BTV NEWS

តំណាងថ្មីរបស់កម្មវិធីអភិវឌ្ឍន៍សហប្រជាជាតិប្រចាំកម្ពុជា លោក អេនរីកូ ហ្គាវេលីយ៉ា ប្តេជ្ញាគាំទ្រកម្ពុជាក្នុងការអភិវឌ្ឍប្រកបដោយបរិយាបន្ន

ក្រសួងការងារ លើកទឹកចិត្តឱ្យនិស្សិតជ័យលាភីអាហារូបករណ៍បារាំង ថ្នាក់បរិញ្ញាបត្រជាន់ខ្ពស់ ក្លាយជាធនធានសក្តានុពល និងជាបេសកជនបន្តពង្រឹងទំនាក់ទំនងរវាងកម្ពុជា និងបារាំង

ជនសង្ស័យ៤នាក់ ត្រូវបានកម្លាំងកងទ័ពចាប់ខ្លួនភ្លាមៗ ក្រោយពួកគេព្យាយាមដឹកកូនត្រីខុសច្បាប់ក្នុងរដូវបិទនេសាទទៅលក់បន្តអោយឈ្មួញ

កាកបាទក្រហមកម្ពុជា សហការជាមួយប្រតិភូ ICRC ចុះធ្វើការងាររួមគ្នាលើចំណុចសំខាន់ចំនួន៤ នៅតាមព្រំដែនកម្ពុជា-ថៃ

ព័ត៌មានជាតិ

ព្រះរាជពិធីសម្ពោធវិមានរដ្ឋធម្មនុញ្ញនឹងប្រព្រឹត្តទៅនៅថ្ងៃទី២៤កញ្ញា ស្អែកនេះ

វិមានរដ្ឋធម្មនុញ្ញ ជាសំណង់និមិត្តរូបនៃរដ្ឋធម្មនុញ្ញ និងជាបេតិកភណ្ឌជាតិដ៏វិសេសវិសាលមួយ កសាងឡើងក្នុងសម័យកាលដ៏រុងរឿង នៃសម្ដេចអគ្គមហាសេនាបតីតេជោ ហ៊ុន សែន។ វិមានរដ្ឋធម្មនុញ្ញ ត្រូវបានបញ្ចុះបឋមសិលាសាងសង់ កាលពីថ្ងៃទី ១២ ខែមិថុនា ឆ្នាំ ២០២៣ ដោយប្រើពេលសាងសង់ប្រមាណ១៥ខែ។ ស្ថាបត្យកម្ម នៃសំណង់បេតិកភណ្ឌជាតិ ស្ថាបត្យករ បានធ្វើសំយោគបញ្ចូលក្នុងសិល្បៈស្ថាបត្យកម្ម ញ៉ាំងឱ្យគ្រប់ផ្នែកនៃសំណង់នេះផ្សារភ្ជាប់ដោយខ្លឹមសារនៃរដ្ឋធម្មនុញ្ញ។ ស្ថាបត្យករបានរចនានូវវិមានមួយក្នុងទិដ្ឋភាព បដិរូបកម្ម ដោយការនាំយកទស្សនៈធម្មនុញ្ញនិយម មកមូលសង្ខេបនៅលើសំណង់ស្ថាបត្យ កម្មដ៏កម្រមួយ ក្នុងសណ្ឋានជារូបភាពសំយោគរវាង ១៖ ស្ថាបត្យកម្មក្រិករ៉ូម៉ាំង សម្ដែងនូវ និមិត្តរូបនៃគុណតម្លៃទំនើប និង២៖ ស្ថាបត្យកម្មខ្មែរបុរាណសម្ដែងនូវនិមិត្តរូបនៃគុណតម្លៃខ្មែរ ដែលគុណតម្លៃទាំងពីរនេះ មានចារឹកទុកក្នុងរដ្ឋធម្មនុញ្ញឆ្នាំ១៩៩៣ នៃព្រះរាជាណាចក្រកម្ពុជា។ ព្រះរាជពិធីសម្ពោធវិមានរដ្ឋធម្មនុញ្ញនឹងប្រព្រឹត្តទៅនៅថ្ងៃទី២៤ ខែកញ្ញា ឆ្នាំ២០២៤។រូបភាព ពីឯកឧត្តម លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារសាងសង់

សេវាករ ប្រតិបត្តិករ អាជីវករ ៤វិស័យក្នុងខេត្តកំពង់ឆ្នាំង ទទួលការបណ្តុះបណ្តាលអំពីការផ្តល់សេវានៅអង្គភាពច្រកចេញចូលតែមួយ និងការផ្តល់សេវាតាមប្រព័ន្ធអនឡាញ

ដើម្បីចូលរួមក្នុងការអនុវត្តគោលនយោបាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នៅថ្ងៃទី២៣ ខែកញ្ញា ឆ្នាំ២០២៤នេះ អង្គភាពច្រកចេញចូលតែមួយរបស់សាលាខេត្តកំពង់ឆ្នាំង បានបណ្តុះបណ្តាលសេវាករ ប្រតិបត្តិករ និងអាជីវករចំនួន៤វិស័យក្នុងខេត្តកំពង់ឆ្នាំង អំពីការផ្តល់សេវានៅអង្គភាពច្រកចេញចូលតែមួយ និងការផ្តល់សេវាតាមប្រព័ន្ធអនឡាញ ក្នុងការលើកកម្ពស់នៃការផ្តល់សេវារដ្ឋបាលស្របតាមគោលការណ៍ និងនីតិវិធីដែលមានលក្ខណៈសាមញ្ញ ឆាប់រហ័ស តម្លាភាព គណនេយ្យភាព ភាពជឿទុកចិត្ត និងគ្មានអំពើពុករលួយ។លោកស្រី ផល នីវៀរ៉ា អនុប្រធានច្រកចេញចូលតែមួយសាលាខេត្តកំពង់ឆ្នាំង បានអោយដឹងថា៖ កម្មវិធីនេះ មានភាពងាយស្រួលដល់ប្រជាពលរដ្ឋក្នុងការស្នើសុំសេវារដ្ឋបាលពីវិស័យចំនួន៤ ដូចជាវិស័យឧស្សាហកម្ម និងសិប្បកម្ម, កសិកម្ម រុក្ខាប្រម៉ាញ់ និងនេសាទ, វប្បធម៌ និងវិចិត្រសិល្បៈ, និងវិស័យទេសចរណ៍ តាមរយៈប្រព័ន្ធអនឡាញដោយមិនចាំបាច់ធ្វើដំណើរមកកាន់អង្គភាពច្រកចេញចូលតែមួយដោយផ្ទាល់នោះទេ។ ក្រៅពីការផ្តល់សេវាលើវិស័យទាំង៤នេះ អង្គភាពនៅមានការផ្តល់សេវារដ្ឋបាលពីវិស័យចំនួន១០ផ្សេងទៀតផងដែរ ធ្វើយ៉ាងណាលើកកម្ពស់នៃការផ្តល់សេវារដ្ឋបាលស្របតាមគោលការណ៍ និងនីតិវិធីដែលមានលក្ខណៈសាមញ្ញ ឆាប់រហ័ស តម្លាភាព គណនេយ្យភាព ភាពជឿទុកចិត្ត និងគ្មានអំពើពុករលួយ តាមគោលនយោបាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល។លោក ឈឹម វុទ្ធា អភិបាលរងខេត្តកំពង់ឆ្នាំងបានថ្លែងថា ការប្រើប្រាស់កម្មវិធីស្នើសុំសេវាតាមប្រព័ន្ធអនឡាញនេះ ហាក់ដូចជាថ្មីសម្រាប់អ្នកមកទទួលសេវា និងអ្នកស្នើសុំសេវា ដែលទាមទារឱ្យមានការផ្សព្វផ្សាយ និងបណ្តុះបណ្តាលពង្រឹងសមត្ថភាពបន្ថែម។ ថ្ងៃនេះ អង្គភាពច្រកចេញចូលតែមួយនៃរដ្ឋបាលខេត្តកំពង់ឆ្នាំង បានរៀបចំវគ្គបណ្ដុះបណ្ដាលនេះឡើង ដើម្បីឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល ដំណាក់កាលទី១ នីតិកាលទី៧ ។ លើកកម្ពស់អភិបាលកិច្ចល្អក្នុងការផ្តល់សេវា និងការអភិវឌ្ឍសេដ្ឋកិច្ចនៅរដ្ឋបាលថ្នាក់ក្រោមជាតិ តាមរយៈការពង្រឹងតួនាទីភារកិច្ចក្នុងការទទួល និងការសម្រុះសម្រួលដោះស្រាយបណ្តឹងនៅក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅរដ្ឋបាលថ្នាក់ក្រោមជាតិ៕ កាំង ហុងវាស្នា

សហគ្រិនក្នុងស្រុកចាប់អារម្មណ៍ការប្រើប្រាស់បញ្ញាសិប្បនិម្មិត AI សម្រាប់ការធ្វើអាជីវកម្ម

សហគ្រិនក្នុងស្រុកកំពុងចាប់អារម្មណ៍ និងធ្វើការស្វែងយល់ លើការប្រើប្រាស់បញ្ញាសិប្បនិម្មិត AI, ដែលជាប្រព័ន្ធបច្ចេកវិទ្យាអាច ជួយដំណោះស្រាយនូវរាល់បញ្ហាផ្សេងៗ ដើម្បីចាប់យកការប្រើប្រាស់ប្រព័ន្ធមួយនេះ ជំរុញលើកកម្ពស់នៅក្នុងដំណើរការធ្វើអាជីវកម្ម របស់ពួកគាត់។ប្រព័ន្ធបច្ចេកវិទ្យាឌីជីថល បាននិងកំពុងដើរឆ្ពោះទៅមុខយ៉ាងលឿន និងជាកាតាលីករថ្មីដ៏មានសារៈសំខាន់ ដែលមានសក្តានុ ពល និងមានកាលានុវត្តន៍ភាព ក្នុងការជំរុញកំណើនសេដ្ឋកិច្ច និងសង្គម បច្ចុប្បន្នប្រព័ន្ធបច្ចេកវិទ្យាឌីជីថល ត្រូវបានរាជរដ្ឋាភិបាល ក្នុងនីតិកាលទី៧ នៃសភា បានដាក់ចេញសម្រាប់ការអភិវឌ្ឍសេដ្ឋកិច្ច និងសង្គមឌីជីថល។ ស្របតាមផែនការសកម្មភាពខាងលើ សមាគមអភិវឌ្ឍន៍សង្គមខ្មែរ នៅថ្ងៃទី២២ ខែកញ្ញា ឆ្នាំ២០២៤នេះ បានចុះអនុស្សាណៈយោគយល់គ្នារវាង សមាគមអភិវឌ្ឍន៍ សង្គមខ្មែរ និងស្ថាប័ន DG ACADEMY ដើម្បីជំរុញផ្សព្វផ្សាយ និងការបង្កើនសមត្ថភាព នៃការធ្វើអាជីវកម្មនៅក្នុងយុគសម័យឌីជីថល ជូនដល់សមាជិក-សមាជិការបស់សមាគម។ជុំវិញបច្ចេកវិទ្យា AI នេះ, សហគ្រិនក្នុងស្រុក ដែលជាម្ចាស់សហគ្រាសធុនតូច និងមធ្យម បានថ្លែងនូវការចាប់អារម្មណ៍យ៉ាង ខ្លាំង អំពីអត្ថប្រយោជន៍នៃប្រព័ន្ធបញ្ញាសិប្បនិម្មិត AI ដែលបញ្ហានេះពួកគាត់នឹងពង្រឹងចំណេះដឹងលើការប្រើប្រាស់ប្រព័ន្ធមួយនេះ សម្រាប់ការរៀបចំផែនការសកម្មភាពនៅក្នុងកិច្ចដំណើរការអាជីវកម្ម ក៏ដូចជាការប្រើប្រាស់ AI សម្រាប់ផ្សព្វផ្សាយផលិតផលជាដើម ដើម្បីជំរុញលើកកម្ពស់ការធ្វើអាជីវកម្មរបស់ពួកគាត់ឱ្យកាន់តែប្រសើរ ដែលជាផ្នែកមួយចូលរួមលើកកម្ពស់វិស័យការងារ និងកំណើន សេដ្ឋកិច្ចក្នុងស្រុក។ទាក់ទិនអាជីវកម្មនេះ, ឯកឧត្តម ស្វាយ សុវណ្ណរិទ្ធ ប្រធានសមាគមអភិវឌ្ឍន៍សង្គមខ្មែរ លើកឡើងថា ជុំវិញបេសកម្មរបស់ សមាគម គឺបានបង្កើតឡើងដើម្បីចូលរួមជាមួយរាជរដ្ឋាភិបាល ក្នុងការអភិវឌ្ឍទាំងសមត្ថភាព ពង្រីកនិងពង្រឹងអភិវឌ្ឍសេដ្ឋកិច្ចគ្រួសារ របស់បងប្អូនដែលជាសមាជិក និងប្រជាពលរដ្ឋទូទៅ។ បញ្ហានេះ សមាគមតែងតែបង្កើតនូវសកម្មភាពជាច្រើន និងការស្វែងរកនូវគំនិត ថ្មីៗ ដើម្បីជួយទៅដល់ពួកគាត់ ជាក់ស្តែង, ការចុះអនុស្សាណៈយោគយល់គ្នារវាងសមាគមអភិវឌ្ឍន៍សង្គមខ្មែរ និងស្ថាប័ន DG ACADEMY នេះ គឺដើម្បីពង្រីកចំណេះដឹងជូនដល់ពួកគាត់បន្ថែម បានស្វែងយល់អំពីអត្ថប្រយោជន៍ AI និងការចាប់យក AI សម្រាប់ ការជួយដល់ការធ្វើអាជីវកម្ម ដែលជាផ្នែកមួយក្នុងការជួយលើកកម្ពស់ ការធ្វើអាជីវកម្មរបស់ពួកគាត់ឱ្យកាន់តែប្រសើរ។ជុំវិញ Ai នេះ, លោក ហិន សុភាព នាយកប្រតិបត្តិ DG ACADEMY បានលើកឡើងក្នុងបទបង្ហាញនូវចំណុចសំខាន់ៗជាច្រើន ជូនដល់ថ្នាក់ដឹកនាំ និងសមាជិកសមាជិករបស់សមាគម បានស្វែងយល់អំពីអត្ថប្រយោជន៍ នៃប្រព័ន្ធវិទ្យាបញ្ញាសិប្បនិម្មិត AI ដែលជា ប្រព័ន្ធមួយអាចជួយដោះស្រាយបញ្ហារបស់មនុស្ស និងធ្វើសកម្មភាពដូចមនុស្ស។ ដូច្នេះ Ai អាចធ្វើឲ្យយើងទទួលបានផលប្រយោជន៍ មានទំនាក់នងកាន់តែកាន់តែល្អ និងធ្វើឲ្យកិច្ចការងារ រួមជាមួយសកម្មភាពអាជីវកម្មកាន់តែរលូន៕ អត្ថបទ៖ សុន រ៉ាឌី

ឯកឧត្តម ស៊ុន ចាន់ថុល អញ្ជើញជាអធិបតីពិធីចុះហត្ថលេខាលើអនុស្សារណៈនៃការយោគយល់គ្នារវាង សហព័ន្ធស្រូវអង្ករកម្ពុជា និងក្រុមហ៊ុន Otis McAllister Inc.

សាន់ហ្វ្រាន់ស៊ីស្កូ៖ នាព្រឹកថ្ងៃអាទិត្យ ទី២២ ខែកញ្ញា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជាអធិបតី ក្នុងពិធីចុះហត្ថលេខាលើអនុស្សារណៈនៃការយោគយល់គ្នា រវាងសហព័ន្ធស្រូវអង្ករកម្ពុជា តំណាងដោយ ឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធ ជាមួយនិងក្រុមហ៊ុន Otis McAllister Inc. តំណាងដោយ លោក Patrick Murphy អនុប្រធានប្រតិបត្តិទទួលបន្ទុកផ្នែកបញ្ជាទិញអង្ករ និងគ្រាប់ធញ្ញជាតិ។អនុស្សារណៈដែលបានចុះហត្ថលេខានាឱកាសនេះ គឺជាមូលដ្ឋានគ្រឹះសម្រាប់កិច្ចសហការនាពេលអនាគត ដើម្បីពង្រឹងកិច្ចសហប្រតិបត្តិការអាជីវកម្ម និងលើកកម្ពស់បន្ថែមទៀតនូវបរិមាណអង្ករកម្ពុជា នៅក្នុងទីផ្សារសហរដ្ឋអាមេរិក។ក្នុងនោះដែរ សហព័ន្ធស្រូវអង្ករកម្ពុជា នឹងផ្តល់ជូននូវប្រភេទអង្ករដែលមានគុណភាពខ្ពស់ រួមមាន៖ អង្ករផ្កាម្លិះកម្ពុជា អង្ករសែនក្រអូបប្រភេទ SKO និង SRO ក៏ដូចជាអង្ករខ្សាយមួយចំនួនទៀត ជាមួយនឹងតម្លៃប្រកួតប្រជែង និងធានាការដឹកជញ្ជូនទាន់ពេលវេលា។ បន្ទាប់ពីការចុះអនុស្សារណៈនៃការយោគយល់គ្នានេះ វត្តមានអង្ករក្រោមស្លាកសញ្ញា "ផលិតនៅប្រទេសកម្ពុជា" រំពឹងថានឹងមានចំនួនកាន់តែច្រើនឡើងនៅក្នុងសហរដ្ឋអាមេរិក ជាពិសេស ក្នុងចង្កោមអាជីវកម្មផ្សារទំនើបខ្នាតយក្សដូចជា Costco និង WallMart ជាដើម។សូមបញ្ជាក់ថា ជុំវិញការនាំចេញអង្ករ នៅក្នុងឆ្នាំ ២០១០ កម្ពុជាបានពង្រីកគោលដៅ ទីផ្សារនាំចេញមានពីចំនួន ៣៥ គោលដៅ និងគិតមកដល់ឆ្នាំ ២០២៣ មានចំនួន ១២១ គោលដៅ ដោយក្នុងនោះ បានកំពុងធ្វើឱ្យអង្ករកម្ពុជាទទួលស្គាល់ពេញពិភពលោក, ជាក់ស្តែងនៅក្នុងរយៈពេល ៨ ខែ ឆ្នាំ២០២៤ នេះ អង្ករកម្ពុជាបាននាំចេញ មានចំនួន ១១២ ពាន់តោន និងស្រូវ មានចំនួន ៣,៣ លានតោន៕

កម្ពុជាកំពុងខិតខំយ៉ាងសកម្មលើការធានាថាកុមារមានសុវត្ថិភាពនៅគ្រប់កន្លែង ទាំងនៅផ្ទះសាលារៀន និងក្នុងសហគមន៍

លោកជំទាវ ញ៉េប សុភាព រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា អំពើហិង្សាលើកុមារ គឺជាបញ្ហាសកលដែលបង្កផលវិបាកធ្ងន់ធ្ងរស្ទើរ ពេញមួយជីវិតដល់សង្គមជាតិ។ អំពើហិង្សាលើកុមារ គឺជាសកម្មភាពដែលមិនអាចអត់ឱនបាន ទោះនៅក្នុងរូបភាពណាក៏ដោយ ព្រោះថាអំពើហិង្សាធ្វើឱ្យប៉ះពាល់ដល់ការអភិវឌ្ឍរបស់កុមារ សីលធម៌សង្គម សេចក្តីថ្លៃថ្នូរ និង ការអភិវឌ្ឍធនធានមនុស្សនាពេលអនាគត។ក្នុងទិសដៅទប់ស្កាត់បញ្ហានេះ រាជរដ្ឋាភិបាលកម្ពុជា បានផ្តល់សច្ចាប័នលើអនុសញ្ញាអន្តរជាតិ ស្តីពីសិទ្ធិកុមារ និងពិធីសារបន្ថែម ព្រមទាំងកិច្ចព្រមព្រៀងអន្តរជាតិនានា ដើម្បីការពារឧត្តមប្រយោជន៍របស់កុមារ។លោកជំទាវបន្តថា រាជរដ្ឋាភិបាលកម្ពុជា ក្រោមការដឹកនាំដោយសម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រី នៅបន្តយកចិត្តទុកដាក់ខ្ពស់ និងពង្រឹងប្រសិទ្ធភាពលើការអនុវត្តច្បាប់ គោលនយោបាយ និងលិខិតបទដ្ឋានគតិយុត្តពាក់ព័ន្ធដែលមានស្រាប់ និងបន្តបង្កើតថ្មីសំដៅធ្វើឱ្យសុខុមាលភាព កិច្ចការពារ និងការអភិវឌ្ឍន៍កុមារកាន់តែប្រសើរឡើង។ ហេតុនេះហើយការយកចិត្តទុកដាក់ចំពោះសុខុមាលភាព សុវត្ថិភាព និងការអភិវឌ្ឍកុមារ គឺជាគ្រឹះ ដ៏សំខាន់ក្នុងការកសាងមូលធនមនុស្សប្រកបដោយសក្តានុពលសម្រាប់ការអភិវឌ្ឍកម្ពុជានាពេលអនាគត ទន្ទឹមនឹងសេចក្តីព្រាងច្បាប់ស្តីពីកិច្ចការពារកុមារ និងផែនការសកម្មភាពជាតិដើម្បីទប់ស្កាត់ និងឆ្លើយតបចំពោះ អំពើហិង្សាលើកុមារ បាននិងកំពុងតាក់តែងជាសេចក្តីព្រាង។ជាក់ស្តែង កម្ពុជាបានរៀបចំ និងដាក់ ឱ្យអនុវត្តនូវគោលនយោបាយ និងផែនការជាបន្តបន្ទាប់ ដូចជា ផែនការសកម្មភាពដើម្បីទប់ស្កាត់ និងឆ្លើយតប ចំពោះអំពើហិង្សាលើកុមារឆ្នាំ២០១៧-២០២១, ផែនការសកម្មភាពដើម្បីបង្ការទប់ស្កាត់ និងឆ្លើយតបចំពោះ ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញឆ្នាំ២០២១-២០២៥ គោលនយោបាយស្តីពីកិច្ចការពារ កុមារនៅសាលារៀន ក្របខណ្ឌគោលនយោបាយជាតិគាំពារសង្គមឆ្នាំ២០១៦-២០២៥ និងគោលនយោបាយជាតិ ស្តីពីប្រព័ន្ធកិច្ចការពារកុមារឆ្នាំ២០១៩-២០២៩ ជាដើម ដើម្បីឈានទៅសម្រេចឱ្យបាននូវការបញ្ចប់អំពើ ហិង្សាលើកុមារ។សូមជម្រាបថា លោកជំទាវ ញ៉េប សុភាព រដ្ឋលេខាធិការ ក្រសួងសង្គមកិច្ចបាន ថ្លែងបែបនេះ គឺក្នុងកិច្ចប្រជុំពិគ្រោះយោបល់ ស្តីពីការរៀបចំឯកសារការប្តេជ្ញាចិត្តរបស់ រាជរដ្ឋាភិបាលកម្ពុជា ដើម្បីបញ្ចប់អំពើហិង្សាលើកុមារ នៅសណ្ឋាគារសាន់ អេន ម៉ូន រាជធានីភ្នំពេញ ថ្ងៃទី២៣ ខែកញ្ញា ឆ្នាំ២០២៤៕

ឯកឧត្តម ហ៊ុន ម៉ានី និងឯកឧត្តម សាយ សំអាល់ អញ្ជើញប្រគល់បណ្ណកម្មសិទ្ធអចលនវត្ថុដល់ប្រជាជន ចំនួន២៤ភូមិ នៃក្រុងឧដុង្គម៉ែជ័យ ខេត្តកំពង់ស្ពឺ

ប្រជាជនចំនួន២៤ភូមិ នៃសង្កាត់វាំងចាស់ សង្កាត់ព្រះស្រែ និងសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ បានទទួលបណ្ណកម្មសិទ្ធអចលនវត្ថុ ដែលប្រគល់ជូនដោយឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ និង ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរោបនីយកម្ម និងសំណង់។ ពិធីខាងលើនេះបានប្រព្រឹត្តទៅនៅថ្ងៃទី២២ ខែកញ្ញា ឆ្នាំ២០២៤ នៅសង្កាត់វាំងចាស់ ក្រុងឧដុង្គម៉ែជ័យ ដោយមានការចូលរួមពីឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា ថ្នាក់ដឹកនាំក្រសួង ក្រុមការងាររាជរដ្ឋាភិបាល ឯកឧត្តមប្រធានក្រុមប្រឹក្សា ឯកឧត្តមអភិបាលខេត្ត មន្រ្តីរាជការជុំវិញខេត្ត ព្រមទាំងប្រជាពលរដ្ឋសរុបប្រមាណ ១២០០នាក់។ ឯកឧត្តមបណ្ឌិត ជាម ចន្ទសោភ័ណ អភិបាលខេត្តកំពង់ស្ពឺ បានថ្លែងអំណរគុណជូនចំពោះឯកឧត្តម ហ៊ុន ម៉ានី និងឯកឧត្តម សាយ សំអាល់ ដែលបានផ្តល់កិត្តិយសដល់អ្នកខេត្តកំពង់ស្ពឺ ក្នុងការចែកបណ្ណកម្មសិទ្ធអចលនវត្ថុជូនដល់ប្រជាពលរដ្ឋដោយផ្ទាល់នាឱកាសនេះ។ មានមតិសំណេះសំណាលជាមួយលោកតា លោកយាយ អ៊ុំពូមីង បងប្អូន ដែលអញ្ជើញមកផ្ទាល់ក្នុងអង្គពិធី ឯកឧត្តម ហ៊ុន ម៉ានី បានសម្តែងនូវក្តីសោមនស្សរីករាយជាមួយបងប្អូនប្រជាពលរដ្ឋដែលទទួលបានបណ្ណកម្មសិទ្ធនាពេលនេះ។ ការចេញបណ្ណកម្មសិទ្ធដល់បងប្អូនប្រជាពលរដ្ឋ គឺជាអាទិភាពមួយរបស់រាជរដ្ឋាភិបាល។ នាឱកាសនោះផងដែរ ឯកឧត្តមបានជំនួសមុខឱ្យប្រជាពលរដ្ឋអ្នកខេត្តកំពង់ស្ពឺធ្វើការថ្លែងអំណរគុណក្រុមការងារក្រសួងរៀបចំដែនដី នគរោបនីយកម្ម និងសំណង់ និងក្រុមការងារថ្នាក់ខេត្ត ដែលបានខិតខំវាស់វែងដីធ្លី និងបំពេញបែបបទសម្រាប់រៀបចំបណ្ណកម្មសិទ្ធជូនប្រជាពលរដ្ឋ ដោយមិនគិតពីពេលយប់ និងថ្ងៃចុងសប្តាហ៍ឡើយ សំដៅធ្វើយ៉ាងណាបង្កលក្ខណៈងាយស្រួលដល់បងប្អូនដែលមានការមមាញឹកក្នុងការងារប្រចាំថ្ងៃ។ដោយឡែក ឯកឧត្តម ក៏បានថ្លែងអំណរគុណដល់ប្រជាពលរដ្ឋទូទាំងប្រទេសដែលបានចូលរួមយ៉ាងច្រើនកុះករក្នុងចលនាជាតិដ៏ធំ តបតាមសេចក្តីអំពាវនាវរបស់សម្តេចមហាបវរធិបតី ហ៊ុន ម៉ាណែត ជាមួយមូលនិធិកសាងហេដ្ឋារចនាសម្ព័ន្ធនៅតាមខ្សែបន្ទាត់ព្រំដែន ដែលសបញ្ជាក់នូវការគាំទ្រ និងជំនឿទុកចិត្តយ៉ាងមុតមាំមកលើរាជរដ្ឋាភិបាលក្នុងការការពារបូរណភាពទឹកដី អធិបតេយ្យជាតិ។ ឯកឧត្តមបានរំលេចថា បើទោះបីជាការចូលរួមជាទំហំតិចក្តី ច្រើនក្តី តែវាបានបង្ហាញនូវទឹកចិត្តដ៏ធំធេងរបស់បងប្អូនដែលស្រលាញ់ជាតិ ស្រលាញ់ទឹកដី។ នៅចុងបញ្ចប់នៃកម្មវិធី ឯកឧត្តមគណៈអធិបតីបានអញ្ជើញចែកបណ្ណកម្មសិទ្ធជានិមិត្តរូបជូនដល់ប្រជាពលរដ្ឋដែលមកទទួលបណ្ណ ប្រកបដោយទឹកមុខសប្បាយរីករាយ ស្ថិតក្នុងបរិយាកាសដ៏ស្និទ្ធស្នាលបំផុត ក្រោមផ្ទៃមេឃរលឹមស្រិចៗ ប្រៀបបានការប្រោះព្រុំពរជ័យពីព្រះភិរុណ៕ អត្ថបទ រដ្ឋា

ថវិកាដែលកើតចេញពីមហាសាមគ្គីរបស់ពលរដ្ឋខ្មែរសម្រាប់កសាងហេដ្ឋារចនាសម្ព័ន្ធតាមព្រំដែនកើនដល់ជាង ២១លានដុល្លារ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបញ្ជាក់ថា រហូតមកដល់ពេលនេះ បងប្អូនប្រជាពលរដ្ឋខ្មែរ ដែលបានចូលរួមបរិច្ចាគថវិកា ដោយស្ម័គ្រចិត្តជាមួយរាជរដ្ឋាភិបាលក្នុងកិច្ចការកសាងហេដ្ឋារចនាសម្ព័ន្ធតាមព្រំដែន គឺមានចំនួនរហូតដល់ជាង ៧០ម៉ឺននាក់ដោយទទួលថវិកាបានចំនួនជាង ២១លានដុល្លារអាមេរិក។តាមរយៈសារពិសេសនាព្រឹកថ្ងៃទី២៣ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានប្រកាសថ្លែងអំណរអរគុណចំពោះទឹកចិត្តដ៏មហាសាមគ្គីរបស់បង ប្អូនប្រជាពលរដ្ឋខ្មែរទាំងក្នុង និងក្រៅប្រទេសដែលបានរួមគ្នាបរិច្ចាគថវិកា ដោយស្ម័គ្រចិត្ត ចូលរួមជាមួយរាជរដ្ឋាភិបាលក្នុងការកសាងនូវហេដ្ឋារចនាសម្ព័ន្ធតាមក្រវ៉ាត់ព្រំដែនចាប់ពីការ ប្រកាសរហូតដល់សព្វថ្ងៃនេះ ខណៈវិភាគទានស្ម័គ្រចិត្តនេះនឹងត្រូវយកទៅកសាង ផ្លូវតាមក្រវ៉ាត់ព្រំដែន។សូមបញ្ជាក់ថា រាជរដ្ឋាភិបាល បានសម្រេចបង្កើត«មូលនិធិកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណងដើម្បីកៀគរថវិកាបន្ថែមសម្រាប់កសាងហេដ្ឋារចនាសម្ព័ន្ធនានា នៅតាមបណ្តោយព្រំដែន ដោយកម្មវិធីមូលនិធិនេះក៏ជាការផ្តល់ឱកាសឲ្យបងប្អូនប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយរាជដ្ឋាភិបាលនៅក្នុងបុព្វហេតុការពារ និងអភិវឌ្ឍន៍ជាតិ ក្នុងស្មារតីសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍនៅតាមតំបន់ព្រំដែនឲ្យបានកាន់តែរឹងមាំ និងប្រកបដោយចីរភាពបន្ថែមទៀត។តាមរយៈសារសំឡេងរបស់សម្តេចធិបតីនាថ្ងៃនេះ សម្តេចបានបញ្ជាក់ថា ក្រុមការងារមូលនិធិនឹងត្រូវបន្តទទួលយកការចូលរួមស្ម័គ្រចិត្តរបស់ជនរួមជាតិទាំងអស់ រហូតដល់ថ្ងៃទី៣១ ខែតុលា ឆ្នាំ២០២៤ខាងមុខនេះ ហើយពេលបិទបញ្ចប់ក្រុមការងារមូលនិធិនឹងជំរាបជូនអំពីទិន្នន័យចុងក្រោយ រួមជាមួយនឹងផែនការច្បាស់លាស់ក្នុងការប្រើប្រាស់នូវមូលនិធិនេះ ដោយឈរលើគោលការណ៍តម្លាភាព និងគណនេយ្យភាព៕ អត្ថបទ៖ បាន ចក់

យុទ្ធនាការមួយខែរបស់KOICA ដើម្បីកម្ពុជាស្អាតសម្រេចបានការចូលរូមពីមនុស្ស ជាង ២០០០០នាក់

ក្នុងឱកាសអបអរសាទរទិវាពិភពលោកសម្អាតបរិស្ថាន ក្រសួងបរិស្ថាន និងទីភ្នាក់ងារសហប្រតិបត្តិការអន្តរជាតិកូរ៉េ (កយកា) បានរៀបចំសិក្ខាសាលាស្តីពី “បច្ចុប្បន្នភាព និងអនាគតនៃបរិស្ថាននៅកម្ពុជា” សិក្ខាសាលានេះបានទទួលស្វាគមន៍អ្នកចូលរួមប្រមាណជា ១៦០នាក់, កាលពីថ្ងៃទី២០ ខែកញ្ញា ឆ្នាំ២០២៤។តាមរយៈសិក្ខាសាលានេះ ក្រសួងបរិស្ថាន បានចែករំលែកអំពីស្ថានភាពបរិស្ថានបច្ចុប្បន្នរបស់កម្ពុជា និងយុទ្ធសាស្ត្រដើម្បីដោះស្រាយបញ្ហាប្រឈមទាំងនោះ។ កម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជាបានបង្ហាញពីកិច្ចសហការបន្តរបស់ខ្លួនក្នុងវិស័យគ្រប់គ្រងសំណល់ ដែលផ្តោតលើសេដ្ឋកិច្ចចក្រា និងបរិស្ថាន។ ដេប៉ាតឺម៉ង់វិស្វកម្មបរិស្ថាន នៃសាកលវិទ្យាល័យភូមិន្ទភ្នំពេញ (RUPP) បានព្យាករណ៍ពីបញ្ហាប្រឈមនាពេលអនាគតដែលអាចនឹងកើតមានកាន់តែអាក្រក់ទៅៗប្រសិនបើគ្មានសកម្មភាពបង្ការ ឬទប់ស្កាត់ណាមួយដែលត្រូវចាប់ផ្ថើមនៅថ្ងៃនេះ និងតួនាទីរបស់វិស័យអប់រំ។ នៅក្នុងសិក្ខាសាលា អ្នកចូលរួមទាំង160នាក់បានយកចិត្តទុកដាក់ និងបង្ហាញការសាទរ ព្រមទាំងចែករំលែក ចំណាប់អារម្មណ៍ និងការព្រួយបារម្ភអំពីបរិស្ថាន ជាពិសេស ពីមន្ត្រីសាធារណៈ ដៃគូអភិវឌ្ឍន៍ ផ្នែកអប់រំ អង្គការក្រៅរដ្ឋាភិបាល និងវិស័យឯកជន និងយុវជនជំនាន់ក្រោយមកពី RUPP និងសមាគមសហព័ន្ធយុវជនសេដ្ឋកិច្ចកម្ពុជា។ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានចែករំលែកការប្តេជ្ញាចិត្ត របស់ រដ្ឋាភិបាលកម្ពុជាចំពោះបរិស្ថាន ស្អាត បៃតង និរន្តរភាព និងអំពាវនាវឱ្យមានការចូលរួម ពីប្រជាពលរដ្ឋ ដោយលើកឡើងថា “បញ្ហាប្រឈមបរិស្ថានដែលយើងកំពុងប្រឈម មិនអាច ដោះស្រាយ បាន ប្រសិនបើគ្មានការខិតខំប្រឹងប្រែងរួមគ្នានោះទេ។ យើងទាំងអស់ គ្នា គួរតែរួមដៃគ្នា។ វាដល់ពេលដែលត្រូវធ្វើសកម្មភាពសម្រាប់ខ្លួនយើង និងមនុស្សជំនាន់ ក្រោយ របស់យើង“។នាឱកាសនោះលោកស្រី Choi Moon Jung នាយកប្រចាំប្រទេស នៃការិយាល័យ កយកា ប្រចាំប្រទេសកម្ពុជា មានប្រសាសន៍ថា “សិក្ខាសាលាថ្ងៃនេះ គឺដើម្បីលើកកម្ពស់ការយល់ដឹង និងចែករំលែកគំនិត យោបល់រវាង គ្នានិងគ្នា។ ទីភ្នាក់ងារកយកា ជឿជាក់ ថា ដំណោះស្រាយ គឺ អាស្រ័យលើមនុស្សគ្រប់រូប»។ តាមរយៈជំនឿជឿជាក់នេះ ទីភ្នាក់ងារកយកា បានគាំទ្រក្នុងការបង្កើត ដេប៉ាតឺម៉ង់វិស្វកម្មបរិស្ថាន នៅសាកលវិទ្យាល័យភូមិន្ទភ្នំពេញ (RUPP) ដើម្បីបណ្ដុះបណ្ដាលអ្នកមានទេពកោសល្យក្នុងការស្រាវជ្រាវ និងបង្កើតដំណោះស្រាយ សម្រាប់ការ ដោះស្រាយបញ្ហាបរិស្ថាន។ទីភ្នាក់ងារកយកា ចែករំលែកនូវលទ្ធផល នៃយុទ្ធនាការ រយៈពេលមួយខែរបស់ខ្លួន ដែលផ្តួចផ្តើមឡើងដើម្បីគាំទ្រ 'កម្ពុជាស្អាត! ខ្មែរអាចធ្វើបាន!' កាលពីថ្ងៃទី ២១ ខែសីហា កន្លងទៅនេះ ដែលមានការចូលរួមរបស់ ឯកឧត្តមPark Jung-wook ឯកអគ្គរដ្ឋទូតសាធារណៈរដ្ឋកូរ៉េប្រចាំកម្ពុជា ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន និងឯកឧត្តម ឃួង ស្រេង អភិបាលសាលារាជធានីភ្នំពេញ ដែលបានចូលរួមក្នុងការចាប់ផ្ថើមយុទ្ធនាការនេះ។ វាបានចាប់ផ្តើមជាមួយនឹងសកម្មភាពរើសសំរាមនៅតាមដងទន្លេ។ នៅថ្ងៃនោះមនុស្សជាង ៧០០នាក់បានចូលរួម។រយៈពេលមួយខែចុងក្រោយនេះ សកម្មភាពនេះបានដំណើរការតាមរយៈការចែករំលែក តាម បណ្តាញសង្គមដូចជា Facebook និង Instagram។ មនុស្ស ២១៣៣នាក់ បានប្តេជ្ញាចិត្តចំពោះការកាត់បន្ថយ ការប្រើប្រាស់ឡើងវិញ និងការកែច្នៃសំណល់ប្លាស្ទិកនៅក្នុងការអនុវត្តជីវិតប្រចាំថ្ងៃរបស់ពួកគេនៅក្នុងសាលារៀន ទីផ្សារ ហាងកាហ្វេ និងនៅផ្ទះ ហើយបានចែករំលែករូបភាព នៅលើការបង្ហោះតាមរយៈបណ្តាញសង្គម។ មនុស្សជាង ២០០០០នាក់បានមើលសកម្មភាព របស់ក្រុមគ្រួសារ មិត្តភក្តិ និងសហការីរបស់ពួកគេ។ ដោយមើលឃើញពីវិបត្តិបរិស្ថានធ្ងន់ធ្ងរ ដូចដែលរដ្ឋលេខាធិការក្រសួងបរិស្ថាន បានមាន ប្រសាសន៍ ថា យុទ្ធនាការរយៈពេលមួយខែរបស់ ទីភ្នាក់ងារកយកា ដែលបិទបញ្ចប់ជាមួយ នឹងសិក្ខាសាលា ប៉ុន្តែការប្តេជ្ញាចិត្តរបស់យើងគួរតែបន្ត។ យុវជនរាប់សិបនាក់ មកពីសាកលវិទ្យាល័យភូមិន្ទភ្នំពេញនិង សមាគមសហព័ន្ធយុវជន សេដ្ឋកិច្ចកម្ពុជា បានចូលរួមក្នុងសិក្ខាសាលានេះ ហើយមនុស្ស ២១៣៣នាក់បាន ចូលរួមដោយ ស្ម័គ្រចិត្ដក្នុងការអនុវត្តប្រចាំថ្ងៃ ហើយរីករាយនឹងចែករំលែកវាជាមួយមិត្តភក្តិ ប្រមាណ ២០០០០នាក់ ដើម្បីផ្សព្វផ្សាយឱ្យពួកគេចូលរួមទាំងអស់គ្នា។ ចាប់ផ្តើមពី សិក្ខាសាលា និងយុទ្ធនាការរយៈពេលមួយខែរបស់ទីភ្នាក់ងារកយកា យើងបាន រកឃើញថា យើងនៅតែត្រូវការមនុស្សជាច្រើនផ្សេងទៀត ដើម្បីចូលរួមដោះស្រាយបញ្ហា ប្រឈម ទាំងនេះ ជាមួយគ្នា៕ អត្ថបទ រដ្ឋា

សម្តេចប្រធានរដ្ឋសភា ឃួន សុដារី ស្នើសភាតំណាងប្រជាជនចិនខេត្តខ្វាងតុង ជំរុញអ្នកវិនិយោគមកបណ្តាក់ទុននៅកម្ពុជា

ឆ្លៀតពេលក្នុងការផ្លាស់ប្តូរជើងយន្តហោះ ធ្វើដំណើរទៅកាន់ទីក្រុងប៉េកំាង ក្នុងការបំពេញទស្សនកិច្ចនៅសាធារណរដ្ឋប្រជាមានិតចិន នៅអាកាសអន្តរជាតិទីក្រុងខ្វាងចូវ ខេត្តក្វាងតុង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានជួបពិភាក្សាការងារជាមួយ ឯកឧត្តម Chen Jiaquan អនុប្រធានគណៈកម្មការកិច្ចការបរទេស សហប្រតិបត្តិការអន្តរជាតិ នៃសភាតំណាងប្រជាជនចិនខេត្តខ្វាងតុង ដែលបានអញ្ជើញមកទទួលស្វាគមន៍គណៈប្រតិភូ នៅរសៀលថ្ងៃទី២២ ខែកញ្ញាឆ្នាំ២០២៤។នៅក្នុងឱកាសនោះ សម្តេចប្រធានរដ្ឋសភា បានស្នើដល់ស្ថាប័នសភាខេត្តនេះ ជំរុញការធ្វើពាណិជ្ជកម្មនិងកៀរគរអ្នកវិនិយោគ ទៅបណ្តាក់ទុននៅកម្ពុជាបន្ថែមទៀត និងលើកកម្ពស់ការភ្ជាប់ទំនាក់ទំនងប្រជាជននិងប្រជាជន ឱ្យកាន់តែជិតស្និទ្ធឡើង។សម្តេចប្រធានរដ្ឋសភា បានថ្លែងអំណរគុណ ចំពោះការទទួលស្វាគមន៍របស់មិត្តចិន ជាពិសេសអាជ្ញាធរខេត្តខ្វាងតុង ទោះបីគណៈប្រតិភូគ្រាន់តែឆ្លងកាត់ខេត្តក្នុងរយៈពេលខ្លីយ៉ាងណាក្តី ក៏សភាខេត្តមកទទួលស្វាគមន៍យ៉ាងកក់ក្តៅ រាក់ទាក់ជាទីបំផុត ដែលនេះបង្ហាញពីចំណងមិត្តភាពជាប្រពៃណី មិត្តភាពដែកថែប ដ៏រឹងមាំនៃប្រទេសទាំងពីរ។ សម្តេចរដ្ឋសភាធិបតី បានសម្តែងការស្ញប់ស្ញែងចំពោះការរីកចម្រើនយ៉ាងខ្លំាងក្លារបស់ខេត្ត ខ្វាងតុង។ភាគីទាំងពីរ បានវាយតម្លៃខ្ពស់ចំពោះ ចំណងមិត្តភាពជាប្រពៃណី កិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ កម្ពុជា-ចិន ។ សម្តេចប្រធានរដ្ឋសភានិងតំណាងសភាប្រជាជនខេត្តខ្វាងតុង បានលើកឡើងថា មិត្តភាពកម្ពុជា-ចិន ជាគំរូនៃទំនាក់ទំនងអន្តរជាតិ ដែលបានឈរលើគោលការណ៍គោរពគ្នា ឱ្យតម្លៃគ្នា និងយោគយល់គ្នា ដើម្បីផលប្រយោជន៍រួម។ឯកឧត្តម Chen Jiaquan បានគំាទ្រប្រសាសន៍លើកឡើងរបស់សម្តេចប្រធានរដ្ឋសភា។ ដើម្បីភ្ជាប់ទំនងទំនាក់រវាងរដ្ឋសភាកម្ពុជានិងសភាតំណាងប្រជាជនចិនខេត្តខ្វាងតុងឱ្យកាន់តែជិតស្និទ្ធនឹងរឹងមាំបន្ថែមទៀត ឯកឧត្តមបានស្នើសូមគណៈប្រតិភូសភាខេត្តខ្វាងតុង មកបំពេញទស្សនកិច្ចផ្លូវការនិងមិត្តភាពនៅកម្ពុជា ក្នុងខែវិច្ឆិកា ឆ្នាំ២០២៤ នេះ។ឯកឧត្តម បានមានប្រសាសន៍ គូសបញ្ជាក់ពីសក្តានុពលខ្ពស់ក្នុងការធ្វើពាណិជ្ជកម្មនៅកម្ពុជា និងបានជម្រាបសម្តេចប្រធានរដ្ឋសភានិងគណៈប្រតិភូថា ខេត្តខ្វាងតុងជាខេត្តនាំមុខគេរបស់ចិន លើការធ្វើពាណិជ្ជកម្ម។ រដ្ឋាភិបាលបានបង្កើតតំបន់សេដ្ឋកិច្ចពិសេសធំជាងគេរបស់ចិន នៅខេត្តខ្វាងតុងឈ្មោះថា តំបន់សេដ្ឋកិច្ចពិសេសតំបន់ ហុងកុង ម៉ាកែវ ខ្វាងតុង។សម្តេចរដ្ឋសភាធិបតី ឃួនសុដារី បានស្វាគមន៍ដោយក្តីរីករាយ ចំពោះការភ្ជាប់ទំនាក់ទំទងសភាកម្ពុជានិងសភាប្រជាជនខេត្តខ្វាងតុង។ រដ្ឋសភាកម្ពុជាត្រៀមស្វាគមន៍ដោយក្តីរីករាយ ចំពោះវត្តមានសភាប្រជាជនខេត្តខ្វាងតុង នៅកម្ពុជាក្នុងខែវិច្ឆិកាខាងមុខនេះ។សម្តេចប្រធានរដ្ឋសភាបានមានប្រសាសន៍ថា ក្រោមការដឹកនាំរបស់រាជរដ្ឋាភិបាលនីតិកាលទី ៧រដ្ឋសភា ដែលមានសម្តេចមហាបវរធិបតី ហ៊ុន ម៉ាណែត នាយកមន្រ្តី កម្ពុជាស្វាគមន៍ និងយកចិត្តទុកដាក់ ធានាការពារផលប្រយោជន៍អ្នកវិនិយោគទុនក្នុងស្រុកនិងបរទេស។ កម្ពុជាមានសុខសន្តិភាព ស្ថិរភាព យ៉ាងរឹងមាំ និងមានច្បាប់វិនិយោគ បទដ្ឋានគតិយុត្តជាច្រើន ក្នុងការធានា ការពារ និងលើកទឹកចិត្តដល់អ្នកវិនិយោគ៕

រយៈពេល៣ថ្ងៃ ភ្ញៀវទេសចរជិត ៤ម៉ឺននាក់ ទស្សនាព្រឹត្ដិការណ៍ថ្ងៃរះចំកំពូលប្រាសាទអង្គរ

អ្នកជំនាញទេសចរណ៍ បានឲ្យដឹងថា ភ្ញៀវទេសចរជាតិ និងអន្ដរជាតិ ទៅទស្សនាព្រឹត្តិការណ៍ថ្ងៃរះចំកំពូលប្រាសាទអង្គរវត្ត ចាប់ពីថ្ងៃទី២១ ដល់ថ្ងៃទី២៣ ខែកញ្ញា ឆ្នាំ២០២៤នេះ មានជាង៣ម៉ឺន៧ពាន់នាក់។លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌អង្គរ នៃអាជ្ញាធរជាតិអប្សរា បានឱ្យដឹងថា ព្រឹត្ដិការណ៍ថ្ងៃរៈចំកណ្ដាលកំពូលប្រាសាទអង្គរ ក្នុងរយៈពេល៣ថ្ងៃ ចាប់ពីថ្ងៃទី២១ដល់ថ្ងៃទី២៣ខែកញ្ញាឆ្នាំ២០២៤នេះ មានភ្ញៀវទេសចរជាតិនិងអន្ដរជាតិ ជាង ៣ម៉ឺន៧ពាន់នាក់។ ក្នុងចំណោមភ្ញៀវទេសចរជាង៣ម៉ឺន៧ពាន់នាក់នោះ មានភ្ញៀវទេសចរអន្ដរជាតិ ១៨៣៤នាក់ ភ្ញៀវទេសចរជាតិ៣៥៨៧៦នាក់ ។ជាមួយគ្នានោះ នៅថ្ងៃទី ២១ កញ្ញា២០២៤ ចន្លោះពីម៉ោង៥:០០នាទី-៧:០០នាទី មានភ្ញៀវទេសចរចំនួន ១២,៣៥៧នាក់ ភ្ញៀវអន្ដរជាតិ ៦៣៧នាក់ នៅថ្ងៃទី២២ ខែកញ្ញា ២០២៤ មានចំនួនសរុប១៩,៥០៥នាក់ ភ្ងៀវបរទេសចំនួន ៧០៤នាក់ និង ភ្ងៀវជាតិចំនួន១៨,៨០០នាក់។ ដោយឡែកនៅថ្ងៃទី២៣ខែកញ្ញា២០២៤ ចន្លោះពីម៉ោង៥:០០នាទី-៧:០០នាទី មានអ្នកទេសចបរទេសចំនួន ៤៩៣នាក់ ភ្ងៀវជាតិមានចំនួន ៥,៣៥៦នាក់។ សូមជម្រាបថា កាលពីឆ្នាំ២០២៣ លំហូរភ្ញៀវទៅទស្សនាព្រះអាទិត្យរះចំកំពូលប្រាសាទអង្គរនេះផងដែរ ក្នុងរយៈពេល៣ថ្ងៃចាប់ពីថ្ងៃទី២១ដល់២៣ ខែកញ្ញា ឆ្នាំ២០២៣ មានចំនួន១២ ៦៣៥ នាក់៕

បណ្ដាញសង្គម

ព័ត៌មានថ្មីៗ

លោក Trump និយាយថា អ៊ីរ៉ង់នឹងបង្កើតអាវុធនុយក្លេអ៊ែរ ក្នុងរយៈពេល ៤ សប្តាហ៍

អ៊ីរ៉ង់ បញ្ជាក់ថា នឹងដាក់ពង្រាយមីស៊ីលថ្មី ប្រសិនបើអ៊ីស្រាអែលវាយប្រហារម្តងទៀត

អារ៉ាប់រួម បញ្ជូនយន្តហោះ ទៅចូលរួមកិច្ចប្រឹងប្រែងពន្លត់ភ្លើងចំហេះព្រៃ នៅប្រទេសម៉ុងតេណេហ្គ្រោ

អាមេរិក ចាប់ផ្តើមនិរទេសជនភៀសខ្លួនអ៊ុយក្រែន

សម្តេច ប៉ាប ឡេអូ អំពាវនាវឲ្យតមអាហារ និងបួងសួងឲ្យមានសន្តិភាព នៅអ៊ុយក្រែន

ប្រភព៖ ប្រទេសសមាជិកអង្គការណាតូ មានការខ្វែងគំនិតគ្នា ទៅលើអាណត្តិរបស់កងកម្លាំងដែលពួកគេចង់បញ្ជូនទៅអ៊ុយក្រែន

ប្រមុខកងទ័ពស៊ូដង់ តែងតាំងមន្ត្រីជាន់ខ្ពស់មួយក្រុម និងរឹតបន្តឹងការគ្រប់គ្រង

អង្គការ MSF៖ ការវាយប្រហារលើមន្ទីរពេទ្យ Darfur បានបណ្តាលឲ្យមនុស្សយ៉ាងតិចម្នាក់ស្លាប់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877