BTV NEWS

ក្នុងខែមីនាកន្លងទៅនេះ មានអ្នកស្លាប់ ១០៧នាក់ និងរបួសជាង ២០០នាក់ដោយគ្រោះថ្នាក់ចរាចរណ៍

UPDATE | កូនប្រុសស្នងការរងខេត្តបន្ទាយមានជ័យសារភាពថារូបគេតែម្នាក់គត់ដែលបានបើករថយន្តបង្កគ្រោះថ្នាក់បណ្តាលឱ្យស្លាប់មនុស្ស ៦នាក់នៅខេត្តបាត់ដំបង

នគរបាលរាជធានីភ្នំពេញ ឃាត់ជនជាតិចិន៤នាក់ ដកហូតកាំភ្លើងខ្លី២ដើម និងថ្នាំញៀនមួយចំនួននៅខណ្ឌសែនសុខ

តុលាការសម្រេចឃុំខ្លួនអ្នកបើករថយន្តបុកមនុស្សស្លាប់ ៥នាក់ នៅខេត្តកំពង់ធំ

សន្តិសុខ និង សង្គម

ឃាត់ខ្លួនជនសង្ស័យជួញដូរគ្រឿងញៀនឆ្លងដែន៣នាក់ដកហូត គ្រឿងញៀនជិត២០០គីឡូក្រាម

ភ្នំពេញ ៖ កម្លាំងជំនាញមន្ទីរប្រឆាំងបទល្មើសគ្រឿងញៀន អគ្គស្នងការដ្ឋាននគរបាលជាតិ ក្រសួងមហាផ្ទៃ បង្ក្រាបបទល្មើសជួញដូរគ្រឿងញៀនឆ្លងដែនឃាត់ខ្លួនជនសង្ស័យ៣នាក់វត្ថុតាងគ្រឿងញៀនជិត ២០០គីឡូក្រាម ។ដោយអនុវត្តតាមបញ្ជា នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក្រោមការបញ្ជាដឹកនាំផ្ទាល់របស់លោកឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កម្លាំងជំនាញមន្ទីរប្រឆាំងបទល្មើសគ្រឿងញៀន កាលពីថ្ងៃទី២០ ខែឧសភា ឆ្នាំ២០២៣ វេលាម៉ោង១៥ និង១០នាទី ដោយមានការដឹកនាំនិងសម្របសម្រួលពីលោក ស៊ន មុនី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងការិយាល័យស៊ើបការណ៍ក្រៅ (ក១១) និង (ក៥) សហការជាមួយកម្លាំងជំនាញ នៃស្នងការដ្ឋាននគរបាលរាជធានីភ្នំពេញ និងកម្លាំងជំនាញខេត្តកណ្តាល ស្រាវជ្រាវ-ស៊ើបអង្កេត រហូតឈានដល់ការបង្ក្រាបករណីរក្សាទុក និងដឹកជញ្ជូនគ្រឿងញៀនដោយខុសច្បាប់នូវសារធាតុញៀន ប្រមាណ ០៥គោលដៅផ្សេងគ្នា (០៤គោលដៅ ក្នុងរាជធានីភ្នំពេញ និង ០១គោលដៅ នៅខេត្តកណ្តាល)។គោលដៅទី១ ៖ នៅចំណុចមុខក្រសួងពាណិជ្ជកម្ម មហាវិថីសហព័ន្ធរុស្សី សង្កាត់ទឹកថ្លា ខណ្ឌសែនសុខ រាជធានីភ្នំពេញ។គោលដៅទី២ ៖ នៅចំណុចផ្ទះជួលលេខ ៦៤E១ ផ្លូវលេខ១១០ ភូមិ៥ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ។គោលដៅទី៣ ៖ នៅចំណុច បុរី ពិភពថ្មី ផ្ទះលេខ១០៧ ផ្លូវE ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។គោលដៅទី៤ ៖ នៅចំណុច បុរី ពិភពថ្មី ផ្ទះលេខ១២៦ ផ្លូវលេខ៣៥B ភូមិត្រពាំងព្រុយ ឃុំបែកចាន ស្រុកអង្គស្នួល ខេត្តកណ្តាល។និងគោលដៅទី៥ ៖ នៅថ្ងៃទី២១ ខែឧសភា ឆ្នាំ២០២៣ វេលាម៉ោង ១១ និង០០នាទី សមត្ថកិច្ចបានបន្តទៅឆែកឆេរ នៅចំណុចផ្ទះ ជួលលេខ២CE1 ផ្លូវលេខ១០៩ ក្រុមទី៣១ ភូមិ៣ សង្កាត់អូប្ញស្សី១ ខណ្ឌ៧មករា រាជធានីភ្នំពេញ។ក្នុងកំឡុងប្រតិបត្តិការនោះសមត្ថកិច្ចជំនាញ ឃាត់ខ្លួនជនសង្ស័យ ០៣នាក់ ១.ឈ្មោះ សេង គុន្នី ភេទស្រី អាយុ ៤៤ឆ្នាំ ជនជាតិខ្មែរ ។ ២.ឈ្មោះ អ៊ឹម ស្រីពៅ ភេទស្រី អាយុ ៣៨ឆ្នាំ ជនជាតិខ្មែរ ។ ៣.ឈ្មោះ លាស់ ណេត ភេទស្រី អាយុ ៣៩ឆ្នាំ ជនជាតិខ្មែរ។ដកហូតវត្ថុតាងគ្រឿងញៀន រួមមាន ៖១-ហេរ៉ូអ៊ីន (HEROINE) ទម្ងន់ជាង ១៣៨ គីឡូក្រាម ។ ២-អ៊ិចស្តាស៊ី (MDMA) ទម្ងន់ជាង ៤ គីឡូក្រាម ។៣-មេតំហ្វេតាមីន (METHAMPHETAMINE) ទម្ងន់ជាង ៤៦គីឡូក្រាម ។ ៤-កេតាមីន (KETAMINE) ទម្ងន់ជាង ៤គីឡូក្រាម ។៥-នីមេតាហ្សេប៉ាម (NIMETAZEPAM) ទម្ងន់ ៧៧២,២០ ក្រាម។សរុបរួមសារធាតុញៀនទម្ងន់ ១៩៣ គីឡូ និង ៩០៨,៤១ ក្រាម) និងសារធាតុមិនច្បាស់ទម្ងន់ ២៣,២១ ក្រាម ។ចំពោះជនសង្ស័យនិងវត្ដុតាងទាំងអស់សមត្ថកិច្ចជំនាញបាននឹងកំពុងកសាងសំណុំរឿងបញ្ជូនទៅសាលាដំបូងរាជធានីភំ្នពេញ ដើម្បីចាត់ការតាមនីតិវិធី ៕ ដោយ ៖ តារាវុទ្ធី

អវកាសយានិកស្ត្រីអារ៉ាប់ដំបូងគេ បានទៅដល់ស្ថានីយអវកាស

អារ៉ាប៊ីសាអ៊ូឌីត៖ លោកស្រី Rayyanah Barnawi គឺជាអវកាសយានិកជនជាតិអារ៉ាប់ស្ត្រីដំបូងគេ ដែលបានធ្វើដំណើរទៅដល់ស្ថានីយអវកាសអន្តរជាតិ ឬ ISS។ លោកស្រីជាជនជាតិអារ៉ាប៊ីសាអ៊ូឌីតម្នាក់ ក្នុងចំណោមជនជាតិអារ៉ាប៊ីសាអ៊ូឌីតពីរនាក់ ក្នុងយានបេសកកម្មឯកជនទី២របស់ស្ថានីយអវកាស Axiom Space ដែលបានបាញ់បង្ហោះយានចម្លង SpaceX Falcon 9 ពីសហរដ្ឋអាមេរិក កាលពីថ្ងៃអាទិត្យ។ក្នុងអំឡុងពេល១០ថ្ងៃរបស់លោកស្រីនៅក្នុងគន្លងផ្លូវលើស្ថានីយអវកាសអន្តរជាតិ (ISS) អ្នកវិទ្យាសាស្ត្រជីវសាស្រ្តវ័យ ២៤ឆ្នាំរូបនេះ គ្រោងនឹងធ្វើការស្រាវជ្រាវកោសិកាដើម និងមហារីកសុដន់។ នាងសង្ឃឹមថា នឹងជួយជំរុញទឹកចិត្តស្ត្រីមកពីគ្រប់មជ្ឈដ្ឋាន នៅមជ្ឈិមបូព៌ា។នៅក្នុងវីដេអូដែលថតនៅក្នុងលំហអាកាស មុនពេលនាងទៅដល់ស្ថានីយអវកាសអន្តរជាតិ ឬ ISS នាងបាននិយាយថា៖ «ជូនចំពោះមនុស្សជុំវិញពិភពលោក អនាគតគឺភ្លឺស្វាងល្អណាស់។ ខ្ញុំចង់ឲ្យអ្នកមានសុបិនដ៏ធំ ជឿជាក់លើខ្លួនឯង និងជឿជាក់លើមនុស្សជាតិ»។នាង Barnawi ត្រូវបានចូលរួមនៅក្នុងយានបេសកកម្ម Axiom 2 ដោយមិត្តរួមជាតិអ្នកជំនាញបេសកកម្មអារ៉ាប៊ីសាអូឌីត លោក Ali Alqarni ដែលជាអវកាសយានិកប្រុសទី២ មកពីរាជាណាចក្រឈូងសមុទ្រ ដើម្បីធ្វើដំណើរទៅកាន់ស្ថានីយអវកាសអន្តរជាតិ រួមជាមួយជនជាតិអាមេរិកពីរនាក់ទៀត គឺអវកាសយានិក លោកស្រី Peggy Whitson និងពីឡុត លោក John Shoffner។ក្រុមយានិកទាំងអស់ បានធ្វើដំណើរទៅកាន់ទីអវកាសខាងក្នុងយានអវកាស Dragon របស់យានអវកាស SpaceX ដែលស្ថិតនៅលើយានចម្លង Falcon 9 និងដែលត្រូវបានបាញ់បង្ហោះពីមជ្ឈមណ្ឌលអវកាស Kennedy នៅទីក្រុង Cape Canaveral រដ្ឋ Florida កាលពីថ្ងៃអាទិត្យ៕

ប្រជាជនអាហ្វ្រិកខាងត្បូង ស្តីបន្ទោសរដ្ឋាភិបាលទីក្រុង ខណៈករណីជំងឺអាសន្នរោគកើនឡើង

អាហ្វ្រិកខាងត្បូង៖ ប្រជាជនអាហ្វ្រិកខាងត្បូង កាលពីថ្ងៃចន្ទ បានស្តីបន្តោសរដ្ឋាភិបាលតំបន់របស់ពួកគេ ព្រោះតែពុំបាន ផ្តល់ឲ្យទឹកស្អាត ខណៈអ្នកស្លាប់ពីជំងឺអាសន្នរោគកើនឡើងដល់១៥នាក់ នៅក្នុងខេត្តដែលមានប្រជាជនរស់នៅច្រើនបំផុតរបស់ប្រទេស។ នាយកដ្ឋានសុខាភិបាល ក្នុងខេត្ត Gauteng បានប្រកាសការផ្ទុះឡើងជំងឺអាសន្នរោគកាលពីថ្ងៃអាទិត្យទី២១ ខែឧសភា ក្នុងតំបន់ Hammanskraal (ហាមម៉ាន់ក្រាអាល់) ជាតំបន់មួយមានចម្ងាយប្រមាណ ៥០គីឡូម៉ែត្រ ខាងជើងទីក្រុង Pretoria (ប្រេតូរៀ)។រដ្ឋាភិបាល ទីក្រុងនិយាយថា ពលរដ្ឋជិត១០០នាក់ ត្រូវបានគេមើលឃើញនៅក្នុងមន្ទីរពេទ្យ ហើយ៣៧នាក់បានចូលសម្រាកនៅក្នុងបន្ទប់ ដោយរដ្ឋាភិបាលបានព្រមានពលរដ្ឋតំបន់ Hammanskraal និងតំបន់នៅជុំវិញនោះកុំឲ្យផឹកទឹកពីក្បាលរ៉ូប៊ីណេ។ ពលរដ្ឋអាយុ៣៦ឆ្នាំឈ្មោះ Sello Samuel Lekoto ជាពលរដ្ឋគ្មានការងារធ្វើនៅតំបន់ Hammanskraal ជាអ្នកដែលកំពុងត្រូវបានព្យាបាលជំងឺអាសន្នរោគនៅមន្ទីរពេទ្យ Jubilee បាននិយាយថា យើងកំពុងផឹកទឹកនោះ ប៉ុន្តែពួកគេមិនចង់សម្អាតទឹកនោះទេ ឬត្រូវដាក់ទុយយោមួយផ្សេងទៀតដើម្បីផ្តល់ឲ្យយើងនូវទឹកនោះ។សាលាក្រុងបាននិយាយនៅក្នុងសេចក្តីថ្លែងការណ៍ថា ទឹកត្រូវបានផ្គត់ផ្គង់ដោយទីក្រុង នៅក្នុងតំបន់ Hammanskraal ដែលអាចបរិភោគបាន ប៉ុន្តែបញ្ហានោះទីក្រុងបានផ្តល់ទឹកស្អាតបរិភោគ តាមរយៈរថយន្តដឹកទឹក ទៅកាន់តំបន់លំនៅឋានក្រៅផ្លូវការជាច្រើនលើកក្នុងមួយសប្តាហ៍។ ជំងឺអាសន្នរោគ អាចបង្ករឲ្យរាគរូសធ្ងន់ធ្ងរ ក្អួត និងចុះខ្សោយ ហើយឆ្លងជាសំខាន់តាមអាហារឬទឹកមិនស្អាត។ វាអាចធ្វើឲ្យស្លាប់បានក្នុងរយៈពេលតែប៉ុន្មានម៉ោងប្រសិនបើមិនត្រូវបានព្យាបាល។ ប្រទេសអាហ្វ្រិកខាងត្បូង បានបញ្ជាក់ពីជំងឺអាសន្នរោគចំនួន៤១ករណី នៅទូទាំងប្រទេស៕

ប្រទេសប្រេស៊ីលប្រកាសគ្រាអាសន្នសុខភាពសត្វរយៈពេល១៨០ថ្ងៃ ខណៈផ្ទុះករណីឆ្លងជំងឺផ្ដាយបក្សីព្រៃ

ប្រេស៊ីល៖ នៅក្នុងឯកសារមួយដែលត្រូវបានចុះហត្ថលេខាដោយរដ្ឋមន្ត្រីក្រសួងកសិកម្ម លោក Carlos Favaroប្រទេសប្រេស៊ីល កាលពីថ្ងៃចន្ទ បានប្រកាសដាក់រដ្ឋក្នុងគ្រាអាសន្នសុខភាពសត្វរយៈពេល១៨០ថ្ងៃ ឆ្លើយតបទៅនឹងការរកឃើញដំបូងរបស់ប្រទេសនៃការផ្ទុះជំងឺផ្ដាសាយបក្សីធ្ងន់ធ្ងរនៅក្នុងចំណោមបក្សីព្រៃ។ ការចម្លងជំងឺផ្ដាសាយបក្សដោយប្រភេទវីរុសទី២គឺ H5N1 លើសត្វបក្សីព្រៃមិនបង្កឲ្យមានការដាក់បម្រាមលើការធ្វើពាណិជ្ជកម្ម ដោយផ្អែកលើសេចក្ដីណែនាំរបស់អង្គការពិភពលោកសម្រាប់សុខភាពសត្វ ។ប៉ុន្តែករណីផ្ទុះជំងឺផ្ដាសាយបក្សីពីកសិដ្ឋានមួយ តាមធម្មតាតម្រូវឲ្យសម្លាប់បក្សីទាំងអស់ និងអាចរឹតត្បិតលើការធ្វើអាជីវកម្មពីបណ្ដាប្រទេសនាំចូល។ ប្រេស៊ីល ជាប្រទេសនាំចេញមាន់សាច់ធំបំផុតក្នុងទំហំទឹកប្រាក់៩,៧ពាន់លានដុល្លារអាមេរិកកាលពីឆ្នាំមុន បានបញ្ជាក់ពីការផ្ទុះករណីជំងឺផ្ដាសាយបក្សី H5N1ចំនួន៨ករណីនៅក្នុងចំណោមបក្សីព្រៃ រួមទាំង៧ករណីនៅក្នុងរដ្ឋ Espirito Santo និងមួយករណីនៅក្នុងរដ្ឋ Rio de Janeiro ។ កាលពីចុងសប្ដាហ៍មុន ក្រសួងសុខាភិបាលបាននិយាយថា មានសំណាកសង្ស័យឆ្លងជំងឺផ្ដាសាយបក្សីចំនួន៣៣ករណីលើខ្លួនមនុស្ស នៅក្នុងរដ្ឋ Espirito Santo ជាទីដែលប្រទេសប្រេស៊ីល បានបញ្ជាក់ករណីដំបូងក្នុងចំណោមបក្សីព្រៃ កាលពីសប្ដាហ៍មុន បានបង្ហាញលទ្ធផលអវិជ្ជមានវិញសម្រាប់វីរុសទី២ប្រភេទ H5N1៕

ជនជាប់ចោទសម្លាប់មនុស្សនៅអាមេរិកនៅស្ងៀម អំឡុងសវនាការពាក់ព័ន្ធនឹងឃាតកម្ម នៅមហាវិទ្យាល័យក្នុងរដ្ឋ Idaho

អាមេរិក៖ លោក Bryan Kohberger ជនជាប់ចោទពីបទសម្លាប់និស្សិតមហាវិទ្យាល័យ Idaho បួននាក់ ក្នុងការវាយប្រហារកាលពីព្រឹកព្រលឹមឆ្នាំមុន បានសម្រេចចិត្តឈរយ៉ាងស្ងៀមស្ងាត់ ក្នុងអំឡុងពេលសវនាការលើចោទប្រកាន់លើមកលើខ្លួន កាលពីថ្ងៃចន្ទ។លោក Kohberger វ័យ ២៨ឆ្នាំ មិនបានឆ្លើយតបទៅកាន់ចៅក្រមទេ នៅពេលត្រូវបានសួរចម្លើយលើរូបគាត់ ហើយមេធាវីរបស់គាត់ បានបញ្ជាក់ថា កូនក្ដីរបស់ខ្លួនឈរនៅស្ងៀមស្ងាត់មិននិយាយអ្វីទាំងអស់។ ដោយសារមិនបានឆ្លើយតប ចៅក្រមបានចូលទៅផ្តល់ចម្លើយពីការគ្មានទោសកំហុសជំនួសឲ្យរូបគេ។លោក Kohberger ត្រូវបានចោទប្រកាន់ពីបទចាក់ស្ត្រីបីនាក់ និងបុរសម្នាក់ នៅក្នុងផ្ទះរបស់ជនរងគ្រោះ កាលពីព្រឹកព្រលឹមថ្ងៃទី១៣ ខែវិច្ឆិកាឆ្នាំមុន ជាក្រិដ្ឋកម្មដែលបានធ្វើឲ្យទីក្រុងតូចមួយនៃមហាវិទ្យាល័យនៅទីក្រុងម៉ូស្កូ រដ្ឋ Idaho មានការភ្ញាក់ផ្អើល និងទាក់ទាញការចាប់អារម្មណ៍នៅទូទាំងប្រទេស។អ្នករួមបន្ទប់ពីរនាក់ទៀតនៅក្នុងផ្ទះពុំមានរបួសទេ ហើយយោងតាមឯកសាររបស់តុលាការបានឲ្យដឹងថា ស្ត្រីម្នាក់ក្នុងចំណោមស្ត្រីទាំងនោះ បានប្រាប់អ្នកស៊ើបអង្កេតថា ខ្លួនបានឮនរណាម្នាក់កំពុងយំនៅក្នុងបន្ទប់ដេករបស់ជនរងគ្រោះ នៅវេលាម៉ោង៤ទៀបភ្លឺ មុនពេលបុរសពាក់ម៉ាស់ ពាក់អាវខ្មៅ បានដើរកាត់នាង និងចេញពីផ្ទះនោះ។ ៦សប្តាហ៍ក្រោយមក លោក Kohberger ត្រូវបានចាប់ខ្លួននៅរដ្ឋ Pennsylvania។ ជនរងគ្រោះរួមមាន Madison Mogen, Kaylee Goncalves, Xana Kernodle និងមិត្តប្រុសរបស់នាង Ethan Chapin សុទ្ធតែបានរងរបួសដោយការត្រូវបានចាក់ជាច្រើនកាំបិត។នៅពេលនោះ លោក Kohberger កំពុងចំណាយពេលសិក្សាសញ្ញាប័ត្របណ្ឌិតផ្នែកច្បាប់ នៅសាកលវិទ្យាល័យ Washington State ដែលមានចម្ងាយប្រមាណជា ១៦គីឡូម៉ែត្រ ពីសាកលវិទ្យាល័យ Idaho ។អាជ្ញាធរមិនបានបង្ហាញពីមូលហេតុនៅពីក្រោយរឿងនេះទេ ប៉ុន្តែបាននិយាយថា ពួកគេមានទំនុកចិត្តថា លោក Kohberger ជាឃាតក។ ចៅក្រមបានកំណត់ពេលសវនាការនឹងចាប់ផ្តើមនៅថ្ងៃទី២ ខែតុលា ហើយជាប់ចោទអាចប្រឈមមុខនឹងការជាប់ពន្ធនាគារអស់មួយជីវិត ឬទោសប្រហារជីវិត ប្រសិនបើត្រូវបានកាត់ឲ្យជាប់ទោសពីបទមនុស្សឃាត៕

ប្រជាពលរដ្ឋឥណ្ឌាទទួលទានភេសជ្ជៈត្រជាក់ៗ ងូតទឹកក្នុងទន្លេដើម្បីការពារអាកាសធាតុក្តៅខ្លាំង

ឥណ្ឌា៖ ប្រជាពលរដ្ឋនៅតាមតំបន់ជាច្រើនក្នុងប្រទេសឥណ្ឌា នាំគ្នាទទួលទានភេសជ្ជៈត្រជាក់ៗ និងងូតទឹកក្នុងទន្លេ ដើម្បីធ្វើឲ្យខ្លួនពួកគេត្រជាក់ ស្របពេលដែលរលកកម្តៅកាន់តែក្តៅខ្លាំងនៅទូទាំងតំបន់ ។ ស្របពេលដែលតូបលក់ទឹកផ្លែឈើ និងភេសជ្ជៈម្សៅក្រាម ផ្តល់ភាពធូរស្រាលដល់ពលរដ្ឋដែលធ្វើដំណើរក្រោមកម្តៅព្រះអាទិត្យដ៏ក្តៅនៅទីក្រុងភាគខាងកើត Patna ប្រជាពលរដ្ឋរស់នៅក្នុងទីក្រុង Chandigarh បានទទួលទានការ៉េមកី និងផឹកទឹកត្រជាក់ ដើម្បីដោះស្រាយបញ្ហាអាកាសធាតុក្តៅនេះ ។ ខណៈពេលនោះដែរ ទន្លេបានសង្រ្គោះប្រជាពលរដ្ឋរស់នៅទីក្រុងភាគខាងជើង Prayagraj ជាទីដែលពួកគេមើលឃើញសីតុណ្ហភាពកើនឡើងខ្ពស់ជាង ៤០អង្សាសេ លោក Rahul Singh គឺជាពលរដ្ឋមួយរូបរស់នៅក្នុងទីក្រុង Prayagraj និយាយថា វាពិតជាក្តៅខ្លាំងណាស់ ហើយវាមានអារម្មណ៍ថាដូចជារងើកភ្លើងធ្លាក់ពីលើមេឃអញ្ចឹង ។ ប្រជាពលរដ្ឋប្រឈមនឹងបញ្ហាច្រើនណាស់ ដោយសារតែរលកកម្តៅនេះ នោះហើយគឺជាហេតុផលដែលអ្នកមើលឃើញមនុស្សយ៉ាងច្រើននៅទីនេះ ។ ប្រជាពលរដ្ឋបានមកទីនេះ ដើម្បីងូតទឹក និងគេចចេញពីកម្តៅ ។ គួរឲ្យដឹងថា រដូវក្តៅនៅក្នុងប្រទេសឥណ្ឌា គឺជាពេលវេលាដ៏លំបាកមួយ ពេលដែលសីតុណ្ហភាពក្តៅខ្លាំងនាំឲ្យកើតមានជំងឺ ហើយជួនកាលស្លាប់មនុស្សទៀតផង ។ មូលហេតុដែលនាំឲ្យសីតុណ្ហភាពកើនឡើងខ្ពស់បែបនេះ គឺដោយសារបញ្ហាជាច្រើន ចាប់ពីបញ្ហាបម្រែបម្រួលអាកាសធាតុ រហូតដល់ការធ្វើនគរូបនីយកម្មកាន់តែខ្លាំងជាងមុន ការកសាងអគារខ្ពស់ៗ និងការថយចុះស្រទាប់បៃតង ៕

ជនប៉ាឡេស្ទីន៣នាក់ ត្រូវបានសម្លាប់ដោយកងកម្លាំងអ៊ីស្រាអែលនៅតំបន់កាន់កាប់វ៉េសប៊ែង

ប៉ាឡេស្ទីន៖ ក្រសួងសុខាភិបាលប៉ាឡេស្ទីន និយាយនៅក្នុងសេចក្តីថ្លែងការណ៍ថា ជនប៉ាឡេស្ទីន ៣នាក់ ត្រូវបានសម្លាប់ដោយកងកម្លាំងអ៊ីស្រាអែល នៅជំរំជនភៀសខ្លួន Balata ស្ថិតក្នុងតំបន់កាន់កាប់វ៉េសប៊ែងនៅព្រឹកថ្ងៃចន្ទនេះ ។ នៅពុំទាន់មានការបញ្ជាក់អះអាងភ្លាមៗពីចំនួនអ្នកស្លាប់ពីដោយយោធាអ៊ីស្រាអែលនោះទេ ។ ទីភ្នាក់ងារព័ត៌មានរដ្ឋប៉ាឡេស្ទីន រាយការណ៍នៅថ្ងៃចន្ទនេះថា កងកម្លាំងអ៊ីស្រាអែល បានវាយឆ្មក់ជំរំជនភៀសខ្លួន Balata ស្ថិតក្នុងទីក្រុង Nablus ដោយប្រើប្រាស់គ្រឿងចក្រ និងបិទផ្លូវមិនឲ្យរថយន្តគិលានសង្រ្គោះចូលក្នុងជំរំ ៕

អគ្គិភ័យដ៍ធំឆេះហ៊ុមព័ទ្ធអគារការិយាល័យប្រៃសនីយ៍កណ្តាលទីក្រុងម៉ានីល

ហ្វីលីពីន៖ អគ្គិភ័យដ៏ធំដែលបានឆេះហ៊ុមព័ទ្ធការិយាល័យប្រៃសនីយ៍កណ្តាលទីក្រុងម៉ានីល ប្រទេសហ្វីលីពីន ជាប្រវត្តិសាស្ត្រ ត្រូវគ្រប់គ្រងបានទាំងស្រុងហើយ បន្ទាប់ពីរយៈពេលជាង៧ម៉ោងនៃការប្រឹងប្រែងពន្លត់ដ៏ខ្លាំងក្លា។ អណ្តាភ្លើង រឹតតែខ្លាំងឡើងឈានដល់ការប្រកាសអាសន្នខ្ពស់បំផុត ឬការប្រកាសអាសន្នទូទៅ នៅម៉ោង៥:៣០នាទី ព្រឹក ម៉ោងក្នុងស្រុក នៅថ្ងៃចន្ទទី២២ ខែឧសភានេះ។ យោងតាមស្ថានីយអគ្គភ័យទីក្រុងម៉ានីល បានឲ្យដឹងថា អគ្គិភ័យបានផ្ទុះឡើងនៅអំឡុងម៉ោង១១យប់ ម៉ោងក្នុងសុក្រ កាលពីថ្ងៃអាទិត្យ។ រហូតដល់ពាក់កណ្តាលអធ្រាត្រ ក្រុមអ្នកពន្លត់អគ្គិភ័យជិត៤០នាក់ មកពីសង្កាត់ផ្សេងៗគ្នានៃទីក្រុងម៉ានីល បានជួយពន្លត់ភ្លើងនេះបានដោយជោគជ័យ។ លោក Mark Laurente នាយបុគ្គលិកនៃអង្គភាពសេវាប្រៃសនីយ៍ បានប្រាប់ប្រព័ន្ធផ្សព្វផ្សាយថាឯកសារអត្តសញ្ញាណជាតិ នៅធានាបាន ព្រោះឯកសារទាំងនោះត្រូវបានតម្កល់ទុកនៅទីក្រុងមួយផ្សេងទៀត។ ទោះជាយ៉ាងណា ការិយាល័យប្រៃសនីយ៍កណ្តាល ដែលផ្ទុកសំបុត្រ និងកញ្ចប់ផ្សេងៗ មួយចំនួនអាចបានបាត់បង់ក្នុងអគ្គិភ័យនោះ។ អគារនេះ ត្រូវបានសាងសង់ដំបូងនៅក្នុងឆ្នាំ១៩២៦ ប៉ុន្តែវាបន្តការសាងសង់ឡើងវិញនៅក្នុងឆ្នំ១៩៤៦ បន្ទាប់ពីត្រូវបានបំផ្លាញធ្ងន់ធ្ងរអំឡុងសង្គ្រាមលើកលើកទី២៕

ហេតុការណ៍ប្រជ្រៀតជាន់គ្នានៅពហុកីឡដ្ឋានបណ្តាលឲ្យមនុស្ស១២នាក់ស្លាប់ នៅអែលសាលវ៉ាឌ័រ

El Salvador៖ យ៉ាងហោចណាស់មនុស្ស១២នាក់បានស្លាប់ និងចំនួនមិនជាក់លាក់បានរងរបួសបន្ទាប់ពីហេតុការណ៍ប្រជ្រៀតជាន់គ្នានៅពហុកីឡដ្ឋានបាល់ទាត់ ក្នុងប្រទេសអែលសាលវ៉ាឌ័រ កាលពីចុងសប្តាហ៍កន្លងទៅនេះ។ ក្រុម Alianza FC និងក្លឹប Deportivo FAS បានប្រកួតគ្នានៅជុំទី២នៃការប្រកួតកីឡា៤ប្រកួតវគ្គចុងក្រោយនៃវគ្គជម្រុះរបស់ពួកគេ នៅពហុកីឡដ្ឋាន Cuscatlan នៅក្នុងរដ្ឋធានី San Salvador នៅពេលនោះការប្រកួតបានផ្អាកបន្ទាប់ពីហេតុការណ៍ប្រជ្រៀតជាន់គ្នាបានកើតឡើងនៅក្នុងទីតាំងសម្រាប់អ្នកឈរទស្សនាការប្រកួត។ ពហុកីឡដ្ឋាន Cuscatlan អាចផ្ទុកអ្នកគាំទ្របាន ៤៤.០០០នាក់ ដែលបានធ្វើឲ្យវាក្លាយជាពហុកីឡដ្ឋានធំបំផុតមួយនៅក្នុងប្រទេសអាមេរិកកណ្តាល។រដ្ឋមន្ត្រីរដ្ឋាភិបាល លោក Juan Carlos Bidegain បាននិយាយថា ពហុកីឡដ្ឋានបានប្រែក្លាយទៅជាសមរភូមិ។ ប្រធានាធិបតីអែលសាលវ៉ាឌ័រ លោក Nayib Bukele បាននិយាយនៅលើបណ្តាញTwitter ថា នគរបាលស៊ីវិលជាតិ និងការិយាល័យអគ្គមេធាវីនឹងធ្វើការស៊ើបអង្កេតហ្មត់ចត់នៅក្នុងហេតុការណ៍នៅ ពហុកីឡដ្ឋាននេះ។មនុស្សគ្រប់គ្នានឹងត្រូវបានស៊ើបអង្កេត មានទាំងក្រុម អ្នកគ្រប់គ្រង ពហុកីឡដ្ឋាន ការិយាល័យប្រអប់សំបុត្រ ក្រុមប្រកួត សហព័ន្ធ និងជាច្រើនទៀត។ នណាក៏ដោយដែលជាពិរុទ្ធជន ពួកគេនឹងពុំត្រូវបានរួចផុតពីទណ្ឌកម្មនោះទេ៕

សមត្ថកិច្ចបញ្ជាក់ថា ការផ្សព្វផ្សាយព័ត៌មានអំពីការចាប់ក្មេងៗជាព័ត៌មានក្លែងក្លាយបង្កើតឡើងដោយក្រុមជនអាក្រក់

ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមាហាផ្ទៃ នាយប់ថ្ងៃទី២១ ខែឧសភានេះបានបញ្ជាក់ថា ការផ្សព្វផ្សាយនៅលើគេហទំព័រហ្វេសប៊ុកមួយចំនួននាពេលថ្មីៗនេះថា មានករណីចាប់ក្មេង ឬការចាប់ក្មេងវះក្រលៀន ជាព័ត៌មានមិនពិត បង្កើតឡើងដោយក្រុមជនអាក្រក់ ប្រឆាំងរាជរដ្ឋាភិបាល មានបំណងបំពុលសង្គម។ នាយកដ្ឋានប្រឆាំងបទល្មើសបច្ចេកវិទ្យា បានជម្រាបជូនសាធារណជនជ្រាបថានាពេលកន្លងទៅនេះ ទំព័រហ្វេសប៊ុកឈ្មោះ “អនុរក្ស”, “កាមទេពលឹមហុង” និងគណនីហ្វេសប៊ុកមួយចំនួន បានចុះផ្សាយព័ត៌មានអំពីការចាប់ក្មេង ឬការចាប់ក្មេងវះក្រលៀន ។ «បន្ទាប់ពីទទួលព័ត៌មានខាងលើនេះ នាយកដ្ឋានបានចាត់មន្រ្តីជំនាញធ្វើការស្រាវជ្រាវបន្ទាន់ ជាលទ្ធផលកំណត់បានថា ព័ត៌មានទាំងនេះ ជាព័ត៌មានក្លែងក្លាយ ដែលបង្កើតឡើងដោយក្រុមដែលមាននិន្នាការប្រឆាំងនឹងរាជរដ្ឋាភិបាលស្របច្បាប់ ។ បច្ចុប្បន្ននាយកដ្ឋានជំនាញ កំពុងប្រមូលភស្ថុតាង ដើម្បីអនុវត្តនិតិវិធីច្បាប់»។ នេះបើតាមសេចក្ដីក្នុងហ្វេសប៊ុកនាយកដ្ឋានដដែល។ នាយកដ្ឋានសង្ឃឹមថា មហាជន និងសាធារណជនដែលប្រើប្រាស់បណ្តាញសង្គម មេត្តាកុំបន្តចែកចាយព័ត៌មានក្លែងក្លាយខាងលើនេះ ដើម្បីចៀសវាងបង្កការយល់ច្រឡំ ឬបង្កអសន្តិសុខសង្គមផ្សេងៗ៕

បណ្ដាញសង្គម

ព័ត៌មានថ្មីៗ

កម្ពុជា និងសាធារណរដ្ឋបង់ក្លាដែស ប្ដេជ្ញាពង្រឹងកិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរ

ពលរដ្ឋអាល្លឺម៉ង់ សម្រុកឆ្លងកាត់ព្រំដែនទៅប៉ូឡូញដើម្បីស្វែងរកប្រេងឥន្ធនៈដែលមានតម្លៃទាបជាង

ចក្រភពអង់គ្លេស នឹងធ្វើជាម្ចាស់ផ្ទះកិច្ចប្រជុំអន្តរជាតិស្តីពីការបើកឡើងវិញច្រកសមុទ្រ Hormuz

ក្រុមបាតុករនៅទីក្រុងតូក្យូ តវ៉ាប្រឆាំងការដាក់ពង្រាយមីស៊ីលរបស់ប្រទេសជប៉ុន

នាវាទេសចរណ៍មួយដឹកភ្ញៀវទេសចរសរុបជាង៦០០នាក់ ចូលចតនៅកំពង់ផែក្រុងព្រះសីហនុ

រញ្ជួយដីដ៏ខ្លាំងក្លានៅឥណ្ឌូនេស៊ី បានបំផ្លាញអគារដែលបណ្ដាលឱ្យមនុស្សម្នាក់ស្លាប់

ធុរកិច្ចជប៉ុនដែលវិនិយោគចិញ្ចឹមត្រីទីឡាប់នៅកម្ពុជាកំពុងសិក្សាលទ្ធភាពជំរុញការនាំចេញ

អភិបាលខេត្តកំពង់ចាម នាំយកអំណោយសប្បុរសធម៌ ចែកជូនបងប្អូនជនភៀសសឹក ក្នុងខេត្តព្រះវិហារ

ភាគហ៊ុនធ្លាក់ចុះ ប្រាក់ដុល្លារនិងប្រេងឡើងថ្លៃ បន្ទាប់ពីសុន្ទរកថារបស់លោក Trump ស្តីពីសង្គ្រាមអ៊ីរ៉ង់

អភិបាលខេត្តកណ្ដាល ណែនាំប្រជាពលរដ្ឋឱ្យប្រុងប្រយ័ត្នអំពីបញ្ហាបោកប្រាស់តាមប្រព័ន្ធបច្ចេកវិទ្យា Online Scam និងពិនិត្យឯកសារឱ្យបានច្បាស់មុនជួលផ្ទះឱ្យជនបរទេសស្នាក់នៅ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877