BTV NEWS

គណៈបញ្ជាការឯកភាពរាជធានី បើកការចុះបង្ក្រាបទីតាំងឆបោកអនឡាញ និងគ្រឿងញៀននៅខណ្ឌមានជ័យ ឃាត់ជនបរទេស៥៥នាក់

នគរបាលរាជធានីភ្នំពេញបង្ហាញមុខជនសង្ស័យ ១១នាក់ករណីហិង្សាវាយកម្ទេចរថយន្តក្បែរវត្តភ្នំ

ជនដែលឈ្លោះជាមួយជនបរទេស ក្នុងបណ្ដាញសង្គម គឺជាជនអនាថា គ្មានទីលំនៅពិតប្រាកដ

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

សន្តិសុខ និង សង្គម

បេឡារុស្សអះអាងថាឧទ្ធម្ភាគចក្រប៉ូឡូញបានរំលោភដែនអាកាសរបស់ខ្លួន ប៉ុន្តែទីក្រុងវ៉ាសូវីបដិសេធ

បេឡារុស៖ ប្រទេសបេឡារុសកាលពីថ្ងៃព្រហស្បតិ៍ បាននិយាយថា ឧទ្ធម្ភាគចក្រប៉ូឡូញ បានរំលោភលើដែនអាកាសរបស់ខ្លួន ប៉ុន្តែទីក្រុងវ៉ាសូវី បាននិយាយថា គ្មានឧទ្ធម្ភាគចក្ររបស់ខ្លួន បានឆ្លងកាត់ព្រំដែនរវាងប្រទេសទាំងពីរនោះទេ។ទំនាក់ទំនងតានតឹងរវាងប្រទេសជិតខាង កាន់តែកើនឡើង ដោយសារសម្ព័ន្ធមិត្តរបស់បេឡារុស គឺប្រទេសរុស្ស៊ីឈ្លានពានអ៊ុយក្រែន កាលពីខែកុម្ភៈ ឆ្នាំមុន។ប្រទេសបេឡារុស បាននិយាយនៅលើប៉ុស្តិ៍Telegramរបស់ខ្លួនថា៖« ប្រហែលម៉ោង១៥២០ (១២២០ ម៉ោងសកល) ឧទ្ធម្ភាគចក្រ បានឆ្លងកាត់ព្រំដែននៃសាធារណរដ្ឋបេឡារុស ហើយបានហោះចូលទៅជម្រៅ រហូតដល់១.៥គីឡូម៉ែត្រ។ នៅឆ្នាំ១៦២២ ឧទ្ធម្ភាគចក្របានរំលោភបំពានព្រំដែនរដ្ឋម្តងហើយម្តងទៀត ដោយចូលទៅក្នុងជម្រៅ ៣០០ម៉ែត្រ»។ បេឡារុសដែលជាសម្ព័ន្ធមិត្តជិតស្និទ្ធបំផុតរបស់រុស្ស៊ី បាននិយាយថា ខ្លួនបានវាយប្រហារដោយប្រើយន្តហោះយោធា ជាការឆ្លើយតប។អ្នកនាំពាក្យនៃទីបញ្ជាការប្រតិបត្តិការនៃកងកម្លាំងប្រដាប់អាវុធនៃប្រទេសប៉ូឡូញ បានប្រាប់សារព័ត៌មានរ៉យទ័រថា៖«ទីបញ្ជាការប្រតិបត្តិការនេះ បដិសេធរបាយការណ៍ទាំងនេះយ៉ាងច្បាស់ៗ។ គ្មានឧទ្ធម្ភាគចក្រ ប៉ូឡូញណាមួយ បានឆ្លងកាត់ដែនអាកាសរបស់ប្រទេសបេឡារុសទេ»៕

ជនជាតិអាមេនី-លីបង់ ប៉ះទង្គិចជាមួយនគរបាល នៅជិតស្ថានទូតអាស៊ែរបៃហ្សង់

អាមេនី៖ ពលរដ្ឋអាមេនី-លីបង់ បានប្រមូលផ្តុំគ្នា នៅជិតស្ថានទូតអាស៊ែរបៃហ្សង់ កាលពីថ្ងៃព្រហស្បតិ៍ ដើម្បីតវ៉ាប្រឆាំងប្រតិបត្តិការយោធារបស់ប្រទេសអាស៊ែរបៃហ្សង់ ក្នុងតំបន់ណាហ្គ័រណូ-ការ៉ាបាក់។ ក្រុមអ្នកតវ៉ាដែលភាគច្រើនមានកាន់បដា និងទង់ជាត់តំបន់ណាហ្គ័រណូ-ការ៉ាបាក់ បានប៉ះទង្គិចគ្នាមួយភ្នែតជាមួយកងកម្លាំងសន្តិសុខ ដែលរារាំងពួកគេមិនឲ្យចូលទៅជិតស្ថានទូត។ ពួកគេបានគប់វត្ថុជាច្រើនទៅលើសមាជិកនគរបាល ដែលបានតបតវិញដោយឧស្ម័នបង្ហៀរទឹកភ្នែកមួយចំនួន។អាស៊ែរបៃហ្សង់ បានយកមកគ្រប់គ្រងវិញតំបន់ការ៉ាបាក់ កាលពីសប្តាហ៍មុន ក្នុងប្រតិបត្តិការយោធា។ ទីភ្នាក់ងារសារព័ត៌មាន RIA បានរាយការណ៍ថា មនុស្សប្រមាណ៧០.៥០០នាក់ បានឆ្លងកាត់ពីតំបន់ការ៉ាបាក់ ចូលទៅប្រទេសអាមេនី កាលពីរសៀលថ្ងៃព្រហស្បតិ៍ ដែលចំនួននេះស្ថិតក្នុងចំណោមប្រជាជន ១២០.០០០នាក់របស់តំបន់នេះ។ អាជ្ញាធរជនជាតិភាគតិចអាមេនី នៅតំបន់ការ៉ាបាក់ និយាយថា ពួករំលាយរដ្ឋតូចផ្តាច់ខ្លួន ដែលពួកគេបានការពារប្រឆាំងអាស៊ែរបៃហ្សង់រយៈពេល៣ទសវត្សរ៍មកនេះ។ ប្រទេសលីបង់ មានសហគមន៍ជនជាតិដើមអាមេនីធំមួយ។ ភាគច្រើន បានរស់នៅក្នុងប្រទេសលីបង់ចាប់តាំងដូនតារបស់ពួកគេមក ដែលបានភៀសខ្លួនចេញពីការសម្លាប់រង្គាលជនជាតិអាមេនី ក្នុងអាណាចក្រអូតូម៉ង់ រយៈពេល១សតវត្សរ៍មកហើយ៕

សាច់ញាតិជនរងគ្រោះទាមទារឱ្យមានការទទួលខុសត្រូវ ជុំវិញអគ្គិភ័យរោងការនៅអ៊ីរ៉ាក់

អ៊ីរ៉ាក់៖ ពិធីរំលឹកវិញ្ញាណក្ខន្ធជនរងគ្រោះ ដោយអគ្គិភ័យយ៉ាងសន្ធោសន្ធៅក្នុងរោងការមួយកន្លែង នៅប្រទេសអ៊ីរ៉ាក់ បានប្រព្រឹត្តទៅកាលពីថ្ងៃព្រហស្បតិ៍ (២៨ កញ្ញា)។ ការអំពាវនាវឱ្យមានការទទួលខុសត្រូវ បានកើនឡើងកាន់តែខ្លាំងនៅក្នុងទីក្រុងគ្រិស្ដសាសនិក ហាមដានីយ៉ា (Hamdaniya) ខណៈដែលអ្នកកាន់ទុក្ខបានសម្លឹងមើលមនុស្សជាទីស្រលាញ់របស់ពួកគេត្រូវបានគេបញ្ចុះយ៉ាងក្រៀមក្រំ។មនុស្សជាង១០០នាក់បានស្លាប់ និងយ៉ាងហោចណាស់១៥០នាក់ បានរងរបួសកាលពីល្ងាចថ្ងៃអង្គារ នៅក្នុងគ្រោះមហន្តរាយ ដែលមន្ត្រីរដ្ឋាភិបាលបាននិយាយថា ត្រូវបានកើតឡើងដោយសារកង្វះវិធានការសុវត្ថិភាព និងសន្តិសុខ ព្រមទាំងការប្រើប្រាស់សម្ភារៈ ដែលងាយឆេះខ្លាំងនៅក្នុងអគារកើតហេតុនោះ។សោកនាដកម្មនេះ បានធ្វើឱ្យមានការចងចាំឡើងវិញ អំពីអគ្គីភ័យដ៏មហន្តរាយ ដែលបានឆាបឆេះនៅមន្ទីរពេទ្យចំនួនពីរកន្លែង ក្នុងប្រទេសអ៊ីរ៉ាក់ កាលពីឆ្នាំ២០២១ ដោយបានសម្លាប់មនុស្សយ៉ាងហោចណាស់ ១៧៤នាក់ ដែលនៅពេលនោះមូលហេតុជាច្រើន រួមមានការធ្វេសប្រហែស បទប្បញ្ញត្តិដែលធូររលុង និងអំពើពុករលួយ ត្រូវបានស្ដីបន្ទោសថានៅពីក្រោយហេតុការណ៍នោះ។ មន្ត្រីរដ្ឋាភិបាលបានប្រកាសពីការចាប់ខ្លួនមនុស្ស១៤នាក់ ជុំវិញអគ្គិភ័យកាលពីយប់ថ្ងៃអង្គារ រួមទាំងម្ចាស់នៃសាលព្រឹត្តិការណ៍នេះ ហើយបានសន្យាថា នឹងមានការស៊ើបអង្កេតយ៉ាងឆាប់រហ័សជុំវិញករណីនោះផងដែរ៕

ជនជាតិអាមេនីនៅតំបន់ការ៉ាបាក់ យល់ព្រមរំលាយរដ្ឋាភិបាលផ្ដាច់ខ្លួនចោលចូលទៅជាមួយអាស៊ែរបៃហ្សង់

អាមេនី៖ ជនជាតិភាគតិចអាមេនីនៅក្នុងតំបន់ណាហ្គ័រណូ -ការ៉ាបាក់ បាននិយាយកាលពីថ្ងៃព្រហស្បតិ៍ថា ពួកគេកំពុងរំលាយរដ្ឋាភិបាលផ្ដាច់ខ្លួន ដែលពួកគេបានការពាររយៈពេល៣ទសវត្សរ៍មកហើយ ជាទីដែលមានប្រជាជនជាងពាក់កណ្ដាលបានរត់គេចខ្លួនចាប់តាំងពីអាស៊ែរបៃហ្សង់បាន បើកការវាយលុកភ្លាមៗកាលពីសប្ដាហ៍មុន។ នៅក្នុងសេចក្ដីថ្លែងការណ៍ ពួកគេនិយាយថា សាធារណរដ្ឋស្វ័យប្រកាស អាតសាក់(Artsakh) របស់ពួកគេ នឹងបញ្ចប់វត្តមានចាប់ពីឆ្នាំក្រោយត្រឹមថ្ងៃទី១ខែមករា ជាអ្វីដែលត្រូវបានរួមបញ្ជូលជាផ្លូវការជាមួយរដ្ឋាភិបាលអាស៊ែរបៃហ្សង់ ។ សម្រាប់អាស៊ែរបៃហ្សង់ និងប្រធានាធិបតីរបស់ខ្លួន លោក អ៊ីលហាំ អាលីយ៉េវ (Ilham Aliyev)និយាយថា លទ្ធផលនេះ គឺជាការស្ដារឡើងវិញនៃអធិបតេយ្យភាពដ៏ជោគជ័យលើតំបន់នេះ ដែលត្រូវបានទទួលស្គាល់ជាអន្តរជាតិ ថាជាផ្នែកមួយនៃទឹកដីរបស់ខ្លួន ប៉ុន្តែភាគច្រើននៃជនជាតិអាមេនីក្នុងតំបន់នេះ បានទទួលឯករាជភាពតាមជាក់ស្ដែងក្នុងសង្រ្គាមមួយកាលពីទសវត្សរ៍ឆ្នាំ១៩៩០។ សម្រាប់អាមេនីវិញ នេះគឺជាការបរាជ័យ និងសោកនាដកម្មសម្រាប់ប្រទេស។ ទីភ្នាក់ងារសារព័ត៌មាន RIA របស់រុស្ស៊ី បានរាយការណ៍ថា មនុស្សប្រមាណ៧0.៥០០នាក់ បានឆ្លងព្រំដែនចូលទៅក្នុងប្រទេសអាមេនី កាលពីរសៀលថ្ងៃព្រហស្បតិ៍សប្ដាហ៍នេះ ក្នុងចំណោមប្រជាជនសរុបដែលមានប្រហែល១២ម៉ឺននាក់។ ការវិភាគជាច្រើនលើស្ថានភាពនេះ បង្ហាញថា នៅប៉ុន្មានថ្ងៃខាងមុខទៀតនេះ នឹងមានពុំមានជនជាតិអាមេនី នៅសេសសល់ក្នុងតំបន់ណាហ្គ័រណូ -ការ៉ាបាក់ ទៀតទេ។ ទីភ្នាក់ងារសារព័ត៌មាន Interfax បានដកស្រង់សម្ដីរបស់ នាយករដ្ឋមន្ត្រី អាមេនី លោក នីកូល ផាស៊ីនយ៉ាន (Nikol Pashinyan)ដោយនិយាយថានេះគឺជាទង្វើបោសសម្អាតជនជាតិភាគតិច៕

ឧត្តមស្នងការUNទទួលបន្ទុកសិទ្ធិមនុស្សធ្វើការអំពាវនាវជាបន្ទាន់សុំឲ្យមានបេសកកម្មសន្តិសុខសម្រាប់ប្រទេសហៃទី

UN៖ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បាននិយាយកាលពីថ្ងៃព្រហស្បតិ៍ថា អំពើហិង្សក្រុមជនអន្ធពាលដែលកំពុងកើនឡើងនៅប្រទេសហៃទី បច្ចុប្បន្ន បានសាយភាយគ្រប់កម្រិតនៃសង្គមនេះ ខណៈដែលលោកបានអំពាវនាវជាបន្ទាន់ឲ្យដាក់ពង្រាយកម្លាំងពហុជាតិទៅកាន់ប្រទេសសមុទ្រការ៉ាអ៊ីបដែលងាយនឹងបង្កជាហេតុ ដើម្បីជួយនគរបាលបង្ក្រាបអំពើហិង្សានេះ។ការអំពាវនាវពីឧត្តមស្នងការ លោក វ៉ុលកើ ទួក (Volker Türk) កើតឡើង នៅពេលដែលអំពើហិង្សារបស់ក្រុមជនអន្ធពាលរីករាលដាលពីទីក្រុងព័រអូប្រាំង ទៅកាន់កណ្តាលនៃប្រទេសនេះ ហើយបទឈប់បាញ់នៅពាក់កណ្តាលខែកក្កដារវាងក្រុមចម្រុះក្រុមជនអន្ធពាលធំៗពីរ បានបែកបាក់គ្នា។ កាលពីថ្ងៃព្រហស្បតិ៍ គ្រូបង្រៀននៅសាលា École Argentine ក្នុងទីក្រុងព័រអូប្រាំង បានចូលទៅរៀបចំអាហារសម្រាប់សិស្សទាំងអស់ បន្ទាប់ពីចុងភៅ មិនអាចចូលទៅធ្វើការបាន ដោយសារអំពើហិង្សា។លោកទួក បាននិយាយថា៖«ជារៀងរាល់ថ្ងៃ ជីវិតរបស់ប្រជាជនហៃទីកាន់តែលំបាកទៅៗ ប៉ុន្តែវាសំខាន់ណាស់ ដែលយើងមិនបោះបង់ទេ។ ស្ថានភាពរបស់ពួកគេ មិនអស់សង្ឃឹមទេ»។ «ដោយមានការគាំទ្រ និងការដោះស្រាយពីអន្តរជាតិ ប្រជាជនហៃទី អាចដោះស្រាយអសន្តិសុខដ៏ធ្ងន់ធ្ងរនេះ ហើយស្វែងរកផ្លូវចេញពីភាពចលាចលនេះ»។ក្នុងរយៈពេលប៉ុន្មានខែថ្មីៗនេះ ប្រទេសហៃទី បានឃើញការវាយប្រហារទ្រង់ទ្រាយធំកើតឡើងដដែលៗ ដោយមិនរើសមុខ ជារឿយៗប្រឆាំងនឹងសង្កាត់ទាំងមូល និងអ្នកស្រុករបស់ពួកគេ។ បញ្ហានេះ បាននាំឲ្យមានការជម្លៀសមនុស្ស ១៣០.000នាក់ ហើយជិត ២.៨០០ នាក់ ត្រូវបានរាយការណ៍ថា ត្រូវបានសម្លាប់នៅចន្លោះខែតុលាឆ្នាំមុន ដល់ខែមិថុនា ក្នុងនោះមានស្ត្រី ២៤៧នាក់ ក្មេងប្រុស ៥៨នាក់ និងក្មេងស្រី ២០នាក់ នេះបើយោងតាមរបាយការណ៍ថ្មីមួយទៅកាន់ក្រុមប្រឹក្សាសន្តិសុខUN។ មានការចាប់ជំរិតមនុស្សជិត ១.៥០០នាក់ ដើម្បីទារប្រាក់លោះ ដែលត្រូវបានរាយការណ៍ ក្នុងអំឡុងពេលនោះ៕

ជនអន្តោប្រវេសន៍ជាច្រើនសម្រុកឆ្លងចូលទឺកដីអាមេរិក ខណៈជួបបញ្ហាប្រឈមនៅព្រំដែន និងច្បាប់សិទ្ធិជ្រកកោនថ្មី

អាមេរិក៖ អស់រយៈពេលជាច្រើនថ្ងៃកន្លងមក ជនអន្តោប្រវេសន៍ជាច្រើនក្រុម ដែលភាគច្រើនមកពីប្រទេសវេណេស៊ុយអេឡា បាននិងកំពុងសម្រុកធ្វើដំណើរឆ្លងកាត់ទន្លេ Rio Bravo ពីទីក្រុង Piedras Negras ភាគខាងជើងប្រទេសម៉ិកស៊ិក ចូលទៅក្នុងទីក្រុង Eagle Pass រដ្ឋតិចសាស់ របស់សហរដ្ឋអាមេរិក ដោយជួបបញ្ហាប្រឈមជាច្រើននៅតាមព្រំដែន ព្រោះតែមានការរារាំងដោយខ្សែលួសបន្លាដ៏មុតស្រួត ដែលដាក់នៅតាមច្រាំងទន្លេនោះ។នៅក្រោមច្បាប់ថ្មី ដែលបានដាក់ក្នុងខែឧសភា ដោយរដ្ឋបាលរបស់ប្រធានាធិបតីអាមេរិក លោក Joe Biden បានដាក់កំហិតលើជនអន្តោប្រវេសន៍ ដែលមិនបានធ្វើការណាត់ជួបដើម្បីឆ្លងកាត់ច្រកចូលផ្លូវច្បាប់ នៅលើកម្មវិធីទូរស័ព្ទគ្រប់គ្រងដោយរដ្ឋាភិបាល ដែលគេស្គាល់ថាឈ្មោះកម្មវិធីសិទ្ធិជ្រកកោន CBP One អាចប្រឈមមុខនឹងការរារាំងក្នុងការជ្រកកោននៅអាមេរិក ព្រមទាំងការនិរទេសត្រឡប់ទៅប្រទេសកំណើត ដែលអាចកើតមានផងដែរ។សូមបញ្ជាក់ថា ចំនួនជនអន្តោប្រវេសន៍បានធ្លាក់ចុះកាលពីដំបូង បន្ទាប់ពីការប្រកាសច្បាប់សិទ្ធិជ្រកកោនថ្មី ប៉ុន្តែក្នុងប៉ុន្មានសប្តាហ៍ថ្មីៗនេះ តួលេខបានចាប់ផ្តើមកើនឡើងម្តងទៀត ខណៈជនអន្តោប្រវេសន៍រាប់ពាន់នាក់ ដែលភាគច្រើនបានភៀសខ្លួនចេញពីវេណេហ្ស៊ុយអេឡា ដែលធ្វើដំណើរឆ្លងកាត់អាមេរិកខាងត្បូង និងកណ្តាល បានចាប់ផ្តើមមកដល់ព្រំដែនអាមេរិកជាបន្តបន្ទាប់មក៕

គណបក្សសាធារណរដ្ឋអាមេរិក បើកការស៊ើបអង្កេតលើការចោទប្រកាន់លោក បៃដិន ដោយផ្តោតលើអាជីវកម្មរបស់កូនប្រុសលោក

អាមេរិក៖ គណបក្សសាធារណរដ្ឋ ដឹកនាំការស៊ើបអង្កេតលើការចោទប្រកាន់ដើម្បីទម្លាក់តំណែងប្រធានាធិបតីអាមេរិក លោកចូ បៃដិន ដោយផ្ដោតលម្អិតលើការទូទាត់ប្រាក់បរទេសដល់សមាជិកនៃគ្រួសាររបស់លោក នៅក្នុងសវនាការលើកដំបូងរបស់ពួកគេកាលពីថ្ងៃព្រហស្បតិ៍ (២៨ កញ្ញា) ប៉ុន្តែមិនបានផ្តល់ភស្តុតាងដែលថាប្រធានាធិបតីប្រជាធិបតេយ្យរូបនេះ បានទទួលផលប្រយោជន៍ផ្ទាល់ខ្លួននោះទេ។សវនាការលើការចោទប្រកាន់ដំបូង ដោយគណៈកម្មាធិការត្រួតពិនិត្យសភាតំណាងរាស្រ្តសហរដ្ឋអាមេរិក បានធ្វើការពិនិត្យលើភស្តុតាងដែលថា គណបក្សសាធារណរដ្ឋបានប្រមូលផ្តុំមកទល់ពេលនេះ អំពីការបណ្តាក់ទុនអាជីវកម្មបរទេស ដោយកូនប្រុសដែលកំពុងមានបញ្ហារបស់លោក បៃដិន ឈ្មោះ ហាន់ធឺ បៃដិន (Hunter Biden) វ័យ៥៣ឆ្នាំ ដែលពួកគេនិយាយថា ភស្តុតាងបានបង្ហាញថាសមាជិកគ្រួសាររបស់លោក បៃដិន កំពុងលក់សិទ្ធិប្រើប្រាស់នៃអាជីវកម្មបរទេសទាំងនោះ។គណបក្សប្រជាធិបតេយ្យ និងសាក្សីឯករាជ្យជាច្រើននាក់បាននិយាយថា មិនមានភស្តុតាងណាមួយដែលថាលោក បៃដិន បានទទួលប្រាក់ទាំងនោះ ឬបានចូលរួមក្នុងអាកប្បកិរិយាមិនសមរម្យ ខណៈពេលដែលលោកបម្រើការជាអនុប្រធានាធិបតីចន្លោះឆ្នាំ២០០៩ និងឆ្នាំ២០១៧ នោះទេ។ សេតវិមានបានបដិសេធការប្រព្រឹត្តខុសរបស់លោកបៃដិន ហើយបានច្រានចោលការស៊ើបអង្កេតនេះថា មានហេតុផលនយោបាយនៅពីក្រោយ។គួររម្លឹកផងដែរថា គណបក្សសាធារណរដ្ឋ បានចោទប្រកាន់លោក បៃដិន និងក្រុមគ្រួសាររបស់លោក ថាបានប្រយោជន៍ពីគោលនយោបាយ ដែលលោកបានបន្តធ្វើជាអនុប្រធានាធិបតី ក្នុងអំឡុងពេលរដ្ឋបាលរបស់អតីតប្រធានាធិបតីអាមេរិក លោក បារ៉ាក់ អូបាម៉ា (Barack Obama) ចន្លោះឆ្នាំ២០០៩ និងឆ្នាំ២០១៧។ ដោយឡែក ពួកគេក៏បានចោទប្រកាន់ក្រសួងយុត្តិធម៌ ថាបានជ្រៀតជ្រែកក្នុងការស៊ើបអង្កេតឧក្រិដ្ឋកម្មរបស់កូនប្រុសលោកប្រធានាធិបតីរូបនេះ គឺលោក ហាន់ធឺ បៃដិន ផងដែរ៕

ក្រសួងការបរទេសអាមេរិក រៀបចំផែនការបន្ទាន់ក្នុងករណីមានការបិទរដ្ឋាភិបាល

អាមេរិក៖ អ្នកនាំពាក្យក្រសួងការបរទេសអាមេរិក លោក Matthew Miller បាននិយាយកាលពីថ្ងៃព្រហស្បតិ៍ (២៨ កញ្ញា) ថា ក្រសួងការបរទេសសហរដ្ឋអាមេរិក បាននិងកំពុងរៀបចំផែនការបន្ទាន់ ក្នុងករណីមានការបិទរដ្ឋាភិបាល។ក្នុងអំឡុងសន្និសីទសារព័ត៌មាន លោក Miller បាននិយាយថា ផែនការនោះនឹងបន្តនៅប៉ុន្មានថ្ងៃខាងមុខ ដើម្បីសម្រេច ថាតើការងារណា ដែលចាំបាច់សម្រាប់សន្តិសុខជាតិ ហើយមិនអាចត្រូវផ្អាកក្នុងពេលការបិទរដ្ឋាភិបាល និងការងារណាខ្លះដែលត្រូវផ្អាក។គួរបញ្ជាក់ផងដែរថា សភាតំណាងរាស្រ្តគណបក្សសាធារណរដ្ឋ ដែលដឹកនាំដោយក្រុមតូចមួយនៃពួកអភិរក្សនិយមដ៏រឹងរូស បានបដិសេធកម្រិតការចំណាយសម្រាប់ឆ្នាំសារពើពន្ធ២០២៤ ដែលបានកំណត់នៅក្នុងកិច្ចព្រមព្រៀង ដែលប្រធានសភាអាមេរិក លោក Kevin McCarthy បានចរចាជាមួយលោកប្រធានាធិបតី ចូ បៃដិន កាលពីខែឧសភា៕

មន្ត្រី៖កិច្ចព្រមព្រៀងEUចែករំលែកអ្នកស្វែងរកសិទ្ធិជ្រកកោននឹងត្រូវកំណត់ ក្នុងរយៈពេលប៉ុន្មានថ្ងៃខាងមុខ

EU៖ មន្ត្រីទេសន្តរប្រវេសន៍ជាន់ខ្ពស់របស់សហភាពអឺរ៉ុប បាននិយាយថា ប្លុកនេះ ត្រូវបានកំណត់ ដើម្បីយល់ព្រមលើរបៀបដោះស្រាយអន្តោប្រវេសន៍មិនទៀងទាត់ឲ្យបានឆាប់ បន្ទាប់ពីកិច្ចពិភាក្សារបស់រដ្ឋមន្ត្រី មិនមានកិច្ចព្រមព្រៀងចុងក្រោយ កាលពីថ្ងៃព្រហស្បតិ៍ជាមួយទីក្រុងប៊ែរឡាំងទេ ហើយទីក្រុងរ៉ូម ព្រួយបារម្ភអំពីការកើនឡើងចំនួននៃអ្នកមកដល់ នៅមុនការបោះឆ្នោតសំខាន់ៗ។ក្រុមរដ្ឋមន្ត្រី កំពុងស្វែងរកកិច្ចព្រមព្រៀងលើប្រព័ន្ធដែលជាប់គាំងជាយូរមកហើយសម្រាប់ការចែករំលែកនៅទូទាំងសហភាពអឺរ៉ុប ដែលអ្នកស្វែងរកសិទ្ធិជ្រកកោន បានទៅដល់អឺរ៉ុប នៅខាងក្រៅច្រកឆ្លងព្រំដែនផ្លូវការ។លោកស្រី អ៊ីលវ៉ា ចូហានសុន (Ylva Johansson) ប្រធានកិច្ចការមហាផ្ទៃរបស់សហភាពអឺរ៉ុប បានបដិសេធមិនផ្តល់ព័ត៌មានលម្អិតថា៖«ខ្ញុំប្រាកដថា ក្នុងរយៈពេលពីរបីថ្ងៃទៀត យើងនឹងមានការសម្រេចចិត្តជាផ្លូវការលើវិធីសាស្រ្តទូទៅសម្រាប់យន្តការដោះស្រាយវិបត្តិនេះ។លោកស្រី បានដាក់ចំនួនមកដល់មិនទៀងទាត់ក្នុងឆ្នាំនេះ គឺមានជនអន្តោប្រវេសន៍ ២៥០.០០០នាក់ ដែលភាគច្រើនជាអ្នកដែលបានភៀសខ្លួនចេញពីសង្គ្រាម និងភាពក្រីក្រនៅមជ្ឈិមបូព៌ា អាហ្វ្រិក និងអាស៊ីខាងត្បូង ហើយបានទៅដល់សហភាពអឺរ៉ុប នៅទូទាំងសមុទ្រមេឌីទែរ៉ាណេ៕

កោះតៃវ៉ាន់បង្ហាញនាវាមុជទឹកថ្មី ដើម្បីទប់ទល់ប្រទេសចិន

តៃវ៉ាន់៖ កោះតៃវ៉ាន់ បានបង្ហាញនាវាមុជទឹកផលិតក្នុងស្រុកលើកដំបូងរបស់ខ្លួន ខណៈកោះនេះពង្រឹងការការពារប្រឆាំងការវាយប្រហាររបស់ប្រទេសចិន។ មេដឹកនាំលោកស្រី Tsai Ing-wen បានអញ្ចើញជាអធិបតីក្នុងពិធីចាប់ផ្តើមការបង្ហាញនៅទីក្រុងកំពង់ផែ Kaohsiung នៅថ្ងៃព្រហស្បតិ៍នេះ។ មន្ត្រីសហរដ្ឋអាមេរិក បានព្រមានថា ប្រទេសចិន អាចប្រើសមត្ថភាពផ្នែកយោធា ក្នុងការបង្កើនការឈ្លានពានក្នុងរយៈពេលប៉ុន្មានឆ្នាំខាងមុខនេះ។ កោះតៃវ៉ាន់ ជាកោះស្វ័យគ្រប់គ្រង ដែលប្រទេសចិនចាត់ទុកថាជាខេត្តរបស់ខ្លួន ហើយបានប្តេជ្ញាទាមទារសិទ្ធក្រសោបយកមកវិញនៅថ្ងៃណាមួយ។ អ្នកសង្កេតការណ៍ភាគច្រើន ជឿថា ប្រទេសចិននឹងមិនវាយប្រហារទៅលើកោះនេះភ្លាមៗនោះទេ ហើយទីក្រុងប៉េកាំងបាននិយាយថាខ្លួនស្វែងរក ការបង្រួបបង្រួមដោយសន្តិវិធីជាមួយកោះតៃវ៉ាន់។ ប៉ុន្តែទន្ទឹមនឹងនេះ ប្រទេសចិនបាន ព្រមានកោះតៃវ៉ាន់ចំពោះការប្រកាសឯករាជ្យជាផ្លូវការ និងមានការគាំទ្រពីបរទេសណាមួយ។ ប្រទេសនេះបានព្យាយាមកាន់តែខ្លាំងឡើង ដើម្បីដាក់សម្ពាធលើកោះនេះ ដោយមានសមយុទ្ធយោធារបស់ខ្លួននៅច្រកសមុទ្រតៃវ៉ាន់ រួមទាំងការធ្វើសមយុទ្ធជាច្រើននៅក្នុងខែនេះ។លោកស្រី Tsai បាននិយាយខណៈលោកស្រីឈរនៅពីមុខនាវាមុជទឹកដែលមានរូបទង់ជាតិកោះតៃវ៉ាន់ថា «ប្រវត្តិសាស្ត្រនឹងចងចាំជារៀងរហូតនៅថ្ងៃនេះ»។ លោកស្រីនិយាយបន្ថែមថា គំនិតនៃនាវាមុជទឹកផលិតក្នុងស្រុកកាលពីពេលមុនត្រូវបានគេចាត់ទុកថា «ជាកិច្ចការមិនអាចទៅរួច ប៉ុន្តែយើងបានធ្វើវា»។យោងតាមមន្ត្រីយោធាបានឱ្យដឹងថា នាវាមុជទឹកដើរដោយថាមពលប្រេងម៉ាស៊ូតតម្លៃ ១,៥៤ពាន់លានដុល្លារ នឹងដំណើរការសាកល្បងជាច្រើនលើក ហើយនឹងត្រូវបញ្ជូនទៅឱ្យកងទ័ពជើងទឹកនៅចុងឆ្នាំ ២០២៤ ។

បណ្ដាញសង្គម

ព័ត៌មានថ្មីៗ

កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ

ចៅក្រម ICC បដិសេធសំណើសុំដោះលែងអតីតប្រធានាធិបតីហ្វីលីពីន លោក Duterte

អ៊ីរ៉ង់និយាយថា ការទូតពឹងផ្អែកលើផលប្រយោជន៍ជាតិ ពុំមែនការសម្រេចចិត្តលើការចរចាទេ

អ្នកការទូត បញ្ជាក់ថា អ៊ីរ៉ង់ «នឹងមិនចរចាក្រោមការគំរាមកំហែង» នោះឡើយ

ប្រទេសលីបង់ និងរុស្ស៊ី ចុះហត្ថលេខាលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងពិសេស

លីបង់នឹងស្នើសុំការបន្តបទឈប់បាញ់រយៈពេលមួយខែ ក្នុងជំនួបជាមួយអ៊ីស្រាអែល

អាល្លឺម៉ង់ប្ដេជ្ញាកសាងកងទ័ពខ្លាំងបំផុតរបស់អឺរ៉ុប នៅឆ្នាំ២០៣៩ ដើម្បីរារាំងរុស្ស៊ី

EU អនុម័តប្រាក់កម្ចី ៩០ពាន់លានអឺរ៉ូដល់អ៊ុយក្រែន និងទណ្ឌកម្មថ្មី លើរុស្ស៊ី ក្រោយហុងគ្រីបោះបង់សិទ្ធិវេតូ

ឯកអគ្គរដ្ឋទូតឡាវប្តេជ្ញាចិត្តបន្តពង្រឹង និងពង្រីកទំនាក់ទំនងដ៏ល្អប្រសើររវាងប្រទេសកម្ពុជា និងឡាវ លើគ្រប់វិស័យ

រដ្ឋមន្ត្រីការបរទេសអ៊ីស្រាអែលអំពាវនាវឲ្យលីបង់ធ្វើការជាមួយអ៊ីស្រាអែល ប្រឆាំងនឹងក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877