BTV NEWS

កម្ពុជា តវ៉ាយ៉ាងខ្លាំងក្លាបំផុត និងជំទាស់ជាដាច់ខាតចំពោះការរៀបចំព្រឹត្តិការណ៍ ពិធីសាសនា និងបើកប្រាសាទខ្នារឱ្យចូលទស្សនាជាសាធារណៈដោយភាគីថៃ ខណៈទីតាំងនេះគឺស្ថិតក្រោមអធិបតេយ្យភាពកម្ពុជា

ឯកឧត្តម ហេង សួរ ចូលរួមអបអរសាទរសិស្ស-និស្សិតជ័យលាភី TVET ជាង ២ពាន់នាក់ដែលជាកម្លាំងចលករថ្មីរួមចំណែកលើកកម្ពស់មុខមាត់ សេដ្ឋកិច្ច និងទាក់ទាញវិនិយោគនៅខេត្តស្វាយរៀង

ពេទ្យស្ម័គ្រចិត្តកម្ពុជា និងសិង្ហបុរី ចុះពិនិត្យព្យាបាលជំងឺជូនពលរដ្ឋ និងធ្វើអនាម័យកុមារា នៅខេត្តតាកែវដោយឥតគិតថ្លៃ

អន្តរក្រសួងចុះពិនិត្យវឌ្ឍនភាព ការអនុវត្តការងារសាងសង់គម្រោងគ្រប់គ្រងធនធានទឹកចម្រុះហ្វូណនតេជោ នៅស្រុកបូរីជលសារ ខេត្តតាកែវ

ព័ត៌មានជាតិ

ឯកឧត្តម ប៉េង ពោធិ៍នា អញ្ជើញចុះជួបសំណេះសំណាល និងសួរសុខទុក្ខកងទ័ពនៅទីបញ្ជាការជួរមុខ សមរភូមិទិសទី៣ យោធាភូមិភាគទី៤ ខេត្តឧត្តរមានជ័យ

នាព្រឹកថ្ងៃពុធ ទី១៦ ខែកក្កដា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចុះជួបសំណេះសំណាល និងសួរសុខទុក្ខជាមួយនាយទាហាន នៃបញ្ជាការដ្ឋានកាំភ្លើងធំអគ្គបញ្ជាការ នៅទីបញ្ជាការជួរមុខ សមរភូមិទិសទី៣ យោធាភូមិភាគទី៤ ក្នុងខេត្តឧត្តរមានជ័យ ព្រំដែនកម្ពុជា-ថៃ ដោយមានការចូលរួមពី ឯកឧត្ដម នាយឧត្ដមសេនីយ៍សាស្រ្តាចារ្យបណ្ឌិត ណុប រតនា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានកាំភ្លើងធំ អគ្គបញ្ជាការ មេបញ្ជាការ មេបញ្ជាការរង នាយពលទាហាន ទាំងអស់ នៃបញ្ជាការដ្ឋានកាំភ្លើងធំ អគ្គបញ្ជាការជាច្រើនរូបទៀត។នាឱកាសនោះ ឯកឧត្តមរដ្ឋមន្រ្តី និងថ្នាក់ដឹកនាំក្រសួង បានពាំនាំនូវការផ្តាំផ្ញើសួរសុខទុក្ខពីសម្ដេចតេជោ និងសម្តេចកិត្តិព្រឹទ្ធបណ្ឌិត ក៏ដូចជាសម្តេចមហាបវរធិបតី និងលោកជំទាវបណ្ឌិត ជូនចំពោះបងប្អូនយុទ្ធជនទាំងអស់គ្នា ហើយក៏សូមថ្លែងអំណរគុណ និងកោតសរសើរដោយស្មោះចំពោះវីរភាពរបស់កងទ័ព និងគ្រប់បណ្តាកងកម្លាំងឈរជើងការពារព្រំដែនទាំងអស់ ដែលបានលះបង់យ៉ាងធំធេងទាំងសាច់ស្រស់ ឈាមស្រស់ និងឃ្លាតឆ្ងាយពីក្រុមគ្រួសារជាទីស្រឡាញ់ ដើម្បីបុព្វហេតុការពារទឹកដីមាតុភូមិរបស់យើង។ឯកឧត្តមរដ្ឋមន្រ្តី ក៏បានផ្តាំផ្ញើដល់បងប្អូននាយទាហាន និងកងការពារព្រំដែនទាំងអស់ ថែរក្សាសុខភាព និងបន្តពង្រឹងស្មារតីឱ្យបានខ្ជាប់ខ្ជួនក្នុងកិច្ចការពារអធិបតេយ្យ និងបូរណភាពទឹកដី ដើម្បីសេចក្ដីសុខក្សេមក្សាន្ត របស់ប្រទេសជាតិយើង និងសូមជឿជាក់លើរាជរដ្ឋាភិបាលក្នុងការដោះស្រាយបញ្ហាព្រំដែន ដោយមិនឲ្យប្រទេសឱ្យធ្លាក់ក្នុងជម្លោះប្រដាប់អាវុធ ឬសង្គ្រាមនោះឡើយ ព្រោះកម្ពុជាមានសុឆន្ទៈ និងគោលនយោបាយច្បាស់លាស់ក្នុងការបន្តពង្រឹង និងអភិវឌ្ឍន៍តំបន់ព្រំដែនជាមួយប្រទេសជិតខាង ឱ្យក្លាយជាព្រំដែនប្រកបដោយសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ហើយការកសាងហេដ្ឋារចនាសម្ព័ន្ធ និងសហគមន៍ប្រជាពលរដ្ឋនៅជាប់ព្រំដែន គឺជាអាទិភាពចម្បងនៃយុទ្ធសាស្ត្រការពារព្រំដែនរបស់កម្ពុជា៕

សម្ដេចតេជោ ប្រាប់សមាជិកក្រុមប្រឹក្សាពិគ្រោះយោបល់ប្រធានាធិបតីឥណ្ឌូណេស៊ីថា កម្ពុជាប្រកាន់យកគោលជំហរប្តឹងទៅ ICJ គឺជាជម្រើសសន្តិវិធី

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានសម្ដែងការសោកស្ដាយចំពោះវិវាទព្រំដែនកម្ពុជា ជាមួយប្រទេសជិតខាងដែលកំពុងកើតមានឡើង ដោយសម្ដេចបញ្ជាក់ថា ភាគីទាំងពីរគួរធ្វើកិច្ចសហប្រតិបត្តិការផ្លាស់ប្តូរពាណិជ្ជកម្ម និងកីឡា ជាដើម ប្រសើរជាងការផ្លាស់ប្តូរគ្រាប់កាំភ្លើងគ្នា ហើយការប្រកាន់យកគោលជំហររបស់កម្ពុជា ដូចជាការប្តឹងទៅ ICJ គឺជាជម្រើសសន្តិវិធី។សម្ដេចតេជោ ហ៊ុន សែន បានបញ្ជាក់បែបនេះ ក្នុងឱកាស អនុញ្ញាតឱ្យ ឯកឧត្តមសាស្រ្តាចារ្យបណ្ឌិត Dato Sri Prof. Dr. Tahir សមាជិកក្រុមប្រឹក្សាពិគ្រោះយោបល់របស់ប្រធានាធិបតីឥណ្ឌូណេស៊ី និងជាស្ថាបនិកក្រុមហ៊ុន Mayapada Group ចូលជួបសម្ដែងការគួរសម នៅវិមានព្រឹទ្ធសភា នៅព្រឹកថ្ងៃពុធ ទី១៦ ខែកក្កដា ឆ្នាំ២០២៥នេះ។ក្នុងឱកាសនោះសម្ដេចតេជោ បានសម្តែងនូវក្តីរីករាយដែលបានជួបឯកឧត្តមសាស្រ្តាចារ្យបណ្ឌិត ជាថ្មីម្តងទៀត បន្ទាប់ពីឯកឧត្តមបានសន្យាថានឹងមកកម្ពុជា នៅក្នុងជំនួបនៅទីក្រុងហ្សាការតា កាលពីខែឧសភាកន្លងទៅ។ នាឱកាសជំនួបនេះ ឯកឧត្តមសាស្រ្តាចារ្យបណ្ឌិត បានគោរពថ្លែងអំណរគុណ ដឹងគុណ និងជាកិត្តិយស ដែលសម្តេចតេជោ បានផ្តល់ការអនុញ្ញាតឱ្យចូលជួបសម្ដែងការគួរសម។ ឯកឧត្តមសាស្រ្តាចារ្យបណ្ឌិត បានបន្តលើកឡើងថា សម្តេចតេជោ គឺជាថ្នាក់ដឹកនាំដ៏ល្បីល្បាញអស្ចារ្យមួយរូប និងបានស្តារកសាងកម្ពុជា រក្សាសន្តិភាព ស្ថិរភាពនយោបាយ និងធ្វើឱ្យកម្ពុជាមានកំណើនសេដ្ឋកិច្ចលេចធ្លោជាង២០ឆ្នាំមកនេះ។ ជាមួយគ្នានេះ ឯកឧត្តមសាស្រ្តាចារ្យបណ្ឌិត បានជម្រាបជូនសម្តេចអំពីគោលបំណង និងសកម្មភាពការងារនានារបស់ឯកឧត្តម រួមចំណែកធ្វើឱ្យជីវភាពប្រជាពលរដ្ឋ មានលក្ខណៈល្អប្រសើរឡើង ដូចឯកឧត្តមបានធ្វើ នៅឥណ្ឌូណេស៊ី និងបណ្តាប្រទេសមួយចំនួន។ ឯកឧត្តមបានគូសបញ្ជាក់ថា កិច្ចការមនុស្សធម៌ គឺជាកិច្ចការគ្មានព្រំដែនកំណត់។ នៅក្នុងបរិបទនេះ ឯកឧត្តមសាស្រ្តាចារ្យបណ្ឌិត បានបង្ហាញអំពីបំណងប្រាថ្នារួមចំណែក និងវិភាគទាននៅកម្ពុជា និងបានគោរពស្នើសុំសម្តេចផ្តល់អនុសាសន៍ និងមគ្គុទេសក៍ដឹកនាំ។ ជាការឆ្លើយតប សម្តេចតេជោ បានសម្តែងនូវក្តីរីករាយដែលឯកឧត្តមសាស្រ្តាចារ្យបណ្ឌិត ទទួលយកការតែងតាំងជាទីប្រឹក្សារបស់សម្តេច និងទន្ទឹមគ្នានេះ បានចង្អុលបង្ហាញអំពីវិស័យដែលឯកឧត្តមអាចពិចារណារួមចំណែកនៅកម្ពុជា ដូចជាការអភិវឌ្ឍជនបទ និងជាពិសេសការគាំទ្រទៅលើកិច្ចការអតីតយុទ្ធជនកម្ពុជា រួមមានការសាងសង់ផ្ទះ និងអណ្តូងទឹកជាដើម ហើយដែលកិច្ចការទាំងនេះគឺមានលក្ខណៈ និងសកម្មភាពស្របទៅនឹងទិសដៅដែលឯកឧត្តមសាស្រ្តាចារ្យបណ្ឌិត បាននិងកំពុងរួមចំណែក។ ផ្សាភ្ជាប់គ្នានេះសម្តេចតេជោបានលើកឡើងអំពីប្រវត្តិ និងការតស៊ូដ៏ជូរចត់របស់សម្តេចក្នុងនាមជាទាហាន ដែលបានជំរុញសម្តេច ផ្តោតការយកចិត្តទុកដាក់ខ្ពស់ទៅលើកិច្ចការអតីតយុទ្ធជននេះ។ សម្តេចតេជោបានគូសបញ្ជាក់ថា ជាគុណធម៌ មិនមែនប្រើយុទ្ធជនពេលត្រូវការ ហើយបោះបង់ចោលនោះទេ។ នៅក្នុងន័យនេះ សម្តេចបានស្នើឯកឧត្តមសាស្រ្តាចារ្យបណ្ឌិត ពិនិត្យលទ្ធភាពរៀបចំអភិវឌ្ឍភូមិអតីតយុទ្ធជនមួយ ដើម្បីរួមចំណែកនៅក្នុងបុព្វហេតុនេះ។ ក្រៅពីនេះសម្តេចក៏បានចែករំលែកទស្សនៈវិស័យរបស់សម្តេច បន្ទាប់ពីការអនុវត្តដោយជោគជ័យនៃនយោបាយឈ្នះ ឈ្នះ ដែលនោះគឺ (១) ការប្រែក្លាយតំបន់អតីតសមរភូមិ ទៅជាតំបន់អភិវឌ្ឍន៍ និង (២) ការប្រែក្លាយតំបន់ព្រំដែនជាមួយប្រទេសជិតខាង ទៅជាតំបន់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។ ប៉ុន្តែ សម្តេចបានសម្តែងនូវការសោកស្តាយចំពោះបញ្ហាដែលកើតឡើងជាមួយប្រទេសជិតខាង ដែលវាពុំគួរកើតឡើង ដោយសារការធ្វើសកម្មភាពឯកតោភាគីរបស់ប្រទេសនោះ តាំងពីការប្រើប្រាស់ផែនទី និងការបិទច្រកព្រំដែន។ សម្តេចបានសង្កត់ធ្ងន់ថា ភាគីទាំងពីរគួរធ្វើកិច្ចសហប្រតិបត្តិការផ្លាស់ប្តូរពាណិជ្ជកម្ម និងកីឡា ជាដើម ប្រសើរជាងការផ្លាស់ប្តូរគ្រាប់កាំភ្លើងគ្នា ហើយការប្រកាន់យកគោលជំហររបស់កម្ពុជា ដូចជាការប្តឹងទៅ ICJ គឺជាជម្រើសសន្តិវិធី។ នៅចុងបញ្ចប់ ឯកឧត្តមសាស្រ្តាចារ្យបណ្ឌិត បានបង្ហាញពីការប្តេជ្ញាចិត្តរួមចំណែកបន្ថែមទៀតរបស់ឯកឧត្តម ទៅលើកិច្ចការយុទ្ធជននេះ និងសង្ឃឹមថា នឹងត្រឡប់មកកម្ពុជានៅពេលខាងមុខ។ សម្តេចតេជោ ក៏បានជូនពរឯកឧត្តម Dato Sri Prof. Dr. Tahir ទទួលបានជោគជ័យនៅក្នុងដំណើរទស្សនកិច្ចនៅកម្ពុជា។

រដ្ឋមន្រ្តីពាណិជ្ជកម្ម ស្នើក្រុមហ៊ុន VISA បន្តកិច្ចសហប្រតិបត្តិការជាមួយកម្ពុជាបន្ថែមទៀត ដើម្បីលើកកម្ពស់ពាណិជ្ជកម្មតាមប្រព័ន្ធអេទ្បិចត្រូនិក

ភ្នំពេញ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម កាលពីព្រឹកថ្ងៃទី១៥ ខែកក្កដា ឆ្នាំ២០២៥ បានអនុញ្ញាតទទួលជួប លោកស្រី Lisa Sargent នាយិកាគ្រប់គ្រងក្រុមហ៊ុន VISA ប្រចាំប្រទេសកម្ពុជា និងសហការី ចូលជួបសម្តែងការគួរសម និងពិភាក្សាការងារ។ ប្រភពក្រសួងពាណិជ្ជកម្ម បានឱ្យដឹង បន្ទាប់ពី លោកស្រី Lisa Sargent បានធ្វើការណែនាំខ្លួនក្នុងនាមជា នាយិកាគ្រប់គ្រងថ្មី ប្រចាំប្រទេសកម្ពុជា និងបានគោរពជម្រាបជូនអំពីវឌ្ឍនភាពការងារ និងទិសដៅអាទិភាពនានារបស់ VISA Cambodia ក្នុងការបន្តកិច្ចសហប្រតិបត្តិការលើកកម្ពស់សកម្មភាពពាណិជ្ជកម្ម ជាពិសេសសម្រាប់សហគ្រាសមីក្រូ តូច និងមធ្យម (MSMEs)។ជាការឆ្លើយតប លោកជំទាវរដ្ឋមន្រ្តី បានកត់សម្គាល់លើការចូលរួមចំណែករបស់ VISA Cambodia តាមរយៈកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ក្នុងការលើកស្ទួយសហគ្រិនភាពស្រ្តី សហគ្រិនភាពវ័យក្មេង និងអក្ខរកម្មឌីជីថលនិងហិរញ្ញវត្ថុ ។ បន្ថែមពីលើនេះ លោកជំទាវរដ្ឋមន្រ្តី បានស្វាគមន៍នូវគំនិតផ្តួចផ្តើមនានារបស់ VISA Cambodia និងលើកទឹកចិត្តឱ្យបន្តកិច្ចសហប្រតិបត្តិការជាមួយក្រសួងពាណិជ្ជកម្មបន្ថែមទៀត ដើម្បីរួមចំណែកលើកកម្ពស់ពាណិជ្ជកម្មតាមប្រព័ន្ធអេទ្បិចត្រូនិក និងការជំរុញការចូលរួមរបស់ MSMEs ក្នុងពាណិជ្ជកម្មអន្តរជាតិ និងការចូលរួមព្រឹត្តិការណ៍ពិព័រណ៍ពាណិជ្ជកម្មនានាដែលក្រសួងពាណិជ្ជកម្មចូលរួមនិងរៀបចំជាដើម៕

អ្នកនាំពាក្យរងក្រសួងមហាផ្ទៃ៖ ស្ថាប័ន Interpol នឹងមិនខ្វល់រឿងបន្ដឹងនយោបាយផ្ទៃក្នុងថៃទេ ហើយកម្ពុជាក៏មិនរងសម្ពាធណាមួយពីបណ្ដឹងរបស់ថៃដែរ

តបទៅថៃ យកសារបែកធ្លាយរវាងសម្ដេចតេជោ និងអតីតនាយមន្ត្រីថៃ ជាបន្ទុកដាក់បណ្ដឹងដោយទាញ Interpol មកប្រឡូកប្រឡាក់ទំនាស់នយោបាយផ្ទៃក្នុងរបស់ខ្លួននោះ អ្នកនាំពាក្យរងក្រសួងមហាផ្ទៃ លោកបណ្ឌិត ទូច សុខៈ បានបញ្ជាក់ថា ស្ថាប័ន Interpol នឹងមិនខ្វល់រឿងនយោបាយផ្ទៃក្នុងថៃនោះឡើយ ហើយកម្ពុជាក៏មិនរងសម្ពាធណាមួយពីបណ្ដឹងរបស់ថៃនេះដែរ។ លោកបណ្ឌិត ទូច សុខៈ បានលើកឡើងថា ពាក់ព័ន្ធនឹងបណ្ដឹងរបស់ថៃ ប្ដឹងសម្ដេចតេជោ ហ៊ុន សែន ទៅស្ថាប័ន Interpol គឺក្រុមអ្នកនយោបាយថៃដែលកំពុងបែកបាក់ផ្ទៃក្នុងនោះបាននឹងកំពុងព្យាយាមបង្វែស្ថានការណ៍ជម្លោះផ្ទៃក្នុងរបស់ខ្លួន តាមរយៈបណ្ដឹងនេះ និងព្យាយាមបង្វែស្ថានការណ៍ដែលកម្ពុជាបានប្ដឹងរឿងវិវាទព្រំដែនទៅតុលាការយុត្តិធម៌អន្តរជាតិ (ICJ) កុំឱ្យប្រជាពលរដ្ឋថៃច្របូកច្របល់ ហើយបោះបញ្ហាផ្ទៃក្នុងរបស់ថៃនោះមកប្រទេសកម្ពុជា និងមេដឹកនាំកម្ពុជាដែលនេះជាទម្លាប់របស់ថៃ។លោកបណ្ឌិត ទូច សុខៈ បានបញ្ជាក់បន្ថែមថា ការបង្កើតប្រធានបទនានារបស់ក្រុមអ្នកនយោបាយថៃ ជាពិសេសក្នុងពេលថ្មីៗនេះ ដោយភ្ជាប់ជាមួយនឹងស្ថាប័ន Interpol គឺជារឿងនយោបាយផ្ទៃក្នុងរបស់ថៃសុទ្ធសាធ ដោយបានបង្វែបញ្ហានោះមកកម្ពុជា និងថ្នាក់ដឹកនាំកម្ពុជា ដើម្បីធ្វើឱ្យមានការភាន់ច្រឡំ កុហកប្រជាពលរដ្ឋថៃខ្លួនឯងផង និងកុហកខ្សែភ្នែកអន្តរជាតិផង៕

រលកកម្ដៅបានបន្ថែមវិបត្តិ និងទុក្ខវេទនាសម្រាប់ប្រជាជនភៀសខ្លួននៅតំបន់ហ្កាហ្សា

រលកកម្ដៅដ៏ខ្លាំងក្លាបានគ្របដណ្ដប់លើតំបន់ហ្កាហ្សាស្ទ្រីប ដែលហែកហួរដោយសង្រ្គាម ដោយធ្វើឱ្យវិបត្តិមនុស្សធម៌ និងទុក្ខវេទនាកាន់តែធ្ងន់ធ្ងរឡើងមួយកម្រិតទៀតសម្រាប់ប្រជាជនប៉ាឡេស្ទីនភៀសខ្លួនជាង ១,៧លាននាក់ ដែលកំពុងជួបការលំបាកជាមួយនឹងកង្វះខាតធ្ងន់ធ្ងរនៃការផ្គត់ផ្គង់មូលដ្ឋាន ស្បៀងអាហារ ទឹក អនាម័យ និងការថែទាំវេជ្ជសាស្រ្តរួចទៅហើយ។បុគ្គលិកពេទ្យនៅហ្កាហ្សា បានរាយការណ៍ពីភាពយ៉ាប់យ៉ឺនកាន់តែគួរឱ្យព្រួយបារម្ភនៅលើស្ថានភាពអ្នកជំងឺ ខណៈដែលសីតុណ្ហភាពខ្ពស់បានគ្របដណ្ដប់ជម្រកតង់បណ្ដោះអាសន្ន ដែលមានក្រុមគ្រួសារជនភៀសខ្លួនស្នាក់នៅច្រើនក្រាស់ក្រែល ស្របពេលវិបត្តិខ្វះខាតទឹក និងប្រេងឥន្ធនៈ។ ស្ថានភាពធ្ងន់ធ្ងរបែបនេះកាន់តែមានគ្រោះថ្នាក់ជាពិសេសសម្រាប់អ្នកជំងឺរាប់ពាន់នាក់ ដែលត្រូវការការព្យាបាលរបួសរលាកពីការទម្លាក់គ្រាប់បែកឥតឈប់ឈររបស់អ៊ីស្រាអែល។ វេជ្ជបណ្ឌិតហ្កាហ្សាម្នាក់ឈ្មោះ Haya Salman បាននិយាយថា កម្ដៅនារដូវក្តៅពន្យារការព្យាបាលរបួស ដោយសារសីតុណ្ហភាពក្ដៅខ្លាំងធ្វើឱ្យរបួសកាន់តែធ្ងន់ធ្ងរឡើង ខណៈកម្ដៅ និងសំណើមបណ្តាលឱ្យបែកញើស ដែលបង្កើនល្បឿននៃការលូតលាស់បាក់តេរី ដែលពន្យារពេលការស្តារឡើងវិញនៃរបួស។ក្រុមវេជ្ជបណ្ឌិតហ្កាហ្សាបាននិយាយថា អ្នកជំងឺមានរបួសរលាក ដែលគ្របដណ្ដប់លើរាងកាយ ៧០% អាចមានអត្រារស់រានមានជីវិតលើសពី ៥០% ប៉ុន្តែតួលេខនេះបានធ្លាក់ចុះយ៉ាងខ្លាំងក្នុងអំឡុងពេលសង្រ្គាមដោយសារតែខ្វះបន្ទប់វះកាត់ឯកទេស ឱសថ និងតម្រូវការក្នុងការផ្តល់អាទិភាពដល់អ្នកជំងឺ បូករួមនឹងស្ថានភាពអាកាសធាតុកាន់តែយ៉ាប់យ៉ឺននាពេលបច្ចុប្បន្ន៕

៦ខែកម្លាំងអនុវត្តច្បាប់ឃាត់ជនសង្ស័យជាប់ពាក់ព័ន្ធគ្រឿងញៀនបានជាង ១ម៉ឺន៣ពាន់នាក់ និងសារធាតុញៀនជិត២តោន

យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថានៅក្នុងរយៈពេលប្រាំមួយខែក្នុងឆ្នាំ២០២៥នេះ កងកម្លាំងអនុវត្តច្បាប់ បានធ្វើការឃាត់ខ្លួនជនសង្ស័យជាងមួយម៉ឺនបីពាន់នាក់ និងសារធាតុញៀនជិតពីរតោន ខណៈសារធាតុគីមីជិត២០តោន រួមទាំងសម្ភារៈមួយចំនួនទៀត។តាមរបាយការណ៍ដែលបានចែកជូនអ្នកសារព័ត៌មាន ក្នុងកិច្ចប្រជុំគណៈបញ្ជាការប្រយុទ្ធប្រឆាំងគ្រឿងញៀន ដែលដឹកនាំដោយឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី និងជាប្រធានអាជ្ញាធរជាតិប្រយុទ្ធ ប្រឆាំងគ្រឿងញៀន នាព្រឹកថ្ងៃទី១៦ ខែកក្កដា ឆ្នាំ២០២៥នេះ នៅទីស្តីការគណៈរដ្ឋមន្រ្តីនោះបានឲ្យដឹងថា លទ្ធផលប្រតិបត្តិការប្រយុទ្ធប្រឆាំងគ្រឿងញៀនខុសច្បាប់លើកទី១០ ប្រចាំឆមាសទី១ ឆ្នាំ២០២៥នេះ កងកម្លាំងអនុវត្តច្បាប់បានធ្វើការបង្ក្រាបបទល្មើសគ្រឿងញៀនសរុបចំនួន ៥,១៨២ធ្លាក់ចុះជាងឆ្នាំទៅ ដែលមានចំនួន៥,២២០ករណី ឃាត់ខ្លួន១៣,៤៥២នាក់ កើនឡើងជាងឆ្នាំទៅ ដែលមានចំនួន១២,៩៦៥នាក់ ចាប់យកសារធាតុញៀនគ្រប់ប្រភេទទម្ងន់ប្រមាណ១,៨៩០.៨៣គីឡូក្រាម សារធាតុគីមី ១៩,១២៩.៣៥គីឡូក្រាម រួមនឹងមធ្យោបាយ សម្ភារៈ វត្ថុតាងមួយចំនួនទៀត។តាមរបាយការណ៍បានបញ្ជាក់ឲ្យដឹងទៀតថា ករណីជួញដូរ ដឹកជញ្ជូន រក្សាទុក ៣,០៨៦ករណី ឃាត់ខ្លួន ៦,០៧៩នាក់, ករណីកែច្នៃផលិត ៨ករណី ឃាត់ខ្លួន៣១នាក់ ,ករណីដាំដុះដំណាំកញ្ញា ៧ករណី ឃាត់ខ្លួន៨នាក់ ,ចាត់ចែងសម្រួលឲ្យប្រើប្រាស់៩ករណី ឃាត់ខ្លួន៣២នាក់, បើកបរក្រោមឥទ្ធិពលគ្រឿងញៀន១៦ករណី ឃាត់ខ្លួន២៦នាក់, ខណៈករណីប្រើប្រាស់២,០៥៦ករណី ឃាត់ខ្លួន៧,២៧៦នាក់ ដោយបានកសាងសំណុំរឿងបញ្ជូន ទៅតុលាការចំនួន៦០១នាក់ បញ្ជូនទៅមណ្ឌលព្យាបាល និងស្តារនីតិសម្បទាចំនួន៦,០៨៤នាក់ និងធ្វើកិច្ចសន្យាប្រគល់ជូនអាណាព្យាបាលយកទៅបន្សាបព្យាបាលនៅតាមសហគមន៍ចំនួន ៥៩១នាក់។ ដោយឡែកអនុវត្តដីកាឃាត់ខ្លួនបានចំនួន៣៣៦នាក់ លើ៤០៧ដីកា។ ចំពោះករណីធំៗ ដែលមានបណ្តាញខ្សែរយៈចាត់តាំងចំនួន៧៤ករណី ត្រូវបានបង្ក្រាបចាប់មេខ្លោងបានចំនួន១១នាក់ ខ្សែរយៈបណ្តាញចំនួន២១៩នាក់ ចាប់យកសារធាតុញៀនសរុបប្រមាណ១,៨២៨គីឡូក្រាម និងសារធាតុគីមីផ្សំសរុបប្រមាណ១៨,៦១០គីឡូក្រាម៕ អត្ថបទ៖ បាន ចក់

នាយឧត្តមសេនីយ៍ វង្ស ពិសេន ដឹកនាំកិច្ចប្រជុំគណៈកម្មការ និងក្រុមការងារសិក្សាស្រាវជ្រាវច្បាប់លក្ខន្តិកៈចំពោះយោធិននៃកងយោធពលខេមរភូមិន្ទ

នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅព្រឹកថ្ងៃទី១៦ ខែកក្កដា ឆ្នាំ២០២៥នេះ បានអញ្ជើញជាអធិបតីដឹកនាំកិច្ចប្រជុំគណៈកម្មការ និងក្រុមការងារសិក្សាស្រាវជ្រាវ ៖ ១. ច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ។ ២. ច្បាប់ស្តីពីរបបសោធននិវត្តន៍ និងរបបសោធនបាត់បង់សមត្ថភាពការងារ។ ៣. ច្បាប់ស្ដីពីកាតព្វកិច្ចយោធាលក្ខន្តិកៈដោយឡែកនៃយោធិនបម្រុង។ កិច្ចប្រជុំនេះ បានប្រព្រឹត្តទៅនៅ សាលប្រជុំអគ្គបញ្ជាការដ្ឋាននៃកងយោធពលខេមរភូមិន្ទ៕

សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

ភ្នំពេញ៖ នៅព្រឹក ថ្ងៃពុធ ទី១៦ ខែកក្កដា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម Wang Zhimin សមាជិកគណៈកម្មាធិការអចិន្ត្រៃយ៍នៃសភាប្រជាជនទូទាំងប្រទេសចិន ចូលជួបសម្តែងការគួរសម។

គណៈកម្មាធិការសេដ្ឋកិច្ចក្រៅប្រព័ន្ធដាក់ឱ្យប្រើប្រាស់សមិទ្ធផលថ្មីលើកកម្ពស់អ្នកសេដ្ឋកិច្ចក្រៅប្រព័ន្ធ

គណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ ប្រកាសដាក់ឲ្យប្រើប្រាស់ជាផ្លូវការ ក្របខ័ណ្ឌត្រួតពិនិត្យ តាមដាន នឹងវាយតម្លៃ ដើម្បីអនុវត្តឱ្យកាន់តែមានតម្លភាព និងស្មារតីទទួលខុសត្រូវខ្ពស់ សំដៅសម្រេចឱ្យបាននូវប្រសិទ្ធភាពសេដ្ឋកិច្ច និង វឌ្ឍនភាពសង្គម និងការបង្កើនលទ្ធភាពដល់សេដ្ឋកិច្ចក្រៅប្រព័ន្ធឱ្យបានចូលក្នុងប្រព័ន្ធ។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាគណៈកម្មាធិការសម្រប សម្រួលការអភិវឌ្ឍសេដ្ឋកិច្ចក្រៅប្រព័ន្ធ នៅថ្ងៃទី១៦ ខែកក្កដា ឆ្នាំ២០២៥នេះ អញ្ជើញជាធិបតី ក្នុងកម្មវិធីដាក់ឱ្យប្រើប្រាស់ជាផ្លូវការ ក្របខ័ណ្ឌត្រួតពិនិត្យ តាមដាន នឹងវាយតម្លៃយុទ្ធសាស្ត្រជាតិ ស្ដីពីការអភិវឌ្ឍន៍សេដ្ឋកិច្ចក្រៅប្រព័ន្ធឆ្នាំ២០២៣-២០២៨ ដែលនេះគឺជា សមិទ្ធផលថ្មី ធានាថា យុទ្ធសាស្រ្តត្រូវបានអនុវត្តគ្រប់ជ្រុងជ្រោយ ដោយបានចូលរួមពីគ្រប់ភាគីពាក់ព័ន្ធ ធានាភាពជាម្ចាស់ប្រកប ដោយបរិយាបន្ន ដើម្បីអនុវត្តឱ្យកាន់តែមានប្រសិទ្ធភាព ជាមួយការចូលរួមសហការគាំទ្រប្រកបដោយសុឆន្ទៈ និងស្មារតីទទួលខុស ត្រូវខ្ពស់ សំដៅសម្រេចឱ្យបាននូវប្រសិទ្ធភាពសេដ្ឋកិច្ច វឌ្ឍនភាពសង្គម និងការបង្កើនលទ្ធភាពដល់សេដ្ឋកិច្ចក្រៅប្រព័ន្ធ ឱ្យបានចូល ក្នុងប្រព័ន្ធ។ចំណែកលេខាធិការដ្ឋាន នៃគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ, ក្របខ័ណ្ឌត្រួតពិនិត្យ តាមដាន នឹងវាយតម្លៃ គឺជាឧបករណ៍ដ៏សំខាន់ សម្រាប់ការត្រួតពិនិត្យតាមដាន សម្របសម្រួល និងរាយការណ៍ជូនគណៈកម្មាធិការ។ ក្រប- ខ័ណ្ឌនេះនិងជួយឱ្យគណៈកម្មាធិការមានលទ្ធិភាព ត្រួតពិនិត្យ និងវាយតម្លៃ វឌ្ឍនភាព សកម្មភាពជាមួយប្រព័ន្ធទិន្នន័យប្រសើរជាង មុន ដើម្បីធានាថា រាល់សកម្មភាពទាំងអស់ដែលបានកំណត់ ត្រូវបានអនុវត្តប្រកបដោយប្រសិទ្ធភាពគ្រប់ភាគីពាក់ព័ន្ធ ដើម្បីសម្រេច គោលដៅរួមក្នុងយុទ្ធសាស្រ្ត ផ្អែកលើសូចនករសមិទ្ធកម្មគន្លឹះសម្រាប់ក្រសួង-ស្ថាប័នគ្រប់កម្រិត។ ក្របខ័ណ្ឌត្រួតពិនិត្យ តាមដាន នឹង វាយតម្លៃ ក៏ជាឧបករណ៍ឆ្លុះបញ្ចាំងដល់ការរៀបចំ តាក់តែងផែនការសកម្មភាពពីដំណាក់កាលនីមួយៗ រួមទាំងការរៀបចំផែនការថវិកា សម្រាប់ស្ថានភាពអង្គភាពស្ថាប័ននីមួយៗ។សូមបញ្ជាក់ថា យុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ ២០២៣-២០២៨ យុទ្ធសាស្រ្តនេះមានគោលបំណងដើម្បី លើកកម្ពស់ការគាំពារ និងពង្រឹងសមត្ថភាព ផលិតភាព និងភាពធននៃសេដ្ឋកិច្ចក្រៅប្រព័ន្ធ ព្រមទាំងការជំរុញនិងពន្លឿនការចូលរួម ទៅក្នុងសេដ្ឋកិច្ចក្នុងប្រព័ន្ធ ដើម្បីធានាឱ្យបាននូវភាពធន់ ភាពប៉ាន់ប្រមាណបាន និងការរីកចម្រើនទៅមុខនៃការធ្វើធុរកិច្ច ពាណិជ្ជកម្ម វិនិយោគ និងការប្រកបអាជីវកម្ម មុខរបរ និងការងារចិញ្ចឹមជីវិតរស់នៅរបស់កម្ពុជា៕ អត្ថបទ៖ សុន រ៉ាឌី

ក្រសួងសេដ្ឋកិច្ច ចេញសារាចរឱ្យប្រើប្រាស់វិក្កយបត្រអេឡិចត្រូនិកជាកាតព្វកិច្ចដល់ក្រសួងចំនួន ៦

ក្រសួងសេដ្ឋកិច្ច និងហិរញ្ញវត្ថុ ចេញសារាចរ ស្តីពីការប្រើប្រាស់វិក្កយបត្រអេឡិចត្រូនិកជាកាតព្វកិច្ច អនុវត្តចំពោះអង្គភាពថវិកា ថ្នាក់កណ្ដាល សម្រាប់ក្រសួងចំនួន ៦ សារាចរនេះគ្របដណ្តប់លើវិក្កយបត្រ សម្រាប់ការស្នើសុំទូទាត់ចំណាយ ដែលឆ្លងកាត់ការអនុវត្ត នីតិវិធីកិច្ចលទ្ធកម្មសាធារណៈ។ក្រសួងសេដ្ឋកិច្ច និងហិរញ្ញវត្ថុ ចេញសារាចរស្តីពីការប្រើប្រាស់វិក្កយបត្រអេឡិចត្រូនិកជាកាតព្វកិច្ច តាមប្រព័ន្ធវិក្កយបត្រ អេឡិចត្រូនិកកម្ពុជាដំណាក់កាលទី១ ជំហានទី២ ដែលប្រព័ន្ធវិក្កយបត្រអេឡិចត្រូនិកកម្ពុជា គឺជាប្រព័ន្ធបច្ចេកវិទ្យាព័ត៌មានរបស់រដ្ឋ ដែលមានតួនាទីជាប្រព័ន្ធកណ្តាល សម្រាប់ផ្លាស់ប្តូរវិក្កយបត្រក្នុងទម្រង់ជាអេឡិចត្រូនិករវាងភាគីអ្នកលក់ ឬអ្នកផ្តល់សេវា និងភាគីអ្នក ទិញឬអ្នកទទួលសេវា។ ប្រព័ន្ធនេះមានមុខងារក្នុងការផ្តល់អត្តសញ្ញាណ និងបញ្ជាក់ការទទួលស្គាល់វិក្កយបត្រអេឡិចត្រូនិកជាផ្លូវការ ដោយមិនតម្រូវឱ្យមានការបោះពុម្ពវិក្កយបត្រជាក្រដាសទៀតឡើយ។ ប្រព័ន្ធវិក្កយបត្រអេឡិចត្រូនិកកម្ពុជា គឺជាឧបករណ៍សម្រាប់ជំរុញការប្រើប្រាស់វិក្កយបត្រអេឡិចត្រូនិក ក្នុងព្រះរាជាណាចក្រ កម្ពុជា ដែលសំដៅលើកកម្ពស់តម្លាភាព និងគណនេយ្យភាព នៃការគ្រប់គ្រងហិរញ្ញវត្ថុសាធារណៈ ដើម្បីគាំទ្រដល់ការអនុវត្តកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤ របស់រដ្ឋាភិបាលកម្ពុជា, ចូលរួមពង្រឹងអនុលោមភាពបទប្បញ្ញត្តិ សារពើ ពន្ធ, ចូលរួមសម្រេចគោលដៅនៃការអភិវឌ្ឍប្រកបដោយចីរភាព និងត្រៀមខ្លួនចូលរួមកិច្ចសហប្រតិបត្តិការ និងសមាហរណកម្ម សេដ្ឋកិច្ចឌីជីថលអាស៊ាន។សារាចរនេះមានវិសាលភាពចំពោះអង្គភាពថវិកាថ្នាក់កណ្ដាល នៃក្រសួងចំនួន ៦គឺ៖ ១-ក្រសួងកសិកម្ម រុក្ខាប្រមាញ់ និង នេសាទ, ២-ក្រសួងពាណិជ្ជកម្ម, ៣-ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ៤-ក្រសួងអប់រំ យុវជន និងកីឡា, ៥-ក្រសួងប្រៃសណីយ៍ និងទូរគមនាគមន៍ និង ៦-ក្រសួងមុខងារសាធារណៈ ព្រមទាំងក្រុមហ៊ុន ឬអ្នកផ្គត់ផ្គង់ដែលពាក់ព័ន្ធនៅក្នុង ព្រះរាជាណាចក្រកម្ពុជា។ សារាចរនេះគ្របដណ្តប់លើវិក្កយបត្រសម្រាប់ការស្នើសុំទូទាត់ចំណាយ ដែលឆ្លងកាត់ការអនុវត្តនីតិវិធីកិច្ច លទ្ធកម្មសាធារណៈ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្រុមហាម៉ាសបញ្ជាក់ពីការស្លាប់របស់មេបញ្ជាការយោធា ក្រោយការវាយប្រហាររបស់អ៊ីស្រាអែល

លោក Trump និងនីហ្សេរីយ៉ា អះអាងថា បានសម្លាប់មេដឹកនាំជាន់ខ្ពស់របស់រដ្ឋឥស្លាម ISIS

ប្រធានាធិបតី ទូលទៅកាន់សម្តេច ប៉ាប ថា អ៊ីរ៉ង់ «នៅតែប្តេជ្ញាចិត្តចំពោះការទូត»

ប្រមុខថាមពលអាមេរិក និយាយថា ច្រកសមុទ្រ Hormuz អាចនឹងបើកឡើងវិញ នៅចុងរដូវក្តៅ

វិមានក្រឹមឡាំង៖ លោក Putin នឹងទៅទស្សនកិច្ច នៅចិន ដើម្បីធ្វើកិច្ចពិភាក្សាជាមួយលោក Xi

គ្រូបង្រៀន នៅម៉ិកស៊ិក ជួបជុំតវ៉ាទាមទារប្រាក់ឈ្នួលខ្ពស់ និងកំណែទម្រង់ប្រាក់សោធននិវត្តន៍

កូរ៉េខាងត្បូងប្រឆាំងផែនការរបស់អ៊ីរ៉ង់ ក្នុងការគិតថ្លៃដឹកជញ្ជូន នៅច្រកសមុទ្រ Hormuz

នាយកប្រតិបត្តិក្រុមហ៊ុន Samsung ទៅជួបសហជីព ខណៈក្ដីបារម្ភពីការធ្វើកូដកម្មកើនឡើង

អ្នកពន្លត់អគ្គិភ័យស្លាប់ ខណៈ ១១នាក់រងរបួស ក្នុងហេតុការណ៍ផ្ទុះ និងមានអគ្គិភ័យនៅរោងចក្រឈើ ក្នុងរដ្ឋ Maine របស់អាមេរិក

លោក Trump និយាយសម្រាលហានិភ័យនៃជម្លោះចិន-អាមេរិក ជុំវិញបញ្ហាតៃវ៉ាន់ ក្រោយជួបជាមួយលោក Xi

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877