BTV NEWS

Eddie Howe លាលែងពីតំណែងអ្នកចាត់ការក្លិប Newcastle United ក្រោយដឹកនាំអស់រយៈពេល ៥ ឆ្នាំ

Chelsea ប្រកាសផ្ទេរ Maxence Lacroix ពី Crystal Palace តម្លៃ ៥២ លានផោន ជាមួយកិច្ចសន្យាដល់ឆ្នាំ២០៣២

អតីតគ្រូបង្វឹកក្រុមជម្រើសជាតិកូរ៉េ Hong Myung-bo សុំទោសក្រោយធ្លាក់ពី World Cup

តើការធ្វើពហិការរបស់ UEFA អាចមានផលប៉ះពាល់អ្វីខ្លះដល់ FIFA?

ព័ត៌មានកីឡា

អាជ្ញាធរកីឡាខេត្តកំពង់ធំគាំទ្រការរៀបចំពានយុវជន AIA-ISF Youth League លើទឹកដីខ្លួន

បាល់ទាត់៖ លោក ឃឹម ស្រេង ប្រធានការិយាល័យអប់រំកាយ និងកីឡានៃមន្ទីរអប់រំ យុវជន និងកីឡាខេត្តកំពង់ធំ បានបង្ហាញការស្វាគមន៍ និងគាំទ្រជាខ្លាំងចំពោះការរៀបចំពានរង្វាន់យុវជន AIA-ISF Youth League ឆ្នាំ២០២៣ លើទឹកដីខ្លួន ដើម្បីផ្ដល់ឱកាសឲ្យយុវជន និងកុមារបានចូលរួមលេងកីឡា ស្របតាមគោលនយោបាយរបស់រាជរដ្ឋាភិបាល។ការលើកឡើងនេះ បន្ទាប់ពីអង្គការផ្កាយសមុទ្រ និងក្រុមហ៊ុន AIA Cambodia បានរៀបចំការប្រកួតវិលជុំកុមារ និងយុវជន AIA-ISF Youth League ឆ្នាំ២០២៣ កាលពីថ្មីៗដោយមានកីឡាករ-កីឡាការិនីដែលជាកុមារ និងយុវជនសរុបចំនួន ៣៦០នាក់មកពី ៣០ក្រុមបានជួបជុំគ្នាលេងយ៉ាងសប្បាយរីករាយ នៅទីលានហ្វូតសាលក្លិបអាចារ្យលាក់ ទីរួមខេត្តកំពង់ធំ។ លោកថា ការប្រកួតនេះគឺជារួមចំណែកមួយដើម្បីជំរុញឲ្យយុវជន និងកុមារចាប់ផ្ដើមលេងកីឡា ដើម្បីក្លាយជាពលរដ្ឋមានសុខភាពល្អ ទាំងផ្លូវការ និងបញ្ញាស្មារតី ក្រោយទំនេរពីការសិក្សា ស្របតាមកំណែទម្រង់របស់ក្រសួងអប់រំ យុវជន និងកីឡា ក៏ដូចជារាជរដ្ឋាភិបាល ដែលបានដាក់ចេញនូវយុទ្ធនាការប្រជាជនម្នាក់ត្រូវចេះលេងកីឡាមួយប្រភេទប្រចាំជីវិត។លោក យិន សាមឌី ប្រធានគ្រប់គ្រងកម្មវិធីបាល់ទាត់នៃអង្គការផ្កាយសមុទ្របានឲ្យដឹងថា ដោយមានការឧបត្ថម្ភគាំទ្រពីដៃគូទើបជំរុញឲ្យមានការប្រកួតនេះកើតឡើង ហើយលោកបានសម្ដែងនូវសេចក្ដីរីករាយជាខ្លាំង ដែលដំណើរការប្រកួតជុំទី២ នៅខេត្តកំពង់ធំ បន្ទាប់ពីរាជធានីភ្នំពេញមានកុមារ និងយុវជនចូលរួមប្រកួតយ៉ាងច្រើនកុះករ។ គួរដឹងថា ព្រឹត្តិការណ៍បាល់ទាត់កុមារ និងយុវជននេះគឺមាន ២រាជធានី-ខេត្ត ពោលគឺរាជធានីភ្នំពេញ និងខេត្តកំពង់ធំ។ ក្រោយបញ្ចប់ការប្រកួតជម្រុះតាមតំបន់នេះរួច សម្រាប់ក្រុមទទួលបានជ័យជម្នះតាមកម្រិតអាយុនីមួយៗ នឹងត្រូវចូលរួមប្រកួតវគ្គផ្ដាច់ព្រ័ត្រ AIA-ISF Grand Championship នាខែឧសភា ឆ្នាំ២០២៣ ខាងមុខ៕អត្ថបទ៖ លី ឈុនឡា

Barcelona និង Manchester United បានត្រឹមស្មើ ២-២ ជើងទី១ វគ្គ Play-Off Europa League

បាល់ទាត់៖ ជំនួបជើងទី១ វគ្គ Play-Off UEFA Europa League រវាងក្រុមម្ចាស់ផ្ទះ FC Barcelona ទទួលស្វាគមន៍បិសាចក្រហម Manchester United បានបញ្ចប់ត្រឹមលទ្ធផលស្មើគ្នា ២-២ ប៉ុណ្ណោះ។ ក្រុមរបស់លោក Erik ten Hag ត្រូវបានគេមើលឃើញថា ជាក្រុមមានប្រៀបក្នុងការប្រកួតនេះតែអ្នកចាំទី Barcelona, Marc Andre ter Stegen បានជួយសង្គ្រោះគ្រាប់បាល់សំខាន់ៗ ៣លើកក្នុងវគ្គទី១។ ក្រុមទាំងពីរត្រូវរង់ចាំដល់វគ្គទី២ ទើបអាចរកគ្រាប់បាល់បាន ពោលគឺអតីតខ្សែការពារ Chelsea, Marcos Alonso ជាអ្នកតែតនាំមុខឱ្យ Barcelona នាំមុខមុនដោយបាល់ជ្រុងពី Raphinha នាទីទី៥០ តែភ្លាមៗ Manchester United ក៏តាមស្មើវិញដោយ Marcus Rashford នាទីទី៥២។ បន្ទាប់ពីតាមស្មើ Marcus Rashford សាជាថ្មីជាអ្នកបង្កើតឱ្យមានគ្រាប់បាល់ទី២ នាំមុខវិញនៅពេលបោះកាត់ផ្លាតនឹង Jules Kounde ចូលទីខ្លួនឯង។ យ៉ាងណាក្តីក្រុមរបស់លោក Xavi ក៏តាមស្មើវិញដោយ Raphinha នៅនាទីទី៧៦។ ក្រុមទាំងពីរនឹងមានតែមួយប៉ុណ្ណោះឡើងទៅវគ្គ ១៦ក្រុមចុងក្រោយ UEFA Europa League បន្ទាប់ពីការប្រកួតជើងទី២ នៅទឹកដី Old Trafford សប្តាហ៍ក្រោយ តែ Barcelona មានបញ្ហារបួសខ្សែបម្រើ Pedri ដែលផ្លាស់ប្តូរចេញនៅវគ្គទី១ និង Gavi ទទួលបានកាតលឿងដែលនឹងត្រូវអវត្តមាននៅជើងទី២៕អត្ថបទ៖នាង សុភាវុធ

ឯកឧត្តម វ៉ាត់ ចំរើន៖ កីឡាករ-កីឡាការិនីហាត់នៅចិនមានភាពរីកចម្រើនគួរឲ្យកត់សម្គាល់

ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានឲ្យដឹងថា កីឡាករ-កីឡាការិនីជាង ១៦០នាក់លើ ១២ប្រភេទកីឡាដែលកំពុងបោះជំរំហ្វឹកហាត់នៅប្រទេសចិន មានភាពរីកចម្រើនគួរឲ្យកត់សម្គាល់ ដើម្បីត្រៀមការប្រកួតកីឡាស៊ីហ្គេមនាខែឧសភាខាងមុខ។ ការលើកឡើងនេះ បន្ទាប់ពីឯកឧត្តមបានដឹកនាំប្រតិភូគណៈកម្មាធិការជាតិ CAMSOC ធ្វើដំណើរទស្សនកិច្ច និងត្រួតពិនិត្យការហ្វឹកហាត់នៅប្រទេសចិនកាលពីថ្មីៗ ក្រោយទទួលបានការអនុញ្ញាតដ៏ខ្ពង់ខ្ពស់ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC។ ឯកឧត្តមបានដឹងថា កីឡាករ-កីឡាការិនីទាំងអស់កំពុងខិតខំហ្វឹកហាត់យ៉ាងសស្រាក់សស្រាំ ក្រោមការយកចិត្តទុកដាក់ខ្ពស់របស់ភាគីមិត្ដចិន ដែលធ្វើឲ្យកម្រិតបច្ចេកទេសមានការវិវឌ្ឍន៍ល្អប្រសើរ ខណៈការរស់នៅទីនោះមានលក្ខណៈប្រសើរ រួមទាំងម្ហូបអាហារផងដែរ។ ដូច្នេះសម្រាប់ពេលវេលាសេសសល់ ឯកឧត្តមរំពឹងថា ពួកគេនឹងបង្កើនគុណផលកាន់តែខ្ពស់ ដើម្បីត្រៀមប្រជែងស៊ីហ្គេមនៅកម្ពុជា។ គួរដឹងថា ការបោះជំរំហ្វឹកហាត់រយៈពេលវែងនេះ ធ្វើឡើងក្រោមជំនួយឥតសំណងរបស់រាជរដ្ឋាភិបាល និងប្រជាជនចិនដល់ក្រុមជម្រើសជាតិកម្ពុជា ក្រោមកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលចិន។ គោលដៅសំខាន់នៃការហ្វឹកហាត់នេះគឺដើម្បីត្រៀមស៊ីហ្គេមឆ្នាំ២០២៣ ហើយបន្ទាប់ពីចប់ព្រឹត្តិការណ៍ប្រវត្តិសាស្ដ្រនៅកម្ពុជា កីឡាករ-កីឡាការិនីទាំងអស់នោះនឹងត្រឡប់ទៅហ្វឹកហាត់នៅចិនបន្ដទៀត រហូតចប់កិច្ចព្រមព្រៀងរយៈពេល ២ឆ្នាំដែលភាគីទាំងពីរបានឯកភាពគ្នា៕ អត្ថបទ៖ លី ឈុនឡា

ប្រាក់ មុន្នីឧត្តម ក៏ដូចជាគ្រូបង្វឹក និងកីឡាករផ្សេងៗទៀតថ្លែងអំណរគុណចំពោះការយកចិត្តទុកដាក់របស់សម្តេចតេជោ

បាល់ទាត់៖ ដោយមើលឃើញនូវការលំបាកជុំវិញបញ្ហារបួសស្នាម លើកីឡាករនៅពេលហ្វឹកហាត់ និងការប្រកួត សម្តេចតេជោ ហ៊ុន សែន បានចាត់ឱ្យក្រសួងសុខាភិបាល រៀបចំទីកន្លែងសម្រាប់ព្យាបាលកីឡាករ-កីឡាការិនីនៅមន្ទីរពេទ្យជាតិតេជោសន្តិភាព ដែលមានចំនួនគ្រែពី ១០០ ទៅ ២០០គ្រែ ហើយការព្យាបាលមិនតម្រូវឲ្យមានការបង់ប្រាក់ និងត្រូវមានឯកទេសគ្រប់គ្រាន់ស្របតាមស្ថានភាពរបួស ជុំវិញសាររបស់សម្តេចតេជោនេះបានធ្វើឱ្យកីឡាករ គ្រូបង្វឹក ថ្លែងអំណរគុណ និងដឹងគុណសម្តេចតេជោចំពោះទឹកចិត្តដ៏ល្អប្រពៃរបស់សម្តេច។តំណាងកីឡាករ-កីឡាការិនីប្រភេទកីឡាវ៉ូវីណាមបញ្ចេញទស្សនៈស្រដៀងៗគ្នាថា ពួកគេពិតជាសប្បាយរីករាយណាស់ចំពោះទឹកចិត្តដ៏ល្អប្រពៃរបស់សម្តេចតេជោ ព្រោះការហ្វឹកហាត់ និងការប្រកួតសម្រាប់កីឡាករម្នាក់ៗគេចមិនផុតពីមានរបួសស្នាមទេ ហើយកន្លងមកការព្យាបាលបានធ្វើឱ្យកីឡាករជួបបញ្ហាមួយចំនួន ហើយជាការតបស្នង ពួកយើងប្តេជ្ញាខិតខំហ្វឹកហាត់បន្ថែមទៀត ដើម្បីប្រកួតយកមេដាយឱ្យបានច្រើនសម្រាប់ព្រឹត្តិការណ៍កីឡាស៊ីហ្គេម។អតីតកីឡាករបាល់ទាត់ជម្រើសជាតិកម្ពុជា ប្រាក់ មុន្នីឧត្តម ក៏បង្ហាញក្តីរីករាយចំពោះទឹកចិត្តដែលមិនអាចកាត់ថ្លៃបានរបស់សម្តេចតេជោ ត្បិតខ្លួនធ្លាប់ជួបបញ្ហារបួស។ គួរបញ្ជាក់ថា ព្រឹត្តិការណ៍កីឡាស៊ីហ្គេមដែលកម្ពុជាធ្វើម្ចាស់ផ្ទះនៅសល់ជាង ៧០ថ្ងៃទៀតប៉ុណ្ណោះនឹងចាប់ផ្តើមជាផ្លូវការហើយ៕អត្ថបទ៖ គង់ រ៉េន

កីឡាតុងហ្គីលម៉ូដូបើកការប្រកួតជើងឯកថ្នាក់ជាតិឆ្នាំ២០២២

តុងហ្គីលម៉ូដូ៖ សហព័ន្ធកីឡាតុងហ្គីលម៉ូដូកម្ពុជា បានប្រកាសបើកការប្រកួតជ្រើសរើសជើងឯកប្រចាំឆ្នាំ២០២២ ដោយមានកីឡាករ-កីឡាការិនីចូលរួមសរុប ១៣៥នាក់មកពី ១៧ក្លិប និង ៤រាជធានី-ខេត្ត។ លោក ចំរើន សុផល អនុប្រធានសហព័ន្ធបានឲ្យដឹងថា ការប្រកួតនេះគ្រោងធ្វើឡើង ៤ថ្ងៃចាប់ពីថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៣ នៅទីលាន FFWPU-Cambodia ក្រោមការឧបត្ថម្ភគាំទ្ររបស់ក្រសួងអប់រំ យុវជន និងកីឡា។ ចំពោះការប្រកួតគឺមាន ៤វិញ្ញាសាធំរួមមានវិញ្ញាសាមេគុន សម្ដែងបច្ចេកទេស និងវិញ្ញាសាប្រយុទ្ធឯកត្តជនបុរស-នារី។ លោកថា ការប្រកួតប្រចាំឆ្នាំនេះត្រូវរៀបចំតាំងពីឆ្នាំ២០២២ ដោយសារបញ្ហាកូវីដទើបសហព័ន្ធសម្រេចពន្យាពេល តែយ៉ាងណាលោកបានវាយតម្លៃខ្ពស់ចំពោះការចូលរួមរបស់ក្លិប ក៏ដូចជាសិស្សគុន ហើយសង្ឃឹមថា ពួកគេនឹងខិតខំប្រឹងប្រែងឲ្យអស់ពីសមត្ថភាពដើម្បីដណ្ដើមជ័យជម្នះផង ក៏ដូចជាអភិវឌ្ឍន៍សមត្ថភាពបន្ថែមដើម្បីឈានទៅរកការប្រកួតប្រជែងលើឆាកអន្ដរជាតិផង៕អត្ថបទ៖ លី ឈុនឡា

សហព័ន្ធជាតិត្រូវគោរពគោលការណ៍ ៤ ដើម្បីនាំមកនូវមោទនភាពជាតិក្នុងនាមម្ចាស់ផ្ទះស៊ីហ្គេម

ស៊ីហ្គេម៖ មន្ដ្រីជំនាញនៃក្រសួងអប់រំ យុវជន និងកីឡាបានជំរុញឲ្យគ្រប់សហព័ន្ធកីឡាជាតិ ត្រូវគោរពឲ្យបាននូវគោលការណ៍ ៤ ដើម្បីធានាបាននូវជោគជ័យប្រកបដោយមោទនភាពជាតិ ក្នុងនាមម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ខាងមុខ។ នេះបើតាមការគូសបញ្ជាក់របស់លោក ប៊ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា ក្នុងពិធីបិទវគ្គសិក្ខាសាលាស្តីពីការរៀបចំផែនការយុទ្ធចូលសាស្ត្រស្វែងរកឧត្តមភាព ក្នុងការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅកម្ពុជាកាលពីថ្ងៃទី១៦ ខែកុម្ភៈម្សិលមិញ។ ក្រោយបញ្ចប់វគ្គនេះលោកបានកោតសរសើរ និងវាយតម្លៃខ្ពស់ចំពោះសិក្ខាកាម ជាអគ្គលេខាធិការ គ្រូ និងតំណាងសហព័ន្ធដែលបានចូលរួមវគ្គនេះ ហើយបានយកចិត្តទុកដាក់ ស្តាប់ និងយល់ដឹង ស្គាល់អំពីតួនាទី ភារកិច្ច សម្រាប់ស្វែងរកឧត្តមភាពមេដាយក្នុងព្រឹត្តិការណ៍ប្រវត្តិសាស្ដ្រលើកដំបូងនៅកម្ពុជា នាពេលឆាប់ៗខាងមុខ។លោកថា ការរៀបចំផែនការយុទ្ធចូលសាស្ត្រស្វែងរកឧត្តមភាព ក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ដើម្បីរៀបចំយុទ្ធសាស្ត្រយកប្រៀបដណ្តើមមេដាយត្រូវគោរពនូវយន្ដការមួយចំនួន រួមមានគោរពការចាត់តាំង គោរពវិន័យ សេចក្តីថ្លៃថ្នូរ និងនាំមកនូវជ័យជម្នះដែលធ្វើឲ្យទង់ជាតិកម្ពុជាត្រូវគេបង្ហូតឡើង ហើយត្រូវបានគេគោរពនោះហើយគឺជាមោទនភាពរបស់ជាតិ។ គួរដឹងថា សិក្ខាសាលារយៈពេល ៣ថ្ងៃនេះបានចាប់ផ្ដើមពីថ្ងៃទី១៤ ដល់ថ្ងៃទី១៦ ខែកុម្ភៈ ដោយមានសិក្ខាកាមចូលរួមសរុប ១៤៩នាក់ក្នុងនោះមានអគ្គលេខាធិការសហព័ន្ធ គ្រូបង្វឹក គ្រូជំនួយមកពីសហព័ន្ធកីឡាជាតិ និងក្រុមគ្រូកីឡាជនពិការ ដើម្បីពង្រឹងសមត្ថភាពក្នុងការរៀបចំយុទ្ធសាស្ត្រយកប្រៀបដណ្តើមមេដាយស៊ីហ្គេម និងអាស៊ានប៉ារ៉ាហ្គេម បន្ទាប់ពីស្ដាប់នូវបទបង្ហាញរបស់មន្ដ្រីជំនាញជាច្រើន ដែលរៀបចំដោយក្រសួងអប់រំ យុវជន និងកីឡា៕អត្ថបទ៖ លី ឈុនឡា

កីឡាជម្រើសជាតិមកពីក្រសួងការពារជាតិត្រៀមខ្លួនរួចជាស្រេច ដើម្បីចូលរួមប្រកួតកីឡាស៊ីហ្គេមដែលកម្ពុជាធ្វើជាម្ចាស់

ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការរៀបចំការប្រកួតកីឡាស៊ីហ្គេមកម្ពុជា(CAMSOC) បានថ្លែងថា កីឡាជម្រើសជាតិ ដែលមកពីមកពីក្រសួងការពារជាតិ និងមជ្ឈមណ្ឌលកីឡាកងយោធពលខេមរភូមិន្ទ បានត្រៀមខ្លួន និងធ្វើការហ្វឹកហាត់រួចជាស្រេច ដើម្បីចូលរួមប្រកួតប្រជែងកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជានឹងធ្វើជាម្ចាស់ផ្ទះនៅក្នុងខែឧសភា ឆ្នាំ២០២៣ខាងមុខនេះ។ថ្លែងប្រាប់អ្នកសារព័ត៌មានបន្ទាប់ពីអញ្ជើញចូលរួមជាអធិបតីភាព សម្ពោធដាក់អោយប្រើប្រាស់ជាផ្លូវការអគាររដ្ឋបាល សាលប្រជុំ និងគម្រោងវារីវប្បកម្មអាងបង្កាត់ពូជ និងភ្ញាស់ត្រី ក្រោមមូលនិធិសម្តេចពិជ័យសេនា ទៀ បាញ់ នាព្រឹកថ្ងៃទី១៦ ខែកុម្ភៈ ឆ្នាំ២០២៣នេះ សម្តេចពិជ័យសេនាទៀ បាញ់ បានលើកឡើងថា កីឡាស៊ីហ្គេមលើកទី៣២ និងប៉ារ៉ាហ្គេមឆ្នាំ២០២៣ នឹងរៀបចំឡើងក្រោមពាក្យស្លោក «កីឡារស់ក្នុងសន្តិភាព» ហើយកម្ពុជានឹងធ្វើជាម្ចាស់ផ្ទះការប្រកួតចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ និងចាប់ពីថ្ងៃទី៣ដល់ថ្ងៃទី៩ ខែមិថុនា ឆ្នាំ២០២៣។ ប្រតិភូកីឡាប្រហែល ១០,០០០ នាក់ រួមទាំងអត្តពលិក៧,០០០ នាក់ គ្រូបង្វឹក និងមន្ត្រីបច្ចេកទេសកីឡា ត្រូវបានរំពឹងថានឹងចូលរួមក្នុងព្រឹត្តិការណ៍នេះ ជាមួយនឹង៣៦ប្រភេទកីឡា។សម្តេចពិជ័យសេនា បានបញ្ជាក់បន្ថែមទៀតថា រាជធានី-ខេត្តចំនួន៥ ត្រូវបានកំណត់សម្រាប់ការប្រកួតកីឡា គឺរាជធានីភ្នំពេញ ខេត្តសៀមរាប ព្រះសីហនុ កែប និងកំពត ។សម្តេច បានបន្ថែមទៀតថា តាមការរំពឹងទុក រាជធានីភ្នំពេញនឹងធ្វើជាម្ចាស់ផ្ទះកីឡាជាច្រើនប្រភេទ ខេត្តសៀមរាបនឹងរៀបចំការប្រកួតកីឡាជិះកង់ រត់ម៉រ៉ាតុង,ខេត្តព្រះសីហនុ នឹងជាកន្លែងប្រកួតកីឡាម៉ូតូទឹក បាល់ទះឆ្នេរខ្សាច់ និងទូកក្តោង , កែបនឹងធ្វើជាម្ចាស់ផ្ទះកីឡាទ្រីអាត្លុង ហើយខេត្តកំពត នឹងរៀបចំការប្រកួតកីឡាទូក។សម្តេចប្រធានCAMSOC បានលើកឡើងទៀតថា នេះជាលើកទីមួយហើយសម្រាប់ប្រទេសកម្ពុជា ក្នុងនាមជាសមាជិកស្ថាបនិកមួយរូបក្នុងចំណោមសមាជិកស្ថាបនិកទាំងប្រាំមួយ ដែលរៀបចំព្រឹត្តិការណ៍កីឡាថ្នាក់តំបន់នេះ បន្ទាប់ពីរយៈពេល៦៤ឆ្នាំ។ សមិទ្ធផលនេះ គឺជាការកសាងទំនុកចិត្តបន្ថែមទៀតដល់អត្តពលិកកម្ពុជាឱ្យធ្វើបានល្អនៅស៊ីហ្គេមលើកទី៣២នា ឆ្នាំ២០២៣នេះ។សូមបញ្ជាក់ថា នៅថ្ងៃទី១៦ ខែកុម្ភៈ ឆ្នាំ២០២៣នេះ គឺនៅសល់តែ៧៨ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេមលើកទី៣២ (32nd SEA Games) ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ៕អត្ថបទ៖ បាន ចក់

ជាពីរបួសវិញ Carlos Alcaraz ប៉ុនប៉ងយកតំណែងលេខ ១ ពិភពលោកពី Djokovic វិញ

វាយកូនបាល់៖ រយៈពេលជិត ៤ខែ កីឡាវាយកូនបាល់ហាក់ស្ងៀមស្ងាត់បាត់ឈ្មោះកីឡាករអេស្ប៉ាញ Carlos Alcaraz ដែលបាត់បង់តំណែងលេខ ១ ពិភពលោកទៅ Novak Djokovic ដោយសាររបួស។ កីឡាករវ័យ ១៩ឆ្នាំរូបនេះនឹងចូលរួមការប្រកួត Argentina Open ថ្ងៃព្រហស្បតិ៍នេះជាមួយនឹងជំនឿចិត្តប៉ុនប៉ងយកតំណែងលេខ ១ ពិភពលោកពីកីឡាករស៊ែបមកវិញឱ្យបាន។ Carlos Alcaraz បានហក់ឡើងឈរលេខ ១ ពិភពលោកកាលពីខែកញ្ញាឆ្នាំមុន បន្ទាប់ពីឈ្នះជើងឯក Grand Slam លើកដំបូងក្នុងអាជីពនៅ U.S Open តែបញ្ហាសាច់ដុំអំឡុងការប្រកួត Paris Masters កាលពីខែវិច្ឆិកាធ្វើឱ្យកីឡាករវ័យ ១៩ឆ្នាំរូបនេះខកខានការប្រកួតនានាបូករួមទាំង Australian Open ដែលឈ្នះដោយ Djokovic កាលពីខែមុន។ Carlos Alcaraz បានបើកឆាកការប្រកួតកម្មវិធី Argentina Open ដោយយកឈ្នះកីឡាករស៊ែប Laslo Dere ព្រឹកមិញនេះដែលជាការប្រកួតដំបូងតាំងពីខែវិច្ឆិកា៕អត្ថបទ៖នាង សុភាវុធ

មហាសេដ្ឋីអ៊ីរ៉ង់កាត់អាមេរិក Jahm Najafl គ្រោងទិញក្លិប Tottenham តម្លៃជិត ៤ពាន់លានដុល្លារ

បាល់ទាត់៖ មហាសេដ្ឋីអ៊ីរ៉ង់កាត់អាមេរិក Jahm Najafl ដែលជាប្រធានក្រុមហ៊ុន MSP Sports Capital គ្រោងនឹងដេញថ្លៃទិញយកភាគហ៊ុនក្លិបបាល់ទាត់អង់គ្លេស Tottenham Hotspur មកគ្រប់គ្រងក្នុងតម្លៃ ៣.៧៥ពាន់លានដុល្លារអាមេរិក នេះបើតាមការចុះផ្សាយរបស់សារព័ត៌មាន Reuters។ មុននេះដែរសារព័ត៌មាន The Financial Times ក៏បានរាយការណ៍ដែរថា MSP Sports Capital កំពុងធ្វើការយ៉ាងខ្មួលខ្មាញ់ជាមួយក្រុមអ្នកវិនិយោគ ដើម្បីធ្វើរចនាសម្ព័ន្ធក្នុងការទិញយកភាគហ៊ុនរបស់ Spurs ដែលកំពុងកាន់កាប់ដោយលោក Joe Lewis និង Daniel Levy។ ក្រុមហ៊ុន MSP Sports Capital រួមជាមួយនឹងដៃគូនឹងបញ្ចេញសំណើទិញ ៧០% នៃតម្លៃលក់ ខណៈដៃគូដែលមានមូលដ្ឋាននៅ Abu Dhabi អារ៉ាប់រួមនឹងបូកបន្ថែម ៣០% ទៀត។ លោក Jahm Najalf បច្ចុប្បន្នក៏មានភាគហ៊ុនតូចនៅក្លិបបាល់បោះអាមេរិក NBA, Phoenix Suns ផងដែរ។ Tottenham Hotspur ដែលកំពុងដឹកនាំដោយលោក Antonio Conte កំពុងឈរលេខ៥ ក្នុងតារាងនៅ English Premier League មាន ៣៩ពិន្ទុពីការប្រកួត ២៣លើក និងដេញពីក្រោយក្រុមលេខ៤ Newcastle United ២ពិន្ទុ។ ក្លិបដែលមានមូលដ្ឋាននៅភាគខាងជើងទីឡុងដ៍មួយនេះ បានខកខានឈ្នះជើងឯកសំខាន់ៗតាំងពីឆ្នាំ២០០៨ ដែលពួកគេឈ្នះជើងឯក League Cup។ ក្លិបនៅ Premier League ផ្សេងទៀតក៏កំពុងស្ថិតក្នុងការចរចារកម្ចាស់ផ្ទះថ្មីដែររួមមាន Manchester United ដែលកំពុងមានទំនាក់ទំនងទិញពីកាតា និងសេដ្ឋីអង់គ្លេសប្រធានក្រុមហ៊ុន INEOS លោក Jim Ratcliffe ស្របពេលដែលហង្សក្រហម Liverpool ក៏កំពុងដាក់លក់ផងដែរ៕អត្ថបទ៖នាង សុភាវុធ

កីឡាករអាមេរិក Matteo Jorgenson គ្រងជើងឯកប្រណាំងកង់ Tour of Oman

ប្រណាំងកង់៖ កីឡាករអាមេរិក Matteo Jorgenson បានក្លាយជាជើងឯកព្រឹត្តិការណ៍ប្រណាំងកង់ Tour of Oman ហើយ ទោះបីជាបញ្ចប់ដំណាក់កាលចុងក្រោយត្រឹមចំណាត់ថ្នាក់លេខ២ ក៏ដោយ។ ដំណាក់កាលចុងក្រោយនៅថ្ងៃពុធម្សិលមិញមានចម្ងាយផ្លូវ ១៥២.៥គីឡូម៉ែត្រឆ្លងកាត់តំបន់ភ្នំ កីឡាករប៊ែលហ្ស៊ិក Mauri Vansevenant ជាអ្នកឈ្នះដោយមកដល់ទីព្រ័ត្រមុនគេប្រើពេល ៣ម៉ោង ៥៣នាទី ៥១វិនាទី តាមពីក្រោយដោយ Matteo Jorgenson ក្នុងថេរវេលាដូចគ្នា និងលេខ៣ កីឡាករបារាំង Geoffrey Bouchard។ ដំណាក់កាលចុងក្រោយជាការប្រកួតដ៏ស្វិតស្វាញរវាង Mauri Vansevenant និង Matteo Jorgenson ដែលទីបញ្ចប់នោះ Jorgenson ដែលជិះឱ្យក្រុម Movistar ជាអ្នកគ្រងជើងឯកជាមួយនឹងវេលាចំណេញត្រឹម ១វិនាទីប៉ុណ្ណោះពី Vansevenant។ រំលឹកថា Tour of Oman ត្រូវបានបង្កើតឡើងនៅឆ្នាំ២០១០ ហើយ Matteo Jorgenson ជាកីឡាករអាមេរិកដំបូងដែលឈ្នះជើងឯកក្នុងព្រឹត្តិការណ៍នេះ៕អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

ប្រធានាធិបតីលីបង់ព្រមានថា ការវាយប្រហាររបស់អ៊ីស្រាអែលកំពុងគំរាមកំហែងកិច្ចចរចាក្របខណ្ឌ មុនជំនួបនៅទីក្រុងរ៉ូម

ប្រមុខUN ៖ ផែនទីបង្ហាញផ្លូវនៃការរំសាយអាវុធនៅតំបន់ហ្កាហ្សា ត្រូវតែអនុវត្តតាម

UN៖ ការខូចខាតហេដ្ឋារចនាសម្ព័ន្ធនៅភាគខាងត្បូងលីបង់ ធ្វើឲ្យប៉ះពាល់ដល់ការវិលត្រឡប់របស់ប្រជាពលរដ្ឋ

វិស័យអប់រំបោះជំហានទៅមុខលើការបណ្ដុះយុវជនឱ្យខិតខំអភិវឌ្ឍជំនាញនិងការច្នៃប្រឌិតថ្មី

ក្រុមហ៊ូទី អះអាងថាបានបង្ខំឱ្យនាវាដឹកប្រេងអារ៉ាប៊ីសាអ៊ូឌីតចំនួន៨គ្រឿងផ្លាស់ប្តូរទិសដៅ

ទេសចរក្នុងស្រុកដាក់ផែនការទៅទស្សនាខេត្តសៀមរាប កំឡុងការបញ្ចុះតម្លៃសេវាស្នាក់រហូតដល់៥០%

រដ្ឋមន្រ្តីសុខាភិបាល «ការព្យាបាល និងស្ដារនីតិសម្បទាអ្នកញៀនគ្រឿងញៀន មិនមែនគ្រាន់តែជាការចូលរួមប្រយុទ្ធប្រឆាំងគ្រឿងញៀនប៉ុណ្ណោះទេ ប៉ុន្តែជាការចូលរួមអភិវឌ្ឍមូលធនមនុស្ស»

ជំនាញបច្ចេកទេសចំនួន៦ នៅវិទ្យាស្ថាន ITI ត្រូវនឹងទីផ្សារការងារទាំងពេលបច្ចុប្បន្ននិងអនាគត

ការវាយប្រហាររបស់អ៊ីស្រាអែល បណ្តាលឱ្យមានការបំផ្លាញយ៉ាងខ្លាំងនៅទូទាំងតំបន់ហ្កាហ្សា

ក្រុមការងារចុះមូលដ្ឋានខណ្ឌ៧មករា បាននាំយកទៀនព្រះវស្សាប្រគេនព្រះសង្ឈគង់ចាំវស្សានៅវត្តទាំង០៣ នៃមូលដ្ឋានខណ្ឌ៧មករា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានកីឡា

អាជ្ញាធរ​កីឡា​ខេត្តកំពង់ធំ​គាំទ្រ​ការរៀបចំ​ពាន​យុវជន​ AIA-ISF Youth League ​លើ​ទឹកដី​ខ្លួន​

Barcelona និង Manchester United បាន​ត្រឹម​ស្មើ ២-២ ជើង​ទី១ វគ្គ Play-Off Europa League

ឯកឧត្តម វ៉ា​ត់ ចំរើន​៖ កីឡាករ​-​កីឡាការិនី​ហាត់​នៅ​ចិន​មាន​ភាព​រីកចម្រើន​គួរ​ឲ្យ​កត់សម្គាល់​

កីឡា​តុង​ហ្គី​ល​ម៉ូ​ដូ​បើក​ការប្រកួត​ជើងឯក​ថ្នាក់ជាតិ​ឆ្នាំ​២០២២

សហព័ន្ធ​ជាតិ​ត្រូវ​គោរព​គោលការណ៍ ៤ ដើម្បី​នាំមក​នូវ​មោទនភាព​ជាតិ​ក្នុងនាម​ម្ចាស់ផ្ទះ​ស៊ី​ហ្គេម​

ជា​ពីរ​បួស​វិញ Carlos Alcaraz ប៉ុនប៉ង​យក​តំណែង​លេខ ១ ពិភពលោក​ពី Djokovic វិញ​

មហាសេដ្ឋី​អ៊ីរ៉ង់​កាត់​អាមេរិក Jahm Najafl គ្រោង​ទិញ​ក្លិប Tottenham តម្លៃ​ជិត ៤ពាន់​លាន​ដុល្លារ​

កីឡាករ​អាមេរិក Matteo Jorgenson គ្រង​ជើងឯក​ប្រណាំង​កង់ Tour of Oman