BTV NEWS

ផ្លូវការហើយ Zidane ក្លាយជាគ្រូបង្វឹកថ្មីរបស់ក្រុមជម្រើសជាតិបារាំង

ព្រះខ័នរាជ ណាត់ក្លិបមកពីហុងកុង និងសិង្ហបុរី ប្រកួតពានមិត្តភាពត្រៀមរដូវកាលថ្មី នៅស្ដាតមរតកតេជោ

មន្ដ្រីសហព័ន្ធកម្ពុជាថា SEA V.League គប្បីមានម៉ាឡេស៊ី សិង្ហបុរី និងឡាវ ចូលលេង ក្នុងនាមសមាជិកអាស៊ានដូចគ្នា

Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ

ព័ត៌មានកីឡា

West Ham ទិញបាន James Ward-Prowse ពី Southampton តម្លៃ ៣០ លានផោន

ក្លិបបាល់ទាត់ញញួរធំ West Ham បានសម្រេចក្នុងការនាំយកខ្សែបម្រើអង់គ្លេស James Ward-Prowse ពី Southampton ក្នុងតម្លៃផ្ទេរ ៣០ លានផោន។កីឡាករវ័យ ២៨ ឆ្នាំរូបនេះ បានចុះហត្ថលេខារយៈពេល ៤ ឆ្នាំជាមួយ West Ham។ James Ward-Prowse បានរួមរស់ជាមួយ Southampton តាំងពីវ័យ ៨ ឆ្នាំ និងបានបង្ហាញខ្លួនសរុប ៤១០ ប្រកួតជាមួយ Southampton ដែលត្រូវបានកាត់ចេញពី Premier League រដូវកាលមុន។Ward-Prowse បានចូលលេងឱ្យក្រុមធំ Southampton នៅវ័យ ១៦ ឆ្នាំក្នុងការប្រកួតពានរង្វាន់ EFL Cup ទល់នឹង Crystal Palace កាលពីខែតុលាឆ្នាំ ២០១១ និងបានចូលលេងប្រកួតដំបូងថ្ងៃបើករដូវកាល ២០១២-១៣។James Ward-Prowse មានទេពកោសល្យខ្ពស់ក្នុងការទាត់បាល់ Set-Piece និងមានតែ David Beckham ទេដែលស៊ុតបញ្ចូលទីបាល់ Freekick ច្រើនជាងកីឡាករវ័យ ២៨ ឆ្នាំរូបនេះដែលស៊ុតបាន ១៧ គ្រាប់។ Ward-Prowse បានក្លាយកីឡាករទី ២ ដែលមកកាន់ West Ham រដូវក្តៅនេះ បន្ទាប់ពី Edson Alvarez ផ្លាស់ពី Ajax ហើយ West Ham ក៏ឈានដល់កិច្ចព្រមព្រៀងដែរក្នុងការផ្ទេរខ្សែការពារអង់គ្លេស Harry Maguire ពី Manchester United៕ អត្ថបទ៖នាង សុភាវុធ

Alex Oxlade-Chamberlain ចាកចេញពី Liverpool ផ្លាស់ទៅក្លិបទួកគី Besiktas

អតីតខ្សែបម្រើអង់គ្លេស Alex Oxlade-Chamberlain បានសំរេចក្នុងការផ្លាស់ទៅកាន់ក្លិបទួកគី Besiktas ហើយក្រោយចាកចេញពី Liverpool។កីឡាករវ័យ ២៩ ឆ្នាំ ដែលធ្លាប់បង្ហាញខ្លួនឱ្យក្រុមជម្រើសជាតិអង់គ្លេស ៣៥ លើករូបនេះបានចុះហត្ថលេខា រយៈពេល ៣ឆ្នាំជាមួយក្លិបដែលមានមូលដ្ឋាននៅទីក្រុង Istanbul មួយនេះ។Oxlade-Chamberlain ធ្លាប់ឈ្នះជើងឯក English Premier League ជាមួយ Liverpool នៅឆ្នាំ ២០២០ តែក្រោយមកក៏ញាំញីដោយសាររបួស ដែលធ្វើឱ្យគេបង្ហាញខ្លួនបានត្រឹម ១៣ ប្រកួតប៉ុណ្ណោះរដូវកាលមុន។Oxlade Chamberlain ដែលធ្លាប់មានរបួសជង្គង់ធ្ងន់ធ្ងរជាមួយ Liverpool បានបង្ហាញខ្លួនសរុប ១៤៦ ប្រកួត រកបាន ១៨ គ្រាប់តាំងពីផ្លាស់ពី Arsenal នៅឆ្នាំ ២០១៧ ក្នុងតម្លៃ ៣៥ លានផោន។ Chamberlain នឹងទទួលបានប្រាក់ឈ្នួល ២.៥ លានអឺរ៉ូក្នុងមួយរដូវកាលនៅ Besiktas។ Besiktas ដែលធ្លាប់ជាជើងឯកលីគកំពូលទួកគី ១៦ លើក បានបញ្ចប់នៅចំណាត់ថ្នាក់លេខ ៣ រដូវកាលមុន៕ អត្ថបទ៖នាង សុភាវុធ

Moises Caicedo ផ្លាស់មកកាន់ Chelsea ផ្លូវការក្នុងតម្លៃបំបែកកំណត់ត្រានៅអង់គ្លេស ១១៥ លានផោន

ទីបំផុតអនាគតរបស់ខ្សែបម្រើអេក្វាដ័រ Moises Caicedo ត្រូវបានកំណត់ច្បាស់លាស់ហើយ ក្រោយសម្រេចក្នុងការផ្លាស់ពី Brighton មកកាន់តោខៀវ Chelsea ក្នុងតម្លៃផ្ទេរបំបែកកំណត់ត្រាអង់គ្លេស ១១៥លានផោន។កីឡាករវ័យ ២១ ឆ្នាំរូបនេះបានចុះហត្ថលេខារយៈពេល ៨ ឆ្នាំនៅ Stamford Bridge និងក្លាយជាកីឡាករដែលផ្លាស់ក្លិបថ្លៃបំផុតបំបែកកំណត់ត្រាចាស់ ១០៦ លានផោនរបស់មិត្តរួមក្រុមថ្មី Enzo Fernandez ដែលផ្លាស់ពី Benfica មកកាន់ Chelsea កាលពីខែមករា។ ក្រោយការមកដល់ Stamford Bridge, Moises Caicedo បាននិយាយថា នេះជាក្តីស្រមៃក្លាយជាការពិត ហើយការសំរេចចិត្តមកកាន់ទីនេះ មិនប្រើពេលយូរឡើយ ហើយក៏មិនបាច់ពិចារណាអ្វីដែរ ដោយសារតែ Chelsea ជាក្លិបដែលខ្លួនស្រលាញ់គាំទ្រ។ ការហ៊ានឱ្យថ្លៃដល់ ១១៥ លានផោនរបស់ Chelsea នេះ គឺបានយកឈ្នះគូប្រជែង Liverpool ដែលដំបូងបានយល់ព្រមក្នុងតម្លៃ ១១១ លានផោនជាមួយ Brighton កាលពីថ្ងៃសុក្រ។ រំលឹកថា Moises Caicedo បានផ្លាស់ពីក្លិបអេក្វាដ័រ Independiente del Valle ក្នុងតម្លៃត្រឹម ៤.៥ លានផោនប៉ុណ្ណោះកាលពីខែកុម្ភៈឆ្នាំ ២០២១ តែក៏ត្រូវបានបញ្ចេញឱ្យក្លិបនៅប៊ែលហ្ស៊ិកខ្ចី។ Caicedo ត្រូវបានកោះហៅត្រលប់មកវិញនៅខែមករាឆ្នាំ ២០២២ និងបានបង្ហាញខ្លួនឱ្យ Brighton តាំងពីពេលនោះមកបង្ហាញខ្លួនបាន ៥៣ លើករកបានពីរគ្រាប់៕ អត្ថបទ៖នាង សុភាវុធ

Raphael Varane តែតបញ្ចូលគ្រាប់ជ័យជំនះឱ្យ Manchester United បានបីពិន្ទុសប្តាហ៍ដំបូង

ក្រុមបិសាចក្រហម Manchester United អាចរកបាន ៣ ពិន្ទុពីសប្តាហ៍ដំបូងរបស់ខ្លួន តាមរយៈជ័យជំនះលើក្រុមភ្ញៀវ Wolverhampton ១-០ យប់ថ្ងៃចន្ទម្សិលមិញ។ខ្សែការពារបារាំង Raphael Varane គឺជាអ្នកសំរេចគ្រាប់បាល់ជ័យជំនះ ដែលត្រូវរង់ចាំដល់នាទីទី ៧៦ ពីការប៉ះបញ្ជូនដោយ Aaron Wan Bissaka។ ថ្វីបើបានបីពិន្ទុពិតមែនអ្នកចាត់ការ Manchester United, Erik ten Hag បានឱ្យដឹងថា ក្រុមរបស់លោកនៅមិនទាន់ធ្វើបានល្អនៅឡើយ។ Wolves មានឱកាសស៊ុតច្រើនជាងដោយមានឱកាសស៊ុតដល់ទៅ ២៣ លើកចំគោលដៅ ៦ លើក ខណៈក្រុម ម្ចាស់ផ្ទះមានឱកាស ១៥ លើកចំគោលដៅ ៣ តែសម្រេចទី ១ គ្រាប់។ ប្រកួតបន្ទាប់ថ្ងៃសៅរ៍នេះ Manchester United នឹងត្រូវទៅទឹកដី Tottenham Hotspur ខណៈ Wolverhampton ត្រូវទទួល Brighton៕ អត្ថបទ៖នាង សុភាវុធ

កីឡាករអ៊ីតាលី Jannik Sinner គ្រងជើងឯកវាយកូនបាល់ Canadian Open លើកដំបូង

កីឡាករវាយកូនបាល់អ៊ីតាលី Jannik Sinner បានគ្រងជើងឯកការប្រកួតកម្មវិធី Canadian Open ជាលើកដំបូងក្រោយយកឈ្នះកីឡាករអូស្រ្តាលី Alex de Minaur នៅវគ្គផ្តាច់ព្រ័ត្រ។នេះជាជើងឯកនៅក្នុងក្របខណ្ឌ Masters 1000 លើកដំបូងផងដែរសម្រាប់កីឡាករវ័យ ២១ ឆ្នាំរូបនេះតាមរយៈជ័យជំនះ ៦-៤ និង ៦-១ ដើម្បីគ្រងជើងឯកធំបំផុតនៃអាជីពរបស់ខ្លួន។Sinner ធ្លាប់ឈានដល់វគ្គផ្តាច់ព្រ័ត្រនៅក្នុងក្របខណ្ឌ Masters 1000 នេះពីរលើកកាលពីឆ្នាំ ២០២១ តែចាញ់ វគ្គ Miami Open នៅឆ្នាំ ២០២១ និងឆ្នាំ ២០២៣ នេះ។Jannik Sinner ក៏មានទំរង់លេងល្អផងដែរក្នុងឆ្នាំ ២០២៣ នេះដោយបានឡើងដល់វគ្គពាក់កណ្តាលផ្តាច់ព្រ័ត្រ Grand Slam, Wimbledon កាលពីខែមិថុនាកន្លងទៅ។កម្មវិធី Canadian Open នេះដូចគ្នាតែផ្នែកនារី កីឡាការិនីម្ចាស់ផ្ទះអាមេរិក Jessica Pegula ជាជើងឯកក្រោយយកឈ្នះកីឡាការិនីរុស្ស៊ី Liudmila Samsonova នៅវគ្គផ្តាច់ព្រ័ត្រ ៦-០ និង ៦-១ ប្រើពេលត្រឹម ៤៩ នាទី៕ អត្ថបទ៖នាង សុភាវុធ

Neymar ខិតជិតសម្រេចកិច្ចព្រមព្រៀងផ្លាស់ទៅ Al-Hilal ដែលអាចទទួលបានប្រាក់ឈ្នួល ៨០លានអឺរ៉ូក្នុងមួយឆ្នាំ

ខ្សែប្រយុទ្ធប្រេស៊ីល Neymar ទំនងជាដល់ពេលដែលត្រូវចាកចេញពីក្លិបបារាំង Paris Saint Germain ហើយ បន្ទាប់ពីប្រភពព័ត៌មានដែលអាចជឿទុកចិត្តបាន បានចុះផ្សាយថា Neymar ខិតជិតសម្រេចកិច្ចព្រមព្រៀងជាមួយក្លិប អារ៉ាប៊ីសាអ៊ូឌីត Al-Hilal។ មកទល់ពេលនេះគេមិនទាន់ដឹងថា គ្រូបង្វឹក PSG ថ្មីលោក Luis Enrique បានទុក Neymar នៅក្នុងគំរោងសម្រាប់រដូវកាលថ្មី រឺអត់នៅឡើយ ស្របពេល Neymar ក៏មិនឈ្មោះដែរពេល PSG ស្មើ Loreint ថ្ងៃបើករដូវកាល។ បើតាមអ្នកកាសែតអ៊ីតាលី Fabrizio Romano បានឱ្យដឹងថា Al-Hilal ហ៊ានឱ្យប្រាក់ឈ្នួលដល់ទៅ ៨០ លានអឺរ៉ីប្រសិន Neymar ព្រមផ្លាស់មកកាន់ក្របខណ្ឌ Saudi Pro League។Neymar មកដល់ PSG កាលពីឆ្នាំ ២០១៧ ផ្ទេរពី Barcelona ក្នុងតម្លៃផ្ទេរបំបែកកំណត់ត្រាពិភពលោកនៅពេលនោះតម្លៃ ២២២ លានអឺរ៉ូ រឺ ២០០ លានផោន។ តាំងពីពេលនោះមក Neymar បានឈ្នះជើងឯកលីគបារាំង ៥ លើក តែមិនទាន់ឈ្នះ UEFA Champions League តាមគោលដៅរបស់ក្លិបនៅឡើយ៕ អត្ថបទ៖នាង សុភាវុធ

ព្រះខ័នរាជ និងវិសាខា បន្ថែម ៣ពិន្ទុ ខណៈបឹងកេត និងព្រៃវែង ឈ្នះលើកដំបូង

ក្រុមបាល់ទាត់ព្រះខ័នរាជស្វាយរៀងអែហ្វស៊ី និងវិសាខា បានបន្ថែម ៣ពិន្ទុរៀងៗខ្លួន ក្នុងសប្ដាហ៍ ទី២ នៃលីគកំពូលកម្ពុជា Cambodian Premier League 2023/24 ស្របពេលក្រុមបឹងកេត និងក្រុមចំណូលថ្មី ព្រៃវែងអែង្វស៊ី បានស្គាល់ជ័យជម្នះលើកដំបូង បន្ទាប់ពីយកឈ្នះគូប្រកួត កាលពីចុងសប្ដាហ៍កន្លងទៅ ។សម្រាប់ក្រុមព្រះខ័នរាជស្វាយរៀងអែហ្វស៊ី បានវាយបកយកឈ្នះក្រុមភ្ញៀវភ្នំពេញក្រោន ២-១ នៅកីឡដ្ឋានខេត្តស្វាយរៀង ។ ជំនួបដ៏តានតឹងនេះ កីឡាករ ប្រាក់ ធីវ៉ា បានរកគ្រាប់បាល់នាំមុខឲ្យក្រុមការពារតំណែងជើងឯក ១គ្រាប់មុន នៅនាទី៣០ ។ ប៉ុន្ដែក្រោយចូលវគ្គទី២ ប្រមាណ ៣នាទី កីឡាករ Marcus Haber ក៏រកបានគ្រាប់តាមស្មើឲ្យក្រុមផ្ទះវិញ នៅនាទី៤៨ មុនខ្សែប្រយុទ្ធសញ្ជាតិកាណាដាដដែល បន្ថែមគ្រាប់ទី២ នៅនាទី៩០+៣ ដែលជាគ្រាប់ជ័យឲ្យក្រុមព្រះខ័នរាជស្វាយរៀងអែហ្វស៊ី យកឈ្នះភ្នំពេញក្រោនតែម្ដង ។ចំណែកក្រុមវិសាខា បានយកឈ្នះក្រុមម្ចាស់ផ្ទះណាហ្គាវើលដ៏ ដោយលទ្ធផល ៤-១ នៅកីឡដ្ឋានខេត្តកំពង់ស្ពឺ ។ ៤គ្រាប់របស់ក្រុមភ្ញៀវវិសាខា ធ្វើសម្រេចដោយកីឡា្រ Jonata Bastos នៅនាទី១៩ និងគ្រាប់បាល់ Own Goal របស់ខ្សែការពារណាហ្គាវើលដ៏ Bektur Amangeldiev នៅនាទី៤៤, កីឡាករ ស៊ិន កក្កដា នៅនាទី៥៥ និងកីឡាករ ស៊ិន សុផាណាត់ នៅនាទី៨៩ គ្រាដែល ១គ្រាប់របស់ណាហ្គាវើលដ៏ រកបានដោយកីឡាករ Bektur Amangeldiev នៅនាទី៥៣ ។ដោយឡែកក្រុមបឹងកេត បានវាយបកឈ្នះក្រុមអង្គរថាយហ្គឺរ ៤-១ នៅពហុកីឡដ្ឋានជាតិ ។ ការប្រកួតនេះ ក្រុមភ្ញៀវអង្គរថាយហ្គឺរ បានបើកការនាំមុខ ១គ្រាប់មុន ដែលបញ្ចប់ទីដោយកីឡាករ Blasco LLorens Victor នៅនាទី២៩ មុនកីឡាករ ចាន់ វឌ្ឍនាកា រកបានគ្រាប់តាមស្មើ នៅចុងវគ្គទី១ ។ ចូលវគ្គទី២ បឹងកេត បន្ដដាក់សម្ពាធរហូតរកបាន ៣គ្រាប់បន្ថែម ដោយកីឡាករ ចាន់ វឌ្ឍនាកា, Yoshimama Ryohei និង ម៉ាត់ នូរុណ ដែលជួយឲ្យបឹងកេត ស្គាល់ជ័យជម្នះលើកដំបូង។រីឯក្រុមព្រៃវែងអែហ្វស៊ី បានយកឈ្នះក្រុមម្ចាស់ផ្ទះ ISI ដង្កោសែនជ័យ ៥-០ នៅកីឡដ្ឋាន AIA Stadium, KMH Park ។ ជំនួបរវាងក្រុមចំណូលថ្មី ទើបឡើងមកពីលីគទី២ នេះ បានធ្វើឲ្យអ្នកគាំទ្រមានការភ្ញាក់ផ្អើល ដែលព្រៃវែង អាចយកឈ្នះគូប្រជែងដោយជោគជាំបែបនេះ ។ ៥គ្រាប់របស់ព្រៃវែង ធ្វើសម្រេចដោយកីឡាករ ផាន សុផេន ២គ្រាប់, Takeshita Masatoshi ២គ្រាប់ និងកីឡាករ So Omae ១គ្រាប់ ដែលនាំឲ្យពួកគេស្គាល់ជ័យជម្នះលើកដំបូង ដូចក្រុមនាគខៀវបឹងកេតដែរ។សម្រាប់ការប្រកួតសប្ដាហ៍ទី២ មួយគូទៀត គឺក្រុមម្ចាស់ផ្ទះគិរីវង់សុខសែនជ័យ បានចែក ១ពិន្ទុម្នាក់ ជាមួយក្រុមកងយោធពលខេមរភូមិន្ទ ក្រោយប្រកួតស្មើគ្នា ១-១ នៅកីឡដ្ឋានគិរីវង់ ។ ការប្រកួតក្រោមភ្លៀងសស្រិចនេះ កីឡាករ Tetsuaki Misawa គឺជាអ្នករកគ្រាប់បាល់នាំមុខឲ្យកងយោធពលខេមរភូមិន្ទមុន នៅនាទី១៦ តែ ១០នាទីក្រោយមក គិរីវង់ ក៏វាយបកតាមស្មើវិញ ដោយកីឡាករ Romario នៅនាទី២៦ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោងតែម្ដង។ក្រឡេកមកចាប់អារម្មណ៍តារាងពិន្ទុបណ្ដោះអាសន្ន ក្រោយបញ្ចប់ការប្រកួតលីគកំពូលកម្ពុជា សប្ដាហ៍ទី២ បន្ទាប់ពីរក្សាកំណត់ត្រាឈ្នះរៀងខ្លួន នាំឲ្យក្រុមវិសាខា និងព្រះខ័នរាជស្វាយរៀង ឈរលេខ១ និងលេខ២ ដោយមាន ៦ពិន្ទុស្មើគ្នា គ្រាដែលព្រៃវែង បឹងកេត ភ្នំពេញក្រោន ណាហ្គាវើលដ៏ និង ISI ដង្កោសែនជ័យ មាន ៣ពិន្ទុស្មើគ្នា គ្រាដែលគិរីវង់ និងកងយោធពលខេមរភូមិន្ទ ទើបរកបាន ១ពិន្ទុ និងក្រុមអង្គរថាយហ្គឺរ គឺជាក្រុមតែមួយគត់ ដែលមិនទាន់មានពិន្ទុរាប់នៅឡើយ៕ អត្ថបទ លី ឈុនឡា

Kylian Mbappe ត្រលប់មកហ្វឹកហាត់ជាមួយ PSG វិញទំនងមិនចាកចេញទៅណាទេ

ខ្សែប្រយុទ្ធបារាំង Kylian Mbappe បានត្រលប់មកហ្វឹកហាតជាមួយក្លិបបារាំង Paris Saint Germain វិញហើយ និងទំនងជាមិនចាកចេញទៅណាទេរដូវកាលនេះ។កីឡាករវ័យ ២៤ ឆ្នាំរូបនេះមិនចូលហ្វឹកហាត់ជាមួយក្រុមឡើយសប្តាហ៍មុន និងមិនមានឈ្មោះក្នុងការប្រកួតដែល PSG ស្មើ Loreint បើករដូវកាលថ្មីលីគបារាំងកាលពីថ្ងៃសៅរ៍។ ប្រធានក្រុមជម្រើសជាតិបារាំងវ័យ ២៤ ឆ្នាំរូបនេះ ដែលនៅសល់កិច្ចសន្យាមួយឆ្នាំជាមួយ PSG បានបដិសេធ មិនបន្តកិច្ចសន្យា។PSG មានគម្រោងលក់ Mbappe ឱ្យបានក្នុងរដូវក្តៅនេះ ប្រសើរជាងឱ្យអតីតខ្សែប្រយុទ្ធ Monaco រូបនេះចាកចេញ ដោយគ្មានបានអ្វីសោះនៅដំណាច់រដូវកាលក្រោយ តែមកទល់ពេលនេះគេមិនទាន់ដឹងពីការចរចាបែបណានៅឡើយរវាងភាគីទាំងពីរ។ PSG កន្លងមកធ្លាប់បាននិយាយថា បើសិន Mbappe សម្រេចចិត្តនៅជាមួយក្លិបបន្តគឺត្រូវតែបន្តកិច្ចសន្យា ដោយមិនអាចលេងបំពេញកិច្ចសន្យាដែលនៅសល់ ហើយដើរចេញនោះទេ។ មិនមែនជារឿងថ្មីឡើយដែល Kylian Mbappe ចង់ចាកចេញពី PSG ពោលគឺកាលពីខែឧសភាឆ្នាំមុនមានដំណឹងចរចាជាមួយ Real Madrid មុនការចរចាកិច្ចសន្យាថ្មីជោគជ័យជាមួយ PSG ក្នុងខែឧសភានោះ៕ អត្ថបទ៖នាង សុភាវុធ

ភ្ញាក់ផ្អើល Roberto Mancini ចាកចេញពីតំណែងអ្នកចាត់ការជម្រើសជាតិអ៊ីតាលី

លោក Roberto Mancini បានប្រកាសចាកចេញពីតំណែងអ្នកចាត់ការក្រុមជម្រើសជាតិអ៊ីតាលីគួរឱ្យភ្ញាក់ផ្អើល ក្រោយចំណាយពេល ៥ ឆ្នាំក្នុងតំណែង។សហព័ន្ធកីឡាបាល់ទាត់អ៊ីតាលីបានចេញសេចក្តីថ្លែងការ ពីការសុំចាកចេញពីតំណែងរបស់លោក Mancini តែមិនបានបញ្ជាក់ពីមូលហេតុឡើយ។បុរសវ័យ ៥៨ ឆ្នាំអ៊ីតាលីរូបនេះ បានចូលមកដឹកនាំក្រុមជម្រើសជាតិអ៊ីតាលី បន្ទាប់ពីជើងឯកពិភពលោក ឆ្នាំ២០០៦ មួយនេះមិនអាចឆ្លងផុតវគ្គជម្រុះមានកៅអីនៅ World Cup ២០១៨ នៅរុស្ស៊ី។ ក្នុងតំណែងរបស់លោក Mancini អ៊ីតាលីបានឈ្នះជើងឯក Euro ២០២០ ដែលលើកមក ២០២១ ដោយយកឈ្នះអង់គ្លេសនៅវគ្គផ្តាច់ព្រ័ត្រដោយបាល់ ១១ ម៉ែត្រកាត់សេចក្តីនៅកីឡដ្ឋាន Wembley។មិនតែប៉ុណ្ណោះអ៊ីតាលីក៏បានបំបែកកំណត់ត្រាពិភពលោក ក្រោយលេងមិនចាញ់សោះ ៣៧ ប្រកួតជាប់គ្នា តែនៅតែមិនអាចមានកៅអីនៅ World Cup ២០២២ នៅកាតាឆ្នាំមុន។ អ៊ីតាលីបច្ចុប្បន្នកំពុងឈរលេខ ៤ ក្នុងពូលនៅវគ្គជម្រុះ Euro ២០២៤ ក្រោយចាញ់អង់គ្លេសនៅក្នុងពូលកាលពីខែមីនា។លោក Mancini ធ្លាប់ដឹកនាំ Manchester City ឈ្នះជើងឯក English Premier League លើកដំបូងក្នុងប្រវត្តិសាស្រ្តក្លិបកាលពីឆ្នាំ ២០១២៕ អត្ថបទ៖នាង សុភាវុធ

Fred ចាកចេញពី Manchester United ទៅចូលរួមជាមួយក្លិបទួកគី Fenerbahce ផ្លូវការ

ខ្សែបម្រើប្រេស៊ីល Fred បានចាកចេញពីក្លិបបិសាចក្រហម Manchester United ទៅកាន់ក្លិបទួកគី Fenerbahce ផ្លូវការហើយ។ កីឡាករវ័យ ៣០ ឆ្នាំដែលមកកាន់ Manchester United កាលពីឆ្នាំ ២០១៨ ក្នុងតម្លៃផ្ទេរ ៤៧ លានផោនផ្ទេរពី Shakhtar Donetsk នោះ បានពេលវេលាកន្លងមកជាមួយ Man United ថាជា ក្តីស្រមៃក្លាយជាការពិត និងបានក្លាយកាត់បទពិសោធដ៏អស្ចារ្យក្នុងអាជីព។ កីឡាករវ័យ ៣០ ឆ្នាំរូបនេះ ត្រូវបានគេប្រាប់ថាមិនស្ថិតក្នុងគំរោងគោលរបស់ Manchester United រដូវកាលថ្មី នេះឡើយ។ Galatasaray ក៏ដូចជា Fulham សុទ្ធតែបានបង្ហាញចំណាប់អារម្មណ៍ ចង់បាន Fred ដែលនឹងអស់សុពលភាពកិច្ចសន្យាឆ្នាំក្រោយជាមួយ Man United។Fred បានផ្លាស់មកកាន់ Manchester United ក្នុងតម្លៃ ៤៧ លានផោនកាលពីឆ្នាំ ២០១៨ ពីក្លិបអ៊ុយក្រែន Shakhtar Donetsk ចូលលេងសរុបបាន ១៣៩ លើកស៊ុតបញ្ចូលទីបាន ៨ គ្រាប់ ៧ បាល់បញ្ជូន។រដូវកាលមុន Fred បង្ហាញខ្លួនសរុបបាន ៥៦ លើកស៊ុតបញ្ចូលទីបាន ៦ គ្រាប់ជួយឱ្យ Manchester United ទទួលបានចំណាត់ថ្នាក់លេខ ៣ នៅ Premier League មានកៅអីនៅ UEFA Champions League រដូវកាលថ្មី៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

កេនយ៉ាស៊ើបអង្កេតជាតិពុលដ៏មានសក្តានុពល ក្រោយដំរី ១៥ក្បាលងាប់នៅតំបន់ប្រព័ន្ធអេកូឡូស៊ី Amboseli

អ្នករស់នៅក្នុងទីក្រុងឡុងដ្រ៍ ចក្រភពអង់គ្លេស បង្ហាញក្តីបារម្ភពីរលកកម្តៅ អំឡុងរដូវក្តៅ

លោក Trump បញ្ជាក់ថា អាមេរិកនឹងចាត់វិធានការខ្លាំងក្លាលើអ៊ីរ៉ង់ តែនឹង «អនុញ្ញាតឱ្យពួកគេបន្តចរចា»

រដ្ឋអាជ្ញា៖ យុវជន ៣នាក់ ត្រូវបានចាប់ខ្លួនក្នុងការស៊ើបអង្កេតអំពើភេរវកម្មហូឡង់

ចិនចូលរួមរំលែកទុក្ខដល់ពលរដ្ឋស្លាប់ និងបន្តតាមដានសុវត្ថិភាពលដ្ឋរបស់ខ្លួន ក្រោយការរញ្ជួយដីនៅ ជប៉ុន

បារាំងបណ្តេញពិធីការិនីទូរទស្សន៍គាំទ្រវិមានក្រឹមឡាំងចេញពីប្រទេស

នេប៉ាល់ដាក់បំរាមគោចរ ក្រោយការប៉ះទង្គិចគ្នាហិង្សាកើតឡើងនៅស្រុក Sunsari

ចិនរិះគន់បំរាមសហរដ្ឋអាមេរិកលើការនាំចូលរូបយន្តរបស់ទីក្រុងប៉េកាំង

សាកសពត្រូវបានទាញចេញពីមន្ទីរពេទ្យក្រុង Mosul បន្ទាប់ពីការវាយប្រហាររបស់អាមេរិក-អារ៉ាប៊ីសាអ៊ូឌីតលើអ៊ីរ៉ាក់

ព្យុះផ្គររន្ទះដ៏ធ្ងន់ធ្ងរ វាយប្រហារទីក្រុងវ៉ាស៊ីនតោន ឌីស៊ី សហរដ្ឋអាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877