BTV NEWS

ផ្លូវការហើយ Zidane ក្លាយជាគ្រូបង្វឹកថ្មីរបស់ក្រុមជម្រើសជាតិបារាំង

ព្រះខ័នរាជ ណាត់ក្លិបមកពីហុងកុង និងសិង្ហបុរី ប្រកួតពានមិត្តភាពត្រៀមរដូវកាលថ្មី នៅស្ដាតមរតកតេជោ

មន្ដ្រីសហព័ន្ធកម្ពុជាថា SEA V.League គប្បីមានម៉ាឡេស៊ី សិង្ហបុរី និងឡាវ ចូលលេង ក្នុងនាមសមាជិកអាស៊ានដូចគ្នា

Paolo Maldini និង Leonardo លាលែងពីតំណែងក្នុងសហព័ន្ធបាល់ទាត់អ៊ីតាលី បង្កវិបត្តិថ្មីដល់ក្រុមជម្រើសជាតិ

ព័ត៌មានកីឡា

ក្រុមម្ចាស់ផ្ទះនូវែស៊ីឡង់ធ្លាក់ពីបាល់ទាត់នារីពិភពលោកក្រោយស្មើស្វ៊ីស

ក្រុមបាល់ទាត់នារីសហម្ចាស់ផ្ទះនូវែស៊ីឡង់ បានធ្លាក់ចេញពីព្រឹត្តិការណ៍បាល់ទាត់នារីជើងឯកពិភពលោកហើយ ក្រោយស្មើក្រុមបាល់ទាត់នារីស្វ៊ីស ០-០ ប្រកួតចុងក្រោយក្នុងពូល A។នូវែស៊ីឡង់ត្រូវការឈ្នះប្រកួតចុងក្រោយនេះដើម្បីទៅកាន់វគ្គបន្ត តែឱកាសមួយចំនួនរបស់ក្រុមម្ចាស់ផ្ទះមិនអាច សំរេចបាន បើទោះជាចាប់ផ្តើមប្រកួតដំបូងក្នុងពូលឈ្នះក្រុមខ្លាំងន័រវេសក្តី។ មួយពិន្ទុប្រកួតចុងក្រោយនេះធ្វើឱ្យនូវែស៊ីឡង់មាន ៤ ពិន្ទុតែឈរលេខ ៣ ក្នុងពូល បន្ទាប់ពីក្រុមន័រវេសដែលដំបូងមានត្រឹម ១ ពិន្ទុនោះ បានយកឈ្នះក្រុមពីអាស៊ីអាគ្នេយ៍ហ្វីលីពីន ៦-០។ អតីតក្រុមជើងឯកពិភពលោកន័រវេសរកបានដល់ទៅ ៦ គ្រាប់ ជាពិសេសកីឡាការិនី Sophie Haug រកបានដល់ទៅ ៣ គ្រាប់ម្នាក់ឯងដើម្បីមាន ៤ ពិន្ទុតែឈរលេខ ២ ដោយមានគ្រាប់ចំណេញ ៥ គ្រាប់ឡើងទៅកាន់វគ្គបន្តជាមួយក្រុមលេខ ១ ក្នុងពូលស្វ៊ីសដែលមាន ៥ ពិន្ទុ។ ងាកមកការប្រកួតនៅក្នុងពូល H វិញក្រុមនារីកូឡុំប៊ីធ្វើឱ្យមានការភ្ញាក់ផ្អើល តាមរយៈជ័យជំនះលើក្រុមជើងឯក ២ សម័យអាល្លឺម៉ង់ ២-១។ Linda Caicedo បើកការនាំមុខឱ្យកូឡុំប៊ីនៅនាទីទី ៥២ តែហៀបនឹងចប់ទៅហើយអាល្លឺម៉ង់ក៏តាមស្មើវិញនៅនាទីទី ៨៩ ដោយបាល់ពិន័យ ១១ ម៉ែត្ររបស់ Alexandra Popp។ យ៉ាងណាក្តី មិនទាន់ចប់ឡើយកូឡុំប៊ីក៏រកបានគ្រាប់ជ័យជំនះនៅនាទីទីចុងក្រោយបំផុត ៩០+៧ ដោយ Manuela Vanegas ធ្វើឱ្យអាល្លឺម៉ង់ស្គាល់បរាជ័យក្នុងពូលនៅ World Cup លើកដំបូងរាប់តាំងពីឆ្នាំ ១៩៩៥។ នៅក្នុងពូលនេះដែរ ក្រុមបាល់ទាត់នារីម៉ារ៉ុករកបានជ័យជំនះលើកដំបូងបំផុតក្នុងព្រឹត្តិការណ៍បាល់ទាត់នារីពិភពលោកតាមរយៈគ្រាប់បាល់របស់ Ibtissam Jraidi តាំងពីនាទីទី ៦។ នៅក្នុងពូល H នេះកូឡុំប៊ីមាន ៦ ពិន្ទុពេញ តាមពីក្រោយដោយអាល្លឺម៉ង់ និងម៉ារ៉ុកមាន ៣ ពិន្ទុដូចគ្នាខណៈ កូរ៉េមាន ០ ពិន្ទុ៕ អត្ថបទ៖នាង សុភាវុធ

Manchester United ព្រមព្រៀងតម្លៃ ៧២ លានផោននាំយក Rasmus Hojlund ពី Atalanta

ក្លិបបិសាចក្រហម Manchester United បានឈានដល់កិច្ចព្រមព្រៀងហើយក្នុងការនាំយកខ្សែប្រយុទ្ធដាណឺម៉ាក Rasmus Hojlund ពីក្លិបអ៊ីតាលី Atalanta ក្នុងតម្លៃ ៧២ លានផោន នេះបើតាមការចុះផ្សាយរបស់សារព័ត៌មានធំៗ នៅអង់គ្លេស។កីឡាករវ័យ ២០ ឆ្នាំរូបនេះ បានព្រមព្រៀងក្នុងតម្លៃ ៧២ លានផោន កិច្ចសន្យា ៥ ឆ្នាំអមជាមួយជម្រើសបន្តបន្ថែមមួយឆ្នាំទៀត។ Rasmus Hojlund នឹងក្លាយជាកីឡាករដែលមានតម្លៃផ្ទេរខ្ពស់បំផុតទី ៦ ក្នុងប្រវត្តិសាស្រ្តរបស់ Manchester United និងក្លាយជាកីឡាករទី ៣ ដែលមកកាន់ Old Trafford រដូវក្តៅនេះបន្ទាប់ពី Mason Mount ពី Chelsea និងអ្នកចាំទី Andre Onana ពី Inter Milan។Hojlund ដែលធ្លាប់លេងនៅក្លិបដាណឺម៉ាក FC Copenhagen និងក្លិបអូទ្រីស Sturm Graz ទើបបានផ្លាស់ទៅកាន់ Atalanta នៅពេលចាប់ផ្តើមរដូវកាល ២០២២-២៣ ប៉ុណ្ណោះ។ រដូវកាលដំបូងរបស់កីឡាករវ័យ ២០ ឆ្នាំរូបនេះ ស៊ុតបញ្ចូលទីបាន ៩ គ្រាប់ក្នុងការបង្ហាញខ្លួន ៣២ លើក៕ អត្ថបទ៖ នាង សុភាវុធ

Max Verstappen បន្តឈ្នះ ៨ ទីលានជាប់គ្នាក្រោយជ័យជំនះនៅប៊ែលហ្ស៊ិក

អ្នកការពារតំណែងជើងឯក Formula One ពិភពលោក Max Verstappen នៅតែបន្តជ័យជំនះរបស់ខ្លួន ៨ ទីលានជាប់គ្នាក្រោយឈ្នះការប្រកួត F1 នៅប្រទេសប៊ែលហ្ស៊ិកកាលពីថ្ងៃអាទិត្យ។ នេះជាការប្រកួតចុងក្រោយរបស់ F1 មុនសម្រាប់រដូវក្តៅ ខណៈដែល Max Verstappen នៅពេលនេះកាន់ ១២៥ ពិន្ទុមិត្តរួមក្រុម Red Bull កីឡាករម៉ិកស៊ិក Sergio Perez មុនសម្រាកលំហែរកាយរដូវក្តៅរបស់ខ្លួន។ ជើងឯកពិភពលោក ២ សម័យរូបនេះបានមកដល់ទីព្រ័ត្រដោយវ៉ាផុតមិត្តរួមក្រុម Sergio Perez ខណៈ Red Bull បញ្ចប់ការប្រកួតដោយចំណាត់ថ្នាក់លេខ ១ និងលេខ ២។ កីឡាកររបស់ Ferrari, Charles Leclerc ទទួលបានតំណែងក្រោយគេនៃវេទិកាកិត្តិយសក្រោយមកដល់ទីព្រ័ត្រចំណាត់ថ្នាក់លេខ ៣ តាមពីក្រោយដោយ Lewis Hamilton និង Fernando Alonso។Formula One នឹងសម្រាកស្ទើរពេញមួយខែ មុនត្រលប់មកវិញនៅថ្ងៃទី ២៧ ខែសីហានៅប្រទេសហូឡង់ដែលជាទឹកដីរបស់ Max Verstappen៕ អត្ថបទ៖នាង សុភាវុធ

បាល់ទះមហាផ្ទៃ ឈ្នះមេដាយមាស World Police ខណៈកីឡា ៣ប្រភេទទៀត ឈ្នះមេដាយ ១៧គ្រឿង

ក្រុមកីឡានគរបាលជាតិកម្ពុជា ដណ្ដើមបានមេដាយសរុប ១៨គ្រឿងហើយ ក្រោយដំណើរការប្រកួតបាន ២ថ្ងៃ ក្នុងព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោក លើកទី២០ ឆ្នាំ២០២៣ (The 20th World Police & Fire Games 2023) នាទីក្រុង Winnipeg ប្រទេសកាណាដា កាលពីចុងសប្ដាហ៍កន្លងទៅ ខណៈក្រុមបាល់ទះក្រសួងមហាផ្ទៃ ដណ្ដើមបានមេដាយមាស ក្រោយយកឈ្នះគូប្រជែង ៨ប្រកួតជាប់ៗគ្នា ។សម្រាប់ការចូលរួមលើកដំបូងក្នុងព្រឹត្តិការណ៍កីឡានគរបាលពិភពលោកនេះ ក្រុមបាល់ទះក្រសួងមហាផ្ទៃ ដែលតំណាងក្រុមកីឡានគរបាលជាតិកម្ពុជា ធ្វើបានយ៉ាងល្អ ដោយវគ្គជម្រុះ បានយកឈ្នះក្រុមម្ចាស់ផ្ទះ Thunder ២-០សិត, ឈ្នះក្រុម NYPD Finest ២-០សិត, ឈ្នះក្រុម United Volleyball USA របស់អាមេរិក ២-០សិត, ឈ្នះក្រុម Winnipeg Golden Boys របស់កាណដា ២-០សិត, ឈ្នះក្រុម CBMDF ២-០សិត និងបន្ដឈ្នះក្រុមកាណាដា Team BC ២-០សិត ។ជ័យជម្នះ ៦ប្រកួតផ្ទួនៗនេះ នាំឲ្យក្រុមបាល់ទះក្រសួងមហាផ្ទៃ ឡើងវគ្គពាក់កណ្ដាលផ្ដាច់ព្រ័ត្រ ហើយបន្ដយកឈ្នះក្រុម PMFC របស់ប្រេស៊ីល ដោយលទ្ធផល ២-០សិត ដើម្បីកក់កៅអីវគ្គផ្ដាច់ព្រ័ត្រ ដោយជួបក្រុម CBMDF ជាថ្មី ខណៈក្រុមបាល់ទះក្រសួងមហាផ្ទៃ នៅតែរក្សាកំណត់ត្រាដ៏ល្អរបស់ខ្លួន ដោយបន្ដយកឈ្នះក្រុមប្រេស៊ីលនេះ ក្នុងលទ្ធផល ៣-០សិត ដើម្បីគ្រងមេដាយមាសលើវិញ្ញាសាបាល់ទះបុរសក្នុងសាលតែម្ដង ។ក្រឡេកទៅកីឡា ៣ប្រភេទៀត ដែលក្រុមកីឡានគរបាលជាតិកម្ពុជា ដណ្ដើមបានមេដាយ គឺកីឡាចំបាប់ វាយកូនឃ្លីលើតុ និងកីឡាហែលទឹក ដែលដណ្ដើមបានមេដាយសរុប ១៧គ្រឿង ក្នុងនោះកីឡាចំបាប់ ដណ្ដើមបានមេដាយមាស ៣ និងប្រាក់ ៤, កីឡាវាយកូនឃ្លីលើតុ ដណ្ដើមបានមេដាយមាស ២ និងប្រាក់ ៣ និងកីឡាហែលទឹក ឈ្នះមេដាយមាស ៣ និងប្រាក់ ២។ សរុបលទ្ធផលបណ្ដោះអាសន្ន ក្រោយដំណើរការប្រកួតបាន ២ថ្ងៃ គឺកម្ពុជាឈ្នះមេដាយចំនួន ១៨គ្រឿង (មាស ៩ និងប្រាក់ ៩គ្រឿង) ។គួរដឹងថា ព្រឹត្តិការណ៍ The 20th World Police and Fire Games 2023 នៅកាណាដា ចាប់ប្រកួតពីថ្ងៃទី២៨ ខែកក្កដា រហូតដល់ថ្ងៃទី០៦ ខែសីហា ឆ្នាំ២០២៣ ដោយមានអត្តពលិកជានគរបាលជាង ៧០ប្រទេសចូលរួម ក្នុងនោះក៏មានក្រុមកីឡានគរបាលជាតិចំនួន ១៣ប្រភេទកីឡាចូលរួមដែរ ៕ អត្ថបទ លីឈុនឡា

កីឡាការិនីហូឡង់ Demi Vollering គ្រងជើងឯកប្រណាំងកង់ Tour de France នារី

កីឡាការិនីប្រណាំងកង់ហូឡង់ Demi Vollering បានក្លាយជាជើងឯកនៃការប្រកួតប្រណាំងកង់ Tour de France ផ្នែកនារីជាលើកដំបូងក្នុងអាជីព បន្ទាប់ពីទទួលបានចំណាត់ថ្នាក់លេខ ២ នៅ ដំណាក់កាលចុងក្រោយថ្ងៃអាទិត្យម្សិលមិញនៅទីក្រុង Pau ប្រទេសបារាំង។ ដំណាក់កាលចុងក្រោយដែលមានចំងាយផ្លូវត្រឹម ២២.៦ គីឡូម៉ែត្រ ជាដំណាក់កាលប្រណាំងយកថេរវេលាផ្ទាល់ខ្លួន កីឡាការិនីស្វ៊ីស Marlen Reusser ជាអ្នកឈ្នះដោយប្រើវេលាតិចជាងគេត្រឹម ២៩ នាទី ១៥ វិនាទី តាមពីក្រោយដោយកីឡាករ Demi Vollering របស់ក្រុម SD Worx យឺតជាង ១០ វិនាទី និងលេខ ៣ ក្នុងដំណាក់កាលបានទៅកីឡាការិនីប៊ែលហ្ស៊ិក Lotte Lopecky យឺតជាង ៣៨ វិនាទី។ Lotte Kopecky ដែលនាំមុខស្ទើរគ្រប់ដំណាក់កាលនោះ បានខាតបង់ពេលវេលាច្រើននៅដំណាក់ចុងក្រោយនេះ ដែលធ្វើឱ្យបាត់បង់ជើងឯកទៅកាន់ Demi Vollering ដែលតែងតែតាមពីក្រោយប្រកៀកប្រកិតកន្លងមក ខណៈ Kopecky បានត្រឹមខកចិត្តត្រឹមជាជើងឯករង។ លេខ ៣ បានទៅកីឡាការិនីប៉ូឡូញ Katarzyna Niewiadoma ខណៈលេខ ៤ បានទៅអ្នកការពារតំណែងជើងឯក កីឡាការិនីហូឡង់វ័យ ៤០ឆ្នាំ Annemiek van Vleuten ដែលបានប្រកាសចូលនិវត្តន៍នៅដំណាច់រដូវកាលនេះ៕ អត្ថបទ៖នាង សុភាវុធ

ជប៉ុន និងអេស្ប៉ាញឡើងវគ្គ១៦ក្រុមចុងក្រោយ បាល់ទាត់នារីជើងឯកពិភពលោក

ក្រុមបាល់ទាត់នារីជប៉ុនបានកក់កៅអីនៅវគ្គ ១៦ ក្រុមចុងក្រោយហើយនៃព្រឹត្តិការណ៍បាល់ទាត់នារីជើងឯកពិភពលោកក្រោយជ័យជំនះលើក្រុមនារីកូស្តារីកា ២-០។ Hikaru Naomoto និង Aoba Fujino រកបានម្នាក់មួយគ្រាប់នៅក្នុងវគ្គទី ១ ឱ្យក្រុមជើងឯកឆ្នាំ ២០១១ មួយនេះ ឡើងវគ្គបន្តទោះបីនៅសល់មួយប្រកួតចុងក្រោយនៅក្នុងពូល C នេះក៏ដោយ។ ការកក់កៅអីនៅវគ្គ ១៦ ក្រុមចុងក្រោយរបស់ជប៉ុន ក៏អាស្រ័យដោយក្រុមអេស្ប៉ាញឈ្នះហ្សាំប៊ីផងដែរនៅក្នុងពូល C នេះ។ កីឡាការិនី Jenni Hermoso និង Alba Redondo រកបានម្នាក់ពីរគ្រាប់ដូចគ្នាឱ្យអេស្ប៉ាញ ខណៈមួយគ្រាប់ទៀត ធ្វើបានដោយ Teresa Abelleira ដែលជាអ្នកបើកការនាំមុខ។ ជ័យជំនះរបស់ជប៉ុន និងអេស្ប៉ាញ ធ្វើឱ្យក្រុមទាំងពីរមាន ៦ ពិន្ទុដូចគ្នានៅក្នុងពូល C នេះកក់កៅអីនៅវគ្គ ១៦ ក្រុមចុងក្រោយមុនគេ ខណៈក្រុមកូស្តារីកា និងហ្សាំប៊ីក្លាយជាក្រុមដែលធ្លាក់មុនគេផងដែរក្នុងព្រឹត្តិការណ៍។ ជប៉ុន និងអេស្ប៉ាញ នឹងត្រូវជួបគ្នាប្រកួតចុងក្រោយក្នុងពូលនៅថ្ងៃទី ៣១ ខែកក្កដាដើម្បីដឹងថាក្រុមណាលេខ១ ក្នុងពូល។ ចំណែកការប្រកួតចុងក្រោយគេនៅថ្ងៃពុធម្សិលមិញ ជាការប្រកួតនៅក្នុងពូល B កាណាដារកបានបីពិន្ទុដំបូងរបស់ខ្លួន និងជាជ័យជំនះដែលធ្វើឱ្យក្រុមនារីអៀកឡង់ធ្លាក់ពីការប្រកួតផងដែរ។ អៀកឡង់បើកការនាំមុខមុនតាំងពីនាទីទី ៤ ដោយប្រធានក្រុម Katie McCabe តែត្រូវកាណាដាវាយបកវិញតាមរយៈគ្រាប់បាល់ចូលទីខ្លួនឯងរបស់ខ្សែការពារ Megan Connolly និងគ្រាប់បាល់ជ័យជំនះនៅវគ្គទី ២ ដោយ Adriana Leon។ នេះជាជ័យជំនះរបស់កាណាដាក្រោយស្មើនីហ្ស៊េរីយ៉ាប្រកួតទី ១ និងឡើងឈរលើគេក្នុងពូលបណ្តោះអាសន្នមាន ៤ពិន្ទុ៕ អត្ថបទ៖នាង សុភាវុធ

កីឡាការិនីអូស្រ្តាលី O’Callaghan បំបែកកំណត់ត្រាហែលសេរី ២០០ ម៉ែត្រនៅការប្រកួតហែកទឹកពិភពលោក

កីឡាការិនីហែលទឹកអូស្រ្តាលី Mobile O’Callaghan បានបំបែកកំណត់ត្រាបានបំបែកកំណត់ត្រាពិភពលោកហែលចំងាយ ២០០ ម៉ែត្រ បែបសេរី តាមរយៈជ័យជំនះនៅព្រឹត្តិការណ៍ហែលទឹកជើងឯកពិភពលោកនៅប្រទេសជប៉ុន។ Mobile O’Callaghan បានចំណាយពេល ១ នាទី ៥២ វិនាទី ៨៥ ដើម្បីឈ្នះមេដាយមាស និងបំបែកកំណត់ត្រា១ នាទី ៥២ វិនាទី ៩៨ ដែលមានអាយុកាល ១៤ ឆ្នាំធ្វើបានដោយកីឡាការិនីអ៊ីតាលី Federica Pellegrini នៅក្នុងការប្រកួតជើងឯកពិភពលោកផងដែរនៅទីក្រុងរ៉ូមកាលពីឆ្នាំ២០០៩។ កីឡាការិនីអូស្រ្តាលីមួយរូបទៀត Ariarne Titmus ទទួលបានមេដាយប្រាក់ក្នុងវិញ្ញាសារនេះ ខណៈកីឡាការិនីកាណាដា Summer McIntosh ទទួលបានមេដាយសំរិទ្ធ៕ អត្ថបទ៖នាង សុភាវុធ

Isco សម្រេចចិត្តរួមជាមួយ Real Betis ក្រោយចាកចេញពី Sevilla

ខ្សែបម្រើអេស្ប៉ាញ Isco បានសំរេចចិត្តរួមជាមួយក្លិបបាល់ទាត់ Real Betis ហើយក្រោយចាកចេញពី Sevilla ដោយទទួលបានកិច្ចសន្យា ១ ឆ្នាំ។កីឡាករវ័យ ៣១ ឆ្នាំរូបនេះនៅទំនេរពីអាជីពបាល់ទាត់របស់ខ្លួនតាំងពីបញ្ចប់កិច្ចសន្យាជាមួយ Sevilla កាលពីខែធ្នូ ពោលគឺ ៤ ខែបន្ទាប់ពីចុះកិច្ចសន្យា។ Isco ដែលបង្ហាញខ្លួនឱ្យក្រុមជម្រើសជាតិអេស្ប៉ាញបាន ៣៨ លើក បានស៊ុតបញ្ចូលទី ១ គ្រាប់ក្នុងការបង្ហាញខ្លួន ១៩ ប្រកួតឱ្យ Sevilla។អ្នកគាំទ្រជាង ១ ម៉ឺននាក់បានចូលរួមពិធីបង្ហាញ Isco ពេលទៅ Sevilla កាលពីខែសីហាឆ្នាំមុន មុនពេលដែលគ្រូបង្វឹក Julen Lopetegui ត្រូវបានដកតំណែងនៅខែតុលា។Isco បានផ្លាស់ទៅកាន់ Sevilla បន្ទាប់ពី ៩ ឆ្នាំដ៏ជោគជ័យជាមួយ Real Madrid ដែលរួមមានឈ្នះជើងឯក UEFA Champions League ៥ លើក La Liga ៣ លើក។ Isco ធ្លាប់ស៊ុតបញ្ចូលទីសរុប ៥៣ គ្រាប់ក្នុងការបង្ហាញខ្លួន ៣៥៣ ប្រកួតឱ្យ Real Madrid៕ អត្ថបទ៖នាង សុភាវុធ

Jordan Henderson ចេញវិដេអូលាអ្នកគាំទ្រ Liverpool ទៅចលរួមជាមួយ Al-Ettifaq

ខ្សែបម្រើអង់គ្លេស Jordan Henderson បានបញ្ជាក់ពីការចាកចេញពី Liverpool ក្រោយចំណាយពេល ១២ ឆ្នាំ ដើម្បីចូលរួមជាមួយក្លិបអារ៉ាប៊ីសាអ៊ូឌីត Al-Ettifaq។កីឡាករវ័យ ៣៣ ឆ្នាំរូបនេះបានសំរេចផ្លាស់ទៅក្លិបនៅ Saudi Pro League មួយនេះក្នុងតម្លៃផ្ទេរដែលគេរំពឹងថា ១២លានផោន។Jordan Henderson បានបង្ហោះវីដេអូលាអ្នកគាំទ្រ Liverpool នៅលើបណ្តាញសង្គម Instagram របស់ខ្លួន ដោយនិយាយថា Liverpool ជាក្លិបដែលធ្វើឱ្យរូបគេមានអាជីពបាល់ទាត់ដ៏ល្អមួយ Liverpool នឹងស្ថិតក្នុងចិត្តរហូតដល់ថ្ងៃស្លាប់។ Jordan Henderson ផ្លាស់មកកាន់ Liverpool កាលពីខែមិថុនាឆ្នាំ ២០១១ ក្នុងតម្លៃ ២០ លានផោនពី Sunderland បង្ហាញខ្លួនសរុប ៤៩១ ប្រកួតរកបាន ៣៣ គ្រាប់ និង ៥៨ បាល់បញ្ជូន ជួយ Liverpool ឈ្នះជើងឯក UEFA Champions League, English Premier League, FA Cup, League Cup, UEFA Super Cup និង FIFA Club World Cup ផងដែរ៕ អត្ថបទ៖នាង សុភាវុធ

កម្ពុជា ចាញ់ហ្សកដានី ទាំងប្រផិតប្រផើយ ក្នុងជំនួបបើកឆាក Davis Cup 2023

ក្រុមកីឡាវាយកូនបាល់ជម្រើសជាតិកម្ពុជា បានរងបរាជ័យទាំងប្រផិតប្រផើយ ក្រោមថ្វីដៃក្រុមជម្រើសជាតិហ្សកដានី ដោយលទ្ធផល ២-១ ក្នុងជំនួបបើកឆាកពូលB នៃព្រឹត្តិការណ៍វាយកូនបាល់ពិភពលោក Davis Cup Group III ឆ្នាំ២០២៣ ប្រចាំតំបន់អាស៊ី/អូសេអានី នៅប្រទេសស្រីលង្ការ កាលពីថ្ងៃទី២៦ ខែកក្កដាម្សិលមិញ ។ការប្រកួតដំបូងនេះ សម្រាប់វិញ្ញាសាឯកត្ដជន កីឡាករកម្ពុជា បានចាញ់ទាំង ២នាក់ ក្នុងនោះ ទេព ធីម៉ូធី បានចាញ់កីឡាករ Mohammad Alkotop ក្នុងពិន្ទុ ០-៦ និង ៤-៦ និងកីឡាករ ឡេង សារិនរាជ ចាញ់កីឡាករ Karam Hatamleh ក្នុងពិន្ទុដ៏ប្រកៀកប្រកិត ៦-៧ និង ៣-៦ ។ ប៉ុន្ដែវិញ្ញាសាវាយគូ កម្ពុជា ដែលមានកីឡាករ ឡុង សំនៀង ចាប់ដៃជាមួយសិស្សប្អូន ទេព ធីម៉ូធី បានយកឈ្នះក្រុមហ្សកដានីវិញ ក្នុងពិន្ទុ ៦-៣, ១-៦ និង ១០-៦ ។គួរដឹងថា យុទ្ធនាការប្រកួត Davis Cup Group III ដែលប្រទេសស្រីលង្ការទទួលធ្វើម្ចាស់ផ្ទះឆ្នាំនេះ គឺក្រុមកម្ពុជា ស្ថិតក្នុងពូលB ជាមួយក្រុមប៉ាស៊ីហ្វិចអូសេអានី, ហ្សកដានី និងម៉ាឡេស៊ី ខណៈពូលA មានម្ចាស់ផ្ទះស្រីលង្កា, អារ៉ាប់ប៊ីសាអ៊ូឌីត, អ៊ីរ៉ង់ និងវៀតណាម ។ សម្រាប់ប្រកួតបន្ទាប់ ក្រុមកីឡាវាយកូនបាល់កម្ពុជា នឹងត្រូវជួបក្រុមប៉ាស៊ីហ្វិចអូសេអានី ដែលជាក្រុមជម្រុះមកពី Group II កាលពីឆ្នាំមុន នៅរសៀលថ្ងៃទី២៧ ខែកក្កដា ឆ្នាំ២០២៣ នេះ៕ អត្ថបទ លី ឈុនឡា