នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ
Manchester City ព្យាយាមរក្សា Rodri ខណៈ Real Madrid បន្តដាក់សម្ពាធចង់នាំយកទៅ Bernabéu
បាល់ទាត់អង់គ្លេសសាកល្បងច្បាប់ថ្មី ដើម្បីទប់ស្កាត់ "យុទ្ធសាស្ត្រ​ផ្អាក​ការ​ប្រកួត​តាមរយៈ​ការ​ព្យាបាល​អ្នកចាំទី"
Yan Diomonde ព្រមព្រៀងលក្ខខណ្ឌផ្ទាល់ខ្លួនជាមួយ Real Madrid ខណៈ PSG ដក​ខ្លួន​ចេញ​ពី​ការ​ប្រជែង

ព័ត៌មានកីឡា

ថ្នាក់ដឹកនាំយុទ្ធគុនចម្រុះកម្ពុជា ប្ដេជ្ញាពង្រឹងការអភិវឌ្ឍ ដើម្បីឆ្លើយតបកំណែទម្រង់​អន្ដរជាតិ

2023/09/20 06:35:03 pm        173
Facebook Telegram Linkin
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) និងជា​ប្រធាន​សហព័ន្ធ​កីឡាយុទ្ធគុនចម្រុះកម្ពុជា បានប្ដេជ្ញា និងជំរុញក្បាលម៉ាស៊ីនសហព័ន្ធ ត្រូវពង្រឹង​ប្រសិទ្ធ​ភាព​ការងារ ដើម្បីធានាការអភិវឌ្ឍ ឆ្ពោះទៅរកភាពរីកចម្រើន និង​ឆ្លើយ​តប​កំណែ​ទម្រង់​ថ្មី​របស់​អន្ដរជាតិ ។ការតាំងចិត្តនេះ បន្ទាប់ពីសហព័ន្ធ បានរៀបចំមហាសន្និបាតបញ្ចប់អាណត្តិទី២ និងបន្ដ​អាណត្តិ​ទី៣​ ឆ្នាំ២០២១-២០២៥ ដោយគណៈកម្មាធិការប្រតិបត្តិ បានបោះឆ្នោតគាំទ្រឯកឧត្តម វ៉ាត់ ចំរើន បន្ដធ្វើជាប្រធានសហព័ន្ធ ព្រមទាំងអនុប្រធាន អគ្គលេខាធិការ អគ្គហិរញ្ញិក និងសមាជិក ១០​រូបផ្សេងទៀត ។ថ្នាក់ដឹកនាំសហព័ន្ធដដែលបន្ដថា បន្ទាប់ពីប្រកួតលក្ខណៈអាជីវកម្ម ឬគេស្គាល់​ត្រឹម​តែ​ការ​ប្រកួត​ក្នុង​ទ្រុង​ ឬវាយដាក់ទ្រុងនោះ បច្ចុប្បន្នកីឡាគុនចម្រុះ ត្រូវបានទទួលស្គាល់ជាប្រភេទកីឡា ដោយ​មាន​ក្បួន​ច្បាប់ត្រឹម បន្ទាប់ពីក្រុមប្រឹក្សាកីឡាអូឡាំពិកអាស៊ី បានបង្កើតគណៈកម្មការពិសេសមួយ ដើម្បី​គ្រប់​គ្រងព្រឹត្តិការណ៍ និងជំរុញការអភិវឌ្ឍន៍កីឡានេះ ហើយក៏កំពុងសិក្សា ដើម្បី​បញ្ចូល​គុន​ចម្រុះ ទៅក្នុងព្រឹត្តិការណ៍កីឡាធំៗទៀតផង ។ដូច្នេះដើម្បីឆ្លើយតបនឹងរបថថ្មី បន្ទាប់ពីជ្រើសរើសបានក្បាលម៉ាស៊ីន សម្រាប់​សហព័ន្ធ​កីឡាគុន​ចម្រុះ​កម្ពុ​ជា អាណត្តិទី៣ ឯកឧត្តមបានចាត់ទុកជាពេលវេលាដ៏សំខាន់ ដែល​សមាជិក​គណៈកម្មាធិការ​ប្រតិបត្តិទាំងអស់គ្នា ត្រូវពង្រឹងសកម្មភាពការងារ ទាំងកិច្ចការរដ្ឋបាល និង​ការងារ​បច្ចេកទេស ក្នុងន័យឆ្ពោះទៅរកការអភិវឌ្ឍនូវធនធានមនុស្ស ស្របតាម​លក្ខ​ខណ្ឌ​អន្ដរជាតិ​ ពិសេសគឺធនធានកីឡាករ-កីឡាការិនី ដើម្បីត្រៀមចូលរួមការប្រកួតនានា ។អ្វីដែលសំខាន់ គឺការពង្រឹងនូវរចនាសម្ព័ន្ធផ្ទៃក្នុងសហព័ន្ធ និងសកម្មភាពការងារ ដើម្បី​ស្វែង​រក​ការ​ទទួល​ស្គាល់​សមាជិកភាពជាផ្លូវការ ពីសំណាក់ក្រសួងអប់រំ យុវជន និងកីឡា ក៏ដូចជា​គណៈកម្មាធិការ​ជាតិ​អូឡាំពិកកម្ពុជា បន្ទាប់ពីមានការគាំទ្រ និងត្រៀមសហការជួយពីអន្ដរជាតិ ។ ឯកឧត្តម វ៉ាត់ ចំរើន ចាត់ទុកនេះគឺជាកិច្ចការសំខាន់ ដែលសហព័ន្ធត្រូវធ្វើ មុនឈាន​ទៅ​រក​ការ​ប្រកួត​ប្រជែង​លើឆាកអន្ដរជាតិ ។សូមបញ្ជាក់ថា សមាជិកគណៈកម្មាធិការប្រតិបត្តិអាណត្តិថ្មីរបស់សហព័ន្ធកីឡាគុនចម្រុះកម្ពុជា ក្រៅ​ពី​ឯកឧត្តម វ៉ាត់ ចំរើន ជាប្រធាន គឺមានឯកឧត្តម វ៉ា ស៊ិនភីរម្យ ជាអនុប្រធានទី១, លោក​បណ្ឌិត សេង ប៊ុនសុង និងលោក ហ៊ុន ច័ន្ទរាជ្យ ជាអនុប្រធាន, លោក ជឹម ធារ៉ា ជាអ​គ្គ​លេខា​ធិការ, លោក ឃឹម សាមាន ជាអគ្គលេខាធិការរង, លោក សុវត្ថិ សិទ្ធិរ៉ូ ជាអគ្គហេរញ្ញិក និងកញ្ញា ឈិន រីយ៉ា ជាអគ្គហេរញ្ញិករង ព្រមទាំងសមាជិក ៣រូបផ្សេងទៀត៕ អត្ថបទ លី ឈុនឡា

Al-Nassr ឈ្នះនៅទឹកដីអ៊ីរ៉ង់ Persepolis ខណៈក្រុមក្នុងតំបន់អាស៊ានសុទ្ធតែចាញ់

2023/09/20 06:18:37 pm        874
Facebook Telegram Linkin
អតីតជើងឯករងឆ្នាំ ១៩៩៥ ក្រុមអារ៉ាប៊ីសាអ៊ូឌីត Al-Nassr បានចាប់ផ្តើមរដូវកាលថ្មី AFC Champions League យ៉ាងល្អជាមួយនឹងជ័យជំនះ ២-០ នៅទឹកដីអ៊ីរ៉ង់ Persepolis។ មុនការប្រកួតនេះមកដល់ អ្នកគាំទ្រអ៊ីរ៉ង់មានការពុះកញ្ជ្រោលសម្រាប់វត្តមានរបស់ Cristiano Ronaldo មកកាន់ទឹកដីអ៊ីរ៉ង់ តែពួកគេមិនអាច​ចូលទស្សនា​ការ​ប្រកួត​ផ្ទាល់​បាន​ដោយសារ​ជាប់​បម្រាម​របស់​ AFC ដែលតម្រូវឱ្យការប្រកួតនៅទីក្រុង Tehran ស្ថិតក្នុងការបិទទ្វា។ Al-Nassr មានឱកាសល្អពី Ronaldo តែការតែតចំគោលដៅជួយសង្គ្រោះបានដោយអ្នកចាំទី។ ឈានដល់វគ្គទី ២ ម្ចាស់ផ្ទះ Persepolis សល់គ្នាតែ ១០ នាក់បន្ទាប់ពី Milan Sarlak ទទួល​បាន​កាត​លឿងទីពីរបណ្តេញចេញពីការប្រកួតតាមរយៈកំហុសជាន់ជើង Ronaldo។គ្រាប់​បាល់ក៏ចាប់ផ្តើមកើតមានឡើង សម្រេចបានដោយ Abdulrahman Ghareeb នៅនាទីទី ៦២ ​និងមួយគ្រាប់ទៀតដោយ Mohammed Qassem Al Nakhli។ បីពិន្ទុនេះធ្វើឱ្យ Al-Nassr ឈរលើគេក្នុងពូល E ខណៈ Istiklol និង Al-Duhail ស្មើគ្នា ០-០។ ងាកទៅការប្រកួតនៅភាគខាងកើតវិញ ក្រុមចិន Shandong Taishan ឈ្នះនៅទឹកដីហ្វីលីពីន Kaya FC ៣-១។ បីគ្រាប់ជ័យជំនះរបស់ Shandong ត្រូវរង់ចាំជាង ១ ម៉ោងទំរាំ​សម្រេច​បាន​ដោយ​កីឡាករ​បី​នាក់​រួមមាន​ Moises Lima Magalhaes, Matheus Pato និង Cryzan ខណៈ Kaya FC តប​បាន​មួយ​គ្រាប់​វិញដោយ Jarvey Gayoso ចុងម៉ោង។ នៅក្នុងពូល G នេះដែរក្រុមភ្ញៀវកូរ៉េ Incheon United យកឈ្នះដល់ទឹកដីជប៉ុន Yokohama F Marinos ៤-២ ខណៈគ្រាប់បាល់ជ័យជំនះ​ពីរ​គ្រាប់​របស់​ក្រុមភ្ញៀវ​ធ្វើ​បាន​ដោយ​ខ្សែ​ប្រយុទ្ធ​ប្រេស៊ីល ​Hernandez ដែលផ្លាស់ចូលនៅនាទីទី ៦១។ នៅក្នុងតំបន់អាស៊ានដដែល ក្រុមជើងឯកម៉ាឡេស៊ី JDT មិនជោគជ័យ​ឡើយ​ដោយ​ចាញ់​ក្រុម​ភ្ញៀវ​ជប៉ុន​ Kawasaki Frontale ១-០ ដោយគ្រាប់បាល់របស់ជ័យជំនះនៅនាទីទី ៤៥ របស់ Marcinho។ នៅក្នុងពូល I នេះដែរក្រុមក្នុងតំបន់អាស៊ានមួយទៀត BG Pathum របស់ថៃ​ក៏​រង​បរាជ័យ​ដែរ​ក្រោម​ថ្វី​ជើង​ក្រុមម្ចាស់ផ្ទះកូរ៉េ Ulsan Hyundai ៣-១។ បីគ្រាប់របស់ Ulsan សម្រេចដោយ Hat-Trick របស់ខ្សែប្រយុទ្ធហុងគ្រី Martin Adam ខណៈ BG Pathum មានគ្រាប់តាមស្មើ ១-១ នៅចុងវគ្គទី ១ ដោយ Ryhan Stewart។ សម្រាប់ថ្ងៃនេះក៏នឹងមានការប្រកួតបន្តទៀត ក្នុងនោះមានក្រុមក្នុងតំបន់អាស៊ាន ៤ រួមមាន Hanoi របស់វៀតណាមទទួល Pohang Steelers របស់កូរ៉េ Buriram United ស្វាគមន៍ក្រុមចិន Zhejiang និងក្រុមសិង្ហបុរី Lion City Sailors ទទួលក្រុមថៃ Bangkok United៕ អត្ថបទ៖នាង សុភាវុធ

មន្ដ្រីបាល់ទះកម្ពុជា ទទួលស្គាល់ការពិត ចំពោះការបរាជ័យក្រោមថ្វីដៃឥណ្ឌា បើកឆាក Asian Games

2023/09/20 05:27:33 pm        1825
Facebook Telegram Linkin
ក្រុមបាល់ទះបុរសក្នុងសាលជម្រើសជាតិកម្ពុជា បានចាញ់ក្រុមជម្រើសជាតិឥណ្ឌា ដោយ​លទ្ធផល​ ៣-០សិត ជាមួយពិន្ទុ ១៤-២៥, ១៣-២៥ និង ១៩-២៥ នៃការប្រកួត​បើក​ឆាក​ពូល​C ​ក្នុង​ព្រឹត្តិការណ៍កីឡាអាស៊ី Asian Games លើកទី១៩ នៅទីក្រុង Hangzhou ប្រទេសចិន កាលពី​ម្សិលមិញ ។ជាមួយការបរាជ័យក្រោមថ្វីដៃក្រុមចំណាត់ថ្នាក់លេខ៧១ ពិភពលោកនេះ លោកបណ្ឌិត អាំង សិរី​ពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជាថា ត្រូវទទួលស្គាល់ការពិត ដ្បិត​ទាំង​កាយសម្បទា និងបច្ចេកទេស ឥណ្ឌាគឺមានទាំងព្រម ក្នុងនាម​ក្រុម​យក្ស​មួយ​នៅ​អាស៊ី​ពិត​មែន​ ។បេសកកម្មនេះ ប្រកួតកីឡាអាស៊ី ឆ្នាំ២០២២ ដែលលើកមករៀបចំនៅឆ្នាំ២០២៣ នាប្រទេស​ចិន​នេះ ​សម្រាប់វិញ្ញាសាបាល់ទះបុរសក្នុងសាល កម្ពុជា ស្ថិតក្នុងពូលC ជាមួយឥណ្ឌា និង​កូរ៉េខាងត្បូង​ ។ ដូច្នេះកម្ពុជា នៅសល់ ១ប្រកួតទៀត ដោយត្រូវធ្វើការធ្ងន់ជាមួយកូរ៉េខាងត្បូង នា​ថ្ងៃ​ទី២១ ខែកញ្ញាស្អែក ដើម្បីកាត់សេចក្ដីរកបេក្ខភាពវគ្គបន្ដក្នុងពូល ។សូមរំឮកថា នេះក៏ជាលើកដំបូងហើយ ដែលក្រុមបាល់ទះបុរសកម្ពុជា បានបង្ហាញខ្លួនជាថ្មី ក្នុង​ព្រឹត្តិការណ៍​កីឡាប្រចាំទ្វីបអាស៊ី ៤ឆ្នាំម្ដងនេះ ក្រោយខកខានអស់រយៈពេល ៥៣ឆ្នាំ បន្ទាប់ពី​ខណៈ​ការ​បង្ហាញខ្លួនលើកចុងក្រោយ កម្ពុជាទទួលបានចំណាត់ថ្នាក់លេខ៤ ក្នុង​ការ​ប្រកួត​កីឡា​អាស៊ី ​លើកទី៦ ឆ្នាំ១៩៧០ នៅទីក្រុងបាងកក ប្រទេសថៃ ៕ អត្ថបទ លី ឈុនឡា

Manchester United អវត្តមានកីឡាករក្រុមដំបូង ១២ នាក់ក្នុងដំណើរទៅទឹកដី Bayern Munich

2023/09/20 04:44:37 pm        281
Facebook Telegram Linkin
ក្រុមដែលញាំញីដោយបញ្ហាកីឡាកររបួស និងរឿងអាស្រូវ Manchester United ត្រូវ​ធ្វើ​ដំណើរ​ទៅ​កាន់​ទឹកដី Bayern Munich យប់នេះក្របខណ្ឌ UEFA Champions League ដោយ​គ្មាន​វត្តមាន​កីឡាករ​ក្រុម​ដំបូង ១២នាក់។ក្រុមរបស់លោក Erik ten Hag ដែលកំពុងលំបាកនៅ English Premier League មិនមាន​វត្ត​មាន​ខ្សែកា​រពារ Raphael Varane, Harry Maguire និង Mason Mount ធ្វើ​ដំណើរ​ទៅ​ទឹកដី​អាល្លឺម៉ង់​ឡើយ​។ អតីតអ្នកចាត់ការ Ajax រូបនេះឱ្យដឹងថា បញ្ហារបួសនៅ Manchester United លោក​មិន​ដែល​ចាប់​បាន​ ១១នាក់ ដំបូងពេញជើង រឺ ១១ នាក់ល្អបំផុតឡើយ តែនេះបញ្ហា​ដែល​អ្នក​ចាត់ការ​គ្រប់​គ្នា​តែង​តែប្រ​ឈម ហើយពេញចិត្តនឹងតទល់នឹងស្ងានការបែបនេះជានិច្ច។ក្រៅពីកីឡាករ ៣ នាក់ខាងលើ Manchester United មិនមានវត្តមាន Jadon Sancho ដែល​មាន​បញ្ហា​ជាមួយលោក Ten Hag ខ្សែបម្រើស្លាបប្រេស៊ីល Antony ដែលត្រូវ​ដោះស្រាយ​បញ្ហា​ផ្ទាល់​ខ្លួន ខណៈខ្សែបម្រើហូឡង់ Donny van de Beek មិនមាន​ឈ្មោះ​ក្នុង​បញ្ជី​ក្រុម​ប្រកួត​នៅ​អឺរ៉ុប​ឡើយ។Manchester United មុនមកដល់ការប្រកួតរាត្រីនេះ ទើបតែចាញ់ Brighton ៣-១ ក្នុង​ទឹក​ដី​ខ្លួន​ឯង និងធ្លាក់ទៅដល់លេខ ១៣ ក្នុងតារាង។ ងាកទៅ Bayern Munich វិញថ្វីបើស្មើ ២-២ ទល់នឹង Bayer Leverkusen តែក្រុមរបស់លោក Thomas Tuchel មិនដែលចាញ់ក្នុងដីនៅវគ្គវិលជុំក្នុងពូល UCL ឡើយ ៣៤ ប្រកួតចុងក្រោយ៕ អត្ថបទ៖នាង សុភាវុធ

ច្បាប់ថ្មីរបស់ NBA មិនអនុញ្ញាតឱ្យក្រុមទុកកីឡាករល្បីរបស់ខ្លួនសម្រាកលើសពីម្នាក់ឡើយ ក្នុងមួយប្រកួត

2023/09/19 10:38:02 pm        142
Facebook Telegram Linkin
ក្របខណ្ឌបាល់បោះអាមេរិក NBA បានចេញច្បាប់ថ្មីសម្រាប់អនុវត្តនៅរដូវកាលថ្មីខាងមុខនេះ ដោយក្រុមនីមួយៗមិនអាចទុកឱ្យកីឡាករល្បីៗរបស់ខ្លួនសម្រាកលើសពីម្នាក់ឡើយក្នុងមួយប្រកួត ខណៈក្រុមដែលល្មើស នឹងត្រូវរងការពិន័យខ្ទង់លានដុល្លារ។កីឡាករដែលចាត់ទុកជាកីឡាករល្បី រឺ Superstar នោះ គឺជាកីឡាករដែលត្រូវជ្រើសរើសនៅក្នុង NBA All-Star ក្នុងរយៈពេល ៣ រដូវកាលចុងក្រោយ។នាយកគ្រប់គ្រងរបស់ NBA លោក Adam Silva ឱ្យដឹងថា កីឡាករដែលល្បីឈ្មោះ គួរតែមាន​វត្តមាន​លើទីលាន ពួកគេជាក្តីរំពឹងរបស់អ្នកគាំទ្រ។ក្រុមនៅក្នុងក្របខណ្ឌ NBA ទាំងអស់នឹងត្រូវប្រកួតគ្នាសរុប ៨២ ប្រកួត​រដូវកាលថ្មី​នេះ​ដែល​នឹង​ចាប់​ផ្តើម​ពីថ្ងៃទី ២៤ ខែតុលាបញ្ចប់នៅថ្ងៃទី ១៩ ខែមេសាឆ្នាំក្រោយ មុនឈានដល់វគ្គ Play-Offs​។រំលឹកថា ថ្វីបើច្បាប់ថ្មីនេះទើបចាប់ផ្តើមអនុវត្តជាទូទៅក្តីសម្រាប់រដូវ​កាលថ្មីខាងមុខ តែ NBA ក៏​ធ្លាប់​បាន​ពិន័យក្លិបបាល់បោះ Dallas Mavericks កាលពីខែមេសាកន្លងទៅចំនួន ៧៥ ម៉ឺន​ដុល្លារ​អាមេរិក ដែលបានទុកឱ្យកីឡាករសំខាន់ៗជាច្រើននាក់សម្រាក ដោយ NBA ចោទ​ប្រកាន់​ថា​ ជាគោលបំណងធ្វើចាញ់៕ អត្ថបទ៖នាង សុភាវុធ

Al-Hilal បានត្រឹមស្មើ ខណៈAl-Ittihad រកបានបីពិន្ទុពីប្រកួតដំបូង AFC Champions League

2023/09/19 09:43:07 pm        101
Facebook Telegram Linkin
ការប្រកួតបាល់ទាត់ក្របខណ្ឌក្លិបកំពូលអាស៊ី AFC Champions League បាន​ចាប់​ផ្តើម​ដំណើរ​ការ​ហើយ​នៅ​យប់ថ្ងៃចន្ទម្សិលមិញ ដែលជាការប្រកួតនៅតំបន់អាស៊ីខាងលិច។ ក្រុមជើងឯករងរដូវកាលមុនអារ៉ាប៊ីសាអ៊ូឌីត Al-Hilal បើក​ទ្វា​ផ្ទះ​ទទួល​ស្វាគមន៍​ក្រុម​ភ្ញៀវ​មក​ពី​អ៊ូសប៊ែគីស្ថាន​ Navbahor តែមិនអាចរកបានបីពិន្ទុក្នុងផ្ទះរបស់ខ្លួនឡើយ។ Toma Tabatadze ជាអ្នកបើកការនាំមុខឱ្យក្រុមភ្ញៀវ Navbahor នៅដើមវគ្គទី ២ បន្ទាប់ពីវគ្គទី ១ ឱកាស​ជាច្រើនរបស់ Al-Hilal មិនបានសំរេច។ រៀបនឹងចប់ការប្រកួតទៅហើយ ៣ ពិន្ទុគួរតែបានសម្រាប់ Navbahor តែ​ម៉ោង​បន្ថែម​បង្គ្រប់​ដល់ទៅ ១៤ នាទី ក្រុមម្ចាស់ផ្ទះក៏តាមស្មើវិញបានសំរេចដោយការតែតបញ្ចូលទីរបស់ Ali Al Bulayhi​។​នៅក្នុងពូល D នេះដែរក្រុមភ្ញៀវអ៊ីរ៉ង់ FC Nassaji Mazandaran ឈ្នះនៅទឹកដីឥណ្ឌា Mumbai City FC​ ២-0។ងាកមកការប្រកួតនៅក្នុងពូល C វិញ ក្រុមចំណាយលុយច្រើនជើងឯក ២ សម័យ Al-Ittihad មិនភ្លាត់​បី​ពិន្ទុ​ក្នុង​ដីរបស់ខ្លួនឡើយ ក្រោយយកឈ្នះក្រុមភ្ញៀវអ៊ូសប៊ែគីស្ថាន FC AGMK ៣-០។ ពីរគ្រាប់ក្នុង ៤ នាទីដំបូងបានកើតឡើង Haroune Camara នៅនាទីទី ១១ និង Romarinho នាទីទី ១៥ ធ្វើឱ្យក្រុមភ្ញៀវបាត់បង់ស្មារតីទៅហើយ មុនពេលដែល Al-Ittihad បន្ថែមមួយគ្រាប់ទៀតចុងវគ្គទី ១ ដោយបាល់ពិន័យ ១១ ម៉ែត្ររបស់ Romarinho ដដែល។ Al-Ittihad ជាក្លិបតែមួយគត់ដែលធ្លាប់ឈ្នះជើងឯក AFC Champions League ពីររដូវកាលជាប់គ្នា ចាប់​តាំង​ពី​ពានរង្វាន់នេះរៀបចំឡើងដំបូងនៅឆ្នាំ ២០០២។ នេះជាការបង្ហាញខ្លួនលើកដំបូងដែរសម្រាប់ Al-Ittihad ក្រោយអវត្តមានតាំងពីឆ្នាំ ២០១៥៕ អត្ថបទ៖នាង សុភាវុធ

លីគអាមេរិក សម្រេចបណ្តេញកីឡាករម្នាក់ក្រោយប្រើឈ្មោះក្លែងក្លាយ​ទៅប្រកួតកន្លែងផ្សេង

2023/09/19 09:09:05 pm        533
Facebook Telegram Linkin
លីគបាល់ទាត់អាមេរិក Major League Soccer បានសម្រេច​បញ្ចប់​កិច្ច​សន្យា​ខ្សែ​បម្រើ​របស់​ក្លិប​បាល់​ទាត់​ CF Montreal, Matko Miljevic ក្រោម​ការ​ចោទ​ប្រកាន​ថា​បាន​ប្រើប្រាស់​ឈ្មោះ​ក្លែងក្លាយ​ទៅ​ប្រកួត​នៅ​ក្របខណ្ឌពាក់កណ្តាលអាជីពមួយនៅកាណាដា។សារព័ត៌មាននៅកាណាដាព្រោងព្រាតបានចុះផ្សាយបន្ថែមថា កីឡាករវ័យ ២២ ឆ្នាំរូប​នេះថែ​មទាំង​បាន​ប្រើប្រាស់​អំពើ​ហឹង្សា​លើគូប្រកួតផងដែរ។ក្លិបបាល់ទាត់ CF Montreal ក៏បានបញ្ជាក់ថា កីឡាករវ័យ ២២ ឆ្នាំអាមេរិក​រូប​នេះ​ក៏​បាន​ចាក​ចេញ​ពី​ក្លិប​ផង​ដែរ​ ស្របពេលគ្រូបង្វឹកលោក Hernan Losada ក៏ធ្លាប់ឱ្យដឹង​សប្តាហ៍​មុន​ដែរ​ពី​ការ​ចាប់​ផ្តើម​ស៊ើបអ​ង្កេត​ក្រោយលេចចេញព័ត៌មាននេះ។សូមបញ្ជាក់ថា​ សារព័ត៌មានអាមេរិកក៏ដូចជាកាណាដាបានចុះផ្សាយថា Matko Miljevic បានចូលលេង ៣ ប្រកួតឱ្យក្រុមរបស់មិត្តភក្តិរបស់ខ្លួនដែលលេងនៅក្របខណ្ឌពាក់កណ្តាលអាជីពនៅទីក្រុង Quebec និង​បានស៊ុតបញ្ចូលទី ៦ គ្រាប់ បន្ទាប់ពីទំនេរមិនសូវបានចូលលេងនៅ CF Montreal។ អតីតកីឡាកររបស់ក្លិបអាហ្សង់ទីន Argentinos Juniors រូបនេះបង្ហាញខ្លួនបាន ៨ ប្រកួតនៅក្របខណ្ឌ Major League Soccer រដូវកាលនេះ តែសុទ្ធតែអង្គុយកៅអីបម្រុង៕ អត្ថបទ៖នាង សុភាវុធ

កីឡាការិនីអេស្ប៉ាញ​បញ្ជាក់​ជំហរ​ធ្វើ​កូដកម្ម​ឡើង​វិញ​បន្ទាប់​ពីការកោះហៅ​របស់ក្រុមជម្រើសជាតិ

2023/09/19 08:51:11 pm        184
Facebook Telegram Linkin
កីឡាការិនីអេស្បាញបានរំលឹកឡើងវិញថា ពួកគេកំពុងធ្វើពហិការមិនចូលក្រុមជម្រើសជាតិនារី បើទោះបីជាត្រូវបានកោះហៅចូលក្រុមត្រៀមការប្រកួត Nations League ក្តី។សមាជិកចំនួន ១៥ នាក់នៃក្រុមដែលបានឈ្នះ World Cup កាលពីខែមុនត្រូវបានបញ្ចូលក្នុងក្រុម​សម្រាប់​ការ​ប្រកួត Nations League នាពេលខាងមុខ។កីឡាករមួយក្រុមមានគ្នា ៨១ នាក់បានធ្វើពហិការមិនចូលរួមក្រុមជម្រើសជាតិ បន្ទាប់ពីលោក Luis Rubiales អតីតប្រធានសហព័ន្ធបាល់ទាត់អេស្ប៉ាញ បានថើបមាត់ខ្សែប្រយុទ្ធកីឡាការិនី Jenni Hermoso ក្រោយអេស្ប៉ាញឈ្នះនៅវគ្គផ្តាច់ព្រ័ត្រលើកពាន World Cup លើកដំបូង។កាលពីថ្ងៃសុក្រ កីឡាករ ៣៩ នាក់ រួមទាំង ២១ នាក់ក្នុងចំណោម ២៣ ដែលជ័យលាភីជើងឯក World Cup បាននិយាយថា កូដកម្មរបស់ពួកគេនឹងបន្តរហូតដល់មានការផ្លាស់ប្តូរបន្ថែមទៀត ហើយ​ថា​ពួក​គេ​មិន​ទាន់​ "មានអារម្មណ៍នៅកន្លែងសុវត្ថិភាព" នៅឡើយ។ម្ចាស់ពានរង្វាន់ Ballon d'Or ពីរសម័យកាល Alexia Putellas ស្ថិតក្នុងចំណោមកីឡាករទាំង ១៥ នាក់​ដែល​ត្រូវ​បានកោះហៅ តែមិនមានវត្តមាន Jennifer Hermoso ឡើយ។សូមបញ្ជាក់ថា នេះជាការកោះហៅប្រមូលផ្តុំក្រុមជម្រើសជាតិនារីអេស្ប៉ាញលើកដំបូង ក្រោម​ការ​ដឹកនាំ​របស់​គ្រូ​បង្វឹកថ្មីលោកស្រី Montse Tome ដែលជំនួសលោក Jorge Vilda៕ អត្ថបទ៖នាង សុភាវុធ

៥ក្រុមបន្ដកំណត់ត្រាមិនទាន់ស្គាល់ចាញ់ក្នុងពានយុវជន Svay Rieng Cup U18

2023/09/19 04:59:05 pm        511
Facebook Telegram Linkin
ការប្រកួតបាលទាត់ពានរង្វាន់ស្វាយរៀងខាប់យុវជនអាយុក្រោម ១៨ឆ្នាំ(Svay Rieng Cup U18) លើកទី១ ឆ្នាំ២០២៣ បានបញ្ចប់ការប្រកួតជម្រុះក្នុងពូល សប្ដាហ៍ទី៥ ហើយ ខណៈមានក្រុមខ្លាំង ៥ក្រុម បានរក្សាកំណត់ត្រាមិនទាន់ស្គាល់ចាញ់រៀងៗខ្លួន។ចំពោះលទ្ធផលការប្រកួតសប្ដាហ៍ទី៥ នៃពានរង្វាន់យុវជនថ្នាក់ខេត្តនេះ ក្រុមព្រះខ័ន​រាជ​ស្វាយរៀង​ U18​ បាន​យក​ឈ្នះក្រុមយុវជនឆន្ទៈកីឡា ១០-០ គ្រាដែលក្រុមពូប្រុស លីង គួយ បានយកឈ្នះក្រុម United SEZ ដោយលទ្ធផល ១-០។លទ្ធផលនេះ នាំឲ្យក្រុមព្រះខ័នរាជស្វាយរៀង U18 និងក្រុមយុវជនពូប្រុស លីង គួស រក្សា​កំណត់​មិន​ទាន់​ស្គាល់ចាញ់ ដោយរកបាន ៧ពិន្ទុស្មើគ្នាក្នុងពូល B បន្ទាប់ពីឆ្លងកាត់ ៣ប្រកួតឈ្នះ ២ និងស្មើ ១ ។រីឯក្រុម Blue Dragon ធ្វើបានកាន់តែល្អ ដោយយកឈ្នះក្រុមកំពូលតារាងពូលC Red Bull​ ដោយ​លទ្ធផល​ ១១-១ ដើម្បីឡើងគ្រងកំពូលតារាង ជាមួយកំណត់ត្រាឈ្នះ ៣ប្រកួតជាប់ៗគ្នា និងរកបាន ៩ពិន្ទុ។ចំណែកលទ្ធផល ២គូក្នុងពូល D វិញ គឺក្រុម MST FC បានយកឈ្នះក្រុមដារ៉ូពិទូ Sport FC ២-១ និង​ក្រុម​ត្នោត​អេហ្វស៊ី យកឈ្នះក្រុមយុវជនតាពៅ ៦-៣ ។ លទ្ធផលនេះ នាំឲ្យក្រុមទាំងពីរ រក្សា​ពាក្យ​មិន​ដែល​ចាញ់​ដូចគ្នា ក្នុងនោះក្រុម MST FC បន្ដឈរកំពូលតារាង មាន ៧ពិន្ទុ ក្រោយឆ្លងកាត់ ៣ប្រកួតឈ្នះ ២ ស្មើ១​ និងក្រុមត្នោតអេហ្វស៊ី ឈរលេខ២ មាន ៥ពិន្ទុ ជាមួយលទ្ធផល ៣ប្រកួតឈ្នះ ១ និងស្មើ ២ ។ដោយឡែកលទ្ធផល ១គូទៀត នៅក្នុងពូល E វិញ គឺក្រុមយុវជនគគីសោម បាន​យក​ឈ្នះ​ក្រុម​សាលា​ចំរើន​សូនីតា ដោយលទ្ធផល ៣-១ ។ ជ័យជម្នះនេះ បានជួយឲ្យក្រុមយុវជនគគីសោម ធានា​បាន​នូវ​កៅអី​វគ្គ​១៦ ក្រុមចុងក្រោយ ជាមួយក្រុមយុវជនរមាសហែក ខណៈសាលាចំរើនសូនីតា ត្រូវចាំ​អ៊ុត​បេក្ខភាព​ក្រុម​លេខ​៣ ល្អជាងគេ ជាមួយបណ្ដាពូលផ្សេងៗទៀត៕ អត្ថបទ លី ឈុនឡា  

រកឃើញក្រុមឡើងវគ្គ ៨ ក្រុមចុងក្រោយវាយកូនបាល់ Davis Cup

2023/09/18 10:09:07 pm        156
Facebook Telegram Linkin
ការប្រកួតវាយកូនបាល់តំណាងប្រទេស Davis Cup រកបានក្រុមឡើងវគ្គ ៨ ក្រុមចុង​ក្រោយ​ហើយ។ គូដំបូងនេះនៅក្នុងពូល B អង់គ្លេសបានយកឈ្នះការប្រកួតប្រផិតផើយលើបារាំងនៅទីក្រុង Manchester ដើម្បីឡើងវគ្គញបន្ត ពោលគឺក្រុមទាំងពីរស្មើគ្នា ២ ប្រកួតដំបូង​តាមរយៈ​ជ័យជំនះ​របស់ Dan Evans លើ Arthur Fils តែ Cameron Norrie ក៏ចាញ់កីឡាករបារាំង Ugo Humbert។ប្រកួតកាត់សេចក្តីវាយគូ Dan Evans ចាប់ដៃគូជាមួយ Neal Skupski សង្គ្រោះពិន្ទុ Match-Point បួនលើករបស់បារាំងរហូតយកឈ្នះវិញ ១-៦ ៧-៦(៧-៤) និង ៧-៦(៨-៦) ដើម្បីឡើង​វគ្គ ៨ ក្រុមចុងក្រោយជាមួយអូស្រ្តាលីដែលឈរលេខ ២ ក្នុងពូលក្រោយយកឈ្នះស្វ៊ីស ៣-០។ អង់គ្លេសដែលឈ្នះជើងឯក Davis Cup ចុងក្រោយបំផុតនៅឆ្នាំ ២០១៥ គឺជាក្រុមលេខ ១ ក្នុង​ពូលត្រូវជួបជាមួយស៊ែប រឺអ៊ីតាលីដែលនឹងចាប់ឆ្នោតនៅថ្ងៃអង្គារស្អែកនេះ។អូស្រ្តាលីគឺជាក្រុមលេខ ២ ក្នុងពូលឡើងជុំបន្តរួមជាមួយក្រុមការពារតំណែងជើងឯក កាណាដា ឆេក ហ្វាំងឡង់ និងហូឡង់ ដែលសុទ្ធតែកក់កៅអីនៅវគ្គបន្ត។ អវត្តមានគួរកត់សំគាល់នៅវគ្គ ៨ ក្រុមចុងក្រោយ Davis Cup ឆ្នាំនេះគឺម្ចាស់ផ្ទះអេស្ប៉ាញ ដែល​ឆ្លង​មិនផុតវគ្កចែកពូល ខណៈក្រុមជើងឯក ៣២ លើកអាមេរិក​ក៏ធ្លាក់ដែរ​ក្រោយចាញ់​ហ្វាំងឡង់​ប្រកួតចុង​ក្រោយក្នុងពូល។Davis Cup ជុំ ៨ ក្រុមផ្តាច់ព្រ័ត្រនឹងធ្វើឡើងនៅទីក្រុង Malaga ប្រទេសអេស្ប៉ាញនៅ​ខែវិច្ឆិកា​ខាងមុខ៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

ប្រសាសន៍សំខាន់ៗសម្ដេចធិបតី ហ៊ុន ម៉ាណែត ក្នុងឱកាសអញ្ជើញ​ចែក​វិញ្ញាបន​បត្រ​សម្គាល់​ម្ចាស់​អចលនវត្ថុ​ជូន​ប្រជាពលរដ្ឋជាង ២ម៉ឺនបណ្ណ នៅឃុំចំនួន៣ នៃស្រុកខ្សាច់កណ្ដាល ខេត្តកណ្ដាល​
07/29/2026 11:07 AM
Facebook Telegram Linkin
គណៈកម្មាធិការអចិន្ត្រៃយ៍ព្រឹទ្ធសភា ប្រជុំពិនិត្យសម្រេចលើរបៀបវារៈចំនួន៦ ដើម្បីបើកកិច្ចប្រជុំវិសាមញ្ញ
07/29/2026 11:07 AM
Facebook Telegram Linkin
លទ្ធផលដំណើរទស្សនកិច្ច សម្តេចប្រធានរដ្ឋសភា នៅប្រទេសវៀតណាម នឹងនាំមកនូវផលប្រយោជន៍ជាច្រើនទៀតជូនប្រជាពលរដ្ឋទាំងសងខាង
07/29/2026 10:07 AM
Facebook Telegram Linkin
គណៈប្រតិភូជាន់ខ្ពស់រដ្ឋសភា ធ្វើទស្សនកិច្ចក្រុមហ៊ុនViettel ដែលឈានមុខគេខាងបច្ចេកវិទ្យា និងទូរគមនាគមន៍ក្នុងប្រទេសវៀតណាម
07/29/2026 10:07 AM
Facebook Telegram Linkin
អូម៉ង់ បង្ហាញអ៊ីរ៉ង់នូវផែនការគាំទ្រដោយរដ្ឋឈូងសមុទ្រសម្រាប់ការបង់ថ្លៃដោយស្ម័គ្រចិត្តនៅច្រកសមុទ្រ
07/29/2026 10:07 AM
Facebook Telegram Linkin
[UPDATE] អ្នករស់រានមានជីវិតកើនឡើងដល់ ៤៨ នាក់ខណៈបន្តស្វែងរកអ្នកបាត់ខ្លួន ក្រោយនាវាវៀតណាមលិចនៅសមុទ្រចិនខាងត្បូង
07/29/2026 10:07 AM
Facebook Telegram Linkin
[UPDATE] ចំនួនអ្នកស្លាប់ដោយសារភ្លៀងធ្លាក់ និងទឹកជំនន់ដ៏គំហុកកើនឡើងដល់ជាង១០០នាក់នៅទូទាំងប្រទេសប៉ាគីស្ថាន
07/29/2026 10:07 AM
Facebook Telegram Linkin
[UPDATE] ចំនួនអ្នកស្លាប់ពីគ្រោះរញ្ជួយដីនៅជប៉ុន កើនឡើងដល់ជាង១០នាក់ ខណៈក្រុមជួយសង្គ្រោះកំពុងស្វែងរកអ្នកបាត់ខ្លួន
07/29/2026 10:07 AM
Facebook Telegram Linkin
លោក Zelenskyyមានកិច្ចប្រជុំដ៏ល្អជាមួយលោកTrump នៅឯសេតវិមានខណៈស្វែងរកកិច្ចសហប្រតិបត្តិការបន្ថែមជាមួយអាមេរិក
07/29/2026 09:07 AM
Facebook Telegram Linkin
យោធាអាមេរិកនិយាយថា មីស៊ីលច្រើនគ្រាប់ដែលបាញ់ដោយអ៊ីរ៉ង់ត្រូវបានស្ទាក់ចាប់
07/29/2026 09:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.