BTV NEWS

ផ្លូវការហើយ Zidane ក្លាយជាគ្រូបង្វឹកថ្មីរបស់ក្រុមជម្រើសជាតិបារាំង

ព្រះខ័នរាជ ណាត់ក្លិបមកពីហុងកុង និងសិង្ហបុរី ប្រកួតពានមិត្តភាពត្រៀមរដូវកាលថ្មី នៅស្ដាតមរតកតេជោ

មន្ដ្រីសហព័ន្ធកម្ពុជាថា SEA V.League គប្បីមានម៉ាឡេស៊ី សិង្ហបុរី និងឡាវ ចូលលេង ក្នុងនាមសមាជិកអាស៊ានដូចគ្នា

Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ

ព័ត៌មានកីឡា

Chelsea ទិញបានយុវជនរបស់ក្លិបបារាំង Rennes, Lesley Ugochukwu តម្លៃ ៣០ លានដុល្លារ

ក្លិបបាល់ទាត់តោខៀវ Chelsea បានសម្រេចក្នុងការនាំយកខ្សែបម្រើយុវជនវ័យ ១៩ ឆ្នាំរបស់ក្លិបបារាំង Rennes, Lesley Ugochukwu ជាមួយនឹងកិច្ចសន្យា ៧ ឆ្នាំ និងជម្រើសបន្តបន្ថែម ១ ឆ្នាំ។ មិនមានការបញ្ជាក់ពីតម្លៃនៃការផ្ទេរនេះឡើយ តែសារព័ត៌មានអង់គ្លេសបានចុះផ្សាយថា Chelsea បានចំនាយប្រមាណ ២៧.៥ លានអឺរ៉ូ រឺ ៣០ លានដុល្លារអាមេរិក ដើម្បីនាំយកកីឡាករវ័យ ១៩ ឆ្នាំរូបនេះមកកាន់ Stamford Bridge។Lesley Ugochukwu គឺជាកីឡាករក្រុមយុវជនអាយុក្រោម ១៩ ឆ្នាំបារាំង និងតែងតែជាជម្រើសដំបូងរបស់ Stade Rennes រដូវកាលមុននៅក្របខណ្ឌ Ligue1 ដែលជួយក្រុមទទួលបានចំណាត់ថ្នាក់លេខ ៤ និងឡើងវគ្គខ្វែង UEFA Europa League។រំលឹកថា Lesley Ugochukwu បានចូលហ្វឹកហាត់នៅ Rennes តាំងពីអាយុ ៨ ឆ្នាំ និងទទួលបានកៅអីនៅក្រុមធំនៅវ័យ ១៧ ឆ្នាំ៕ អត្ថបទ៖នាង សុភាវុធ

Hun Sen Cup៖ ភ្នំពេញហ្គាឡាក់ស៊ី កក់កៅអីវគ្គបន្ដ ខណៈព្រះសីហនុ បន្ដឈ្នះកំពង់ស្ពឺ ២-១

ក្រុមបាល់ទាត់ភ្នំពេញហ្គាឡាក់ស៊ី បានកក់កៅអីវគ្គ ៨ក្រុមចុងក្រោយ នៃពានរង្វាន់សម្ដេចតេជោ ហ៊ុន សែន (Hun Sen Cup) លើកទី១៧ ថ្នាក់ខេត្ត ឆ្នាំ២០២៣ ហើយ ក្រោយបន្ដយកឈ្នះក្រុមកំពតអេហ្វស៊ី ៥-២ ក្នុងជំនួបជើងទី២ ក្នុងពូលA កាលពីល្ងាចថ្ងៃទី០១ ខែសីហា គ្រាដែលខេត្តព្រះសីហនុ បន្ដយកឈ្នះក្រុមមន្ទីរអប់រំ យុវជន និងកីឡា ខេត្តកំពង់ស្ពឺ ដោយលទ្ធផល ២-១ ដើម្បីក្ដោបឱកាសឡើងវគ្គបន្ដ ។សម្រាប់ជំនួបនៅទីលានវិទ្យាល័យ ច្បារអំពៅ ក្រុមទាំងពីរ បានបញ្ចប់វគ្គទី១ ដោយលទ្ធផលស្មើគ្នា ១-១ ក្នុងនោះ ១គ្រាប់របស់ភ្នំពេញហ្គាឡាក់ស៊ី ធ្វើសម្រេចដោយកីឡាករ ម៉ាន សាមី នៅនាទី១៤ និងគ្រាប់តាមស្មើរបស់កំពតអេហ្វស៊ី ធ្វើសម្រេចដោយកីឡាករ នី យ៉េរីម៉ាន នៅនាទី២៤ ។ ប៉ុន្ដែចូលវគ្គទី២ កីឡាករ ភឺន ចាន់វិសុទ្ធ បានបន្ថែម ៤គ្រាប់ទៀត ឲ្យភ្នំពេញហ្គាឡាក់ស៊ី នៅនាទី៥១, ៧២, ៧៥ និងនាទី៧៨ ខណៈកំពតអេហ្វស៊ី រកបានត្រឹម ១គ្រាប់ប៉ុណ្ណោះ ដោយកីឡាករ ហង្ស ប៉ាលីដា នៅនាទី៨៣ ។ចំណែកការប្រកួតពូលA នៅទីលានវិទ្យាល័យកំពង់ស្ពឺវិញ ខេត្តព្រះសីហនុ បានស៊ុតបំប៉ោងសំណាញ់ក្រុមម្ចាស់ផ្ទះ ២គ្រាប់មុន នៅវគ្គទី១ ដោយកីឡាករ ខេម លាងខេ នៅនាទី៣៥ និងកីឡាករ ម៉ាត់ ដាវីត នៅនាទី៤៤ ។ រីឯក្រុមមន្ទីរអប់រំ យុវជន និងកីឡា ខេត្តកំពង់ស្ពឺ បានព្យាយាមវាយបកជាខ្លាំង ពិសេសនៅវគ្គទី២ តែពួកគេរកបានត្រឹម ១គ្រាប់ប៉ុណ្ណោះ ដោយកីឡាករ លឿង ចន្ទ្រី នៅនាទី៦៣ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង ដោយជ័យជម្នះបានទៅក្រុមភ្ញៀវខេត្តព្រះសីហនុ ។ជាមួយលទ្ធផលនេះដែរ ក្រុមភ្នំពេញហ្គាឡាក់ស៊ី បានបន្ដឈរកំពូលតារាង និងមាន ១៤ពិន្ទុ បានកក់កៅអីវគ្គ ៨ក្រុមចុងក្រោយ ដោយស្វ័យប្រវត្តិ ខណៈខេត្តព្រះសីហនុ បានបន្ដឈរលេខ២ និងមាន ៩ពិន្ទុ តាមពីក្រោយ ដោយពួកគេមានភាគរយខ្ពស់ ក្នុងការប្រជែងកៅអីវគ្គបន្ដ ។ ចំណែកក្រុមកំពតអេហ្វស៊ី និងខេត្តកំពង់ស្ពឺ បន្ដឈរលេខ៣ និងលេខ៤ ដោយរក្សា ៦ពិន្ទុក្នុងដៃ ហើយក្រុមទាំងពីរ ក៏នៅសល់ឱកាសប្រជែងកៅអីវគ្គបន្ដជាមួយខេត្តព្រះសីហនុដែរ ដ្បិតក្រុមនីមួយៗ នៅសល់ ២ប្រកួតក្នុងដៃទៀត៕ អត្ថបទ លី ឈុនឡា

ជប៉ុនឈ្នះអេស្ប៉ាញ ៤-០ ឡើងវគ្គ ១៦ ក្រុមចុងក្រោយជួបន័រវែស

ក្រុមបាល់ទាត់នារីជប៉ុនបានបង្ហាញពីសក្តានុពល ដែលគេចាត់ទុកជាបេក្ខភាពជើងឯកបាល់ទាត់នារីពិភពលោកឆ្នាំនេះ បន្ទាប់ពីយកឈ្នះក្រុមនារីអេស្ប៉ាញធ្ងន់ដៃ ៤-០ ដើម្បីកក់កៅអីវគ្គ ១៦ ក្រុមចុងក្រោយជួបជាមួយន័រវេស។ ក្រុមជើងឯកឆ្នាំ ២០១១ រកបានគ្រាប់នាំមុខក្នុងវគ្គទី ១ បីគ្រាប់ដោយកីឡាការិនី Hinata Miyazawa ពីរគ្រាប់ និង Riko Ueki មុនពេលដែលកីឡាការិនីបម្រុង Mina Tanaka បន្ថែមគ្រាប់ទី ៤ នៅវគ្គទី ២។ នេះជាជ័យជំនះ ៣ ប្រកួតផ្ទួនសម្រាប់ជប៉ុននៅក្នុងពូល C នេះមាន ៩ ពិន្ទុពេញខណៈដែលអេស្ប៉ាញថ្វីបើចាញ់ តែអាចឡើងវគ្គបន្ទាប់បានដោយមាន ៦ ពិន្ទុ។ មួយប្រកួតទៀតនៅក្នុងពូល C នេះក្រុមនារីហ្សាំប៊ីយកឈ្នះកូស្តារីកា ៣-១ តែមិនអាចឡើងជុំបន្តបានឡើយ។ ក្រុមជប៉ុននឹងចាកចេញពីប្រទេសនូវែស៊ីឡង់ឡើយ ពោលគឺវគ្គ ១៦ ក្រុមចុងក្រោយត្រូវជួបជាមួយក្រុមលេខ ២ ន័រវេសនៅទីក្រុង Wellington ថ្ងៃសៅរ៍ចុងសប្តាហ៍នេះ។ ចំណែកឯអេស្ប៉ាញនឹងត្រូវជួបក្រុមលេខ ១ ក្នុងពូល A ស្វ៊ីសនៅទីក្រុង Auckland។ រីឯការប្រកួតមួយពូលទៀត ក្រុមម្ចាស់ផ្ទះអូស្រ្តាលីរកបានជ័យជំនះទី ២ របស់ខ្លួនដើម្បីកក់កៅអីនៅវគ្គ ១៦ ក្រុមចុងក្រោយ បន្ទាប់ពីយកឈ្នះកាណាដា ៤-០។ Hayley Raso រកបានពីរគ្រាប់ម្នាក់ឯងក្នុងវគ្គទី ១ មុនពេលដែល Mary Fowler និង Steph Catley រកបានម្នាក់មួយគ្រាប់នៅវគ្គទី ២ ធ្វើឱ្យអូស្រ្តាលីបញ្ចប់ការប្រកួតក្នុងពូល B ជាក្រុមលេខ ១។ ក្រុមដែលឡើងទៅជាមួយអូស្រ្តាលីនោះគឺនីហ្សេរីយ៉ា បន្ទាប់ពីក្រុមនារីមកពីអាហ្រ្វិកមួយនេះស្មើគ្នាជាមួយក្រុមនារីអៀកឡង់ ០-០៕ អត្ថបទ៖នាង សុភាវុធ

Manchester United ព្រមព្រៀងបន្តកិច្ចសន្យាជាមួយ Adidas ១០ ឆ្នាំទៀតតម្លៃ ៩០០លានផោន

ក្លិបបាល់ទាត់បិសាចក្រហម Manchester United បានឈានដល់កិច្ចព្រមព្រៀងបន្តកិច្ចសន្យាជាមួយដៃគូផ្គត់ផ្គត់សម្ភារៈកីឡា Adidas រយៈពេល ១០ ឆ្នាំទៅមុខទៀតដែលមានតម្លៃយ៉ាងហោចណាស់ ៩០០ លានផោន។ កិច្ចសន្យាថ្មីជាមួយក្រុមហ៊ុនផ្គត់ផ្គត់សម្ភារៈកីឡារបស់អាល្លឺម៉ង់មួយនេះ មានន័យថា Manchester United នឹងបន្តប្រើប្រាស់សម្លៀកបំពាក់ Adidas ដល់ឆ្នាំ ២០៣៥។ កិច្ចសន្យាចាស់ ១០ ឆ្នាំកន្លងមកមានតម្លៃត្រឹម ៧៥០ លានផោនប៉ុណ្ណោះ។ រំលឹកថា កិច្ចសហការគ្នារវាង Manchester United និង Adidas បានចាប់ផ្តើមនៅឆ្នាំ ២០១៥ ហើយក៏ធ្លាប់ជាដៃគូនឹងគ្នាពីមុខដែរពីឆ្នាំ ១៩៨០ ដល់ឆ្នាំ ១៩៩២៕ អត្ថបទ៖ នាង សុភាវុធ

Manchester United នឹងសម្រេចអនាគត Mason Greenwood មុនរដូវកាលថ្មីចាប់ផ្តើម

ក្លិបបាល់ទាត់បិសាចក្រហម Manchester United នឹងសម្រេចពីអនាគតរបស់ខ្សែប្រយុទ្ធ Mason Greenwood មុនរដូវកាលថ្មី English Premier League ចាប់ផ្តើមនៅថ្ងៃទី ១៤ ខែសីហាខាងមុខនេះ។ការដាក់ពិន័យ ជាច្រើនត្រូវបានធ្វើឡើងលើ Greenwood បន្ទាប់ពីរឿងអាស្រូវចាប់រំលោភ និងបៀតបៀនលើក្មេងស្រីម្នាក់ តែការចោទប្រកាន់ព្រហ្មទណ្ឌទាំងអំបាលម៉ានត្រូវទម្លាក់ចោលកាលពីខែកុម្ភៈកន្លងទៅ។ កីឡាករវ័យ ២១ ឆ្នាំរូបនេះត្រូវបានចាប់ខ្លួនក្នុងខែមករា ឆ្នាំ ២០២២ ចំពេលមានការចោទប្រកាន់ជុំវិញរូបភាព និងវីដេអូ។ក្រោយមកគាត់ត្រូវបានចោទប្រកាន់ពីបទប៉ុនប៉ងចាប់រំលោភ បង្ខិតបង្ខំ និងវាយដំក្នុងឱកាសបង្កគ្រោះថ្នាក់ដល់រាងកាយពិតប្រាកដ។អយ្យការអមតុលាការបានឱ្យដឹងថា ការចោទប្រកាន់ត្រូវបានបញ្ឈប់ បន្ទាប់ពីសាក្សីសំខាន់ៗបានដកការជាប់ពាក់ព័ន្ធរបស់ពួកគេ។Mason Greenwood នៅសល់កិច្ចសន្យារបស់ខ្លួនជាមួយ Manchester United រហូតដល់ឆ្នាំ ២០២៥។ រំលឹកថា Mason Greenwood ជាកីឡាករដែលចេញពីថ្នាលយុវជនរបស់ Manchester United និងបានឡើងមកលេងក្រុមធំនៅឆ្នាំ ២០១៩ ក្នុងវ័យ ១៧ ឆ្នាំ។ Greenwood ក៏ជាសមាជិកសំខាន់ម្នាក់របស់ក្រុមកាលពីរដូវកាលមុនដែរដោយបង្ហាញខ្លួនបាន ១៨ លើនៅ Premier League និងប្រកួតចុងក្រោយបំផុតនៅថ្ងៃទី ២២ ខែមករាទល់នឹង West Ham មុនពេលត្រូវបានឃាត់ខ្លួន៕ អត្ថបទ៖នាង សុភាវុធ

Fabinho ផ្លាស់ពី Liverpool ទៅកាន់ Al-Ittihad ផ្លូវការតម្លៃ ៤០ លានផោន

ខ្សែបម្រើប្រេស៊ីល Fabinho បានសំរេចផ្លូវការក្នុងការផ្លាស់ពីហង្សក្រហម Liverpool ទៅកាន់ក្លិបអារ៉ាប៊ីសាអ៊ូឌីត Al-Ittihad ក្នុងតម្លៃផ្ទេរ ៤០លានផោន។ កីឡាករវ័យ ២៩ ឆ្នាំរូបនេះ មិនបានរួមដំនើរជាមួយ Liverpool ឡើយក្នុងការបោះជំរំហ្វឹកហាត់នៅអាល្លឺម៉ង់ និង Pre-Season នៅសិង្ហបុរី បន្ទាប់ពី Liverpool ទទួលសំណើពី Al-Ittihad កាលពីពាក់កណ្តាលខែកក្កដាកន្លងមក។ Fabinho បាននិយាយថា Liverpool គឺជាផ្ទះរបស់ខ្លួន ហើយLiverpool នឹងស្ថិតក្នុងបេះដូងគេជានិច្ច និងអរគុណគ្រប់យ៉ាងដល់ក្លិប និងអ្នកគាំទ្រ តាមរយៈពេលវេលាជាមួយគ្នាកន្លងមកមិនថាជោគជ័យ រឺបរាជ័យ។Fabinho បានក្លាយជាកីឡាករដែលមានឈ្មោះបោះសម្លេងពីអឺរ៉ុបម្នាក់ទៀតផ្លាស់ទៅកាន់ Al-Ittihad បន្ទាប់ពី Karim Benzema និង N’Golo Kante ជាដើម។Fabinho ជាសមាជិករបស់ Liverpool តាំងពីឆ្នាំ ២០១៨ ផ្លាស់ពី AS Monaco ក្នុងតម្លៃ ៣៩លានផោន និងបានបង្ហាញខ្លួនសរុបមកទល់ពេលនេះ ២១៩ លើកស៊ុតបញ្ចូលទី ១១ គ្រាប់ ជួយ Liverpool ឈ្នះពាន English Premier League, UEFA Champions League, FA Cup, EFL Cup និង FIFA Club World Cub៕ អត្ថបទ៖នាង សុភាវុធ

អ្នកគាំទ្រ Boca Junior ៣០០០០នាក់ ស្វាគមន៍ខ្សែប្រយុទ្ធចំនូលថ្មីជើងចាស់អ៊ុយរូហ្កាយ Edinson Cavani

ខ្សែប្រយុទ្ធជើងចាស់អ៊ុយរូហ្កាយ Edinson Cavani បានបង្ហាញមុខជាផ្លូវការនៅចំពោះមុខអ្នកគាំទ្រក្លិបអាហ្សង់ទីន Boca Junior នៅកីឡដ្ឋាន Bombonera ទីក្រុង Buenos Aires ថ្ងៃចន្ទម្សិលមិញ។អ្នកគាំទ្រប្រមាណ ៣០០០០ នាក់បានស្វាគមន៍ និងអបអរសាទរវត្តមានខ្សែប្រយុទ្ធដែលមានបទពិសោធក្រាសក្រែលវ័យ ៣៦ ឆ្នាំរូបនេះ ដែលធ្លាប់ចំណាយពេលច្រើនឆ្នាំនៅអឺរ៉ុប។ អតីតខ្សែប្រយុទ្ធ Manchester United រូបនេះបានចុះហត្ថលេខារយៈពេល ១៨ ខែជាមួយក្លិបបាល់ទាត់ដែលឈ្មោះល្បីជាងគេមួយនៅអាហ្សង់ទីននេះ។ រំលឹកថា Edinson Cavani បានមកដល់ Boca Junior បន្ទាប់ពីអាជីពជាច្រើនក្លិបនៅអឺរ៉ុបរួមមាន Palermo, Napoli, Paris Saint Germain, Manchester United និង Valencia។ Cavani ធ្លាប់បង្ហាញខ្លួនឱ្យក្រុមជម្រើសជាតិអ៊ុយរូហ្កាយនៅព្រឹត្តិការណ៍បាល់ទាត់ពិភពលោក ៤ លើកនៅឆ្នាំ ២០១០, ២០១៤, ២០១៨ និង ២០២២៕ អត្ថបទ៖ នាង សុភាវុធ

Hun Sen Cup៖ គូជក់ចិត្តក្នុងពូលA ខណៈកំពង់ចាម ត្រូវការឈ្នះកណ្ដាល ដើម្បីបញ្ចប់ឱកាសដៃគូ

ពានរង្វាន់សម្ដេចតេជោ ហ៊ុន សែន (Hun Sen Cup) លើកទី១៧ ថ្នាក់ខេត្ត ឆ្នាំ២០២៣ នឹងបន្ដការប្រកួតជម្រុះ សប្ដាហ៍ទី១៤ នៅថ្ងៃទី០១ និងថ្ងៃទី០២ ខែសីហានេះ ជាមួយកម្មវិធីប្រកួតដ៏សំខាន់ក្នុងពូលA ខណៈពូលB ប្រសិនបើខេត្តកំពង់ចាម បន្ដយកឈ្នះខេត្តកណ្ដាល នឹងធ្វើឲ្យគូប្រជែង ៣ក្រុមទៀត បាត់បង់ឱកាសឡើងវគ្គបន្ដតែម្ដង ។សម្រាប់កម្មវិធីប្រកួតក្នុងពូល A ដែលទស្សនិកជនមិនគួរមើលរំលេង នៅរសៀលថ្ងៃទី០១ ខែសីហានេះ គឺក្រុមកំពូលតារាងភ្នំពេញហ្គាឡាក់ស៊ី ត្រូវជួបក្រុមភ្ញៀវខេត្តកំពត បន្ទាប់ពីយកឈ្នះក្រៅដី ១-០ កាលពីជើងទី១ ស្របពេលក្រុមព្រះសីហនុ ត្រូវជួបក្រុមម្ចាស់ផ្ទះខេត្តកំពង់ស្ពឺវិញ ក្រោយទទួលបានជ័យជម្នះ ២-១ លើទឹកដីខ្លួន កាលពីជើងទី១ ។បច្ចុប្បន្នក្នុងពូល A នេះ ខេត្តព្រះសីហនុ ខេត្តកំពត និងខេត្តកំពង់ស្ពឺ កំពុងកាន់ ៦ពិន្ទុក្នុងដៃស្មើគ្នា និងនៅសល់ ៣ប្រកួតរៀងខ្លួន តាមពីក្រោយក្រុមភ្នំពេញហ្គាឡាក់ស៊ី ដែលមាន ១១ពិន្ទុ ។ ដូច្នេះការប្រកួតថ្ងៃនេះ ពិតជាសំខាន់ សម្រាប់ក្រុមនីមួយៗ ដែលទាមទារឈ្នះដាច់ខាត ដើម្បីរក្សាឱកាសប្រជែងកៅអីវគ្គបន្ដ ។ចំណែកកម្មវិធីប្រកួតពូល B នាថ្ងៃទី០២ ខែសីហាវិញ គឺមានខេត្តកណ្ដាល ជួបក្រុមភ្ញៀវខេត្តកំពង់ចាម និងខេត្តស្វាយរៀង ជួបក្រុមមិនទាន់ស្គាល់ចាញ់ ខេត្តត្បូងឃ្មុំ ។ កាលពីជើងទី១ ខេត្តកណ្ដាល ចាញ់ខេត្តកំពង់ចាម ៤-១ និងខេត្តស្វាយរៀង ចាញ់ខេត្តត្បូងឃ្មុំ ៥-១ ។ចំពោះតារាងពិន្ទុបច្ចុប្បន្ន ក្នុងនាមក្រុមកំពូលតារាង ដែលរកបាន ១៥ពិន្ទុ ខេត្តត្បូងឃ្មុំ បានកក់កៅអីវគ្គ ៨ក្រុមចុងក្រោយទៅហើយ គ្រាដែលកំពង់ចាម មាន ១២ពិន្ទុឈរលេខ២ តាមពីក្រោយដោយខេត្តស្វាយរៀង និងកំពង់ឆ្នាំង ដែលមាន ៧ពិន្ទុស្មើគ្នា និងនៅសល់ ២ប្រកួតក្នុងដៃដូចគ្នា ។ប៉ុន្ដែផ្អែកលើលទ្ធផល គិតត្រឹមសប្ដាហ៍ទី១៣ ប្រសិនបើខេត្តកំពង់ចាម បន្ដយកឈ្នះខេត្តកណ្ដាលទៀត ពួកគេនឹងត្រូវឡើងវគ្គបន្ដជាមួយខេត្តត្បូងឃ្មុំ គ្រាដែលខេត្តស្វាយរៀង និងខេត្តកំពង់ឆ្នាំង នឹងអស់ឱកាសប្រជែងកៅអីវគ្គបន្ដ ជាមួយខេត្តកណ្ដាលតែម្ដង៕ អត្ថបទ លី ឈុនឡា

Allan Saint-Maximin ចាកចេញពី Newcastle ទៅចូលរួមជាមួយ Al-Ahli

ខ្សែប្រយុទ្ធបារាំង Allan Saint-Maximin បានចាកចេញពីសារិកាព្រៃ Newcastle ហើយដើម្បីទៅចូលរួមជាមួយ ក្លិបអារ៉ាប៊ីសាអ៊ូឌីត Al-Ahli ក្នុងតម្លៃផ្ទេរបិទជិត។កីឡាករវ័យ ២៦ ឆ្នាំរូបនេះបានក្លាយជាកីឡាករដែលមានឈ្មោះបោះសម្លេងនៅអឺរ៉ុបម្នាក់ទៀតដែលផ្លាស់មកកាន់ ក្លិបជើងឯក Saudi Pro League នេះ បន្ទាប់ពី Riyad Mahrez, Roberto Firmino និង Edouard Mendy។Saint-Maximin ដែលផ្លាស់មកកាន់ Newcastle ពីក្លិបបារាំង Nice កាលពីឆ្នាំ ២០១៩ ស៊ុតបញ្ចូលទីបាន ១២ គ្រាប់នៅ Premier League ក្នុងចំណោមការបង្ហាញខ្លួន ១១១ លើក បានចុះហត្ថលេខារយៈពេល ៤ ឆ្នាំ នៅ Al-Ahli។Al-Ahli ស្ថិតក្រោមការវិនិយោគរបស់ Saudi Arabia’s Investment Fund (PIF) ដែលកំពុងគ្រប់គ្រងភាគហ៊ុនធំនៅ Newcastle ផងដែរ។ការចាកចេញរបស់ Allan Saint-Maximin ពី Newcastle បន្ទាប់ពីក្លិបបាននាំយកខ្សែបម្រើអ៊ីតាលី Sandro Tonali ពី AC Milan តម្លៃ ៥៥ លានផោន និង Harvey Barnes ពី Leicester City តម្លៃ ៣៨ លានផោន៕អត្ថបទ៖នាង សុភាវុធ

Iga Swiatek និង Alexander Zverev គ្រងជើងឯកនៅលើទឹកដីកំណើតរៀងខ្លួន

កីឡាការិនីវាយកូនបាល់ប៉ូឡូញ Iga Swiatek និងកីឡាករអាល្លឺម៉ង់ Alexander Zverev បានគ្រងជើងឯកក្នុង ការប្រកួតកម្មវិធីនៅក្នុងទឹកដីកំណើតរៀងៗខ្លួនចុងសប្តាហ៍កន្លងទៅ។ កីឡាការិនីលំដាប់លេខ ១ ពិភពលោក Iga Swiatek បានយកឈ្នះកីឡាការិនីអាល្លឺម៉ង់ Laura Siegemund ៦0 និង ៦-១ នៅទីក្រុងវ៉ាសូវីប្រទេសប៉ូឡូញនៃកម្មវិធី Poland Open។Iga Swiatek ត្រូវលេង ២ ប្រកួតក្នុងមួយថ្ងៃអាទិត្យម្សិលមិញ ពោលគឺការប្រកួតវគ្គពាក់កណ្តាលផ្តាច់ព្រ័ត្រត្រូវរុញមកបញ្ចប់នៅនៅពេលព្រឹក បន្ទាប់ពីមានភ្លៀងធ្លាក់រំខានការប្រកួតការប្រកួតនៅល្ងាចថ្ងៃសៅរ៍។ងាកមកការប្រកួតផ្នែកបុរស ការប្រកួតកម្មវិធី Hamburg Open នៅប្រទេសអាល្លឺម៉ង់ កីឡាករម្ចាស់ផ្ទះ Alexander Zverev គឺជាជើងឯកក្រោយយកឈ្នះកីឡាករស៊ែប Laslo Djere នៅវគ្គផ្តាច់ព្រ័ត្រ ៧-៥ និង ៦-៣។ បច្ចុប្បន្នឈរលេខ ១៥ ពិភពលោក Zverev ដែលជាម្ចាស់មេដាយមាសអូឡាំពិកទីក្រុងតូក្យូ បានគ្រងជើងឯកលើកដំបូងប៉ុណ្ណោះរាប់ពីឆ្នាំ ២០២១។ កីឡាករវ័យ ២៦ ឆ្នាំរូបនេះបានក្លាយជាកីឡាករអាល្លឺម៉ង់ដំបូងប៉ុណ្ណោះរាប់តាំងពីឆ្នាំ ១៩៩៣ ដែលឈ្នះជើងឯក Hamburg Open នេះ បន្ទាប់ពី Michael Stich៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

កេនយ៉ាស៊ើបអង្កេតជាតិពុលដ៏មានសក្តានុពល ក្រោយដំរី ១៥ក្បាលងាប់នៅតំបន់ប្រព័ន្ធអេកូឡូស៊ី Amboseli

អ្នករស់នៅក្នុងទីក្រុងឡុងដ្រ៍ ចក្រភពអង់គ្លេស បង្ហាញក្តីបារម្ភពីរលកកម្តៅ អំឡុងរដូវក្តៅ

លោក Trump បញ្ជាក់ថា អាមេរិកនឹងចាត់វិធានការខ្លាំងក្លាលើអ៊ីរ៉ង់ តែនឹង «អនុញ្ញាតឱ្យពួកគេបន្តចរចា»

រដ្ឋអាជ្ញា៖ យុវជន ៣នាក់ ត្រូវបានចាប់ខ្លួនក្នុងការស៊ើបអង្កេតអំពើភេរវកម្មហូឡង់

ចិនចូលរួមរំលែកទុក្ខដល់ពលរដ្ឋស្លាប់ និងបន្តតាមដានសុវត្ថិភាពលដ្ឋរបស់ខ្លួន ក្រោយការរញ្ជួយដីនៅ ជប៉ុន

បារាំងបណ្តេញពិធីការិនីទូរទស្សន៍គាំទ្រវិមានក្រឹមឡាំងចេញពីប្រទេស

នេប៉ាល់ដាក់បំរាមគោចរ ក្រោយការប៉ះទង្គិចគ្នាហិង្សាកើតឡើងនៅស្រុក Sunsari

ចិនរិះគន់បំរាមសហរដ្ឋអាមេរិកលើការនាំចូលរូបយន្តរបស់ទីក្រុងប៉េកាំង

សាកសពត្រូវបានទាញចេញពីមន្ទីរពេទ្យក្រុង Mosul បន្ទាប់ពីការវាយប្រហាររបស់អាមេរិក-អារ៉ាប៊ីសាអ៊ូឌីតលើអ៊ីរ៉ាក់

ព្យុះផ្គររន្ទះដ៏ធ្ងន់ធ្ងរ វាយប្រហារទីក្រុងវ៉ាស៊ីនតោន ឌីស៊ី សហរដ្ឋអាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877