នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តមឧបនាយករដ្ឋមន្ត្រី ហ៊ុន ម៉ានី ផ្តល់អនុសាសន៍ ចំនួន៤ ជូនដល់សិក្ខាសាលាឌីជីថលូបនីយកម្មក្នុងរដ្ឋបាលសាធារណៈ
យុទ្ធនាការថ្ងៃទី៩ ដើម្បីជំរុញ​ការផ្តល់​ឱកាស​ការងារ​ជូនដល់​ពលករខ្មែរ​ទើប​ត្រឡប់​មក​ពីប្រទេសថៃ ក្រុមការងារក្រសួងការងារបានចុះ​ទៅដល់រោងចក្រ សហគ្រាសចំនួន ១៤៣៥
អ្នកជំនាញមកពីសាធារណរដ្ឋកូរ៉េ ធ្វើបទបង្ហាញប្លង់មេនៃការផ្លាស់ប្ដូរឌីជីថល ក្នុងសិក្ខាសាលាស្ដីពីឌីជីថលូបនីយកម្មក្នុងរដ្ឋបាលសាធារណៈ
អាជ្ញាធរជាតិប្រយុទ្ធនឹងជំងឺអេដស៍ បើកកិច្ចប្រជុំក្រុមប្រឹក្សាបច្ចេកទេស លើកទី៨ ដើម្បីជំរុញការផ្តល់មូលនិធិសុខាភិបាលសម្រាប់ប្រជាជនគន្លឹះ

ព័ត៌មានជាតិ

កាកបាទក្រហម ដាំកូនឈើ និងផ្តល់កម្ចីគ្មានការប្រាក់ដល់អតីតយុទ្ធជន នៅភូមិប៊ុនរ៉ានីសែនជ័យដំណាក់ត្រយឹង

2024/09/12 06:41:37 pm        115
Facebook Telegram Linkin
ពោធិ៍សាត់ ៖ ក្រុមការងារ កាកបាទក្រហមកម្ពុជា ថ្នាក់កណ្តាល ដឹកនាំដោយលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា សហការជាមួយសាខាកាកបាទក្រហមកម្ពុជាខេត្តពោធិសាត់ បានរៀបចំយុទ្ធនាការដាំដើមឈើ ក្រោមប្រធានបទ    (រួមគ្នាពង្រឹងនិងពង្រីកបរិស្ថានបៃតង)នៅក្នុងបរិវេណមណ្ឌលសុខភាព ប៊ុន រ៉ានី សែនជ័យ ដំណាក់ត្រយឹង និងប្រគល់ប្រាក់កម្ចីគ្មានការប្រាក់ ដល់បងប្អូនជាអតីតយុទ្ធជនចំនួន១០០គ្រួសារ កំពុងរស់នៅក្នុងភូមិ ប៊ុនរ៉ានី សែនជ័យ ដំណាក់ត្រយឹង ឃុំព្រងឹល ស្រុកភ្នំក្រវ៉ាញ ខេត្តពោធិសាត់ កាលថ្ងៃទី១១ ខែកញ្ញា ឆ្នាំ២០២៤។ក្នុងឱកាសនោះឯកឧត្តម ខូយ រីដា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខា បានគោរពថ្លែងអំណរគុណយ៉ាងជ្រាលជ្រៅ ចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូ ពីជីវភាពរស់នៅរបស់ប្រជាជន ក្នុងភូមិប៊ុនរ៉ានីសែនជ័យដំណាក់ត្រយឹង តាមរយៈការផ្តល់ជាលំនៅដ្ឋាន ការបង្កើតឱ្យមានមណ្ឌលសុខភាព សាលារៀន សម្រាប់ផ្តល់សេវាសុខភាព និងការសិក្សារៀនសូត្រ ជូនប្រជាជន និងកូនចៅប្រជាជន មិនតែប៉ុណ្ណោះថែមទាំងផ្តល់នូវប្រាក់កម្ចី គ្មានការបា្រក់ជូនបងប្អូនអតីតយុទ្ធជនយកទៅធ្វើដើមទុន សំរាប់ប្រកប អាជីវកម្មផ្សេងៗបង្កើនសេដ្ឋកិច្ចគ្រួសារថែមទៀត។លោកជំទាវ ពុំចន្ទីនី បានបញ្ជាក់ថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន តែងតែយកចិត្តទុកដាក់ គិតគូពីសុខទុក្ខ របស់បងប្អូនប្រជាពលរដ្ឋ ដែលជាអតីតយុទ្ធជន ដោយសម្តេចបានអភិវឌ្ឍន៍នូវហេដ្ឋារចនាសម្ព័ន្ធ មន្ទីរពេទ្យ សាលារៀន ផ្លូវ ភ្លើង និងបានសាងសង់ផ្ទះ សម្រាប់បងប្អូនរស់នៅ មិនត្រឹមតែប៉ុណ្ណោះ សម្តេចក៏បានផ្តល់ប្រាក់កម្ចី ដោយគ្មានការប្រាក់បន្ថែមទៀត ធ្វើយ៉ាងណាឱ្យប្រជាពលរដ្ឋអាចមានមុខរបរចិញ្ចឹមជីវិត និងមានជីភាពធូរធារ រស់នៅប្រកបដោយស្នាមញញឹមក្រោមដំបូលនៃសុខសន្តិភាព។សូមបញ្ជាក់ថា នេះជាលើកទី២ហើយដែលបងប្អូនអតីតយុទ្ធជន និងគ្រួសារអតីតយុទ្ធជន រស់នៅក្នុងភូមិប៊ុនរ៉ានីសែនជ័យ តំណាក់ត្រយឹង ទទួលបានប្រាក់កម្ចីគ្មានការប្រាក់ពី កាកបាទក្រហមកម្ពុជា ក្នុងនោះលើកទី១មានចំនួន ៥៨គ្រួសារ និងលើកទី២នេះចំនួន១០០គ្រួសារ ។ពោធិ៍សាត់គឺជាខេត្តមួយក្នុងចំណោមខេត្តគោលដៅចំនួន៤ ដែលប្រជាពលរដ្ឋងាយរងគ្រោះ ទទួលបានសេវាប្រាក់កម្ចីពីកាកបាទក្រហមកម្ពុជា។ ដោយគិតចាប់តាំងពី ឆ្នាំ២០០៥ ដល់ ២០២៤នេះ មានប្រជាពលរដ្ឋចំនួន ២.៥៦៩គ្រួសារ ទទួលបានប្រាក់កម្ចី ដែលក្នុងនោះស្រុកវាលវែង១.៣៧១គ្រួសារ, ស្រុភ្នំក្រវាញ៩៦៥គ្រួសារ និងស្រុកតាលោសែនជ័យ ២៣៣គ្រួសារ៕​អត្ថបទៈ សំ ងីម​

សម្តេចតេជោ ហ៊ុន សែន អញ្ជើញជាអធិបតីក្នុងពិធីចុះអនុស្សរណៈ ស្តីពីកិច្ចសហប្រតិបត្តិការគម្រោងចលនាភូមិថ្មី ខេត្តឃ្យុងសាងប៊ុកដូ នៃសាធារណរដ្ឋកូរ៉េ និងក្រុមប្រឹក្សាវប្បធម៌អាស៊ី នៃព្រះរាជាណាចក្រកម្ពុជា

2024/09/12 05:14:11 pm        688
Facebook Telegram Linkin
ភ្នំពេញ ៖ នៅរសៀលថ្ងៃទី១២ ខែកញ្ញា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានស្ថាបនិកកិត្តិយសក្រុមប្រឹក្សាវប្បធម៌អាស៊ី អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីចុះអនុស្សរណៈយោគយល់គ្នាស្តីពីកិច្ចសហប្រតិបត្តិការគម្រោងចលនាភូមិថ្មី ខេត្តឃ្យុងសាងប៊ុកដូ នៃសាធារណរដ្ឋកូរ៉េ និងក្រុមប្រឹក្សាវប្បធម៌អាស៊ី នៃព្រះរាជាណាចក្រកម្ពុជា។ ពិធីចុះអនុស្សរណៈយោគយល់គ្នានេះធ្វើឡើងនៅ ខេត្តឃ្យុងសាងប៊ុកដូ នៃសាធារណរដ្ឋកូរ៉េ។ពិធីចុះហត្ថលេខាលើអនុស្សរណៈនៃការយោគយល់គ្នា(MOU)នេះ ដើម្បីរួមចំណែកលើកកម្ពស់ចំណងមិត្តភាព និងការអភិវឌ្ឍរួមគ្នារវាងប្រទេសទាំងពីរតាមរយៈការចែករំលែកបទពិសោធន៍ជោគជ័យ នៃកិច្ចសហប្រតិបត្តិការអភិវឌ្ឍន៍ជនបទ និងចលនាភូមិថ្មីរបស់កូរ៉េ។គោលបំណងនៃ MOU នេះគឺដើម្បីលើកកម្ពស់ចលនាភូមិថ្មីសម្រាប់ការអភិវឌ្ឍជនបទនៅកម្ពុជា ក្នុងនោះភាគីទាំងពីរនឹងចូលរួមនិងសហការគ្នាយ៉ាងសកម្ម ដើម្បីធានានូវភាពជោគជ័យលើកិច្ចការនេះ។វិសាលភាព នៃកិច្ចសហប្រតិបត្តិការវិសាលភាព នៃគម្រោងសហប្រតិបត្តិការធ្វើឡើងតាមរយៈកិច្ចសហប្រតិបត្តិការរបស់ភាគីទាំងពីរមានដូចជា ៖ ការអនុវត្តគម្រោងអភិវឌ្ឍន៍ជនបទរួមមាន ការបង្កើត និងដំណើរការកសិដ្ឋានឆ្លាតវៃ កសិកម្មមេកានិក និងប្រព័ន្ធគាំទ្រកសិកម្ម។ ការលើកកម្ពស់គម្រោងសុខភាពសាធារណៈ រួមមានសេវាចល័តបុគ្គលិកពេទ្យសាធារណៈ ការងារពេទ្យស្ម័គ្រចិត្ត និងកិច្ចដំណើរគ្លីនិកមន្ទីរពេទ្យក្នុងស្រុក។ ដំណើរការសាលាបណ្ដុះបណ្ដាលវិជ្ជាជីវៈសមស្របមួយ ការពង្រីកការផ្លាស់ប្តូរធនធានមនុស្សរវាងសាកលវិទ្យាល័យ។ល។ ការគាំទ្រការផ្តល់អាហារូបករណ៍ថ្នាក់អនុបណ្ឌិតសម្រាប់កម្មវិធីចលនាភូមិថ្មី បង្កើត និងដំណើរការ មជ្ឈមណ្ឌលចលនាភូមិថ្មី និងការបណ្តុះបណ្តាលបុគ្គលិកសំខាន់ៗអំពីចលនាភូមិថ្មី។ កិច្ចសហប្រតិបត្តិការក្នុងវិស័យ AI និងឌីជីថល ព្រមទាំងការផ្លាស់ប្តូរវប្បធម៌។បន្ទាប់មក សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃកម្ពុជាបានដឹកនាំប្រតិភូជាន់ខ្ពស់កម្ពុជាអញ្ជើញជាកិត្តិយសក្នុងពិធីជប់លៀងអាហារស្វាគមន៍ដោយ ឯកឧត្តម លី ឈុលរ៉ូ អភិបាលខេត្តស្យុងសាងប៊ុកដូ ៕

ឧត្តមសេនីយ៍ទោ ហ៊ុល សំអុន ផ្ញើសារអបអរសាទរសម្តេចតេជោ ហ៊ុន សែន ទទួលបានសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព»

2024/09/12 05:08:50 pm        720
Facebook Telegram Linkin
ឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ និងនាយទាហាន នាយ​ទាហាន ​និងពលទាហានទាំងអស់នៃកងពលតូចដឹកជញ្ជូនលេខ៩៩ ផ្ញើសារអបអរសាទរយ៉ាង​ស្មោះស្ម័គ្រ​បំផុតជូនចំពោះសម្តេចតេជោ ហ៊ុន សែន ប្រធាន ព្រឹទ្ធសភាកម្ពុជា និងជា​ប្រធានក្រុមឧត្តមប្រឹក្សាផ្ទាល់​ព្រះមហាក្សត្រ ជូនចំពោះសម្តេច ដែលទទួលបានសញ្ញាបត្របណ្ឌិតកិត្តិយសផ្នែក«ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ Dongguk University WISE ខេត្តឃ្យុងសាងបុកដូ នៃ​សាធារណរដ្ឋកូរ៉េ នាថ្ងៃទី១២ ខែកញ្ញា ឆ្នាំ២០២៤នេះ។ការទទួលសញ្ញាបត្របណ្ឌិតកិត្តិយសនេះ ជាមហាកិត្តិយសដ៏ថ្លៃថ្លា ឧត្តុង្គឧត្តមបំផុតសម្រាប់ប្រ ទេសជាតិ និង​ប្រជាជនកម្ពុជាទាំងមូល និងស័ក្តិសមបំផុតចំពោះសម្តេច ដែលបានដឹកនាំការតស៊ូប្រកប ដោយ​វីរភាព ក្នុងការដណ្តើមបាននូវ សន្តិភាព ការកសាង និងអភិវឌ្ឍន៍សង្គមកម្ពុជាទាំងមូល ព្រមទាំង បានកែប្រែប្រទេសកម្ពុជា ពីភាពដុនដាបខ្ទេចខ្ទាំដោយភ្លើងសង្រ្គាម ក្លាយជាប្រទេសដែលមានកិត្តិនាម និង កិត្តិស័ព្ទស្មើមុខស្មើមាត់ស្មើសិទ្ធនៅក្នុងតំបន់ និងសកលលោក។ក្នុងនាមកងពលតូចដឹកជញ្ជូនលេខ៩៩ សូមគោរពជូនពរ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រីទាំងអស់ ជួបប្រទះតែសេចក្តីសុខ សុភមង្គល ព្រមទាំងសមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

មន្ត្រីជំនាញជលផលក្រចេះ បន្តចុះត្រួតពិនិត្យ បង្ក្រាបបទល្មើសជលផល និងចាក់លែងកូនត្រី​ចម្រុះចូលបឹងធម្មជាតិ

2024/09/12 03:46:07 pm        800
Facebook Telegram Linkin
ខណ្ឌរដ្ឋបាលជលផលក្រចេះ បានសហការជាមួយកម្លាំងនគរបាលប្រឆាំង បទល្មើស​សេដ្ឋកិច្ច​ នៃ​ស្នងការដ្ឋាន​នគរបាលខេត្ត រួមទាំងក្រុមប្រឹក្សាសង្កាត់ និងសហគមន៍ នេសាទ បានបន្តចុះត្រួតពិនិត្យ បង្ក្រាប​បទល្មើសជលផល និងចាក់លែងកូនត្រីចម្រុះ ចូលក្នុងបឹងធម្មជាតិ ស្ថិតក្នុងសង្កាត់រកាកណ្តាល និ​ង​សង្កាត់អូរឫស្សី ក្រុងក្រចេះ កាលពីថ្ងៃទី១១ ខែកញ្ញា ឆ្នាំ២០២៤ ។កម្លាំងសមត្ថកិច្ចចម្រុះ ដែលដឹកនាំដោយលោក ម៉ុក ពន្លក នាយខណ្ឌរដ្ឋបាល ជលផល នៃមន្ទីរកសិកម្ម រុក្ខា​ប្រមាញ់ និងនេសាទខេត្តក្រចេះ បានបញ្ជាក់អោយដឹងថា រដូវនេះ គឺជារដូវបិទនេសាទ ការធ្វើ​នេសាទ​ដោយ​ប្រើ​ប្រាស់​ឧបករណ៍ស្បៃមុង និងសាច់អួន ក្រលាញឹក (សាច់ប៉ាក់) និងឧបករណ៍​ខុសច្បាប់​នេសាទ​ទាំង​ឡាយ គឺត្រូវច្បាប់ហាមឃាត់ ដាច់ខាតមិនអនុញ្ញាតិអោយប្រើឡើយ។ ហេតុដូច្នេះ បើសិនជា​បង​ប្អូន​អ្នក​នេសាទ នៅតែលួចធ្វើនេសាទដោយប្រើប្រាស់ឧបករណ៍ខុសច្បាប់ខាងលើ ថ្ងៃណាមួយសមត្ថកិច្ច ចាប់​ឃាត់ខ្លួនបាន បងប្អូននឹងត្រូវទទួលទោសតាមមាត្រា៩៩ ចំនុចទី៧ នៃច្បាប់ស្តីពី ជលផល ដោយ​ត្រូវ​ផ្តន្ទា​ទោស​ក្រោមបទល្មើសជលផលថ្នាក់ទី២ ដែលត្រូវដាក់ពន្ធនាគារ ពីមួយ (១) ឆ្នាំ ទៅបី (៣) ឆ្នាំ និង​ពិន័យជាប្រាក់ពីប្រាំលាន (៥.០០០.០០០) រៀល ទៅ ហាសិបលាន (៥០.០០០.០០០)រៀល និង​វត្ថុ​តាង​ទាំងអស់ត្រូវរឹបអូសជាសម្បត្តិ៍រដ្ឋ ឬ បំផ្លាញចោល ។លោក នាយខណ្ឌ ក៏បានអំពាវនាវដល់ប្រជានេសាទចូលរួមគោរពច្បាប់ទាំងអស់គ្នា ព្រោះរដូវនេះ ជា​រដូវ​ត្រី​ពង ដើម្បីការពារនឹងអភិរក្សាធនធានជលផលឲ្យមាននិរន្តរភាព ឋិតថេរគង់វង្ស ទាំងបច្ចុប្បន្ន និង​អនាគត​។ជាក់ស្តែង នៅក្នុងសកម្មភាពចុះបង្ក្រាបបទល្មើសជលផលស្ថិតនៅទីតាំងខាងលើ​សមត្ថកិច្ចចម្រុះ បាន​ធ្វើ​ការ​រុះរើ និងបំផ្លាញចោលនូវឧករណ៍នេសាទល្មើសច្បាប់ រួមមាន របាំងព្រួលស្បៃមុងចំនួន ១៧ខ្សែ មាន​ប្រវែង ៩៥០ម៉ែត្រ លូស្បៃមុងចំនួន ១៩មាត់លូ របាំងលប ណរ៉ាវ ចំនួន ០២ខ្សែ ប្រវែង១៤០ម៉ែត្រ។ លប ណរ៉ាវ (លបកាវ) ០៤គ្រឿង បង្គោលចម្រឹងប្ញស្សី ចំនួន ២៦០ដើម និង​បាន​ចាក់​លែង​ត្រី​ចម្រុះ​ទម្ងន់​ប្រមាណ ១០០គីឡូក្រាម ចូលក្នុងបឹងធម្មជាតិវិញ ៕ ដោយ សេង ម័រ

សមាគមមួយសហការជាមួយអ្នកកសិកម្ម លើកកម្ពស់ដល់សហគ្រិនលើការដាំដុះដំណាំសក្តានុពលកាកាវ

2024/09/12 03:36:34 pm        274
Facebook Telegram Linkin
ភ្នំពេញ ៖ សមាគមក្នុងស្រុកមួយ សហការជាមួយអ្នកអភិវឌ្ឍន៍វិស័យកសិកម្ម លើការដាំដុះដំណាំកាកាវ ដែលជាដំណាំសក្តានុពល ដើម្បី លើកកម្ពុជាដល់សហគ្រិនដែលជាសមាជិករបស់សមាគមនៅតាមបណ្តាខេត្ត ចាប់យកនៃការដាំដុះ និងការកែច្នៃប្រភេទដំណាំនេះ ដើម្បី បង្កើនប្រាក់ចំណូលក្នុងសេដ្ឋកិច្ចគ្រួសារ និងការចូលរួមក្នុងសេដ្ឋកិច្ច-សង្គម។ ​ឯកឧត្តម ស្វាយ សុវណ្ណរិទ្ធ ប្រធានសមាគមអភិវឌ្ឍន៍សង្គមខ្មែរ លើកឡើងនៅក្នុងការចុះអនុស្សារណៈយោគយល់គ្នា ជាមួយ អ្នកអភិវឌ្ឍន៍វិស័យកសិកម្មក្នុងស្រុកមួយ ដើម្បីលើកកម្ពស់ដល់ការដាំដុះដំណាំកាកាវ នៅថ្ងៃទី ១២ ខែ កញ្ញា ឆ្នាំ២០២៤ នេះថា ជុំវិញបេសកម្មរបស់សមាគមអភិវឌ្ឍន៍សង្គមខ្មែរ បានបង្កើតឡើងដើម្បីគាំទ្រដល់សហគ្រិន និងផលិតផលខ្មែរ ក្នុងគោលដៅលើក កម្ពស់ដល់អ្នកដាំដុះ មានទីផ្សារសម្រាប់លក់ផលិតផលរបស់ខ្លួន ជាពិសេសការទទួលនូវចំណេះ-ជំនាញ លើការកែលម្អផលិតផល របស់ពួកគាត់ជាដើម។ឯកឧត្តម បន្តថា ជាក់ស្តែងតាមរយៈនៃការចុះអនុស្សារណៈយោគយល់គ្នា ជាមួយអ្នកអភិវឌ្ឍន៍វិស័យកសិកម្មនេះ គឺជាការ ជំរុញលើកកម្ពស់ដល់សហគ្រិនដែលជាសមាជិករបស់សមាគមបន្ថែម បានស្វែងយកលើការដាំដុះដំណាំកាកាវ ដែលជាប្រភេទដំណាំ កសិឧស្សាហកម្មមួយដែលមានសក្តានុពល និងកំពុងមានវត្តមានលើទីផ្សារកម្ពុជា ក្រោមការគាំទ្រក្នុងការដាំដុះនិងទីផ្សារសម្រាប់លក់ ចេញពីអ្នកអភិវឌ្ឍន៍ដំណាំកាកាវនេះផ្ទាល់។ ផែនការសកម្មភាពនេះ គឺជាជួយគាំទ្រដល់សហគ្រិនក្នុងស្រុក និងកសិករដាំដុះផ្សេងៗ ទៀត ទទួលបានចំណូលកាន់តែប្រសើរនៅក្នុងសេដ្ឋកិច្ចគ្រួសារ ជាពិសេសការចូលរួមជាមួយរាជរដ្ឋាភិបាល លើការលើកកម្ពស់វិស័យ កសិកម្ម និងបង្កើនចំណូលក្នុងសេដ្ឋកិច្ចជាតិជាដើម។ឯកឧត្តម ស្វាយ សុវណ្ណរិទ្ធ លើកឡើងបន្ថែមថា ជុំវិញបញ្ហានេះ សមាគមនឹងមានគោលដៅចុះរៀបចំ ជំរុញលើកទឹកចិត្តដល់បងប្អូន ប្រជាពលរដ្ឋ ដោយនៅក្នុងមួយស្រុក យ៉ាងហោចមានដាំដុះដំាណំានេះឱ្យបាន ៥០ ហិចតាឡើងទៅ ដើម្បីងាយស្រួលដល់ការ ប្រមូលផល និងការរៀបចំកន្លែងសំងួតសម្រាប់ការកែច្នៃនៅនឹងកន្លែង។ ហើយបញ្ហានេះដែរ ឯកឧត្តម នឹងស្នើរសុំឱ្យមានការទទួល ស្គាល់ពីក្រសួង-ស្ថាប័នដែលពាក់ព័ន្ធ ជាពិសេសក្រសួងកសិកម្ម រុក្ខាប្រមាញ់ និងនេសាទ ដើម្បីជំរុញឱ្យមានការដាំដុះដំណាំនេះ គាំទ្រដល់សមាគម ក្រុមហ៊ុន និងជួយដល់កសិករផងដែរ។ជុំវិញដំណាំនេះដែរ, លោក គៀរីស៊ិញ ស្ថាបនិកដំណាំកាកាវ លើកឡើងឱ្យដឹងផងដែរថា កាកាវគឺជាដំណាំសក្តានុពលមួយ ងាយក្នុង ការដាំដុះ មិនប្រកាន់រដូវ ហើយឆាប់ទទួលបានផល បន្ទាប់ពីការដាំដុះក្នុងរយៈពេល២ឆ្នាំប៉ុណ្ណោះ ចំណែកការទទួលផលសម្រាប់ ឆ្នាំដំបូង ក្នុង ១ ហិតតា កសិករអាចទទួលបានផលជាមធ្យម ក្នុងរង្វង់ពី ៩ ទៅ ១០ តោន ក្នុងនោះប្រសិនយើងថែទាំដល់រយៈពេល ៥ ទៅ ៨ឆ្នាំ កសិករអាចទទួលផលបានចាប់ពី ៥០ ទៅ ៦០ តោន ដោយកសិករអាចលក់ចេញផ្លែកាកាវស្រស់ ក្នុង ១ តោន បានក្នុង រង្វង់ ៣០០ ដុល្លារ និងមានទីផ្សារគាំទ្រនៅក្នុងស្រុកស្រាប់៕ អត្ថបទ៖ សុន រ៉ាឌី

កិច្ចប្រជុំប្រាក់ឈ្នួលកម្មកររោងចក្រ គ្រោងបិទបញ្ចប់នៅថ្ងៃទី១៩ កញ្ញាខាងមុខ

2024/09/12 03:35:09 pm        722
Facebook Telegram Linkin
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា កិច្ចប្រជុំ​ចរចា​ប្រាក់​ឈ្នួល​អប្បបរមា​វិស័យកាត់ដេរសម្រាប់ឆ្នាំ២០២៥ ត្រូវបានត្រីភាគី​ឯកភាព​គ្នា​កំណត់​ប្រជុំ​លឿន​ជាង​ការ​កំណត់នៅថ្ងៃទ១៩ ខែកញ្ញាខាងមុខ ដែលតាមគម្រោងនឹងបិទបញ្ចប់នៅថ្ងៃទី២៦ ខែកញ្ញា។មាន​ប្រសាសន៍ប្រាប់ក្រុមអ្នកសារព័ត៌មាន ក្រោយចប់កិច្ចប្រជុំពិភាក្សាប្រាក់ឈ្នួលអប្បបរមា នៅ​ព្រឹកថ្ងៃទី១២ កញ្ញា ឆ្នាំ២០២៤នេះ ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះ​បណ្តាល​វិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា បានឲ្យដឹងថា ក្រោយ​ឆ្លង​កាត់​កិច្ច​ប្រជុំជាលក្ខណៈត្រីភាគីផង ក៏ដូចជាលក្ខណៈផ្ទៃក្នុងរបស់ភាគីមួយៗផង គឺបាន​សម្រេច​ឯកភាព នឹងជួបប្រជុំគ្នាចុងក្រោយ នៅថ្ងៃទី១៩ ខែកញ្ញាខាងមុខ ដើម្បីកំណត់​ប្រាក់​ឈ្នួល​អប្បបរមា​របស់កម្មករផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើ​ដំណើរ និង​កាបូប​។ឯកឧត្តមរដ្ឋមន្រ្តី បានបញ្ជាក់ឲ្យដឹងថា សម្រាប់កិច្ចប្រជុំត្រីភាគី លើកទី៤ ក្នុងថ្ងៃនេះ ភាគី​ទាំង​ពីរ​បាន​បន្ត​ពន្យល់​គ្នាទៅវិញទៅមកនូវគោលជំហររបស់ខ្លួនប្រកបដោយវិជ្ជាជីវៈ និងភាពចាស់ទុំ។ ជា​លទ្ធផល តំណាងភាគីកម្មករនិយោជិត បានស្នើរតួលេខកំណើនរបស់ខ្លួនចំនួន ៣ផ្សេងៗគ្នា គឺ​តួ​លេខ​កំណើន ៦ដុល្លារ, ៧ដុល្លារ និង១០ដុល្លារ លើប្រាក់ឈ្នួលបច្ចុប្បន្ន ២០៤ដុល្លារ។ ដោយឡែក ភាគីនិយោជក បានរក្សាគោលជំហរនៅដដែល គឺកំណើនចំនួន ២ដុល្លារ លើ​ប្រាក់​ឈ្នួល​បច្ចុប្បន្ន ហើយនឹងដាក់សំណើរមួយចំនួនទៀត នាកិច្ចប្រជុំបញ្ចប់ខាងមុខ។លោក គឹម ចាន់សំណាង ភាគីសហជីពតំណាងកម្មករនិយោជិត បានលើកឡើងថា រហូតមក​ដល់​ពេល​នេះ សហជីពមានបទ​ពិសោធន៍​ច្រើន​ក្នុង​ការ​សម្រេច​លើ​តួលេខ​ដែល​ត្រូវ​ដាក់​ដើម្បី​ពិភាក្សា​ជា​បន្ត​បន្ទាប់ ដូច្នេះជាទូទៅមិនមែនមានតែសហជីពក្នុងចិត្តតែមួយ មានន័យថា មានគំនិត​រៀងៗ​ខ្លួន ហើយមានក្រុមរៀងៗខ្លួនដែលមានសិទ្ធិបញ្ចេញតួលេខរៀងៗខ្លួនដូចគ្នា ហើយ​នេះ​ក៏​ជា​សិទ្ធិ​សេរីភាព​ក្នុង​ការបើកទូលាយដើម្បីសម្រេចចិត្តចំពោះលើតួលេខនីមួយៗ ដូច្នេះភាគី​សហជីព​ពិភាក្សា​គ្នា​ជាបន្តបន្ទាប់ ដោយមានទឡ្ហីករណ៍​រៀងៗខ្លួន​ដើម្បី​កំណត់​យក​តួ​លេខ​មួយ​ឲ្យ​ទទួល​បាន​ទាំង​អស់គ្នា។លោកបន្ថែមថា សម្រាប់តួលេខដែលដាក់ចេញរបស់ភាគីសហជីពផ្សេងៗគ្នាខាងលើ ក៏​មិន​ប្រាកដ​ថា នៅថ្ងៃចុងក្រោយមានតួលេខទាំង៣ ឬក៏បង្រួមតួលេខណាមួយទេ ដែល​នេះ​ជា​លទ្ធិ​ប្រជាធិបតេយ្យ​ក្នុងការសម្រេចចិត្តរបស់ភាគីសហជីព ហើយសម្រាប់ក្រុមនីមួយៗ ខណៈ​សហជីព​ទាំង​អស់ គឺបានគិតប្រយោជន៍ជារួមដូចគ្នា ទៅដល់កម្មករនិយោជិត។ការកំណត់​ប្រាក់​ឈ្នួល​អប្បបរមា​របស់​កម្មករ​និយោជិត​ក្នុង​វិស័យ​ឧស្សាហកម្ម​កាត់​ដេរ​ជារៀ​ង​រា​ល់​ឆ្នាំ​នេះ ត្រីភាគី រួមមាន ភាគីរដ្ឋាភិបាល ភាគីនិយោជក និងភាគីសហជីពតំណាងកម្មករនិយោជិត បាន​ពិភាក្សាគ្នាដោយផ្អែកទៅលើមូលដ្ឋានបម្រែបម្រួលលក្ខណៈវិនិច្ឆ័យបែបសង្គម និង​សេដ្ឋកិច្ច​ចំនួន ៧ចំណុច ក្នុងនោះរួមមាន៖ ស្ថានភាពគ្រួសារ អត្រាអតិផរណា ការចំណាយក្នុងការរស់នៅ ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិត​ចំណេញ​របស់​វិស័យ​៕ អត្ថបទ៖ ឈិត បូរ៉ាវី

សមាជិកក្រុមប្រឹក្សារាជធានីភ្នំពេញ ស្នើសុំឲ្យសមត្ថកិច្ចបន្តរឹតបណ្តឹងច្បាប់ចរាចរណ៍ផ្លូវគោក

2024/09/12 02:50:18 pm        866
Facebook Telegram Linkin
ភ្នំពេញ៖ សមាជិកក្រុមប្រឹក្សារាជធានីភ្នំពេញបានស្នើសុំឲ្យ​សមត្ថកិច្ច​បន្ត​រឹត​បណ្តឹង​ច្បាប់​ចរាចរណ៍​ផ្លូវ​គោក ដើម្បីកាត់បន្ថយគ្រោះថ្នាក់ចរាចរដែលតែងតែកើតមានជារៀងរាល់ថ្ងៃនោះ ជាមួយ​និង​ការ​កោតស​រសើរ ចំពោះវិស័យសុខាភិបាលនៅរាជធានីភ្នំពេញ ដែលបានគិ​តគូរ​ និង​យក​ចិត្ត​ទុក​ដាក់​ចំពោះ​សុខមាលភាពប្រជាពលរដ្ឋ។ ការស្នើសុំ​របស់សមាជិកក្រុមប្រឹក្សារាជធានីបែបនេះបានធ្វើឡើង ក្នុងកិច្ចប្រជុំសាមញ្ញ លើកទី៤ របស់​ក្រុម​ប្រឹក្សា​រាជធានីភ្នំពេញ នាព្រឹកថ្ងៃទី១២ កញ្ញា ក្រោមអធិបតីភាពឯកឧត្ដមជួប ខុន សមាជិក​ក្រុម​ប្រឹក្សារាជធានី តំណាងឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និង​លោក កើត ឆែ អភិបាលរងរាជធានី តំណាងឯកឧត្ដម ឃួង ស្រេង អភិបាលរាជធានីភ្នំពេញ នៅ​សាលារាជធានីភ្នំពេញ។ឆ្លើយតបទៅនឹងការស្នើឡើងរបស់សមាជិកក្រុមប្រឹក្សារាជធានីភ្នំពេញ លោក កើត ឆែ អភិបាល​រង​រាជ​ធានី​ភ្នំពេញបានមានប្រសាសន៍លើកឡើងថា ការបង្ការទប់ស្កាត់គ្រោះថ្នាក់ចរាចរនេះ រាជ​រដ្ឋាភិបាលបានយកចិត្តទុកដាក់ណាស់ សំដៅ​ធ្វើ​យ៉ាង​ណា​កាត់​បន្ថយ​អោយ​បាន​នៅ​គ្រោះ​ថ្នាក់​ចរាចរណ៍ ដោយបានពង្រឹងការអនុវត្តច្បាប់ចរាចរ ការផ្សព្វផ្សាយអោយប្រជាពលរដ្ឋបានយល់ និង​ចូលរួមគោរពច្បាប់ចរាចរណ៍។ គ្រោះថ្នាក់ចរាចរណ៍បានឆក់យកជីវិតមនុស្ស ៥ទៅ៦​នាក់​ក្នុង​មួយ​ថ្ងៃ​នៅទូទាំងប្រទេស។ ចំពោះមនុស្ស ៥ទៅ៦នាក់នេះ បើគិតពីថ្លៃចិញ្ចឹម ថ្លៃសិក្សារៀនសូត្រ និង​ការអប់រំផ្សេងៗ តើត្រូវខាតបង់ថវិកា និងពេលវេលានៃការចិញ្ចឹមអស់ប៉ុណ្ណា ហើយ​មក​ស្លាប់​ដោយ​គ្រោះថ្នា​ក់ចរាចរណ៍បែបនេះ។ លោកបន្តថា ដូច្នេះហើយ ទើបរាជរដ្ឋាភិបាល​កម្ពុជា​យក​ចិត្ត​ទុ​កដាក់​យ៉ាងខ្លាំងដោយបានរិះរកអស់គ្រប់មធ្យោបាយ ដើម្បីកាត់បន្ថយ​អោយ​បា​ន​នៅ​គ្រោះថ្នាក់​ចរាចរណ៍​នេះ។ ដើម្បីកាត់បន្ថយបាននូវគ្រោះថ្នាក់ចរាចរណ៍ លុះត្រាតែមាន​ការ​ចូលរួម​ទាំង​អស់​គ្នា​។លោក កើត ឆែ បានបន្តទៀតថា៖ ក្រុមប្រឹក្សារាជធានីភ្នំពេញ បាន​សម្តែង​នូវ​ការ​កោត​សរសើរ​ផង​ដែរ​ ចំពោះវិស័យសុខាភិបាលនៅរាជធានីភ្នំពេញ ដែលបានគិតគូរ និង​យក​ចិត្ត​ទុក​ដាក់​ចំពោះសុ​ខ​មាលភាព​ប្រជាពលរដ្ឋ។ ប៉ុន្តែទោះបីជាយ៉ាងណាក្តី លោក កើត ឆែ នៅតែជំរុញ​អោយមន្ទី​រ​សុខាភិបាល​រាជ​ធានីភ្នំពេញបន្តយកចិត្តទុកដាក់បន្ថែមទៀត ដើម្បីបម្រើសេវា​ជូន​ប្រជាពលរដ្ឋ​អោយ​កាន់​តែល្អលើវិស័យសុខាភិបាលនេះ។លោក កើត ឆែ បានបញ្ជាក់ផងដែរថា វេទិការផ្សព្វផ្សាយ និងពិគ្រោះ​យោបល់​របស់​ក្រុម​ប្រឹក្សា​រាជ​ធានី​ភ្នំពេញ ត្រូវធ្វើឡើងក្នុង១ឆ្នាំម្តង ដើម្បីដោះស្រាយរាល់កង្វល់ សំណូមពរ និង​សំណើរ​របស់​ប្រជា​ពលរដ្ឋ​។ សម្រាប់ឆ្នាំ២០២៤នេះ វេទិការនេះនឹងត្រូវធ្វើឡើងនៅខែក្រោយនេះហើយ។ ដូច្នេះទេ ស្នើអោយប្រធានមន្ទីរទាំងអស់ចូលរួមគ្រប់វេទិកា ដើម្បីឆ្លើយ​តប​ទៅ​នឹង​ការ​ចង់​បាន​របស់​ប្រជាពលរដ្ឋ ជៀសវាងអោយអនុប្រធានទៅជំនួស ដែលគាត់មិនមានសិទ្ធិ អាកាត់ ឬ​សម្រេច​បាន​នោះ។ឯកឧត្ដម ជួប ខុន បានមានប្រសាសន៍លើកឡើងថា កិច្ចប្រជុំ​សាមញ្ញ​លើកទី៤​របស់​ក្រុម​ប្រឹក្សា​រាជ​ធានី​ភ្នំពេញ បានពិនិត្យ និងអនុម័តលើរបៀបវារៈចំនួន៧ ក្នុងនោះរួមមាន ១- ពិនិត្យ និង​អនុម័ត​លើ​ច្បាប់ឈប់សម្រាករបស់ ឯកឧត្តម ម៉ក់ ថាយ សមាជិកក្រុមប្រឹក្សារាជធានីភ្នំពេញ ដែល​អវត្តមានក្នុងកិច្ចប្រជុំសាមញ្ញរបស់ក្រុមប្រឹក្សាចំនួនបីលើកជាប់គ្នា។ ២- ពិនិត្យ និង​អនុម័ត​លើ​សេចក្តី​ព្រាងកំណត់ហេតុកិច្ចប្រជុំសាមញ្ញលើកទី៣ របស់ក្រុមប្រឹក្សារាជធានីកាលពីថ្ងៃទី១៥ ខែ​សីហា ឆ្នាំ២០២៤។ ៣- ពិនិត្យ និងអនុម័តលើសេចក្តីព្រាងរបាយការណ៍ប្រចាំខែសីហា ឆ្នាំ​២០២៤ ស្តីពីការអនុវត្តការងាររបស់រដ្ឋបាលរាជធានីភ្នំពេញ។ ៤- ពិនិត្យ និង​អនុម័ត​លើ​សេចក្តី​ព្រាង​ប្រតិទិន​ការងារសម្រាប់ដំណើរការកសាងផែនការអភិវឌ្ឍន៍រយៈពេលប្រាំឆ្នាំ (២០២៥-២០២៩) និងសេចក្តីព្រាងគោលការណ៍ណែនាំផ្នែកគោលនយោបាយ សម្រាប់ការកសាង​ផែនការ​អភិវឌ្ឍ​ន៍រយៈពេលប្រាំឆ្នាំ និងការកសាងកម្មវិធីវិនិយោគបីឆ្នាំរំកិលរាជធានីភ្នំពេញ។ ៥- ពិនិត្យ និងអនុម័តលើសេចក្តីព្រាងការបែងចែកប្រាក់រង្វាន់លើទឹក​ចិត្ត​របស់​រដ្ឋបាល​រាជ​ធានី​ភ្នំពេញ។​ ៦- ពិនិត្យពិភាក្សា និងផ្តល់យោបល់លើចម្លើយតបចំពោះសំណើ និងសំណូមពរ​របស់​ប្រជាពលរដ្ឋ​ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិ​ទី៣ នៅតាមខណ្ឌទាំង១៤ ក្នុងឆ្នាំ២០២៣ ដើម្បី​ឆ្លើយ​តប​ជូន​ប្រជាពលរដ្ឋ​នៅ​ក្នុង​វេទិកា​របស់​ក្រុម​ប្រឹក្សា​រាជធានីភ្នំពេញ អាណត្តិទី៤ ក្នុងឆ្នាំ២០២៤ នៅតាមខណ្ឌទាំង១៤។ ៧- ពិនិត្យនិង​អនុម័ត​លើ​សេចក្តីព្រាងឯកសារស្តីពីការរៀបចំវេទិកាផ្សព្វផ្សាយ និងពិគ្រោះយោបល់ របស់​ក្រុម​ប្រឹក្សារាជធានីភ្នំពេញ អាណត្តិទី៤ នៅតាមខណ្ឌទាំង១៤ ក្នុងឆ្នាំ២០២៤៕

ពលរដ្ឋថៃជាច្រើននាក់ធ្វើដំណើរឆ្លងដែនចេញពីប្រទេសថៃ ដើម្បីទស្សនាប្រាសាទអង្គរវត្ត

2024/09/12 02:35:56 pm        229
Facebook Telegram Linkin
នៅព្រឹកថ្ងៃទី១២កញ្ញាឆ្នាំ២០២៤នេះមានប្រជាពលរដ្ឋថៃដែលជាភ្ញៀវទេសចរបានធ្វើដំណើរឆ្លងដែនចេញពីប្រទេសថៃចូលមកកម្ពុជាតាមច្រកទ្វារព្រំដែនអន្តរជាតិក្នុងភូមិសាស្រ្តខេត្តឧត្តរមានជ័យ​ជាច្រើននាក់ដើម្បីបន្តដំណើរទៅលេងខេត្តសៀមរាប ទស្សនាប្រាសាទអង្គរវត្ត ។មន្រ្តីជំនាញនគរបាលអន្តោប្រវេសន៌ច្រកទ្វារព្រំដែនអន្តរជាតិអូរស្មាច់បានឲ្យដឹងថា ជា​រៀង​រាល់​ថ្ងៃ​មាន​ភ្ញៀវ​ទេសចរចេញ-ចូលតាមច្រកទ្វារព្រំដែន​អន្តរជាតិអូរស្មាច់​ហ៊ាក់​ចំនួន​កើត​ឡើង​បន្តិច​ចំពោះ​អ្នក​ធ្វើដំណើរឆ្លងដែនតាមច្រកនេះ។មន្រ្តី​ជំនាញបានបន្ត ជាក់ស្តែងភ្ញៀវទេសចរពលរដ្ឋថៃ តែង​តែ​មាន​វត្តមាន​ឆ្លង​ដែន​ចូល​មក​មាន​ចំនួន​ច្រើន​ដើម្បីធ្វើដំណើរបន្តទៅលេងខេត្តសៀមរាប ប្រាសាទអង្គរវត្ត ។មន្រ្តីជំនាញបានបន្តថា ក្នុងការធ្វើដំណើរឆ្លងដែនចេញ-ចូលរបស់អ្នក​ធ្វើ​ដំណើរ​ក៏​ដូចជា​ភ្ញៀវ​ទេសចរ​គ្រប់​ជាតិសាសន៍ មន្រ្តីជំនាញ​នគរបាល​អន្តោ​ប្រវេសន៍​ប្រចាំ​ការ​ច្រកទ្វារ​ព្រំដែន​អូរ​ស្មាច់​តែង​តែ​ធ្វើ​ការសម្របសម្រួលរាល់បែបបទ ទិន្នការ នានាដើម្បីធ្វើយ៉ាង​ណា​សម្រួល​ជូន​ដល់​ភ្ញៀវ​ទាំង​អស់​នោះឲ្យបានឆាប់រហ័សក្នុងការផ្តល់សេវាផ្សេងៗ​ប្រកប​ដោយភាពរីករាយរាក់​ទាក់​ផង​ដែរ​។ កត្តា​ទាំងអស់នះ​គឺ​ដោយសារ​រាជរដ្ឋាភិបាលកម្ពុជាមានសហប្រតិបត្តិការ​ ល្អជា​មួយ​និង​រាជ​រដ្ឋាភិបាល​ថៃក្នុ​ង​បើចំហរលើវិស័យទេសចររវាងប្រទេសទាំងពីរ៕

កងរាជឣាវុធហត្ថខេត្ត បង្ក្រាបករណីដឹកជញ្ជូន ជួញដូរ រក្សាទុក គ្រឿងញៀនជាង ៧៣គីឡូក្រាម ឃាត់ខ្លួនជនសង្ស័យជនជាតិថៃចំនួន៥នាក់ បញ្ជូនទៅសាលាដំបូងខេត្តឣនុវត្តតាមនីតិវិធី

2024/09/12 02:31:17 pm        199
Facebook Telegram Linkin
បន្ទាយមានជ័យ ៖ កម្លាំង កងរាជអាវុធហត្ថ ខេត្តបន្ទាយមានជ័យ និងកម្លាំងមូលដ្ឋាន​កងរាជ​អាវុធ​ហត្ថ​ក្រុងប៉ោយប៉ែត បានបើកប្រតិបត្តិការទ្រុងទ្រាយធំ ឃាត់ខ្លួនជនសង្ស័យជាជនជាតិថៃ ដែល​រកស៊ីជួញដូរដោយខុសច្បាប់នូវសារធាតុញៀនយ៉ាងសកម្ម នៅក្នុង​ភូមិ​សាស្រ្ត​ក្រុង​ប៉ោយប៉ែត និងកាន់កាប់ ឬដឹកជញ្ជូនឣាវុធដោយគ្មានការឣនុញ្ញាត សរុបចំនួន៥នាក់ រួមនឹង​គ្រឿង​ញៀន​ជាង ៧៣គីឡូក្រាម។ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋាន​កង​រាជ​ឣាវុធ​ហត្ថ​ក្រុង​ប៉ោយប៉ែត​បាន​ឱ្យ​ដឹង​ថា ក្រោយពីទទួលបានព័ត៌មាននេះលោកបានរាយការណ៍ជូនលោកឧត្តមសេនីយ៍ត្រី បោន ប៊ិន មេ​បញ្ជាការកងរាជឣាវុធហត្ថខេត្តបន្ទាយមានជ័យ ដើម្បីស្នើសុំទៅព្រះរាជឣាជ្ញា ឣម​សាលា​ដំបូង​ខេត្ត ដើម្បីបើកប្រតិបត្តិការបង្ក្រាប។ រហូតដល់វេលាម៉ោង១១និង៣០នាទី ថ្ងៃទី១០ ខែកញ្ញា ឆ្នាំ​២​​០២៤ នៅចំណុចផ្ទះលេខC62 ក្នុងបុរីដួងច័ន្ទ ស្ថិតក្នុងភូមិសាមគ្គីមានជ័យ សង្កាត់ឣូរជ្រៅ ក្រុង​ប៉ោយ​ប៉ែត កម្លាំងមូល​ដ្ឋាន​កង​រាជ​ឣាវុធ​ហត្ថ​ក្រុង​សហការ​ជាមួយ​កម្លាំង​ការិយាល័យ​ប្រឆាំង​គ្រឿ​ង​ញៀន​កងរាជឣាវុធហត្ថខេត្ត ដឹកនាំដោយលោកវរសេនីយ៍ទោ ព្រហ្ម ថេង ប្រធានមន្ទីរ​ស្រាវជ្រាវ និងបង្ក្រាបបទល្មើស និងដឹកនាំសម្របសម្រួលដោយលោក លុយ ទីហួរ ព្រះរាជ​ឣាជ្ញារង ឣមសាលាដំបូងខេត្តបន្ទាយមានជ័យ បានចុះធ្វើប្រតិបត្តិការបង្ក្រាប និងឃាត់​ខ្លួន​ជន​សង្ស័យ​ជា​ជនជាតិថៃបានចំនួន០៥នាក់រួមមាន ១.ឈ្មោះ វីរ៉ាឆៃ មីស៊ីន ហៅ ឃីវ ភេទប្រុស ឣាយុ២៩ឆ្នាំ ជនជាតិថៃ ដកហូតវត្ថុតាងរួមមាន គ្រឿងញៀនប្រភេទម៉្សៅក្រាមពណ៌សថ្លា (ICE)ចំនួន ៧១កញ្ចាប់ ទម្ងន់ ៧៣,៦៧៥ក្រាម ,គ្រឿងញៀនប្រភេទម៉្សៅម៉ត់ពណ៌ស (ហេរ៉ូអ៊ីន) ចំនួន ០២កញ្ចប់ ទម្ងន់ ៧៤៨,២០ក្រាម, និងកាបូបពណ៌​ខ្មៅ​សម្រាប់​ដាក់​គ្រឿង​ញៀន​ចំនួន​០៦កាបូប។ ២.ឈ្មោះ ចាក់កាក់ផាន់ ផូស៊ី ហៅ ប៉ុក ភេទប្រុស ឣាយុ២៩ឆ្នាំ ជន​ជាតិ​ថៃ ដកហូតវត្ថុតាងរួមមាន គ្រឿងញៀនប្រភេទម្សៅក្រាមពណ៌សថ្លា (ICE) ចំនួន ០១កញ្ចប់ ទម្ងន់ ១៣១,១០ក្រាម, គ្រឿងញៀនប្រភេទថ្នាំគ្រាប់រាងមូល ពណ៌បៃតង ០១ថង់កិប ស្មើនឹង ៤០គ្រាប់ ទម្ងន់ ៦,៦៩ក្រាម ,ថ្នាំគ្រាប់រាងមូលពណ៌ទឹកក្រូច ចំនួន០១ថង់កិប ស្មើនឹង ៣៣២គ្រាប់ ទម្ងន់ ៧,៨០ក្រាម, គ្រឿងញៀនប្រភេទថ្នាំគ្រាប់រាងត្រីកោណ ពណ៌​ផ្កា​ឈូក​(អ៊ិចស្តាស៊ី) ចំនួន ០៤ថង់កិប ស្មើនឹង ២០គ្រាប់ ទម្ងន់ ១១ក្រាម, គ្រឿងញៀន​ប្រភេទ​ថ្នាំ​គ្រាប់​រាង​ផ្លែឈើ ពណ៌ត្នោត(អ៊ិចស្តាស៊ី) ចំនួន ០៤ថង់កិប ស្មើនឹង ២០គ្រាប់ ទម្ងន់ ១១,៥០ក្រាម, គ្រាប់​ថ្នាំបន្ទះពណ៌ក្រហម(Erimin5) ចំនួន០២បន្ទះ ស្មើនឹង ១២គ្រាប់ ទម្ងន់ ៤,៧៥ក្រាម, គ្រឿង​ញៀនប្រភេទម៉្សៅម៉ត់ពណ៌ស(កេតាម៉ីន)ចំនួន ០១កូនថង់កិប ទម្ងន់ ០,៦៨ក្រាម, កញ្ឆា​ក្រៀម​ចំនួន ០១ថង់កិប ទម្ងន់ ៧៥,៩០ក្រាម, ជញ្ជីងសម្រាប់ថ្លឹងគ្រឿងញៀនចំនួន០២គ្រឿង និង​ថង់​សម្រាប់វេចខ្ចប់គ្រឿងញៀនមួយចំនួន។ ៣.ឈ្មោះ រ៉ាក់សាន់ ផុងសឿ ហៅ ឣូរ ភេទប្រុស ឣាយុ​៣៣ឆ្នាំ ជនជាតិថៃ ដកហូតវត្ថុតាង មានកាបូប ស្ពាយចំហៀង ពណ៌ខ្មៅ ចំនួន០១ មាន​កាំ​ភ្លើង​ខ្លី ចំនួន០១ដើម (ម៉ាកSIG SAUER លេខ58C385402 ពណ៌ខ្មៅ) ក្នុងនោះមាន​បង់​ចំនួន​០២ គ្រាប់ចំនួន ១៩គ្រាប់(ជាឣ្នកដឹកជញ្ជូន), ៤.ឈ្មោះ ប្រាគីត សាមីផាក់ ហៅ គីត ភេទប្រុស ឣាយុ​៣៨ឆ្នាំ ជនជាតិថៃ (ជាឣ្នកដឹកជញ្ជូន) ៥.ឈ្មោះ ព្រីឆា យឺនយ៉ុង ហៅ ឃីវ ភេទប្រុស ឣាយុ​២១ឆ្នាំ ជនជាតិថៃ (ជាឣ្នកដឹកជញ្ជូន) បន្ទាប់​មក​កម្លាំង​បាន​ធ្វើ​ការ​ឃាត់​ខ្លួន​ហើយ​នាំ​មក​មូលដ្ឋាន​កង​រាជឣាវុធហត្ថក្រុង ដើម្បីសួរនាំនិងចាត់ការតាមនីតិវិធី។លោកវរសេនីយ៍ត្រី នួន នីណារ៉ូ បានបញ្ជាក់ទៀតថា ជនសង្ស័យទាំង០៥នាក់ ក្រោយ​ពី​កម្លាំង​ជំនាញ​សួរ​នាំ​រួចបានឆ្លើយសារភាពថា ពួកខ្លួនពិតជាបាន ដឹកជញ្ជូន ជួញដូរ រក្សាទុក គ្រឿង​ញៀន និងកាន់កាប់ ឬដឹកជញ្ជូនឣាវុធដោយគ្មានការឣនុញ្ញាតពិតប្រាកដមែន។ ដោយ​ផ្ឣែក​លើ​ចម្លើយ​សារភាព និងមានវត្ថុតាងជាក់ស្ដែង កម្លាំងជំនាញមូលដ្ឋានកងរាជឣាវុធហត្ថក្រុង កសាង​សំណុំ​រឿង​បញ្ជូនមកបញ្ជាការដ្ឋានកងរាជឣាវុធហត្ថខេត្តចាត់ការបន្តតាមនីតិវិធី។លោកវរសេនីយ៍ឯក ម៉ែន ភិរម្យ មេបញ្ជាការរង កងរាជឣាវុធហត្ថខេត្ត ទទួលការងារស្រាវជ្រាវ និង​បង្ក្រាបបទល្មើស បានឱ្យដឹងថា ជនសង្ស័យទាំង០៥នាក់ រួមនឹងវត្ថុ​តាង​ត្រូវ​បាន​កម្លាំង​ការិយាល័យ​ប្រឆាំង​គ្រឿងញៀន កងរាជឣាវុធហត្ថខេត្តបញ្ជូន​ទៅសាលា​ដំបូង​ខេត្ត​ហើយ​នៅ​ព្រឹ​ក​ថ្ងៃ​ព្រហស្បតិ៍ ទី១២ ខែកញ្ញា ឆ្នាំ២០២៤នេះ ដើម្បីចាត់ការតាមនីតិវិធី៕ អត្ថបទ រឿង ចន្ទ្រា

មន្រី្តជាន់ខ្ពស់សុខាភិបាល ស្នើគណៈទន្តពេទ្យកម្ពុជា ត្រូវតែមានភាពម៉ត់ចត់ក្នុងការអនុវត្តច្បាប់

2024/09/12 02:16:47 pm        125
Facebook Telegram Linkin
ឯកឧត្តមទន្តបណ្ឌិត អឿន បូរ៉ារ័ត្ន រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បានស្នើគណៈទន្តពេទ្យកម្ពុជា ត្រូវតែមាន​ភាព​ម៉ត់ចត់​ក្នុង​ការ​អនុវត្ត​ច្បាប់។ការថ្លែងរបស់ឯកឧត្តមទន្តបណ្ឌិត អឿន បូរ៉ារ័ត្ន យ៉ាងដូច្នេះ ក្នុងសន្និសីទ​ទន្តសាស្រ្ត​អន្តរជាតិ លើកទី​១២ និងការតាំងពិព័រណ៌សម្ភារបរិក្ខារទន្តសាស្រ្ត រយៈពេល២ថ្ងៃ ចាប់ពីថ្ងៃទី១២-១៣ ខែ​កញ្ញា ឆ្នាំ២០២៤នេះ។ឯកឧត្តម​ទន្តបណ្ឌិត បានបន្តថា បច្ចុប្បន្នអ្នកប្រកប​វិជ្ជាជីវៈ​លើ​វិស័យ​ទន្ត​សាស្រ្តមា​ន​ការ​រីក​ចម្រើន​។ ​ប៉ុន្តែវិជ្ជាជីវៈរបស់យើងនៅមានការខ្វះចន្លោះមួយចំនួនតូច កំពុងប្រាស​ចាក​ពី​ក្រមសីលធម៌​វិជ្ជា​ជីវៈ​។ ជាក់ស្តែងយើងឃើញមានការផ្សព្វផ្សាយពាណិជ្ជកម្ម យើងមិនគួរធ្វើដូច្នោះទេ។ ព្រោះ​យើង​មាន​​លក្ខណៈសម្បតិ្តគ្រប់គ្រាន់ហើយ ប៉ុន្តែមួយចំនួនឃើញមាននៅក្នុងបណ្តាញសង្គមច្រើន នៅ​មាន​ការ​ផ្សព្វផ្សាយ អួតអាងច្រើន។ ដូច្នេះ​សូម​ឲ្យ​គណៈ​វិជ្ជាជីវៈ​មេត្តាចា​ប់​អារម្មណ៍​លើ​កិច្ច​ការ​ទាំង​អស់ ដើម្បីជៀសវាងនូវការអនុវត្តតាមផ្លូវច្បាប់ ព្រោះថា​បងប្អូន​យើង​សុទ្ធ​តែ​មាន​ចំណេះ​ជំនា​ញ​ដូច​គ្នា។​ យើងផ្ទាល់សុទ្ធតែជាទន្តបណ្ឌិត ជាជំនាញមួយដែលប្រកបដោយកិត្តិយស សូមយើង​ធ្វើ​តាម​អ្វី​ដែល​ជាសេចកី្តថ្លៃថ្នូររបស់យើង។ ឯកឧត្តមទន្តបណ្ឌិត អឿន បូរ៉ារ័ត្ន បានសង្កត់ធ្ងន់ថា ក្នុងអាណតិ្តទី៧នេះ រាជរដ្ឋាភិបាល​ផ្តោត​សំខាន់​លើ​វិស័យសុខាភិបាល ហើយអាណតិ្តថ្មីរបស់គណៈទន្តពេទ្យកម្ពុជា ស្របគ្នាជា​មួយ​នឹង​អាណតិ្ត​ថ្មី​របស់រាជរដ្ឋាភិបាលផងដែរ។ ដូច្នេះអ្វីដែលជាភាពម៉ត់ចត់របស់រាជរដ្ឋាភិបាល ទាមទា​រ​ឲ្យ​គណៈ​ទន្តពេទ្យកម្ពុជា ត្រូវមានភាពម៉ត់ចត់ដោយខ្លួនឯងក្នុងការអនុវត្តច្បាប់។ ដូច្នេះ​សុំ​ឲ្យ​គណៈ​វិជ្ជាជីវៈទាំងថ្នាក់ជាតិ និងថ្នាក់ខេត្ត ត្រូវតែពង្រឹងនូវការអនុវត្តច្បាប់ ជាពិសេស​ឯកឧត្តម​សាស្រ្តា​ចារ្យ ឈាង រ៉ា រដ្ឋមន្រី្តក្រសួងសុខាភិបាល តែងតែផ្តាំផ្ញើដល់មន្រី្តសុខាភិបាលទាំងអស់ ត្រូវ​តែ​បុរេសកម្ម។ ដូច្នេះយើងត្រូវត្រៀមបង្ការទុកជាមុន ជៀសវាងមាន​ហេតុការណ៍​ណា​មួយ​កើត​ឡើង​ជាយ​ថាហេតុ ហើយទើបយើងមានការសោកស្តាយជាក្រោយ។បើតាមលោក​សាស្រ្តាចារ្យជំនួយ ប៉ូច សុភារ័ត្ន ប្រធានគណៈទន្តពេទ្យកម្ពុជា បានឲ្យដឹងថា គិត​ត្រឹម​ថ្ងៃ​ទី៣១ ខែសីហា ឆ្នាំ២០២៤ គណៈទន្តពេទ្យកម្ពុជា បានចុះបញ្ជីកា ជូនទន្តពេទ្យ​ចំនួន​១៥៤៧​នាក់​។ ក្នុងចំណោមនោះទន្តពេទ្យដែលមានអាជ្ញាបណ្ណ ប្រកបវិជ្ជាជីវៈទន្តសាស្ត្រ ដែល​មាន​សុពលភាព​មាន​ចំនួន​១២៧៧​នាក់​។​ និស្សិត​ដែល​បាន​បញ្ចប់​ការ​សិក្សា​កម្រិ​ត​ទន្ត​បណ្ឌិត​ពី​គ្រឹះស្ថាន​បណ្តុះបណ្តាលទាំងសារធាណៈ និងឯកជនគិតត្រឹមឆ្នាំ២០២៤មានចំនួន២,២៦០នាក់ (ស្រី៦៧៣នាក់)។ គណៈទន្តពេទ្យកម្ពុជា ទទួលខុសត្រូវក្នុង​ការ​អនុវត្ត​ច្បាប់​ស្តីពី​ការ​គ្រប់​គ្រង​អ្នក​ប្រកប​វិជ្ជាជីវៈក្នុងវិស័យសុខាភិបាល ហើយបានចងក្រង និងផ្សព្វផ្សាយនូវឯកសារគតិយុត្តជា ច្រើន​មានជាអាទិ៍៖ - ក្រមសីលធម៌ទន្តពេទ្យ - លក្ខខណ្ឌ និងបែបបទ​នៃ​ការ​ស្នើ​សុំ​ចុះ​បញ្ជីការ និង​អាជ្ញា​ប័ណ្ណ​វិជ្ជាជីវៈទន្តសាស្ត្រ - និយាមអប្បបរមានៃការអភិវឌ្ឍវិជ្ជាជីវៈបន្ត - គោលការណ៍ណែនាំ​ស្តីពី​ការ​អភិវឌ្ឍវិជ្ជាជីវបន្ត និងដែនកំណត់វិជ្ជាជីវៈបទដ្ឋាន និងនិយាមវិជ្ជាជីវៈ​នៃ​ការ​ប្រតិបត្តិ​សម្រាប់​អ្នក​ប្រកប វិជ្ជាជីវៈទន្តសាស្ត្រនៅព្រះរាជាណាចក្រកម្ពុជា និងសូមអំពាវនាវ​ដល់​ទន្តពេទ្យ​ប្រកប​វិជ្ជាជីវៈទន្តសាស្ត្រទាំងអស់ដែលមិនទាន់មានអាជ្ញាបណ្ណវិជ្ជាជីវៈ រួសរាន់ចុះបញ្ជីការ​ស្នើ​អាជ្ញា​​បណ្ណឲ្យបានគ្រប់គ្នា ដើម្បីមាននីតិសម្បទា គ្រប់គ្រាន់អាច​ប្រកប​វិជ្ជា​ជីវៈ​ទន្តសាស្ត្រ​ស្រប​ច្បាប់​៕ អត្ថបទ រដ្ឋា

បណ្ដាញសង្គម

ព័ត៌មានថ្មីៗ

ដាណឺម៉ាក បញ្ជាក់ថា ខ្លួនមិនច្រានចោលលទ្ធភាពនៃការទទួលស្គាល់ភាពជារដ្ឋរបស់ប៉ាឡេស្ទីនឡើយ
08/26/2025 09:08 PM
Facebook Telegram Linkin
ប្រធានាធិបតីងហ្វាំងឡង់ រំពឹងថា លោក Trump នឹងអស់ការអត់ធ្មត់ជាមួយរុស្ស៊ី
08/26/2025 09:08 PM
Facebook Telegram Linkin
អ៊ីរ៉ង់ប្តេជ្ញាចាត់វិធានការតបតវិញ បន្ទាប់ពីអូស្ត្រាលីបណ្តេញបេសកជន
08/26/2025 09:08 PM
Facebook Telegram Linkin
គ្រោះទុរ្ភិក្សត្រូវបានប្រកាសនៅទីក្រុងហ្កាហ្សា ខណៈភាពអត់ឃ្លានកើតមានឡើង
08/26/2025 08:08 PM
Facebook Telegram Linkin
កសិករប៉ាគីស្ថានជាប់បំណុល និងប្រឈមវិបត្តិទឹកជំនន់បង្កឡើងដោយបម្រែបម្រួលអាកាសធាតុ
08/26/2025 08:08 PM
Facebook Telegram Linkin
អេស្ប៉ាញប្រកាសតំបន់អាសន្នដែលរងការឆាបឆេះដោយសារភ្លើងឆេះព្រៃ
08/26/2025 08:08 PM
Facebook Telegram Linkin
UN៖ មនុស្សម្នាក់ក្នុងចំណោម ៤នាក់ ជួបកង្វះទឹកផឹកស្អាតសុវត្ថិភាពនៅទូទាំងពិភពលោក
08/26/2025 08:08 PM
Facebook Telegram Linkin
ជនប៉ាឡេស្ទីនប៉ះទង្គិចជាមួយកងទ័ពអ៊ីស្រាអែល អំឡុងការវាយឆ្មក់ទីក្រុង Ramallah តំបន់វ៉េសប៊ែង
08/26/2025 08:08 PM
Facebook Telegram Linkin
ឯកឧត្តមឧបនាយករដ្ឋមន្ត្រី ហ៊ុន ម៉ានី ផ្តល់អនុសាសន៍ ចំនួន៤ ជូនដល់សិក្ខាសាលាឌីជីថលូបនីយកម្មក្នុងរដ្ឋបាលសាធារណៈ
08/26/2025 08:08 PM
Facebook Telegram Linkin
យុទ្ធនាការថ្ងៃទី៩ ដើម្បីជំរុញ​ការផ្តល់​ឱកាស​ការងារ​ជូនដល់​ពលករខ្មែរ​ទើប​ត្រឡប់​មក​ពីប្រទេសថៃ ក្រុមការងារក្រសួងការងារបានចុះ​ទៅដល់រោងចក្រ សហគ្រាសចំនួន ១៤៣៥
08/26/2025 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.