BTV NEWS

UEFA ថា ការសុំទោសរបស់ Infantino មិនផ្លាស់ប្តូរជំហររបស់ខ្លួនឡើយ និងនៅតែអាចធ្វើពហិការការប្រកួតរបស់ FIFA

កម្ពុជា ជួបវៀតណាម បញ្ចប់ភារកិច្ចពានបាល់ទាត់អាស៊ាន ខណៈលោក Koji ចាត់ទុកជាប្រកួតដ៏សំខាន់

Leeds នាំយកអ្នកចាំទីអង់គ្លេស James Trafford ពី Manchester City ក្នុងតម្លៃអាចឡើងដល់ ៤៥ លានផោន

កីឡាករ កីឡាការិនីហាប់គីដូកម្ពុជាទៅចូលរួមការប្រកួតនៅហុងកុងភាគច្រើនត្រូវចំណាយថវិការផ្ទាល់ខ្លួន

ព័ត៌មានកីឡា

Andy Murray ចាញ់ Cameron Norrie នៅ Cincinnati Open ខណៈ Raducanu យកឈ្នះ Azarenka

វាយកូនបាល់៖ កីឡាករវាយកូនបាល់ស្កុតឡេនអតីតលេខ ១ ពិភពលោក Andy Murray បានធ្លាក់ចេញពីព្រឹត្តិការណ៍ Cincinnati Open នៅសហរដ្ឋអាមេរិកហើយ ក្រោយរងបរាជ័យក្រោមស្នាដៃកីឡាករអង់គ្លេស Cameron Norrie។ កីឡាករវ័យ ២៦ លំដាប់កំពូលរបស់អង់គ្លេសបច្ចុប្បន្ន Cameron Norrie បានវាយបកយកឈ្នះពីរសិតចុងក្រោយ ៦-៣ និង ៦-៤ បន្ទាប់ពីការនាំមុខសិតដំបូង ៦-៣ ពី Andy Murray។ កីឡាករវ័យ ៣៥ឆ្នាំ Andy Murray បានឆក់យកឱកាសសិតទីមួយដែល Cameron Norrie បង្កើតឱ្យមានកំហុសច្រើន។ កីឡាករលំដាប់លេខ ១១ ពិភពលោកបច្ចុប្បន្ន Cameron Norrie នឹងបន្តជួបជាមួយកីឡាករវ័យក្មេងអាមេរិក Ben Shelton ដែលបានយកឈ្នះកីឡាករន័រវេស Casper Ruud។ ចំណែកឯកីឡាករលេខ ១ របស់អូស្ត្រាលី Nick Kyrgios បានធ្លាក់ចេញពីការប្រកួតហើយ ក្រោយរងបរាជ័យក្រោមស្នាដៃកីឡាករម្ចាស់ផ្ទះអាមេរិក Taylor Fritz ដោយលទ្ធផល ៦-៣ និង ៦-២ មិនលំបាកប្រើពេលត្រឹម ៥១នាទីប៉ុណ្ណោះ។ងាកមកការប្រកួតផ្នែកនារីវិញ កីឡាការិនីលេខ ១ របស់អង់គ្លេស Emma Raducanu បានយកឈ្នះអតីតកីឡាការិនីលេខ ១ ពិភពលោក Victoria Azarenka ដោយលទ្ធផល ៦-០ និង ៦-២។ មុនមកដល់វគ្គនេះកីឡាការិនីវ័យ ១៩ឆ្នាំ Raducanu បានយកឈ្នះម្ចាស់ជើងឯក Grand Slam ២៣លើក Serena Williams នៅជុំទី១។ គូប្រកួតបន្ទាប់របស់កីឡាការិនីស្រស់ស្អាត Raducanu គឺត្រូវជួបជាមួយកីឡាការិនី Jessica Pegula៕អត្ថបទ៖នាង សុភាវុធ

Real Madrid ដាក់តម្លៃ ៧០លានអឺរ៉ូលើ Casemiro បើ Manchester United ចង់បាន

បាល់ទាត់៖ ក្លិបយក្សអេស្ប៉ាញ Real Madrid បានដាក់តម្លៃដល់ទៅ ៧០លានអឺរ៉ូលើកីឡាករប្រេស៊ីល Casemiro ស្របពេលដែល Manchester United កំពុងព្យាយាមនាំយកកីឡាករវ័យ ៣០ឆ្នាំរូបនេះមកកាន់ Old Trafford។ ក្រុមរបស់លោក Erik ten Hag នៅពេលនេះកំពុងតាមស្វែងរកតម្លៃបម្រើកណ្តាល ដែលខ្វះខាតតាំងពីការចាកចេញរបស់ខ្សែបម្រើបារាំង Paul Pogba។ យ៉ាងណាក្តីគេមិនទាន់ដឹងពីការចរចាឈានដល់ដំណាក់កាលណានៅឡើយ ស្របពេលតម្លៃ ៧០លានអឺរ៉ូក៏លំបាកដែរសំរាប់ Manchester United ស្របពេល Casemiro ឈានដល់វ័យ ៣០ឆ្នាំទៅហើយ ខណៈប្រាក់ឈ្នួលមួយឆ្នាំ ១០.៥លានអឺរ៉ូ។ បើតាមសារព័ត៌មានអេស្ប៉ាញមួយបានចុះផ្សាយថា Manchester United អាចនឹងព្រមទិញប្រសិនតម្លៃធ្លាក់មកត្រឹម ៦០លានអឺរ៉ូ។ រំលឹកថា Casemiro បានមកដល់ Real Madrid តាំងពីឆ្នាំ២០១៣ ផ្លាស់ពីក្លិបប្រេស៊ីល Sao Paulo។ រយៈពេល ៩ឆ្នាំនៅអេស្ប៉ាញ Casemiro បានឈ្នះពាន La Liga ៣លើក, Copa del Rey ១លើក, UEFA Champions League ៥លើក និង FIFA Club World Cup ៤លើក៕អត្ថបទ៖នាង សុភាវុធ

West Ham ទិញបានខ្សែការពារអាល្លឺម៉ង់ Thilo Kehrer ពី PSG តម្លៃ ១០លានផោន

បាល់ទាត់៖ ក្លិបញញួរធំ West Ham បានសំរេចក្នុងការនាំយកខ្សែការពារអាល្លឺម៉ង់ Thilo Kehrer ពីក្លិបបារាំង Paris Saint Germain ក្នុងតម្លៃផ្ទេរ ១០.១លានផោន។ កីឡាករវ័យ ២៥ឆ្នាំរូបនេះបានចុះហត្ថលេខារយៈពេល ៤ឆ្នាំនៅ West Ham។ Thilo Kehrer បង្ហាញខ្លួនបាន ១២៨ប្រកួតក្នុងរយៈពេល ៤ឆ្នាំនៅ PSG តាំងពីផ្លាស់ពី Schalke 04 តម្លៃ ៣៣លានផោនកាលពីឆ្នាំ២០១៨។ Thilo Kehrer ក៏ធ្លាប់បង្ហាញខ្លួនឱ្យក្រុមជំរើសជាតិអាល្លឺម៉ង់ ២២លើកផងដែរ និងតែងតែជាជំរើសដំបូងជានិច្ចមួយរយៈចុងក្រោយនេះ។ រដូវកាលមុន Kehrer បង្ហាញខ្លួនបាន ៣៤លើកឱ្យ PSG ឈ្នះជើងឯក Ligue 1 បារាំងដែលជាពាន Ligue 1 ទី៣ របស់គេ និងធ្លាប់ឈ្នះពាន French Cup ២លើក និងឡើងដល់វគ្គផ្តាច់ព្រ័ត្រ UCL កាលពីឆ្នាំ២០២០ តែចាញ់ Bayern Munich។ Thilo Kehrer បានក្លាយជាកីឡាករទី៦ ដែលផ្លាស់មកកាន់ West Ham រដូវកាលនេះបន្ទាប់ពី Maxwel Cornet, Gianluca Scamacca, Nayef Aguerd, Flynn Downes និងអ្នកចាំទី Alphonse Areola៕អត្ថបទ៖នាង សុភាវុធ

មហាសេដ្ឋីអង់គ្លេសមួយរូបមានបំណងចង់ទិញភាគហ៊ុន Manchester United

បាល់ទាត់៖ មហាសេដ្ឋីអង់គ្លេស Sir Jim Ratcliffe មានបំណង់ចង់ទិញភាគហ៊ុនក្លិបបិសាចក្រហម Manchester United បន្ទាប់ពីសារព័ត៌មាន Bloomberg បានចុះផ្សាយថា ម្ចាស់ភាគហ៊ុនធំគ្រួសារ Glazer ចង់លក់ភាគហ៊ុនមួយចំនែក។ អ្នកនាំពាក្យលោក Jim Ratcliffe បានបញ្ជាក់ថា ច្បាស់ណាស់ថា លោក Jim នឹងទិញយកភាគហ៊ុននោះ ប្រសិនបើម្ចាស់ភាគហ៊ុនលក់មែននោះ។ Sir Jim Ratcliffe កំពុងកាន់កាប់ភាគហ៊ុនធំនៃក្រុមហ៊ុន Ineos របស់អង់គ្លេស ហើយលោកគឺជាអ្នកគាំទ្រក្រុមបិសាចក្រហម Manchester United តាំងពីកុមារភាព។ Sir Jim Ratcliffe ក៏កំពុងកាន់កាប់ភាគហ៊ុនធំក្លិបបារាំង Nice ក្លិបស្វ៊ីស Lausanne-Sport និងក្រុមប្រណាំងកង់ Ineos Grenadiers ផងដែរ។ Ineos ក៏ដៃគូឧបត្ថម្ភធំនៃក្រុមប្រណាំង F1 Mercedes ផងដែរ។ Manchester United ជើងឯកលីគអង់គ្លេស ២០សម័យកំពុងឈរបាតតារាងនៃក្របខណ្ឌលីគ English Premier League ក្រោយចាញ់ពីរប្រកួតដំបូងនៃរដូវកាលថ្មីនេះ ក្រោមការដឹកនារបស់លោក Erik ten Hag។ មានការរិះគន់ជាច្រើនឆ្នាំមកហើយពីការវិនិយោគរបស់គ្រួសារ Glazer ដែលមិនបានបញ្ចេញសាច់ប្រាក់ទិញដូរកីឡាករ ពោលគឺមានត្បិតត្បៀតក្នុងការវិនិយោគ។រដូវកាលនេះទៀតសោត Manchester United បានរងបរាជ័យជាច្រើនក្នុងការចរចានាំយកកីឡាករថ្មី ជាពិសេសគឺគោលដៅធំ Frenkie de Jong ពី Barcelona ដែលចរចាមិនសំរេចរាប់ខែមកហើយ។ Manchester United បានធ្លាក់ផុងខ្លួនតាំងពីការចាកចេញរបស់ Sir Alex Ferguson នៅឆ្នាំ២០១៣ ដោយឈ្នះពានតែមួយគត់កាលពីឆ្នាំ២០១៧ គឺពាន UEFA Europa League ក្រោមការដឹកនាំរបស់ Jose Mourinho។ អ្នកគាំទ្រ Manchester United បានរៀបបាតុកម្មប្រឆាំងតវ៉ានឹងគ្រួសារ Glazer ជាច្រើនឆ្នាំមកហើយ ហើយក៏នឹងមានបាតុកម្មទៀតមុនការប្រកួតរវាង Manchester United ទទួល Liverpool នៅសប្តាហ៍ទី៣ ស្របពេលដែលបាតុកម្មក៏ធ្លាប់ធ្វើឱ្យលើកការប្រកួតរវាងក្រុមទាំងពីរនេះដែរកាលពីឆ្នាំ២០២១៕អត្ថបទ៖នាង សុភាវុធ

Wolves ទិញបាន Matheus Nunes បំបែកកំណត់ត្រាទិញកីឡាករថ្លៃបំផុតរបស់ក្លិប

បាល់ទាត់៖ ក្លិបអង់គ្លេស Wolverhampton បានសំរេចហើយក្នុងការនាំយកខ្សែបម្រើព័រទុយហ្កាល់ Matheus Nunes ក្នុងតម្លៃផ្ទេរបំបែកកំណត់ត្រាក្លិប ៣៨លានផោនផ្ទេរពីក្លិប Sporting CP។ កីឡាករវ័យ ២៣ឆ្នាំរូបនេះបានចុះហត្ថលេខារយៈពេល ៥ឆ្នាំនៅកីឡដ្ឋាន Molineux បន្ទាប់ពីឆ្លងកាត់ដំណាក់កាលពិនិត្យសុខភាពជោគជ័យនៅថ្ងៃពុធម្សិលមិញ។ Liverpool និង Manchester City ក៏ធ្លាប់មានទំនាក់ទំនងទិញកីឡាករវ័យ ២៣ឆ្នាំរូបនេះដែរកាលពីប៉ុន្មានសប្តាហ៍មុន ស្របពេលលោក David Moyes ក៏បរាជ័យដែរក្នុងការលួងលោមរូបគេមកកាន់ West Ham។ Matheus Nunes បានរួមរស់ជាមួយ Sporting CP តាំងពីឆ្នាំ២០១៩ បង្ហាញខ្លួនសរុបបាន ៧៦ប្រកួតរកបាន ៧គ្រាប់ឈ្នះជើងឯកលីគកំពូលព័រទុយហ្កាល់កាលពីឆ្នាំ២០២១។តម្លៃនៃការផ្ទេរ ៣៨លានផោនបូកនឹងការចំណាយបន្ថែមផ្សេងទៀតនោះ បានបំបែកកំណត់ត្រាទិញកីឡាករថ្លៃបំផុតរបស់ Wolves ដែលធ្លាប់ចាយលុយខ្ពស់បំផុតត្រឹម ៣៥លានផោនទិញ Fabio Silva រដូវកាលមុន។ ការមកដល់របស់ Nunes មានន័យថា Wolves ចំណាយលុយលើសពី ១០០លានផោនលើកដំបូងក្នុងការទិញដូរកីឡាករចូល បន្ទាប់ពីការមកដល់របស់ Hwang Hee-Chan, Nathan Collins និង Goncalo Guedes៕អត្ថបទ៖នាង សុភាវុធ

កម្ពុជាគ្រោងបញ្ជូនក្រុមកីឡា ១២ប្រភេទទៅហាត់នៅចិននាពេលឆាប់ៗខាងមុខ

ស៊ីហ្គេម៖ ក្រុមជម្រើសជាតិ ១២ប្រភេទកីឡាគ្រោងនឹងចេញទៅហ្វឹកហាត់ នៅសាធារណរដ្ឋប្រជាមានិតចិននាពេលឆាប់ៗខាងមុខ ដើម្បីពង្រឹងសមត្ថភាព និងត្រៀមខ្លួន សម្រាប់ព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។ នេះបើតាមការបញ្ជាប់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC)។ ប្រតិភូ គ្រូបង្វឹក និងកីឡាករ-កីឡាការិនីលើ ១២ប្រភេទកីឡាស្មើនឹង ១៦១នាក់ដែលកម្ពុជាត្រៀមបញ្ជូនទៅហ្វឹកហាត់នៅចិន រួមមានកីឡាកាយសម្ព័ន្ធ, យូដូ, វូស៊ូ, បាល់បោះ, វាយកូនឃ្លីលើតុ, អត្តពលកម្ម, ចំបាប់, វាយសី, ហែលទឹក, លើកទម្ងន់, បាល់ទាត់នារី និងបាល់ទះ ដែលនឹងត្រូវបោះជុំរុំហ្វឹកហាត់រយៈពេលវែងនៅទីនោះ រហូតដល់ស៊ីហ្គេមឆ្នាំ២០២៣ តែម្ដង។ ឯកឧត្តម វ៉ាត់ ចំរើន មានប្រសាសន៍ថា តាមគម្រោងអត្តពលិកកម្ពុជានឹងត្រូវចាកចេញក្នុងខែសីហានេះ តាមរយៈការរៀបចំដោយគណៈកម្មាធិការជាតិ CAMSOC ក្រោមជំនួយឥតសំណងពីសំណាក់រដ្ឋាភិបាលចិន លើការហ្វឹកហាត់របស់កីឡាករ-កីឡាការិនីជម្រើសជាតិកម្ពុជា។ ដើមឡើយគម្រោងនេះគ្រោងចាប់ផ្ដើមកាលពីឆ្នាំ២០២១ ប៉ុន្តែដោយសារវិបត្តិជំងឺកូវីដ-១៩ ទើបត្រូវបានពន្យារពេលរហូតមកទល់ពេលនេះ។គួរដឹងថា ការបញ្ជូនក្រុមជម្រើសជាតិទៅហ្វឹកហាត់ក្រៅស្រុក គឺជាផែនការយុទ្ធសាស្ដ្រមួយរបស់ CAMSOC ដើម្បីពង្រឹងសមត្ថភាពកីឡាករ-កីឡាការិនីត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ក្រៅពីបញ្ជូនទៅហ្វឹកហាត់នៅចិន កម្ពុជាក៏មានផែនការបញ្ជូនប្រភេទកីឡាផ្សេងៗ ទៅហ្វឹកហាត់នៅប្រទេសផ្សេងទៀតផងដែរ ដូចជាសាធារណរដ្ឋកូរ៉េ ជប៉ុន អ៊ីរ៉ង់ រួមជាមួយបណ្ដាប្រទេសក្នុងតំបន់អាស៊ាន អាស៊ី និងអឺរ៉ុបមួយចំនួនទៀតផងដែរ៕អត្ថបទ៖ លី ឈុនឡា

Messi អត់មានឈ្មោះបោះឆ្នោតឈ្នះពាន Ballon d’Or លើកដំបូងតាំងពីឆ្នាំ២០០៥

បាល់ទាត់៖ ខ្សែប្រយុទ្ធអាហ្សង់ទីន Lionel Messi មិនមានឈ្មោះក្នុងបញ្ជី ៣០នាក់ចុងក្រោយដែលអាចឈ្នះពានកីឡាករឆ្នើមប្រចាំឆ្នាំ Ballon d’Or ជាលើកដំបូងតាំងពីឆ្នាំ២០០៥។ ពានជ័យលាភីដែលរៀបចំដោយទស្សនាវដ្តីបារាំងមួយនេះបានបញ្ចេញបញ្ជីឈ្មោះ ៣០នាក់ចុងក្រោយនៅថ្ងៃពុធម្សិលមិញដោយក្រៅពី Messi មិត្តរួមក្រុមនៅ PSG, Neymar ក៏អត់មានឈ្មោះដែរ។ Lionel Messi បានឈ្នះពានជ័យលាភី Ballon d’Or នេះនៅឆ្នាំ២០១៩ និង ២០២១ បន្ទាប់ពីឆ្នាំ២០២០ ត្រូវលុបចោលដោយសារវិបត្តិកូវីដ-១៩។ ក្រៅពីនោះ Messi ក៏ធ្លាបឈ្នះពាននេះ ៥លើកផ្សេងទៀតនៅឆ្នាំ២០០៩, ២០១០, ២០១១, ២០១២ និង ២០១៥ សរុប ៧លើក។ កីឡាករ PSG ទាំងពីរ Messi និង Neymar បានរួមចំណែកក្នុងការជួយ PSG ឈ្នះពាន Ligue 1 បារាំងរដូវកាលមុនជាមួយនឹងជ័យជំនះ ២៦ប្រកួតស្មើ៨ ចាញ់៤។ Messi ស៊ុតបញ្ចូលទីបាន ៦គ្រាប់ ខណៈ Neymar ស៊ុតបញ្ចូលទីបាន ១៣គ្រាប់ ៦បាល់បញ្ជូន។បេក្ខភាពសំខាន់ៗផ្សេងទៀតក្នុងបញ្ជី ៣០នាក់មាន Karim Benzema ជាបេក្ខភាពឈានមុខគេដែលគេរំពឹងឈ្នះពាន Ballon d’Or នេះបន្ទាប់ពីជួយ Real Madrid ឈ្នះពាន UEFA Champions League និង La Liga ខណៈកីឡាករផ្សេងទៀតមានដូចជា Robert Lewandowski, Mohamed Salah និង Cristiano Ronaldo ជាដើម៕អត្ថបទ៖នាង សុភាវុធ

U23 កម្ពុជានឹងប្រកួតមិត្តភាពជាមួយ U23 ជប៉ុននាខែក្រោយដើម្បីគោលដៅត្រៀមស៊ីហ្គេម

បាល់ទាត់៖ ក្រុមជម្រើសជាតិយុវជនអាយុក្រោម ២៣ឆ្នាំកម្ពុជានឹងធ្វើការប្រកួតមិត្តភាពអន្ដរជាតិជាមួយក្រុមជម្រើសជាតិ U23 ជប៉ុននាថ្ងៃទី២០ ខែកញ្ញាខាងមុខនៅពហុកីឡដ្ឋានជាតិមរតកតេជោ។ តាមការបញ្ជាក់របស់សហព័ន្ធកីឡាបាល់ទាត់កម្ពុជា ដែលបានប្រកាសស្វាគមន៍ជំនួបមិត្តភាពអន្ដរជាតិនៅព្រឹកថ្ងៃទី១៨ ខែសីហានេះបានឲ្យដឹងថា ការប្រកួតនេះផ្ដោតសំខាន់សម្រាប់គោលដៅត្រៀមខ្លួន សម្រាប់ការប្រកួតកីឡាស៊ីហ្គេមឆ្នាំ២០២៣ ខាងមុខ។ គួរដឹងថា ក្រុម U23 កម្ពុជា និងជប៉ុនក៏ទើបតែជួបគ្នាដែរទេនៅក្នុងវគ្គជម្រុះពានរង្វាន់ AFC U23 Asian Cup 2022 ពូលK ដែលពេលនោះកម្ពុជាបានចាញ់ម្ចាស់ផ្ទះជប៉ុន ៤-០។ ដូច្នេះការប្រកួតមិត្តភាពនាខែក្រោយគឺជាឱកាសវាយស្ទង់ និងពង្រឹងសមត្ថភាពដ៏សំខាន់របស់ក្រុមគោព្រៃជំទង់កម្ពុជា ដើម្បីត្រៀមព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានាឆ្នាំក្រោយ តាមរយៈការប្រកួតជាមួយខ្លាំងប្រចាំទ្វីបអាស៊ីមួយនេះ៕អត្ថបទ៖ លី ឈុនឡា

អគ្គិសនីកម្ពុជា និងកោះកុងសុទ្ធតែជួបក្រុមខ្លាំងរៀងៗខ្លួនក្នុងវគ្គ ៨ក្រុមចុងក្រោយពានសម្តេចតេជោ

បាល់ទាត់៖ បាល់ទាត់ពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ លើកទី១៦ បានរកឃើញក្លិបដែលឡើងដល់វគ្គ ១/៤ផ្តាច់ព្រ័ត្រអស់ហើយ ក្រោយបញ្ចប់ការប្រកួតពីរជើងវគ្គ ១៦ក្រុមចុងក្រោយ។ អគ្គិសនីកម្ពុជា និងកោះកុងអេហ្វស៊ីជាក្រុមលេងក្នុងលីគលំដាប់ទី២ ដែលបានឡើងមកដល់វគ្គដ៏សំខាន់នេះ ពិសេសត្រូវជួបក្រុមកំពូលតារាងទាំងពីរក្នុងលីគកំពូលកម្ពុជា។ ប្រកួតថ្ងៃទី១៧ ខែសីហា អគ្គិសនីកម្ពុជាបានត្រឹមស្មើ ១ទល់នឹង១ ជាមួយគីរីវង់សុខសែនជ័យជើងទី២ នៅទឹកដីខេត្តតាកែវ បន្ទាប់ពីជើងទី១ ក្លិបដែលមានមូលដ្ឋាននៅភ្នំពេញឈ្នះ ៣ទល់នឹង២។ ជំនួបនេះតង់ទី១ ក្រុមទាំងពីរបានត្រឹមស្មើគ្នា ០ទល់នឹង០ ទោះបីជាមានឱកាសរៀងៗខ្លួនក៏ដោយ។ តែយ៉ាងណាក៏ដោយនៅនាទីទី៧០ ភ្ញៀវអគ្គិសនីកម្ពុជាផ្តើមនាំមុខដោយគ្រាប់បាល់របស់កីឡាករ ចន្ថា ចន្ថាកា។ ៧នាទីមុនចប់ការប្រកួតកីឡា លី មល្លីម វាយបកតាមស្មើឱ្យគិរីវង់ ប៉ុន្តែគ្រាប់បាល់នេះមិនអាចជួយឱ្យក្លិបរក្សាកៅអីនៅពានរង្វាន់សម្តេចតេជោបន្តទៀតទេ ខណៈនាទីនៅសេសសល់ម្ចាស់ផ្ទះគ្មានគ្រាប់បាល់បន្ថែម។ វគ្គបន្ទាប់ ៨ក្រុមចុងក្រោយ អគ្គិសនីកម្ពុជាត្រូវទទួលម្ចាស់កំពូលតារាងលីគកំពូលកម្ពុជាព្រះខ័នរាជស្វាយរៀង ថ្ងៃទី២៤ ខែសីហាសប្តាហ៍ក្រោយ។ថ្ងៃជាមួយគ្នាកោះកុងបានបង្កភាពភ្ញាក់ផ្អើល បន្ទាប់ពីទម្លាក់ក្លិបក្នុងលីគកំពូលអង្គរថាយហ្គឺរដោយវាយបកពីបរាជ័យជើងទី១ យកឈ្នះជើងទី២ ក្នុងលទ្ធផល ៣ទល់នឹង១ នាទឹកដីកីឡដ្ឋានហនុមាន ខេត្តសៀមរាប។ លេងបាន ៣៦នាទី កោះកុង បើកការនាំមុខមុនដោយគ្រាប់បាល់របស់កីឡាករ សារី តៃម៉ូ ប៉ុន្តែក្នុងនាទីបន្ថែមបង្គ្រប់តង់ទី១ កីឡាករ ម៉ៅ ពិសិដ្ឋ ស៊ុតគ្រាប់ស្មើឱ្យអង្គរថាយហ្គឺរ។ ពេលវេលានៅសល់ជាង ១០នាទីចុងក្រោយ កីឡាករ សារី តៃម៉ូ និងកីឡាករ សាន បូរ៉ា បន្ថែមម្នាក់មួយគ្រាប់ទៀតឱ្យកោះកុងអេហ្វស៊ីឈ្នះ ៣ទល់នឹង១ សរុបទាំងពីរជើងឈ្នះ ៤ទល់នឹង៣ និងឡើងទៅជួបបឹងកេតវគ្គ ៨ក្រុមចុងក្រោយដើមសប្តាហ៍ក្រោយ។នៅស្តាតចាស់វិញ ក្លិបម្ចាស់ផ្ទះកងយោធពលខេមរភូមិន្ទ វាយបកតាមពីក្រោយយកឈ្នះនគរបាលជាតិ ២ទល់នឹង១ ជើងទី២ វគ្គ ១៦ក្រុមចុងក្រោយ។ ការប្រកួតនេះទម្រាំមានគ្រាប់បាល់កើតឡើង ចាំរហូតដល់នាទីទី៣៨ ពេលដែលកីឡាករ តាំង សុភក្ត្រ ស៊ុតបញ្ចូលទីឱ្យនគរបាលជាតិនាំមុខ ១ទល់នឹង០ មុនអាជ្ញាកណ្តាលផ្លុំកញ្ចែបញ្ចប់តង់ទី១។ ក្រោយពីមានការផ្លាស់ប្តូរកីឡាករមួយចំនួន តង់ទី២ នេះម្ចាស់ផ្ទះកងយោធពលខេមរភូមិន្ទហាក់លេងបានល្អ ហើយទីបំផុតនាទីទី៦៣ កីឡាករ ណារ៉ុង កក្តដា ស៊ុតបញ្ចូលទីគ្រាប់ស្មើឱ្យក្លិប មុនពេលកីឡាករ ញាណ សុស៊ីដាន បន្ថែមគ្រាប់ជ័យជំនះ ៦នាទីមុនចប់ការប្រកួតទាំងស្រុង។ សរុបទាំងពីរជើងកងយោធពលខេមរភូមិន្ទឈ្នះ ៤ទល់នឹង២ ឡើងទៅជួបម្ចាស់ពានសម្តេចតេជោ វិសាខា ថ្ងៃទី២៤ ខែសីហាខាងមុខ។ដោយឡែកម្ចាស់ពានសម្តេចតេជោពីរដងភ្នំពេញក្រោនក៏បានឡើងទៅវគ្គបន្ទាប់ដែរ ទោះបីស្មើព្រៃវែង ៤ទល់នឹង៤ ក្នុងជើងទី២ យ៉ាងណាក៏ ខណៈជើងទី១ ភ្នំពេញក្រោនឈ្នះ ១ទល់នឹង០ ទៅហើយនោះ។ វគ្គ ៨ក្រុមចុងក្រោយភ្នំពេញក្រោនទទួលណាហ្កាវើលដ៍នៅអ អេសអិន សប្តាហ៍ក្រោយ។ សូមជម្រាបជូនថា ជើងទី២ ពានរង្វាន់សម្តេចតេជោ ហ៊ុន សែន នឹងលេងនៅថ្ងៃទី៣១ ខែសីហា ខណៈវគ្គផ្តាច់ព្រ័ត្រប្រកួតនៅថ្ងៃទី២៦ ខែតុលា ឆ្នាំ២០២២៕អត្ថបទ៖ គង់ ហួន

Nick Kyrgios ឡើងជុំទី២ Cincinnati Open តែ Coco Gauff មានរបួសដកខ្លួនពីការប្រកួត

វាយកូនបាល់៖ កីឡាករវាយកូនបាល់លំដាប់កំពូលរបស់អូស្ត្រាលី Nick Kyrgios បានបន្តដំណើរឡើងជុំទី២ ហើយនៃព្រឹត្តិការណ៍ Cincinnati Open នៅសហរដ្ឋអាមេរិក។ កីឡាករវ័យ ២៧ឆ្នាំរូបនេះបានយកឈ្នះកីឡាករអេស្ប៉ាញ Alejandro Davidovich Fokina ដោយលទ្ធផល ៧-៥ និង ៦-៤ ប្រើពេល ១ម៉ោង ៣១នាទី។ ជ័យជំនះនេះធ្វើឱ្យ Nick Kyrgios បន្តដំណើរជួបជាមួយកីឡាករម្ចាស់ផ្ទះអាមេរិក Taylor Fritz។ ផ្ទុយពី Kyrgios កីឡាករអូស្ត្រាលីមួយរូបទៀត Thanasi Kokkinakis មិនអាចឈានទៅជុំបន្តបានទេក្រោយចាញ់កីឡាករអ៊ីតាលី Jannik Sinner ដោយលទ្ធផល ៦-៧(៧-៩), ៦-៤ និង ៧-៦(៨-៦)។ ជ័យជំនះរបស់ Jannik Sinner គឺស្ថិតក្នុងថ្ងៃកំណើតរបស់គេតែម្តងឈានចូលវ័យ ២១ឆ្នាំ។ ងាកមកការប្រកួតផ្នែកនារីវិញ កីឡាការិនីអាមេរិក Coco Gauff ដែលគេស្គាល់ថាជា Serena Williams តូចនោះបានដកខ្លួនចេញពីការប្រកួតដោយសាររបួសកជើង។អតីតជើងឯករង French Open វ័យ ១៨ឆ្នាំ Coco Gauff បានយកឈ្នះសិតដំបូងលើកីឡាការិនីឆេក Marie Bouzkova តែរបួសធ្វើឱ្យនាងមិនអាចបន្តការប្រកួតបាននៅពេលនាំមុខសិតទីពីរ ១-០។ របួសកជើងនេះក៏បានធ្វើឱ្យមានក្តីបារម្ភសំរាប់ Coco Gauff ដែរស្របពេលដែលព្រឹត្តិការណ៍ Grand Slam, US Open ខិតជិតឈានចូលមកដល់នៅចុងខែនេះ។ ដោយឡែកកីឡាការិនីជប៉ុនដែលធ្លាប់ឈ្នះពាន Grand Slam បួនលើក Naomi Osaka បានធ្លាក់ត្រឹមជុំដំបូងប៉ុណ្ណោះក្រោមស្នាដៃកីឡាការិនីចិន Zhang Shuai ៦-៤ និង ៧-៥។ នេះជាបរាជ័យទី៦ ក្នុងចំណោម ៨ប្រកួតចុងក្រោយសំរាប់ Naomi Osaka៕អត្ថបទ៖នាង សុភាវុធ