពិបាកប៉ាន់ស្មាន។ ក្នុងន័យនេះ, គោលនយោបាយហិរញ្ញវត្ថុសាធារណៈឆ្នាំ ២០២៧-២០២៩ បានកំណត់អាទិភាពបន្ថែមទៀតការការពារអធិបតេយ្យជាតិ និងបូរណភាពទឹកដី ព្រមទាំងធានាស្ថិរភាពនយោបាយ និងម៉ាក្រូ-សេដ្ឋកិច្ច៖ រាជរដ្ឋាភិបាល ទឹកដី, ការការពារសន្តិភាព និងស្ថិរភាពនយោបាយ ដែលជាមូលដ្ឋានគ្រឹះ សម្រាប់ការរក្សាស្ថិរភាព ម៉ាក្រូសេដ្ឋកិច្ច, សមិទ្ធផលសង្គម និងជំរុញការដោះស្រាយបញ្ហាគ្រោះអាសន្ននានា ក្នុងសង្គម នឹងបន្តផ្តល់អាទិភាពដល់កិច្ចការការពារអធិបតេយ្យជាតិ និងបូរណភាពជាចម្បង។ ជាមួយគ្នានេះ រាជរដ្ឋាភិបាលនឹងបន្តជំរុញការធ្វើ ពិពិធកម្មសេដ្ឋកិច្ច និងអភិវឌ្ឍប្រភពថ្មីនៃកំណើន ដោយផ្តោតលើការពង្រឹងមូលដ្ឋានគាំទ្រកំណើន ប្រកបដោយចីរភាព តាមរយៈការជំរុញការអភិវឌ្ឍហេដ្ឋារចនាសម្ព័ន្ធរូបវន្តគ្រប់ប្រភេទ, ការអភិវឌ្ឍ ខ្សែច្រវាក់ផលិតកម្មក្នុងស្រុក, និងការលើកកម្ពស់ការកែច្នៃ សម្រាប់ជំនួសការនាំចូល និងជំរុញ ការនាំចេញ ដើម្បីបង្កើនតម្លៃបន្ថែម និងពង្រឹងភាពធន់នៃសេដ្ឋកិច្ច ស្របតាមអាទិភាពគោល-នយោបាយ ដែលបានដាក់ចេញ៕

សម្ដេចតេជោ ហ៊ុន សែន ណែនាំមន្រ្ដីត្រូវបម្រើប្រជាជនដោយស្មោះត្រង់ និងលុបបំបាត់ទង្វើខុសឆ្គងចំពោះពលរដ្ឋ

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា នៅព្រឹកថ្ងៃទី៣ ខែមិថុនា ឆ្នាំ២០២៦នេះ បានអញ្ជើញជួបសំណេះសំណាលជាមួយសមាជិក សមាជិកាក្រុមប្រឹក្សាខេត្ត ក្រុង-ស្រុក ឃុំ-សង្កាត់ និងមន្ត្រីនៃមន្ទីរ-អង្គភាពនានាជុំវិញខេត្តកំពង់ធំ, ក្នុងឱកាសនោះសម្ដេចបានណែនាំមន្រ្ដីត្រូវបម្រើប្រជាជនដោយស្មោះត្រង់ និងលុបបំបាត់ទង្វើខុសឆ្គងចំពោះពលរដ្ឋ។ ខេត្តកំពង់ធំ ស្ថិតនៅចំកណ្តាល នៃព្រះរាជាណាចក្រកម្ពុជាមាន ក្រុង ១, ស្រុក ៨, ឃុំ ៧៣, សង្កាត់ ៨ និងមានភូមិ ៧៦៥ មានប្រជាពលរដ្ឋរស់នៅសរុបចំនួន២០៤.៣៩៣គ្រួសារស្មើនឹង៨៨០.៨៩៦នាក់។ មានប្រសាសន៍សំណេះសំណាលនោះ សម្តេចតេជោ ហ៊ុន សែន ប្រមុខរដ្ឋស្តីទី បានកោតសរសើរចំពោះខេត្តកំពង់ធំ ធ្វើការងារបានល្អពាក់ព័ន្ធនិវត្តជន និងអតីតយុទ្ធជនបង្ហាញពីការគិតគូរ និងយកចិត្តទុកដាក់ តាមរយៈសម្តេចកត់សម្គាល់ថា ខេត្តកំពង់ធំជាខេត្តដំបូងដែលបានធ្វើរបាយការណ៍ជូនសម្តេចស្តីពីការអនុវត្តគោលនយោបាយគាំពារសង្គមក្នុងខេត្ត។ សម្រាប់ខេត្តកំពង់ធំ សម្តេចតេជោកត់សម្គាល់ឃើញថា អគ្គិសនីគ្រប់គ្រាន់តែនៅក្នុងខេត្តកំពង់ធំ ប្រើប្រាស់បច្ចុប្បន្នរង្វង់៤៤មេហ្គាវ៉ាត់ ដែលកាលពីមុនអគ្គិសនីនៅកម្ពុជាប្រើតែជាង៣០មេហ្គាវ៉ាត់ទេនៅទូទាំងប្រទេស នេះបង្ហាញពីការលូតលាស់ជារួមនៅកម្រិតទូទាំងប្រទេស និងកម្រិតដាច់ដោយឡែកនៃខេត្តនីមួយៗផងដែរ។ នេះជាការទទួលបាន កើតចេញពីការប្រឹងប្រែងទាំងអស់គ្នា។ នាឱកាសនោះ ទាក់ទងការបំពេញការងាររបស់មន្ត្រី សម្តេចបានមានប្រសាសន៍ថា សម្តេចតែងតែរំលឹកទៅដល់មន្ត្រីតាំងពីសម្តេចជានាយករដ្ឋមន្ត្រីគឺ«យើងត្រូវរត់ទៅរកការងារ កុំអោយការងាររត់មករកយើង ត្រូវរត់ទៅរកប្រជាជន កុំអោយប្រជាជនរត់មករកយើង» ។ ចំពោះការងារនៅមូលដ្ឋានត្រូវយកចិត្តទុកដាក់លើការងារបន្ត សម្តេចតេជោបានណែនាំ និងផ្តល់អនុសាសន៍ដល់មន្ត្រីខេត្តនិងនៅតាមមូលដ្ឋាន យកចិត្តទុកដាក់ធ្វើជាបង្អែកដល់គ្រួសារកងទ័ព គ្រួសារយុទ្ធជនពលី គ្រួសារយុទ្ធជនពិការ មិនអាចទុកពួកគាត់ចោលដោយមិនបានដឹង និងដោយមិនបានដោះស្រាយនោះទេ។ សម្តេចតេជោណែនាំឲ្យខិតខំរក្សាស្ថិរភាពនយោបាយ សន្តិសុខសង្គមអោយបានល្អ ប្រយ័ត្នលើការឆបោកអនឡាញដែលអាចពង្រាយខ្លួន។ តាមភូមិឃុំ ត្រូវយកចិត្តទុកដាក់នៅមូលដ្ឋាន បោសសម្អាតអោយអស់ក្រែងមានការបែកសំបុកទៅជាក្រុមតូចៗ ត្រូវបង្ក្រាបគ្រប់កន្លែងទាំងអស់។ នៅតាមមូលដ្ឋានក៏ត្រូវជួយគ្រប់គ្រងស្ថេរភាពម៉ាក្រូសេដ្ឋកិច្ចតាមរយៈការខិតខំទាំងឡាយ ខណៈបញ្ហាសេដ្ឋកិច្ចមិនមែនជាបញ្ហាតូចតាចនោះទេ។ ចូលរួមសន្សំសំចៃ ក៏ជាផ្នែកមួយសំខាន់ និងខិតខំចូលរួមចំណែកប្រមូលថវិកាជាតិ។ សម្តេចតេជោបន្តថា អ្វីដែលខេត្តកំពង់ធំត្រូវយកចិត្តទុក ជារួមខេត្តជុំវិញទន្លេសាប ដែលមានទាំងដីទឹក និងដីគោក មានការទន្ទ្រានកាន់កាប់ព្រៃលិចទឹក មានដីតំបន់៣ សូមបន្តយកចិត្តទុកដាក់បន្ថែមលើចំណុចនេះ និងមានធនធានដទៃទៀតដែលត្រូវជួយគ្រប់គ្រងអោយបានល្អ ការពារធនធានធម្មជាតិដែលមាននៅមូលដ្ឋានអោយបានគង់វង្ស។ លើការងារដីធ្លីនៅមូលដ្ឋាន សម្ដេចតេជោក៏ឱ្យណែនាំត្រូវយកចិត្តទុកដាក់ដោះស្រាយជម្លោះដីធ្លីជូនប្រជាពលរដ្ឋ និងលុបបំបាត់ទំនាស់ដីធ្លីនៅទូទាំងប្រទេស តាមរយៈយន្តសម្របសម្រួលក្រៅប្រព័ន្ធតុលាការ និងវាស់វែងផ្តល់បណ្ណកម្មសិទ្ធជូនប្រជាជនអោយបានឆាប់។ សម្តេចតេជោក៏បានណែនាំឱ្យបន្តយកចិត្តទុកដាក់គ្រប់គ្រង និងជួយមើលថែចំពោះបងប្អូនអតីតយុទ្ធជន និងនិវត្តន៍ជនដែលមានក្នុងមូលដ្ឋាន។ ចំពោះរោងចក្រសហគ្រាសនានានៅក្នុងខេត្តកំពង់ធំមិនមានច្រើនទេ ប៉ុន្តែសម្តេចតេជោនៅតែណែនាំអោយយកចិត្តទុកដាក់បន្ថែមគ្រប់គ្រងអោយបានល្អចំពោះកម្មករនិយោជិត និងខិតខំដោះស្រាយវិវាទការងារនៅគ្រប់ទីកន្លែងអោយបានឆាប់បំផុត ប្រសិនបើមាន។ លើការងារនៅមូលដ្ឋាន សម្តេចតេជោណែនាំឲ្យខិតខំបម្រើប្រជាជនដោយស្មោះត្រង់ សម្តេចឃើញថាមូលដ្ឋានបានខិតខំធ្វើការបានល្អហើយ ប៉ុន្តែមូលដ្ឋានត្រូវខិតខំបន្តទៀត «អំពើល្អចំពោះប្រជាពលរដ្ឋ ទទួលបានត្រឡប់មកវិញដោយការស្រលាញ់ ប៉ុន្តែអំពើទាំងឡាយណាដែលមិនល្អ ទទួលបានត្រឡប់មកវិញដោយការស្អប់ពីប្រជាពលរដ្ឋ។ អ្វីក៏ដោយកើតចេញពីការខុសឆ្គងរបស់មន្ត្រីត្រូវខិតខំលុបបំបាត់»។ សូមបញ្ជាក់ថា ដំណើរអញ្ជើញចុះមូលដ្ឋានរបស់សម្តេចតេជោ ហ៊ុន សែន ប្រមុខរដ្ឋស្តីទី បានចាប់ផ្តើមកាលពីថ្ងៃទី២៥ ខែមេសា ឆ្នាំ២០២៦ ពីខេត្តកំពង់ចាម និងបន្តមកខេត្តជាបន្តបន្ទាប់ ហើយរហូតមកដល់ពេលនេះ ជាលើកទី១២ នៅខេត្តកំពង់ធំនេះ។ ការចុះជួបសំណេះសំណាលនេះ ជាការពង្រឹងគណនេយ្យភាពរវាងព្រឹទ្ធសភា ជាមួយអង្គបោះឆ្នោត ដើម្បីចែករំលែកពីការវាយតម្លៃសភាពការណ៍ជាតិ និងអន្តរជាតិ ព្រមទាំងជំរុញឱ្យការងារ មូលដ្ឋានកាន់តែមានប្រសិទ្ធភាព ក៏ដូចជាផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយអាជ្ញាធរមូលដ្ឋាន និង ក្រើនរំឭកដល់មន្ត្រីនៅមូលដ្ឋាន ឱ្យបង្កើនការយកចិត្តទុកដាក់លើភារកិច្ចរបស់ខ្លួន ពិសេសការផ្តល់សេវាសាធារណៈ ឱ្យបានល្អប្រសើរ ព្រមទាំងការដោះស្រាយបញ្ហានានា ដែលជាក្តីកង្វល់របស់ប្រជាពលរដ្ឋនៅមូលដ្ឋាន ឱ្យមានប្រសិទ្ធភាពខ្ពស់និងទាន់ពេលវេលា៕

សម្តេចតេជោ ហ៊ុន សែន៖ កំពង់ធំជាគោលដៅការចាប់អារម្មណ៍លើការវិនិយោគកែច្នៃស្វាយចន្ទី ខណៈមហិច្ឆតាកម្ពុជាចង់ប្រែក្លាយជាអធិរាជស្វាយចន្ទី

សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ណែនាំឲ្យអភិបាលខេត្តកំពង់ធំ ក្តាប់យកការទាក់ទាញវិនិយោគកែច្នៃគ្រាប់ស្វាយចន្ទី ខណៈកម្ពុជាចង់ប្រែក្លាយជាប្រទេសអធិរាជគ្រាប់ស្វាយចន្ទី និងមានដំណាំស្វាយចន្ទីច្រើនជាងគេ។ ក្នុងឱកាសសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ និងមន្ត្រីនៃមន្ទីរអង្គភាពនានាជុំវិញខេត្តកំពង់ធំ នៅព្រឹកថ្ងៃទី០៣ ខែមិថុនា ឆ្នាំ២០២៦នេះ សម្តេចតេជោ ហ៊ុន សែន បានលើកឡើងថា ខេត្តកំពង់ធំបានចូលរួមបង្កើនគម្របព្រៃឈើច្រើនតាមរយៈដំណាំចំការកៅស៊ូ ដំណាំស្វាយចន្ទី ហើយខេត្តកំពង់ធំជាគោលដៅនៃការចាប់អារម្មណ៍ការវិនិយោគកែច្នៃគ្រាប់ស្វាយចន្ទី ដូច្ចេះអភិបាលខេត្តត្រូវក្តាប់អោយជាប់ទាក់ទងការទាក់ទាញការវិនិយោគ ប្រើប្រាស់វត្ថុធាតុដើមដែលមានស្រាប់នៅក្នុងខេត្តកំពង់ធំ ក្នុងនោះក៏អាចមានចំណែកខ្លះមកពីខេត្តព្រះវិហារ និងខ្លះមកពីខេត្តកំពង់ចាមដែរ។ សម្តេចតេជោបន្តថា យើងត្រូវប្រែក្លាយប្រទេសកម្ពុជាទៅជាអធិរាជគ្រាប់ស្វាយចន្ទី ខណៈលើពិភពលោកបច្ចុប្បន្នប្រទេសដែលមានគ្រាប់ស្វាយចន្ទីច្រើនជាងគេគឺកម្ពុជា សម្តេចបញ្ជាក់ថា «ពីមុនគឺប្រទេសកូឌីវ័រ តែពេលនេះនៅកម្ពុជា»។ សម្តេចបន្តថា ដំណាំស្វាយចន្ទីនេះ ប្រជាជនដាំងាយស្រួលជាង។ ក្នុងនោះប្រទេសវៀតណាមជាប្រទេសទីមួយចែកចាយគ្រាប់ស្វាយចន្ទីលើពិភពលោក ហើយឥណ្ឌាជាប្រទេសទី២។ ទាំងវៀតណាម និងប្រទេសឥណ្ឌាផលិតគ្រាប់ស្វាយចន្ទីមិនមានគ្រប់គ្រាន់ទេ ដូច្ចេះវៀតណាមដឹកពីអាហ្វ្រិកទៅកែច្នៃ និងចែកចាយ ប៉ុន្តែបច្ចុប្បន្នសេដ្ឋកិច្ចបំពេញអោយគ្នារវាងកម្ពុជា និងវៀតណាម ទំហំពាណិជ្ជកម្មប្រទេសទាំងពីរ បានកើនឡើង១០ពាន់លានដុល្លារ និងឆ្ពោះទៅរក ២០ពាន់លានដុល្លារ អ្វីគួរអោយចាប់អារម្មណ៍៣ឆ្នាំចុងក្រោយ យើងនាំចេញទៅវៀតណាម ច្រើនជាងនាំចេញពីវៀតណាមមកកម្ពុជា ក្នុងនោះគឺកៅស៊ូ និងគ្រាប់ស្វាយចន្ទី បានដើរតួនាទីដ៏សំខាន់។ បើតាមតួលេខ វៀតណាមនាំមកកម្ពុជា រយៈពេល៣ខែ ឆ្នាំ២០២៦នេះមាន ១ពាន់៣០០លានដុល្លារ និងកម្ពុជាចេញទៅវៀតណាមមាន១ពាន់៩០០លានដុល្លារ។ សម្តេចតេជោបន្តថា នៅពេលចំពោះមុខឬអនាគត កម្ពុជានឹងនាំចេញទៅវៀតណាមច្រើនជាងវៀតណាមនាំចូលមក។ នេះជាសេដ្ឋកិច្ចក្នុងតំបន់បំពេញអោយគ្នា។ កម្ពុជាកំពុងប្រែក្លាយពីប្រទេសគ្រាន់តែផ្គត់ផ្គង់ខ្លួនឯងទៅជាប្រទេសសម្រាប់ការនាំចេញ។ សូមបញ្ជាក់ថា នៅក្នុងប្រទេសកម្ពុជា តាមបណ្តាខេត្តនានា មានដាំដុះដំណាំស្វាយចន្ទីច្រើន ហើយបើនិយាយដាច់ដោយឡែកនៅក្នុងខេត្តកំពង់ធំ ផ្ទៃដីដាំដុះដំណាំស្វាយចន្ទីមានចំនួនសរុប ១៦៨ ១៥២ហិកតា (ស្មើនឹង២៣%នៃផ្ទៃដីកសិកម្មសរុប), ទិន្នផល ជាមធ្យម ១,៥តោន/ហិកតា, រោងចក្រកែច្នៃគ្រាប់ស្វាយចន្ទី ចំនួន ៣ទីតាំង និងសិប្បកម្មកែច្នៃគ្រាប់ ស្វាយចន្ទី ចំនួន ៩ទីតាំង (មានសមត្ថភាពកែច្នៃ ៧៨តោន/១ថ្ងៃ)៕

បណ្ដាញសង្គម

ព័ត៌មានថ្មីៗ

កាតាអំពាវនាវដល់គ្រប់ភាគីឆ្លើយតបជាវិជ្ជមានចំពោះកិច្ចប្រឹងប្រែងសម្របសម្រួលដែលកំពុងបន្តរវាងអាមេរិកនិងអ៊ីរ៉ង់

ប្រជាជនប៉ាឡេស្ទីនអំពាវនាវឲ្យលោក TRUMP បញ្ឈប់អ៊ីស្រាអែល ដាក់បញ្ចូលទឹកដីរបស់ពួកគេជារបស់ប្រទេសនេះ

ក្រុមជំនួយមនុស្សធម៌ជំរុញឲ្យមានសកម្មភាពដ៏មានអត្ថន័យ អំឡុងពេលបទឈប់បាញ់នៅលីបង់

មនុស្សជិត ៥០នាក់បានស្លាប់ ដោយសារស្រេកទឹកនៅប្រទេសនីហ្សេ បន្ទាប់ពីរថយន្តដឹកពួកគេមិនដំណើរការ

ប៉ាគីស្ថានចោទ ឥណ្ឌាថា កំពុងប្រើប្រាស់ទឹកជាអាវុធ បន្ទាប់ពីព្យួរសន្ធិសញ្ញាទឹក Indus

ប្រធាន WFP ព្រមានជាថ្មីអំពីវិបត្តិស្បៀងអាហារពិភពលោក ស្របពេលមានការបិទច្រកសមុទ្រហ័រមូស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877