BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

ក្រុមបាតុករក្រុងម៉ាឌ្រីដ ប្រទេសអេស្ប៉ាញ ប៉ះទង្គិចជាមួយនគរបាល ក្រោយការជាប់ឆ្នោតថ្មីរបស់នាយករដ្ឋមន្ត្រី

ក្រុមអ្នកតវ៉ានៅទីក្រុងម៉ាឌ្រីដ បានប៉ះទង្គិចជាមួយនគរបាលបង្រ្កាបកុបកម្មកាលពីថ្ងៃព្រហស្បតិ៍ ១៦ខែវិច្ឆិកា បន្ទាប់ពីគណបក្សសង្គមនិយមរបស់ប្រទេសអេស្ប៉ាញបានឈានដល់កិច្ចព្រមព្រៀងជាមួយគណបក្សចាន់ស៍(Junts) របស់ក្រុមផ្ដាច់ខ្លួនតំបន់កាតាឡាន់ សម្រាប់ការគាំទ្រពីរដ្ឋាភិបាលដែលរួមបញ្ចូលទាំងការលើកលែងទោសសម្រាប់អ្នកដែលពាក់ព័ន្ធនឹងការទាមទារឯករាជ្យពុំបានជោគជ័យកាលពីឆ្នាំ២០១៧ របស់គណបក្សតំបន់ផ្ដាច់ខ្លួនកាតាឡាន់(Catalonia) ។ សភារបស់ប្រទេសអេស្ប៉ាញបានបោះឆ្នោតជ្រើសរើសលោកផេដ្រូសាន់ឆេស (Pedro Sanchez) ជានាយករដ្ឋមន្ត្រីមួយអាណត្តិទៀតកាលពីថ្ងៃព្រហស្បតិ៍ ដោយបញ្ចប់ភាពជាប់គាំងអូសបន្លាយជាយូរ បន្ទាប់ពីការបោះឆ្នោតសកល ដែលពុំបានរកឃើញអ្នកឈ្នះដាច់កាលពីខែកក្កដាកន្លងទៅ។ គណបក្សពលករសង្គមនិយមអេស្ប៉ាញ (PSOE) របស់លោក Sanchez បានឈានដល់កិច្ចព្រមព្រៀងដាច់ដោយឡែកជាមួយគណបក្សក្នុងតំបន់មួយចំនួនដើម្បីទទួលបានការគាំទ្រពីបក្សទាំងនោះ ។នោះរាប់បញ្ចូលទាំងច្បាប់លើកលែងទោសដ៏ចម្រូងចម្រាសដែលបានចុះបញ្ជីនៅក្នុងសភាកាលពីថ្ងៃចន្ទ ទី១៣ វិច្ឆិកា ដែលបានធ្វើឱ្យប្រជាពលរដ្ឋអេស្ប៉ាញជាច្រើនខឹងសម្បា និងបង្កឱ្យមានការតវ៉ានៅទូទាំងប្រទេសរហូតឈានដល់ផ្ទុះជាអំពើហិង្សា៕

អ៊ីស្រាអែល ចេញបញ្ជាឲ្យពលរដ្ឋជម្លៀសក្នុងទីក្រុងតូចៗចំនួន៤នៅហ្កាហ្សា ខណៈមានក្ដីបារម្ភពីការសង្គ្រាមរីកធំ

អ៊ីស្រាអែលបានបញ្ជាឱ្យជនស៊ីវិលចាកចេញពីទីក្រុងតូចៗចំនួន៤នៅភាគខាងត្បូងនៃតំបន់ហ្កាហ្សាស្ទ្រីបកាលពីថ្ងៃព្រហស្បតិ៍ដោយបង្កើនក្ដីបារម្ភថាសង្រ្គាមរបស់ខ្លួនប្រឆាំងនឹងក្រុមហាម៉ាស អាចរីករាលដាលដល់តំបន់ដែលខ្លួនបានប្រាប់ប្រជាជនថាមានសុវត្ថិភាព។ នៅភាគខាងជើងតំបន់រងការឡោមទ័ពប៉ាឡេស្ទីន គ្រប់គ្រងដោយក្រុមហាម៉ាស អ៊ីស្រាអែលបាននិយាយថា កងកម្លាំងរបស់ខ្លួននៅតែមានវត្តមាននៅមន្ទីរពេទ្យដ៏ធំបំផុត Al Shifa របស់តំបន់ហ្កាហ្សា ប៉ុន្តែពុំបានផ្តល់ព័ត៌មានលម្អិតបន្ថែមអំពីប្រតិបត្តិការរបស់ពួកគេចាប់តាំងពីមួយថ្ងៃមុន នៅពេលពួកគេបានចូលទៅក្នុងកន្លែងដែលបានបញ្ចប់ការឡោមព័ទ្ធអស់រយៈពេលជាច្រើនថ្ងៃ។ សារព័ត៌មាន Reuters មិនអាចផ្ទៀងផ្ទាត់ស្ថានភាពនៅមន្ទីរពេទ្យ Shifa បានទេ កាលីព្រឹកថ្ងៃព្រហស្បតិ៍ ដោយបានបាត់ទំនាក់ទំនងជាមួយក្រុមគ្រូពេទ្យនៅខាងក្នុងនោះតាំងពីថ្ងៃពុធមក។ខិត្តប័ណ្ណជាច្រើនបានត្រូវបានជម្លាក់ពេញមួយយប់ពីយន្តហោះ បានប្រាប់ជនស៊ីវិលឱ្យចាកចេញពីទីក្រុងបានីស៊ូហៃឡា(Bani Shuhaila) ទីក្រុង គូហ្សា (Khuzaa) ទីក្រុង អាបាសាន ( Abassan) និងទីក្រុងការ៉ារ៉ា (Qarara )នៅជាយខាងកើតនៃទីក្រុងខាន់យូនីស(Khan Younis) ដែលជាទីក្រុងភាគខាងត្បូងដ៏សំខាន់។ ទីប្រជុំជននានាដែលជាកន្លែងប្រមូលផ្តុំមនុស្សជាង១០០.០០០នាក់ នៅក្នុងពេលពុំទាន់កើតសង្រ្គាម ឥឡូវនេះកំពុងផ្តល់ជម្រកដល់មនុស្សរាប់ម៉ឺននាក់ទៀតដែលបានភៀសខ្លួនចេញពីតំបន់ផ្សេងៗ។អ៊ីស្រាអែលបានបញ្ជាឲ្យជម្លៀសតំបន់ភាគខាងជើងទាំងមូលនៃតំបន់ហ្កាហ្សារួចហើយ មុនបញ្ជូនកងកម្លាំងជើងគោករបស់ខ្លួនចូលទៅកាលពីចុងខែតុលា។ហ្វូងមនុស្សជម្លៀសខ្លួន វេចស្ពាយទ្រព្យសម្បត្តិមួយចំនួនបានធ្វើដំណើរទៅភាគខាងត្បូងជារៀងរាល់ថ្ងៃ ក្រោមក្រសែភ្នែករបស់ទាហានអ៊ីស្រាអែលក្នុងអំឡុងពេលផ្អាកការប្រយុទ្ធ រយៈពេល៦ម៉ោងដើម្បីអនុញ្ញាតឱ្យប្រជាពលរដ្ឋចាកចេញ៕

បារាំង៖ អនាគតរបស់ហ្កាហ្សា មិនអាស្រ័យលើអ៊ីស្រាអែល ជាអ្នកសម្រេចទេ

ប្រទេសបារាំង បានព្រមានកាលពីថ្ងៃព្រហស្បតិ៍ថា អនាគតរបស់តំបន់ហ្កាហ្សា មិនអាស្រ័យលើអ៊ីស្រាអែល ជាអ្នកសម្រេចទេ ខណៈដែលខ្លួនបានជំរុញឲ្យរដ្ឋាភិបាលអ៊ីស្រាអែលទប់ទល់នឹងអំពើហិង្សាតាំងទីលំនៅ នៅតំបន់វេសបែង។អ្នកស្រី Anne-Claire Legendre អ្នកនាំពាក្យក្រសួងការបរទេសបារាំង បាននិយាយថា អាជ្ញាធរប៉ាឡេស្ទីន គួរតែសម្រេចចិត្តពីរបៀបដែលតំបន់ហ្កាហ្សាគួរតែដំណើរការជាផ្នែកនៃរដ្ឋនាពេលអនាគតបែបណា ទោះបីជាមានជំហរទន់ខ្សោយក៏ដោយ។ អ្នកស្រី បានថ្លែងប្រាប់អ្នកយកព័ត៌មាន នៅទីក្រុងប៉ារីសថា៖ «ទាក់ទងនឹងតំបន់ហ្គាហ្សា វាមិនអាស្រ័យលើអ៊ីស្រាអែលក្នុងការសម្រេចចិត្តលើលក្ខខណ្ឌនៃអភិបាលកិច្ចនៃតំបន់ហ្កាហ្សាស្ទ្រីបនាពេលអនាគតនោះទេ។ តំបន់ហ្កាហ្សាស្ទ្រីប ត្រូវបានកំណត់ថាជាផ្នែកនៃរដ្ឋប៉ាឡេស្ទីននាពេលអនាគត ហើយអាជ្ញាធរប៉ាឡេស្ទីន មានគោលដៅអនុវត្តសិទ្ធិអំណាចរបស់ខ្លួននៅទីនោះ»។ ការអំពាវនាវនេះ បានកើតឡើងនៅពេលដែលលោក Isaac Herzog ប្រធានាធិបតីអ៊ីស្រាអែល បាននិយាយថា ប្រទេសរបស់លោក មិនអាចចាកចេញពីកន្លែងទំនេរនៅក្នុងតំបន់ហ្កាហ្សា ហើយនឹងត្រូវរក្សា «កម្លាំងដ៏ខ្លាំង» នៅក្នុងទឹកដីឆ្នេរសមុទ្រសម្រាប់ពេលអនាគតដ៏ខ្លី ដើម្បីទប់ស្កាត់ក្រុមហាម៉ាសមិនឲ្យងើបឡើងវិញ។នៅក្នុងបទសម្ភាសន៍ជាមួយសារព័ត៌មា Financial Times លោក Herzog បាននិយាយថា បញ្ហានេះ គឺជាបញ្ហានៃការពិភាក្សា នៅក្នុងរដ្ឋាភិបាលអ៊ីស្រាអែល ហើយលោកបានសន្មត់ថា សហរដ្ឋអាមេរិក និង «អ្នកជិតខាងរបស់យើង នៅក្នុងតំបន់» នឹងមានការពាក់ព័ន្ធមួយចំនួននៅក្នុងការរៀបចំសណ្តាប់ធ្នាប់ ក្រោយ ជម្លោះ។

អ៊ីស្រាអែលទម្លាក់ខិត្តប័ណ្ណនៅផ្នែកនានានៃតំបន់ហ្កាហ្សាភាគខាងត្បូង ដោយស្នើមានការពង្រីកការវាយលុកប្រឆាំងហាម៉ាស

អ៊ីស្រាអែល បានទម្លាក់ខិត្តប័ណ្ណនៅទូទាំងផ្នែកនៃតំបន់ហ្កាហ្សាភាគខាងត្បូង ដោយអំពាវនាវឲ្យជនស៊ីវិលជម្លៀសចេញ ហើយ «ឆ្ពោះទៅរកជម្រកដែលគេស្គាល់» ដែលបង្ហាញថា អ៊ីស្រាអែលអាចពង្រីកប្រតិបត្តិការថ្នើរជើងរបស់ខ្លួន ក្នុងពេលឆាប់ៗនេះ ប្រឆាំងនឹងក្រុមហាម៉ាស នៅភាគខាងត្បូងនៃតំបន់នោះ។ខិត្តប័ណ្ណ ត្រូវបានទម្លាក់កាលពីថ្ងៃពុធ នៅលើសហគមន៍ចំនួន៤នៅភាគខាងកើតនៃទីក្រុងKhan Younis ដែលជាទីក្រុងធំបំផុត នៅហ្កាហ្សាភាគខាងត្បូង ដោយព្រមានប្រជាជនដែលរស់នៅទីនោះឲ្យ«ជម្លៀសលំនៅដ្ឋានរបស់ពួកគេ ជាបន្ទាន់» ។សហគមន៍ Al Qarrah, Khuza'a, Bani Suhaila, និង Absaan នៅជិតរបងបរិវេណដែលបំបែកតំបន់ ហ្កាហ្សាស្រ្ទីប ពីអ៊ីស្រាអែល ដោយស្នើឲ្យមានការលុកលុយថ្មីដែលអាចកើតឡើងដោយកងកម្លាំងការពារអ៊ីស្រាអែល (IDF) ដែលកំពុងស្វែងរកការគ្រប់គ្រងភាគខាង ត្បូង។នឹងគ្រោះថ្នាក់។ គ្រប់ផ្ទះដែលប្រើដោយអង្គការភេរវកម្ម នឹងត្រូវបានកំណត់គោលដៅ។ ការគោរពតាមការណែនាំរបស់កងកម្លាំងការពារអ៊ីស្រាអែល នឹងរារាំងអ្នក ដែលជាជនស៊ីវិល ឲ្យរួចផុតពីគ្រោះថ្នាក់»។នាយកក្រុមប្រឹក្សាជនភៀសខ្លួនន័រវែសដែលមានបុគ្គលិកនៅហ្កាហ្សា បានស្នើកាលពីថ្ងៃពុធ នៅក្នុងការបង្ហោះប្រព័ន្ធផ្សព្វផ្សាយសង្គមថា សមាជិកនៃក្រុមក្នុងស្រុករបស់ខ្លួន បានឃើញខិត្តប័ណ្ណនោះ។ សារព័ត៌មានរ៉យទ័រ ក៏បាននិយាយផងដែរថា ខ្លួនបាននិយាយទៅកាន់ប្រជាជន ដែលបានឃើញវានោះ។

កងទ័ពមីយ៉ាន់ម៉ា កាន់តែច្រើនរត់គេចពីការវាយប្រហាររបស់ក្រុមឧទ្ទាម ចូលទៅក្នុងប្រទេសឥណ្ឌា

មន្តី្រឥណ្ឌាម្នាក់ និយាយថា ទាហានយ៉ាងហោចណាស់ចំនួន២៩នាក់បន្ថែមទៀត បានឆ្លងចូលក្នុងប្រទេសឥណ្ឌាកាលពីថ្ងៃព្រហស្បតិ៍ រត់គេចពីក្រុមឧទ្ទាមបះបោរដែលបានវាយប្រហារលើមូលដ្ឋានយោធារបស់ពួកគេ នៅជិតព្រំដែនប្រទេសឥណ្ឌា ខណៈក្រុមឧទ្ទាម បង្កើនការវាយប្រហារប្រឆាំងរបបសឹកមួយនេះ។កាលពីដើមសប្តាហ៍នេះ ទាហានមីយ៉ាន់ម៉ាចំនួន ៤៣ នាក់បានចូលទៅក្នុងរដ្ឋមីហ្សូរាំ(Mizoram)របស់ប្រទេសឥណ្ឌា បន្ទាប់ពីមូលដ្ឋានយោធាមួយចំនួនរបស់ពួកគេ ត្រូវបានកាន់កាប់ដោយក្រុមឧទ្ទាម។ មនុស្សជិត ៤០ នាក់ត្រូវបានអាជ្ញាធរឥណ្ឌាបញ្ជូនត្រឡប់ទៅវិញតាមច្រកព្រំដែនផ្សេងគ្នា ដែលមានចម្ងាយពីរ-បីរយ គីឡូម៉ែត្រភាគខាងកើត។យោធាមីយ៉ាន់ម៉ា បានប្រយុទ្ធជាមួយជនជាតិភាគតិច និងការបះបោរផ្សេងទៀតជាច្រើនទសវត្សរ៍មកហើយ ប៉ុន្តែរដ្ឋប្រហារឆ្នាំ ២០២១ បាននាំមកនូវការសម្របសម្រួលមិនធ្លាប់មាន រវាងកងកម្លាំងប្រឆាំងយោធា ដែលកំពុងប្រឈមមុខដ៏ធំបំផុតសម្រាប់កងទ័ពក្នុងរយៈពេលជាច្រើនឆ្នាំមកនេះ។លោក ទិន មួងស្វេ (Tin Maung Swe) លេខាធិការនៃក្រុមប្រឹក្សារដ្ឋបាលក្នុងរដ្ឋធានី ណៃពិដោ( Naypyitaw)បាននិយាយកាលពីថ្ងៃព្រហស្បតិ៍ថា មេដឹកនាំយោធារបស់ប្រទេសនេះ បានបញ្ជាឱ្យបុគ្គលិករដ្ឋាភិបាលទាំងអស់ និងអ្នកដែលមានបទពិសោធន៍យោធា ត្រៀមខ្លួនដើម្បីបម្រើទ័ពក្នុងករណីមានគ្រោះអាសន្ន បន្ទាប់ពីរបបសឹក បានរងការវាយប្រហារដ៏ធ្ងន់ធ្ងរពីក្រុមឧទ្ទាមនៅតាមតំបន់មួយចំនួន។គួររម្លឹកថាសហភាពមីយ៉ាន់ម៉ាបានធ្លាក់ចូលក្នុងភាពចលាចលចាប់តាំងពីរដ្ឋប្រហារឆ្នាំ ២០២១មក នៅពេលដែលយោធាបានទម្លាក់រដ្ឋាភិបាលដឹកនាំដោយលោកស្រី Aung San Suu Kyi ម្ចាស់ជ័យលាភីរង្វាន់ណូបែល ដោយបានបញ្ចប់កំណែទម្រង់លទ្ធិប្រជាធិបតេយ្យដ៏ក្មេងខ្ចីរយៈពេលមួយទសវត្សរ៍៕

មន្ត្រី WHO៖ ជម្រើសសម្រាប់ការជម្លៀសនៅមន្ទីរពេទ្យ អាល់ស៊ីហ្វា របស់តំបន់ហ្កាហ្សាមានកំណត់

អង្គការសហប្រជាជាតិ កំពុងស្វែងរកមធ្យោបាយដើម្បីជម្លៀសអ្នកជំងឺនៅមន្ទីរពេទ្យ អាល់ស៊ីហ្វា (Al Shifa) នៅក្នុងតំបន់ហ្កាហ្សា ប៉ុន្តែជម្រើសត្រូវបានកំណត់ដោយឧបសគ្គផ្នែកសន្តិសុខ និងផ្នែកដឹកជញ្ជូន នេះបើតាមមន្ត្រីជាន់ខ្ពស់មួយរូបរបស់អង្គការសុខភាពពិភពលោក បាននិយាយកាលពីថ្ងៃព្រហស្បតិ៍ (១៦ វិច្ឆិកា)។ឧបសគ្គទីមួយនោះគឺថាទីភ្នាក់ងារអឌ្ឍចន្ទក្រហមប៉ាឡេស្ទីន ខ្វះប្រេងឥន្ធនៈគ្រប់គ្រាន់សម្រាប់រថយន្តគិលានសង្គ្រោះរបស់ខ្លួននៅក្នុងតំបន់ហ្កាហ្សា ដើម្បីជម្លៀសអ្នកជំងឺ នេះបើយោងតាមនាយកផ្នែកសង្គ្រោះបន្ទាន់ប្រចាំតំបន់របស់អង្គការ WHO លោក Rick Brennan បានប្រាប់សារព័ត៌មានរ៉យទ័រ។ អ្នកនាំពាក្យគណៈកម្មាធិការអន្តរជាតិនៃកាកបាទក្រហម នៅទីក្រុងហ្សេរុយសាឡឹម ក៏បាននិយាយថាមិនមានរថយន្តគិលានសង្គ្រោះគ្រប់គ្រាន់ដែរ។លោក Brennan បាននិយាយនៅក្នុងបទសម្ភាសន៍មួយពីទីក្រុង គែរ ថា ប្រទេសអេហ្ស៊ីប បើកចំហក្នុងការបញ្ជូនរថយន្តគិលានសង្គ្រោះរបស់ខ្លួនឆ្លងចូលទៅក្នុងតំបន់ហ្កាហ្សា ដើម្បីជួយជម្លៀសប្រជាជន ដរាបណាការធានាសុវត្ថិភាព និងការឆ្លងកាត់ប្រកបដោយសុវត្ថិភាពអាចត្រូវបានផ្តល់ជូន។ លោក Brennan បាននិយាយថា អង្គការ WHO បាននិយាយថានៅតែមានអ្នកជំងឺប្រហែល ៦០០នាក់ រួមទាំងមនុស្ស ២៧នាក់ ស្ថិតក្នុងស្ថានភាពធ្ងន់ធ្ងរនៅមន្ទីរពេទ្យ ស៊ីហ្វា ដែលកងកម្លាំងអ៊ីស្រាអែល បានចូលវាយឆ្មក់ក្នុងសប្តាហ៍នេះ បន្ទាប់ពីការឡោមព័ទ្ធអស់រយៈពេលជាច្រើនថ្ងៃ។លោកបន្ថែមថា អ្នកដែលផ្តល់អាទិភាពក្នុងការជម្លៀសនឹងរួមមានអ្នកជំងឺធ្ងន់ធ្ងរ និងទារកទើបនឹងកើតចំនួន ៣៦នាក់ ដែលបាត់បង់ការប្រើប្រាស់ឧបករណ៍កម្ដៅខ្លួន ដោយសារខ្វះប្រេងឥន្ធនៈដើម្បីបង្កើតថាមពល៕

ប្រធានមន្ទីរពេទ្យអាល់ស៊ីហ្វានៅតំបន់ហ្កាហ្សានិយាយថា មន្ទីរពេទ្យអស់ទឹក ឬអ៊ុកស៊ីសែនហើយ

ប្រធានមន្ទីរពេទ្យដ៏ធំនៅតំបន់ហ្កាហ្សាស្ទ្រីប ដែលត្រូវបានទាហានអ៊ីស្រាអែលវាយឆ្មក់និយាយថា ពេលនេះកន្លែងនេះអស់អុកស៊ីសែន និងទឹកហើយ ហើយអ្នកជំងឺ កំពុងស្រែកដង្ហោយរកទឹក។លោក មហាម៉ាដ អាប៊ូ សាល់មីយ៉ា (Muhammad Abu Salmiya) បាននិយាយថាស្ថានភាពទាំងនេះ គឺ ជាសោកនាដកម្ម នៅក្នុងមន្ទីរពេទ្យ អាល់ ស៊ីហ្វា (Al-Shifa) ដែលមានអ្នកជំងឺជាង ៦៥០ នាក់ បុគ្គលិកពេទ្យ ៥០០ នាក់និងមនុស្សដែលបានផ្លាស់ទីលំនៅចំនួន ៥.០០០ នាក់។ លោកបាននិយាយថា រថក្រោះអ៊ីស្រាអែលបានឡោមព័ទ្ធជុំវិញមន្ទីរពេទ្យក្នុងទីក្រុង ហ្កាហ្សា ដោយយន្តយានដ្រូនបានបន្លឺសំឡេងពីលើ ហើយទាហានអ៊ីស្រាអែលនៅតែធ្វើសកម្មភាពជុំវិញខាងក្នុងមន្ទីរពេទ្យនេះ ខណៈសកម្មភាពតាមប្រម៉ាញ់ក្រុមហាម៉ាសរបស់ពួកគេបានអូសបន្លាយចូលដល់ថ្ងៃពីរ។កងទ័ពអ៊ីស្រាអែលបាននិយាយថា ប្រតិបត្តិការរបស់ខ្លួនប្រឆាំងនឹងក្រុមហាម៉ាស កំពុងដំណើរការក្នុង វិធីសាស្ត្រច្បាស់លាស់ និងហ្មត់ចត់។ ទោះបីជាយ៉ាងណាក៏ដោយ អ្នកកាសែតម្នាក់ដែលជាប់នៅក្នុងមន្ទីរពេទ្យ លោក Khader បានប្រាប់អ្នកសារព័ត៌មានរបស់ទូរទស្សន៍ BBC លោក រ៉ាសឌី អាប៊ូ អាឡូហ្វ(Rushdi Abu Alouf)តាមទូរស័ព្ទថា ទាហានអ៊ីស្រាអែល នៅគ្រប់ទីកន្លែង បាញ់គ្រប់ទិសដៅ ។យ៉ាងណា ទូរទស្សន៍ BBC មិនអាចផ្ទៀងផ្ទាត់ដោយឯករាជ្យនូវរបាយការណ៍ណាមួយឡើយ។ចាប់តាំងពីកងកម្លាំងការពារអ៊ីស្រាអែល (IDF) បានបើកការវាយឆ្មក់ ទៅលើមន្ទីរពេទ្យ Al-Shifa កាលពីព្រឹកថ្ងៃពុធមក ពួកគេបានបញ្ចេញរូបថត និងវីដេអូជាច្រើន នៃអ្វីដែលពួកគេនិយាយថាជាអាវុធ និងឧបករណ៍របស់ក្រុមហាម៉ាស។ កាលពីថ្ងៃព្រហស្បតិ៍ ពួកគេបាននិយាយថាពួកគេបានរកឃើញ ផ្លូវរូងក្រោមដីប្រតិបត្តិការមួយ និងយានជំនិះដែលមានអាវុធមួយចំនួនធំ៕

ករណីផ្ទុះអាវុធលើភ្នំគិរីរម្យតុលាការចោទប្រកាន់មនុស្ស៥នាក់និងបក្ខពួកដែលគេចខ្លួន

កំពង់ស្ពឺ ៖ ករណីបាញ់បោះសេរីជាង ២០០គ្រាប់លើភ្នំគិរីរម្យ តុលាការសម្រេចចោទប្រកាន់មនុស្សចំនួន៥នាក់ និងបក្សពួកមួយចំនួនទៀតដែលកំពុងគេចខ្លួន។បន្ទាប់ពីមនុស្ស៤នាក់បានចូលខ្លួនសារភាព ករណីបាញ់បោះសេរីជាង ២០០គ្រាប់លើភ្នំគិរីរម្យ នៅថ្ងៃទី១៦ ខែវិច្ឆិកា ឆ្នាំ២០២៣នេះ ស្ថាប័នតុលាការបានសម្រេចចោទប្រកាន់មនុស្ស៥នាក់ និងបក្សពួកមួយចំនួន ប៉ុន្តែជនបង្កសំខាន់ក្នុងរឿងនេះកំពុងគេចខ្លួន។អ្នកនាំពាក្យតំណាងអយ្យការអមសាលាដំបូងខេត្តកំពង់ស្ពឺបានឲ្យដឹងថា ករណីនេះដឹកនាំដោយឯកឧត្តម ព្រះរាជអាជ្ញា ស៊ិន វិរៈ បានចុះផ្ទាល់ដល់កន្លែងកើតហេតុ ជាមួយកម្លាំងស្នងការដ្ឋាននគរបាលខេត្តកំពង់ស្ពឺ កម្លាំងកងរាជអាវុធហត្ថខេត្តកំពង់ស្ពឺ និងមន្ត្រីពាក់ព័ន្ធមូលដ្ឋាន បានចុះស្រាវជ្រាវពិនិត្យរកឃើញថា ទីតាំងខាងលើជារបស់ឈ្មោះ កង តារាវិតា ភេទស្រី អាយុ២៨ឆ្នាំ ហើយនៅថ្ងៃកើតហេតុខាងលើមានឈ្មោះ កង តារាវិឆៃ ដែលត្រូវជាបងប្រុសរបស់ កង តារាវិតា បាននាំមិត្តភក្ររបស់ខ្លួនមកធ្វើខួបកំណើត ដុតផាវ បាញ់កាំជ្រួច និងផ្ទុះអាវុធជាច្រើនគ្រាប់។ កន្លែងកើតហេតុ បានបន្សល់នូវវត្ថុតាងជាសំបកគ្រាប់ បាញ់រួច មានចំនួន២០៣គ្រាប់ ដូចជាសំបកគ្រាប់កាំភ្លើងខ្លីចំនួន ១១២សំបក, សំបកគ្រាប់កាំភ្លើង ប្រភេទ M16 ចំនួន៣៦សំបក និងសំបកគ្រាប់កាំភ្លើងប្រភេទ AK47 ចំនួន៥៥សំបក និងស្រោមកាំភ្លើងខ្លីមួយ ព្រមទាំង បានធ្វើកំណត់ហេតុបិទទីតាំងខាងលើ ជាបណ្តោះអាសន្ន។ អ្នកនាំពាក្យតំណាងអយ្យការអមសាលាដំបូងខេត្តកំពង់ស្ពឺបន្ថែមថា អំឡុងពេលនៃការស្រាវជ្រាវស៊ើបអង្កេតខាងលើ ជនសង្ស័យចំនួន ០៤រូបមាន ១-ឈ្មោះ ស៊ឹម សុវណ្ណារិទ្ធ ភេទប្រុស អាយុ៣៧ឆ្នាំ ២-ឈ្មោះ ប៊ិន ភារម្យ ភេទប្រុស អាយុ៤០ឆ្នាំ ៣-ឈ្មោះ ប៊ិន ភាលុច ភេទប្រុស អាយុ៣៤ឆ្នាំ និង ៤-ឈ្មោះ ឈិត លីហៀង ភេទប្រុស អាយុ៣២ឆ្នាំ បានចូលមកសារភាពនៅស្នងការដ្ឋាននគរបាលខេត្តកំពង់ស្ពឺ ចំណែកឈ្មោះ កង តារាវិឆៃ ភេទប្រុស អាយុ៣២ឆ្នាំ និងបក្ខពួកកំពុងគេចខ្លួន ។អ្នកនាំពាក្យតំណាងអយ្យការអមសាលាដំបូងខេត្តកំពង់ស្ពឺបញ្ជាក់ថា នគរបាលយុត្តិធម៌ ទាំងស្នងការដ្ឋាន និងកងរាជអាវុធហត្ថ រួមជាមួយអយ្យការអមសាលាដំបូងខេត្តកំពង់ស្ពឺ ខិតខំ ប្រឹងប្រែងស្រាវជ្រាវដោយយកចិត្តទុកដាក់កសាងសំណុំរឿងបញ្ចូនជនពាក់ព័ន្ធខាងលើទៅអយ្យការអមសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់។ ដោយមានមូលដ្ឋានគ្រប់គ្រាន់ តំណាងអយ្យការអមសាលាដំបូងខេត្តកំពង់ស្ពឺ បានសម្រេចចោទប្រកាន់ទៅលើជនសង្ស័យ៥នាក់មាន១-ឈ្មោះ ស៊ឹម សុវណ្ណារិទ្ធ ២-ឈ្មោះ ប៊ិន ភារម្យ ៣-ឈ្មោះ ប៊ិន ភាលុច និង ៤-ឈ្មោះ ឈិត លីហៀង ៥-ឈ្មោះ កង តារាវិឆៃ ព្រមទាំងបក្ខពួក ពីបទ ប្រើប្រាស់អាវុធគ្រឿងផ្ទុះ និងគ្រាប់រំសេវ ដោយគ្មានការអនុញ្ញាត តាមបញ្ញត្តិមាត្រា ២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ និងបានបញ្ចូនទៅចៅក្រមស៊ើបសួរបន្តនីតិវិធីច្បាប់៕អត្ថបទ ៖ ប្រាក់ វ៉ាន់ដា

រថយន្តមួយគ្រឿងបើកបុករបាំងការពារក្បែរស្ថានទូតអ៊ីស្រាអែល នៅជប៉ុន ហើយបុរសម្នាក់ត្រូវចាប់ខ្លួន

ប្រព័ន្ធផ្សព្វផ្សាយក្នុងស្រុកបានរាយការណ៍ថា រថយន្តមួយគ្រឿងបានបើកបុករបាំងការពារនៅជិតច្រកចូលស្ថានទូតអ៊ីស្រាអែល ក្នុងទីក្រុងតូក្យូ ប្រទេសជប៉ុន នៅថ្ងៃព្រហស្បតិ៍ (១៦ វិច្ឆិកា) នេះ ហើយបុរសម្នាក់ វ័យ ៥០ឆ្នាំត្រូវបានឃាត់ខ្លួននៅនឹងកន្លែង។ ទូរទស្សន៍ Fuji TV បាននិយាយថា នគរបាលម្នាក់បានរងរបួស។ មន្ត្រីម្នាក់នៅស្ថានទូតអ៊ីស្រាអែលបាននិយាយថា បញ្ហានេះកំពុងស្ថិតនៅក្រោមការស៊ើបអង្កេតរបស់នគរបាល ហើយបានបដិសេធមិនធ្វើអត្ថាធិប្បាយបន្ថែមទៀតទេ។យោងតាមសាក្សីនៅកន្លែងកើតហេតុ បាននិយាយថា ក្រុមមន្រ្តីនគរបាលបានបិទតំបន់ជុំវិញកន្លែងកើតហេតុនោះ ដែលរថយន្តពណ៌ខ្មៅមួយគ្រឿងរងការខូចខាតយ៉ាងធ្ងន់ធ្ងរ ខណៈដងផ្លូវពោរពេញដោយកំទេចកំទី។បាតុកម្មគាំទ្រប៉ាឡេស្ទីនជាច្រើនបានធ្វើឡើងនៅខាងក្រៅស្ថានទូតអ៊ីស្រាអែល ជុំវិញពិភពលោកក្នុងប៉ុន្មានសប្តាហ៍ថ្មីៗនេះ រួមទាំងនៅទីក្រុងតូក្យូ ក្នុងការតវ៉ាប្រឆាំងនឹងការទម្លាក់គ្រាប់បែករបស់អ៊ីស្រាអែល ទៅលើតំបន់ហ្កាហ្សា ស្ទ្រីប។កាលពីមួយខែមុន ភ្លាមៗបន្ទាប់ពីអ៊ីស្រាអែល បានចាប់ផ្តើមការទម្លាក់គ្រាប់បែករបស់ខ្លួនទៅលើតំបន់ហ្កាហ្សា ជាការសងសឹកចំពោះការវាយប្រហារកាលពីថ្ងៃទី ៧ ខែតុលា ដោយក្រុមសកម្មប្រយុទ្ធហាម៉ាស លើភាគខាងត្បូងអ៊ីស្រាអែល មានក្រុមបាតុករគាំទ្រប៉ាឡេស្ទីនមួយក្រុម បានប្រឈមមុខដាក់គ្នាជាមួយនគរបាលនៅខាងក្រៅស្ថានទូតអ៊ីស្រាអែល នៅទីក្រុងតូក្យូ៕

ម៉ាស៊ីនខួងដ៏ទំនើប ត្រូវបានបញ្ជូនដើម្បីសង្រ្គោះកម្មករឥណ្ឌាដែលជាប់នៅក្នុងផ្លូវរូងក្រោមដីបាក់រលំ

កាលពីថ្ងៃពុធ (១៥ វិច្ឆិកា) រថយន្តផ្គត់ផ្គង់មួយគ្រឿងត្រូវបានគេមើលឃើញថាកំពុងដឹកជញ្ជូនម៉ាស៊ីនខួងដ៏ទំនើបទៅកាន់ទីតាំងនៃផ្លូវហាយវេ នៅតំបន់ភ្នំហិម៉ាឡៃ ដែលបានបាក់រលំ ខណៈក្រុមជួយសង្គ្រោះកំពុងប្រតិបត្តិការដើម្បីចូលទៅដល់កម្មករឥណ្ឌាចំនួន ៤០នាក់ ដែលជាប់នៅខាងក្នុងនោះ។លោក រ៉ានជីត ស៊ីនហា (Ranjit Sinha) មន្ត្រីជាន់ខ្ពស់គ្រប់គ្រងគ្រោះមហន្តរាយនៅរដ្ឋ អ៊ុតតារ៉ាក់ហាន (Uttarakhand) បាននិយាយថាម៉ាស៊ីនខួងអណ្តូងថាមពលខ្ពស់ កំពុងត្រូវបានដំឡើងនៅទីតាំងកើតហេតុដើម្បីកាត់កំទេចកំទីក្នុងល្បឿន ២,៥ម៉ែត្រក្នុងមួយម៉ោង ខុសពីម៉ាស៊ីនមុនចំនួនមួយម៉ែត្រ។ក្រុមអាជ្ញាធរបាននិយាយកាលពីថ្ងៃពុធថា កម្មករដែលជាប់នៅក្នុងនោះមានសុវត្ថិភាព និងមានសុខភាពល្អ ហើយកំពុងត្រូវបានផ្គត់ផ្គង់អាហារ ទឹក និងអុកស៊ីសែនតាមរយៈបំពង់មួយ។ ក្រុមមន្ត្រីក៏មានទំនាក់ទំនងជាប្រចាំជាមួយពួកគេដែរ។ផ្លូវរូងក្រោមដីប្រវែង ៤,៥គីឡូម៉ែត្រ ដែលកំពុងត្រូវបានសាងសង់ក្នុងរដ្ឋ អ៊ុតតារ៉ាក់ហាន នៅលើផ្លូវជាតិហាយវេមួយ ដែលជាផ្នែកមួយនៃផ្លូវធម្មយាត្រាហិណ្ឌូ ឆាដាម (Char Dham) បានបាក់រលំប្រហែលម៉ោង ៥:៣០នាទីព្រឹកថ្ងៃអាទិត្យ (ម៉ោងក្នុងស្រុក)៕

បណ្ដាញសង្គម

ព័ត៌មានថ្មីៗ

លោកជំទាវលីម ដារ៉ែន ជួន ណារិន្ទ ផ្តល់ម៉ូតូ២០គ្រឿង និងអំណោយមួយចំនួន ទៅកាន់វរៈនគរបាល និងកងទ័ពការពារព្រំដែន

ក្រុមការងាររាជរដ្ឋាភិបាលចុះមូលដ្ឋានឃុំកណ្តឹងស្រុកបាទី ខេត្តតាកែវនិងរដ្ឋបាលឃុំកណ្តឹងប្រារព្វពិធីផ្សព្វផ្សាយពីបញ្ហាគ្រឿងញៀន និង ពិធីបង្សុកូលឧទ្ទិសកុសលដល់វិញ្ញាណក្ខន្ធវិរះកងទ័ពកម្ពុជាដែលបានពលីជីវិតក្នុងសមរភូមិ

ហ្វីលីពីន និងអូស្ត្រាលី ចាប់ផ្តើមសមយុទ្ធដ៏ធំបំផុតមិនធ្លាប់មាន នៅជិតសមុទ្រចិនខាងត្បូង

ទីក្រុងគីវ៖ រុស្ស៊ីបាញ់យាន ៨៥គ្រឿង និងមីស៊ីល ១គ្រាប់ លើអ៊ុយក្រែន ប៉ុន្មានម៉ោងក្រោយមានជំនួប Trump-Putin

ផ្ទុះរោងចក្រ នៅតំបន់ Ryazan របស់រុស្ស៊ី បណ្ដាលឲ្យមនុស្ស ១១នាក់ស្លាប់ និង ១៣០នាក់របួស

នាយករដ្ឋមន្ត្រីដាណឺម៉ាក និយាយថា លោក Netanyahu បានប្រែទៅជាបង្ក «បញ្ហាដោយខ្លួនលោកផ្ទាល់»

ឯកឧត្តមសាស្ត្រាចារ្យ ប៉ិច សុធី អញ្ជើញបើកសន្និសីទប្រចាំឆ្នាំលើកទី១ របស់សមាគមគ្រូពេទ្យបង្កកំណើតកម្ពុជា

មេដឹកនាំអឺរ៉ុបស្វាគមន៍កិច្ចប្រឹងប្រែងរបស់លោក Trump ប៉ុន្តែបញ្ជាក់ថា សម្ពាធលើរុស្ស៊ី ត្រូវតែមានបន្ត

មេភូមិភាគ៣កម្ពុជាស្នើថៃជៀសវាងសកម្មភាពទាំងឡាយដែលនាំឲ្យមានភាពតានតឹងនៅតាមព្រំដែនជាយថាហេតុ

[UPDATE] ក្រុមអ្នកជួយសង្គ្រោះប៉ាគីស្ថាន ពិបាកស្រង់សាកសព ក្រោយភ្លៀងរដូវមូសុង សម្លាប់មនុស្សយ៉ាងតិច ៣២០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877