BTV NEWS

ស្នងការរាជធានី បញ្ជារឲ្យរឹតបន្តឹងកាន់តែខ្លាំង លើម៉ូតូកៃច្នៃបំពង់ស៊ីម៉ាំងបង្កសម្លេងរំខានដល់ពលរដ្ឋ តាមទីសាធារណៈ

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

សន្តិសុខ និង សង្គម

ស្រីលង្កា បិទសាលារៀន ខណៈមនុស្ស១៤នាក់បានស្លាប់ក្នុងទឹកជំនន់រដូវមូសុង

មជ្ឈមណ្ឌលគ្រប់គ្រងគ្រោះមហន្តរាយរបស់ប្រទេសស្រី លង្កា បាននិយាយកាលពីថ្ងៃអាទិត្យទី២មិថុនា ថា ទឹកជំនន់ដ៏គំហុក បំណាក់ដី និងការដួលរលំដើមឈើបានសម្លាប់មនុស្សយ៉ាងហោចណាស់ ១៤នាក់នៅក្នុងប្រទេសស្រីលង្កា ខណៈប្រទេសកោះមួយនេះ ត្រូវបានវាយប្រហារដោយព្យុះរដូវមូសុង។មនុស្សមួយចំនួនបានលង់ទឹកស្លាប់ រួមទាំងសមាជិកបីនាក់នៃគ្រួសារតែមួយ ដែលត្រូវបានទឹកហូរកួចយកទៅ នៅជិតរដ្ឋធានីកូឡុំបូ (Colombo) កាលពីថ្ងៃអាទិត្យ។ មជ្ឈមណ្ឌលគ្រប់គ្រងគ្រោះមហន្តរាយ (DMC) បាននិយាយថា អ្នកផ្សេងទៀតត្រូវបានកប់ទាំងរស់នៅក្នុងបំណាក់ដី រួមទាំងក្មេងស្រីអាយុ ១១ ឆ្នាំ និងយុវជនវ័យ ២០ឆ្នាំម្នាក់។មជ្ឈមណ្ឌលគ្រប់គ្រងគ្រោះមហន្តរាយដដែលនេះ បាននិយាយថា មនុស្ស៦នាក់ផ្សេងទៀតបានស្លាប់នៅពេលដើមឈើបានដួលរលំលើពួកគេនៅក្នុងស្រុកចំនួន ៧ ចាប់តាំងពីខ្យល់មូសុងបោកបក់កាន់តែខ្លាំង កាលពីថ្ងៃទី ២១ ខែឧសភា។ស្របពេលស្រីលង្កាពឹងផ្អែកលើភ្លៀងមូសុងតាមរដូវសម្រាប់ប្រព័ន្ធធារាសាស្រ្ត ក៏ដូចជាវារីអគ្គិសនី អ្នកជំនាញបានព្រមានថាប្រទេសនេះប្រឈមនឹងទឹកជំនន់ញឹកញាប់ជាងមុន ខណៈពិភពលោកកាន់តែក្តៅដោយសារតែបម្រែបម្រួលអាកាសធាតុ។មជ្ឈមណ្ឌលគ្រប់គ្រងគ្រោះមហន្តរាយខាងលើ បាននិយាយថា ស្រុកចំនួន ២០ ក្នុងចំណោមស្រុកទាំង ២៥ ដែលត្រូវបានរងផលប៉ះពាល់ដោយភ្លៀងធ្លាក់ខ្លាំងរបស់ប្រទេសនេះ ហើយបានចេញការព្រមានដល់ប្រជាជនដែលរស់នៅតាមច្រាំងទន្លេសំខាន់ៗ ឱ្យផ្លាស់ទីទៅកាន់ទីទួលខ្ពស់មានសុវត្ថិភាព៕

ត្រឹម១សប្ដាហ៍ សមត្ថកិច្ចឃាត់ខ្លួនក្មេងទំនើងជាង ២០០នាក់ នៅទូទាំងប្រទេស

ភ្នំពេញ៖ បញ្ជាដ៏ម៉ឺងម៉ាត់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ឱ្យអាជ្ញាធរគ្រប់រាជធានី ខេត្ត បង្កើនការយកចិត្តទុកដាក់បង្ក្រាបក្រុមក្មេងទំនើង នៅគ្រប់មូលដ្ឋាន បានធ្វើឱ្យលទ្ធផលកិច្ចប្រតិបត្តិការ របស់កម្លាំងនគរបាលជាតិ នៃក្រសួងមហាផ្ទៃ ដែលបាននឹងកំពុងអនុវត្តយ៉ាងសកម្មលើការងារនេះ ចាប់តាំងពីដើមនីតិកាលទី៧ នៃរដ្ឋសភាមកនោះ កាន់តែមានប្រសិទ្ធភាពខ្ពស់។លោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានឱ្យដឹងថា ក្នុងរយៈពេល៧ថ្ងៃ បន្ទាប់ការចេញបញ្ជាដ៏មុតស្រួច របស់សម្ដេចធិបតីនាយករដ្ឋមន្រ្តី កម្លាំងនគបាលជាតិ ចាប់ពីកម្រិតអគ្គស្នងការដ្ឋាន រហូតដល់ប៉ុស្តិ៍នគរបាលឃុំ សង្កាត់ ទូទាំងប្រទេស បានបង្ក្រាបក្រុមក្មេងទំនើងចំនួន ៦៥ករណី ឃាត់ខ្លួនយុវជនសរុបចំនួន ២២៣នាក់ កើនខ្ពស់ជិត ២ដងធៀបនឹងកិច្ចប្រតិបត្តិការកន្លងទៅ ។អ្នកនាំពាក្យរងដដែល បានបន្តថា ស្របតាមគោលនយោបាយរាជរដ្ឋាភិបាល និងអនុសាសន៍ ដ៏ខ្ពង់ខ្ពស់របស់សម្ដេចមហាបវរធិបតី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដៅយកបញ្ហាក្មេងទំនើង ជាកិច្ចការអាទិភាពមួយក្នុងចំណោមអាទិភាព៦ ដែលត្រូវយកចិត្តទុកដាក់ដោះស្រាយ ចាប់ពីដើមនីតិកាលទី៧ រួមទាំងការពង្រឹងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព ។លោក ទូច សុឃៈ បន្ថែមថា យុវជនទាំងនោះ នឹងប្រឈមុខវិធានការរដ្ឋបាល និងវិធានការច្បាប់ ក្នុងនោះចំពោះវិធានការរដ្ឋបាល គឺការអប់រំ ណែនាំ និងធ្វើកិច្ចសន្យាមុនអនុញ្ញាតឱ្យត្រឡប់ទៅផ្ទះ សម្រាប់ករណីស្រាលៗ ប៉ុន្តែត្រូវបានរកឃើញពាក់ព័ន្ធនឹងបទល្មើសព្រហ្មទណ្ឌ នឹងត្រូវកសាងសំណុំរឿងបញ្ជូនទៅតុលាការ។ គួរកត់សម្គាល់ថា ក្នុងចំណោមករណីក្មេងទំនើងទូទាំងប្រទេស រាជធានីភ្នំពេញ មានករណីនេះច្រើនជាងគេ សម្រាប់រាជធានីភ្នំពេញ ក្នុងកិច្ចប្រតិបត្តការរយៈពេល៧ថ្ងៃមកនេះ ឯកឧត្តមអភិសន្តិបណ្ឌិត ស សុខា បានណែនាំឱ្យស្នងការដ្ឋានរាជធានីភ្នំពេញ ធ្វើតេសទឹកមូត្រលើក្រុមក្មេងទំនើង ដែលឃាត់ខ្លួនបានសរុប ដោយជាលទ្ធផលបានរកឃើញថាជាង ៥០ភាគរយ មានសារធាតុញៀនក្នុងខ្លួន។ព្រោះហេតុដូច្នេះហើយ បានជាក្នុងឱកាសដឹកនាំកិច្ចប្រជុំ ពិនិត្យការងារប្រយុទ្ធប្រឆាំងគ្រឿងញៀន នៅខេត្តបន្ទាយមានជ័យ និងខេត្តបាត់ដំបង កាលពីថ្ងៃទី២៧ និង២៨ ខែសភា ឆ្នាំ២០២៤ ឯកឧត្តមអភិសន្តិបណ្ឌិត បានណែនាំឱ្យរដ្ឋបាលខេត្តទាំងពីរ និងរាជធានី ខេត្ត ផ្សេងទៀត បង្កើនការយកចិត្តទុកដាក់បង្ក្រាបករណីក្មេងទំនើង ដោយភ្ជាប់នឹងការស្រាវជ្រាវឈានទៅបង្ក្រាបបទល្មើសគ្រឿងញៀន៕ អត្ថបទ បាន សុខរិទ្ធិ

អ្នកស្លាប់ដោយសាររថយន្តក្រុងធ្លាក់ចូលក្នុងជ្រោះ ក្នុងទីក្រុង Jammu ប្រទេសឥណ្ឌា កើនឡើងដល់ ២២នាក់

អាជ្ញាធរបាននិយាយថា រថយន្តក្រុងដឹកអ្នកធ្វើធម្មយាត្រាមួយគ្រឿង បានធ្លាក់ចូលទៅក្នុងជ្រលងជ្រោះជ្រៅមួយកន្លែង ក្នុងដែនដីសហព័ន្ធ Jammu ភាគខាងជើង កាលពីថ្ងៃព្រហស្បតិ៍ បណ្តាលឲ្យ មនុស្សយ៉ាងហោចណាស់ ២២ នាក់ស្លាប់ និងរាប់សិបនាក់ផ្សេងទៀតរងរបួស។អ្នកនាំពាក្យនគរបាល បាននិយាយថា រថយន្តក្រុងដែលបានចាប់ផ្តើមធ្វើដំណើរក្នុងទីក្រុង គូរូស្សេត្រា(Kurukshetra) ក្នុងរដ្ឋ Haryana ភាគខាងជើង បានធ្វើដំណើរទៅកាន់ព្រះវិហារហិណ្ឌូមួយកន្លែងក្នុងទីក្រុង Jammu នៅពេលនោះ រថយន្តបានធ្លាក់ចូលទៅក្នុងជ្រលងជ្រោះជ្រៅ។មនុស្សយ៉ាងហោចណាស់៦០នាក់ដែលរងរបួស ត្រូវបានបញ្ជូនទៅកាន់មហាវិទ្យាល័យវេជ្ជសាស្ត្ររបស់រដ្ឋាភិបាល ក្នុងទីក្រុង Jammu ដើម្បីព្យាបាល។មន្ត្រីនគរបាលម្នាក់ និយាយថា ប្រតិបត្តិការជួយសង្គ្រោះ នៅបន្ត។ រថយន្តក្រុងដែលបានជួបឧបទ្ទវហេតុនេះ បានផ្ទុកមនុស្សច្រើនលើសទម្ងន់ ដែលមានអ្នកដំណើររហូតដល់៨០នាក់ ជិះនៅលើរថយន្តក្រុងនេះ។

ការវាយប្រហារតាមអាកាសរបស់អ៊ីស្រាអែល ធ្លាក់លើជំរំ Jabalia ខណៈប្រជាជនប៉ាឡេស្ទីនត្រឡប់ទៅមើលការខូចខាត

វីដេអូ ត្រូវបានថតនៅពេលការវាយប្រហារតាមអាកាសរបស់អ៊ីស្រាអែល បានវាយប្រហារ ទៅលើជំរំ Jabalia កាលពីថ្ងៃព្រហស្បតិ៍។ ប្រជាជន និយាយថា ពួកគេបានវិលត្រឡប់មកវិញ បន្ទាប់ពីកងកម្លាំងអ៊ីស្រាអែល បានដកខ្លួនចេញពីផ្នែកមួយនៃជំរំនៅភាគខាងជើងតំបន់ហ្កាហ្សាស្ទ្រីប។ លោក Ali Badran ជាជនភៀសខ្លួនប៉ាឡេស្ទីន បាននិយាយថា លោកបានភៀសខ្លួនទៅកាន់ជំរំមួយកន្លែងនៅឆ្នេរសមុទ្រ នៅពេលដែលកងកម្លាំងកាន់កាប់ បានមកដល់ជំរំ Jabalia ហើយនៅពេលដែលយើងទទួលដំណឹងថាពួកគេបានដកខ្លួនចេញពីជំរំនោះ យើងក៏បានត្រឡប់ទៅវិញ។នៅពេលដែលយើងត្រឡប់ទៅជំរំ Jabalia ពួកយើងមានការភ្ញាក់ផ្អើលជាខ្លាំងចំពោះហេតុការណ៍ដែលបានកើតឡើងនៅជំរំ គឺការបំផ្លិចបំផ្លាញ។ លំនៅឋានជាច្រើនខ្នង ត្រូវបានបំផ្លាញរាបដល់ដី និងមានភ្លើងឆេះ ហើយអ្វីដែលមិនបានឆេះនោះ ក៏ត្រូវបានបំផ្លាញទាំងស្រុង។យោធារបស់ប្រទេស បាននិយាយថា កងកម្លាំងអ៊ីស្រាអែល បានដណ្តើមការគ្រប់គ្រងតំបន់ទ្រនាប់មួយកន្លែងនៅតាមព្រំដែនរវាងតំបន់ហ្កាហ្សាស្ទ្រីប និងប្រទេសអេហ្ស៊ីប ដោយផ្តល់អំណាចដល់អ៊ីស្រាអែលដោយប្រសិទ្ធភាព នៅលើព្រំដែនដីគោកទាំងមូលនៃដែនដីប៉ាឡេស្ទីន។ អ៊ីស្រាអែល បានបន្តការវាយឆ្មក់លើទីក្រុង Rafah នៅភាគខាងត្បូងតំបន់ហ្កាហ្សា ទោះបីជាមានសេចក្តីបង្គាប់ពីតុលាការយុត្តិធម៌អន្តរជាតិ(ICJ) ឲ្យបពា្ឈប់ការវាយលុកលើទីក្រុងដែលមានប្រជាជនពាក់កណ្តាល នៃប្រជាជន២,៣ លាននាក់ នៅហ្កាហ្សា ដែលបានភៀសខ្លួនចេញកាលពីពេលមុន។អាជ្ញាធរសុខាភិបាលបាននិយាយថា ប្រជាជនប៉ាឡេស្ទីនជាង ៣៦.០០០ នាក់ត្រូវបានសម្លាប់ក្នុងការវាយលុករបស់អ៊ីស្រាអែលនៅតំបន់ហ្កាហ្សា។

មនុស្សបីនាក់ស្លាប់នៅក្នុងការបាញ់ប្រហារនៅទីក្រុង មីនីប៉ូលីស រួមទាំងមន្រ្តីនគរបាលនៅអាមេរិក

យោងតាមប្រព័ន្ធផ្សព្វផ្សាយក្នុងស្រុកដែលសំអាងប្រភពពីសមត្ថកិច្ចបានឱ្យដឹងថា មនុស្ស៣ នាក់ រួមទាំងមន្ត្រីនគរបាលម្នាក់ត្រូវបានសម្លាប់ និងជាច្រើននាក់ទៀតបានរងរបួសក្នុងហេតុការណ៍បាញ់ប្រហារ នៅទីក្រុង មីនីប៉ូលីស (Minneapolis) សហរដ្ឋអាមេរិក កាលពីថ្ងៃព្រហស្បតិ៍ ៣០ ឧសភាសប្ដាហ៍នេះ។ ក្រុមអាជ្ញាធរបាននិយាយថា ជនសង្ស័យក៏បានស្លាប់ផងដែរក្នុងពេលបាញ់តដៃជាមួយនគរបាល។ ហើយជនល្មើសត្រូវបានកំណត់អត្តសញ្ញាណ មានឈ្មោះថា ចាម៉ាល់ មីតឈេល (Jamal Mitchell)វ័យ២៨ឆ្នាំ។ ស្នងការនគរបាលក្រុង មីនីប៉ូលីស បាននិយាយនៅលើបណ្តាញសង្គមរបស់ខ្លួនថា ក្រុមមន្រ្តីកំពុង ឆ្លើយតបទៅនឹងឧបទ្ទវហេតុសកម្មមួយ ដែលមានមនុស្ស៦ នាក់ក្នុងនោះ២នាក់ជាមន្ត្រីនគរបាល ត្រូវបានរាយការណ៍ថាបានរងរបួស។ ស្នងការនគរបាលខាងលើ បាននិយាយថា ក្រោយហេតុការណ៍បាញ់បោះដោយសេរី ស្ថានភាពនៅមិនទាន់ល្អនៅឡើយ ដោយជំរុញឱ្យសាធារណជន ជៀសវាងទៅជិតតំបន់មួយនៃសង្កាត់ វៃធីអ័រ (Whittier) នៃទីក្រុងដែលមានករណីបាញ់បោះបានកើតឡើង។ពុំមានព័ត៌មានលម្អិតផ្លូវការបន្ថែមទៀតភ្លាមៗទេ។សមត្ថកិច្ច បានរាយការណ៍បឋមពីហេតុការណ៍នេះនៅម៉ោងប្រហែល ៦ និង ១៥ នាទីល្ងាច ថ្ងៃព្រហស្បតិ៍សប្ដាហ៍នេះ ម៉ោងនៅសហរដ្ឋអាមេរិក ។ ស្ថានីយ៍ទូរទស្សន៍ មីនីប៉ូលី KMSP ដែលជាបុត្រសម្ព័ន្ធរបស់ទូរទស្សន៍ Fox បានរាយការណ៍ថា មនុស្ស៦ នាក់ត្រូវបានបាញ់ រួមទាំងមន្រ្តីនគរបាល២ នាក់ និងជនស៊ីវិល ៤ នាក់ ហើយមន្រ្តីម្នាក់ និងជនស៊ីវិល២ ផ្សេងទៀតបានស្លាប់។ ស្ថានីយ៍ទូរទស្សន៍ក្នុងស្រុកមួយផ្សេងទៀតដែលដកស្រង់ប្រភពពីបណ្ដាញសារព័ត៌មាន ABC សាខា របស់ប្រព័ន្ធផ្សព្វផ្សាយ KSTP បានរាយការណ៍ថា មន្ត្រីម្នាក់បានស្លាប់ និងម្នាក់ទៀតកំពុងសម្រាកព្យាបាលនៅមន្ទីរពេទ្យ ខណៈជនស៊ីវិលជាច្រើននាក់បានរងរបួសដោយសារគ្រាប់កាំភ្លើង៕

[UPDATE] មនុស្សជាង២០នាក់បានស្លាប់ ដោយសាររលកកម្តៅនៅប្រទេសឥណ្ឌា

ប្រព័ន្ធផ្សព្វផ្សាយ NDTV ដែលមានមូលដ្ឋាននៅទីក្រុងញូវដេលី បានរាយការណ៍នៅថ្ងៃសុក្រសប្ដាហ៍នេះថា ប្រជាជនឥណ្ឌាជាង ២០ នាក់បានស្លាប់ដោយសារកម្ដៅដ៏ក្តៅ ដែលនៅតែបន្តគ្របដណ្ដប់នៅក្នុងរដ្ឋជាច្រើននៃប្រទេសឥណ្ឌា។ យោងតាមរបាយការណ៍បានឱ្យដឹងថា មនុស្ស ១៥ នាក់បានស្លាប់នៅក្នុងស្រុក អូរ៉ានហ្កាបាត (Aurangabad) នៃរដ្ឋ ប៊ីហា (Bihar) ភាគខាងកើតប្រទេសឥណ្ឌា និង ១០ នាក់ទៀតបានស្លាប់នៅក្នុងទីក្រុង រ៉ូកេឡា (Rourkela) នៃរដ្ឋ អូឌីសា (Odisha) ដោយសារតែរលកកម្ដៅនេះ។ ប្រព័ន្ធផ្សព្វផ្សាយមួយចំនួនបានដាក់ចំនួនអ្នកស្លាប់នៅក្នុងរដ្ឋ ប៊ីហា (Bihar) តែមួយគត់រហូតដល់ជាង ៥០នាក់ ប៉ុន្តែមិនទាន់មានការបញ្ជាក់ជាផ្លូវការនៅឡើយទេ។ តំបន់ខ្លះនៃភាគពាយព្យ និងភាគកណ្តាលនៃប្រទេសឥណ្ឌាឥណ្ឌា បាននិងកំពុងជួបប្រទះរលកកម្ដៅ ធ្ងន់ធ្ងរអស់រយៈពេលជាច្រើនសប្តាហ៍មកនេះ ហើយសីតុណ្ហភាពនៅក្នុងសង្កាត់ ម៉ុនហ្គេសពួរ (Mungeshpur)របស់រដ្ឋធានី ដេលី(Delhi) បានឈានដល់កម្រិតខ្ពស់បំផុតគឺ ៥២,៩ អង្សាសេ កាលពីថ្ងៃពុធសប្ដាហ៍នេះ។ រលកម្ដៅនេះ ក៏កំពុងគំរាមកំហែងដល់ប្រជាពលរដ្ឋឥណ្ឌា ចេញទៅបោះឆ្នោតសកលផងដែរ៕

មនុស្សជាង៥០នាក់សម្លាប់ដោយសារព្យុះស៊ីក្លូន រីម៉ាល់ នៅឥណ្ឌា និងបង់ក្លាដែស ខណៈកុមាររាប់សែននាក់គ្មានផ្ទះសម្បែង

យោងតាមមន្ត្រីក្នុងតំបន់បានឱ្យដឹងថា មនុស្សជាង ៥០ នាក់បានស្លាប់នៅក្នុងប្រទេសឥណ្ឌា និងបង់ក្លាដែស បន្ទាប់ពីព្យុះស៊ីក្លូនត្រូពិក រីម៉ាល់ (Remal) បានវាយប្រហារលើតំបន់នេះដោយមានភ្លៀងធ្លាក់ខ្លាំង និងខ្យល់បក់ខ្លាំងផងដែរ។អង្គការសង្គ្រោះកុមារ Save the Children បាននិយាយថាកុមារជាង ២៧០.០០០នាក់នៅក្នុងប្រទេសបង់ក្លាដែសបានបាត់បង់ផ្ទះសម្បែងរបស់ពួកគេ ឬកំពុងរស់នៅក្នុងផ្ទះដែលរងការខូចខាត បន្ទាប់ពីព្យុះស៊ីក្លូនដ៏ខ្លាំងក្លាមួយបានបោកបក់បំប៉ើងដំបូលផ្ទះ ជន់លិចភូមិស្រុក និងកាត់ផ្តាច់ចរន្តអគ្គិសនីសម្រាប់មនុស្សជាង១៧លាននាក់។ ព្យុះស៊ីក្លូន រីម៉ាល់ បានបោកបក់ពាសពេញភាគនិរតីនៃប្រទេសបង់ក្លាដែសកាលពីថ្ងៃទី ២៦ ខែឧសភា ដោយនាំមកនូវខ្យល់ក្នុងល្បឿន១២០ គីឡូម៉ែត្រ ក្នុងមួយម៉ោង និងទឹកហក់ឡើងកម្ពស់ពី ២ទៅ៣,៥ លើសពីកម្រិតធម្មតា។ មនុស្សប្រហែល ៣,៧៥ លាននាក់ត្រូវបានរងផលប៉ះពាល់ដោយសារព្យុះ រួមទាំងកុមារប្រមាណ១លាន៦សែនលាននាក់ ។ យោងតាមការវាយតម្លៃរបស់រដ្ឋាភិបាលរហូតមកដល់ពេលនេះ លំនៅឋានយ៉ាងហោចណាស់១៥០.០០០ ខ្នង ត្រូវបានបំផ្លាញ ឬខូចខាតនៅទូទាំង១៩ ស្រុក ដែលប៉ះពាល់ដល់មនុស្សប្រមាណ ៦៣៩.០០០នាក់ ក្នុងនោះប្រហែល ២៧៤.០០០នាក់ជាកុមារ។ គ្លីនិកសុខភាពសហគមន៍នៅតំបន់ជាច្រើនមិនដំណើរការទេ ដោយសារទឹកជំនន់៕

លោកអភិបាលខណ្ឌ៧មករា ដឹកនាំកម្លាំងគណៈបញ្ជាការឯកភាពរៀបចំសណ្ដាប់ធ្នាប់ តំបន់លក់ម៉ូតូគីរីរម្យ

ភ្នំពេញ ៖ កម្លាំងគណៈបញ្ជាការឯកភាពខណ្ឌ៧មករា បន្តចុះរៀបចំសណ្ដាប់ធ្នាប់សាធារណៈ នៅតាមបណ្ដោយមហាវិថីព្រះសីហនុ តំបន់លក់ម៉ូតូគីរីរម្យ ឲ្យមានរបៀបរាបរយ និងរក្សារចិញ្ជើមផ្លូវសម្រាប់អ្នកថ្មើរ។ការចុះរៀបចំសណ្ដាប់ធ្នាប់នេះ ធ្វើឡើងនៅព្រឹកថ្ងៃទី៣០ ខែឧសភា ឆ្នាំ២០២៤ ដឹកនាំផ្ទាល់ដោយលោក ថេង សុថុល អភិបាលខណ្ឌ៧មករានិងជាប្រធានគណៈបញ្ជាការឯកភាពខណ្ឌ៧មករា ចុះរៀបចំសណ្ដាប់ធ្នាប់សាធារណ បរិស្ថានអនាម័យ ឲ្យមានភាពល្អប្រសើរ ដើម្បីសោរភ័ណ្ឌភាពតាមផ្លូវ និងរក្សារចិញ្ជើមផ្លូវសម្រាប់អ្នកថ្មើរផងដែរ។ ដែលស្ថិតនៅតាមបណ្ដោយមហាវិថីព្រះសីហនុ តំបន់លក់ម៉ូតូគីរីរម្យ មូលដ្ឋានសង្កាត់បឹងព្រលឹត ខណ្ឌ៧មករា រាជធានីភ្នំពេញ។ក្នុងប្រតិបត្តិការចុះរៀបចំសណ្ដាប់ធ្នាប់នេះផងដែរ លោក ណុប ផា អភិបាលរងទទួលផែនសណ្ដាប់ធ្នាប់ បានប្រាប់BTV ឲ្យដឹងថាផងដែរថា ដោយមានការណែនាំពីលោកអភិបាលរាជធានីភ្នំពេញ និងដឹកនាំផ្ទាល់ពីលោក ថេង សុថុល អភិបាលខណ្ឌ៧មករា បានចុះរៀបចំសណ្ដាប់ធ្នាប់ អប់រំណែនាំដល់ម្ចាស់អាជីវកម្មលក់ម៉ូតូ ឲ្យរក្សាចិញ្ជើមផ្លូវ ដើម្បីឈានការកាត់បន្ថយការកក់ស្ទះចរាចរណ៍។ ក្នុងការចុះរៀបចំនេះ អាជីវក មួយចំនួនធំ បានចូលរួមសហការជាមួយកម្លាំងគណៈបញ្ជាការបានយ៉ាងល្អ ។ ហើយបន្ថែមទៀតនោះលោកអភិបាលរង បានបញ្ជាក់ប្រាប់ថាក្រោយចុះអប់រំណែនាំ ក្រុមការងារបានធ្វើកិច្ចសន្យា ជាមួយម្ចាស់អាជីវកម្មដើម្បី ចូលរួមថែរក្សារបរិស្ថានអនាម័យសណ្ដាប់ធ្នាប់ ទាំងអស់គ្នា។ ក្នុងករណីមិនចូលរួម អាជ្ញាធរនឹងចាត់វិធានរដ្ឋបាល ឬវិធានការក្ដៅ។ជាចុងក្រោយលោកអភិបាលសំណូមពរដល់ប្រជាពលរដ្ឋ ក៏ដូចអាជីវកទាំងអស់ក្នុងមូលដ្ឋានខណ្ឌ៧មករា សូមចូលរួមថែរក្សារបរិស្ថានអនាម័យសណ្ដាប់ធ្នាប់ ឲ្យបានល្អ៕អត្ថបទ៖ លីហេង

ក្រុមក្មេងទំនើង០៩នាក់ ឆ្លងពីខេត្តចូលមកលាក់ខ្លួនក្នុងរាជធានីភ្នំពេញ ត្រូវនគរបាលខណ្ឌ៧មករា បង្ក្រាបបាន

ភ្នំពេញ ៖ ក្រុមក្មេងទំនើងចំនួន០៩នាក់ ត្រូវបាននគរបាលខណ្ឌ៧មករា ធ្វើការបង្ហាញមុខ បន្ទាប់ពីបង្ក្រាបបាន ក្នុងរង្វង់ការចុះរដ្ឋបាលរបស់គណះបញ្ជាការឯកភាពខណ្ឌ កាលពីថ្ងៃទី២៩ ខែឧសភា ឆ្នាំ២០២៤ម្សិលមិញ នៅតំបន់បុរីកីឡា ។ សមត្ថកិច្ច នៃអធិការដ្ឋាននគរបាលខណ្ឌ៧មករា នាព្រឹកថ្ងៃទី៣០ ខែឧសភា ឆ្នាំ២០២៤នេះ បានធ្វើការបង្ហាញមុខ ក្រុមជនសង្ស័យជាមុខសញ្ញាក្មេងទំនើងបង្កសកម្មភាពកាប់ចាក់គ្នាយ៉ាងសកម្ម ក្នុងទឹកដីខេត្តកណ្តាល ប៉ុន្តែក្រុមនេះបាននាំគ្នារត់មកជ្រកកោនក្នុងខណ្ឌ៧មករា នៃរាជធានីភ្នំពេញ ។ លោកវរសេនីយ៍ទោ ជុន ប៊ុនណាន អធិការនគរបាលខណ្ឌ៧មករា បានប្រាប់ BTV ឱ្យដឹងថា ៖ ក្រុមក្មេងទំនើងទាំង០៩នាក់នេះ មិនទាន់បានធ្វើសកម្មភាពកាប់ចាក់ ឬអុកឡុកក្នុងរាជធានីភ្នំពេញ ពិសេសមូលដ្ឋានក្នុងខណ្ឌ៧មករានៅឡើយនោះទេ ដោយគ្រាន់តែពួកគេបានព្យាយាមរត់គេចពីការតាមចាប់ខ្លួនរបស់សមត្ថកិច្ចស្រុកលើកដែក ក្រោយការធ្វើសកម្មភាពបង្កហិង្សាកាប់ចាក់គ្នាជាច្រើនករណីរួចមក ។ លោកអធិការ បន្តថា ៖ ក្រុមនេះ ត្រូវបានឃាត់នៅពេលចុះរដ្ឋបាលនៅតំបន់អាគារបុរីកីឡា ដោយពួកគេបានទៅពួនសំងំលាក់ខ្លួននៅទីនោះ ដោយក្នុងចំណោម០៩នាក់នេះ មាន០៦នាក់មានផ្ទុកសារធាតុញៀន។ លោកបន្ថែមថា សកម្មភាពបង្ក្រាបនេះ ក៏ជាការឆ្លើយតបទៅនឹងបទបញ្ជារដ៏ម៉ឺងម៉ាត់របស់សម្តេចធិបតីហ៊ុន ម៉ាណែត នាយករដ្ឋមន្ត្រី ហើយវាក៏ឋិតក្នុងដែនសមត្ថកិច្ចទំនួលខុសត្រូវរបស់សមត្ថកិច្ចផងដែរ ក្នុងការការពារសន្តិសុខសុវត្ថិភាពជូនប្រជាពលរដ្ឋក្នុងមូលដ្ឋាន ។ សូមបញ្ជាក់ថា ក្រោយការបង្ហាញមុខរួចរាល់ហើយនោះ ក្រុមក្មេងទំនើងទាំង០៩នាក់ ត្រូវបានប្រគល់ជូនសមត្ថកិច្ចស្រុកលើកដែក ដែលបានចុះមកទទួលយកដោយផ្ទាល់ពីនគរបាលខណ្ឌ៧មករា ក្នុងការបន្តនាំខ្លួនពួកគេយកទៅផ្តន្ទាទោសទៅតាមផ្លូវច្បាប់ ព្រោះបទល្មើស និងអំពើហិង្សាដែលពួកគេបានប្រព្រឹត្តិ គឺស្ថិតក្នុងស្រុកលើកដែក ទឹកដីខេត្តកណ្តាល ។ តាមការឱ្យដឹងបន្ថែមពីសមត្ថកិច្ចស្រុកលើកដែក បញ្ជាក់ថា ៖ ក្រុមនេះមានឈ្មោះថា ក្រុម KV ដែលជាក្រុមធំមួយមានបក្សពួកសេនារីយូជាច្រើននៅតាមតំបន់មួយចំនួន ដែលតែងធ្វើសកម្មភាពបង្កហិង្សាដោយការកាប់ចាក់គ្នាជាច្រើនករណីកន្លងមកហើយ នៅក្នុងទឹកដីស្រុកលើកដែរ ។ ក្រុមនេះ ត្រូវបានសមត្ថកិច្ចបង្ក្រាបបានមួយចំនួនហើយ ហើយសមត្ថកិច្ចក៏កំពុងបន្តប្រតិបត្តិការរបស់ខ្លួន ក្នុងការស្រាវជ្រាវតាមចាប់ខ្លួនបក្សពួកគេបន្តទៀតផងដែរ ៕ អត្ថបទ ៖ លីហេង

ទឹកជំនន់ធ្ងន់ធ្ងរ នៅតែបន្តប៉ះពាល់ដល់ប្រជាជន នៅភាគខាងត្បូងប្រទេសប្រេស៊ីល

ប្រជាជននៅភាគខាងត្បូងប្រទេសប្រេស៊ីល នៅតែបន្តរងផលប៉ះពាល់ដោយទឹកជំនន់ធ្ងន់ធ្ងរ បង្កឡើងដោយភ្លៀងធ្លាក់ខ្លាំង ដែលបានវាយបក់មកលើតំបន់នេះ ចាប់តាំងពីចុងខែមេសា។អាជ្ញាធរនៅក្នុងរដ្ឋ Rio Grande do Sul បាននិយាយថា មនុស្ស១៦៩នាក់ ត្រូវបានបញ្ជាក់ថាស្លាប់ ហើយមនុស្ស៤៤ នាក់ផ្សេងទៀត នៅបាត់ខ្លួននៅឡើយ គិតត្រឹមថ្ងៃពុធម្សិលមិញនេះ។តំបន់ដ៏ធំទូលាយនៅរដ្ឋធានី ប៉តូ អាលីហ្ក្រេ(Porto Alegre) របស់រដ្ឋ Rio Grande do Sul បានជន់លិចរយៈពេលជាង២០ថ្ងៃមកហើយ។ ប្រជាជនភាគច្រើន ត្រូវបានបង្ខំឱ្យជម្លៀសខ្លួនចេញ ក្នុងរយៈពេលយូរ។ ប្រជាជនដើមកំណើតជប៉ុនជាច្រើន បានមករស់នៅក្នុងតំបន់នេះ។ ការិយាល័យរបស់សមាគម ដែលផ្តល់សេវាវេជ្ជសាស្រ្តដល់លំនៅឋានសម្រាប់ជនជាតិជប៉ុន-ប្រេស៊ីល បានជន់លិចដោយទឹកជំនន់ក្នុងជម្រៅ៣ ម៉ែត្រ។ អនុប្រធានសមាគម លោក ហ៊ីវ៉ាតាស្ស៊ី មីលតុន(Hiwatashi Milton) ជនជាតិជប៉ុន-ប្រេស៊ីល បានប្រើប្រាស់ទូក ទៅពិនិត្យមើលការិយាល័យសមាគមជាលើកដំបូង ចាប់តាំងពីទឹកជំនន់បានចាប់ផ្តើមជន់លិច។ លោក Milton និយាយថាសមាជិកសមាគម មានអារម្មណ៍ សោកសៅយ៉ាងខ្លាំង ព្រោះពួកគេប្រហែលជាបាត់បង់អ្វីៗទាំងអស់ នៅក្នុងការិយាល័យរបស់សមាគមនេះ។តំបន់ដែលរងគ្រោះដោយគ្រោះមហន្តរាយ កំពុងស្វែងរកជំនួយពីសហគមន៍អន្តរជាតិ ក្នុងពេលមានការព្រួយបារម្ភកាន់តែខ្លាំងឡើងអំពីសន្តិសុខ និងការរាលដាលជំងឺឆ្លង។

បណ្ដាញសង្គម

ព័ត៌មានថ្មីៗ

ការស្ទង់មតិ៖ ប្រជាជនអាមេរិកភាគច្រើនជឿថា ប្រទេសនានាគួរតែទទួលស្គាល់រដ្ឋប៉ាឡេស្ទីន

ឥណ្ឌា បាញ់សាកល្បងមីស៊ីលបាលីស្ទិក ដែលមានសមត្ថភាពផ្ទុកក្បាលគ្រាប់នុយក្លេអ៊ែរ

តុលាការអាមេរិក អនុញ្ញាតឱ្យលោក Trump បញ្ចប់សិទ្ធិការពារពីការនិរទេស សម្រាប់ជនអន្តោប្រវេសន៍ ៦ម៉ឺននាក់

[BREAKING NEWS] គ្រោះរញ្ជួយដីកម្រិត ៥,៤រ៉ិចទ័រ ចេញពីប្រទេសមីយ៉ាន់ម៉ា បានរង្គើដល់ទីក្រុងបាងកក របស់ថៃ

អាជ្ញាធរម៉ិកស៊ិកចាប់ខ្លួនមនុស្ស១៣នាក់ក្នុងករណីសម្លាប់មន្ត្រីរដ្ឋាភិបាលទីក្រុង Mexico City

បង្ក្រាបទំនិញជាគ្រឿងសមុទ្រមួយទូក ដែលឈ្មួញលួចនាំពីថៃ មកខេត្តកោះកុង តាមផ្លូវទឹក

ក្រុមផ្តល់ជំនួយ៖ សម្ភារទីជម្រកនៅតែមិនទាន់អាចត្រូវបាននាំចូលទៅក្នុងតំបន់ហ្កាហ្សាបាន

មេដឹកនាំយោធាណាតូពិភាក្សាដោយស្មោះត្រង់លើបញ្ហាអ៊ុយក្រែន ក្នុងការសន្ទនាតាមបណ្តាញវីដេអូ

[UPDATE] នាយករដ្ឋមន្រ្តីថៃ ដែលត្រូវព្យួរតំណែង ឡើងតុលាការផ្ដល់សក្ខីកម្មក្នុងរឿងក្ដី ដែលអាចដកតំណែងជាផ្លូវការ

មន្ត្រីប្រទេសអ៊ុយហ្គង់ដា ច្រានចោលរបាយការណ៍ដែលថាខ្លួននឹងទទួលយកជននិរទេសពីអាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877