BTV NEWS

កម្ពុជាទទួលបានការគាំទ្រឱ្យធ្វើជាម្ចាស់ផ្ទះកីឡាតេក្វាន់ដូអាយ-ធីអែហ្វជើងឯកអាស៊ី២០២៨

មន្ដ្រីកីឡាជាន់ខ្ពស់ខេត្តយូណាន សរសើរ និងរៀនសូត្រពីភាពអស្ចារ្យព្រឹត្ដិការណ៍ម៉ារ៉ាតុងចក្រភពអង្គរ

ធារី ចន្ថាប៊ីន ចាត់ទុកពាន CJ Summer League ជាវេទិកាសម្រាប់អភិវឌ្ឍយុវជន

អង់គ្លេសត្រៀមដកការគាំទ្រការឈរឈ្មោះបន្តអាណត្តិរបស់ Gianni Infantino ខណៈវិបត្តិនៅ FIFA កាន់តែក្តៅគគុក

ព័ត៌មានកីឡា

កីឡាករកម្ពុជា និងកីឡាការិនីថៃឈ្នះជុំទី៣ ការប្រកួតកង់ភ្នំឆ្នាំ២០២២

ប្រណាំងកង់ភ្នំ៖ ការប្រកួតកង់ភ្នំជើងឯកជាតិ ២០២២ (WURKZ Mountain Bike Series) ដំណើរការដល់ជុំទីបីហើយ ដោយដំណើរការប្រកួតនៅចុងសប្តាហ៍កន្លងទៅនៅបរិវេណជើងភ្នំគូលែន ស្រុកបន្ទាយស្រី ខេត្តសៀមរាប ដោយមានកីឡាករ-កីឡាការិនី ៣២០នាក់ចូលរួមប្រកួត ក្នុងនោះមានកីឡាករ-កីឡាការិនីជម្រើសជាតិកង់ភ្នំថៃចូលរួមផងដែរ។ក្រោយដំណើរការប្រកួតស្ទើរពេញមួយថ្ងៃអាទិត្យ វិញ្ញាសាកម្រិត A បុរស កីឡាករជម្រើសជាតិកម្ពុជា គីម ម៉េងឡុង បញ្ចប់នៅចំណាត់ថ្នាក់លេខ១ បន្ទាប់បញ្ចប់ការប្រកួត ៥ជុំដោយប្រើថេរវេលា ១ម៉ោង ៣នាទី ២៨វិនាទី៣ ខណៈដែលកីឡាករ ឆាប ឆៃហ្វុង បញ្ចប់នៅចំណាត់ថ្នាក់ទី២ ដោយប្រើថេរវេលា ១ម៉ោង ៤នាទី ៤៣វិនាទី៦។ ចំនែកកីឡាករជម្រើសជាតិថៃ Adisak Tailangkha និង Athiphong Suwannasing ឈរនៅចំណាត់ថ្នាក់លេខ៣ និងលេខ៤រៀងគ្នា ចាញ់អ្នកឈ្នះ ២នាទី ៤៤វិនាទី និង ៣នាទី ០០វិនាទី៥។ សម្រាប់កីឡាករ ហួត ឡយរស្មី បញ្ចប់នៅចំណាត់ថ្នាក់លេខ៥ និងលេខ៦ បានទៅកីឡាករ សាង សីហា។ រីឯវិញ្ញាសានារីកម្រិតខ្ពស់ដែលប្រកួត ៤ជុំ កីឡាការិនីជម្រើសជាតិថៃ Jarinya Suebjakthin ដណ្តើមបានចំណាត់ថ្នាក់លេខ១ បន្ទាប់ពីប្រើថេរវេលា ១ម៉ោង ៥នាទី២៦វិនាទី១ ដោយបានយកឈ្នះមិត្តរួមជាតិ Thanaporn Haman ក្នុងគម្លាតថេរវេលា ១នាទី៤២វិនាទី៨។ ចំនែកកីឡាការិនីជម្រើសជាតិកម្ពុជា ខេន ម៉ាឡៃ បញ្ចប់នៅចំណាត់ថ្នាក់លេខ៣ ចាញ់អ្នកឈ្នះ៣នាទី១៦វិនាទី៧ ខណៈដែលកីឡាការិនីថៃមួយរូបទៀត Natalie PANYAWAN បញ្ចប់នៅចំណាត់ថ្នាក់លេខ៤ និងកីឡាការិនីកម្ពុជា យស កន្និការ ឈរនៅលេខ៥ និងកីឡាការិនី វន ស្រីនីត បញ្ចប់នៅចំណាត់ថ្នាក់លេខ៦។ក្រៅពីវិញ្ញាសាធំៗទាំងពីរនៅនៅមានវិញ្ញាសា B1 (ប្រកួត៤ជុំ ចម្ងាយ១៤គីឡូម៉ែត្រ) កីឡាករជម្រើសជាតិកម្ពុជា គ្រួច វ៉ា ជាអ្នកទទួលបានជ័យជំនះ លេខ២ បានទៅកីឡាករ កែវ សុផា មកពីក្លិបជិះកង់ RVC និងលេខ៣ បានទៅកីឡាករ ឆាង រ័ត្នមុន្នី មកពីក្លិបជិះកង់ខេត្តសៀមរាប ខណៈលេខ៤ កីឡាករ ភោគ ចំណាប់ និងលេខ៥ កីឡាករមកពីកំពត យូរ៉ា គីម។ វិញ្ញាសា B2 ប្រកួតបីជុំចម្ងាយជិត ១០គីឡូម៉ែត្រ កីឡាករមកពីប្រទេសថៃ Surachet Sing jui ជាអ្នកទទួលបានជ័យជំនះ លេខ២ កីឡាករ Vasco ramsperger មកពីក្រុមជិះកង់ខេត្តកំពត លេខ៣ កីឡាករ Pierre Yves CATRY មកពីក្រុមកង់ហោះ លេខ៤ កីឡាករ ហុង ចាន់មករា មកពីក្រុមជិះកង់តាខ្មៅ និងលេខ៥ កីឡាករ Julius មកពីក្រុមជិះកង់ ICF កម្ពុជា។ វិញ្ញាសា E-Bikes ចំណាត់ថ្នាក់លេខ១ បានទៅកីឡាករ ប៊ុត ឈឿន របស់ក្រុមកង់ហោះ លេខ២ កីឡាករ អ៊ូ ស៊ីផា មកពីក្រុមកង់ហោះ និងលេខ៣ កីឡាករ Pascal CATRY ក្រុមកង់ហោះ២។វិញ្ញាសា C1 ជ័យជំនះបានទៅកីឡាករ ពៅ សុភាន់ មកពីក្រុមកង់ហោះ, វិញ្ញាសា C2 ជ័យជំនះបានទៅកីឡាករ ធីម លីម៉េង មកពីក្រុមជិះកង់ខេត្តសៀមរាប, វិញ្ញា C3 លេខ១ បានទៅកីឡាករ អ៊ី លាងម៉េង របស់ក្រុមជិះកង់ Sun Bikes, វិញ្ញាសា Master ជ័យជំនះបានទៅកីឡាករ គីម សម្បត្តិ មកពីក្លិបជិះកង់ Cycle Path Club, វិញ្ញាសា CMG ជ័យជំនះបានទៅកីឡាករ ស្មគ្រ វិស្ណុ, វិញ្ញាសា VIP កីឡាករ ឈួន យ៉េនរបស់ក្លិប Sun Bikes បញ្ចប់នៅចំណាត់ថ្នាក់លេខ១ វិញ្ញាសានារី ៣ជុំក្នុងចំងាយជាង ៦គីឡូម៉ែត្រ កីឡាការិនី ខេន ម៉ាឡៃ ដណ្តើមជ័យជំនះ, វិញ្ញាសា C0 ដែលមានកីឡាករចូលរួមជាង ៦០នាក់លេខ១ បានទៅកីឡាករ ជា សុបញ្ញា មកពីក្លិបជិះកង់រិទ្ធិសែន ខេត្តកំពង់ឆ្នាំង, វិញ្ញសាកុមារ K2 ដែលមានកុមារជាង ៣០នាក់ចូលរួមប្រកួតលេខ១ បានទៅកីឡាករ វន ដាវីដ និងវិញ្ញាសា K1 លេខ១ បានទៅកុមារា លី សុវណ្ណារាជមកពីក្លិប Sun Bike និងលេខ១ កុមារី បានទៅ បញ្ញា អ៊ាន មកពីក្រុមជិះកង់សុខសាន្ត។ សូមជម្រាបជូនថា ការប្រកួតជុំទី១ នៃកម្មវិធី WURKZ Mountain Bike Series នឹងធ្វើនៅព្រែកលៀបរាជធានីភ្នំពេញ ខណៈជុំទី៥ ដែលជុំចុងក្រោយនឹងធ្វើនៅកំឡុងខែធ្នូ នៅរមណីយដ្ឋានគិរីរម្យ ខេត្តកំពង់ស្ពឺ៕អត្ថបទ៖ គង់ ហួន

Karim Benzema ឈ្នះពានកីឡាករឆ្នើមប្រចាំឆ្នាំ Ballon d’Or លើកដំបូងក្នុងអាជីព

បាល់ទាត់៖ ខ្សែប្រយុទ្ធ Real Madrid និងក្រុមជំរើសជាតិបារាំង Karim Benzeman បានក្លាយជាម្ចាស់ពានកីឡាករឆ្នើមប្រចាំឆ្នាំរបស់ Ballon d’Or លើកដំបូងក្នុងអាជីព និងជាកីឡាករបារាំងដំបូងដែលឈ្នះជ័យលាភីនេះតាំងពីឆ្នាំ១៩៩៨។ Karim Benzema បានស៊ុតបញ្ចូលទីសរុប ៤៤គ្រាប់ក្នុងការបង្ហាញខ្លួន ៤៦ប្រកួតជួយឱ្យ Real Madrid ឈ្នះជើងឯក UEFA Champions League និង La Liga រដូវកាលមុន។ រយៈពេល ១៣ឆ្នាំកន្លងមកមានកីឡាករតែ ៣នាក់ប៉ុណ្ណោះដែលឈ្នះពាន Ballon d’Or នេះដែលក្នុងចំណោម ១៣លើកនោះមាន Lionel Messi ៧លើក, Cristiano Ronaldo ៥លើក និង Luka Modric មួយលើក។ Karim Benzema ទទួលបានពាន Ballon d’Or ក្រោយទទួលបានសំឡេងគាំទ្រច្រើនជាងអ្នកលេខ២ Sadio Mane និងលេខ៣ Kevin de Bruyne។ចំណែកពានដូចគ្នានេះតែផ្នែកនារីបានទៅកីឡាការិនី Barcelona, Alexia Putellas បានទទួលបាន Ballon d’Or នេះពីរឆ្នាំជាប់គ្នា។ សម្រាប់លទ្ធផលនៃការទទួលពានផ្សេងៗរួមមាន៖ កីឡាករយុវជនឆ្នើមបំផុតប្រចាំឆ្នាំបានទៅខ្សែបម្រើ Barcelona, Gavi, អ្នកចាំទីឆ្នើមបំផុតបានទៅអ្នកចាំទី Real Madrid, Thibaut Courtios, ខ្សែប្រយុទ្ធឆ្នើមប្រចាំឆ្នាំបានទៅ Robert Lewandowski, ក្លិបបាល់ទាត់ឆ្នើមបំផុតប្រចាំឆ្នាំបានទៅ Manchester City៕អត្ថបទ៖នាង សុភាវុធ

ថ្នាក់ដឹកនាំកីឡាបញ្ចសិលាថៃមកសិក្សាពីគុនល្បុក្កតោ ដើម្បីមានឱកាសចូលរួមស៊ីហ្គេមនៅកម្ពុជា

បញ្ចសិលា៖ លោក Tanayut Jongsukkaijai ប្រធានសមាគមកីឡាបញ្ចសិលានៅខេត្តសារិន្ទ ប្រទេសថៃ កាលពីចុងសប្ដាហ៍កន្លងទៅបានចូលជួបសម្ដែងការគួរសម និងពិភាក្សាការងារជាមួយឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការសហព័ន្ធកីឡាគុនល្បុក្កតោកម្ពុជា ដើម្បីសិក្សាពីឱកាសចូលរួមប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។ ឯកឧត្តម វ៉ាត់ ចំរើន បានគូសបញ្ជាក់ថា ជំនួបសវនការនេះ ភាគីខេត្តសុរិន្ទដែលជាផ្នែកមួយនៃរដ្ឋអំណាចកីឡាថៃគឺចង់ភ្ជាប់ខ្លួនជាមួយគុនល្បុក្កតោ ក្នុងការសិក្សាស្វែងយល់ពីកីឡាអត្តសញ្ញាណជាតិខ្មែរនេះ ដោយស្នើសុំឲ្យភាគីកម្ពុជាជួយបណ្ដុះបណ្ដាល និងបង្ហាត់ ដើម្បីបានបញ្ជូនអត្តពលិករបស់ខ្លួនមកចូលរួមប្រកួតកីឡាស៊ីហ្គេមឆ្នាំ២០២៣ ។ ជាមួយសំណើរនេះ ភាគីទាំងពីរបានឯកភាពគ្នា ដោយកម្ពុជាបានបើកភ្លើងខៀវក្នុងការជួយបង្ហាត់ដល់ភាគីថៃ ដែលជាគោលដៅមួយរបស់សហព័ន្ធ ដើម្បីពង្រឹង និងពង្រីកសក្ដានុពលគុនល្បុក្កតោក្នុងតំបន់។រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិ CAMSOC ដដែលបានគូសបញ្ជាក់ថា មកទល់ពេលនេះគិតទាំងថៃ មានប្រទេសចំនួន ៧ហើយដែលត្រៀមចូលរួមប្រកួតលើប្រភេទកីឡាគុនល្បុក្កតោ ក្នុងព្រឹត្តិការណ៍ស៊ីហ្គេមឆ្នាំ២០២៣ រួមមានឥណ្ឌូនេស៊ី ហ្វីលីពីន វៀតណាម ឡាវ មីយ៉ាន់ម៉ា ថៃ និងកម្ពុជា។ លើសពីនេះ ទីម័រខាងកើតក៏បានបង្ហាញពីបំណងចង់ចូលរួម លើប្រភេទកីឡាអត្តសញ្ញាណជាតិខ្មែរនេះផងដែរ។ គួរដឹងថា ស៊ីហ្គេមលើកទី៣២ បានអនុម័តប្រភេទកីឡាសម្រាប់ការប្រកួតរួចរាល់ដោយមាន ៣៨ប្រភេទកីឡាលើ ៦០៨វិញ្ញាសា ក្នុងនោះក៏មានកីឡាអត្តសញ្ញាណជាតិមួយចំនួនផងដែរ ដូចជាកីឡាគុនល្បុក្កតោ និងកីឡាអុកចត្រង្គជាដើម៕អត្ថបទ៖ លី ឈុនឡា

កម្ពុជាយកឈ្នះប៊ូតាន ៣-០ ក្នុងជំនួបបើកឆាកការប្រកួត Davis Cup នៅបារ៉ែន

វាយកូនបាល់៖ ក្រុមកីឡាវាយកូនបាល់ជម្រើសជាតិកម្ពុជា បានយកឈ្នះក្រុមជម្រើសជាតិប៊ូតានដោយលទ្ធផល ៣-០ ក្នុងជំនួបបើឆាកការប្រកួតកីឡាវាយកូនបាល់ប្រចាំតំបន់អាស៊ី/អូសេអាស៊ី Davis Cup ក្រុម៤ ឆ្នាំ២០២២ នៅប្រទេសបារ៉ែនកាលពីល្ងាចថ្ងៃទី១៧ ខែតុលាម្សិលមិញ។ បេសកកម្មនេះក្រុមជម្រើសជាតិកម្ពុជាស្ថិតក្នុងពូល A ជាមួយក្រុមជម្រើសជាតិទួកមេនីស្ថាន ម៉ុងហ្គោលី និងប៊ូតាន ។ រីឯពូល B គឺមានក្រុមខ្លាំងគុយវ៉ែត សិង្ហបុរី ឡាវ កាំហ្គាំ និងក្រុមម្ចាស់ផ្ទះបារ៉ែន ដែលការប្រកួតត្រូវធ្វើឡើងពីថ្ងៃទី១៧ រហូតដល់ថ្ងៃទី២២ ខែតុលាចុងសប្ដាហ៍នេះ។ ជាលទ្ធផលការប្រកួតដំបូងកាលពីម្សិលមិញ ក្រុមកីឡាករកម្ពុជាសុទ្ធតែទទួលបានជ័យជម្នះលើកីឡាករប៊ូតាន ក្នុងនោះកីឡាករខ្មែរ-អាមេរិក Matthew David Krusling បានយកឈ្នះកីឡាករ Tenzin Singye Do ដោយលទ្ធផល ៧-៦ និង ៦-៣។ រីឯកីឡាករ ប៊ុន កេន្នី បានយកឈ្នះកីឡាករ Tenzin Wangchuk ដោយលទ្ធផល ៦-០ និង ៦-០ និងចុងក្រោយវិញ្ញាសាវាយគូ កីឡាករ ឡុង សំនៀង និង ទេព ធីម៉ូធី បានយកឈ្នះក្រុមប៊ូតានក្នុងលទ្ធផល ៦-០ និង ២-០។នេះគឺជាការប្រកួតដំបូងក្នុងពូល A ខណៈប្រកួតបន្ទាប់ក្រុមកីឡាវាយកូនបាល់ជម្រើសជាតិកម្ពុជា នឹងបន្ដជួបក្រុមជម្រើសជាតិម៉ុងហ្គោលីនាថ្ងៃទី១៨-តុលា និងជួបក្រុមជម្រើសជាតិទូកមេនីស្ថាននាថ្ងៃទី២០ ខែតុលា ឆ្នាំ២០២២ ខាងមុខ។ បន្ទាប់ពីបញ្ចប់ការប្រកួតវិលជុំក្នុងពូលនីមួយៗ ក្រុមឈរលេខ១ និងលេខ២ នឹងត្រូវប្រកួតខ្វែងពូលដើម្បីស្វែងរកបេក្ខភាពវគ្គផ្ដាច់ព្រ័ត្រ។ រីឯក្រុមទទួលបានជ័យជម្នះនៅវគ្គផ្ដាច់ព្រ័ត្រនឹងទទួលបានកៅអីក្រុម៣ នៃព្រឹត្តិការណ៍ Davis Cup 2023 តែម្ដង៕អត្ថបទ៖ លី ឈុនឡា

ឯកឧត្ដមបណ្ឌិត ថោង ខុន៖ ការទទួលបានគ្រឿងឥស្សរិយយសថ្នាក់ខ្ពស់ពី OCA ផ្ដើមចេញពីកត្ដាសន្ដិភាព

អូឡាំពិក៖ ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ អនុប្រធានអចិន្ដ្រៃយ៍ CAMSOC និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា ការទទួលបាននូវគ្រឿងឥស្សរិយយសថ្នាក់ខ្ពស់បំផុត «ខ្សែកមាស» ពីក្រុមប្រឹក្សាអូឡាំពិកអាស៊ី (OCA) កាលពីថ្មីៗ ផ្ដើមចេញពីកត្ដាសន្ដិភាពក្រោមការដឹកនាំយកចិត្តទុកដាក់ និងជួយជ្រោមជ្រែងដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ ឯកឧត្តមបានគូសបញ្ជាក់បែបនេះក្នុងសន្និសីទសារព័ត៌មាន ស្ដីពីការរាប់ថយក្រោយ ២០០ថ្ងៃឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ កាលពីថ្មីៗ។ ឯកឧត្តមបានចាត់ទុកគ្រឿងឥស្សរិយយសដ៏ឧត្ដុង្គឧត្តមនេះ គឺជាគ្រឿងឥស្សរិយយដ៏មានសារៈសំខាន់សម្រាប់ចលនាអូឡាំពិកកម្ពុជា ដែលបានមកពីកិច្ចសហការ និងការខិតខំប្រឹងប្រែង រវាងប្រតិបត្តិករចលនាអូឡាំពិក និងស្ថាប័នពាក់ព័ន្ធទាំងអស់ ពិសេសសម្ដេចតេជោនាយករដ្ឋមន្ដ្រី ដែលជាអ្នកនាំមកសុខសន្ដិភាពពេញលេញ នាំឲ្យមានការរីកចម្រើនលើគ្រប់វិស័យក្នុងនោះក៏មានវិស័យកីឡាផងដែរ។សូមរំឭកថា ឯកឧត្តមបណ្ឌិត ថោង ខុន បានទទួលគ្រឿងឥស្សរិយយសថ្នាក់ខ្ពស់បំផុត «ខ្សែកមាស» ពីក្រុមប្រឹក្សាកីឡាអូឡាំពិកអាស៊ីចំពោះការលះបង់ និងការខិតខំប្រឹងប្រែងក្នុងការជំរុញចលនាអូឡាំពិកកម្ពុជា ក៏ដូចជាចលនាអូឡាំពិកអន្ដរជាតិ ដែលពិធីប្រគល់-ទទួលគ្រឿងឥស្សរិយយសនេះ ធ្វើឡើងអំឡុងពេលកម្ពុជាទទួលរៀបចំមហាសន្និបាត OCA លើកទី៤១ កាលពីដើមខែតុលាកន្លងទៅ ដោយពិធីបើកបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី និងមានឥស្សរជន ថ្នាក់ដឹកនាំ ចលនាអូឡាំពិកអាស៊ី និងអន្ដរជាតិប្រមាណ ៤០០នាក់មកពី ៥៥ប្រទេសចូលរួមមហាសន្និបាតនេះ៕អត្ថបទ៖ លី ឈុនឡា

Alex Rins ឈ្នះការប្រណាំងម៉ូតូ GP នៅអូស្ត្រាលីក្រោយវ៉ា Bagnaia ជុំចុងក្រោយ

ប្រណាំងម៉ូតូ៖ កីឡាករអេស្ប៉ាញ Alex Rins បានប្រជែងឈ្នះការប្រណាំងម៉ូតូ GP នៅទឹកដីអូស្ត្រាលីនៅថ្ងៃអាទិត្យម្សិលមិញនេះ ក្រោយវ៉ា Francesco Bagnaia នៅជុំចុងក្រោយ។ កីឡាកររបស់ក្រុមប្រណាំង Suzuki, Alex Rins បានវ៉ាផុត Francesco Bagnaia មុនបន្តទៅវ៉ាមិត្តរួមជាតិអេស្ប៉ាញ Marc Marquez ម្នាក់ទៀតដើម្បីមកដល់ទីព្រ័ត្រមុនគេ។ Marc Marquez ទទួលបានចំណាត់ថ្នាក់លេខ២ ក្នុងការប្រកួតនេះដែលជាលើកទី១០០ សម្រាប់ Marquez ឈរលើវេទិកាកិត្តិយស។ ចំណែកអ្នកការពារតំណែងជើងឯកកីឡាករបារាំង Fabio Quartararo មិនអាចបញ្ចប់ការប្រកួតបានឡើយ ដែលធ្វើឱ្យតារាងអ្នកឈរកំពូលចំណាត់ថ្នាក់ពិភពលោកត្រូវធ្លាក់ទៅលើ Francesco Bagnaia ដែលបានលេខ៣ ពីការប្រកួតនៅអូស្ត្រាលីនេះ។ គម្លាតរវាងអ្នកលេខ ១ និងលេខ ២ នៅពេលនេះមានត្រឹម ១៤ពិន្ទុប៉ុណ្ណោះខណៈការប្រកួតនៅសល់ត្រឹម ២ទីលានទៀតប៉ុណ្ណោះគឺនៅម៉ាឡេស៊ី និងចុងក្រោយនៅ Valencia ប្រទេសអេស្ប៉ាញ៕អត្ថបទ៖នាង សុភាវុធ

Reece James នឹងអវត្តមានពី World Cup ដោយសាររបួសជង្គង់

បាល់ទាត់៖ ខ្សែការពារស្លាបស្តាំនៃក្រុមជំរើសជាតិអង់គ្លេស Reece James នឹងអវត្តមានពីព្រឹត្តិការណ៍បាល់ទាត់ពិភពលោក FIFA World Cup ឆ្នាំនេះដោយសាររបួសជង្គង់។ កីឡាករវ័យ ២២ឆ្នាំដែលធ្លាប់បង្ហាញខ្លួនឱ្យក្រុមជម្រើសជាតិអង់គ្លេស ១៥លើករូបនេះបានទទួលរងរបួសជង្គង់នៅពេល Chelsea យកឈ្នះនៅទឹកដី AC Milan ២-០ សប្តាហ៍មុន។ បើតាមអាការៈរបួសរបស់ Reece James នឹងត្រូវសម្រាកព្យាបាលយ៉ាងហោចណាស់ ៨សប្តាហ៍ ខណៈដែល World Cup សល់ពេលតែ ៥សប្តាហ៍ទៀតប៉ុណ្ណោះនឹងឈានចូលមកដល់។ ខ្សែការពារស្តាំរបស់អង់គ្លេស ២រូបទៀតក៏កំពុងមានបញ្ហារបួសរួមមានខ្សែការពារ Man City, Kyle Walker និងខ្សែការពារ Liverpool, Trent Alexander-Arnold។ Kyle Walker បានរបួស និងឈានដល់ការវះកាត់ក្រលៀន ស្របពេលដែល Arnold មានរបួសកជើងពេលជួប Arsenal។ ជម្រើសជាតិតែមួយទៀតរបស់អង់គ្លេសនៅតំបន់ការពារស្តាំនេះគឺខ្សែការពារ Newcastle, Kieran Tippier។ ក្រុមអង់គ្លេសនឹងចាប់ផ្តើមប្រកួតដំបូងរបស់ខ្លួននៅ World Cup ជួបជាមួយអ៊ីរ៉ង់នៅថ្ងៃទី២១ ខែវិច្ឆិកា៕អត្ថបទ៖នាង សុភាវុធ

Deontay Wilder ផ្តួល Robert Helenius ត្រឹមទឹកទី១ ក្នុងការត្រលប់មកសង្វៀនវិញលើកដំបូងក្នុងរយៈពេល ១ឆ្នាំ

ប្រដាល់៖ អតីតជើងឯកប្រដាល់ទំងន់ធ្ងន់ពិភពលោក Deontay Wilder បានផ្តួល Robert Helenius ត្រឹមទឹកទី១ ប៉ុណ្ណោះក្នុងការវិលឡើងសង្វៀនវិញលើកដំបូងក្នុងរយៈពេល ១ឆ្នាំ។ កីឡាករអាមេរិកវ័យ ៣៦ឆ្នាំរូបនេះបានឡើងសង្វៀនលើកដំបូង តាំងពីប្រកួតចុងក្រោយកាលពីខែតុលាឆ្នាំមុនដែលចាញ់ Tyson Fury លើកទី២។ Wilder បានប្រើកណ្តាប់ដៃស្តាំវាយចំពេញផ្ទៃមុខរបស់គូប្រកួតសញ្ជាតិហ្វាំងឡង់ Robert Helenius នៅវិនាទីចុងក្រោយនៃទឹកទី១។ ជ័យជំនះរបស់ Deontay Wilder លើ Robert Helenius នៅកីឡដ្ឋាន Barclays Center គឺជាជ័យជំនះលើកទី៤៣ ចាញ់ ២ប្រកួតក្នុងអាជីពប្រដាល់របស់ខ្លួន ដែលក្នុងចំណោម ៤៣លើកនោះផ្តួលគូប្រកួតឱ្យបោះបង់ ៤២លើក។ បរាជ័យតែពីរលើកគត់របស់ Wilder គឺចាញ់ Tyson Fury ទាំងពីរលើកដែលធ្វើឱ្យគេបាត់បង់ខ្សែប្រយុទ្ធ WBC ដែលពាក់តាំងពីឆ្នាំ២០១៥។ គោលដៅបន្ទាប់របស់ Wilder គឺជួបមិត្តរួមជាតិអាមេរិក Andy Ruiz រឺកីឡាករអ៊ុយក្រែន Oleksandr Usyk ហើយក៏នៅតែសង្ឃឹមថានឹងអាចជួបជាមួយ Anthony Joshua ផងដែរ៕អត្ថបទ៖នាង សុភាវុធ

Union Berlin ឡើងនាំមុខដាច់ ៤ពិន្ទុនៅ Bundesliga ក្រោយឈ្នះ Dortmund

បាល់ទាត់៖ ក្រុម Union Berlin បានបន្តរក្សាការនាំមុខរបស់ខ្លួននៅក្របខណ្ឌកំពូលអាល្លឺម៉ង់ Bundesliga និងពន្លាតពិន្ទុនាំមុខដាច់ដល់ ៤ពិន្ទុពីក្រុមលេខ២។ ពីរគ្រាប់របស់ខ្សែប្រយុទ្ធអាល្លឺម៉ង់ Janik Haberer ក្នុងចន្លោះពេល ១៣នាទី គ្រប់គ្រាន់ល្មមសម្រាប់ Union Berlin យកឈ្នះ Borussia Dortmund ២-០ ក្នុងសប្តាហ៍ទី១០ នៃក្របខណ្ឌ Bundesliga។ យោងតាមលទ្ធផលនេះធ្វើឱ្យ Union Berlin ជាក្រុមការពារបានល្អជាងគេគិតត្រឹមសប្តាហ៍ទី១០ នេះដោយរបូតគ្រាប់បាល់ត្រឹម ៦គ្រាប់ប៉ុណ្ណោះស៊ុតបញ្ចូលទីគេ ១៨គ្រាប់ ចំណេញ ១២គ្រាប់មាន ២៣ពិន្ទុ។ Freiburg ដែលដំបូងឈរលេខ២ បានរងបរាជ័យនៅទឹកដី Bayern Munich ៥-០ យប់ថ្ងៃអាទិត្យម្សិលមិញផងដែរ។ ជ័យជំនះនេះធ្វើឱ្យ Bayern Munich ឡើងមកលេខ២ ក្នុងតារាងមាន ១៩ពិន្ទុតាមពីក្រោយ Union Berlin ៤ពិន្ទុ និងនាំមុខក្រុមលេខ៣ Freiburg ១ពិន្ទុ។ ចំណែក Borussia Dortmund ធ្លាក់ទៅលេខ៨ មានត្រឹម ១៦ពិន្ទុ៕អត្ថបទ៖នាង សុភាវុធ

ជំនួប El Clasico លើកទី២៥០ Real Madrid យកឈ្នះ Barcelona ៣-១

បាល់ទាត់៖ ក្រុមបាល់ទាត់ FC Barcelona បានស្គាល់បរាជ័យលើកដំបូងក្នុងរដូវកាលនេះចំជំនួប El Clasico លើកទី២៥០ ក្នុងប្រវត្តិសាស្ត្រដោយ Real Madrid យកឈ្នះ ៣-១។ Real Madrid បានបើកការនាំមុខមុនដោយ Karim Benzema មុនពេលដែល Federico Valverde បង្កើនការនាំមុខ ២គ្រាប់មុនចប់វគ្គទី១។ Barcelona ជាក្រុមមានប្រៀបនៅវគ្គទី២ ដោយមានការគ្រប់គ្រងបាល់ច្រើន និងឱកាសជាច្រើនតែមិនបានសំរេច ពោលគឺត្រូវរង់ចាំដល់ចុងម៉ោងនាទីទី៨៣ ទើបអតីតខ្សែប្រយុទ្ធ Manchester City, Ferran Torres តាមពីក្រោយវិញបានមួយគ្រាប់។យ៉ាងណាក្តីមុនចប់ Real Madrid ក៏បន្ថែមគ្រាប់ចុងក្រោយដោយ Rodrygo នៅនាទីទី៩០+១ ដោយពិន័យ ១១ម៉ែត្រ។ នេះជាជ័យជំនះលើកទី១០១ សម្រាប់ Real Madrid ក្នុងជំនួប El Clasico នេះខណៈ Barcelona ឈ្នះសរុប ១១៧ប្រកួត។ បីពិន្ទុនេះធ្វើឱ្យ Real Madrid ឡើងមកនាំមុខដាច់ ៣ពិន្ទុពីលើក្រុមលេខ២ Barcelona ផងដែរ៕អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

ប្រព័ន្ធផ្សព្វផ្សាយរដ្ឋ៖ បំណាក់ដីបណ្ដាលឱ្យមនុស្ស ១៤នាក់ស្លាប់ នៅតំបន់ Amhara របស់អេត្យូពី

Brussels Airlines រាយការណ៍ពីការខាតបង់ប្រតិបត្តិការ ៨០លានដុល្លារ អំឡុងការចំណាយលើប្រេងឥន្ធនៈខ្ពស់

ប្រភព៖ អាមេរិកបានប្រើប្រាស់មីស៊ីលចម្ងាយឆ្ងាយមានភាពជាក់លាក់ខ្ពស់ស្ទើរទាំងអស់ អំឡុងសង្គ្រាម ជាមួយអ៊ីរ៉ង់

មនុស្សជាង ៨.០០០នាក់ នៅតែបន្តនៅក្នុងជម្រកបណ្ដោះអាសន្ន ក្រោយរញ្ចួយដី ១សប្តាហ៍ នៅជប៉ុន

ក្រុម AOT ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ច្រកបឹងត្រកួន

កូរ៉េខាងត្បូង តវ៉ាចំពោះការអះអាងសិទ្ធិរបស់ជប៉ុន លើកោះតូចៗមានជម្លោះ

ប្រធានចារកម្មទួរគី និងមេដឹកនាំក្រុមហាម៉ាស ពិភាក្សាអំពីផែនទីផ្លូវសម្រាប់ដំណាក់កាលទី២នៃផែនការសន្តិភាពហ្កាហ្សា

ព្រះរាជទាយាទអារ៉ាប៊ីសាអ៊ូឌីត និងប្រធានាធិបតីទួរគី ពិភាក្សាអំពីសន្តិសុខក្នុងតំបន់ និងការវាយប្រហារនៅសមុទ្រក្រហម

អាជ្ញាធរ៖ ជនអន្តោប្រវេសន៍ជាង ១៥០នាក់ ត្រូវបានសង្គ្រោះ ក្រោយទូកមានអគ្គិភ័យ នៅច្រកសមុទ្រអង់គ្លេស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានកីឡា

កីឡាករ​កម្ពុជា និង​កីឡាការិនី​ថៃ​ឈ្នះ​ជុំ​ទី​៣​ ការប្រកួត​កង់​ភ្នំ​ឆ្នាំ២០២២

Karim Benzema ឈ្នះ​ពាន​កីឡាករ​ឆ្នើម​ប្រចាំឆ្នាំ Ballon d’Or លើកដំបូង​ក្នុង​អាជីព

កម្ពុជា​យកឈ្នះ​ប៊ូ​តាន ៣-០ ក្នុងជំនួប​បើកឆាក​ការប្រកួត​ Davis Cup ​នៅ​បា​រ៉ែ​ន

ឯកឧត្ដម​បណ្ឌិត ថោង ខុន​៖ ការទទួលបាន​គ្រឿង​ឥស្សរិយយស​ថ្នាក់ខ្ពស់​ពី​ OCA ​ផ្ដើមចេញពី​កត្ដា​សន្ដិភាព​

Alex Rins ឈ្នះ​ការប្រណាំង​ម៉ូតូ GP នៅ​អូស្ត្រាលី​ក្រោយ​វ៉ា Bagnaia ជុំ​ចុងក្រោយ​

Reece James នឹង​អវត្តមាន​ពី World Cup ដោយសារ​របួស​ជង្គង់​

Deontay Wilder ផ្តួល Robert Helenius ត្រឹម​ទឹក​ទី​១ ក្នុងការ​ត្រលប់មក​សង្វៀន​វិញ​លើកដំបូង​ក្នុង​រយៈពេល ១ឆ្នាំ

Union Berlin ឡើង​នាំ​មុខដាច់ ៤ពិន្ទុ​នៅ Bundesliga ក្រោយ​ឈ្នះ Dortmund

ជំនួប El Clasico លើក​ទី២៥០ Real Madrid យកឈ្នះ Barcelona ៣-១