BTV NEWS

Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ

Manchester City ព្យាយាមរក្សា Rodri ខណៈ Real Madrid បន្តដាក់សម្ពាធចង់នាំយកទៅ Bernabéu

បាល់ទាត់អង់គ្លេសសាកល្បងច្បាប់ថ្មី ដើម្បីទប់ស្កាត់ "យុទ្ធសាស្ត្រផ្អាកការប្រកួតតាមរយៈការព្យាបាលអ្នកចាំទី"

Yan Diomonde ព្រមព្រៀងលក្ខខណ្ឌផ្ទាល់ខ្លួនជាមួយ Real Madrid ខណៈ PSG ដកខ្លួនចេញពីការប្រជែង

ព័ត៌មានកីឡា

កម្ពុជាចាញ់ម៉ុងហ្គោលលី ២-១ ជំនួបមិត្តភាពអន្តរជាតិជើងទីពីរនៅទីក្រុងអ៊ូឡង់បាទ័រ

ក្រុមកីឡាបាល់ទាត់ម៉ុងហ្គោលី វាយបកយកឈ្នះកម្ពុជា ២-១ ក្នុងការប្រកួតមិត្តភាពអន្តរជាតិ ជើងទី២ នៅរដ្ឋធានីអ៊ូឡង់បាទ័រ ថ្ងៃអង្គារម្សិលមិញនេះ។ ជំនួបជើងទីពីរដែលមានការផ្សាយផ្ទាល់ពី BTV ផងដែរនោះ ជាថ្មីម្តងទៀត សារ ទី ជាអ្នករកគ្រាប់បាល់នាំមុខឱ្យកម្ពុជា មុនពេល Nyam-Osor និង Gantuyaa សម្រេចគ្រាប់បាល់តាមស្មើ និងជ័យជម្នះ ជាបន្តបន្ទាប់។ កាលពីជើងទី១ នៅថ្ងៃទី៧ ខែមិថុនា នៅពហុកីឡដ្ឋានជាតិអូឡាំពិក ក្រុមគោព្រៃកម្ពុជា បានយកឈ្នះ ម៉ុងហ្គោលី ២-០ ដែលធ្វើបានដោយ Yudai Ogawa និង សារ ទី។ ការប្រកួតមិត្តភាពអន្តរជាតិទាំងពីរប្រកួតនេះធ្វើឡើងដើម្បីកម្តៅសាច់ដុំ ខណៈក្រុមទាំងពីរត្រៀមប្រកួតជម្រុះ AFC Asian Cup ឆ្នាំ ២០២៧។តាមរយៈលទ្ធផលប្រកួតនេះ មានន័យថាកម្ពុជា ឈ្នះ១ ចាញ់១ និងស្មើ១ ជាមួយម៉ុងហ្គោលីក្នុងចំណោមប្រវត្តិជួបគ្នា ៣ លើក។ ជំនួបដំបូងរវាងក្រុមទាំងពីរធ្វើឡើងនៅពហុកីឡដ្ឋានជាតិអូឡាំពិក ឆ្នាំ ២០១៩ បញ្ចប់ទៅដោយលទ្ធផល ១-១៕ អត្ថបទ៖នាង សុភាវុធ

១៨ប្រទេសឡើងជុំទី៣ ការប្រកួតជម្រុះបាល់ទាត់ពិភពលោក២០២៦ តំបន់អាស៊ី

១៨ប្រទេសឡើងទៅជុំទី៣ នៃការប្រកួតជម្រុះបាល់ទាត់ពិភពលោក២០២៦ តំបន់អាស៊ី ក្នុងនោះសមាជិកសហព័ន្ធបាល់ទាត់អាស៊ាន (AFF) មាន អូស្ត្រាលី និង ឥណ្ឌូនេស៊ី, អាស៊ីកណ្តាល (CAFA) មានអ៊ីរ៉ង់ កៀហ្ស៊ីស៊ីស្ថាន និងអ៊ួសបេគីស្ថាន, អាស៊ីខាងកើត (EAFF) មាន ចិន កូរ៉េខាងត្បូង កូរ៉េខាងជើង និងជប៉ុន, អាស៊ីខាងត្បូង (SAFF) មិនមានក្រុមឡើងទេ ហើយក្រៅពីនោះជាក្រុមមកពីអាស៊ីខាងលិច (WAFF) ដូចជា បារ៉ែន កាតា កូវ៉ែត ហ្សក់ដានី អ៊ីរ៉ាក់ ប៉ាឡេស្ទីន អារ៉ាប៊ីសាអូឌីត អេមីរ៉ាត់អារ៉ាប់រួម និងអូម៉ង់។ ការចាប់ឆ្នោតជុំទី៣ និងធ្វើឡើងនៅថ្ងៃទី២៧ ខែមិថុនា ខាងមុខនេះ។ សូមជម្រាបជូនថា ក្រុមទាំង១៨នេះ ត្រូវបែងចែកជាបីពូល (A B C) ក្នុងមួយពូលមាន៦ក្រុម ហើយក្រោយលេង១០ប្រកួត(ក្នុងដី-ក្រៅដី)នៃពូលនីមួយៗ, ក្រុមលេខ១ (A1 B1 C1) និងលេខ២ (A2 B2 C2) សរុប៦ក្រុម បានកៅអីទៅលេងបាល់ទាត់ពិភពលោក២០២៦ កាណាដា ម៉ិកស៊ិក អាមេរិក។ ចំនែកក្រុមលេខ៣ (A3 B3 C3) និងលេខ៤ (A4 B4 C4) សរុប៦ក្រុមទៀត ត្រូវលេងជុំទី៤ ដោយបែងចែក២ពូល (A និងB ) ទៀតដោយមួយពូលមាន៣ក្រុម ក្រុមនីមួយៗត្រូវលេងតែមួយជើងលើដីកណ្តាល ហើយក្រុមលេខ១ពូលA និងលេខ១ពូលB ឡើងទៅលេងបាល់ទាត់ពិភពលោកបន្ថែមកៅអីមាន៨ក្រុមពីតំបន់អាស៊ី។ ដោយឡែក ក្រុមលេខ២ ពូលA និងលេខ២ពូលB ក្នុងជុំទី៤ ត្រូវលេងវគ្គជម្រុះជុំទី៥បន្ត ដោយលេងក្នុងដី-ក្រៅ ក្រុមដែលឈ្នះត្រូវជម្រុះជាមួយក្រុមនៅទ្វីបផ្សេង ហើយបើឈ្នះ នោះអាស៊ី នឹងមាន៩ក្រុម បង្ហាញខ្លួនក្នុង បាល់ទាត់ពិភពលោក២០២៦៕

ពាន Soccer League លើកទី៧ ចាប់ផ្ដើមការប្រកួតជម្រុះតាមពូល ទាំងបុរស និងនារី

ការប្រកួតបាល់ទាត់ដណ្ដើមពានរង្វាន់ Soccer League លើកទី៧ ឆ្នាំ២០២៤ បានចាប់ផ្ដើមការប្រកួតជម្រុះតាមពូលនីមួយៗ ជាផ្លូវការហើយ នៅថ្ងៃទី១០ ខែមិថុនា ឆ្នាំ២០២៤ ទាំងផ្នែកបាល់ទាត់បុរស និងនារី ខណៈការប្រកួតជម្រុះតាមពូលនេះ បានធ្វើឡើង ១ថ្ងៃ ក្រោយពិធីបើកផ្លូវការ កាលពីថ្ងៃអាទិត្យកន្លងទៅសម្រាប់លទ្ធផលការប្រកួតថ្ងៃដំបូង នៃវិញ្ញាសាបាល់ទាត់បុរស ចំពោះពូលA គឺក្រុម Try All FC បានយកឈ្នះក្រុម Helpl To Buy FC ៣-១ ស្របពេលក្រុម ខណៈពូលB ក្រុមយុវជនវត្តសិរីបន្ទាយដែក បានប្រកួតស្មើក្រុមយុវជនមូស្លិមច្រាំងចំរេះ១ ដោយលទ្ធផល ២-២ នៅទីលានបាល់ទាត់វិទ្យាល័យបឹងត្របែកដូចគ្នា ។ចំណែកលទ្ធផលការប្រកួតបាល់ទាត់បុរស ២គូទៀត ដែលធ្វើឡើងនៅទីលាន AUPP គឺក្រុម Chamkarmon Lion FC បានយកឈ្នះក្រុមយុវជនឬស្សីកែវ ៣-១ ក្នុងពូលC និងក្រុមដូណាត់រីករាយ បានយកឈ្នះក្រុមយុវជន ៧មករាច្រាំងចំរេះ១ ដោយលទ្ធផល ៤-១ ក្នុងពូលD ។រីឯការប្រកួតបើកឆាកផ្នែកបាល់ទាត់នារីវិញ សម្រាប់ជំនួបបើកឆាកពូលA គឺក្រុមបាល់ទាត់ភ្នំពេញក្រោន បានយកឈ្នះក្រុម ស.ស.យ.ក រាជធានីភ្នំពេញ ដោយលទ្ធផល ៦-០ ។គួរដឹងថា ពានរង្វាន់ Soccer Leaguer ឆ្នាំនេះ មានក្រុមចូលរួមប្រកួតសរុប ៦១ក្រុម ក្នុងនោះក្រុមបុរសមានចំនួន ៤៨ក្រុម និងក្រុមនារីមានចំនួន ១៣ក្រុម ដែលបានប្រារព្ធពិធីបើកការប្រកួតផ្លូវការ កាលពីថ្ងៃទី០៩ ខែមិថុនាកន្លងទៅ ក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា និងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រួមជាមួយថ្នាក់ដឹកនាំ និងប្រជាពលរដ្ឋជាច្រើន ដែលបានចូលរួមអបអរសាទរពិធីបើក និងការប្រកួតមិត្តភាពសប្បុរសធម៌ រវាងក្រុម ស.ស.យ.ក អលស្ដារ និងក្រុមផ្ការីកគ្រប់រដូវ របស់នាយ ពាក់មី ក្រោមមូលបទ «បេះដូងអ្នកីឡាដើម្បីកុមារកម្ពុជា» ។ចំពោះការប្រកួតជម្រុះនេះដែរ សម្រាប់ក្រុមបាល់ទាត់បុរស បានបែងចែកចេញជា ១៦ពូល ខណៈក្រុមនារី បែងចែកចេញជា ៤ពូល ដោយគណៈកម្មការរៀបចំ គ្រោងនឹងរៀបចំការប្រកួតលើទីលានមួយចំនួន ក្នុងរាជធានីភ្នំពេញ ដូចជាទីលានវិទ្យាល័យបឹងត្របែក, ទីលានសាលកវិទ្យាល័យ អាម៉េរិកកាំងភ្នំពេញ (AUPP), ទីលានវិទ្យាស្ថានជាតិ អប់រំកាយ និងកីឡា, កីឡដ្ឋាន Smart RSN, កីឡដ្ឋាន AIA, KMH Park និងពហុកីឡដ្ឋានជាតិអូឡាំពិកជាដើម៕ អត្ថបទ លី ឈុនឡា

មន្ដ្រីជាន់ខ្ពស់សហព័ន្ធបាល់ទះថា ១ដុល្លារ នៅតែជាតម្រូវការជានិច្ច របស់មន្ទីពេទ្យគន្ធបុប្ផា

លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានគូសបញ្ជាក់ថា ថវិកា ១ដុល្លារក្ដី ២ដុល្លារ ឬ ១ម៉ឺនរៀលក្ដី នៅតែជាតម្រូវការជានិច្ចរបស់មន្ទីរពេទ្យគន្ធបុប្ផា ដើម្បីបន្ដនិរន្ដរភាព នៃបេសកកម្មជួយសង្គ្រោះកុមារកម្ពុជា ។ការលើកឡើងនេះ បន្ទាប់ពីថ្នាក់ដឹកនាំសហព័ន្ធ បានចាត់តាំងរូបលោក ដឹកនាំប្រតិភូសហព័ន្ធ និងអត្តពលកីឡាបាល់ទះកម្ពុជា ដែលទើបដណ្ដើមបានជើងឯកពានរង្វាន់អន្ដរជាតិ Win+ Streak Volleyball Invitational Tournament (WSVI) ឆ្នាំ២០២៤ នៅកោះតៃវ៉ាន់ កាលពីថ្មីៗ នាំយកថវិកាចំនួន ៩,៩៩៩ដុល្លារ បរិច្ចាគជូនមន្ទីរពេទ្យគន្ធបុប្ផា នៅថ្ងៃទី១០ ខែមិថុនា ឆ្នាំ២០២៤ ។មន្ដ្រីជាន់ខ្ពស់សហព័ន្ធដដែលបន្ដថា សកម្មភាពសប្បុរសធម៌នេះ ផ្ដួចផ្ដើមគំនិតដោយថ្នាក់ដឹកនាំសហព័ន្ធ ភ្ជាប់ជាមួយទឹកចិត្តសប្បុរសធម៌របស់អត្តពលិកបាល់ទះកម្ពុជា ដែលទើបដណ្ដើមបានជ័យជម្នះលើឆាកអន្ដរជាតិ ។ ចំពោះការបរិច្ចាគថវិការខ្វះ ១ដុល្លារ ស្មើនឹង ១ម៉ឺនដុល្លារនេះដែរ លោកបានពន្យល់ថា ក៏ព្រោះលោកចង់ផ្ញើសារដល់ប្រជាពលរដ្ឋថា មន្ទីពេទ្យត្រូវការ ១ដុល្លារជានិច្ច ដើម្បីបង្គ្រប់បន្ថែម ។ ហេតុនេះ លោកបានអំពាវនាវឲ្យប្រជាពលរដ្ឋចូលរួមបរិច្ចាគទាំងអស់គ្នា ទោះបីតិចក្ដីច្រើនក្ដី ដើម្បីជួយទ្រទ្រង់ឲ្យមន្ទីរពេទ្យគន្ធបុប្ផា ក្លាយជាមន្ទីរពេទ្យមួយ ដែលអាចមានលទ្ធភាពគ្រប់គ្រាន់សម្រាប់បន្ដនិរន្ដរភាពក្នុងការព្យាបាល និងជួយសង្គ្រោះកុមារកម្ពុជា ។គួរដឹងថា កាលពីថ្មីៗ ក្រុមបាល់ទះវិសាខា ដែលប្រជុំដោយកីឡាករជម្រើសជាតិកម្ពុជា បានចូលរួមប្រកួតពានរង្វាន់ Win+ Streak Volleyball Invitational Tournament (WSVI) ឆ្នាំ២០២៤ នៅកោះតៃវ៉ាន់ ដែលមានបេក្ខភាព ៨ក្រុម មកពី ៧ប្រទេសចូលរួម ។ ជាលទ្ធផលក្រុមតំណាងកម្ពុជានេះ ធ្វើបានយ៉ាងល្អ ដោយដណ្ដើមបានជើងឯកជូនជាតិមាតុភូមិ បន្ទាប់ពីយកឈ្នះក្រុមខ្លាំងៗជាច្រើន ពិសេសការវាយបកយកឈ្នះក្រុមម្ចាស់ផ្ទះ Win Streak ដោយលទ្ធផល ៣-១សិត ក្នុងវគ្គផ្ដាច់ព្រ័ត្រវិញ បន្ទាប់ពីរងបរាជ័យ ៣-២សិត ក្នុងវគ្គជម្រុះក្នុងពូល ៕ អត្ថបទ លី ឈុនឡា

អតីតគ្រូឆ្នើមលោក សំ វ៉ាន់ដេត ចង់ដឹកនាំក្លិបឡើងវិញ ពិសេសក្រុមជម្រើសជាតិ យុវជន

អ្នកគ្រប់គ្រង និងជានាយកបច្ចេកទេសសាលាបាល់ទាត់ខេត្តស្វាយរៀង លោក សំ វ៉ាន់ដេត បានបង្ហាញពីបំណងចង់ប្រឡូកអាជីពលើសមរភូមិវាលស្មៅ ក្នុងនាមគ្រូបង្វឹកដឹកនាំក្រុមប្រកួតប្រជែងក្នុងលីគ ក៏ដូចជាពានរង្វាន់សម្ដេចតេជោ ហ៊ុន សែន ឡើងវិញ ក្រោយខកខានអស់រយៈពេលជាយូរ។ មិនតែប៉ុណ្ណោះ លោកក៏មានក្ដីស្រម៉ៃចង់ដឹកនាំក្រុមជម្រើសជាតិកម្រិតយុវជនរបស់កម្ពុជា ដើម្បីជាការរួមចំណែកអភិវឌ្ឍវិស័យកីឡាបាល់ទាត់ជាតិផងដែរ។សូមរំឮកថា មុនចាកចេញពីតំណែងគ្រូបង្វឹកក្រុមព្រះខ័នរាជស្វាយរៀង លោក សំ វ៉ាន់ដេត ត្រូវបានចាត់ទុកជាគ្រូបង្វឹកខ្មែរដ៏ជោគជ័យ ១រូប ដែលធ្លាប់ដឹកនាំក្លិបមានមូលដ្ឋាននៅខេត្តស្វាយរៀងនេះ ទទួលបានជោគជ័យជាច្រើន ទាំងលីគ និងពានរង្វាន់សម្ដេចតេជោ ហ៊ុន សែន ពិសេសគឺការកសាងធនធានកីឡាករល្អៗ និងមានសក្ដានុពលជាច្រើន សម្រាប់ជួយដល់ក្រុមជម្រើសជាតិទៀតផង ។ម្ចាស់ពានគ្រូបង្វឹកឆ្នើមពានសម្ដេចតេជោ ៣សម័យដដែល បានបញ្ជាក់ថា ចំពោះវិស័យបាល់ទាត់ នៅតែជាក្ដីស្រលាញ់ ដែលលោកចូលចិត្តខ្លាំងបំផុត ។ ដោយផ្អែកលើបទពិសោធន៍ និងចំណេះដឹង ដែលលោកបានការសិក្សាវគ្គគ្រូបង្វឹក A License ផង លោកចង់ត្រឡប់មកដឹកនាំក្រុមប្រកួតប្រជែងក្នុងលីគឡើងវិញ ទោះបីការងារនេះ ហាក់ចង្អៀត និងមានការប្រកួតជែងខ្លាំងពីទីផ្សារគ្រូបរទេសក៏ដោយ ។ តែបើលោកមានការឱកាសដឹកនាំក្រុមជម្រើសជាតិយុវជន ក៏ជារឿងល្អ ដ្បិតនេះក៏ជាក្ដីស្រម៉ៃមួយរបស់លោកផងដែរ ។យ៉ាងណាមិញគោលបំណងរបស់លោក ក្នុងការដឹកនាំក្រុមផ្សេងៗ អាចសម្រេចទៅបាន លុះត្រាមានការអនុញ្ញាតពីថ្នាក់ដឹកក្លិបព្រះខ័នរាជស្វាយរៀង ។ លោកទទួលស្គាល់ថា លោកចង់ប្រើប្រាស់ចំណេះដឹង និងបទពិសោធន៍ ដើម្បីចូលរួមអភិវឌ្ឍន៍បាល់ទាត់ជាតិ ពិសេសលោកចង់ប្រកួតប្រជែងជាមួយគ្រូបង្វឹកបរទេស ។ ដូច្នេះលោកសង្ឃឹមថា ថ្ងៃណាមួយ លោកនឹងអាចសម្រេចក្ដីស្រម៉ៃមួយនេះ ហើយលោកក៏បានលើកទឹកចិត្តដល់គ្រូបង្វឹកខ្មែរផ្សេងៗ ឲ្យខំប្រឹង ក្រោមស្មារតីចែករំលែក និងជួយគ្នា ដើម្បីបាល់ទាត់កម្ពុជាផងដែរ ។គូរបញ្ជាក់ថា លោក សំ វ៉ាន់ដេត បានចូលរួមជាមួយក្លិបព្រះខ័នរាជស្វាយរៀង ក្នុងនាមកីឡាករ តាំងពីឆ្នាំ១៩៩៧ រហូតដល់ឆ្នាំ២០០១ ទើបលោកចាប់ផ្ដើមការងារជាគ្រូជំនួយ និងបន្ដឡើងជាគ្រូបង្វឹកក្រុមធំ។ ក្រោមការដឹកនាំរបស់គ្រូបង្វឹកជនជាតិខ្មែររូបនេះ បានជួយឲ្យក្លិបឈ្នះពានធំៗជាច្រើន ដូចជាការគ្រងជើងឯកពានរង្វាន់សម្ដេចតេជោ ហ៊ុន សែន ៣សម័យ កាលពីឆ្នាំ២០០៩, ឆ្នាំ២០១០ និងឆ្នាំ២០១៨ រួមទាំងបានគ្រងជើងឯកលីគកំពូលកម្ពុជា ១លើកផងដែរ៕ អត្ថបទ លី ឈុនឡា

ប្រតិភូ និងអត្តពលិកកីឡាសិស្សកម្ពុជា៤ប្រភេទកីឡា វិលមកដល់មាតុប្រទេសរបស់ខ្លួនវិញក្រោយបំបែកកំណត់ត្រាថ្មី

នាល្ងាចថ្ងៃអាទិត្យម្សិលមិញនេះ ក្រុមប្រតិភូ អត្តពលិកកីឡាសិស្សកម្ពុជាលើ៤ប្រភេទកីឡា បានវិលត្រឡប់មកដល់មាតុប្រទេសរបស់ខ្លួនវិញហើយ បន្ទាប់ពីបញ្ចប់បេសកកម្មពីការចូលរួមការប្រកួតកីឡាសិស្សអាស៊ី អាគ្នេយ៍ លើកទី១៣ ASEAN School Games នៅប្រទេសវៀតណាម។ ដោយមានការអញ្ជើញទទួលស្វាគមន៍ពីសំណាក់ឯកឧត្តម កែ ប៊ុនខៀង រដ្ឋលេខាធិការ ក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជា ។ ក្នុងការវិលត្រលប់មកដល់មាតុភូមិវិញ ឯកឧត្តម ព្រំ ប៊ុនយី នាយបេសកម្មដឹកនាំក្រុមអត្តពលិកកីឡាសិស្សកម្ពុជា បានឲ្យដឹងថា សម្រាប់ព្រឹត្តិការណ៍កីឡាសិស្សអាស៊ានឆ្នាំ២០២៤ គឺជាការប្រកួតលើកទី១៣ ហើយ ដោយធ្វើការប្រកួតលើ៦ប្រភេទកីឡា ប៉ុន្តែកម្ពុជាទើបតែបានចូលរួមបានចំនួន៦ លើកប៉ុណ្ណោះ ក្នុងនោះកម្ពុជាបានបញ្ជូនអត្តពលិកសរុប៤០នាក់ លើ៤ប្រភេទកីឡាទៅចូលរួមមានដូចជា អត្តពលិកម្ម ហែលទឹក វាយសី និងវ៉ូវីណាម ។ ឯកឧត្តម ក៏បានបញ្ជាក់ពីមោទនភាពជាប្រវត្តិសាស្រ្តថ្មី សម្រាប់ការប្រកួត កីឡាសិស្ស ASEAN School Games លើកទី១៣ នេះថា កម្ពុជាឈរនៅចំណាត់ថ្នាក់លេខ៧ ទទួលបានមេដាយ មាស២គ្រឿង ប្រាក់១គ្រឿង និងសំរឹទ្ធ ៦គ្រឿង ហើយមេដាយទាំងអស់ដណ្តើមបានដោយអត្តពលិកកីឡា វ៉ូវីណាមតែប៉ុណ្ណោះ ជាក់ស្តែងកាលពីអំឡុងឆ្នាំ២០១៦ កម្ពុជាទទួលាបានតែមេដាយសំរឹទ្ធ១គ្រឿងតែប៉ុណ្ណោះ ។ គួររំលឹកផងដែលថា ព្រឹត្តិការណ៍ការប្រកួតកីឡាសិស្សអាស៊ានលើកទី១៣ ប្រព្រឹត្តទៅនៅទីក្រុង Da Nang ប្រទេសវៀតណាមចាប់ពីថ្ងៃទី ២៩ ឧសភា ដល់ថ្ងៃទី ៩ ខែមិថុនា ដោយមានអត្តពលិក និងគ្រូបង្វឹកប្រមាណ ១.៣០០ នាក់មកពីប្រទេសក្នុងតំបន់ចំនួន១០ ដែលបានចូលរួមប្រកួតចំនួន ១០៧វិញ្ញាសា លើប្រភេទកីឡា ហែលទឹក អត្តពលកម្ម វាយសី បាល់បោះ បញ្ចសិលា និងវ៉ូវីណាម។ ជាប្រវត្តសាស្រ្ត កម្ពុជាបានឈរនៅក្នុង ចំណាត់ថ្នាក់ទី៧ ទទួលបានមេដាយ មាស២គ្រឿង ប្រាក់១គ្រឿង និងសំរឹទ្ធ៦គ្រឿង ក្នុងនោះម្ចាស់ផ្ទះវៀតណាមឈរនៅចំណាត់ថ្នាក់ទី១ ដណ្តើមបានមេដាយ មាស៤៤គ្រឿង ប្រាក់៣១គ្រឿង និងសំរឹទ្ធ១៧គ្រឿង។ សូមបញ្ជាក់បន្ថែមថា ការប្រកួតកីឡាសិស្សអាស៊ានលើកទី១៤ ឆ្នាំក្រោយនឹងធ្វើនៅប្រទេស ប្រ៊ុយណេ ហើយម្ចាស់នឹងដាក់៨ប្រភេទកីឡាចូលរួមព្រឹត្តិការណ៍នេះផងដែរ ៕

ក្រុមកីឡាម៉ូតូទឹកកម្ពុជា ដណ្ដើមបានមេដាយ ៥គ្រឿងពីការប្រកួតជើងឯកអាស៊ី នៅជប៉ុន

ក្រុមកីឡាម៉ូតូទឹកជម្រើសជាតិកម្ពុជា បានបញ្ចប់បេសកកម្មរបស់ខ្លួន ក្នុងការប្រកួតជើងឯកអាស៊ី Jet Ski Asian Championships ឆ្នាំ២០២៤ នៅទីក្រុង Osaka ប្រទេសជប៉ុនហើយ ដោយដណ្ដើមបានមេដាយ ៥គ្រឿង រួមមានមេដាយមាស ៣ ប្រាក់ ១ និងសំរឹទ្ធ ១គ្រឿង ។សមិទ្ធផលថ្មី ដែលក្រុមកីឡាម៉ូតូទឹកកម្ពុជា ដណ្ដើមបានលើឆាកអន្ដរជាតិ ក្រោមការដឹកនាំរបស់ប្រធានក្រុម និងជាអគ្គលេខាធិការសហព័ន្ធ លោក សាលី អ៊ូមើត នេះ រួមមាន៖ មេដាយមាស កីឡាករ មីន ម៉ូស្ដាន ដណ្ដើមបានមេដាយមាស ១ និងសំរឹទ្ធ ១ លើវិញ្ញាសា Novice Ski Stock និងវិញ្ញាសា Novice Runabout 1100 Stock ។រីឯមេដាយមាស ២គ្រឿងទៀត ដណ្ដើមបានដោយកីឡាករ សាលី អ៊ូមើត លើវិញ្ញាសារ Sport GP និងប្អូនប្រុសបង្កើតរបស់ខ្លួន គឺកីឡាករ សាលី ហ្វីលីន លើវិញ្ញាសា Expert Runabout 1100 Stock ។ ចំណែកមេដាយប្រាក់ ១គ្រឿង ដណ្ដើមបានដោយកីឡាករ កៃវ៉ាន់ ស៊ីដែន លើវិញ្ញាសា Novice Ski Stock ។ក្រោយបញ្ចប់ការប្រកួតលោក សាលី អ៊ូមើត បានសម្ដែងការពេញចិត្ត ចំពោះការខិតខំប្រឹងប្រែងរបស់កីឡាករទាំងអស់គ្នា តែលោកសោកស្ដាយ ចំពោះកីឡាករ ម៉ីន អូស្មាន់ ដោយសារបញ្ហាគ្រោះថ្នាក់ កំឡុងការប្រកួត ធ្វើឲ្យកីឡាករវ័យក្មេងដ៏មានសក្ដានុពលរូបនេះ គេខកខានឱកាសដណ្ដើមមេដាយជូនជាតិ ។ម្ចាស់មេដាយមាសកីឡាអាស៊ីដដែលបន្ដថា គោលដៅរបស់ខ្លួន ក្នុងការប្រកួតជើងឯកអាស៊ីនេះ យ៉ាងហោចឈ្នះមេដាយមាស ៤ និងប្រាក់ ៤ ។ តែយ៉ាងណាការដណ្ដើមបានមេដាយមាស ៣ ក៏ជារឿងមួយល្អដែរ ។ ក្នុងនាមអគ្គលេខាធិការសហព័ន្ធ លោកប្ដេជ្ញានឹងបន្ដខំប្រឹង ដើម្បីជំរុញពួកគេឲ្យមានការប្រកួតប្រជែង និងដណ្ដើមបានលទ្ធផលកាន់តែល្អប្រសើរជូនជាតិបន្ថែមទៀត ។គួរដឹងថា ការប្រកួត Jet Ski Asian Championships នេះ គឺជាផ្នែកមួយ នៃព្រឹត្តិការណ៍ Jet Ski World Series ដោយអ្នកទទួលបានជ័យលាភី នឹងទទួលបានកៅអីចូលរួមការប្រកួតជុំផ្ដាច់ព្រ័ត្រ ឬជុំទី៣ នៃព្រឹត្តិការណ៍ Jet Ski World Series 2024 នាចុងឆ្នាំ ។ ប៉ុន្ដែមុនឈានដល់ការប្រកួតជុំផ្ដាច់ព្រ័ត្រ សាលី អ៊ូមើត ក៏ត្រៀមនឹងបន្ដដឹកនាំសិស្សប្អូន ចូលរួមការប្រកួត Jet Ski World Series ជុំទី១ នៅប្រទេសប៉ូឡូញ នាខែកក្កដាខាងមុខ និងជុំទី២ នៅសហរដ្ឋអាមេរិក នាខែតុលា ឆ្នាំ២០២៤ ខាងមុខផងដែរ៕ អត្ថបទ លី ឈុនឡា

ឯកឧត្តម ខូវ ឆាយ មិនឲ្យ Dave Leduc ឡើងសង្វៀនគុនខ្មែរដាច់ខាត ដ្បិតការមកនៅកម្ពុជា គ្រាន់តែជាការអស់ផ្លូវប៉ុណ្ណោះ

ប្រធានសហព័ន្ធកីឡាប្រដាល់គុនខ្មែរ ឯកឧត្តម ខូវ ឆាយ បានប្រកាសមិនស្វាគមន៍កីឡាករ Dave Leduc ឡើងសង្វៀននៅកម្ពុជាដាច់ខាត បន្ទាប់ពីឯកឧត្តមបានមើលឃើញកីឡាករ Lethwai របស់មីយ៉ាន់ម៉ារូបនេះ បានបង្កបញ្ហាម្ដងហើយម្ដងទៀត ដោយគ្មានអ្វីចំណេញដល់ការជួយផ្សព្វផ្សាយគុនខ្មែរ ក្រៅពីគិតប្រយោជន៍ផ្ទាល់ខ្លួនជាធំប៉ុណ្ណោះ ។ការប្រកាសជំហរដ៏ម៉ឹងម៉ាត់នេះ បន្ទាប់ពីកីឡាករ Dave Leduc បានបង្ហាញពីបំណងឡើងសង្វៀនវិញ ដែលជាការប្រកួតនៅកម្ពុជា ជាមួយនឹងតម្លៃខ្លួន ១លានដុល្លារទើបព្រមប្រកួត ។ ឯកឧត្តម ខូវ ឆាយ បានចាត់ទុកការទាមទារនេះ គឺជាការទាមទារដើម្បីប្រយោជន៍ផ្ទាល់ខ្លួន មិនមែនដើម្បីជួយផ្សព្វផ្សាយគុនខ្មែរនោះទេ ។ លើសពីនេះ ឯកឧត្តមរឹតតែមិនគាំទ្រឲ្យមានការលើកឡើងពីបញ្ហាគុនខ្មែរ និងមួយថៃ ដែលនាំឲ្យមានការរើសអើងពូជសាសន៍ថែមទៀត ។ ដូច្នេះដរាបណាឯកឧត្តមនៅជាប្រធានសហព័ន្ធ គ្មានថ្ងៃ Dave Leduc បានឡើងសង្វៀននៅកម្ពុជាឡើយ ។បន្ថែមលើនេះ ឯកឧត្តមប្រធានសហព័ន្ធ ចាត់ទុកវត្តមានរបស់ Dave Leduc ដែលកំពុងស្នាក់អាស្រ័យនៅកម្ពុជា គ្រាន់តែជាការអស់ផ្លូវទៅប៉ុណ្ណោះ ។ មួយវិញទៀត ឯកឧត្តមបានសម្ដែងការហួសចិត្តជាខ្លាំង ដែលកីឡាករដើមកំណើតជនជាតិកាណាដារូបនេះ យកកម្មវិធីគុនខ្មែរ ដែលមានវត្តមានស្ដេចប្រដាល់ពិភពលោក Manny Paquiao ចូលរួមជាភ្ញៀវកិត្តិយស ដើម្បីផ្សព្វផ្សាយក្បាច់គុនខ្មែរ Lethwai ទៅវិញ ។ តាមរយៈនេះ ឯកឧត្តម ខូវ ឆាយ បានអំពាវនាវឲ្យអ្នកគាំទ្រគុនខ្មែរ ឈប់ចាប់អារម្មណ៍បុគ្គលនេះ ដ្បិតរូបគេមិនស័ក្ដិសមទទួលបានការកោតសរសើរពីពលរដ្ឋខ្មែរឡើយ ។គួរដឹងថា ក្រោយប្រកួតស្មើជាមួយអ្នកលេងគុនខ្មែរ ព្រំ សំណាង កាលពីដើមខែវិច្ឆិកា ឆ្នាំ២០២៣ Dave Leduc ក៏បានប្រកាសចូលនិវត្តន៍ ។ ទើបតែថ្មីៗនេះ រូបគេចង់ឡើងប្រកួតវិញនៅកម្ពុជា តែលុះត្រាមានការហ៊ានឲ្យតម្លៃខ្លួន ១លានដុល្លារ ទើបរូបគេព្រមប្រកួត ។ បច្ចុប្បន្ន Dave Leduc កំពុងរស់នៅកម្ពុជាប្រមាណជិត ៣ខែមកហើយ ដោយកំពុងដំណើរការបើកអាជីវកម្មផ្ទាល់ជាក្លិបកីឡាមួយ ដែលមានឈ្មោះថា «ដាវ» ទៀតផង ៕ អត្ថបទ លី ឈុនឡា

កីឡាករឆ្នើមៗ និងយុវជន គាំទ្រពិធីបើកពាន Soccer League ក្រោមមូលបទ «បេះដូងអ្នកកីឡា ដើម្បីកុមារកម្ពុជា»

ការប្រកួតបាល់ទាត់ដណ្ដើមពានរង្វាន់ Soccer League លើកទី៧ បានប្រារព្ធពិធីបើកការប្រកួតជាផ្លូវការ នៅល្ងាចថ្ងៃទី០៩ ខែមិថុនា ឆ្នាំ២០២៤ ក្រោមវត្តមានឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា អមដំណើរដោយឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ព្រមទាំងថ្នាក់ដឹកនាំ ក្រុមបាល់ទាត់ និងមានការចូលរួមទស្សនាពីប្រជាពលរដ្ឋយ៉ាងច្រើនកុះករផងដែរ ។ដើម្បីអបអរសាទរពិធីបើកការប្រកួតផ្លូវការនេះ គណៈកម្មការ បានរៀបចំឲ្យមានការប្រកួតមិត្តភាព រវាងក្រុម ស.ស.យ.ក អលស្ដារ ដែលមានការអញ្ជើញចូលរួមលេងផ្ទាល់ពីថ្នាក់ដឹកនាំ ស.ស.យ.ក ជាមួយក្រុមផ្ការីកគ្រប់រដូវ ក្រោមមូលបទ «បេះដូងអ្នកកីឡាដើម្បីកុមារកម្ពុជា» ដែលជាការប្រកួតដើម្បីស្វែងរកមូលនិធិសម្រាប់បរិច្ចាគជូនមន្ទីរពេទ្យកុមារនានានៅកម្ពុជា ដែលទទួលបានការគាំទ្រពេញទំហឹង ពីកីឡាករឆ្នើមៗ ក៏ដូចជាយុវជនផងដែរ ។ឯកឧត្តម ហ៊ុន ម៉ានី មានប្រសាសន៍ថា នេះគឺជាការបន្តបេសកកម្មរបស់ក្រុមគ្រួសារ ស.ស.យ.ក លើការងារសង្គម មនុស្សធម៌ ការងារស្ម័គ្រចិត្ត ការកសាងមិត្តភាព ភាតរភាព សាមគ្គីភាព ក៏ដូចជាការលើកកម្ពស់កិត្យានុភាពជាតិ។ ការប្រកួតពានរង្វាន់ Soccer League មិនត្រឹមតែជាវេទិកា ដែលបានផ្តល់ឱកាសដល់យុវជនកម្ពុជា ក្នុងការជួបជុំ រឹតចំណង មិត្តភាព សាមគ្គីភាព និងបង្កើនកិច្ចសហប្រតិបត្តិការរវាងគ្នា និងគ្នា តែប៉ុណ្ណោះទេ ថែមទាំងបានក្លាយជាកម្មវិធីមនុស្សធម៌ដ៏ប្រពៃថែមទៀត ។ឆ្លៀតឱកាសនោះ ឯកឧត្តមបានលើកទឹកចិត្ត ដល់កីឡាករ-កីឡាការិនី ដែលចូលរួមប្រកួត ត្រូវប្រកាន់ខ្ជាប់នូវវិធាន និងលក្ខន្តិកៈនៃការប្រកួត ក្នុងស្មារតីសប្បាយរីករាយ មិត្តភាព សាមគ្គីភាព ភារតភាពជាបងប្អូន និងស្មារតីអធ្យាស្រ័យគ្នា។ ទន្ទឹមជាមួយគ្នា ឯកឧត្តមក៏បានអំពាវនាវដល់ប្រជាពលរដ្ឋខ្មែរ រួមទាំងសមាជិក សមាជិកា ស.ស.យ.ក. គ្រប់ៗរូប ចូលរួមលេងកីឡាឲ្យបានគ្រប់ៗគ្នា ដើម្បីសុខភាព និងសាមគ្គីភាព ព្រមទាំងបានចូលរួមជាមួយគ្នា តាមរយៈកីឡានេះ កើនបានជាផល ផ្តល់ជាប្រយោជន៍ជូនដល់សង្គមជាតិតាមលទ្ធភាពរៀងៗខ្លួនផងដែរ ។តាមរយៈការផ្សារភ្ជាប់សកម្មភាពកីឡា និងមនុស្សធម៌ ក្រោមមូលបទដ៏មានសារៈសំខាន់នេះ កីឡាករ ប្រាក់ មុន្នីឧត្តម និង កែវ សុខផេង រួមជាមួយយុវជន ដែលបានចូលរួមប្រកួត និងអបអរពិធីបើក បានសម្ដែងការសប្បាយចិត្តជាខ្លាំង ដែលថ្នាក់ដឹកនាំ ស.ស.យ.ក បានរៀបចំព្រឹត្តិការណ៍អស្ចារ្យនេះឡើង ដើម្បីមិនត្រឹមផ្ដល់ឱកាសឲ្យយុវជនបានលេងកីឡានោះទេ ថែមទាំងរួមចំណែកជួយដល់ការងារសង្គមថែមទៀត។គួរដឹងថា ពានរង្វាន់ Soccer Leaguer ឆ្នាំនេះ មានក្រុមចូលរួមប្រកួតសរុប ៦១ក្រុម ក្នុងនោះក្រុមបុរសមានចំនួន ៤៨ក្រុម និងក្រុមនារីមានចំនួន ១៣ក្រុម។ សម្រាប់ក្រុមបុរស បានបែងចែកចេញជា ១៦ពូល ខណៈក្រុមនារី បែងចែកចេញជា ៤ពូល ។ ក្រោយពិធីបើកការប្រកួតជាផ្លូវការ ចំពោះការប្រកួតបាល់ទាត់ផ្នែកបុរស និងផ្នែកនារីនេះ នឹងត្រូវដំណើរការប្រកួតដំណាលគ្នាចាប់ពីថ្ងៃទី១០ ខែមិថុនាតទៅ នៅទីលានមួយចំនួន ក្នុងរាជធានីភ្នំពេញ ដូចជាទីលានវិទ្យាល័យបឹងត្របែក, ទីលានសាលកវិទ្យាល័យ អាម៉េរិកកាំងភ្នំពេញ (AUPP), ទីលានវិទ្យាស្ថានជាតិ អប់រំកាយ និងកីឡា, កីឡដ្ឋាន Smart RSN, កីឡដ្ឋាន AIA, KMH Park និងពហុកីឡដ្ឋានជាតិអូឡាំពិកជាដើម៕ អត្ថបទ លី ឈុនឡា

មន្ដ្រីសហព័ន្ធថា ជោគជ័យក្រុមបាល់ទះវិសាខា នៅឆាយនីសតៃប៉ិ មិនមែនដោយសារកីឡាករបារាំងទាំងស្រុងទេ

លោកបណ្ឌិត អាំង សេរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ក្នុងនាមប្រធានប្រតិភូដឹកនាំក្រុមបាល់ទះវិសាខា ចូលរួមប្រកួតពានរង្វាន់អន្ដរជាតិ Win+ Streak Volleyball Invitational Tournament (WSVI) ឆ្នាំ២០២៤ នៅកោះតៃវ៉ាន់ កាលពីសប្ដាហ៍កន្លងទៅថា ជោគជ័យរបស់ក្រុមក្នុងពានអន្ដរជាតិនេះ មិនមែនផ្អែកលើកីឡាករបារាំង ៣រូបទាំងស្រុងនោះទេ គឺផ្អែកលើស្មារតី និងឆន្ទៈក្រុមទាំងមូល។ការលើកឡើងនេះ បន្ទាប់ពីលោកបានដឹកនាំក្រុមត្រឡប់មកដល់កម្ពុជាវិញ ដោយសុវត្ថិភាព កាលពីល្ងាចថ្ងៃទី០៣ ខែមិថុនា ឆ្នាំ២០២៤ បន្ទាប់ពីក្រុមបាល់ទះវិសាខា បានគ្រងជើងឯកពានរង្វាន់ Win+ Streak Volleyball Invitational Tournament (WSVI) ឆ្នាំ២០២៤ ក្រោយយកឈ្នះក្រុមម្ចាស់ផ្ទះរបស់កោះតៃវ៉ាន់ គឺក្រុម Win Streak ដែលកីឡាករជម្រើសជាតិកម្ពុជា វឿន វាសនា កំពុងប្រកបអាជីពជាមួយ ក្នុងលទ្ធផល ៣-១ សិត ក្នុងវគ្គផ្ដាច់ព្រ័ត្រ កាលពីចុងសប្ដាហ៍កន្លងទៅ។មន្ដ្រីជាន់ខ្ពស់សហព័ន្ធដដែល បានចាត់ទុកជោគជ័យរបស់ក្រុមបាល់ទះតំណាងកម្ពុជា លើឆាកអន្ដរជាតិនេះ គឺជាផ្នែកមួយដ៏ធំ ដើម្បីផ្សព្វផ្សាយពីភាពរីកចម្រើន និងសក្ដានុពលកីឡាជាតិ ពិសេសវិស័យកីឡាបាល់ទះកម្ពុជា ។ លោកថា ទោះបីបេសកកម្មនេះ មានកីឡាករបរទេស គឺកីឡាករអាជីពពីប្រទេសបារាំង ៣រូបចូលរួមក៏ពិតមែន តែឆ្លើយតបនឹងសំណួរអ្នកសារព័ត៌មានតៃវ៉ាន់ ដែលបានចោទសួរថា ជោគជ័យនេះ ដោយសារមានកីឡាករបារាំងជួយ? លោកថា មិនបែបនេះឡើយ ពោលគឺកីឡាករទាំងអស់ ទាំងអ្នកបម្រុង សុទ្ធតែបានត្រៀមយ៉ាងល្អ ទើបជំរុញឲ្យក្រុមបាល់ទះវិសាខា ទទួលបានជោគជ័យបែបនេះ ។គួរដឹងថា មុនគ្រងជើងឯកពានរង្វាន់ Win+ Streak Volleyball Invitational Tournament (WSVI) ឆ្នាំ២០២៤ នៅកោះតៃវ៉ាន់ ក្រុមបាល់ទះវិសាខា បានឆ្លងកាត់ ៥ប្រកួត និង ៥ថ្ងៃជាប់ៗគ្នា ក្នុងនោះប្រកួតទី១ ឈ្នះក្រុម Australian Volleyball Academy របស់អូស្ដ្រាលី ដោយលទ្ធផល ៣-០ (សិត) តែប្រកួតទី២ ចាញ់ក្រុមម្ចាស់ផ្ទះ Win Streak ៣-២ សិត ខណៈប្រកួតជម្រុះទី៣ ឈ្នះក្រុម Saitama Azalea របស់ជប៉ុន ៣-១ សិត ដើម្បីឡើងវគ្គពាក់កណ្ដាលផ្ដាច់ព្រ័ត្រ ។ក្នុងវគ្គពាក់កណ្ដាលផ្ដាច់ព្រ័ត្រទៀតសោត ក្រុមសម្បូរដោយធនធានកីឡាករជម្រើសជាតិកម្ពុជាដដែល បានយកឈ្នះក្រុម Flying Falcon របស់ម៉ាឡេស៊ី ៣-០ សិត ដើម្បីឡើងវគ្គផ្ដាច់ព្រ័ត្រ ដោយជួបក្រុម Win Streak ជាថ្មី ដើម្បីសងសឹក ហើយជាលទ្ធផលក្រុមបាល់ទះវិសាខា ធ្វើបានយ៉ាងល្អ ដោយយកឈ្នះវិញ ៣-១ សិត ដើម្បីលើកពានអន្ដរជាតិ ដែលមានបេក្ខភាព ៨ក្រុម មកពី ៧ប្រទេស និងកោះចូលរួមប្រកួតនេះតែម្ដង ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

[UPDATE] ការផ្ទុះនៅផ្សារទំនើបក្នុងខេត្ត Kumamoto របស់ជប៉ុន ធ្វើឱ្យមនុស្សជាប់ក្នុងនោះ ក្រោយមានរញ្ជួយដីខ្លាំង

ឯកអគ្គរដ្ឋទូត៖ រុស្ស៊ី និងឥណ្ឌូនេស៊ីពិចារណាឱកាសសហការលើវិស័យធនធានលោហៈកម្រ

[BREAKING NEWS] មនុស្សជាប់នៅក្នុងផ្សារទំនើប ក្នុងប្រទេសជប៉ុន បន្ទាប់ពីមានរញ្ជួយដី

អ្នកការទូត៖ រុស្ស៊ីអំពាវនាវឲ្យជប៉ុនត្រឡប់ទៅរកផ្លូវអភិវឌ្ឍប្រកបដោយសន្តិភាពវិញ

កងនាវារបស់កងនាវាចរប៉ាស៊ីហ្វិករុស្ស៊ីបានទៅដល់កំពង់ផែ Cam Ranh របស់វៀតណាម ដើម្បីធ្វើសមយុទ្ធរួមគ្នា

រដ្ឋមន្ត្រីការបរទេសអ៊ីរ៉ង់ពិភាក្សាជាមួយសមភាគីអារ៉ាប៊ីសាអ៊ូឌីត និងអូម៉ង់ អំពីសន្តិសុខច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877