BTV NEWS

កិច្ចប្រជុំ RBC ព្រឹកនេះ កម្ពុជា-ថៃ បានឯកភាពរក្សាទំនាក់ទំនង និងខិតខំដោះស្រាយរាល់បញ្ហាដោយសន្តិវិធី និងបញ្ចៀសការប៉ះទង្គិចគ្នា

អតីតយុទ្ធជន៤០គ្រួសារនឹងទទួលបានផ្ទះ និងដី ជាអំណោយរបស់សម្តេចធិបតី ហ៊ុន ម៉ាណែត

រាជរដ្ឋាភិបាលបានបន្ថែមថវិកា ២០ លានដុល្លារផ្តល់ជាទុនបង្វិលក្នុងការប្រមូលទិញស្រូវពីកសិករ

សភាយុវពាណិជ្ជករអន្តរជាតិ កម្ពុជា (JCI Cambodia) ទទួលបានការគាំទ្រលើការបណ្តុះបណ្តាលជំនាញសហគ្រិនភាពនៅកម្រិតវិទ្យាល័យពីក្រសួងការងារ និងបណ្ដុះបណ្ដាលវិជ្ជាជីវៈ

ព័ត៌មានជាតិ

ឯកឧត្តម យឿន យឿត ផ្ញើសារអបអរសាទរសម្តេចតេជោ ហ៊ុន សែន ទទួលបានសញ្ញាបត្របណ្ឌិតកិត្តិយសផ្នែក«ភាពជាអ្នកដឹកនាំ និងការកសាងសន្តិភាព»

ឯកឧត្តម យឿន យឿត ទីប្រឹក្សារាជរដ្ឋាភិបាលកម្ពុជា និងជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងភរិយាបានផ្ញើសារអបអរសាទរយ៉ាងស្មោះស្ម័គ្របំផុតជូនចំពោះសម្តេចតេជោ ហ៊ុន សែន ប្រធាន ព្រឹទ្ធសភាកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ជូនចំពោះសម្តេច ដែលទទួលបានសញ្ញាបត្របណ្ឌិតកិត្តិយសផ្នែក«ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ Dongguk University WISE ខេត្តឃ្យុងសាងបុកដូ នៃសាធារណរដ្ឋកូរ៉េ នាថ្ងៃទី១២ ខែកញ្ញា ឆ្នាំ២០២៤នេះ។ការទទួលសញ្ញាបត្របណ្ឌិតកិត្តិយសនេះ ជាមហាកិត្តិយសដ៏ថ្លៃថ្លា ឧត្តុង្គឧត្តមបំផុតសម្រាប់ប្រ ទេសជាតិ និងប្រជាជនកម្ពុជាទាំងមូល និងស័ក្តិសមបំផុតចំពោះសម្តេច ដែលបានដឹកនាំការតស៊ូប្រកប ដោយវីរភាព ក្នុងការដណ្តើមបាននូវ សន្តិភាព ការកសាង និងអភិវឌ្ឍន៍សង្គមកម្ពុជាទាំងមូល ព្រមទាំង បានកែប្រែប្រទេសកម្ពុជា ពីភាពដុនដាបខ្ទេចខ្ទាំដោយភ្លើងសង្រ្គាម ក្លាយជាប្រទេសដែលមានកិត្តិនាម និង កិត្តិស័ព្ទស្មើមុខស្មើមាត់ស្មើសិទ្ធនៅក្នុងតំបន់ និងសកលលោក។ក្នុងនាមប្រជាពលរដ្ឋម្នាក់ ដែលកំពុងរស់នៅយ៉ាងសុខសាន្ត ក្រោមម្លប់សន្តិភាព ដែលដឹកនាំដោយគណបក្សប្រជាជនកម្ពុជា ខ្ញុំបាទ និងភរិយាសូមគោរពជូនពរ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រីទាំងអស់ ជួបប្រទះតែសេចក្តីសុខ សុភមង្គល ព្រមទាំងសមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាត ឡើយ៕

សម្ដេចតេជោ បានទទួលសញ្ញាបត្របណ្ឌិតកិត្តិយសពីសាកលវិទ្យាល័យដុងហ្គុកវ៉ាយស៍ នៃប្រទេសកូរ៉េខាងត្បូង

នៅខេត្តឃ្យុងសាងបុកដូ នៃសាធារណរដ្ឋកូរ៉េ ព្រឹកថ្ងៃទី១២កញ្ញានេះ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា មានមហាកិត្តិយសដ៏ឧត្តុង្គឧត្តមបានអញ្ជើញទទួលសញ្ញាបត្របណ្ឌិតកិត្តិយសពីសាកលវិទ្យាល័យដុងហ្គុកវ៉ាយស៍ (Dongguk University WISE) និងធ្វើបាឋកថា ស្តីពី «បទពិសោធន៍របស់កម្ពុជា ក្នុងការរំដោះជាតិការកសាងសន្តិភាព ការផ្សះផ្សារ និងកសាងជាតិឡើងវិញ»។ក្រោយពីទទួលមហាកិត្តិយសដ៏ថ្លៃថ្លាទទួលសញ្ញាបត្រពីសាកលវិទ្យាល័យដ៏ល្បីមួយនេះ សម្តេចតេជោ ហ៊ុន សែន បានថ្លែងសុន្ទរកថា និងធ្វើបាឋកថា បង្ហាញនូវជីវប្រវត្តិស្ទើរពេញមួយជីវិតរបស់សម្តេចក្នុងការតស៊ូ ដើម្បីរំដោះប្រទេសជាតិ និងប្រជាជនកម្ពុជាឱ្យរួចផុតពីការកាប់សម្លាប់នៅក្នុងរបបកម្ពុជាប្រជាធិបតេយ្យខ្មែរក្រហម ក្រោមការជួយគាំទ្រពីកងទ័ពស្ម័គ្រចិត្តវៀតណាម ហើយបានដឹកនាំស្តារ កសាងប្រទេសជាតិឡើងវិញចេញពីគំនរផេះផង់ជាបន្តបន្ទាប់រហូតដល់មានកិច្ចព្រមព្រៀងសន្តិភាព និងការបង្រួបបង្រួមជាតិ នាំមកនូវការឯកភាពជាតិ ឯកភាពទឹកដី មានសន្តិភាព ស្ថិរភាព សន្តិសុខសណ្តាប់ធ្នាប់សាធារណៈ ការគោរពសិទ្ធិមនុស្ស ដែលមានគណបក្សនយោបាយចូលរួមប្រកួតប្រជែងជាច្រើនក្នុងការបោះឆ្នោត និងធ្វើឱ្យប្រទេសជាតិមានការអភិវឌ្ឍរីកចម្រើនដូចសព្វថ្ងៃ។ជាមួយនឹងរឿងរាវជាច្រើននៃជីវិតតស៊ូនិងដឹកនាំប្រទេសក្នុងឋានៈជានាយករដ្ឋមន្ត្រីអស់រយៈពេលជាច្រើនទសវត្សដែលមានទាំងការដឹកនាំកំណែទម្រង់ សេដ្ឋកិច្ច ជំរុញកម្ពុជាប្ដូរពីសេដ្ឋកិច្ចផែនការទៅចាប់យកសេដ្ឋកិច្ចទីផ្សារខណៈពេលដែលសូវៀត និងវៀតណាមពុំទាន់បានអនុវត្តនយោបាយកំណែទម្រង់បែបនេះនៅឡើយ ក្នុងអំឡុងទសវត្សរ៍៨០ និង៩០ដែលសេដ្ឋកិច្ចកម្ពុជាមានភាពទន់ខ្សោយខ្លាំង ហើយការអភិវឌ្ឍ សេដ្ឋកិច្ចនិងហេដ្ឋារចនាសម្ព័ន្ធ បានពឹងផ្អែកស្ទើរតែទាំងស្រុងទៅលើជំនួយរបស់បរទេស សម្តេចគូសបញ្ជាក់ថា៖ យើងបានខិតខំ កែទម្រង់ផ្ទៃក្នុងផង និងខិតខំជំរុញសមាហរណកម្មសេដ្ឋកិច្ចរបស់កម្ពុជាទៅក្នុងតំបន់និងសកលលោក។សម្តេចថា នៅក្រោមការគ្រប់គ្រងរបស់សម្ដេច រាជរដ្ឋាភិបាលបានដាក់ចេញ និងអនុវត្តដោយជោគជ័យនៅយុទ្ធសាស្ត្រត្រីកោណនៅឆ្នាំ១៩៩៨ដល់ឆ្នាំ២០០៣និងយុទ្ធសាស្ត្រចតុកោណ ចំនួន ៤ដំណាក់កាលពីឆ្នាំ២០០៣ ដល់២០២៣។ សម្ដេចបានគូបញ្ជាក់ថាយុទ្ធសាស្ត្រត្រីកោណ ដែលសង្កត់ធ្ងន់លើអាទិភាពបី៖ ទីមួយ. ការធ្វើសន្តិភាវូបនីកម្ម ពាណិជ្ជកម្ម សំដៅដល់ការរក្សាសណ្ដាប់ធ្នាប់ស្ថេរភាព សន្តិសុខនិងការកសាងសន្តិភាពក្នុងប្រទេស.ទី២. សមាហរណកម្មរបស់កម្ពុជា ទៅក្នុងតំបន់ និងសហគមន៍អន្តរជាតិរួមទាំងស្ថាប័នហិរញ្ញវត្ថុអន្តរជាតិ និងការធ្វើឲ្យមានប្រក្រីភាពនៃទំនាក់ទំនងរបស់ខ្លួនជាមួយប្រទេសផ្សេងទៀត ដើម្បីជំរុញការផ្លាស់ប្ដូរពាណិជ្ជកម្ម និងការវិនិយោគ។ ទី៣. ការអភិវឌ្ឍសេដ្ឋកិច្ចសង្គមការកាត់បន្ថយភាពក្រីក្រ កំណែទម្រង់អភិបាលកិច្ចស្ថាប័នប្រព័ន្ធតុលាការ និងការគ្រប់គ្រងវិស័យសាធារណៈ ចាប់ពីអាណត្តិទី៣ឆ្នាំ២០០៤ ដល់២០០៨ ដល់អាណត្តទី៦ រាជរដ្ឋាភិបាលកម្ពុជាបានអនុម័ត និងអនុវត្តយុទ្ធសាស្ត្រចតុកោណ ដើម្បីប្រែក្លាយតួនាទីជារាជរដ្ឋាភិបាលសេដ្ឋកិច្ចក្រោមបាវចនា រាជរដ្ឋាភិបាលនៃកំណើនការងារ សមធម៌ និងប្រសិទ្ធភាព ដោយអនុវត្តរបៀបវារៈ សកម្មភាពសេដ្ឋកិច្ចគ្រប់ជ្រុងជ្រោយ សំដៅកែលម្អ និងកសាងសមត្ថភាពស្ថាប័នសាធារណៈ ពង្រឹងអភិបាលកិច្ច និងទំនើបកម្មហេដ្ឋារចនាសម្ព័ន្ធសេដ្ឋកិច្ច ដូចជាផ្លូវថ្នល់ ផ្លូវដែក ការតភ្ជាប់ផ្លូវអាកាស ដើម្បីលើកកម្ពស់កំណើនសេដ្ឋកិច្ច បង្កើតការងារសម្រាប់ប្រជាពលរដ្ឋគ្រប់រូប ធានាសមធម៌សង្គម និងលើកកំពស់ប្រសិទ្ធភាពនៃវិស័យសាធារណ:។ សម្តេចថា ទន្ទឹមនឹងការជំរុញការអភិវឌ្ឍផ្ទៃក្នុងយើងក៏បានជំរុញការធ្វើសមាហរណកម្មទៅក្នុងតំបន់និងអន្តរជាតិ ដើម្បីបង្កើតកាលានុវត្ថភាពថ្មីៗ ទំនាក់ទំនងការទូតកិច្ចសហប្រតិបត្តិការសេដ្ឋកិច្ចនិងការអភិវឌ្ឍប្រកបដោយចីរភាព។ផ្អែកលើសមិទ្ធផលកន្លងមក រាជរដ្ឋាភិបាលថ្មីបានបង្កើតយុទ្ធសាស្ត្រ ដោយទំនុកចិត្តដែលប្រាថ្នាចង់ប្រែក្លាយប្រទេស ជាប្រទេសដែលមានចំណូលខ្ពស់នៅឆ្នាំ 2050 យើងបានប្រែក្លាយពីប្រទេសដែលនៅឯកោ និងទទួលរងទណ្ឌកម្មដោយសហគមន៍អន្តរជាតិទៅជាប្រទេសដែលធ្វើសមាហរណកម្មយ៉ាងស៊ីជម្រៅនៅក្នុងតំបន់និងពិភពលោក ក្លាយទៅជាប្រទេសដែលអាចបញ្ជូនកងរក្សាសន្តិភាព ទៅចូលរួមយ៉ាងសកម្មនៅក្នុងរបៀបវារៈសន្តិភាពទាំងក្នុងតំបន់និងក្រៅតំបន់ថែមទៀត។ទោះជាយ៉ាងណា សម្តេចបានបញ្ជាក់ថា ភាពជាម្ចាស់នូវជោគវាសនាប្រទេសជាតិ ប្រទេសជាតិមួយត្រូវតែមានភាពជាម្ចាស់លើបញ្ហាជាតិរបស់ខ្លួន នៅពេលដែលប្រជាជាតិមួយបាត់បង់ម្ចាស់លើជោគវាសនារបស់ខ្លួនពេលនោះហើយដែលប្រទេសជាតិត្រូវរងការបែកបាក់និងអន្តរាយ។ ដូចគ្នានៅក្នុងដំណើរការស្វែងរកសន្តិភាពក៏ត្រូវតែចាប់ផ្ដើមពីពលរដ្ឋម្ចាស់ប្រទេស ហើយដំណោះស្រាយដ៏យូរអង្វែងក៏ទាមទារឲ្យមានការចូលរួមពីប្រជាជន និងកងកម្លាំងប្រដាប់អាវុធគ្រប់និន្នាការនយោបាយផងដែរ៕

ក្រុមប្រឹក្សាធម្មនុញ្ញរៀបចំបោះឆ្នោតជ្រើសតាំងសមាជិកឧត្តមក្រុមប្រឹក្សាអង្គចៅក្រម ដើម្បីបន្តយន្តការធានាយុត្តិធម៌សង្គម

អ្នកនាំពាក្យក្រុមប្រឹក្សាធម្មនុញ្ញ បញ្ជាក់ថា ការបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រម គឺជាការបន្តយន្តការធានាដល់យុត្តិធម៌សង្គម។នៅថ្ងៃទី១២ ខែកញ្ញា ឆ្នាំ២០២៤ ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានដឹកនាំសមាជិក-សមាជិកា ដើម្បីដឹកនាំកិច្ចប្រជុំពេញអង្គបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រម ០១រូប សម្រាប់អាណត្តិ៥ឆ្នាំ លើកទី៣ លើបេក្ខភាពចំនួន ៤រូប និងមានសមាជិក០១រូប ត្រូវបានជាប់ឆ្នោតជាសមាជិកឧត្តមក្រុមប្រឹក្សា នៃអង្គចៅក្រម មានឈ្មោះថា ឯកឧត្តម ប្លង់ ឆ្លាម និងទទួលបានសំឡេងគាំទ្រទាំងស្រុងពីសមាជិកក្រុមប្រឹក្សាទាំងមូល។ ឯកឧត្តម ព្រហ្ម វិចិត្រអក្ខរ៉ា អគ្គលេខាធិការរង និងជាអ្នកនាំពាក្យក្រុមប្រឹក្សាធម្មនុញ្ញ បញ្ជាក់ថា យោងតាមការបែងចែកអំណាចរវាងនីតិប្រតិបត្តិ នីតិបញ្ញត្តិ និងអង្គតុលាការត្រូវបានញែកដាច់ពីគ្នា ដូច្នេះចំពោះតួនាទីរបស់សមាជិកឧត្តមក្រុមប្រឹក្សានៃអង្គចៅក្រមត្រូវធានាបានយុត្តិធម៌ ប៉ុន្តែក្នុងករណីមានបណ្តឹងពាក់ព័ន្ធនឹងវិជ្ជាជីវៈរបស់ចៅក្រម ឬព្រះរាជអាជ្ញា ឧត្តមក្រុមប្រឹក្សានៃចៅក្រមជាស្ថាប័នត្រូវតម្រង់ទិសក្នុងការធានាយុត្តិធម៌សង្គម។ សូមជម្រាបថា ការបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រមនេះយោងតាមមាត្រា៤នៃច្បាប់ស្តីពីការប្រព្រឹត្តទៅរបស់ឧត្តមក្រុមប្រឹក្សានៃអង្គចៅក្រម ដែលចែងថាក្រុមប្រឹក្សាធម្មនុញ្ញត្រូវបោះឆ្នោតជ្រើសតាំងសមាជិក០១រូប សម្រាប់ទទួលតំណែងជាសមាជិកឧត្តមក្រុមប្រឹក្សានៃអង្គចៅក្រម ដែលជាឥស្សរជនក្នុងវិស័យច្បាប់យ៉ាងតិច១៥ឆ្នាំ និងធ្លាប់ជាអតីតចៅក្រម ឬព្រះរាជអាជ្ញា៕ អត្ថបទ សេក ឧត្តម

សម្តេចតេជោ៖ បើអាមេរិកមានសន្តិភាព និងអំណាចហើយហេតុអ្វីខំប្រឹងផលិតអាវុធបន្ថែមទៀតធ្វើអ្វី?

ឆ្លើយតបក្រុមអ្នកប្រឆាំងដែលបានរិះគន់ និងលើកឡើងថា កម្ពុជាមានសន្តិភាពហើយចាំបាច់ខំរក្សា និងការធ្វើអ្វីនោះ? សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានចំអកទៅក្រុមទាំងនោះវិញថា ចុះអាមេរិកមានអំណាច និងមានសុខសន្តិភាពហើយហេតុអ្វីអាមេរិកខំប្រឹងផលិតអាវុធបន្ថែមទៀតធ្វើអ្វី?ក្នុងឱកាសអញ្ជើញទទួលសញ្ញាបត្របណ្ឌិតកិត្តិយស«ភាពជាអ្នកដឹកនាំនិងការកសាងសន្តិភាព » ពីសាកលវិទ្យាល័យដុងហ្គុកវ៉ាយស៍ និងធ្វើបាឋកថា ស្តីពីបទពិសោធន៍របស់កម្ពុជាក្នុងការរំដោះជាតិ ការកសាងសន្តិភាពនៅសាធារណរដ្ឋកូរ៉េ នាថ្ងៃទី១២ ខែកញ្ញា ឆ្នាំ២០២៤នេះ សម្តេចតេជោ ហ៊ុន សែន បាន លើកឡើងថា មានក្រុមប្រឆាំងមួយក្តាប់តូចដែលកំពុងនីរទេសនៅក្រៅស្រុក បានធ្វើការរិះគន់ និងចំអក ឲ្យរាជរដ្ឋាភិបាលជារឿយៗ ចំពោះការប្តេជ្ញាចិត្តរបស់រាជរដ្ឋាភិបាលក្នុងកិច្ចការពារនូវសុខសន្តិភាពជូនប្រ ទេសជាតិដែលកំពុងមានសព្វថ្ងៃនេះ សម្តេចតេជោ ហ៊ុន សែន បានថ្លែងថា កម្ពុជាចំាបាច់ត្រូវតែរក្សា និង ការពារនូវសុខសន្តិភាពនេះឲ្យខាងតែបាន ខណៈមានការប៉ុនប៉ងពីពួកក្រុមជ្រុលនិយមដែលចង់ផ្តួលរំលំ រាជរដ្ឋាភិបាលស្របច្បាប់កើតចេញពីការបោះឆ្នោតតាមគន្លងប្រជាធិបតេយ្យ សេរីពហុបក្ស ហើយការប្តេជ្ញាចិត្តរបស់រាជរដ្ឋាភិបាលនេះ វាដូចជាប្រទេសមហាអំណាចមួយចំនួនដូចជាអាមេរិកយ៉ាងដូច្នេះដែរ ដែលខិតខំផលិតអាវុធបន្ថែមពេលដែលខ្លួនកំពុងមានអំណាច និងសន្តិភាពហើយនោះ។យ៉ាងណាក៏ដោយសម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជាបានប្រកាសជាថ្មីម្តង ទៀតរាជរដ្ឋាភិបាលនឹងការពារឲ្យខាងតែបាននូវសុខសន្តិភាព និងការអភិវឌ្ឍជូនប្រជាពលរដ្ឋដែលកំពុង មានសព្វថ្ងៃនេះ ហើយនឹងកំចាត់ចោលភ្លាមចំពោះបុគ្គលណា ដែលមានចេតនាចង់បំផ្លាញនូវសន្តិភាព ដែលបានរកដោយកម្រនេះ៕ អត្ថបទ៖ បាន ចក់

សម្ដេចតេជោ ហ៊ុន សែន៖ កម្ពុជាត្រូវនិយាយពីសន្តិភាពវាមិនមែនជារឿងចម្លែកទេ ខណៈពិភពលោកកំពុងរត់ប្រណាំងសព្វាវុធ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញជីវប្រវត្តិនៃការតស៊ូស្ទើរពេញមួយជីវិតរបស់សម្តេចដើម្បីរំដោះជាតិ និងប្រជាជនឱ្យរួចផុតពីរបបកាប់សម្លាប់ខ្មែរក្រហមហើយនាំប្រទេសកម្ពុជាមានការកសាងពីគំនរផេះផង់ និងមានផ្សះផ្សាបង្រួបបង្រួមជាតិនិងនាំមកនូវសន្តិភាព ការអភិវឌ្ឍរីកចម្រើនរហូតមកដល់សព្វថ្ងៃនេះ ហើយដើម្បីការពារសន្តិភាពសម្តេចកំពុងត្រៀមរៀបចំនូវច្បាប់ដាក់ក្រុមមនុស្ស ឬអង្គការចាត់តាំងខ្លះទៅជាក្រុមភេរវកម្មនៅពេលខាងមុខ។សម្តេចតេជោ ហ៊ុន សែន គូសបញ្ជាក់បង្ហាញសកលលោកបានយល់ដឹងបន្ថែមពីគុណបំណាច់ដ៏ធំធេង និងគោលគំនិតរបស់សម្តេចបែបនេះក្នុងឱកាសអញ្ជើញទៅខេត្តឃ្យុងសាងបុកដូ នៃសាធារណរដ្ឋកូរ៉េ ដើម្បីទទួលសញ្ញាបត្របណ្ឌិតកិត្តិយស « ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ (Dongguk University WISE) នាព្រឹកថ្ងៃទី១២ ខែកញ្ញា ឆ្នាំ២០២៤នេះ។សម្តេចបានគូសបញ្ជាក់ថា ឥឡូវនេះ យុវជនមួយចំនួនបានភ្លេចនៅគុណតម្លៃនៃសន្តិភាពជាបណ្ដើរៗ។ សម្ដេចបន្តថា ដើម្បីធានានូវបញ្ហានេះយើងត្រូវតែធ្វើឲ្យបានហ្មត់ចត់ បើនិយាយពីសន្តិភាពដែលកម្ពុជា ធ្លាប់មានពីអតីតកាលគឺខ្លីណាស់ ពោលកាលពីសង្គមរាស្ត្រនិយមមានត្រឹមតែ១៦ឆ្នាំ ហើយឥឡូវមាន២៦ឆ្នាំ ហើយយើងមិនត្រូវការត្រឹមតែ ២៦ឆ្នាំនេះទេគឺ យើងត្រូវការសន្តិភាពជារៀងរហូត៕

សម្ដេចធិបតី៖ កំពង់ផែស្វយ័តក្រុងព្រះសីហនុ នឹងក្លាយទៅជាមជ្ឈមណ្ឌលភស្តុភារកម្មតំបន់ដ៏សំខាន់

ក្នុងឱកាសអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យប្រើប្រាស់ជាផ្លូវការចំណតផែកុងតឺន័របន្ថែមប្រវែង ២៥៣ ម៉ែត្រ នៃកំពង់ផែស្វយ័តក្រុងព្រះសីហនុ នាព្រឹកថ្ងៃទី១២ ខែកញ្ញា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា កំពង់ផែស្វយ័តក្រុងព្រះសីហនុនឹងក្លាយទៅជាមជ្ឈមណ្ឌលភស្តុភារកម្មតំបន់ដ៏សំខាន់នាពេលអនាគតសម្រាប់ប្រទេសកម្ពុជា។ សម្ដេចធិបតីនាយករដ្ឋមន្រ្ដី មានប្រសាសន៍បញ្ជាក់ថា ចំណតផែកុងតឺន័របន្ថែមថ្មីនេះបាននិងកំពុងជួយបំពេញបន្ថែមមុខងាររបស់ កំពង់ផែស្វយ័តក្រុងព្រះសីហនុ ដែលធ្វើឱ្យសមត្ថភាពផែសរុបកើនឡើងពី ៥៥ម៉ឺនធីអីយូ/ឆ្នាំ ទៅ១លានធីអ៊ីយូ/ឆ្នាំ និងអាចឱ្យនាវាផ្ទុកកុងតឺន័រ ចូលចតបានតាមការព្យាករកើនឡើងពី១៨ ភាគរយ ទៅប្រមាណ ៣៨ភាគរយនៃនាវាដែលធ្វើនាវាចរក្នុងពិភពលោក។ ដោយឡែកសម្រាប់នាវា ដែលមានផ្លូវរត់ក្នុងតំបន់អាស៊ីប៉ាស៊ីហ្វិកកើនឡើងរហូតដល់ ៤៩,២៥ភាគរយ។សម្តេចធិបតី ក៏បានចាត់ទុកការពង្រីកសមត្ថភាពកំពុងផែស្វយ័តក្រុងព្រះសីហនុ គឺជាការពង្រឹងមូលដ្ឋានសេដ្ឋកិច្ចរបស់កម្ពុជា ហើយការពង្រីកសមត្ថភាពផែ តភ្ជាប់ជាមួយប្រព័ន្ធហេដ្ឋារចនាសម្ព័ន្ធដឹកជញ្ជូន គឺជាជួយប្រព័ន្ធភស្តុភាកម្មរបស់កម្ពុជាកាន់តែប្រសើរ ហើយនឹងប្រែក្លាយកំពង់ផែស្វយ័តក្រុងព្រះសីហនុនេះឱ្យក្លាយជាមជ្ឈមណ្ឌលភស្តុភាកម្មក្នុងតំបន់នាពេលអនាគត។ក្នុងឱកាសនោះ សម្តេចធិបតី នាយករដ្ឋមន្រ្ដីបានថ្លែងអំណរគុណដល់រាជរដ្ឋាភិបាល និងប្រជាជនជប៉ុន ដែលតែងជួយដល់កម្ពុជា បូករួមទាំងការស្វែងរកសន្តិភាពផងដែរ។ សម្តេចធិបតី បានលើកទឹកចិត្តក្រុមប្រឹក្សាភិបាល ថ្នាក់ដឹកនាំ និងមន្ត្រីរាជការ បុគ្គលិក កម្មករនិយោជិតនៃកំពង់ផែស្វយ័តក្រុងព្រះសីហនុទាំងអស់បន្តខិតខំបំពេញការងារឱ្យកាន់តែល្អប្រសើរ និងខ្លាំងក្លាថែមទៀត ព្រមទាំងបន្តអភិវឌ្ឍន៍សមត្ថភាពខ្លួន ដើម្បីរួមចំណែកដល់ការធ្វើទំនើបកម្មកំពង់ផែកម្ពុជា កំពង់ផែតំបន់ប្រកបដោយភាពប្រកួតប្រជែងខ្ពស់សម្រាប់បម្រើឱ្យវិស័យពាណិជ្ជកម្មអន្តរជាតិរបស់កម្ពុជា៕អត្ថបទ៖ វ៉ន ដារ៉ា

សម្ដេចធិបតី៖ ការកសាងហេដ្ឋារចនាសម្ព័ន្ធរឹងមាំផ្នែកឡូជីស្ទិក ធ្វើឱ្យកម្ពុជាមានសក្ដានុពលកាន់តែខ្លាំង

ក្នុងឱកាសអញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យប្រើប្រាស់ជាផ្លូវការចំណតផែកុងតឺន័របន្ថែមប្រវែង ២៥៣ ម៉ែត្រ នៃកំពង់ផែស្វយ័តក្រុងព្រះសីហនុ នាព្រឹកថ្ងៃទី១២ ខែកញ្ញា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា ការកសាងហេដ្ឋារចនាសម្ព័ន្ធរឹងមាំផ្នែកឡូជីស្ទិក ដូចជាកំពង់ផែស្វយ័តក្នុងព្រះសីហនុនេះ បានធ្វើឱ្យកម្ពុជាមានសក្ដានុពលកាន់តែខ្លាំងក្នុងការជំរុញកំណើនសេដ្ឋកិច្ច និងការអភិវឌ្ឍប្រទេសជាតិ។សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា កំពង់ផែស្វយ័តក្រុងព្រះសីហនុ គឺជាកំពង់ផែទឹក ជ្រៅតែមួយគត់របស់កម្ពុជា ដែលបាននិងកំពុងដើរតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍប្រទេសជាតិ តាមរយៈផលចំណូលអាជីវកម្មទទួលបានពីកំណើនបរិមាណទំនិញ និងកុងតឺន័រឆ្លងកាត់ជារៀងរាល់ថ្ងៃ។ សម្តេចធិបតីក៏បានកោតសរសើរ និងវាយតម្លៃខ្ពស់ ចំពោះក្រសួងសាធារណការ និងដឹកជញ្ជូន, ក្រុមប្រឹក្សាភិបាល ថ្នាក់ដឹកនាំ និងមន្ត្រីរាជការ បុគ្គលិក កម្មករនិយោជិតនៃកំពង់ផែស្វយ័តក្រុងព្រះសីហនុ ដែលបានខិតខំបំពេញ ការងារអស់ពីកម្លាំងកាយចិត្ត ក្នុងការផ្តល់សេវាកំពង់ផែឱ្យបានរហ័សប្រកបដោយគុណភាព និង ប្រសិទ្ធភាព សំដៅលើកកម្ពស់ភាពប្រកួតប្រជែងរបស់កម្ពុជា ក្នុងវិស័យដឹកជញ្ជូន និង ឡូជីស្ទិក នៅក្នុងតំបន់។សូមជម្រាបថា ចំណតផែកុងតឺន័របន្ថែមប្រវែង ២៥៣ ម៉ែត្រនេះ នឹងពង្រីកសមត្ថភាព និងទំនើបកម្មកំពង់ផែ ដើម្បីឆ្លើយតបនឹងកំណើនកុងតឺន័រឆ្លងកាត់នាពេលបច្ចុប្បន្ន មុននឹងយើងទទួលបានសមិទ្ធផលចំណតផែកុងតឺន័រទឹកជ្រៅថ្មីទាំង ៣ ជំហាន នាពេលអនាគត។ ចំណតផែកុងតឺន័របន្ថែមថ្មីនេះ បាននិងកំពុងជួយបំពេញបន្ថែមនូវមុខងាររបស់កំពង់ផែស្វយ័តក្រុងព្រះសីហនុ ដែលធ្វើឱ្យនាវាកុងតឺន័រមានជម្រៅទឹក ១០,៤ ម៉ែត្រ អាចចូលចតបាន ដែលតាមការព្យាករណ៍ គឺកើនឡើងពី ១៨% ទៅប្រមាណ ៣៨% នៃនាវាដែលធ្វើនាវាចរក្នុងពិភពលោក។ ដោយឡែកសម្រាប់នាវាដែលមានផ្លូវរត់ក្នុងតំបន់អាស៊ី-ប៉ាស៊ីហ្វិក បានកើនឡើងរហូតដល់ ៤៩,២៥%៕ អត្ថបទ៖ វ៉ន ដារ៉ា

ការពង្រីកកំពង់ផែព្រីសីហនុនាពេលនេះ មិនត្រឹមតែជាកំពង់ផែធម្មតាទេ វាគឺជាការរៀបចំប្រព័ន្ធភស្តុភារកម្ម ក្នុងតំបន់ផងដែរ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការពង្រីកចំណតផែកុងតឺន័រនៅខេត្តព្រះសីហនុ មានប្រវែង២៥៣ម៉ែត្រ ដែលជាជំនួយរបស់ជប៉ុននេះ មិនមែនត្រឹមតែជាកំពង់ផែធម្មតានោះទេ វាជាកន្លែងរៀបចំប្រព័ន្ធភស្តុភារកម្មសម្រាប់ក្នុងតំបន់ផងដែរ ខណៈកំពង់ផែនេះ នឹងជំរុញឲ្យសេដ្ឋកិច្ចកម្ពុជា កាន់តែរីកចម្រើនបន្ថែមទៀត។ក្នុងឱកាសអញ្ជើញសម្ពោធបើកឱ្យប្រើប្រាស់ជាផ្លូវការចំណតផែកុងតឺន័របន្ថែមប្រវែង ២៥៣ម៉ែត្រ ក្រោមឥណទានសម្បទានពីរដ្ឋាភិបាល នៃប្រទេសជប៉ុននៅខេត្តព្រះសីហនុ នាថ្ងៃទី១២ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា កំពងផែនេះមិនត្រឹម តែបម្រើឲ្យកម្ពុជាប៉ុណ្ណោះទេ វាបានក្លាយទៅជាមជ្ឈមណ្ឌលភស្តុភារកម្មក្នុងតំបន់ផងដែរ ហើយចំពោះកិច្ច ការនេះកម្ពុជាត្រូវតែធ្វើឲ្យខាងតែបាន ខណៈជប៉ុនក៏កំពុងតែជួយនោះ។ជាមួយគ្នានោះដែរសម្តេចធិបតី ហ៊ុន ម៉ាណែត នាយករដ្ឋមន្រ្តីក៏បានប្រកាសថ្លែងអំណរអគុណជាថ្មីម្តងទៀត ដល់ភាគីជប៉ុនដែលបានជួយដល់កម្ពុជាតាំងពីដើមរហូតដល់សព្វថ្ងៃនេះ ហើយសម្តេចរំពឹង ថានឹងបន្តជួយកម្ពុជាទៅខាងមុខបន្ថែមទៀតផងដែរ។ សម្តេចធិបតីបានបន្ថែមថា« ជប៉ុនគឺជាដៃគូមួយសំ ខាន់របស់កម្ពុជា ដែលបានជួយកម្ពុជាតាំងពីដំណាក់កាលនៃការស្វែងរកសន្តិភាព ដំណាក់កាលនៃការចចារ បង្កើតរាជរដ្ឋាភិបាលដំបូង ក៏ដូចជាការកសាងប្រទេសនៅក្រោយសង្រ្គាម នៅក្រោយឆ្នាំ១៩៩៣ ក៏ ដូចជាមកដល់បច្ចុប្បន្ន ហើយដូច្នេះយើងនឹងបន្តកិច្ចការងារជាមួយគ្នា(ជប៉ុន)»៕អត្ថបទបាន ចក់

សម្ដេចតេជោចាត់ទុកការទទួលបានសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព»នេះ បានបង្ហាញពីការលះបង់របស់សម្ដេចក្នុងការលះបង់ស្វែងរកសន្ដិភាព

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញក្ដីសោមនស្សរីករាយក្រៃលែង ដែលទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យដុងហ្គុកវ៉ាយស៍ នៃសាធារណៈរដ្ឋកូរ៉េ ខណៈសម្ដេចបានចាត់ទុកការទទួលបានសញ្ញាបត្របណ្ឌិតកិត្តិយសនេះ គឺបានបង្ហាញពីការលះបង់របស់សម្ដេចក្នុងការតស៊ូរំដោះប្រទេសជាតិពីរបបប្រល័យពូជសាសន៍ និងស្វែងរកសុខសន្ដិភាពរហូតមកដល់បច្ចុប្បន្ននេះ។ក្នុងឱកាសនោះសម្ដេចតេជោ បានរម្លឹកឡើងពីគុណតម្លៃមិនអាចកាត់ថ្លៃបាននៃសុខសន្ដិភាពរបស់ប្រទេសនីមួយៗនៅលើសកលលោក ខណៈដែលសោកនាដកម្មសង្គ្រាម អាចឆាប់ឆេះបានយ៉ាងលឿន និងយ៉ាងងាយបំផុត ប៉ុន្ដែការលុបបំបាត់សង្គ្រាមទៅវិញពិតជាមានការលំបាកខ្លាំងណាស់។ សម្ដេចតេជោបានរម្លឹកឡើងថា ជាក់ស្ដែងបទពិសោធន៍របស់កម្ពុជា ដើម្បីស្ដារប្រទេសឡើងវិញពីរបបប្រល័យពូជសាសន៍ប៉ុលពត កម្ពុជាត្រូវការពេលជាង ៣០ឆ្នាំទើបអាចស្វែងរកសន្ដិភាពបានដូចសព្វថ្ងៃនេះ ឡើងវិញ។សូមបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា កាលពីព្រឹកថ្ងៃទី៩ ខែកញ្ញា ឆ្នាំ២០២៤ បានអញ្ជើញដឹកនាំគណៈប្រតិភូជាន់ខ្ពស់ធ្វើដំណើរទៅកាន់សាធារណៈរដ្ឋកូរ៉េខាងត្បូង ដើម្បីអញ្ជើញចូលរួមក្នុងវេទិកាចំណេះដឹងពិភពលោកលើកទី២៥ ក្រោមមូលបទ «មាគ៌ាឆ្ពោះទៅរកសហត្ថិភាព» ក្នុងឱកាសនេះសម្ដេចក៏បានអញ្ជើញចូលរួមកម្មវិធី និងជំនួបផ្លូវការសំខាន់ៗផ្សេងទៀតជាមួយថ្នាក់ដឹកនាំកំពូលនៅសាធារណរដ្ឋកូរ៉េខាងត្បូង ចាប់ពីថ្ងៃទី៩ ដល់ថ្ងៃទី១៣ ខែកញ្ញា ឆ្នាំ២០២៤នេះផងដែរ។នៅព្រឹកនេះសម្ដេចតេជោ បានបន្តដំណើរទស្សនកិច្ចទៅកាន់ខេត្តឃុងសាងបុកដូ ដើម្បីទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ដែលរៀបចំដោយសាកលវិទ្យាល័យដុងហ្គុកវ៉ាយស៍ និងសម្ដេចតេជោក៏បានផ្តល់កិត្តិយសធ្វើបាឋកថាស្តីពី «បទពិសោធន៍របស់ប្រទេសកម្ពុជា ក្នុងការរំដោះជាតិ ការកសាងសន្តិភាព ការផ្សះផ្សា និងការកសាងជាតិឡើងវិញ» ពីប្រទេសដែលហែកហួរដោយសង្គ្រាម និងវាលពិឃាត មកជាប្រទេសជាតិដែលពោរពេញដោយសន្តិភាពការរួមរស់ជាមួយគា្ន (សហត្ថិភាព) និងការអត់ឱន ផងដែរ៕ អត្ថបទ៖ វ៉ន ដារ៉ា

សាលាបឋមមួយចំនួនកំពុងបង្វែរម៉ោងចេញលេងរបស់សិស្សមកជាការអានសៀវភៅ

សាលាបឋមសិក្សា ចតុមុខ ស្ថិតនៅសង្កាត់ចតុមុខ ខ័ណ្ឌដូនពេញ រាជធានីភ្នំពេញ បច្ចុប្បន្នកំពុងក្លាយជាសាលាគំរូមួយ តាមរយៈការបង្វែរម៉ោងចេញលេងរបស់សិស្សមកជាការអានសៀវភៅវិញ ខណៈដែលការអាននេះពុំមែនជាការអាននៅក្នុងបណ្ណាល័យដែលជាកាលវិភាគសិក្សានោះទេ ប៉ុន្ដែជាសកម្មភាពអានបន្ថែមដែលសាលាមួយចំនួនកំពុងអនុវត្ត។លោក សូ ធី នាយកគ្រប់គ្រង សាលាបឋមសិក្សា ចតុមុខ បញ្ជាក់ថា សាលាបានដាក់ចេញសកម្មភាពថ្មីនេះដោយមានការរៀបចំទូសៀវភៅ នៅពីមុខទីចាត់ការសាលា។ ការដាក់ទូសៀវភៅនៅខាងក្រៅបណ្ណាល័យនេះ ជាសកម្មភាពបន្ថែមដែលសិស្សកុមារតូចៗ អាចមកអង្គុយអានជុំគ្នាជាមួយមិត្តភក្តិ នៅម៉ោងចេញលេង ដែលកន្លងទៅកុមារប្រើប្រាស់ពេលវេលាទាំងនោះដើម្បីរត់លេង។លោកនាយកលើកឡើងថា ការដាក់ទូសៀវភៅនៅពីមុខទីចាត់ការនេះ ជាសកម្មភាពក្រៅកាលវិភាគសិក្សា។ ជាក់ស្ដែងនៅក្នុងកាលវិភាគ គឺសិស្សគ្រប់ថ្នាក់មានម៉ោងចូលអានសៀវភៅនៅក្នុងបណ្ណាល័យ រួចទៅហើយ។ការដាក់ទូសៀវភៅ នៅពីមុខទីចាត់ការនេះ កំពុងហុចផលជាបណ្ដើរៗ។ ផលដែលផ្ដល់មកនេះ គឺជាវត្តមានសិស្ស ដែលពួកគេមកជាក្រុម ជាមួយមិត្តរួមថ្នាក់ មកបើកទូចាប់សៀវភៅអាន នៅម៉ោងចេញលេង។ សកម្មភាពដដែល បានបង្កើតជាទម្លាប់ល្អ ក្នុងការអានសៀវភៅ។ អានបណ្ដើរ ញញឹមបណ្ដើរ កុមារទាំងនេះលើកឡើងថា ពួកគេមកអានជាប្រចាំនៅម៉ោងចេញលេង។ ពួកគេថា ការអានជួយឱ្យពួកគេកាន់មានចំណេះដឹង។ពាក់ព័ន្ធនឹងការជំរុញ ការអាន រាជរដ្ឋាភិបាលកម្ពុជា ក៏បានបង្កើតទិវាជាតិអំណាន កាលពីឆ្នាំ ២០១៥ ក្នុងគោលដៅសំខាន់បណ្ដុះទម្លាប់អាន លើកកម្ពស់សមត្ថភាពអាន និងការតែងនិពន្ធ។ ជារៀងរាល់ឆ្នាំ ទិវាជាតិអំណាន រៀបចំឡើងនៅថ្ងៃទី ១១ ខែមីនា ដែលវាជាថ្ងៃប្រសូត្ររបស់សម្ដេចព្រះសង្ឃរាជ ជួន ណាត៕ អត្ថបទ៖ គឹម ហុក

បណ្ដាញសង្គម

ព័ត៌មានថ្មីៗ

លោក Trump៖ សហរដ្ឋអាមេរិកនឹងស្វះស្វែងរកការកំណត់ទោសប្រហារជីវិតក្នុងករណីមនុស្សឃាតនៅវ៉ាស៊ីនតោន

លោក Bessent និយាយថា ប្រាក់ចំណូលពន្ធអាមេរិក អាចលើសពី ៥០០ពាន់លានដុល្លារ ក្នុងមួយឆ្នាំ

UN ទាមទារយុត្តិធម៌ពីអ៊ីស្រាអែល បន្ទាប់ពីការទម្លាក់គ្រាប់បែកលើមន្ទីរពេទ្យនៅតំបន់ហ្កាហ្សា

រដូវក្តៅឆ្នាំ២០២៥នេះ ជាប់ជារយៈពេលក្តៅបំផុតមួយរបស់អេស្ប៉ាញ បន្ទាប់ពីសីតុណ្ហភាពប្រវត្តិសាស្ត្រខែសីហា

សហរដ្ឋអាមេរិក អនុម័តលទ្ធភាពនៃការលក់ប្រព័ន្ធគាំទ្រយន្តហោះទៅឱ្យប៉ូឡូញ និងចក្រភពអង់គ្លេស

ការដំឡើងពន្ធដ៏ខ្ពស់របស់អាមេរិកនឹងប៉ះពាល់ដល់ការនាំចេញរបស់ឥណ្ឌាចាប់ពីថ្ងៃទី២៧ ខែសីហានេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

សម្ដេចតេជោ បានទទួលសញ្ញាបត្របណ្ឌិតកិត្តិយសពីសាកលវិទ្យាល័យដុងហ្គុកវ៉ាយស៍ នៃប្រទេសកូរ៉េខាងត្បូង

សម្តេចតេជោ៖ បើអាមេរិកមានសន្តិភាព និងអំណាចហើយហេតុអ្វីខំប្រឹងផលិតអាវុធបន្ថែមទៀតធ្វើអ្វី?

សម្ដេចធិបតី៖ កំពង់ផែស្វយ័តក្រុងព្រះសីហនុ នឹងក្លាយទៅជាមជ្ឈមណ្ឌលភស្តុភារកម្មតំបន់ដ៏សំខាន់

សម្ដេចធិបតី៖ ការកសាងហេដ្ឋារចនាសម្ព័ន្ធរឹងមាំផ្នែកឡូជីស្ទិក ធ្វើឱ្យកម្ពុជាមានសក្ដានុពលកាន់តែខ្លាំង

សាលាបឋមមួយចំនួនកំពុងបង្វែរម៉ោងចេញលេងរបស់សិស្សមកជាការអានសៀវភៅ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

សម្ដេចតេជោ បានទទួលសញ្ញាបត្របណ្ឌិតកិត្តិយសពីសាកលវិទ្យាល័យដុងហ្គុកវ៉ាយស៍ នៃប្រទេសកូរ៉េខាងត្បូង

សម្តេចតេជោ៖ បើអាមេរិកមានសន្តិភាព និងអំណាចហើយហេតុអ្វីខំប្រឹង​ផលិតអាវុធ​បន្ថែមទៀតធ្វើអ្វី?

សម្ដេចធិបតី៖ កំពង់ផែស្វយ័តក្រុងព្រះសីហនុ នឹងក្លាយទៅជាមជ្ឈមណ្ឌលភស្តុភារកម្មតំបន់ដ៏សំខាន់

សម្ដេចធិបតី៖ ការកសាងហេដ្ឋារចនាសម្ព័ន្ធរឹងមាំផ្នែកឡូជីស្ទិក ធ្វើឱ្យកម្ពុជាមានសក្ដានុពលកាន់តែខ្លាំង

សាលាបឋមមួយចំនួនកំពុងបង្វែរម៉ោងចេញលេងរបស់សិស្សមកជាការអានសៀវភៅ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្តេចតេជោ៖ បើអាមេរិកមានសន្តិភាព និងអំណាចហើយហេតុអ្វីខំប្រឹងផលិតអាវុធបន្ថែមទៀតធ្វើអ្វី?