BTV NEWS

លោកជំទាវលីម ដារ៉ែន ជួន ណារិន្ទ ផ្តល់ម៉ូតូ២០គ្រឿង និងអំណោយមួយចំនួន ទៅកាន់វរៈនគរបាល និងកងទ័ពការពារព្រំដែន

ក្រុមការងាររាជរដ្ឋាភិបាលចុះមូលដ្ឋានឃុំកណ្តឹងស្រុកបាទី ខេត្តតាកែវនិងរដ្ឋបាលឃុំកណ្តឹងប្រារព្វពិធីផ្សព្វផ្សាយពីបញ្ហាគ្រឿងញៀន និង ពិធីបង្សុកូលឧទ្ទិសកុសលដល់វិញ្ញាណក្ខន្ធវិរះកងទ័ពកម្ពុជាដែលបានពលីជីវិតក្នុងសមរភូមិ

ឯកឧត្តមសាស្ត្រាចារ្យ ប៉ិច សុធី អញ្ជើញបើកសន្និសីទប្រចាំឆ្នាំលើកទី១ របស់សមាគមគ្រូពេទ្យបង្កកំណើតកម្ពុជា

មេភូមិភាគ៣កម្ពុជាស្នើថៃជៀសវាងសកម្មភាពទាំងឡាយដែលនាំឲ្យមានភាពតានតឹងនៅតាមព្រំដែនជាយថាហេតុ

ព័ត៌មានជាតិ

ឯកឧត្តម ហ៊ុន ម៉ានី និងឯកឧត្តម សាយ សំអាល់ អញ្ជើញប្រគល់បណ្ណកម្មសិទ្ធអចលនវត្ថុដល់ប្រជាជន ចំនួន២៤ភូមិ នៃក្រុងឧដុង្គម៉ែជ័យ ខេត្តកំពង់ស្ពឺ

ប្រជាជនចំនួន២៤ភូមិ នៃសង្កាត់វាំងចាស់ សង្កាត់ព្រះស្រែ និងសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ បានទទួលបណ្ណកម្មសិទ្ធអចលនវត្ថុ ដែលប្រគល់ជូនដោយឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ និង ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរោបនីយកម្ម និងសំណង់។ ពិធីខាងលើនេះបានប្រព្រឹត្តទៅនៅថ្ងៃទី២២ ខែកញ្ញា ឆ្នាំ២០២៤ នៅសង្កាត់វាំងចាស់ ក្រុងឧដុង្គម៉ែជ័យ ដោយមានការចូលរួមពីឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា ថ្នាក់ដឹកនាំក្រសួង ក្រុមការងាររាជរដ្ឋាភិបាល ឯកឧត្តមប្រធានក្រុមប្រឹក្សា ឯកឧត្តមអភិបាលខេត្ត មន្រ្តីរាជការជុំវិញខេត្ត ព្រមទាំងប្រជាពលរដ្ឋសរុបប្រមាណ ១២០០នាក់។ ឯកឧត្តមបណ្ឌិត ជាម ចន្ទសោភ័ណ អភិបាលខេត្តកំពង់ស្ពឺ បានថ្លែងអំណរគុណជូនចំពោះឯកឧត្តម ហ៊ុន ម៉ានី និងឯកឧត្តម សាយ សំអាល់ ដែលបានផ្តល់កិត្តិយសដល់អ្នកខេត្តកំពង់ស្ពឺ ក្នុងការចែកបណ្ណកម្មសិទ្ធអចលនវត្ថុជូនដល់ប្រជាពលរដ្ឋដោយផ្ទាល់នាឱកាសនេះ។ មានមតិសំណេះសំណាលជាមួយលោកតា លោកយាយ អ៊ុំពូមីង បងប្អូន ដែលអញ្ជើញមកផ្ទាល់ក្នុងអង្គពិធី ឯកឧត្តម ហ៊ុន ម៉ានី បានសម្តែងនូវក្តីសោមនស្សរីករាយជាមួយបងប្អូនប្រជាពលរដ្ឋដែលទទួលបានបណ្ណកម្មសិទ្ធនាពេលនេះ។ ការចេញបណ្ណកម្មសិទ្ធដល់បងប្អូនប្រជាពលរដ្ឋ គឺជាអាទិភាពមួយរបស់រាជរដ្ឋាភិបាល។ នាឱកាសនោះផងដែរ ឯកឧត្តមបានជំនួសមុខឱ្យប្រជាពលរដ្ឋអ្នកខេត្តកំពង់ស្ពឺធ្វើការថ្លែងអំណរគុណក្រុមការងារក្រសួងរៀបចំដែនដី នគរោបនីយកម្ម និងសំណង់ និងក្រុមការងារថ្នាក់ខេត្ត ដែលបានខិតខំវាស់វែងដីធ្លី និងបំពេញបែបបទសម្រាប់រៀបចំបណ្ណកម្មសិទ្ធជូនប្រជាពលរដ្ឋ ដោយមិនគិតពីពេលយប់ និងថ្ងៃចុងសប្តាហ៍ឡើយ សំដៅធ្វើយ៉ាងណាបង្កលក្ខណៈងាយស្រួលដល់បងប្អូនដែលមានការមមាញឹកក្នុងការងារប្រចាំថ្ងៃ។ដោយឡែក ឯកឧត្តម ក៏បានថ្លែងអំណរគុណដល់ប្រជាពលរដ្ឋទូទាំងប្រទេសដែលបានចូលរួមយ៉ាងច្រើនកុះករក្នុងចលនាជាតិដ៏ធំ តបតាមសេចក្តីអំពាវនាវរបស់សម្តេចមហាបវរធិបតី ហ៊ុន ម៉ាណែត ជាមួយមូលនិធិកសាងហេដ្ឋារចនាសម្ព័ន្ធនៅតាមខ្សែបន្ទាត់ព្រំដែន ដែលសបញ្ជាក់នូវការគាំទ្រ និងជំនឿទុកចិត្តយ៉ាងមុតមាំមកលើរាជរដ្ឋាភិបាលក្នុងការការពារបូរណភាពទឹកដី អធិបតេយ្យជាតិ។ ឯកឧត្តមបានរំលេចថា បើទោះបីជាការចូលរួមជាទំហំតិចក្តី ច្រើនក្តី តែវាបានបង្ហាញនូវទឹកចិត្តដ៏ធំធេងរបស់បងប្អូនដែលស្រលាញ់ជាតិ ស្រលាញ់ទឹកដី។ នៅចុងបញ្ចប់នៃកម្មវិធី ឯកឧត្តមគណៈអធិបតីបានអញ្ជើញចែកបណ្ណកម្មសិទ្ធជានិមិត្តរូបជូនដល់ប្រជាពលរដ្ឋដែលមកទទួលបណ្ណ ប្រកបដោយទឹកមុខសប្បាយរីករាយ ស្ថិតក្នុងបរិយាកាសដ៏ស្និទ្ធស្នាលបំផុត ក្រោមផ្ទៃមេឃរលឹមស្រិចៗ ប្រៀបបានការប្រោះព្រុំពរជ័យពីព្រះភិរុណ៕ អត្ថបទ រដ្ឋា

ថវិកាដែលកើតចេញពីមហាសាមគ្គីរបស់ពលរដ្ឋខ្មែរសម្រាប់កសាងហេដ្ឋារចនាសម្ព័ន្ធតាមព្រំដែនកើនដល់ជាង ២១លានដុល្លារ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបញ្ជាក់ថា រហូតមកដល់ពេលនេះ បងប្អូនប្រជាពលរដ្ឋខ្មែរ ដែលបានចូលរួមបរិច្ចាគថវិកា ដោយស្ម័គ្រចិត្តជាមួយរាជរដ្ឋាភិបាលក្នុងកិច្ចការកសាងហេដ្ឋារចនាសម្ព័ន្ធតាមព្រំដែន គឺមានចំនួនរហូតដល់ជាង ៧០ម៉ឺននាក់ដោយទទួលថវិកាបានចំនួនជាង ២១លានដុល្លារអាមេរិក។តាមរយៈសារពិសេសនាព្រឹកថ្ងៃទី២៣ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានប្រកាសថ្លែងអំណរអរគុណចំពោះទឹកចិត្តដ៏មហាសាមគ្គីរបស់បង ប្អូនប្រជាពលរដ្ឋខ្មែរទាំងក្នុង និងក្រៅប្រទេសដែលបានរួមគ្នាបរិច្ចាគថវិកា ដោយស្ម័គ្រចិត្ត ចូលរួមជាមួយរាជរដ្ឋាភិបាលក្នុងការកសាងនូវហេដ្ឋារចនាសម្ព័ន្ធតាមក្រវ៉ាត់ព្រំដែនចាប់ពីការ ប្រកាសរហូតដល់សព្វថ្ងៃនេះ ខណៈវិភាគទានស្ម័គ្រចិត្តនេះនឹងត្រូវយកទៅកសាង ផ្លូវតាមក្រវ៉ាត់ព្រំដែន។សូមបញ្ជាក់ថា រាជរដ្ឋាភិបាល បានសម្រេចបង្កើត«មូលនិធិកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណងដើម្បីកៀគរថវិកាបន្ថែមសម្រាប់កសាងហេដ្ឋារចនាសម្ព័ន្ធនានា នៅតាមបណ្តោយព្រំដែន ដោយកម្មវិធីមូលនិធិនេះក៏ជាការផ្តល់ឱកាសឲ្យបងប្អូនប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយរាជដ្ឋាភិបាលនៅក្នុងបុព្វហេតុការពារ និងអភិវឌ្ឍន៍ជាតិ ក្នុងស្មារតីសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍនៅតាមតំបន់ព្រំដែនឲ្យបានកាន់តែរឹងមាំ និងប្រកបដោយចីរភាពបន្ថែមទៀត។តាមរយៈសារសំឡេងរបស់សម្តេចធិបតីនាថ្ងៃនេះ សម្តេចបានបញ្ជាក់ថា ក្រុមការងារមូលនិធិនឹងត្រូវបន្តទទួលយកការចូលរួមស្ម័គ្រចិត្តរបស់ជនរួមជាតិទាំងអស់ រហូតដល់ថ្ងៃទី៣១ ខែតុលា ឆ្នាំ២០២៤ខាងមុខនេះ ហើយពេលបិទបញ្ចប់ក្រុមការងារមូលនិធិនឹងជំរាបជូនអំពីទិន្នន័យចុងក្រោយ រួមជាមួយនឹងផែនការច្បាស់លាស់ក្នុងការប្រើប្រាស់នូវមូលនិធិនេះ ដោយឈរលើគោលការណ៍តម្លាភាព និងគណនេយ្យភាព៕ អត្ថបទ៖ បាន ចក់

យុទ្ធនាការមួយខែរបស់KOICA ដើម្បីកម្ពុជាស្អាតសម្រេចបានការចូលរូមពីមនុស្ស ជាង ២០០០០នាក់

ក្នុងឱកាសអបអរសាទរទិវាពិភពលោកសម្អាតបរិស្ថាន ក្រសួងបរិស្ថាន និងទីភ្នាក់ងារសហប្រតិបត្តិការអន្តរជាតិកូរ៉េ (កយកា) បានរៀបចំសិក្ខាសាលាស្តីពី “បច្ចុប្បន្នភាព និងអនាគតនៃបរិស្ថាននៅកម្ពុជា” សិក្ខាសាលានេះបានទទួលស្វាគមន៍អ្នកចូលរួមប្រមាណជា ១៦០នាក់, កាលពីថ្ងៃទី២០ ខែកញ្ញា ឆ្នាំ២០២៤។តាមរយៈសិក្ខាសាលានេះ ក្រសួងបរិស្ថាន បានចែករំលែកអំពីស្ថានភាពបរិស្ថានបច្ចុប្បន្នរបស់កម្ពុជា និងយុទ្ធសាស្ត្រដើម្បីដោះស្រាយបញ្ហាប្រឈមទាំងនោះ។ កម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជាបានបង្ហាញពីកិច្ចសហការបន្តរបស់ខ្លួនក្នុងវិស័យគ្រប់គ្រងសំណល់ ដែលផ្តោតលើសេដ្ឋកិច្ចចក្រា និងបរិស្ថាន។ ដេប៉ាតឺម៉ង់វិស្វកម្មបរិស្ថាន នៃសាកលវិទ្យាល័យភូមិន្ទភ្នំពេញ (RUPP) បានព្យាករណ៍ពីបញ្ហាប្រឈមនាពេលអនាគតដែលអាចនឹងកើតមានកាន់តែអាក្រក់ទៅៗប្រសិនបើគ្មានសកម្មភាពបង្ការ ឬទប់ស្កាត់ណាមួយដែលត្រូវចាប់ផ្ថើមនៅថ្ងៃនេះ និងតួនាទីរបស់វិស័យអប់រំ។ នៅក្នុងសិក្ខាសាលា អ្នកចូលរួមទាំង160នាក់បានយកចិត្តទុកដាក់ និងបង្ហាញការសាទរ ព្រមទាំងចែករំលែក ចំណាប់អារម្មណ៍ និងការព្រួយបារម្ភអំពីបរិស្ថាន ជាពិសេស ពីមន្ត្រីសាធារណៈ ដៃគូអភិវឌ្ឍន៍ ផ្នែកអប់រំ អង្គការក្រៅរដ្ឋាភិបាល និងវិស័យឯកជន និងយុវជនជំនាន់ក្រោយមកពី RUPP និងសមាគមសហព័ន្ធយុវជនសេដ្ឋកិច្ចកម្ពុជា។ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានចែករំលែកការប្តេជ្ញាចិត្ត របស់ រដ្ឋាភិបាលកម្ពុជាចំពោះបរិស្ថាន ស្អាត បៃតង និរន្តរភាព និងអំពាវនាវឱ្យមានការចូលរួម ពីប្រជាពលរដ្ឋ ដោយលើកឡើងថា “បញ្ហាប្រឈមបរិស្ថានដែលយើងកំពុងប្រឈម មិនអាច ដោះស្រាយ បាន ប្រសិនបើគ្មានការខិតខំប្រឹងប្រែងរួមគ្នានោះទេ។ យើងទាំងអស់ គ្នា គួរតែរួមដៃគ្នា។ វាដល់ពេលដែលត្រូវធ្វើសកម្មភាពសម្រាប់ខ្លួនយើង និងមនុស្សជំនាន់ ក្រោយ របស់យើង“។នាឱកាសនោះលោកស្រី Choi Moon Jung នាយកប្រចាំប្រទេស នៃការិយាល័យ កយកា ប្រចាំប្រទេសកម្ពុជា មានប្រសាសន៍ថា “សិក្ខាសាលាថ្ងៃនេះ គឺដើម្បីលើកកម្ពស់ការយល់ដឹង និងចែករំលែកគំនិត យោបល់រវាង គ្នានិងគ្នា។ ទីភ្នាក់ងារកយកា ជឿជាក់ ថា ដំណោះស្រាយ គឺ អាស្រ័យលើមនុស្សគ្រប់រូប»។ តាមរយៈជំនឿជឿជាក់នេះ ទីភ្នាក់ងារកយកា បានគាំទ្រក្នុងការបង្កើត ដេប៉ាតឺម៉ង់វិស្វកម្មបរិស្ថាន នៅសាកលវិទ្យាល័យភូមិន្ទភ្នំពេញ (RUPP) ដើម្បីបណ្ដុះបណ្ដាលអ្នកមានទេពកោសល្យក្នុងការស្រាវជ្រាវ និងបង្កើតដំណោះស្រាយ សម្រាប់ការ ដោះស្រាយបញ្ហាបរិស្ថាន។ទីភ្នាក់ងារកយកា ចែករំលែកនូវលទ្ធផល នៃយុទ្ធនាការ រយៈពេលមួយខែរបស់ខ្លួន ដែលផ្តួចផ្តើមឡើងដើម្បីគាំទ្រ 'កម្ពុជាស្អាត! ខ្មែរអាចធ្វើបាន!' កាលពីថ្ងៃទី ២១ ខែសីហា កន្លងទៅនេះ ដែលមានការចូលរួមរបស់ ឯកឧត្តមPark Jung-wook ឯកអគ្គរដ្ឋទូតសាធារណៈរដ្ឋកូរ៉េប្រចាំកម្ពុជា ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន និងឯកឧត្តម ឃួង ស្រេង អភិបាលសាលារាជធានីភ្នំពេញ ដែលបានចូលរួមក្នុងការចាប់ផ្ថើមយុទ្ធនាការនេះ។ វាបានចាប់ផ្តើមជាមួយនឹងសកម្មភាពរើសសំរាមនៅតាមដងទន្លេ។ នៅថ្ងៃនោះមនុស្សជាង ៧០០នាក់បានចូលរួម។រយៈពេលមួយខែចុងក្រោយនេះ សកម្មភាពនេះបានដំណើរការតាមរយៈការចែករំលែក តាម បណ្តាញសង្គមដូចជា Facebook និង Instagram។ មនុស្ស ២១៣៣នាក់ បានប្តេជ្ញាចិត្តចំពោះការកាត់បន្ថយ ការប្រើប្រាស់ឡើងវិញ និងការកែច្នៃសំណល់ប្លាស្ទិកនៅក្នុងការអនុវត្តជីវិតប្រចាំថ្ងៃរបស់ពួកគេនៅក្នុងសាលារៀន ទីផ្សារ ហាងកាហ្វេ និងនៅផ្ទះ ហើយបានចែករំលែករូបភាព នៅលើការបង្ហោះតាមរយៈបណ្តាញសង្គម។ មនុស្សជាង ២០០០០នាក់បានមើលសកម្មភាព របស់ក្រុមគ្រួសារ មិត្តភក្តិ និងសហការីរបស់ពួកគេ។ ដោយមើលឃើញពីវិបត្តិបរិស្ថានធ្ងន់ធ្ងរ ដូចដែលរដ្ឋលេខាធិការក្រសួងបរិស្ថាន បានមាន ប្រសាសន៍ ថា យុទ្ធនាការរយៈពេលមួយខែរបស់ ទីភ្នាក់ងារកយកា ដែលបិទបញ្ចប់ជាមួយ នឹងសិក្ខាសាលា ប៉ុន្តែការប្តេជ្ញាចិត្តរបស់យើងគួរតែបន្ត។ យុវជនរាប់សិបនាក់ មកពីសាកលវិទ្យាល័យភូមិន្ទភ្នំពេញនិង សមាគមសហព័ន្ធយុវជន សេដ្ឋកិច្ចកម្ពុជា បានចូលរួមក្នុងសិក្ខាសាលានេះ ហើយមនុស្ស ២១៣៣នាក់បាន ចូលរួមដោយ ស្ម័គ្រចិត្ដក្នុងការអនុវត្តប្រចាំថ្ងៃ ហើយរីករាយនឹងចែករំលែកវាជាមួយមិត្តភក្តិ ប្រមាណ ២០០០០នាក់ ដើម្បីផ្សព្វផ្សាយឱ្យពួកគេចូលរួមទាំងអស់គ្នា។ ចាប់ផ្តើមពី សិក្ខាសាលា និងយុទ្ធនាការរយៈពេលមួយខែរបស់ទីភ្នាក់ងារកយកា យើងបាន រកឃើញថា យើងនៅតែត្រូវការមនុស្សជាច្រើនផ្សេងទៀត ដើម្បីចូលរួមដោះស្រាយបញ្ហា ប្រឈម ទាំងនេះ ជាមួយគ្នា៕ អត្ថបទ រដ្ឋា

សម្តេចប្រធានរដ្ឋសភា ឃួន សុដារី ស្នើសភាតំណាងប្រជាជនចិនខេត្តខ្វាងតុង ជំរុញអ្នកវិនិយោគមកបណ្តាក់ទុននៅកម្ពុជា

ឆ្លៀតពេលក្នុងការផ្លាស់ប្តូរជើងយន្តហោះ ធ្វើដំណើរទៅកាន់ទីក្រុងប៉េកំាង ក្នុងការបំពេញទស្សនកិច្ចនៅសាធារណរដ្ឋប្រជាមានិតចិន នៅអាកាសអន្តរជាតិទីក្រុងខ្វាងចូវ ខេត្តក្វាងតុង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានជួបពិភាក្សាការងារជាមួយ ឯកឧត្តម Chen Jiaquan អនុប្រធានគណៈកម្មការកិច្ចការបរទេស សហប្រតិបត្តិការអន្តរជាតិ នៃសភាតំណាងប្រជាជនចិនខេត្តខ្វាងតុង ដែលបានអញ្ជើញមកទទួលស្វាគមន៍គណៈប្រតិភូ នៅរសៀលថ្ងៃទី២២ ខែកញ្ញាឆ្នាំ២០២៤។នៅក្នុងឱកាសនោះ សម្តេចប្រធានរដ្ឋសភា បានស្នើដល់ស្ថាប័នសភាខេត្តនេះ ជំរុញការធ្វើពាណិជ្ជកម្មនិងកៀរគរអ្នកវិនិយោគ ទៅបណ្តាក់ទុននៅកម្ពុជាបន្ថែមទៀត និងលើកកម្ពស់ការភ្ជាប់ទំនាក់ទំនងប្រជាជននិងប្រជាជន ឱ្យកាន់តែជិតស្និទ្ធឡើង។សម្តេចប្រធានរដ្ឋសភា បានថ្លែងអំណរគុណ ចំពោះការទទួលស្វាគមន៍របស់មិត្តចិន ជាពិសេសអាជ្ញាធរខេត្តខ្វាងតុង ទោះបីគណៈប្រតិភូគ្រាន់តែឆ្លងកាត់ខេត្តក្នុងរយៈពេលខ្លីយ៉ាងណាក្តី ក៏សភាខេត្តមកទទួលស្វាគមន៍យ៉ាងកក់ក្តៅ រាក់ទាក់ជាទីបំផុត ដែលនេះបង្ហាញពីចំណងមិត្តភាពជាប្រពៃណី មិត្តភាពដែកថែប ដ៏រឹងមាំនៃប្រទេសទាំងពីរ។ សម្តេចរដ្ឋសភាធិបតី បានសម្តែងការស្ញប់ស្ញែងចំពោះការរីកចម្រើនយ៉ាងខ្លំាងក្លារបស់ខេត្ត ខ្វាងតុង។ភាគីទាំងពីរ បានវាយតម្លៃខ្ពស់ចំពោះ ចំណងមិត្តភាពជាប្រពៃណី កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ កម្ពុជា-ចិន ។ សម្តេចប្រធានរដ្ឋសភានិងតំណាងសភាប្រជាជនខេត្តខ្វាងតុង បានលើកឡើងថា មិត្តភាពកម្ពុជា-ចិន ជាគំរូនៃទំនាក់ទំនងអន្តរជាតិ ដែលបានឈរលើគោលការណ៍គោរពគ្នា ឱ្យតម្លៃគ្នា និងយោគយល់គ្នា ដើម្បីផលប្រយោជន៍រួម។ឯកឧត្តម Chen Jiaquan បានគំាទ្រប្រសាសន៍លើកឡើងរបស់សម្តេចប្រធានរដ្ឋសភា។ ដើម្បីភ្ជាប់ទំនងទំនាក់រវាងរដ្ឋសភាកម្ពុជានិងសភាតំណាងប្រជាជនចិនខេត្តខ្វាងតុងឱ្យកាន់តែជិតស្និទ្ធនឹងរឹងមាំបន្ថែមទៀត ឯកឧត្តមបានស្នើសូមគណៈប្រតិភូសភាខេត្តខ្វាងតុង មកបំពេញទស្សនកិច្ចផ្លូវការនិងមិត្តភាពនៅកម្ពុជា ក្នុងខែវិច្ឆិកា ឆ្នាំ២០២៤ នេះ។ឯកឧត្តម បានមានប្រសាសន៍ គូសបញ្ជាក់ពីសក្តានុពលខ្ពស់ក្នុងការធ្វើពាណិជ្ជកម្មនៅកម្ពុជា និងបានជម្រាបសម្តេចប្រធានរដ្ឋសភានិងគណៈប្រតិភូថា ខេត្តខ្វាងតុងជាខេត្តនាំមុខគេរបស់ចិន លើការធ្វើពាណិជ្ជកម្ម។ រដ្ឋាភិបាលបានបង្កើតតំបន់សេដ្ឋកិច្ចពិសេសធំជាងគេរបស់ចិន នៅខេត្តខ្វាងតុងឈ្មោះថា តំបន់សេដ្ឋកិច្ចពិសេសតំបន់ ហុងកុង ម៉ាកែវ ខ្វាងតុង។សម្តេចរដ្ឋសភាធិបតី ឃួនសុដារី បានស្វាគមន៍ដោយក្តីរីករាយ ចំពោះការភ្ជាប់ទំនាក់ទំទងសភាកម្ពុជានិងសភាប្រជាជនខេត្តខ្វាងតុង។ រដ្ឋសភាកម្ពុជាត្រៀមស្វាគមន៍ដោយក្តីរីករាយ ចំពោះវត្តមានសភាប្រជាជនខេត្តខ្វាងតុង នៅកម្ពុជាក្នុងខែវិច្ឆិកាខាងមុខនេះ។សម្តេចប្រធានរដ្ឋសភាបានមានប្រសាសន៍ថា ក្រោមការដឹកនាំរបស់រាជរដ្ឋាភិបាលនីតិកាលទី ៧រដ្ឋសភា ដែលមានសម្តេចមហាបវរធិបតី ហ៊ុន ម៉ាណែត នាយកមន្រ្តី កម្ពុជាស្វាគមន៍ និងយកចិត្តទុកដាក់ ធានាការពារផលប្រយោជន៍អ្នកវិនិយោគទុនក្នុងស្រុកនិងបរទេស។ កម្ពុជាមានសុខសន្តិភាព ស្ថិរភាព យ៉ាងរឹងមាំ និងមានច្បាប់វិនិយោគ បទដ្ឋានគតិយុត្តជាច្រើន ក្នុងការធានា ការពារ និងលើកទឹកចិត្តដល់អ្នកវិនិយោគ៕

រយៈពេល៣ថ្ងៃ ភ្ញៀវទេសចរជិត ៤ម៉ឺននាក់ ទស្សនាព្រឹត្ដិការណ៍ថ្ងៃរះចំកំពូលប្រាសាទអង្គរ

អ្នកជំនាញទេសចរណ៍ បានឲ្យដឹងថា ភ្ញៀវទេសចរជាតិ និងអន្ដរជាតិ ទៅទស្សនាព្រឹត្តិការណ៍ថ្ងៃរះចំកំពូលប្រាសាទអង្គរវត្ត ចាប់ពីថ្ងៃទី២១ ដល់ថ្ងៃទី២៣ ខែកញ្ញា ឆ្នាំ២០២៤នេះ មានជាង៣ម៉ឺន៧ពាន់នាក់។លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌អង្គរ នៃអាជ្ញាធរជាតិអប្សរា បានឱ្យដឹងថា ព្រឹត្ដិការណ៍ថ្ងៃរៈចំកណ្ដាលកំពូលប្រាសាទអង្គរ ក្នុងរយៈពេល៣ថ្ងៃ ចាប់ពីថ្ងៃទី២១ដល់ថ្ងៃទី២៣ខែកញ្ញាឆ្នាំ២០២៤នេះ មានភ្ញៀវទេសចរជាតិនិងអន្ដរជាតិ ជាង ៣ម៉ឺន៧ពាន់នាក់។ ក្នុងចំណោមភ្ញៀវទេសចរជាង៣ម៉ឺន៧ពាន់នាក់នោះ មានភ្ញៀវទេសចរអន្ដរជាតិ ១៨៣៤នាក់ ភ្ញៀវទេសចរជាតិ៣៥៨៧៦នាក់ ។ជាមួយគ្នានោះ នៅថ្ងៃទី ២១ កញ្ញា២០២៤ ចន្លោះពីម៉ោង៥:០០នាទី-៧:០០នាទី មានភ្ញៀវទេសចរចំនួន ១២,៣៥៧នាក់ ភ្ញៀវអន្ដរជាតិ ៦៣៧នាក់ នៅថ្ងៃទី២២ ខែកញ្ញា ២០២៤ មានចំនួនសរុប១៩,៥០៥នាក់ ភ្ងៀវបរទេសចំនួន ៧០៤នាក់ និង ភ្ងៀវជាតិចំនួន១៨,៨០០នាក់។ ដោយឡែកនៅថ្ងៃទី២៣ខែកញ្ញា២០២៤ ចន្លោះពីម៉ោង៥:០០នាទី-៧:០០នាទី មានអ្នកទេសចបរទេសចំនួន ៤៩៣នាក់ ភ្ងៀវជាតិមានចំនួន ៥,៣៥៦នាក់។ សូមជម្រាបថា កាលពីឆ្នាំ២០២៣ លំហូរភ្ញៀវទៅទស្សនាព្រះអាទិត្យរះចំកំពូលប្រាសាទអង្គរនេះផងដែរ ក្នុងរយៈពេល៣ថ្ងៃចាប់ពីថ្ងៃទី២១ដល់២៣ ខែកញ្ញា ឆ្នាំ២០២៣ មានចំនួន១២ ៦៣៥ នាក់៕

សម្តេចធិបតី៖ ទោះមាន ឬមិនមានកិច្ចសហប្រតិបត្តិការCLVក៏រាជរដ្ឋាភិបាលនៅតែបន្តអភិវឌ្ឍន៍តំបន់ភូមិភាគឦសាន

តាមរយៈសារពិសេសនាព្រឹកព្រលឹម ថ្ងៃទី២៣ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា ទោះកម្ពុជាបានបិទបញ្ចប់កិច្ចសហប្រតិបត្តិការ CLV-DTAក្តី ក៏រាជរដ្ឋាភិបាលនៅបន្តខិតខំកសាង និងអភិវឌ្ឍន៍នៅតំបន់ភូមិភាគឦសានក៏ដូចជាការធានានូវកិច្ចការពារទឹកដី និងអធិបតេយ្យភាពរបស់ខ្លួនដដែល ដើម្បីឆ្លើយតបទៅនឹងការចង់បានបរបស់ប្រជាពលរដ្ឋ ជាពិសេសពលរដ្ឋដែលកំពុងរស់នៅតំបន់ភូមិភាគឦសាននេះតែម្តង។សម្តេចធិបតី ហ៊ុន ម៉ាណែត បានបញ្ជាក់បន្ថែមទៀតថា ការបន្តអនុវត្តន៍គោលនយោ បាយជំរុញការអភិវឌ្ឍភូមិភាគឦសានរបស់កម្ពុជា គឺនៅរក្សាដដែលដោយគ្មានការប្រែប្រួល នោះឡើយ ដោយរួមទាំងការបោះបង្គោលព្រំដែន ជាមួយប្រទេសជិតខាង ការកសាងហេដ្ឋា រចនាសម្ព័ន្ធតភ្ជាប់ ជាពិសេសនោះគឺផ្លូវក្រវាត់ព្រំដែន និងការដាក់ចេញនូវកញ្ចប់លើកទឹកចិត្ត និងជំរុញការអភិវឌ្ឍខេត្តនៅតំបន់ភូមិភាគឦសានគឺនៅបន្តធ្វើដដែល។ទាក់ទងនឹងដំណើរកម្សាន្តរបស់បងប្អូនប្រជាពលរដ្ឋនៅរៀងរាល់ចុងសប្តាហ៍ ដោយ ឥតគិតថ្លៃទៅខេត្តតំបន់ភូមិភាគឦសាន ដែលបានផ្តួចផ្តើមឡើងដោយសម្តេចធិបតី នាយករដ្ឋមន្រ្តីកាលពីកន្លងទៅនោះ ត្រូវបានសម្តេចធិបតី បញ្ជាក់ថា នៅរក្សាដដែលដូចការគ្រោងទុក របស់រាជរដ្ឋាភិបាល។សម្តេចធិបតី ហ៊ុន ម៉ាណែត បានបញ្ជាក់ថា «ការរៀបចំដំណើរទស្សនកិច្ចនៅខេត្តតំបន់ភូមិភាគឦសាននៅរាល់ ចុងសប្តាហ៍ចន្លោះពីខែកញ្ញារហូតដល់ចុងឆ្នាំ២០២៤ គឺនៅបន្តរក្សាដដែល បើទោះបីជាពេល នេះកម្ពុជាបានបញ្ចប់កិច្ចសហប្រតិបត្តិការ CLV-DTAក្តី»។ ការប្រកាសបន្តនូវយុទ្ធនការដឹកពលរដ្ឋដោយឥតគិតថ្លៃនេះ គឺដើម្បីឲ្យបងប្អូនប្រជាពលរដ្ឋមានឱកាសបានទៅទស្សនាដោយភ្ទាល់ នូវការអភិវឌ្ឍជាក់ស្តែងនៅតាមបណ្តោយព្រំដែនរបស់ប្រទេសកម្ពុជា៕អត្ថបទបាន ចក់

គណៈប្រតិភូជាន់ខ្ពស់រដ្ឋសភាកម្ពុជាដឹកនាំដោយ សម្តេចរដ្ឋសភាធិបតី ឃួន សុដារី បានអញ្ជើញដល់ប្រទេសចិនដោយសុវត្ថិភាព និងទទួលបានការស្វាគមន៍យ៉ាងកក់ក្តៅពីសភាតំណាងប្រជាជនចិន

គណៈប្រតិភូជាន់ខ្ពស់រដ្ឋសភានៃព្រះរាជាណាចក្រកម្ពុជា ដឹកនាំដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅល្ងាចថ្ងៃទី២២ ខែកញ្ញាឆ្នាំ២០២៤នេះ បានអញ្ជើញដល់ទីក្រុងប៉េកំាងប្រកបដោយសុវត្ថិភាព នៅក្នុងដំណើរទស្សនកិច្ចផ្លូវការនិងមិត្តភាព រយៈពេល៥ថ្ងៃ នៅទីក្រុងប៉េកំាងនិងក្រុងសៀងហៃ តបតាមការអញ្ជើញរបស់ ឯកឧត្តម ចាវ ឡឺជី (Zhao Leji) ប្រធានគណៈកម្មាធិការអចិន្រ្តៃយ៍នៃសភាតំណាងប្រជាជនចិនទូទាំងប្រទេស។នៅអាកាសយានដ្ឋានអន្តរជាតិនាទីក្រុងប៉េកំាង គណៈប្រតិភូ បានទទួលការស្វាគមន៍និងបដិសណ្ឋារកិច្ចយ៉ាងកក់ក្តៅពីភាគីមិត្តចិន ។ លោកជំទាវ ពូ សៀវលិន (Bu Xiaolin) អនុប្រធានគណៈកម្មាធិការការពារបរិស្ថាន និងអភិរក្សធនាធាននិងជាសមាជិកនៃក្រុមមិត្តភាពសភាចិន-កម្ពុជា និងមន្រ្តីជាច្រើនរូបទៀត បានអញ្ជើញមកទទួលស្វាគមន៍និងធ្វើបដិសណ្ឋារកិច្ចយ៉ាងកក់ក្តៅ ជូនគណៈប្រតិភូរដ្ឋសភាកម្ពុជា ។ នៅក្នុងឱកាសនោះ ក៏មានវត្តមានលោកជំទាវ សឿង រដ្ឋចាវី ឯកអគ្គរាជទូតនៃព្រះរាជាណាចក្រកម្ពុជា ប្រចាំនៅប្រទេសចិនរួមទាំងសហការីស្ថានទូតជាច្រើននាក់ទៀត ក៏បានអញ្ជើញមកទទួលស្វាគមន៍ដំណើរ ទស្សនកិច្ចរបស់គណៈប្រតិភូជាន់ខ្ពស់រដ្ឋសភាកម្ពុជាផងដែរ។ នៅរសៀលថ្ងៃទី២៤ ខែកញ្ញា ស្អែកនេះ សម្តេចរដ្ឋសភាធិបតី ប្រធានរដ្ឋសភា នឹងជួបពិភាក្សាការងារជាមួយ ឯកឧត្តម ចាវ ឡឺជី នៅវិមានសភាតំណាងប្រជាជនចិន។ ប្រធានរដ្ឋសភានៃប្រទេសទាំងពីរ នឹងចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការរវាងរដ្ឋសភាប្រទេសទំាងពីរ និងអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងអគ្គលេខាធិការដ្ឋានរដ្ឋសភានៃប្រទេសទំាងពីរផងដែរ។ ឯកសារទាំងពីរនេះ នឹងផ្តល់លទ្ធភាពកាន់តែទូលំទូលាយថែមទៀត ដល់ការផ្លាស់ប្តូរដំណើរទស្សនកិច្ចនិងការចែករំលែកបទពិសោធន៍ការងារពីគ្នាទៅវិញទៅមកនៅគ្រប់កម្រិតរវាងសភាប្រទេសទំាងពីរ។ បន្ទាប់ពីបញ្ចប់ទស្សនកិច្ចនៅរដ្ឋធានីប៉េកំាង គណៈប្រតិភូជាន់ខ្ពស់រដ្ឋសភាកម្ពុជា នឹងបន្តដំណើរទស្សនកិច្ចទៅកាន់ទីក្រុងសៀងហៃ ដែលនៅទីនោះ សម្តេចរដ្ឋសភាធិបតី ឃួន សុដារី នឹង អញ្ជើញជួបពិភាក្សាការងារជាមួយ ឯកឧត្តម ឈិន ជីនីង (Chen Jining) លេខាធិការនៃគណៈកម្មាធិការគណបក្សកុម្មុយនីស្តចិន ប្រចាំទីក្រុងសៀងហៃ និងភាគីមិត្តចិនមួយចំនួនទៀត៕

ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ បន្តចុះពិនិត្យព្យាបាលភ្នែកជូនប្រជាពលរដ្ឋក្នុងក្រុងពោធិ៍សាត់

រថយន្តវះកាត់ចល័ត រួមនិងក្រុមគ្រូពេទ្យភ្នែកស្ម័គ្រចិត្តឯកឧត្ដម កែវ រតនៈ ដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ បានបន្តធ្វើការចុះពិនិត្យព្យាបាលភ្នែក វាស់ភ្នែក វះកាត់បកភ្នែក និងកន្ទុយថ្លែន ផ្តល់ថ្នាំភ្នែក និងផ្តល់វ៉ែនតា ដោយឥតគិតប្រាក់ ជូនបងប្អូនប្រជាពលរដ្ឋ និងព្រះសង្ឃក្នុងក្រុងពោធិ៍សាត់ ក្រោមកិច្ចសហការសម្របសម្រួលដោយឯកឧត្តម ខូយ រីដា ប្រធានគណៈកម្មាធិការគណបក្សប្រជាជនកម្ពុជាខេត្តពោធិ៍សាត់ និងជាប្រធានក្រុមការងារគណបក្សចុះមូលដ្ឋានក្រុងពោធិ៍សាត់ ។ កម្មវិធីពិនិត្យព្យាបាលភ្នែកនេះត្រូវបានរៀបចំឡើងនៅបរិវេណទីស្នាក់ការគណបក្សប្រជាជនកម្ពុជាខេត្តពោធិ៍សាត់ រយៈ១ថ្ងៃពេញ ដោយបានធ្វើការពិនិត្យ និងផ្តល់វ៉ែនតាជូនដល់ប្រជាពលរដ្ឋបានចំនូន២១៦២នាក់ ហើយធ្វើការផ្តល់ថ្នាំព្យាបាលភ្នែកជូនប្រជាពលរដ្ឋបានចំនួន៨៦៤នាក់ ជាមួយគ្នានោះបានធ្វើការវះកាត់បកបាយភ្នែកនៅទីតាំងផ្ទាល់បានចំនួន៩នាក់ និងវះកាត់កន្ទុយថ្លែនភ្នែកបានចំនួន៣នាក់ ព្រមទាំងបានរកឃើញអ្នកមានជំងឺបាយភ្នែកត្រៀមវះកាត់លើកក្រោយចំនួន២៨នាក់ ក្នុងនោះមានករណីពិសេសចំនួន៥នាក់ ត្រូវអន្តរាគមន៍បញ្ជូនទៅវះកាត់បន្ទាន់នៅមន្ទីរពេទ្យមិត្តភាពខ្មែរសូវៀតក្រុងភ្នំពេញ ។ឯកឧត្តម ខូយ រីដា មានប្រសាស៍លើកឡើងថា ក្រុមគ្រូពេទ្យភ្នែកស្ម័គ្រចិត្ត ចុះមកពិនិត្យនិងព្យាបាលភ្នែកជូនប្រជាពលរដ្ឋដោយឥតគិតប្រាក់ក្នុងពេលនេះគឺជាសកម្មភាពមនុស្សធម៌ ដែលបានផ្តួចផ្តើមឡើងដោយឯកឧត្តម កែវ រតនៈ ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ ដែលជាការយកចិត្តទុកដាក់លើសុខមាភាពរបស់ប្រជាពលរដ្ឋក្នុងមូលដ្ឋានខេត្តពោធិ៍សាត់និងក្នុងគោលបំណងដើម្បីរួមចំណែកកាត់បន្ថយការចំណាយនិងការលំបាកនានារបស់ប្រជាពលរដ្ឋជាពិសេសប្រជាពលរដ្ឋដែលមានជីវភាពខ្សត់ខ្សោយ ។ ហើយឯកឧត្តម សូមថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ ដែលបានដឹកនាំក្រុមគ្រូពេទ្យភ្នែកស្ម័គ្រចិត្តជាច្រើនរូប លះបង់ទាំងថវិកា កំលាំងកាយចិត្ត និងពេលវេលាផ្ទាល់ខ្លួន ចុះមកពិនិត្យព្យាបាលភ្នែក វះកាត់ជួយសង្គ្រោះភ្នែក ផ្តល់ទាំងថ្នាំនិងវ៉ែនតា ជូនប្រជាពលរដ្ឋក្នុងក្រុងពោធិ៍សាត់ ក៏ដូចជាតាមបណ្តាស្រុកនានាទូទាំងខេត្តពោធិ៍សាត់ជាច្រើនលើកច្រើនសារដោយមិនគិតប្រាក់តាំងតែពីឆ្នាំ២០២៣ រហូតដល់ពេលនេះ ហើយដោយមើលឃើញពីតម្រូវការជាក់ស្តែង និងតបតាមសំណូមពរពីប្រជាពលរដ្ឋ ក្រុមការងារចុះមូលដ្ឋានក្រុងពោធិ៍សាត់ និងបន្តសហការជាមួយក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ ធ្វើការចុះមកពិនិត្យព្យាបាលភ្នែកជូនបងប្អូនប្រជាពលរដ្ឋក្នុងក្រុងពោធិ៍សាត់ជាបន្តបន្ទាប់ទៀត ។គួរឱ្យដឹងដែរថាក្នុងឆ្នាំ២០២៤នេះ ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ ដឹកនាំដោយឯកឧត្ដម ជិត ប៉ុណ្ណារ៉ា និងលោកជំទាវ យូ ស្រីលាភ បានចុះមកខេត្តពោធិ៍សាត់ចំនួន៦លើក ដោយពិនិត្យព្យាលបាលភ្នែក ជូនប្រជាពលរដ្ឋបានប្រមាណ១៣៥០០នាក់ ហើយកាលពីឆ្នាំ២០២៣ក្រុមគ្រូពេទ្យភ្នែកស្ម័គ្រចិត្តឯកឧត្តម កែវ រតនៈ បានចុះមកខេត្តពោធិ៍សាត់ចំនួន០៧លើក ដោយធ្វើការពិនិត្យព្យាបាលជូនប្រជាពលរដ្ឋប្រមាណជិត១ម៉ឺននាក់ ក្នុងនោះលោកយាយលោកតាចាស់ជរាជាប្រមាណជិត២០០នាក់ ដែលមានបញ្ហាភ្នែកធ្ងន់ធ្ងរអាចបណ្តាលអោយទៅជាពិការភ្នែក ត្រូវបានក្រុមគ្រូពេទ្យភ្នែកស្ម័គ្រចិត្តធ្វើការវះកាត់ជួយសង្គ្រោះបានយ៉ាងជោគជ័យផងដែរ ៕

ឯកឧត្តម ចាន់ យុត្ថា ចុះពិនិត្យវឌ្ឍនភាពគម្រោងពង្រីកសមត្ថភាពស្រោចស្រព និងការពារទឹកជំនន់នៃប្រព័ន្ធធារាសាស្ត្រព្រែកអូរដំរីឆ្លង-ព្រែកថ្មី ក្នុងខេត្តស្វាយរៀង

ភ្នំពេញ៖ នៅព្រឹកថ្ងៃទី២១ ខែកញ្ញា ឆ្នាំ២០២៤ នេះ ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជានាយកគម្រោងបានដឹកនាំក្រុមការងារបច្ចេកទេសក្រសួង និងមន្ទីរធនធានទឹក និងឧតុនិយមខេត្តស្វាយរៀងចុះពិនិត្យវឌ្ឍនភាពគម្រោងស្តារពង្រីកសមត្ថភាពស្រោចស្រព និងការពារទឹកជំនន់នៃប្រព័ន្ធធារាសាស្រ្តព្រែកអូរដំរីឆ្លង-ព្រែកថ្មី ស្ថិតក្នុងឃុំថ្មី ឃុំរាជមន្ទីរ និងឃុំបន្ទាយក្រាំង ស្រុកកំពង់រោទិ៍ ខេត្តស្វាយរៀង។ឯកឧត្តមរដ្ឋលេខាធិការបានបញ្ជាក់ឱ្យដឹងថា ការងារសំខាន់ៗរបស់គម្រោងរួមមាន៖ ទី១)ស្តារព្រែកធម្មជាតិអូរដំរីឆ្លងប្រវែង ៨,២៨៧គីឡូម៉ែត្រ ទី២)ស្តារព្រែកធម្មជាតិព្រែកថ្មីប្រវែង ១២,៦០០គីឡូម៉ែត្រ ទី៣)ស្តារប្រឡាយមេប្រវែង ៤,៨៧៦គីឡូម៉ែត្រ ទី៤)កសាងផ្លូវក្រាលក្រួសក្រហមអមសងខាងព្រែកអូរដំរីឆ្លង ប្រឡាយមេ ព្រែកថ្មី ទី៥)ជួសជុលនិងសាងសង់ស្ពានឆ្លងព្រែកអូរដំរីឆ្លង និងព្រែកថ្មីចំនួន ១០កន្លែង ទី៦)ជួសជុលនិងសាងសង់សំណង់សិល្បការ្យតភ្ជាប់ពីប្រឡាយមេព្រែកថ្មីទៅប្រឡាយស្រោចស្រពចំនួន ៥០កន្លែង និង ទី៧)សាងសង់អគារសហគមន៍សម្រាប់ការគ្រប់គ្រង និងថែទាំប្រព័ន្ធធារាសាស្ត្រ។ បើគិតមកដល់ពេលនេះវឌ្ឍនភាពការងារសម្រេចបានប្រមាណ ៥៤%។សូមបញ្ជាក់ថា គម្រោងពង្រីកសមត្ថភាពស្រោចស្រព និងការពារទឹកជំនន់នៃប្រព័ន្ធធារាសាស្ត្រព្រែកអូរដំរីឆ្លង-ព្រែកថ្មី ដែលចាប់អនុវត្តពីខែមិថុនា ឆ្នាំ២០២៤ ហើយគ្រោងនឹងបញ្ចប់នៅខែមិថុនា ឆ្នាំ២០២៥ មានសក្តានុពលបង្កើនការស្រោចស្រពលើផ្ទៃដីបានប្រមាណ ១៦ ២០០ហិកតា និងមានប្រជាពលរដ្ឋទទួលផលប្រមាណ ៣៧២៧គ្រួសារ៕

កម្ពុជា ជោគជ័យក្នុងការនាំចេញនាំផលិតផលគ្រាប់ស្វាយចន្ទីជាលើកដំបូងទៅកាន់ទីផ្សារខេត្តហឺណាន នៃប្រទេសចិន

បន្ទាប់ពីឆ្លងកាត់កិច្ចប្រជុំប្រកបដោយផ្លែផ្កាចំនួន២លើក ក្នុងខែកក្កដា និងខែសីហា ជុំវិញកិច្ចសហប្រតិបត្តិការលើវិស័យឧស្សាហកម្មដំណាំ កម្ពុជា-ចិន រវាងមន្រ្តីក្រសួងជំនាញពាក់ព័ន្ធរបស់រាជរដ្ឋាភិបាលកម្ពុជា (មានក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ) ក្រុមហ៊ុនដឹកជញ្ជូនតាមផ្លូវអាកាស (Cambodia Angkor Air) និងភាគីអ្នកបញ្ជាទិញ (Jian Yu Zhou Heng Trading) កម្ពុជា បានសម្រេចជោគជ័យក្នុងការនាំចេញផលិតផលគ្រាប់ស្វាយចន្ទីជាលើកដំបូង ចំនួន២តោន នៃផលិតផលគ្រាប់ស្វាយចន្ទីដែលបានបញ្ជាទិញចំនួន ២០០តោន/ឆ្នាំ ទៅកាន់ខេត្តហឺណាន ប្រទេសចិន។សមិទ្ធិផលនេះ គឺកើតចេញពីកិច្ចខំប្រឹងប្រែងរបស់ក្រុមការងារមន្ត្រីជំនាញនៃក្រសួងកសិកម្មរុក្ខាប្រមាញ់ និងនេសាទ ក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ ដោយការដាចេញគោលនយោបាយ ការណែនាំ និងដោយមានការអនុវត្តតាមដោយយ៉ាងយកចិត្តដាក់ពីសំណាក់ក្រុមហ៊ុនពាក់ព័ន្ធ ដើម្បីឱ្យស្របតាមភូគាមសុវត្ថិភាព គុណភាព និងអនាម័យ ឬការតម្រូវរបស់រដ្ឋាភិបាលចិន ឬពីសំណាក់អ្នកបញ្ជាទិញក្នុងប្រទេសចិន។ ឯកឧត្តមបណ្ឌិត ងិន ឆាយ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទបញ្ជាក់ថា រយៈពេល៨ខែ ក្នុងឆ្នាំ២០២៤នេះ កម្ពុជាបាននាំចេញគ្រាប់ស្វាយចន្ទីចំនួន ៥៦ម៉ឺនតោនទៅកាន់ទីផ្សារក្រៅប្រទេសរួចហើយ។ សម្រាប់ការនាំចេញគ្រាប់ស្វាយចន្ទីចំនួន ២តោនលើកទីមួយ នៅថ្ងៃទី២២ ខែកញ្ញានេះតាមផែនការមានគម្រោងនាំចេញទៅចំនួន ២០០តោនក្នុង១ឆ្នាំទៅកាន់ខេត្តហឺណាន ប្រទេសចិន។

បណ្ដាញសង្គម

ព័ត៌មានថ្មីៗ

ហ្វីលីពីន និងអូស្ត្រាលី ចាប់ផ្តើមសមយុទ្ធដ៏ធំបំផុតមិនធ្លាប់មាន នៅជិតសមុទ្រចិនខាងត្បូង

ទីក្រុងគីវ៖ រុស្ស៊ីបាញ់យាន ៨៥គ្រឿង និងមីស៊ីល ១គ្រាប់ លើអ៊ុយក្រែន ប៉ុន្មានម៉ោងក្រោយមានជំនួប Trump-Putin

ផ្ទុះរោងចក្រ នៅតំបន់ Ryazan របស់រុស្ស៊ី បណ្ដាលឲ្យមនុស្ស ១១នាក់ស្លាប់ និង ១៣០នាក់របួស

នាយករដ្ឋមន្ត្រីដាណឺម៉ាក និយាយថា លោក Netanyahu បានប្រែទៅជាបង្ក «បញ្ហាដោយខ្លួនលោកផ្ទាល់»

មេដឹកនាំអឺរ៉ុបស្វាគមន៍កិច្ចប្រឹងប្រែងរបស់លោក Trump ប៉ុន្តែបញ្ជាក់ថា សម្ពាធលើរុស្ស៊ី ត្រូវតែមានបន្ត

[UPDATE] ក្រុមអ្នកជួយសង្គ្រោះប៉ាគីស្ថាន ពិបាកស្រង់សាកសព ក្រោយភ្លៀងរដូវមូសុង សម្លាប់មនុស្សយ៉ាងតិច ៣២០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877