BTV NEWS

សម្តេចតេជោ ហ៊ុន សែន អញ្ជើញចូលរួមអបអរសាទរខួបលើកទី៨០ឆ្នាំ ទិវាឯករាជ្យរបស់វៀតណាម

ការថែទាំផ្លូវមានសារៈសំខាន់ណាស់ ដើម្បីលើកកម្ពស់ជីវភាពរស់នៅរបស់ប្រជាជននៅជនបទ

អតីតពលការិនីត្រឡប់មកពីប្រទេសថៃ បីនាក់បងប្អូន ទទួលបានការងារធ្វើភ្លាមៗ នៅក្នុងខេត្តស្វាយរៀង ដោយម្នាក់ៗទទួលបានប្រាក់ឈ្នួលប្រចាំខែជិត ៥០០ដុល្លាអាមេរិក

ឯកឧត្តម ឃឹម ហ្វីណង់៖ទោះបីជាថ្លៃស្រូវបច្ចុប្បន្ននៅតែបន្តជាបញ្ហាប្រឈមតែការចូលរួមប្រមូលទិញស្រូវពីរោងម៉ាស៊ីនដៃគូពិតជាបានជួយកាត់បន្ថយយ៉ាងច្រើនដល់ការកកស្ទះនៅតាមទីវាល

ព័ត៌មានជាតិ

ប្រមុខរដ្ឋស្តីទី ចេញព្រះរាជក្រឹត្យ កែសម្រួល និងតែងតាំងឯកឧត្តម ហួត ហាក់ ជារដ្ឋមន្ត្រីក្រសួងទេសចរណ៍ និងឯកឧត្តម សុខ សូកេន ជារដ្ឋមន្ត្រីក្រសួងអធិការកិច្ច

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា នារសៀលថ្ងៃទី២០ ខែកញ្ញា ឆ្នាំ២០២៤ បានចេញព្រះរាជក្រឹត្យ កែសម្រួល និងតែងតាំងឯកឧត្តម ហួត ហាក់ ជារដ្ឋមន្ត្រីក្រសួងទេសចរណ៍ និងឯកឧត្តម សុខ សូកេន ជារដ្ឋមន្ត្រីក្រសួងអធិការកិច្ច។សូមជម្រាបថា រដ្ឋសភាបានបោះឆ្នោតផ្តល់សេចក្តីទុកចិត្តលើការកែសម្រួលសមាសភាពរាជរដ្ឋាភិបាលចំនួន ២រូប គឺឯកឧត្តម ហួត ហាក់ ជារដ្ឋមន្ត្រីក្រសួងទេសចរណ៍ និងឯកឧត្តម សុខ សូកេន ជារដ្ឋមន្ត្រីក្រសួងអធិការកិច្ច។ ការបោះឆ្នោតផ្តល់សេចក្តីទុកចិត្តលើការកែសម្រួលសមាសភាពរាជរដ្ឋាភបាលបានធ្វើឡើងក្នុងសម័យប្រជុំជាវិសាមញ្ញ នីតិកាលទី៧ នៅព្រឹកថ្ងៃទី២០ ខែកញ្ញា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា។

ឯកឧត្តម នេត សាវឿន ប្រាប់សមត្ថកិច្ចតាមព្រំដែនសហការជាមួយថៃ ដើម្បីសម្រួល និងដោះស្រាយបញ្ហាប្រឈមរបស់ពលករ

ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី និងជាប្រធានគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ-ចូលរបស់ពលករខ្មែរតាមព្រំដែនកម្ពុជា ដែលហៅកាត់ថា គ.ច.ព.ក បានណែនាំដល់សមត្ថកិច្ចតាមបន្ទាត់ព្រំដែនទាំងអស់ ត្រូវពង្រឹងកិច្ចសហការល្អបន្ថែមទៀតជាមួយភាគីថៃ ដើម្បីសម្របសម្រួល និងដោះស្រាយបញ្ហាប្រឈមជាក់ស្ដែងរបស់ពលករ ដែលត្រូវចេញចូល តាមព្រំដែនរវាងកម្ពុជា និងថៃ។ការណែនាំរបស់ឧបនាយករដ្ឋមន្ដ្រី នេត សាវឿន បានធ្វើឡើងនៅព្រឹកថ្ងៃទី២០ ខែកញ្ញា ឆ្នាំ២០២៤នេះ នៅទីស្ដីការគណៈរដ្ឋមន្ដ្រី ក្នុងឱកាសដឹកនាំកិច្ចប្រជុំបូកសរុបលទ្ធផលការងាររយៈពេល១ឆ្នាំ និងលើកទិសដៅសម្រាប់អនុវត្តបន្ដរបស់គណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ ចូលរបស់ពលករខ្មែរតាមព្រំដែនកម្ពុជា។ឯកឧត្តមសន្ដិបណ្ឌិត បានប្រាប់ឲ្យគ្រប់តួអង្គភាពពាក់ព័ន្ធទាំងអស់ ត្រូវឯកភាពគ្នាពង្រឹងសេវាតាមព្រំដែន ដើម្បីឲ្យពលករ និងពលរដ្ឋចេញចូលតាមព្រំដែន កាត់បន្ថយការកោសរួសក្រៅផ្លូវការ និងការប្រឈមនានា។ លើសពីនេះ ឯកឧត្តមលើកទឹកចិត្ត និងជំរុញឲ្យពង្រឹងកិច្ចសហប្រតិបត្តិការជាមួយភាគីថៃ ដែលក្នុងនោះ អភិបាលខេត្ត និងកម្លាំងជំនាញសមត្ថកិច្ចទ្វេភាគីទាំងនគរបាល អន្ដោប្រវេសន៍ ទាហាន និងគយជាដើមត្រូវជួបប្រជុំទៀងទាត់ បើមានសំណូមត្រូវដោះស្រាយជាក់ស្ដែង ជាមួយភាគីថៃ ដើម្បីធ្វើយ៉ាងណា «រួមគ្នា ជួយពលករចេញចូលតាមព្រំដែន កាត់បន្ថយភាពស្មុគស្មាញ»។ឯកឧត្តមឧបនាយករដ្ឋមន្រ្តី ក៏បានដាក់ចេញទិសដៅឲ្យពង្រឹងសមត្ថកិច្ចជំនាញនៅតាមព្រំដែន និងបង្កើនកិច្ចសហការជាមួយភាគីថៃ, លើកកម្ពស់ការផ្សព្វផ្សាយអប់រំដើម្បីទប់ស្កាត់ព័ត៌មានក្លែងក្លាយ ការចោទប្រកាន់អំពីបញ្ហាសមត្ថកិច្ចនៅតាមព្រំដែន ពោលត្រូវផ្សាយអំពើល្អត្រឡប់ទៅវិញ នូវអ្វីដែលសមត្ថកិច្ចបានបំពេញនាពេលកន្លងមក ទៅតាមគ្រប់រូបភាពទាំងអស់។ មួយវិញទៀតត្រូវពង្រឹងក្រុមប្រចាំបញ្ជា ពង្រឹងទំនាក់ទំនង និងធានាដល់ការបូកសរុបរបាយការណ៍ឆ្លើយតបជាដើមផងដែរ។ក្នុងឱកាសនោះដែរ ឯកឧត្តមឧបនាយករដ្ឋមន្ដ្រី នេត សាវឿន កោតសរសើរដល់ថ្នាក់ដឹកនាំ និងសមាជិក សមាជិការបស់គណៈកម្មការចំពោះកិច្ច ព្រមទាំងអភិបាលខេត្តជាប់ព្រំដែនទាំងអស់ ដែលបំពេញការងារបានយ៉ាងល្អនាពេលកន្លងមក ក្នុងនោះមានទាំងកិច្ចសហការជាមួយភាគីថៃ ដើម្បីបំពេញកិច្ចការងារជូនពលករដែលចេញចូលតាមព្រំដែន។ បន្ថែមពីនេះ បានកោតសរសើរដល់កម្លាំង និងសមត្ថកិច្ចទាំងអស់ ដែលឈរជើងតាមបន្ទាត់ព្រំដែន សំដៅរួមគ្នាកាត់បន្ថយភាពអសកម្ម។ តែយ៉ាងណាក៏ដោយ ឯកឧត្តមឧបនាយករដ្ឋមន្រ្តី ក៏បានលើកឡើងអំពីភាពចន្លោះប្រហោងមួយចំនួនរបស់ក្រុមការងារផងដែរ ដែលករណីនេះត្រូវឲ្យគ្រប់ក្រសួង ស្ថាប័នពាក់ព័ន្ធទាំងអស់រួមគ្នាបន្ដដោះស្រាយផងដែរ ដើម្បីធ្វើយ៉ាងណាអនុវត្តឲ្យបាននូវស្មារតីមុតស្រួច តាមទិសដៅរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដែលបង្ហាញពីការទទួលខុសត្រូវចំពោះពលករ ជួយសម្រួលឲ្យពលករទៅបម្រើការងារដោយស្របច្បាប់៕ អត្ថបទ៖ បាន ចក់

អគ្គស្នងការនគរបាលជាតិ រៀបចំសិក្ខាសាលាស្តីពីតួនាទីភារកិច្ចមន្ត្រីនគរបាលយុត្តិធម៌ ទំនាក់ទំនងជាមួយស្ថាប័ន្ថតុលាការ

អគ្គស្នងការនគរបាលជាតិ បានរៀបចំសិក្ខាសាលាស្តីពីតួនាទីភារកិច្ចរបស់មន្ត្រីនគរបាលយុត្តិធម៌ និងទំនាក់ទំនងជាមួយស្ថាប័ន្ថតុលាការ ដើម្បីធ្វើការកែលម្អ ផ្លាស់ប្តូរចំណេះដឹង និងបទពិសោធន៍ការងារគ្នាទៅវិញទៅមករវាងស្ថាប័ន្ថច្បាប់ទាំង២ ។ សិក្ខាសាលានេះ បានរៀបចំប្រារព្ធឡើងនាព្រឹកថ្ងៃទី២០ ខែកញ្ញា ឆ្នាំ២០២៤នេះ ក្រោមវត្តមានឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តមកេង សុម៉ារិទ្ធ រដ្ឋលេខាធិការក្រសួងយុត្តិធម៌ ជាសហប្រធានគណៈអធិបតី រួមទាំងមានការចូលរួមពីឯកឧត្តមស្នងការ, អធិការដ្ឋានក្រុង ស្រុក ខណ្ឌ ចំណុះស្នងការរាជធានីខេត្តទាំង២៥ និងក្រសួងមហាផ្ទៃ , ព្រះរាជអាជ្ញានៃស្ថាប័នអយ្យការ ចៅក្រមនៃស្ថាប័នតុលាការ បញ្ជាការដ្ឋានកងរាជអាវុធហត្ថ ព្រមទាំងគណៈមេធាវី ដែលមានចំនួនសរុប ប្រមាណ៦០០នាក់ ដែលជាសិក្ខាកាម ។ ឯកឧត្តមកេង សុម៉ារិទ្ធ រដ្ឋលេខាធិការក្រសួងយុត្តិធម៌ បានមានប្រសាសន៍ឱ្យដឹងថា គោលបំណងសំខាន់ៗ នៃសិក្ខាសាលាបានផ្តល់ឱកាសដល់តួអង្គពាក់ព័ន្ធទាំងអស់ រួមមាន ព្រះរាជាអាជ្ញា ចៅក្រម មេធាវី និងមន្ត្រីនគរបាលយុត្តិធ៌ ធ្វើការសិក្សាស្វែងយល់ ផ្លាស់ប្តូរចំណេះដឹង និងបទពិសោធន៍គ្នាទៅវិញទៅមក ក្នុងការអនុវត្តតួនាទី ភារកិច្ច និងការទទួលខុសត្រូវរបស់ខ្លួន ដើម្បីឈានទៅដល់ការ ធ្វើកែសម្រួល កែលម្អ កែតម្រូវ និងកែទម្រង់ លើការអនុវត្តក្រមនីតិវិធីព្រហ្មទណ្ឌឱ្យកាន់តែមានប្រសិទ្ធភាពខ្ពស់ ស្របតាមបទប្បញ្ញត្តិច្បាប់ជាធរមាន ដើម្បីបង្កើនការជឿទុកចិត្តលើប្រព័ន្ធយុត្តិធម៌កម្ពុជាពីសាធារណជនទូទៅ ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោម ការដឹកនាំប្រកបដោយគតិបណ្ឌិត ឈ្លាសវៃ ស្វាហាប់ និងទស្សនវិស័យកំណែទម្រង់របស់សម្តេចមហា បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ ឯកឧត្តមរដ្ឋលេខាធិការ បានបន្ថែមថា ៖ អង្គសិក្ខាសាលានៅថ្ងៃនេះ ក៏ជាការពង្រឹងកិច្ចសហការឱ្យកាន់តែល្អប្រសើរឡើងរវាង មន្ត្រីនគរបាលយុត្តិធម៌ ជាមួយព្រះរាជអាជ្ញា ចៅក្រមស៊ើបសួរ និងមេធាវី ដើម្បីលើកកម្ពស់ប្រសិទ្ធភាពនៃការ អនុវត្តច្បាប់ក្នុងប្រព័ន្ធយុត្តិធម៌កម្ពុជា ។ ឧត្តមសេនីយ៍ឯកជា ប៊ុនថុល អនុប្រធាន នាយកដ្ឋានកណ្ដាលយុត្តិធម៌ បានឡើងធ្វើបទបង្ហាញ ពីដែនកាតព្វកិច្ច និងភារកិច្ចនៃការអនុវត្តច្បាប់របស់មន្ត្រីនគរបាលយុត្តិធម៌ លើសំណុំរឿងជាច្រើនដូចជាបទល្មើសព្រហ្មទណ្ឌ , គ្រឿងញៀន , រំលោភសេពសន្ថវះ , បណ្ដឹងរដ្ឋប្បវេណី រួមជាមួយបទល្មើសផ្សេងៗជាច្រើនទៀត ដើម្បីបង្ហាញដល់សិក្ខាកាមទាំងអស់ ដែលកំពុងមានវត្តមានក្នុងអង្គពិធី ឱ្យបានយល់ដឹងកាន់តែច្បាស់លាស់ ក្នុងការធានាប្រសិទ្ធភាពដើម្បីអនុវត្តច្បាប់ឱ្យមានតម្លាភាព និងសុច្ចរិតភាពត្រឹមត្រូវ ។ការធ្វើបទបង្ហាញជិត១ម៉ោងរបស់លោកឧត្តមសេនីយ៍អនុប្រធាននាយកដ្ឋាន បានបង្ហាញការយល់ដឹងកាន់តែទូលំទូលាយ ដល់សិក្ខាកាម កាន់តែដឹងច្បាស់រវាងកិច្ចការងាររបស់អង្គភាពខ្លួន បង្កើនទំនាក់ទំនងស្អិតរមួតជាមួយស្ថាប័ន្ថអយ្យការ និងតុលាការ លើផ្លូវច្បាប់ ។ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានឡើងធ្វើបទបង្ហាញចែករំលែកបទពិសោធន៍ផ្ទាល់ខ្លួនរបស់លោកក្នុងនាមជាថ្នាក់ដឹកនាំ ជូនដល់អង្គពិធីទាំងមូលផងដែរ ដើម្បីជាមូលដ្ឋានគ្រឹះមួយ សម្រាប់ការទទួលបានចំណេះដឹងថ្មី លើផែនបង្ការទប់ស្កាត់ និងបង្ក្រាបរាល់បទល្មើសផ្សេងៗ ក្នុងបុព្វហេតុការពារសន្តិសុខជូនពលរដ្ឋ និងសង្គមជាតិមាតុភូមិ ជាដើម ។ សូមបញ្ជាក់ថា សិក្ខាសាលានេះ គឺនឹងធ្វើឡើងពេញមួយថ្ងៃ ដោយ នៅរសៀលថ្ងៃខែដដែល ឯកឧត្តម ប៊ុនហុន ដែលជាប្រធានអង្គគណះអធិបតី នឹងធ្វើការបូកសរុបលទ្ធិផល នៃសិក្ខាសាលាទាំងមូល និងការផ្តល់អនុសាសន៍សំណេះសំណាលណែនាំ ដល់សិក្ខាកាមទាំងអស់ដើម្បីទទួលបានបទចំណេះដឹង និងបទពិសោធន៍ថ្មី សម្រាប់ជាទន់បន្ថែម ក្នុងការយកទៅប្រើប្រាស់ កំពុងពេលអនុវត្តភារកិច្ចការងារតាមដែនសមត្ថកិច្ចរបស់ខ្លួន៕ អត្ថបទ៖ លីហេង

អ្នកលក់ផ្កាទទួលបានចំណូលប្រសើរជាងថ្ងៃធម្មតា ចាប់តាំងពីចាប់ផ្ដើមពិធីកាន់បិណ្ឌ

ចាប់តាំងពីថ្ងៃកាន់បិណ្ឌ១ រហូតដល់ថ្ងៃកាន់បិណ្ឌ៣នេះ អ្នកលក់ផ្កានៅតាមបណ្តាវត្តអារាមក្នុងរាជធានីភ្នំពេញ បានលក់ផ្កាដាច់ច្រើនជាងមុខ ខណៈពុទ្ធបរិស័ទជាច្រើនកុះករបានទៅវត្តក្នុងថ្ងៃកាន់បិណ្ឌនៃពិធីបុណ្យភ្ជុំបិណ្ឌ ដែលរយៈ១៥ថ្ងៃ។អ្នកលក់ផ្កានៅវត្តព្រះបារមីវង្គតបុរី ស្ថិតនៅខណ្ឌសែនសុខ រាជធានីភ្នំពេញ នៅថ្ងៃទី២០ ខែកញ្ញានេះ បានប្រាប់BTVឱ្យដឹងថា ក្នុងរយៈពេលកាន់បិណ្ឌ៣ថ្ងៃនេះ ពួកគេទទួលបានចំណូលច្រើនជាងថ្ងៃធម្មតាពីការលក់ផ្កាជូនប្រជាពលរដ្ឋមកវត្តក្នុងថ្ងៃកាន់បិណ្ឌនៃពិធីបុណ្យភ្ជុំបិណ្ឌ។ ពុទ្ធបរិស័ទបានប្រាប់BTVឲ្យដឹងថា ជាទំនៀមទម្លាប់ប្រពៃណីពីដូនតាមក ឲ្យតែដល់រដូវពិធីបុណ្យកាន់បិណ្ឌ និងភ្ជុំបិណ្ឌ គឺតែងតែរៀបចំម្ហូបអាហារ និងទេយ្យទានផ្សេងៗទៅប្រគេនព្រះសង្ឃគង់នៅក្នុងវត្តដើម្បីឧទ្ទិសកុសលផលបុណ្យទៅដល់ញាតិសណ្ដានដែលបានចែកឋានទៅ។ ម្យ៉ាងវិញទៀត ការយកផ្កាមកថ្វាយព្រះគឺដើម្បីសូមពរ សូមជ័យពីព្រះពុទ្ធ។ព្រះសាក្យវង្ស បណ្ឌិត ស៊ីម សារ៉ាន ព្រះចៅអធិការវត្តព្រះបារមីវង្គតបុរី(ទួលក្រសាំង) មានសង្ឃដិកាដែរថា ការថ្វាយផ្កាដល់ព្រះពុទ្ធដូចជាផ្កាឈូក និងផ្កាម្លេះជាដើមនោះ គឺមានតាំងពីព្រះពុទ្ធទ្រង់គង់ជាធរមានឡើង។ហើយការថ្វាយផ្កានេះគឺដើម្បីបួងសួងសូមសេចក្តីសុខ សេចក្តីចំរើននៅក្នុងជីវិត។ភ្ជុំបិណ្ឌ ជាពិធីបុណ្យមួយ ក្នុងចំណោមពិធីបុណ្យធំៗដទៃទៀតនៃ ព្រះរាជពិធីទា្វរទសមាស ដែលប្រជារាស្រ្តទូទាំងព្រះរាជាណាចក្រកម្ពុជាតាំងពីបុរាណរៀងមកតែងតែប្រារព្ធពិធីនេះ មិនដែលអាក់នោះខានឡើយ។បុណ្យភ្ជុំបិណ្ឌ ត្រូវបានធ្វើឡើងតាមបែបព្រះពុទ្ធសាសនា។តាមទម្លាប់ ជារៀងរាល់ឆ្នាំ នៅពេលដល់ថ្ងៃខែដែលត្រូវប្រារព្ធពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិសន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយ ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃដែលគង់នៅវត្តអារាម។ នៅឆ្នាំ២០២៤ ពិធីបុណ្យកាន់បិណ្ឌ និងភ្ជុំបិណ្ឌ នឹងចាប់ផ្តើមពីថ្ងៃទី១៨ខែកញ្ញា រហូតដល់ថ្ងៃទី២ខែតុលា ដែលត្រូវនឹងថ្ងៃ១រោច ដល់ថ្ងៃ១៥រោច ខែភទ្របទ ពុទ្ធសករាជ ២៥៦៨៕ អត្ថបទ៖ទូច សោភ័ណ

សមាគមគ្រូពេទ្យស្ម័គ្រចិត្តយុវជនសម្ដេចតេជោ និងមន្ទីរពេទ្យរ៉ូយ៉ាល់ភ្នំពេញចុះកិច្ចសហការជាមួយគ្នាដើម្បីភាពជាដៃគូជួយសង្គម

មន្ទីរពេទ្យ រ៉ូយ៉ាល់ ភ្នំពេញ និងសមាគមគ្រូពេទ្យស្ម័គ្រចិត្តយុវជនសម្ដេចតេជោ ចុះអនុស្សរណៈលើភាពជាដៃគូក្នុងការព្យាបាល និងវះកាត់ជូនអ្នកជំងឺបេះដូង ឆ្អឹងខ្នង ក្បាលជង្គង់ និងថង់ទឹកប្រម៉ាត់ ដោយឥតគិតថ្លៃដើម្បីរួមចំណែកលើកកម្ពស់សុខុមាលភាពរបស់ប្រជាជនកម្ពុជា។ ថ្លែងក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីភាពជាដៃគូជួយសង្គមរវាងមន្ទីរពេទ្យរ៉ូយ៉ាល់ ភ្នំពេញ និងសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) នាថ្ងៃទី១៩ ខែកញ្ញា ឆ្នាំ២០២៤ លោកសាស្ត្រាចារ្យ Attapoom Susupaus នាយកមន្ទីរពេទ្យ រ៉ូយ៉ាល់ ភ្នំពេញ បានថ្លែងថា ការចូលរួមសហការរវាងមន្ទីរពេទ្យ រ៉ូយ៉ាល់ ភ្នំពេញ ជាមួយសមាគមមូលនិធិក្រុមគ្រូពេទ្យ TYDA គឺជាផ្នែកមួយយ៉ាងសំខាន់ ដែល សមាគមនេះបង្កើតឡើងដោយសម្ដេចតេជោ ហ៊ុន សែន ហើយនេះក៏ជាផ្នែកមួយនៃគោលនយោបាយរបស់មន្ទីរពេទ្យផងដែរ ដើម្បីរួមចំណែកជាមួយសមាគម។ ការចុះអនុស្សរណៈជាមួយសមាគមមូលនិធិក្រុមគ្រូពេទ្យ TYDA នាថ្ងៃនេះ ខាងមន្ទីរពេទ្យ រ៉ូយ៉ាល់ ភ្នំពេញ នឹងជ្រើសរើសយកបញ្ជីឈ្មោះអ្នកជំងឺដែលត្រូវបញ្ជូនមកវះកាត់ក្នុងមន្ទីរពេទ្យរបស់យើងដើម្បីធ្វើការវះកាត់ និងព្យាបាលជូនអ្នកជំងឺ។ លោកសាស្រ្តាចារ្យក៏បានរម្លឹកផងដែរថា មន្ទីរពេទ្យធ្លាប់បានសហការជាមួយសមាគមមូលនិធិក្រុមគ្រូពេទ្យ TYDA កាលពីឆ្នាំ២០២០ កន្លងមក នៅក្នុងការនាំអ្នកជំងឺពីខាងមូលនិធិមកធ្វើការវះកាត់ទាក់ទងនឹងបញ្ហាបេះដូង ហើយសម្រាប់លទ្ធផលនៃការវះកាត់ គឺទទួលបានលទ្ធផលល្អដែលមានការទទួលស្គាល់ និងកោតសរសើរពីសំណាក់ប្រជាជនកម្ពុជាយើង។ក្នុងឱកាសនោះលោកវេជ្ជបណ្ឌិត ស៊ូ ស៊ីផាន់ណា ប្រធានប្រតិបត្តិសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) មានប្រសាសន៍ថា តាមរយៈការចុះអនុស្សរណៈនេះ អ្នកជំងឺធ្ងន់ធ្ងរយើងអាចបញ្ជូនអ្នកជំងឺមកមន្ទីរពេទ្យរ៉ូយ៉ាល់ភ្នំពេញ ហើយធ្វើឱ្យក្រុមគ្រូពេទ្យ TYDA អាចពង្រីកវិសាលភាព នៃការព្យាបាលជំងឺបន្ថែមទៀត។ លោកវេជ្ជបណ្ឌិតបានលើកឡើងដែរថា សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត តែងតែគិតគូរសុខទុក្ខចំពោះសុខភាព និងការរស់នៅរបស់បងប្អូនប្រជាពលរដ្ឋ និងតែងតែបង្កលក្ខណៈងាយស្រួលនៅក្នុងការព្យាបាលជំងឺជូនប្រជាពលរដ្ឋដល់ទីកន្លែង។ ជាក់ ស្ដែងតាមរយៈការយកចិត្តទុក្ខដាក់របស់សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី បានឱ្យក្រុមការងារ និងកម្លាំងស្ម័គ្រចិត្តរបស់សមាគមចុះព្យាបាលជូនប្រជាពលរដ្ឋដោយឥតគិតថ្លៃ។ សូមជម្រាបជូនថា ការចុះអនុស្សរណៈយោគយល់គ្នា រវាងមន្ទីរពេទ្យ រ៉ូយ៉ាល់ ភ្នំពេញ និងសមាគមគ្រូពេទ្យស្ម័គ្រចិត្តយុវជនសម្ដេចតេជោ(TYDA)នេះ ដោយមន្ទីរពេទ្យ រ៉ូយ៉ាល់ ភ្នំពេញ ផ្ដល់ការវះកាត់ដោយឥតគិតថ្លៃសម្រាប់ប្រជាជនកម្ពុជា និងអ្នកជំងឺដែលត្រូវធ្វើវះកាត់ ដូចជាការវះកាត់បិតប្រើសបេះដូង ថតខាងក្រោម, ការថតឆ្លុះសរសៃឈាមបេះ និងដាក់ស្តែន, វះកាត់ទ្រនាប់ឆ្អឹង ដោយការចោះ, ការវះការសរសៃពួរផ្នែកខាងមុខ, ការវះកាត់ដើម្បីភ្ជាប់សរសៃឈាម និងសរសៃវ៉ែន និងការវះកាត់ថង់ទឹកប្រមាត់ដោយការចោះ៕ អត្ថបទ រដ្ឋា

ទិវាសន្តិភាពអន្តរជាតិ៖ មន្ត្រីរាជការ និងពលរដ្ឋថា គុណតម្លៃសន្តិភាពធ្វើឱ្យកម្ពុជាមានការអភិវឌ្ឍរីកចម្រើន

នៅក្នុងទិវាសន្តិភាពអន្តរជាតិ ២១ កញ្ញា ឆ្នាំ២០២៤ មន្ត្រីរាជការ និងពលរដ្ឋខ្មែរ អរគុណសម្តេចតេជោ ហ៊ុន សែន ស្ថាបនឹកសន្តិភាពនៅកម្ពុជា និងនាំគ្នាប្រកាន់ខ្ជាប់ពាក្យស្លោក អរគុណសន្តិភាព ខណៈ គុណតម្លៃនៃសន្តិភាព គឺធ្វើឲ្យប្រទេសជាតិ មានការអភិវឌ្ឍ រីកចម្រើន និងភាពសំបូរសប្បាយ។បើតាមមន្ត្រីរាជការ និងពលរដ្ឋនានា នៅខេត្តកណ្តាល បានថ្លែងប្រាប់BTV នៅថ្ងៃទី២០ ខែកញ្ញានេះ ថាជាទូទៅបណ្តាប្រទេសនៅទូទាំងពិភពលោក តែងនាំគ្នាប្រារព្ធទិវាសន្តិភាពអន្តរជាតិនៅថ្ងៃទី២១ ខែកញ្ញា រៀងរាល់ឆ្នាំ ហើយតាមរយៈទិវាសន្តិភាពអន្តរជាតិឆ្នាំនេះ ពលរដ្ឋនានាក៏សូមសម្តែងការដឹងគុណ អរគុណសម្តេចតេជោ ហ៊ុន សែន មគ្គុទេសក៏ឯក ស្ថាបនឹកសន្តិភាព និងបានបញ្ចប់ភ្លើងសង្គ្រាមពីបនប្រល័យពូជសាសន៍ប៉ុល ពត ហើយក៏សូមគាំទ្រខ្ពស់ សម្តេចធិបតី ហ៊ុន ម៉ាណែត ជានាយកមន្ត្រី គឺបានបង្ហាញនូវការប្តេជ្ញាចិត្តរួមគ្នា លើកកម្ពស់គុណតម្លៃសន្តិភាព ការពារសុខសន្តិភាពកម្ពុជាទោះក្នុងតម្លៃណាក៏ដោយ និងការជំរុញប្រទេសជាតិ មានស្ថេរភាព ការអភិវឌ្ឍ រីកចម្រើន និងភាពសំបូរសប្បាយរបស់កម្ពុជា។លោកគ្រូ អ្នកគ្រូ នៅខេត្តកណ្តាល ក៏បានបញ្ជាក់ដែរថា ជាក់ស្តែងណាស់ សន្តិភាពនៅកម្ពុជាបច្ចុប្បន្ន គឺមិនមែនកើតឡើងដោយចៃដន្យនោះទេ ពោលគឺការកសាងសន្តិភាពនៅកម្ពុជា បានកើតចេញពលរដ្ឋខ្មែរយើងទាំងអស់គ្នាត្រូវពុះពារគ្រប់ឧបសគ្គ ប្រកាន់យ៉ាងខ្ជាប់ខ្ជួននូវស្មារតីសាមគ្គីភាព រួបរួមគ្នាជាធ្លុងមួយ ។តាមរយៈទិវាសន្តិភាពអន្តរជាតិនេះដែរ មន្ត្រីរាជការ ក្នុងចំណោមគ្រូបង្រៀន ក៏បានស្នើឲ្យយុវជន កូនខ្មែរគ្រប់រូប ពលរដ្ឋដែលប្រកាន់និន្នាការបក្សនយោបាយនានា សូមរួមគ្នាតម្កល់ «សន្តិភាព» ជាគុណតម្លៃខ្ពស់បំផុត និងប្រកាន់ខ្ជាប់ចំពោះពាក្យស្លោក «អរគុណសន្តិភាព» និងបន្តពូនជ្រុំធ្វើឲ្យប្រទេសជាតិអភិវឌ្ឍន៍ រីកចម្រើនឥតឈប់ឈរ៕ អត្ថបទ៖ ស៊ុម សុខជា

ឯកឧត្តម ចាយ បូរិន និងលោកជំទាវ ដឹកនាំមន្រ្តីរាជការកាន់បិណ្ឌវេនទី៣ នៅវត្តបទុមវតីរាជវរារាម

នាឱកាសនៃពិធីបុណ្យកាន់បិណ្ឌទី៣ភ្ជុំបិណ្ឌនេះ ឯកឧត្តម ចាយ បូរិន រដ្ឋមន្រ្តីក្រសួងធម្មការនិង សាសនា និងលោកជំទាវបានអញ្ជើញដឹកនាំមន្រ្តីរាជការក្រោមឱវាទចូលរួមក្នុងពិធីសូត្រមន្តបុណ្យកាន់បិណ្ឌវេនទី៣ នៅវត្តបទុមវតីរាជវរារាម រាជធានីភ្នំពេញ នាព្រឹកថ្ងៃទី២០ ខែកញ្ញា ឆ្នាំ២០២៤ ។ឯកឧត្តម រដ្ឋមន្រ្តី និងលោកជំទាវ បានអញ្ជើញអុជទៀនធូប ប្រគេនគន្ធពិដោរ ថ្វាយបង្គំព្រះពុទ្ធបដិមា និងព្រះសង្ឃ ព្រមទាំងសមាទានសីល រម្លឹកដល់គុណបុណ្យព្រះរតនៈត្រៃយ៍តាមគន្លងប្រពៃណីព្រះពុទ្ធសាសនា ពិសេសរម្លឹកដល់ព្រះសម្មាសម្ពុទ្ធព្រះបរមគ្រូនៃយើង ដែលព្រះអង្គបានត្រាស់ដឹងនូវអនុត្តរៈសម្មាសម្ពុទ្ធធិញាណ និងព្រះធម៌វិន័យដ៏វិសេសវិសាល បន្សល់ទុកឱ្យពុទ្ធបរិស័ទគ្រប់ជំនាន់ បានគោរពប្រតិបត្តិជាដ៏រាបរៀងមក។ប្រជាពុទ្ធបរិស័ទនៅទូទាំងប្រទេស ដែលគោរព ប្រតិបត្តិ ទំនៀមទំលាប់ ប្រកាន់ភ្ជាប់ ប្រពៃណី ព្រះពុទ្ធសាសនា ហើយតែងតែធ្វើបុណ្យធ្វើទាន នៅគ្រប់រដូវកាលនៃពិធី បុណ្យនីមួយៗ ជារៀងរាល់ឆ្នាំនោះ សម្រាប់ឱកាសនៃពិធី បុណ្យកាន់បិណ្ឌ ភ្ជុំបិណ្ឌ ឆ្នាំ២០២៤នេះ នឹងប្រព្រឹត្តទៅពីថ្ងៃ១រោច ដល់ថ្ងៃ១៥រោច ខែភទ្របទ ហើយសម្រាប់ឆ្នាំ នេះ បិណ្ឌ១ ត្រូវនឹងថ្ងៃទី១៨ ខែកញ្ញា ដល់ថ្ងៃទី០១ ខែ តុលា ឆ្នាំ២០២៤។ ជារៀងរាល់ឆ្នាំនៅ ពេលដល់ ថ្ងៃ ខែ ដែលត្រូវប្រារព្ធ ពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេស ឪពុកម្ដាយ នៅស្រុកកណើត ដើម្បីរៀបចំម្ហូប អាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតិការទាំង៧សណ្តាន រួមមាន មាតា បិតា ជីដូន ជីតា បងប្អូនកូនចៅ គ្រូឧជ្ឈាយាចារ្យ បុព្វការីជន-បុព្វបុរសជាតិ និងបងប្អូនជនរួមជាតិទាំងឡាយ ដែលបានលាចាកលោកនេះទៅកាន់លោកខាងមុខ ហើយនោះសូមអញ្ជើញមកទទួលយកផល្លានិសង្ឃបានគ្រប់ៗគ្នា ។ សូមរម្លឹកថា ចាប់តាំងពីសម័យបុរាណកាល រហូតមក ដល់បច្ចុប្បន្ននេះ ពិធីបុណ្យភ្ជុំបិណ្ឌតែងតែប្រារព្ធនៅក្នុងរដូវ វស្សា ព្រោះនៅក្នុងរដូវនេះ ពពួកប្រេត អាចមានឱកាសច្រើនក្នុងការស្វែង រកចំណីអាហារជាងរដូវផ្សេងៗ ទាំង អស់។ពិធិបុណ្យកាន់បិណ្ឌវេនទី៣ សម្រាប់ថ្នាក់ដឹកនាំ មន្ត្រីរាជការ ក្រសួងធម្មការនិងសាសនា បានបន្តដោយនៅ ព្រឹកថ្ងៃទី២០ ខែ កញ្ញា ឆ្នាំ២០២៤ ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា និងលោកជំទាវ រួមជាមួយ មន្រ្តីរាជការក្រោមឱវាទ នៃក្រសួងធម្មការនិង សាសនា បានប្រគេនយាគូ រាប់បាត និងវេរភត្តាហារ និមន្តព្រះសង្ឃ ដារបង្សុកូលពហូឆ្លង ដើម្បីជាកិច្ចឧទ្ទិសកុសលជូនចំពោះឧកញ៉ា មហាសប្បុរសធម្មសិរីញាណ អគ្គមហាឧបាសកពុទ្ធសាសនូបត្ថម្ភក៍ ចាយ ស៊ាងអុី ដែលត្រូវជាឪពុកបង្កើត ឯកឧត្តម រដ្ឋមន្រ្តី និងញាតិកាទាំង ៧សន្តាន ដែលបានចែកឋានទៅកាន់លោកខាងមុខសូមជួបតែសេចក្តីស្ងប់ក្នុងសុខគតិភពជារៀងរហូត៕ អត្ថបទ ហួត រដ្ឋា

គណៈកម្មាធិការជាតិសុវត្ថិភាពចរាចរណ៍ផ្លូវគោក អំពាវនាវដល់អ្នកប្រើប្រាស់ផ្លូវទាំងអស់បង្ការទប់ស្កាត់គ្រោះថ្នាក់ចរាចរណ៍ផ្លូវគោក ក្នុងពិធីបុណ្យកាន់បិណ្ឌ-ភ្ជុំបិណ្ឌ

គណៈកម្មាធិការជាតិសុវត្ថិភាពចរាចរណ៍ផ្លូវគោក ចេញសេចក្តីអំពាវនាវស្តីពីការបង្ការ ទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាស ពិធីបុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរ នៅថ្ងៃទី១៨ ខែកញ្ញា ដល់ថ្ងៃទី៣ ខែតុលា ឆ្នាំ២០២៤។ក្នុងឱកាសពិធីបុណ្យកាន់បិណ្ឌ ភ្ជុំបិណ្ឌប្រពៃណីជាតិខ្មែរ ដែលនឹងប្រព្រឹត្តទៅចាប់ពីថ្ងៃទី១៨ ខែកញ្ញា ដល់ថ្ងៃទី៣ ខែតុលា ឆ្នាំ២០២៤ខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក សូមអំពាវនាវ ដល់អ្នកប្រើប្រាស់ផ្លូវទាំងអស់ សូមមេត្តាខិតខំយកចិត្តទុកដាក់ចូលរួមបង្ការ និងទប់ស្កាត់គ្រោះថ្នាក់ចរាចរណ៍ ផ្លូវគោក ដោយអនុវត្តវិធានការដូចខាងក្រោម៖១-អ្នកបើកបរត្រូវបន្ថយល្បឿនបើកបរតាមច្បាប់កំណត់ និងតាមស្ថានភាពជាក់ស្តែង ដូចជា៖ ទីប្រជុំជន សាលារៀន ផ្លូវកោង ផ្លូវប្រសព្វ ផ្លូវចំណោត ឬផ្លូវរអិល។ ២-អ្នកបើកបរត្រូវបើកបរបន្ថយល្បឿននៅពេលជិតដល់ផ្លូវប្រសព្វ និងត្រូវគោរពសិទ្ធិអាទិភាពនៅត្រង់ផ្លូវប្រសព្វ តាមច្បាប់ ផ្លាកសញ្ញាសិទ្ធិអាទិភាព និងការយោគយល់អាធ្យាស្រ័យ។ ៣-អ្នកបើកបររថយន្ត និងអ្នករួមដំណើរ ត្រូវពាក់ខ្សែក្រវាត់សុវត្ថិភាពឱ្យបានត្រឹមត្រូវជាប់ជាប្រចាំ។ ៤-អ្នកបើកបរមុននឹងវ៉ាជែង ត្រូវដឹងច្បាស់ថាផ្លូវខាងមុខទំនេរ អាចជែងបាន ដោយសុវត្ថិភាព ចៀសវាង ការវ៉ាជែងដោយប្រថុយប្រថាន។ ៥-ត្រូវត្រួតពិនិត្យលក្ខណៈបច្ចេកទេសយានយន្តជាប្រចាំ ពិសេសត្រួតពិនិត្យកង់ ចង្កូត ហ្វាំង ភ្លើងបំភ្លឺ។ ៦-ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ គ្រប់ពេលវេលា។ ៧-ចំពោះរថយន្តដឹកអ្នកដំណើរ ឬរថយន្តដឹកទំនិញ សូមកុំផ្ទុកមនុស្ស ឬទំនិញលើសច្បាប់កំណត់ ជាពិសេសរថយន្តដឹកអ្នកដំណើរ មិនត្រូវផ្ទុកមនុស្សនៅលើដំបូល។ ៨-ត្រូវប្រកាន់ខ្ជាប់នូវស្មារតីគោរពច្បាប់ ប្រុងប្រយ័ត្នជានិច្ច សីលធម៌រក្សាសុវត្ថិភាព និងការយោគយល់ អធ្យាស្រ័យក្នុងការបើកបរ។គណៈកម្មាធិការជាតិសុវត្ថិភាពចរាចរណ៍ផ្លូវគោក សូមសម្តែងនូវសេចក្តីសង្ឃឹម និងជឿទុកចិត្តលើ ស្មារតីប្រុងប្រយ័ត្នរបស់សាធារណជនក្នុងការអនុវត្តសេចក្តីអំពាវនាវនេះ ដើម្បីនាំមកនូវសុវត្ថិភាព និងសេចក្តី សុខសប្បាយ រីករាយជាមួយក្រុមគ្រួសារក្នុងឱកាសប្រារព្ធពិធីបុណ្យកាន់បិណ្ឌ ភ្ជុំបិណ្ឌប្រពៃណីជាតិឆ្នាំនេះ កុំឱ្យ ថ្ងៃសប្បាយក្លាយជាថ្ងៃកើតទុក្ខ៕ អត្ថបទ៖ រដ្ឋា

ឧបនាយករដ្ឋមន្ត្រី ហ៊ុន ម៉ានី ទទួលជួបឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសអូស្ត្រាលីថ្មីប្រចាំព្រះរាជាណាចក្រកម្ពុជា

តបតាមសំណើរបស់ស្ថានទូតអូស្ត្រាលី ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានទទួលការជួបសម្តែងការគួរសម និងសំណេះសំណាល ពី ឯកឧត្តម ដេរិក យីប (Derek Yip) ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសអូស្ត្រាលីថ្មីប្រចាំព្រះរាជាណាចក្រកម្ពុជា នារសៀលថ្ងៃទី១៩ ខែកញ្ញា ឆ្នាំ២០២៤ នៅទីស្តីការក្រសួងមុខងារសាធារណៈ។ ផ្តើមចេញពីការស្វាគមន៍យ៉ាងកក់ក្តៅ ឯកឧត្តមឧបនាយករដ្ឋមន្ត្រី បានអបអរសាទរឯកឧត្តមឯកអគ្គរដ្ឋទូត ដែលបានទទួលបេសកកម្មដ៏ឧត្តម មកកាន់ប្រទេសកម្ពុជា ហើយឯកឧត្តមឯកអគ្គរដ្ឋទូត ក៏បានបង្ហាញនូវឆន្ទៈក្នុងបន្តជំរុញកិច្ចសហប្រតិបត្តិការរវាងប្រទេសទាំងពីរ ឱ្យកាន់តែស៊ីជម្រៅលើគ្រប់វិស័យ។ក្នុងជំនួបពិភាក្សានេះ ថ្នាក់ដឹកនាំទាំងពីរ បានធ្វើការកត់សម្គាល់លើទំនាក់ទំនងការទូតរវាងប្រទេសកម្ពុជា អូស្ត្រាលីដែលបានបន្តពង្រឹង និងពង្រីកទាំងក្នុងក្របខណ្ឌរាជរដ្ឋាភិបាល ថ្នាក់ដឹកនាំ និងប្រជាជននៃប្រទេសទាំងពីរ លើគ្រប់វិស័យ។ ឯកឧត្ដមឯកអគ្គរដ្ឋទូត បានបង្ហាញការជឿជាក់ថា ប្រទេសអូស្ត្រាលី នឹងបន្តជាដៃគូកិច្ចសហប្រតិបត្តិការល្អ ក៏ដូចជាបន្តគាំទ្រលើចក្ខុវិស័យរបស់រាជរដ្ឋាភិបាលកម្ពុជា ស្របទៅនឹងយុទ្ធសាស្រ្តបញ្ចកោណ ដែលកម្ពុជាកំពុងអនុវត្ត ដើម្បីឆ្ពោះទៅការអភិវឌ្ឍសង្គមសេដ្ឋកិច្ច។ ជាមួយគ្នានេះ ឯកឧត្តមឧបនាយករដ្ឋមន្ត្រី ក៏បានរម្លឹកជូនឯកឧត្តមឯកអគ្គរដ្ឋទូតនូវប្រសាសន៍របស់សម្តេចធិបតីដែលបានប្រកាសជាសាធារណៈ និងបានលើកឡើងជាមួយមិត្តបរទេស អំពីនយោបាយការបរទេសរបស់កម្ពុជាដែលមានភាពច្បាស់លាស់ ហើយជានយោបាយការបរទេសដែលបន្តនិរន្តភាព (Continuity) និងមានសង្គតិភាព (Consistency)។ កិច្ចពិភាក្សា បានផ្តោតលើកិច្ចសហប្រតិបត្តិការនានាផ្តើមចេញពីការអភិវឌ្ឍធនធានមនុស្ស តាមរយៈការផ្តល់ឱកាសអាហារូបករណ៍ដល់និស្សិត និងមន្ត្រីរាជការវ័យក្មេងកម្ពុជា ការជំរុញលើវិស័យពាណិជ្ជកម្ម ធុរកិច្ច និងវិនិយោគ រវាងប្រទេសទាំងពីរ។ ជាមួយគ្នានេះ ជាការឆ្លើយតបនឹងចំណាប់អារម្មណ៍ខ្ពស់របស់ឯកឧត្តមទូតក្នុងការស្វែងយល់បន្ថែមលើកិច្ចការងារកែទម្រង់របស់រាជរដ្ឋាភិបាលក្នុងអាណត្តិទី៧នេះ ឯកឧត្តមឧបនាយករដ្ឋមន្ត្រី បានគូសបញ្ជាក់អំពីកិច្ចការអាទិភាព ជាពិសេសការងារកែទម្រង់រដ្ឋបាលសាធារណៈ ស្របតាមចក្ខុវិស័យរបស់រាជរដ្ឋាភិបាលអាណត្តិទី៧ ដឹកនាំដោយ សម្តេចមហាបវរធិបតី ហ៊ុន ម៉ាណែត តាមរយៈយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ជូនដល់ឯកឧត្តមអគ្គរដ្ឋទូត។ ថា្នក់ដឹកនាំទាំងពីររូបក៏បានពិភាក្សាលើកិច្ចការពង្រីកកិច្ចសហការក្នុងវិស័យ មុខងារសាធារណៈកម្ពុជា និងសិក្សាពីលទ្ធភាពក្នុងការបង្កើនឱកាសបន្ថែមដើម្បីគាំទ្រ និងជំរុញការងារអភិវឌ្ឍសមត្ថភាពមន្ត្រីរាជការកម្ពុជា បន្ថែមលើយន្តការដែលមានស្រាប់ក្នុងក្របខណ្ឌកិច្ចប្រជុំប្រមុខមុខងារសាធារណៈ សម្រាប់កិច្ចសហប្រតិបត្តិការអាស៊ានស្តីពីបញ្ហាពាក់ព័ន្ធនឹង មុខងារសាធារណៈ (ACCSM) ជាដើម។ចុងបញ្ចប់ ឯកឧត្តមឧបនាយករដ្ឋមន្ត្រី បានជូនពរដល់ក្រុមការងារស្ថានទូតអូស្ត្រាលីប្រចាំកម្ពុជា ជាពិសេស ឯកឧត្ដម ដេរិក យីប ឱ្យទទួលបានជោគជ័យគ្រប់ភារកិច្ច ក្នុងអាណត្តិបេសកកម្មការងារថ្មីរបស់ ឯកឧត្ដម នៅប្រទេសកម្ពុជា។

អាជ្ញាធរខណ្ឌពោធិ៍សែនជ័យ ឈូសឆាយផ្លូវដែលមានជង្ហុកទឹកដក់ ឲ្យបានស្អាត ជូនពលរដ្ឋធ្វើដំណើរ ក្នុងពិធីបុណ្យភ្ជុំបិណ្ឌ

ដើម្បីសម្រួលដល់ការធ្វើដំណើររបស់ប្រជាពលរដ្ឋ សិស្សានុសិស្ស លោកតា លោកយាយ នៅក្នុងពិធីបុណ្យកាន់បិណ្ឌភ្ជុំបិណ្ឌ ដែលជាទំនៀមទំលាប់ព្រះពុទ្ធសាសនាប្រពៃណីខ្មែរ អាជ្ញាធរខណ្ឌពោធិ៍សែនជ័យ បានឈូសឆាយផ្លូវដែលមានជង្ហុកទឹកដក់ ឲ្យបានស្អាតជូនពលរដ្ឋធ្វើដំណើរ ។លោក ប៉ាង លីដា អភិបាលរងខណ្ឌពោធិ៍សែនជ័យ បញ្ជាក់ប្រាប់ BTV ឲ្យដឹងថា ដោយមានការយកចិត្តទុកដាក់ពីលោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ លោកបានដឹកនាំក្រុមការងាររដ្ឋបាលខណ្ឌពោធិ៍សែនជ័យ អាជ្ញាធរសង្កាត់ចោមចៅទី១ នាព្រឹកថ្ងៃទី២០ ខែកញ្ញា ឆ្នាំ២០២៤ បានចុះពិនិត្យចាក់ថ្មមិច និងឈូសឆាយពង្រាបថ្ម ផ្លូវ ចំនួន ២ខ្សែ ដោយក្នុង ១ខ្សែៗ ប្រវែងប្រហែល ៤០០ម៉ែត្រ ស្ថិតនៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។លោក ប៉ាង លីដា បញ្ជាក់បន្តថា មូលហេតុដែលអាជ្ញាធរខណ្ឌពោធិ៍សែនជ័យ ធ្វើការឈូសឆាយ ពង្រាបថ្ម ផ្លូវ ចំនួន ២ខ្សែនាពេលនេះ គឺដើម្បីសម្រួលដល់ការធ្វើដំណើររបស់ប្រជាពលរដ្ឋ សិស្សានុសិស្ស លោកតា លោកយាយ នៅក្នុងពិធីបុណ្យកាន់បិណ្ឌ ភ្ជុំបិណ្ឌដែលជាទំនៀមទំលាប់ ព្រះពុទ្ធសាសនាប្រពៃណីខ្មែរ ។ រាល់ការចាក់ថ្មមិច និងឈូសឆាយនេះ ជាការចំណាយថវិកាផ្ទាល់របស់លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ ផ្ទាល់ ។ ដោយឡែកឆ្នាំ២០២៥ ខាងមុខនេះ អាជ្ញាធរនឹងប្រែក្លាយផ្លូវនេះទៅជាផ្លូវបេតុង ៕ តារាវុទ្ធី

បណ្ដាញសង្គម

ព័ត៌មានថ្មីៗ

បេឡារុស៖ របៀបបំពាក់ប្រព័ន្ធមីស៊ីលជាមួយនឹងក្បាលគ្រាប់នុយក្លេអ៊ែរ កំពុងត្រូវបានស្វែងយល់

រដ្ឋមន្ត្រីការបរទេស៖ ចិនសម្លឹងដល់កិច្ចសហប្រតិបត្តិការផ្នែកកសិកម្ម និងជីករ៉ែ ជាមួយប៉ាគីស្ថាន

រដ្ឋាភិបាល៖ អង្គការណាតូនឹងបង្កើតមូលដ្ឋានភស្តុភារ នៅស៊ុយអែត

រុស្ស៊ីធ្វើសមយុទ្ធបាញ់មីស៊ីល នៅសមុទ្រជប៉ុន

ផ្នែកខ្លះរបស់រុស្ស៊ី ប្រឈមនឹងកង្វះប្រេងសាំង បន្ទាប់ពីអ៊ុយក្រែនវាយប្រហាររោងចក្រចម្រាញ់ប្រេង

សរទរដូវជិតមកដល់ ប៉ុន្តែកូរ៉េខាងត្បូង នៅតែស្ថិតក្នុងអាកាសធាតុក្តៅហួតហែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877