BTV NEWS

គ.វ.ជ. ចាប់ផ្តើមវាយតម្លៃបេក្ខភាពជ័យលាភីអង្គភាពផ្តល់សេវាសាធារណៈគំរូ Top 5 ក្នុងវិស័យអប់រំ និងវិស័យសុខាភិបាល ឆ្នាំ២០២៥ ដំណាក់កាលចុងក្រោយ

រដ្ឋមន្រី្តសុខាភិបាល ជួបពិភាក្សាជាមួយតំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិនៅទីក្រុងហ្សឺណែវ

សម្តេចពិជ័យសេនា ទៀ បាញ់៖ សន្តិភាព និងការឯកភាពជាតិពេញលេញនៅកម្ពុជា មិនមែនទទួលបានដោយចៃដន្យនោះទេ គឺវាកើតចេញពីឥស្សរជនជាច្រើនបានយកជីវិតទៅធ្វើជាដើមទុន

ស្តូបអនុស្សាវរីយ៍នយោបាយឈ្នះ ឈ្នះ កោះកុង នឹងត្រូវសម្ពោធជាផ្លូវការនៅថ្ងៃទី៣០ ខែឧសភានេះ

ព័ត៌មានជាតិ

ឧត្តមសេនីយ៍ឯក ជួន ណារិន្ទ បញ្ជាឱ្យកោះហៅមន្ត្រីនគរបាលចរាចរណ៍៩រូប មកបំភ្លឺជុំវិញករណីឃាត់រថយន្តជនជាតិឥណ្ឌូនេស៊ី ហើយទារលុយ

ភ្នំពេញ៖ ក្រោយមានការផ្សព្វផ្សាយតាមបណ្តាញព័ត៌មានសង្គមករណីឃាត់រថយន្តជនជាតិឥណ្ឌូនេស៊ី ០១គ្រឿង ហើយសួរនាំរកឯកសាររថយន្តនៅពេលនោះជនជាតិឥណ្ឌូនេស៊ី បានបង្ហាញ ប័ណ្ណបើកបរអាស៑ាន រួចហើយ តែប៉ូលីសនៅតែទាមទាររក ឯកសារ ផ្សេងៗ រហូតប៉ូលីសទាមទារលុយចំនួន៣០០ដុលា្លរ តែបុរសឥណ្ឌូនេស៊ី បានសម្រួលមកត្រឹម៥០ដុល្លារវិញ មិនតែប៉ុណ្ណោះមានប៉ូលីសមកទាមទារបន្ថែម៤០០០រៀល កាលពីកន្លងទៅថ្មីៗនេះ។ នេះបើតាមការបញ្ជាក់របស់ អគ្គស្នងការដ្ឋាននគរបាលជាតិ។ អគ្គស្នងការដ្ឋាននគរបាលជាតិ បានឱ្យដឹងថា ចំពោះករណីនេះ អនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងផែនការងារធនធានមនុស្ស ឲ្យការិយាល័យបុគ្គលិក នៅព្រឹកថ្ងៃទី០៤ ខែកក្កដាឆ្នាំ២០២៥ កោះហៅមន្ត្រីនគរបាលចរាចរណ៍ និងមន្រ្តីជាប់កិច្ចសន្យា ចំនួន៩រូប នៅគោលដៅស្តុបព្រះសក្យមុនីចេតិយ ស្ថិតក្នុងសង្កាត់ស្រះចក ខណ្ឌដូនពេញ ដើម្បីសួរនាំបំភ្លឺ និងកំពុងធ្វើការស្រាវជ្រាវតាមជំនាញរបស់នគរបាល ប្រមូលព័ត៌មានឲ្យបានច្បាស់លាស់គ្រប់ជ្រុងជ្រោយយកមកវិភាគវាយតម្លៃ ហើយធ្វើរបាយការណ៍ រាយការណ៍ជូនឯកឧត្តមស្នងការ ដើម្បីពិនិត្យនិងសម្រេច។អគ្គស្នងការដ្ឋាននគរបាលជាតិ បញ្ជាក់ថា កន្លងមក ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានណែនាំដល់មន្ត្រីចុះអនុវត្តច្បាប់ចរាចរណ៍ផ្លូវគោក ពេលចុះអនុវត្តបំពេញភារកិច្ច ត្រូវមានក្រមសីលធម៌ វិជ្ជាជីវៈ សេចក្ដីថ្លៃថ្នូរ សាកសមជាកម្លាំងនគរបាលជាតិ ដោយត្រូវអនុវត្តច្បាប់ប្រកាន់យកវិធានការជំនាញ និងវិធានការច្បាប់ ដោយភាពម៉ត់ចត់បំផុត។ ដោយឡែកចំពោះមន្ត្រីណាដែលរកឃើញថា អនុវត្តការងារ គ្មានវិន័យ ខ្វះក្រមសីលធម៌ វិជ្ជាជីវៈនគរបាលជាតិ ត្រូវតែទទួលវិន័យរបស់នគរបាលជាតិ ជាដាច់ខាតដោយមិនលើកលែងនោះទេ៕

កម្ពុជា-អាមេរិកឯកភាពគ្នា លើសេចក្តីព្រាងសេចក្តីថ្លែងការណ៍រួម ស្តីពីកិច្ចព្រមព្រៀងក្របខណ្ឌលើពន្ធបដិការ

កម្ពុជា-សហរដ្ឋអាមេរិក បានឯកភាពគ្នាលើសេចក្តីព្រាងសេចក្តីថ្លែងការណ៍រួមស្តីពី កិច្ចព្រមព្រៀងក្របខណ្ឌរវាងសហរដ្ឋអាមេរិក និងកម្ពុជាលើពន្ធបដិការ ដែលនឹងផ្សព្វផ្សាយជាសាធារណៈនាពេលដ៏ខ្លីខាងមុខ។ នេះបើតាមការបញ្ជាក់នៅក្នុងសេចក្តីប្រកាសព័ត៌មានរបស់អង្គភាពអ្នកនាំពាក្យរាជរដ្ឋាភិបាលនៅព្រឹកថ្ងៃទី៤ ខែកក្កដានេះ។ យោងតាមសេចក្ដីប្រកាសបានបញ្ជាក់ថា នៅព្រឹកថ្ងៃទី៤ ខែកក្កដា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំក្រុមការងារចំពោះកិច្ចជួបប្រជុំ ទ្វេភាគីតាមប្រព័ន្ធវីដេអូ ជាមួយតំណាងពាណិជ្ជកម្មសហរដ្ឋអាម៉េរិក ដឹកនាំដោយ លោកជំទាវ Sarah Ellerman អនុប្រធានតំណាងពាណិជ្ជកម្មសហរដ្ឋអាម៉េរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។ក្នុងកិច្ចប្រជុំនេះ ភាគីទាំងពីរបានពិនិត្យ និងឯកភាពគ្នាលើសេចក្តីព្រាងសេចក្តីថ្លែងការណ៍រួម ស្តីពី កិច្ចព្រមព្រៀងក្របខណ្ឌរវាងសហរដ្ឋអាម៉េរិក និងកម្ពុជាលើពន្ធគយបដិការ ដែលនឹងផ្សព្វផ្សាយជាសាធារណៈ នាពេលដ៏ខ្លីខាងមុខ។ នេះបើតាមការបញ្ជាក់នៅក្នុងសេចក្តីប្រកាសព័ត៌មានដដែល។អង្គភាពអ្នកនាំពាក្យរាជរដ្ឋាភិបាលបានបញ្ជាក់ថា រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជា នាយករដ្ឋមន្ត្រីនៃកម្ពុជានឹងបន្តធ្វើកិច្ចការងារពន្ធបដិការជាមួយអាមរិកនេះដោយយកចិត្តទុកដាក់បំផុត៕

ក្រសួងយុត្តិធម៌៖ អ្នកដែលលើកឡើងថា ការដកសញ្ជាតិជាការបំបាត់ជាតិសាសន៍ ជាការលើកឡើងដោយមិនយល់

មន្រ្ដីនាំពាក្យក្រសួងយុត្តិធម៌ ឯកឧត្តម សេង ឌីណា បានបញ្ជាក់ថា អ្នកដែលលើកឡើងថា ការដកសញ្ជាតិជាការបំបាត់ជាតិសាសន៍ ហើយមានអ្នកខ្លះលើកឡើងរហូតថា ជាការប្រល័យពូជសាសន៍នោះជាការលើកឡើងដោយមិនយល់ និងមិនបានបែងចែកដាក់ពីគ្នារវាងម្ខាងជាតិសាសន៍ ឬជនជាតិ ហើយម្ខាងទៀតសញ្ជាតិ។ឯកឧត្តម សេង ឌីណា បានពន្យល់ដល់ជនរួមជាតិតាមរយៈកិច្ចសម្ភាសន៍ជាមួយ BTV នៅព្រឹថ្ងៃទី៤ ខែកក្កដា ឆ្នាំ២០២៥នេះថា ជនជាតិ និងសញ្ជាតិ ពីរនេះគឺខុសគ្នា ដូច្នេះបានជាយើងឃើញនៅក្នុងឯកសារផ្លូវការ គឺតែងតែមានដាក់ពាក្យទាំងពីរនេះ។ រួមមានជនជាតិខ្មែរ, សញ្ជាតិខ្មែរ, ជនជាតិផ្សេង, សញ្ជាតិផ្សេង, ន័យគឺខុសគ្នា។ ឯកឧត្តមពន្យល់ថា ជនជាតិ ឬក៏ជាតិសាសន៍នេះ យើងអាចនិយាយបាន គឺជាចំណងលោហិត។ ចំណែកឯ សញ្ជាតិ គឺជាចំណងផ្លូវច្បាប់រវាងបុគ្គលជាមួយនឹងរដ្ឋ។ បើតាម ឯកឧត្តម សេង ឌីណា ចំណងផ្លូវច្បាប់ន័យសញ្ជាតិនេះ គឺបង្កើតបាននូវសិទ្ធិផងហើយនឹងកាតព្វកិច្ចផង ពិសេសរឿងកាតព្វកិច្ចនេះ គឺជាកាតព្វកិច្ចរបស់ពលរដ្ឋនៅក្នុងរដ្ឋធម្មនុញ្ញដែលជាច្បាប់កំពូលរបស់ជាតិ ខណៈនៅត្រង់មានត្រា៤៩ថ្មី ចែកថា ប្រជាពលរដ្ឋខ្មែរគ្រប់រូបត្រូវតម្កល់ផលប្រយោជន៍ជាតិជាធំ ហើយមិនត្រូវធ្វើសកម្មភាពណាមួយទោះដោយផ្ទាល់ក្ដី ឬដោយប្រយោលក្ដីដែលនាំឱ្យប៉ះពាល់ទៅដល់ផលប្រយោជន៍របស់កម្ពុជា ឬប្រជាពលរដ្ឋខ្មែរ ដូច្នេះនៅពេលណាដែលបុគ្គលណាម្នាក់ប្រព្រឹត្តអំពើក្បត់ជាតិខ្លួនឯង ឬធ្វើសកម្មភាពណាមួយ ដែលបំផ្លាញឧត្តមប្រយោជន៍ប្រទេសជាតិខ្លួនឯង ជាពិសេសទៅគប់គិតគ្នាជាមួយបរទេសមកបំផ្លាញប្រយោជន៍ជាតិខ្លួនឯង បំផ្លាញប្រជាជនខ្មែរគ្នាឯងបុគ្គលនោះគឺបានបំពាននូវកាតព្វកិច្ចជាពលរដ្ឋខ្មែរ បានប្រព្រឹត្តនូវទង្វើប្រាសចាកនូវឧត្តមគតិ និងមនសិកាជាពលរដ្ឋខ្មែរ ដូច្នេះបុគ្គលនោះលែងសាកសមជាពលរដ្ឋខ្មែរទៀតហើយ។ យោងតាមសេចក្តីក្រាបបង្គំទូលថ្វាយព្រះមហាក្សត្ររបស់ក្រុមប្រឹក្សាធម្មនុញ្ញបានឱ្យដឹងថា ការផ្តួចផ្តើមគំនិតធ្វើវិសោធនកម្មមាត្រា៣៣ នៃរដ្ឋធម្មនុញ្ញ នៃព្រះរាជាណាចក្រកម្ពុជា មានគោលបំណងសំខាន់ គឺដើម្បីបើកផ្លូវអនុញ្ញាតឱ្យមានការរៀបចំក្របខណ្ឌច្បាប់សម្រាប់ដកសញ្ជាតិខ្មែរ ពីប្រជាពលរដ្ឋខ្មែរណាដែលបានប្រព្រឹត្តអំពើក្បត់ជាតិ ឬធ្វើសកម្មភាពប៉ះពាល់ ធ្ងន់ធ្ងរដល់ផលប្រយោជន៍របស់ព្រះរាជាណាចក្រកម្ពុជា និងប្រជាពលរដ្ឋខ្មែរ ពិសេសអំពើគប់គិតជាមួយបរទេស ដែលធ្វើឱ្យប៉ះពាល់ដល់សន្តិសុខជាតិ សេចក្តីសុខសាន្តរបស់ប្រជាជន និងឧត្តម ប្រយោជន៍របស់ប្រទេសជាតិ។ ក្នុងន័យនេះ ការស្នើសុំធ្វើវិសោធនកម្មរដ្ឋធម្មនុញ្ញត្រង់មាត្រា៣៣ គឺដើម្បីលើកកម្ពស់ឧត្តមគតិជាតិ មនសិការស្នេហាជាតិ និងគោលជំហរស្មោះត្រង់ឥតងាករេរបស់ប្រជាពលរដ្ឋខ្មែរគ្រប់រូប ចំពោះជាតិមាតុភូមិ និងប្រជាជនកម្ពុជានៅគ្រប់កាលៈទេសៈទាំងអស់ ពិសេសការតម្កល់ផលប្រយោជន៍ជាតិជាធំស្របតាមមាត្រា៤៩ថ្មី នៃរដ្ឋធម្មនុញ្ញនៃព្រះរាជាណាចក្រ៕ អត្ថបទ៖ វ៉ន ដារ៉ា

សម្តេចធិបតី ទទួលជួបលោកតា ស៊ុច និងសង្ឃឹមព្រះអង្គជួយពលរដ្ឋខ្មែរលើវិថីការអប់រំតាមព្រះធម៌

នៅព្រឹកថ្ងៃសុក្រ ទី៤ ខែកក្កដា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានទទួលជួបលោកតា ស៊ុច ដែលជាព្រះសង្ឃគង់នៅប្រទេសថៃ ហើយត្រូវបានពលរដ្ឋថៃ ផ្ទុះការខឹងគ្រោធមិនឱ្យលោកតានិមន្តចូលប្រទេសថៃវិញ ហើយត្រូវបានសម្ដេចធិបតីនាយករដ្ឋមន្រ្ដី និមន្តព្រះអង្គមកគង់នៅប្រទេសកម្ពុជា។លោកតា ស៊ុច ជាព្រះសង្ឃមួយអង្គគង់នៅទឹកដីថៃ ដែលជាអតីតទឹកដីរបស់ខ្មែរ។ លោកតា ស៊ុច និងជនជាតិថៃដែលខ្មែរហៅថា «ជាខ្មែរលើ» រស់នៅជាប់ខេត្តរបស់ខ្មែរនាពេលបច្ចុប្បន្ន អាចនិយាយភាសាខ្មែរបានយ៉ាងច្បាស់។ ក្នុងពេលកម្ពុជា និងថៃ កើតវិវាទព្រំដែនជាមួយគ្នា លោកតា ស៊ុច បានចេញមានសង្ឃដីកាបញ្ជាក់ពីប្រភពកំណើតរបស់ខ្មែរ ក៏ដូចជាពលរដ្ឋថៃ រស់នៅតាមខេត្តសុរិន្ទ បុរីរ៉ាំ ស៊ីសាកេត ជាដើមនោះថា មានដើមកំណើតជាខ្មែរ។ការមានសង្ឃដីកាពីប្រវត្តិពិតទាំងអស់នេះ បានធ្វើឱ្យពលរដ្ឋថៃរស់នៅតាមខេត្តអតីតដែនដីរបស់កម្ពុជានោះកើតការខឹងគ្រោធ ហើយរើសអើងមិនឱ្យលោកតានិមន្តចូលប្រទេសវិញនោះឡើយ។ក្រោយមកសម្តេចធិបតី ហ៊ុន ម៉ាណែត បានប្រកាសទទួលសំណូមពររបស់លោកតា ដោយអនុញ្ញាតឱ្យលោកតាគង់នៅក្នុងប្រទេសកម្ពុជា។ លោក តា ស៊ុច បាននិមន្តពីប្រទេសកាណាដាត្រឡប់មកដល់កម្ពុជា កាលពីថ្ងៃទី២ ខែកក្កដា ឆ្នាំ២០២៥កន្លងទៅនេះ។ ក្នុងឱកាសនិមន្តមកដល់កម្ពុជា លោកតា បានបង្ហាញទឹកព្រះទ័យរីករាយ ទទួលបានការសណ្តោសពីសម្តេចមហាបវរធិបតី និងសម្តេចតេជោ ហ៊ុន សែន អនុញ្ញាតឱ្យលោកតាគង់នៅកម្ពុជា ដូចជាពលរដ្ឋខ្មែរដទៃ។ នៅព្រឹកនេះ ក្នុងឱកាសសម្តេចធិបតី ទទួលជួបលោកតា ស៊ុច សម្ដេចនាយករដ្ឋមន្រ្ដីបានស្វាគមន៍យ៉ាងកក់ក្តៅចំពោះវត្តមានលោកតានៅកម្ពុជា ហើយសម្ដេចសង្ឃឹមថាព្រះអង្គនឹងជួយដល់ប្រជាជនកម្ពុជាលើវិថីនៃការអប់រំតាមព្រះធម៌នៃមាគាព្រះពុទ្ធសាសនា៕

សម្តេច ម៉ែន សំអន៖ ប្រទេសជាតិមានសន្តិភាព ពលរដ្ឋមានជីវភាពធូរធា ធ្វើឲ្យការចូលរួមចំណែកកសាងសមិទ្ធផល នៅវត្តមានភាពឆាប់រហ័សជាងពេលមុន

សម្តេចកិត្តិសង្គហបណ្ឌត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញជាអធិបតីក្នុងពិធីក្រុងពាលីបុណ្យបញ្ចុះខណ្ឌសីមាព្រះវិហារថ្មី ស្ថិតក្នុងវត្តពោធិ៍ព្រឹក្សាខារាម (ហៅវត្តតូប) ដែលមានទីតាំងនៅភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ខេត្តកំពត នាព្រឹកថ្ងៃសុក្រ ៩កើត ខែអាសាឍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៤ ខែកក្កដា ឆ្នាំ២០២៥។ការកសាងព្រះវិហាថ្មីនេះ ក្រោមគំនិតផ្តួចផ្តើមរបស់សម្តេចព្រះវនរ័តកិត្តិបណ្ឌិត ណយ ច្រឹក, សម្តេចកិត្តិសង្គហបណ្ឌិត ម៉ែន សំអន, ឯកឧត្តមបណ្ឌិត ម៉ៅ ធនិន និងលោកជំទាវ, អ្នកឧកញ៉ា យី រដ្ឋា និងឯកឧត្តម ប៊ុន ដារ៉ា ព្រមទាំងក្រុមគ្រួសារ រួមជាមួយ អ្នកឧកញ៉ា លោកឧកញ៉ា ឧកញ៉ា លោក លោកស្រី ព្រមទាំងពុទ្ធបរិស័ទជិតឆ្ងាយ បានចូលរួមកសាងកុសលផលបុណ្យ ប្រកបដោយសទ្ធា ជ្រះថ្លាក្នុងព្រះពុទ្ធសាសនា ក្រោមការបង្កលក្ខណៈគ្រប់បែបយ៉ាងរបស់រាជរដ្ឋាភិបាលឱ្យប្រជាពលរដ្ឋមានឱកាសធ្វើបុណ្យតាមជំនឿរៀងៗខ្លួន។សមិទ្ធផលជាច្រើនបានកើនឡើងជាបន្តបន្ទាប់ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានធ្វើឲ្យមានការអភិវឌ្ឍលើគ្រប់វិស័យ និងធ្វើឲ្យប្រទេសជាតិមានសុខសន្តិភាពពេញលេញ។ថ្លែងក្នុងពិធីនោះផងដែរសម្តេចកិត្តិសង្គហបណ្ឌិត ក៏បានមានប្រសាសន៍ថា ការរីកចម្រើនរបស់ពុទ្ធចក្រ គឺមាការចូលរួមចំណែកយ៉ាងសំខាន់ពីកត្តាសុខសន្តិភាព ប្រជាពលរដ្ឋមានជីវភាពធូរធារ ដែលបានរួមគ្នា ប្រិតបត្តិបានយ៉ាងខ្ជាប់ខ្ជួននូវប្រពៃណីព្រះពុទ្ធសាសនា និងកសាងសមិទ្ធផលជាច្រើននៅតាមវត្តអារាមនៅទូទាំងប្រទេស។ ទាំងនេះវាខុសប្លែកកាលពីជាង ៤៦ឆ្នាំមុន ដែលប្រទេជាតិកំពុងជួបការលំបាក រងឥទ្ធិពល និងផលប៉ះពាល់នៃវិប្បត្តិសង្គ្រាម ដែលធ្វើឲ្យការកសាងសមិទ្ធផលនានានៅក្នុងវត្តត្រូវចំណាយពេលយូរអាចរហូតដល់ជាង១០ឆ្នាំក៏មាន។ ប៉ុន្តែ បច្ចុប្បន្ននេះ ការសាងសង់ព្រះវិហារដែលមានលក្ខណស្អាត ប្រណិត គឺចំណាយពេលតែជាងចន្លោះពី ១-២ឆ្នាំ ប៉ុណ្ណោះ។គួររំលឹកផងដែរ វត្តតូបនេះបានចាប់ផ្តើមកសាងតាំងពីឆ្នាំ១៩៥០ មានអាយុកាលជាង ៧៥ឆ្នាំហើយ និងបានកសាងមកជាបន្តបន្ទាប់រហូតដល់បច្ចុប្បន្ន។ ក្នុងនោះកាលពីថ្ងៃទី២២ ខែមេសា ឆ្នាំ២០២៥ សម្តេចកិត្តិសង្គហបណ្ឌិត ក៏បានអញ្ជើញជាអធិបតីក្នុងពិធីបច្ចុះបឋមសិលាសាងសង់ព្រះវិហារនេះ ។ ដោយឡែកនៅថ្ងៃទី០៥ ខែកក្កដា ឆ្នាំ២០២៥នេះ ក៏មានពិធីសម្ពោធសមិទ្ធផលនានានៅវត្តពោធិ៍ព្រឹក្សាខារាម (ហៅវត្តតូប) ក្រោមអធិបតីភាពរបស់ លោកជំទាវបណ្ឌិត ពេជ ចន្ទមុនី ហ៊ុន ម៉ាណែត តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាផងដែរ៕

សមាគមអ្នកផ្គត់ផ្គង់ត្រីនៅកម្ពុជា ជួបសំណេះសំណាលនិងនាំយកអំណោយជូនស្ត្រីមានផ្ទៃពោះ ជនពិការ និងកងកំលាំងប្រចាំការ នៅវត្តពោធិ៍៥០០០ដើម

សមាគមអ្នកផ្គត់ផ្គង់ត្រីនៅកម្ពុជាដឹកនាំដោយ លោកជំទាវ នាង សុណ្ណារី ជួបសំណេះសំណាល និងនាំយកអំណោយ ជូនដល់ស្ត្រីមានផ្ទៃពោះ ជនពិការ និងកងកំលាំងប្រចាំការនៅមណ្ឌលសុវត្ថិភាពវត្តពោធិ៍៥០០០ដើម។ ពិធីនេះប្រព្រឹត្តទៅក្រោមវត្តមាន ចូលរួម ពីសំណាក់ លោក សុខ សាន្តតារ៉ា អភិបាលរងខេត្ត ព្រះវិហារអជ្ញាធរស្រុក កងកំលាំងប្រដាប់អាវុធ និងបងប្អូនប្រជាពលរដ្ឋជាច្រើនរូប នៅក្នុងបរិវេណវត្តពោធិ៍៥០០០ដើម ស្ថិតនៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ នារសៀលថ្ងៃទី០៣ ខែកក្កដា ឆ្នាំ២០២៥។ សកម្មភាពនេះ បានបង្ហាញអោយឃើញអំពីមនោសញ្ចេតនា ដ៏ជ្រាលជ្រៅ និងការយកចិត្តទុកដាក់ខ្ពស់របស់សមាគមឯកជនជាមួយប្រជាពលរដ្ឋដែលកំពុងជួបការលំបាកក្នុងគ្រាមានអាសន្ន ពិសេសការគិតគូរចំពោះស្ត្រីមានផ្ទៃពោះ និង ជនពិការភាព ដែលជួបប្រទះនូវការលំបាក។ ហើយក៏បង្ហាញអោយឃើញពីការរួបរួមសាមគ្គីគ្នារបស់បងប្អូនប្រជាពលរដ្ឋខ្មែរ រួមសុខរួមទុក្ខជួយគ្នាទៅវិញទៅមកធ្វើឱ្យសង្គមយើងកាន់តែរឹងមាំ។ថ្លែងក្នុងឱកាសនោះ លោក សុខ សាន្តតារ៉ា បានថ្លែងអំណរគុណយ៉ាងជ្រាលជ្រៅចំពោះការចូលរួម បរិច្ចាគនូវ សម្ភារៈប្រើប្រាស់ និងគ្រឿងឧបភោគបរិភោគទាំងអស់នេះ របស់ សមាគមអ្នកផ្គត់ផ្គង់ត្រីនៅកម្ពុជា ក្នុងពេលដ៏សំខាន់នេះ។ ទាំងនេះបញ្ជាក់ឲ្យឃើញពី ការលះបង់ របស់ សមាជិកសមាជិកានៃសមាគម គ្រប់រូប ដើម្បីចូលរួម សម្រាលនូវទុក្ខលំបាករបស់បងប្អូនប្រជាពលរដ្ឋ ដែលបានជម្លៀសខ្លួនមកពីតំបន់ងាយរងហានិភ័យ ក៏ដូចជាការចូលរួម ដោះស្រាយនៅក្តីកង្វល់របស់ រដ្ឋបាលខេត្តព្រះវិហារ។លើសពីនេះបង្ហាញ អោយឃើញ អំពីសាមគ្គីភាព របស់បងប្អូនប្រជាពលរដ្ឋខ្មែរ គ្រប់ស្រទាប់វណ្ណៈ សមនឹងពាក្យថា ខ្មែរជួយខ្មែរ ជួយគ្នាក្នុងគ្រាលំបាក។សម្ភារៈនាំមកជូនរួមមាន៖ អង្រឹងមុង កង្ហា ត្រីងៀត ទឹកសុទ្ធ ឆៃប៉ូវ និងថវិកាមួយចំនួន៕

រដ្ឋបាលស្រុកសង្គមថ្មី នាំយកគ្រឿងឧបភោគបរិភោគ ជូនក្រុមការងារប្រចាំការ នៅមណ្ឌលសុវត្ថិភាពវត្តពោធិ៍៥០០០ដើម

នៅព្រឹកថ្ងៃទី០៣ ខែកក្កដា ឆ្នាំ២០២៥ លោក ស៊ាប កែវជីវ៉ា អភិបាលស្រុកសង្គមថ្មី បានដឹកនាំក្រុមការងារនាំយកអំណោយជាគ្រឿងឧបភោគបរិភោគជាច្រើនមុខ រួមមាន៖ សាច់ បន្លែបង្ការ មី ត្រីខ ទឹកបរិសុទ្ធ និងសម្ភារៈចាំបាច់ផ្សេងៗទៀត ទៅផ្តល់ជូនក្រុមការងារប្រចាំការនៅមណ្ឌលសុវត្ថិភាពវត្តពោធិ៍៥០០០ដើម ស្ថិតក្នុងភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ ដើម្បីចូលរួមគាំទ្រ និងលើទឹកចិត្តដល់ក្រុមការងារដែលកំពុងបំពេញតួនាទីភារកិច្ចយ៉ាងសកម្ម ដើម្បីការពារសុវត្ថិភាព និងសុខុមាលភាពរបស់ប្រជាពលរដ្ឋ។ ពិធីនេះប្រព្រឹត្តទៅក្រោមវត្តមាន លោក សុខ សាន្តតារ៉ា អភិបាលរងខេត្តព្រះវិហារ ព្រមទាំងមានការចូលរួមពីសំណាក់ លោក លោកស្រី ជាក្រុមការងារប្រចាំការ នៅវត្តពោធិ៥០០០ ដើម ជាច្រើនរូប។ក្នុងឱកាសនោះ លោក ស៊ាប កែវជីវ៉ា បានឲ្យដឹងថាសម្ភារៈ និងគ្រឿងឧបភោគបរិភោគនាំមកជូននាពេលនេះ រួមមាន៖ គោចំនួន 2ក្បាល ជ្រូកចំនួន 5ក្បាល ទឹកសុទ្ធចំនួន ១៣០យួរទឹកត្រី ៣៦យួរ អង្ករចំនួន 2000គីឡូ មី ៣៦កេះ ត្រីខ ៣០យួរ ទឹកស៊ីអ៊ីវចំនួន ២៧យួរ អំបិល ៥៩កញ្ចប់ប៊ីចេង ៧៦កញ្ជប់ ស្ករស ៦០កញ្ចប់ ល្ពៅ ៣តោន សម្ភារៈជាច្រើនមុខទៀត និងថវិការ ៤០ម៉ឺនរៀល។ លោកបន្តថា សម្ភារៈទាំងនេះបានមកពីការគាងគរពីសម្បុរសជន និងរដ្ឋបាលស្រុកសង្គមថ្មី ដើម្បីចូលរួមចំណែកសម្រួលដល់ក្រុមការងារ ប្រចាំការ ដែលបានចំណាយពេលវេលានិង កម្លាំងកាយចិត្ត ក្នុងរៀបចំសន្តិសុខសណ្តាប់ធ្នាប់ ជូនដល់បងប្អូនប្រជាពលរដ្ឋ ដែលបានជម្លៀសចេញពីតំបន់ងាយរងហានិភ័យ ក្នុងស្រុកជាំក្សាន្ត មកស្នាក់នៅបណ្ដោះអាសន្ននៅក្នុង តំបន់សុវត្ថិភាពវត្តពោធិ៥០០០ដើម។ថ្លែងក្នុងឱកាសនោះ លោក សុខ សាន្តតារ៉ា បានថ្លែងអំណរគុណយ៉ាងជ្រាលជ្រៅចំពោះការចូលរួម បរិច្ចាគនូវ គ្រឿងឧបភោគបរិភោគទាំងអស់នេះ របស់រដ្ឋបាលស្រុកសង្គមថ្មីក្នុងពេលដ៏សំខាន់នេះ។ ទាំងនេះបញ្ជាក់ឲ្យឃើញពី ការលះបង់របស់រដ្ឋបាលស្រុក ក៏ដូចជាបងប្អូនប្រជាពលរដ្ឋទាំងអស់ ក្នុងស្រុកសង្គមថ្មី ប្រកបដោយសាមគ្គីភាព សមនឹងពាក្យថា ខ្មែរជួយខ្មែរ ជួយគ្នាក្នុងគ្រាលំបាក៕

កម្ពុជាបង្ហាញពីជំហរភាពជាដៃគូនៃទំនាក់ទំនងជាមួយអាម៉េរិក ដោយបានកំពុងបន្តភាពរឹងមំា

មន្រ្តីជាន់ខ្ពស់រាជរដ្ឋាភិបាល បង្ហាញពីជំហររបស់កម្ពុជា ដោយកម្ពុជានៅតែជាដៃគូជាទីទុកចិត្តរបស់សហរដ្ឋអាម៉េរិក និងជឿជាក់ថា ចំណងមិត្តភាពរវាងប្រទេសទាំងពីរ នឹងបន្តរីកចម្រើនប្រកបដោយភាពរឹងមំា និងភាពជាដៃគូយូរអង្វែងទៅមុខ ជាពិសេសលើកិច្ចសហ- ប្រតិបត្តិការពាណិជ្ជកម្ម និងវិនិយោគ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងពិធីអបអរសាទរ ខួបលើកទី ២៤៩ នៃទិវាឯករាជ្យជាតិរបស់សហរដ្ឋអាម៉េរិក ៤ កក្កដា និងខួបលើកទី ៧៥ នៃចំណងទំនាក់ទំនងការទូតកម្ពុជា-អាម៉េរិក (១៩៥០-២០២៥) នៅថ្ងៃទី៣ ខែកក្កដា ឆ្នាំ២០២៥ នេះថា ឆ្នាំនេះគឺជាឆ្នាំដ៏សំខាន់ ដែលយើងរួមគ្នាអបអរខួបលើកទី៧៥ នៃចំណងទំនាក់ទំនងការទូតរវាងប្រទេសកម្ពុជា និងសហរដ្ឋអាម៉េរិក។ អស់រយៈពេលជាច្រើនទសវត្សរ៍កន្លងមកនេះ កម្ពុជា-អាមេរិក បានកសាងភាពជាដៃគូយ៉ាងរឹងមាំ និងកាន់តែស្អិតរមួត ដោយផ្អែកលើគោលការណ៍នៃការគោរពគ្នាទៅវិញទៅមក និងសហប្រតិបត្តិ- ការល្អ។ ទំនាក់ទំនងទ្វេភាគីនេះកំពុងបន្តរីកលូតលាស់ក៏ដូចជា ពង្រីកវិសាលភាពបន្ថែមលើបណ្តាវិស័យដូចជា៖ ពាណិជ្ជកម្ម និង វិនិយោគ កិច្ចសហប្រតិបត្តិការលើវិស័យការពារជាតិ វិស័យអប់រំ ការអភិរក្សវប្បធម៌ និងទំនាក់ទំនងរវាងប្រជាជននិងប្រជាជន។ឯកឧត្តមឧបនាយករដ្ឋមន្ត្រី សង្កត់ធ្ងន់ថា ក្នុងនាមរាជរដ្ឋាភិបាលនិងប្រជាជនកម្ពុជា បានសម្តែងនូវទឹកចិត្តអរគុណដ៏ស្មោះ ស្ម័គ្រ ចំពោះការគាំទ្រ និងចំណងមិត្តភាពដ៏យូរអង្វែងរបស់សហរដ្ឋអាម៉េរិក និងបានសម្តែងនូវការកោតសើរ ជូនចំពោះលោកស្រី ភារធារី ព្រមទាំងសហការីទាំងអស់នៅស្ថានទូតសហរដ្ឋអាម៉េរិក និងសហគមន៍ជនជាតិអាម៉េរិកនៅកម្ពុជា ចំពោះកិច្ចខិតខំប្រឹងប្រែង ដោយមិនគិតអំពីការនឿយហត់លើគ្រប់វិស័យ។ ឯកឧត្តមឧបនាយករដ្ឋមន្ត្រី បន្ថែមថា ការងាររបស់ពួកគាត់ គឺពិតជាមានសារៈសំខាន់ ក្នុងការពង្រឹងចំណងទាក់ទងរវាងប្រទេសទាំងពីរ ព្រមទាំងគាំទ្រដល់ការអភិវឌ្ឍ និងភាពរីកចម្រើនរបស់ប្រទេសកម្ពុជាផ្ទាល់ផងដែរ។សូមបញ្ជាក់ថា ក្នុងពិធីនេះ លោកស្រី Bridgette L. Walker ភារធារីរបស់ស្ថានទូតសហរដ្ឋអាម៉េរិកប្រចាំនៅកម្ពុជា បានជម្រាបជូនពី ទិវាឯករាជ្យរបស់សហរដ្ឋអាម៉េរិក គឺជាពេលវេលាមួយសម្រាប់ឆ្លុះបញ្ចាំងឱ្យឃើញថា តើសហរដ្ឋអាម៉េរិកបានចេញដំណើរមកពីទីណា ហើយកំពុងមានទិសដៅធ្វើដំណើរទៅកាន់ទីណា។ ទិវានេះគឺជាពេលមួយសម្រាប់ជនជាតិអាម៉េរិកជួបជុំគ្នាជាមួយក្រុមគ្រួសារ និងមិត្ត ភក្តិ ក្នុងស្មារតីនៃការដឹងគុណ ចំពោះអ្វីដែលបុព្វបុរសបានកសាងឡើង ហើយរួមគ្នាខិតខំប្រឹងប្រែងជាបន្តទៀត ដើម្បីទទួលបាននូវ សមិទ្ធផលថ្មីៗ ដែលជាការបង្ហាញឱ្យឃើញពីភាពជាអ្នកដឹកនាំ និងនវានុវត្តន៍របស់អាម៉េរិកផ្ទាល់។ ជាមួយគ្នានេះ លោកស្រីក៏បាន រំលេចអំពីខួបលើកទី៧៥ នៃទំនាក់ទំនងការទូតកម្ពុជា-អាម៉េរិក ដោយបានបញ្ជាក់ថា នេះគឺជាសក្ខីភាពជាក់ស្តែងនៃមិត្តភាពដ៏រឹងមាំ រវាងសហរដ្ឋអាម៉េរិកនិងប្រទេសកម្ពុជា និងបានបញ្ជាក់ជាថ្មី នូវការប្តេជ្ញាចិត្តរួម ក្នុងការបន្តកិច្ចសហប្រតិបត្តិការ ដើម្បីកសាងអនាគត មួយដែលមានភាពរុងរឿង សន្តិភាព និងការរីកចម្រើនរួមគ្នា៕អត្ថបទ៖ សុន រ៉ាឌី

ប្រតិបត្តិករផ្គត់ផ្គង់ទឹកស្អាតខេត្តក្នុងកំពង់ស្ពឺ កំពុងចូលរួមគាំទ្រដល់ការអភិវឌ្ឍរីកចម្រើននៅក្នុងខេត្ត

កំពង់ស្ពឺ៖ ប្រតិបត្តិករផ្គត់ផ្គង់ទឹកស្អាតឯកជននៅក្នុងខេត្តកំពង់ស្ពឺ បាននិងកំពុងផ្តល់សេវាផ្គត់ផ្គង់ទឹកស្អាតដល់ប្រជាជន ជាពិសេស ការផ្គត់ផ្គង់ដល់ក្រុមហ៊ុនអាជីវកម្ម រោងចក្រ សហគ្រាសមួយចំនួន ក្នុងតំបន់អាជ្ញាប័ណ្ណរបស់ខ្លួន ដែលជាការចូលរួមចំណែកគាំទ្រដល់ ការអភិវឌ្ឍរីកចម្រើននៅក្នុងខេត្ត។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងចុះទស្សនកិច្ចរោងចក្រទឹក ស្អាតរបស់ក្រុមហ៊ុន បុរីកម្មករ ក្នុងខេត្តកំពង់ស្ពឺ ដែលផ្គត់ផ្គង់ទឹកស្អាតដល់រោងចក្រ សហគ្រាស ឧស្សាហកម្ម និងតំបន់លំនៅដ្ឋាន ក្នុងតំបន់ប្រតិបត្តិការចំនួន ៣ នៃខេត្តកំពង់ស្ពឺ នៅថ្ងៃទី៣ ខែកក្កដា ឆ្នាំ២០២៥នេះ, ឯកឧត្តមរដ្ឋមន្ត្រី បានកោតសរសើរដល់ក្រុមហ៊ុន ទាំងនៅក្នុងការផ្តល់សេវាផ្គត់ផ្គង់ទឹកស្អាត និងការវិនិយោគផ្សេងៗទៀត រួមទាំងក្នុងវិស័យកាត់ដេរសម្លៀកបំពាក់ ការគ្រប់គ្រងសំរាម និងវិស័យបដិសណ្ឋារកិច្ចជាដើម។ ជុំវិញទឹកស្អាតនេះ, ឯកឧត្តមរដ្ឋមន្ត្រី បានណែនាំឱ្យក្រុមហ៊ុនបន្តកែលម្អប្រតិបត្តិការបន្ថែម ព្រោះទឹកស្អាតជាសេវាសង្គមចាំ បាច់ ដែលមានផលប៉ះពាល់ផ្ទាល់ដល់សុខភាពសាធារណៈ។ ដើម្បីជំរុញឱ្យកិច្ចដំណើរការអាជីវកម្មឱ្យកាន់តែប្រសើរ ក្រុមហ៊ុនត្រូវ សិក្សាស្វែងយល់បន្ថែមពីបច្ចេកវិទ្យាដែលកំពុងវិវត្តលឿន។ បញ្ហានេះឃើញថា ប្រតិបត្តិករនៅក្នុងប្រទេសមួយចំនួនបានប្រើ AI ដើម្បី បង្កើនប្រសិទ្ធភាពនៃការប្រើប្រាស់ គ្រប់គ្រងសម្ពាធទឹក និងចេញវិក្កយបត្រជាដើម។ ក្រៅពីនេះ ក្រុមហ៊ុនក៏ត្រូវបន្តធ្វើទំនើបកម្ម ប្រតិបត្តិការរបស់ខ្លួន និងស្វែងរកវិធីបង្កើនប្រសិទ្ធភាពបន្ថែមទៀត។លោក ផាវ ដារ័ត្ន ជាប្រតិបត្តិករផ្គត់ផ្គង់ទឹកស្អាតឯកជន តំណាងចំនួន៣ កំពុងផលិត និងផ្គត់ផ្គង់ទឹកស្អាត នៅខេត្តកំពុងស្ពឺ លើកឡើងថា ជុំវិញការធ្វើអាជីវកម្មលើវិស័យទឹកស្អាតនេះ ក្រុមហ៊ុនបានចាប់ផ្តើមតាំងពីឆ្នាំ១៩៩៧ បច្ចុប្បន្នមានបណ្តាញចែកចាយ ទឹកស្អាតជាង ២០០ គីឡូម៉ែត្រ ក្នុងនោះសម្ព័ន្ធក្រុមទាំង ៣ ជំរុញតបណ្តាញបានចំនួនប្រមាណជា ៣ ម៉ឺនខ្នងផ្ទះ ដោយបានគ្រប ដណ្តប់ជិត១០០% ជាពិសេសការផ្តល់សេវាទឹកស្អាតទៅដល់រោងចក្រសហគ្រាសនានា ដើម្បីបង្កភាពងាយស្រួលដល់ការធ្វើអាជីវកម្ម ចំណែកទាក់ទងការអភិវឌ្ឍ ក្រុមហ៊ុនកំពុងសិក្សានៅលើបច្ចេកវិទ្យាថ្មីៗបន្ថែម រួមទាំងការធ្វើទំនើបកម្មប្រព័ន្ធ ដោយប្រើបច្ចេកវិទ្យា SCADA និង GIS ដើម្បីបង្កើនប្រសិទ្ធិភាពប្រតិបត្តិការផងដែរ។ឯកឧត្តម ហែម វណ្ណឌី លើកឡើងបន្ថែមថា ជុំវិញវិស័យទឹកស្អាតនេះ, ក្រសួងបាននិងកំពុងអនុវត្តគំនិតផ្តួចផ្តើមមួយចំនួន ដើម្បីកែទម្រង់វិស័យទឹកស្អាត ដោយក្រសួងបានបង្កើតក្រុមការងារត្រួតពិនិត្យបច្ចេកទេស ដើម្បីចុះវាយតម្លៃសមត្ថភាពប្រតិបត្តិករ ផ្តល់សេវាផ្គត់ផ្គង់ទឹកស្អាតនៅទូទាំងប្រទេស ហើយថ្មីៗនេះ បានចេញសេចក្តីណែនាំ ឱ្យប្រតិបត្តិករផ្ញើរបាយការណ៍ប្រតិបត្តិការពេញ លេញ និងផែនការវិនិយោគរយៈពេលមធ្យមមកក្រសួង ក្នុងគោលដៅលើកកម្ពស់ការវិនិយោគឯកជន ប្រកបដោយការទទួលខុសត្រូវ និងជំរុញ វឌ្ឍនភាពឆ្ពោះទៅការសម្រេចគោលដៅអភិវឌ្ឍន៍ប្រកបដោយចីរភាពទី៦.១៕អត្ថបទ៖ សុន រ៉ាឌី

ក្រសួងអភិវឌ្ឍន៍ជនបទ បានបង្កើតបរិយាកាសជូនប្រជាពលរដ្ឋមូលដ្ឋានដោយមានផ្លូវល្អធ្វើដំណើរ

សៀមរាប៖ ក្រសួងអភិវឌ្ឍន៍ជនបទ បានកំពុងចូលរួមចំណែកគាំទ្រគោលនយោបាយរបស់រាជរដ្ឋាភិបាល ជំរុញបង្កើតហេដ្ឋរចនាសម្ព័ន្ធ ផ្លូវជនបទកាន់តែរឹងមាំ ដើម្បីបង្កបរិយាកាសដល់ជីវិតរស់នៅរបស់ប្រជាពលរដ្ឋ ប្រកបដោយបរិយាបន្ន ទាំងផ្នែកសេដ្ឋកិច្ចនិងសង្គម។ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើក ឡើងនៅក្នុងការចុះត្រួតពិនិត្យ វាយតម្លៃដំណាក់កាលទី១ លើការងារថែទាំជាប្រចាំផ្លូវក្រាលកៅស៊ូ DBST ចំនួន ១៥ ខ្សែ ប្រវែងសរុប ជិត ១៧២ គីឡូម៉ែត្រ និងស្លាកសញ្ញាចរាចរចំនួន ៥២២ ស្លាក ក្នុងស្រុកចំនួន ៧ ខេត្តសៀមរាប នៅថ្ងៃទី៣ ខែកក្កដា ឆ្នាំ២០២៥ នេះថា ជុំវិញហេដ្ឋាចរនាសម្ព័ន្ធផ្លូវនេះ ក្រសួងអភិវឌ្ឍន៍ជនបទបាននិងកំពុងជំរុញការងារសាងសង់ ស្តារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ផ្លូវក្រាលកៅស៊ូពីរជាន់ ឬបេតុង ដោយក្នុងនោះក្រសួងបាននិងកំពុងយកចិត្តទុកដាក់ខ្ពស់ លើការពង្រឹង សមត្ថភាពជំនាញ ក្នុងគោលដៅបង្កើនគុណភាព និងធានាចីរភាពផ្លូវជនបទ។ឯកឧត្តមរដ្ឋលេខាធិការ លើកឡើងបន្ថែមថា ទាក់ទិនហេដ្ឋារចនាសម្ព័ន្ធផ្លូវជនបទនេះ ឯកឧត្តម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ បានយកចិត្តទុកដាក់យ៉ាងខ្លាំង ដោយឯកឧត្តមរដ្ឋមន្រ្តីតែងតែអញ្ជើញចុះពិនិត្យជាប្រចាំ លើការងារស្ថាបនា ការស្តារ ការថែទាំ និងការកែលម្អហេដ្ឋារចនាសម្ព័ន្ធផ្លូវផ្សេងៗ ដើម្បីធ្វើយ៉ាងណាជំរុញការស្ថាបនាផ្លូវជនបទ ឱ្យឆ្លើយតបទៅនឹងតម្រូវ ការរបស់ប្រជាពលរដ្ឋ។ជុំវិញផ្លូវខាងលើនេះ, ឯកឧត្តម បានឯកភាព និងវាយតម្លៃខ្ពស់ ចំពោះការខិតខំប្រឹងប្រែងអនុវត្តទៅតាមផែនការ ព្រោះផ្លូវ មានសារៈសំខាន់ណាស់ សម្រាប់ការធ្វើដំណើររបស់ប្រជាពលរដ្ឋ មិនថាប្រជាពលរដ្ឋនៅមូលដ្ឋាន ឬប្រជាពលរដ្ឋធ្វើដំណើរឆ្លងកាត់ នោះឡើយ ដែលនេះជាការចូលរួមចំណែកបង្កភាពងាយស្រួល ការកាត់បន្ថយពេលវេលា និងចំណាយផ្សេងៗដល់សាធារណជន ជាពិសេសប្រជាជនមូលដ្ឋាន ជាក់ស្តែងការអភិវឌ្ឍន៍ហេដ្ឋារចនាសម្ព័ន្ធនៅតាមមូលដ្ឋាននេះ នៅក្នុងអាណត្តិនីមួយៗ រាជរដ្ឋាភិបាល បានវិនិយោគដោយចំណាយថវិកាយ៉ាងច្រើនសន្ធឹកសន្ធាប់ ដើម្បីលើកកម្ពស់ជីវភាពរស់នៅរបស់ប្រជាជនឱ្យកាន់តែប្រសើរ។ឯកឧត្តម សាន វិសាល បានសង្កត់ធ្ងន់ថា តាមរយៈការអភិវឌ្ឍន៍ផ្លូវនៅតាមជនបទនេះ, ក្រសួងអភិវឌ្ឍន៍ជនបទ ដែលជា សេនាធិការរាជរដ្ឋាភិបាល បានគិតគូរយកចិត្តទុកដាក់យ៉ាងខ្លាំង លើការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ដឹកជញ្ជូននៅ ជនបទ ជាក់ស្តែងមកដល់ពេលនេះ ក្រសួងបានស្ថាបនា ស្តារ និងការកែលម្អផ្លូវជនបទសរុបបានចំនួនជាង ៥ ម៉ឺនគីឡូម៉ែត្រ ក្នុងនោះ ផ្លូវក្រាលកៅស៊ូ ក៏បានស្ថាបនារាប់ពាន់គីឡូម៉ែត្រផងដែរ។ បច្ចុប្បន្ន, ជុំវិញផ្លូវកៅស៊ូនេះដែរ ក្រសួងអភិវឌ្ឍន៍ជនបទ បាននិងកំពុងប្រែ ក្លាយផ្លូវក្រាលក្រួសជាច្រើនខ្សែ ទៅជាផ្លូវក្រាលកៅស៊ូ ឬផ្លូវបេតុង សំដៅធានាបានការប្រើប្រាស់យូរអង្វែង ដើម្បីជំរុញដំណើរអន្តរកម្ម ផ្នែកសង្គម-សេដ្ឋកិច្ច និងការផ្សារភ្ជាប់សកម្មភាពធុរកិច្ចផ្សេងៗ រវាងតំបន់ជនបទនិងទីប្រជុំជន៕អត្ថបទ៖សុនរ៉ាឌី

បណ្ដាញសង្គម

ព័ត៌មានថ្មីៗ

ប្រមុខហិរញ្ញវត្ថុ G7 ស្វែងរកដំណោះស្រាយទប់ស្កាត់អតុល្យភាព ខណៈពាណិជ្ជកម្មធ្វើឱ្យខូចសាមគ្គីភាព

យានដ្រូនអ៊ុយក្រែនសម្លាប់មនុស្សបួននាក់នៅរុស្ស៊ី ខណៈក្រុងមូស្គូប្រឈមការវាយប្រហារធំបំផុតក្នុងរយៈពេលជាង១ឆ្នាំ

លីគកំពូលកម្ពុជាបញ្ចប់រដូវកាល ព្រះខ័នរាជស្វាយរៀងគ្រងជើងឯក ភ្នំពេញក្រោនជើងឯករង

អ៊ីរ៉ង់ បង្ហាញពី «ការត្រៀមខ្លួន ជាជាងការសម្របសម្រួល» ក្នុងពេលមានការគំរាមកំហែងរបស់អាមេរិក

អង្គការ WHO ប្រកាសពីការផ្ទុះឡើងជំងឺអេបូឡានៅកុងហ្គោ និងអ៊ុយហ្គង់ដា ជាគ្រាអាសន្ននៃការព្រួយបារម្ភអន្តរជាតិ

សេតវិមាន៖ ចិននឹងទិញផលិតផលកសិកម្មអាមេរិកយ៉ាងហោច១៧ពាន់លានដុល្លារជារៀងរាល់ឆ្នាំ ក្រោយជំនួបលោកTrump -Xi

លោក Trump ចេញការព្រមានធ្ងន់ៗដល់អ៊ីរ៉ង់ឱ្យទទួលយកកិច្ចព្រមព្រៀងសន្តិភាព

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877