BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

នាយឧត្តមសេនីយ៍ ម៉ក់ ជីតូ ធ្វើសន្និសីទកាសែតពាក់ព័ន្ធនឹងការចាប់មេខ្លោងគ្រឿងញៀនជនជាតិចិនតៃវ៉ាន់

នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ នាព្រឹកថ្ងៃទី២៣ ខែសីហា ឆ្នាំ២០២៣នេះ ធ្វើសន្និសីទកាសែត ក្រោយចាប់បានមកវិញនូវមេខ្លោងគ្រឿងញៀនជាជនជាតិចិនតៃវ៉ាន់ ដែលត្រូវបានក្រុមឧក្រិដ្ឋជនប្រដាប់ដោយអាវុធបានប្លន់រំដោះនៅខេត្តសៀមរាប កាលពីកន្លងទៅថ្មី។បើតាមការ បញ្ជាក់ពីនាយឧត្តមសេនីយ៍ ម៉ក់ ជីតូ មេខ្លោងគ្រឿងញៀនរូបនេះ ត្រូវបានកម្លាំង សមត្ថកិច្ចអគ្គស្នងការនគរ ដ្ឋានគរបាលជាតិ ចាប់បាននៅព្រឹកថ្ងៃទី២២ ម្សិលមិញ នៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ៕

ប្រទេសនីហ្សេ ត្រូវបានផ្អាកពីសមាជិកសហភាពអាហ្រ្វិក

នីហ្សេ៖ ក្រុមប្រឹក្សាសន្តិភាព និងសន្តិសុខរបស់ប្លុកសហភាពអាហ្វ្រិក បាននិយាយនៅក្នុងសេចក្តីថ្លែងការណ៍មួយ ចេញផ្សាយកាលពីថ្ងៃអង្គារ (២២សីហា)ថា ប្រទេសនីហ្សេ ត្រូវបានផ្អាកភ្លាមៗពីសកម្មភាពទាំងអស់របស់សហភាពអាហ្វ្រិក (AU) បន្ទាប់ពីរដ្ឋប្រហារកាលពីថ្ងៃទី២៦ ខែកក្កដា។ ប្លុកក្នុងតំបន់បានរំលឹកឡើងវិញនូវការអំពាវនាវរបស់ខ្លួនឱ្យមេដឹកនាំរដ្ឋប្រហារ ដោះលែងប្រធានាធិបតីនីហ្សេ លោក Mohamed Bazoum ហើយត្រឡប់ទៅបន្ទាយរបស់ពួកគេវិញ។រដ្ឋប្រហារនេះ បានបង្កឱ្យមានការភ្ញាក់ផ្អើលក្នុងចំណោមសម្ព័ន្ធមិត្តលោកខាងលិច និងបណ្ដារដ្ឋអាហ្វ្រិកប្រជាធិបតេយ្យ ដែលមានការព្រួយបារម្ភថា ការធ្វើរដ្ឋប្រហារនេះអាចអនុញ្ញាតឱ្យក្រុមអ៊ីស្លាមនិយមនៅក្នុងប្រទេសតំបន់ Sahel អាហ្វ្រិកមួយនេះ ពង្រីកវិសាលភាពរបស់ពួកគេ និងផ្តល់ឱ្យរុស្ស៊ីនូវជំហរបង្កើនឥទ្ធិពលរបស់ខ្លួន។ក្រុមប្រឹក្សាសន្តិភាព និងសន្តិសុខសហភាពអាហ្វ្រិក AU បាននិយាយថា ខ្លួនបានកត់សម្គាល់ការសម្រេចរបស់សហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) ដើម្បីដំណើរការកងកម្លាំងត្រៀម សម្រាប់អន្តរាគមន៍យោធាដែលអាចកើតមាន ហើយបានស្នើឱ្យគណៈកម្មការ AU វាយតម្លៃផលប៉ះពាល់សេដ្ឋកិច្ច សង្គម និងសន្តិសុខ នៃការដាក់ពង្រាយកម្លាំងបែបនេះផងដែរ៕

នាយករដ្ឋមន្ត្រីជាប់ឆ្នោតថ្មីថៃ លោកសេដ្ឋា (Srettha) សន្យាធ្វើជានាយករដ្ឋមន្ត្រីរបស់ប្រជាជន ខណៈរង់ចាំការឡាយព្រះហស្តលេខាពីព្រះមហាក្សត្រ

ថៃ៖ នាយករដ្ឋមន្ត្រី ទើបជាប់ឆ្នោតរបស់ប្រទេសថៃលោកសេដ្ឋា ថាវីស៊ីន បានក្លាយជាមេដឹកនាំសម្រាប់ប្រជាជន កាលពីថ្ងៃអង្គារ ២២ សីហា បន្ទាប់ពីទទួលបានតំណែងនាយករដ្ឋមន្ត្រីដោយជោគជ័យពីសភា។ ជ័យជម្នះរបស់លោក សេដ្ឋា វ័យ ៦០ឆ្នាំ ត្រួសត្រាយផ្លូវសម្រាប់បង្កើតរដ្ឋាភិបាលចម្រុះថ្មី ដោយបញ្ចប់ ភាពមិនច្បាស់លាស់ និងភាពជាប់គាំងនៅក្នុងសភារយៈពេលជាង៣ខែ បន្ទាប់ពីការបោះឆ្នោតកាលពីជាង១០០ ថ្ងៃមុន ដែលគំរាមកំហែងធ្វើឲ្យឥទ្ធិពលនយោបាយរបស់យោធាដ៏មានឥទ្ធិពលរបស់ប្រទេសចុះខ្សោយ។លោកសេដ្ឋា ដែលត្រូវបានចាប់អារម្មណ៍ខ្លាំងកាលពីប៉ុន្មានខែមុន ដោយគណបក្សភឿថៃ ប្រជានិយម (Pheu Thai) បានទទួលការគាំទ្រពីសភាពីរភាគបីនៅក្នុងការបោះឆ្នោតមួយដែលធ្វើឡើងប៉ុន្មានម៉ោងបន្ទាប់ពីអារម្មណ៍អន្ទះសារក្នុងប្រទេសថៃ ជុំវិញការវិលត្រឡប់មកវិញរបស់លោកថាក់ស៊ីនដែលរង់ចាំជាយូរមកហើយ បន្ទាប់ពីការនិរទេសខ្លួន ជាង១៥ឆ្នាំ។ លោក សេដ្ឋា បានត្រឹមតែធ្វើអត្ថាធិប្បាយខ្លីៗទៅកាន់អ្នកសារព័ត៌មាន ហើយបាននិយាយថា លោកនឹងធ្វើសន្និសីទសារព័ត៌មាន បន្ទាប់ពីលោកបានទទួលការឡាយព្រះហស្តលេខាពីព្រះមហាក្សត្រថៃ។ កាលបរិច្ឆេទសម្រាប់ការអនុម័តមិនទាន់ត្រូវបានកំណត់ពេលនៅឡើយទេ៕

កម្ពុជានាំចេញទំនិញមានទឹកប្រាក់ជាង៤.៥ពាន់លានដុល្លារ ទៅកាន់ប្រទេសសមាជិក RCEP

ភ្នំពេញ៖ កម្ពុជាបាននាំចេញទំនិញទៅកាន់ប្រទេសសមាជិកនៃកិច្ចព្រមព្រៀមភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) មានទឹកប្រាក់ ៤.៥៩ពាន់លានដុលា្លរ ក្នុងរយៈពេល៧ខែ ឆ្នាំ២០២៣ កើនឡើង ២១ភាគរយ ធៀបនឹងរយៈពេលដូចគ្នាកាលពីឆ្នាំមុន។តួលេខនាំចេញនេះ ត្រូវបានលើកឡើងក្នុងពិធីពិធីសម្ពោធ នៃការបោះពុម្ពផ្សាយសៀវភៅស្តីពី «អាសិប៖ ផ្នែកទី១ ភូមិសាស្ត្រនយោបាយ ភូមិសាស្ត្រសេដ្ឋកិច្ច និងការវិភាគផ្នែកច្បាប់” កាលពីថ្ងៃទី១៩ ខែសីហា ដោយមានការចូលរួមដោយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មឯកឧត្តម សួស យ៉ារ៉ា អនុប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា, ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ, ឯកឧត្តមសាស្ត្រាចារ្យ បណ្ឌិតសភាចារ្យ សុក ស៊ីផាន់ណា ប្រធានក្រុមប្រឹក្សាភិបាល នៃវិទ្យាស្ថានចក្ខុវិស័យអាស៊ី និងឯកឧត្តមសាស្រ្តចារ្យបណ្ឌិត ឆែម គាតរិទ្ធី អនុប្រធានអចិន្ត្រៃយ៍នៃក្រុមប្រឹក្សាភិបាលសាកលវិទ្យាល័យបច្ចេកវិទ្យានិងវិទ្យាសាស្ត្រកម្ពុជា។ឯកឧត្តមរដ្ឋមន្ត្រី បានលើកឡើងថា អាសិប ត្រូវបានគេរំពឹងថានឹងដើរតួយ៉ាងសំខាន់ក្នុងការធ្វើសមាហរណកម្មអាស៊ានទៅក្នុងសេដ្ឋកិច្ចពិភពលោក, ជំរុញកំណើនសេដ្ឋកិច្ចប្រកបដោយចីរភាព បរិយាប័ន្ន និងភាពធន់, ទប់ទល់នឹងទំនោរនៃការប្រឆាំងសកលភាវូបនីយកម្មនិងការការពារនិយម ហើយក៏ជាប្លុកពាណិជ្ជកម្មដ៏ធំបំផុតក្នុងពិភពលោកនាពេលបច្ចុប្បន្ន ដែលមានដប់ប្រាំប្រទេសជាមួយនឹងផលិតផលក្នុងស្រុកសរុបចំនួន ២៦,២ ទ្រីលានដុល្លារអាម៉េរិក។ អាសិប តំណាងឱ្យ ៣០% នៃផលិតផលក្នុងស្រុកសរុបរបស់ពិភពលោក, ២៨% នៃពាណិជ្ជកម្មពិភពលោក និង ៣២,៥% នៃការវិនិយោគសកល។សូមជម្រាបថា កិច្ចព្រមព្រៀង RCEP បានចូលជាធរមាន នៅថ្ងៃទី១ ខែមករា ឆ្នាំ២០២១ គឺជាកម្លាំងចលករដ៏សំខាន់ ក្នុងការជំរុញកំណើនពាណិជ្ជកម្ម ទំនិញ សេវាកម្ម និងវិនិយោគ កាន់តែធំជាងមុន ជាពិសេសផ្តល់ទីផ្សារបន្ថែមលើមុខទំនិញថ្មី ចំនួនរាប់រយមុខបន្ថែមទៀត សម្រាប់ការនាំចេញពីកម្ពុជា។កិច្ចព្រមព្រៀង RCEP មានការចូលរួមពីប្រទេសចំនួន១៥ រួមមានប្រទេសជាសមាជិកអាស៊ានទាំង១០ និងដៃគូពាណិជ្ជកម្មសេរី ចំនួន៥ទៀត ដូចជា អូស្ត្រាលី ចិន ជប៉ុន កូរ៉េខាងត្បូង និងណូវែលហ្សេឡង់ ដែលបានចាប់ផ្តើម បង្កើតដំបូងនៅ ឆ្នាំ២០១២ នៅភ្នំពេញ៕អត្ថបទ៖ វណ្ណៈ

ប្រជាជនជប៉ុន មានប្រតិកម្មផ្សេងគ្នាចំពោះផែនការបញ្ចេញសំណល់ទឹក ហ្វ៊ូគូស៊ីម៉ា

ជប៉ុន៖ ប្រជាជននៅទីក្រុងតូក្យូមានប្រតិកម្មផ្សេងគ្នា ដោយអ្នកខ្លះបានសម្តែងការគាំទ្រ បន្ទាប់ពីប្រទេសជប៉ុនបាននិយាយនៅថ្ងៃអង្គារ (២២ សីហា) នេះថា ខ្លួននឹងចាប់ផ្តើមបញ្ចេញទឹកវិទ្យុសកម្មជាងមួយលានតោន ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលត្រូវបានបំផ្លាញ នៅក្នុងប៉ុន្មានថ្ងៃខាងមុខនេះ ដោយដាក់ចូលទៅក្នុងផែនការដែលបានទាក់ទាញការរិះគន់យ៉ាងខ្លាំងពីប្រទេសចិន។ការបង្ហូរទឹក ដែលបានគ្រោងទុកនៅថ្ងៃព្រហស្បតិ៍ (២៤ សីហា) ខាងមុខនេះ ដោយប្រទេសជប៉ុននិយាយថាមានសុវត្ថិភាព ក៏បានប្រឈមមុខនឹងការរិះគន់ពីក្រុមនេសាទក្នុងស្រុកដែលភ័យខ្លាចការបំពុលសមុទ្រ និងការគំរាមកំហែងដល់ជីវភាពរបស់ពួកគេ។ ទន្ទឹមនឹងនេះដែរ ក្រុមបាតុកររាប់សិបនាក់បានឈរនៅមុខការិយាល័យរបស់នាយករដ្ឋមន្ត្រីជប៉ុន លោក Fumio Kishida នៅថ្ងៃអង្គារនេះ ដើម្បីតវ៉ាប្រឆាំងនឹងផែនការបញ្ចេញទឹកមួយនេះផងដែរ។ទីភ្នាក់ងារថាមពលអាតូមិកអន្តរជាតិ (IAEA) ដែលជាអង្គភាពឃ្លាំមើលនុយក្លេអ៊ែររបស់អង្គការសហប្រជាជាតិ បានបំភ្លឺផែនការនេះកាលពីខែកក្កដា ដោយនិយាយថា វាបានបំពេញតាមស្តង់ដារអន្តរជាតិ ហើយថាផលប៉ះពាល់ដែលវានឹងមានលើមនុស្ស និងបរិស្ថាន គឺមានតិចតួចប៉ុណ្ណោះ៕

ការប្រយុទ្ធគ្នាយ៉ាងខ្លាំងនៅតែបន្ត ជុំវិញជំរំយុទ្ធសាស្ត្រក្នុងរដ្ឋធានីស៊ូដង់ ភាគខាងត្បូង

ស៊ូដង់៖ ការប៉ះទង្គិចគ្នាយ៉ាងខ្លាំងក្លារវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) បានបន្តកាលពីថ្ងៃចន្ទ ជុំវិញជំរំកងរថពាសដែកយុទ្ធសាស្ត្រ នៅភាគខាងត្បូងនៃរដ្ឋធានី Khartoum។កងកម្លាំង RSF បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា ខ្លួនបានគ្រប់គ្រងជំរុំរថពាសដែក និងបានរឹបអូសយកគ្រឿងយុទ្ធោបករណ៍យោធា អាវុធ និងហាងលក់គ្រាប់រំសេវធំៗ។ ចំណែកកងទ័ព SAF បានបដិសេធដោយនិយាយថា កងកម្លាំងរបស់ខ្លួនបានបដិសេធការវាយប្រហារនេះ ហើយនៅតែរក្សាជំហរដដែល។កាលពីថ្ងៃចន្ទផងដែរនោះ ការប៉ះទង្គិចគ្នារវាងភាគីជម្លោះទាំងពីរបានបន្តនៅក្នុងសមរភូមិសំខាន់មួយទៀតក្នុងទីក្រុង Nyala រដ្ឋធានីនៃរដ្ឋ South Darfur នៅភាគខាងលិចប្រទេសស៊ូដង់។ អង្គការមនុស្សធម៌ក្នុងតំបន់បានព្រមានកាលពីថ្ងៃចន្ទថា ការប៉ះទង្គិចគ្នានេះបានបណ្តាលឱ្យមានការរំលោភលើមនុស្សធម៌ធ្ងន់ធ្ងរ ជាមួយនឹងកង្វះខាតស្បៀងអាហារ ឱសថ និងសម្ភារៈប្រើប្រាស់ប្រចាំថ្ងៃផ្សេងៗទៀតផងដែរ។ប្រទេសស៊ូដង់ បាននិងកំពុងមើលឃើញការប៉ះទង្គិចគ្នាយ៉ាងសាហាវរវាងកងទ័ព SAF និងកងកម្លាំង RSF នៅរដ្ឋធានី Khartoum និងតំបន់ផ្សេងទៀតចាប់តាំងពីថ្ងៃទី១៥ ខែមេសា មក ដែលបានបណ្តាលឱ្យមនុស្សយ៉ាងហោចណាស់៣.០០០នាក់បានស្លាប់ និងជាង៦.០០០នាក់រងរបួស នេះបើយោងតាមតួលេខដែលចេញផ្សាយដោយក្រសួងសុខាភិបាលប្រទេសស៊ូដង់៕

មេដឹកនាំកូរ៉េខាងជើង រិះគន់បណ្ដាមន្ត្រីជាន់ខ្ពស់ ដែលគ្មានភាពទទួលខុសត្រូវ ចំពោះការខូចខាតដោយទឹកជំនន់

កូរ៉េខាងជើង៖ ទូរទស្សន៍រដ្ឋ KRT បានរាយការណ៍នៅថ្ងៃអង្គារ (២២ សីហា) នេះថា មេដឹកនាំកូរ៉េខាងជើងលោក គីម ជុងអ៊ុន បានទៅពិនិត្យតំបន់ដែលរងការខូចខាតដោយទឹកជំនន់ក្នុងទីក្រុងកំពង់ផែ Nampho និងបានរិះគន់បណ្ដាមន្ត្រីជាន់ខ្ពស់ ជុំវិញកង្វះការត្រៀមខ្លួន និងការឆ្លើយតបមិនល្អ ចំពោះការខូចខាតទឹកជំនន់។ មានការព្រួយបារម្ភកាន់តែខ្លាំងឡើងអំពីវិបត្តិស្បៀងអាហារនៅក្នុងប្រទេសផ្តាច់ខ្លួនពីគេមួយនេះ។នៅក្នុងវីដេអូដែលបានចាក់ផ្សាយនៅលើកញ្ចក់ទូរទស្សន៍ KRT លោក Kim និងមន្ត្រីត្រូវបានគេមើលឃើញថាកំពុងសម្លឹងមើលជុំវិញទំនប់ដែលបាក់រលំ និងវាលស្រែដែលលិចទឹកកាលពីថ្ងៃចន្ទ (ថ្ងៃទី 21 ខែសីហា)។យោងតាមទីភ្នាក់ងារសារព័ត៌មានរដ្ឋ KCNA បានឱ្យដឹងថា ផ្ទៃដីជាង៥៦០ហិចតា រួមទាំងផ្ទៃដីដាំស្រូវជាង២៧០ហិចតា ត្រូវបានជន់លិច បន្ទាប់ពីទំនប់ទឹកមួយត្រូវបានបាក់ដោយទឹកសមុទ្រ ដោយសារតែការស្ថាបនារចនាសម្ព័ន្ធលូនៅតំបន់ Ansok មិនល្អ។ទីភ្នាក់ងារ KCNA បានបន្ថែមថា ក្នុងអំឡុងដំណើរចុះពិនិត្យនោះ លោក គីម បានស្តីបន្ទោសគណៈរដ្ឋមន្ត្រីរបស់នាយករដ្ឋមន្ត្រីកូរ៉េខាងជើង លោក គីម តុកហ៊ុន (Kim Tok Hun) ហើយបាននិយាយថា ការខូចខាតនេះមិនមែនជាគ្រោះមហន្តរាយធម្មជាតិទេ ប៉ុន្តែជាគ្រោះមហន្តរាយរបស់មនុស្ស ដែលបណ្តាលមកពីការមិនទទួលខុសត្រូវ និងការមិនគោរពវិន័យ៕

បារាំងចេញការប្រកាសអាសន្នពណ៌ក្រហម ជុំវិញបញ្ហារលកកម្ដៅនៅភាគខាងត្បូង

បារាំង៖ កាលពីរសៀលថ្ងៃច័ន្ទ (២១ សីហា) ប្រទេសបារាំង បានចេញការជូនដំណឹងពណ៌ក្រហម ដែលជាការព្រមានដ៏ធ្ងន់ធ្ងរបំផុតរបស់ខ្លួន សម្រាប់តំបន់ភាគខាងត្បូងចំនួន៤ ស្របពេលមានអាកាសធាតុក្តៅខ្លាំង ដែលបណ្ដាលឱ្យក្រុមអាជ្ញាធរក្នុងតំបន់ផ្អាកព្រឹត្តិការណ៍សង្គម និងបិទកន្លែងសាធារណៈប្រសិនបើចាំបាច់។កាលពីព្រឹកថ្ងៃច័ន្ទ ទីភ្នាក់ងារឧតុនិយមរបស់ប្រទេសបារាំង Meteo France (មេតេអូ ហ្វ្រង់) បានចេញការជូនដំណឹងពណ៌លឿងទុំ សម្រាប់ពាក់តំបន់កណ្តាលនៃទឹកដីរបស់ប្រទេសនេះ ដោយនិយាយថាសីតុណ្ហភាពនឹងឡើងដល់ចន្លោះពី៣៥អង្សាសេ ទៅ៣៨អង្សាសេ នៅក្នុងនាយកដ្ឋានភាគច្រើននៃតំបន់រងផលប៉ះពាល់។ទីក្រុង Vinsobres (វ៉ាំង សូប្រឹស) ភាគខាងត្បូងបានឡើងកម្តៅខ្លាំង ខណៈដែលទីក្រុងនេះបានកត់ត្រាសីតុណ្ហភាពខ្ពស់បំផុតគឺកម្រិត៤២អង្សាសេ។ ទីក្រុង Perpignan និងទីក្រុង Toulouse ក៏ទទួលការវាយប្រហារពីកម្ដៅផងដែរ ខណៈសីតុណ្ហភាពកើនឡើងដល់៣៩អង្សាសេ។ដោយថ្លែងតាមទូរទស្សន៍ BFM កាលពីថ្ងៃច័ន្ទ រដ្ឋមន្ត្រីសុខាភិបាលបារាំង លោក Aurelien Rousseau (អូរ៉ែលីយាំង រូសូ) មានការព្រួយបារម្ភយ៉ាងខ្លាំង អំពីបញ្ហាអាកាសធាតុក្តៅ ដែលអាចអូសបន្លាយរហូតដល់ចុងសប្តាហ៍ ហើយបានណែនាំដល់ក្រុមមនុស្សងាយរងគ្រោះ ឱ្យអនុវត្តតាមវិធានការបង្ការ ដើម្បីចៀសវាងការចូលមន្ទីរពេទ្យ៕

អ្នករួចពីគ្រោះថ្នាក់នៃគ្រោះមហន្តរាយទូកដឹកជនអន្តោប្រវេសន៍ ចេញពីតំបន់ Cape Verde ឆ្ពោះទៅសេណេហ្គាល់

សេណេហ្គាល់៖ អ្នករួចផុតពីគ្រោះថ្នាក់ពីការធ្វើដំណើរតាមទូកដឹកជនអន្តោប្រវេសន៍ដ៏គ្រោះថ្នាក់ ដែលមនុស្សជាង៦០នាក់បានស្លាប់ បានចេញដំណើរពីកោះ Cape Verde ទៅកាន់ប្រទេសសេណេហ្គាល់ មានរយៈពេល១សប្តាហ៍បន្ទាប់ពីពួកគេត្រូវបានជួយសង្គ្រោះនៅសមុទ្រនិងបានចំណាយពេលជាង១ខែ នៃការរសាត់អណ្តែត។ មនុស្សជាង១០០នាក់ បានជិះនៅលើទូកនេសាទមួយគ្រឿង នៅក្នុងភូមិ Fass Boye ប្រទេសសេណេហ្គាល់ កាលពីថ្ងៃទី១០ ខែកក្កដា ក្នុងផ្លូវធ្វើដំណើរ ដែលពួកគេសង្ឃឹមថាបានទៅដល់អឺរ៉ុប។ ទូកត្រូវបានរកឃើញដោយទូកនេសាទជនជាតិអេស្បាញនៅជិតប្រជុំកោះ Cape Verde កាលពីថ្ងៃទី១៥ ខែសីហា ដែលមានចម្ងាយរាប់រយម៉ាយស៍។ មនុស្សប្រមាណ៣៨នាក់ ត្រូវបានជួយសង្គ្រោះ ប៉ុន្តែមនុស្សជាង៦០នាក់នៅបាត់ខ្លួន ដែលត្រូវបានសន្និដ្ឋានថាស្លាប់។ ការធ្វើអន្តោប្រវេសន៍ទៅកាន់អឺរ៉ុបពីអាហ្វ្រិកខាងលិចគឺជាការធ្វើដំណើរមានការគំរាមកំហែងដល់ជីវិត ទោះបីតាមរថយន្តដឹកទំនិញនៅវាលខ្សាច់សាហារ៉ា ឬតាមទូកឆ្លងកាត់សមុទ្រម៉េឌីទែរ៉ាណេ។ អ្នកជំនាញអន្តោប្រវេសន៍និយាយថា ផ្លូវទៅកាន់កោះ Canary ប្រទេសអេស្បាញ ក្លាយជាទីពេញនិយមខ្លាំងព្រោះតែការឆ្លងកាត់តាមប្រទេសលីប៊ី ត្រូវបានការពារយ៉ាងតឹងរ៉ឹង។កាលពីថ្ងៃចន្ទ អាជ្ញាធរប្រទេសសេណេហ្គាល់ បាននាំយកជនអន្តោប្រវេសន៍៣៧នាក់ ជាអ្នកដែលត្រូវបានជួយសង្គ្រោះនៅឆ្នេរកោះ Cape Verde កាលពីសប្តាហ៍មុន បន្ទាប់ពីទូករបស់ពួកគេបានគាំងដំណើរដោយគ្មានប្រេងនៅលើសមុទ្រទ្រអាត្លង់ទិករយៈពេលច្រើនសប្តាហ៍៕

ប្រមុខកងរក្សាសន្តិភាពUNលើកទឹកចិត្តឲ្យមានកិច្ចសហប្រតិបត្តិការដ៏ឆាប់រហ័សនិងប្រកបដោយសុវត្ថិភាពសម្រាប់ការដកទ័ពចេញពីប្រទេសម៉ាលី

UN៖ អ្នកនាំពាក្យUN បាននិយាយកាលពីថ្ងៃចន្ទថា ប្រមុខកងរក្សាសន្តិភាពរបស់អង្គការសហប្រជាជាតិ បានជំរុញបេសកកម្មនៅក្នុងប្រទេសម៉ាលីឲ្យផ្ទេរភារកិច្ចទៅឲ្យអាជ្ញាធរ និងដៃគូឲ្យបានឆាប់រហ័សសម្រាប់ការដកខ្លួនចេញពីប្រទេសនេះដោយសុវត្ថិភាព។លោក ស្ទេហ្វែន ឌូចារិក ( Stephane Dujarric) ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានថ្លែងថា៖«លោក ហ្សង់ព្យែរ ឡាកគ្រ័រ (Jean-Pierre Lacroix) បានបញ្ចប់ដំណើរទស្សនកិច្ចរបស់គាត់ទៅកាន់ប្រទេសនេះ បន្ទាប់ពីកិច្ចប្រជុំជាបន្តបន្ទាប់ជាមួយមន្ត្រីជាន់ខ្ពស់នៃរដ្ឋាភិបាលអន្តរកាល រួមទាំងនាយករដ្ឋមន្ត្រី លោក ចូហ្គែល កូកាឡា ម៉ៃហ្គា (Choguel Kokalla Maiga) នៅចុងបញ្ចប់នៃដំណើរទស្សនកិច្ចរយៈពេលពីរថ្ងៃរបស់លោកឡាគ្រ័រ (Lacroix)។លោក ឌូចារិក បាននិយាយថា លោកឡាក្រូអ៊ីក បានពិភាក្សាអំពីមេរៀនដែលបានរៀនក្នុងអំឡុង ដំណាក់កាលទី១នៃការដកខ្លួនចេញរបស់បេសកកម្មនេះដែលរំពឹងថា នឹងត្រូវបញ្ចប់នៅចុងខែនេះ។កងរក្សាសន្តិភាពបានរាយការណ៍ថា កាលពីសប្តាហ៍មុន សមាជិកនៃបេសកកម្មដែលគេស្គាល់ថា បេសកកម្មរក្សាស្ថិរភាពរួមបញ្ចូលគ្នាពហុភាគីរបស់អង្គការសហប្រជាជាតិនៅប្រទេសម៉ាលី(MINUSMA) បានដកចេញពីមូលដ្ឋានតូចៗមួយចំនួនរបស់ពួកគេ នៅក្នុងតំបន់Timbuktu ភាគខាងជើង៕

បណ្ដាញសង្គម

ព័ត៌មានថ្មីៗ

បញ្ជាការកងទ័ពជើងទឹកធ្វើពិធីសូត្រមន្តប្រោះព្រំជូននាយនាវី នាយនាវីរង និងពលនាវិកក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ

សម្ដេចតេជោ និពន្ធចម្រៀងពីរបទរំលឹកដល់ខួបលើកទី ៥១ឆ្នាំ នៃថ្ងៃសម្ដេចធ្លាក់ខ្លួនពិការនៅសមរភូមិ

ពលរដ្ឋអរគុណរាជរដ្ឋាភិបាលចំពោះការបន្តផ្តល់រថយន្តក្រុងឥតគិតថ្លៃ ទោះបីស្ថិតក្នុងវិបត្តិប្រេងឥន្ធនៈសកល

ពិធីប្រគល់ភារកិច្ចត្រូវបានធ្វើឡើងសម្រាប់ប្រធានាធិបតីអ៊ីរ៉ាក់ដែលជាប់ឆ្នោតថ្មី

ក្រុមបាតុករប្រមូលផ្តុំគ្នានៅទីក្រុង Tel Aviv តវ៉ាប្រឆាំងរដ្ឋាភិបាល ខណៈប្រតិបត្តិការអាមេរិក និងអ៊ីស្រាអែលប្រឆាំងអ៊ីរ៉ង់បន្ត

លោក Netanyahu នៅលីបង់ និយាយថា «សង្គ្រាមនៅតែបន្ត និងមានការងារជាច្រើនទៀតដែលត្រូវធ្វើ»

មន្ត្រីអាមេរិក បង្ហាញបន្ទាត់ក្រហមចំនួន ៦ ក្នុងការចរចាជាមួយភាគីអ៊ីរ៉ង់

លោក Orban ត្រូវបានទម្លាក់ចេញពីតំណែងបន្ទាប់ពី១៦ឆ្នាំ ខណៈប្រជាជនហុងគ្រីសម្រុកទៅរកគូប្រជែងដែលគាំទ្រសហភាពអឺរ៉ុប

អ្នកជំនាញ៖ ការបិទផ្លូវអ៊ីរ៉ង់របស់សហរដ្ឋអាមេរិក នឹងក្លាយជាកិច្ចខិតខំប្រឹងប្រែងផ្នែកយោធាដ៏ធំ

ស្រ្ដីទីមួយកម្ពុជា៖ «ការលះបង់ដ៏ធំធេងរបស់វីរយុទ្ធជនទាំងអស់សម្រាប់ជាតិមាតុភូមិ គឺជាការផ្តល់សន្តិភាព និងឱកាសរីករាយឆ្នាំថ្មីដល់យើងខ្ញុំទាំងអស់គ្នា!»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877