BTV NEWS

ដកហូតអាជ្ញាបណ្ណកាស៊ីណូ ដែលផ្តល់ជូនក្រុមហ៊ុន សៀងហៃ រីហ្សត ពាក់ព័ន្ធករណីឆបោកតាមប្រព័ន្ធបច្ចេកវិទ្យា

មន្ទីរប្រឆាំងគ្រឿងញៀន បង្ក្រាបសំបុកក្រុមជួញដូរគ្រឿងញៀនយ៉ាងសកម្មក្នុងភូមិសាស្ត្រខេត្តតាកែវ ប្រដាប់ដោយអាវុធ បានបាញ់មកលើកម្លាំងនគរបាល២នាក់របួសធ្ងន់កំពុងសង្គ្រោះបន្ទាន់ ចាប់ខ្លួនជនល្មើសបានចំនួន ៧នាក់

BREAKING NEWS | តំណាងអយ្យការសម្រេចចោទប្រកាន់កូនស្នងការរងខេត្តបន្ទាយមានជ័យបើកបរបុកស្លាប់មនុស្ស ៦នាក់ នៅស្រុកមោងឫស្សី ចំនួន ២បទល្មើស

ខែមីនាកន្លងទៅនេះ នគរបាលជាតិឃាត់ខ្លួនជនងប់ល្បែង ៧៤នាក់ ខ្លះបញ្ជូនទៅតុលាការ មុនបន្តទៅពន្ធនាគារ ខ្លះបានទៅផ្ទះវិញ

សន្តិសុខ និង សង្គម

ព្យុះទីហ្វុង ថាលីម ព្យាករណ៍ថានឹងបោកបក់ទៅភាគខាងត្បូងប្រទេសចិននៅល្ងាចថ្ងៃចន្ទនេះ

ប៉េកាំង៖ ទីភ្នាក់ងារព្យាករណ៍អាកាសធាតុជាតិបាននិយាយថា ព្យុះត្រូពិច ថាលីម បានក្លាយទៅជាព្យុះទីហ្វុងនៅព្រឹកថ្ងៃចន្ទ (១៧ កក្កដា)នេះ ហើយត្រូវបានកំណត់ថាជាព្យុះទីមួយក្នុងឆ្នាំនេះ ដែលបានបោកបក់ដល់ដីទៅក្នុងប្រទេសចិន ខណៈដែលក្រុមអាជ្ញាធរបានលុបចោលជើងហោះហើរជាច្រើន និងបានជំរុញឱ្យអ្នកស្រុកស្នាក់នៅក្នុងផ្ទះ។រដ្ឋបាលឧតុនិយមចិនបានចេញការប្រកាសអាសន្នពណ៌លឿងទុំ ដោយនិយាយថា ព្យុះទីហ្វុងត្រូវបានគេរំពឹងថានឹងកើនឡើងក្នុងកម្រិតខ្លាំងក្លាយជាព្យុះទីហ្វុងដ៏ធ្ងន់ធ្ងរពេលវាបោកបក់នៅពេលយប់តាមបណ្តោយឆ្នេរសមុទ្រភាគខាងត្បូងពីខេត្តក្វាងតុងទៅកាន់ខេត្តហៃណាន។ព្យុះទីហ្វុង ថាលីម ត្រូវបានកំណត់ថាជាព្យុះទីហ្វុងទី៤ នៅឆ្នាំនេះ ប៉ុន្តែជាព្យុះទី១ ដែលបានបោកបក់ដល់ដីគោកនៅក្នុងប្រទេសចិន នេះបើយោងតាមការព្យាករណ៍អាកាសធាតុ។ នៅព្រឹកថ្ងៃច័ន្ទនេះ មជ្ឈមណ្ឌលឧតុនិយមបាននិយាយថា ព្យុះថាលីម ស្ថិតនៅចម្ងាយ ៣៧៥គីឡូម៉ែត្រភាគអាគ្នេយ៍នៃទីក្រុងចានជាំង (Zhanjiang) ក្នុងខេត្តហ្គ័ងតុង (Guangdong) ដោយផ្លាស់ទីក្នុងល្បឿន ២០គីឡូម៉ែត្រក្នុងមួយម៉ោង។ទីភ្នាក់ងារព្យាករណ៍អាកាសធាតុជាតិរបស់ចិនបាននិយាយថា កម្រិតទឹកភ្លៀងនៅក្នុងទីក្រុងជាច្រើននៅភាគអាគ្នេយ៍ខេត្តហ្វ៊ូជាន (Fujian) និងខេត្តជាំងស៊ូ (Jiangsu) ភាគខាងកើតបានឈានដល់កម្រិត ២០០មីលីម៉ែត្រ ទៅ៣០០មីលីម៉ែត្រ ក្នុងរយៈពេលបីម៉ោងនៅព្រឹកថ្ងៃចន្ទនេះ៕

តម្លៃបន្លែនៅកូរ៉េខាងត្បូងកើនឡើងដោយសាររលកកម្ដៅ និងភ្លៀងធ្លាក់យ៉ាងខ្លាំងបំផ្លាញដំណាំ

កូរ៉េខាងត្បូង៖ សីតុណ្ហភាពក្តៅហែង និងភ្លៀងធ្លាក់ដ៏ខ្លាំងបានវាយប្រហារប្រទេសកូរ៉េខាងត្បូងក្នុងខែកក្កដានេះ ដោយបានធ្វើឱ្យខូចខាតយ៉ាងធ្ងន់ធ្ងរលើការផ្គត់ផ្គង់ និងផលិតកម្មបន្លែ ព្រមទាំងជំរុញឱ្យតម្លៃបន្លែក្នុងស្រុកកើនឡើងខ្ពស់ជាងធម្មតា។យោងតាមទិន្នន័យដែលបានចេញផ្សាយកាលពីថ្ងៃសៅរ៍ដោយសាជីវកម្មកសិកម្មនេសាទ និងស្បៀងអាហាររបស់កូរ៉េបានឲ្យដឹងថា តម្លៃនៃផលិតផលកសិកម្មសំខាន់ៗចំនួន១៩មុខរបស់ប្រទេសនេះបានកើនឡើងបើធៀបនឹងខែមុន។ជាឧទាហរណ៍ តម្លៃលក់ដុំនៃសាឡាត់មួយប្រអប់ទម្ងន់ ៤គីឡូក្រាមកើនឡើងទ្វេដងពីខែមុនរហូតដល់ ២៦.០០០វ៉ុន (ប្រហែល២០,៤៨ដុល្លារ)។ ហើយតម្លៃស្ពៃខ្មៅ និងស្ពៃក្តោបបានកើនឡើង ៩០,២ភាគរយ និង ៥១,៧ភាគរយរៀងគ្នាក្នុងមួយខែ នេះបើយោងតាមទិន្នន័យ។ទិន្នន័យផ្លូវការរបស់ក្រសួងកសិកម្ម រុក្ខាប្រមាញ់ បសុសត្វ និងស្បៀងអាហាររបស់ប្រទេស បានបង្ហាញថា ភ្លៀងធ្លាក់ក្នុងសប្តាហ៍ចុងក្រោយនៃខែមិថុនា បានជន់លិចលើផ្ទៃដីដំណាំជាង ៤.០០០ ហិចតា រួមទាំងវាលស្រែ និងវាលសណ្តែកជាច្រើនទៀតផង។អ្វីដែលអាក្រក់ជាងនេះទៅទៀតនោះគឺ ភ្លៀងធ្លាក់ខ្លាំងបានវាយលុកដីស្រែចំការនៅតំបន់ជនបទកាន់តែច្រើនចាប់តាំងពីថ្ងៃព្រហស្បតិ៍មក ដោយធ្វើឱ្យមានការបំផ្លិចបំផ្លាញដល់វិស័យកសិកម្មដ៏ផុយស្រួយរបស់ប្រទេសនេះ និងនាំមកនូវក្តីបារម្ភកាន់តែច្រើនអំពីការខូចខាតដំណាំ និងការឡើងថ្លៃបន្លែផងដែរ។ភ្លៀងធ្លាក់ដ៏ខ្លាំងកាលពីចុងសប្ដាហ៍នៅក្នុងកូរ៉េខាងត្បូងបានសម្លាប់មនុស្ស៤០នាក់ ខណៈដែល៩នាក់ទៀតបាត់ខ្លួន៕

សីតុណ្ហភាព ៤៣អង្សាសេ ឬខ្ពស់ជាងនេះបានវាយប្រហារដ្ឋ Arizona សហរដ្ឋអាមេរិករយៈពេល ១៧ថ្ងៃជាប់ៗគ្នា

អាមេរិក៖ កាលពីថ្ងៃអាទិត្យម្សិលមិញ ដែលជាថ្ងៃទី ១៧ជាប់ៗគ្នានៃសីតុណ្ហភាពកើនឡើងជាង ៤៣អង្សាសេរនោះ ប្រជាពលរដ្ឋរស់នៅក្នុងរដ្ឋ Arizona សហរដ្ឋអាមេរិក បានធ្វើដំណើរទៅកាន់សួនទឹកដើម្បីរកទីកន្លែងត្រជាក់ ។ លោក Mike Qurin គឺជាប្រជាពលរដ្ឋវ័យ ៤០ឆ្នាំ ដែលបានទៅលេងសួនទឹកជាមួយកូនប្រុសរបស់គាត់ ដើម្បីទប់ទល់នឹងរលកកម្តៅនោះ បាននិយាយថា វាពិតជាវេទនាខ្លាំងណាស់ពេលនៅខាងក្រៅ លុះត្រាតែអ្នកនៅកន្លែងណាដែលមានទឹក ហើយជាការពិតណាស់ថា វាគ្មានសុវត្ថិភាពទាល់តែសោះ ។ ចំណែកឯអ្នកស្រី Lauren Stewart បាននៅទីនោះផងដែរជាមួយកូនតូចរបស់គាត់ ។ អ្នកស្រីនិយាយថា បម្រែបម្រួលអាកាសធាតុ គឺជាដើមហេតុនាំឲ្យសីតុណ្ហភាពក្តៅខ្លាំងបែបនេះ ។ អ្នកស្រីពន្យល់ថា ជាច្រើនឆ្នាំមកហើយដែលពួកយើងនៅតែកន្លែងត្រជាក់ និងជាកន្លែងសើម ប៉ុន្តែពេលនេះ វាប្រែទៅជាក្តៅខ្លាំង គឺក្តៅខ្លាំងជាងពេលណាៗទាំងអស់ ។ ការព្យាករណ៍អាកាសធាតុនៅថ្ងៃចន្ទនេះ បានឲ្យដឹងថា ទីក្រុង Phoenixនឹងបំបែកកំណត់ត្រាសីតុណ្ហភាពជាង ៤៣អង្សាសេ រយៈពេល ១៨ថ្ងៃជាប់ៗគ្នា ដែលធ្លាប់បានបង្កើតឡើងកាលពីខែមិថុនា ឆ្នាំ ១៩៧៤ ៕

អ៊ុយក្រែនបាត់បង់សព្វាវុធ ២០ភាគរយ ក្នុងរយៈពេល២សប្តាហ៍

អ៊ុយក្រែន៖ សារព័ត៌មាន The New York Times បាននិយាយថា កងទ័ពអ៊ុយក្រែន បានបាត់បង់សព្វាវុធច្រើនជាង២០ភាគរយ ដែលពួកគេបានប្រើប្រាស់ ក្នុងរយៈពេល២សប្តាហ៍ដំបូងនៃការវាយបកលើរុស្ស៊ី។ ការរាយការណ៍កាលពីថ្ងៃសៅរ៍ ដែលបានបានលើកឡើងដោយមន្ត្រីសហរដ្ឋអាមេរិក និងអឺរ៉ុប និយាយថា ការបាត់បង់រួមមានរថក្រោះដែលត្រូវបានផ្គត់ផ្គង់ដោយប្រទេសលោកខាងលិច។ សេចក្តីរាយការណ៍បាន បន្ថែមថា ស្ថានភាពបានរីកចម្រើននូវអ្វីមួយចំនួន បន្ទាប់ពីអ៊ុយក្រែនផ្តោតបន្ថែមទៀតលើការប្រើប្រាស់មីស៊ីលរយៈចម្ងាយឆ្ងាយ ដើម្បីយកឈ្នះកងកម្លាំងរុស្ស៊ី។ អនុរដ្ឋមន្ត្រីការពារជាតិអ៊ុយក្រែន លោកស្រី Hanna Maliar បាននិយាយកាលពិថ្ងៃអាទិត្យថា កងកម្លាំងអ៊ុយក្រែន កំពុងរុលទៅកាន់ភាគខាងត្បូងទីក្រុង Bakhmut ក្នុងតំបន់ Donetsk ភាគខាងកើត។ លោកស្រីនិយាយថា មានការប្រយុទ្ធគ្នាកាន់តែខ្លាំង ហើយជំហររបស់ភាគីសង្គ្រាមទាំងពីរផ្លាស់ប្តូរជាច្រើនដងក្នុងមួយថ្ងៃ។ ប្រធានាធិបតីរុស្ស៊ី លោក Vladimir Putin និយាយតាមទូរទស្សន៍រដ្ឋ ដែលបានផ្សាយកាលពីថ្ងៃអាំទិត្យថា ការវាយបករបស់អ៊ុយក្រែនពុំទទួលបានជោគជ័យនោះទេ។លោក Putin បានព្រមានថា ប្រទេសរបស់លោក មានសិទ្ធិបតវិញ ប្រសិនបើអ៊ុយក្រែនប្រើប្រាស់គ្រាប់បែកចង្កោម ដែលផ្គត់ផ្គង់ដោយសហរដ្ឋអាមេរិក។ ទន្ទឹមនឹងនេះ កិច្ចព្រមព្រៀងដែលធានាដល់ការនាំចេញសុវត្ថិភាពនៃផលិតផលកសិកម្មរបស់អ៊ុយក្រែន តាមរយៈសមុទ្រខ្មៅ បានដល់ពេលផុតកំណត់នៅថ្ងៃចន្ទនេះ។ កិច្ចព្រមព្រៀង ដែលបានសម្របសម្រួលដោយអង្គការសហប្រជាជាតិនិងប្រទេសទួរគី បានបន្ថែមពេល៣ដង។ ក្រុមមន្ត្រី នៅវិមានក្រឹមឡាំង និយាយថាពួកគេ ពុំអាចធ្វើបែបនេះម្តងទៀតនោះទេ៕

រលកកម្ដៅ ជំរុញឲ្យទីក្រុង Athens បិទស្ថានទីបុរាណ Acropolis ខណៈភាគខាងត្បូងអាមេរិកឡើងក្ដៅខ្លាំង

អាមេរិក៖ ជនជាតិអាមេរិកជាង ១០០លាននាក់ ប្រឈមនឹងការឡើងកម្ដៅខ្លាំង ដែលអូសបន្លាយពេលយ៉ាងយូរ ខណៈដែលក្រុងអាតែន (Athens) ប្រទេសក្រិក បានសម្រេចបិទស្ថានទីបុរាណ Acropolis អំឡុងពេលមានអាកាសធាតុក្តៅខ្លាំងបំផុត នៅពេលខ្លះ កាលពីថ្ងៃសុក្រ (ទី១៥ ខែកក្កដា) ដើម្បីការពារភ្ញៀវទេសចរ នៅពេលដែលតំបន់អឺរ៉ុបភាគខាងត្បូង ទទួលរងនូវរលកកម្ដៅដែលក្ដៅស្ទើរទ្រាំមិនបាន។ទីភ្នាក់ងារអវកាសអឺរ៉ុប (ESA) ដែលផ្កាយរណបរបស់ខ្លួន តាមដានសីតុណ្ហភាពនៅលើដី និងសមុទ្រ បានព្រមានថា ប្រទេសអ៊ីតាលី អេស្ប៉ាញ បារាំង អាល្លឺម៉ង់ និងប៉ូឡូញ កំពុងប្រឈមនឹងស្ថានភាពធ្ងន់ធ្ងរ។ សីតុណ្ហភាព នាសប្តាហ៍ក្រោយ អាចឲ្យអឺរ៉ុបជួបនឹងកម្ដៅក្ដៅលើសពីកម្ដៅបច្ចុប្បន្ន ៤៨,៨អង្សាសេ ដែលត្រូវបានកត់ត្រា នៅលើកោះស៊ីស៊ីលី (Sicily) ក្នុងខែសីហា ឆ្នាំ២០២១។ពិភពលោកបានជួបប្រទះនឹងថ្ងៃដែលក្តៅបំផុតមិនធ្លាប់មាន កាលពីសប្តាហ៍មុន ដោយអ្នកវិទ្យាសាស្ត្រ បានបន្ទោសថា នេះកើតឡើងដោយសារការរួមផ្សំគ្នានៃការឡើងកម្ដៅផែនដីរយៈពេលវែង ដែលបង្កឡើងដោយឧស្ម័នផ្ទះកញ្ចក់ ជាមួយនឹងការជំរុញរយៈពេលខ្លីពីព្រឹត្តិការណ៍ El Niño ដែលជាលំនាំអាកាសធាតុក្តៅជាធម្មតាដែលមានប្រភពមកពីមហាសមុទ្រប៉ាស៊ីហ្វិក។នៅកន្លែងជាច្រើន នៅភាគនិរតីនៃសហរដ្ឋអាមេរិក ដែលតែងមានរដូវក្តៅក្តៅខ្លាំងជាប្រក្រតី សីតុណ្ហភាពឡើងក្ដៅកាន់តែខ្លាំងឡើងៗ រហូតដល់អាចនឹងខ្ពស់ជាងការព្យារការណ៍អាកាសធាតុ ក្នុងរយៈពេលប៉ុន្មានថ្ងៃខាងមុខនេះ។ជាក់ស្ដែង ទីក្រុង Phoenix ក្នុងរដ្ឋ Arizona មានសីតុណ្ហភាពក្ដៅខ្លាំងលើស ៤៣,៣អង្សាសេ រយៈពេល ១៥ថ្ងៃជាប់ៗគ្នា ហើយគ្លីនិកចល័ត ត្រូវព្យាបាលអ្នកគ្មានផ្ទះសម្បែង ដែលទទួលរងនូវការរលាកកម្រិតទី៣ និងការខ្វះជាតិទឹកធ្ងន់ធ្ងរ។ឥទ្ធិពលនៃរដូវក្តៅក្ដៅខ្លាំង ត្រូវបាននាំឲ្យចាប់អារម្មណ៍ខ្លាំង ចំពោះការសិក្សាមួយ ក្នុងសប្តាហ៍នេះថា មនុស្សរហូតដល់ ៦១.០០០នាក់ អាចនឹងស្លាប់ អំឡុងការឡើងកម្ដៅកាន់តែក្ដៅខ្លាំងឡើងៗ នៅទូទាំងទ្វីបអឺរ៉ុប កាលពីរដូវក្តៅមុន៕

ក្រុមវេជ្ជបណ្ឌិតជាន់ខ្ពស់នៅចក្រភពអង់គ្លេសប្រកាសរៀបចំកូដកម្មបន្ថែម និងច្រានចោលកិច្ចព្រមព្រៀងដំឡើងប្រាក់ឈ្នួល

អង់គ្លេស៖ សហគមន៍វេជ្ជសាស្ត្រចក្រភពអង់គ្លេស (BMA) បាននិយាយនៅថ្ងៃចន្ទនេះថា ក្រុមវេជ្ជបណ្ឌិតជាន់ខ្ពស់នៅក្នុងចក្រភពអង់គ្លេស នឹងរៀបចំក្បួនកូដកម្មរយៈពេល២ថ្ងៃ នៅខែសីហា ដោយច្រានចោលកិច្ចព្រមព្រៀងដំឡើងប្រាក់ខែ៦% ដែលបានប្រកាសដោយរដ្ឋាភិបាលកាលពីសប្ដាហ៍មុន ថាជាការកាត់ប្រាក់ឈ្នួលតាមលក្ខខណ្ឌជាក់ស្តែងដោយខ្វះការពិចារណា។ ក្រុមវេជ្ជបណ្ឌិតកម្រិតពិគ្រោះយោបល់ នៅក្នុងសេវាសុខភាពជាតិដែលបានផ្ដល់មូលនិធិសាធារណៈរបស់ចក្រភពអង់គ្លេស នឹងរៀបចំកូដកម្មនៅថ្ងៃទី២៤និង២៥ខែសីហា ជាការបន្ថែមពីលើកូដកម្មនានាដែលធ្លាប់បានប្រកាសកាលពីកន្លងទៅនៅថ្ងៃទី២៩ និង២១ និងការគូសបញ្ជាក់ការបរាជ័យរបស់លោកនាយករដ្ឋមន្ត្រីរីស៊ីស៊ូណាក់(Rishi Sunak) ក្នុងការបញ្ចប់សកម្មភាពឧស្សាហកម្មជាច្រើនខែទូទាំងសេវាសាធារណៈ។ លោក Sunak កាលពីសប្ដាហ៍មុន បានហៅការដំឡើងប្រាក់ឈ្នួលវិស័យសាធារណៈនាពេលថ្មីៗនេះ ថាជាដំណោះស្រាយចុងក្រោយ ដោយព្រមានថា ពួកគេនឹងខាតបង់ប្រាក់រាប់លាន ការកាត់កញ្ចប់ថវិកាគ្រប់ទីកន្លែង និង ពុំមានការចរចាបន្ថែមទៀតនោះទេ។ ខណៈក្រុមសហជីពគ្រូបង្រៀន បានផ្អាកកូដកម្ម និងបានលើកឡើងពីការទទួលយកកិច្ចព្រមព្រៀងរបស់ពួកគេ ក្រុមសហជីពរបស់ក្រុមវេជ្ជបណ្ឌិត ពុំចាប់អារម្មណ៍ទេ បន្ទាប់ពីអ្វីដែលពួកគេនិយាយថា មានការខាតបង់ជាច្រើនឆ្នាំសម្រាប់សមាជិករបស់ខ្លួន។ អត្រាអតិផរណារបស់ចក្រភពអង់គ្លេស បានហាក់ឡើងខ្ពស់ជាង១ឆ្នាំមកហើយ ដោយកើនឡើងជាង១១% កាលពីខែតុលា និង៨,៧%កាលពីខែឧសភា ជាកម្រិតខ្ពស់បំផុតក្នុងចំណោមប្រទេសអភិវឌ្ឍ ដែលមានសេដ្ឋកិច្ចធំៗ៕

ម៉ិកស៊ិក ចាប់បានជនអន្តោប្រវេសន៍ជាង ៥០០នាក់ ក្នុងរយៈពេល ២ថ្ងៃ

ម៉ិកស៊ិក៖ អាជ្ញាធររបស់ប្រទេសម៉ិកស៊ិក កាលពីថ្ងៃអាទិត្យ (ទី១៦ ខែកក្កដា) បានឲ្យដឹងថា ពួកគេស្ទាក់ចាប់បានជនអន្តោប្រវេសន៍ជាង ៥០០នាក់ ក្នុងរយៈពេល ២ថ្ងៃ នៅភាគខាងកើតរដ្ឋ Veracruz ខណៈដែលអាជ្ញាធរ បង្ក្រាបលើការដឹកជញ្ជូនជនអន្តោប្រវេសន៍ទៅសហរដ្ឋអាមេរិក ដោយមិនមានស្ថានភាពសុវត្ថិភាព។ប្រភពពីវិទ្យាស្ថានជាតិ សម្រាប់ជនអន្តោប្រវេសន៍ (INM) បានប្រាប់ថា អាជ្ញាធរបានរកឃើញជនអន្តោប្រវេសន៍ចំនួន ២០៦នាក់ដែលត្រូវបានគេទុកចោលនៅក្នុងរថយន្តសណ្ដោងរ៉ឺម៉កមួយ កាលពីថ្ងៃសៅរ៍ (ទី១៥ ខែកក្កដា) នៅទីក្រុង Puente Nacional ក្នុងរដ្ឋ Veracruz។អភិបាលក្រុងលោក Roberto Montiel បានសរសេរនៅលើបណ្ដាញសង្គម Facebook ថា ជនអន្តប្រវេសន៍ជាង ១៨០នាក់ ត្រូវបានរកឃើញ ក្នុងនោះមានរួមទាំងស្ត្រី និងកុមារផងដែរ ដោយជនអន្តោប្រវេសន៍មួយចំនួន មានអាការខ្វះជាតិទឹក។ នៅព្រឹកថ្ងៃអាទិត្យ វិទ្យាស្ថានជាតិ សម្រាប់ជនអន្តោប្រវេសន៍ (INM) បានឲ្យដឹងក្នុងសេចក្តីថ្លែងការណ៍មួយថា អាជ្ញាធរស្ទាក់ចាប់បានជនអន្តោប្រវេសន៍ចំនួន ៣០៣នាក់នៅក្នុងប្រតិបត្តិការចំនួន២ កាលពីព្រឹកថ្ងៃសុក្រ (ទី១៤ ខេកក្កដា) ក្នុងរដ្ឋ Veracruz។កាលពីថ្ងៃសុក្រនោះដែរ អាជ្ញាធរបានរកឃើញជនអន្តោប្រវេសន៍ចំនួន ១៩៦នាក់ រួមទាំងអនីតិជនដែលមិនមានអ្នករួមដំណើរចំនួន ១៩នាក់ ត្រូវបានទុកក្នុងរថយន្ដសណ្ដោងរ៉ឺម៉កចតគ្មានសណ្ដាប់ធ្នាប់ ដែលត្រូវបានឃើញនៅលើផ្លូវមួយនៅជិតទីក្រុង Fortin de las Flores។ការរត់ពន្ធជនអន្តោរប្រវេសន៍ប្រកបដោយគ្រោះថ្នាក់ នៅលើផ្លូវឆ្ពោះទៅកាន់សហរដ្ឋអាមេរិក បានបញ្ចប់ទៅក្នុងទិដ្ឋភាពសោកនាដកម្មគួរឲ្យកត់សម្គាល់ នៅប៉ុន្មានឆ្នាំថ្មីៗនេះ។ក្នុងខែធ្នូ ឆ្នាំ២០២១ មនុស្ស ៥៥នាក់បានស្លាប់ បន្ទាប់ពីរថយន្តដឹកជនអន្តោប្រវេសន៍ប្រមាណ ១៦៦នាក់បានជួបឧបទ្ទវហេតុ នៅភាគខាងត្បូងរដ្ឋ Chiapas របស់ប្រទេសម៉ិកស៊ិក ហើយនៅខែមិថុនា ឆ្នាំ២០២២ ជនអន្តោប្រវេន៍ចំនួន ៥៣នាក់បានបាត់បង់ជីវិត ក្នុងរថយន្តសណ្ដោងរ៉ឺម៉កដែលកំពុងឆេះ នៅរដ្ឋតិចសាស់ ដែលនេះជាឧបទ្ទវហេតុជួញដូរជនអន្តោប្រវេសន៍ដ៏គួរឲ្យរន្ធត់បំផុត នៅសហរដ្ឋអាមេរិក៕

មនុស្សរាប់ពាន់នាក់ ត្រូវបានជម្លៀស ខណៈក្រុមពន្លត់អគ្គិភ័យព្យាយាមពន្លត់ភ្លើងឆេះព្រៃនៅកោះឡាផាល់ម៉ារបស់អេស្ប៉ាញ

អេស្ប៉ាញ៖ ក្រុមអាជ្ញាធរបាននិយាយកាលពីថ្ងៃអាទិត្យថា ក្រុមអ្នកពន្លត់អគ្គិភ័យកំពុងព្យាយាមពន្លត់ភ្លើងឆេះព្រៃដែលគ្រប់គ្រងលែងបាន និងបង្ខំឱ្យមានការជម្លៀសមនុស្សយ៉ាងហោចណាស់ ៤ពាន់នាក់ នៅលើកោះឡា ផាល់ម៉ា (La Palma) របស់អេស្ប៉ាញ ។ ភ្លើងឆេះនៅកោះ La Palma បានចាប់ផ្តើមកាលពីព្រឹកព្រលឹមថ្ងៃសៅរ៍នៅក្នុងតំបន់អេល ភីណាឌឺ ផុនតាហ្គ័រដា( El Pinar de Puntagorda) ជាតំបន់ព្រៃឈើនៅភាគខាងជើងនៃកោះនេះ ដោយចាំបាច់ត្រូវជម្លៀសប្រជាជនចេញពីភូមិ ផុន តាហ្គ័រដា (Puntagorda) និងភូមិ ទីចារ៉េហ្វ (Tijarafe) ដែលនៅជិតខាង។យន្តហោះទម្លាក់ទឹកពីលើអាកាសចំនួន ១០គ្រឿង និងក្រុមអ្នកពន្លត់អគ្គិភ័យនៅលើដី ៣០០ នាក់បានព្យាយាមពន្តត់អណ្ដាតភ្លើងឆេះព្រៃ នៅលើកោះនេះ ដែលជាផ្នែកមួយនៃប្រជុំកោះ កាណារី(Canaries)របស់ឆ្នេរសមុទ្រភាគខាងលិចនៃទ្វីបអាហ្រ្វិក និងដែលបានទទួលរងនូវការហក់ឡើងសីតុណ្ហភាពខ្លាំងស្រដៀងទៅនឹងអ្វីដែលបានឃើញនៅក្នុងរលកកម្ដៅដែលប៉ះពាល់ដល់ទ្វីបអឺរ៉ុបភាគខាងត្បូង។អ្នកពន្លត់អគ្គិភ័យ ម្នាក់ វ័យ ៤៦ ឆ្នាំលោក ហូសេ ហ្វើណាដេស (Jose Fernandez) បានប្រាប់សារព័ត៌មាន រ៉យទ័រថា យើងមានការពិបាក វាពិបាកបន្តិច ដោយសារ ការប្រែប្រួលកម្លាំងខ្យល់ និងកម្ដៅថ្ងៃចុងក្រោយ ប៉ុន្តែយើងកំពុងបន្តនៅឡើយ ។ក្រុមពន្លត់អគ្គិភ័យបានកំពុងព្យាយាមទប់ស្កាត់ភ្លើងឆេះព្រៃនៅតំបន់មួយដើម្បីធានាថាភ្លើងបានឈប់នៅផ្លូវមួយហើយមិនអាចរាលដាលបន្តទៀតទេ។លោក ហ្វើណាដេស ក្លាវីចូ (Fernando Clavijo) ប្រធានគ្រប់គ្រងកោះ Canary បាននិយាយថា ផ្ទះសម្បែងយ៉ាងហោចណាស់២០ខ្នងត្រូវបានបំផ្លាញ ខណៈភ្លើងឆេះរាលកាន់តែខ្លាំងឡើង។ក្រុមអាជ្ញាធរបាននិយាយថា ភ្លើងព្រេះបានប៉ះពាល់ដល់ផ្ទៃដីជាង ៤.៦៥០ ហិកតា៕

ចិន-រុស្ស៊ី នឹងចាប់ផ្តើមសមយុទ្ធដែនអាកាស និងសមុទ្ររួមគ្នា នៅសមុទ្រជប៉ុន

ចិន៖ កងនាវាតូចនៃកងទ័ពជើងទឹកចិនកាលពីថ្ងៃអាទិត្យ បានចេញដំណើរទៅចូលរួមជាមួយកងទ័ពជើងទឹក និងដែនអាកាសរុស្ស៊ីនៅសមុទ្រជប៉ុនក្នុងសមយុទ្ធមួយ ដែលមានគោលបំណង«ការពារសន្តិសុខផ្លូវទឹកជាយុទ្ធសាស្ត្រ» នេះបើយោងតាមក្រសួងការពារជាតិចិន។សមយុទ្ធនេះ មានឈ្មោះថា «Northern/Interaction-2023» គឺជាការបង្កើនកិច្ចសហប្រតិបត្តិការយោធារវាងចិន និងរុស្ស៊ី ចាប់តាំងពីការលុកលុយរបស់ទីក្រុងមូស្គូមកលើអ៊ុយក្រែន ហើយកំពុងប្រព្រឹត្តទៅ ខណៈ ដែលទីក្រុងប៉េកាំង នៅតែបន្តបដិសេធការអំពាវនាវរបស់សហរដ្ឋអាមេរិកឱ្យបន្តទំនាក់ទំនងយោធាឡើងវិញ។ក្រសួង បាននិយាយនៅលើគណនី WeChat ផ្លូវការរបស់ខ្លួនកាលពីថ្ងៃអាទិត្យថា កងនាវាចិន មាននាវាចម្បាំងចំនួន ៥គ្រឿង និងឧទ្ធម្ភាគចក្រផ្ទុកនៅលើនាវាចំនួន ៤គ្រឿង បានចាកចេញពីកំពង់ផែភាគខាងកើតនៃទីក្រុង Qingdao ហើយនឹងជួបជាមួយកងកម្លាំងរុស្ស៊ីនៅក្នុង«តំបន់ដែលបានកំណត់ទុកជាមុន»។កាលពីថ្ងៃសៅរ៍ ក្រសួងបានឲ្យដឹងថា កងកម្លាំងទ័ពជើងទឹក និងដែនអាកាសរុស្ស៊ី នឹងចូលរួមក្នុងសយុទ្ធ ដែលធ្វើឡើងនៅសមុទ្រជប៉ុន។ សារព័ត៌មានរដ្ឋ Global Times បានដកស្រង់សម្តីអ្នកសង្កេតការណ៍យោធា ដោយនិយាយថា នេះគឺជាលើកទីមួយហើយដែលកងកម្លាំងរុស្ស៊ីទាំងពីរ ចូលរួមក្នុងសមយុទ្ធនេះ៕

ចំនួនអ្នកស្លាប់ដោយទឹកជំនន់នៅកូរ៉េខាងត្បូង កើនឡើងដល់៣៩នាក់

កូរ៉េខាងត្បូង៖ ប្រធានាធិបតីប្រទេសកូរ៉េខាងត្បូង លោក Yoon Suk Yeol នៅថ្ងៃចន្ទនេះ បានបញ្ជាឲ្យមានកិច្ចប្រឹងប្រែងខ្លាំងក្លាដើម្បីដោះស្រាយការបំផ្លាញបណ្តាលមកពីភ្លៀងធ្លាក់ខ្លាំងជាច្រើនថ្ងៃ ខណៈចំនួនអ្នកស្លាប់បានកើនឡើងដល់៣៩នាក់នៅថ្ងៃចន្ទនេះ រួមទាំងមនុស្សជាង១០នាក់ត្រូវបានរកឃើញស្លាប់នៅផ្លូវក្រោមដីដែលមានទឹកជន់លិច។ ភ្លៀងធ្លាក់ខ្លាំង បានវាយបក់មកលើភាគកណ្តាលរបស់ប្រទេស និងតំបន់ភាគខាងត្បូងចាប់តាំងពីថ្ងៃព្រហស្បតិ៍ ខណៈរដូវភ្លៀងបានចាប់ផ្តើម កាលពីចុងខែមិថុនា ឈានដល់កម្រិតខ្លាំង ដោយក្រសួងមហាផ្ទៃរាយការការណ៍ថា មនុស្ស៩នាក់កំពុងបាត់ខ្លួន និង៣៤នាក់រងរបួស។ ក្នុងចំណោមអ្នកស្លាប់និងរងរបួស អ្នកស្លាប់១២នាក់កើតឡើងនៅក្នុងផ្លូវក្រោមដី ក្នុងទីក្រុង Cheongju ភាគកណ្តាល ជាកន្លែងដែលយានយន្ត១៦គ្រឿងរួមទាំងរថយន្តក្រុងមួយគ្រឿង ត្រូវបានលិចដោយទឹកជំនន់ដ៏គំហុក កាលពីថ្ងៃសៅរ៍ បន្ទាប់ពីទំនប់ទឹកនៃទន្ហេនៅក្បែរនោះបានបាក់ ហើយមនុស្ស៩នាក់ផ្សេងទៀតបានរងរបួស។ លោកYoon បានកោះប្រជុំទីភ្នាក់ងារពាក់ព័ន្ធចំពោះការឆ្លើយតបគ្រោះមហន្តរាយ និងបានអំពាវនាវដល់អាជ្ញាធរដើម្បីបង្កើនកិច្ចប្រឹងប្រែងជួយសង្គ្រោះជនរងរគ្រោះ និងបានសន្យាជួយសម្រាប់ការងារស្តារឡើងវិញ រួមទាំងរៀបចំតំបន់ដែលរងផលប៉ះពាល់ ជាតំបន់គ្រោះមហន្តរាយពិសេស។

បណ្ដាញសង្គម

ព័ត៌មានថ្មីៗ

កម្ពុជាតវ៉ាជាផ្លូវការចំពោះសកម្មភាពខុសច្បាប់របស់ថៃចូលកាន់កាប់នៅតំបន់ភូមិជោគជ័យ, ច្រកទ្វារអន្តរជាតិអូរស្មាច់ និងស្រុកអន្លង់វែង

ឯកឧត្តម ហួត ហាក់ ជួបពិភាក្សាការងារលើវិស័យទេសចរណ៍ ការការពារបេតិកភណ្ឌវប្បធម៌ និងធម្មជាតិនៅកម្ពុជា ជាមួយអ្នកស្រី Angelina Jolie

ឯកឧត្តម ហ៊ុន ម៉ានី អញ្ជើញជួបសំណេះសំណាលកងកម្លាំងខេត្តកំពង់ស្ពឺសម្រាប់ឱកាសចូលឆ្នាំប្រពៃណីជាតិខ្មែរ

គំនិតផ្តួចផ្តើមរបស់វិចិត្រករ បានគាំទ្រក្មេងៗជម្លៀសខ្លួននៅលីបង់ឲ្យគូរគំនូរតាមអារម្មណ៍របស់ខ្លួន

អ៊ីរ៉ង់អះអាងពីការបាញ់ទម្លាក់យន្តហោះចម្បាំង F-35 ទី២ របស់អាមេរិក ក្នុងរយៈពេល ២សប្តាហ៍

សហភាពអាហ្វ្រិក គាំទ្រការជំរុញសន្តិភាពចិន-ប៉ាគីស្ថាន ជុំវិញបញ្ហាមជ្ឈិមបូព៌ា និងជំរុញឲ្យបន្ថយភាពតានតឹង

មេបញ្ជាការយោធាប៊ូគីណា ហ្វាសូ និយាយថា បំភ្លេចចោលទៅលទ្ធិប្រជាធិបតេយ្យ

WTO ព្រមានអំពី «ការវាយប្រហារជាច្រើនដងលើទីតាំងសេវាសុខភាព» នៅអ៊ីរ៉ង់

មនុស្សម្នាក់ស្លាប់នៅជិតទីក្រុងគីវ ខណៈរុស្ស៊ីប្តូរមកវាយប្រហារទ្រង់ទ្រាយធំនៅពេលថ្ងៃ

របាយការណ៍៖ អាមេរិកបណ្តេញបេសកជនរងរបស់អ៊ីរ៉ង់ ប្រចាំនៅ UN ដោយសារក្តីបារម្ភពីសន្តិសុខជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877