នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាភ្លាត់ចាញ់សិង្ហបុរីនៅនាទីទីចុងក្រោយ ក្នុងជំនួបបើកឆាកពានរង្វាន់បាល់​ទាត់តំបន់​អាស៊ី​អាគ្នេយ៍ ​(ASEAN Hyundai Cup 2026)
វ័យ ៤០ ឆ្នាំ Luka Modric បន្តកិច្ចសន្យាថ្មីជាមួយ AC Milan មួយឆ្នាំទៀត
Arsenal នាំយកខ្សែប្រយុទ្ធក្រិក Christos Tzolis ពី Club Brugge ក្នុងតម្លៃ ៣៤ លានផោន
មន្រ្តីជាន់ខ្ពស់ក្រសួងអប់រំ៖ ការប្រកួតកីឡាជាតិ-កីឡាជាតិជនពិការ ត្រូវរៀបចំតាមលំនាំហ្គេមស្តង់ដា លើប្រភេទកីឡានីមួយៗ

ព័ត៌មានកីឡា

Pro Esports រំពឹងខ្ពស់ក្នុងការប្រជែងជើងឯក MPL ខណៈ Vigor ចង់ជួបគ្នាម្ដងទៀត នៅវគ្គផ្ដាច់ព្រ័ត្រ

2026/05/15 11:40:10 pm        361
Facebook Telegram Linkin
ក្រុមកីឡាអេឡិចត្រូនិក Pro Esports នៅតែរក្សាភាពខ្លាំងរបស់ខ្លួន ក្នុងការប្រកួត MPL Cambodia រដូវកាលទី១០ បន្ទាប់ពីយកឈ្នះក្រុម Vigor Apex ដោយលទ្ធផល ៣-២ ក្នុងវគ្គពាក់កណ្ដាលផ្ដាច់ព្រ័ត្រ-Upper Bracket ស្របពេលក្រុម Galaxy Legends បានវាយបកឈ្នះក្រុមការពារជើងឯក CFU Gaming គួរឲ្យភ្ញាក់ផ្អើល ក្នុងលទ្ធផល ៣-២ នៅវគ្គដូចគ្នា នៅថ្ងៃទី១៤ ខែឧសភា ឆ្នាំ២០២៦។តាមរយៈជ័យជម្នះដ៏តានតឹង ដើម្បីរក្សាកំណត់ត្រាមិនទាន់ស្គាល់ចាញ់នេះដែរ បានធ្វើឲ្យសមាជិកក្រុម Pro Esports បានដាក់ក្ដីរំពឹងកាន់តែខ្ពស់ ក្នុងដំណើរឆ្ពោះទៅប្រជែងជើងឯកព្រឹត្តិការណ៍ដ៏ធំប្រចាំឆ្នាំនេះ។ នេះបើតាមការលើកឡើងរបស់កីឡាករ សេង រ៉ូហ្សា និង ឡេង គីមហាក់ ក្រោយរួមចំណែកជួយក្រុមវាយបកឈ្នះក្រុមកំពុងឡើងដៃ Vigor Apex ៣-២។កីឡាករទាំងពីរ បានលើកឡើងស្រដៀងគ្នា ពីកំហុស ដែលផ្ដល់ឱកាសឲ្យ Vigor Apex តដៃឈ្នះបាន ២វគ្គ តែយ៉ាងណាពួកគេ នៅតែជឿជាក់លើស្មារតីក្រុម និងព្យាយាមបន្ថែមនូវអ្វីដែលថ្មី ដើម្បីត្រៀមការប្រកួតបន្ទាប់ឲ្យកាន់តែរន្ថើន ទោះត្រូវជួបក្រុមណាក៏ដោយ។ ជាមួយការឈានទៅវគ្គ Upper Bracket Final នេះ ពួកគេបានដាក់ក្ដីរំពឹងយ៉ាងហោច ៨២% ថា Pro Esports នឹងក្លាយជាជើងឯក MPL រដូវកាលនេះ។ទន្ទឹមជាមួយគ្នា សមាជិកក្រុម Vigor Apex កីឡាករ ទី ឧត្តម បានសម្ដែងការសោកស្ដាយ ចំពោះកំហុសបន្ដិចបន្ដួច នាំឲ្យក្រុមខ្លួនភ្លាត់ចាញ់ Pro Esports តែយ៉ាងណាពួកគេនឹងព្យាយាមសិក្សាពីកំហុក ពង្រឹងក្រុមឲ្យបានខ្លាំងនៅវគ្គ Lower Bracket ដើម្បីមានឱកាសឡើងវគ្គបន្ដ ហើយបើអាចពួកគេចង់ជួប Pro Esports ម្ដងទៀត ដើម្បីសងសឹកជាថ្មី នៅវគ្គផ្ដាច់ព្រ័ត្រតែម្ដង។សម្រាប់កម្មវិធីប្រកួតបន្ទាប់ ក្រុមដែលទទួលបានជ័យជម្នះក្នុងវគ្គពាក់កណ្ដាលផ្ដាច់ព្រ័ត្រ-Upper Bracket នឹងត្រូវជួបគ្នា នៅវគ្គផ្ដាច់ព្រ័ត្រ-Upper Bracket ពោលគឺក្រុម Pro Esports ត្រូវជួបក្រុម Galaxy Legends នៅថ្ងៃទី១៥ ខែឧសភានេះ ដើម្បីស្វែងរកក្រុមឈ្នះឡើងឈរចាំនៅវគ្គ Grand Final ឬវគ្គផ្ដាច់ព្រ័ត្រ ខណៈក្រុមចាញ់ ត្រូវឈរចាំជួបបេក្ខភាពទទួលបានជ័យជម្នះពីវគ្គពាក់កណ្ដាលផ្ដាច់ព្រ័ត្រ-Lower Bracket រវាងក្រុម Vigor Apex និងក្រុម CFU Gaming នៅវគ្គផ្ដាច់ព្រ័ត្រ-Lower Bracket ហើយក្រុមដែលឈ្នះវគ្គនេះ នឹងត្រូវឡើងជួបក្រុមឈ្នះ រវាង Pro Esports និង Galaxy Legends ដើម្បីក្លាយជាជើងឯក MPL Cambodia រដូវកាលទី១០ តែម្ដង ដែលការប្រកួតផ្ដាច់ព្រ័ត្រ គ្រោងនឹងធ្វើនាថ្ងៃទី១៧ ខែឧសភាចុងសប្ដាហ៍នេះ៕ អត្ថបទ លី ឈុនឡា

តើភ្នំពេញក្រោន ឬអង្គរថាយហ្គឺរ ក្លាយជាជើងឯករងលីគកំពូលកម្ពុជា រដូវកាលនេះ?

2026/05/15 10:20:09 pm        360
Facebook Telegram Linkin
លីគកំពូលកម្ពុជា រដូវកាលឆ្នាំ២០២៥/២៦ បានឈានដល់ការប្រកួតសប្ដាហ៍ចុងក្រោយ នាថ្ងៃទី១៦-១៧ ខែឧសភាចុងសប្ដាហ៍នេះ ជាមួយការប្រកួតដ៏ទាក់ទាញ ដែលអ្នកគាំទ្រកំពុងចាប់អារម្មណ៍ ចំពោះឱកាសក្លាយជាជើងឯករង ដើម្បីមានសិទ្ធលេងពានរង្វាន់អន្ដរជាតិ រវាងក្លិបភ្នំពេញក្រោន និងអង្គរថាយហ្គឺរ បន្ទាប់ពីព្រះខ័នរាជស្វាយរៀង បានគ្រងជើងឯកជាផ្លូវការ។សម្រាប់កម្មវិធីប្រកួតកាត់សេចក្ដី ដើម្បីកំណត់ជោគវាសនាក្រុមចំណាត់ថ្នាក់លេខ២ រដូវកាលនេះ នឹងធ្វើឡើងនៅថ្ងៃទី១៧ ខែឧសភា ដោយភ្នំពេញក្រោន ត្រូវជួបព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ និងអង្គរថាយហ្គឺរ ជួបក្រុមភ្ញៀវណាហ្គាវើលដ៏ នៅកីឡដ្ឋានអាគីហ៊ីរ៉ូកាតូ ។ ដំណាលគ្នា ក្រុមបឹងកេត ក៏ត្រូវជួបក្រុម អឹមអូអាយ កំពង់ដេវ៉ា នៅថ្ងៃអាទិត្យផងដែរ។បច្ចុប្បន្នភ្នំពេញក្រោន និងអង្គរថាយហ្គឺរ មាន ៥៣ពិន្ទុ ស្មើគ្នា តែដោយសារលក្ខខណ្ឌ Heat to Head ភ្នំពេញក្រោន បានឈរលេខ២ តែតំណែងនេះ មិនទាន់ផ្លូវការនោះទេ ដ្បិតត្រូវចាំអ៊ុតលទ្ធផលការប្រកួតចុងក្រោយ នាចុងសប្ដាហ៍នេះ ដោយក្រុមទាំងពីរ សុទ្ធតែត្រូវការជ័យជម្នះ ដើម្បីប្រជែងជើងឯករង ពិសេសភ្នំពេញក្រោន តែករណីបើពួកគេភ្លាត់ចាញ់ ឱកាសមាសនេះ នឹងធ្លាក់ទៅអង្គរថាយហ្គឺរ ដោយត្រូវការត្រឹមស្មើណាហ្គាវើលដ៏ប៉ុណ្ណោះ តែបើភ្នំពេញក្រោនស្មើ នោះអង្គរថាយហ្គឺរ ត្រូវការឈ្នះដាច់ខាត ទើបអាចឡើងឈរលេខ២។ករណីដោយឡែកមួយទៀត ប្រសិនបើភ្នំពេញក្រោន និងអង្គរថាយហ្គឺរ បរាជ័យដូចគ្នា ហើយក្លិបបឹងកេត ទទួលបានជ័យជម្នះ លើ អឹមអូអាយ កំពង់ដេវ៉ា ក៏នឹងធ្វើឲ្យកៅអីលេខ២ ប្រែប្រួលផងដែរ មានន័យថា បឹងកេត នឹងកើនដល់ ៥៣ពិន្ទុ ស្មើក្រុមទាំងពីរ តែផ្អែកលើលក្ខខណ្ឌ Heat to Head ពួកគេនៅតែឈរលេខ៤ ហើយទាញភ្នំពេញក្រោន ធ្លាក់មកឈរលេខ៣ និងរុញអង្គរថាយហ្គឺរ ទៅឈរលេខ២ ។ នេះគឺជាអ្វីដែលជំនួប Top-6 សប្ដាហ៍ចុងក្រោយ ធ្វើឲ្យអ្នកគាំទ្រមានការចាប់អារម្មណ៍ និងតាមដានជាខ្លាំង។ក្រឡេកទៅចាប់អារម្មណ៍ការប្រកួតបញ្ចប់រដូវកាល រវាងបេក្ខភាពក្រុមខាងក្រោមទាំង ៥ វិញ វិសាខា ដែលធានាកៅអីលេខ៧ នឹងត្រូវជួបក្រុមគិរីវង់សុខសែនជ័យ ស្របពេលក្រុមកងយោធពលខេមរភូមិន្ទ ត្រូវជួបម្ចាស់ផ្ទះ ISI ដង្កោសែនជ័យ នៅថ្ងៃទី១៦ ខែឧសភាស្អែកនេះ ។ រីឯក្រុម ឡាយហ្វខេត្តព្រះសីហនុ គឺបានអស់ការប្រកួតមុនគេ ដោយឈរចំណាត់ថ្នាក់លេខ១០ ជាផ្លូវការ ក្រោយរកបាន ២០ពិន្ទុ លើក្រុម ISI ដង្កោសែនជ័យ ដែលឈរបាតតារាង មាន ១៥ពិន្ទុប៉ុណ្ណោះ៕ អត្ថបទ លី ឈុនឡា

Alfonso Eulalio ឡើងនាំមុខគេរួមក្រោយ ៥ ដំណាក់កាលព្រឹត្តិការណ៍ប្រណាំងកង់ Giro d’Italia

2026/05/14 11:14:45 pm        163
Facebook Telegram Linkin
កីឡាករប្រណាំងកង់ព័រទុយហ្គាល់ Afonso Eulalio បានឡើងកាន់កាប់តារាងរួមនៃព្រឹត្តិការណ៍ប្រណាំងកង់កម្រិត Grand Tour ប្រចាំឆ្នាំ Giro d’Italia បន្ទាប់ពីបញ្ចប់ដំណាក់កាលទី៥ ទោះបីជាគេត្រូវកីឡាករអេស្ប៉ាញ Igor Arrieta ដណ្ដើមជ័យជម្នះនៅវិនាទីចុងក្រោយក៏ដោយ។ក្នុងដំណាក់កាលដែលមានភ្លៀងធ្លាក់ខ្លាំង និងផ្លូវរអិលខ្លាំងលើចម្ងាយផ្លូវ ២០៣ គីឡូម៉ែត្រ Alfonso Eulalio មកពីក្រុម Bahrain Victorious បានតាមទាន់អ្នកនាំមុខ Igor Arrieta របស់ក្រុម UAE Team Emirates-XRG នៅជិតកំពូលភ្នំ Montagna Grande di Viggiano។ ប៉ុន្តែ Arrieta មិនបោះបង់ឡើយ ដោយបានព្យាយាមបង្កើនល្បឿន និងតាមទាន់ Eulalio នៅត្រង់ផ្លូវចុងក្រោយ មុនឆ្លងខ្សែព្រ័ត្រយកឈ្នះក្នុងដំណាក់កាលទី ៥ នេះ។ចំណែកកីឡាករអ៊ីតាលី Giulio Ciccone ដែលបានពាក់អាវពណ៌ផ្កាឈូកជាអ្នកនាំមុខមុនចាប់ផ្តើមដំណាក់កាលទី ៥ នេះ បានបញ្ចប់ការប្រកួតយឺតជាងអ្នកនាំមុខប្រហែល ៧ នាទី ហើយធ្លាក់ទៅលេខ៦ក្នុងតារាងរួម។បច្ចុប្បន្ន Afonso Eulalio កំពុងនាំមុខតារាងរួមដោយមានវេលាចំណេញ ២ នាទី ៥១ វិនាទី លើ Igor Arrieta ខណៈ Christian Scaroni ឈរនៅលេខ៣ តាមពីក្រោយជិត ៤ វិនាទី។ សម្រាប់ដំណាក់កាលទី ៦ ថ្ងៃព្រហស្បតិ៍នេះមានចម្ងាយផ្លូវ ១៤២ គីឡូម៉ែត្រចេញពី Paestum ទៅ Naples៕ អត្ថបទ៖នាង សុភាវុធ

កីឡដ្ឋានបាល់ទាត់នៅក្រុង Philadelphia បង្ហាញស្មៅកូនកាត់ត្រៀមទទួលការប្រកួតបាល់ទាត់ពិភពលោក

2026/05/14 10:20:23 pm        379
Facebook Telegram Linkin
ទីក្រុង Philadelphia រដ្ឋ Pennsylvania សហរដ្ឋអាមេរិក បានចាប់ផ្តើមការកែប្រែចុងក្រោយលើកីឡដ្ឋាន Lincoln Financial Field ដើម្បីត្រៀមធ្វើម្ចាស់ផ្ទះព្រឹត្តិការណ៍ FIFA World Cup 2026។ កីឡដ្ឋានដែលជាទឹកដីរបស់ក្រុមបាល់ឱប០អាមេរិក Philadelphia Eagles កំពុងទទួលការកែប្រែទាំងផ្នែកបច្ចេកទេស និងការតុបតែងស្តង់ដារថ្មី ដើម្បីឆ្លើយតបទៅនឹងលក្ខខណ្ឌរបស់ FIFA។ចំណុចសំខាន់នៃការកែប្រែនេះ គឺការដំឡើងស្មៅប្រភេទកូនកាត់ (Hybrid) ទំនើបថ្មី ដែលផ្សំឡើងពីស្មៅ Kentucky Bluegrass និងសរសៃសិប្បនិម្មិត ដើម្បីបង្កើនភាពរឹងមាំ និងអាចទ្រាំទ្រការប្រកួតកម្រិតខ្ពស់បាន។ លោក Tony Leonard អនុប្រធានផ្នែកគ្រប់គ្រងទីលានរបស់ Philadelphia Eagles បានឲ្យដឹងថា ប្រព័ន្ធស្មៅនេះត្រូវបានសាកល្បងរួចមកហើយក្នុងការប្រកួត Club World Cup ដើម្បីធានាគុណភាពសម្រាប់ព្រឹត្តិការណ៍ធំ។ក្រៅពីការកែប្រែទីលាន FIFA ក៏បានអនុវត្តគោលការណ៍ “Clean Site” ដែលតម្រូវឲ្យដកចេញនូវស្លាកសញ្ញាពាណិជ្ជកម្ម និងអត្តសញ្ញាណ NFL ទាំងអស់ ដោយជំនួសវិញដោយការតុបតែង និងម៉ាកសញ្ញាផ្លូវការរបស់ World Cup។ លោក Frank Gumienny ប្រធានរៀបចំការប្រកួត Philly Soccer 2026 បានបញ្ជាក់ថា កីឡដ្ឋានកំពុងចូលទៅក្នុងដំណាក់កាល “Exclusive Window” ដែល FIFA នឹងគ្រប់គ្រងប្រតិបត្តិការទាំងស្រុង។អ្នករៀបចំក៏មានទំនុកចិត្តថា ហេដ្ឋារចនាសម្ព័ន្ធទំនើប និងបទពិសោធន៍ទស្សនាកីឡានៅ Lincoln Financial Field នឹងអាចទាក់ទាញ បំពេញចិត្តអ្នកគាំទ្របាល់ទាត់ពីជុំវិញពិភពលោក។ លោកស្រី Meg Kane អគ្គនាយក Philadelphia Soccer 2026 បានលើកឡើងថា បរិយាកាសនៃកីឡដ្ឋានដែលតែងតែទទួលបានការវាយតម្លៃខ្ពស់សម្រាប់កីឡាបាល់ឱបអាមេរិក នឹងអាចបម្លែងទៅជាបទពិសោធន៍ដ៏អស្ចារ្យសម្រាប់អ្នកស្នេហាបាល់ទាត់ផងដែរ។Philadelphia គឺទីក្រុងមួយក្នុងចំណោមទីក្រុងម្ចាស់ផ្ទះទាំង ១៦ នៅសហរដ្ឋអាមេរិក ម៉ិកស៊ិក និងកាណាដាដែលត្រូវទទួលការប្រកួតបាល់ទាត់ពិភពលោក FIFA World Cup 2026៕ អត្ថបទ៖នាង សុភាវុធ

ជិះកង់ភ្នំពេញ-សៀមរាប ដើម្បីកុមារកម្ពុជា លើកទី៣ នឹងមកដល់នាចុងខែឧសភានេះ

2026/05/14 08:33:51 pm        190
Facebook Telegram Linkin
សហព័ន្ធកីឡាទោចក្រយានកម្ពុជា នឹងរៀបចំកម្មវិធីជិះកង់ដើម្បីកុមារ ជាលើកទី៣ ដោយចេញដំណើរពីរាជធានីភ្នំពេញ ឆ្ពោះទៅខេត្តសៀមរាប លើចម្ងាយផ្លូវ ៣១២គីឡូម៉ែត្រ នាថ្ងៃទី៣០ ខែឧសភា ឆ្នាំ២០២៦ ខាងមុខ កៀគរមូលនិធីជួយដល់មន្ទីរពេទ្យកុមារអង្គរ នៅខេត្តសៀមរាប។លោក នូ ចំរើន អគ្គលេខាធិការសហព័ន្ធ បានឲ្យដឹងថា ការជិះកង់ដើម្បីកុមារកម្ពុជា ឆ្នាំនេះ ក៏មិនខុសពីឆ្នាំមុនដែរ ដោយក្បួនកង់ នឹងត្រូវចេញដំណើរពីរាជធានីភ្នំពេញ រហូតដល់មន្ទីរពេទ្យកុមារអង្គរ ខេត្តសៀមរាប ដោយគ្រោងចំណាយពេល ១០ម៉ោង ។ បច្ចុប្បន្នមានអ្នកចុះឈ្មោះចូលរួម ១២០នាក់ ទាំងជាតិ និងអន្ដរជាតិជិត ១០ប្រទេស រួមទាំងអ្នកចូលរួមជិះអមដំណើរតាមបណ្ដារាជធានី-ខេត្តត្រូវឆ្លងកាត់ទៀត អាចមានអ្នកចូលរួមប្រមាណ ៤០០នាក់។ចំពោះគោលបំណង នៃការរៀបចំឆ្នាំនេះ ផ្ដោតសំខាន់លើការកៀគរមូលនិធិសប្បុរសធម៌ជួយដល់មន្ទីរពេទ្យកុមារអង្គរ ហើយក៏ជាវេទិកា ដើម្បីអបអរសាទរទិវាកុមារអន្ដរជាតិ ១-មិថុនា និងអបអរសាទរទិវាជិះកង់ពិភពលោក ៣-មិថុនា ដែលជាថ្ងៃកំណើតនៃកីឡាទោចក្រយាន ។ បន្ថែមលើនេះ លោកសង្ឃឹមថា ព្រឹត្តិការណ៍នេះ ក៏ជាផ្នែកមួយ ដើម្បីរួមចំណែកលើកកម្ពស់ និងផ្សព្វផ្សាយវិស័យទេសចរណ៍ ពិសេសនៅខេត្តសៀមរាបផ្ទាល់តែម្ដង។ដូច្នេះតាមរយៈព្រឹត្តិការណ៍កីឡា ផ្សារភ្ជាប់កម្មវិធីសប្បុរសធម៌នេះ លោកបានអំពាវនាវដល់បណ្ដាក្រុមហ៊ុន វិស័យឯកជន និងសប្បុរសជននានា ចូលរួមឧបត្ថម្ភគាំទ្រ ទាំងសម្ភារ និងថវិកា ដើម្បីផ្ដល់ក្ដីសង្ឃឹមដល់កុមារកម្ពុជា ក៏ដូចជារួមចំណែកលើកកម្ពស់ការអភិវឌ្ឍវិស័យកីឡាជិះកង់នៅកម្ពុជាផងដែរ។គួរដឹងថា ក្រោយសហព័ន្ធកីឡាទោចក្រយានកម្ពុជា បានប្រកាសរៀបចំកម្មវិធីជិះកង់ដើម្បីកុមារកម្ពុជា លើកទី៣ ពីភ្នំពេញ ទៅខេត្តសៀមរាប គេឃើញមានកីឡាករ-កីឡាការិនីជាតិ និងអន្ដរជាតិ បានចុះឈ្មោះចូលរួមជាបន្ដបន្ទាប់ ហើយក៏មានសប្បុរសជនជាច្រើន បានចូលរួមបរិច្ចាគថវិកា ជាមួយមូលនិធិសហព័ន្ធ ដើម្បីជួយដល់មន្ទីរពេទ្យកុមារអង្គរផងដែរ៕ អត្ថបទ លី ឈុនឡា

ប្រជាជនអ៊ីរ៉ង់ជួបជុំនៅរដ្ឋធានីតេហេរ៉ង់ជូនដំណើរក្រុមជម្រើសជាតិទៅ World Cup នៅទឹកដីអាមេរិក

2026/05/14 08:12:27 pm        637
Facebook Telegram Linkin
ប្រជាពលរដ្ឋអ៊ីរ៉ង់ជាច្រើនបានប្រមូលផ្តុំគ្នានៅរដ្ឋធានីតេហេរ៉ង់ កាលពីថ្ងៃពុធដើម្បីជូនដំណើរក្រុមបាល់ទាត់ជម្រើសជាតិអ៊ីរ៉ង់ មុនពេលធ្វើដំណើរចូលរួមការប្រកួតបាល់ទាត់ពិភពលោក FIFA World Cup ខណៈកំពុងប្រឈមមុខនឹងភាពតានតឹងបន្តជាមួយសហរដ្ឋអាមេរិក និងមិនទាន់មានកិច្ចព្រមព្រៀងណាមួយត្រូវបានសម្រេចនៅឡើយ។មុនពេលចេញដំណើរ ប្រធានាធិបតីអ៊ីរ៉ង់ លោក Masoud Pezeshkian បានជួបសំណេះសំណាលជាមួយក្រុមកីឡាករ ដោយថតរូបអនុស្សាវរីយ៍ និងផ្លាស់ប្តូរពាក្យសម្ដីលើកទឹកចិត្តជាមួយកីឡាករ និងមន្ត្រីសហព័ន្ធបាល់ទាត់ រួមទាំងប្រធានសហព័ន្ធលោក Mehdi Taj ផងដែរ។លោក Mehdi Taj បានថ្លែងថា វត្តមានរបស់ក្រុមជម្រើសជាតិបង្ហាញពីអារម្មណ៍ និងស្មារតីរួមរបស់ប្រជាជាតិអ៊ីរ៉ង់ក្នុងអំឡុងពេលមានវិបត្តិ។ លោកបានរៀបរាប់ថា ក្រុមជម្រើសជាតិអ៊ីរ៉ង់ គឺជាក្រុមបាល់ទាត់របស់ប្រជាជាតិដែលកំពុងស្ថិតក្នុងស្ថានភាពសង្គ្រាម ហើយនេះបង្ហាញថា កីឡាកររបស់អ៊ីរ៉ង់នៅតែឈរលើទីលាន ដើម្បីតំណាងឲ្យជាតិរបស់ខ្លួន។លោកក៏បានបន្ថែមថា ពិធីជូនដំណើរនេះមានន័យជានិមិត្តរូបដ៏សំខាន់ ដោយធ្វើឲ្យកីឡាករកាន់តែជិតស្និទ្ធជាមួយអ្នកគាំទ្រ ដែលបានចេញមកប្រមូលផ្តុំតាមដងផ្លូវក្នុងរយៈពេលប៉ុន្មានសប្ដាហ៍ចុងក្រោយនេះ។តាមកាលវិភាគ ក្រុមជម្រើសជាតិអ៊ីរ៉ង់ នឹងត្រូវប្រកួតនៅទីក្រុងម្ចាស់ផ្ទះក្នុងសហរដ្ឋអាមេរិក រួមមាន Seattle និង Los Angeles ដោយពួកគេនឹងជួបក្រុមជម្រើសជាតិបែលហ្ស៊ិក នូវែលសេឡង់ និងអេហ្ស៊ីប ក្នុងវគ្គចែកពូល៕ អត្ថបទ៖នាង សុភាវុធ

Manchester City ឈ្នះ Crystal Palace បន្តដាក់សម្ពាធលើ Arsenal ក្នុងការប្រជែងពាន Premier League

2026/05/14 07:31:06 pm        588
Facebook Telegram Linkin
Manchester City បានយកឈ្នះ Crystal Palace យ៉ាងងាយស្រួល ៣-០ ដើម្បីបន្តដាក់សម្ពាធលើក្រុមកំពូលតារាង Arsenal ក្នុងការប្រជែងពាន Premier League ខណៈការប្រកួតប្រជែងជើងឯកកំពុងធ្វើដំណើរទៅសប្ដាហ៍ចុងក្រោយដ៏តានតឹង។ក្រុមរបស់លោក Pep Guardiola បានដឹងច្បាស់ថា ប្រសិនបើពួកគេមិនអាចរកជ័យជម្នះបានទេ នោះ Arsenal អាចមានឱកាសលើកពានជាមុន ប្រសិនបើយកឈ្នះ Burnley នៅថ្ងៃចន្ទ។ ទោះយ៉ាងណា ជ័យជម្នះនេះបានធ្វើឲ្យការប្រជែងពាននៅតែបន្តយ៉ាងក្តៅគគុក។ដោយគិតគូរដល់ការប្រកួតវគ្គផ្តាច់ព្រ័ត្រ FA Cup ទល់នឹង Chelsea នៅថ្ងៃសៅរ៍ លោក Pep Guardiola បានសម្រេចចិត្តផ្លាស់ប្តូរកីឡាករចំនួន ៦ នាក់ និងទុកខ្សែប្រយុទ្ធសំខាន់ៗសម្រាកដូចជា Erling Haaland, Rayan Cherki និង Jeremy Doku។ការផ្លាស់ប្តូរច្រើននេះធ្វើឲ្យ Manchester City ចាប់ផ្តើមការប្រកួតមិនសូវល្អ ប៉ុន្តែខ្សែបម្រើ Phil Foden បានក្លាយជាអ្នកកែប្រែស្ថានការលំបាក ខណៈកីឡាករជម្រើសជាតិអង់គ្លេសរូបនេះបានបញ្ជូនបាល់ដោយកែងជើង យ៉ាងអស្ចារ្យឲ្យ Antoine Semenyo ស៊ុតបញ្ចូលទីនាំមុខ។Omar Marmoush បានបន្ថែមគ្រាប់ទីពីរ ហើយក៏ជាចំណែកនៃការបញ្ជូនរបស់ Foden ម្តងទៀត។ នៅចុងម៉ោង Savinho បានបន្ថែមគ្រាប់ទីបី ធ្វើឲ្យ Manchester City ទទួលបានជ័យជម្នះយ៉ាងល្អឥតខ្ចោះ និងបន្តសង្ឃឹមក្នុងការប្រជែងពាន Premier League រដូវកាលនេះ។ពីរប្រកួតចុងក្រោយក្នុងលីគរបស់ City នឹងត្រូវទៅផ្ទះ Bournemouth និងទទួល Aston Villa សប្តាហ៍ចុងក្រោយ ខណៈ Arsenal ទទួល Burnley និងទៅផ្ទះ Crystal Palace៕ អត្ថបទ៖នាង សុភាវុធ

កម្ពុជាត្រៀមអញ្ជើញក្លិបខ្លាំងៗជប៉ុន ចិន ឥណ្ឌូនេស៊ី និងវៀតណាម មកប្រកួតដណ្ដើម​ប្រាក់រង្វាន់​សម្ដេចបវរធិបតី ឆ្នាំ២០២៦

2026/05/14 07:11:29 pm        367
Facebook Telegram Linkin
សហព័ន្ធកីឡាបាល់ទះកម្ពុជា គ្រោងអញ្ជើញក្លិបខ្លាំងៗនៅប្រទេសជប៉ុន ចិន ឥណ្ឌូនេស៊ី និងវៀតណាម ចូលរួមការប្រកួតដណ្ដើមប្រាក់រង្វាន់សម្ដេចមហាបវរធិបតី ហ៊ុន ម៉ាណែត ឆ្នាំ២០២៦ ដែលគ្រោងរៀបចំនាខែសីហាខាងមុខ។ លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធ បានបញ្ជាក់ថា ការប្រកួតដណ្ដើមប្រាក់រង្វាន់សម្ដេចបវរធិបតី គឺជាព្រឹត្តិការណ៍ដ៏ធំកម្រិតអន្ដរជាតិ ក្រោយបញ្ចប់ព្រឹត្តិការណ៍ តេជោលីគ ហើយសហព័ន្ធនឹងអញ្ជើញក្លិបខ្លាំងៗមកប្រកួត ក្នុងក្រុមជើងឯកលីគបាល់ទះឥណ្ឌូនេស៊ី បានឯកភាពរួចហើយ គ្រាដែលសហព័ន្ធកំពុងធ្វើការជាមួយភាគីចិន ជប៉ុន និងវៀតណាម បន្ថែមទៀត ដើម្បីអញ្ជើញក្លិបមួយចំនួនមកប្រកួត។សម្រាប់រដូវកាលឆ្នាំ២០២៦ នេះដែរ សហព័ន្ធកីឡាបាល់ទះកម្ពុជា គ្រោងនឹងរៀបចំព្រឹត្តិការណ៍ជាច្រើន ដើម្បីផ្ដល់ឱកាសដល់ក្លិប និងក្រុមជម្រើសជាតិ បានអភិវឌ្ឍសមត្ថភាព និងបច្ចេកទេស ជាក់ស្ដែងចុងសប្ដាហ៍នេះ ព្រឹត្តិការណ៍ តេជោលីគ រដូវកាលទី៣ នឹងចាប់ផ្ដើមការប្រកួតជុំទី១ ដោយមានបេក្ខភាព ៨ក្រុមចូលរួម។ រីឯការប្រកួតដណ្ដើមប្រាក់រង្វាន់សម្ដេចមហាបវរធិបតី ហ៊ុន ម៉ាណែត វិញ គឺគ្រោងនឹងចាប់ផ្ដើមពីថ្ងៃទី៩ ដល់ថ្ងៃទី១៦ ខែសីហា ឆ្នាំ២០២៦ ខាងមុខ៕ អត្ថបទ លី ឈុនឡា

សម្ដេចតេជោ ហ៊ុន សែន ចាត់ទុកជាលទ្ធផលមិនអាចបន្ទោស ក្រោយ​ទស្សនា​ចប់​ជំនួប​ផ្ដាច់​ព្រ័ត្រ​រវាង​ព្រះខ័នរាជ និងKuwait SC

2026/05/14 05:43:49 pm        571
Facebook Telegram Linkin
សម្ដេចតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា មានប្រសាសន៍ថា សម្ដេច​បាន​តាម​ដាន​ និងទស្សនាការប្រកួតដល់យប់ជ្រៅ សម្រាប់ជំនួបវគ្គផ្ដាច់ព្រ័ត្រពានរង្វាន់លំដាប់ទី៣ ទ្វីប​អាស៊ី AFC Challenge League 2025/26 រវាងក្លិបព្រះខ័នរាជស្វាយរៀង ទល់នឹង​ក្រុម​ម្ចាស់​ផ្ទះ ​Al-Kuwait SC របស់រដ្ឋកូវ៉ែត កាលពីយប់រំលងអធ្រាត្រថ្ងៃទី១៣ ឈានចូលថ្ងៃទី១៤ ខែ​ឧសភា​ ឆ្នាំ២០២៦។ជំនួបដ៏តានតឹងនេះ ព្រះខ័នរាជស្វាយរៀង បានរងបរាជ័យទាំងប្រផិតប្រផើយ ៣-៤ បន្ទាប់​ពី​បើក​ការ​នាំមុ​ខ ២គ្រាប់មុន នៅវគ្គទី១ តែត្រូវម្ចាស់ផ្ទះវាយបកតាមស្មើម្ដងជាពីរដង ក្នុងម៉ោងធម្មតា ៩០​នាទី ​និងម៉ោងបន្ថែម ១៥នាទី ២ដង រហូតរកបានគ្រាប់ទី៤ នាំមុខលើក្រុម​ជើង​ឯក​លីគ​កំពូល​កម្ពុជា​វិញ នៅនាទី១១០ ដោយកីឡាករ Al-Sulaiman ដែលជួយឲ្យក្រុម Kuwait SC ​ក្លាយ​ជា​ជើង​ឯកតែម្ដង។ជុំវិញលទ្ធផលនេះដែរ សម្ដេចតេជោ ហ៊ុន សែន មានប្រសាសន៍ បន្ទាប់ពីបានតាម​ដាន​ទស្សនា​កាត់​ស្បៃ​រាត្រី ​ដូចប្រជាពលរដ្ឋជាច្រើនដែលថា លទ្ធផលនេះ មិនអាចបន្ទោសបានទេ ព្រោះ​បាល់​មូល​ ខណៈស​ម្តេចបានសង្កេតឃើញក្រុមព្រះខ័នរាជស្វាយរៀង បានខិតខំប្រឹងប្រែង និង​ធ្វើ​បាន​ល្អ ​ពិសេសនៅវគ្គទី១ តែប៉ុន្មាននាទីដំបូង មានជ័យជំនះរកបាន ២គ្រាប់ភ្លាមៗ ប៉ុន្តែក្រោយ​មក​ក្រុម​កូវ៉ែត​ក៏បានតាមវិញ។សូមបញ្ជាក់ថា ប្រសាសន៍របស់សម្តេចតេជោ ហ៊ុន សែន បានធ្វើឡើងក្នុងឱកាស​សម្ដេច​បាន​អញ្ជើញ​ជួប​សំណេះសំ​ណាលជាមួយសមាជិក សមាជិកាក្រុមប្រឹក្សាខេត្ត ក្រុង-ស្រុក ឃុំ-សង្កាត់ និង​មន្ត្រីនៃមន្ទីរ-អង្គភាពនានាជុំវិញខេត្តស្វាយរៀង នៅព្រឹកថ្ងៃទី១៤ ខែឧសភា ឆ្នាំ២០២៤ នេះ នៅ​ខេត្តស្វាយរៀង៕ អត្ថបទ លី ឈុនឡា 

សិប្បករប្រេស៊ីលផលិតពាន World Cup ចម្លងជាង ៣០០០ គ្រឿងសង្ឃឹមថាប្រេស៊ីលនឹងនាំយកពានពិតមកផ្ទះ

2026/05/13 10:16:18 pm        243
Facebook Telegram Linkin
សិប្បករជនជាតិប្រេស៊ីលលោក Jarbas Meneghini បានផលិតពានចម្លង FIFA World Cup ជាង ៣,០០០ គ្រឿង ដើម្បីជួយលើកទឹកចិត្តអ្នកគាំទ្រប្រេស៊ីលក្នុងក្តីសង្ឃឹមថា ក្រុមសាំបានឹងអាចនាំយកពានមាសពិតត្រឡប់មកវិញពីទ្វីបអាមេរិកខាងជើង។បុរសវ័យ ៥៨ ឆ្នាំរូបនេះ បាននិយាយថា គំនិតបង្កើតពានចម្លងនេះ កើតឡើងតាំងពីឆ្នាំ ១៩៩៤ នៅពេលដែលលោកបានឃើញ Dunga ប្រធានក្រុមប្រេស៊ីលលើកពាន World Cup បន្ទាប់ពីឈ្នះការប្រកួតនៅសហរដ្ឋអាមេរិក។«ខ្ញុំបានឃើញ Dunga កាន់ពាន ហើយគិតថាចង់ទិញមួយ ប៉ុន្តែខ្ញុំរកមិនឃើញកន្លែងលក់ទេ។ ដូច្នេះ ខ្ញុំសម្រេចចិត្តផលិតវាដោយខ្លួនឯង ដោយប្រើជំនាញធ្វើលោហៈដែលខ្ញុំបានរៀន»។បច្ចុប្បន្ន លោកផលិតពានចម្លងពីជ័រប្លាស្ទ័រដោយដៃ និងនាំចេញទៅកាន់ ១៧ ប្រទេសទូទាំងទ្វីបអាមេរិក និងអឺរ៉ុប។ ពានខ្លះត្រូវបានលាបពណ៌មាស ខណៈពានខ្លះទៀតត្រូវបានប៉ូលាបែបក្រូម៉េភ្លឺចាំង។សិប្បកររូបនេះធ្វើការនៅក្បែរកីឡដ្ឋានប្រវត្តិសាស្រ្ត Maracanã ដែលជាកីឡដ្ឋានដ៏ល្បីល្បាញរបស់ប្រេស៊ីល ហើយលោកក៏លក់ពានទាំងនេះដល់ភ្ញៀវទេសចរ និងអ្នកគាំទ្របាល់ទាត់ផងដែរ។«ខ្ញុំផលិតពានរាប់ពាន់ពីគំរូតែមួយ។ ខ្លះត្រូវបានលាបពណ៌ ខណៈខ្លះទៀតខ្ញុំធ្វើឱ្យពិសេសជាង ដោយក្រូម៉េធ្វើឱ្យវាភ្លឺចាំង និងអាចឃើញរូបខ្លួនឯងពេលថើបពាន»។ការផលិតពានចម្លងកើនឡើងរៀងរាល់បួនឆ្នាំម្តងនៃព្រឹត្តិការណ៍ World Cup ដោយសារក្តីសង្ឃឹមរបស់អ្នកគាំទ្រប្រេស៊ីលកាន់តែខ្លាំងឡើង។ ទោះបីជាប្រេស៊ីលជាក្រុមដែលឈ្នះ World Cup ច្រើនជាងគេក្នុងប្រវត្តិសាស្ត្រ មាន ៥ លើកក៏ដោយ ប៉ុន្តែពួកគេមិនទាន់លើកពាននេះម្តងទៀតឡើយ ចាប់តាំងពីឆ្នាំ ២០០២។សម្រាប់ការប្រកួតឆ្នាំ ២០២៦ ដែលរៀបចំនៅអាមេរិក ម៉ិកស៊ិក និងកាណាដាលោក Meneghini បានផលិតពានចម្លងរួចហើយចំនួន ៦០០ គ្រឿង ដែលជាចំនួនខ្ពស់ជាងមុនយ៉ាងច្រើន បើប្រៀបធៀបនឹង ១០០ ទៅ ២០០ គ្រឿងដែលលោកធ្លាប់ផលិតមុន World Cup កន្លងមក៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

គណបក្សប្រជាជនកម្ពុជាខេត្តកំពង់ស្ពឺ ប្រជុំបូកសរុបលទ្ធផលការងារខែកក្កដា ឆ្នាំ២០២៦ និងលើកទិសដៅភារកិច្ចខែបន្ទាប់
07/25/2026 05:07 PM
Facebook Telegram Linkin
ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER
07/25/2026 05:07 PM
Facebook Telegram Linkin
ការ​លាលែងពីតំណែងរបស់​រដ្ឋមន្ត្រីអប់រំឥណ្ឌា គឺ​ជាជ័យជម្នះដ៏ធំ សម្រាប់ក្រុមបាតុករយុវជន
07/25/2026 05:07 PM
Facebook Telegram Linkin
លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨
07/25/2026 05:07 PM
Facebook Telegram Linkin
មនុស្សយ៉ាង​តិច ៥នាក់ស្លាប់ ក្នុងហេតុការណ៍​បាក់ដី នៅភាគខាងជើងចិន
07/25/2026 05:07 PM
Facebook Telegram Linkin
ម៉ិកស៊ិកនឹងមិន​តប​ត​ពន្ធរបស់លោក Trump ទេ ខណៈ​​ការនាំចេញត្រូវបានការពារដោយ​កិច្ចព្រមព្រៀងពាណិជ្ជកម្ម
07/25/2026 05:07 PM
Facebook Telegram Linkin
កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យ​រាជរដ្ឋាភិបាល រកឃើញអ្នកទទួលបានជ័យលាភីហើយ
07/25/2026 05:07 PM
Facebook Telegram Linkin
ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹង​បញ្ហា​រុស្ស៊ី
07/25/2026 05:07 PM
Facebook Telegram Linkin
មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ
07/25/2026 05:07 PM
Facebook Telegram Linkin
ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោក​ជិត​ដល់
07/25/2026 03:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.