BTV NEWS

សម្តេចពិជ័យសេនា ទៀ បាញ់៖ សន្តិភាព និងការឯកភាពជាតិពេញលេញនៅកម្ពុជា មិនមែនទទួលបានដោយចៃដន្យនោះទេ គឺវាកើតចេញពីឥស្សរជនជាច្រើនបានយកជីវិតទៅធ្វើជាដើមទុន

ស្តូបអនុស្សាវរីយ៍នយោបាយឈ្នះ ឈ្នះ កោះកុង នឹងត្រូវសម្ពោធជាផ្លូវការនៅថ្ងៃទី៣០ ខែឧសភានេះ

ប្រទេសកម្ពុជាជាប់លេខ១ ជាប្រទេសដែលមានបរិស្ថានធម្មជាតិដ៏ល្អបំផុតនៅលើពិភពលោក

សម្ដេចតេជោ ប្រកាសទទួលរ៉ាប់រងក្នុង ជួយព្យាបាលទាំងស្រុងអ្នកគ្រូបង្រៀនម្នាក់ដែលមានជំងឺតម្រង់នោមដំណាក់កាលចុងក្រោយ

ព័ត៌មានជាតិ

កងទ័ពកម្ពុជាចូលរួមជំរុញសកម្មភាពដើម្បីកម្ពុជាមានភាពស្អាត

បញ្ជាការដ្ឋានកងរាជអាវុធហត្ថលើផ្ទៃប្រទេស បានទទួលសម្ភារគ្រប់គ្រងសំណល់រឹង ដែលជាអំណោយរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាព្រឹកថ្ងៃទី០៤ ខែកក្កដា ឆ្នាំ២០២៥ នៅទីស្តីការក្រសួងបរិស្ថាន។ ឯកឧត្តម ចាយ សាមិត្ត រដ្ឋលេខាធិការក្រសួងបរិស្ថាន រួមជាមួយថ្នាក់ដឹកនាំនិងមន្រ្តីរាជការក្រសួងបរិស្ថាន បានប្រគល់អំណោយធុងសំរាមចំនួន៣០ (សាមសិប)ធុង ជូនទៅកងរាជអាវុធហត្ថ លើផ្ទៃប្រទេស សម្រាប់ទុកដាក់សំណល់រឹង ក្នុងពិធីសម្ពោធដាក់ឱ្យប្រើប្រាស់ជាផ្លូវការសមិទ្ធិផលនានា និងអបអរសាទរពិធីប្រារព្ធខួបលើកទី៣២ ទិវាបង្កើតកងរាជអាវុធហត្ថ (១៤ កក្កដា ១៩៩៣-១៤ កក្កដា ២០២៥) និងដើម្បីទុកសម្រាប់ប្រើប្រាស់នៅក្នុងអង្គភាពកងរាជអាវុធហត្ថលើផ្ទៃប្រទេស។ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានថ្លែងអំណរគុណ ដល់ឯកឧត្តមបណ្ឌិត អ៊ាង សុផល្លែត ដែលបានផ្លតល់សម្ភារៈទុកដាក់សំរាម សំណល់ប្លាស្ទិក នាពេលនេះ និងបានថ្លែងចាត់ទុកថា ជានិច្ចកាលឯកឧត្តមរដ្ឋមន្រ្តី បានគិតគូរខ្ពស់លើការថែទាំសុខភាព អនាម័យបរិស្ថាន និងសោភ័ណភាពនៅតាមមូលដ្ឋាន។សូមបញ្ជាក់ថា ការប្រគល់ធុងសំរាមជូនកងរាជអាវុធហត្ថលើ់ផ្ទៃប្រទេស នាពេលនេះ ជាការបង្ហាញថាភាពស្អាត ត្រូវបានផ្សព្វផ្សាយនៅទូទាំងប្រទេស ហើយបានជំរុញឱ្យមានការចូលរួមពីគ្រប់ទីកន្លែងថែមមួយកម្រិតទៀត ក្នុងនោះមានទាំងកងយោធពលខេមរភូមិន្ទផងដែរ សំដៅដល់ភាពស្អាតនៅលើដីរបស់កម្ពុជា និងលើសពីនេះ បានឆ្លើយតបនឹងគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា និងការយកចិត្តទុកដាក់ខ្ពស់ ចំពោះជីវភាព សុខភាព និងការរស់នៅប្រកបដោយចីរភាព របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន សូមថ្លែងអំណរគុណដល់អ្នកចូលរួមទាំងអស់ ក្នុងយុទ្ធនាការដើម្បីកម្ពុជាមានភាពស្អាត មានដូចជាយុទ្ធនាការ កាត់បន្ថយការប្រើប្រាស់ប្លាស្ទិក «ថ្ងៃនេះ ខ្ញុំមិនប្រើថង់ប្លាស្ទិកទេ» ការរួមគ្នាសម្អាតមូលដ្ឋាន ក្នុងយុទ្ធនាការ«កម្ពុជាស្អាត ខ្មែរធ្វើបាន» និងយុទ្ធនាការសម្អាតផ្លូវជាតិ«ផ្លូវជាតិ គ្មានសំរាមនិងសំណល់ប្លាស្ទិក» ហើយជាបន្តបន្ទាប់ប្រជាជន មានការគិតគូលើការទុកដាក់សំរាម និងសំណល់ប្លាស្ទិក ឱ្យបានត្រឹមត្រូវជាបណ្តើរៗ។ ឯកឧត្តមរដ្ឋមន្រ្តីមានសុទិដ្ឋិនិយមចំពោះ ការចូលរួមអនុវត្តសកម្មភាព ដើម្បីកម្ពុជាមានភាពស្អាត ដែលបាននិងកំពុងរួមចំណែកដល់ការអភិវឌ្ឍសេដ្ឋកិច្ច ការកែលម្អសេវាសាធារណៈ និងការដោះស្រាយបញ្ហាបរិស្ថាន អនុលោមតាមយុទ្ធសាស្រ្តចក្រាវិស័យបរិស្ថាន ដែលជំរុញឱ្យកម្ពុជាមានភាពស្អាត បៃតង និងចីរភាព និងឆ្លើយតបនឹងគោលដៅយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា៕

សម្តេចប្រធានរដ្ឋសភា ថ្លែងអំណរគុណវីរកងទ័ពបានពលិកម្ម យ៉ាងអង់អាចការពារបូរណភាពទឹកដី

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានថ្លែងអំណរគុណ និងដឹងគុណជាអនេកចំពោះបងប្អូនកងទ័ព និងកងកម្លាំងប្រដាប់អាវុធគ្រប់ប្រភេទ ដែលបានពលិកម្មយ៉ាងអង់អាចក្លាហាន និងមានស្មារតីមោះមុត ក្នុងបេសកកម្មការពារព្រំដែន ជាខឿនឯករាជ្យជាតិ បូរណភាពទឹកដី និងមាតុភូមិ។សម្ដេចមានប្រសាសន៍ថា គំរូវីរភាពដ៏មហិមា ដែលមានតម្លៃមិនអាចកាត់ថ្លៃបាននេះ គឺជាកត្តាចាំបាច់បំផុតក្នុងការធានានូវសុខសន្តិភាព ស្ថិរភាព ការអភិវឌ្ឍសេដ្ឋកិច្ចសង្គម និងភាពសុខក្សេមក្សាន្តរបស់ប្រជាជន ហើយនេះ ជាគំរូដ៏ឧត្ដុង្គឧត្ដមសម្រាប់ប្រជាជនខ្មែរគ្រប់រូប ព្រមទាំងកូនចៅជំនាន់ក្រោយៗត្រូវរៀនសូត្រ និងយកតម្រាប់តាម។សម្តេចប្រធានរដ្ឋសភា បានបញ្ជាក់បែបនេះនៅក្នុងឱកាសអញ្ជើញដឹកនាំសមាជិកសមាជិការដ្ឋសភា និងថ្នាក់ដឹកនាំអគ្គលេខាធិការដ្ឋានរដ្ឋសភា ចុះសួរសុខទុក្ខ និងនាំយកអំណោយជាថវិកា និងសម្ភារៈប្រើប្រាស់ ចែកជូនវីរកងទ័ពដែលកំពុងឈរជើងនៅតាមបន្ទាត់ព្រំដែនក្នុងខេត្តព្រះវិហារ នៅថ្ងៃសុក្រ ទី៤ ខែកក្កដាឆ្នាំ២០២៥នេះ។ក្នុងពិធីសំណេះសំណាលជាលក្ខណៈមហាគ្រួសារខ្មែរក្នុងស្មារតី អ្នកជួរក្រោយគំាទ្រ នៅជាប់ជានិច្ចជាមួយយុទ្ធជនជួរមុខនោះ សម្តេចប្រធានរដ្ឋសភា បានគូសបញ្ជាក់ថា កម្ពុជាប្រកាន់ខ្ជាប់នូវគោលជំហរក្សាសន្តិភាព មិត្តភាព និងកិច្ចសហប្រតិបត្តិការល្អជាមួយថៃ ដូចអ្វីដែលប្រមុខដឹកនាំដែលជាស្ថានិកសន្តិភាពនៅកម្ពុជា សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្រ្តី បានបញ្ជាក់ជាញឹកញាប់រួចមកហើយ ពិសេសនៅពេលសម្តេចទំាងពីរ បានអញ្ជើញមកសួរសុខទុក្ខ វីរកងទ័ពកាលពីពេលថ្មីៗនេះ។ ប៉ុន្តែជាអកុសល ដែលយើងមានអ្នកជិតខាងដូចជាសៀម មានចិត្តមិនស្មោះចិញ្ចឹមចិត្តឈ្លានពាន រំលោភបំពានទឹកដីរបស់យើងជានិច្ច។សម្ដេចបានថ្លែងថា ភាគីថៃតែងតែចិញ្ចឹមចិត្តដណ្តើមទឹកដីកម្ពុជាតាំងពីអតីតកាលរហូតមក។ ដោយសារបញ្ហានយោបាយនៅទីក្រុងបាងកក ភាគីថៃបានបង្កជម្លោះ រំលោភបំពានលើ អធិបតេយ្យ និងបូរណភាពទឹកដីកម្ពុជា ដែលផ្ទុយនឹងកិច្ចព្រមព្រៀងទ្វេភាគី និងធម្មនុញ្ញសហប្រជាជាតិ។ កម្ពុជាប្រាថ្នាធ្វើជាមិត្ត ប៉ុន្តែគេចិញ្ចឹមចិត្តម្ដងហើយម្ដងទៀត ដណ្ដើមទឹកដីរបស់យើង។ សមដូចប្រសាសន៍សម្តេចតេជាលើកឡើងថា «មានមិត្តជិតខាងល្អដូចមានមាស ពេលមានមិត្តជិតខាងអាក្រក់ដូចមានមីន»។គណៈប្រតិភូជាន់ខ្ពស់រដ្ឋសភា ដែលតំណាងឱ្យប្រជាពលរដ្ឋកម្ពុជានៅទូទាំងប្រទេស និងក្រៅប្រទេសជាង ១៧ លាននាក់ ក៏ដូចជាខ្លួនសម្តេចផ្ទាល់ សម្តេចប្រធានរដ្ឋសភាពិតជាមានមោទនភាពយ៉ាងខ្លាំង ដោយមានឱកាសបានមកជួបដោយផ្ទាល់ជាមួយបងប្អូន នាយទាហាន នាយទាហានរង ពលទាហាន និងកងកម្លាំងប្រដាប់អាវុធដែលកំពុងឈរជើងនៅតំបន់មុំបី ទិសប្រាសាទព្រះវិហារ ខេត្តព្រះវិហារ រួមនឹងថ្នាក់ដឹកនាំកងវរៈសេនាតូចប្រចាំទិស ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ដោយស្មារតី និងឆន្ទៈមោះមុត និងម៉ឹងម៉ាត់ក្នុងជំហរការពារយ៉ាងដាច់ខាតនូវបូរណភាពទឹកដី អធិតេយ្យ និងឯករាជ្យ របស់មាតុភូមិ។សម្តេចរដ្ឋសភាធិបតី ឃួន សុដារី បានមានប្រសាសន៍លើកឡើងថា សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ និងជាប្រធានព្រឹទ្ធសភា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រួមសុខរួមទុក្ខជាមួយពលរដ្ឋជានិច្ច។ សម្តេចថ្នាក់ដឹកនាំ តែងតែគិតគូរល្អិតល្អន់ គ្រប់ជ្រុងជ្រោយចំពោះ កងកម្លាំង និងប្រជាពលរដ្ឋគ្រប់ពេលវេលា មិនចង់ឃើញពលរដ្ឋបាត់បង់អាយុជីវិត រងទុក្ខលំបាកនោះឡើយ ជាពិសេស សម្តេចទំាងពីរមានឆន្ទះមុតមាំមិនឱ្យចោរបរទេសណាមួយ ឃ្លានពានទឹកដីកម្ពុជាបានមួយមីលីម៉ែត្រឡើយ ។ កម្ពុជាពិតជាមានសំណាង ដែលមានវត្តមានសម្តេចតេជោហ៊ុន សែន ពោរពេញដោយបទពិសោធន៍ច្បាស់លាស់និងតែងតែទទួល បានជោគជ័យជារហូតមក ប្រឆំាង វាយបកចំពោះចោរឃ្លានពាន។ ដូចជាកាលពីឆ្នាំ២០០៨ និងឆ្នាំ២០១១ជាដើមនោះ ក្រុមចោរឈ្លានពានបានទទួលរងនូវបរាជ័យនិងក្តីអាម៉ាស់យ៉ាងធ្ងន់ធ្ងរបំផុត នៅលើឆាកអន្តរជាតិ។សម្តេចរដ្ឋសភាធិបតី បានគូសបញ្ជាក់ថា ការសម្រេចចិត្តរបស់កម្ពុជាយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅតុលាការយុត្តិធម៌អន្តរជាតិ (ICJ) គឺដើម្បីស្វែងរកដំណោះស្រាយបញ្ហាព្រំដែននៅតំបន់ទាំងនោះដោយសន្តិវិធីឱ្យបានឆាប់ចប់ជាស្ថាពរ ជាជាងបន្សល់ទុកបញ្ហាឱ្យនៅបន្តស្រពេចស្រពិលរយៈពេលវែង ដែលអាចបង្កឱ្យកើតមានជាជម្លោះប្រដាប់អាវុធសាជាថ្មី។ ជាមួយគ្នានេះ កម្ពុជា បន្តសហការជាមួយភាគីថៃដើម្បីជំរុញការវាស់វែង ខ័ណ្ឌសីមា និងបោះបង្គោលព្រំដែនរវាងប្រទេសទាំងពីរដែលនៅសេសសល់ (ក្រៅពីតំបន់ទាំង៤ខាងលើ)ដោយប្រើប្រាស់យន្តការគណៈកម្មការព្រំដែនចម្រុះ(JBC) កម្ពុជា-ថៃ។ បន្តរក្សាទំនាក់ទំនងរវាងប្រទេសទាំងពីរ តាមរយៈគ្រប់យន្តការដែលមានស្រាប់ ដើម្បីជាឧត្តមប្រយោជន៍សម្រាប់ប្រជាពលរដ្ឋនៃប្រទេសទាំងពីរកម្ពុជា-ថៃ។សម្ដេចប្រធានរដ្ឋសភា បានគូសបញ្ជាក់ថា រដ្ឋសភាកម្ពុជាសូមសម្តែងនូវសាមគ្គីភាពនិងការគាំទ្រដល់រាជរដ្ឋាភិបាលដែលកំពុងប្រឹងប្រែង ស្វែងរកដំណោះស្រាយបញ្ហាព្រំដែនកម្ពុជា-ថៃតាមរយៈយន្តការតុលាការយុត្តិធម៌អន្តរជាតិ (ICJ) និងក្របខណ្ឌច្បាប់អន្តរជាតិ។ កាលពីដើមខែមិថុនាកន្លងមកនេះ ក្នុងព្រឹត្តការណ៍ប្រវត្តិសាស្រ្តដែលរដ្ឋសភា និងព្រឹទ្ធសភាបានធ្វើសមាជរួមគ្នា ពិភាក្សាលើបញ្ហាចំបងសំខាន់ៗរបស់ជាតិនោះ បានចេញសេចក្តីថ្លែងការណ៍គាំទ្រដល់រាជរដ្ឋាភិបាលកម្ពុជា ចំពោះការដោះស្រាយជាមួយថៃនេះដែរ។កម្ពុជាមិនចង់បានអ្វី ក្រៅតែយុត្តិធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែព្រំដែនជាមួយប្រទេសជិតខាង ដើម្បីកុំអោយកូនចៅជំនាន់ក្រោយនៅបន្តមានបញ្ហាមិនចេះចប់ជាមួយគ្នា ជាពិសេស ការកសាងខ្សែបន្ទាត់ព្រំដែន ជាព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។ រាជរដ្ឋាភិបាលក្នុងកិច្ចខិតខំប្រឹងប្រែងធ្វើកិច្ចការងារនេះប្រកបដោយឆន្ទៈនិងការទទួលខុសត្រូវខ្ពស់ ដើម្បីការពារបូរណភាពទឹកដីនិងឧត្តមប្រយោជន៍របស់ជាតិនិងប្រជាជន។ជាមួយគ្នានេះ សម្តេចប្រធានរដ្ឋសភា បានមានប្រសាសន៍ថា នៅចំពោះមុខការកើនឡើងនៃការគំរាមកំហែងពីខាងក្រៅ បែបនេះ កម្ពុជាក្រោមការដឹកនាំសម្តេចធិបតី ហ៊ុន ម៉ាណែត បាន ទាញយកឱ្យឱកាសនេះដើម្បីឈរដោយខ្លួនឯង ដើម្បីរក្សាការពារបូរណភាពទឹកដឹ ឯករាជ្យ អធិបតេយ្យ សន្តិភាព ឯកភាពជាតិហើយធ្វើយ៉ាងណារួមគ្នាពង្រឹង ភាពធន់របស់ជាតិជាពិសេសតាមរយៈការជំរុញសេដ្ឋកិច្ចកម្ពុជា ឱ្យកាន់តែរីកចម្រើនខ្លាំងក្លាថែមទៀត បន្តកំណើនបានយ៉ាងរឹងមាំ រហូតសម្រេចបានគោលដៅឆ្នាំ២០៣០ និង២០៥០ ជាប្រទេសអភិវឌ្ឍន៍ជាមិនខានឡើយ៕

កម្ពុជាចែករំលែកបទពិសោធន៍ ប្រព័ន្ធទូទាត់សងប្រាក់ឌីជីថល និងប្រព័ន្ធបាគងដល់អន្តរជាតិ

កម្ពុជាចែករំលែកបទពិសោធន៍ នៃការអភិវឌ្ឍហេដ្ឋារចនាសម្ព័ន្ធ ប្រព័ន្ធទូទាត់សងប្រាក់ឌីជីថលប្រកបដោយនវានុវត្តន៍ ជាពិសេស ប្រព័ន្ធបាគង ដែលបានលើកកម្ពស់ប្រតិបត្តិការទូទាត់ក្នុងប្រទេស និងពង្រីកលទ្ធភាពនៃការទូទាត់ឆ្លងដែន ទៅកាន់បណ្តាប្រទេសផ្សេងៗ ។លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា នៅក្នុងវេទិកាហេដ្ឋារចនាសម្ព័ន្ធប្រព័ន្ធទូទាត់ឆ្លងដែន លើក ទី៣២ (CSIF) បានអញ្ជើញចូលរួមថ្លែងសុន្ទរកថាគន្លឹះ និងជាវាគ្មិនក្នុងកិច្ចពិភាក្សាស្តីពី “តើអាស៊ាន+៣ អាចជំរុញការអភិវឌ្ឍបច្ចេកវិទ្យាឌីជីថលឱ្យកាន់តែរីកចម្រើនបន្ថែមទៀតយ៉ាងដូចម្តេច?” ដែលវេទិកានេះបានប្រារព្វធ្វើ នៅថ្ងៃទី៣ ខែកក្កដា ឆ្នាំ២០២៥ នៅទីក្រុងក្យូតុ ប្រទេសជប៉ុន។លោកជំទាវទេសាភិបាល បានចែករំលែកបទពិសោធ នៃការអភិវឌ្ឍហេដ្ឋារចនាសម្ព័ន្ធប្រព័ន្ធទូទាត់សងប្រាក់ឌីជីថល ប្រកប ដោយនវានុវត្តន៍ ជាពិសេសប្រព័ន្ធបាគង ដែលបានលើកកម្ពស់ប្រតិបត្តិការទូទាត់ក្នុងប្រទេស និងពង្រីកលទ្ធភាពនៃការទូទាត់ឆ្លង ដែនជាមួយប្រទេសជាច្រើន ព្រមទាំងការអភិវឌ្ឍកម្មវិធីទូទាត់បាគងទេសចរ ដើម្បីសម្រួលដល់ភ្ញៀវទេសចរ ក្នុងការប្រើប្រាស់កម្មវិធី ក្នុងទូរស័ព្ទដៃ ដើម្បីស្កេនទូទាត់ថ្លៃទំនិញ និងសេវានៅកម្ពុជា និងប្រទេសជាដៃគូបានយ៉ាងងាយស្រួល។លោកជំទាវបណ្ឌិត ក៏បានលើកឡើងពីកិច្ចសហការរវាងធនាគារជាតិនៃកម្ពុជា ជាមួយដៃគូអន្តរជាតិជាច្រើន ក្នុងការអភិវឌ្ឍ គម្រោងច្រករបៀងតម្លាភាពហិរញ្ញវត្ថុ (FTC) ដើម្បីសម្រួលដល់សកម្មភាពពាណិជ្ជកម្ម និងហិរញ្ញវត្ថុឆ្លងដែន ពន្លឿនការតភ្ជាប់ការ ទូទាត់ឆ្លងដែន និងបង្កើនប្រសិទ្ធភាពនៃការទូទាត់ឆ្លងដែនពហុភាគី សំដៅជំរុញបរិយាបន្នហិរញ្ញវត្ថុ និងនវានុវត្តន៍ ក្នុងសេវាហិរញ្ញវត្ថុ ដែលនឹងរួមចំណែកអភិវឌ្ឍសេដ្ឋកិច្ចជាតិ៕ អត្ថបទ៖ សុន រ៉ាឌី,

មនី្ទរពេទ្យព្រះអង្គឌួង និងសាកលវិទ្យាល័យ ស្ត្រី ប៊ូសាន បើកវគ្គបណ្តុះបណ្តាលជូនដល់គិលានុបដ្ឋាក និងឆ្មប

ភ្នំពេញ ÷ មនី្ទរពេទ្យព្រះអង្គឌួង ក្រសួងសុខាភិបាល នៃព្រះរាជាណាចក្រកម្ពុជា សហការជាមួយសាកលវិទ្យាល័យ ស្រី្ត ប៊ូសាន(BUSAN WOMEN´S UNIVERSITY) នៅទីក្រុងប៊ូសាន នៃសាធារណរដ្ឋកូរ៉េ បានរៀបចំបើកវគ្គបណ្តុះបណ្តាលជូនដល់គិលានុបដ្ឋាក និងឆ្មប ដើម្បីជំនួយទៅដល់ការអនុវត្តន៍ទៅលើអ្នកជំងឺជារៀងរាល់ថ្ងៃ រយៈពេល០១ថ្ងៃពេញ, នាថ្ងៃទី៣ ខែកក្កដា ឆ្នាំ២០២៥។លោកស្រី អ៊ីន វិជ្ជរ៉ា ប្រធានផ្នែកថែទាំ នៃមនី្ទរពេទ្យព្រះអង្គឌួង បានលើកឡើងថា ថ្ងៃនេះមនី្ទរពេទ្យព្រះអង្គឌួង សហការជាមួយសាកលវិទ្យាល័យ ស្រី្ត ប៊ូសាន បើកវគ្គបណ្តុះបណ្តាល រួមមាន៖ ការចាក់ស៊ីរ៉ូម សង្រ្គោះបឋម និងការជួយសង្រ្គោះអ្នកជំងឺដែលសន្លប់មិនដឹងខ្លួន និងជំនាញជាច្រើនទៀត ដើម្បីជំនួយទៅដល់ការអនុវត្តន៍ទៅលើអ្នកជំងឺជារៀងរាល់ថ្ងៃ និងពង្រឹងចំណេះដឹងបន្ថែមទៅលើគិលានុបដ្ឋាក និងឆ្មប នៅក្នុងមនី្ទរពេទ្យព្រះអង្គឌួងទាំងមូល។ សកម្មភាពនេះ ក៏ជាលើកទី២ ដែលសាកលវិទ្យាល័យ ស្រី្ត ប៊ូសាន បានសហការជាមួយមនី្ទរពេទ្យព្រះអង្គឌួង ដើម្បីធ្វើការបណ្តុះបណ្តាលជូនដល់បុគ្គលិក ដែលជាគិលានុបដ្ឋាក និងឆ្មប។ ជាមួយគ្នានោះដែរ លោកស្រីសាស្រ្តាចារ្យ ផាក ជុងហា ប្រធានដឹកនាំក្រុមអ្នកស្ម័គ្រចិត្តផ្នែកថែទាំគិលានុបដ្ឋាក មកពីសាកលវិទ្យាល័យ ស្រី្ត ប៊ូសាន បានមានប្រសាសន៍ថា កម្មវិធីនេះមានការរួមចំណែកពីអ្នកគ្រូ២រូបទៀត គឺអ្នកគ្រូ គីម ចុងគីហ័រ និងអ្នកគ្រូ អ៊ី យ៉ុងប៊ុក ពួកគាត់បានមកកាន់ប្រទេសកម្ពុជា តាំងពីឆ្នាំ២០២២ ដោយធ្វើការអប់រំ បណ្តុះបណ្តាល លើផ្នែកគិលានុបដ្ឋាក និងឆ្មប ការចាក់ស៊ីរ៉ូម តាមសរសៃឈាម ដែលមានច្រើនផ្នែក និងការសុងបំពង់ខ្យល់ជាដើម។ឆ្លៀតក្នុងឱកាសនោះដែល លោក នង ម៉ានិត នាយករងមនី្ទរពេទ្យព្រះអង្គឌួង តំណាងលោកសាស្រ្តាចារ្យរង លូ លីឃាង នាយកមនី្ទរពេទ្យព្រះអង្គឌួង បានថ្លែងថា គិលានុបដ្ឋាក ឆ្មប និងបុគ្គលិករបស់មនី្ទរពេទ្យព្រះអង្គឌួង បានខិតខំប្រឹងប្រែងរៀនសូត្របន្ថែម ពីសាស្រ្តាចារ្យជំនាញមកពីសាកលវិទ្យាល័យ ស្រី្ត ប៊ូសាន នៃសាធារណរដ្ឋកូរ៉េ។ ថ្ងៃនេះយើងប្រាកដជាទទួលបាននូវអ្វីបន្ថែមទៀតក្នុងចំនេះដឹង យើងនឹងប្រើប្រាស់ជំនាញនេះ ដើម្បីជាប្រយោជន៍សម្រាប់មនី្ទរពេទ្យ និងបម្រើសេវាជូនបងប្អូនប្រជាពលរដ្ឋឲ្យកាន់តែប្រសើរឡើង។ ក៏ប៉ុន្តែយើងក៏ត្រូវម៉ត់ចត់ក្នុងការងារប្រចាំថ្ងៃ សូមឲ្យពង្រឹងបន្ថែមទៀត ក្នុងនាមយើងជាអ្នកថែទាំអ្នកជំងឺ យើងជាអ្នកនៅផ្ទាល់ជាមួយអ្នកជំងឺ។ ដូច្នេះសុំចាត់ទុកអ្នកជំងឺគឺជាបងប្អូន ឪពុក ម្តាយរបស់យើង ត្រូវមើលថែអ្នកជំងឺឲ្យដូចជាកំពុងតែមើលថែបងប្អូន ឪពុក ម្តាយរបស់យើង ក្នុងនាមយើងជាអ្នកមើលថែទាំអ្នកជំងឺ។ យើងត្រូវដើរទៅមុខជាមួយគ្នា ក្នុងនាមជាមន្រី្តរាជការ ថ្នាក់ដឹកនាំ គិលានុប្បដ្ឋាក លោកគ្រូពេទ្យ អ្នកគ្រូពេទ្យ បុគ្គលិក អ្នកផ្តល់សេវាកម្មរបស់មនី្ទរពេទ្យ ព្រោះថាភាពជោគជ័យមិនមែនបានមកដោយសារតែអ្នកណាម្នាក់នោះទេ គឺភាពជោគជ័យ បានមកពីការរួមចំណែកទាំងអស់គ្នា ដែលធ្វើឲ្យមន្ទីរពេទ្យមានការរីកចម្រើន។ ក៏សូមថ្លែងអំណរគុណដល់ថ្នាក់ដឹកនាំសាកលវិទ្យាល័យ ស្រី្ត ប៊ូសាន ដែលបានធ្វើការបណ្តុះបណ្តាលដល់គិលានុបដ្ឋាក និងឆ្មប ដ៏មានសារៈសំខាន់នេះ ដើម្បីជាប្រយោជន៍ដល់គ្រូពេទ្យ សម្រាប់បម្រើសេវាជូនអ្នកជំងឺឲ្យកាន់តែមានប្រសិទ្ធភាព គុណភាព៕អត្ថបទ រដ្ឋា

ឯកឧត្តមសាស្ត្រាចារ្យ ហ៊ុន ចំរើន អញ្ជើញបើក ទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំ លើកទី២៧

ភ្នំពេញ : ឯកឧត្តមសាស្ត្រាចារ្យ ហ៊ុន ចំរើន អគ្គនាយករងមន្ទីរពេទ្យកាល់ម៉ែត បានអញ្ជើញជាអធិបតីបើក “ទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំ លើកទី២៧ ក្រោមប្រធានបទ«ដំណើរឆ្ពោះទៅរកឧត្តមភាព នៃការព្យាបាល និងការថែទាំក្នុងបរិបទឌីជីថល” ដែលរៀបចំឡើងដោយគណៈកម្មការទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំរបស់ មន្ទីរពេទ្យកាល់ម៉ែត ប្រចាំឆ្នាំ២០២៥, នាព្រឹកថ្ងៃទី ០៤ ខែកក្កដា ឆ្នាំ២០២៥នេះ។ ឯកឧត្តមសាស្រ្តាចារ្យ ហ៊ុន ចំរើន បានថ្លែងថា ទិវាវេជ្ជសាស្ត្រ-សល្យសាស្ត្រ និងវិទ្យាសាស្ត្រថែទាំលើកទី២៧ គឺជា ការអនុវត្តដោយគោរព ប្រតិបត្តិតាមនិយាមស្តង់ដាវិទ្យាសាស្ត្រ វេជ្ជសាស្ត្រ ក្រមសីលធម៌ វិជ្ជាជីវៈ ដើម្បីអភិវឌ្ឍន៍សេវាសុខាភិបាលឲ្យទាន់សម័យទំនើបដោយប្រើបច្ចេកវិទ្យាឌីជីថល ដើម្បីធ្វើឲ្យការព្យាបាល និងការថែទាំមានគុណភាពខ្ពស់ទាន់ ពេលវេលា និងមានឯកជនភាព។ ទន្ទឹមនឹងនេះសកម្មភាពបណ្តុះបណ្តាលរបស់គិលានុបដ្ឋាក គិលានុបដ្ឋាកយិកា និងឆ្មប ក៏ត្រូវបានលើកឡើង ជាប្រធានបទសំខាន់ៗ ក្នុងការធ្វើបទបង្ហាញ ការពិភាក្សាផ្តោតទៅលើការបណ្តុះបណ្តាលទាំងផ្នែកទ្រឹស្តី និងការអនុវត្តជាមួយនឹងក្រមសីលធម៌វិជ្ជាជីវៈ ហើយក៏បានផ្តល់លទ្ធភាពដល់បណ្តាលសហភាតរៈសុខាភិបាល ទាំងថ្នាក់ជាតិ និងថ្នាក់ក្រោមជាតិ ក្នុងការចូលរួមមកពីបណ្តាលខេត្តនានា ដើម្បីមកធ្វើវិក្រឹត្យការ ពង្រឹងសមត្ថភាពបន្ថែមជាពិសេសការយល់ដឹង និងការស្គាល់អំពីការធ្វើរោគវិនិច្ឆ័យ និងការព្យាបាលបច្ចេកវិទ្យាសម័យទំនើប។ ឯកឧត្តមសាស្រ្តាចារ្យ បានបន្ថែមទៀតថា ប្រធានបទ “ដំណើរឆ្ពោះទៅរកឧត្តមភាពនៃការព្យាបាល និងការថែទាំក្នុងបរិបទឌីជីថល” សម្រាប់ឆ្នាំ២០២៥នេះ ពិតជាបានឆ្លើយតបនឹងបរិបទជាក់ស្តែងក្នុងវិស័យសុខាភិបាលរបស់ប្រទេសកម្ពុជា ក៏ដូចជាពិភពលោកនាសតវត្សទី២១នេះ។ ជាមួយនឹងការបន្តធ្វើនវានុវត្តន៍លើបច្ចេកទេសវេជ្ជសាស្ត្រឥតឈប់ ឈរមន្ទីរពេទ្យកាល់ម៉ែត ក៏ដូចជាមន្ទីរពេទ្យថ្នាក់ជាតិនានា បានជ្រើសរើសឈានទៅមុខជាមួយនឹងការអភិវឌ្ឍដ៏សំខាន់ក្នុងការបម្លែងខ្លួនទៅជាមន្ទីរពេទ្យឌីជីថល។ ក្នុងរយៈពេលចុងក្រោយនេះ មន្ទីរពេទ្យកាល់ម៉ែត បានបង្កើតកម្មវិធីស្វ័យប្រវត្តិជាច្រើន ដើម្បីសម្រួលដល់ការងារប្រចាំថ្ងៃរួមមាន៖ ប្រព័ន្ធ CMS ឬហៅថា Calmette Management System), PACS System (Picture Archiving and Communication System), OT Reservation (Operation Theatre Reservation) និងបច្ចេកវិទ្យា ជាច្រើនទៀតដូចជា AI និង Telemedicine សុទ្ធតែជាឧបករណ៍សំខាន់ៗក្នុងការលើកកម្ពស់ភាពវៃឆ្លាត សុវត្ថិភាព ភាពជឿជាក់ និងប្រសិទ្ធភាពខ្ពស់ ដល់សេវាសុខាភិបាល ក្នុងន័យនេះការបង្កើតបច្ចេកទេសវះកាត់ថ្មីតែមួយមុខគត់ គឺពុំទាន់គ្រប់គ្រាន់នោះទេ ប៉ុន្តែវាទាមទារឱ្យមានការកំណត់នូវរបបគ្រប់គ្រងថ្មី សម្រាប់ការថែទាំព្យាបាលជាច្រើនផ្នែកដើម្បីចូលរួមអភិវឌ្ឍន៍ប្រព័ន្ធឌីជីថលឱ្យកាន់តែទំនើប ងាយស្រួល ប្រើប្រាស់ សម្រាប់ឆ្លើយតបនឹងតម្រូវការបច្ចុប្បន្ន បច្ចេកវិទ្យាឌីជីថល អនុញ្ញាតឱ្យយើងផ្សារភ្ជាប់ការយល់ដឹងរបស់អ្នកជំងឺជាមួយនឹងដំណើរការព្យាបាលរបស់ពួកគេដោយរួមបញ្ចូលវីដេអូបង្ហាញសកម្មភាពវះកាត់ និងការព្យាបាលផ្សេងៗតាមប្រព័ន្ធឌីជីថលហើយអ្នកជំងឺអាចយល់ឃើញបានច្បាស់ និងមានទំនុកចិត្ត ចំពោះសេវាព្យាបាលរបស់យើងកាន់តែខ្ពស់ថែមទៀត។ឯកឧត្តមសាស្រ្តាចារ្យ ហ៊ុន ចំរើន ជឿជាក់យ៉ាងមុតមាំថា វេទិកានេះនឹងផ្តល់ជំនួយយ៉ាងសំខាន់សម្រាប់ការផ្តល់យោបល់ និងបង្ហាញបទពិសោធន៍ដ៏មានតម្លៃ ក្នុងការអភិវឌ្ឍន៍សេវាសុខាភិបាលរបស់យើងឱ្យកាន់តែប្រសើរឡើងជាបន្តទៀត ដើម្បីឈានទៅសម្រេចបាននូវគោលដៅនេះ គឺយើងត្រូវការរួមកម្លាំងទាំងអស់គ្នា ដើម្បីជួយជម្រុញឱ្យកិច្ចការនេះក្លាយជាការពិត ដូចពាក្យស្លោកមួយលើកឡើងថា “ម្នាក់ឯង យើងធ្វើបានតិច ប៉ុន្តែជាក្រុមយើង អាចសម្រេចបានសមិទ្ធផលកាន់តែច្រើន”៕ អត្ថបទ រដ្ឋា

កម្ពុជាគ្រោងរៀបចំធ្វើជាម្ចាស់ផ្ទះកិច្ចពិភាក្សាពហុភាគីក្នុងតំបន់ ពាក់ព័ន្ធនឹងការជួញដូរមនុស្ស និងឆបោកតាមអនឡញ

កម្ពុជាគ្រោងរៀបចំធ្វើជាម្ចាស់ផ្ទះកិច្ចពិភាក្សាពហុភាគីក្នុងតំបន់ ពាក់ព័ន្ធនឹងបទល្មើសជួញដូរមនុស្សឆ្លងដែន និងឆបោកតាមអនឡាញ ខណៈបច្ចុប្បន្នបទល្មើសទាំងនេះកំពុងរីករាលដាលនៅក្នុងតំបន់។លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និជាអនុប្រធានអចិន្រ្តៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅរសៀលថ្ងៃទី០៣ ខែកក្កដាម្សិលមិញ បានដឹកនាំកិច្ចប្រជុំស្តីពី ការត្រៀមកិច្ចពិភាក្សាពហុភាគីក្នុងតំបន់ ឆ្លើយតបទៅនឹងបទល្មើសជួញដូរមនុស្សឆ្លងដែន និងបទល្មើសឆបោកតាមអនឡាញ ដោយមានការចូលរួមពីតំណាងស្ថានទូតប្រទេសឡាវ មីយ៉ាន់ម៉ា ហ្វីលីពីន ម៉ាឡេស៊ី ឯកអគ្គរដ្ឋទូតនៃប្រទេសអូស្រ្តាលី និងឥណ្ឌូនេស៊ី ប្រចាំព្រះរាជាណាចក្រកម្ពុជា។នៅកិច្ចប្រជុំ លោកជំទាវ ជូ ប៊ុនអេង បានថ្លែងថា នៅថ្ងៃនេះគឺជាការពិគ្រោះយោបល់មុនកិច្ចពិភាក្សាពហុភាគីក្នុងតំបន់ គ្រោងរៀបចំឡើងក្នុងពេលខាង ដែលប្រទេសកម្ពុជានឹងធ្វើជាម្ចាស់ផ្ទះ។ ហើយកិច្ចពិភាក្សានេះ ធ្វើឡើងក្នុងគោលបំណងរួមគ្នាប្រយុទ្ធប្រឆាំងការជួញដូរមនុស្សឆ្លងដែន ដែលផ្សារភ្ជាប់ការឆបោកតាមអនឡាញ។លោកជំទាវបន្តថា បច្ចុប្បន្នការជួញដូរមនុស្ស និងឆបោកតាមប្រព័ន្ធអនឡាញ មិនមែនតែប្រទេសកម្ពុជាទេ ដែលទទួលរងផលប៉ះពាល់ ពោលគឺស្ទើរប្រទេសទាំងអស់នៅក្នុងតំបន់កំពុងទទួលរងឥទ្ធិពលពីបណ្តាញក្រុមឧក្រិដ្ឋជន ដែលកំពុងធ្វើសកម្មភាពយ៉ាងមមាញឹក។ពាក់នឹងការជួញដូរមនុស្ស និងឆបោកតាមប្រព័ន្ធអនឡាញ កន្លងទៅ និងបច្ចុប្បន្ន រាជរដ្ឋាភិបាលកម្ពុជា បានដាក់ចេញវិធានការជាបន្តបន្ទាប់ និងបានសហការជាមួយបណ្តាប្រទេសនានា ដើម្បីទប់ស្កាត់បទល្មើសទាំងអស់នេះ។ អត្ថបទ៖ទូច សោភ័ណ

ឯកឧត្ដម ឃួង ស្រេង ណែនាំគ្រប់ខណ្ឌឱ្យបង្ក្រាបគ្រឿងញៀន លុបបំបាត់ការជក់បារីអេឡិចត្រូនិច ឬស៊ីហ្សា និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា

ភ្នំពេញ ៖ ឯកឧត្ដម ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានណែនាំឱ្យកម្លាំងមានសមត្ថកិច្ច និងអាជ្ញាធរខណ្ឌទាំង១៤ បន្តទប់ស្កាត់បង្ក្រាបគ្រឿងញៀន ការលុបបំបាត់ការជក់បារីអេឡិចត្រូនិច ឬស៊ីហ្សា និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS) សំដៅធ្វើយ៉ាងណាឱ្យភូមិសង្កាត់មានសុវត្ថិភាព។ការណែនាំរបស់ឯកឧត្ដម ឃួង ស្រេង អភិបាលរាជធានីភ្នំពេញ បានធ្វើឡើងនាព្រឹកថ្ងៃទី០៤ ខែកក្កដា ឆ្នាំ២០២៥ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញជាមួយកម្លាំងមានសមត្ថកិច្ចទាំង២ប្រភេទ មន្ទីរពាក់ព័ន្ធ និងអាជ្ញាធរខណ្ឌទាំង១៤ នៅសាលារាជធានីភ្នំពេញ។ឯកឧត្ដម ឃួង ស្រេង មានប្រសាសន៍ថា កិច្ចប្រជុំគណៈបញ្ជាការឯកភាពរាជធានីភ្នំពេញនេះ ធ្វើឡើងដើម្បីដាក់ផែនការក្នុងការថែរក្សាសន្តិសុខសុវត្ថិភាពជូនប្រជាពលរដ្ឋឱ្យបានល្អ ពិសេសគឺការបន្តទប់ស្កាត់បង្ក្រាបគ្រឿងញៀន ការលុបបំបាត់ការជក់បារីអេឡិចត្រូនិច ឬស៊ីហ្សា (VAP) និងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា សំដៅធ្វើយ៉ាងណាឱ្យភូមិសង្កាត់មានសុវត្ថិភាព។ឯកឧត្ដម ឃួង ស្រេង បានបន្តទៀតថា ការងារសព្វបែបយ៉ាង គឺសុទ្ធតែជាការងាររបស់អាជ្ញាធរខណ្ឌបើបង្ក្រាបមិនបានគ្មាននរណាបង្ក្រាបបានទេ។ រឿងគ្រឿងញៀន អាជ្ញាធរខណ្ឌត្រូវម្ចាស់ការធ្វើរៀងខ្លួន ដើម្បីបង្ក្រាបគ្រឿងញៀន។ ការងារនេះបើកម្លាំងខណ្ឌមិនគ្រប់គ្រាន់ ត្រូវស្នើសុំ គណៈបញ្ជាការឯកភាពរាជធានីភ្នំពេញនឹងរកថវិកាជួយទ្រទ្រង់ការងារនេះ ដើម្បីប្រតិបត្តិការឱ្យបានសកម្ម។ អាជ្ញាធរខណ្ឌទាំងអស់ត្រូវរង់ចាំសហការជាមួយកម្លាំងទាំង២ប្រភេទក្នុងការបង្ក្រាបគ្រឿងញៀន។ឯកឧត្ដម ឃួង ស្រេង បានបញ្ជាក់ថា បើចង់ធ្វើអភិបាលខណ្ឌត្រូវតែនៅជាមួយប្រជាពលរដ្ឋជានិច្ចគ្មានគិតថ្ងៃសៅរ៍ និងអាទិត្យនោះទេ។ គ្រឿងញៀននិងការឆបោកតាមប្រព័ន្ធបច្ចេកវិទ្យាជារឿងដែលត្រូវបង្ក្រាបជាប្រចាំ ដូច្នេះអាជ្ញាធរខណ្ឌទាំង១៤ត្រូវពិនិត្យតាមខុនដូ និងបុរី ដែលមានការសង្ស័យថា បាននិងកំពុងធ្វើសកម្មភាពឆបោកតាមប្រព័ន្ធបច្ចេកវិទ្យានេះ។ ឯកឧត្ដម អភិបាលរាជធានី បន្តទៀតថា គ្រប់ខណ្ឌត្រូវប្រជុំដាក់ផែនការទៅឱ្យមេភូមិ និងប្រជាពលរដ្ឋ ដើម្បីឱ្យពួកគាត់សហការជាមួយ។ ចាប់ពីពេលនេះតទៅ នឹងបន្តការរឹតបន្តឹងបន្ថែមទៀតលើការបង្ក្រាប។ ការជក់ស៊ីហ្សានៅតាមសាលារៀន ត្រូវតែលុបបំបាត់ឱ្យអស់ សិស្សានុសិស្សជាទំពាំងស្នងឬស្សី។ ទំពាំង ត្រូវមើលថែឱ្យល្អធំធាត់ ដើម្បីជាធនធានមនុស្សក្នុងការអភិវឌ្ឍប្រទេសជាតិ។ បើពួកគាត់កំពុងពេញកម្លាំង បែរជាឈឺ តើមានកម្លាំងឯណាដើម្បីជួយជាតិ។ រឿងនេះមន្ទីរអប់រំយុវជន និងកីឡា ត្រូវមើលការងារនេះឱ្យបានល្អ។ បន្ថែមពីនេះចំពោះអាជ្ញាធរខណ្ឌដែលមានទីតាំងជាកន្លែងសប្បាយភាពត្រូវចុះពិនិត្យមើលជាប្រចាំ។ ត្រូវយកស្លាកសញ្ញាដាក់ហាមជក់បារីអេឡិចត្រូនិច ឬស៊ីហ្សា (VAP) ទៅបិទតាមហាងនានានៅក្នុងរាជធានីភ្នំពេញ ពិសេសនៅហាងបារាំង។ក្នុងនោះដែរលោកឧត្តមសេនីយ៍ទោ គល់ យី ស្នងការរងនគរបាលរាជធានីភ្នំពេញបានឱ្យដឹងថា ចំពោះបញ្ហាគ្រឿងញៀននៅតែជាបញ្ហាប្រឈម ដោយក្រុមជនល្មើសបានធ្វើសកម្មភាពផ្លាស់ប្តូរគ្រប់រូបភាព ដែលសមត្ថកិច្ចក៏ពិបាកក្នុងការបង្ក្រាប ដូចជាករណីខ្លះការជួញដូរគ្រឿងញៀនរាប់គីឡូក្រាម ពួកគេប្រើរូបភាពដោយយកគ្រឿងញៀនទៅដាក់នៅគោលដៅមួយ ហើយពួកគេប្រើឡុកខេសិនប្រាប់ពីទីតាំងនោះ ចំពោះទឹកប្រាក់ទិញគ្រឿងញៀននោះវិញពួកគេវេតាមវីង៕

មេបញ្ជាការកងពលតូចលេខ៩៩ រំលឹកដល់កងទ័ពនៃកងពលទាំងអស់ ត្រូវពង្រឹងគោលជំហរជាតិនិយម ត្រូវហានលះបង់ក្នុងការការពារជាតិ

ក្នុងឱកាសប្រជុំជួរ និងផ្សព្វផ្សាយសភាពការណ៍ថ្មីៗ អន្តរជាតិនិងក្នុង តំបន់ពិសេស បញ្ហាព្រំដែន កម្ពុជា-ថៃ ដែល បង្កឡើងដោយ ភាគីយោធាថៃ នាព្រឹកថ្ងៃទី៤ ខែកក្កដា ឆ្នាំ២០២៥នេះ លោក ឧត្តមសេនីយ៍ទោ ហ៊ុល សំអុន បានបន្តរំលឹកដល់នាយទាហាន នាយទាហានរង ពលទាហានទាំងអស់នៃកងពលតូចដឹកជញ្ជូនលេខ៩៩ គប្បីប្រកាន់គោលជំហរជាតិនិយម និងត្រូវហានលះបង់គ្រប់យ៉ាងដើម្បីក្នុងបុព្វហេតុការការពារជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់។លោកឧត្តមសេនីយ៍ បានប្រាប់ទៅយោធិននៃកងពលទាំងអស់ថាពង្រឹង គោលជំហរ ជាតិនិយម ត្រូវហានលះបង់ក្នុងការការពារជាតិ បូរណៈភាពទឹកដីមិនត្រូវឲ្យខ្មាំងសត្រូវ ណាមកឈ្លានពានបានឡើយ។ លោកឧត្តមសេនីយ៍« យើងទាំងអស់គ្នាត្រូវ ស្មោះត្រង់ និងជឿជាក់លើការដឹកនាំរបស់រាជរដ្ឋាភិបាលក្រោមការដឹកនាំដ៏ឈ្លាសវៃ និងប្រកបដោយ គតិបណ្ឌិត របស់សម្ដេចបរវធិបតី ហ៊ុន ម៉ាណែត ដែលតំកល់ផលប្រយោជន៍ជាតិ និងប្រជាជនជាធំ ដោយគិតគូរដល់សុខសុវត្តិភាព សន្ដិភាពជាតិ និងប្រជាជនជារួម»។ជាមួយគ្នានោះដែរ ឧត្តមសេនីយ៍ទោ ហ៊ុល សំអុន ក៏បានដាក់បទបញ្ជាដល់នាយទាហាន នាយទាហានរង និងពលទាហានទាំងអស់ ត្រូវរួបរួមសាមគ្គីជាធ្លុងមួយ ដើម្បីការពារអធិបេតយ្យភាព បូរណភាពទឹកដីកម្ពុជា នឹងរក្សា សុខសន្ដិភាពជូនប្រជាជន ត្រៀមខ្លួនក្នុងការអនុវត្តបទបញ្ជាយ៉ាងម៉ឺងម៉ាត់ របស់ថ្នាក់ដឹកនាំគ្រប់លំដាប់ថ្នាក់ ឲ្យទទួលបានជោគជ័យនិងមានប្រសិទ្ធិភាពខ្ពស់បំផុតក្នុងគ្រប់កាលៈទេសៈទាំងអស់៕អត្ថបទបាន ចក់

ឧត្តមសេនីយ៍ឯក ជួន ណារិន្ទ បញ្ជាឱ្យកោះហៅមន្ត្រីនគរបាលចរាចរណ៍៩រូប មកបំភ្លឺជុំវិញករណីឃាត់រថយន្តជនជាតិឥណ្ឌូនេស៊ី ហើយទារលុយ

ភ្នំពេញ៖ ក្រោយមានការផ្សព្វផ្សាយតាមបណ្តាញព័ត៌មានសង្គមករណីឃាត់រថយន្តជនជាតិឥណ្ឌូនេស៊ី ០១គ្រឿង ហើយសួរនាំរកឯកសាររថយន្តនៅពេលនោះជនជាតិឥណ្ឌូនេស៊ី បានបង្ហាញ ប័ណ្ណបើកបរអាស៑ាន រួចហើយ តែប៉ូលីសនៅតែទាមទាររក ឯកសារ ផ្សេងៗ រហូតប៉ូលីសទាមទារលុយចំនួន៣០០ដុលា្លរ តែបុរសឥណ្ឌូនេស៊ី បានសម្រួលមកត្រឹម៥០ដុល្លារវិញ មិនតែប៉ុណ្ណោះមានប៉ូលីសមកទាមទារបន្ថែម៤០០០រៀល កាលពីកន្លងទៅថ្មីៗនេះ។ នេះបើតាមការបញ្ជាក់របស់ អគ្គស្នងការដ្ឋាននគរបាលជាតិ។ អគ្គស្នងការដ្ឋាននគរបាលជាតិ បានឱ្យដឹងថា ចំពោះករណីនេះ អនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងផែនការងារធនធានមនុស្ស ឲ្យការិយាល័យបុគ្គលិក នៅព្រឹកថ្ងៃទី០៤ ខែកក្កដាឆ្នាំ២០២៥ កោះហៅមន្ត្រីនគរបាលចរាចរណ៍ និងមន្រ្តីជាប់កិច្ចសន្យា ចំនួន៩រូប នៅគោលដៅស្តុបព្រះសក្យមុនីចេតិយ ស្ថិតក្នុងសង្កាត់ស្រះចក ខណ្ឌដូនពេញ ដើម្បីសួរនាំបំភ្លឺ និងកំពុងធ្វើការស្រាវជ្រាវតាមជំនាញរបស់នគរបាល ប្រមូលព័ត៌មានឲ្យបានច្បាស់លាស់គ្រប់ជ្រុងជ្រោយយកមកវិភាគវាយតម្លៃ ហើយធ្វើរបាយការណ៍ រាយការណ៍ជូនឯកឧត្តមស្នងការ ដើម្បីពិនិត្យនិងសម្រេច។អគ្គស្នងការដ្ឋាននគរបាលជាតិ បញ្ជាក់ថា កន្លងមក ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានណែនាំដល់មន្ត្រីចុះអនុវត្តច្បាប់ចរាចរណ៍ផ្លូវគោក ពេលចុះអនុវត្តបំពេញភារកិច្ច ត្រូវមានក្រមសីលធម៌ វិជ្ជាជីវៈ សេចក្ដីថ្លៃថ្នូរ សាកសមជាកម្លាំងនគរបាលជាតិ ដោយត្រូវអនុវត្តច្បាប់ប្រកាន់យកវិធានការជំនាញ និងវិធានការច្បាប់ ដោយភាពម៉ត់ចត់បំផុត។ ដោយឡែកចំពោះមន្ត្រីណាដែលរកឃើញថា អនុវត្តការងារ គ្មានវិន័យ ខ្វះក្រមសីលធម៌ វិជ្ជាជីវៈនគរបាលជាតិ ត្រូវតែទទួលវិន័យរបស់នគរបាលជាតិ ជាដាច់ខាតដោយមិនលើកលែងនោះទេ៕

កម្ពុជា-អាមេរិកឯកភាពគ្នា លើសេចក្តីព្រាងសេចក្តីថ្លែងការណ៍រួម ស្តីពីកិច្ចព្រមព្រៀងក្របខណ្ឌលើពន្ធបដិការ

កម្ពុជា-សហរដ្ឋអាមេរិក បានឯកភាពគ្នាលើសេចក្តីព្រាងសេចក្តីថ្លែងការណ៍រួមស្តីពី កិច្ចព្រមព្រៀងក្របខណ្ឌរវាងសហរដ្ឋអាមេរិក និងកម្ពុជាលើពន្ធបដិការ ដែលនឹងផ្សព្វផ្សាយជាសាធារណៈនាពេលដ៏ខ្លីខាងមុខ។ នេះបើតាមការបញ្ជាក់នៅក្នុងសេចក្តីប្រកាសព័ត៌មានរបស់អង្គភាពអ្នកនាំពាក្យរាជរដ្ឋាភិបាលនៅព្រឹកថ្ងៃទី៤ ខែកក្កដានេះ។ យោងតាមសេចក្ដីប្រកាសបានបញ្ជាក់ថា នៅព្រឹកថ្ងៃទី៤ ខែកក្កដា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំក្រុមការងារចំពោះកិច្ចជួបប្រជុំ ទ្វេភាគីតាមប្រព័ន្ធវីដេអូ ជាមួយតំណាងពាណិជ្ជកម្មសហរដ្ឋអាម៉េរិក ដឹកនាំដោយ លោកជំទាវ Sarah Ellerman អនុប្រធានតំណាងពាណិជ្ជកម្មសហរដ្ឋអាម៉េរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។ក្នុងកិច្ចប្រជុំនេះ ភាគីទាំងពីរបានពិនិត្យ និងឯកភាពគ្នាលើសេចក្តីព្រាងសេចក្តីថ្លែងការណ៍រួម ស្តីពី កិច្ចព្រមព្រៀងក្របខណ្ឌរវាងសហរដ្ឋអាម៉េរិក និងកម្ពុជាលើពន្ធគយបដិការ ដែលនឹងផ្សព្វផ្សាយជាសាធារណៈ នាពេលដ៏ខ្លីខាងមុខ។ នេះបើតាមការបញ្ជាក់នៅក្នុងសេចក្តីប្រកាសព័ត៌មានដដែល។អង្គភាពអ្នកនាំពាក្យរាជរដ្ឋាភិបាលបានបញ្ជាក់ថា រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជា នាយករដ្ឋមន្ត្រីនៃកម្ពុជានឹងបន្តធ្វើកិច្ចការងារពន្ធបដិការជាមួយអាមរិកនេះដោយយកចិត្តទុកដាក់បំផុត៕

បណ្ដាញសង្គម

ព័ត៌មានថ្មីៗ

អ៊ីរ៉ង់ បង្ហាញពី «ការត្រៀមខ្លួន ជាជាងការសម្របសម្រួល» ក្នុងពេលមានការគំរាមកំហែងរបស់អាមេរិក

អង្គការ WHO ប្រកាសពីការផ្ទុះឡើងជំងឺអេបូឡានៅកុងហ្គោ និងអ៊ុយហ្គង់ដា ជាគ្រាអាសន្ននៃការព្រួយបារម្ភអន្តរជាតិ

សេតវិមាន៖ ចិននឹងទិញផលិតផលកសិកម្មអាមេរិកយ៉ាងហោច១៧ពាន់លានដុល្លារជារៀងរាល់ឆ្នាំ ក្រោយជំនួបលោកTrump -Xi

លោក Trump ចេញការព្រមានធ្ងន់ៗដល់អ៊ីរ៉ង់ឱ្យទទួលយកកិច្ចព្រមព្រៀងសន្តិភាព

AOT ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ភូមិជោគជ័យ ឃុំអូរបីជាន់

លោក Zelenskiy ៖ រុស្ស៊ីពិចារណាផែនការវាយប្រហារប្រទេសសមាជិកអង្គការណាតូ ចេញពីបេឡារុស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877