BTV NEWS

Mohamed Salah ខិតជិតការផ្ទេរទៅកាន់ក្លិបទួកគី Trabzonspor

Hervé Renard វិលត្រឡប់មកដឹកនាំក្រុមជម្រើសជាតិកូតឌីវ័រ ជាលើកទី២

អ្នកណាខ្លះអាចជាបេក្ខភាពប្រជែងតំណែងប្រធាន FIFA ជាមួយ Gianni Infantino នៅឆ្នាំ២០២៧?

គ្រូបង្វឹកជម្រើសជាតិកាប់វែរ ទទួលបានតំណែងដឹកនាំក្លិបអាជីពមួយនៅម៉ារ៉ុកក្រោយជោគជ័យនៅ World Cup

ព័ត៌មានកីឡា

Haaland ក្លាយជាកីឡាករទី១ ក្នុងប្រវត្តិសាស្ត្រ Premier League ស៊ុតបញ្ចូលទី ៣គ្រាប់ម្នាក់ឯង ៣ប្រកួតជាប់គ្នាក្នុងដី

បាល់ទាត់៖ ខ្សែប្រយុទ្ធន័រវេស Erling Haaland ជាថ្មីម្តងទៀតបានបង្កើតប្រវត្តិសាស្ត្រថ្មីនៅក្របខណ្ឌអង់គ្លេស Premier League គឺជាកីឡាករទី១ ក្នុងប្រវត្តិសាស្ត្រដែលស៊ុតបញ្ចូលទី ៣គ្រាប់ម្នាក់ឯង (Hat-Trick) បីប្រកួតជាប់គ្នានៅក្នុងដី។ បីគ្រាប់ម្នាក់ឯងក្នុងជំនួប Manchester Derby ម្សិលមិញ បូកនឹងបីគ្រាប់ម្នាក់ឯងរបស់កីឡាករអង់គ្លេស Phil Foden ធ្វើឱ្យ Manchester City យកឈ្នះ Manchester United ៦-៣។ បីគ្រាប់របស់ Manchester United ធ្វើបានដោយ Antony និងពីរគ្រាប់របស់ Anthony Martial ដែលដូរចូលនៅវគ្គទី២។ គិតមកដល់ពេលនេះ Haaland ស៊ុតបញ្ចូលទីបាន ១៧គ្រាប់ហើយក្នុងការបង្ហាញខ្លួន ១១ប្រកួតពោលគឺគិតជាមធ្យមភាគ ៥៤នាទី ១មួយគ្រាប់តាំងពីផ្លាស់ពី Borussia Dortmund។ លោក Pep Guardiola បានពណ៌នាពី Haaland ថា លោកមិនជឿនឹងភ្នែកខ្លួនឯងពីការស៊ុតបញ្ចូលទីរបស់ Haaland តែវាជាការពិត ហើយធ្លាប់កើតឡើងតាំងពីពេលនៅន័រវេស អូទ្រីស និងអាល្លឺម៉ង់។មួយទៀតលោកក៏សូមសរសើរកូនក្រុមទាំងអស់ ដែលរួមចំណែកសំខាន់ក្នុងការបញ្ជូនឱ្យ Haaland មានគ្រាប់បាល់ផងដែរ។ ជុំវិញការចូលលេងរាល់ការប្រកួតលោក Pep និយាយថា Man City មានសំណាងដែល Haaland មានអ្វីគ្រប់យ៉ាងនៅពេលនេះ មិនដូចពេលនៅ Dortmund ដែលមានការញាំញីដោយសាររបួស តែច្បាស់ណាស់ថា Haaland មានលទ្ធភាពអាចគ្រប់ ៩០នាទីរាល់ការប្រកួតទាំងអស់។ សូមបញ្ជាក់ថា ជ័យជំនះធ្វើឱ្យ Manchester City បន្តឈរលេខ២ ដេញពីក្រោយក្រុមកំពូលតារាង Arsenal ដែលឈ្នះ Spurs ៣-១ កាលពីថ្ងៃសៅរ៍ ១ពិន្ទុដដែល៕អត្ថបទ៖នាង សុភាវុធ

ពេជ្រ សម្បត្តិ ប្រើពេលត្រឹមមួយទឹកយកឈ្នះ ធន់ ផានិត ឡើងវគ្គផ្តាច់ព្រ័ត្រខ្សែក្រវាត់ខារ៉ាបាវរដូវកាលទី៨

គុនខ្មែរ៖ កំពូលកីឡាករគុនខ្មែររហ័សនាមក្របីព្រៃ ពេជ្រ សម្បត្តិ បានធ្វើឱ្យសង្វៀនស្ទូឌីយោស្ទឹងមានជ័យរបស់អគ្គនាយកដ្ឋានវិទ្យុ និងទូរទស្សន៍បាយ័នកក្រើកម្តងទៀត ក្រោយយកឈ្នះកីឡាករមិត្តរួមជាតិ ធន់ ផានិត ត្រឹមទឹកទី១ ដើម្បីឡើងវគ្គផ្តាច់ព្រ័ត្រ “ម្ចាស់ជើងឯកខ្សែក្រវាត់ខារ៉ាបាវ” រដូវកាលទី៨។ ជាការប្រកួតដែលអ្នកគាំទ្រគុនខ្មែរគ្រប់ទិសទីទន្ទឹងរង់ចាំចង់ដឹងថា កីឡាករទាំងពីរ ពេជ្រ សម្បត្តិ និងធន់ ផានិត ដែលសុទ្ធតែជាកីឡាករក្នុងចិត្តរបស់អ្នកគាំទ្រទាំងអស់ តែការប្រកួតបានត្រឹមមួយទឹកប៉ុណ្ណោះ បន្ទាប់ពីកូនសិស្សលោកគ្រូ ពេជ្រ សុផាន់ កីឡាករពេជ្រ សម្បត្តិ ប្រើកែងបុកចំក្រោមច្រមុះ ធន់ ផានិត បណ្តាលឱ្យបែកសន្លប់ ធ្វើឱ្យលោកអាជ្ញាកណ្តាល ម៉ី រតនៈ សំរេចចិត្តបញ្ឈប់ការប្រកួតភ្លាមៗ។ កីឡាករទាំងពីរឡើងមកកាន់វគ្គនេះសុទ្ធតែមាន ១០ពិន្ទុក្រោយឈ្នះ ៣ និងចាញ់ ១ ដូចគ្នា តែនៅពេលនេះមានតែម្នាក់ប៉ុណ្ណោះដើម្បីដណ្តើមខ្សែក្រវាត់ខារ៉ាបាវ លើសង្វៀនដែលមានការគាំទ្របំផុតនៅប្រទេសកម្ពុជា ដោយនឹងត្រូវជួបជាមួយកីឡាករថៃ។មួយគូដែលបានប្រកួតចប់មុន កីឡាករថៃពីររូបដែលមាន ១០ពិន្ទុដូចគ្នាក្នុងពូលដូចពូលកម្ពុជាដែរ ផាត់ថាណា ស៊ីតអាចានវីន បានយកឈ្នះមិត្តរួមជាតិថៃ ទួនប៉េ ស៊ីតសាមផាយ៉ាក ដោយពិន្ទុ។ ដូច្នេះការប្រកួតវគ្គផ្តាច់ព្រ័ត្រនឹងជាជំនួបរវាង ពេជ្រ សម្បត្តិ និង ផាត់ថាណា ស៊ីតអាចានវីន ដែលគ្រោងធ្វើឡើងនៅថ្ងៃទី២៣ ខែតុលានេះ។ ចំណែក ធន់ ផានិត និងទួនប៉េ ស៊ីតសាមផាយ៉ាក ក៏នឹងត្រូវជួបគ្នាម្តងទៀតនៅថ្ងៃជាមួយគ្នានោះដែរ ដើម្បីដណ្តើមចំណាតថ្នាក់លេខ៣៕អត្ថបទ៖នាង សុភាវុធ

ចិនចាត់ទុកមហាសន្និបាត និងការរត់កម្សាន្ដ OCA នៅកម្ពុជា ជាឱកាសផ្សព្វផ្សាយកីឡាអាស៊ី

កីឡាអាស៊ី៖ លោក Xu Jianfeng ប្រធានផ្នែកទំនាក់ទំនងការបរទេស នៃគណៈកម្មការរៀបចំការប្រកួតកីឡាអាស៊ី លើកទី១៩ នៅទីក្រុង Hangzhou (19th Asian Games Hangzhou 2022) បានចាត់ទុកមហាសន្និបាតក្រុមប្រឹក្សាកីឡាអូឡាំពិកអាស៊ី(OCA) និងកម្មវិធីរត់កម្សាន្ដ OCA Fun Run នៅកម្ពុជាគឺជាឱកាសផ្សព្វផ្សាយ និងបង្ហាញពីវឌ្ឍនភាពនៃដំណើរឆ្ពោះទៅការប្រកួតកីឡាអាស៊ីនៅប្រទេសចិន។ ការលើកឡើងនេះបន្ទាប់ពីក្រុមប្រឹក្សាកីឡាអូឡាំពិកអាស៊ី សហការជាមួយគណៈកម្មាធិការជាតិអូឡាំពិកកម្ពុជារៀបចំកម្មវិធី OCA Fun Run ដើម្បីអបអរសាទរដំណើរឆ្ពោះទៅកីឡាអាស៊ីលើកទី១៩ កាលពីថ្ងៃទី០២ ខែតុលាម្សិលមិញ ក្នុងគ្រាដែលកម្ពុជាកំពុងធ្វើម្ចាស់ផ្ទះរៀបចំមហាសន្និបាតក្រុមប្រឹក្សាកីឡាអូឡាំពិកអាស៊ីលើកទី៤១ ចាប់ពីថ្ងៃទី០១ ដល់ថ្ងៃទី០៥ ខែតុលា ឆ្នាំ២០២២។ លោក Xu Jianfeng បានសម្ដែងសេចក្ដីត្រេកអរដែលកម្ពុជាបានទទួលរៀបចំមហាសន្និបាត និងកម្មវិធីរត់កម្សាន្ដ OCA Fun Run ដែលជាការផ្ដល់នូវអត្ថប្រយោជន៍ជាច្រើនដល់គណៈកម្មការរបស់ខ្លួន ក៏ដូចជាមុខមាត់ប្រទេសចិន ដើម្បីផ្សាយផ្សាយពីការប្រកួតកីឡាអាស៊ីដល់មហាជន ពិសេសបណ្ដាប្រទេសសមាជិក OCA ដែលចូលរួមមហាសន្និបាតនៅកម្ពុជា ហើយក៏ជាឱកាសធ្វើបទបង្ហាញពីវឌ្ឍនភាព នៃការត្រៀមរៀបចំព្រឹត្តិការណ៍កីឡាប្រចាំទ្វីបអាស៊ី ៤ឆ្នាំម្ដង ដែលត្រូវបានលើកពេលទៅចុងឆ្នាំ២០២៣ នេះផងដែរ។រីឯមន្ដ្រី OCA លោក Wissan Trkmani បានបញ្ជាក់ថា គោលបំណងនៃការរៀបចំកម្មវិធីរត់កម្សាន្ដ ៣គីឡូម៉ែត្រ និង ៥គីឡូម៉ែត្រនេះគឺដើម្បីផ្សព្វផ្សាយពីកីឡាអាស៊ីនៅទីក្រុង Hangzhou និងលើកឡើងនូវប្រធានបទមួយដែល Asian Games ផ្ដោតសំខាន់គឺកីឡាដើម្បីទាំងអស់គ្នា មានន័យថា កីឡាសម្រាប់មហាជនគ្រប់ជាតិសាសន៍ មិនប្រកាន់ពណ៌សម្បុរ ភេទ អាយុ ឬនិន្នាការអ្វីឡើយ ជាក់ស្ដែងការរត់កម្សាន្ដនេះបើកឲ្យមហាជនទូទៅចូលរួម ដោយផ្ដោតលើគុណតម្លៃនៃកីឡាអូឡាំពិក មិនផ្ដោតលើការចាញ់-ឈ្នះនោះទេគឺផ្ដោតទៅលើការចូលរួម។ ជាថ្មីម្ដងទៀត ក្នុងនាម OCA លោកបានសម្ដែងការអរគុណដល់រាជរដ្ឋាភិបាលកម្ពុជា និង NOCC ដែលបានសហការយ៉ាងល្អជាមួយ OCA ដើម្បីរៀបចំនូវកម្មវិធីនេះ ពិសេសមហាសន្និបាតលើកទី៤១ ដែលមានលក្ខណៈល្អឥតខ្ចោះ ទាំងការទទួលបដិសណ្ឋារកិច្ច និងការស្នាក់នៅ-ហូបចុកជាដើម។លោកបានបង្ហាញសុទិដ្ឋិនិយមថា តាមរយៈការរៀបចំកម្មវិធីទាំងអស់នេះ គឺជាឱកាសកម្ពុជាបង្ហាញនូវភាពខ្លាំងរបស់ខ្លួន ហើយក៏ជាភាពល្អទៅកាន់ដៃគូជាម្ចាស់ផ្ទះកីឡាស៊ីហ្គេមឆ្នាំ២០២៣ ផងដែរ។ ដោយឡែកឯកឧត្តម វ៉ាត់ ចំរើន បានបង្ហាញការស្វាគមន៍យ៉ាងកក់ក្ដៅ ចំពោះការរៀបចំកម្មវិធីរត់កម្សាន្ដនេះ ហើយឯកឧត្ដមបានចាត់ទុកវេទិការនេះ គឺជាឱកាសហ្វឹកហាត់ និងជាបទពិសោធន៍ដ៏ល្អ ពោលគឺជាបទពិសោធន៍ផ្ទាល់ដែលត្រូវរៀនសូត្រ សម្រាប់ដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ មានន័យថា ជាឱកាសដើម្បីហ្វឹកហាត់ការងារ ទាំងការងារទំនាក់ទំនង ទទួលបដិសណ្ឋារកិច្ច ការស្នាក់នៅ-ហូបចុក និងការរៀបចំកម្មវិធីផ្សេងៗទៀត។ សូមបញ្ជាក់ថា មហាសន្និបាត OCA លើកទី៤១ នឹងប្រារព្ធពិធីបើកនាព្រឹកថ្ងៃទី០៤ ខែតុលា ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ហើយសម្ដេចតេជោនាយករដ្ឋមន្ដ្រីនឹងថ្លែងសន្ទរកថាបើក និងសន្ទរកថាគន្លឹះ ដើម្បីស្វាគមន៍ចំពោះឥស្សរជនកីឡា និងថ្នាក់ដឹកនាំចលនាអូឡាំពិកអាស៊ី និងអន្ដរជាតិប្រមាណ ៤០០នាក់មកពីជាង ៥០ប្រទេសលើពិភពលោក ដែលនឹងចូលរួមព្រឹត្តិការណ៍ដ៏ធំនេះផងដែរ៕អត្ថបទ៖ លី ឈុនឡា

ក្រសួងមហាផ្ទៃឈ្នះមេដាយច្រើនជាងគេនៃការប្រកួតតេក្វាន់ដូ ITF ជើងឯកជាតិឆ្នាំនេះ

តេក្វាន់ដូ៖ ក្រុមកីឡាករ-កីឡាការិនីតេក្វាន់ដូ ITF របស់ក្រសួងមហាផ្ទៃដណ្ដើមបានមេដាយច្រើនជាងគេ ក្នុងការប្រកួតជ្រើសរើសជើងឯកថ្នាក់ជាតិឆ្នាំ២០២២ បន្ទាប់ពីឆ្លងកាត់ការប្រកួតដ៏ស្វិតស្វាញកាលពីចុងសប្ដាហ៍កន្លងទៅ នៅសាលដំបូលទូកនៃសាកលវិទ្យាល័យភូមិន្ទភ្នំពេញ។ ពិធីបិទការប្រកួតនេះបានធ្វើឡើងក្រោមវត្តមានឯកឧត្តម កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា និងជាប្រធានសហព័ន្ធកីឡាតេក្វាន់ដូ ITF អាស៊ីអាគ្នេយ៍។ ឯកឧត្តមបានវាយតម្លៃខ្ពស់ចំពោះការខិតខំរបស់កីឡាករ-កីឡាការិនី ក៏ដូចជាគណៈកម្មការបច្ចេកទេស ដែលស្ដែងឲ្យឃើញភាពរីកចម្រើនមួយកម្រិតទៀតរបស់កីឡាតេក្វាន់ដូ ITF កម្ពុជាបច្ចុប្បន្ន។ ឯកឧត្តម បួនហ៊ីង សុធីយ៉ា អគ្គលេខាធិការសហព័ន្ធបានឲ្យដឹងថា ជើងឯកថ្នាក់ជាតិឆ្នាំនេះមានកីឡាករ-កីឡាការិនីចូលរួមចំនួន ១៣៨នាក់មកពី ១៧សមាគម/ក្លិប។ ជាលទ្ធផលក្រសួងមហាផ្ទៃដណ្ដើមបានមេដាយច្រើនជាងគេសរុប ២០គ្រឿង (មាស ៨ ប្រាក់ ៤ និងសំរិទ្ធ ៨) ខណៈក្រសួងសេដ្ឋកិច្ច និងហិរញ្ញវត្ថុឈរលេខ២ ឈ្នះមេដាយសរុប ១៤គ្រឿង (មាស ២ ប្រាក់ ៤ និងសំរិទ្ធ ៨)។ចំណែកក្លិបយុវជនឈរលេខ៣ ឈ្នះមេដាយសរុប ៥គ្រឿង (មាស ២ និងប្រាក់ ៣)។ ក្លិប ស.ស.យ.ក ខេត្តកំពង់ស្ពឺ ឈ្នះមេដាយសរុប ៦គ្រឿង (មាស ២ ប្រាក់ ២ និងសំរិទ្ធ ២) ខណៈវិទ្យាស្ថានបច្ចេកវិទ្យាប្រាជ្ញាសាស្ត្រឈ្នះមេដាយសរុប ៦គ្រឿងដូចគ្នា (មាស ២ គ្រឿង ប្រាក់ ១ និងសំរិទ្ធ ៣)។ រីឯក្លិបសេរីភាពដណ្តើមបានមេដាយសរុប ៣គ្រឿង (មាស ២ និងប្រាក់ ១)។ ក្លិបមិត្តភាពដណ្ដើមបានមេដាយមាស ២ និងខេត្តកោះកុងដណ្តើមបានមេដាយសរុប ៦គ្រឿង (មាស ១ ប្រាក់ ១ និងសំរិទ្ធ ៤ គ្រឿង៕អត្ថបទ៖ លី ឈុនឡា

ឯកឧត្តម វ៉ាត់ ចំរើន ពន្យល់ពីការដាក់កីឡា Muay នៅស៊ីហ្គេម កុំឲ្យភាន់ច្រឡំរវាង គុនខ្មែរ និង Muay Thai

ភ្នំពេញ៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) និងជាប្រធានសហព័ន្ធកីឡា Muay អាស៊ី បានពន្យល់ពីការកំណត់កីឡា Muay ដាក់ក្នុងការប្រកួតកីឡាស៊ីហ្គេម ដើម្បីចៀសវាងការភាន់ច្រឡំ រវាងប្រដាល់ «គុនខ្មែរ» និង «Muay Thai» បន្ដទៀត ។ការបកស្រាយរបស់ឯកឧត្តម បន្ទាប់ពីសង្កេតឃើញមានការយល់ច្រឡំអំពីកីឡាគុនខ្មែរ និង Muay Thai ដែលបានលើកឡើងលើបណ្ដាញសង្គមជាហូរហែនាពេលកន្លងមក ដោយឯកឧត្តម បានពន្យល់ថា ៖«នៅក្នុងធម្មនុញ្ញរបស់សហព័ន្ធកីឡាអាស៊ីអាគ្នេយ៍បានដាក់ពាក្យថា «កីឡា Muay» ជាគុនខ្មែរ ហើយពេលនេះ កម្ពុជាធ្វើម្ចាស់ផ្ទះ កម្ពុជាក៏ត្រូវប្រកួតកីឡា Muay ប៉ុន្ដែកម្ពុជាបានសុំការឯកភាពពីគេដាក់ថា គុនខ្មែរ ។ កម្ពុជា ចូលរួមក្នុងកីឡា Muay ក៏ប៉ុន្ដែជាគុនខ្មែរ មិនមែន Muay Thai ទេ។ Muay Thai គឺ Muay Thai ដូច្នេះកីឡា Muay គឺមិនមែន Muay Thai ទេ ។ឯកឧត្តម បានលើកឡើងថា ក្នុងនាមប្រធានសហព័ន្ធកីឡា Muay អាស៊ី គឺមិនមែន Muay Thai ហើយប្រធានរបស់សហព័ន្ធកីឡា Muay ពិភពលោក គឺជនជាតិឡាវ លោក Say Samone Sayasone ប៉ុន្តែក៏មិនមែន Muay Thai ដែរ។ កម្ពុជាក៏មិនចូលរួមជាសមាជិកក្នុងសមាគមមួយថៃអន្ដរជាតិ IFMA នោះ ប៉ុន្ដែបើជាសកម្មភាពកីឡាប្រកួត កម្ពុជាប្រកួតនៅក្រៅប្រទេស បើខាង Muay Thai អញ្ជើញ កម្ពុជាចូលរួមប្រកួតលក្ខណៈ Muay Thai ប៉ុន្ដែបើថៃ ឬប្រទេសផ្សេងមកស្រុកខ្មែរវិញ ពួកគេត្រូវចូលរួមប្រកួតជាលក្ខណៈ គុនខ្មែរ។ នេះគឺជាគោលការណ៍របស់គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា និងជាអនុសាសន៍ណែនាំរបស់ថ្នាក់ដឹកនាំ ដើម្បីរក្សាក្បាច់គុនអត្តសញ្ញាណជាតិខ្មែរ ។ តែកាលណាគេប្រកួតកីឡាប្រដាល់គុនខ្មែរ សូម្បី Muay Thai ក៏ដោយ នៅស្រុកខ្មែរ គឺត្រូវគោរពតាមឈ្មោះ គោលការណ៍ និងបទបញ្ជាប្រកួតរបស់ គុនខ្មែរ ហើយខ្មែរ ទៅប្រកួតក្រៅប្រទេស ដែល Muay Thai អញ្ជើញ គឺប្រកួតធម្មតា ដោយគ្មានការរើសអើងទេ ពោលគឺចូលរួមប្រកួត ដើម្បីបង្កើនសមត្ថភាព និងការងារបច្ចេកទេស តែមិនមែនបានន័យថា កម្ពុជា ជាសមាជិក Muay Thai នោះទេ គ្រាន់តែជាសមាជិករបស់កីឡា Muay ប៉ុណ្ណោះ ។ប្រតិបត្តិករកីឡាដ៏ឆ្នើមរបស់កម្ពុជាដដែល ពន្យល់បន្ថែមថា ពាក្យថា Muay ប្រទេសឡាវ ក៏ប្រើពាក្យហ្នឹង ថៃក៏ប្រើពាក្យហ្នឹង ពោលគឺប្រើរួមសម្រាប់ការប្រកួតក្នុងស៊ីហ្គេម ។ ប៉ុន្ដែកម្ពុជា បានធ្វើការតវ៉ា ក្នុងការរក្សាអត្តសញ្ញាណរបស់គុនខ្មែរ គ្រប់វេទិកាទាំងអស់ នៃការចរចាគ្នា ដោយគ្មានការគាំទ្រ ឬឯកភាពទៅលើពាក្យថា Muay Thai ដាក់នៅក្នុងការប្រកួតកីឡាស៊ីហ្គេមឡើយ ពោលគឺគាំទ្រដាក់ត្រឹមពាក្យថា Muay មានន័យថា ប្រដាល់ ដែលជាភាសារបស់ថៃ និងឡាវ ហៅដូចគ្នា ។ ប៉ុន្ដែក៏មានអង្គការគ្រប់គ្រងខុសគ្នាដែរ Muay Thai គឺគ្រប់គ្រងដោយសហព័ន្ធ Muay Thai អន្ដរជាតិ ។ រីឯកីឡា Muay នៅថៃ គេមានសហព័ន្ធកីឡា Muay ពិភពលោក មួយផ្សេងទៀត» ។ ឯកឧត្តម វ៉ាត់ ចំរើន បានសង្កត់ធ្ងន់ថា ការបង្កើតសហព័ន្ធកីឡា Muay ពិភពលោក និងសហព័ន្ធកីឡា Muay អាស៊ីនេះ គឺមានប្រទេសចូលរួមទាំងអស់ ហើយកម្ពុជាបានប្រកាន់យកពាក្យ Muay ជាមួយពាក្យថា គុនខ្មែរ ក្នុងរង្វង់នៃការការពារអត្តសញ្ញាណរបស់ខ្មែរ ។ រាល់ការប្រកួតនៅក្នុងស្រុក គឺត្រូវយកទម្រង់នៃការប្រកួតគុនខ្មែរ និងឈ្មោះ គុនខ្មែរ ដោយយកពាក្យក្នុងភាសាច្បាប់របស់ស៊ីហ្គេម ដែលគេដាក់ឈ្មោះថា កីឡា Muay» ។ ទន្ទឹមជាមួយគ្នា ឯកឧត្តមក៏បានឲ្យមតិសាធារណៈទាំងអស់ មេត្ដាយោគយល់ ហើយបន្ដនូវការគាំទ្រ ការការពារ និងថែរក្សាអត្តសញ្ញាណរបស់ជាតិនេះ ជារាងរហូត មិនឲ្យមានការប៉ះពាល់ទេ ។ លើសពីនេះ ឯកឧត្តមក៏ថ្លែងអំណរគុណ ដល់ការយកចិត្តទុកដាក់ និងការចូលរួមអភិរក្ស និងអភិវឌ្ឍន៍គុនខ្មែរទាំងអស់គ្នាផងដែរ ។ ឯកឧត្តមថា រួមគ្នាធ្វើការអភិរក្ស ដើម្បីការអភិវឌ្ឍ រួមគ្នាអភិវឌ្ឍន៍ ដើម្បីការអភិរក្ស រក្សាអត្ដសញ្ញាណក្បាច់គុនព្រលឹងជាតិ គឺគុនខ្មែរ ៕ អត្ថបទ៖ លី ឈុនឡា

ខ្សែបម្រើ Arsenal, Emile Smith Rowe ត្រូវអវត្តមានដល់ខែធ្នូដោយសាររបួស

បាល់ទាត់៖ ខ្សែបម្រើក្រុមកាំភ្លើងធំ Arsenal, Emile Smith Rowe បានទទួលការវះកាត់បញ្ហាក្រលៀនរបស់ខ្លួនដោយជោគជ័យ តែរំពឹងថានឹងត្រូវសម្រាកយ៉ាងហោចណាស់ដល់ខែធ្នូចុងឆ្នាំនេះ។ កីឡាករវ័យ ២២ឆ្នាំរូបនេះបានបង្ហាញខ្លួន ៤លើករដូវកាលនេះនៅ Premier League តែត្រឹមជាកីឡាករបម្រុងផ្លាស់ប្ដូរចូល។ ចុងក្រោយបំផុត Smith Rowe បានរងរបួសអំឡុងបរាជ័យនៅទឹកដី Manchester United ដែលជារបួសចាស់។ រំលឹកថា Smith Rowe មានរដូវកាលដ៏ល្អរបស់ខ្លួនកាលពីរដូវកាលមុនដោយរកបាន ១០គ្រាប់។ យ៉ាងណាក្តីរបស់គេនៅពេលនេះ គឺនឹងមិនប៉ះពាល់ដល់ការប្រកួតច្រើនពេលនោះទេដោយសារ Premier League នឹងសម្រាកនៅខែវិច្ឆិកាខាងមុន ខណៈក្រុមជំរើសជាតិនីមួយៗត្រៀមការប្រកួតនៅ World Cup ប្រទេសកាតា។ Arsenal នឹងត្រូវទទួលក្រុមរួមទីក្រុងឡុងដ៍ Tottenham Hotspur ថ្ងៃសៅរ៍នេះ៕អត្ថបទ៖នាង សុភាវុធ

Antonio Conte ស្នើឱ្យដាក់បម្រាមមួយជីវិតលើអ្នកគាំទ្រដែលចោលចេកមកលើ Richarlison

បាល់ទាត់៖ គ្រូបង្វឹក Spurs លោក Antonio Conte ស្នើឱ្យវែកមុខអ្នកចោលចេកមកលើ Richarlison អំឡុងការប្រកួតឱ្យក្រុមជម្រើសជាតិប្រេស៊ីលកាលពីថ្ងៃអង្គារនៅទីក្រុងប៉ារីស និងស្នើឱ្យដាក់ពិន័យដល់មួយជីវិតលើអ្នកគាំទ្រនោះ។ ខ្សែប្រយុទ្ធ Spurs, Richarlison ជាថ្មីម្តងទៀតបានរងគ្រោះក្នុងការរើសអើងពីអ្នកគាំទ្រ អំឡុងការប្រកួតដែលប្រេស៊ីលយកឈ្នះទុយនីស៊ី ៥-១ ក្នុងជំនួបមិត្តភាពអន្តរជាតិ។ Richarlison ជាអ្នកស៊ុតបញ្ចូលទីគ្រាប់នាំមុខ ២-០ បន្ទាប់ពីគ្រាប់ដំបូងធ្វើបានដោយ Raphinha តែការអបអរសាទរគ្រាប់បាល់របស់ Richarlison នោះ អ្នកគាំទ្របានចោលចេកមកលើទីលានដែលជាទង្វើររើសអើងមួយ។ សហព័ន្ធបាល់ទាត់ប្រេស៊ីល ក៏ដូចជាម្ចាស់ផ្ទះបារាំងបានថ្កោលទោស និងទទូចឱ្យរកមុខអ្នកគាំទ្រដែលមានទង្វើរអសីលធម៌នេះ។ថ្មីៗនេះដែរក្លិបបាល់ទាត់នៅ Premier League ទាំងអស់បានយល់ព្រមច្បាប់ដាក់ពិន័យលើអ្នកគាំទ្រណាដែលមានអាកប្បកិរិយាមិនសមរម្យ និងរើសអើងជាដើមនឹងត្រូវដាកបម្រាមយ៉ាងហោចណាស់មួយឆ្នាំ។ តែលោក Conte ថា មួយឆ្នាំមិនគ្រប់គ្រាន់ឡើយ ដាក់មួយជីវិតទើបសម។ Spurs នឹងត្រូវធ្វើដំណើរទៅទឹកដី Arsenal ចុងសប្តាហ៍នេះនៅក្របខណ្ឌ English Premier League៕អត្ថបទ៖នាង សុភាវុធ

ក្រុមហ៊ុន KAM Sports របស់អាមេរិកចាប់អារម្មណ៍ចង់ទិញក្លិប Everton

បាល់ទាត់៖ ក្រុមហ៊ុន KAM Sports ដែលមានមូលដ្ឋាននៅសហរដ្ឋអាមេរិក នៅតែចាប់អារម្មណ៍ក្នុងការទិញយកភាគហ៊ុនធំក្លិប Everton មកគ្រប់គ្រង នេះបើតាមការចុះផ្សាយរបសសារព័ត៌មានអង់គ្លេស BBC។ ក្រុមហ៊ុនមួយនេះធ្លាប់បានធ្វើទំនាក់ទំនងចរចាទិញ Everton ម្តងរួចមកហើយកាលពីដើមឆ្នាំ២០២២ នេះ តែម្ចាស់ក្លិប Everton បច្ចុប្បន្នលោក Farhad Moshiri មិនព្រមលក់។ KAM Sports គឺស្ថិតក្រោមការគ្រប់គ្រងរបស់ Kaminski Family ដែលមានមូលដ្ឋាន Minneapolis ដែលជាក្រុមហ៊ុនវិនិយោគអចលនទ្រព្យមួយនៅសហរដ្ឋអាមេរិក។ Kaminski Family ក៏ធ្លាប់ជាសមាជិករបស់លោក Peter Kenyon ដែរដែលធ្លាប់ចង់ទិញភាគហ៊ុនរបស់ Everton ផងដែរនាពេលកន្លងមក។ លោក Peter Kenyon គឺជាអតីតនាយកក្លិប Manchester United និង Chelsea កាលពីអតីតកាល។ដោយឡែកទោះបីមានការចង់បាន Everton ពីអ្នកវិនិយោគមួយចំនួនក្តី ម្ចាស់ក្លិបបច្ចុប្បន្នលោក Farhad Moshiri នៅតែប្រកាន់ជំហរមិនលក់ឡើយ។ តាំងពីកាន់កាប់ភាគហ៊ុនធំរបស់ Everton នៅឆ្នាំ២០១៦ លោក Moshiri បានចាយលុយវិនិយោគក្លិបជាច្រើនលានផោន ដូចជាការសាងសង់កីឡដ្ឋានថ្មីដែលមានកៅអីសរុប ៥៣,០០០ ដែលនឹងរួចរាល់នៅឆ្នាំ២០២៤។ យ៉ាងណាក្តី Everton ក៏មានការខាតបង់ជិត ៤០០លានផោនក្នុងរយៈពេល ៣រដូវកាលចុងក្រោយ ដែលមានការលំបាក និងប្រឈមនឹងការកាត់ចោល៕អត្ថបទ៖នាង សុភាវុធ

ការធ្វើតេស្ត Covid-19 នៅតែចាំបាច់សម្រាប់ការចូលរួមរបស់អ្នកគាំទ្រនៅ World Cup

បាល់ទាត់៖ អ្នកគាំទ្រដែលចូលរួមទស្សនាការប្រកួត World Cup 2022 នៅកាតាឆ្នាំនេះ នៅតែតម្រូវឱ្យធ្វើតេស្តរកមេរោគ Covid-19 ដដែល នេះបើតាមការប្រកាសផ្លូវការរបស់ម្ចាស់ផ្ទះកាតា។ អ្នកគាំទ្រទាំងអស់ចាប់ពីអាយុ ៦ឆ្នាំឡើងត្រូវបង្ហាញលទ្ធផលតេស្តអវិជ្ជមាន Covid-19 ដោយម៉ាស៊ីន PCR រយៈពេល ៤៨ម៉ោងក្រោយពេលចេញលទ្ធផលតេស្ត។ សម្រាប់ការធ្វើតេស្តរហ័សមិនត្រូវបានអនុញ្ញាតឡើយ តែនឹងមិនមានការធ្វើតេស្តបន្ថែមណាមួយទៀតឡើយ លើកលែងតែមានចេញអាការៈនៃមេរោគ Covid-19។ ជាមួយគ្នានោះដែរអ្នកគាំទ្រដែលមានអាយុ ១៨ឆ្នាំឡើងទៅគឺតម្រូវឱ្យទាញយកកម្មវិធី ដែលគ្រប់គ្រងដោយរដ្ឋាភិបាលកាតាដាក់ក្នុងទូរស័ព្ទដៃរបស់ខ្លួន ដើម្បីងាយស្រួលក្នុងការគ្រប់គ្រងការចល័តរបស់ភ្ញៀវទេសចរណ៍ដែលពាក់ព័ន្ធនឹងអ្នកជំងឺ Covid-19។អ្នកគាំទ្រទាំងអស់ត្រូវពាក់ម៉ាស់ជាប់ជានិច្ចនៅលើមធ្យោបាយធ្វើដំណើរសាធារណៈដូចជា រថយន្តក្រុង រឺតាក់ស៊ីជាដើម តែសម្រាប់អ្នកចាក់វ៉ាក់សាំង និងអ្នកមិនបានចាក់វ៉ាក់សាំងត្រូវបានអនុញ្ញាតឲ្យចូលទស្សនាបានដូចគ្នា។ សូមបញ្ជាក់ថា ប្រទេសកាតាមានអ្នកឆ្លងមេរោគ Covid-19 សរុប ៤៤០.០០០ករណី និងមានអ្នកស្លាប់សរុប ៦៩២នាក់តាំងពីការផ្ទុះឡើងនៃមេរោគ Covid-19។ កាតាមានប្រជាជនសរុបប្រមាណ ២.៨០០.០០០នាក់ដោយក្នុងនោះមានអ្នកចាក់វ៉ាក់សាំងសរុបជាង ៧លានដូសមកទល់ពេលនេះ៕អត្ថបទ៖នាង សុភាវុធ

Barcelona នៅតែឈរលើគេជាក្លិបដែលមានអ្នកទស្សនាច្រើនបំផុតក្នុងមួយប្រកួត

បាល់ទាត់៖ ក្លិបយក្សអេស្ប៉ាញ FC Barcelona នៅតែឈរលើគេដដែល ជាក្លិបដែលមានអ្នកគាំទ្រចូលរួមទស្សនាផ្ទាល់ច្រើនបំផុតក្នុងមួយប្រកួត។ បើតាមការចុះផ្សាយពីសារព័ត៌មាន Sport របស់អេស្ប៉ាញឱ្យដឹងថា Barcelona មានអ្នកគាំទ្រចូលទស្សនាការប្រកួតក្នុងដីជាមធ្យម ៨៣,៣៤៨នាក់ក្នុងរដូវកាល ២០២២ នេះ ដែលចំនួននេះគឺជាចំនួនច្រើនបំផុតបើប្រៀបធៀបនឹងក្លិបផ្សេងទៀតនៅតំបន់អឺរ៉ុប។Barcelona ជាក្លិបអេស្ប៉ាញតែមួយគត់ដែលឈរក្នុងលំដាប់ Top10 នេះ ខណៈក្លិបអាល្លឺម៉ង់ Borussia Dortmund ឈរលេខ២ មានអ្នកគាំទ្រទស្សនាមធ្យម ៨០,០០០នាក់នៅកីឡដ្ឋាន Signal Iduna Park។ ក្លិបផ្សេងទៀតដែលមានអ្នកគាំទ្រចូលទស្សនាចជាមធ្យមលើសពី ៧០,០០០នាក់មានដូចជា Bayern Munich, Manchester United, Inter Milan និង AC Milan។ ក្លិបដែលស្ថិតក្នុង Top10 ដែលតែមានមធ្យមភាគអ្នកចូលទស្សនាជាង ៥០,០០០នាក់មាន Tottenham Hotspur, Marseille, Schalke និង West Ham៕អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

មនុស្ស៦នាក់ស្លាប់ និងម្នាក់រងរបួសធ្ងន់ក្នុងប្រតិបត្តិការបង្ក្រាបគ្រឿងញៀននៅវាលវែង

ពលរដ្ឋកូរ៉េខាងត្បូងស្វែងរកកន្លែងត្រជាក់នៅក្នុងរូងភ្នំក្រោមដី ខណៈរលកកកម្តៅវាយប្រហារប្រទេសមួយនេះ

បំណែកដំណាក់កាលទី ២នៃយានចម្លងរបស់ក្រុមហ៊ុន SpaceXនឹងធ្លាក់លើឋានព្រះចន្ទនៅថ្ងៃពុធនេះ

ពលរដ្ឋរស់នៅរដ្ឋ Assam ប្រទេសឥណ្ឌា បាត់បង់អ្វីៗគ្រប់បែបយ៉ាងដោយសារទឹកជំនន់

ការវាយប្រហារមីស៊ីលបាលីស្ទិករុស្ស៊ី បង្កជាអគ្គិភ័យជាច្រើនកន្លែងនៅទីក្រុងគីវ របស់អ៊ុយក្រែន

ជនអន្តោប្រវេសនាំគ្នាសម្រាកនៅលើឆ្នេរសមុទ្រស្ថិតក្នុងដែនដី Ceuta របស់អេស្ប៉ាញ ក្រោយការជាន់គ្នាស្លាប់មនុស្ស

សារព័ត៌មានរដ្ឋអ៊ីរ៉ង់បង្ហាញស្ពានរងការខូចខាត ក្រោយការវាយប្រហាររបស់សហរដ្ឋអាមេរិក

ពលរដ្ឋហ្គាតេម៉ាឡាជម្លៀសខ្លួនទៅកាន់ទីជម្រក ពេលភ្នំភ្លើងព្រួសកម្អែកាន់តែខ្លាំង

អគ្គិភ័យក្នុងរោងចក្រគីមី បង្ខំឲ្យជម្លៀសអ្នកស្រុក ១៥០នាក់នៅតំបន់ជាយក្រុង Sao Paulo ប្រទេសប្រេស៊ីល

លោក Macron បញ្ជាក់ថា EU នឹងបង្កើនសម្ពាធលើរុស្ស៊ី និងពង្រឹងការគាំទ្រផ្នែកយោធាដល់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានកីឡា

ចិន​ចាត់ទុក​មហាសន្និបាត និង​ការរត់​កម្សាន្ដ​ OCA ​នៅ​កម្ពុជា ជា​ឱកាស​ផ្សព្វផ្សាយ​កីឡា​អាស៊ី​

ក្រសួងមហាផ្ទៃ​ឈ្នះ​មេដាយ​ច្រើន​ជាង​គេនៃ​ការប្រកួត​តេ​ក្វាន់​ដូ​ ITF ​ជើងឯក​ជាតិ​ឆ្នាំនេះ​

ឯកឧត្តម វ៉ាត់ ចំរើន ពន្យល់ពីការដាក់កីឡា Muay នៅស៊ីហ្គេម កុំឲ្យភាន់ច្រឡំរវាង គុនខ្មែរ និង Muay Thai

ខ្សែបម្រើ Arsenal, Emile Smith Rowe ត្រូវ​អវត្តមាន​ដល់​ខែ​ធ្នូ​ដោយសារ​របួស​

Antonio Conte ស្នើឱ្យ​ដាក់​បម្រាម​មួយជីវិត​លើ​អ្នកគាំទ្រ​ដែល​ចោល​ចេក​មកលើ Richarlison

ក្រុមហ៊ុន KAM Sports របស់​អាមេរិក​ចាប់អារម្មណ៍​ចង់​ទិញ​ក្លិប Everton

ការធ្វើ​តេស្ត​ Covid-19 នៅតែ​ចាំបាច់​សម្រាប់​ការចូលរួម​របស់​អ្នកគាំទ្រ​នៅ World Cup

Barcelona នៅតែ​ឈរលើ​គេ​ជា​ក្លិប​ដែលមាន​អ្នកទស្សនា​ច្រើន​បំផុត​ក្នុង​មួយ​ប្រកួត