BTV NEWS

ការប្រជែងកៅអីក្នុងពូលC នៃពានសម្ដេចតេជោ-ថ្នាក់ខេត្ត ចាប់ផ្ដើមឡើងកម្ដៅ ក្រោយចប់សប្ដាហ៍ទី៣

ពានបើករដូវកាលរវាងព្រះខ័នរាជ និងវិសាខា នឹងធ្វើឡើង ១សប្ដាហ៍មុនលីគរដូវកាលថ្មីចាប់ផ្ដើម

ស្ទឹងត្រែង និងបាត់ដំបង រក្សាភាពខ្លាំង តែបន្ទាយមានជ័យ បន្ដស្មើក្នុងពានសម្ដេចតេជោ ហ៊ុន សែន ថ្នាក់ខេត្ត

Arsenal ព្រមព្រៀងតម្លៃផ្ទេរ ៧៥ លានផោននាំយក Bruno Guimaraes ពី Newcastle

ព័ត៌មានកីឡា

វៀតណាមនឹងជួយរៀបចំការប្រកួតកីឡាអេឡិចត្រូនិចទាំងស្រុងនៅស៊ីហ្គេមឆ្នាំ២០២៣

កីឡាអេឡិចត្រូនិច៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) និងសហព័ន្ធកីឡាអេឡិចត្រូនិចកម្ពុជានៅថ្ងៃទី០៧ ខែកញ្ញានេះបានធ្វើការចុះអនុស្សារណៈយោគយល់គ្នា(MOU) ជាមួយសហព័ន្ធកីឡាអេឡិចត្រូនិចវៀតណាម លើកិច្ចព្រមព្រៀងជួយរៀបចំការប្រកួតទាំងស្រុង សម្រាប់កីឡាអេឡិចត្រូនិចនៃព្រឹត្តិការណ៍ស៊ីហ្គេមឆ្នាំ២០២៣ នៅកម្ពុជា។ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC មានប្រសាសន៍ថា ការចុះ MOU នេះធ្វើឡើងក្រោយមានការអនុញ្ញាតដ៏ខ្ពង់ខ្ពស់ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC និងឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC ហើយភាគីវៀតណាមបានព្រមព្រៀងជួយរៀបចំការប្រកួតកីឡាអេឡិចត្រូនិចទាំងស្រុង ទាំងសម្ភារៈ បច្ចេកទេស និងធនធានមនុស្ស។ លើសពីនេះភាគីវៀតណាមថែមទាំងសន្យាជួយបណ្ដុះបណ្ដាលដល់កីឡាករ-កីឡាការិនីកម្ពុជាទៀតផង។បន្ទាប់ពីការចុះ MOU លើភាពជាដៃគូ ភាគីកម្ពុជា និងវៀតណាមក៏ត្រៀមសហការគ្នារៀបចំការប្រកួត Pre-Sea Games មួយអំឡុងចុងឆ្នាំ២០២២ ឬដើមឆ្នាំ២០២៣ ខាងមុខ ដែលជាការតេស្ដសាកល្បងជំនាញ ឧបករណ៍ សម្ភារៈ និងបច្ចេកវិទ្យាផង ក៏ដូចជាការវាស់ស្ទង់សមត្ថភាពរបស់កីឡាករកម្ពុជាផង ពិសេសដើម្បីវាយតម្លៃជារួមពីចំណុចខ្លាំង និងចំណុចខ្សោយក្នុងការធ្វើការសាកល្បង ដើម្បីត្រៀមឲ្យបានគ្រប់ជ្រុងជ្រោយសម្រាប់ការប្រកួតកីឡាស៊ីហ្គេម ឆ្នាំ២០២៣ នៅកម្ពុជាផងដែរ៕អត្ថបទ៖ លី ឈុនឡា

Casper Ruud យកឈ្នះ Matteo Berrettini ឡើងវគ្គពាក់កណ្តាលផ្តាច់ព្រ័ត្រ US Open

វាយកូនបាល់៖ កីឡាករន័រវេស Casper Ruud បានហក់ឡើងចំណាត់ថ្នាក់លេខ២ ពិភពលោកហើយក្រោយយកឈ្នះកីឡាករអ៊ីតាលី Matteo Berrettini ឡើងវគ្គពាក់កណ្តាលផ្តាច់ព្រ័ត្រ Grand Slam, US Open។ នេះជាការឈានឡើងវគ្គ ៤នាក់ចុងក្រោយ US Open ដំបូងបំផុតសំរាប់កីឡាករវ័យ ២៣ឆ្នាំរូបនេះក្រោយយកឈ្នះកីឡាករលំដាប់លេខ ១៣ Berrettini ដោយលទ្ធផល ៣សិតផ្ទួនៗ ៦-១, ៦-៤ និង ៧-៦(៧-៤)។ Casper Ruud នៅពេលនេះមានឱកាសឡើងឈរលេខ១ ពិភពលោកប្រសិនបើអាចយកឈ្នះការប្រកួតនៅវគ្គពាក់កណ្តាលផ្តាច់ព្រ័ត្រ។ ចំណែកការប្រកួតផ្នែកនារីវិញកីឡាការិនីទុយនេស៊ី Ons Jabeur ក៏បានបន្តដំណើរឡើងវគ្គពាក់កណ្តាលផ្តាច់ព្រ័ត្រជាលើកដំបូងក្នុងអាជីពដែរ ក្រោយយកឈ្នះកីឡាការិនីអូស្ត្រាលី Ajla Tomljanovic ដោយលទ្ធផល ៦-៤ និង ៧-៦(៧-៤)។ Ons Jabeur គឺជាកីឡាការិនីមកពីតំបន់អាហ្វ្រិកទី១ ក្នុងសករាជ Open ដែលឡើងមកដល់វគ្គពាក់កណ្តាលផ្តាច់ព្រ័ត្រ US Open នេះ។កីឡាការិនីវ័យ ២៨ឆ្នាំរូបនេះនឹងបន្តជួបជាមួយកីឡាការិនីបារាំង Caroline Garcia ដែលបានយកឈ្នះកីឡាការិនីម្ចាស់ផ្ទះអាមេរិក Coco Gauff លទ្ធផល ២សិតផ្ទួនៗ ៦-៣ និង ៦-៤។ នេះក៏ជាលើកដំបូងដែរដែល Caroline Garcia ឈានឡើងវគ្គ ៤នាក់ចុងក្រោយនៅ US Open នេះ៕អត្ថបទ៖នាង សុភាវុធ

Wolves ដាក់លិខិតតវ៉ាទៅ FA រឿងមិនអនុញ្ញាតឲ្យចុះឈ្មោះ Diego Costa

បាល់ទាត់៖ ក្លិប Wolverhampton បានធ្វើលិខិតតវ៉ាទៅកាន់សមាគមបាល់ទាត់អង់គ្លេស FA បន្ទាប់ពីមិនអនុញ្ញាតឱ្យចុះឈ្មោះខ្សែប្រយុទ្ធអេស្ប៉ាញ Diego Costa។ កីឡាករវ័យ ៣៣ឆ្នាំ Diego Costa បានធ្វើដំណើរទៅកាន់ជំរុំហ្វឹកហាត់ Compton របស់ Wolves ខណៈក្លិបនៅ Premier League មួយនេះរង់ចាំដំណឹងពី FA។ អតីតខ្សែប្រយុទ្ធតោខៀវ Chelsea រូបនេះត្រូវបាន Wolves ធ្វើទំនាក់ទំនងនាំយកមកកាន់ទឹកដីអង់គ្លេសវិញ បន្ទាប់ពីក្លិបបាត់បង់ខ្សែប្រយុទ្ធទាំងពីររូបដោយសាររបួសរួមមាន Sasa Kaladzic និង Raul Jimenez។ Diego Costa បាននៅទំនេរពីការប្រកួតឱ្យក្លិបអាជីពតាំងពីខែមករា ក្រោយចាកចេញពីក្លិបប្រេស៊ីល Atletico Mineiro ពោលគឺកីឡាករវ័យ ៣៣ឆ្នាំរូបនេះមិនបានចូលប្រកួតបាល់ទាត់អាជីពតាំងពីថ្ងៃទី១២ ខែធ្នូចុងឆ្នាំមុន។ បើតាមច្បាប់របស់ FA កង្វះសកម្មភាពបាល់ទាត់ប៉ុន្មានខែចុងក្រោយនេះមានន័យថា Diego Costa មិនទាន់បានការចុះបញ្ជីឈ្មោះដោយស្វ័យប្រវត្តិពីការស្នើសុំរបស់ក្លិបឡើយ៕អត្ថបទ៖នាង សុភាវុធ

Thiago Alcantara វិលមកហ្វឹកហាត់វិញមុន Liverpool ជួប Napoli យប់នេះ

បាល់ទាត់៖ ខ្សែបម្រើអេស្ប៉ាញ Thiago Alcantara បានត្រលប់មកហ្វឹកហាត់វិញហើយ ហើយក៏អាចចូលលេងវិញបានដែរនៅពេល Liverpool ជួបក្រុមអ៊ីតាលី Napoli យប់នេះនៅទីក្រុង Naple។ កីឡាករវ័យ ៣១ឆ្នាំរូបនេះបានចូលហ្វឹកហាត់ឡើងវិញកាលពីថ្ងៃចន្ទ បន្ទាប់ពីអវត្តមានតាំងពីថ្ងៃទី៦ ខែសីហាកន្លងទៅដោយសាររបួសសសៃពួរអំឡុងការប្រកួតបើករដូវកាល Premier League ដែល Liverpool ស្មើនៅទឹកដី Fulham ២-២។ អ្នកចាត់ការសញ្ជាតិអាល្លឺម៉ង់លោក Jurgen Klopp បានបង្ហាញអារម្មណ៍រីករាយចំពោះវត្តមានអតីតខ្សែបម្រើ Bayern Munich រូបនេះត្រលប់មកហ្វឹកហាត់វិញ ស្របពេលតំបន់កណ្តាលនេះ Jordan Henderson, Naby Keita និង Alex Oxlade-Chamberlain សុទ្ធតែរបួស។Fabio Calvalho ក៏មិនទាន់ច្បាស់ថា អាចចូលលេងបានសំរាប់ការប្រកួតនៅទឹកដីអ៊ីតាលីយប់នេះ ឬអត់នៅឡើយ បន្ទាប់ពីរងរបួសជើងអំឡុងពេល Liverpool ស្មើនៅទឹកដី Everton ០-០ កាលពីថ្ងៃសៅរ៍។ Liverpool ស្ថិតក្នុងពូល A នៃការប្រកួតក្របខណ្ឌ UEFA Champions League រដូវកាលនេះជាមួយ Napoli, Rangers និង Ajax Amsterdam៕អត្ថបទ៖នាង សុភាវុធ

Kylain Mbappe ស៊ុតពីរគ្រាប់ម្នាក់ឯង ខណៈ PSG យកឈ្នះ Juventus ២-១

បាល់ទាត់៖ ខ្សែប្រយុទ្ធបារាំង Kylain Mbappe បានស៊ុតបញ្ចូលទីពីរគ្រាប់ម្នាក់ឯងក្នុងជ័យជំនះរបស់ Paris Saint Germain ២-១ លើក្រុមភ្ញៀវអ៊ីតាលីសេះបង្កង់ Juventus។ អតីតខ្សែប្រយុទ្ធ Monaco រូបនេះរកបានគ្រាប់ដំបូងនៅនាទីទី៥ ក្រោយទទួលបាល់ពី Neymar មុនពេលគ្រាប់ទីពីរនៅនាទីទី២២ ក្រោយលេង ១ ២ ជាមួយ Achraf Hakimi។ក្រុមភ្ញៀវចូលវគ្គទី២ ក៏តបបានមួយគ្រាប់វិញដែរដោយកីឡាករបម្រុង Weston McKennie តែតបញ្ចូលទីនៅនាទីទី៥៣ ខណៈ Dusan Vladhovic មានឱកាសតែតតាមស្មើតែជួយបានដោយអ្នកចាំទី Gianluigi Donnarumma។ មួយគូទៀតក្នូលពូល H នេះដែរក្រុមម្ចាស់ផ្ទះព័រទុយហ្កាល់ Benfica យកឈ្នះក្រុមភ្ញៀវអ៊ីស្រាអែល Maccabi Haifa ២-០៕អត្ថបទ៖នាង សុភាវុធ

Erling Haaland ស៊ុតបានពីរគ្រាប់ទៀត ខណៈ Manchester City យកឈ្នះដល់ដី Sevilla ៤-០

បាល់ទាត់៖ ខ្សែប្រយុទ្ធន័រវេស Erling Haaland ជាថ្មីម្តងទៀតបានស៊ុតបញ្ចូលទីពីរគ្រាប់ម្នាក់ឯង ខណៈ Manchester City បើកទំព័ររដូវកាលថ្មី UEFA Champions League បំបាក់ម្ចាស់ផ្ទះអេស្ប៉ាញ Sevilla ៤-០។ Haaland ដែលមាន ៩គ្រាប់រួចហើយក្នុងប្រាំប្រកួតនៅ Premier League ធ្វើដំណើរទៅទឹកដីអេស្ប៉ាញរកបានគ្រាប់ដំបូងនៅនាទីទី២០ ពីការកាត់បាល់ឥតខ្ចោះពី Kevin de Bruyne។ វគ្គទី២ ក្រុមរបស់លោក Pep Guardiola ដែលស្រែកឃ្លានពាន UCL បំផុតក៏រកបានបីគ្រាប់បន្ថែមដោយ Phil Foden នាទីទី៥៨ មុនពេលដែល Haaland រកបានគ្រាប់ទីពីររបស់ខ្លួននៅនាទីទី៦៧ និងគ្រាប់ចុងក្រោយដោយ Ruben Dias នៅនាទីទី៩០+២។ ការប្រកួតនេះដោយសារតែ John Stone និង Kyle Walker មានរបួសបន្តិចបន្តួចធ្វើឱ្យខ្សែការពារចំនូលថ្មីសញ្ជាតិស្វ៊ីស Manuel Akanji មានឱកាសបង្ហាញខ្លួនដំបូងផងដែរ។ ងាកមកមួយគូទៀតក្នុងពូល G នេះដែរ Borussia Dortmund ក៏ចាប់ផ្តើមបានល្អដែរក្រោយបំបាក់ក្រុមភ្ញៀវដាណឺម៉ាក FC Copenhagen ៣-០៕អត្ថបទ៖នាង សុភាវុធ

ឯកឧត្តម អ៊ុក សិទ្ធិជាតិ៖ ពហុកីឡដ្ឋានខេត្តកំពង់ស្ពឺឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំបន្ដវេន

បាល់ទាត់៖ ឯកឧត្តម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំ យុវជន និងកីឡាបានសម្ដែងការអបអរសាទរចំពោះពហុកីឡដ្ឋានខេត្តកំពង់ស្ពឺ ដែលបានសម្ពោធដាក់ឲ្យប្រើប្រាស់ជាផ្លូវការ ហើយបានចាត់ទុកសមិទ្ធផលថ្មីនេះគឺជាការឆ្លុះបញ្ចាំង ពីការយកចិត្តទុកដាក់ដ៏ខ្ពង់ខ្ពស់របស់ថ្នាក់ដឹកនាំបន្ដវេន ចំពោះសុខុមាលភាពរបស់ប្រជាពលរដ្ឋ។ ក្នុងនាមអាជ្ញាធរកីឡា ឯកឧត្តមបានកោតសរសើរ និងវាយតម្លៃខ្ពស់ចំពោះកីឡដ្ឋានខេត្តកំពង់ស្ពឺ ដែលបានលេចចេញជារូបរាងក្រោមសាងសង់ស្របតាមស្ដង់ដារបច្ចេកទេស និងរចនាបថខ្មែរ ដែលមានឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាអ្នកតំណាងរាស្ដ្រខេត្តកំពង់ស្ពឺ បានចលនាសប្បុរសជនកសាងពហុកីឡដ្ឋានស្ដង់ដារអន្ដរជាតិឡើង ដែលនិយាយដោយឡែកសម្រាប់ប្រជាជនខេត្តកំពង់ស្ពឺ និងនិយាយរួមគឺសម្រាប់ប្រយោជន៍កីឡាជាតិ។ ឯកឧត្តមបានគូសបញ្ជាក់បន្ថែមថា ពាក់ព័ន្ធនឹងសមិទ្ធផលនេះគឺឆ្លុះបញ្ចាំងពីថ្នាក់ដឹកនាំបន្ដវេន គិតគូរយកចិត្តទុកដាក់ទៅលើសុខុមាលភាពរបស់ប្រជាជនជាចម្បង។ ក្នុងនោះវិស័យកីឡា បើសិនប្រជាជនមានសុខភាពល្អ រាង្គកាយរឹងមាំ បញ្ញាវាងវៃ ហើយមានចំណេះដឹង និងសីលធម៌ល្អ នឹងក្លាយទៅជាធនធានដ៏មានប្រសិទ្ធភាព សម្រាប់កសាង និងអភិវឌ្ឍន៍សេដ្ឋកិច្ចគ្រួសារ និងសេដ្ឋកិច្ចជាតិ ដែលឆ្លើយតបទៅនឹងចក្ខុវិស័យរបស់រាជរដ្ឋាភិបាល ឆ្នាំ២០៣០ និងឆ្នាំ២០៥០ ពិសេសសមិទ្ធផលនេះមានតម្លៃធំធេងអាចប្រើប្រាស់សម្រាប់ស៊ីហ្គេមឆ្នាំ២០២៣ ផងដែរ។សូមបញ្ជាក់ថា ពហុកីឡដ្ឋានខេត្តកំពង់ស្ពឺដែលផ្ដួចផ្ដើមគំនិតសាងសង់ដោយឯកឧត្តម ហ៊ុន ម៉ានី បានសម្ពោធដាក់ឲ្យប្រើប្រាស់ជាផ្លូវការកាលពីថ្ងៃទី០៦ ខែកញ្ញា ឆ្នាំ២០២២ ក្រោមអធិបតីភាពឯកឧត្តម ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។ ពហុកីឡដ្ឋានស្ដង់ដារអន្ដរជាតិនេះបានចំណាយថវិកាសាងសង់ ៣លាន និង ៥០ម៉ឺនដុល្លារដោយមិនគិតពីតម្លៃដី ក្នុងនោះមានអគារកម្ពស់ ៣ជាន់ដែលអាចផ្ទុកអ្នកទស្សនាបាន ៣ពាន់នាក់ និងមានបង្គោលភ្លើងអាចបម្រើឲ្យការប្រកួតពេលយប់ រួមជាមួយហេដ្ឋានរចនាសម្ព័ន្ធជាច្រើនផ្សេងទៀត៕អត្ថបទ៖ លី ឈុនឡា

ជើងឯកពីរសម័យ Chelsea បើកឆាក UCL ចាញ់នៅទឹកដី Dinamo Zagreb

បាល់ទាត់៖ ក្រុមជើងឯក UEFA Champions League ពីរសម័យតោខៀវ Chelsea បានចាប់ផ្តើមរដូវកាលថ្មីរបស់ខ្លួន ជាមួយបរាជ័យគួរឱ្យភ្ញាក់ផ្អើលនៅទឹកដីក្រូអាស៊ីរបស់ Dinamo Zagreb។ Dinamo Zagreb ដែលជាជើងឯកលីគកំពូលក្រូអាស៊ីមានស្ថិតិមិនល្អទេនៅ UCL ពោលគឺឈ្នះតែ ៥ប្រកួតប៉ុណ្ណោះក្នុងចំណោមវត្តមាន ៤៣ប្រកួត។ យ៉ាងណាក្តីក្រុមដែលមកពីវគ្គជំរុះច្រើនដំណាក់មួយនេះ រកបានគ្រាប់ជ័យជំនះនៅនាទីទី១៣ Mislav Orsic។ Chelsea ដែលជាជើងឯករដូវកាល ២០២០-២១ ក៏បានដាក់ខ្សែប្រយុទ្ធចំនូលថ្មី Pierre-Emerick Aubameyang ចូលលេងដំបូងដែរតែមិនអាចជួយ Chelsea តាមស្មើការប្រកួតនេះបានឡើយ។ ចំណែកមួយប្រកួតទៀតក្នុងពូល E នេះដែរជើងឯកអ៊ីតាលី AC Milan បានត្រឹមស្មើគ្នា ១-១ ប៉ុណ្ណោះនៅទឹកដីអូទ្រីសរបស់ Red Bull Salzburg៕អត្ថបទ៖នាង សុភាវុធ

កីឡាករ-កីឡាការិនីកំពង់ស្ពឺប្ដេជ្ញាខំប្រឹងកាន់តែខ្លាំង ក្រោយទទួលបានសមិទ្ធផលថ្មី

បាល់ទាត់៖ សមាជិកក្រុមបាល់ទាត់នារីណាហ្គាវើលដ៏-កំពង់ស្ពឺដែលជាអ្នកខេត្តកំពង់ស្ពឺ ក៏ដូចជាអ្នកស្នេហាវិស័យកីឡានាខេត្តកំពង់ស្ពឺបានប្ដេជ្ញាបង្កើនការខំប្រឹងកាន់តែខ្លាំង ដើម្បីលើកមុខមាត់ខេត្តរបស់ខ្លួន បន្ទាប់ពីទទួលបានសមិទ្ធផលថ្មីស្រឡាងមួយទៀតគឺពហុកីឡដ្ឋានខេត្តកំពង់ស្ពឺ ដែលទើបសម្ពោធដាក់ឲ្យប្រើប្រាស់ផ្លូវការកាលពីថ្ងៃទី០៦ ខែកញ្ញា ឆ្នាំ២០២២ ម្សិលមិញ។ ក្នុងឱកាសម្ពោធដាក់ឲ្យប្រើប្រាស់នោះ ពួកគេបានសម្ដែងនូវមោទនភាព និងសេចក្ដីរីករាយ ដែលខេត្តរបស់ខ្លួនមានកីឡដ្ឋានស្ដង់ដារអន្ដរជាតិ ពិសេសពួកគេបានថ្លែងអំណរគុណឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាអ្នកតំណាងរាស្ដ្រខេត្តកំពង់ស្ពឺ ដែលបានផ្ដួចផ្ដើមគំនិតសាងសង់គម្រោងនេះឡើង។ តាមរយៈនេះពួកគេបានប្ដេជ្ញានឹងខិតខំហ្វឹកហាត់ ដើម្បីពង្រឹងសមត្ថភាពសមត្ថភាពឲ្យបានខ្លាំង សម្រាប់ចូលរួមប្រកួតប្រជែងលើឆាកជាតិ និងអន្ដរជាតិ និងដើម្បីជាការលើកមុខមាត់ខេត្តរបស់ខ្លួន។ គួរដឹងថា ពហុកីឡដ្ឋានខេត្តកំពង់ស្ពឺសាងសង់ឡើងលើផ្ទៃដីជាង ៤៣,៣ម៉ែត្រក្រឡា ដែលមានអគារកម្ពស់ ៣ជាន់អាចផ្ទុកអ្នកទស្សនាបាន ៣ពាន់នាក់។ ក្រៅពីទីលានាបាល់ទាត់ សមិទ្ធផលថ្មីនៃក្រុងច្បារមននេះក៏មានទីលានរត់ប្រណាំងចម្ងាយ ៤០០ម៉ែត្រ រួមជាមួយហេដ្ឋារចនាសម្ព័ន្ធជាច្រើនទៀត ពិសេសក៏មានសួនកម្សាន្ដសម្រាប់ប្រជាពលរដ្ឋនាំកូន-ចៅមកលេងកម្សាន្ដ ក៏ដូចជាហាត់ប្រាណនៅទីនោះបានទៀតផង។ក្រោមគំនិតផ្ដួចផ្ដើមរបស់ឯកឧត្តម ហ៊ុន ម៉ានី ពហុកីឡដ្ឋានស្ដង់ដារអន្ដរជាតិនេះសាងសង់ឡើងក្នុងស្មារតីដើម្បីលើកមុខមាត់ និងកិត្យានុភាពរបស់ខេត្តកំពង់ស្ពឺផង និងក្នុងគោលបំណងរួមចំណែកជាមួយរាជរដ្ឋាភិបាលក្នុងការអភិវឌ្ឍវិស័យកីឡាជាតិឲ្យរីកចម្រើនផង ពិសេសត្រៀមដំណើរឆ្ពោះទៅស៊ីហ្គេមឆ្នាំ២០២៣ ខាងមុខ។ ពហុកីឡដ្ឋាននេះបានសម្ពោធដាក់ឲ្យប្រើប្រាស់ជាផ្លូវការនៅថ្ងៃអង្គារ៍សប្ដាហ៍នេះ ក្រោមអធិបតីភាពឯកឧត្តម ជា សុផារ៉ា ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា៕អត្ថបទ៖ លី ឈុនឡា

ក្រុមការពារជើងឯក Real Madrid បើកឆាក UCL យកឈ្នះនៅទឹកដី Celtic ៣-០

បាល់ទាត់៖ ក្រុមការពារតំណែងជើងឯក UEFA Champions League, Real Madrid បានបើកឆាកការប្រកួតនៅក្នុងពូល F ជាមួយនឹងជ័យជំនះ ៣-០ នៅទឹកដីស្កុតឡេនរបស់ Glasgow Celtic។ បន្ទាប់ពីប្រាំឆ្នាំអវត្តមានពីបាល់ទាត់អឺរ៉ុប Celtic មានឱកាសជាច្រើននៅក្នុងវគ្គទី១ តែធ្វើមិនបានសំរេច។ ចូលវគ្គទី២ Vinicius Junior ដែលស៊ុតបញ្ចូលទីមួយគ្រាប់ឱ្យ Real Madrid លើកពានរដូវកាលមុននោះក៏រកបានគ្រាប់នាំមុខនៅនាទីទី៥៦ មុនពេលដែលខ្សែបម្រើក្រូអាស៊ី Luka Modric បន្ថែមការនាំមុខ ២-០ នៅនាទីទី៦០ និងគ្រាប់ចុងក្រោយដោយខ្សែបម្រើប៊ែលហ្ស៊ិក Eden Hazard។ ក្រុមរបស់លោក Carlo Ancelotti ក៏បានបាត់ខ្សែប្រយុទ្ធបារាំង Karim Benzema ដែរក្រោយរបួសនៅវគ្គទី១។ ជ័យជំនះនេះធ្វើឱ្យ Real Madrid មានបីពិន្ទុជាមួយក្រុមអ៊ុយក្រែន Shakhtar Donetsk ដែលបានយកឈ្នះនៅទឹកដីអាល្លឺម៉ង់ RB Leipzig ៤-១។ Shakhtar Donetsk ជាក្លិបអ៊ុយក្រែនដំបូងដែលបានប្រកួតនៅក្របខណ្ឌអឹរ៉ុប តាំងពីសង្គ្រាមរបស់រុស្ស៊ីលើទឹកដីអ៊ុយក្រែន៕អត្ថបទ៖នាង សុភាវុធ